Thutiam 14

THUTIAM - 14

Ziaktu: Toni Râlte

Hnahthial lama a phei dawn zingah Lawmsanga pawn a va thlah ve a. Va hruai chu duh viau mah se;amah Nguri'n rem a tih chiah loh bakah inneihna velah buaipui tur neuh neuh a la awm bawk nen, an inthlah ta lo. Nguri chu sumo-in a haw ta vang vang mai. Remsanga'n a lo hmuak a, Achawii te nen an han inhmu leh chu an hlim khawp mai. Nguri pawh an rin aiin a taksa pawh a lo chhe lo va. A dul erawh a la lang hran lo. Remsanga te inah a innghat a. A nu a la insawn chhuak si lo nen. Nguri a lo haw tih a hriat rualin Pi Sangi pawh a zuk chhuk ve vat. Nguri nen an inhmachhawn ran mai. 

"Khati khawpa i tet lai pawha duat thintu che I pa Zova te chhungkaw chunga khatianga chet kha a ngai em ni? Khawngaihna i pianpui hlawl na nge? " a ti nghal bawrh bawrh a. Remsanga pawn khap a tum lo, Nguri chuan cha chhuah ve zêk se a duh vangin. 

"Engvangin nge ka tih loh ang? Nang pawh ka hremtir nghal loh che a" A lo tihsan ve hmiah. 

"Tel vena ka nei awzawng lo ve. I duh dan ang chuan i awm dawn hlek lo a nia. In pawh khi ka chhuahsan dawn reng reng lo" a la ti ngam nia! Nguri pawh a nui tawp. 

"A nih chuan ukil kan rawih a ngai dawn a nih chu. Ka pa in rim taka a thawhchhuah in chhunga i bialpa nen nuam in chen ka phal reng reng lo" a ti ve ta hmak a. 

"I pa fanu pawh ni lo hi khatin tawng liam ve mai mai suh. In khi ka ta a nih khi.. I pa nupui ka ni tih hre reng rawh" a lo ti a. 

"Kan hre zel ang chu. Lawmsanga nen pawh kan la luah duh maithei a ni.. Emaw bultan nan ka la hralh maithei bawk" ngeiawm zetin Nguri chuan a ti ve a. Pi Sangi ngeng a chhun ngei mai. Chhan vak ngaihna a hre tawh bawk si lo. 

Achawii'n a thuam chhawm tur a lo lei khawm a hmuh chuan a hmangaih zual sawt. Pasal neih lam ngaihtuah vak ngai ta lo chu a mamawh tur awm pawh amah mai chuan a hrethiam lo va, Achawiin a ngaihtuahsak ta vek mai. 

Mut hma deuhin, "U, ka tana in insenna hi a thlawn lo vang. Ruahmanna ka siam fel tawh. In khi mi ka luahtir dawn. Luah man chu in ta tur a ni e" a ti ta a. 

"Mate, u leh nau karah khatiang an sawi ngai lo. In chungchang erawh i ta a nia, i duh duh danin i ti thei. Mahse, Rinfela khi ngaihtuah chu a ngai ve ang" a u chuan a ti a. 

"Ni tak, naktukah biak a ngai a ni. Ka nu lahin a ngaihsak der si lo. Ka khawngaih ngawt mai" a ti ve a. Mu turin an pindan lam an pan ta a. 

Lawmsanga pawh ni tla van vuaiin a service a, a taksa hah mah se, a rilru a hlim tal a, a zia e. Patlinga pumpa, nu leh pa thawhchhuah ringawta nupui neih chu a duh bik lo. A tihtheih ang angah phuhruksak ve a duh a ni. Inneihna hi nupa nun hman leh fa neih ngawt hi a lo ni si lo va, hetia ngaih mai chuan duh berte nena inneih chu nuam viau tur pawh a ni ang. Mahse, mawhphurhna a lo sang tawhin, puitlin a lo ngai khawp mai a. Chutiang mawhphurhna la zo lo chu an phel leh phawk zel reng a ni. Chuvang chuan Lawmsanga pawn a nupui hmasa leh a chhungkua hre reng chungin, kehchhe thei tawh lo tura nghet chhungkaw din tumin theihtawp a chhuah mek a ni. 

"I van induh tak em.. Thian pawh kan ni thei tawh lo tihna em ni? " Rampuii msg chu a chhiar nawn sek. A msg a reply ngai lo va, a call a pick sak ngai hek lo. Derthawnna siamsak theitu chu pumpelh zel a duh rih a ni. Nguri a awm bawk si lo nen.. Mahse, chutiang em ema la ngaipawimawhtu hmeichhia, amah zawkin a lo tihnat tawh chu na leh beidawng lutuka siam loh a duh ve ta a. 

"Ka buai ve em a ni. Ka nupui neih tur velah hian. Thian chu ni thei tehlul mai" tiin a reply ve ta nge nge a. 

Chuta tang chuan pangngai takin an inbe chho leh a, pangngai han tih hian Rampuii hi chuan an nunhlui rawn sawi chhuah a ching zeuh zeuh thin, Lawmsanga hian thu dangin a chhilh zel zawk a. Dik tak chuan Rampuii hi a tlangval chhuah hlawt ngaihzawng, a duh ve ngawih ngawih thin, an chhungte ve ve pawhin harsatna an siamsak ngai loh kha a ni ve a. Nula nungchang tha leh nu zim zem tak, Kohhran leh khawtlangah pawh a langsar pawl a ni ve a. Lawmsanga zu han in ve zeuh te kha a thinrimin a hau nasa thin. Hmalam hun eng tak neia an inngaih laiin, Rampuii thianpa zek zek kha Lawmsanga'n a hmu mawh ta tlat a. Ani Rampuii lahin a thiantha ber angin a chhal tlat si a. A thlah duh bik si lo nen, chuta a lungawi lo chuan Ruthi kha a kawp chho a. Inngaihzawnna awm em em si loin zu an in ho a, eng emaw changa han ck leh zuai kha a ni mai a. Rampuii'n a lo hriat chuan a rilru a na ngang mai. Mahse, Lawmsanga luhlul laklawh tawh khan thlem leh ngaihdam dil buai tum loin a be lo zui ta mai bawk si a. Ruthi a lo rai leh ta zel bawk nen, Rampuii kehchhia chu Phai lamah a tlanchhe ta ngawt reng kha a nia. Rampuii a tihnat em vang khan Ruthi hmangin chunglamin phuba a rawn laksak ni hial ten Lawmsanga hian a ngai thin. Mahse, mak ve tak chu Ruthi a uire lai pawh khan Rampuii hi a rilruah a lang ngai miah lo. Nguri a rawn lang zui ve nghal bawk nen. Tuna a rawn haw leh tak avanga tluk chhiat chu a tum lo ve bur a ni tawp. Nguri nen an kal thui tawh em mai. 

Nguri te lam pawh inphochhuak em em lo mah se, an chhungkaw buaina bakah a pasal neih tur thute chu Hnahthial khaw mite titi ber a ni ve tho mai. Nguri chanchin, hmanni lawka rukbo a nihna titi thangva a reh fel hma hauhin tihian chanchin dang an nei leh ta si a. An tan han chhuah leh thenawmte in takngiala chuankai pawh a nuam lo. A tawm deuh ngar ngar mai. Mahse, bazar ve zeuh zeuh a ngai lo thei lo va, Achawii nen an chhuak mai zel. En a hlawhin chîk a hlawh thin a, chu chuan a rilru a tihrehawm thin. Rinfela pawh a be tawh a. A awm zel dan tur te an sawi ho tawh. Rinfela chuan Nguri in chu a la luah ang a, a pain a hnutchhiah in leh lo erawh mi dang an luahtir ta a, a luah man chu Rinfela kutah a lut dawn a ni. Pi Sangi erawh Nguri pasal neih hma geia insawn chhuak tura tih a ni ta a ni. Rinfela kuta in leh lo a dah mai bik loh chhan pawh a nu hian zahpuiawm taka a chuhpui a hlauh vang a ni. A huamhap ropui si a. 

Remsanga phone be mawlh mawlh chu a rawn lut a. An nu leh Nguri melh chungin.. "Ka nu va hruai a ngai a nih awm chu, a bialpain kut a thlak nasa lutuk an rawn tia.. Kal ang u," a ti a. An phâwk angreng hle. 

Hmanhmawh takain a nu bialpa Lalnuna in lam chu an pan ta a. An lo awm nual mai. A quarter hi a fal deuh mai pawha. A nu au ri pawh an hre zui nghal. 

"Ka duh tawh lo, min khawih tawh suh. A naaa.. A na lutuk. Min ngaidam rawh" a ti chul a. 

"Khanglang che hian.. Hmeichhe tenawm leh nasa lutuk, i duh duha kaih kual theih angah te min lo ngai a. Ka mamawh hlek lo che" Lalnuna aw ri pawh a fiak tha khawp mai. A khawih leh a ni ngei ang, an ri deuh bawp bawp mai. In chhung atangin kawngkhar a kalh tlat si a. An han chum thin.. 

"In rawn luh vaih chuan a aia nasain ka khawih ang" a ti mauh mai si. Remsanga thinin a tuar ta lo va, thenawmte hreipui a va la lawk a. A chek ta nghek nghek a. An hawng thei ta. In chhung chu a lo hnawk nuaih mai, thawmhnaw vakah pheikhawk uih hmel zet zet a inchap darh nuaih a, kawnghren te, zu um leh chawhmeh thing niawm tak te.. Zu rim lah chu a nam hum hum bawk. Kil khatah Pi Sangi chu a lo thu khur ngawt ngawt a, a sam chu a hnawk niaiah a, a kawr hak lai a dar vel chu a lo thler bawk. A hnar thi chu tihreh tumin a lo hup ve ţâwk ţâwk bawk. An chungah sualin ţha lo teh mah se; an tette atanga lo enkawl seiliantu na nâ na chu lainatna chin a lo awm thei lo aniang e. Remsanga leh Nguri chuan rang takin an va bawihsawm nghal a. Lalnuna pawn Remsanga te hmel a hmuh takah chuan chet a la zui ngam ta lo aniang e. A thu ta hle hle mai. 

"Engvangin nge ka nu hi kut i thlak a? Hre rawh. Police kan hrilh dawn ania.. " Remsanga chuan a ti buan buan a. 

Lalnuna rui la reh fel chiah lo bawk si chuan, "I nu hi dem zawk rawh u. Min luhkhung a tum a, ka remti lo a nih kha. Nupui ka nei dawn te a nih ngai chuan hetiang pitar ni lo, nula ngat le" a lo ti ve nghut nghut a. An inchachhuah nasat poh leh chhungkua an mualpho dawn tih hai bik hek lo le.. A nu chu kuah chhuakin damdawiin hnai berah an tlanpui ta nghal a. Lalnuna pawh Police lamin custody lamah an hruai bawk. A hna thlengin a tawrh phah theih thil a ni a, pawi a la ti ve khawpin a rinawm. 

Pi Sangi chu rin ai daihin a lo na a, a ban dinglam chu a chet tir tha ngam meuh lo, a pelh deuh a ni maithei. A hnar thi chu a tawp tawh a, a biang veilam a duk ruih a, a tukhum lam a pawng ûl bawk. A nâk chu na a ti bawk a, a thaw te a kalh titih, Lalnuna chhuihna kha a ni ngei ang. Engmah a sawi thei lo, a mu hle hle ringawt. A duh loh leh mamawh nia a inhriat loh a faten an buaipui a, hei hi a inhmuhchhuahna tur hmanrua pawh a ni ve maithei asin. Beiseisak ang. 

"Lawmsang, khawngaihtakin min lo hruai teh a. Hetah Falkawnah chaw kan ei khawm a, ka beisei loh deuhin an rui vek sia. Hei chhuah pawh ka chhuak ngam lo, an nasa hlawm si" mangan hmel deuhin Rampuii'n a rawn ti a. A service nileng bawk sia, a chau ve angreng viau. Mahse, chutia hmeichhia puih ngaia awm ta chu tlan chhiatsan a tum bik lo. Nguri erawh a va hrilh hram. Ani a nu vanga an buai lai ni bawk nen, a sawi buai lem lo. 

Rampuii sawina hmun lam pan chuan a tlan ta vang vang a. Veng tawp lam deuh, fal ve deuh takah an lo awm a lo nia. An lo bengchheng ngang mai. Rampuii chu a call a, ţi zet hian a rawn chhuak ta zan zan a. A thiante pawh a hrilh hre hman bik lo. An tlan let leh ta vang vang a. Reife chu an ngawi dun, a insum thei ta ngang lo nge.. 

"Lawmsang, min hmangaihna zawng zawngte kha a reh ta vek a ni maw? " Rampuii chuan a ti ta a. 

Lawmsanga a rum nghut. 

"Chu lam chu sawi dun loh a tha zawkin ka hria" a ti a. 

"Sawi dun ka duh alawm. Ih maw, kei chuan englai mahin ka theihnghilh ngai lo che. Ka ngai thin che asin.. Lawmsang" Lungchhiat hmel zet hian a ti ţiau a. Lawmsanga a tlan zawi deuh. 

"I rui ve em ni? " a ti ta daih a. 

"Ka duh leh ka rui ang. Nangmah vangin zu ka in ve. A chhan chu i tan engmah ka ni tawh lo hi na ka ti em a ni" a ti ta ngawih ngawih a. Lawmsanga te ang mipa rilru tluang pangngai tan chuan khawngaih lohna chi pawh a ni lo. 

Kawng sir zau laiah a ding ta nge nge a. 

"Nupui nei mai tawh tur ka ni a, hetiang rilru hi put a hun tawh lo asin.. Rampui" a ti dam thlup. Rampuii chu a che zawk, Lawmsanga chu a va kuah ta mai a. A awmah a lu nghatin a ngik ta feih feih mai. Chet lak nachang a hre lo, a lo dawh ve tawp ringawt. 

"Ngah nge zu chu i in ve aw" a ti vawng vawng a. Rampuii chu mittui tla hliam hian a rawn hawi chho a, "A nih thil pakhat ka ngen ang che aw" a ti sap a. 

"Sawi la" a ti ve mai. Rampuii pawh a thut dan pangngaiin a thu leh a. 

"Fa min pe rawh" a ti ta a. Lawmsanga a ner sawk. An inngaihzawn chhung khan vawi hnih chiah sex an hmang ve. Rampuii virgin hawngtu a ni nghe nghe. Kha vang khan neih kha a tum em em a, mipa dang tan a Phal ngai lo a nih kha. Mahse, tunah chuan amah aia pawimawh a awm tawh tlat. 

"Khatiang rilru pu suh" a ti sup a. 

"Ka ta i nih theih loh rau rau chuan, i fa tal pawm ka duh alawm" a ngenngawl phian a. 

"Ka nupui hual a lungawi lo ang.. Ka tina thei lo" Lawmsanga aw chu a nghet charh mai. 

"Ani chu eng nge kei aia a that bikna? Aizawl khua pawh ni lo lehnghal.. Ka neih loh eng nge a neih bik? " a ti ta mawlh mawlh a. 

Lawmsanga chuan hmalam melh ran chungin, "Ani chuan ka thu a awih a ni" a ti ta nghut a. 

"Lalrinmawia kha ka thian a ni tih i hria, i thik tlat a nih kha.. Engtin nge ka tih chuan ang? Ka kawm lo thei hleinem" Rampuii chuan a ti leh hlawk hlawk. 

"Chu tak chu in danglamna a ni. Ani chuan mipa thian a nei ngai lo" a lo ti leh hmiah. Rampuii chu beidawn hmel zetin a thaw hawk a, chutah a mitmengah chuan eng emaw a lo lang zawk. A inpetruh a. Nui lui chungin, "Nei mawlh rawh. Mahse, min tihnatna hi chu i rulh a la ngai ve ang. In inkarah engtin chiah nge chet ka lak tih i lo en dawn nia" a ti ta mai a. 

Lawmsanga'n a melh hrãwk. 

"Chutiang rilru i pu anih chuan i duh danin che rawh. Ka Ngurpuii hian min ringtawk tih erawh i hre lo a niang e.. " a ti ve ta hmak a. 

"Mahse, i ring tawk ve chiah em ni? " ngeiawm zetin a lo ti ve khauh. 

"Chimawm suh. Ramluahpui" tih nghut pahin steering a vuan a, motor a tinung a, a tlan zui nghal. A lungawi lo ni fahmiang, a tlan muang lo kher mai. 

"Chak zeta tlan kher a ngai em ni? Hmela, i va sual ve" a ti tuar tuar a. A chhang tawh eih lo. An rin aia hmain Rampuii te in an thleng. 

"I lo peng kawi dawn em? " a la ti zui. 

Nuih huk pahin, "Chhuk rawh" a lo ti sam êt a. A chhuk fel awrh tihin an veng lam panin a tlan nghal vang vang. Ngurnunsangi a lo hmangaihzia a hre chiang ta khawp mai. 

"Nu, i harh em? " Nguri chuan a ti sap a. Pi Sangi chu a rawn che ţelh ţelh a. A rum niah niah bawk. A harh tha thei meuh lo va, a zu in nasa kulcho bawk nen.. Drip an khai char char a, chaw mumal pawh a la ei lo a ni. 

"Khaw nge ka awm? " a ti hu a. 

"Damdawiinah i awm.. I ril a tam em? " a lo ti vat. 

"Ţam lem lo. Ka tui a hal zawk" tiin inbenkan a tum a. Nguri'n a lo nem mu leh vat. 

"Mu rawh mu rawh, tui chu ka rawn laksak ang che" a ti a. A va bun chhuahsak nghal. An dah luh tirh khan Dini te pawh an be nghal a, Rinfela chu a rawn lang nghal a, Dini erawh mi sawi an hriat leh danin, "Sawtiang nu zahpuiawm lutuk ka enkawl peih lo" a lo ti niawm tak a ni. A fanu diktak zawk a ni reng sia. A pasal nen an inkhik khak deuh hlekin a tlan a, a nu a bel leh zel tho a, a timak ve angreng khawp mai. A zahpui pawh a ni mahna. Lalnuna erawh khawngaih a dil nasat bakah Remsanga te lamin a hna thlenga tawrhtir em em chu a nu pawh a dik bik lo nen; case an siamsak ta lo hram a ni. Mahse, intiamkamna erawh an neihtir, Tun hnuah Pi Sangi a hmuin a be leh tawh tur a ni lo tiin. Lalnuna zawk hi chuan a thei mai zel, Pi Sangi ber hian a koin zu a leisak thul, Lalnuna tan hian a insengso nasa tawh viau a ni. Amah Lalnuna tan lah hnar phal chi ni nghal lo chuan. A pawi tehzawng a ni e. 

An inneihna tur kar khat chiahin a dang ta. Tlan inkoh ang mai mah nise, mo kawr te pawh an thuitir ve tho a, hak lai nena luh chi ni bik hek lo le. A nu enkawl ngai nen Lawmsanga nen pawh an inbe tha hman meuh lo a ni e. Mahse, a ringtawk a, hlauhthawnna a nei ngai lo. Anmahni Lawmsanga te lam pawh an inpuahchah ve reng bawk a, room te an zauh belh leh a. Khum pawh an siam zo thawkhat ta. 

Pi sangi pawh ni 4 a awm hnuah a chhuah chak tawh em vangin a chhuak ta hram. A zia a zawi raih mai. A awm chhung khan eng lai pawha chiahpiah reng a u te nupa khan vawi khat chiah an rawn kan ve! Chungte chuan a rilru ngaihtuahna pawh a tisei ve viauin a rinawm. An inah an lut leh ta phawt a. A chhuah tlaiah Remsanga te chhungkua nen chaw an ei khawm a. An papuia leh patea te chhung an sawm ve bawk. An ni lam hi chu mi pangngai an ni bawk a, an rawn kan reng reng thing, mihring hi an lo inang lo thin khawp mai. 

Chaw an ei khamah Pi Sangi chu an zilhhau ta a. Pu Zaia u chiah Pu Malsawma chuan, "Hei le.. Sangi, i dinhmun chu kan hre tlang a. A mualphothlakin vantlang titi kan ni ta ringawt chu a nia! Nang pawh inenfiah ve la a tha khawp ang. Hmangaihtu che emaw i tihte kha i mamawh hunah chuan an bo diak ta chu a nia. Ngaihtuah nasa hle rawh.. " a han ti dap dap a. A ngawi reng ringawt. Dik tak chuan Damdawiina a awm chhung khan zan mutnaah te a inngaihtuah ve nasa a, a fanu Dini ngeiin a sawina te, A u te nupa in an rawn ngaihpawimawh tawk lohzia te, a lo hmelma en leh a hmuhmawh te zawkin an tuamhlawm zia te a hre ve vek. Lalnuna, a pasal thlima khumpui a lo kaipui fo tawh leh a tana sum leh pai a senralna ngeiin a nghaisak nasat zia te pawh a hai hlek lo va. A inchhirin hrehawm a ti ve takzet. Remsanga leh Nguri lakah phei chuan a inthlahrungin biak pawh a be tha ngam meuh lo a ni e. An lo hmangaihzia leh a laka that an chhuahzia chu a chiang tawh ngawt ang. Nguri lahin a riahpuiin engkimah a enkawl a, a mamawh a lamsak zung zung bawk. A tan chuan a hrin loh fate hi an lo hlu ber a ni. 

"Ni e, ka nu, rilru nei deuhin awm tawh rawh. I fela i that phawt chuan, in leh lo chungchangah pawh buaina tur a awm lo asin.. Lalnuna hi a hnaih chu sawi loh, a hming pawh theihnghiilh hmak la kan duh a ni" Remsanga chuan a ti ta khawl khawl a. Pi Sangi pawh chuan, "Ni e, ni e, engkim ka hrethiam vek tawh e. Ka inzahpui ngawih ngawih a ni. In nu anga min la pawm thei hi ka lawm lutuk, tun chinah chuan engmah a thleng tawh lo vang. In duh phawt chuan U sawma te pawn uire chhuahin min hnawtchhuak thei. Mahse, heti taka ka laka indawhthei leh inzaidam hi ka rul seng che uin ka ring lo, a bik takin Nguri pawh khati khawpa ka tiduhdah che leh ka hmelma chung chein tihian i nu tak tak angah min ngaiin min la tuam hlawm a. Min ngaidam hram teh u" a ti ve ta mawlh mawlh a. A hmel hmaiah inchhirna a lan chian em avangin awm ve ho te pawh chu an thaw huai mai. Beiseina sang tak an nei a ni. 

Nguri patea chuan, "Hei Ngurbawihi pawh kar khat hnu maiah pasal i nei tawh dawn a ni a. Hengte pawh hi a pa in atang ngeia thlah te pawh kan duh em em, hetianga Sangi a rawn harh takah chuan in pui ngei atangin man inhlanna te pawh kan nei thei ang chu. Tin, Ngurbawih, i pa a awm tawh lo naa, i pa aiawhin hei hi ka chah ve ang che. Mi inah i va awm tawh dawn a ni a. Lawmsanga chhungte kha mi pangngai tak an ni tih ka hre mai. Chhungkuaah naupang ber i ni naa, chet vel kawngah chuan i nu thachhang dawltu pawh i ni a, ka ngaihtuah lo che. Amaherawhchu, i chhungte kalsanin chhungkaw thar i va fin tawh dawn a, an zia te pawh i chik vea; rem taka i khawsakpui te pawh a ngai ve dawn. Ei leh in thu hlaah te, titihona boruak leh ngaihdanah te hian hote anga lang si atang hian ania innghirnghona a thlen a, chhungkua a kehdarh fo thin ni. I awm ang khan awm la, duat leh beisei phut lutuk lo la, i pasala nu leh pate ko tamin be sawm peih bawk la, Lawmsanga fapa pawh i fahrin ang chiaha hmangaih chu a har ang. Mahse, i theihtawp erawh i chhuah tur a ni. I pa a awm tawh lo va, i nu te pawh hi rawn theihnghilh lo la, intihthiam loh hleka khaw tlan ringawt te hi tih loh a tha aw.. 

A pawimawh ber chu mi thatchhia hi khawi hmunah mah an tuitla thei ngai lo tih hi hrereng ang che" a ti ta dap dap a. Nguri pawn a ngaithla uluk khawp mai. A hmain Achawii'n a hrilh ve keuh keuh tawh bawk a, Tin, Lawmsanga chhungte misual an ni lo bawk a, hrehawm taka a va mo a inring hran lo. 

Chumi zan chu an hlim tlang dar dar ve khawp mai. Rinfela pawh a khi ve suk suk reng mai. Dini te leh an putea te erawh an rawn dik dak eih lo. Pi Sangi chuan a hre ve rauh rauh ang chu. 

"Lawmsang, i mak ka ti thlawt, Rampui'n a hmangaihzia che hi i hmu thiam lo mi? Mualpho pawh huamin tihian a rawn haw leh a, nangmahah bak rilru a pe thei lo asin" Rampuii thiannu Lily chuan a rawn ti a. Reply loh a tum zet a, mahse, "Ngawi teh, nupui nei mai tur ka ni a. Ka hnaih thei lo alawm. Lo hnem rawh. Bakah kum tam a liam tawh a, pasal tha tak nei rawh se," a va ti hram. Rampuii chu a duh aiin a kal thui dawnin a hria. Mahse, Va beih leta va khap a tum rih lo. 

"Apa, hei ih, anu Rampuii khan min lei a" a fapa school bang chuan tun laia an uar deuh sana, naupangin an awh em em a rawn bun haw at mai. 

"Engvangin nge a leisak che a? Khaw nge i hmuh? " a ti vat a. 

"Ka school bang kha Atea(a thianpa) nen min lo ko ding a, 'I pa saw ka thianpa a nia. Hei hi ka leisak ang che. ' a ti ringawt a. Atea pawh eitur a leisak" hlim zetin a lo ti a. Lawmsanga a meng nur hle. Ringawt a! Rampuii hmalak tum dan chu a duhzawng a ni hauh lo mai. 

"Hlip rawh.. Khawi" a ti hmak a. Bawihtea a ngui nghal rawih thei. "Apaa.. " a ti chuai raih a. 

. "I awh te chuan sawi ta che, leina nei lo kan ni hleinem.. Ka pe let anga.. A dang ka leisak ang che.. Umm.. " nem deuh zawk hian a ti a. 

"Umm.. Min lei loh vaih" a tih ţuau laiin a farnu a rawn lut a. 

"Ngati nge ka duatpuia chu.. Apain a hau elo! " a rawn ti a. 

"Nini, apa hi a sual lutuk, Sana min leisak pawh a la let daih. Anu Rampuiin min leisak a" a lo ti hmanhmawh. Teteii chu a nau chu a melh ralh a. 

"Laksak kher a tul mawni le.. Rampuii chuan a lo leisak ve a ni mai a.. A kawihthlak lutuk," a ti hlar a. 

"Ani leisak saw ka duh lo. Ka leisak ve mai ang. Ka fapa a nia, a fapa a ni ve lo" a lo ti hmuk. 

"I â thin em mai. I lakah hman ang rilru pawh kha a pu kher tawh nang.. I fapa anihnaah a ngaipawimawh ve a ni mai lawm.. Khirh viau thin suh" a ti leh a. Sana erawh Lawmsanga chuan a pe let lo. Zana Rampuii va pek leh a tum tlat a ni. 

"Hi, thiannu, i dam em? " tih msg chu Nguri chuan, "Aw dam e, tu nge aw? " tiin a chhang a. A dp a hmu thei bawk si lo. 

"Min hre kher lo maithei. Lawmsanga thiannu ka nia.. " a rawn ti a. 

Ngaihthat lohna pawh nei loin, "Aw a nih chu" a ti mai a. 

"Innei vat vat ula kan ti lutuk a.. Lawmsanga lerh lutuk hi i thunun theih kan beisei a" a rawn ti ta a. 

Nguri chuan, "Hahah.. A lerh maw? " awih lo lutuk hian a ti a. 

"Tak taka sawi a nuam vak lo va, a 1st love a rawn haw a. An inthen dan a mumal si lo va; an inzui leh zeuh zeuh a" a rawn ti a. Nguri chuan a awih hrep khawp mai. Mahse, a rawn sawi chiang viau si. 

"A va'n mak awm em em.. ka lo hre miah lo" a ti a. 

"A mah hrilh suh aw. Ka tan a nuam lo va. Kei chuan innei vat ula ka duh" a rawn ti a. Nguri chuan a reply tawh lo. A rilru a na ve ta tlat. Lawmsanga nen an la inbe lo tih a hrechhuak nghal bawk. Call a tum bik lo. Lawmsanga status a en a, "Ngaih mek i ni" tih a ni. Chu pawh chu a inngaihbel ngam tawh lo. A thiannu inti khan a rawn sawi chiang em mai. Out a tum lai takin Lawmsanga thiannu hnen atangin pic a dawng leh nawlh. A open lo thei lo. Lawmsanga leh hmeichhe pakhat thu dun lai, hmeichhiain a han thlek deuh hâw lai a lo ni! A sa pup pup mai. Inenihna kar khat lekin a dang tawh tihah hetiang hian a ti thei maw? A rintawk tehlul nen. A mood chu a chhe nghal vek a ni ber. 

Dar 9 rik hmain a mu daih. A u te bulah a nawmsam loh thu a sawi tawp bawk. A tah a chhuak a, a tap ngam si lo. A rin ang a lo ni lo tihna em ni ang? Innei ta pawh nise hetianga a lerhsan mai mai chuan engtin nge an inkawp rem theih tehlul ang le? Rilru hrehawm zetin a let kual sek. Dar 10 rik dawn ţêpah Lawmsanga'n a rawn call ta a. A pick duh lo. Vawi 6-naah a pick hram. 

"Eng nge" a ti hul hak a. 

"Msg i hnutchhiah bawk si lo va, i mut ka ring lo va.. Ti nge ka call i va la thei lo ve" a rawn ti dam thluam a. 

"Ka be chak lo che aniang e" a ti hmak. 

"Eng nge thleng" bo hmel tak hian a rawn ti a. 

"I 1st love nen chuan ngah nge in inneih mai loh? " a ti nghat. Lawmsanga'n thil awmzia a hrethiam tan. 

"He thil hi sawipui che ka duh a, hmaichhana sawipui che ka duh laiin tuna sawi a ngai ta a nih hmel.. " a ti sup a. Rampuii nen an nih lai atanga sawi tanin tun hun thleng a sawi ta a. Dawt a tel lo bawk. 

"Mahse, zaninah pawh in inhmu a, in thlalak ka dawng thlap e" a ti a. 

"Ka sawi chu, ka fapa sana a lo leisak a, ka va pelet. A nuin min lo chelh tlat pek anih kha.. a tu chuan nge kan thla te lo la hman ni.. Min rawn thawn teh.. A number" a rawn ti a. Lawmsanga a hmangaihna chuan a rinhlelhtir hlei thei bik lo. Innei mai tur an lo ni bawk nen. An inbiak zawhah rawn betu number chu a va pe ta a. 

"Lily, Rampuii best friend number a nih hi.. Man chhuah awlsam zet hian engtin nge maw an chet duh ni" a rawn ti a. Nguri awm pawh a nuam ta deuh. 

Lawmsanga chuan Rampuii chu textin, "Game ţhing zet khel suh. Nguri phêna ka din chhung chuan engmah intichhe dawn chuang lo.. I hrethiam ang chu" a va ti a. Block em zawng a block lo. 

Rampuii'n a msg a lo hmuh chuan rum zeta meng chungin, "I thikthu chhiatna zawk hi ka hmang tangkai dawn alawm.. Mimawl pa" a ti sap a. 

Hmangaihna leh indonaah chuan engkim a thiang miau sia le… 

(Ka tui leh laklawh.. La tawp rih lo lawk rawh se 😢