Thlarau Thuchah 10

THLARAU THUCHAH - 10

Ziaktu: Toni Râlte

A nau Valtea'n, "Ú i harh em? I tha em? " tia a koh mial mial chu hla tak atanga lo ri chhuak ni maiin a hria. A meng thei lo, ni lo, a meng naa, chhum chhah tak bak engmah a hmu lo. A thaw a ipik a, boruak chu a duh angin a hîp tam thei lo. Au vak vak a chak a, a au chhuak thei der si lo. Hmalam a thlir ngawt ngawt ringawt a, chhum chhah zet chu a pan ta telh telh a, a hnuah phei chuan kawngpui zawl phei zet a lo inkham ta ruah mai. Pen tuma a ke a khai lai tak chuan, "Ú, tho rawh" tiin an rawn sawi nawk a. Khuma a mu lai chu an tung tho lawp mai. A harh chiang ta viau e. A thaw kâwk kâwk a. A tuite chu a hal huam huam mai. 

"Tui" a ti tham chhal a. Valtea'n a rawn la vat. A in khawlh khawlh a. A awm a nuam ta deuh e. 

"Mangchhia a nia" a ti satliah a. A naute pawn zawhna dang an zawt hran lo. 

Thla 3 chhung zet chu thlarau a hmu ta rih lo. A thawveng hman viau naa, tun maia a awm dan avang khan a ngaih a tha chiah lo. Thlarau tih vela inhambuai lo va, nula pangngai ve mai nih hi a chak ber asin mawle. Mahse, an mamawh miau si a. 

Tukthuan a rel lai chuan a phone a ri ral ral a, A thiannu Msi a lo ni. Ani nen hian whatsapp group atanga inchhar thar, inkawmngeih zui ta an ni a. An veng thenawm lawkah an awm bawk a, amah Msi zawk hi a rawn leng zeuh zeuh. A bialpa nen chance neih nan an rawn hmang thin. 

"Aw ms" a ti nghal a. 

"Mate, enteh, kan group ami Davida kha a boral an tia. Vawiin holiday a ni tho bawk a, va râl ve ila. Ka ui em mai. A fel si" a rawn ti bawrh bawrh a. Tawng duh ve tak, nuih heh leh enghelh em em nei lo a nia, Azeli pawh hian kawm nuam a ti fú. 

"Awij a va zia lo em em. Nia, chaw ei phawt ila, kan inbe tha dawn nia. A group ang zawng pawn râl chi a nih chu" a lo ti ve a. An group hi Hmelchhe bawm tih a ni a, an hmelchhia azeng pawh a ni lo. Mi 70 vel chauh an awm naa, a lun mep mep thei khawp mai. Thla kalta mai khan an picnic nghe nghe a. Azeli pawn hmelhriat leh thian thar a siam nual phah. Chu groupa active leh fiamthu duh, mi pawisawi lo tak mai Davida chu a boral a nih chu! A thawh hlim atangin phone a la en loh vangin engmah a hre lo a ni. 

"Engtia thi nge ni reng reng" tiin a han zawt tha leh hnuhnawh a. 

"Sawi pawh a nuam lo. A inawkhlum an tia.. Mak ka ti lutuk" Msi chuan a rawn ti a. Azeli pawh a ţhawng ve hle, mahni intihlum duh tur khawp chuan Davida kha a lo buai ru tihna em ni ang? An hriatpui leh hmuhpui phak lohin a lo beidawng hle a niang a.. A mak mang e aw. A naute pawh an rawn tho a, in leh a vel a tihfai thuak thuak hnuah tukthuan chu an ei ta a. 

"Mitthi ka râl dawn a. Lo leng chhuak su aw.. Tun hnaiah rukruk a tam si" tiin a naute chu a chah a. Thu an awih a, hrilh chiam pawh an ngai lem lo. A inbual fai zawhah a insiam nghal a. Group hoin a huhova va ral an tum a, Msi'n a rawn lam dawn a ni. Puan dum plane bihin, kawr sen duk a ha a. A sam chu a thlah mawl tawp. Make up lam hi a timi tehchiam lo va, a natural sar reng mai. Hmeltha tak tia sawi theih ni lo mah se; an group mai bakah a thawhpuite zingah pawh a ruka startu hi chu a nei ve reng zel. Amah hi a inthlahrun luatah a inkhar khip êm mai pawh a. 

Msi'n a rawn lam a. Innghah khawmna tur lam panin an tlan nghal. Davida hi Tuikualah an awm a. An va thlen chuan an lo awm nual tawh mai. Rei vak lo an innghah leh hnuah Davida te veng lam pan chuan an tlan ta nghal a. Chhungkaw awm thei tak an ni bawk a. Súntu a ngah kher mai. An in chu a len tehreng nen, an khat vek a ni. Pangpar kengin a ruang chu an va hmu ve liam liam a. A nu tah hla mawlh chuan lung a tichhe duh ngei mai.. "Bawihte, mama, ka fapa duat, ka bulah awm ni la hetiang hi a thleng lo tur.. A pawi a ni. Ka en kham thei lo che asin. Min ngaih vangin ka rawn zin ve a, tihian maw min lo dawnsawn dawn? Vawikhat chauh min be leh ta che.. Bawihte" a ti hawm hawm a. Davida nu leh pate hi Davida'n kum 18 a tlin hnuah an inthen a. Davida pain ngaihzawng a neih vang a ni. A nu hi Serchhip khua a ni a, Davida te farnu an naupangber nen Serchhipah in an luah ve a, hna chhete a neih vangin an harsa em em lo. Pasal dang nei tawh lem lo vin a fanu chu a tulpui ta a ni. Davida ruang veilam sirah chuan a phirpui Apuia a thu ran bawk. Davida nen an danglamna chu Apuia chuan a sam a tikir a, tun lai style ang hian. Davida erawh a lu a buk ve satliah a ni mai. Chik lo tan phei chuan an sam vang mai mai chuan hriat hran a harsa tho mai. Apuia pawn a mittui a hru a hru mai. A tah em zawng a tap lo. Davida hi a thih hian kum 25-na a hmang mek a, a vul lai tak leh a vanglai takin a liam ta a ni. A pa pawh a thu kun ngul a, a rilru a nat hmel khawp mai. A nupui, Davida te nuhrawn pawh a langin a tap ngam vak lo nge a mittui erawh a hru zauh zauh. Kum 46 awm vel, lang naupang tak hmel tha vir ver deuh mai a ni a. Davida pa nen an inneih pawh khan a la naupang reng a, Davida pa Pu Lawmkima nen hian kum 12-laiin an inthlau reng a ni. Mahse, Officer ta na nâ na chu le Pi Nancy hian a lo hnar phal ikhaw lo nge ni.. An office-ah te hial a va lenchilh ta fo a, Pu Lawmkima lah pa harhvang, a changa han lem thei mai a lo ni bawk a, a sihhnip riau mai si. A nupui an thlim ta zauh zauh a. An nuin a hriat chhuah meuh chuan Nancy chuan Pu Lawmkima fa thla 3 mi a lo pai der tawh a lo ni. Chuvang chuan Davida nu Pi masangi tan chuan an in chu chhuahsan loh theih niin a lang ta lo va, Nancy lahin Pu Lawmkima a lo be buai sek bawk si. Pu Lawmkima pawh a rilru a nuam lem lo hle a niawm e. An nu han thlak em kha a la ngaihtuah pha lo ni tur a ni. An fate lah an puitling ve ţhuau tawh bawk nen. Mahse, Nancy hian a luhchilh ta rap mai si a, Pi Masangi tan chuan thil zahthlak leh tlawmthlak a tling ta vei nen, a fanu hruaiin an chhuak ta kha a nia. Davida te unau pawh hian a pa chu an hua a, a nu a phatsan vang chuan a nu pawh zui ve an tum hial a ni. Mahse, Pi Masangi hi a â bik lo va, "Ka bula in awm ringawt zawngin in mamawh ka pe seng dawn lo che u. Tin, mipa fa in ni a, i pain zan khat mitchhin pawh tawk se la, in nuhrawnin in chanai zawng zawng a khawm tur hi ka phal bik lo. Mipa in ni a, a tiduhdah ngam dawn lo che u. Chuvang chuan i pa in bel tur a ni.. In nu ka nihna a bo dawn chuang lo e" a tih tlat avangin an zui ta lo kha a nia. 

Pu Lawmkima leh Nancy te hian fa pahnih mipa leh hmeichhia an nei a. A insiam zui ta niin a lang. An han chenho takah chuan Nancy pawn that a chhuah ve viau a, tin, sawi tawh ang khan mipa na na na chu sawisel leh i an nei lem lo bawk a, han tihduhdahna chhan tur a nei lem lo. Tiduhdah ngat se chuan Apuia phei hi chu a rorum chi a ni bawk nen; a tawrhhlelhawm phian zawk ang. Inpawh em em lo mah se, chhungkua an nih angin an khawsa ho ve zel chu a nia. Tunah Davida rin loh takin a boral ta si a, Apuia pawh chuan a tuar takzet ang tih a lang reng mai. Azeli pawh a mittui a tla nasa mai. Davida hi sawi tawh ang khan fiamthu duh leh nuihheh tak, mi pawisawi si lo a ni a. Group member te pawhin an ngainat rawn a ni. A thih dan erawh chuan sawi zui a la hlawh fo ngei ang. A chhan tumahin an hre miau si lo va. 

Chhungkaw aiawhin Pu Lawmkunga chuan thu a sawi a. Davida pian kum leh thla te bakah a thih dan te chu a sawi ve a. 

"Niminah khan ka nuamsam lo êm mai tiin a chhuak lo va, innhriat angin Davida hi M. Com a zawh atang khan a patea te Schoolah a thawk zui nghal kha a nia, hna nghet dangte hi chu a zawng kal ve reng tho bawk. Niminah kha chuan a patea te pawh biain ka nuamsam tlat lo tiin school kha a kal ta lo va. Kei pawh hnaah ka kal a, a nu nen hian in an nghak a nih ber chu. Tlaia ka hawn pawh khan engmah amahah danglamna ka hmu lo. Zanriah pawh hlim tlang takin kan kil ni maiin ka hria. Zanah khan zantirah thil leiin a chhuak zauh tih loh chu a roomah a tawm char char niin ka hria, in chungah an unau room hi a awm avangin an thawm leh vâng zaeng zawng erawh kan han hre thei lo va. Zing dar 7 a la ri lo deuh tihin kan nu hian min kai tho va, "Davida a thi" a ti ta mai a! A fiamthu emaw ka ti hial. Mahse, a tah par avangin a uang han tih chi a ni si lo. Hmanhmawh takin ka tho a, an room lam panin kan tlan chho a. A rooma kan luh chuan Apuia hian a ruang lo inkhai reng chu a lo chawi kang mek a, ka pui vat. Mahse, chhan tlak a lo awm tawh lo a ni. Apuia hian a va hmu hmasa ber a niawm a. Ani hi zing tin insawisawi thin a ni a. A insawizawi hawng hi a nau hi a kaitho ziah bawk. Davida hi chuan insawizawi lam a uar ve lem lo naa, an unau hi an inngaiin thu an inawihsak tawn dun bawk a, a tho tlai ngai bik lo. Tukin zinga a va kaitho kha thawm a rawn nei mai si lo va, Kawngka a kalh bawk si. A mutui hle a niang tiin a chhuksan leh a. A hnua a han kaihthawh leh chuan a ngaih a tha ta lo deuh nge, Kawngka a nek chhia a, Davida inkhai chu a va hmu ta a, rang takin a nu eirawngbawl lai chu koin min rawn kaitho ta nghal a ni. Ka fapa hian mahni nunna la hial tur khawpin eng nge a tawn mek ka hriatpui lo hi ka damchhunga ka inthiam theih ngai lohna tur a ni. A mak teh thut em a, min ţhawng takzet a ni, lehkha engmah a hnutchhiah bawk si lo. Hrilh a hai takzet a ni" tiin. 

Davida thihna chuan tupawh a ţhawng a ni ber e. Ngaihzawng a neih awm hriat a ni lo va, buaina a neih thu a thiantha ber te bulah a sawi hek lo. Damdawi te hi a rukin a lo ti ve ang a, a rui buai hian a inkhai ringawt em mawni dawn le tihte chu ngaihdan tlanglawn a ni ta ringawt mai. A lainatawm khawp mai. 

Râlna pawh chu group creator in Pu Lawmkima a hlan a. Vui zawhah Azeli te pawh chu an haw ve ta nghal a. An ngui nghiai mai. Groupah pawh rak peih an awm lo. Rilru a khingbai a ni mahna le.. Azeli pawn eirawngbawl pahin a ngaihtuahna a kawm melh melh a. Davida chu a ui ve takzet a ni. A mimal takin inbe ngai lo mah se, a lo hlimpuiin a lo nel ve em em tawp. An picnic te khan boruak vaw hot tu ber kha a ni a, mipa dang anga han lerha hmeichhe tihuam chi a ni hek lo. A pawi runthlak teh e. Zanriah an ei khamah a naute chuan lehkha an zir nghal a. An fel ve ngawt mai. A nute nen an inbiak zawhah tv a en mai mai. A hmet sawn chhen ringawt. Dar 8 bawrah a mut a chhuak ta ringawt a, mutthilh theih loh hrehawmzia a hriat avangin a mutchhuah lai chuan a mu ta vat a. Phone pawh a khawih zui tawh lo. A mumangah an khuaah a lo haw a, a nu nen maipawl an lo phur dun a, an kal mek laiin a nu chuan, "Bawihte, ka thihsan hunah che chuan i naute hi rawn ensan hlek suh aw. I kuta innghat an nih hi" a lo ti ringawt a. 

. "Nu, min thihsan suh aw.. Ka phal lo" tiin a lo ţap vak vak a. A maipawl phurh te chu kawngah an tla a, an lum bawp bawp mai. A nu nen maipawl lum chhara an buai em em lai chuan, "Azel" tia rawn kotu a hre ta thut a. A hawi chhuak vat. A êm dahna bul lawkah Davida hi a lo ding reng mai a. Ngun zetin a rawn melh reng mai. 

"David, i la dam law? " a lo ti hú a. 

"Ka be duh che a ni" a rawn ti a. A ral leh daih. A nu chuan, "Ti nge khatia i awm reng.. Haw ang" tiin a lo kai tho a.. A mumang ram atang chuan a harh ta chiah. Thlanin a lo bual a. A mumang hi a tha lo thei riau tunlai chu. A tui inchhawp chu a in khawlh khawlh a. A mut a chhuak leh tawh lo kher mai. Sana a en a, dar 1 a lo ri dawn mek. Engkim chu a reh ngawih ngawih. A hriatna thazâm te chuan eng emaw a awm tih an rawn hriilh tih a hria. Tun tum chu engin nge mawlh a hre lo, Davida hmuh a inbeisei takzet. Ni e, a thih danah khan sawi tur a nei dawn tih a chiang ve tlat. Hlau miah lo turin a infuih ve nasa hle bawk. A beisei ang ngeiin choka lama an bathroom kawngka chu a ri rek a, a inhawng thawm in a zui nghal bawk. A naute hnar súk súk dan atangin a naute thawm a ni lo tih a chiang ngang mai. A tho ta ţhem ţhem a. A room chhuahsanin choka lam chu a va pan a. Dawhkan bawhin Davida ngei mai chu a lo thu ran mai le.. 

A rawn melh zauh a. Hnuai lam a bih leh daih. 

"Ka ngaithla a nia.. " a ti sep a. Davida chu a thaw hawk a. A kuta dawhkan tlir zaih zaih chungin, "Mitthi ka ni ta mai hi ka awih thei lo " a ti a. A hmel chu mitthi hmel pawh a pu lo, a dam thlup mai. 

"A pawi khawp mai" a ti a. 

"Chuan, ka lo kal chhan chu i hria ang tiraw? Ka thihdan hi min puanzarsak tur chein ka duh a ni" a ti ta a. Azeli pawh Davida hmachhawn zawngin thuthmun a rem a. A hlau miah lo chu amah pawhin mak a ti. 

"Phatsanna tenawm ber leh rapthlak ber a ni. Ka sawi zawng pawh hian ka thinlung hi chemtea vih ang mai a ni.. I rin phak bak a nih dawn avangin ngun takin i lo ngaithla dawn nia" a ti te te a. 

"Aw le tehreng mai" Azeli chuan a lo ti a. 

"Umm.. I hriat tawh ang khan ka nu leh pa te an inthen a. Nuhrawn kan hrawn ta kha a nia. Kei chu ka pa lakah hian thinlung takin ka lawm ngai reng reng lo. A langin nuiin hlim angin lang mah ila, kan inah chuan mi khawhar ber ka ni si. Chuvang a nia thian pawh ka ngainata groupah te pawh ka active em em ni. Ka nuhrawn saw ka nu angin ka ngai thei lo va, kan lakah sual lo mah se, a koh pawh ka ko khat khawp a ni. Ka naute eraeh ka ngaina viau, ka nun tihlimtu ber pawh an ni ve. A duat pawh ka duat. Kar hmasa nilaini khan ka patea nupui ú a boral avangin School kan chawl thut a, Patea nupui u chu Sesawng lamah phum tur a nih tho vangin rei awm lem loin in lam panin ka haw a. A lo reh thiap mai. Thawm nei lem loin ka lut a, roomah ka chho nghal. Mahse, room ka lut chiah chu Apuia room atang chuan thawm ka hre ta a. Kan room hi duratuff hmanga pindan a ni a, thawm nasa deuh chu kan inhre pawh thei a ni. Ka nuhrawn aw ngei mai hian, "A ni ringawt lo.. I pa mahnise, ka duhdan chu i tihlawhtling ngei tur a ni. Min hmangaih a nih chuan" a ti hlawk hlawk a. A ngaihna ka hre lo kher mai. 

Ngaihthlak ruk chakna ka neih miau vangin thawm nei miah loin ka thu ta ran a. 

Apuia aw hian, "Ka pa a ni a, ka ti thei lo. I duh chuan i then thei alawm. Chumi hnuah kawng chu a awm mai ang" a ti a. An sawi awmzia chu va hre vek lo mah ila, ka pa chungah eng emaw tak tih an tum tih ka hria. 

. "Mipa i ni na nge? Nge kei hi nawmchenna mai mai zawk ka lo ni.. Mampuia phei hi chu i fa a ni asin. Hetiang ringawt hi chuan kan tawpsan thei lo.. " ka nuhrawnin a tih takah chuan ka thaw hawk. Mak ka ti lutuk chu ka khur thei hial. Ka unaupa, ka phirpui leh ka nuhrawn chuan ka pa an lo thlim thin a lo nih chu! Uirenaah pawh a tenawm leh rapthlak ber hmangin an phatsan chu a nia. Va thawh lawka va khawih hial kha ka nãp hman a. Mahse, ka insum hram. Ka pa hrilh ngei ka tum ta a ni. Khami ni tukah khan ka pa chu hna avangin Khawzawlah a zin leh ta daih si a. Phone-a sawi chi ah ka ngai si lo. Ka nghak leh ta reng a. 

Apuia leh ka nuhrawn chu ka ten, insum tum hle mah ila, ka be tui thei hlawl lo a ni ber e. Ka awmdan danglam tak avang chuan an ngaih a tha vak lo ni pawhin ka hria. Ka nuhrawn chu mi pasal luahlan duh khawpa hmeichhe nasa a ni a, ka la ngaithiam, ka unaupa chuan engtin nge a nu amah hringtu luahlana chhuahtirtu mihring chu a mutpui theih ka ti a ni. Ka zakin Apuia chu ka zahpui ngawih ngawih a ni ber e. 

Tichuan, ka pa pawh nimin piah khan a lo haw ve a. Hrilhna remchang ka dap char char chung pawn ka nuhrawn chuan kan awm fal dawn hlek chuan min rawn chimbuai zel. Phone tala ka lo hrilh loh kha ka tihsual lian ber a ni ta a ni. Ka hrilh loh chhan chu ka pa khan amah ka ngaihnatna a tlahniam tawh tih a hria a, ka nuhrawn puhchhiat tum angah min ngaih ka hlauh em vang a nia. Tin, finfiahna chiang tak ka nei bawk si lo a ni. Chuvang chuan ka pain ka thusawi a awih nan, finfiahna siam chawp ka tum ta a. An mudun lai chu ka phawk thei dawna ka hriat loh avangin keimah ngeiin ka unaupa lem chan ka tum ta a ni. Ka pa sawi ang khan niminah khan ka nawmsam loh chhuanlamin School ka kal ta lo va. Apuia erawh a chhuak thung. Ka tawm tlawk tlawk hnuah ka inbual fai a, kan sam a inan loh vangin ka sam chu ka tihuh a ni. A ro chuan ka nuhrawnin a hrethiam dawn si a. In hnuaia ka nuhrawn awm mek chu towel chauh vengin ka zuk pan a. Apuia aw phawi ang chiahin, "Lo chho lawk la" ka ti a. Maktih hmel deuhin min rawn melh a. 

"I lo haw lai ka hre miah lo. " a ti a. A ringhlel deuh niin ka hria. 

"Inchungah ka chho nghal alawm" ka ti mai a. Pawn lam atangin in chung panna kailawn a awm avangin a ngaih a tha ve ta deuh a ni maithei. 

"I nau a awm khi" a ti a. 

"A chhuak aniang, a awm lo. " ka ti mai a. Ka chhohsan leh daih. Apuia roomah lutin a thawmhnaw ka inbel a. Rei vak loah ka nuhrawn pawh a rawn chho ve nghal. A rawn lan hmain camera ka kam ru sa vek a. Khumah thuin ka lo nghak a. Ka room chu a va hawng phawt a, "A nuamsam lo sia, ti nge maw a chhuah daih le? " a ti sap a. 

"A bialnu a hmu dawn aniang" ka lo ti mai a. Ka bulah rawn thuin, "I pa hian a la hre lo tih ka hria. Chet lak vat hi a ngai a ni" a ti a. 

"Kar tawpah ruahmanna ka siam alawm. Mahse, Davida hi kan bum thiam hle a ngai dawn a" ka ti ve zel a. 

"Ani pawh hian i pa a zui ve nghal mai ang chu" a ti a. Rapthlak ka va ti tak. 

"Kan tan a hnawksak ngam chuang lo vang. Awmtir ve mai mai rawh" ka ti thung. A ner nâwng a. A nunrawng lutuk chu han ţhuai deuh bawrh bawrh ka chak kher mai. Mahse, insum a ngai si. Ka va hnaih a, ka kuah a, ka fawp ta a. Ka luak mai dawnin ka hria.. 

"Apui, zalen deuha awm dun hi ka chak tawh a ni" a ti sep sep a. Ka u hming a lamri chu ka lawm kher mai. 

"Kei pawn ka chak tawh alawm" tih leh khuma kawih mut ka rual nghal a. Ka hrâwm hrep a. Pawl erawh ka pawl lo. Ka thei ngang lo a ni. 

"Ka pa a lo haw hnai ang.. Zanah inhmuh kan tum zawk mai dawn nia" ka ti ta a. A hrilhhai hmel phian. Eng sawi ta lem lo chuan a chhuk a. Kei pawn ka camera ka check vat. Ka roomah pheiin ka laptopah ka dah lut ta nghal a. Chinfel dan tur ka ngaihtuah ta neuh neuh a. 

Zanriah kan ei lai khan ka nuhrawn hmel a dik tawh lo tih ka hria. A chhan chu Apuia kha inhnuai atangin a rawn lut chho a, chhuna a mi hmuh kha Apuia a ni lo tih a hre tawh tih ka chiang. Apuia erawh a la hrilh hman lo a nih hmel. A pangngai reng. Zanriah ei kham veleh roomah ka inkhung nghal a. Chet lak dan tur bawk ka ngaihtuah leh. Ka lo muhil daih a lo nia. Ka mumangah minpakhat ka hriat ngai loh hian min lo rek bet tlat a, ka lo ţang nasa mai a, mahse, ka hneh hlawl si lo. Ka muhil zui leh ta daih a. Kha ka muhil kha ka muhil hlen ta a ni. Ka harh leh chuan khuma ka taksa chu Apuia leh ka nuhrawn chuan chuan hruiin khai an lo tum mek a. Dan ka tum a, ka thei si lo. Ka mangang a sin aw. Mahse, ka taksa ka chhuahsan tih ka hmuh khan ka thi tih ka hrethiam nghal. Ka phone chu Apuia'n a check vek a, video pawh a delete nghal. Ngaihtha takin an awm a. Ka laptopah ka la dah tih an hre lo a ni ngei ang. Hre mah se, an hawng thei chuang lo vang. Chung chu thil thlen dan a ni e. A chinfel chu i kutah a awm. I thianpa thlarau rethei tak hi puiin a pa nunna derthawng mek saw chhanchhuahsak hram rawh aw" Davida chuan a ti ngawih ngawih a. A thusawi zawng zawng khan Azeli a ţhawng lutuk a, awmdan pawh a thiam lo. A rin phak bak a ni miau a ni. 

"Ka theih tawp ka chhuah ang" tia a hawi chhuah chuan Davida hmel reng reng a hmu tawh lo. Chet lak dan tur ngaihtuahin a tal tlaivar ta thak a. 

A tuk chu office kalin nilengin a buai a. Davida vangin a tawng tlemin a ngaihtuahna a kawm nasa kher mai. A tuk inrinni a ni bawk a. Va len a rilruk ta a. Mahse, fiahna a mamawh ta tlat. Davida lah a duh hun hunah a ko chhuak thei bik si lo. A mangang ru hle. Police hrilh pawh nise finfiahna an phut ngei dawn si. Zing dar 4 velah an thenawm te ui bauh vak vak thawmin a kai harh a. Parda keuin pawn lam a thlir vat. Tumah a hmu lo. Beidawng zetin a mu leh ringawt. A tuk zing a tho, bathroom-a a lut chu a rak ţhawt. Bathrooma an darthlalang khaiah chuan thisen nge lipstick sen pawh hriat loh hian, "1995Dave" tih hi a lo inziak kuau a. A thla a la a, a nawtreh ta nghal a. Tikha chuan a ngaih a ngam ta deuh. 

Tukthuan ei khamah a insiam a, a naute pawh hian an hrethiam khawp mai. Police hrilh nghal mai pawi a ti ta lo. Amah aiin an chingfel thiam zawk dawn bawk a. A hmelhriat ve ber Inspector Muanpuia biain Davida chungchang chu a sawi thuak thuak a, a pa nunna a derthawn thu te pawh. Muanpuia pawh chuan kalpui a lo remti hlauh a. Constable pahnih hruaiin Davida te inah chuan an va kal ta a ni. 

Inleng an lo la nei nual a. Police hmel an han hmu chu an phãwk hlawm hle. Muanpuia chuan Pu Lawmkima chu ko hrangin in chung lamah an hruai chho ta a. Apuia leh a nuhrawn te pawn an rawn zawm ve nghal. Azeli chuan thil awmdan chu chipchiar takin a sawi mawlh mawlh a, Apuia leh a nuhrawn eraeh an meng râng hle. 

"Hetiang dawt muhlum lutuk phuahchawp tur hian hun i duh rei ngawt lo maw? " Nancy chuan a ti vin thak a. A meng ling hlar mai. 

"Finfiahna ka nei" a lo ti sam èt si. Apuia nen an mangang ţan ta. Davida laptop chu lain, a on a. Password chhut luh a ngai a. Zinga a chhinchhiah tawh kha a chhu ta mawlh mawlh a. A inhawng ta. Khawi folderah ber nge a awm a hre bik lo naa, a zawng ta char char. Zawn rei a ngai lo. "Apuia & Nancy" tih folder lo awm kuau chu hawngin an vaia hmuh theiha hriat theih turin a pholang ta a. Apuia leh Nancy te tan kawng dang a awm ta lo. Pu Lawmkima zak leh hrilhhai thinrim bawk si chu a sen ţâwn ţâwn mai. Ţawng pawh a ţawng ţha thei lo. 

"Ka hmuh phak lohah la bo ru" tih zawng a sawi. Nancy han lepchiah dan chu, "Paa, ka duh vang a ni lo. I fapa hian min pawngsual a, min vau alawm.. Ka tan tihngaihna a awm lo a ni" a la ti ngam nia. Tah zet chuan tu khap hman rual lohin a pasal kut thlak a tuar ta a ni. A beng na bawk a niang, a tlu thlawrh mai. Apuia erawh hamhaih hmel takin a ding zum zut ringawt. Police station lamah an hruai ta a. 

Apuia inpuanna chu.. 

"A tirah Nancy hi ka ngaihmelh ngai lo. Ngaihzawng ngaihsak mi ka ni lo va, amah Nancy phei chu ka nu luahlantu a nih avangin ka hua a ni. Mahse, zan khat chu ka pa a zin a, Davida lah ka nu te tlawhin a zin daih bawk. Ruah a sur bur bur a, Nancy hian ka room kawngka rawn kikin, "ka hlau ania' a rawn ti a. Mut kawr pante inbelin bra a hreng lo. A hnute chu a lang vek a ni ber. Kei lah zu ka lo in lai tak a lo ni a. Ka nuhrawn chu ka huat em avangin ka lo ît ta a ni ber. Ka sawi thiam danin ka nu a tihnatna phuba chu lak ka duh a nih ber chu. A duh ang ngeiin ka lo mutpui a. Hmeichhe ngaihsak ngai lo nafam chu min zial â hneh chho ta zel a, sex kan hman reng takah chuan kei pawh a lak tangin ka tal chhuak thei ta lo. Ka pa that turin min ti a, vawi tam tak kan inhauh phah. Ani chuan awmduna ka pa ro hi keiman khawm ila amah hi nupuiah nei bawk ila tih chu a duhdan a ni. A lo ni kher lo thei bawk. A mizia enin ka pa kha lo tihlum tehreng pawh ni ila amah khan ro zawng zawng chana keini unau min hnawhchhuah a tum hmel zawk ka ti.. Mahse, ka â zel a. Ka pa that turin rilru ka siam ta hial anih chu! Mahse, Davida a rawn lang ta a. Ka ruahmanna a tichhe vek a ni. Keimah lem changin Nancy a lo chhimbudawi a. Ka pa bulah engkim a sawi dawn tih ka hriatin kawng dang ka nei ta lo a ni. 

Khami zan khan a rooma a tui inchhawpah mut duhna ka phul a. A muhil ta thuai reng a. Kawngka kha a kalh lo hlauh bawk. Tichuan, zing lamah khan Nancy nen kan inhmu zo kha kan va lut a. Ka unaupa ngei chu ka kut ngei hian ka rekhlum ta a ni. A muhil kha a rawn harh ta lo. Inawkhlum angin Nancy nen kan lantir ta bawk a. A bak kha chu inhriat tawh kha" tiin. 

An chanchin chuan Zoram a luah hneh ngang mai. Mi tinin rapthlak an ti hle. Nancy leh Apuia chu Central jail-ah damchhung tang turin an phur liam ta a ni. 

"Ka lawm e.. Azel, thlamuang takin ka chatuan hmun ka pan tawh dawn e. Ka pa leh ka naute tan lo tawngtai ve thin rawh aw" Davida hmel chu a hlimin, a mitmeng pawh a phur sârh mai. Chhum var pan tak tawlh rual chuan a tawlh ve ta zel a.. Hmuh phak lohah a liam ta.. Ar a khuang thliai thliai a. Azeli muhil pawh a thangharh ve chiah… ham bai bai chungin rilru nuam tak siin a tho chhuak ta a. 

(Mood-a chen a va ngai nasa ve 😢