Thutiam 11

THUTIAM.. -11

Ziaktu: Toni Râlte

Nguri chu pasal nei mai tawh tur mah nise, a zirna a laklawh si a, a haw ta chuang lo. Lawmsanga fuihna angin zirna lamah a insawrbing tan leh a. A harsa rih khawp mai. An inneih hunah Manipura zina a nu leh pa diktak te zawn chhuah kha an sawi dun a. An hlawhtlin erawh a ring lem lo. Khutiang mihring zozai zingah. Becky chuan a duat khawp a, eitur te hi a leisak reng a, Lawmsanga lahin a châk a sawi tawh chu a rawn pe vang vang zel bawk. Rai no angin a la awm chiah lo naa a fimkhur ve hle. Fa enkawl a thiam angem tihte hmangin a ngaihtuahna khawvel te a tizau ve a. Lawmsanga fapa pawh theihtawpa hmangaih a tum ve a ni. A nu atangin enhran leh thlim nih hrehawmzia a lo hre tawh a, nuhrawn pawh ni dawn se, sual a tum bik lo. A nu ang takin hmangaih thei lo mah se, that chhuah erawh a tum ve bur mai a ni. A nuin a rawn be leh ta miah lo va, a u te nen erawh an inbe deuh reng thung. Achawii'n a thuam chhawm vel pawh a buaipuisak vek dawn a, he nu hi chu aw.. Rulhlet a la tum ve khawp mai. Mo ang pawn a ngai thei tawh lo, a ú tak tak angin a en tawh. Mi fel tak zawng a ni ve chiang khawp mai. Inrinniah Lawmsanga ngenna angin Lawmsanga te inah zanriah an ei dawn a. A zah thup nan Becky pawh a tel ve dawn. Amah chauha va hmachhawn kha chu a zâmawm ve deuh bawk a ni. Zahawm leh felfai takin a inchei a, Lawmsanga'n a rawn lam a. An chhuak. 

An va thlen chuan Lawmsanga te colony ami zawng zawng tihtheih deuhthaw an lo awm ve chu niin, a zak angreng hle. Lawmsanga nî, Zamteii chuan a lo dawngsawng vat a. Nu te lam, ngo vir ver, nuih heh zet mai a ni a. Lawmsanga pawn a bulah, "Ka ni Zamteii nen in inngainat phawt chuan i tan thil harsa engmah a awm lo vang" a lo ti tawh a. Ni zami pawh chu nel a tum khawp mai. An han inchibai liam liam phawt a, Lawmsanga pa Pu Mawia chu a zahawmin a dam thlup mai. A nu Pi Lawmi erawh a thinchhiat hmel lek lek, mahse, Lawmsanga bawkin a zaidamzia a lo hrilh tawh a. An landan anga teh a tum lo. Lawmsanga farnu Teteii pawn nui sâng chungin a chibai a, a ngainatawm reuh hle. Lawmsanga u chiah Police chu a hmeltha kher mai. Lawmsanga ai pawn a hmeltha, Muanpuia a ni a, ani pawh a fel hmel khawp mai. An upa ber erawh an zin lai a lo nia. A hmu ve ta lo. 

An han titi a, ngawih reng bik kha a hreh ve si, a lo zawm ve zeuh zeuh. 

Ni Zami'n, "Kan Lawmhnapa duhthusam hmeichhia i nih vang pawh ni loin i lo hmeltha reuh em a nih hi. Ngawi teh, Lawmhnapa ai chuan Muanpuia nen hian innei zawk teh u, in inhmeh zawk" a ti lang lang a. An nui ham ham mai. A nuam chho tan e. Eirawng bawl fel vek tawh a ni a, tihtur em em a awm tawh lo. Vanropuia, Lawmsanga fapa pawh a rawn lang a, a tirah a zum deuh cheih cheih naa, Lawmsanga'n, "Hmana motora kan phurh 'Anu' i tih kha a nih hi. Anu han ti leh teh le" a ti a. 

Nui sen sen chungin, "Anu" a ti sep a. Nguri a lo lai mah zawk. 

A lo pawm ta vat a, Bawihtea chuan a zui kawi ta reng mai. Pu Mawia te nupa pawn mak an ti, an ina lawi lut vak lo te hi chu a nel mai mai ngai lo kha a ni sia, Nguri a belh chat danah nufa niawm reng niin an hre ve a, an lawm nupa khawp mai. Nguri lahin a ngaina telh telh bawk si, Bawihtea chuan zawhna ho deuh deuh a zawt chamchi a, a lo chhang thei zel bawk nen.. Engkim chu a fuh vel vek a ni ber. Lawmsanga roomah an lut a, mipa room mah nise, a hnawk lem lo. 

"Khum ka siamtir a, duh dan te i nei em? " a ti sur sur a. 

"Nei hran lo. Zau deuh kha a tha a ni mai. Bawihtea kan bula a mut a ngai tawh dawn sia" a lo ti ve a. 

"Naa.. Thla khat vel tal chu a pite bulah la mu rawh se.. Engtin nge nianga..? " tiin awmze nei zetin Nguri a va melh. A lo nuih sak a, "A mutthilh hnuah" a ti sam êt a. 

"A harhvang ropui si. Chi loh.. Chaw bel bulah ka ţamchhawl duh hleinem" a ti bul bul a. Nguri a nui char char. Becky erawh Teteii nen khan an inkawm thei nghal mai a, an sawi duhzawng a lo inang a ni teh chêk ang chu.. An inkawm tui nasa mai. 

Zanriah ei pawh a lo hun dawn ta a. Hostela kir leh tur an ni bawk nen.. chaw ei chu an siam ta a. Pu Mawia'n tawngtaina neiin, tui ti takin zanriah chu an ei tlang ta a. An ei kham an insengfel mek lai chuan, kawngka chu a rawn inhawng rawp. Ruthi a lo lut hlawl mai le! 

Chîk em emin Nguri chu a melh tur ngan mai a. Pi Lawmi'n, "Eng nge ni ta.. I lo kal teh mial? " a tih pawh chu a ngaihsak lo. Nguri chu a pan ta chher chher mai. Nguri chuan tu nge a nih a hre lo, A vawikhat hmuhna a ni miau a. 

"Nang hi maw ka fapa enkawltu tur chu.. Ka fapa hi nang ang mi hur enkawl ka phal hleinem" a ti ta siah siah mai. Nguri hamhaih lutuk leh hrilhhai hmel chu a va khawngaihthlak tak.. 

"Ka.. Eng nge awmzia" a ti bah nuaih a. 

"Ngur, ka nupui hlui Ruthi a nih hi. Ruthi, he inah hian tihtur engmah i nei lo. Min chhuahsan rawh" Lawmsanga'n a lo ti nghut. Bawihtea erawh a niin roomah a luhpui daih. 

"Nei e.. Tihtur ka neih vang alawm ka lo kal. He ina awm zawng zawngte hian hre rawh u. In monu tur hi mi pasal ngaihzawn hreh lo, sex video hial siam tawh a nih hi. He tiang mo hi in duh a maw? Bawihtea nu a tan in duh a maw? Min chhang rawh u" a ti tuar tuar a. Zu rim a nam huam bawk. 

Lawmsanga chuan a kut hum ruh kher mai. Ben mai chakin a sahal tawh a ni. Chu chu Muanpuia'n a hai lo, a va inrawlh ta tawp a. Nguri lah a khur hlawk hlawk a, hnuai lam a bih ngat ngat tawh mai si. 

"Ruthi, kan monu tur hi a nunhluiah chuan engtin pawn a awm thei. Keini chuan kan pawm thlap e. Ka nau hmangaihber a nih hi.. Chuan, khatiang i thusawi avang khan inneih kan thulh ring duh suh. Chhuak rawh" a ti ta hmak hmak a. Pu Mawia te nupa erwh kut invuanin an ding zum reng. A thleng rang lutuk a, a ţhawng ve deuh a ni mahna. Mi dang ho zawng erawh chuan mak an ti tih an hmelah a lang chiang hle. An monu tur chu an rin ang a ni lo te pawh a ni mahna le.. 

"Kha i bialpa mi pasal fa te kha a ni zawk lo maw? Tuna i pai hi" a tih leh meuh chuan Lawmsanga a insum zo ta ngang lo va, Ruthi hmaiah chuan a beng ta a. Hmeichhia leh naupang kutthlak duh ngai lotu a ni a, a vawrtawp ve deuh a niang e. 

"I bialnu vangin min beng a maw? Nang pawh hi engmah i ni bik lo. Kan inthen atanga reiloteah bialnu i nei nghal a. Tenawm lutuk.. Hei hi lo hria ang che u, ka fapa hi ka rawn la dawn" ţap deuh par chung chuan Ruthi chuan a ti a. 

"Ekhai! A sawi pawh i sawi zak lo mang e. Kan tupa hi i uiresan atang khan a tan i thi tawh.. A hringtunu zawng i ni ngei mai. Mahse, a nu nihna i nei tawh lo ve. Eng pawhnise, he inah hian vawikhatmah rawn kal tawh ngai suh. Chhuak rawh" Pu Mawia aw chu a hlauhawm kher mai. An makpa leh Muanpuia te chuan an namchhuak ta a. A la rak tuar tuar zui. 

Nguri erawh a tla vawn vawn niin a hria, a zak lutuk chu chu lai hmuna thih mai te a duh rum rum. Becky a kuah a, chhuahpui mai a tum laiin, "Ngawi teh, la chhuak suh u. Nguri, khatin kimki suh. Engkim kan hre vek tawh alawm.. A sawi ang kha i ni lo tih pawh kan hria.. " Pu Mawia bawk chuan a lo ti a. An ding leh rih. 

"Ni e, ka pa, Ruthi sawi kha a dik alawm. Nguri hian kan intawn hmain pathlawi emaw a tih vangin U Thanpuii pasal Joela nen khan an inngaizawng a. A hnuah mi pasal a ni tih a hriatchhuah leh tak avangin a bansan ta hmak zawk a ni. Ka hre vek alawm. Sex video chungchang kha chu Joela'n Nguri vau nan a hmang a, keiman ka pui. Tuman video chu an hmu lo, amah Joela bakin.. Eng hmeichhia pawh niin ks hial lo ni ta pawh nise, Ngurnunsangi hi ka hmangaih a, ka ta chauh a ni reng ang. Nupui uiresan tawh thinlung hneha mi pangngaia min siamtu hi ka phatsan dawn reng reng lo" Lawmsanga aw chu a nghet charh charh khawp mai. Inringtawk zetin chu laia awm ve te chu a melh kual bawk a. Nguri chu panin duat takin a kuah a, "Bawihi, ka thlah ang che u.. Engmah a ni lo. A tha vek aw.. Ka awm alawm" a ti seuh seuh a. An hmuh lai rengin a hruai chhuak ta a. Nguri erawh tawngkam khat pawn a tawng tawh lo. Eng thu mah a ka atanga chhuak tur a awm lo. Hawn kawngah Becky a ang hlak hlak a, Ruthi rapthlak a tihzia te, Lawmsanga nen an inthen chu a lawmawm zawk thu te thlengin a sawi. Nguri erawh a la ngawi kal zel. Hostel an thleng a, chhuk dawnah, "Zanah ka rawn bia ang che. Ţap suh aw" LWmsanga'n a ti a. A bu nghat ringawt. Vanduaina pawh hi a hlawm hlawmin a lo kal a nih dawn hi. 

In lama an kalsan takte pawh an titi ve nak nak mai. An ni Remi chuan, "Khatiangte chu neih chi a ni dawn em ni? Mama pawh a la uiresan ve mai lawng maw? Mi pasal ngaizawng ngam chinte chu," a ti hlak hlak a. 

Ni Zami erawh chuan, "Tu pawn nunhlui kan nei alawm. Kan kalsan tawh ber a hnu. Nguri kha kei ka ngainat zawng tak a ni. A felin a rilru pawh a tha ang. Bawihtea'n a ngainat dan atang reng khan" a lo ti ve thung. Hemi te unau hi an zia a inang lo khawp mai. Ni Remi hi zawng a thim zawnga thlir mi a ni a, tin, mi han rel neuh neuh te hi a hrat bakah veng chhung thil thlengte hi a hre thei zêk mai. Ni zami erawh tupawh kawm thei, an inah pawh chuangkai an tam thin.. Ri hawr hawr chi a ni a, tumah a rel ve ngai lo. 

Pu Mawia chuan, "Ni e, Zami sawi ang khan inneih khàm tur khawpa pawi a ni lo ve. Kan fapa hian a then thei dawn chuang lo, Lawmsanga luhlulzia kan hriat tawh kha.. Tikhan khawiahmah sawi darh lo ula, nakin zelah pawh a inngaihbel theihna lam hawi ţawngkam cheh loh a tha ang. " a ti dap dap a. An bu nghat nghat hlawm mai. 

Ruthi chu a âng hlak hlak reng a, a pasal chuan ngawi rengin a lo ngaithla ve tawp. Engvanga Lawmsanga nupui neihna tura inrawlh chhen nge a nih a hrethiam lo. A sawi danah chuan a fapa enkawl turin a duh lo tih kha a ni mai a, ani Ruthi pawh eng ual a ni chai si lo. An intitlan zeuh zeuh reng a, an pa hian a mize dik tak a hriat takah chuan then hlen pawh pawi a ti lem lo, a chhung ten an lawm vak lo bawk nen. Mahse, Ruthi zawk hian, "Lawmsanga ten min hmusit lutuk ang. Inthen ka duh lo" a ti ve tlat a, a chen ve reng chuan nupa na nâ na chu inrem hun an nei ve leh mai thin. Fa erawh an la nei lo, fa nei tawh phei se chuan a pasal hi a rilru a hah thei ngawt ang. 

Ni e, Ruthi hi kar hmasa khan mipa pakhatin a rawn tlawh hlawl a. A hming pawh a sawi duh lo. Lawmsanga leh Nguri te inneih tur thu leh Nguri rai thu te chu a hrilh a, Nguri nunhlui sawi kaiin a fapa enkawltu atan a tlak loh thu te nen lam a fah chiam a nih kha. Ani Ruthi Lawmsanga laka thikthu la nei bawk si chuan a lo lem duak duak a. Chu pa thusawi chu rinhlelhna chhete mah a nei lo. A kai phur sauh sauh a, Lawmsanga nu bulah a mo tur chanchin a va sawi ta hrep a nih kha. Eng a ang lo tih a hriat hnuah an chaw ei khawm lai ngeiin Lawmsanga chhung leh khat te hmaah Nguri nihna dik tak chu a va phawrh fai ta leng a nih kha. Mahse, an nem chhuak leh ta bawk si. Thinrim tak a ni. Zep thu a cheng lo ve, a nun khua hi a harin Lawmsanga a ngai ngawih ngawih thin. An inneih laia a care zia leh duatzia te, hausa le lu lo mah se, an nghei ngai bik lohzia te leh mi dang an rawn lan hmaa an hlim dun theihzia te khan a ngaihtuahna khawvel an chhuahsan thei reng reng lo va. Zantin deuhthaw a ngaibtuah kir a, a fapa te chu a ngai ve ngawih ngawih, mahse, a biak leh chul phakah a awm tawh si lo. A fapa lahin a ngaina tawh bawk si lo va. Chu a phurrit, sawi chhuah chi ni bawk si lo chuan a thunun tlat avangin a chhawk nan zu a in leh mai thin. Chhawk a hnehn a zual zel zawk si a, a pasal lakah a thinrimna leh natna te chu a hrithla ta thin a. Tuna a pasal hi thenin kir leh dawn se, an inah mi chuang mai a ni tawh bawk si. A ma cho chhuah natna mah nise, Ruthi pawh hi mi vanduai leh khawngaihthlak tak chu a ni ve reng reng e. 

"Nu, Nguri chu eng emaw tal te pawh leisak ve la. Mi ngaihah pawh a mawi lo " Rinfela chuan a nu en chungin a ti a. 

Ner nawk chungin, "Khanglang a. A engvang chuan maw ka leisak ang a. Ka pawisa dere pawh a phu lo ve. I duh leh leisak la ti nia" a ti hmak mai. 

"Nia, ka leisak ve ang. I fa ni lo mah se, kha chen i lo enkawl tawh a, hmangaihna tlemtal pawh i nei lo tihna a nia. I mak ve thlawt" Rinfela chuan a ti pawr ve hlur a. Mipa a ni bawk a, a nu anga mize tha lo nei a ni lo bawk nen, Nguri chu a ngai thin hle. A khawngaih bawk. Unau dik tak ni lo mah se, kha chen kha unau dik tak angin an lo khawsa tawh a. Nguri pawn a ngaina vein a rawn hawn apiangin a thil tur a rawn hawnsak ve hram hram thin kha a nia, an thisen a lo nih loh vanga thlauhthlak ngawt chu a duh bik hauh lo. 

"Aldrina chu nei dawn se, ka thuam ropui ngawt ang" a nu chuan a ti a. A mitmeng a thip leh hle. 

"Ti nge Aldrina chu neihtir i duh em em a? " 

"Chhan a awm a ni mai. Ka hausakna tur Ngurnunsangi hian a tichhe vek a nih hi" a lo ti hlar a. Rinfela chuan a hrethiam ve chiah lo. Aldrin a neih vanga an hausakna chhan tur awmin a hre lo a ni. 

"In leh lo chu engtin nge Nguri chuan a tih tak le? " a thuphungin a ti a. 

"Ele! Min pek phal i ring em ni? Pasal a neih rualin kan chhuahsan ve tawh mai ang chu" a lo ti leh hmiah. 

Rinfela chu a bangbo ngawt mai. An awm zel dan tur pawh a ngaihtuah thiam tawh lo. Zan tin a nu bialpa lah hi a lo riak tawh mai si a, vawi khat a khak tawh a. Namên loin a nu a so a, a rapthlak si a, ngawih lamah a ramtang ta tawp mai a ni. A putea te lah hian an rawn chim reng a, hne chang a ngah malh malh ta hle mai. Dini lah eng emaw hlekah a rawn tlan zel bawk nen, an la inthen tak tak pawh a ring. A pain a rochun in chu luaha mahnia awm daih mai te pawh a suangtuah hial tawh a ni. Thawhchhuah a la nei si lo lai hi a buaina a ni. Tunah hian private schoolah inhlawhna chu a hmu ve ngei tak naa, an hlawh a beitham angreng si a, nupui chhia tha pawh hmu mah se, nupui fanau chawm nan chuan a tlem lu deuh a ni e. 

Nguri erawh a mu leh ta chawrh chawrh mai. Becky chuan a khawngaih em em a, a bulah a tâp deuh chawt reng mai a ni. Nau pai a ni si a, ei leh in a ei tha si lo chu buaina a tling. A batchmate te pawn a rai tih an hre si lo va, "Thlarau te pawh i ang alawm le.. I cher bawk si" an ti hial a ni. Lawmsanga'n hmuh duh thin mah se; a inla hrang rih tlat. Lawmsanga a huat vang ni loin a inthlahrung em a tin ni. A chhungte pawh a zah ngawih ngawih, engtin nge an sawi zui ang tihte a ngaihtuah a, a lungphu a rang nasa thin. Mi khawngaihthlak Ngurnunsangi.. 

Hun chelh din ngawt theih ni hek lo, ni a ral ve zel a. Achawii te lam pawn thuam chhawm an theih ang angin an lei tan a. Nguri pawh an rawn lem lo. Amah Nguri'n an kutah a dah vek bawk nen. Mi pangngai inah a lawi dawn a, tlawm lutuka luhtir kha an hreh ve si, a sen pawh an inseng nasa angreng. A papuia te leh patea te lam pawh an ţang ve bawk a, an thil lei chu tam le lu lo mah se, a changkangin zahpuiawm loh tak tak vek an ni. 

Nguri pawh fuihna leh nawrna a dawng nasa bawk a. Inneih thulh a nih miau loh chuan hetiang ringawta awm theih a ni bik lo tih a hria. Insanmar ve hram hram a tum a. Harsat zawng a la harsa ngang mai. Zirtawp zan a ni a, a hriat ngai loh number atangin call a dawng a. 

"I nu leh pa te diktak i hre duh tiraw? " a rawn ti a. Hmeichhe aw a ni. 

"Aw i hria em ni? " a ti a, a lung a phu dup dup mai. 

"Ka hre maithei. Mahse, tumah hrilh rih suh aw. "

"Tu nge i nih reng reng, engtin nge ka chanchin i hriat theih? "

"I tet lai atanga hre tawhtu che ka ni alawm.. " a aw chu a nem hle. 

"A ni maw? Khaw nge ka nu leh pate chu an awm"

"Hmanhmawh lutuk suh. Naktuk chhun dar 1-ah inhmuh kan tum dawn nia. He thil hi a serious deuh vangin mi dang hriat a rem rih lo va, nangmahin i lo kal dawn nia" a rawn ti a. 

"Khawiah nge niang" Nguri a phur tawh takzet. 

"Bethesda Hospital thlangah ka lo awm ang.. Dar 1 a nih chu aw" a rawn ti a. A dah nghal daih. Nguri chuan van lam enin "Lalpa, a tawpa tawpah chuan" a ti sap a. A nu leh pa tak tak a hriat hunah chuan inneihna pawh phur takin a hmachhawn thei tawh ang chu.. 

A tukah chuan phur takin a insiam a. Becky pawn a awmdan chu mak a ti, a lawm tho bawk sia. Mahse, a kalna tur leh a hmuh tur chu tuma bulah a sawi lo. Lawmsanga takngial pawh a hrilh lo. Thil a khaw lo zo ang tih a hlau ve bawk nen. Taxi hmangin Bawngkawn lam panin an tlan ta vang vang a. A rilruin a tawngtai mawlh mawlh mai. Taxi fare a pek lai chuan a phone a ri a. Amah kha a ni. A la ta vat a. 

"Lo hawi thla la" a rawn ti a. A zuk hawi thlak chuan nu ti ila kum 37 bawr vel tur, hmai duk pheuh pheih, cher ve zet hi a lo ding a. A mitmeng a hriam hle. A zuk pan thla a. 

"Khaw nge an awm? " a ti nghal tâwng a. 

"Hmanhmawh suh ka tih kha.. Lungngai lo phawt rawh. Tanhril lamah kan kal a ngai dawn a. " a ti a. An inzui chho leh a. Chu nu chuan scooty a lo nei a, an inphur ta vawn vawn mai. An inbe mang lo. Nguri chuan a ngaihtuahna a kawm melh melh ringawt. A nu leh pate a hmuh hunah eng nge a sawi ang tihte a ngaihtuah a. A helhhawlh kher mai. 

MZU thlen hma si-ah laklawh deuhin an ding ta thut a. 

"He tah hian lo nghak ang" a ti mai a. Ngaihthat lohna engmah nei loin Nguri pawh a thu ve mai. 20 mins vel zet an thut hnuah Eco van dumpawl a rawn tlan ta a. Motor veivak a tam lo kher mai. An bulah a rawn ding chat a. 

"Lo lut rawh le" a khalhtu chuan a ti a. Mask a hren vangin a hmel a hmuh theih loh. 

A chuang lut a.A kalpuinu erawh a fing reng thung. A let zawngin an tlan leh a. Kawng chanve awm vel an thlen hnuah, a ding ta a. 

Driver chu chhukin Nguri thutna lam kawngka chu a rawn hawng a, Nguri chu a ngaih a tha lo tan. 

"Ti nge i din? " a ti khur dat a. 

"Hei hi maw le" tih leh syringe rawn phawrh a rual nghal a. Nguri hamhaih buai lai takin a nghawngah chuan a vit ta thawih a.Minute khat pawh a liam hmain Nguri chu mitthi ang chauh a ni ta. A muhil ta der mai. Chu pa chuan a mask chu hlipin a phone a phawrh a. 

"Ka tifel thei e. Ka rawn hruai ang" a ti sup a. Nguri melh leh zeuhin driver seatah chuan a thu lut a, a tlan leh ta a. 

"I chesual ang tih ka hlau a ni. Man i nih teh chuan aw" A pain a tih mek lai chuan, mitmeng hlauhawm zeta a pa melh chungin, "Tuman ka chungah engmah an ti lo vang.. Tunah chuan kan hlawhtlinna chiah kan thlir thei ta" a ti hniam raih a. A tarmit phena a mitmeng chu a phur sarh mai… 

"Lawmsang, Nguri a rawn haw thei lo. Ka call tlang thei bawk si lo" Becky aw-a thlaphanna lo lang chu a hre thei. Vawiin chu inrinni a ni bawk a tiin huan lamah hna an thawk a. Nguri a la biak tlak lutuk loh avangin a va be sek lem lo. 

"Kan be ve chhin ange" tih leh dah a rual a. A call nghal. Switch off! Dar 6 a ri hnai tawh a. In an thlenna a la rei lo. Dar 6 thleng thleng khaw nge a kal ang. A ngaih a la tha lo em em rih lo. Chimbuai a duh loh vangin a phone pawh a off rih a ni maithei asin tih rilru a la pu. Chaw te an ei fel a, dar 7 a ri ta. Becky a va bia, Nguri a la haw ta chuang lo. Eng pawh ti dawn se, a riak chhuak dawn anih chuan rawn hrilh ve awm a nia a ti rilru a. Nguri lakah pawh a lawm lo lek lek hman hial. A chhungte inah a riak dawn aniang tiin a inhnem a. A rilru erawh a nuam chiah tawh lo kher mai. Zan dar 11-ah a call leh a, a la ngai reng. 

"Hm… ka tibuai lo tawp ang che. Chuti taka tihbuai i hlauh chuan" tih nghut pahin phone a dah a. A mu ta daih. A chau ve bawk nen, a hriat loh karin a lo muhil daih. 

Sunday zingah hi chuan a tho hma ngai lo va. Mahse, Nguri vangin a harh hma thung. A call leh a la off zel. A ni em em tawh lo tihna rilru pu mah se; Nguri inlakhran duhna angah a la ngai lui hram hram a. Inkhawm ban lamah Nguri chhungte ho zawh kual erawh a tum. Ban veleh Remsanga biain Nguri chungchang a hrilh a, an ni pawn ngaihthat lohna an la nei em em lo. An chhungkhat te number leh an veng te chu a rawn hrilh a. Lawmsanga chuan a han be kual hlawm a. Mahse, tumah reng rengin Nguri an hmu lo. Tah zet chuan a awm a nuam ta lo. A arkawhchhuah ta ngawt a, khawi emaw laiah te hian a rilru hah leh ippik lutuk hi a lo tlu reng anianga tihte a ngaihtuah a. A thin a tawt up up mai. Khaw laiah Nguri a hmu lo, a kalna tur awm a hre si lo. Bceky lah a lo mangang ve nasa tawh bawk si. Sunday zan chu a liam leh ta phawt. Lawmsanga erawh a tlaivar ta thak a nih kha. A tukah Becky nen Police Station an pan ta ngawt a. Nguri chin hriat loha a bo thu chu report an theh lut ta. Lawmsanga chhungte pawh an buai khawp mai. Remsanga pawh a rang a rangin Aizawl a rawn phei ta bawk. An buai ta nuaih mai. 

"Engvanga hetiang thil hi ti nge i nih? " Nguri aw chu a zawi hle. A chau ngawih ngawih a ni. An damdawi chiuna khan a taksa chak lo bawk si chu a hneh mah mah a ni. 

"Kei min hnawlin Driver i um a. Ka awm mai mai i ring em ni? Tin, tangkaina dang i la nei cheu.. Ka nu tan i kal i pe dawn a ni. " Aldrina chuan a ti fiak thak a. Nguri chu a khur der der. 

"Naute ka pai asin. Hetiang hi chu ti suh. Khawngaihin, Pastor i nih kha. Pathian i hlau lo em ni? "

"Nang hian Pathian chu i hnawtbo vek tawh.. Ka nu hi heti mai chuan ka kaltir thei lo. Ka nupui i ni ang a, ka nu tan i kal i pe bawk ang. A chiang em? " a rawn hnaih sauh a. Nguri a thle sawn. 

"Ka kal chu ka pe ang. Mahse, i nupui ka ni ngai lo vang. Ka thi zawk mai ang" a ti ve ta ngat a. 

"I pasal tur hnenah pasal dang i um thu sawi luihtir i la ni dawn.. Bawihte" tih pahin a biang chu a rawn chul a. Nguri mittui a tla zawih zawih. 

Lawmsanga ta chauh a ni.. A rawn chhanchhuak em em ang tih beiseina nen a hmaa mipa mak tak ding chu a hmachhawn ve tawp mai chu a nia! Nguri, i vanduaina hian tawp chin a nei ve thuai ang. Lo lungngai hlek suh, khawvel mipa tam tak zinga mipa dik ber Lawmsanga i nei alawm.. 

(A tawp tep tawh aw.. Thawnthu dang khawih a ngai thut a)