Thlarau Thuchah 12

THLARAU THUCHAH (12)

Ziaktu: Toni Râlte

"Azeli i ni em? " titu chu tlangval sa pan lam, lu buk ve tak, hmel erawh chhe lem lo; lungngaihna thûk tak nei hmel pu a ni a. Mitmeng ngui zetin Azeli chu a melh kar bawk. 

"Aw ni e, lo lut rawh eng nge ni ta?" a lo ti var a. 

Tlangval chu a rawn lut a. Tunah zan dar 8 a ri dawn mek a, a naute erawh roomah an awm thung. Valtea, damdawiin atanga an lakchhuahna a la rei lo deuh a, a nu pawh tukinah an khaw lamah a haw ve chauh a ni. Thutthleng seiah chuan a thu a. A che chu a zawiin a harhvang lo kher mai. 

"Thingpui ka lo lum mek a, in ve rawh aw" tih tlangnel tum takin Azeli chuan a ti a. Thingpui a siam nghal rak rak. A naute a va pe phawt a. Tlangval chu pe ve lehin, tlangval bulah chuan thuthmun a rem ve ta nghal a. 

"Ih, eng nge i lo kal chhan chu ni ta? " va melh zauh pah chuan a ti sap a. 

"E aw.. Ih, Malsawma ka nia, Ms tiin min ko mai zel. Ka buaina hi ka sawi thiam ang em aw.. Ka thiam ang angin sawi ka'n tum ang e" tiin thingpui chu a in te tê a. 

Azeli pawh chuan a lo ngaichang deuh tawp. 

"Bialnu ka nei a.. (A thaw hawk a) mahse, kar liamta zirtawp zanah khan a thi a… (a hnuk a ulh deuh nge a ngawi vang vang a..) chu chu ania ka buaina chu. Zantin hian ka mumangah ka la hmu a, sawi duh nei niawm tak hian a lang thin. Mahse, engmah a sawi thei si lo va. A thih danah khan ka ngaih a tha thei thlawt lo a ni" a ti ta a. Thlarau kaihhnawih tho a nih ringsa Azeli chuan mak a ti vak lo. 

"Chutah chuan eng nge tihtheih ka neih tak ang? " a ti sep a. 

"I hmu thei alawm.. Thlarau i hmuin i be thei a. Khawngaihin ka bialnu thih chhan dik tak hi min zawnchhuahsak rawh" ngenngawl zet hian a ti ta a. 

Thingpui an in zo ta. A va seng sawk sawk a. A rawn let leh vat. 

"Mahse, i bialnu pawh ka hre ve si lo va. Kawng ka va bo ve" a ti a. 

"Kan chanchin tlem ka'n sawi ang e. Ka bialnu chu Estheri a nia, Khatlaah sawn an awm. Keini Mission vengthlangah kan awm thung. Collgege kan kal lai atanga inzui tawh kan nia, ka chhungte pawn an ngainain an inpawh em em vek. Mahse, a chhungte nen erawh kan inmil vak lo. Esi a pa fabik a nia. Kan sawi vek ang e. Ih, a nu leh pate hi Esi u chiah kum 2 vel a nih laiin an inthen zuai a, chumi chhung chuan a pa chuan Esi nu hi a lo kawp hman a, a rai tih a inhriat hmain a nupui nen an lo innei leh hman a. Mahse, an hrilh hre ta tho va. Chuan, Esi nu chuan kum 2 vel a nih thleng a enkawl a, pasal a umsan ta a, a pi leh pute lah an dam tawh si lo, a rethei ta em em a. A putea te bulah a awm a, a piteii'n a tihduhdah thinzia hria te chuan a pa chu hrilhin enkawl turin an ngensak ta tawp a. A pa pawh chuan fanu na nâ na chu tiin an nu thinrim chung chung chuan a enkawl ta a. Mahse, a piteii tihduhdahna ang kha tuar lo mah se; a unau dangte nen an inkarah gap a tam lutuk tho. Mahse, a zirna senso te an tumsak tal a tiin Esi hian a dinhmun chu a pawm thiam em em a. Kei aiin a puitling zawk mah a ni. Lehkha a thiam thei bawk si. Lecturer nih hi a tum ber a ni a. College kan zawh khan a hautak em mai tiin a nu te chuan a zir zelna tur chu an tihtawpsak ta a. A rilru a na sin aw. 

A pa lah eizawngtu zawk mah nise; a tihsual avang chuan an nu a hlau si! Esi hian nau mipa leh u hmeichhia pakhat leh an upa ber mipa a nei a. A nau mipa chiah chu a lama tang awmchhun a ni thin. Dika a nia, ani chu awm lo se, Esi hian in a chhuahsan duh tawh hial maithei a ni. Dika chuan a thlavang hauhin a nu te pawh a hau ve thin a niawm e. Mahse, a ù te pahnih erawh chungah an sual em em a. A u chiah Miriami phei chu a tawrhhlelhawm zual hle. "Nangmah vang hian ka nu in min pawm laiin a tawrh nasat phah" tihte hi a tawng khum duh dan a ni. Tin, an upa ber Jerry phei chuan Esi chu vawi hnih lai sual a tum tawh a ni. A ruih laiin a nia, chungte chu ka bulah zep nei loin a sawi vek. A hlau a, kei pawn ka hlauhthawnpui. Nei dawn ila hna ka la nei bik si lo va, min nghak hram hram turin ka ngen tawp thin. 

Tichuan, Zirna a chawlhsan takah chuan a nu te chuan inhlawhna zawng turin an ti a, Ka patea te school-ah ka ngensakna angin hna chu a hmu ve ta hlauh a. A lawm ngei mai. Hlawh tam lo mah se; tlem a lo lakluh vena khan a inthlahrung lutuk tur pawh a tiziaawm ve deuh a ni. Keini hi Pathian zarah chhungkaw pangngai, ka nu leh pate sawrkar hnathawk ve ve an ni a. Kan khawsak a harsa lutuk lo bawk a, ka theihna ang angah a sum pai ang zawnga han puih zawk te pawh ka nei ve thin. Ka hmangaih a, a dinhmun a chhiat poh leh ka hmangaihna a zual ka ti mai. Min nghak ve ta ţâng ţâng a. An inah hian vawi 3 chiah ka la leng. Len fo chi a ni lo, Jerry khan ngeiawm zet zeta min tawngkhum a chin bakah a nu leh miriami ten awmpui chei taka cheiin ka awm ve reng laiin an tirkual reng a. Ka awm loh khan a nuam zawk ang tiin hmun dangah kan inhmu thin. Amah pawn pawi a ti lem lo. I awih lo maithei, chutiang khawpa chance nei zing si chu vawi khat mah kan la chesual lo a ni. Amah hian a duh tlat lo va, ka hmangaih em vangin ka tilui ngai bik lo a ni. 

Chuan, thil pakhat, a nuhrawn ti tawh mai ang, chumi te chhung lam ami pathlawi hian tih takzetin a ngaizawng ve a. Esi chuan a ten lutuk. Pathlawi fa pahnih nei tawh a nia, an nu nen an inthen chhan pawh bialnu neih a chin vang a nia. An hausa naa chapo chi a ni ve a. Zantin deuhthaw Esi chu a rim thin. A nu te lah chuan an be thain a sumdawnna velah hlawkna an chang ve nge mawni.. Pawisa te hi zuk thin a! Ani lah a zei si a. Esi chu neih ngei a lo tum ve a niawm e. Keini erawh chuan ngaihmawh thamah kan ngai vak lo. Esi chuan, "Nangmah nen ni lo pawh ni ila, he pa ka neih ai chuan thih ka thlang" a tih meuh avangin ka ringngam tawk. Tin, sawi leh sawi hnu Miriami chu nula harhvang ve tak, party leh eng ilo ngaina ve tak a ni a. Damdawi pawh a bar thin an ti! Zu chu sawi loha lum a nia. A bialpa lo len changte hian Esi chu hmusit leh diriam zet zetin a tawngkhum thin aniang, tin, a tir kual reng bawk. Zan khat phei chu lo duh vetu Pathlawi khan a kam khat hial aniawm e. Chutiang vel chu an nia. 

Chuan, kar hmasa nilaini khan, "Ms, putea te inah awm leh mai ka duh. A hrehawm em mai" a rawn ti a. 

"I thu thu ni mai. I piteii pawh a fel tawh maithei asin" ka ti ve mai a. Ka khawngaih ve em a ni. 

"Nia, putea ka be phawt ang" a ti a. Ka lo ngaichang a. 

A hnuah, "Putea chuan a remti reng a, mahse, Khawzawlah an sawn dawn a. Khawzawla awm a ngai dawn a" a rawn ti a. A putea hi police a nia. A ngaihna ka hre ta lo hle. Ka hmuh phak loha a awm ka phal si lo. 

. "Engpawhnise, hei kumin bak a ngai tawh lo va, tuar hram hram mai ang. A nih loh pawn ka pate ka lo rawn ang a. Inneih hnuah pawh a zir zawm theih tho alawm" ka ti ta tawp a. Keimahah a innghat pumhlum tawp a ni ber e. Ka pa te pawh ka rawn ve a, mahse, Thla thum liamtaah khan ka farnu min chhangtu chiah hian pasal a nei a, mizo upa ten, "Kum khata lut leh chhuak a tha lo" tih changchawiin nghak rih turin min ti bawk si. Tin, palai tir mah ila, min rem dawn lo tih ka hre sa. Inruk mai a ngai dawn tih kan hre ve ve. Kan inhuam hle bawk. 

Tikhan, dawhthei takin min nghak leh ta poh a. Zirtawpni khan chawhma chauh an kal dawn vangin inhmuh ka rawt a. Engmah a danglamna ka hre lo. Ka thlah haw leh thlap.. A chhuk lai hian Jerry a rawn haw ve chiah bawk. Min melh rum khawp mai. Engahmah ka ngai lo. He jerry-a hi Esi avang chauhin ka la khawih lo a ni. Ka tan chuan hnawksak a tling tawh hle. Zanah pawh dar 8 bawrah, "Ka lu a na deuh reng a. Phone ka dah rih aw.. " tiin a dah a. Kan inmang tha thlap. Tichuan, zing dar 7 velah ka thianpa, Esi te veng ami Rinzuala'n min lo call a.. 

"Thianpa, chanchn i hre tawh em? " a rawn ti a. 

"Eng nge a" ka tih chuan, "Esi a boral kha.. An kaitho zo lo" a rawn ti ta anih kha! A fiamthu emaw ka ti a. Mahse, a lo ni si lo. Ka tliak hnâwp a ni ber e. Zingtin dar 6-ah hian morning a rawn ti ngei ngei thin. Khamini erawh kha chuan a ti ta lo, a reh ta tlawk tlawk a. Awmngaihna tak pawh ka hre lo. Ka nuin min va kalpui a, ka thiante pawn min tawiawm. Ka awmdan tak kha ka hrethiam lo. Ka â muih a ni ber. Ka awih thei hlawl lo a ni ber. A lo kir leh ka ring tlat a, khawi hmunah emaw ka kal te hian lo lang tur hian ka beisei a, ka zawng thin. Chuan, a ruang thlak zan atang khan ka mumangah ka hmu ta ziah a. Ka mutna bul chair-ah thuin min lo melh ngawih ngawih thin. Ka mumang ka ti tak naa, a tak tak pawh a n zawk maithei. Khawih ka tum hian a bo daih zel a. 

Ka biak lahin min chhang ngai si lo. Lungngai hmel a pu thin. A thih danah dik lo a awm a nih ka ring nghet bur a ni. A ruang kha an postmortem lo a! A chhan ka hre lo. Zing tin dar 6-a tho ziah, Dar 7-ah pawh la tho lo chu an va kaitho dawn a. A lo khawng vek tawh a ni. Damdawi a bar ngai lo va, engmah chutiang hmu tur pawh a awm hek lo. Dika'n a va hmu hmasa ber a, a sawi danin rizai te pawh a sin thlap a niawm e. A mak em a ni. Kei chuan a muthlum hi ka ring thei thlawt lo. Saw chhungkua atang sawn inrawlh an awm ngei ka ring tlat a ni. " a ti ta dap dap a. 

Azeli chu a lo thaw hawk. Msa chu a khawngaih takzet a ni. Puih ngei pawh a duh. Mahse, chutin thlarau a ko thei dawn hauh si lo. Esi thlarau chuan a rawn tlawh loh chuan tih vak dan a hre bik lo. 

"Eng pawhnise, thlarau ka ko thei si lo va, mahse, zaninah i hmuh leh hunah 'Azeli va hmu rawh' ti tawp mai teh. A sâwt maithei asin" a ti ta tawp a. Msa pawh beiseina sang tak nen a haw ta hnu hnu a. 

Zan 3 a liam leh hnuah Azeli mu tur a va zung zo chu an chaw ei dawhkan sir lam deuhah amah hmachhawn zawngin nula te lam, ngo vir ver, duhawm zet, mahse, a mitmeng lungngaihnaa khat si hi a lo ding ran a. Tun ţum chu Azeli pawh a phu hran lo. A rinlawk leh beisei deuh ang kha a ni bawk nen. A thaw huai zawk mai. 

"Esi i ni ngei ang tiraw? " a ti nghal chat a. A naute erawh an muhil tawh nge, an reh vawng vawng mai. 

"Aw.. I hnen hi ka rawn thleng thei lawk lo va. Hmannia Msa a rawn kal pawh khan a bulah ka awm reng a, mahse, eng thil vang nge ka hre lo, min hmu thei miah lo" a ti a. A aw chu a zawiin a fiah hle thung. 

"Ka ngaithla e" Chair-a thut pahin Azeli chuan a ti ta a. Esi pawh chu thu anga lang si, a mawng leh chair insi miah si lo chuan a awm a. 

"Thah ka ni alawm. Msa rin dan kha a dik a ni. Thudik hi hre lo law law se tih ka duh naa, mahse, ka dikna chanvo hmuh chu ka phû vein ka hria. Tin, khang misualho te kha nuamsa taka an dam reng ka remti thei lo a ni. Ni e, ka sawi zung zung ang, khawngaihin min lo ngaihthlaksak hram hram dawn nia. 

Zirtawp zan khan ka lu nat chhuanlamin Msa kha ka mangtha a nih kha. Thudik kha lo hrilh law law zawk ila tha tur. Zan tir lam khan Miriami bialpa Mama thianpa birthday party-naa kal turin Miriami chuan min sawm tawh a. Nidangah pawh a sual thup nan min hmang thin. Ka pa hian chhuah zen a phal loh vangin kei hi chhuanlamah min hmang fo a, ka chhuahpui chuan ka pa ngaih a tha thin tih a hriat vang a ni. Kei chuan ka chhuah peih loh thu ka sawi a. Mahse, "Tun chiah, a bak chu ka nawr tawh lo vang che. Kan haw hma dawn nia.. Ka tiam a che. " tiin min thlem ngat ngat a. Khami zan khan U Jerry-a kha U Jerry-a a rawn rui haw leh hle a, a tawrhhlelhawm leh dawn tih ka hriatsa avangin chhuahsan daih chu ka duh ve ta deuh a. Ka nu leh pa ten U Jerry hi chu an hlau ka ti mai. Min sual a tum pawh khan keimah zawk min mawhpuh vek a ni. "A rui a, a harhfim loh vang a nih kh.. Nangman i zir bawk a" ti ten. Chuvang chuan ani lak atanga thlavang hauh chu ka phut ngam tawh lo va, a hlat thei ang bera awm zel chu ka duhdan a ni tawh a ni. Tichuan, Msa khan min ngaihtuah ka hlauh vangin lu nat chhuanlamin ka mang tha ta ngawt a. A pawi em mai. Party-naah chuan kan kal a. Ka hriat sa te pawh an awm ve. Keimah chiah kha rui lo hai lo ka nih ka ring. Dar 10 bawr velah Miriami chu hawng tawh ang tih tumin in chung lamah ka han zawng a. Ka hmu zo lo. A ngaihna hre lo va ka din laiin tu emaw hian ka hmui a rawn hup thut a, kut tha chak zet hian min rawn pawm nghal. Room pakhatah min luhpui a. Mipa pathum, Mama, a birthday neitupa Johny leh Zaia te an ni. Khum pahnih a awm a. Khum pakhatah chuan Miriami chu saruak titih hian a lo mu zawi nguan mai a. A chatthla niin ka hria. Ka rak dawn thin a, ka hmui an hup tlat si. Tichuan, mipa palian ve tawk tak pathum te chuan min ching ta hrep a, ka hmui chu plasterin an bel phui hmiah a. Ka thawmhnaw an hlih lai te chuan ka tap nasa lutuk. An rui a, chutia hrehawm ka tuarte chu hmuhnawm titakin min thlir a ni. Ka tawngtai char char a, mahse, chhanna ka hmu lo.. Sawi pawh nuam ka ti lo, an pathum chuan min pawngsual ta a ni. (A kun ngawih ngawih a. A hmel chu na tuar tih hriat ngawih ngawih hian a ngui vek.. Azeli pawh a lo insehruh nasa mai) 

Tawngkam bawlhhlawh zet zet an hmang a, "I chhungkaw chhehchhawl i nih hi. Tihian ka duh chang apiangin kan duh ang i ti zel tawh ang. Anih loh chuan camera kan kam thlap a, i video a darh nghal a ni mai" ti ten min vau a. Thih kha ka chak ber a ni. Min that mah se pawi tihna ka nei tawh lo. Msa tan hlutna ka nei tawh lo, a tan ka tling tawh lo. Kha kha na ka tihber a ni. Ka mu zawi der a, ka en ngai ka en reng ringawt. Miriami chu an kai harh a, "I unaunu hi en teh.. A nalh tiraw? " te an ti a. Engmah ka ha lo chutih lai chuan. Miriami pawh chuan mak a tih ve hmel hle. Mahse, "Zawngi, i lo va tenawm ve.. Hetiangtea i awm a. I va hur ve" min ti ta chiam a. 

Ka tho a. Saruak vekin an ni chu ka hmachhawn a. "Hremna ka pe ngei ang che u. Engkim hi ka sawi vek dawn" ka ti a.. Pawisak pakhatmah ka nei tawh lo. Ka phone ka zawng nghal a, ka switch off daih bawk si. Phone ka zawn lai tak chuan, "Ka pa ten an hriat chuan aw" Miriami chuan a ti a. 

Mama chuan, "That law law ila a ni mai lawm" tiin min rawn bawh nghal a. Khumah min nam thluin min rek ta a. A thianten an lo pui bawk. Rei ka daih ta lo. Ka thi ta a ni. Thawmhnaw min haktir a, zu chu ka taksaah an theh that that a, a rim ka nam nan an ti aniang. Miriami chuan, "Min hrechhuak tho ang.. Engtin nge kan tih dawn? Ka hruai chhuah a nih hi" a ti a. 

Johny chuan, "Tihian hawnpui vat ila, inah kan paw lut dawn nia.. 'A rui a chatthla' kan ti anga " a ti ta a. Tichuan, a rang a rangin min thlah haw ta a. Ka pa te chu an lo mu tawh. Mahse, ka nu a lo tho a. Min pua a hmuh chuan a mak a ti deuh a. Mama chuan, "A chatthla pek a. Damdawi a bar nual bawk nen.. " a lo ti a. Miriami'n a lo pui vat bawk. Ka roomah min luhpuiin tha takin ka ruang chu an muttir a. Rizai te pawh min sintir.. Chu chu ka tawp dan chu a ni. " a ti ta a. Azeli thinrim lutuk chu a khur dat dat mai. 

"Ngawi tak rawh.. I dikna chanvo chu i hmu khawp ang. Mai mai chuan a" tiin a inhrosa bap bap a. Esi pawh chuan thawveng hmel a pu ta deuh. 

A tuk atangin chet a la ta a, Msa koin Report thehlut turin a hrilh a. Msa chuan a thehlut nghal vat. Police te leh Azeli te an inhre tha tawh bawk a; thlarau thusawi mah nise, an lo awih sak lo ngam tawh bik lo. Esi chhungte chu an kawm phawt a, a chhan chu finfiahna an mamawh ve bawk a ni. A ruang an postmortem loh chhan a pain a sawi dan chuan, "Kan nu hian 'Nizanah pawh a rawn rui haw a. I fanu hi i rin ang a ni lo. Damdawi pawh a bar nasa. A OD a nih hi.. Kan mualpho zau mai mai' a ti tlat si a, ka ti ta lo ringawt a ni" a ti! Pa azawnga pa nep ber zawng a niawm e. 

Mama, Johny, Zaia leh Miriami te chu an man ta rap a. An â bik lo va, a tirah an ţang nasa. Esi an pawngsualna room te an va en dik tha leh a, sulhnu hmuh tur chu a awm chuang lo. Azeli bawk thuhretu atan an ko leh ta phawt. 

Esi sawi ang zelin a sawi ve a. Johny chu melhin, "I kawr kha hlip la, Esi'n khami zana a hamna che kha a la belkang ngei ang. A ham nat em che vangin a hmaiah i hnek nghe nghe kha" a ti a. Johny kawr chu an hlip nghal a. A hnungzang a nâk bul siah hian a lo inrinthla ruak mai. 

"Ka tlukna a nih hi" ti sasawi mah se, an mitmeng a dawih tanzia an hai lo. An han dâwp leh tak tak chu an inpuang ta zawt zawt mai. Zoram khawvelin thudik an han hria chu le.. Khatla thalai mipa tawh phawt chuan chung misual te nunna chu lak ve ngei tumin an rawn thawk ve rup mai. Khatla chauh an ni lo, veng dang pawh an tel nasa mai. Police ten an khap hram hram a, khap daih an har khawp mai. Gangrape a nih miau avangin khaihlum an nih ngei beiseina pawh a lian hle. Mahse, Christian ramah hian Christian fel tak tak te khan an lo khawngaihin, an lo ngaidam leh maithei a ni. 

Msa'n thudik a han hriat takah chuan dam reng chakna reng reng a nei ta lo va. Mi â ang maiin a hun a hmang chho ta. Amah a indem thul, a chhungte a dem thul.. A nun chu hremhmun ang mai a ni. Thih ve a chak a, mahni nunna em lak chu a hreh si. A rawih tial tial a. Esi thih atanga thla 3-na lekah a taksa chau leh eitur ei tha bawk si lo chuan natna dang dang a vei phah a. Damdawiina zan khat lek a riah hnuah a chatuan hmun lam a pan ve ta. A hmangaih nen intawng tak ang maw.. 

Ni 3, Vawkhniakzawn thla a ni a. Ruah a sur cherh cherh a. Current a awm loh vangin Azeli pawh a mu hma ringawt. A mutui phian. A mumangah an khaw park, phul hmun hring dupah an chhungkua an lo kal a. Khaw thlir a nuam hle.. Pathian thilsiam mawi tak tak te hmuhnawm ti taka a thlir mek lai chuan, "Azel" tia rawn kotu avang chuan a hawi let a. Msa leh Esi te chu kut inkai dun rialin, thawmhnaw fai leh mawi tak hain an lo nui sen sen mai…