Thutiam 10

THUTIAM - 10

Ziaktu: Toni Râlte

Lawmsanga'n thil nih dan zawng zawng a han hriat vek takah chuan Nguri chu a khawngaih zual sauh a. Tin, a nu khati taka a che maksak kha mak a ti ta lo bawk. Mahse, a hriatthiam loh ruk erawh a tan Nguri a phal miah loh laia Aldrina nei tura a nawr leh vak lawi si kha.. Engvang tak ni ang maw? Aldrin a neih chuan in leh lo an chuhpui a ring lo nge? Thil dang vang zawk ni ta ang.. 

"Rin dan ka nei, Ngur, khawngaihin ngaithla hram hram la aw. I nuin heti taka a hmumawh che leh i laka a râwn viau chhan hi i pain i hminga in leh lo a dah vang anih ka ring ta tlat. I nu hian a thik che a nih ka ring ta ber. Remna siam hi a tha. Kan inneih dawn tho chuan in leh lo saw pe rawh.. Kan mamawh lo" a ti mawlh mawlh a. 

Nguri erawh a ngai kar ringawt. A rilru a la buai rih em a ni. Chumi zan chuan Lawmsanga awm nghengin a tlaivar thawthang a ni e. Lawmsanga tak pawh a muhil mang lo. Hmangaihber te thinlung nâa an awm laia lo mut hnar súk súk chu thil mawi pawh a ni lem lo. A tuk zing karah an tlan haw nghal a. Nguri erawh class kal chi ziazang a ni lo. A intifai a. A mu chawrh chawrh ringawt. A khat tawkin a ú te leh Lawmsanga ten an rawn bia tih loh chu a chechang thei meuh lo a ni e. 

Chumi zan chuan Pu Rinpuia leh a thenawmpa te chuan Lawmsanga te in va zawng chhuakin sâwn man chu an va ţhing ta a. Pu Mawia (Lawmsanga pa) chuan, "Ekhai! Rem intia min iai lo te a nih chuan palai rawn tirh kan duh zawk a. Sâwn man chu kan pe rih lo phawt zawk ang che u. Amaherawhchu, min finchhuah a ngai dawn tlat a. Hnahthial lamah sawn hmelhriat hnaivai kan nei mang hlek lo va; ngamtlaka min palaisak tur pawh. Aizawl atanga kan intirh mai te pawh a ngaih hmel a, Lawmsanga sawi hmangin Nguri hi a ú te hnena khawsa deuh niin a sawi si a, a nu bulah nge a ú bulah kan palai tak ang tih kha kan buaina deuh chu a ni" a han ti dap dap a. 

Hei hi chu Remsanga khan Pu Rinpuia a lo hrilhlawk vek tawh a. "Nguri ú thu min râwn angin a ú Remsanga hnenah hian va tir mai zawk ta ula a fuh zawk awm mang e ka ti" Pu Rinpuia chuan a ti a. An buaina zualpui chu a veng ta deuh e. Pu Rinpuia te pawh sâwn man dawng lo chuan an haw leh ta phawt chu a nia. Mahse, rilru lamah an hlawhtling tho e. Tin, Lawmsanga nu leh pa bakah a unaute tawngkam leh chetzia atang khan chhungkaw pangngai leh inkaihhruaina tha tak hnuaia seilian leh rorel an ni tih a hmu thiam vek a, a tunu Nguri lawi nan pawh a tha tawk viauin a hria. An khawsak a harsat hmel vak loh bawk nen. A lo rai ta sa sa a, inneih aia tha kha a awm lo reng a ni. 

Lawmsanga chuan mut hmain Nguri leh a nu inkar, an chhungkaw thuruk te chu a hrilh fai ta vek a. Nguri nu leh pa an hriat loh thu bakah Pu Zaia'n in leh lo Nguri hminga a dah thu te pawh a sawi. Pi Lawmi chuan, " a va khawngaihthlak ve aw. Nau pai tir a ni bawk si a, rilru hah taka awmtir a chi miah loh a nia. Bawiha, i pawimawh aw" a lo ti vat vat a. 

Pu Mawia erawh chu a múk angreng hle. 

"Nakinah buaina te kan la neih loh nan Nguri chuan in leh lo chu a nute kutah dah rang se la va duh em ve aw.. Chu ber chu a nu buaina pawh chu a nih hmel a. Chhungkhata kan insiam dawn a nih chuan inremna hi kei ka ngaipawimawh a, a nute nen pawh inpawh taka inlaichinna neih ka duh. Rilru khingbai deuha inneih te hi a tha ngai lo a nia" a ti ta thlup a. Lawmsanga pa hi zawng pa nghet chet chawt, fing tak leh ngaihtuahna sèng nasa mi a ni ve reng a ni. 

"Nia, a bulah pawh ka sawi tawh a, engmah a sawi ve rih lo. A ui ve deuh em mawni chu aw te ka tia.. A kutah ka dah tawp" Lawmsanga chuan a ti ve a. 

"Engpawhnise, a rang lama inneih vat tha ka ti, Nguri chu enkawl that a ngai dawn tlat.. A buaina tawh hi a namai si lo va" Pi Lawmi'n a lo ti ve bawk a. Palai pawh a ranglama tirh an rel ta chuk chûk a. 

Nguri erawh a vai riai reng mai. A tet lai chhung zawng te a ngaihtuah kir a, a nu thusawi kha dâwt tih ngam chi niin a hre lo. Ni e, a nu hian a ngaina ve miah lo nia a hriat vanga a lunghnur thinzia te, An exam result a chhuah apianga a nuin a lawmpui ve ngai lo te leh Rinfela leh Dini te erawh thil a leisak ziah bik te, ani erawh a pain a leisak thin te khan awmzia a lo nei vek tih a hrechhuak.. A la hriatreng bawk chu a tleirawl chhuah tirh hian a luck ve bawk a, a hmel lam ai mahin a tituai nalhna chuan mipa a hîp thin. Khang a tleirawl chhuah tirh khan Dini hi chu nula ang tak takin a chetla tawh a. In leng te pawh a nei ve tawh a ni. Zan khat an in leng hlun Hruaitea chuan mikhual tlangval chhe lo fahran hi a rawn lenpui ve a, Nguri hi a tleirawl ve tawh bawk. Nguri chu a duh nasa ta mai a, Mahse, Dini chuan a lo star ve bawk si. An buai ta nuaih a. Khami tuma a nuin Nguri a tihdan kha Nguri hian a theihnghilh thei ngai lo. 

"Nau zawk i ni a, i ú hi ter pha turah inngai suh. I ú duh loh hnu zel bak i chhui dawn lo. An inkarah hian i tlazep a nih ngat chuan i nghawng ka ţhuai tliak ang" a ti a nih kha. Khata tang phei kha chuan a nu a ngainatna kha vawmbo ang duak a ni ta a. Hmun dangah lehkha zirin a awm ta hlauh a, a hahdam letling ta a ni. Chutiang vel chu a nia an tetlai hringnun chu.. 

Pu Mawia te chuan an thenawmpa Pu Thana sawmin amah Pu Mawia nen Hnahthiala va palai chu an rawt thlu ta a. Nguri pawh an rawn tawh lem lo. Buaina a tam hmaa insawifel vat chu an tum a ni ber, dik tak chuan ro chungchanga buai hi Pu Mawia hlauh ber a ni a. Hminghliauna neih a duh lo bur a ni. Nilaini zingah Hnahthial lam panin an motorin Pu Thana nen chuan an kal ta a. Remsanga te pawh an be lawk bawk. Thlenin tur pawh Nguri papuia te inah an innghat tawp mai dawn a ni. Chhungkhat nei hek lo le. An thlen zan la lain Remsanga inah chuan an va leng ta nghal a, Patling takin a lo dawngsawng a. Pu Mawia pawn fel a tiin puitling a ti khawp mai. 

"Rem lohna han sawi tur kan nei lem lo e. Keini lam chu, mahse, mizo dan angin chhungkhat te kan lo inrawn khawm ve ang a, nau te hial kan pai tawh a, harsatna liantham chu a awm lo turah ka ngai" Remsanga chuan a ti dap dap a. 

Pu Mawia chuan "Mi dang tumah an awm lem lo bawk a, han sawi ta phawng mai ila. Nguri hminga in leh lo dah chungchang vel kha.. Kan sawi phak chu a awm lo naa, buaina a thlen hlauh thu-ah sawifel mai hi ka duh deuh a. Keini lam chuan buaina kan nei lo a nia; kan duhdan tak phei chuan in leh lo hi Nguri hminga kaltir loh hi kan duh a. Kan fanu a ni tawh dawn a, kan in leh lo pawh a ta a ni tawh dawn tho a. I nu te nena inrem hi kan duhdan a ni.. " a ti charh charh a. Remsanga pawh chuan insum hun a ni lo tih a hai bik lo. Engkim an hre vek tawh si a. 

"Ni e, a zia lo khawp mai. In leh lo chungchanga buaina neih a hlauh luatah ka pa khan engkim a lo siamrem fel vek a, mahse, ka nu te lam an lungawi miau si lo va. An ni te nena sawiho pawh a tihchiin ka ring. Amaherawhchu, kei ka ngaihdan tumlum takah chuan Nguri hming hian kal reng se ka duh zawk a. An niin an nawm amaka an hmana an chen hi ka remti hleithei tlat lo va, amah Nguri thu thu pawh ani ang a. A dik a dik chuan thudik engkim han hriat takah phei chuan inpapek tawp chu ka hmin zat lo deuh chu a ni" a ti ve ta mawlh mawlh a. Pu Mawia te pawn an hrethiam kher mai. An nuhrawn leh faten an pa thawhrimna rah nuamsa taka an chen tur thlir chu a harsa ve khawpin a rinawm. Beng thara inngaichang tura inchah chungin an inthlah liam ta phawt a. 

Lawmsanga erawh Nguri ngaihtuah reng rengin a hun a hmang a. A bulah a awm si lo, a rilru hah leh na lutuk te khan tih loh loh te a lo ti ang tih a hlau a ni. Nau a pai bawk si. A call awl lo va, Nguri lahin a rul tawk chiahin a chhang bawk si. Msg phei chu a seen a, a reply loh a tam zawk. Becky a va bia a, lo awmpuia kalsan lo turin a chah mawlh mawlh ringawt tawp a ni. Nguri chu a dem lo, a dawhtheih a ngai tih a hria a, chimbuaia biak buai sek pawh a insúm ve takmeuh. A rilruah thil dang an leng meuh lo a ni. 

Kawngka kik dat dat chu hriain Pi Lawmi chuan, "Lo lut rawh" a ti lang lang a. Kawngka chu rawn inhawngin, Ruthi a rawn lut hlawl. A hmaa a lan dan ai khan tlemin a thau ve ta deuh a, hmuh pawh a nuam deuh. Lawmsanga a service a, Bawihtea School kal a la bang lo bawk. Mi dang ho pawh an hna thilah an chhuak vek a ni. 

"Teh hlawl che chuan.. Lo thu rawh" a ti a. Han huat vak dan a thiam thin lo. 

"An chhuak vek em ni? " pangngai takin a ti a. A lo bu nghat ringawt. 

"Ih, englo a nia. Lawmsanga'n nupui a nei dawn tih ka lo hria a.. thil eng emaw sawipui che ka duh a" inthlahrun hmel angreng tak hian a ti a. 

"Eng lam nge ni ta? " Pi Lawmi chuan a tarmit chawi pah chuan a ti a. 

"Lawmsanga nupui tur hi mi tha a ni lo tih ka sawi duh a ni. Mi pasal ngaihzawn ching a nia, video te hial pawh an nei a ni. In hriat loh ka duh lo va. Lawmsanga mizia ka hria, a tih tawh chu ti tlut mi a ni si a.. A thlah theih ka ring lo, nangni lamin in nawr a nih loh chuan.. Ka fapa enkawl turin ka ring zo lo a ni" Ruthi chuan a ti ta a. Pi Lawmi a meng zau kâwk mai! 

A ding hluai a. "Ruthi, i thusawi hi i hre chiang maw? " a ti ta salh a. 

"Hrechiang e, a bialpa pawh an zirtirtu a ni e. Min hrilhtu hi a daw lo vang. Pastor a nia" a lo ti ve sak. Pi Lawmi a thu leh a. 

"Engpawhnise, kan chhungkaw rorelnaah hian i lo inrawlh ve a tul lo ve. Ka fapain a hmangaih a nih chuan a tawk mai. A nunhlui lam hriat kan chak ber lo, ka tu tur a pai mek a, nangin i lo sawi chhia a. I va ngam zawk ve. Khawngaihin min chhuahsan ta mai che" a ti hriam ta hraih mai. A mitmeng chu do zawh ngam ni hek lo. Ruthi a meng khup zâl zal mai. A tum ang ngawtin thil a kal ta lo. Tûm bûrin a chhuak ta a. Pi Lawmi erawh ngaihtuah nei tih hriat takin a chhing vang vang ringawt. 

Nguri Papuia Pu Rinliana te inah chuan Nguri nu Pi Sangi chu zam lo zet hian a rawn lut a. An ni chuan thingpui hâng an lo in mek thung. 

A melh kual hrek hrek a, "Palai laktlak loh tak in ni. A nu ka awm reng a, engvanga a ú hnena palai daih nge in nih chu le? A va intham lohthlak ve le" a ti ta sak sak a. Pu Thana zawk chuan, "Ngawi teh, Nguri nu, An sawi hmangin i fanu i tuithlar niawma sawi kha a awm si a. Kan rawn kal ngam lo a ni zawk" a ti dam thluam a. 

Pu Rinliana pawh chuan, "Sangi, thu teh, khatia thinrim vak a tul lo. Sawiho ngai pawh a awm ania" nem deuh hian a lo ti ve a. 

"Ka lungawi hlek lo a nia. Ka fanu a ni a, a chungah thu ka nei. Inneih hi ka duh chuan ka kham thei.. Ka remtih loh miau chuan" a ti pâng pâng a. 

Pu mawia chuan, "I kham loh dan tur kan ngaihtuah a ngai a nih chu" a lo ti khauh a. 

"Chuti maia lungawi chi ka ni ve lo a nia. Ka lungawi lohna a thúk lutuk tawh. Amah Ngurnunsangi pawh hi rawn hawn a tum lo em ni? Tunah khaw nge a awm? I fapa nen chuan em ni an awm dun? " a ti leh phiar phiar a. Rapthlak an tih hmel hlawm ngang mai. 

"Hostelah a la awm e. Ngaihtuah suh a tha" a ti nghut a. A lung awi hmel vak tawh bik loh. 

"Kei chuan an inneih hi rem ka ti ngai dawn lo tih in lo hre phawt dawn nia. A chhan chu ka fanu pasal atan driver mai mai ka duh lo tlat. Pastor ngat asin ka hualsak" a ti ngat a. A hawi champ hle bawk. Pu Rinliana chuan a beng chak kher mai. Mahse, a nau nupui a ni a, kha chen a nau nen nupa niin an lo khawsa tawh a, a nau thlarau a zah avang pawhin a insum hram hram a ni. 

"A pawi hle mai. Mahse, a ú sawn mawhphurhna a lak tak siah chuan a ú remtih leh remtih lohah kan innghat tawh mai aniang chu" Pu Thana chuan a ti ta a. Pi sangi erawh a tawng tawh lo. Thinrim hmel tur ngun mai pu chungin a chhuak leh nghal daih. 

Pu Rinliana nupui chuan, "Engahmah ngai suh u. A rak ve mai mai a nih kha.. Tih tak êmah chuan Nguri pa te lam kan nia, kan thu pawh a tlang ve viau turah ngai ru" a lo ti ve hmiah. Pu Mawia te ngaih pawh a tha thawkhat e. 

"Ngur, hei tal chu eizo ve la.. Heti ringawt chu. Nau i pai si. I naute tan engtin nge niang" Mi dang hriat hlau takin Becky chuan a ti sar sar a. Nguri erawh chuan hmalam a melh tlat. A mit a sen râm a, ni hnih khat maiah pawh a tla nghal dãwk thei. A pa a sún hlim ang chiah kha a ni. A thinlung tina bertu chu a pa kha a pa dik tak a lo ni lo hi a ni. A pa kha a hmangaih a, ani pawn a hmangaih asin. A fanu diktak nih a duh takzet a ni. Tu nge a nu leh pa tih pawh hre lo vin pasal a nei daen chu a nia! A pasala chhungten an hmusit ang em? An lo hnualsuat viau mai lawng maw tihte thlengin a ngaihtuah a ni. Lawmsanga lamah chuan a rilru a hah lo, a hmangaih tih a hria. A innghat ngam thlap. Mahse, nakinah heng a fahrahna te hian buaina a la thlen ang em? A nu anga a lo ngaih lah a tan hmelma hlauhawm ber a ni tawh si.. A buai ve tawk a ni. 

A phone la chhuakin Lawmsanga number a hmet chhuak a. A ring ral ral hnuah a rawn la a. "Min chhuahpui rawh.. Khawiah emaw. I bula awm ka duh" a ti tawp. Lawmsanga a lo lawm tumhrang. 

"Tehreng mai. Ka'n be nghal ange. Lo nsiam rawh ka lo lam ang che" a rawn ti nghal zung zung. Lehkha zir lam pawh a lang thei rih meuh lo a ni e. 

Lawmsanga phur taka an in chhung a lut a nu hmel a hmuh chuan a ding chawt. A nu hmel chu a dik tlat lo. 

"Nu, i tha em? " a ti nghal a. A fapa thil a hawnsak chu dawhkanah a dah a. 

"Bawiha, Thil pawimawh deuh a awm a. I pa erawh ka la hrilh lo" a lo ti chuai raih a. 

"Aw sawi la"

"Nguri chungchang a nia" a fapa chu a melh vawng vawng ringawt. 

"Umm sawi teh" ngaihtha vak tawh lo hian a ti a. 

"Ih.. Ruthi a lo kal a. Nguri chanchinna rawn sawi a. Mi pasal a ngaihzawn thu leh video chena a neih thu te thlengin.. " a ti hman chiah tihin, "Kan uipuinu mai mai chuh! A va zak thei lo ve" Lawmsanga'n a lo ti nghut. 

"Ngaithla phawt rawh. Chu chu ka buaina a ni ber lo, a nunhlui chu eng pawh ni rawh se, i hmangaih a, i fa hial a pai a. Keini pawn kan hmangaih mai ang. Mahse, Ruthi ka saw kan veng hneh dawn hauh lo a nia. A chanchin sawiah a ramtang ang a, chu chu Bawiha hian hre ta si se.. Tin, Ruthi hian sual chhuahin a nuhrawn enkawl ka duh lo tiin Bawiha hi rawn chuh ta se.. Ka buai nuai a ni.. " A ti ta mawlh mawlh a. Lawmsanga chuan a nu chu a khawngaih hle. 

"Nu, engkim a tha vek ang. Lungngai miah suh aw.. Ka chingfel vek ang. Keimah ngeiin Ruthi pawh ka va hmu ang. Chuan, zanin chu Nguri ka riahchhuahpui dawn. A khawngaihthlak lutuk, a thil tawn hian a la nghawng nasa si a. Ka bula awmtir ka duh a ni" a ti seuh seuh a. Pi Lawmi pawh chuan buk nghat nghat pahin, "Ni e, i awmpui a ngai. I theihtawp chhuah ang che.. " a lo ti a. Lawmsanga pawh insiam turin a roomah a lut ta nghal a. 

Pu Mawia te va leng nawn leh pawh thu lawmawm lam an dawng ta. A ni leh thla an ruat fel ta vek a, Amah Nguri zirna chena ngaihtuahpui a ngaih vangin an ngaihtuah rei angreng. A hma lama inneih an duh bawk si. Pu Mawia'n an in atanga class a kal theih mai tur thu a sawi takah chuan ngaihngam takin thla thar ni 29-a innei turin thu an thlung ta rup mai. Mahse, Hautak taka tih an duh lo ve ve. An inren vang lam ai mahin Nguri nu te lam ngaihtuahna nen tih bung bung rawngkai kha chu thil tih chi-ah an ngai chiah lo a ni. Tlan inkoh ang deuh mai nise chhung leh khatte nena chawhlui kil ang kha a ni deuh mai. Anmahni Nguri te duhdan tak pawh a nih a rinawm. 

"Sangi, inneihna chu an tifel tawh maw? Engkim a chhe ta vek a nih hi" Pu Zova aw chu a nelawm hran loh hle mai. Pi Sangi chuan, "Ka remtih loh thu ka sawi ve chu vut laka vawih ang chauh a ni. Engahmah min ngai lo. A pawi khawp mai, pu Zo, kawng dang kan hre bik si lo a ni" a ti a. 

"Nangmah alawm.. I nawr mah mah a, a tihel tawk lekin i siam a. Vehthlem ve fahran tur che i nia, i ti hmawk hmawk a. A buaichuar ta vek a nih hi, i chanvo tur pawh i chân phah ti tawh mai ang" Pu Zova chuan a ti nghut nghut a. A lung chu a awi zan lo tih a lang reng mai. 

"Mi dang ka lo zawng mai dawn em ni? " a ti tak naa, amah pawh a inring zo meuh lo. 

"Nang ai chuan Mizoram hi kan suartluan tam tawh zawk ang. Keini pawhin kan hmuh loh chu nang khan khawiahmah i va hmu lêk lo ange" a lo tihkhum hmak. 

"Enteh, Pu zo, ka duh vang renga thleng a ni lo tih i hria.. Ngurnuni hi mihring ve tho a ni a, chuti maia hneh awlsam a ni hleinem. Kei pawn tihian in leh lo ka chân ve tho asin. Pawi ka tih loh i ring bik em ni? " a ti ve ta hlak hlak a. Chutia a tih takah chuan Pu Zova pawh a nem ve leh mai. An buaina hi a ril ru phian a niang e. 

"Ka pa, i rilru tihah suh. Ka tifel thei em em ang" Aldrina chu a ding khawng lah a. 

"Tihtheih kan nei tawh lo. Thla thar ni 29-ah an innei dawn" a pa chuan a ti chuai raih. 

"An la innei hleinem. Inneih hma chetna hun kan la ngah alawm.. Ka thangkam pakhat hi a per tawh ngei ang a, hna a thawk lo a ni maithei. Kawng dang a awm loh tawpah Ngurnunsangi hi ka ru bo dawn a ni" Aldrina chuan a ti ta mai a. Pu. zova chuan a fapa chu a melh tlawk tlawk ringawt. 

"I hna leh nihna hi hrechiang rawh. Kan tihtheih phak bak chu ban hram hram loh a him zawk" a ti a. 

"Kei min hnawl avang hrim hrim pawhin he thil hi ka ti duh a ni. Tu nge ka nih a hre thuai ang. Kei min hnawlin taxi driver a um a, chu chu ka tan tlawmna zahthlak tawp a tling.. Kei hi tuman min la hnawl ngai lo. Chuvang chuan min lo dal hlek suh ang che u" a ti vawt raih a. A mitmeng verther leh nunrawng zetah chuan Pastor anihna hmuh tur pakhatte mah a awm lo. Ngurnunsangi chu engvanga pawimawh em em nge maw a nih le.. 

"Bawihte, i cher.. Ka duh aiin i lo danglam hman" Lawmsanga chuan Nguri melh chung chuan a ti a. 

"Ka tha alawm" a lo ti tak naa, a mitmeng dul raih chu a hmuh hmaih si lo. 

"Soup ka chah ang aw.. Hawp teh.. Thil sakhat i ei hleithei bawk si lo " tih pahin a phone hmet nghal a. 

"Zu in i phal em? " a rawn ti tham chhal a. A melh ngawih ngawih ringawt. Rui hnâp se, reilote chhung tal pawh thinthiin a bula muhil se tih chu a duh ve tho. A rilru a insual nasa hle. 

"Naute i pai sia.. Bawihte" a ti a. 

"Ni bawk si.. Aaa.. Ka ning.. Engkim hi.. Ka hne" a ti chuai raih a. Lawmsanga chuan a khawngaih bawk si. A thianpa Doctor a call tawp. 

"Thianpa, ka mangang deuh, nau pai tirh thla khat leh a chanve bawr velah hian zu hi in ta se naute tan a pawi thui thei viau em? Ka khawngaih sia, naute ka ngaihtuah bawk sia.. Thurawn ka mamawh" a ti ta tawp. Mahse, Ngurin a hre lo. Bathroomah a va biak avangin. 

"Alcohol kaihhnawih hrim hrim chu a tha lo vek naa, mahse, chutu taka mamawh leh khawngaihthlak a nih chuan dal deuh hlekin no 3 vel chu pe mai rawh. A la pawi thui tham lo vang. A zawngchhang erawh a hlauhawm" a rawn ti a. Lawmsanga pawh a awm a nuam ta deuh. 

A va chhuak a. Zu a chah nghal bawk. A hmangaih hi a hmangaih êm vangin hahdam hun siamsak a duh a ni. Zu a pek avang hian a hmangaih lo a ni lo. A hmangaih êm vang zawk a ni. A chhan chu Nguri chuan mut a hmu tha tawh lo tih a hmel hmaiah a lang chiang em a tin ni. Zanin chauh chu a bulah muhil bawrh bawrh teh se.. 

"Duatpui, hawp zo hram rawh. I taksain a mamawh aw.. A tha em? Umm vawi khat chiah" tiin soup chu a hawp luihtir a. Nguri pawn a hnial hran lo. Lawmsanga bula a awm atang chuan a chau zual, a chhan chu a pangchan theih vang a ni. 

Chaw an ei khamah zu chu Lawmsanga'n a siamsak a, dal deuhin a pe ta tawp. "Luak lo hram rawh aw" a ti sup a. No 3 a in meuh chuan a taksa chak lo sa nen, a zawi ta der mai. Mu chungin an titi sep sep a. Lawmsanga erawh chuan a in tam lo. Nguri buaipui tura kal a ni a, amah ber ruih kha a duh lo bur. 

"Lawmsang, i nu te hian ka fahrahzia hriain min la iai lo vang maw? " a ti sap a. 

"Buai suh. Kei aiin inneih an hmanhmawh zawk.. Ka nu leh pate chu i nu leh pa an ni tawh dawn alawm.. Fahrah i ni lo… duatpui" tiin a sam chu a chulsak heuh heuh a. 

"Umm.. Chhungkaw tha taka ka lawi lut tur hi ka lawm.. Ka tawng lo ang che tih ka hlau a ni" mittui hnâm par chungin a ti sep a. 

Lawmsanga insum zo lo chuan a zuk fawp zauh. 

"Uiresan mipa thinlung sak leh khauh tak tidanglam thei hmeichhia ka tawng che hi kei aia lawm tur an awm ka ring lo. Ka hmangaih che. Ngurpui" thúk zetin a ti sup a. 

Nguri pawn nui sen sen chungin, "I nupui ni vat ila, nitin zantin ka bulah i awm thei ang a. Chu chu ka chak ber tawh.. Ka innghahna i ni" a lo ti ve a. 

Nguri duhthusam ang takin chumi zan chu enghelh nei miah loin thlamuang takin Lawmsanga kuah chial chungin a muhil ve ta bawrh bawrh a.. 

Lawmsanga leh Ngurnunsangi hian tibuaitu nei miah lo se kan va duh êm… mahse.. Chhum dum chu kawlkilah a rawn zãm ţan mek si a 😢

(Vawiin ruahsurin ka lunglen a kai tho pek a. Ka ziak thei ikhaw lo. Ka rawn tlailam úm pawngpar a. Mahse, ka rawn dah hma hman tho.. 😍