Boss Amanda 4

BOSS AMANDA - 4

Ziaktu: Toni Râlte

Kan hmaa thu chu nu kum36-38 inkar bawl vel, smart tak, fin hmel tak a ni a. A thut dan leh a landanah pawh nu zahawm tak niin a lang. Mahse, buaina a nei tih erawh a mitmeng buai nak atang chuan a lang ve tlat. Amanda chuan a harsatna sawi turin a han ngen a. 

"A bultê atangin ka'n sawi ange. Kei hi Vanlalsangi ka ni a, Vl tiin min ko thin. Churachanpur-a piang leh seilian ka ni a. Kum 21 ka nihin Aizawlah hian ka pa hna avangin kan rawn awm ta a. Ka pa chu Hauzathang a ni a. Ka nu erawh Lusei niin Lalsiammawii a ni thung. Ka hming pawh hi Lusei hming tawmin a phuah ve a ni. Unau pahnih chiah kan ni a, ka nau chu Vanlalduhsaka a ni. Kum 30 ka nihin tuna ka hna Lecturer hi ka hmu a, ka hmuh kumin ka pa chuan chuap cancer vangin min boralsan a. Ka nu hoin kan awm. Ka nau erawh Aizawla kan han pem ta kha thian a thlang fuh lo nge ruihhlo lamah tlanin kan buaina ber a ni chho a. Zirna pawh chhunzawm tawh lo vin mechanic lam a tui vangin chumi line-ah chuan a kal a. Workshop pakhatah a thawk ve a ni. Tichuan, kum 33 ka nihin Ka thawhpui Denis-a nen kan innei a. Ka nu pasal neihsan kha ka hreh hle naa amah zawkin min nawr zawk a. 'I kum a tam ve zel a. Ka dampui reng dawn lo che. I hmuh lai hian nei rawh' min ti a ni. Denis-a chu unau zinga upa ber dawttu a ni a. An chhungkua an rual ve bawk nen, kan inneih atanga kum khat hnuah indan zai kan rel a. Hetih lai hian vanduai asiamin ka nu chu a hriselna a tlahniam hle a, ka nau lah sualna khur lam a la luhchilh ve mek bawk si. Ka nu ka khawngaih bawk si chu Denis bulah ka nu bula awm ka duh thu ka sawi ta tawp a. Denis te hi chhungkaw rual viau e ti lo chuan hnathawk hi amah leh ka pa bakah a nau mipa an ni mai a. Ka pa hlawh lah pension hlwh a nia, tihtham a awm lo. An khawsak a tha em em lo. Kan indang tur pawh min ui ru ve viau reng a. Ka sawi hmaih leh chu Denisa rawn thlapin ka hlawh hmun thuma thena hmun khat hi ka nu ka pe ve thin a ni. Tichuan, ka nu a bawrhsawm tial tial nen, Denisa chhungte nen pawh sawihoin mi in luah ai chuan tiin ka nu chu kan va fin ta a. Nau ka la pai lo a ni.

Ka nu chu kan han enkawl chho a, ka nau pawh kan zilh nasa. Duhsaka hi ruihhlo a duh ve a ni mai a, amah ngau ngau hi chu a sual lem lo. Zu a in nasa a, ganja a nghei ngai lo bawk. A hlawh ve chhun pawh a ruih nan a ral a ni ber. Mahse, buaina siam zawngin a khawsa lo thung. Ka nu kan belh atanga thla 3-naah nau ka pai ve ta a. Kan hlim hle. A tawi zawngin sawi ila, fanu ka nei a. Ka nu hian a hmu ve hman chiah chiah a ni. 

Ka fanuin thla hnih a tlinin ka nu chuan min peih lohsan ta a. Mahse, ka nu thihna chuan ka nau nunah a tha zawngin nghawng a nei chho ta a. A nun sim vek lo mah se, han riahbo daih te, ganja zuk te chu a sim phah ta a. Zu erawh a la in zauh zauh thung. Chu erawh ka en liam ve tawh mai. Ka nu ber boral mah se, kan inah chuan kan la khawsa zui zel a. Ka nau lahin, "Min chhuahsan daihin, engtin nge awm se min tih? Nupui ka neih pawn ka nu leh pa ang in nia, min chenpui zel ang chu" a ti mauh mai si a. Amah ka lainat bakah Denisa pa ten in an lo sa buai nen, Denisa hlawh hi chu kan chang lo tluk a ni. Chuvang chuan man chawia mi in luah ai chuan tiin kan la khawsa ta zel a. 

Hun a liam chho ve zel a, ka fanu pwn kum 2na a rawn hmang chho ve a. A pu nen hian an inngaiin an induat em em a. Denisa ai hian Duhsaka'n a khawih tam zawk ka ti ngam. Kei erawh nau ka pai leh ta rih lo. Denisa leh Duhsaka hi mi tawng tam lo ve ve an ni bawk a, an inbe tam vak lo, chutihrualin Duhsaka hian eng emaw thil lian tham a tih dawn chuan kei aiin Denisa a rawn zawk thin a, ka lo lawm ru zawk thin. Nupui a rawn ru ve zuai a, mahse, a nupui tur lam ten duh sa loha an duh loh vangin an innei ta lo. Sâwn erawh mi dang lakah a thlak ve a, fapa a ni a, a fa neihna nu chu neih pawh a hnial lo. Mahse, A lo rinawm lohsan pek a.. A hnaih leh ta ngai lo a ni. A fapa pawh kei pawn ka duatpuiin thil ka leisak a, ka thawn fo thin. Kum 5 a tlin veleh kan bula awm tura lak ka tum rilru nghe nghe. Amah Duhsaka pawn a hnial lo. 

Hnathawk vek kan ni si a, kan chhuak vek lo thei si lo nen. Awmpui kan nei lo thei lo va. Kan awmpui chu Duhsaka rawn hmuh a ni nghe nghe. "Ka khawngaih em mai, awmpui mai ang u. A fel lutuk" tiin a rawn hruai lut a. Feli tiin an ko thin a niawm e. Vanduaithlaktakin a tawngthei lo thung! Chu tak chu Duhsaka'n a khawngaih chhan a ni. An workshop bul lawk thingpui dawrah a thawk a, an hrawkin an tir kat nasa lutuk chu a lainat a lo ni. Feli chu nula te lam, ngo ving veng, hmel chhe lo tak a ni a. Tawngtheiin mi ang pangngai ni se, nupui atan pawha iaiawm loh tak a ni. A inthlahrungin a kimki dûk reng a. A che fel em em thung. Nau awm tura tawngthei lo ber kher han lak chu Denisa ngaihdan a ni ta lo va, nau awm tur mi dang lânga kal tur kan chhawr ta tho a. Mami a nia, ani pawh a felin Bawihteii pawn a ngaina hle. Denisa chu college dangah a thawh tawh vangin kei pawn scooty ka lei a, a remchang hle. Denis erawh loan-a kan lak kan motorin a kal mai thin. Duhsaka hi chu ka nu khan a boral hma khan Bullet a leisak ve a, a duhtawk viau. Tiang chuan khawsak pangngai takin hun kan hmang ve zel a. Mahse, kumin march thla khan vanduaina chuan thla a rawn zâr ta a ni. Lecture ka pek mawlh mawlh laiin, kan thawhpui Sir Ramtea hian, "Ma'm, ka lo tibuai lawk che" tiin ka beng bulah, "I fanu tunah hian nikhaw hre loin a awm mek" a rawn ti ta a. Ka hamhaih vek. Mahse, Sir Ramtea chuan min lo chhan vatin mualpho loin class room chu ka chhuahsan ta a. 

Ka tlan haw nghal. In ka thlen chuan Bawihteii chu a lo chatthla fel vek tawh. Rapthlak ka ti takzet a ni. Mami leh Denisa an tap hawm hawm a, Feli pawh kil khatah a lo inhnit faih faih. Duhsaka erawh a lo la haw lo a niang. Kei chu ka tap thei lo a chha a ni e. Ka awih hlawl lo an ni ber. Duhsaka a rawn haw a, Bawihteii chu a sawi nawk nawk a, a harh thei si lo. Engkim chu mumang ang vek a ni. 

Bawihteii chu Kum 4 lai ni ve tawh mah se, School hi ka la luhtir duh lo. In lamah ka theih ang tawkin ka zirtir thung. Khamini pawh khan Mami a lo thlen veleh, 'Vawiin chu lemziah lo tihpui teh aw. Ka chikatna lam a nia" tiin ka chhuahsan kha a nia. Mami sawi danin a bual fai zawhah a mutchhuah thu a sawi a. Tichuan, "Ka mutpui a, a muhil nghal deuh mai. Feli erawh a roomah a awm aniang. A mutthilh tho chuan tiin in lamah hna ka ngah sia, ka va tifel lawk teh ang tiin ka chhuahsan a. Chawhnu lamah ka let phei leh a. Bawihteii chu a lo la muhil. Phone khawih pahin Bawihteii bulah chuan ka tluzal ve a. Rei vak loah a rawn khuh kherh kherh a. A tal ta chiam mai a. Ka pawm bet vat. A tap miah lo lehnghal. Na a neih leh neih loh ka zawt a, 'nei lo' a ti a. Mahse a sawi zawh rualin a kaih ta chiam mai a. Feli ka au a, ani lah a muhil nge a rawn lang thei si lo. Pu Denisa call ka tum lai takin a rawn lang ta hlauh mai a. A period a zawh tawh thu a sawi.. Bawihteii chu kan pahnih chuan kan buaipui ta nghal a. Damdawiin panpui kan tum mek laiin a chat zui ta a ni.. " tiin. A mak mang e aw. Dam that lohna a neih awm ka hre lo. Mahse, a hma zan khat velah khan, "Ma, he lai hi a na" tiin a bek dinglam hi min khawihtir a. A khami inţham kha a nih ka ring deuh. A kal thut avang chuan ka chawmawlh vek a ni ber. Fa ka nei ta lo. 

Chawlh kan la a, kan pa nen chuan kan lusun khawhar chu Manipurah kan zin ta daih a. Thla chanve lai kan zu zin a ni. Tlem chuan kan zia deuh e. Mahse, fa sun natzia erawh ka hrechiang ta khawp mai. Hnaah kan let leh a, bawihteii awm lo chuan khua a tihar ngawih ngawih. Mami pawh a khat tawkin a rawn leng thin. An lo in awm rei bawk a, a ngaihzia a sawi reng thin. Feli pawh kan la awmpui reng a, a awmdan hi mak tih chang ka nei thin. A duh zawng hi chu lehkhaah ziakin a sawi ve mai zel a. Zaizira biak chu Duhsaka bakin a thiam meuh lo. Zan khat chu Denisa a leng a. Roomah keimahin ka awm a. Feli hi ngawi rengin a lo lut a. Sawi duh nei hmel a pu.. 

"I duh sawi rawh" ka tih chuan, lehkha phek hi min pe ta a. A chhuak leh nghal daih. Lehkhaah chuan, "Bawihteii thih ni khan inah ka awm lo. Ka pi, tuin emaw min lo msg a, 'Duhsaka'n buaina a tawk a. Tumah hrilh loin lo kal rawh. I pui thei' a rawn ti ringawt a. Mami leh Bawihteii mut lai khan ka chhuak daih a. Chuan, ka haw leh chuan Pu leh Mami khan Bawihteii chu an lo buaipui mek. Mak ka tih zawk chu ka va chhuah khan a awmna hmun tura a sawiah khan tumah an lo awm lo. Mangang takin ka va hawi vak vak ringawt a. Kha numberah khan msg ka thawn leh a, min chhang thei tawh si lo. Mak ka ti em a, a hnuah U Duhsaka chu ka zawt a. Engmah a hre lo bawk si, mak a lo ti ve em em zawk a. Pi, ka rindanin Bawihteii kha tu ten emaw an that aniang. Mami khan a hawnsan sia, kei lah ka chhuak daih sia, mak ka ti em a ni" tih thu hi a nia. Kha.. Lehkha pawh ka rawn keng. Chu thil chuan ka thin a thawng em em a. Rang takin kan pa ka be nghal a, a lo haw vat. Lehkha chu ka hmuhtir ve a. Feli chu koin khaminia lo betu number chu a dil ta a. A lo pe vat. Duhsaka pawh a rawn haw a, kan sawiho ta a. Number chu kan dial a, mahse, a hmang tawh lo. Chhui chhuah ngaihna a vang ta viau. A tukah Mami pawh kan ko a, ani pawn a ringhlel ve khawp mai. Police hrilh mai kan duh a, mahse, Duhsaka'n, "A sarhu laiin engmah kan ti tawh si lo va, Police hrilh rih loin he number hi ka lo chhui ang. Hma kan sawn hunah report kan thehlut dawn nia" a ti ta a. Kan pawm tlang ta a ni. Mahse, Mami khan a let leh khan Bawihteii chu a la that thu a sawi bawk si. Amah Mami tak pawh chuan nuam lo a tiin kan rinhlelh a hlau hle a ni. Kan pa chuan Muthmunah Mami enthlak a tum thu a sawi ta chiah reng a. Kei chuan ka ringhlel ve vak lo. Mahse, Duhsaka chuan a chhui ta zung zung a. Kha number kha Jio a ni a, Jio office-ah va kalpuiin a booktu a va en a. "Lalrinsanga " hminga book a nia. Ramthar-a awm a ni. Zawn chhuah a tum lai velin Feli chungah thil a thleng ta tlat a. A rai! Mak ka ti em em a. A fa paina ka zawhin a sawi duh si lo. Mipa a kawm ngai ka hre bawk si lo. A tawpah ka beidawng chuan, "Duhsaka em ni? " ka tih chuan, ţi em emin min melh ta reng a, Aw a tihna angah ka ngai. Ka thinrim a, Duhsaka pawh kut hial ka thlak phah. Rualbanlo pawngsual duh khawpa mi rapthlak ka nau a lo ni chuan min tina em em a a ni. Tichuan, Feli chu nau tihtlaktir kan tum ta a. Hei hi chu a hmakhua kan ngaih vang a ni. Duhsaka lah chuan, "Ka fa a ni lo" tih bak engmah a sawi duh si lo. Tun kar thawhtanni khan Doctor ka va hmu a, a tukah nau chu paih kan tum a ni. Ka mawhphurhna a nihna chen a awm ve tlat si a! Mahse, thil rapthlak tak a thleng leh ta a. (A ţap faih faih a) Thawhlehni zing khan Feli chu a rawn tho thei mai lo va, thawh hi a hai ngai lo tihtheih a ni. Ka va kai tho dawn a. A room ka lut chu a lo ruak hiau mai. Feli chuan a nau tihtlak a duh loh vangin in a chhuahsan taah ka ngai. Ka mawhphurhnaah ka ngaih avangin ka rilru a mangang em em a. Duhsaka lah chuan thinrim takin, "A nau paihsak in tum a, chuvang anih kha.. Khaw nge a kal ang. Nangmahni vang a nih hi" min ti hrep a. 

"Nangmah vang zawk a nih hi. I hurherh vangin tihian kan chhe ta vek anih hi.. Ka fa a ni lo tiin i la tang tlat zui a. Nangmah vanga thleng vek a nih hi" ka ti thung a. 

Denisa'n, "I u sawi chu a dik a ni. Nei mai tur in ka hrilh che a. I zawm duh lo va. A pawi khawp mai" a ti chu a lo la na em em a. An insual ta hial a. Keia thinrim rilru ipik bawk si chuan Duhsaka chu ka hnawtchhuak ta a. "In in a ni lo. Ka in a nih hi. Chhuak zawk rawh u" a ti khanglang a. 

Ka beng ta a. "Ka chawmin ka enkawl che a. Rualawt lo in ka siam che a. Hetiang hian min ti dawn maw? " ka ti a. A thinrim chu a hak lai nen a tlan chhuak a. Tun thlengin a la rawn haw ta lo a ni. 

Ni e, ka lo ti lutuk deuh pawh a ni mahna. Nizanah kan pa nen kan sawi dun a, Ka buaina hi eng ber nge pawh ka hre lo. Mahse, mak deuh maiin ka thinlungah hian Feli leh Duhsaka chhuak dun leh a rai chungchangte hi Bawihteii thihna nen khan a inzawm vek ni hian ka hre tlata a nih chu.. Ka suihzawm thiam miah lo thung. Min pui rawh u" a ti ta dap dap a. A sawi rei bawk a, a dang a ro aniang.. Tui a in khawlh khawlh a. Amanda erawh a ngawi ran ringawt. 

A hnuah, "In fanu March-ah a boral a. Tunah May thla tawp a ni a. A la inzawm thei tho mai. Engtik atangin nge Duhsaka chuan Feli rawn msg tu number chu a chhui tan? " a lo ti daih a. 

"Ih.. Sawi tawh ang khan Feli khan April thla tawp lam velah min hrilh a. Duhsaka chuan May thlatir vel atang khan a chhui. A la rei lo. Chuan, Feli kha a rai ta sia.. A chhui zawm ta lo nge engmah a sawi tawh lo a ni" Vli chuan a ti a. 

"I fanu chu a natna pawh in hre chuang lo va, thihchhanah eng nge inziah? " a ti leh khawl khawl a. A tawngkam a nem lo ve sia, ka lo inthlahrung. 

"Kha lam kha ka lo ngaihtuah chang tawh lo va, a kaih vang kha nge khawsikpui an ti ta in ka hria" a ti a. 

"Postmortem tul inti lo tihna a ni a"

"Aw.. Mami leh apa khan an dawm hlum bawk si a.. "

"Umm.. A nih i nau chu i zawng reng reng em? Feli pawh chu"

"An awmdun emaw ni aw ka ti a. An kalna tur awm chu ka zawt chhuak tawhin ka hria. Feli kha chuan thian a neih awm ka hre lo. Amah hi khawchhak lam atanga lo chhuk a nia. A chhuah khan pawisa tihtham pawh a nei lo maithei. A hlawh hi tlem bak a chang ngai lo va, a chhungte hi kan thawnsak thin" a lo ti a. 

"A mak hle mai. I nau chuan a phone a switch off si a tiraw.. Anih feli ve le? "A lo ti khauh a. 

"Ka sawi hmaih, Feli kha a phone kha ka leisak a, a chhuah pawh a keng lo. A hnutchhiah" a ti chuai raih a. Engkim chu lung bang sut tum ang ni maiin ka hria. Beiseina awmchhun chu Feli msg tu zawn chhuah kha a ni mai.. 

Pi Vli chhuah hnu chuan, Amanda chuan, "Eng emaw inthup a la awm mai mai a nih hmel. Ngaihdan i siam thiam em? " a ti a. 

"Ka bo hû mai. An fanu thihna nen suihzawm dan ka hre hauh lo mai" ka lo ti a. 

"Thil ni thei ve pakhat chu.. Duhsaka hian Feli hi a lo pawngsual tak tak emaw a ni thei a. Hei chu kal hrang ta phawt se.. An fanu thih ni kha chhui let ta ila, Feli kha engvanga koh chhuah nge ni ta ang? Mami kha an in lamah a phei dawn tih an hre lawk nge? He lai tak hi a buai a ni. Eng emaw chu a awm tur a ni" a ti dat dat a. 

"Chuan, naute kha a thiin an va hmu lo bawk. Thah a ni lo aniang. Feli zawk hian tum a nei zawk a ni lo maw? Number kan chhuichhuah hunah a chiang mai ang" ka lo ti ve a. A khi sak a, min rawn melh chungin, "I chhawrtlak ta hle mai" a ti a. Ka ngei thut. Mahse, engmah ka sawi lo. Case dang khirh khan kan nei lo bawk a; VLi case rawn putluh chu kan umzui thei mai. A tuk atangin Feli betu number nia sawi Rinsanga Ramthar veng chu zawn chhuah tumin kan chhuak ta a. A number ber lah chu a biak tlang theih der si loh. An house number kan neih atang chuan zawn a lo harsa lutuk lo hlauh. Kan zuk luh chuan, pa valai tak cher sang lam hian min lo chhawn a. Amah chu Pu Rinsanga a nih thu kan hre nghal bawk. Amanda chuan a number chungchang vel chu tawi kim takin a sawi ta a. 

"E kha ka jio sim kha maw.. Ka phone a bo khan a bo tel ve ta daih sia, ka number ngaia thlak leh ka tum laiin ka faten, 'Airtel hmang rawh' an ti tlat a. Airtel sim ka book ta a. Ka number ngai pawh chu ka hmang ta lo va. In sawi chu ka hrethiam miah lo" a ti ta a. A tawng ngheh chet chawt danah dawt a sawi ka ring lo. 

"I phone chu engtik hun laiin nge a bo i la hre thei em? " Amanda chuan a ti a. 

"March thla tir lam kha niin ka hria.. Ka ui khawp asin. Ka u fapain phai atanga min lo hawnsak ve a nia" a ti a. 

"Engtia ti bo nge i nih le? ". 

"Office dawrin Unit hruaitu te kan chhuak a, ka hriat dan chuan chhuna thil kan ei lai khan niin ka hria; kan chhuah hnua in ka thlenin a lo awm tawh lo. Kawngah ka thlauh ka ring bawk si lo va. Kan han call khan a switch off nghal hmak bawk si a.. Ruk a nih ka ring deuh" a ti a. 

Amanda a bu nghat nghat. A number te chu kan la khawmawi a, tangkaina em em a nei tawh kherin ka ring lo. Amah a sual lo tih a lang reng mai si. Chawhnu lamah VLi biain an ina va len ve hrim hrim kan tum ta a ni. Tin, An nau awm thintu Mami pawh lo awm ve turin kan ti bawk. Kan va thlen chuan pu Denisa pawh a lo awm ve hlauh a, a lawmawm khawp mai. 

Amanda chuan an fanu thih nia thil thleng zawng zawng chu a bul atangin a zawt chhuak leh ta vek a. Mami chuan, "Sawi tawh ang khan kan in hi a hla lem lo va, U Vli pawh hian ka haw zauh thin tih a hre tho. Feli kha a awm rengah ngaiin ka va haw zawk kha a nia. Ka phei leh pawn Bawihteii chu a lo la muhil tho bawk si. Thah nise ka thlen hma khan thi tawh tur chu a niin ka hria.. Mahse, tiang khan a buai thut tawp mai a ni. " Vli sawi ang deuh tho khan a sawi a. 

Pu Denis ve thung chuan, "Class ka nei tawh lo bawk a tiin ka haw a. Bawihteii chu thil te pawh ka hawnsak nghe nghe. Ka va luh chuan Mami hi a lo buai ngang mai. A mangan zia chu a hmelah ka hmu thiam mai. Amah ai mahin Bawihteii awmdan ka hmuh chuan ka buai zawk. Kan nu pawh ka call hman tawh lo, Mami hian, 'Damdawiinah hruai vat ang' a ti a. Ka pawm a. Mahse kan tlai tawh. Hetih lai hian Feli pawh kan bulah mangang deuhin a awm tawh.. " a ti ve a. Vli aiin kum 3 vel bakin a u lo vang, a la tlangval viau, mahse, a tawngkam leh a landan erawh a zahawmin a dam thlup thung. 

"Duhsaka pawh chu in la be tlang thei chuang lo maw? " Amanda chuan a ti a. 

"Thei lo anih hi.. Khawiah tak kal ang maw.. Manipurah te hian a chhuk daih mawni te ka ti rum rum" Vli chuan a ti a. 

Denisa chuan, "A pawi khawp mai. Duh aiin kan lo hau na deuh a ni. Unau pahnih chauh an ni a, hetia intihrang tham pawh an ni si lo.. " a tih mek laiin Amanda chuan call a dawng a. 

"Khawihah? " a tih rual chuan thil tha lo tak a thleng a ni tih ka hrethiam nghal. Phone a dah zawh chuan min rawn en a. "Hmeichhe ruang an chhar a ni. College vengah, bawlhhlawh paihna hmunah.. Vl, Feli a ni lo vang tih pawh a sawi theih loh" a ti ta a. Kan ngawi thap mai. 

Denisa chuan, "Chuti chu kan lo zui ve mai dawn che u em ni? " a lo ti ta var a. 

"A pawi lo turah ngai ang. Tiru le" tiin a tho a. Vli chuan, Mami bulah, "Mam, in lamah in buai lutuk chuang lo va, khawngaihin in hi min lo nghahsak mai ta che. A chhe ber kan thlen thut chuan thenawm khawvengte pawh min punsak a ngai ang, Feli a nih chuan kan inah a ruang kan nghat ang" a ti a. Fel ka lo ti hle. Mami pawh chu a bu nghat a. 

Ruang an hmuhna hmun kan thlen chuan an lo tam ngei mai. Police lamin hnaih an phal lo zawk a. Ruang chuan rim a lo chhuah tawh a. Khaw lum nen, hnar kan hup far mai. Rim na over erawh a la ni lo. Amanda chuan a va hnaih sawk sawk a. A bawkkhup zawnga muin, a ban pahnih chu chung lamah a phar hiang a. Kekawr dum loose hek hawk a ha a, a kawr chu a var mah nise, bawlhhlawh in a bawm vangin a bal hle. Ke lawngin a awm bawk. Amanda chuan a kuai zangthal ta a. Vli a rak thawt. "Feli, Feli.. A va pawi tak em" tiin a tap nghal hlawp hlawp a. Ka hriatthiampui hle. Feli chu a hmelhmaiah hliam a tuar lo va, a lo la chhe lutuk lo bawk. A dulah chemtea vih niin, vawi khat mai a ni lo bawk. Chu chu a thihpui niin a lang. 

Postmortem turin an phur liam ta a. A bul vel chu a dap sasawi a, engmah a hmu lo. Beidawng zetin kan haw ta a. Kan hna chu a rit leh ta sawt mai. Duhsaka lah hmuh tur a awm der si lo. 

Postmortem atanga a landanin, Feli chu ni 2 kalta vela thi tawh niin, a ruang a la chhe lutuk lo kha chu nimin piah zanah ruah a sur a, kha khan a vawng ve deuh a ni maithei. Chemtea vihna kha a thuk viau a, vih nawn ni lo mah se, thihpui tham a ni hrim hrim a ni. Tin, Vli te sawi danin nau a lo pai ngei bawk. A nau pai chuan thla thum hmel a hmu lek lek tawh a ni. A khawngaihthlak ngei mai. 

"A thattu hi tu nge nia i rin? " Amanda chuan a ti a. 

"Duhsaka bak rinhlelh tur ka hre lo" ka ti a. Amanda chuan Vli hnen atanga a lak Feli phone hnutchhiah kha a rawn lek vâ a. 

"Duhsaka hi a rinhlelhawm viau naa, a ni lo thei tlat. An inbiakna kha chhiar teh" tiin min rawn pe a. Feli chu tu em em mah biak a lo nei lo, Duhsaka, U Mawia baka Mami leh Nu Vli tih chiah a chat list-ah zuk awm a! 

Duhsaka nen an inbiakna ka chhiar chuan ka ner nang mai. 

"Tu nge i fa paina chu sawi rawh. Engmah hlau suh. Ka hum zel ang che. Sawi tawp rawh" tih te, "Mawia mi? Nge hmannia ka lo hruai Robert-a zawk kha.. Mipa i kawm ka hre ngai si lo va" tih te a ni nawk. Feli chuan, "A pian hunah in hre mai ang" tiin a reply a. 

"Tunah sawi mai rawh. I nei duh lo mi" tih chu.. 

"Kan innei thei dawn chuang lo. " tiin a chhang. 

Feli hian a bo hma zanah, "I u ten min tihtlaksak an tum sia.. Pawngsual avanga ka pai mah nise ka thisen a ni tawh a. Ka tihlum thei lo. I mi khawngaihna leh duhsakna zawng zawngah ka lawm e. " tih thu a thawn a. Duhsaka chuan, " i duh lo chung chu an titla lo vang. Min ring rawh. Ka lo sawipui ang" tiin a chhang thung. 

Mi dang nena an inbiakna chu a pangngai, U mawia tih nen phei chuan, an inbe nasa naa, Mawia chuan fiamthu a thawn teuh teuh a, Feli chu a lo nui thin. Text pangngai chu, "I u Duhsaka bialnu kha a lo kal a, kan lo chhaih vak vak a, Duhsaka a lai tawp.. " tih vel lam a ni. Engmah han rinhlelha han lak bing tur a awm lo. 

Mami nen thung erawh, Mami'n, "Vawiin chu ka lo kal tlai ang. U Vli chhuah hunah lo sawi rawh aw.. " tih leh, "U Denisa a chhuak em? Bawihteii thil ka leisak kha an hmu maw? " tih a ni. Feli chuan a reply lem lo. 

Vli thung chu, "Vawksa kha lo fry mai rawh aw.. Bawngsa ka rawn lei haw leh sia.. Chhum turin" tih lam deuh vek a ni thung. A phone chu han lepse chiam mah ila.. Eng tihtham a awm lo hrim hrim.. 

Amanda chuan, "Duhsaka fa a pai lo tih chu a chiang tawh reng a. Duhsaka hian Feli hi thahna chhan tur a nei lo tihna nih chu" a ti a. 

"Lawk.. amanda, An fanu kha Duhsaka thah ni ta se, Feli hian hre ru ta se.. Duhsaka tan chuan thahna chhan tha tak a ni" ka lo ti hluai a. Min nuih sak.. 

"Duhsaka chuan engvangin nge naute pawisawi lo chu a thah ang?" a ti ta khauh a. 

"A thik pawh a ni thei a. A u lakah. A uin a fanu vang khan a ngaihsak tawk tawh lo ve thei" ka tih chuan a nui hak hak a. 

"Sam, i ngaihtuahnaah Duhsaka chiah i dah a. I hmehbel lui a nih zawk kha.. " a ti a. 

"Mahse, ngaihtuah la, Feli'n Vli hnena lehkha a pek pawn police hrilh remti rih lotu kha Duhsaka a ni asin" tifuh inti lutukin ka ti a. A mitmeng chu a zim sawt. 

"Kha tak kha a lawm ka lo ngaihtuah thin. Engvanga police hrilh lo va amah ngeia chhui a duh ni ang? Hriat ruk a nei tawh zawk a ni lo maw? " a ti ta daih a. Thinrim zetin dawhkan ka beng a. Lehlam ka hawisan hmak. 

Feli chu a rim a nat tawh vangin a ruang hmuh ni la lain an vui liam ta a. Kan va lang ve lem lo. Dar 9 velah Amandain min lo call a, "Vli te inah kal a ngai" a rawn ti. 

Peih lo tawkin ka insiam a. Ka chhuak. Vli te in chu a lo la eng ut a. Inriak pawh thenawm hnai pali nga bak an nei lo. Kan va luh chuan Sitting roomah an lo thu thap mai. Vli bulah chuan kan mi zawn mek Duhsaka chu a lo thu ve run mai.. Mak ka ti viau. Amah lah chu a pawr fup mai a. A rui deuh niin ka hre bawk. 

"Dar 8 velah khan a rawn haw hlawl mai a. A â ruai mai bawk sia.. Hei tunah chuan a harh tawh a. In hmuh duh ka ring a, a sarhu lai hian thil a fel zawk ve thin bawk nen.. " Vli chuan a ti sawt sawt a. Amanda chuan Duhsaka chu a va thut hnaih a. 

"Khaw nge i tawm bo char char? " a ti sap a. 

"Feli kha ka zawng a. Zanah chuan workshop-ah ka riak thin. Ka u te bulah ka awmna sawi lo turin ka thiante ka hrilh a. Feli kha ka mawhphurhna a ni. He ina hruai luttu ka ni a, a chunga thil thleng avang khan ka inthiam thei thlawt lo a ni" a ti ta a. A tawngkam chu a felfai viau thung. 

"Mahse, i hmu lo va" Amandain a tih lai chuan, 

"Aw ka hmu lo. Mahse, min rawn bia asin. Msgin.. Ka zawng tih a lo hre ve a ni maithei. Nilaini tlaiah khan number ka hriat ngai loh atangin min rawn text a ni. Tah chuan, "Feli ka nia. Zaninah College vengah min lo hmu rawh. Bawlhlawh paihna bula kawr-ah khan ka lo awm ang. Chutah chuan engkim ka hrilh ang che" a rawn ti a. Phur takin ka va kal a. Mahse, tumah ka hmu lo. Rei deuh ka thu nghe nghe. Dar 12 velah ka haw chiah. Khatih lai khan a lo thi reng tawh zawk a nih hmel" a ti ta a. Amanda chuan a chal a chuar nâng a. Thil chu a hnawk mah mah tawh a ni. 

"A lo thawnna number chu i la kawl em! " a ti a.

"Ka phone a bo a.. Nizan khan zu ka rui a, Ka kham loin ka zuk down leh a, ka rui ve tawh nen, ka tlu a. Khatah khan ka thlauh a niang. Ka call pawn a switch off tawh" a ti leh bawk si. Huiham.. 

"Feli chuan college vengah hmelhriat a nei em ni? Engvangin nge chutah daih daih chuan a awm? " a tih chuan, " A neih awm ka hre miah lo. Kei pawn mak ka ti ve tho" a lo ti ve a. Mi dang pawn an hre bik lo. Hma sawnna tur a vâng hle. 

"Anih Kawra i va thut lai chuan thawm danglam deuh leh thil thleng pangngai lo deuh hriat i nei em? Han ngaihtuah teh" Amanda chuan a ti leh a. Duhsaka chu a ngawi vung vung, chutah, "Chhinchhiahthlak chu a ni lo maithei a. Dar 10 bawr velah khan mei ka zuk laiin, Kawr chhak bawlhhlawh zingah khan eng emaw che zeuh leh bawlhhlawh rawn tla ur ur chu a awm. Mahse, rannung pawh an ni ve thei. Ka hlau hran lo. " a ti mai a. 

Hawn kawngah, "Duhsaka khan dawt a sawi aniag" ka ti ţâlh a. 

"Maithei. Mahse, a intalawhna turah engvangin nge kha thil kha a sawi chhuah duh ang? Feli anga rawn betu ngei hian Feli chu a that a ni. A chhan erawh kan la hre lo" a ti a. Kei zawng ka bo em mai. 

A tukah Amanda chuan hna min pe. Chu chu ka rin loh lam daih, An nau awmtu Mami hriatchian a ni mauh mai. Mak ka ti nasa. Mahse, a awm ve tho, Naute thih laia awm kha a ni tlat. Mami chu ka veh tan ta a. Hriatchian a lo har lem lo. An venga ka hmelhriatte nen an lo inhrechiang ve a. An sawi danin, A hma chuan dawr nghakin a inhlawh thin a, an chhungkaw khawsak a sang hran lo, mahse, rethei bakberh erawh an ni lo. Nula kum 26 bawr vel niin Kohhranah pawh a phak tawka inhmang, khawtlangah an sectionah pawh Fin. Secy ni pha a ni. Hminghliauna a neih awm hriat a ni lo va, ngaihzawng chu zui ve deuh chu a nei thin a, mahse, tun hnuah an ni tawh lo nia hriat a ni. A hlim thei a, nuih a hehin titi nuam ti chi a ni. Amaha tha lo ve deuh nia lang chu a taima vak lo. Chu zawng chu a ni mami character chu. Amanda hnenah ka repot zat zat a. Ka leh awl phian. Ani erawh chuan tu nge a chhui ka hre lo, Vli nen an inbe zeuh zeuh tih erawh ka hria. Duhsaka erawh a tawm deuh chawt a niawm e. Feli thihna chu a tuar viau a ni ngei ang. 

Vli te ina kan kal leh chuan, Duhsaka chauh a lo awm a. A tawngtam lo hle. Amanda pawn eng em em a zawt lo. Feli rooma luh a dil a, kan va lut. An lo tifaiin an lo singsa nual tawh a. Amanda chuan dap theih zawng zawng a dap, Diary te tal lo ziak thin se a tha tur. Almira chu a hawng a, suitcase a lo awm. A chhungah Feli thawmhnaw alo awm a. Suitcase tawpen leh a dangte chu a zen rak rak a. A thaw hawk.. lehkha phek themte pawhthlak tawh niawm tak hi a rawn phawrh a, hawrawp chhe angreng tak hian, "Thudik i hriat hunah chuan mak i ti ve ngawt ang.. Ramsa a ni. Sakawlh a ni. Keimah pawh duhkhawp loin… " tih chiah hi a inziak. A dang chu pawhthler a ni. Amanda erawh chuan beidawng lo vin lehkha them bang chu a zawng nge ni a dap kual zel a, a hmu zo lo.

Duhsaka bulah, a u te rooma luh a dil leh a. Mak a tih hmel viau. Mahse, kan lut ta tho. Ka lo thlir reng ringawt. Khum bul dawhkan pawhdawh chu hawngin damdawi bur niawm tak hi a la chhuak a. A kawmah engmah a inziak lo. A ak ta zauh a. A khi sak bawk. Duhtawk a ngah aniang. Kan chhuak ta a. 

Zanriah chu a inah ka ei leh a. Ani chuan Feli ruang thlalak kha a bih nawn leh. A damlaia a thlalak nen a enkawp a, a mit a khap fak fak. Kei chuan tihtheih nei ve hek lo, Pubg ka khelhsan daih.

Dar 10 velah Vli te in lam kan pan a. Engmah a sawi lo. Kawta kan din vang vang hnuah kan chhuk a. A reh thiap tawh. Kan han nghak leh deuh vang vang a. Chutah garage-ah lutin an motor chu thirzaiin a hawlh rak rak a, kawngkhar chu a hawng thei ta. Kan lut vat a. 

"Sam, dap rawh. Hriau pawh hmu thei tur khawpin lepse ang che" a ti sap a. Kan dap tan ta. A fai viau a, kei chuan han dap vak dan ka hre lo. A back seat chu a kuai a, keiin hnuailam ka bih thung. Hmuh ka nei lo. A seat-a thu chung chuan ka melh kual leh a, a nghenchhan leh a seat inkara ka kut zuk rawlh chuan khawih fuh a nei ta tlat! Rang takin ka pawt chhuak a. Ţhi a lo ni. Silver hrawl angreng tak a ni a, a man a to viau maithei. Amanda chuan a ak vat a. Kan chhuak zui nghal. 

A tukah Vli chu koh a nih angin a lo kal a. 

"Nizan i mu tha vak lo em ni? I hmel a dik lo" Amanda chuan a ti a. 

"Nia mawle.. Ka damdawi kan zawng hmu zo miah lo va" a lo ti a. Amandain a ruksak daih kha ka hre chhuak. 

"Engtin nge a bo theih? Tu nge lut ang? " a lo ti ha a. 

"Ka hre bik lo, Duhsaka lahin a lak loh thu a sawi bawk si, tumah an rawn kal loh thu a sawi bawk a" a ti a. Nia, Duhsaka hnenah khan engmah sawi lo turin a ti tak alawm. 

"Thil serious tak a nih chu.. Engtik atangin nge damdawi i ei tan? " amanda chuan a ti a. 

"Aa.. Kumin kumtir vel atang khan a niin ka hria. Indanna ka ei kha ka taksain a ngeih lo nen, ka cher riau a. Kan pain, 'Doctor ka rawnsak che a, mut duhna leh vitamins a nia.. Ei rawh" tiin min rawn thawn a. Ka ei atang chuan ka zia sawt khawp mai" a ti a. Amanda chu thaw huai hmel a pû. 

"Inriakte an chhuak tawh em? " a ti ta daih a. 

"Tukin zingah an inpuchhuak ta a nih kha" a ti ta a. 

"Aw le.. Vl, zanin chu tui deuhin mutthilh tum la, naktukah chuan i fanu thattu leh Feli nunna latu kan rek thei turah ngai ang" a ti nghet charh a. 

A lo bu nghat. 

Zanah chuan Dar 11 rik hma deuhin Vli te in lam chu kan pan ta a. Motor chu an in piahah kan dah a,Garrage-a motorah chuan lut lehin camera a va fit zauh a. A dah biru thiam zek. An garrage phenah kan tawm ta khar mai. Kan thu rei viau. Dar 12 dawnah ke pen thawm kan hre ta a. A rawn phei zel a. Garrage-ah chuan a lut ta a. 5 mins a liam hman lo ang tih velin zawitea ke pen thawm bawk kan hre leh a. Hmeichhia a ni. Garrage -ah bawk chuan lutin motor chhungah ngei chuan thawm an siam ta a. Hriat nuam em em a ni lo. Hnuailam a ni ţung mai. 

"Kal ang. I sen vek tawh. Min pawngsual duh mai dawnin a lang" ka beng bulah a rawn ti a. Ka va run tak. 

Ka rin loh lama min hruai dawrhtu chu hei hi a ni ta a ni. A tukah Pu Denisa leh Mami chu kan hling fel thei ta. An ţang na viau a, mahse, kan hmanraw neih beitham te te chu phawrhin, Amanda chuan tihian a ti ta a. 

"Duhsakna min rinhllelhtir tumin theihtawp i chhuah naa, amah Duhsaka zawkin a dai khalh zawk che a nih hi. Naute a thih dan khan ka ngaih a titha tawh lo sa, Feli koh chhuah a nih lehzel danah. Duhsaka chu khamini khan motor siamin a buai nileng a, khawiahmah a kal chhuak lo tih ka finfiah tawh. Nang erawh i haw hma a, eng nge thleng chu i hre zawk ang. In chet dun lai takin i fanu khan a rawn phawk ta che u a. A hrethiam kher lo maithei, mahse, i hlauthawng a, a tawng thei tawh a, kum 4 lai a ni ve tawh si. Tichuan, i rekhlum ta a ni. 

Feli kha a tawngtheih loh hmang tangkain i pawngsual a. Amah mai duhtawk lova Mami lehzel i khawih takah khan Feli khan Vli hrilh a tum ta a. Nangin a rilru chu hriain i vau a, a thinlungah hlauhna i tuh laklawh tawh a. Engmah a sawi ngam ta lo. Amah mai bakah a mi ngainat em em Vli leh Duhsaka te thlenga thah a tum avangin i ka chu i chip lo thei ta lo. Feli a rai ta a. I che sual chho tan ta a ni. Feli khan a duh vang renga in kha chhuahsan a ni lo, chhuak turin i nawr lui zawk a, Amah leh naute enkawlna tur i pek tur thu i sawi bawk. Tichuan, Feli chuan a hlau si che a, a chhuak ta a. Nang chuan khawi hmunah emaw thukruin a chhuah zanah kha chuan Duhsaka te nen in inhauh kual avang leh Duhsaka a chhuah vangin in nuin chhuah a phal lo va. Chet i la thei lo. A tukah Feli chu i that ta a. Lui kawrah khan biru deuh siin i paih ta a ni. Motor chhungah in inchai feee a ni mahna. Feli thi, Duhsaka'n a pianchama a leisak pawh i motorah hmuh a ni. Duhsaka pawh thah ve mai tha i tih vangin sim card dang hmangin Feli angin i bia a. Mahse, Chet i la leh ta lo. Idea i neih vang a ni. Duhsaka a lo let emaw kan hmuh hun hunah Feli thattu anga kan ngaih theih nan remchang i zawng ta zawk a. 

Mami nen in la incontact ru reng a. Mut duhna damdawi, Vli i pek thin chhan kha Tui taka a muthilh hnua Mami nen chet lak i duh vang a ni. Vli a la indan reng nachhan pawh nangin Fa neih i duh loh vang a ni. Mami neiha Vli then i tum, a chhan chu Duhsaka saw i mil lo. A rinhlelh ruk che avangin.. Ka sawi dik em? " A ti ta kalh kalh a. 

Sawi tur reng reng an hre ta lo. Vli'n a pasal hmai a ben thuai thawm tih loh chu thawm dang reng reng a awm ta lo. 

(Ka tlai.. Ka hreeee…. 😒