Thutiam 12

THUTIAM - 12

Ziaktu: Toni Râlte

(Ka hmangaih êm che u, ka rawn ziak leh hram) 

Lawmsanga mangang lutuk chu a chhungte rilru tihahtu a tling hial tawh. Awmngaihna reng reng a hre lo. Thil thlen dan awm te a han ngaihtuah a, a rilru a fim thei meuh lo. Police lamin Becky pawh thu an zawt a, "A kalna tur a sawi lo, ka chhuak lawk dawn a. Gate khar hma chuan ka rawn let ang" a tih bak chu sawi tur a hre bik lo. A phone lah a in off char char mai bawk si. A kalna tur awm chi an chhungkhat te lah tumah reng rengin an hmu si lo. Remsanga tak pawh a rilru a hah kher mai. A nau duat lai chu khawiah nge a awm tak ang le? A nu te chu a han ringhlel dawn dawn a, mahse, Hnahthialah daih a awm a, eng a tih a ring chiah si lo. Rinhlelh theih tur awm zawng zawng an dap tawh, Lawmsanga'n thil a hre chhuak ta thut. Police a pan nghal a. 

"Ka nupui hlui Ruthi hian inrawlhna a neih ka ring tlat. Khawngaihin ko rawh u" a ti ta tawp mai. Ni e, Ruthi khan Nguri kha a hua a, a thik bawk. Ani zurui lungpuam hmeichhe nasa ve tak chuan engtin tin emaw Nguri chu a lo rukbotir emaw a ni ve thei tlat. Police lam pawn an bawhzui ta vat a. Ruthi chu an ko ta a. A hlauhthawn hmel angreng hle. 

An han zawt ţan a, Police tih takah an daikhalh hneh bawk a, Ruthi pawh a inpuang zung zung mai. 

"A chungah engmah ka ti lo. Ka ankhum bak kha chu, a hmuh pawh ka hmu leh tawh lo hrim hrim.. " a ti bah nak a. 

A mitmeng chiang taka en chungin Pu Rinliana chuan, "I thîk hle a ni maw? Tichuan, tu te emaw ruaiin i dah thattir emaw i rukbotir ta a" a ti ta khauh a. Ruthi a zâm kher mai. 

"A teuh lo mai. Ka pu, engmah ka ti lo.. Ka thîk vang pawh a ni lo, ih.. Mi pakhatin…" a ti a. A tawp chawt. Chu tak chu an hriat a tul takzet a ni tih Police lam chuan an hai lo. Tihtakzetin Ruthi chu an kawm leh ta a. Ruthi pawn zep nei miah loin Aldrina'n a rawn hmuh dan leh biak dan te a sawi ta a. Engvanga chutianga rawn bia nge a nih a hriat bik chiah loh thu te pawh a sawi. Aldrina number chu an la nghal a, mahse, an call tlang thei tlat lo. Lawmsanga koin Aldrina a hriat leh hriat loh an zawt ta a. A hming chu a hre tawh, Nguri ngaizawngtu a ni a, mahse, a hmel a la hmu lo thung. Remsanga an ko ta vat a. Aldrina chu a lo hre chiang ngang mai. Ani bak target an nei ta rih lo. 

Nguri erawh a kut leh ke phuarin chau zetin a thu chawrh chawrh a. Eitur an pek lai chiahin an phel ve thin. An eitur pek lah a ei hleithei si lo, a nau pai mawlh chu a ngaihtuah hle. Aldrina'n hetiang thil a tithei hi a rin phak bak a ni, a mumang chu sawi loh a suangtuahnaah pawh a la tel ngai lo. Mak a ti tawp thei lo a ni ber. A nuin Aldrina nei tura a nawr vak chhan kha a hrethiam tawh. Ni e, Pa Zova leh a nu kha inbiain, Nguri kal leh a nupui kal a inmil thu te, mi dang an hmuh zawh loh bakah hmu zo pawh nise, an pek phal a rin loh thute a sawi vek a. Pi Sangi mizia hre ţhang tawh a ni a, tin, Nguri hi an fa dik tak a ni lo tih a hre ve kar bawk. Pu Zaia khan thawkkhat laiin a bulah chiah a lo sawi zauh tawh tlat a. Chu chu a hre ta reng a ni. Thil a inhmu rem chho zel a, A fapa Aldrina'n Nguri chu a lo duh hle mai bawk si a, Nguri khan a duh ve mai turah a lo ngaih vangin an inneih theih hlauh chuan a kal pawh a phal emaw phal lo emaw lak theih an inbeisei a. Mahse, Pi Sangi khan Nguri kal man kha a phút ve ta tlat a. Inremsiamna an nei ta kha a nia. A kal man pawh a to khawp mai. Pu Zova te lahin nu ber nunna in a tawrh ai chuan tiin an neih zawng zawng insen pawh pawi an lo ti hauh lo va. Hnahthiala an awm lai khan an lo inremsiam fel diam tawh a ni. Mahse, a nupui a chau zel si a, hmanhmawh a ngai tih hriain a va palai ta tawp kha a nia. An rin loh deuhin Nguri'n a lo hnar ta tlat si! Engkim kha a buai zo ta a nih kha.. 

Aldrina hi a tleirawl lai mizia kha a paih hret hret a, Pastor hna hi a tuina lam a ni miah lo. Mahse, a nu hian "Nang chu pastor tura ka hlan i ni" a tih chamchi vang leh Pastor chu vantlang nawlpui pawhin an ngaihsanzia leh an ensanzia te an hria a, an hlawh a lo chhe lem lo bawk nen. Aldrina lehkhathiam leh rilru chak nafam chuan a zir ve thei ta mai a. An zir lai pawn pakhatna a ni zar zar thin a ni. Mahse, piantharna tak tak a la nei reng reng lo va, a nu leh pa te hmuh phak loha a chetdan tenawm tak te chu sawi pawh zahthlak khawp a ni. Mahse, Pro Pastor a rawn ni ta luah a, tlem chuan a insiamrem ve deuh naa, a chhungril khakna leh hurherhna te chuan an kiansan tak tak thei lo. Pawi deuh chu a tleirawl tilpawr aw mai a nih lai khan an hostel-a girls lama an warden hian a pawngsual tlat mai a. Naupang mai emaw an tih laiin sexah a lo sang viau tawh a lo ni. Kha nu nen khan an hmang nasa bawk a, a rai ta hial reng a, mahse, Aldrina remtihna ngeiin naute kha an paih ta a nih kha.. Chutiang chu a hringnun a lo nih teh hrep avangin, Nguri'n a hnawl khan a ze tha lo chu hmuh theihin a lo ţhang lian ta zawt zawt a. Phuba lak duhna leh a nu nunna chhanchhuah duhna chu an insual reng a, tihdan leh kawng tha ber nia a hriat, Nguri ruk bo chu a puitlin ta hial a nih hi.. A pa ngei pawhin a khap kha a ni a, mahse, A pastor nihna chu hlipin a ramhuai zia a chhuah ta a, Nguri tan chuan thilmak tih loh rual a ni lo ve. 

Nguri hriat dan chuan an dahna hmun chu lei hnuai niin a hria. Tukverh pakhatmah a awm lo va, a thim viau bawk. Mahse, bulb pakhat a awm ve a. Pindan zau tak chu a ni lo, mahse, a uapin pawn lam thawm engmah a hriat theih loh. In chung panna kai lawn ulh zet a awm a. Chu chauh chu tlan chhuahna kawng awmchhun a ni. Mahse, chu leilawn pawh chu zawh ngawt mah se; in chhung a han pawh dawn tho va, an man leh nghal dawn tih a chiang reng mai. A ţah nasat luatah a mit te chu a bui vek tawh a, a hnar pawh a sen hlar tawh. A sam a thur bâm a, Aldrina benna a hnar thi te pawh an khawn uaih tawh. A ngaihtuahna fim a hmang thei lo va, an rawn chhanchhuah hun a nghak tawp mai a ni. 

Kai lawn chu a rawn ri thla leh kauh kauh a. Aldrina leh Pu Zova an lo chhuk mek. Pu Zova chuan lainat hmel angreng deuh hian a rawn melh a, a fapa a thunun zo miau si lo a le.. 

"Le.. Vawiin chu Lawmsanga hnenah he lehkhathawn hi kan thawn dawn a ni. Ka'n chhiar ange aw" tih leh lehkha phek hlai vak lo phawrh a rual nghal a. 

"Lawmsang, min hrethiam rawh aw. I chhungte tan mo ni tlak ka ni si lo va, kei chu ka tenawmin ka bawlhhlawh tawh em mai. Chuvang chuan i fa ka pai chung pawha min nei duhtu Aldrina hnenah ka kalsan ta mai che. Min lo zawng buai lo la.. Ka chhungte leh i chhungte hnenah ngaihdam min dilsak dawn nia. Dam takin le" tih thu chu a chhiar ri kauh kauh a. 

Nguri a inpetruh nasa kher mai. 

. "I ti lo vang. I tithei ngawt lo. Lawmsanga'n a awih ring duh suh. Bum theih mipa a ni lo ve" a ti ţap ţiau a. Adrina a nui suk duh chauh. 

"Naktukah ka nupui i ni ang. A tuk lehah Vellore kan pan nghal ang" a ti a. Rapthlak ti zetin Nguri'n a melh thung. 

"I nu leh pa dik tak te pawh kan la zawng chhuak dawn nia. I beisei aiin ka duat ang che. I fa lo piang tur pawh hmangaih takin ka enkawl ang.. " 

"Zak thei lopa, ka neih ai che chuan ka thi zawk mai ang. Lawmsanga ta chiah ka nih hi" a ti tuar. A biang a ri thak. Aldrina hian a kut a leklam rang deuh thin chu a ni. 

"Pa Zo, ka pa ang chiah i ni a, chutiang chuan kei pawn ka ngai che. Engtin nge hetiang hian i tihtheih? I fapa thiltih hi i pawmpui tihna maw ni a? In lo va rapthlak pafa ve" a ti ve ta sak sak a. Pu Zova mitmeng chu a dul ruih mai. Nguri hi a ngaina a, a duat pawh a duat thin kha a nia. A fapa hi theih nise dan ve tho a duh.. Mahse, amah pawh hian Aldrina hi hlauh chang a nei ve tho.. A fapa hi a rin ang a lo ni lo lutuk a ni. 

Police lam chuan va ţhawn thuta va khawrh tawp ai chuan belhchian phawt an duh a. Lawmsanga ngaihdan a ni lo nasa. Aldrina bak a nih a ring lo bur.. Mahse, Police te hmalakna chu hnial a sawt si lo va. Remsanga chuan Pu Zova biain, A farnu bo thu te chu a sawi pui ta a. Pu Zova thusawi chu an ngaithla ţhap mai. 

"Ka lo hre ve a, i nuin min rawn hrilh a, a zia lo khawp mai. Theihtawp chhuahin kan lo zawnpui ve dawn che u nia. Aldrina pawh a rilru a hah khawp mai" a rawn ti. 

"Bawiha, kha i lehkha tur aw.., " in a thlen rualin a nuin a lo ti nghal a. 

Lehkha chu lain a pharh a. Kutziak pherh deuh a ni. A hma lama kan sawi tawh ang thu kha a lo inziak. Lawmsanga a ner sak. A awih loh dan leh Nguri a la dam tih a hriat vanga a lawmna chu a inzat thuak ang. 

. "Nu, ka chhuak leh lawk dawn.. A pawimawh" tih leh lehkha keng chunga chhuah a rual nghal a. Police station lam a pan ding vang vang. A thlen veleh lehkha chu pein, "Kha bak baka chiang a awm thei dawn em ni? Aldrina hi amah leh amah a rawn intatlut a ni ber alawm. Nguri'n min phatsan ngai lo vang tih hretu ka ni" a ti ta hmiah hmiah mai a. Police lam pawn a chiang thawkhatin an hre ta a. Hmanhmawh takin Aldrina te in lam an pan ta a ni. 

Pu Zova'n kawngka a lo hawnsak a, Police hmel a hmuh chuan a tawlhhnung dãwrh. 

"Khawiah nge i fapa! " an tih chuan, a roomah a va ko nghal a. Aldrin pawh mit nuai chat chat chungin a rawn chhuak. A landanah chuan tlangval fel tak a ni asin le.. 

"Ngurnunsangi i ruk bo avangin man i ni e" tih pahin an handcuff ta mai. 

"Ngawi teh, ka pu, in chiang maw? Nguri hi ka ru bo hleinem. Aman min rawn pan alawm" a lo ti khauh. A sawi zawh rualin Aldrina room bul chiah atang chuan Nguri chu a lo chhuak ta zan zan mai. Inbual fai hlim niawm takin a lang thar sar mai. A mit erawh a la bui deuh thung. 

"Eng nge thleng a? " Pangngai takin a rawn ti a. 

"Hei, i bialpa hlui Lawmsanga'n min report a nih dawn hi.. Ru bo angah che min puh a" Aldrina chuan a lo ti a. Lawmsanga erawh chuan Nguri chu a lo melh ngawih ngawih thung. 

Nguri chuan Inspector chu chiang taka melhin, "Sir, min ru bo hleinem. Ka duhthu ngeia pan ka ni. Ani hi ka pasal a ni tawh bawk" a ti ta mai a! 

Police te lam chu an hrilhhai hmel angreng hle. Lawmsanga an melh hrek hrek ringawt. Lawmsanga hamhaih leh hrilhhai chuan sawi tur a hre mai lo. Nguri chu a melh tlawk tlawk ringawt. Nguri zawk chuan rawn melhin, "Lehkhathawnah ka rawn sawi vek tawh kha. I ring lo em ni? Aldrina hi ka pasal a ni tawh" a ti a. Lawmsanga mitah erawh a melh lo. 

"Dawt a nih chu" a ti nghut. Va pan hnaiin, "Ka mitah en la, sawi nawn leh rawh" tiin Nguri chu a kuai dak a. Nguri mitmeng a hmachhawn takah chuan engkim a hrethiam ni maiin a lang. Ni e, Mitmeng hian dãwt a sawi thei lo. Harsa tih hmel zetin, "Lawmsang, Aldrina hi ka pasal a ni tawh" a ti sap a. A chil a lem khawlh. 

"Aw le.. A tha e.. Min tina hle mai. Hlim ang che u.. Sir, ka tihbuainaah che u in mi hriatthiamna ka dil e. Aldrin, tha takin Nguri hi i lo enkawl dawn nia aw.. Ka kal e" tih leh Lawmsanga chu chhuah a rual nghal a. Police ho pawh chuan tihtheih nei tawh hek lo. An zui chhuak ve ta nghal a. 

Station an thleng a, Lawmsanga chuan, "Nguri kha vau beh a ni. Engtin chiah nge an vau ka hre lo, mahse, ka bula a thusawi kha dâwt vek a ni. Kan chhanchhuah a ngai. He thilah hi chuan keiman mawh ka la ang. Ka nupui hual hi ka ru chhuak dawn.. " a ti nghut nghut a. Police lam pawn a thusawi chu an ringhlel lo. Va tih bung bung ai chuan Lawmsanga hian a ma remhriatna hmangin hma la ta se, Nguri chu chhanchhuah a ni thei zawk maithei. Fimkhur taka ngaihtuah a tul dawn a ni. 

Ni e, Aldrina'n vawi tam tak, "I chhungte bakah i hmangaih Lawmsanga ngei pawh hi ka duh hun hunah a nunna ka chhahsak thei. Nangmah awlsam taka ka ruk chhuah theih che ang khan tu emaw ka biak zeuh chuan Lawmsanga chu mitthi a ni mai. Chutiang thlentir i duh lo a nih chuan, ka thu i awih a ngai. I naute khan nunna a nei ve tawh a, engkim a hre vek a nia. Thil harsa a ni lo, Police kan hmachhawn hunah ruk bo ni loin i duhthlanna a ni tih sawi a ni mai.. A chiang em? " a tih sekna chuan a hneh tial tial a. Aldrina rapthlakzia leh pawisak neih lohzia a lo hre tawh. A hmangaih leh a neihchhun a chhungte leh Lawmsanga nunnain a tawrh ai chuan tiin a inhlan ta tawp mai a ni. Mahse, beiseina tawp thei lo a la kawl tho. Lawmsanga'n a mitmeng a chhiar thiam a beiseina chuan a thil hmachhawn pawh a tiawlsam ve zawk a ni. 

A beisei ang taka Kha thu a sawi laia Lawmsanga hmela tawrhna hmuh tur a awm tak lohah chuan a beiseina a sang lehzual a, a hrethiam tih a hre tlat. Tunah chuan thiam taka lem a chan a ngai tawh ang. Pawn chhuah phalsak a ni lo va, eng lai pawha ven leh mitmei reng a nih avangin amah tlanchhuah kha chu a harsa dawn lutuk, Lawmsanga chet hun a nghah mai a ngai a ni. A phone lah an paih nge an phum bo nge.. An rukbo atang khan a la hmu miah lo. A ngaihtuah fe hnuah Pu Zova bulah, "Pa Zo, ka u tal biak min phalsak u la, thil nih dan te pawh ka hrilh ve loh chuan" a ti ta tawp a. Pu Zova pawn a lo phalsak ve mial. A u number hmetchhuakin a call ta nghal a. 

"U, ka tha aw.. Aldrina bulah ka awm a. Inneih kan tum. Lawmsanga lam chu theihnghilh rawh. A chhungten min pawm thei dawn chuang lo va, hrehawm taka va mo ai chuan tiin min hmangaihtu ka pan ta mai a ni" a ti a. Remsanga chuan Lawmsanga ngaihdan leh thu hriat te a lo hriatsa vek tawh avangin, "Ka swi reng kha.. Aldrina hi i tan a tha ber.. a tha vek e" a rawn ti ve a. Lo ngaithla ve tu tan pawh han ngaihthat lohna tur a awm hlek lo. Nguri erawh chuan a u pawn a hrethiam tih a hrethiam. A lawm ru viau. Zanriah pawh an ruk bo atanga a vawi khat nan a eitui viau mai. Aldrina leh a nu leh pate chiah an khawsa tawh a, a nu eraeh a mu deuh reng a, chau ngawih ngawih hmel a pu. Nguri chuan khawngaih ve hle mah se; a fapa thil tih dan tenawm tak vangin a enliam lui tawp. 

Mu chungin chet lak dan tur a ngaihtuah rauh rauh a. A cigaratte zuk bung pawh astray-ah a khat dul tawh. A rilru chawl thei meuh lo chuan a hmel pawh a tinelawm loh vek a ni. A hlauhthawn ber chu Nguri chuan pawngsual a tawk ang tih chu a ni. Mahse, nau pai lai a nih bakah vau beh lai a ni rih bawk a, chuti maia ngampaa Aldrina pawn mutpui tum luih loh hram a beisei. Zantin mut dawnin ţawngtai ve ziah mah se; zanin erawh a thinlung leh tihtakzetin a ţawngţai, amah ai mahin a nu leh pate an ţawngţai nasa zawk awm e. Nguri chu him dam taka an hmuh leh ngei theih nan tawngtaipuitu a ngah khawp mai. Hostel lama a awmpui a thiante pawn theihtawpin an dilsak ve bawk. Becky chuan chiang takin a sawi duh bik lo va, Lawmsanga nen erawh an inbe reng thung. Zing dar 4 dawnah a chau tawngkhawng tawh lutuk chu a chhing ve thei hram.. A harh chuan dar 8 a lo pel duai tawh a. A fapa a rawn tlan lut chan chan a. "A pa, tho tawh la.. Ka cycle saw a chhia a. Min siamsak la.. A papuia a awm bawk si lo" a ti mawlh mawlh a. An buai atalângin a fapa paeh a ngaihsak tha hman meuh lo, a inthiam lo ru hle. Lu rit burin a tho a, a inphihfai hnuah a fapa cycle chu a va ensak a, siam a lo harsa lem lo va. 

"Apa, Anu kha a lo awm tawh dawn lo ami? " a fapa chuan a ti seuh seuh a. A tu zawk nge a sawi ang tih a ngaihtuah lai takin, "Kha, ih.. A nu Ruthi lo zawk kha" a rawn ti leh a. A khi suk. 

"Awm dawn e. Bawihte, a rawn awm ţêp.. A duat ngawt ang che" a ti dam thlup a. 

"Anu Ruthi ai chuan a hmel pawh a tha daih zawk tiraw.. A pa" a ti leh a. A rilru thianghlimzia piah lamah amah hringtunu zawk 'Anu Ruthi' a ti zawk daih chuan natpui duh nise, natpui tham a tling awm e. Mahse, Ruthi hian a nunah chhete maha hmun a chan tawh miau loh vangin a fapa thusawi chu a lawmawm zawngin a laksak a ni. 

He tih mek lai hian Nguri pawn chhuah theihna remchang a melh ve reng a. Aldrina bulah, "Ka thiantha ber Becky tal ka hmuh phal rawh. Ka thawmhnaw min pe turin ka duh a ni. Inthlakna pawh nei lo va hetia awm tawp chu a hrehawm em mai. Ani chuan a hrethiam vek dawn" ti zawngin a nawr ve mawlh mawlh a. Aldrina chuan Nguri lemchanna chu a awihsak nge a ngaih a tha tawh zawk a lo remti mial mai le.. Aldrina phone atangin Nguri chuan Becky chu a be ta a. Speaker on zel a ngaih avangin fimkhur erawh a ngai dawn hle a ni. 

"Beck, keimah Nguri.. Ka phone a chhe daih a. Ih maw, mate, tlawmngai thei la ka van duh. Ka thawmhnaw inthlakna tam vak lo kha min lo pe thei hram ang em le" a ti nghal mawlh mawlh a. Becky zawk a lo hamhaih. Mahse, Lawmsanga nen inbe sa vek tawh tho a ni ve a, a hamhaih rei lo. 

"Awii min rawn be har ka ti lutuk a, vawiin class kan chawl alawm. Inpa pawh chu ka hmu ve chak. Ka lo kal ang. Ka ngai tawh lutuk che.. " a ti ve ta sar sar a. 

"Ka room chabi kha ka keng daih sia, tichhe mai ru aw. Tam a ngai lo ania. Underware lam kha tam deuh se a tawk mai.. Kei pawn ka ngai che lawm.. Ka inthlahrung ve deuh a.. " Nguri pawh chuan a lo ti ve a. 

"Ka lo chhuah hunah ka lo sawi ang. In pa te in pawh ka la hre si lo va.. Pastor nupui i ni mai dawn chu a nia.. Inru ang in ni sia, an thunun dawn lo mi? " a va ti leh duah a. Nguri'n Aldrina a melh, a lu a lo thin khum a. 

"Dawn lo aniang, ka hre tawh bik lo. Kha lam chu.. Lo kal vat rawh aw, e chuan ka dawhkanah khan damdawi ka ei lai a awm a, mut duhna lo zawk kha.. I hrethiam em? Kha kha min lo ken bawk rawh aw. Ka nau pai lai tan hian ei a ngai sia" tih leh phone dah a rual nghal. 

Becky chuan Lawmsanga a be ve nghal vat. Thil awmdan chu a sawi nghal par par a. Lawmsanga chuan, "Chîk takin en la, thuchah duh che a neih ka ring a. Fimkhur takin va che ang che. Kan innghahna i nih kha" a ti a. Becky pawh tumruh zetin a bu nghat mai. 

"Mahse, damdawi kha a rawn sawi a. Damdawi ei lai a neih awm ka hre miah lo. Eng nge awmzia ni ta ang? " a ti a. 

Lawmsanga chuan, 'Ngawi teh, beck, mut duhna lo zawk a ti a tiraw.. Mut duhna damdawi rawn keng rawh a tihna a ni thei ang em? " a rawn ti a. Ngun takin an han zirchiang a. Nguri hian mut duhna a mamawh dawn tih a rinthiam theih avangin kensak risk tawp chu fuhin an hria a. Thawmhnaw zingah zeh bo an tum ta a ni. 

"Mi hriat tam hmaa sawi fel chi a ni lo maw? I nihna te avang hian" Nguri chuan Aldrina melh chungin a ti a. 

"Kha lam lungkham suh. Ka farnu angin ka sawi dawn che alawm.. Mi dang hmuh turin awm lo la a tawk" a lo ti hmuk. Nguri chu a bu nghat ringawt. A hlauhthawn em em inpawngsualna a la thleng lo va, Lawmsanga tan a la thianghlim avangin a lawm em em tawp. Becky chu a innghahna a ni ta. 

Dar 12 rik hma deuhin Becky chu Aldrina'n kawna a awm chu a zuk hruai a. Becky chuan lemchan a thiam kher mai. Nguri a lawmpuizia leh Lawmsanga a duhpui lohzia te a sawi pap pap reng a. Aldrina erawh a ngawi reng, a ringhlel deuh pawh a ni mahna. An han inhmu ta chu an inkuah chawt a. A langah chuan an nui dun hawk hawk mai. Thawmhnaw chu a pe a. Nguri chuan roomah a luhpui nghal a. Thawmhnaw intel kara damdawi bur lian lo tak chu la chhuakin khum ke leh bang inkarah a zep ta a. 

"Thingpui in rawh aw. Ka lum mek.. " Nguri chuan a ti a. Becky pawn a pawm. 

Pu Zova te hriat phak ngei turin, "Awii, Ngur, ka lawmpui che. Lawmsanga kha chu ka duhpui hlawl lo che alawm.. Bakah a chhugte kha hrawn an hrehawm hmel em mai. Chuan, hetah chuan ti chauh hi an ni bawk sia, i lal ngawt ang" a ti sar sar a. Nguri pawh chuan Aldrina'n a en kur tih hrerengin, "Nia, ka vannei ka ti mai. Inneih hunah ka bulah i ding dawn tih kha hria la aw" a ti a. A nui sâng bawk. 

"Min hman loh ka lo hlau tawp a" Becky chuan a ti a. Nguri chuan thingpui a va siam a, Aldrina leh Becky an titi thung. Aldrina pawn Becky chu Nguri'n a bum hneh vek tawhah ngaiin rinhlelhna nei lem loin a kawm thei ve tawh niin a lang. Nguri chuan thingpui chu a rawn chawi a, Pu Zova te nupa a phawt a, chumi hnuah an pathum chuan an in ta a. 

No sengkhawmin choka lam a panpui nghal a, Becky pawh chuan, "Aldrin, khaw nge in bathroom, ka zun a chhuak lutuk" tih leh din a rual nghal a. Aldrina pawh chuan choka lam a kawk nghal zauh. Becky chu zun chhuah hmel zetin a tlan phei chan chan a, bathroomah a lut nghal. A kalh lo thung. A rang a rangin Nguri chuan a bra kara lehkha them a dah chu bathroom kawngka inkau deuhah chuan a zep lut zauh a, no a sil zawm lenghal. A sil mek laiin Aldrin a rawn lang ve zui zat. A man teuh kher mai. A lung a phu dup dup mai. Becky pawn bathroom chhuata lehkha them chu chhar vatin a bra karah a zep ve nghal zauh. 

Kawn thleng Aldrina'n a zuk thlah leh a, taxi a hmang leh mai dawn a ni. Aldrina a tlan haw rual chuan Lawmsanga a rawn lang ve nghal chat. Becky nen chuan hmanhmawh takin chu lai hmun chu an tlanchhuahsan ta nghal a. 

Nguri pek lehkha them chu la chhuakin an chhiar dun ta a. 

"Zanin dar 10 leh 11inkarah.. Kawmchhakte theihai kung bulah.. " tih chiah hi a lo inziak. Mahse, a sawi awmzia an hrethiam a, a tawk mai e. Lawmsanga a helhhawl ngei mai. 

Nguri chuan fridge hawngin vawksa rep chu a la chhuak a. "Pa Zo, vawksa rep hi ka siam dawn. Ka ei chak e" inthlahrun hmel deuh hian a ti a. 

"Siam rawh siam rawh.. I ei chak apiang kha siam tawp tawp rawh" a lo ti mai a. 

Chutih lai chuan inleng an nei ta a. Nguri an hmuh chuan an phâwk deuh, ni dangah chuan inleng an neih dawn chuan a roomah a tawm bo zel kha a nia. Tunah erawh an rawn nangching ta si a. 

"Mikhual in nei a ni maw? " an inleng pa chuan a ti a. 

"Nia mawle.. Ka thianpa Zaia fanu a nih kha.. Nguri a nih saw.. Hnahthiala kan awm laia kan nau duat a nih kha" Pu Zova chuan a lo ti duah a. 

Nguri lam chu an sawi zawm ta lo. Eirawng a bawl ta daih bawk nen.. Aldrina inbual hlan leh pu Zova leh an inleng pa inkawm tui lai tak chuan damdawi kha phawrhin, vawksa rep chhum tih loh chawhmeh dangah chuan a far ta vek a. A far zo vek mai. A bur ruak an hmuh chuan Aldrina a fing si a, a ringhlel ang tih hlauin dekchi pakhat chhungah a dah rih ta ringawt. 

Zanriah chu an ei ta a. Ani chuan vawksa rep ngawr ngawr bak a ei lo, an rinhlelh lutuk loh nan a dang chu a suak ve tak naa.. A ei lo. Chaw ah te chuan a phum bo ta vel mai mai a. 

"I nu nen pawh kan inbia a. Hetia thu i awih takah chuan ani pawh a lawm viauin ka hria a. In pahnih inneihna chungchang chu nakinah i nute nen felfai zawkin kan la sawiho ang chu" Pu Zova chuan a ti sauh sauh a. A duhthlanna a nih lohzia hretu chu amah leh Aldrina chauh an ni. 

"Nia, ka nu pawn min rem ve thei ang chu" a ti mai. A ngaihsak hurh duh tehchiam lo. 

Chaw eikhamah Aldrina chu Kohhran secretary te inah a va kal zuai a. Pu Zova nen tv enin an thu dun ta reng mai. An nu erawh a mu leh daih tawh. Aldrina chu a rei lem lo. Dar 9 rik hma deuh chuan Pu Zova chu a mu a, Nguri chu a ham der vak vak a, "Ka chau deuh mawni.. Ka mut a chhuak. Ka mu dawn" tih leh a room lam pan a rual nghal. Aldrina chuan, "Nguri" a rawn ti fiak thak. 

A va hawilet a. "Ka bulah mu rawh" a ti sup a. Nguri a ral riai riai a ni ber. 

"Enteh, nupa kan la ni lo.. Naute ka pai bawk" a tih mek laiin, "Ka hria.. Naute kha a thih phah dawn lo. Zanin chu ka bulah i riak ang" a ti chhur chhur a. A mitmeng rawng inthlak mek chu Nguri chuan a hmuh hmaih lo. Mi nunrawng ber a che leh dawn tih a hai lul lo mai. 

"Khawngaihin" a ti tham chhal a. 

"Lut rawh" a rawn ti ţhawt. Vai ruaiin Aldrina roomah chuan a lut a. Tukverh te chu bar kham lo se a zuangthla duh hial ang chu.. Khumah chuan thuin a pum a chul a. 

"Lalpa, min hmangaih a nih chuan" ti sepin a bianga mittui luang chu a hru zauh a. Aldrina a rawn lut ve chiah bawk.. 

(A tawp ta.. Han tih theih a chakawm tawh hle mai. A la tawp hlei thei lo 😢😀