Ka nupui

KA NUPUI..! 

Ziaktu: Toni Râlte

Kan in thar turah chuan kan inthiar lut kim thawkhat viau mai. Nupa rek chauha khawsa tur kan ni bawk a, a zau mah mahin ka hria. Mahse, nakinah Pathian zarah fanau te pawh kan la nei ve ngei ang a, kan la tawt viau maithei zawk a ni. Aizawl Electric vengah Concrete building hnuai ber dawttu kan luah ve dawn mek a ni. Kan in luahna neitu hi Pu Thanghlira a ni a, Aizawl veng hrang hrangah hian in luah tur a sa nual mai. An nei bawk a, anmahni tak chu Zarkawtah an khawsa thung. 

Kei hi Malsawmzuala ka ni a, kan khua tak chu Chhim phei kawng lam Buangpui a ni a. Kan nu nena kan intawn dan hi tlem sawi ngaiin ka hria a, ka'n sawi ang e. Kan nu Rinpuii hi Tlabung khua daih niin, Kum hnih dawn chu kan khuaa a nite inah a rawn khawsa a. Kei hna avang hian kan khaw lamah ka khawsa ngai meuh lo va, kum tawp Christmas ka hmang ve ţâwk zel a. Rinpuii rawn awm tirh kum tawp chawlh ka va hman tum chuan Rinpuii chu ka hre ve ta chauh a ni. Nula lian thelhthawlh, pian nalh tak mai a ni a, a kawng a fekin a mawngbawr a vawng lah bawk. A awmbawr pawh a poh ţha viau a. A hmel tak erawh ţha lutuk tia han sawi theih ni chiah lo, mahse, duhawm rukna riau nei a ni. Kan khua angah chuan a luck pawl tur tak zawng a ni e, mikhual nula a lo ni chhap nen. Kei erawh chuan ka enliam mai a, a chhan pawh Aizawl lamah ngaihzawng nghet ka neih vang a ni. Chu chu Cindy a ni a, an khawsak a thain amah a zahpuiawm lo bawk a, ka lung a dum viau, kan tum dan chuan nakkum lama inneih te pawh kan sawi ve thuak thuak tawh a ni. Tichuan, chumi kum Christmas chu bialnu tel loin tlangawl tak chuan ka hmang liam ve a. Awm loh rei na nâ na chuan inthlahdah a lo awl deuh bawk nen, Kohhran lamah pawh ka inhawlh lawr tehchiam lo. Ka tawmim angreng. Rinpuii Nî Nu Sawmi kan tih mai pasal leh ka pa ú nupuite hi unau an ni a. Chhungkhat ang maiin kan intlawhpawh ve a ni. Kan inhlat em em lo bawk. Nu Sawmi rawn leng hian Rinpuii chu a fak thei khawp a, tuk khat a lo len tumin ka nuin, "Tihian inbulah a khawsa reng tawh mai dawn mi? " a lo tih chuan, "A ni tawh mai ang chu.. Aa.. Sawi a nuam lem lo viau naa, Rinpuii nu hi a nu diktak a ni lo va, hrawn a nuam tehchiam lo a niang. Kan bula awm a thlang zawk tlat mai a. Ka ú lah an nu ţan hlur chi, pa thothang na lo zet a lo ni bawk nen, a chêp deuh aniang. Tihian kan hnen atangin pasal pawh nei rawh se" a ti ta a. Chu chu Rinpuii chanchin ka hriat theih chu a ni deuh mai. 

Kum tharah Aizawlah ka liam leh nghal a. Ka vannei a, kan pu ber te in hnuai ber te fel ren rawn hi ka luah ve a. Eirawng ka bawl ngai lo tluk a ni. Pu te ina ka ei hi a tam zawk. Cindy hian min rawn bawlsak zeuh zeuh zawk a. Rawn riah changte pawh a nei tih kan sawilang hram ang e. Induh tawn ve ve, dipdaltu nei lo nafam chu zalenna pawh kan hmang thiam tehchiam lo. Damdawi a ei zel vang chauha la mualpho lo mai kan ni zawk awm e. Tichuan, hun a kal ve zel a, March thla lai hawl vel atang hian Cindy nen chuan kan on off ta deuh sek mai. Ni e, a bialpa hlui, a duh ve em em phaia zuk awm ta vang vang a lo haw thut a. A rawn beisei leh nghal mai si a, Cindy lah chuan lo nep phal hek lo ti ila chutin inngaizawng ang tak chuan an awm ka ti hran lo. Mahse, ka mit tikham tur tawk thil a thleng ta zeuh zeuh a. Inthen ka rawt lahin a duh ngai bawk si lo. Kei lahin ka lo duhin ka lo hmangaih nasa tawh si. Laklawh deuhin kum chanve dawn chu kan awm ti mai ang. 

Mahse, ka thianpa ngawih ngawih, Cindy te venga awmin, "Thianpa, thlah a tha ang. A chhungte sawn an pâk ţan tlat, tin, hman zan mitthi lumen zan khan lo hmu rutu an awm a ni awm e. Ka phâwk ti chiah lo mah se; an thukhuh dan atangin eng emaw chu a thleng a nih hmel. I hma ka ngaih vangin ka hrilh che anih chu" a ti ta a. Chu zet zawng ka thiantha tak chuan dawt a sawi ka ring lo bawk a, Cindy ka hmangaihna chu huatnaah a inlet ta a ni ber mai. Ka ţhen ta a. Mi rawn zai leh mah se; ka hawi ta miah lo va. Kan tawp zui chu a ni ta mai. Nat erawh ka na ngang mai. Intihthawven ka duh vangin kar hnih chawlh ka la a, kan khuaah ka haw ta a. Kan huan lamah ka liam ta tlut tlut mai. Dil sangha man turin Rinpuii te leh ka farnu te nen kan kal thin bawk. Ta tang chuan Rinpuii chu Cindy laka ka tawrhna hrikthlak nan ka hmang a ni ber e. Ka hmu mawi chho a, ka ngai ta riau zel a. Cindy lah a reh ve hmak tawh bawk si nen. Rinpuii chuan min hnar phal ka ring hauh lo bawk. Zan lamah ka leng ve ta tlut tlut mai a. Inbirh tlut tlut na nâ na chu hneh hun ka nei ta thuai reng a. Aizawl ka phei leh hmain inzawmna kan nei ta a ni. Tichuan, a tawi zawngin kum tawp ka haw chuan ka chhungten palai tirh mai an duh thu an sawi ta a. La inring chiah lo mah ila, Cindy runluih nan la ti hram chungin ka remti ve ta a. Kum hlui leh kum thar inkarah palai kan tir a. January ni 28-ah kan innei ta a ni. Kei pawn chawlh ka la ta bawk a. March thla thleng kan inah kan nupa chuan kan khawsa a, ka mit a tlun lohna ka hre lo va; nupa nunah pawh ka rin loh leh beisei ai daihin a che zei! Innupa na nâ na chu kei pawh ka nghet ta khawp mai. Min zahthiamin ka chhungte lakah a tha em em bawk a, ka nu phei chuan a duat mah mah em aw tih tur a ni. Ka farnu te lah a be thiamin a ti seuh seuh thiam a, inrem taka kan khawsaho chu lawmawm ka ti khawp mai. Ka chawlh lak a zawh takah chuan Aizawl lama inbengbel ve rih turin kan nupain kan liam leh ta a ni. 

"Mal, kan thlalak tarna tur hi perek lo kheng lawk teh" tiin min rawn au lang lang a. Ka va kheng a, uluk zetin kan nupa thlalak chu a tar a, a lung a lawm hmel kher mai. Thiantha ten min pui bawk a, kan inrem fel thuai mai. Tlaiah chaw kan eipui nghal bawk a. Rinpuii chu pawl 12 thleng chauh lehkha zir a ni na vangin ka thian leh thawhpuite a kawm danah duhthu a sam hle. Ka thiante pawn an fak hle reng bawk. An han haw darh a, kan nupa chauhin kan in tharah chuan muthmun kan rem ve ta a. 

Thla khat kan awm meuh chuan Rinpuii zia chu a duhawm telh telh mai. In chung leh hnuaite nen pawh an inpawh tawh viau. Nitin hnaah ka kal a, tlaiah fai vangin min lo dawngsawng a, engmah ka tih ve ngai loin engkim a lo peih thlap zel bawk. Ka sawi hmaih loh tur chu Cindy kha a bialpa nen khan phaiah an chhuk dun a niawm e. In an zu luahdun nge eng nge engmah hriat ka nei tawh lo. Ngaihven pawh ka tum buai hek lo. Kan nupa kan hlim a, a tawk rih mai. 

Aizawla thla li zet kan khawsak hnuah thil mak tak chuan kan nupa chungah ro a rawn rel tan ta a. Tlai khat ka office bang in ka thleng chu in a lo hnawk niaih mai a. Rooma ka va luh chuan Rinpuii chu rizai sinin a lo mu hlun mai. 

. "I dam sam na nge" tih pahin a chal ka zuk dehsak a. A lo sa kher mai. Mitmeng â deuh riai hian a rawn hawi chho a, min hre ngai miah lo ang hian rei vak lo chu min melh nia! Mahse, a inthunun niawm takin a nui lui a. 

"Nia, i lo haw tawh ni maw?" tiin thawh mai a tum a. Ka nem mu leh vat. "Min lo call tur alawm.. Damdawi ka'n dap ange, mu rawh.. I pang a sa em mai.. Ngati ringawt nge mawni dawn le" tih pahin damdawi bur ka va la a, ka zen rak rak a. Nachhawkna sang deuh ber tur nia ka hriat chu tui nen keng pheiin ka dawlhtir ta a. 

"Tikhan mu hahdam rawh aw.. " tiin duat deuhin puan ka sintir a. A chauh hmel si a, ka khawngaih reuh ngei mai. 

"Eirawng chu ka bawl thei mai ang" a ti hram a. 

"I tiang lo em mai. Ka bawl ve thei" ka ti a. Ka inthlak sawk sawk a. Zanriah tur ka rel tan ta a. Ka zei tehchiam lo naa, ka ti ve naw naw thei mai. Ka bawl zo, ka inbual zawh meuh chuan Rinpuii pawh nachhawkna chuan a lo chhawk tawh a. A lo tho harh ve ta deuh. Tlem tal ei tura a nawr vangin chaw pawh chu a ei ve hram. 

"Naktukah thisen laktir a ngai a nih kha.. Ka rualin i chhuak ve ang a" ka ti a. 

"Ka zia mai ang. Ngaichang phawt ang" a ti mai a. 

"Chutiang ringawt a ni lo. A chhan hriat a tha" ka ti a. 

"A mak khawp mai. I chhuah hnu khan ka insu a, insuk pahin chhuat ka nawt bawk a. Ka nawh mek laiin ka lu a rawn hai thut a, ka pai deuh nawk nawk alawm.. Ka lu a rawn na lutuk a, a keh mai dawnin ka hre hial. Ka mu ta ringawt anih kha" a ti seuh seuh a. Mahse, ka hawn tirha in lo hnawk niaih kha mak ka ti angreng. Ka zawt duh lem chuang lo. Hma takah kan mu a. Harsatna kan tawk lo. Zingah pawh a tho harh viau,. Thisen lak tir pawh chu tul a ti ta lo va, ka nawr lui ta lem lo. 

Mahse, khami ni atanga kar khatnaah chiah ka office bang chu in chungnuin min lo hui zauh zauh a. Ka va peng kawi a. Nu Remi kan ti mai a. Ka nu rual vel tur a ni. 

"Mala, eng dang phei chu a ni lo va, in nu awmdan hi mak ka ti deuh. I office hlan hian maksak deuhin a awm thin a. Nimin piah khan ka antam leisa a lo tam deuh vangin rawn pek che u tumin ka chhuk a, kawngka a lo inkalh khum a. Ka kik vak vak hnuah pawh a rawn hawng lo. Ka chhohsan a, 5 mins hnu velah sam phelh phang hian a rawn chho a, a mutthilh thu a sawi a. Ngaihthat lohna pawh ka nei lo. Thingpuite ka lum a, ka thingpui siam lai chuan kan fridge a hawng a, kan pa vawk kawchhung rawn lei kan dah chu a thithun la chhuakin a keih bawrh bawrh mai a. A la hmin reng reng si lo! Mak ka ti nasa mai a. Min rawn melh a, a mitmeng kha ka sawi thiam chiah lo. A rapawm a ni tawp. Ngawi rengin a chhuk leh ta daih a. 

Chuan, Nimin khan kan naute 2nd hand bale rawn hawn chu mi dang en hmaa en tura zuk sawm ka tum a. Kawngka a lo kalh tawh lo. Ka lut ve mai a. Ka ko a, a reh tlawk tlawk mai. Mahse, a hnuah, "Ka lo kal" a ti a. A rawn chhuak a. Ka kal chhan te chu ka sawi a, "Ka peih lo" a ti hmak mai a. A sawi zawh rual rualin, min nam chhuak a. "Pitar, rawn lawr fo suh. Keimahin min awmtir rawh" a ti bawrh bawrh mai. Ka hamhaih khawp mai. In lo awm tirha Rinpuii kha a ang tawh lo, dam lohna emaw natna ruk te hi a nei a ni lo maw? A mak ka ti em a. Hrilh lo thei lo ah che ka inngai a ni" a ti ta dap dap mai a. Ka thu hriat chuan min nghawng kher mai. Engtin nge chutiang chu a nih theih? Ka nupui Rinpuii kha chu mi vengva, inngaitlawm leh mi dang zai ngai tak kha a ni asin le.. 

Rilru mang deuhin inah ka lut a. Eirawng a lo bawl surh surh mai. Min lo nuih var var a. Ka nuih let ve hram hram.. Ka inbual lai te chuan Nu Remi thu min hrilh kha ka ngaihtuah let rauh rauh a. Rinpuii chu zawh tawp mai chi em mawni dawn le.. Nuam ka ti chiah bawk si lo. Zanriah kan ei lai te chuan ka lo chîk deuh nge, "Ni dang i va ang lo ve. I ngawi hmuk a" a ti a. 

"Aa.. Ka chau deuh a" ka ti ta ringawt.. Khatia a dam loh a khawsik tuk atang khan chaw hi a heh zual em em a, ka rin phak bak aia tam a ei ziah. Chaw heh mi a ni ngai lo kha a nia. Chungte pawh chu a mak zawnga lak chuan a mak riau. 

Zanriah kan ei khamah ka thianpa Vana a rawn leng a, ani hi chu a zin chhuah loh chuan kan in hrik a ni ve thawthang a. Titi a thiamin fiamthu a duh bawk a, kan nuihpui bawk bâwk zel. Mahse, Chumi zan Vana rawn leng pawh chu ka hlimpui famkim thei meuh lo. A langah chuan ka nui naa, ka bula thu ka nupui nui har har chu ka chik ru reng ni maiin ka hria. Vana pawh chuan kan boruak chu a hrethiam ve nge ni dawn ni, zan dang aia hmaah a hawng ta a. Keini pawh mut kan tintuah nghal mai. Nupa nun hi kei a fit rual lo ni bawk nen, kan hmang khât lem lo viau. Rinpuii hi nupa nunah chuan duhthusam a ni. Mahse, a khawsik ni atang khan chhuanlam siamin mi hnar ta ziah a. Kei pawn lung loah ka la bik lem lo. Chutia kan han mu ta chu beisei pawh ka nei lem loh laiin, min rawn kuah a.. Amah zawk chuan min nawr ta a. Phurna pakhatmah nei loin nupa nun chu ka hmanpui ta a. A tawp a thlen dawn chuan zan danga ka la hriat ngai loh thil ka hre leh ta bawk.. A khur hlawk hlawk a, a sam te chu a kek nget nget a, a chang leh ka hnungzang te chu rawn hamin, a na phian lehnghal. A mitmeng chu chunglam melhin a varlek lek bawk. Chutiang chuan vawikhatmah Rinpuii hi a la awm ngai lo! Ka zep hni hne lo vang, chutia rapawm taka a awm vang chuan kei chu ka zawi nghal vek. Ka tilui thei tawh ngang lo va. Ka tawpsan tawp. Ani chu a muhil nghal ni maiin ka hria. Kei erawh ka harh kar thung. Ka nupui hian natna eng emaw a vei niin ka hria. Doctor panpui mai chu ka tum ta a ni. 

A tukah Doctor panpui ka tum thu chu ka sawi ta a. A nui hawk hawk ringawt. 

"That lohna ka nei lo. Ka tha vek. Ka dam bawk. Pawisa hek heka Doctor rawn ka duh lo" a ti ta tlat mai. Kei lahin a that lohna nia ka hriat ka sawi ngam mai bik si lo. Anihna takah chuan hrehawm a tiin a zak ang tih ka hlauh vang a ni pakhat. Rilru kim lo zetin in ka chhuahsan a. Nilengin ka rilru a nuam lo. 

Chutianga mawlhtu nei run chung chuan hun kan hmang ve zel a. Thenawm te nen pawh kan inhlat ta vawk ni hian ka hria a. Hrehawm ka ti. Ka awm loh hlana Rinpuii chet dan hi hriat ka chak zek zek a. Enthlak dan tur a vang ka ti si. Thiante han rawn lah ka tlawmngai ve tum hrang a. Mahse, nawr et ettu avangin Vana chu ka rawn ta tawp a. Ani pawn Rinpuii zia a dan thu chu a sawi ve ta reng a. 

"Hmanni i office hlana i machine hawh tura ka kal pawh a lo inkalh khum a, rei iak ka nghak alawm. A rawn hawng a, Thianpa, min hrethiam teh.. Khatiang em ema thil rimchhia kha ka la hre ngai lo. In nu khan kha rim kha a nam ni pawn ka hre lo, in inah sawn a nam zawk niin ka hria. Mahse, zana ka rawn kal leh kha chuan eng rim mah ka rawn hre leh tawh bawk si lo' a ti ta a. Mak ka ti takzet. Vana thu min rawn angin camera kam ruk chu ka tum ta a. Rinpuii hmuh loh laia fit a ngaih dawn vangin a mutthilh tawh hnuah ka tho a, hlauthawng takin ka fit ta a ni. 

A tuk nileng ka chhuak leh a. Phur ru angreng takin ka haw a. Zaninah hi chuan eng emaw tak hriat ka nei turah ka inngai. Vana a rawn leng lo bawk a. Mut hma ka rawt ta a. A muhil tawh nia ka hriat hnuah ka tho leh ta ţhem ţhem a. Ka camera fit te chu checkin laptopah record chu ka en ta a. Rinpuii chu a vei tuak sek mai, chawhnu lamah chuan roomah awmin a thawmhnaw a phelh vek a. Darthlalangah inenin a lam kual vel a, mak ka ti nasa. Chutah kan inneih thlalak chu la thlain chil te a chhak a, chhuatah paihin a rap vel a. A chetdan teh hrep chu aw! Mahse, a hnuah hru fai lehin dimdawih deuhin a tar leh lawi si! A hnu deuhah a sam tuai thurin a dang chu a kawm ngawng ngawng a. Room chhuatah chuan a luak ta nghek mai. Chu chu ka la en thei. Ama luak ngei a ei leh meuh chuan ka uak ta tuar a! Laptop ka khup nghal. 

"I va mengrei ve" chu aw ka hriat chuan ka vir zawk a ni ber mai. Ka phu nasa lutuk. 

Ka nupui chuan a mut kawr nen sam thlah hnuangin min lo melh kur mai. 

"Nia.. Ka muhil thei lo va" ka ti bah nak a. 

Min rawn pan hnai a. Ka tawlh hnug thung. 

"I awmdan hi ka hrethiam lo. Min hlat telh telhin ka hria" a ti a. 

"Rinpui,i awm dan hi a dik lo. Inentir i mamawh. Naktukah i duh emaw duh lo emaw ka hruai dawn che" ka ti ta tawp a. Ngawi rengin khumah a va mu leh hmak. 

Kei pawh ka mu ve nghal. Ka nupui chu ka hnaih tha ngam lo a ni ber mai. Ka lungten nge a luak ngei a ei avang khan ka hnaih hleithei lo. 

A tukah chuan min hnial miah loin min ui chhuak ve ta mial a! Doctor ka va hmuhpui thlap. Mahse, a awmdan zawng zawng an sawi chu amah a awm ve kur si, ka hreh leh tlat! Damdawi a chawh nual a. Ani chuan min hawnsan ta a. Office banah Doctor chu ka tlawh leh ta tawp mai. Chutah chuan a awm dan zawng zawng chu ka sawi fai ta leng a. Mak a tih ve hmel hle. A chhul lam a nih te a ring a, damdawi min chawh tha leh ta bawk. Beiseina sang tak nen ka haw ta a. Kan nu pawn eirawng lo bawlin hmel hlim takin min lo dawngsawng a. A hma ang kha ni leh ila ka va duh tak em.. Zanriah pawh zan hmasa ai chuan ka ei tui e. A damdawi ei hunah tak ka eitir thlap a. Thu a awih viau mai. Ruah a sur nasa a, kan mu ta ringawt. 

Tiharhtu awm ang maiin ka harh hlawl.. Ruah chu a lo bang deuh tawh a. A la tla fuap fuap tho. Kan nu chu ka bulah a mu ta hauh lo mai. Sana ka en vat a. Dar 2:13 chiah chiah a ni. Bathroom ka va en a, a thim vek, tumah an awm lo. Choka lamah ka va kal, min hnungchhawn zawngin gas bulah hian a lo ding khur mai a. 

"Rinpui" ka ti sap a. 

Muangchangin a rawn inher tual tual a. A sam chu a hmalamah a tla thla chhup a, mahse, a hmuia thil sen kai nuai chu hmuh hmaih chi rual a ni lo. A sam kar atang chuan mitmeng var pup hian min rawn melh rú bawk a. Ka tawlhhnung dawrh mai. Ka thauah min man a, ka khur ru ta der der mai. A tawng der si lo. 

"Ti.. Ti nge khatia i awm? " ka ti nawk nawk a. 

Chutah a rawn nui huk. A nui ri te chu rapawm lamah a kal. A ban dinglam rawn phar chhuakin min rawn kawk va a. 

"Rinpuii ka ni lo" a ti ta chher chher mai. Chutia a tih takah chuan ka hlauhna te kha mak takin an bo duak nia! Ka nupui chu ramhuaiin a man nia ka hriatna chuan min chhawk ka ti dawn nge? Ka ngaihthat loh rukna zawng zawng chu an phai duak duak mai. Pawi ka tih loh vang ni loin a chhul lam chiangkuan loh vang emaw a rilru lam chian loh vang emaw a nih kha ka lo hlau ru viau a ni ngei ang. 

. "Tu nge i nih? " ka ti tuar a. 

"Rinpuii" a ti leh lawi si! Ka va pan hnai a. A sam te chu ka hui mam sak thuak thuak a. A hmuia thisen kai luai chu a thang kher mai. Tui khawihnaah chuan tlaia ka lei hawn ar puahsa chu a lo inthet darh nuaih mai a. Chu sa hring ngei chu ka nupui chuan a lo ei a ni ngei ang. Kan nu ka kuah lawp a, tui dehnah chuan ka kuai kun a, a hmai ka phihsak ta bawrh bawrh a. Engmah a sawi lo. Ka hruk hul leh vek hnuah roomah ka luhpui a. Khumah ka muttir a. A chauh hmel hle. Chunglam a melh kul reng a. 

"A tu pawh ni rawh. Ka nupui hi kalsan rawh. " ka ti vin thak a. Chhungrila nawrtu a awm avangin kan nu luchungah kut nghatin ka tawngtai ta a. A tal eih lo. Ka tawngtai zo ka men chuan a lo muhil bawrh bawrh mai. Mak ka ti telh telh. Ka rilru a hah hle bawk. Ka pa te chah phei mai tur em ni ang aw ka ti rilru a, an hna tul vanglai a ni bawk si. Khami zan atang kha chuan Rinpuii pawh chu a zia zawi ta hle. Pangngai takin a awm chho tan a. A tawng tam lo em em thung. Inthlahrung hmel te a pu thin. Nupa nun pawh kan hmang pangngai ve leh ta deuh. 

Mahse, kan nu a zia chho tihin kan in luahah chuan thilmak a thleng chho tan leh ta. Ka office bang ka inbual zo chu towel ka ken luh theihnghiilh vangin Rinpuii ka ko a, towel min pe turin. Bathroom kawngka chu zimtea hawngin ka ban a, a rawn dah ve mai. Towel veng chunga ka chhuak chu Kawngkapui a ri rak a, Rinpuii chu a rawn lut ve chiah. 

"Khaw nge i kal a? " ka lo ti var a. 

"Chawhmeh ka han en lawk a.. Ka lei nual mai. " a ti siam siam a. Ka va chhuak ve a, a lo lei nual reng bawk a. Mak ka tih zawk chu towel min rawn pek leh bathroom atanga ka chhuah kha 1min pawh a liam lo vang. Engtin nge chumi chhung lek chuan a chhuaha chuti zozai chawhmeh chu a han lei hman? 

"I va che rang ve.. Towel min pek khan i chhuak nghal ni maw? " ka ti thuphung a. Mak ti zet hian min rawn melh a. 

"Awihawm loh e. I inbual hma khan ka chhuak tawh.. " a ti ta mai. Ka bing mup thung. Tu nge towel min petu kha ni ta ang le. 

Zanah Vana a rawn leng a, a titi suam suam a, Rinpuii pawn ngai a awh deuh tawh bawk a. A lo nuihpui leh var var mai. Vana awm lai reng chuan vawi leh khatah thil rimchhe uchuak tak mai hi a rawn nam huk mai le! Kan inmelh hrek hrek a, current a la thim zui. Inverter kan la nei ve si lo va, solar plate te takte kan neih lah hian a daih rei si lo. Kei chuan on tumin switch chu ka han bat vat a. Ka kut ka la thla rang kher mai. Ban hmul ther thur niawm tak ka han dap duh tlat a ni. Ka on ni miah loin a rawn eng ta a. Rimchhia erawh a la nam reng. 

"A va han uih em em, eng nge niang le" Rinouii chuan thlanglam tukverh hawn pah chuan a ti a. Pawn lam boruak a rawn luh takah chuan a zia chho ta hret hret e. Mahse, ka tiril a khur a ni. Patlinga pumpa ka hlau a ni ber e. Ban hmul ther thur kha tu kut nge ni ang? Vana lah a thutna a sawn miah si lo, bakah a ban a hmul lo hrim hrim. Vana pawh a haw zui ve nghal a. Keini pawh mu turin room kan lut. Ka ţi dui mai. Dawihzep ka va inti tak. Ka pachang thei der lo mai. Rinpuii a hnar sâk sâk lai te chuan ka let tawn sek a, ka harh tulh tulh mai. Zing lam dar 3 bawr velah kan room-a bathroomah chuan tui a haw pur pur mai. Ka thu chhuak vat a. Rang takin ka va hawng. Engmah a hawng lo. Ka khar chiah tihin bucket te chu a ri bawl bawl a, tui bawk a haw leh. Ka hawng leh a, umm tui chu a lo haw ngei e. Tu mah mihring an awm lo thung. Ka va herh tawp a. Ka hmai te ka phih bawrh bawrh. Current a awm tawh bawk a, a en uar hi chuan hlauhna a kiam deuh thin. Ka mut leh chuan, "I muhil thei na nge? " Rinpuii chuan phak chual hian a ti a. 

"Umm.. Ka muhil ve mai ang" ka ti a. A ham bai bai a. A muhil zui leh daih. Kei pawh ka hriat loh karin ka lo muhil ve hram. 

Rinpuii a that ka lawm tehlul nen, kan in chu a hrâng ta niin ka hria. Sunday zan a ni a, Rinpuii muhil lai chu a rawn rak chhuak ţhawt mai. Rang takin ka va kuah a. A thaw hlawp hlawp a, a lungphu pawh a rang khawp mai. 

"Mal, kei chu kan in hi ka hlau.. Chhuak ang" a ti ta hlawl mai. 

"Ngati nge? Hlauh tur a awm em ni? " ka tih chuan, "Chhunah te hian roomah pawh ka mu ngam ngai lo. Chokaah te sawn ka thu reng zel. Hlauhna riau ka nei thin. Ka dam loh lai te khan engkim kha ka hre vek. Ih maw, Mal, engkim hi hre tawh la a tha" a ti ta mial mial a. Ka insiam rem a, ka ngaichang ta ran mai. 

"Khamini ka khawsik ka lo mut ni khan ka luhai kha ka lo tlu a, i bulah ka sawi hreh em a ni. Chhuata ka tlu kha min chawi lawptu a awm a. Khumah khan min muttir ta a ni. Kha ta tang khan chenchilhtu ka nei a, ka tih ngai loh thil mak tak tak ka ti a, a hnuah hian ka hre chhuak thin. Hrehawm ka ti a, ka hrilh ngam bawk si lo che a. Amah chu ka hmu thei lo, min thunun tlat bawk si. Mahse, kha min tawngtai zan khan i tawngtai khan mak takin ka chau em em a, ka mutthilh daih nghe nghe kha.. Doctor kan va hmu ta a, damdawi hmanga tih dam theih ka ni lo tih ka hria, mahse, tihbeidawn che ka hreh em a.. Damdawi pawh ka ei ve ta zel anih kha. Mahse, ka theihtawpin Pathian ka au a, min chenchilhtu chu zawi zawiin a kiang ta hret hret a, Bible te hi chhunah hian ka chhiar nasa thin lutuk. Ka dam tawh emaw ka tih hnuah kan in hi an rawn chenchilh leh niin ka hria" a ti ta a. Engkim a lo hre ve vek chu ka thaw huai zawk. 

"Nia, Kei pawn ka lo hre tawh asin.. In luah tur dang ka lo dap dawn nia aw.. Chumi chhung chu lo dawhthei hram hram rawh" ka ti ta a. Dap ngei pawh ka tum. 

A tuk atangin ka dap tan ta a. A to mah mah zel hi ka buaina a ni. Ka hlawh a tam lua si lo. Tlai ka haw chu Rinpuii chuan min lo kuah chawt a, "Lo kal teh" tiin roomah min kai lut a. 

Khumah chuan test kit a lo awm a, min hmuhtir ta a. A nui var var mai. Ni e, kei hi pa ka ni ve dawn.. Ka va hlim em.. Rilru nuam lo leh kim lo ţeuha ka awm hnuah hlimna chuan min rawn hnaih tan ta. Rinpuii chu ka kuah ta vawng vawng a. Mahse, zanah thawm kan hre leh ta. Kan khum hnuaiah chuan phun ser ser niawm tak kan hre ta tlat. Rinpuii a phawk hra mai. Kei chuan vawi leh khatah khum hnuai chu ka zuk bih thut a.. Engmah ka hmu lo. Thawm pawh a tawp nghal hmiah. 

A tuk atang chuan ngawrh lehzualin in luah tur chu ka dap leh ta a. Khatlaah ka duh ang chu ka hmu. Mahse, a neituten bungrua eng emaw an la dah avangin hun tlem nghah a ngai dawn a ni. Rinpuiin nau a pai ta bawk si a, a him lo tlat. Mak ka tih zawk chu Rinpuii a hmaa a awmdan kha. A kawchhungah ramhuai kha a lo lut reng em ni ang le?! Kan in chenchilhtu thiltih a ni thei ang em? Engmah ka hre lo. 

Kan in lam pana ka hawn lai chuan Nu Remi pasal Pa Zika'n min lo call a. 

"Mala, rawn haw vat teh. A hmanhmawhthlak" a rawn ti ta mai. Ngaihthat lohna lian tak nen ka pen hlawk hlawk mai. Ka zu thleng thla chu kan thenawm te ho chu kan in kawtah an lo ding far mai. An hnar an hup bawk. 

"Eng nge thleng a? " ka ti a. Pa Zika chuan, "Kawngka hi chhunglamah a inkalh si a, thil rim na lutuk chu in in atanga chhuak a ni bawknsi.. Kan ngaih a tha lo a ni" a lo ti vat a. Kei chut an kawngka chu tichhe mai turin ka ti ta a. Tlangval pathumte chuan an nek sawk sawk a, a chhe ta hram. Mitthi uih rim na lutuk avang chuan kan uak ţhawt thawt mai. Hmanhmawh zetin roomah ka tlan lut a. Karei! Ka thil hmuh avang chuan ka ding ta chawt. 

Khumah chuan Rinpuii chu a lo mu ngil zar a. A taksa ţawih tawh tan mek te chu lungin an lo bawm nuai nuai mai nia! Ka mumang a nih ka beisei a ni. Mahse, a ni lo. Engtin nge chu chu a nih theih? Tukinah pawh tha takin kan inthlah kha mawle.. Mitthi maw ka lo chenpui reng a? Ka ring thei lo. A hnu lama thil thleng zel chu engmah hriat ka nei tawh lo. Engtin nge Rinpuii ruang chu an sawngbawla an thehthang ka hre hek lo, ka chhungte an rawn kal leh kal loh lah ka hre bawk hek lo.. Ka harh leh meuh chuan thla 4 zet mi â dahna hmunah ka lo awm tawh. Mahse, ka harh chhuak leh ta a ni. 

Ka tha tawh tih vawi tam ka thlen hnuah ka chhungten min rawn la chhuak ta a. Thil thlen dan engmah min zawt lo va. Ka sawi hek lo ang. Mahse, Rinpuii nge ka chenpui ramhuai tih erawh ka hre duh a ni. 

Ka harh chhuah atanga zan thumnaah mumang mak danglam tak ka nei ta a. Cindy ka lo hmu a ni. Mitmeng sen rúm leh huatnaa khata min melh chung hian, "I nupui kha nu vannei tak a nih avangin a thih hma phah a nih kha.. Tudang ni loin keimah ngeiin ka that..a ta i ni thei bik lo.. " a lo ti tuar tuar mai. A kut cher chhe zet chuan ka hrawkah reh a rawn tum a, ka tal aih aih chu ka tal harh ta a ni. Ka thlan hluam mai. Ka hui pawp. Thil mak tak a va ni èm. A tukah Cindy chanchin chu ka ngaihven ta nghal a. 

A thiannu ve ber Kimkimi number ka zawng nasa. Kan inthen khan a mah kaihhnawih ho kha tumah ka be ngai ta lo va, an number pawh ka nei tawh lo a ni. Facebook atangin kimkimi no chu ka nei thei ta hlauh mai. Ka va be nghal a. 

"Hrilh dawn che pawn biak pawh ngaihna che ka hre lo va. Cindy chu a boral tawh alawm. An pa khan kut a thlak nasa thin lutuk a, an pa kut tuar loin a thi kan ti mai. Mahse, a mualphothlak an tih avangin a chhungten report an thehlut lo zawk a. Mizoramah pawh phum a ni lo. Ka lainat asin" a rawn ti ta a. Cindy thih hun leh Rinpuii awmdan danglam hun a inang em tih ka zawn chhuah a ngai ta in ka hria. Diary ka ziak ngai lo va, ka hriatna lah a la mawl huih bawk si. Nu Remi ka hrechhuak ta a. Rinpuii danglam tan hun kha a la hriat ringin ka va zawt ta tawp a. A ni tak chu a hre lo va, a thla eraeh a la hria. Nileng zankhuain ka chhut ta ngat ngat a. Hei hi ka chhut chhuak ta a ni. 

Cindy chu July ni 16-ah a thi a. Rinpuii khawsik vak ni kha ni 16 chiah a ni. Mahse, khami ni khan Rinpuii kha thi nise a ruang kha a tawihral titih tawh ang. A dik thei lo. Rinpuii chu tihbuaiin a awm chho ta a. Zana arsa hring a ei zan kha ka hrechhuak ta. Khami zanah khan ka tawngtai a nih kha.. A lo muhil bawrh bawrh thung. Khami zan khan Rinpuii ni loin Cindy zawk ka lo tawngtai a ni thei ang em? Hei zawng tuma chhan theih loh zawhna a ni tawh dawn a nih hi. Rinpuii thih hnuah a taksa hawhin Cindy thlarauin min uap a. Ka lakah lemchangin ka nupui angin a awm a… ni lo, engmah hi a chiang tak tak thei lo.. Engvangin nge Rinpuii taksa pawh chu a chhuahsan kher le? Nau te kha a pai si a.. Aa.. Ka â mai dawn.. Heng zawhna zawng zawng chhanna hre tur chuan Pathian hnen ka thlen a ngai ang. 

Thil makah pawh mak danglam ber chu ka chungah a thleng ta miau si a. Chuvang chuan ramhuai hi ka ngaina lo a ni.