Thutiam 13

THUTIAM - 13

Ziaktu: Toni Rãlte

Lawmsanga pawn Mapuia biain an chanchin chu a hrilh fai ta kêlh a. Mapuia pawh a sa ve khawp mai. "Va luhkhung hmiah ila a ni mai lawm" a ti thur thur mai. Mahse, Nguri thuchah kha a hrilh a, kalpui turin a sawm nghal a. A lo pawm nasa mai. Zan dar 9-ah chuan Zotlangah an awm vang tawh. Aldrina te in hmu phak siin an thu a, an nghak ta tlawk tlawk mai. 

"I thawmhnaw kha phelh rawh" Aldrina aw chu a ring lo. A rapthlak thung a ni. 

"Hei hi chu ti suh.. " a ti tham ţiak a. 

"Sawi nawn ngai suh se.. Inhlip rawh," a ti leh ţhak. 

A damdawi hman kha a thawk miah lo mawni le tih a ngaihtuah lai chuan, a ngaihtuahna hria niawm takin, "Ka nu leh pate chu i hrai muhil tawh. An harh mai mai dawn lo. Kei chu bum theih ka ni ve lo aw. Vawksa rep chiah i ei tih hretu hian thil dang ka ei duh ring bik suh" a rawn ti ta a. Nguri plan a flop dawn ta em ni ang? Hlauthawng zetin Aldrina chu a va melh a. 

"Ni lo, zaninah chuan ni lo e. Ka nei ang che. Mahse, inneih hma chu hetiang hi ti lo vang" a ti nawk nawk a. 

"Heh, i neih hma hauhin Lawmsanga fa pawh i pai alawm le.. Hre rawh, kha naute kha rawn piang se.. Lawmsanga kutah kan dah ang. Ka hmelmapa fa hi ka enkawl beisei hlek suh" tih pahin a rawn pan hnai ta chher chher a. Khum kilah a thu tawm Chawih chawih a. A hlauthawng takzet a ni. Chet lak dan mai tur a hre bawk si lo. A rilruin a tawngtai mawlh mawlh mai. Pakhat leh pakhat na nâ na chu a huphurh a ni lo, Aldrina nunrawnzia leh kutramzia a ramhuai zia a lo hmu tawh a, kha khan a la thunun ve bawk a ni. Tin, nau pai a nihna hian eng emaw hlekah a tihlauthawngin a lungphu pawh a control a, a mawl húih zel. 

Khumah rawn lawn kaiin hnai zetah a rawn melh kuau a, râp zetin a lo melh let ve kal bawk. A tshirt chu a rawn ţham a, Nguri a khur der der.. Hnuai lam atangin a hlimsak vak a, khum mawng lamah Nguri a tal thla, a rawn bawhbet nghal rawp. A lian si, ani thil ei tha thúm lo, taksa chau em em tan chuan hneh a harsa lam a ni. An inelh ngat ngat a, Aldirna mitmu rawng pawh a inthlak nasa tawh khawp mai. A thin a rim takzet tih a lang reng mai si. Chuti maia tlawm chu a tum bik bawk si lo. Ţawng miah lo va, rei tawk fang an inbuan thial thial hnuah chuan Aldrina thinin a tuar ta lo nge, a bek veilamah a rawn hnek ta dawp mai. Nguri khaw hmuh a thim nghal mup, mahse, a ngaihtuahna a fim ta thung. A taksa erawh han ţang fan fan thei tur khawpin a chak tawk tawh lo. A chhip samah rawn ţham lehin a kuai dak âwrh a, "Ka ta i ni tawh ka tih kha.. Zaninah hian Lawmsanga sulhnu zawng zawng chu phum boin a awm tawh ang" tih leh a hmuia rawn fawh a rual nghal a. Nguri chuan a hmui a chip ve tlat. A hnute te chu a ţhamsak tawn tawn a, a kekawr kawngah chelhin pawhthlak a tum a, a theihtawpin a lo pawt ve ţang ţang thung. Chutah ngaihtuahna thar a nei ta hlauh mai le.. 

"Lawk.. Aldrin, ka chau.. Aw le.. A tha e.. Kan ti ang. Mahse, pangngai takin" thaw hlawp hlawp chung chuan a ti ta a. Mahse, Aldrin chu a chechang duh lo. 

"Mu ţha ila, i lakah ka tlawm ta a ni e. " Nguri chuan a ti leh a. Aldrina pawh a che ta hrut. A tho ve ta mial a. Nguri chuan a tshirt chu hlipin, a bra erawh a phelh lo va. A kekawr kawng a chelh lai takin, "Hei chu keiman ka phelh ang" a rawn ti nghut a, a kekawr kawng a rawn chelh nghal. Maimichhing chungin a lo nghak a. A phelh ta. Kekawrte leh Kawrhnuai nen chauh a mu ta zar mai. Aldrina chuan ît hmel zeta melh kual chungin, "Nau pai pawh i ang lo.. Hei ai hian thau belh phei la chuan i nalh lehzual dawn a ni" tiin a chil a lem khulh a. Nguri chu a luak lo chauh tawh a ni. A rawn fawp a, a tih ang ang chuan a awm ve hmiah hmiah. Har zawng a harsa thlawt e. Mahse, a hmachhawn a ngai rih si. Rei tawk fang an infawh hnuah Aldrina chuan hnuai lam a melh tan ta a. Nguri kekawrte chu hlihsakin, amah pawh a inhlip ve sawk sawk a. A mipatna phawrha Nguri taksa nena inzawmna neih tuma a kun buai mek lai chuan, A theihtawp chhuaha insangmarin Nguri chuan Aldrina kap ah chuan a khupin a rawn do sak ta zawt mai.. Khum atangin a tla thla nghal a, a vial nghal ngawlh ngawlh. Hmanhmawh zeta inha tha mawlh mawlhin, a chhuah pah chuan Aldrina kapah bawk chuan a petsak leh a. A rum nghut mai. A na thawkhat ngawt ang le. A room lama a thawmhnaw Becky rawn kensak kha a va la te te a, Amah ru botu Aldrina te in chu a chhuahsan ta a ni. Kawngka chu pawn lamah a hawlh kalh nghal rap a. Lawmsanga te lo awmna tura a sawi lamah a tlan chho nghal. Theihai buk hnuai atang chuan chak zetin Lawmsanga a rawn tlan thla bawk. An han inhmu chiah chu nghet em ema inpawmin an inkuah ngawih ngawih mai. Mapuia pawh a rawn lang nghal a, hmanhmawh takin Zotlang chu an chhuahsan ta a ni. 

Lawmsanga te in an an pan lo thei ta lo va. A nu leh pa an lo la meng bawk. Nguri an han hmu leh chu an lawm hmel khawp mai. Nguri erawh a inthlahrung leh ngawih ngawih tawh. Buaina thlentu mai niin a inhria a, he ina lawi lut tlak ni hian a inhre hlawl lo a ni ber. A chanchin ngaichângtu a lamhnaite chu chanchin an han hrilh zung zung a. Police lam erawh a tuk lama biakah an ti thung. Lawmsanga roomah, a khumah ngei an inneih hmain a mut a lo ngai ta a. Aldrina hnekna kha a vung ţan a, a tur et et reng a, Nachhawkna a ei ta tawp. Lawmsanga'n vurin a dehsak bawk a. A mitmeng atang chuan a bialnu kut lo thlaktu lakah chuan a thinrim takzet tih a lang reng. Kut hmawr pawha a ben phal loh, Aldrina te angina kutthak hnawih nana an hmang chu Lawmsanga tan tlawmna a tling ve tlat. Rulhlet erawh a tum chiang khawp ang le.. 

A chhuah dan leh an inbengberek buai dante chu Nguri chuan a sawi sep sep a. Aldrina chuan rilru lam doctor a mamawh thu pawh a sawi. An ruk bo chhung kha kar khat a tling lo deuh a, mahse, an tan chuan kum khat ang vela rei a ni maithei. An ruk tirh atanga a hriat theih chin zawng zawng chu a sawi vek a, Aldrina thurualpui te pawh kha an hmel a la mitthla thei bawk, man an harsa lo turah a ngai. Chung zawng zawng a sawi zawh hnuah Lawmsanga chu lungchhiat hmel zeta melh chungin, "Dawt ka sawi ni khan ka dawt sawi kha i awih ka hlau lutuk a, ka tawngtai ngat ngat asin" a ti a. 

"Hmangaihte mitmeng chhiar thiam lo khawpa mipa chhaw ka ni hleinem.. Ka duat, tunah chuan i him tawh a, hmalam kan pan thei tawh. Tuman an tina leh tawh ngai lo vang che" Lawmsanga chuan a ti sup sup a. A rawn kuah hlu hlu mai. Alrdrina kuah nen chuan inhlut hleih tak a ni. Zing dar 2 dawnah an muhil ve ta chauh a. Lawmsanga erawh Nguri veng reng renga a awm avangin a muhil tam hman vak lo. Nguri chuan mang lamah thleng tibuaitu a nei a ni mahna, a rawn phu leh dawr zel a. A chang leh a rumin a tawngvai thul. Lawmsanga chuan a lainat kher mai. Hetiang thil teh hrep, Nguri'n a tawng chu amah vang a nih te a ring rum rum. Nia, a mah vanga thleng te pawh a ni ve thei tho. Nguri erawh Lawmsanga bulah a him tih a inhre tawh nge a mutui phian mai. A taksa a lo chak lo bawk nen. 

Aldrina te pafa erawh an buai hle. Nguri khan a kalh hnan bawk si nen, Aldrina a tlawhna lah kha a lo na phian a ni awm e. A pawt kun deuh tlat mai a. A pa thei tawh lo vang tih a hlau ru hle. Thenawmte callin kawngka chu an hawntir a, Aldrina chu damdawiin hnai berah an hruai ta nghal a ni. A nat chhan han sawi chiam chi ni hek lo, a tlukna lamah a insawh khaw lo an ti tawp. Damdawiina an buai mek laiin Police an rawn lang ta khap khap mai. Pu Zova a mangang takzet a ni. Mi thenkhat lah hi an hawkdak ve bawk si. Aldrina lah chu a kap na chuan eng dang mah a ngaihtuahtir hleithei si lo, nachhawknain an jection hnu chuan a zia ta deuh. Police ho pawh a lo hmachhawn thei ta. 

"Zantirah kan inhau deuh a, a bialpa hlui vangin. A thinrim deuh khan min tlanchhuahsan a nih kha. Kawngka min kalh hnan leh nghal a. A suaksual khawp mai" tiin Nguri chungchang chu a la sawi thei nia. Police ten engkim an hre vek tawh si. 

Stationah an phur phei ta nge nge a. Pu Zova te tan buaina zakhua a thleng chho ta. Media a chak tawh si a," Pro Pastor Aldrin Lalmuanzuala'n hmeichhe pakhat a ru bo a, hmeichhia chu a tlanchhuak thei hlauh mai' tih thu chuan Zoram khawvel a tuam ta hlup hlup mai. Tu han khap theih ziazang lah a ni si lo. Nguri nu ngei pawn a lo hmu ve. Thinrim takin Pu Zova a call nghal a, 

"Engtin nge in tlan chhuahtir theih a? Nep lutuk" a ti hrep mai. 

Pu Zova lah mangang rilru hah tawh bawk si chu, "Ngawi hmak rawh, i hming ka lamri ve a nih chuan i buai khawp ang" a lo ti ve salh. Pi Sangi chu a tawng zui ngam ta lo va. Ni e, Pu Zova te hian sual chhuahin Pi Sangi hming hi lam ri ve ta se, an inremsiamna lehkha te kha phawrh duh nise, a chung a rip ve khawp ang. Mahse, Aldrina humhim phawt a la ngai miau a ni. 

Aldrina chu an han dâwp tak tak takah chuan a inpuang lo thei ta lo va. Nguri a rawn lan ve hnuah phei chuan dawt sawi tur a hre mang lo. Mitmeng hriam zeta melhtu Lawmsanga phei chu a melh tha ngam der lo. A pawngsual hman lo naa, a rukbo hrim hrim avang khan hremna a hmuh a ngai ngei dawn a ni. Central jail lamah hun a zuk hmang ve rih aniang chu.. A pastor nihna pawh hlihsak nghal niin, mualphona leh hmingchhiatna tinreng nen Central jail lamah an phur liam ta vuah vuah mai. 

"A luh hma ngeia ben ka chak asin mawle" Lawmsanga chuan a ti nghut a. Nguri a khi sak, "Amah ang i ni ve hleinem" a lo ti sap a. 

Nguri pawh hostelah let lehin, Remsanga pawn ngaihtha takin a hawnsan ta rih. Inneih ni a hnai ve telh telh bawk nen. A zirna hian a tibuai ta ber rih a nih hi. Zirna laklawh lo nise, Hnahthial lamah hun te pawh lo va hmang thei a ni a, mahse, amah hian a ui ve tawh bawk si. Pasalte chawmhlawm ringawt nih chu a duh bik lo a ni. Remsanga a haw hma khan a pa Rinpuia te inah in leh lo chungchang kha an sawi dun a. Aldrina'n a ruk bo laia a nu chungchang an chham khum te kha a theihnghilh reng reng lo va, chuvang chuan a tira a rilru kha thlakin a pain a hnutchhiah in leh lo a hminga dah chu thlak a tum ta bik lo. 

"Duh leh nangmahniin in luah ang a, in in kha mi dang in luahtir mai ang a. U Rinfela erawh duh leh in bulah awmtir ve u la. Ani saw chu ka chunga tha thin a ni a, ka tina ve thei lo. Ka nu leh U Dini erawh anmahni an inngaihtuah tawh mai ang chu" a ti a. Remsanga pawn a pawmpui hle. 

"In saw duh leh Rinfela'n luahlum ve se la, ka pain a pek a in kha chu mi dang luahtir se, luah man pawh a tan chuan inchawmna tham a tling tho dawn a. Kei chu min ngaihtuah suh.. Tihral i duh tak leh kan tiral mai dawn alawm" Remsanga chuan a ti ve a. Nguri pawn a sawi buai lem lo. A nu chuan an in chu chhuahsanin duh leh a bialpa kha um mai se tih a duh ber. Jail-a dah ve kher chu tul a ti lo a, mahse, a phutawk hremna erawh pek ngei a tum ve a ni. 

Remsanga haw chuan Nguri thutlukna chu a nu te a hrilh ta a. Pi Sangi a sen ţâwn ţâwn mai. Dik tak chuan Nguri chu a lo ngainep mah mah a, pasal a neih chuan in leh lo chu a rawn ngaihven a ring tawh lem lo kha a nia. Mahse, a tihsual tawhte phuba chuan a rawn luhchilh ta a ni ber e. Nguri lahin pasal a neih hma ngeia chhuak turin a ti mauh mai si. Mi ngaihah chuan Nguri chu fanu maksak, nu te hmangaihna pawh nei lo a ni maithei. Mahse, Pi Sangi zia hrechiangte leh an chhungkhat te tan chuan a mak lo va, Nguri thutlukna chu a awm em em zawk a ni. An pa mitmu keh chu sawi loh, a ruang pawh a ţawih ral hma hauhin ngaihzawng a nei a, tuna a bialpa pawh hi an pa dam laia a ngaihzawng tho kha a la ni. Tlangval zawng a ni naa, thau pem pum, zu heh tih hriat zet, a hminga hna chhete nei ve a ni. Hnahthial khaw hlun pawh a ni lo va, a hna avanga he lama rawn awm a ni. A hrechiang deuhte sawi hmangah chuan nupui a nei tawh a, mahse, a lerhsan reng vangin a chhuahsan tawp an ti. Amahin quarter a luah ve a, Pi Sangi chauh lo nula emaw nuthlawi zu duh ve deuhte a kawikhawm hut hut zel a, a thenawm khawvengte tan a che hnawksak thin hle. Chutiang mi zunah chuan kan pi Sangi chu a uai ve fan chu a ni si a. Mualpho leh hmingchhiat pawh pawisa loin a um duan duan tak chu a ni si a..! An pain a hnutchhiah bazara dawr leh in ni nghal chu a luah mai a ngaih hmel. Emaw a bialpa pawh a luhkhung mai mahna.. A thu thu ni teh se. 

"Theitê ka ei chak eee.. Ka sawi zawng pawn ka chil a pút" Nguri msg chu a chhiar khi suk. A thiante bulah uang zetin, "A changtunuin theitê a ei châk tlat! Ka va zawng lawk ange" tih leh tlan chhuah a rual nghal a. 

A thiante pawn an nuih liam vur vur mai. Hetia a rawn tha chhuak leh hi an lawmpuiin Nguri tak pawh an hmu chak ve takzet a ni. A bo te khan an lo buai ru ve em em a, sawi tlang than vak chi a ni bawk si lo. Lawmsanga tan an theihtawp hi chu an chhuah ve takmeuh a ni. 

Bazar a suar tluan tawh. Theite zuar reng reng an awm lo. Sunhlu zuar nu pakhat bulah, "Ka pi, theite i zuar lo a ni maw? " an ti ngawt a! 

"Aw.. Bawiha, theite rah hun pawh a nih loh hi.. " a lo ti si. Mahse, Nguri'n a ei chak asin le aw.. 

"Duatpui, theite rah hun a ni tlat lo. Ka zawng nasa tawh lutuk" a va ti a. 

"Zawng tawh suh. Sunhlu i hmuh chuan a pawi lo" a rawn ti a. Sunhlu zawng a tam nangiang mai. Polythene khat hnawk a lei a, Hostelah a va pe leh vang vang. Hostelah hian warden phalna lain common roomah a rawn lut thla ve thei tawh a. A chhan chu innei mai tur an ni tawh a, warden pawn a hrethiam ve a ni. 

Sunhlu chauh lo, thil dang eitur pawh a lei nual. Nguri chuan chi thak siamin sunhlu chu a ei nghal bawrh bawrh a. 

"Naktuk chu bawihtea te nen huanah zuk kal leh ang u hmiang. Zan riak lo vin.. A chak tawp a" Lawmsanga chuan a ti a. 

"Pawi hleinem. Sangha hmeh ila.. Ka ei chak, sangha te takte te ang kha a bai thak ka râwp.. " a lo ti a. 

"Hawn pahin ka lo lei dawn nia. Eng nge thil dang? " hrethiam takin a lo ti a. 

"Ka hre mai lo. I duh duh a ni mai. Becky hruai ve ila, a bialpa nen, chuan Bawihtea pawn a thian tu emaw hruai ve se.. " inthlahrun hmel lek lek hian a ti a. 

"Nu berin i tihte chuan.. Tak taka Becky hi chu eng emaw la leisak ka ba hrim hrim. Thian tha a tling takzet a ni" Lawmsanga pawh chuan a lo ti a. Khua a lo tlai lam tawh bawk nen, a tuka inhmu turin an inthlah liam ta a. 

Zanah Nguri chu a nu nen inbiain an inhau hrep mai. Nguri pawh a tlawm duh tawh bik lo. 

. "Nu, min lo enkawl seilenna kha chu ka lawm lutuk, min hmangaih lo mah la, hetiang thleng thei tura min enkawlna avang khan kei chu ka nu angah ka la ngai reng che. Mahse,i fanu ni lo mah ila, sumdawn nana min hmang kha chu ka damchhungin ka hrethiam ngai lo vang. Tin, chung zawng zawng aia ka thin tinatu chu ka pa lung kan phun hma chu sawi loh, a mitmu em pawh a keh hmaa bialpa i riahpui thei kha a ni. Ka ten lutuk che" a ti ve hrep mai. A nu pawn sawi tur a van ve map alawm. 

. "Lo inla chhuak rang la, U rinfela erawh a duh chuan a la awm thei. A hming pawn ka la dah daih maithei. I fanu Dini kha i duh leh bel mai rawh. Kei chu ka tha.. Ka lakah rilru chhia pu lo ni la chuan that chhuah ka tum tehlul nen, i tichhe ta vek a nih hi" a ti leh sak sak a. A dah daih. 

A tuk zing dar 9 velah Lawmsanga'n a rawn lam a, Becky te erawh a bialpa nen bikein an rawn kal thung. Bawihtea chu an in hnuai luahtu a thian pahnih te nen an kal ve a. An phur kher mai. Kalkawngah an zai vak vak a, Nguri pawh a hlimin a hmel pawh a tharlam sar mai. Huan thlen hma picnic spot thlang deuh kawiah bike pathum an rawn inzui a, An side lo lutuka an tlan avangin an intai lek lek a, a balance a buai nge bike pakhat chu a tlu ta a. Lawmsanga pawh a ding ve mai. Bike dang ho pawh an ding a. An pawr viau mai. An rui deuh bawk a. 

Hmeichhia an phur theuh a. An hmeichhia te pawh an pawr! 

"Zawnga, i va zak lo ve.. Motor khalh i thiam na nge? " tia bultanin an insawi pawr telh telh ta mai. Becky te pawh an rawn thleng a. Lawmsanga chhuak chiah chu bike tlukpui pa chuan a awmah a lo ţham nghal thawr a, meng sen ram chungin, "I va inla pa awm ve aw. Khanglang a. Ka bike hi chhete pawha a chian loh chuan i chawi ang.. I hria maw? " tih leh hnek a tum a, Lawmsanga a thle sawn zauh. 

"Ekhai! Thiante u, duhtawk ru.. Tha takin sawi fel ang u" a ti dam thlup a. Mahse, an kai phur thisen lum chu khap daih chi awzawng an ni lo mai. Nguri chuan, bawiha te lam hawiin,"Bawihte, tikhan lo thu ru aw.. Engmah a ni lo a nia" tiin a va chhuk ve a. 

"Tharumin chingfel ila a ni mai. Ka tha zat lai i rawn nang a, i vanduai khawp mai" pakhat chuan a rawn ti ham ham a. Lawmsanga chu hmai thal ha hian a en bawk a. Becky Bialpa Puia chuan, "Thiante u, kan cho lo che u.. Tikhan tha te tein inkalsan ang u. Bike pawh a chhiat loh hi" a rawn ti ve a. Buaina an duh lo ve khawp mai. 

. "Nang pawh khan i duh a ni maw? " tih leh chapo zet pa khan va bawh a rual a. Puia pawh a tlu hawn hawn mai. Lawmsanga kut a za ta zak mai. A mah hnaih bertu Bike tlukpui pa kha a hnek let tawp. 

"Mai mai a, tha zai sawi theih reng, tharum in duh zawk te chuan englai pawn ka inpeih e" a ti ta. Nguri'n a lo chelh vat, "Naupang an awm" a ti sap a. 

Chutia a tawng mek lai chuan a hmaa tawng ve lo, pakhat kha rawn pheiin, "Ti ila a ni mai lawm" tih pahin a inhum sek nghal a. 

. "Ngawi lawk.. Naupang nen kan ni a. Tunah chuan duhtawk phawt ang. Lehpekah fair takin le" Lawmsanga chuan harsa tih hmel zet hian a ti a. Puia pawh a tho chhuak tawh a, Becky lah hlauhlawpin an sirah a lo ding khur hlak hlak. Puia pawh chuan a khawih zawm bik lo. 

Hmeichhe pakhat inhnawih nasa deuh hian, "Va nep sazu ve.. Kal ang u. Hetiang tuai lakah hun khawhral lo vang u" a ti hlang hlang a. Nguri chuan a chhang chak ngei mai. Mahse, naupang an awm miau si a. Lawmsanga hnek thluk pa kha chu a la pawr ngang mai. Puia'n, "Lut ru.. Kan lo zui ang che u. Kalsan rih mai ang u" a rawn tih vangin Lawmsanga te pawh motor lam an pan a, an pan mek laiin Puia bawhthlutu khan bottle ruak hian Nguri hnungzangah tak a rawn vawm a. Nat chu a na lo. Mahse, Lawmsanga chu tuman an thunun thei hauh lo vang. 

"Glass va upa rawh" tiin Nguri a hrilh zauh a. Mipa pathum lo dingte lam chu ding zetin a pan phei ta chhak chhak mai. 

Hmeichhe pakhat hian, "Ehh.. a bialnu chhan a tina ve rap.. Kick dak ru" a lo ti ham ham a. An rin ang ngawt erawh a ni lo vang tih a hlauhawm mang e. A hnaih bera rawn ding chu a hnek leh siah, a lo inring hman miah lo em mawni dawn ni, Puia'n a rawn pui ve hmiah bawk. Pakhat khan zei vak lo hian Lawmsanga chu a pawm bet a, Lawmsanga chuan a kut chu laksakin a herh ngâwk a, a rak tuar mai, kawngpui charah chuan a chal tauh zawngin a nem thlu ţhuai a. A chhuih zui ţawk bawk. Che chang tur a awm lo, a chal chu a kak a, a thi nghal zur zur mai. An hmeichhe ho an mangang tan ta. Puia lah chuan a insualpui pa chu a hnehsawt ve bawk si. Bike tlukpui pa ber chuan Lawmsanga chu hnek tumin a rawn pan leh a, chiang lutuk tak maiin Lawmsanga'n a lo hnek leh siah, a hnar a thi nghal puat. Hmeichhe nasa deuh khan chemte kawihthleh theih ang kha a va theh thla zauh a, pakhat a la harh ber chuan a lo la zauh. Nguri'n, "Lawmsang, chemte a keng a nia" a lo ti tuar. 

Lawmsanga a khi suk duh chauh. A va pan hnai a, a nghawng chu va dawhin, "Zai rawh" a ti chhum hmuk. Lawmsanga mitmeng a hmuh vang nge chu pa chu a chechang ngam der lo nia! Nuih leh suk pahin, "Vawi khat chiah aw" tih leh a hmaiah bawk hnek a rual leh a. A tlu zangthal ngût mai. An nulate chuan an va bawihsawm vat vat a, Hmeichhe nasa beri khan Lawmsanga melh chungin, "Zawnga, thisen i chhuah man hi i chawi ngei a ngai ang. Police ka call dawn" a ti nghek nghek a. 

"Call teh.. Vat vatin.. Kan hmanhmawh a nia" a lo tihsan mai si. An rin ang ngawt a lo ni lo chu an thin a rim kher mai. An mipa te lah an tlu zawi nguai ringawt mai si a. 

"Tenawmpa, i hre viau ang" hmeichhe pakhat chuan a rawn ti zui leh hram. An insual chhung kha minute rei lote a ni. Lawmsanga insual thiamzia leh a kutthlak natzia chu Nguri pawn a hre ve chiah. 

"Ka bialpa hi a nep sazu lo tih tikhan inhre thei tawh ang chu.. In mipa tuai ho kha sawngbawl ru.. Kan kalsan phawt ang che u.. Hmelchheho" Nguri chuan a ti ve hram. Lawmsanga a lo nui suk. An ankhumna chu hre lo ang hmiahin motorah an lut a, an tlansan daih. An chawh ve khawp mai. 

"Apa," a aw chu a pangngai lo. 

"Bawihte, engkim a tha vek ania.. Kan thleng tep.. Tuiah in cheng chak tawh em? " A lo tih khalh hmawk hmawk a. 

Nguri pawn, "Tui chen min zirtir ve ru aw" a lo ti ve a. Boruak a pangngai leh ta deuh. Huan pawh chu an thleng thla ve mai. Naupangho pawh an rak chul mai. Thlamah an innghat te te a, tui chen an chak tawh si chu Lawmsanga'n a va chenpui zuai zuai a. An tlak a hlauhawm bawk si, buaithlak. Nguri leh Becky'n ei rawng an bawl nghal a. Puia erawh huan fan pahin thei eng ilo chu a lo khawm bawk. 

"Enteh, Ngur, Puia nen kan nih hnu hian Ţpa hi a rawn lawr leh sek tawh mawle.. " Becky chuan a ti sar sar a. 

"Ka tih reng kha. Kha chen in ni tawh a. Mi dang ta i han ni mai tur chu uina che a nei dawn ka tih kha.. Hawi let hlek suh ang che" Nguri chuan a ti hmak hmak a. 

. "Teuh lo, hman zan i bo lai vel te khan Rempuii hian' Ţpa i bulah a awm em' a rawn ti mawle.. "Ka bula awmna chhan tur a nei lo ve" ka lo tih khum ve hmak.. A buai tan tawh. Ţpa'n a ngaihsak vak tawh si lo va" a lo ti a. 

"Na lutuka kan mihringpuite siam hi chu khati dawn reng kha a ni.. An la chawh telh telh ang" Nguri chuan a lo ti a. Lawmsanga huh hluamin a rawn lut a. A inhrukhul pah chuan, "Sangha kha chu ka lo siam ang. In zei loh hmel si" a ti a. 

"Ngur, in pa hi a thaibawih dawnin ka hria" Becky chuan a ti nghal zauh. 

"Thaibawih nguar ang.. Min la duat ve mai mai a nih hi," Nguri chuan a ti a. A ner nãng bawk. Lawmsanga chuan, "Mawina Beck, Tun atang hian a changtupa zawk emaw a inti tawh mawle.. Min tir min tir tawh" a lo ti ve a. Puia a rawn haw ta bawk a. Naupangho erawh an infiam a. Ven leh vil reng an ngai lem lo va, a zia e. 

Hlim takin chumini chu an hmang a, hawn lamah lah an zai kawngtluan. Chaw lah kha an ei hnem ropui. Nguri pawh a puar kher mai. 

Lawmsanga te pafain in an thleng a, a fapa nen an inpawm chhuak a. 

"Lawmsang" a hnung lam atangin a rawn ti sap a. A hawi let chuan a phu zawk mai. Kum 6 tehmeuh a lo zui tawh, Ruthi a lo lan tak avanga rilru na em ema a kalsan tak, a 1st love Rampuii a ni tlat mai! Khatia Ruthi laka a pelhe san lai khan Rampuii chuan tuar thei ngang lovin Delhi lamah hna a zu thawk ta daih a. Tun hi a hmuh leh hmasakna ber a ni. 

"Rampui, i dam maw? " a ti ve ta hlut a. A lungphu la ran danah eng emaw zawng a la awm chiang mai. 

"I fapa chu kha kha mi? A pa a va chhun ve" tih pahin a nui sen sen a. A that ngaiin a la tha reng. Amah Lawmsanga zek zuk khan Rampuii thiantha tak Johny a thik vangin Ruthi kha a kawpsan kual a, a lo rai ta mai bawk si. Chhe deuhin an kal hrang ta kha a nia. 

"Nia, a nih ve hi.. Bawihte, anu Rampuii a nih hi aw" tiin a fapa a melh a. Bawiha pawh a khi ve sak. 

"Engtikah nge i lo hawn? " A ti nghal zat a. 

"Nizan khan ka rawn thleng, hei Eli te inah sawn ka rawn kal lawk a. Hetah ka awm rih tawh ang.. " a ti siam siam a. 

"Nia, awm ve rih rawh.. Nih bawiha hi bual a ngai sia, kan kal phawt ang aw" a ti a.

A inbual fai lai chuan Rampuii hmel chu a mitthlaah a rawn lang a, "Ni lo, kei chu Nguri ta ka ni. Hei chu a dik lo.. " tih pahin a chhing vang vang a. Tawntirh hmangaihna hi chu a dai hlen thei tak tak ngai lo a nih hi.. 

Zanah Nguri'n a lo call a, "Ka u in, 'kar lehah lo haw mai la, inneih a hnai tawh sia, he lama awm ve rih a tha a rawn tia' a ti a. 

"Umm a tha alawm.. Nia, i zirna kha chu inzirtirtu te pawn an hriatthiam em che kha.. Buai rih lo phawt ang" a ti ve a. A ngai dawn hlein a hre nghal. An inbe zo a phone a en chu Rampuii msg a lo awm va mai. 

"Bulţan ţha turin ka rawn hawng a. Mahse, i nupui neih tur thu ka hre leh ta si a" a rawn ti! Chhungrilah kher nget ngettu a nei ve leh ta tlat.. 

"Ni e, pawi ka ti. Mipa tha tak i phú e.. " a va ti ve a. 

"In la innei êm hleinem. Inneih hma vawi khat tal inhmuh ka duh" a rawn ti a. 

Chutih lai mekin Nguri msg a rawn lut ve chiah, "Tunah tak hian ka ngai che.. " tih thu tê hi.. 

Lawmsanga a thaw hawk a. Khumah mu zangthalin, "Lawmsanga ka ni lo em ni? Hetiang nunhlui hian min tibuai tawh tur a ni lo.. " a ti sup a. 

Nguri msg chu reply-in, "Kei pawn nang aia nasain ka ngai che.. Bawihte" tiin.. 

(Naktukah a tawp maithei.. Huiham.. 😁😢