Thutiam 5/

THUTIAM - 5

Ziaktu: Toni Râlte

Nguri chu a za deuh sek a ni ber. Lecture pawh a ngaithla mang lo. Vawiin chu an class-aj Joela a rawn lut lo hlauh. Mahse, a rawn text thung. 

"Bialpa i va nei rorum ve" tih thu chu. Engkim a hre ve vek tawh tih Nguri chuan a hai lo. Ni e, Thanpuii khan Lawmsanga chhuah rualin a call nghal a, "Tenawmpa, ramsa i nih kha. I lo tenawm dan lutuk hi aw.. Mualpho i duh loh chuan Ngurnunsangi nen in video kha delete nghal ang che. I nupui hian khaw hawi ngaihna ka hre tawh lo. A chiang em? " a zuk ti deuh sak sak a. Joela a lo hamhaih thung. Tu nge Nguri bialpa chu ni ta ang tih a ngaihtuah daih! Chutiang khawpa a bialnu hlui thlavang hauh ngamtu mipa chu mipa satliah a ni lo vang tih a ring thiam mai. 

Nguri'n, "Rorum tak a nia sin. Hlau hle rawh" tia a rawn reply ngam ve zel danah te chuan hlauhthawnna a nei lian ve telh telh mai. Tin, Joela hi eizawngtu zawk mah nise, Thanpuii hian thunun theihna riau a nei ve tlat. A chhan pawh Joela hi a nu leh pate inthen hnuah a pa bulah awmin nuhrawn hnuaia seilian a ni a. A pa lah zu ngawlvei ni bawk nen, an dinhmun a harsa ve hle thin. A han tlangval chhuak a, Thanpuii nen hian intawngin, Thanpuii te hi khawsa thei leh mi lian ve tak an ni bawk a. Thanpuii hian a duh ve bawk aniang, MA an zawh hnuah ani Thanpuii chuan zirna zawm tawh lo vin hna a zawng nghal a. Joela erawh M. Ed tal neih ve a duh si vangin inhlawh chawp takmeuhin B. Ed a zir ve leh a. Thanpuii hian an khawsak harsat ve zia hrethiamin, a pa bulah Joela chungchang chu a sawi a. Fanu duat tih takah a thusawi chuan ngaihpawimawh a hlawh lo thei lo. Joela leh Thanpuii te chu inzui reng leh inngheng reng an lo ni bawk nen, nau a han pai zui ve mai bawk a. Chu chu remchangah hmangin an innei zui a, Joela nuhrawn nen an inngeih dawn loh vang nge an ruahman lawk sa vang phei chu a hriat loh.. Thla khat erh awrh Joela te ina an awm hnuah Thanpuii pa te in hnuai luahin an indang a. Hetih lai hian Joela chuan B. Ed a la zir kal reng tho a ni. Thanpuii hlawh beitham tak chu inchawm zawhna tham ni hek lo, Thanpuii pa chuan sum fai thahnem takin Joela chu a pui ta a. A zirna senso zawng zawng a tumsak bakah an nupa pawh chu a chawm a ni deuh ber e. Fa pakhat an neih hnuah an indang char char a. Joela chuan tumruh taka zir ve zelin M. Ed pawh chu tha takin a pass ve ta a. A thiamna a ril bawk a, AISE-ah chuan contract anga lut nghalin, Multi mode lamah an chhawr a. Hun a kal zel a, M. Phil te han bei lehin Ph. D a tih dawn kumah a nghetin a thawk zui ta nghal a ni. Hetiang tehnuai an nih vang hian Joela chuan Thanpuii chu ngam lohna riau a nei ve tlat a, han lerhsan ziai ziai thin mah se; thlak tumna erawh a nei ngai bik lo. 

Hetia a lerh pawh hi amah pawh hian a chhan fak sawi tur a hre chuang lo. Thanpuii a chuai emaw a danglam tak viau lam ai mahin, a ngai reng ninna vang leh amah Joela a lo chhe loin duh dertu an lo awm ve nuk nen. A insum zo ta bik lo a ni maithei. Thanpuii lah a duh tawh lohna lamah chuan a nasa ve bawk si a, inbakkaih chang an ngah thin khawp mai. Mahse, heti chung hian Thanpuii pawh hian chhuahsan tumna a nei bik lo nge a ngaidam thei nge an la cheng dun reng ang lawi a! An nu dawhtheihna hian a la siamtha ve êm ang chu maw.. 

"Banah inbe lawk ang" Joela msg bawk chu. Nguri a ner sak a. Mahse, a hmaa a hlauhna te kha an kiam duak tawh vangin inbiak pawh chu pawi a ti hran lo. 

"A tha lawm" a ti ve mai a. Banah Joela lo nghahna hmun lam a pan ding nghal. Tun tum chu an hostel lamah a tlanpui a. A thlah nghal dawn a ni maithei. 

"Tu nge? " Joela chuan a ti zawi sup a. 

"I hriat ve kher a tulin ka hre lo" a lo ti hmak. 

"A fawng vuantu ka la ni tho tih theihnghilh suh. Pawisak nei miah lo va Video hi ka thehdarh a nih chuan nang leh kei hi kan mualpho ang a, chu chu pawi ka ti lo maithei ania" Joela chuan a ti sak sak a. Nguri chhungril chu hlauhthawnnain a tuam nghal. Mahse, a langah chuan, "Ti rawh. Mualpho hi ka hlau hran hleinem.. Mualpho mah ila, ka bialpa hian min pawm dawn tho" cho zetin a ti ve ta hmiah a. Melh erawh a melh chiang ngam lo. 

Joela rilru pawh a buai ve nak mai. Nguri confi ta lutuk chuan a tihlauthawng ve vek alawm. 

"Zan khat chauh hun min hmanpui la, damchhungin ka tibuai leh tawh lo vang che" a ti dam dup a. 

"Nupui i nei alawm.. A hmangaih bawk che a. Pakhatah duhtawk ve tawh rawh" a lo ti nem ve thlap. An inveh tawn dan chu pawn lamah alh hlup lo mah se; chhungrilah chuan ţang ţha at at tak a ni. 

"I bialpa pawh chu ka hmu ve duh" a la ti zui! 

"In la inhmu ngei ang ka ring" hahdam hmel zet hian a lo ti ve a. 

Hostel an thlen chuan a ding ve mai a. A chhuk hma si chuan, "Zaninah emaw naktuk zanah emaw kan inhmu ang" Joela chuan a ti nghet charh a. A tumruh hmel kher mai. 

"Kan en ang chu" a lo ti duh lek a. A chhuksan ta a. 

A inbual a, helhhawlh ang hian a awm. Lawmsanga hmel mitthla ngar ngar chungin a inbual zo a, a inthlak laiin a rawn call ta chiah. Lak vat a hreh ve deuh a, an nghak ren rawn a. Muangchangin a chhang ta a. 

"Zanin chu aw.. Dar engzatah nge ka rawn lam ang che" a rawn ti a. 

"Ka hre lo le.. " a ti ringawt. 

"Dar 6-ah aw. Riak chhuak tur nghalin" a rawn ti leh hmiah. Lawmsanga duhdan zawm loh chu a hreh tlat tawh. Hmeichhe awlsam tak angin hria pawh nise pawi tihna a nei tawh lo. Joela tihbuai nih reng ai chuan. 

"Aw le" a ti ban charh a. An dah ta a. Becky pawh a riak chhuak ve dawn tho va, a zia. A cousin a lo zin a, chuvang a lo ni. Thawmhnaw a thlak zing dup mai. Engmah chu mawipui leh Lawmsanga mit la phak niin a ngai hleithei lo. A inhai hnawk ngang mai. Lawmsanga mizia a chhut vang vang hnuin a tawpa tawpah a simple thei ang ber, mawi ve tho si chuan a inthuam ta tawp. Ni e, Lawmsanga hian dress a care berin a ring lo. A chhan chu mipa lerh leh mit râwp tak a ni lo miau a. A hmai vel pawh a hnawih nasa lo. Natural takin a chei ve tawp. Dar 6 rik nan 5 mins a la awm tihin a rawn call leh a, a rawn chhuah dawn mek thu a rawn sawi. Mapuia text a la hmu zui. Nuam a ti vak lo hle. 

"Vawiinah nangmah ang deuh ka hmu a. Ka rawn ngai tawp che" tih a ni. Lawmsanga hian engmah a la hrilh lo a ni ngei ang. A tan pawh a harsa ve hlein a rinawm. A best friend a ni ve tlat si a.. Dar 6 a pel hlek tihin a rawn thleng a, bike a rawn keng thung. An bolero kha a pain a hmang si a. Heritage lamah an tlan ta vang vang a. An thlen veleh cabin an book nghal. Eitur pawh an order zui a. Room-ah an ei thei dawn bawk a, room-a ei mai an duh zawk. 

Nguri chu a ţawng meuh lo, a zak nge a lai deuh tlat pek a. Tun hi Lawmsanga nen hmun fianriala an inhmuh leh hmasakna ber a ni bawk nen. Lawmsanga erawh a awmdan a danglam vak lem lo. Khuma thu Nguri chu rawn melhin, "Joela nen in inbia em? " a ti ta a. 

Nguri chuan an inbiak dan vel chu a sawi mawlh mawlh a. Hlauhthawnna eng emaw tak a la neih thu a belh tel zauh. 

Lawmsanga a khi suk a. "Ka ta hi chu hauh ve thei tîk têk tak ka nia, a tawp thleng ka ţang ţhin. Ka kut atang hi chuan a ru chhuak mai mai lo vang che. Hlau duh suh" a ti nghet charh a. Nguri awm nawm lohna pawh a kiam nghal duak. Eitur an rawn dah a. Dawhkan kilin inhmatawnin an ei dun a. Lawmsanga chuan a ruckshack va dap ruk rukin, blenders a va phawrh a. 

"I duh ve em? " a ti a. Nguri rilru a buai deuh. Zu nena inchiahpiah tawh loh hram hi a duh a ni. A hmaa a lo chetchhiatna leh tun thlenga a awm tinuam lotu zingah zu hi a tel ve tlat si a. 

"Ka ti lo zawk mai ang. Buaina ka thlen leh palh ang" a ti sap a. Lawmsanga chuan ngawi rengin ama in tur a siam nghal. Lungawi lo hmel a pu lem lo bawk. Chaw pawh an ei tam phian mai. Eitur an rawn sengfel zawhah sofaah thu dunin an inngheng chial a. Lawmsanga pawh chuan zu chu a in belh tawh rih lo. Rui hmel a pu lo bawk. 

"Mapuia kha i la hrilh lo mi? " Nguri chuan a ti a. Rilru a kap ve tlat si a. 

A ngawi vang vang a, "He lai tak hi ka tan a harsa khawp mai. Ka thianpa bum hi ka duh lo a, tihnat ka duh bawk si lo. Hrilh dan turah ka buai mek" tiin a lo chhang a. 

"Nia, ka hrethiam.. A nih Mapuia hi ka nihpui mai dawn mi niang? " fiamthu titih hian a ti sar sar a. Rawn melh hrãwk chungin, "A teuh lo" a lo ti hlur mai. Nguri chu a nui tat tat a. 

"A hrethiam ve mai ang. Mi rilru tha a nia, kan nunhlui ka sawi chuan a pawm thiam ka beisei khawp mai" Lawmsanga chuan a ti leh a. 

Chutah rawn ngheng hnai salhin Nguri sam chu a rawn zutsak delh delh a. "Thil pakhat min tiam ta che" a ti dam thlup a. 

"Sawi la"

"Keimah lo mipa bulah awm tawh suh" a ti riap mai. Nguri a thaw hak. 

"Ţhiante pawh maw? " a ti ha a. 

"Umm thiante pawh.. Mipa an nih chuan ka thîk vek. Mipa thian nei lo pawn i damkhawchhuak thei tho ang, kei hi i thian leh bialpa ka ni tawh mai" a ti leh hmiah. Nguri nuihza deuh, a rilru taka lawm tho si chu a khi sak a. 

"Mipa ka kawm vak lo hrim hrim.. A nih chuan nang pawn hmeichhia kawm bik lo la" a ti ve a. 

"Hmeichhe thian ka nei ngai bik lo. Mahse, ka eizawnna i hria a, ka phur lo thei lo" a lo ti a

. 

"I phurh pawn be suh" a lo ti ve hmak. Inhrethiam tawn zetin an inmelh a, an nui dun sak. Lawmsanga rawn kun hniamin a rawn fawp ta a. A tirah a dim mah mah, 2mins velah erawh a keih deuh bawrh bawrh tawh. Ni, an lo inup rei tawh a, khami zana an tihhlawhtlin hman tak loh sulhnu an hriatreng si khan an chhungrilah a la ţham reng a. Chu chu a rawn puakkeh tih loh theih a ni lo. Engtik laiin nge Lawmsanga chuan khumah Nguri a pawm phei tih pawh Nguri chuan a hre mang lo. Hetiang reng renga a taksa tidanglama nawmna pe theitu mipa hi mihring a nih a ring lo hial zawk. Lawmsanga tak pawh chu a khur der der thei, he hmeichhia hi a ta a nih kumkhua tir loh chuan ngaihngam taka khawvel a hman theih a ring lo.. A vawi khatna chu an zo rang khawp mai. Nguri chu bathroomah lut nghalin a va insil nghal sawk sawk a. Lawmsanga erawh cigaratte zuin chunglam a melh vung vung, a hmela lungawina chu hmuh theih khawpin a langsar a ni. Nupui uiresan a nih atanga a hlim ber hun a la ni hial awm e. Nguri a rawn mut leh hnu chuan Lawmsanga awmah a bei tlan a, "Rai la ka ti" Lawmsanga chuan a lo ti nghut. 

"Ka period zo vel chiah a, ka rai ka ring lo" a ti ve mai a. 

"Tak taka zirlai nih laia rai chu a tha lo. I thianten an hmusit palh ang che" a lo ti tha ve leh mai. 

Joela chungchang te, Mapuia chanchin te engmah a leng lo. Lawmsanga a tawng a, Nguri'n a ngaithla a. Nguri thusawi a lo ngaithla bawk a. An pahnih khawvel chu a mawi a, engmahin a chiah buai pha rih lo. Hmalam hun an sawi lo va, khami zana thil thlen teuhzia atanga tanin damdawiina an inhmuh leh thut dan te sawikaiin.. Chu chuan an taksa a rawn tidanglam nghal zel a. Lawmsanga fit lutuk pawh chu a mak reng reng, dam lo hrep pawh a ang lo hial zawk. Nguri lahin a lo dawl zo ve thei zel bawk si. 

Nguri tih dan takah, "Toni Story ziah pakhat 'Zobiaksangi' tiha Zoi leh changtupa kha kan nih duh hmel" tia a sawi te chu, Zobiaksangi thawnthu chhiar tawhte chuan a sawi awmzia an hre vek ang. Inthiam lohna an nei lo phawt chu a nia. Sex hi nupa nih hmaa hman loh tur tih lam an hrechang tawh lo, sual chuan a zêm hneh tawh a, châkna chuan a kal pel thei hlek si lo. Mahse, zan hlimawm tak zawng a ni mawlh mai. 

A tukah an inthlah haw leh a. Nguri pawh class a kal ta lo mai. A chau ve deuh bawk a ni. Zu a hnar thei kha a la lawm reng. Sex chu a virgin tawh lo a, a mipa duh ber a pe ve ah a inngai fel then a. Inchhirna a nei lo. Lawmsanga erawh a service leh avangin an inbe tam lutuk hman lo. Mapuia'n a rawn text leh zeuh zeuh tih mai loh chu.. Zanriah an ei laiin a û-in a lo call a. 

"Ngur, ka pa Damdawiinah kan chhohpui.. Eng a la ang thei lo" thlaphang zetin a rawn ti a. A chaw ei tuina a bo nghal vek. A tho nalh a. "Tunah engtin nge a awm? " a ti a. 

"Oxygen an pe a. A theih chuan rawn haw la a tha khawp ang" a rawn ti ta a. A ú tawngkam atang chuan ani naupangchhia ni tawh bik lo chuan, a pa chu a damchhuah a beisei lo niin a lang. Lungzur takin a roomah a lut a, khumah a thu chawrh. A mittui chu dan rual lohin a rawn luang nghal zawih zawih. Becky a rawn lut ve nghal. 

"Ngur, i pa ami? Engtin nge a awm? " a ti nghal siam siam a. 

"Ka hre lo" a lo ti ţiau. 

Engtin nge a hawn ang aw.. Taxi a hire mai dawn nge? A tukah sumoin a haw mai ang. Zaninah a pa chu kal ta si se, a pa damlai hmel a hmu hman dawn lo a ni awm sia. A ngaingam si lo. A inngaihtuah buai lai takin Lawmsanga'n a lo call a.. "Hello" a ti ţap ţiau a. 

Thil nih dan manthiam rang tak a bialpa chuan, "I tha em? Eng nge thleng? " a ti nghal zung zung a. A ţawng dawn chuan a hnuk a ulh zel si avangin Becky chuan phone chu chhuhsakin amah chuan Lawmsanga chu thil awm dan a hrilh ta a. 

"Lo insiam rawh se, ka lo hruai ang. Nang pawh kal ve rawh" a rawn ti nghal. Becky chuan Nguri chu a hrilh a, Nguri chu mittui kar atangin a nui a. A hlim vang a ni lo, puih a ngaihna apianga pui theitu bialpa a neih vanga a thlamuanna chuan a nuihtir mai zawk a ni. Insiam vak ngaihna pawh a hre lo. Becky zawk chuan a thawmhnaw te chu a khung sak mawlh mawlh a. Ani pawh a va insiam ve nghal. Thiantha nih a tling khawp mai. Lawmsanga chuan Becky khawhar hnem tur thian hruai tur a ngaihtuah vang vang a, Mapuia chu sawm chi niin a hre si lo. An in hnuai tlangval Zuala a sawm ta tawp a. Ani lah engmah tihtur em em nei hek lo le, Hnahthiala zin te chu a lo chak sakhai a, an insawm hlawhtling kher mai. 

Dar 8 rik hma deuhin Aizawl an chhuahsan thei ta a. Becky leh Zuala pawh an inkawm thei nghal mai. Zuala hi phawk zet mai, uang deuh rrng mai a ni bawk a. Nguri thawidam nan a pawi lo tawka rawn uan a thiam riau a, rilru rit taka awm Nguri pawh a nui a nui ve mai. Lawmsanga chu fimkhur tak siin chak ve deuh takin a tlan a, a tawng tam lem lo. Nguri chu a melh leh zeuh zeuh thin tih mai loh chu.. 

Dar 12 rik hma deuhin Nguri chu a patea'n a rawn call a. Hlauthawng takin a la a. "Bawihte, i pa chu a kal ta.. Tunah mai khan" a rawn ti ta a. A khur nghal hlawk hlawk. A phone a thlauh zui nghal a. Lawmsanga pawh a ding tawp ringawt. "Paaa… ka lo kal mek asin.. Min lo nghak ta che" a ti ţiau a. A ţap zui nghal hlawp hlawp. Lawmsanga chuan rang takin a va kuah thuai a, Lawmsanga awm ngheng chuan a ţap ta hlap hlap a. Becky lahin a lo tahpui ve bawk. 

"I duhtawkin tap phawt rawh.. Insum a ngai lo aw.. Bawihte" Lawmsanga chuan a ti dam thlup a. A hnungzang a chul pah bawk. Rei tawk fang a han inbunruah hnu chuan a tap bang ve ta a. A mit a sen râm mai. Ni e, pa chân chu a na dawn êm asin. Nguri ngat phei chu a naupang ber a ni a, a pa duat sual tia an sawi thin a ni. A pa hi pa dam thlup, fate pawh hau ngai lem lo, an duh leh mamawh an sawi chu tihhlawhtlin tum ngat ngat thin a ni a, Nguri phei hi chu, "I duh chen chen zir rawh. Ka damchhung chuan i bahlah lo vang" ti ngat thin a ni. Tin, a fanu hmu tur ringawta Aizawla zin fô te hi a tihdan a ni. Tunah pawh hian inentir paha rawn kan a tum kha a nia. Mahse, a thleng hman ta lo chu a nih hi.. 

Hnahthial lam pan chuan an tlan leh ta phawt a. Zuala pawn fiamthu thawh hun a ni rih lo tih hriain patling takin, "Nguri, a na ngawt ang. Mahse, i pa chu natna awm tawh lohnaah a awm ta ti zawngin ngaihtuah tum hram rawh aw. Engkim i chân a ni lo a nia. Nu leh unau i la nei alawm" tiin a fuih ve sauh sauh a. Lawmsanga erawh a hul viau aniang, sawi tur reng reng a hre lo. Nguri chu a khawngaih em em a ni tawp. 

Hnahthial an thlen meuh chuan a pa ruang pawh inah an lo thlenpui daih tawh a. Thalai lumentu te chu an lo zai ţhât ţhât a. Sawi tawh angin Pu Zairema hi pa zaidam leh khawtlang hruaitu, VC mai bakah YMA hruaitu te pawh lo ni ve tawh thin a ni a. Uitu leh ngaipawimawhtu an tam khawp mai. Ina leng lo khawpin thalai lam pawh an lo thu khat a ni. Nguri chu Lawmsanga rinchhan titihin a chhuk thla bauh bauh a, A lungchhiatthlak hi a ti ngawih ngawih.. Chutiang thihna chu a chungah a la thleng ve ang tih a ngaihtuah thiam ngai lo. Kawtah an upa ber mipa, nupui neia indang tawh leh a putea ten an lo dawngsawng a. A ú pawh chu a meng sen râm mai. In chhung an lut a, ruang zalhna lamah an inkuah phei.. A pa ruang dai tawh a zuk hmuh meuh chuan awmngaihna a hre ta lo. A zu bawh rawp a. 

"Paaa… ka lo haw asin.. I fanu duat ka nih kha.. Ti nge hetia i awm? " tia au tuar tuarin a ţap hlawp hlawp a. Nguri a lo thlen meuh chuan mittui lo hul deuhte pawh a rawn hnâm thar leh a, Nguri ú chiah mipa bakah chumi ú leh chiah hmeichhia pasal nei tawh te pawn an pa chu an rawn ţah ve leh. Chutah a nu a rawn rak ve leh bawk. Ţap ri hlirin in chhung chu a khat a ni ber. 

Lawmsanga te pawh chuan ruang chu an kil ve ta reng a. A ţap ve lo naa, a hmaa hmeichhia a pa sún mek vang chuan a thinlung a rum a ni. Va thawh lawka pawmbeha duat taka a awm nghentir a chak hliah hliah. Thil tha ber a ni bik si lo. Becky pawh awmhmunah a lo tap ve ngat ngat. A thiannu chu a khawngaih takzet a ni. Zing dar 4 bawr velah chuan Nguri chu a khawng ta a. Tah pawh a tap thei tawh lo, a rum a rum ringawt. An thenawm te inah an pawm phei ta ringawt a. Lawmsanga bawk chuan mipa dang khawih phal lo niawm takin a buaipui zel. A thutchilh chawt a, a hmet bawk a. Becky'n a pui bawk. Chutia an inhmeh lai chuan Nguri te upa ber kha a rawn kal a. 

"Hei, ka farnu in rawn kalpui a, kan la ni nuai sia, duh ang pawn kan la inbe thei si lo va, min lo hrethiam ngawt mai teh u.. Kei hi Nguri te upa ber Remsanga ka nia.. " tiin felfai takin a inhmelhriattir a. A pangngai hmelin a zahawm khap reuh mai. 

Lawmsanga pawh chuan an hmingte chu a lo sawi ve vat a. Remsanga pawh chu an bulah thu zuiin a nau chu a hmet ve a. Lawmsanga chu a chîk hmel kher mai. Chu chu Lawmsanga pawn a hai miah lo. 

Becky nen zawk an titi naa, a mitmeiin Lawmsanga chu a chîk reng tih a chiang. A chhe lam zawng erawh chuan a ni lo, heti taka Nguri buaipuitu chu a thian satliah a nih a rin loh vang zawk a ni. Han inzawh tawp chi ni nghal lo chuan.. Nguri pawh a rawn harh ţan a, a aw te chu a chhang vek. Lawmsanga hmel a hmuh rualin ri si lovin a tap leh nghal a. 

. "Ngur, i taksa a chau lutuk dawn. A harsa ang tih chu la hria, mahse, hei thingpui hi in la.. Chhang nen hian.. " Lawmsanga chuan a ti a. Thingpui leh a hmeh chu a pe zui a. Nguri pawh chuan thuawih takin a lo in ve mai. A ú bulah, "Ú, vawikhatmah a rawn harh tawh lo maw? " a ti a. A mit bui lâk chu a khap sak sak a. 

"Um.. Khatia a lung tha lo a chhuah khan a tlu zui nghal mai a. Kan chhohpui a, vawi khat kha chu a rawn meng.. Chu zawng chu a ni" a u chuan a lo ti a. 

"A mak em mai" Nguri chuan a ti ringawt. 

"Mate, ni e, ka pa hi hetiang hian kan thlahliam ang tih ka ngaihtuah phak ngai lo.. Mahse, engkim tan hun ruat a ni a. Pathian remruatah pawm thiam a tha.. " a ti dap dap a. Nguri erawh a ngawi reng. 

Khua a var zui ve mai bawk a. Lawmsanga te thianho pawh Remsanga te inah chaw an ei a. Remsanga nupui Achawii lah chu a lo fel em em a, a mawng a zang si, a be siam siam reng bawk a. Nguri nen pawh an inngainat hmel hle. Tukthuan erawh Nguri chuan bar hnih vel bak a bar lo. Lawmsanga mak tih deuh chu Nguri nu leh Nguri an la inbe mang lo chu a ni. Nguri nu chu ama ú te inah chaw a ei daih a. Nguri u chiah khan a zui bawk. An la buai deuh nuai a, chuvang ania tiin a ngaihtuah ringawt. 

Chhungkaw aiawhin Remsanga chuan thu a sawi a, a la upat hmel vak loh nen a patlingin tawngkam a chhep sual mang lo tihtheih a ni. Nguri erawh a pa ruang chu a kalsan thei thlawt lo. Becky'n a thutpui bawk a, Lawmsanga leh Zuala te erawh pawn lamah an thu ta daih.. Hmelhriat an awm ve vak lo nen, nuam an ti chiah lo a ni maithei. Nguri pa chu an vui liam ta chu a nia. Thlan thlengin Nguri pawn a zui ve zel. A ţap tawh miah lo thung. Chutiang chuan Ngurnunsangi pa, Pu Zairema chu khawvel atanga thlah liam a lo ni ta a ni. 

Lawmsanga te chuan ro an han rel a, awm ve reng chu engmah inthlakna mumal an keng bawk si lo nen.. Nguri chu a la awm rih a ngaih hmel si a, hawnsan mai tha an ti tlang ta a. Lawmsanga chuan a ngaihtuah viau naa, a sarhu lai chuan ani pawn engmah tihtheih a nei rih bik lo nen.. Hawnsan mai chu pawi a ti ta bik lo a ni. Nguri bula an thutlukna a sawi chuan ani pawn hrethiam takin, "Ka tibuai che u sia, ka inthlahrung.. Nia, in thu thu aw. Kei chu ka awm ve deuh rih a ngai dawn sia.. " a ti sep sep a. 

"Inenkawltha la ka duh aw. Thil i ei tha ang tih min tiam rawh" Lawmsanga chuan a ti a. 

Nguri chu a bu nghat nghat ringawt. 

"Chuan, ka ngai ngawt ang che.. I lo let dawnah lo sawi la, ka lo hruai ang che.. A tha em? " A ti zawi sup a. Mittui kar atangin Nguri chuan a rawn melh a, nui lui chungin, "Nupa ni tawh ila tiraw? " a ti ringawt. A ngai ve lutuk tih Lawmsanga chuan a hrethiam. Amah mai chu nise la chamchilh deuh pawi a ti lo, thian a nei si a, bakah Nguri pawh a inthlahrung tih a hria. 

A chhip samah a chul thuak a.. " Khawhar hmanin ka siam lo vang che. Ka hun awl neih zawng zawngah ka lo bia ang che" a ti thawp sup. 

Chawhnu dar 2-velah Lawmsanga te thian thum chuan Hnahthial chu an chhuahsan ta a. Becky pawh khan cham chu a duh, mahse, Practice teaching an neihna tur ni khat chiahin a dang tawh si a.. Nguri zawkin haw turin a nawr a ni. Lawmsanga te tlan liam lai thlir chung chuan a rum nghat a.. 

A thinlung zawng zawng a liam tel ve ni hialin a hria.. 

(Lalmifelnu ka nih hi.. Ka nuin min tir leh tawh a. Ka. Hman ta lo aw 😘😍