Boss Amanda -3

BOSS AMANDA - 3

Ziaktu: Toni Râlte

Ruang chu ka melh vang vang a. A vanglai hmang chho ve mek, tleirawl duhawm tak a ni. A sam chu a buang thâng a, a summer jacket dum hak chu a jipper a inhawng huau a, a hnuaiah chuan tawnzau dum a ha bawk. Jean kekawr paw dak tha zet hain, pheikhawk erawh a bun lo thung. A ruang hi Millinium Centre ground floor a kil lam deuhah chhar a ni a. Security in a hmu hmasa ber a ni. Mi nawlpui rawn lan hmain an phur chhuak ta vat a. Amanda erawh chuan a ruang chharna bul vel chu a dap a, thil te tham tê pawh a hlu thin angin hmuh hmaih neih a tum loh hmel kher mai. 

'Hei le.. Sam" tih pahin samzai sei tak a dum hlap pahnih thum vel hi a rawn chep chhuak ta va a. Chumi hnuah ground floor pumpui chu a theih ang angin kan ching let a, a zau angreng sia, a hahthlak viau. Engmah kan hmu lo! Mitthi khan hliam engmah a nei lo va, ti ila, thisen chhuahna a awm lo ti zawk ang. A nghawngah erawh rehna hrui sin tak hmanga rehna hnuhma a lang kuau thung. Kha tleirawl khan lo bei let vein tualthattu samah pawh a kek ve ni ngeiin a lang. Amah sambuang a nih laiin sam dum sei kha a awm ve tlat si a. Office lamah kan phei leh ta a. Tleirawli hmel kha ka mitthlaah a cham reng zu nia! A heh a sen hiam a, make up a hmang vakin a lang lo. Mahse, a hmel chu a tha reuh a ni. A thih hun kha zing dar 4 bawr vel a nih hmel a, security in a hmuh hun kha zing dar 5-6 inkar vel a ni bawk. Chawhnu lamah tu nge a nih kan hre thei ta a. Aizawl mihlun, Pu Lalliana Sailo fanu naupang ber, Malsawmtluangi a lo ni. Msi tia koh a ni bawk. A ruang vui liam zawh tawh, zanriah ei hma siin kan va kal ve ta a. Pu Lalliana hi MLA-ah te pawh a lo incandidate ve tawh thin awm e. An khawsak a sang a, an fanu upa ber hian sap pasalah neiin USA-ah an awm mek a. A nau chiah mipa hi Engineer niin Chennai-ah hnathawkin a awm bawk. Chumi nau leh mipa erawh naupangtein nupui a nei ve a, an khawsa ho, dawr changtlung tak an enkawl thung. An te ber Msi hi chu MZU-ah MA (pol. Sc) lain final year a kal ve mek thung a ni. Kan zu lang chu Amanda an lo hre sa nen, min lo welcome tha khawp mai. Room pakhatah kan lut khawm a. Msi nu chu nu hmeltha leh no nuak mai niin a tahna sulhnu erawh a hmelhmaiah a lang thung. 

"Nizanah khan engti turin nge a chhuah? " Amanda chuan a ti a. 

Pa ber chuan, "An thiannu Dawngi birthday party-a kal tur khan a insawi a. Dar 11 velah khan a riah nghal tur thu a rawn sawi bawk a. Dawngi hi chu a thian kawm ve ber, keini pawhin kan hriatchian a ni a. Ka lo remti ve mai bawk. Ngaihtha takin kan awm a, tihian min rawn deng leh ta thut sia" na tuar tih hriat zet hian a ti a. 

"Bawihte,.. A mak em mai. Hetiang hi ka beisei lo asin" a nu chuan tap hlawp hlawp chungin a rawn ti a. Kan ngawi thap mai. 

Amanda chuan, "Ni e, ka pi, a na hle ang tih ka ring. Mahse, i fanu rawng taka thattu kan man chhuah theih nan khawngaihin lo insum hram hram rawh aw. Ka thuzawh dan che u a lo dengkhawng deuh a nih pawhin min hrethiam dawn nia.. Ih, Msi hi tun lai thalai te anga han petek ve zauh changte a nei em? Ka sawi awmzia chu ruihhlo han tih ve chang te, han riahbo zauh changte a nei thin em? " a ti ta a. An inmelh kual hnuah, a pa bawk chuan, " Zep thu a cheng lo. College a kal tirh khan a han petek ve hman a, zu te pawh a in ve lawp lawp thin. Theihtawp kan chhuah a, a nu phei hi chuan han zawn mai te a ching thin. College a zawh khan nasa takin kan zilhhau ta a. Amah pawh inchhirin, "Ka bialpain min phatsan vang a nia. Mahse tunah chuan ka sim tawh ang. Min ring rawh u" a ti a. Kan ring a. A chhuak ngai ta mang lo. Thian pawh Dawngi tih loh chu han kawm vak a nei ta lo va, kan lawm khawp mai.. Mahse.. Tihian.. " a hnuk a ulh a. A ngawi vang vang. 

"Umn ka hrethiam e. Anih tun hnaiah han thinrimna emaw hmelma emaw a neih awm in hria em? " a tih chuan, an mo nu chuan, "Kar hmasa Zirtawpni khan a class bang kha a rawn thinrim haw nasa mai a. "Judy hian min er lutuk a, Tluanga nen kan inkawm ve hi min lo thik a. Ka sual lai vel kha a lo sawi darh chiam a, ka rilru a na.. Ka haw lutuk" a ti a. Judy chu kan hre ve chuang lo. Mahse, tun karah kha chuan engmah chutiang han ngaihbel tur awm ka hre miah lo. Keimah nen hian inah hi chuan kan inkawm tam ber a,. " a lo ti var a. A fel hmel reuh khawp mai. 

"Dawngi address chu min pe thei ula a lawmawm ngawt ang. Engpawhnise, lo lungngai lo ula; misual hi chu an bibo rei thei tak tak lo a nia" Amanda chuan a ti nghet charh a. An ngaihsan hlawm hmel kher mai. 

Dawngi te in lam kan pan leh ta nghal a. Msi te nen an level a inan hmel viau, inkawm awm reng pawh an ni. Room atangin a nuin a va ko chhuak a, a tap nasa hle tih a lang reng mai. A mit a bui lak mai. Thingpui in pahin kan kawm ta a. 

"Nizana thil thleng zawng zawng min h'"an hrilh phawt teh" Amanda chuan a ti a. 

Dawngi chuan aw tham chhel hian, "Dar 7 velah a rawn thleng a. In chungah party chu kan huaihawt dawn a. Thian dangte an rawn thleng ve zel a. Kan kim tak hnuah in chungah kan chho a. Msi chuan ruihhlo lam a bansan tawh vangin beer takngial pawh a in lo a ni. A phusa berah eraeh a tang tho thung. Dar 11 vel thleng kan party a, amaha scooty-a haw tur chu ka ngaihtuah deuh a, riak turin ka sawm nghe nghe. Mahse, a tukah chhuah a ngaih thu sawiin min hnial a. A tlan liam lai pawh ka thlir reng alawm.. A bak chu a thih thuin min rawn den kha a ni mai" a ti a. A mak hle mai.

. "A nih tun hnaiah i bulah sawi a nei em? Ngaihzawng emaw hmelma emaw tu pawh" 

"Aw.. A.. Bialpa chu a nei alawm. Mahse, Delhi-ah a awm daih a, Hruaitluanga a nia. Nikum atang khan an ni ve. Hmelma lamah chuan an class-ah hian Tluanga nen an inkawp nasa a, thian angin.. Chu chu Tluanga ex Judy hian a lo thik lutuk a, Hmanni khan Msi nunhlui vel a lo sawi darh vak a, a thinrim thu chu a sawi ngei. Mahse, Judy thah a nih ka ring lo.. " a ti a. 

"Engvangin nge i rin loh? " Amanda chuan chik zetin a ti a. 

" Judy te nen hian college kan kal ho vek a. Ka hrechiang, a tawngkam a rapthlak naa thil tih tak tak dawnin a dawih lutuk. Tual that tur em chuan ka ring zo lo" a ti mai a. 

Judy address erawh kan la tho. 

"A bialpa nen an inkar a tha em? " a ti leh a. 

"Aw tha e. Nizanah pawh khan ka roomah rei deuh an inbia alawm. Hruaia hian a hmangaih em a, Msi pawh hi a rinawm viau a ni" a lo ti a. 

"Nizan khan ph call dangdai emaw ngaihbel theih tur a dawng em? "

"Min hrilh miah lo.. Chu lam chu" Dawngi chuan a ti a. 

 

Sawi hmaih loh tur chu Msi khan a phone kha a la ak a. Chawhma chhung khan Amanda chuan a check deuh vek tawh a ni. A pa nen an inbe hnuhnung ber. Hruaia chu a ni ngei ang, 'Hubby' tia a save nen rei tak an inbia a. A call log-ah ngaihmawh tur em em an awm lo. Number hriat loh pakhat erawh kan la a, a message te pawh kan han lepse tak naa, Msi chu a pa sawi ang khan a nun chu tha takin a hmang chho tih a lang reng mai. Facebook a khawih lo va, IG leh whatsapp a ni deuh mai. Han rinhlleh tur awm an awm lem lo. Judy msg pawh a lo awm ve khar a. 

"Tluanga duh zawng hmeichhia i ni lo. Tum buai duh suh. I nihna dik tak hria se, a ten ngawt ang che" tih a ni. Msi chuan, "Bialpa ka nei a. Ka mamawh belh lo ve" tiin a chhang thung. 

A tukah Judy chu kan va hmu ta ngei a. Msi aia upa hlek tur, hmel erawh tha vet vawt tak tho a lo ni a. Msi thihna chuan a ţhawn ve thu leh mak a tihzia a sawi nasa mai. 

"I haw hle si a, i lawm ngawt lo maw? " Amanda chuan a ti hmiah. 

"A huat chu ka hua, ka thik. Mahse, ka hmelma lian ber pawh thi se tih ka duh ngai lo. Thihna hi chu a na em a" a ti ve mai a. Dawt a sawiin ka ring lo. A confi tlat. Khami zana a awmna hmun te kan han zawt a, ina a awm thu leh an group OB ho an lo len thu te a sawi a. Hriatpuitu an tha tlat! 

Hawn lamah, "Judy chu kan dah tha thei tihna a ni mai lo mi! " ka ti a. 

"Ngaihtha ringawt suh. A confi danah khan zan rei mut hnua in chhuahsan ngam khawp a ni ve tlat" a lo ti mai a. Kan inbe zui lo. 

Msi ruang bula sam kan chhar kha forensic lamin an endik tawh a, black list ami te sample nen inmil a awm lo. Kan hmachhawn tur hi sualna kawnga mi thar a ni ngei ang. 

Chhuizui mai dan kawng a vâng ta hle mai. Kan hmanraw neih ber Sam lah chu a milpui zawn ngawt dan a vâng nasa si. Dawngi sam a sen a, khami zan party-a kal te pawh kan kawm kual vek tawh. Amanda pawn an sam uluk takin a en tih ka hria. An tam lo va. Mipa pali leh hmeichhe pathum an ni. Hmeichhe pakhat sam chu a dum a, a sei bawk. Zorini a ni a, Bawngkawna khawsa niin, Chhungkaw pangngai atanga chawr chhuak a ni. Tin, khami zan khan a bialpa Fela'n an in thlengin a thlah a, dar 12 dawnah in a thleng. A chhan chu an pahniha an len kual leh vang a ni. Hmeichhe pahnih te erawh an sam a tawi tlat. Pakhat chuan a pixie a, pakhat erawh chuan a dar thleng velin a zuah a, a tikir thung. Mipa lam lah sam sei an awm der bawk si lo. A ruang hmu hmasa bertu Security kha Dingtea a ni a. A sawi danin an duty hi chuan fel lo leh bawlhhlawh te a awm em tiin thlen veleh an fang kual thin a, a va fanna lamah Msi kha a va hmu tawp mai a niawm e. A tirah phei chu zu rui chatthla emaw a ti ngje nghe. A hamhaih atalangin a bul vel han en kual nachang a hre lo va, en kual mah se, hmuh a nei kher lo mai thei a ni. Ni 3 zet engmah ti hleithei lo va kan awm hnuin thuthar kan hre ta hlauh. Tlangval chawrche ve angreng tak, rawng tak tha ve tak hian Amanda a rawn hmu ve hlawl mai a. 

A polite danah ruih a nei tih a lang; eng dang ni loin no. 4 addict a ni tih a lang reng mai. 

"In tangkaipui takin ka tia. Ih, kha nula boral zan khan ka thianpa ti ila, vai a nia, ks dawr a duh a. Spee min leisak dawn vangin ka zawnpui a. Ks ho nen hi chuan inhnimhnai ve reng kan ni bawk a, hmelhriatte pawh ka nei ve tawh a. MC bul velah sawn kan zawng a, khami zan ber kher khan an vâng riau mai a. Ka hmelhriatte lah an customer an lo nei ve zel si. Dar 11 dawn kan nghah hnuah ka suffer mai dawn sia, damdawi min ngaihtuahsak turin ka ti ta a. Zodinah ka thiante tho hnenah kan va la a, ka hit nghal a. Vaipa chu a beidawng duh si lo va, kan let leh a. Ka hmelhriat pakhat hian a theih tur thu a rawn sawi ta hlauh mai a. Kan nghah mek laiin hmeichhe pahnih hi scooty-in an rawn inphur phei a. Sumo counter kawta kan thut lai a ni. Helmet a khum loh vangin a khalhtu zawk kha tuna thi Msi ngei kha a ni tih ka chiang khawp mai. A thlalak ka hmuh khan ka hrechhuak zawk a, mahse, ka ngaihtuah a, addict te ka ni sia, keimah zawk min rinhlelh ka hlau a, ka ngawi ta ringawt a. Mahse, dik thei nganga ka hriat loh vangin ka rawn kal tawp a ni. A scooty kha mc piaha parkingah an hmuh thu an sawi bawk nen, ka haw tur ka phei lai takin kha scooty ngei kha msi ni lo mi dangin a rawn park tlat a ni. A chhan chu kei damdawi kai phet phawt khan, damdawi a tih ve tho ka rin vangin, ka va au pek a. A rawn hawi khan Msi chu a ni lo. Mahse, a hma lawka Msi rawn khalh scooty ngei kha a ni thung. " a ti ta a. Amanda chuan a ngaithla uluk kher mai. 

"A hmel mitthla chungin han sawi dawn teh le" a ti a. A phur hmel viau. 

A chhing vang vang a, sarêp te pawh a ang lek lek, a ha lah chu a var hrep a. 

"Umm.. Jumper grey a ha a, a jumper lukhum chu a khum bawk. Kekawr dum a ha a, sneaker dum a bun bawk. Ngo deuh tak chu a nia, mahse, a hmel a zum ka ti mai. A ha kha a kuh lek lek bawkin ka hria;a mitmeng chu light nen a inreflec deuh vang kha nge ka hre thei tawh lo. Hmui pan lam a ni bawk" a ti a. 

"Kum engzat bawr vel nge a nih ang? " 

"Ka van hrethiam lo ee.. Kum 25 bawr vel a ni maithei. Amah kha a kuh feng ka ti mai.. " a ti a. Ka nuih a za lek lek. 

"Chuan i biak chuan a chhang che em? " a ti a. 

"Min chhang tawh dawn lo emaw tih hnuah 'Eng nge i duh? " a tia.. Sawi mai tur ka hre si lo va. 'Eng ni lo ve' ka tia. Ka kal leh daih" a ti ta a. 

"Amah chu hmu leh la, i la hre thei ang em? " 

"Tehreng mai. Hei ka mitthla pawn ka hmu reng mai" a ti a. A hriatna a tha riau chu a ngaihsan hrim hrim e. 

"A lawmawm takzet. Kan lo beidawng titih tawh a. Hnuhma a hnutchhiah si lo nen.. A nih khami zan khan MC kha gate an kalh vek tiraw? " Amanda chuan a ti leh a. 

. "umm kalh e. Mc kawt ka han tihah khan a opposite ka sawina a nia. Mahse, ka pi, MC te chu gate lawn liam bakah a duh tan chuan luh ruk a har lo lutuk. Keini pawh hmanah kan lut ru tawh" a ti mai a. Hei chu kei pawn ka hre tawh. Mahse, ruang nena han lut ru tur chuan beih fe a ngai ang. Chuvang chuan MC- an luh hmain Msi kha a la thi lo tihna a ni ngei ang. 

Kan thianpa chu C. Mawia a inti deuh ngat a, Amanda chuan a lawm riau. A number te a laksak a, "I fel em mai, kha i thingpui in nan" tiin Cheng 1000 a la pe zui! "Ruih nan hmang suh aw.. Tin fimkhur ang che" tiin a chah thlap bawk. 

"Pawisa duh vang te khan dawt a sawi a ni lo maw? " ka lo ti pek a. 

. "Sam, meng ve thin la, mihring hi kan mitmeng hian tumah a bum thei lo. Dawt a sawi ngai lo, mitmengin" hahdam hmel zet hian a ti a. 

"Mahse, a ruih laia a hmuh a nia. Tiangho hian dawt sawi an thiam teh mai a nia" ka ti ve leh hram. 

"Mak ka tih zawk chu a hriatrengna tha lutuk kha a ni. Msi scooty a hrechiang hman em em te, a thlalak a hmuh atanga Msi a ni tih a hre nghal chat te kha a mak! Chutiang a nih vang chuan a thusawi kha kan hnualsuat thei chuang lo vang" A ti mawlh mawlh a. A sawi dik ve reng mai. 

Zanah chuan mitthi kan neih vangin lumen turin ka kal ve a. Kan veng pa lar tak, Pu Tawnvela a ni a, thalai pawh kan tam nangiang mai. Kan zai thawm pawh a tha e. Dar 3 bawr chho velah mut a chhuak tan a. Intihharh nan tiin zunram ka va thiar a, ka zun tur tur lai chuan ka ph a nghawr ngawr dat dat mai. Amanda a lo ni. Ka la nghal vat a. 

"C. Mawia a thi" a rawn tih chuan ka mur sung sung nia! Hrep tak chuan.. 

"Khawiah" ka ti bah nak a. 

"Huntharah.. Tunah rawn kal nghal mai rawh. Kawng bul maiah a ni e" a ti a. Mitthi inah pawh lut ta lo chuan, hmanhmawh takin Hunthar veng lam pan chuan ka tlan ta a. Ka thleng rang viau, zing dar 3:30 a ri dawn tawh a, mipui pawh rin aiin an tam lo. Amanda chu ka va hmu vat. C. Mawia chu a saisir zawng deuh hian a lo mu a, kelawng bawkin a lo awm. A mit chu a meng deuh rú a, a ha var tak pawh a lang thei. Amanda chuan a taksa a han dap vel a, a tukhum lam chu a lo pawng ûl a, a dup bawk. Thil sakhata hlapna a ni ngei ang. Ruang bul vel chu balu leh rora dahna a ni a, a hnawk deuh niah. Tin, C. Mawia chuan bengbeh kual lian vak lo pakhat hi a lo hum ran mai! A pawimawh khawp ang le. 

"Tu nge a ruang hmu hmasa bertu kha? " Amanda chuan a ti a. Ruang chu an lo senghawi mek bawk. 

"Khaw nge.. A awm ve reng kha mawle.. Engtik laiin nge a lo kal bo hman aw" Patling dul kiar lam chuan hawi kual pahin a ti a. 

"A hmu hmasa bertu chu ka ni lo va, mahse, ka hmuh dan ka sawi thei e" Tlangval sang thlerh thlawrh, hnar ngul sang vah mai hian a rawn ti a. A fel hmel viau. 

A bula in hnai berah chuan kan lut khawm a, chu tlangval chuan, "Ka pu thawhah vangin dar 10 velah khan damdawiin kan panpui a. Ka nu nen kan nia. An lo admit si a, thawmhnaw leh eng ilo chu kan inkeng nghal vek tho a. Kei naktuk lamah hna ka neih vangin ka nu chuan ka riahpui mai ang a ti a. Mahse, ka pu chu a rawn zual leh tak thut avangin ka han awm leh rih a. Dar 3 bawr velah a muhil ta chauh a, ka nuin, 'Va hawng tho rawh. Hnain a hmuak che sia, reilote mutthilh pawh a tha' a tih deuh tlat avangin ka inkhalh hawng ta a. He lai ka rawn thlen hian Nula pakhat hian a lo bawihsawm mek nge a lo sawi deuh nawk nawkin ka hria a. Ka ding ta a. Switch off-a ka tlan avangin ka thawm a hre lo a ni maithei. 

"Thiannu, eng nge ni ta? " ka va tih chuan, a rawn hawi vat a

"Hei, ka thianpa hi a OD a, ka kai harh thei miah lo" a ti a. Ka va bawihsawm ve nghal. Mahse, a mar ka deh khan a phu tawh lo tih hriain mi ka pun ta nghal a ni. Engtik lain nge a thiannu kha a kal bo ka hre miah lo. Amah pawh khan damdawi a ti ve tho ang a, a hlauthawng a ni maithei" a ti ta a. Amanda chuan chhuat lam a bih ngar ngar hnuah rawn hawi chhuakin, "Chu nu hmel chu i hmu em? " a ti ta sap a. 

"A eng vak lo va, an awmna kha.. Mahse, a sam a sei a, cher lam deuh, hmai hriam lam chu a ni. A naupan vak tawh loh hmel bawk.. " a ti a. Midang a tira lo hmu ve tu te pawh chuan an hmuh dan an lo sawi ve liam liam a. Hmeichhe hmai tung leh hriam lam, ha kuh lek lek, mitmeng zim lam deuh tih chu an sawi dan tlanglawn a ni. C. Mawia hmeichhe sawi nen khan an inan duh hmel ta khawp mai. 

Amanda chuan ruang awmna lai vel chu endik lehin a hai chiam a, hmuh chhuah pakhat a nei. Thing bung tawite, chang zet mai a ni a. A rualrem viau lo naa, mi hlap nan chuan a thawk chak viau ang. Ruang awmna atanga pen 13 velah balu in a lo khuh deuh a, a va hai chhuak ta a ni. Chu ngei chu C. Mawia nunna chhahna hmanrua a nih ngei a rinawm. 

Mut kham lo em emin a tukah kan inhmu leh a. Ani pawh mut a hmu tha lo tih a lang chiang. C. Mawia te in lam kan pan ta a. In tha vak lo, hlui lam tawh. Awngrawp ve tak a ni a, an khawsak a tha tehchiam lo hle. A nu leh a putea bakah a nau nula te nen an khawsa a lo nia. A nu chuan a tuar hle tih a lang. Kawm hleihtheih pawn a khawsa lo. A farnu erawh a kawm tlak viau thung. 

"Ka u hi addict chu a ni tehmeuh mai. Mahse, mi rilru chhia a ni lo va, mi khawngaihna te hi a ngah em em a, ina a hriat ngai pawh ni lo ţawp pui pui rawn hruai luh te hi a ching thin. A thawmhnaw tha te hi a khawngaih zawngte hnena pek mai a ching bawk. Chutiang mi chu a ni a, kan veng chhungah pawh 'C. Mawia hi addict a ni naa, tu pawi mah a sawi lo. " an ti ve thin. Thil a ruk awm pawh ka la hre lo. Amah hian a ruihna tur a thawk chhuak ve a, kan en tawp a ni mai. 

Chuan, nimin chawhnu khan 'Kalna tur pawimawh ka nei' tiin a chhuak a, a rawn haw leh chuan bawngsa leh chawhmeh dang dang a rawn khai haw teuh mai a. "Ka nuin a tui hâng a hawp chak sia" tiin Bawngsa pawh chu aman a siam vek. 

"I inhlawh mi? Khawi tangin nge pawisa i neih? " ka tih chuan, "Ka lawmman dawn ve a nih hi" a ti mai a. Ka zawt zui lem lo. 

Zan tirah khan a thiante nen an chhuak a. Rei an thang lo. A rawn haw pawh a kai phawt a. Kan hau lem lo. Ngaiah kan nei titih tawh a. Thutthleng seiah hian tv en chungin a mu a, dar 12 pelh khan ka va zung a, ka mu har thin hrim hrim a. Chhuak tur niawm takin a lo inha a.. "Khaw nge i kal dawn? " ka tih chuan,.. 

"Hna ropui lutuk kan thawk dawn. I u hi min la chhuang viau ang. Tualthattu kan man dawn" a ti a. Ka ner khum vak ringawt. Fiamthu a duh ve a, thutak hla takah engmah kan laksak vak ngai lo. A chhuah dawn chuan, "Kawngka hi kalh daih rawh. Zingah bak ka rawn haw lo ang" a tih vangin ka kalh a. Mahse, zinga kan thu hriat chu hetiang hi a ni ta sia" a ti a. A inhnit feih feih mai. Ka lung a lo chhe ve ringawt. C mawia, a ruka ka lo en hniam leh engahmah ka lo ngaih loh kha a chanchin ka han hriat chian takah chuan ka inthiam loin ka khawngaih takzet a ni. Amanda pawisa pek chu ruih nan a lo hmang lo tak tak a nih dawn chu.. 

Amanda pawh a thinrim hle tih a lang reng mai. Nilengin kan inbe mang lo tihtheih a ni. Msi thih atanga kan mi kawm te leh an record te chu a en chhuak leh vek a, "Msi bialpa Hruaitluanga hi kan la be miah lo tak e" a ti sap a. 

"A rawn haw em ni? " ka ti hú. 

"Dawngi khan a sawi tlatin ka hria " a ti a. A tukah Hruaitluanga chu kan va ngaihven nghal. A lo haw ngei a, ruang erawh a rawn nang lo. Let leh mai a tum lai tak a ni a, a chhan chu Mizoram chu a tan thawpikna nasa tak a ni tlat. Tlangval hmel tha leh lian thelh thawlh, sar vuah mai a ni a. A lusunna chuan a tipawr ve hlek thung. 

"Msi nen kan inkarah buaina a awm ngai lo tihtheih a ni. Amah ngaizawng ve deuhtu te pawn kan ngheh zia hriain an kiansan ve mai zel. Chutin keima lam pawh.. Han hrilh tur tehchiam che u ka nei lo hi pawi ka ti. Tihtheih neih ve hi ka chak takzet a ni" a tih mek laiin an nulain thingpui a rawn dah a, Kan in pah chuan, Amanda chuan, "A pawi ngawt mai. Msi vang khan mi pakhatin nunna a chân ve leh ta bawk si a" a ti sap a. 

"Chuti maw?! Engmah ka lo hre hleinem. A va pawi tak em.. " Hruaitluanga chuan a ti vang vang a. 

Chutih lai tak chuan, an nula chuan, "U Hruai, ka bazar dawn.. Nautea hi a lo chhuak leh ange aw.. Ka hling lo a nia" a rawn ti lang lang a. A chhang lem lo. A chhungte ho an chhuak vek a niawm e. Hruaia hnen atang chuan eng thu mah kan hre ta lo phawt. Amanda lah chuan haw a ti thut bawk si. Hamhaih ru takin kan chhuahsan ta a. 

"I va tlan chak ve" ka ti a. Hmalam a melh ngawt ngawt ringawt. Office lam pan ta lo chuan, MC lam kan pan ta daih! Ka bangbo riau. Chawhnu chhuak tur sumo chu an lo ding tuar tawh a, motor parkna tur pawh chep tak a ni. Engtin tin emaw kan inhnawh thei mai. Amanda a chhuk vat a, ka zui nghal. Sumo ho chu a bih dan dan a, a phei zel. A duh a hmu lo tih a lang, counter lamah a phei leh a. Pathumnaah chuan a duh a hmu ta a niang, a ding ta chat a. 

"Malsawmtluangi leh C. Mawia i thah avangin man i ni e" tiin Hruaitluanga te awmpui nula kha a hling ta chat mai! Ka mawl khawp mai. An nula in thingpui a rawn dah khan ka lo en chiang lem lo va, chu nula ka han hmuhchian takah chuan, CMawia leh midang te sawi thin hmel kha a pu! Ka ngaihbel miah lo. Tin, a beng veilam chu band-aid in a tuam bawk. CMawia khan bengbeh a hum tak kha mawle.. 

A chiâi chhung a rei lo; chutah a sarak ta chiam a. Mahse, Amanda chuan a ngaipawimawh lo kher mai. A hmaiah a beng ta sawk a. "I ka kha chip hmak rawh.. Ka ţhuaisawm mai ang che" a ti hem mai. A mitmeng hlauhawmzia a hmuthiam tehreng aniang chu, a ngawi ta hle hle a. Station lam kan pan pui ta nghal. 

Dâwp rei a ngai lem lo. 

"Hruaia te ina ka awm tirh atangin Hruaia hi tihtakzetin ka atchilh nghal a. Phaia a awm hlante hian a roomah lutin a chang phei chuan ka riak hial thin. A bialnu Msi kha ka haw ngawih ngawih a ni ber mai. Mahse, Hruaia chuan melh pawh min melh ve duh si lo. Thingtlang atanga rawn inhlawh ka ni a, chhungkaw rethei tak atanga seilian ka ni bawk. Hruaia kha ka pasal chu nise ka chhungte pawn min chhuangin an ni pawh Aizawlah ka awmpui thei anga ti ten ka suangtuah thin. Khami zan Msi ka thah zan khan Hruaia leh ka pi an inbia a. Msi chungchangte an sawi a, ka pi chuan, "MA hi chhuak vat se, kan dil dawn nia. Khalamah duh leh in awm ang a.. " a ti vel a. Ka rilru a na lutuk chu ka let but a ni ber mai. 

Dawngi birthday an lawm tih ka pi tawngkam atangin ka hria a. Ruahmanna ka siam ta a ni. Dawngi te in chu ka hre ve lo va, mahse, Msi chu ka call ta a. "Damdawiinah kan khua ami te ka han kan ve a. Ka hawng thiam tawh lo.. Kawng ka bo a.. " ka ti a. Kan inhmu fo tawh a, ani phei chuan min be thain kawr te pawh min pe tawh nghe nghe. Ka chhuah tam loh vangin ka bo pawh chu mak a ti lo vang. "Ka lo thlah daen che nia" a ti a. Ka awmna lai ka sawi a. A rawn kal ta a. 

Kan in thlen hma hian, "Ms, ding lawk ang. Thudik ka hrilh ang che" ka ti ta a. Chuan, hmun reh leh biru laiah ka thutpui a, Tui bottle ka leisa damdawi ka pawlh sa chu a in ve zauh zauh a, kei chuan ka in lo. Dawt vek ka hrilh ta a. Ka awmna pain min pawngsual thin thu te chu ka sawi a, dawt vek a ni. Mak a ti hle a. Mahse, a awmdan a danglam chho ta a. A rui ta viau mai. 

Chutia kan thu dun chu veng chhung duty ten min rawn hmuh ka hlau ta thut a, MC luh rukna ka hre tawh bawk nen.. (Hei hi Aizawl ka awm tirh, Hruaia te ina ka awm hmaa zu kan in thin laia ka hriat tawh a ni) a scooty chu ka va park te te a. Thawm leh veivak awm tawh loh hnuah ka kuah phei a, MC ah chuan ka luhpui ta a. Dik tak chuan thah ka tum mai bik lo, khati khan hnutchhiah ila mipa tu emaw ten pawngsual se ka duh a. , mahse, kan awmna lai kha biru deuh mah se, duty ho ten an check ngunna lai a ni tih ka hre tawh a, an nangching ang a, an hruai daih ka hlau a ni. Tichuan, MC-a ka luhpui hnu chuan, Hruaia ka hmangaihzia leh ka tana amah chu a hnawksakzia ka sawi ta sak sak a. Mak a ti em em a, a che hleithei bawk si lo. Ka in âng thinrim chho zel a. Thah hial ka duh ta a. A tirah ka rek phawt a, min lo keh ve avangin duh angin ka che thei lo. Ka jumper hruai ka pawt thla a, chu chuan ka hreng bet ta tlat a. A thi ta a ni. 

Mahse, ngaihthat lohna ka la nei tlat. C. Mawia khan min hmu tih ka hria. Nakinah a sawi chhuah mai ka hlau a ni. Ka pi te bulah kan khuaa kan chhungte damdawiin awm chu hmang tangkaiin ka chhuak ta zeuh zeuh a. Ka hmu fuh thei mai lo. Ka hlauh ang ngeiin nimin piah khan a rawn kal ta a. Rawn kal lo se a tha zawk tur a nia. 

A number neih dan ka zawng a, ka zui ruk than tawh vangin a thiante ka hre nual. Awlsam takin a number chu ka nei ta a. Zan laiah, phone ka be der a, ka pi te bulah, "Kan khuaa dam lo kha a thi ta nge nge anih chu. Chhungkhat an nei si lo va, ka han kal ve ange" ka ti a. Hruaia ngei hian min thlah bawk. Mahse, C. Mawia zawk chu ka call a, Nangmah angin. 

"Tunah hian tualthattua rinhlelh kan zui ru mek a, min rawn telpui ta che. Kha nu kha a ni ngei em tih kan hre duh a" tiiin. Ani a lo phur nasa mai a. Ka awmna hmun ka sawiah a rawn kal ta vang vang a ni. min hmuh chuan a meng phawk nasa mai a. Kei chuan, "Tualthattu angah min lo ringhlel a, keimah ka ni lo. Tunah hian min zui la, Police te pawn min nghak tawh.. Kal ang" ka ti a. Engmah chu a hrethiam lo tih ka hria.. Tin, damdawi a la rui deuh bawk nen.. Hunthar lamah ka chhuk pui a. 

. "Kan mi chante hi RV atanga lo chho tur an nia" ka ti zel a. Msi bialpa u ka nih thu te sawiin tualthattu hmuh ka chakzia te ka sawi sauh sauh a. Awih harsa a ti tih chu ka hria. A ruang inhmuhna thlen hma khan a ding thut a, "Nang hian alawm that.. " a ti ta mai a. A phone phawrhin tu emaw call a tum ta mai a. Tihngaihna ka hre tawh si lo va, ka va bawh ta a. Kan insual chu a ni mai. Ka bengbeh pawh a pawtthla nghe nghe. A chak vak lo bawk a, ka tlukna lamah thingbung chang zeta ka va hmu a, ka chuh ta vat. A inrin hmain ka hlap ta a ni. Vawi hnih ka hlap hnuah a thi ta a ni. A ruang kha ka hnuk phei a. A phone ka check lai takin tlangval khan min rawn hmu ta a ni. Msi pawh kha a call log-a ka number kha ka delete a, C. mawia pawh ka delete hman. An buai deuh hnuah ka bibo ta daih a nih kha… " tiin. 

"A tir atang khan ka bangbo viau.. Rinhlelh tur awm kha ka hre mai lo a ni. Ka hriat chhun chu hmeichhia emaw mipa emaw sam dum sei a ni tih bak chu. C. Mawia khan beiseina thar min rawn pe ta hlauh a, A nunna a hloh phah erawh pawi ka ti. A farnuin zan laiah a chhuak a, tualthattu kan man dawn a tih khan keimah angin call a dawng tih ka hre nghal. Ka mi um mek hi mi mawl tak a ni lo tih ka hria.. Msi thiante record ka chhuikir leh vek a, Judy thlengin.. Msi thahna chhan tur an nei lo. Judy kha chuan a ngam lo. Msi bialpa ka hrechhuak ta a, ani hi amah ngaizawngtu urhsun deuh te a nei ve ngei ang a, chumi thiltihte pawh a ni thei.. Tiin. Kan va lenchilh ta chiah a. Hruaia atang ni loin an nula hmel landan leh a beng atang khan ka man chhuak ta a ni.. A rukin ka chik reng a, Msi thihna chungchangah kan leng tih a hriattjiam rual khan tlanbo dan kawng dapin, bazar chhuanlamin a chhuak ta a nih kha.. A chhuah hnu lawka fridge-a tui ka va in khan chawhmeh a khat ţún mai. Bazar an mamawh lo. A awmzia chu tlanbo a tum a ni. Khatiang hma lutuka bazar kha mi pangngaiin an ti ngai lo, zing lam a nih ngawt loh chuan.. Tichuan, kan umzui ta. A nih kha.. Chuzawng chu.. " Amanda chuan a ti thung. 

"Nunna hi a hlu a, nunna pe theitu i nih si loh chuan, tu nunna mah hi chhan ţha tak avang pawhin laksak ngai suh"