Thlarau Thuchah 11

THLARAU THUCHAH - 11

Ziaktu: Ton Râlte

A nau Valtea khawsik chu a sang riau mai. Damdawi an neih ang ang han pe mah se; a chhawk hleithei tlat lo. A nu te erawh an mangan a hlauh avangin engmah a la hrilh duh lo thung. Zan dar 9-ah te chuan a la ţawngvai bial bial mai. Valtea nau chiah Mapuia chuan, "U, damdawiinah kan kalpui mai lo va" a ti a. A thla a phang tih a lang reng mai. Ani pawn a lo ngaihtuah mek lai a ni. Inchung tlangval Sanga a call ta tawp a, ani hi a tlawmngai thei a, a hruai theih mai a beisei a ni. Ni hnih liam taa an Class bang ruah surin a nan hrep tak avang khan Valtea chu a hritlang viau a, class erawh a kal lui tak naa ban hmain a haw. Ta tang khan a khua a sik ta deuh reng a, amah inti pa chi, tlawmngai tak a nih vangin, "Damdawiina hruai ka ngai lo. Ka tha mai ang" a ti tlat a. Azeli lah an hna lamah an buai lai lo ni bawk nen, mahse, a rin ang ngawtin Valtea chu a tha ta mai si lo va. A thlaphang ve tan ta a ni. 

Sanga chu a rawn chhuk thuai a. Valtea chu a paw chhuak a, a taxi-in Civil Hospital an pan ta vang vang a. A khawsik a la sang bawk nen, rin ang ngeiin an lo admit ta a. Mapuia leh Sanga chu in lamah an haw ta rih, Azeli chuan a riahpui dawn a ni. Male ward-ah chuan mi 12 an awm a. Thenkhat chu an dam that hmel tawh viau. Valtea erawh nurse ten an rawn bawihsawm nghal a, nachhawknaa jectioinin Drip an khai nghal bawk. Azeli pawh a thla a muang tan e. Zun pahin a nu te chu chanchin a hrilh ta nge nge a. A nu a hlauthawng leh hle mai, a tuka rawn zin a tum nghal chuk chuk mai. A ngai ve mai thei, Azeli a hnaa a kal a ngai daen si a, Mapuia ringawt rin chu a felhlel deuh bawk a ni. Valtea chu a thaw te a rawn sa tan a, a khawsik pawh a zia ta deuh. Rei meng lo vin a muhil zui leh ta mai a. Azeli erawh mut ngai lohna a ni bawk nen, a meng kar mai. A phone a khawih malh malh ringawt. 

Zing dar 3 bawr velah an ward nghenga awm toilet kawngkhar ri ţhuai chuan a kai harh a. A mutthilh lai a hre miah lo. Thawm chu a ngaichang leh deuh a, a ri leh ta lo. Hlauhna a nei lem lo bawk a, a harh ta sa sa tiin zung turin a tho ta a. Valtea mutna atanga chhiara a pathumnaa mu mipa chu a tum loh deuhin a va thlek zauh a, a lu dah dan chu dik lo riau hian a hria. A khum bawhin a nu emaw a farnu emaw ni awm tak hi a muhil bawrh bawrh mai. Thawm dim takin a chhuak ţhem ţhem a, Toiletah chuan lutin a zung a. 

A chhuak leh chiah chu ward hmalam balcony-ah chuan mipa khat a lo ding vang mai. Mei a zu aniang tih a ngaihtuah a, mahse, engmah meizial khu a awm lo. A dinna lai chu engin chhun phak loh deuh vang nge hmun dang aiin a thim deuh bawk. Tshirt pawl da lam tawh a ha a, kekawr dum a ha bawk. Mizo chapal kaih a bun bawk a, hmalam thlirin a ding vang vang mai. Azeli pawh chuan ngaihsak zui duh loin ward kawngkhar lam a pan nghal a. Kawngka hawnna vawnban a chelh chiah tihin, "Ka be duh che a ni" a rawn ti ta a. A mur sung sung mai. Chu pa chu thlarau a ni tih a hrethiam nghal. Hawi let chuang miah lo hian, "A tlai tawh" a ti sap a. 

"Hun ka ngah lo " a lo ti bung nghut. A biak dan tawngkam chu a ngainat zawng a nih loh vangin Azeli chuan luhlul a chhuah ve tlat. Kawngka a pawt hawng a, a luhsan ta daih. Valtea bul khum ruaka a mu leh chiah tihin Nichina a mut dan dik lo a tih ruk khum zawn atang chuan rak tuar ri a hre ta nghal. A rak ring bawk a, ward ami te chu an harh vek. Thinthi lo va mu an ni bawk nen. Azeli pawh a thu chhuak nghal vat a, a va hawi phei bawk. Kha tshirt pawl ha ngei kha meng â ruai chungin a lo hawi kual hrek hrek nia! Nurse an rawn lang vat a, mahse, an tawng hre awm pawn a lang lo. A nguk hruih hruih ti ila a sawi fiah ber ang. Khum atanga chhukthlain chhuatah chuan a sapatal ta mai a. A venflon vuah lai te chu a phih darh vek a, thisen rawn chhuak te chu chhuatah chuan a kai nual tawh mai. Nurse pahnih chiah an nih vangin an thlabar tih a chiang reng. Ward chhunga tlema zialam pan deuh tawh mipa pahnihte chuan muttir an tum a, a chak lutuk. An hneh lul lo mai. Nurse pakhat mangang chuan ward danga nurse bakah doctor a call ta tawp a. Chu pa "Rina" tia an koh lah chu maksak tak takin a che a, a riahpuitu kha a farnu a lo ni awm e. Chu lah chu a ţap par tawh mai si. A au ruai ruai a, damdawiin angah chuan a rapawm duh khawp mai. Valtea pawh a rawn harh ve a, thei leh thei loin a va thlir ve a. Tuman an chelh hneh miau loh vangin chhuatah chuan a let tawp tawp mai, a chang leh a khumah chuan a va inrulpuiludin thul! Azeli chuan nuam a ti lo takzet. Lo be mai se hetiang hi a thleng kher ang em tihte a ngaihtuah a, lehlamah mipa ward a ni bawk a, an hlau ru ve tho maithei naa hlau angin an lang duh lem lo. Doctor a rawn thleng a, eng tehchiam a ang bik lo. Jection an tumin a lo ben per sak zel si. 

Azeli bula rawn ding putar lam tawh chuan, "Thih sual a nih loh pawn tulum a ni ngei ang" a ti zawi sup a. 

Darkar chanve dawn chutianga mi dang rikrap zawnga a khawsak hnu chuan a zawi ta hnawk a, khumah chuan a mu thal ta der a. A farnu chuan ngam leh ngam loin, "Au Rin, i harh em? " tiin a va sawi a. Doctor leh nurse ten an buaipui nghal ta bawk. A mar a phu tawh lo ni ngei tur a ni, a mar chu an indeh chhawk sek a, a thaw em tih hre turin an han ngaithla thin bawk. Mahse, an hmelah beidawnna a lan tak avangin Rina chu a thi ta tih chu lai ami te chuan an hrethiam ta vek. Engvanga khatia rapthlak leh ingeuh kual taka a awm kher ni le? A farnu chu a ngik feih feih a, Azeli chuan a khawngai em vangin a va kuah a, a lainatawm em a ni. A la nupan hmel ve bawk si a, chhungkaw dang tel lo va a nuta hnukchat thlir chu a nuam fahran lo khawp ang le.. Nurse ten a ruang chu an han sawngbawl vat vat a. Azeli pawn Rina farnu, Maengi chu biain a chhungte hrilh turin a ti a. A phone rawn phawrhin a nu number a dial a. Azeli chu a pe ta daih. 

A ring ral lek lek tihin nu ni ngei tur hian mutchhuah hmel takin a rawn la a. 

"Ka pi, a pawi ka ti khawp mai. In fapa Rina kha tun lawk khan a boral ta a ni" Azeli chuan chhing vang vang chungin a ti ta a. 

Lehlam thawm chu a reh hmak. Azeli pawh chuan sawi tur dang hre tawh hek lo le.. A dah ve ringawt. Tikhan an inhrilh kual tawh mai ang chu.. Mutthilh chi ni tawh hek lo le.. Rina ruang chu an lumen a ni ta ringawt. Kar loah a chhungte an rawn lang ve ta bawk a, ţap thawm pawh a tha viau e. A nu ţah hla atang chuan, Rina mizia pawh a hriat theih titih. 

"Mama, Lalrin, a va pawi tak êm.. Hetiang hi i la ni dawn ka tih mawlh mawlh thin che kha.. Ti nge ka thu awih lo va sual lam kawng i zawh leh thin. I chhungte hian kan hmangaih che asin. A pawi em mai" tih atangte chuan Rina chu tlangval fel tak a ni lem lo tih a lo rinthiam ve theih mai. Chutih rualin a chhungte chuan an hmangaih viau tho niin a lang. Khaw var tawh lamah an inla chhuak thei hram. Rina farnu Maengi chuan Azeli chu lawmthu a hrilh mawlh mawlh a, a tihtheih a tlem tehlul nen, an lakah chuan inthlahrunna chhan tur a nei ru reng zawk si a. 

A tukah Mapuia'n a rawn chhawk a. Mut a hmu tha lo nen, a rir bur mai. Thlen veleh a inbual a, tukthuan pawh a ei ta lo mai. A tlai ve deuh tawh nen.. Canteenah a inhnawhpuar tawh mai ang chu. Azeli fel vena chu a mawhphurhna a hna bikah hian felfai taka tih duh mi a ni a, a hmabak thil awm reng reng chu pending a duh ngai lo, a thawhpuite pawn an fak reng bawk. Chumini pawh chuan rit bur mah se, a hmachhawp chu a hlen par par tho. Riltam pawh a hrechang meuh lo, hna a ngah bawk nen. A rilru ngaihtuahna kil khatah Rina bawk kha a rawn awm ve leh run thin a. Nizan khan be ta se, eng nge a sawi ang? Mak a tih zawk chu a thih hmaa khatia a hmu kha? Nge putar sawi ang khan tulum hnathawh zawk ni ang? Tulum hi pi leh pute sawi dan chuan ramhuai chi khat, mitthi ruang kawchhunga luta che thin niin an sawi. Chutiangte chu tun lai hunah chuan sawi tur a awm meuh tawh lo va. Thawnthu anga hriat a ni hial tawh zawk a ni. Chutiang a ngaihtuah reng chu a ning a. A thaw leh hawk thin. 

A nu nen an inbia a, Aizawl a lo lut chiah a lo nia. Fate hmangaih hi zawng a na a niang e. In chungah chabi a dah tho a, a lo inngaihtuah ve tawp tawp mai loh chuan.. 

An office bang pawh peng khawmuang lo vin in lam a pan ding nal nal a. Zanin chu Valtea a riahpui leh phawt a ngai ang. A nu a zin chau ve si a. In a thlen chuan a nu eisiam rimtui tak a hre ta nghal a, a hîp vang vang mai. Chawhmeh siam hi a thiam vak bik lo nen, in lam a ngaihna ber pawh a ni. A nu nen an han inhmu chu an inngai tawh bawk a, Azeli chuan a kuah chuk chuk mai. Sawi tur pawh an ngah dun e. 

Zanriah chu Azeli chuan a ei hma a, Valtea chaw kengin damdawiin lam a pan leh ta phawt. A nu lo zin thu te leh naktuk atanga a awmpui tawh tur thute a sawi siam siam a, Valtea pawh a lawm hle. Chaw pawh tlem chu a ei ve thei e. Mipa hrisel ve tak, khumbeta na ngai mang lo a ni a, chutia che hleithei lo va a awm chu hrehawm a ti hle. 

"Nizana boral pa kha ka lainat e" Valtea chuan a ti a. 

"Nia, a khawngaihthlak khawp mai" a lo ti ve mai a. 

"Vawiinah a chanchin an sawi a. Amah kha No. 4 addict a lo ni ve a, he lamah pawh an enkawl tha vak duh lo a niawm e. An chhungkua an awm thei vak lo nen, a chhungte an khawngaihthlak lutuk an tia. Chiang tak chuan ka hre lo, mahse, kha tia a thi pawh kha a chhungte tan chuan a thawventhlak hawk maithei a ni" a ti mial mial a. Azeli rin dan sa a ni bawk a, han sawi zui vak tur a hre lem lo. Doctor-in ward a rawn fang a, "Ni 2 hnu vputaelah i i chhuak thei tawh mai ang. " a ti a. An lawm unau ve hle. Tihtur em em awm hek lo, an mu hma viau. An ward-ah na lutuk leh buaipui ngai an awm lo bawk a, a tihzia hle. 

Maimizial ang deuh hian a lo awm a. An khum ep chiaha awm putar lam deuh tawh kha a khum mawng lamah a ding run mai a. A kut zur tawh lam lian pui mai chuan rawn reh tum niawm tak hian a rawn ban a, Azeli hlau mangang chu a tal dawn thin, a che thei der si lo. Au chhuah a tumin a aw a chhuak thei der si lo. A mangang takzet a ni. Mahse, chutia mangang taka a awm lai chuan Valtea damdawi pek hun a lo ni a, nurse pakhat hian a rawn jection a, chutia nurse a rawn lan rual chuan putara chu a khum lamah a phei leh ta daih a. Azeli pawh a harh zui ve ta nghal. A zun a chhuak bawk nen, a va zung leh te te a, dar 10 a pel hlek chauh a ni. Khua a thiang nuamin, arsi pawh an lang iar mai. Thlifim a thaw heuh heuh bawk a, mahse, awm rei loin a lut leh nghal. Valtea pawh a muhil niin a hria a. A pang a va dek a, a dai dak mai. Ngaihtha takin a mu ve leh ta a. A mut pah chuan putara khum chu a va melh kher a, a lo en kur mai. Nuam ti lo zetin a mu thla a. A maimichhing ngam mang lo. Mahse, a hma zan lama mut hmu tha vak lo bawk nen chuan mutchhuakin a zem chiai chiai a. A hriat loh karin a lo muhil ve leh daih. 

Thawm ri duh huk vang chuan a harh hlawl mai a. A thu chhuak a. A beisei loh deuhin putara khum chu nurse ho chuan an lo hual ţaih a. Thawktir an tum ni maiin a hria. Dam lo dangte pawh an lo harh ve vek tawh a, Putara awmpuitu a fanu niawm tak chu a tap faih faih mai. A va mak teh fo em.. Zan hnih chiah an la riak a, ruang pahnih a chhuak der tawh mai. Azeli awm chu a nuam thei ta reng reng lo va, amah vanga thleng ni ten a ngai hial. Ruang chu an la chhuak fel a, dam lo dangte pawh an mu ve leh ta hlawm a. Azeli erawh zing dar 3-ah pawh nghate rèp ang kar a la ni. A ngaihtuahna a kal thui hle. 

Mawlhtu a neih tlat avangin a tho ţhem ţhem a, balcony-ah chuan a va ding ta vang vang mai. Nghah a nei a, tu nge a nghah a inhre si lo. Hlauhna erawh a nei miah lo thung. Dar 3:30 a ri mek tihin toilet kawngkhar chu a ri rak a. A va hawi phei nghal. Rina ngei mai kha a lam panin a rawn phei ta chhat chhat mai. A hmai dâng bul mai leh a mit khur thuk dâk te chu a rapawm lek lek, Mahse, Azeli chu a insangruh ve tlat. A bulah a rawn ding ta a. 

"I inthiam lohna kha dah tha la, min pui rawh" a ti nghut a. 

"Sawi rawh" a lo ti ve hmiah. 

"Kei chu addict ka ni a, mi tenawm leh tangkaina nei lo ka ni. Ka dam laia ka nun chhiat èm vangin ka thih dawn thleng pawha nghaisak ka ni a, rapthlak takin ka thi a nih kha. Ni e, ka chhungte tan chuan a thawventhlak huai maithei a ni. Ka tirethei rei tawh a, ka nu ngat phei chu keimah vanga rilru hrehawm leh mangang reng rengin a awm tawh a. Ka thihsan hi tuar hle mah se, ka lawmpui zawk a ni. Nakinah ka chanchin hi puanzar te i la duh a nih chuan, hei hi lo sawi tel hram rawh aw. Ruihhlo hi tumah hian ti chhin ve suh se, no 4 ngat phei chu kum 10 hnuah pawh ruh a ka tiza thei. Chutiang khawpa sim harsa chu a ni. Pathian atang lo chuan sim hlen theih niin ka hre lo. Rukruk a keng tel bawk a, mahni kan inhnuhhniam bakah kan chhungte zak leh kimkiin kan siam a. Damlai hremhmun bak hlawhchhuah kan nei lo. 

Tuna ka rawn hmuh chhan ber che erawh hei hi a ni. Damdawiina ka luh hma khan zan khat ka thianpa nen kan inchiu zo kan haw lam chu vai pakhat kan lam pana rawn phei hi kan tawk a. Zan rei tawha chutianga vai lehnghal lo kal chu ka thianpa nen chuan rilru hmun khat puin kan suam ta a ni. A wallet kan han laksak chuan pawisa a lo khat ţùn mai a, a bag ah lai pawh chu kan chhuhsak a. Hmun him nia kan hriata kan han phawrh chuan, kan la hmuh ngai reng reng loh lunghlu leh rangkachak a lo awm teuh mai. Kha vaipa kha a ruka lunghlu leh rangkachak tawlha lo sumdawng thin a niawm e. Min report ngam loh danah a chiang ka ti mai. Tichuan, ka thianpa nen chuan kan insem ta vek a, chang tam bik kan awm lo. Kei chuan ka thil lak te chu inah ka hawn ngam mai lo va, ka pa hi pa mawlmang tak mahnise pa dik leh huaisen tak mai a nih avangin chung ka thil neihte chu police kutah a dah mai ka hlau a ni. Kan in bula forget me not kan phun hnuai chu ka lai khuar a, chutah chuan ka dah ta a ni. 

Ka thianpa erawh chuan a thil lak te chu hawnin a chhungte hnenah chuan vaipa nunna kan chhanchhuah vanga min pek angin alo sawi a. An lo lawm hle nghe nghe. Pawisa kan lak erawh damdawi lei nan tiin a pe duih lo. Ka thianpa hi Peka a ni a. Inzui chawt reng thin kan ni. An ina ka len tumin a pain kan thil neih chungchang chu min zawt a, kei chuan ka la thuhruk rih thu ka sawi mai a. Peka pa chuan a vei ta tlat aniang, Chumi zan Peka nen kan hit leh chu duh aiin a lo pawlh hnem a. Kei chaw ei tha mang lo taksa chak tawh lo chuan a lo zo ta si lo va, ka OD ta a ni. Peka chuan min tlan chhiatsan daih a. A hnua min rawn hmutu ten Damdawiinah min hruai ta a nih kha.. 

Damdawiina ka awm atanga ni naah Peka pa chu a rawn lut ve ta a. Chu chu tuna boral ta putar kha a ni. Mi dang hmuh leh hriat loh hian ka rohlu lak ka thuhrukna hmun chu min zawt chamchi mai a. Keiin ka hrilh phal bik si lo. min tibuai chamchi ta mai. In lo luh zan khan ka zung chu min zui chhuak a, "I chhung te an mangang tawh lutuk alawm.. Pawisa an nei tawh lo.. Zep reng a tul lo.. Nangmah enkawl nan a ngai alawm" ti zawngin min chhimbudawi a. Khatah kha chuan kei pawn ka tisual ta niin ka hria a. Ka farnu kha ka hrilh ta a ni. Mahse, ka buai zui ta si a, ka farnu khan ka nute a lo hrilh bawk si lo. Ka thih hi hlim sarhu lai khan putara chuan ka farnu chu lo zawtin thiam takin, "I u kha ka fapa nena inzui chawt an ni a. A dam lai khan rohlu eng emaw a thukru a, chu chu a neitu dik tak hnena peksak turin min ngen a, ka pe lo anih chuan a thlarau a vahvaih tur thu te a sawi hial a ni. Mahse, a thuhrukna min hrilh hman ta si lo va. I lo hriat takin ka zawt ta tawp che a ni" tiin.. Ka nau lah rilru mang, min lainatna nena a buai lai a lo ni si a. Putara chu a lo hrilh vek a lo ni! Putara chuan Peka biain la turin a hrilh a. Mahse, ka thih miau avangin chet lak na hun an la nei thei lo a ni. Ka dahna hmun kha a langsar ve bawk nen, zaninah mut reh tawh hnua lak an tum avangin ka tihtheih kawng zawhin putara chu ka tihthaih ta a. Ani hlauhlawp mangang chu a thaw a hah ta a. Kha kha a thihpui ta a nih kha. Putar duham lutuk leh a fapa thian phatsan chingte tawrh a tan chuan a tawk chiah a ni..heng thu zawng zawng hi ka chhungte bula sawi a ngai lo va, mahse, ka rohlu lak te kha hai chhuak se la, dinhmun siam nan hmang hram rawh se.. Ka dam laia ka tihretheihna zawng zawng kha rulhlet hram ka duh a ni. Kei chu min rawn ngai duh tawh lo bawk rawh se. Ka phutawk ka hmu a ni" a ti chuai raih raih a. Khua a lo var tan deuh tawh nen, Azeli hawi chhuak chuan Rina chu a hmu ta miah lo. A sawi duh a sawi zo a. A kal ta a ni ngei ang. 

Zingah a nuin a rawn chhawk ta a. A ngaitein a hna lamah a buai leh. Banah erawh Rina te veng lamah a kual ta a. Inleng an lo la awm nual mai. Zah a hun lo tih hriain Rina pa biak a duh thu a sawi ta tawp a. Pindan lamah an inzui lut ta a. Rina thusawi zawng zawngte chu a dam laia a hrilh angin a hrilh ta zawk a. A chhan chu a chau si a, inhnialna hun a nei lo a ni. Rina farnu khan a lo la hre hlauh bawk nen, Rina pa pawn a ringhlel lo aniang e, a hmel landanah. 

Valtea chhuah hnua Rina chhungte a va tlawh leh chuan, Rangkachak leh lunghlu chu an lo hai chhuak tawh tih a va hria a. A lawmpui hle. Dinhmun siam nan hmang ngei se a duhsak. Mahse, hralhna mai tur an bangbo ve hle mai a. Kawng awm thei te dapsak tura intiam chungin a hawnsan ta a. 

Ar a khuang liai liai a, zan lai ar khuang an ni. Azeli mu nghet vak lo chu a harh leh hlawl mai a. A phu chiang kher mai. A khum bulah Putara, Rina'n Peka pa nia a sawi kha a lo ding zun mai a. Rum leh huat hmel em ema melh chung hian, "I la hria ang" a rawn ti ni hian a hria a. A bo leh nghal daih. A muhil leh tawh lo.. He thlarau hmuhtheihna hi phumbo daih theih a va duh tehlul em…