Thutiam 6

THUTIAM - 6

Ziaktu: Toni Râlte

(Adds kha aw.. $100 a tling ţêp tawh ania.. Ţang ang 😘

"Mate, Lawmsanga kha i bialpa tiraw? " Remsanga'n a tih chuan a lai deuh a. Mahse, naupangchhia a ni tawh lo bawk a, "Aw, a fel tiraw" a ti ve mai a. 

"Umm ka ngainat zawng tak a ni. A puitling khawpin ka hria. Khawi vengah nge an awm? Eng ang chhungkua nge? " tiin a nau chu a zawt zui a. 

Nguri chuan an veng hming bakah Lawmsanga chu nupui uiresan niin fapa a neih thu a sawi nghal a. A eizawnna pawh a sawi bawk. A nu a rawn luh vangin a ngawi ta a. 

"Khaw nge i thiante kha.. An haw ta law? " a ti a. 

A bu nghat ringawt. 

"A that chu.. An awm ve reng kha a tulna a awm hran lo. A inthlahrunawm mai mai. Nang pawh kar khat vel han awm la, phei leh mai rawh, i zirna a laklawh sia" a nu chuan a ti mawlh mawlh a. 

"Nia.. A tha lawm" a ti ringawt. A nu hi a ngaina lo hran lo, mahse, a tet lai chhung zawnga ngaihsaktu zawk chu a pa a ni tlat. A nuin a hauh leh a vuak chang pawha thinrim taka a thlavang hauhsak thintu pawh a pa a ni. A nu hi nu sual tak chu a ni bik lo, mi zaidam a ni lo va. A tawngkam reng reng hi bak hlak chi, vin hlar chi a ni. A rilru chu a chhe hran lo niin Nguri pawh hian a hria. Mahse, a hranpa taka inbiaka inkawm hi an nei khât khawp a, a pa damsam loh chang hian a rawn call ve zeuh tih loh chu a duh leh mamawh pawh a pa nen vek an sawi dun thin. Chuvang chuan a pa thihna pawh hi a tuar lo thei lo a ni. 

"Nguri chu Aizawlah pasal i neih hmel sia, a tha.. Chhungkhat tak tak kan nei lo va, eng emaw chang pawn thlenna tur hi a vâng ve sia" A u nupui Achawii chuan a ti sar sar a. A nu meng râng deuh chu haider luiin, "Chu chiah.. I duh hun hunah i lo zin thei ang a" Nguri chuan nui chungin a ti ve a. 

"Pa te thih sarhu laia chutiangte sawi.. Inzahpuiawm mah mah" a nu chuan a lo ti leh hlar a. Achawii nen inmelh ralh ralh chungin an ngawi zui ta a. 

Becky an thlah hnuah an in lam an pan zui nghal a. Zep thu a cheng lo, long run a tlan khat tawh a, a chau ve angreng. Zuala pawh an inah a tlang nghal a. Lawmthu te chu a hrilh ve nel nual kha.. Ani pawh a inbual fai zawhah chaw tlem barin a mu nghal daih. A chaw ei laiin a nu mu tawh a rawn tho a. Chanchinte a zawt ve luam a. An kal dawn khan a nu bulah a hrilh ve thuak thuak kha a nia. Han inhrilh chian vakna hman awm hek lo le.. 

"Mama, in inthenna a la rei si lo va, tlemin mi mitmei veng ve deuh la aw.. Amah i bialnu ka duh loh lam ni lo vin, mi hi an ţawng duh thin si a" a nu Pi Remi chuan a ti charh charh a. 

"Umm, nia ka hria alawm. Mahse, Nu, ani Ruthi pawn mi mitmei a veng bik lo va. Ka zah em em chhan tur ka hre lo " a ti ve mai a. Pi Remi pawn sawi zui vak tur a hre bik lo. 

Khumah a mu chiah tihin Nguri number a hmet chhuak nghal a, a call zui chat. 

"Um, in thleng tluang em? " a rawn ti nghal vat a. 

"Tluang e, chaw ka ei kham chiah.. Khawhar inleng an bang tawh mi? " a ti a. 

"Bang ve deuh chiah, in riak ho an lo kal tan.. " 

"Khaw nge i riah ang? "

"Ka u te inah a niang. Ka u in riak mai rawh a tia" a ti a. 

"Nia, a tha, khawhar inriak te an awm dawn sia, fimkhur a tha. I chau em? Chaw i ei tha em? " ngaihtuah zetin a ti a. 

"Umm zanin chu ka ei ve teuh mai. E chuan, tlaiah ka u nen i chanchin kan sawi a" a ti sar sar a. 

"Engtin.. Min hua em? " dilchhut zetin a ti nghal a. 

"Teuh lo mai. A fak tawp che. Ka u hian ka bialpa te hi a duh uluk thei tawp a, nang chu a sawisel ve miah lo che" zangkhai tak hian a rawn ti a. Lawmsanga pawh a khi suk mai. A hlimawm ve bawk alawm le.. 

"Nih chu, ka van lawm.. Chuan, engtia rei nge i awm ang? Ka ngai nghal der che" a ti sup sup a. 

"Ka nuin 'kar khat vel awm la, i zirna a laklawh sia, phei leh nghal mai rawh' min tia. Ih, apa thihcham ka hmang ang a, a tukah chuan ka lo phei thei mai ang" a rawn ti a. 

"Hmm.. Kum khat vel aiin a rei dawn nih chu, mahse, a tul bawk sia tiraw.. " Lawmsanga chuan a ti chuai raih a. Thil dang neuh neuhte sawi lehin an chau dun ve bawk nen, an inmang tha ta a. Lawmsanga pawh phone khawih zawm lo vin a ngaihtuahna kawmin a chhing ta vang vang a. 

"Paa.. Apa, a nu a lo kal a" a harh chiang ngang mai. Dar 8 a lo ri ţêp tawh a. A lo mutui hle a lo ni. A inperh tho nghal at. 

"I nu a lo kal a maw? " a fapa bulah chuan a ti hâ a. A lo bu nghat. A fapa kai chung chuan room atang chuan an chhuak a. Chokaah chuan Ruthi ngei mai chu hmel phelh phang leh dawldang zet hian a lo thu ngui bâr a. Melh pawh a lo melh tha ngam lo. A nu erawh chuan a lo be siam siam thung. Lawmsanga chuan hmai pawh phih hma hmain, "He tah eng nge i rawn tih? " a ti hriam hraih a. 

"Ka fapa hmu tur hian chanvo ka nei ve alawm" a lo ti ve khauh a. 

"Ani chu ka ta a ni. I ta ni lovin" Lawmsanga awki a sang lek lek. Pi Remi chuan dik dawna a hriat loh vangin Bawihtea chu a kai vat a, roomah a luhpui ta a. 

"Lawmsang, i duh tawkin min hauin kut pawh min thlak rawh. Mahse, ka fapa a ni tih erawh a hrereng tur a ni" Ruthi chuan a ti lui ve tlat. Tin, Lawmsanga zaidamzia leh hmeichhia kutthlak a hrehzia a hre tawh a, a nu leh pa hmaizah vang hrim hrim pawn engtinmah a ti dawn lo tih hrethiam turin a hrechiang hman ve tlat! 

"Aw ni e, ka fapa hringtunu chu i ni ngei e. Mahse, khami ni atang khan a nu i nihna leh ka nupui i nihna chu nang hian i tibo tawh. Uirenu thisen a ni tih hriattir ai chuan a nu a thi tawh tih hrilh ka thlang zawk e" Lawmsanga chuan a ti hmiah mai. Ruthi pawh a hrilhhai letling. Chuti em ema Lawmsanga khauh leh luhlul chu pal daih leh palzam ngawt chi niin a hre lo.. 

Lawmsanga pa, Pu Sawma pawh a rawn haw a. Ruthi leh Lawmsanga lo inmelh râng dun chu melh vung vung chungin, "In inbakkaih deuh em ni? Ruthi, ka inah eng nge i rawn tih? " a ti ta mai a. 

"Ka pa, ka fapa ka hmu ve thei lo em ni? Eng thil pawh ti ila ka fapa a nihna a bo lo asin" a ti tak deuh deuh a. Lawmsanga thinin a diar ta lo, "Ruthi, zing zu i rui a nih kha.. I rim te kha.. Ih maw, ka fapa hmuh hi i duh takzet a nih chuan khatianga ţawp kha chuan lo kal tawh suh. Pangngai taka min dawr chuan misual tak ka ni bik lo a nia. Tunah chuan khawngaihin min chhuahsan phawt teh" a ti ta mai a. Pi Remi rawn chhuak vein Ruthi chu a kuah chhuak a, "A sawi ang khan ti mai rawh. A thinrim i tawngbaw palh ang.. Ni dangah pangngai takin i lo kal leh zawk dawn nia" a ti dam thlap a.. Ani hi zawng nu zaidam leh lainatna ngah tak kha a ni miau a. Ruthi pawh eng han sawina kaw tawh hek lo le.. Hrilhhai zetin a chhuak ta hnak hnak a. Lawmsanga a insehruh ţeuh mai. 

Tukthuan an kil laiin Bawihtea kham hnuah a pa chuan, "Rawn lawr vak lo se ka duh a nia. I nu pawh hi lawm.. Lo be lumlam vak suh se" tiin an nu chu a melh a. Pi Remi chuan, "Ngawi teh, a hmel ka hmuh khan ka lainat deuh tlat mai a.. ka be lo thei lo a ni" a lo ti ve mai a. Nu ţha ta ngang hi a nia, a awm ve tho mai. A pa pawn eng a sawi zui lo. Lawmsanga u chiah mipa chuan, "Engawhnise, A nu a nihna chu a bo dawn chuang lo va, mahse, khawih tamtir loh erawh a tha. A nu tur ngaihtuah vat a ngai a nih hi" tiin a nau chu a melh a. Lawmsanga ú tho hmeichhia chuan, "Nia, bawihtea hian thinlung taka nu anga a la pawm theih lai hian ngaihtuah a tha.. Mi sawi danah buai vak a ngai lo" a lo ti ve bawk a. 

Pi Remi chuan, "A hmu daih tawh. Hnahthial lam product a nia" a lo ti ve zauh a. An chhungkaw tihdan ve reng a nia, han infiam leh titi ho hi an nunphung pangngai a ni. An inpawhna thatzia lanna a ni mai. 

"B. Ed hi zo se, kan nei mai dawn em niang? " a pa pawh chuan a lo ti ve khauh a. A pa hi chu a hranpa takin a hrilh lo naa a nuin engkim a hrilh tawh tih a hai lo. 

"Ka hre lo le.. A pa a boral ta sia, a nu te lam hian an ui ve viau chu ka ring, pathlawi ka lo ni ve bawk sia" Lawmsanga chuan a ti a. A ú chiah Jerry chuan, "Kan ru hmiah dawn nia" a lo ti sur sur a. An han nui leh rih.. Lawmsanga ippik ţeuh pawh a thawl ve hawk mai. 

Becky call lo kal chu a kut huh chung chuan a la a, "Aw, Beck" a ti var a. 

"Mate, ka ngai che" a rawn ti ţap ţiau mai. A ngaihna a hre lo viau. 

"Eng nge thleng? " a ti a. 

A chil a lem khalh hnuah, "Lalţanpuia bawk mawle.. Rempuii hian min rawn khei vak vak zel hi ka ngei em vangin, 'i bialnu kha thunun ve deuh rawh, nang nen biak pawh kan inbe ngai tawh lo va, hetia min rawn ti chhen hi ka ning a nia' ka tia.. Chu chu, "I thiam loh aniang chu.. Nangman i ti hmasa aniang' min ti a nih chu! Ka rilru a na lutuk" a ti bawrh bawrh a. 

Nguri a thaw hawk. Becky hian Tpa vanga a natna kha a la tuar chhuak miah lo tih a hria. A khawngaih a, tunah chuan tihsak theih a nei rih bik si lo. 

"A va ti ang lo ve, ka lo hau ve dawn nia, khanglang a.. Rempuii pawh chu ka lo bia ang" a ti hlak hlak a. 

"Awiii a rapthlak sia maw.. Kei chu ka hlau tawh. Groupah pawh sawn engmah ka sawi ngam tawh lo. Min rawn kalh nghal zar zar zel bawk si" a rawn ti a. Becky hi a kum ang aia nem leh derthawng a ni ve bawk nen, Nguri chu huaisar lamah a pha lo hrat. 

"Lungngai miah suh. Ka rawn che dawn nia.. Hei vawiin chu thlan nghah ni a nia, thlan lamah ka kal ve ang. Awm ve la tha tur" tiin topic dang a sawi a. 

"Chu chu lawm. Ka lo cham ve daih lo va ka tia.. Mahse, practice teaching hi a ngaihpawimawhawm ve bawk sia.. Min hrethiam rawh aw. Lawmsanga nen in inbe tawh em? " a tih zawm ve zat a. Rei mawi tak an inbiak hnuah an dah ve ta chauh. Becky pawh a hlim ve leh ta deuh e. Amah aia naupang zawk Nguri chu tluk lo hlein a inhria.. A chhelna te, a luhlulna te chu a ngaisang. A pa a chân erawh a khawngaih takzet a ni. 

"Nguri, hei i pa Zova fapa Aldrina kha a nih hi.. I la hria em? " a nuin a tih chuan a mi sawipa lam chu a va melh a, Aldrina te nen chuan an tleirawl chhuah hlimin an inkawm ve thin. A pa leh Aldrina pa te hi thawk ho leh unau ang deuhthawa inngai an ni ve a, an in bul quarter an rawn luah bawk nen, an tleirawl lai kha chuan inkawm nasa thei tak an ni. A lo danglam ve tawh hle mai. A smart zaih mai a, a lu meh dan pawh a zahawm khep khep khawp mai. A tleirawl lai pawh khan zuk leh hmuam engmah ti ngai lo, ruihhloa fihlim, khawtlangin an fak leh nu leh pa ten an fate entawn atana an duh leh sawi thin kha a ni ve bawk a. 

"Ehe! Ka hai dawn che lawm le.. I va'n danglam tawh em em" Nguri chuan a ti hlut a. Aldrina pawh chu a nui var var a, "Kei pawn ka hai tho che. I lo lian tawh lutuk a, mahse, i hmel chu i la paih vak lo" a lo ti ve bawk a. Tunah chuan Aldrin te hi Aizawl Zotlangah awm tawhin Pastor a zir mek a ni. A pa thih thu an hriat khan rawn kal nghal an tum naa, Pa Zova'n a kawng a herh leh ta si, Aldrina ringawt han kaltir kha an hreh deuh nge, a thlan nghah niah Pa Zova pawh thei leh thei loin a rawn lang thei hram a ni. An zahawm khawp mai. Nguri nu Pi Sangi chuan, "An fel pafa a nia, I pa Zova pawn a hmu chak ang che. Va hmu rawh u" a lo ti zung zung a. Pa Zova ú te inah an innghat a lo nia. Nguri pawh chuan Aldrin chu îhe lovin a zui ve ta vat a. A nu chu muk taka inngaihtuah chungin an pahnih chuan a thlir dun reng tih a hre hauh lo thung. 

Pa Zova'n Nguri a hmu chu a lungte a chhe lek lek mai. Pu Zaia khan Nguri a atchilhzia leh duatzia kha a hai bik lo va, a thianpa a ngai thar viau ni tur a ni. 

"Pasal nei rual zet i ni ve ta mai a.. Ngurbawih, i U Aldrina nen hian innei mai ta che u.. Ani hi zawng zawnsak a ngai a nih hi" a lo ti luam a. Aldrina chuan zak hmel a pu deuh, Nguri erawh a nui hawk hawk a. 

"I la phawk reng a ni maw? I van ngaihawm tak" tiin a banbulah a chum taih taih a. A pa Zova pawh hi a pa ang maia a ngainat kha a ni ve hrim hrim a. A pa a ngaih pawh a zual phah reng a ni. Rei mawi tawk an inkawm hnuah Aldrin nen bawk chuan thlan siamna lama kal turin an inzui chhuak ve ta nghal a. Nguri chuan an tleirawl laia an infiamna leh an lenhona te lo danglam tawh si chu a kawhhmuh zauh zauh a. 

"Aizawlah i awm tih hriata lo kan thin tur che ania. Ka pa te pawh min hrilh nachang an hre lo, an â lutuk a" Aldrina chuan a ti a. 

" a.. Buai te a na ve a. An hre seng bik lo aniang. AICS-a i awm hlan khan ka pa nen chuan in inah chuan kan lo kal tawh alawm" Nguri chuan a ti a. 

Thlan mual an thleng a, a siam pawh an thahnem angreng e. Nguri hi an khuaah a awm tam lo bawk a, an kohhran lo phei chu a hriat an tam lo khawp mai. A haw chang lahin a tuallim lo chi, tawm deuh chawt chi a lo ni bawk nen. Thian tha tia sawi tur pawh a nei vak lo reng a ni. A thiannu ve ber Venpuii lahin Tuipui D lamah pasal a nei daih tawh bawk si a, a mal ve ngâwk mai. Aldrin nen chuan nilengin an inzui tihtheih a ni. Lawmsanga nen an intext zeuh zeuh bawk. A khawhar zualpui leh a lungngaihna te hnem tura Aldrin lo awm chu a lawm hle. 

"Min van reply har thei" Lawmsanga msg a hmuh chuan a khi sak a. 

"Ka lo buai ve leh lawk thin a. Phone khawih reng a nuam bik lo nen" a ti ve mai a. Zanriah eikhamah an inbia a. 

"Ka pa thianpa te pafa an lo kal ve hlauh a, Aldrin hi kan tleirawl laia ka kawm ve thin ber a nia, Pastor zir mek, a fel sia, min hnem thei lutuk, ka lawm tak tak a ni. " a ti siam siam a. 

Lawmsanga a ngawi ta hmuk mai. 

"Lawmsang, Hello" Nguri chuan a ti lâng lâng a. 

"Umm ka hria" a rawn ti nghut. 

"I dah daih maw ka ti hman a. Vawiin lam te i hlawh tha em? " a ti a. 

"Tha lo"

"Ngati nge? I thinrim mi? " Nguri chuan a ti hâ a. 

"Kan intiamna i bawhchhia.. Nguri, ka dah e aw" tih leh dah a rual nghal. Nguri hrilhhaizia chu! A hrethiam ve nghal mai. A hui pap a. A chhing vang vang. Ni e, Lawmsanga khan mipa dang kawm a phal hlek lo a nih kha. A lo hrechang tawh lo, a pa a sún nat sarhu laia kawm tur thian a nei chu a lawmpui a lo beisei zawk kha a nia. Mahse, Lawmsanga ngaihdan tumlum tak chu a sawhsawn thei miah si lo. Tih dan tur a ván hle. Aldrin lah a lo lut ve leh tawh bawk si. Chaw eina vel an tihfel hnuah an in lam panin an inzui chho leh ta hnak hnak a. 

"Ngur, i va ngawichawi ve.. An hau che mi? "Aldrin chuan a ti a. 

Nui lui chungin, "Aih, chutiang a awm lo. Ka ngaihtuahna ka lo kawm nasa deuh a ni" a ti ve mai a. An in an thleng a, an ngawi ta a. Thalai an zai ţhat ţhat chhung te chuan Nguri chuan eng dang mah a ngaihtuah thei lo. Lawmsanga bak a thinlungah tumah an leng lo. A pa a ngaihna pawh a luahlan vek thei mawle.. Phone han khawih zut zut kha mawiin a hre bawk si lo. A thaw a ipik kher mai. Aldrin erawh a zai tuiin a maimichhing duar duar a, a nun chu a nawm hmel bik hle. 

Mi pakhat erawh a vei tuak sek a, a thinlunga mawlhtu chuan puahkeh chakin a tur ut ut a ni ber. Tukverhah te a va dak leh ringawt thin. Cigaratte lah bawm khat a zu zo thak tawh. Thinrim ni si lo, rilru nâ tia chhal theih ni chiah bawk si lo natna chuan a tuam vel mek a ni. Ni e, a nunhluia ser hnutchhiah a nih tawh avangin a ta ni tawh hmeichhia chu tu mipa mahin an khawih leh an kawm a phal lo bur a ni tawp. Mi rilru zim a ni hran lo, a awm ve lai chuan biain kawm rawh se, a hrethiam. A hmuh phak loha an pahnih chauha an inzui tur a mitthla phei chuan a kut a hum sek a, a mitmeng a tak ran mai bawk. Lawmsanga phur hi a rit takzet a ni. Tleirawl lai atanga inkawm tawh phei chu a mipa khan a lo hmelduh thei, Nguri'n thian angin kawm mah se; a mipa rilru a hre ve si lo. Chutak chu a buaina a ni. 

Chokaah kalin fridge a hawng a, tuivawt a in khawlh khawlh. A mitmeng leh hmel landan chu a hringtunu tan haider theih ni hek lo le.. 

"Eng nge thleng a? " a lo ti ta chiah a. 

"Eng ni lo ve" a ti satliah a. A nu erawh chuan a awih lo tih a chiang reng mai. 

"In inhau em ni? " a ti leh a. 

"Hau chiah lo. Mipa thian a nei a" a ti ta a. A nu chuan a fapa thil lo tawn tawh nen a hmehbel nghal chat. 

"Bawiha, thiante chu thian an nia lawm.. A pa a sún lungngaih laia hnem theitu chu an hlu hle zawk.. Khatiang ngaihtuahna kha nei suh.. Nangmah i inhrem mai mai" a ti seuh seuh a. Lawmsanga chuan dik a ti lo pawh a ni lo, amah chuan a pawm thei tlat si lo a ni. 

"Ka tha mai ang, min ngaihtuah suh" tiin a nu chu a kalsan a. 

A phone a khawih chuan, "Ka tihpalh.. I awm si lo va, ka khawhar hnem theitu an awm chu i lo lawm zawk ka rin vang a nia. Ka kawm tawh lo vang" tih thu hi Nguri hnen atangin a dawng. A ner sak a. "Khawhar hnem maw? " a hriat phak lekin a ti sup. 

Video a en ta daih a. A rilru zawng zawng erawh a pe thei der lo.. Mapuia'n a lo call teh mial a. Chu te chuan a lung a tizîng zual. Mapuia lah chuan, "Nguri pa kha a boral a.. A haw daih alawm.. Ka khawngaih reuh tawp. Kal ve pawh a tha a nia, ka hre tlai lutuk a" a rawn ti chhar chhar. Engkim hrilh law law mai tur em ni ang aw tih a ngaihtuah laiin a dah leh ta mai bawk sia, thudik hi engtikah tak hrechhuak ang maw?! 

A msg chhan loha awm ngât chu a melh leh thin. Lawmsanga chu online pawh a online lo. A call tawp mai dawn mawni le tih te a ngaihtuah a. A ngam chiah bawk si lo. A thinrim hmel bawk si nen.. Awm nuam lo ru takin a mu meng kar ringawt. Aldrin msg a lo lut a. 

"Thil hrilh tur che ka nei a" tih hi.. 

"Sawi la"

"Mak ti suh aw" a ti te te a. 

"Nge sawi vat zawk teh" 

Chutah Aldrin chuan, "Ka duh che a" tih thu a rawn thawn ta a. Nguri a hnual nghal rawih. Ngaihzawng ena a en loh lutuk vang te pawh a ni mahna le.. Unaupa ang deuhthawin a en miau si a. 

" A van mak! " a ti ve ringawt. 

"Nia, dik tak chuan kan tleirawl lai atang tawh khan a nia.. Ka sawi ngam ngai lo va" a la ti zui.. Nguri a buai hle. 

"Bialpa ka nei a" a ti ta tawl a. 

"Ka ring sa hrim hrim a. Engpawhnise, in inthen hun ka lo nghak ang e" a la ti lehzel. Zahawm a ti ngawt mai. Lawmsanga lah a ngawi ngat ngat mai bawk si. Lungtum a ni.. Lungtum.. 

(Vawiinah ka mood zawng zawng a bo vek a. Ka whatsapp data a bo vek avangin. Hei hi ka tihtheih tawk a ni rih e. Sorry..