Boss Amanda 2/

BOSS AMANDA - 2

Ziaktu: Toni Râlte

"Ka pain nizanah 'Palai te hi kan tir tawh mai dawn em ni? Nei lo rual lah in ni tawh lo va, sawtia amaha awmtir reng pawh saw a dik lo' a ti a. Chhan dan tur ka hre lo" Amanda bulah chuan ka ti a. A nui hawk. 

"Pasal nei tur hian ka la inngaihtuah ngai miah lo" a ti tawl mai. Ka na deuh zawk. 

"I ngaihtuah a ngai anih chu.. Chhungkua i mamawh" ka lo ti a. 

"A dik, chhungkua chu ka mamawh alawm. Mahse, kumin hi liam leh phawt teh se" a ti a. Ţawng leh ka tum lai takin nu pakhat kum 35 bawr vel tur hi a rawn lut ta a. Amanda chuan a lo be sawm vat. Nu lian lam, thau lam lek lek, pawisawi lo zet mai a ni a. A hmanhmawh deuh nge a kamiz hring dal lam deuh kipte chu a chilh dik lo, chu pawh chu a hre lo a ni maithei. Kekawr dum a ha a, inchei angin lang mah se, a hnawk ru riau. A hmanhmawh hle loh pawhin a chiâi hle tih ka hrethiam ve tlat. Tui ka chhawpsak chu a in khawlh khawlh a. 

"Min pui rwwh" Amanda en chung chuan a ti ta a. A aw chu a tliang mawi hle. 

"I harsatna chu han sawi phawt teh le.. Muangchang khan" a lo ti dam thlap a. 

A aw a han thian te te a, chutah, "Ih maw.. Lalsangpuii ka ni a, Sp min ti mai zel a. Kum 3 liamtaah khan pasal ka nei a, kan pa chu kei aia naupang a nia, kei chu kum 36-na ka hmang mek tawh. Kan pa erawh kum 30 a ni a. A nu nen chauha khawsa an ni. Kei chu chhungkaw pangngai ti mai ang, nu leh pa kar atanga seilian ka ni a, kan hung ve viau bawk. A hmingin hna chhete ka nei ve a, mahse, kan inneih takah khan kan pa hi inti mipa ve tak mai, mawhphurhna hlen duh mi a ni ve a. A hna dil a lo hmu ve ta bawk nen, PWD-ah hian a thawk ve a. A hlawh tam lua lo mah se, kan tlem tho bawk a, ka hna pawh chu a nghet lo a ni bawk nen 'Bang mai rawh. Ka nu lah a upa chho ve tan si a, chhuahsan vek zawng a dik lo. Kan rethei bik lo ang, ' a tih vangin ka hna pawh chu ka bansan ta a. Kan pa nu hi Pi Malsawmi a ni a. In lo hre ve tawh mai thei, ţawngţai dam theihna te pawh nei thin, thil bo te pawh tawngtaina hmanga zawn hmuhsak thin kha a nia. Tunah hian Republic vengthlangah sawn kan khawsa ve a ni. 

Ka buaina berah kan lut tawh ang e. Kan inneih hlim kha chuan kan hlim in ka nu pawn min duat viau mai. Nu sual tak zawng a ni lo. Mahse, tu kha a awt lutuk a, mipa fa ngei a duh bawk. Kei ka rai mai si lo kha a lunghnur lek lek ta fo mai a. Ka kum a lo upa ve tawh bawk si nen, keintak pawn hrehawm ka ti. Kan pa nen vawi hnih lai Doctor pawh kan hmu tawh a ni. That lohna kan nei lo ve ve, 'In la inhamtawng lo mai mai a niang e" Doctor pawn a ti a. Ngaihtha takin kan inupa chho ve zel a. Tichuan nikum Feb thlaah khan nau chu ka pai ve ta mial a! Kum 2 zet kan lo nghah tawh, a hlawhtlinna kan han hmu ta chu kan hlim tlang a ni. Ka nu hmel pawh hmuh a nuam viau. Zep thu a cheng lo, kan inneih kum khatnaah kha chuan that a chhuah viau a, a kum hnihnaah kha chuan ka tlin lo lek lek thin. Kan pa a awm ngai si lo va, min tiduhdah a ni tawp mai, nute rel chan ka chang dawn si a, ka ngawi mai zel a. Tupa a awh vang a ni tih ka hai lo bawk. Ka dawh ve hram hram a ni ber. Chhunah pawn lama kawngkhar min kalh hnan tlat te a ching a, bathrooma darkar tam ka tan changte pawh a awm. Eitur zawng zawng a roomah a ken luh changte, ka thil tihfel tawh sa a tibal leh vek thin te.. Aa. A tam mai. Mahse, nau ka pai takah chuan duat namên lovin min duat leh lawi a! A zia chu mak lam ai mahin râpawm lamah te pawh a kal zawk. 

Tin, nikum hmasa min tihduhdah chhoh zel lai atang khan ţawngţai dam theihna power kha a zo ka ti mai. A hul em em a, Zan laiah te hian Biak inah a va tawngtai thin. Tihdamna te kha a hloh ta ni maiin ka hria. Thil bo an rawn zawntir lahin a sawi sual nasa thei bawk si. Min tihduhdah vang kha a nih ka ring tawp. A khami hloh thinrim kha ka chungah a ţuan zawk pawh a ni maithei. 

Tluang takin nau chu ka pai chho ve zel a; ka kum ngaihtuahin rai pawh ka haw hran lo, ka thau kung kung mai. Min duat ta bawk nen. Raipuar nuamsa pawl tak ka nih ka ring. October thlaah nau chu tluang takin ka nei ta a. Hliam pawh ka inhliam nasa lo hlauh. Ka nu duhthusam ber fapa a la ni zui bawk.. Kan pa pawh a lawm ve khawp mai. Tichuan, nikum chhung kha chu hlim takin hun kan hmang ta a. 

(A dang a ro deuh nge, tui chu a in leh khawlh khawlh a..) mahse, kumin kumtir atang khan buaina chu kan tawk chho ta a ni. Bawihtea chu a tlei viau a, a awm mual mual tawp hi a ni mai. Ka nu hian a duat em em a, ka leh awl phian. Mahse, January ni 11,Missionary Day-ah khan kan Kohhran pawhin ruat kan theh dawn a. Bawihtea chu ka bual fai hliau a, ka nu erawh a zaikhawm a. Kan pain TV a en bawk. Chutia rooma bawihtea ka buaipui mawlh mawlh lai chuan ka nu a rawn haw a. A rawn Amen tuar tuar mai. A power te kha an rawn let leh tan ta a ni maithei. Ka lo lawm ve viau kei pawh. Roomah lo lutin Bawihtea chu a pawm lawp a, chawi kangin, "Pathian fapa a nih hi.. Ka Pathian fa a ni.. Kan chhungkua min chhandam tur chu' tiin a au a. Makti zetin ka lo en reng ringawt. Bawihtea chu a tap ta a. Ka pawm vat a, hnute ka pe a. Ruai kan va theh zo, ina kan hawn chuan ka nu chuan inleng a lo nei a. Ka la hmuh ngai loh te an ni. Nula leh tlangval, khawlai mi ve hmel deuh an ni a, an phone bo an rawn zawntir a lo nia. 

Ka nu chu a tawngtai ta mawlh mawlh a, a rawn men leh chiah chuan, "Vawiina in lenna Lalsavunga park-a zu in inna hmunah khan a awm e," a ti ta mai a. Zu an in tih an hmelah a lang lo, makti zetin an ni pawh chuan an melh a. 

"Ka pi, a va mak ve. Kan zu inna te thlengin i hria a. Kan lawm e.. " mipa chuan a ti mawlh mawlh a. Lawmman atan tiin Rs. 1000 an pe bawk. An phone bo va la tur chuan an tlan leh ta vang vang a. An hmu ngei tih an rawn report leh thlap bawk. Ka nu chuan pan a hlawh leh ta viau a.. . Zan khat mitthi kan nei a, kan pa chu a va kal ve a, Zing dar 2 bawr velah kan roomah chuan zawi tea rawn pen lut thawm hi ka mang hriat ruai ruai a. Ka mut a chhuak bawk nen, kan pa a nih ka ring mai a. Ka lo ûksak tehchiam lo. Mahse, a rawn mu mai ta si lo va; ka zun a chhuak tho bawk nen, ka tho ta a. Bawihtea a lo awm miah lo anih chu! Hmanhmawh zetin ka chhuak a. Ka nu ka ko nghal chul a, a room kawngka ka chum dawt dawt. A hnu feah phak a rawn hawng a. 

"Bawihtea a awm lo" ka ti nghal a. Makti hmel pawh a pu lo. 'Ka bulah a mu. Ka la phei alawm' a ti ta mai a. Ka thaw huai tak naa ka thinrim tho. Min hrilh that ve mai tur a nia. Bawihtea pawm chung chuan ka phei leh ta a. Chumi hnu lawkah Bawihtea entir a ngaih tumin, "Keiman ka va kalpui ang e.. In lo nghak zawk rawh" a ti leh tlat a. A duat hi a lawmawm lutuk, mahse, a atchilh thawthang hi ka thinrim lek lek zawk. Chumi tum pawh chuan a kalpui a. Kan inkhawm hi chuan Bawihtea chu a kut hmawr pawn a khawih ngai lo thung. Kan pa bulah pawh ka nu thiltih dan te chu ka hrilh tawh a. 'A tupa neihchhun a nia, hrethiam mai rawh' a ti mai zel a. Thla tir lam khan ka nu te inah kan pa nen chaw kan va ei phei ve a. Ka nuin Bawihtea hruai a phal tlat si lo va, rilru kim lo zetin kan va kal. Kan hawn chuan an pitu chuan an lo awm miah lo va. Ka nu kan call nghal a, a la thei si lo. Kan nghak ren rawn a. Zan dar 10-ah pawh an la rawn haw thei si lo, kan pa nen zawng turin kan chhuak ta tawp a. Kan call reng bawk. Kan hmu zo bawk si lo, kei phei chu ka ţap pur tawh. Ina kan let leh chuan an lo awm reng tawh a! Bawihtea chu a lo ţap vak vak bawk. Kan pa chuan ka nu pawh chu a khak ta nge nge a. Khami zana ka nu awmdan kha mak ka ti tawp! 

A meng sen rúm a, a phun nuah nuah bawk. 

"A tlei duh si lo va, ka vah harhpui anih kha" tih chiah a sawi. Kei chuan ka be hleithei lo a ni ber. Khata tang phei kha chuan ka fapa chu ka taksaa behtir reng mai ka duh tawh a ni. Ka nu lah hian remchang zawng ang hrim hian ka hlat deuh chuan a lo khawih ve ziah a. Ka rilru a chhia pawh a ni maithei, mahse, hlauhthawnna ka nei tlat a ni. 

Tichuan, kar hmasa thawhlehni khan in chungah puan pho ka zar a, a lo chho ve tih ka hre miah lo. Ka fapa muhil lai chu a rawn pawm bawk a. Rum zeta min melh chungin, "I fapa hi ka thehthla dawn nge he in hi ichhuahsan dawn? " min ti ta a nih chu! Mak ka ti lutuk a ka ding khawng reng ringawt. Chutah Bawihtea chu boruakah a va khai a, ka harh ta zawk. "Ka chhuak ang. Khawngaihin ti suh" ka ti a. Ka tap bawk. Nui vur vur chungin a chhuk ta a. Awmngaihna reng ka hre ta lo. Kan pa ka call ta a. Engkim ka hrilh. Mak a ti ve viau. Mahse, chutianga ka nu a awm chung chuan mi dang tan a la tawngtai kal reng tho a, thil bo pawh an la zawntir reng bawk. Mi dang bulah chuan a pangngai vek bawk si. A chhuah erawh ka la chhuak êm lo va, mahse, ka hlauthawng reng tawh. Tunah pawh bawihtea chu keima nu te kutah ka dah a, ka rawn pan tawp che a ni. Ka nu hi a rilru lam a buai nge ho te angin a lang naa.. A awm dan ka hrethiam lo. E.. Ka sawi hmaih. Nimin piah zan khan kan mut tawh hnuah kan pa thianpa Mapuia te hi an rawn inru ve a. Mikhual roomah an mu a. Zan laiah a nupui ruk Tleipuii chu a sarak ta chiam mai a. Kan harh vek. Kan va ngaihven chuan, "Ka harh hlawl ringawt a, a chhan pawh ka hre lo. Dawhkana tui bottle hi ka ban a, ka in lai takin tukverh lam hi ka va melh kher a, putar khabe leh hmuihmul sei tawk mai hian min lo bih kur a" a ti ta mai a. Awih harsa viau mah se, a thlabar dan leh a khurh nasat danah dawt a sawi a rinawm si loh. Ka nu erawh a rawn tho ve lo.. Chung vel chu a ni ka buaina chu" a ti ta a. Ngaihnawm ka lo ti viau mai. 

Amanda chuan, "In pa pa hi a boral nge an inthen nge? " a ti a. 

"Aw kan pa kum 25 a nih khan a boral tawh a. " a lo ti var a. 

"Pi Malsawmi chu ka hre ve deuh. A pasal boral hma pawn tihdam rawngbawlna hi a kalpui thin em? " a ti leh daih. 

"Aih, kan pa sawi dan chuan an pa thi kha a tuar lutuk a, a ât phah tep hial a, mahse, chutia mumal lo taka a awm lai chuan Pathian thlarauin a rawn awmpui ta a ni a tia" Spi chuan a lo ti fel leh thlap. 

"I fapa chuan a pi chu a ngaina ve reng em? " 

.. "Teuh lo lutuk. Chuvang alawm ka ngaihthat theih loh. Duattu te chu ngainat ve viau awm. Ka nuin a pawm tawh chuan tal chhuah a tum char char zel" a ti a. 

"Aw le.. He thil hi ho viau anga lang mah nise, a ril viau maithei a ni. Kan lo ngaihven dawn nia. Ka number la la, chanchin min rawn hrilh leh zel dawn nia" Amanda chuan a ti ta a. 

"Aw le" tiin an inthlah liam ta kha a nia. 

Amanda chuan pawn lam melh vang vang chungin, "Hmalam hun te pawh a hmu lawk hial maithei a ni" a ti sap a. 

"Va intawngtaitir ve chi a ni.. " ka lo ti zauh. Min rawn melh zawk a, "Chutiang ni loin thil bo i zawntir dawn a ni" a ti ta a. 

A tukah Spi te in lam chu ka va pan ta a. Amanda erawh a rawn tel ve lo. Spi kan hrilh sa bawk a, confi zetin ka va lang ve. 

Ngaihsan hmel takin Pi Malsawmi chu ka han fak phawt a. "Ka pi, ka bialnuin min leisak, ka roh leh ngaihhlut em em silver thi ka hloh daih mai a. Ka nun a nuam thei thlawt lo. Khawngaih takin min zawn hmuhsak rawh" ka ti ta a. Min melh vung vung a, ka awm a nuam lo deuh. 

"I ti bo tak tak amaw? " a ti a. A aw chu a chher lek lek. 

"Aw.. Nizanah khan zan khuain ka zawng tawh" ngam leh ngam lo va melh chung chuan ka ti a. Min tawngtai ta a. A chham duah kher mai. A tui hluam hluam bawk si. 

A tawngtai zo chu ka darah na zeta hmer chungin, "Vala, engmah tihbo i nei lo ve. Min fiah i duh vang chauha lo kal i nih hrep hi.. Tu nge rawn tir che? " a ti ta khur khur mai. Spi nen kan inmelh zauh. Engtin nge a hriat theih? 

"Ka tibo alawm" ka ti ringawt a. Ka chil ka lem khawlh. 

Rum zeta min melh chunga eng emaw sawi a tum lai tak chuan an kawngka chu a rawn inhawng rawp a. Pa valai, thau met mut, nun tam pai loh ve hmel zet hi a rawn lut a. Pawr zet hian, "Zawlnei dernu, ka pawisa i bat kha min pe tawh rawh le . " a rawn ti ta a. Pi Malsawmi chuan kei chu min ngaihven ta lo. Chu pa chu va panin, "Zawlnei der a?! Chutianga min ko tur chuan setana thuihhruai ten an hneh che a ni ngei ang. Pawisa chu ka pe em em ang che. Tunah ni lo " a ti a. A aw chu a zawi lek lek. 

"I zak thei lo mang e. Nang pitar tidamna ka nei e te i ti khanglang a, ka ring thlawt lo che. Pawisa in min rul rawh. I tihdamna atang pawn i hmu nual tawh ang chu mawle" chu pa chuan a lo ti ve khauh. 

"Ka inah rawn kal suh ka ti che a ni lawm ni? Ka pe em em ang che" Pi Malsawmi chuan a ti leh a. A dawih aw deuh. 

"Kan intiamna a liam tam tawh e. Rawn biak dawn chein call i la duh si lo va, rawn kal a ngai ta a nih hi. Ka pawisa kha ka duh tawh" a ti rum nghut mai bawk si. 

"Pathian mi ka nih hi, khatiang chaldelh lutuk kha chuan min nawr suh.. " Pi malsawmi aw chu a vin ta deuh. 

Ngaihnep hmel zet hian, "Ve che hian a.. Hetiang lo va eizawnna dang hi i hre ngang na nge. Ka pawisa i puk te kha eng atan nge i hman zozai a. A pung nen lam khan min pe ngei ngei ang che. Ni 2 hun i nei" a ti a, chhuah a tum lai takin pi Malsawmi chuan, "Pathian thlarauthianghlim zah lo taka i biak avang hian hremna i hmu ngei ang. Naktuk zing ni chhuak i hmu tawh lo vang. Hria ang che" a ti ta mai a. Spi nen kan inmelh kâwk. Chu pa lah chuan nui chungin, "I thlarau chan kha eng atanmah ka ti ve lo e" a ti hmiah. A chhuak zui nghal. Pi Malsawmi thinrim insehruh chu a hlauhawm khawp mai. Kei pawh rei awm lovin ka chhuak nghal daih. 

Amanda bulah report ka pe ta zar zar a. Thi ka tibo miah lo tih a hre tlat kha mak ka ti takzet. Spi lahin a hrilh dawn der si lo, bakah kan ruahmanna zawng zawng kan hrilh kilh kelh lo. Amanda chuan, "Pawisa rawn thingtu chu a hming a hria em? " a ti a. 

"Hre lo, a pianhmang chu ka hria. Mi fel leh tha tak chu a ni bik lo maithei" ka ti a. 

Phone a hmang kual nghal char char. Aizawl khawpuia mimal, a pung awma pawisa puktir thin te ho zawn chhuah a tum a ni. An lo awm nual a, An address te pawh kan nei. Mahse, Amanda chuan ph callin a be ta hlawm a, Tuman Pi Malsawmi hnenah pawisa an puktir lo! Chairah a thu hnawk. "Zaninah ruang a chhuak ngei dawn anih hi" a ti chang fak a. Ka lo melh reng ringawt. 

Zanah chuan vawiin lam thil thleng kha ka hre leh tawh lo. Games ka khel a, ka meng rei viau. Ka nuin, "Mama, tho vat rawh. Saw Amanda a lo kal" a rawn tih chuan dar 6 a lo pel tawh. Phak zetin ka tho a, living roomah a lo thu fel ât mai. Tun anga zingah ka tho ngai lo sin le.. Thil thleng a awm a ni mahna. Ka insiam vat vat a. Kan chhuak zui nghal. Ka mut a la chhuak ngei mai. WRB lamah kan tlan a, mak ka ti deuh. A tawng mai bawk si lo. A hnu deuhah mi lo pungkhawm deuh an lo awm a. Kan ding. 

Ruang ka va hmu chu ka ding khawng reng ringawt! Kawngpui atanga penhleh deuh hlekah a ni a, hnahthel ro a tla teuh bawk, ruang chu an la khawih che lo va, a thattu chuan thup a tum ve deuh nge hnahchhawl tam vak lo hian a lo khuh a. Mahse, ka hai lo ngang mai. Ni e, nimina Pi Malsawmi ina rawn kal ngei kha a ni. A mit chu a meng rú a, a ang phuau bawk. A taksa lang theiah hliam hmuh tur a awm lo va, Amanda chuan glove nen a han belchiang ta a. A kawr a han hlim chuan a nak dinglam chu a duk chur mai. An inchai ve deuh nge ni dawn ni, sam niawm tak hi a lo hum tún bawk. A tukhum lam kan han en leh chuan a lo dup ul mai. Thil sakhat rit tak hmanga vuak a ni ngei ang. Thisen pawh a lo khang vek tawh. A thihna a rei deuh tawh aniang, a taksa pawh a khawng vek tawh a ni. 

"A va'n mak em em.. Pi Malsawmi khan a sawi dik chiah a ni" kan let lamah chuan ka ti hluai a. A lo khi sak thung. 

"Kei chu ka ţih riau tawh a nia. " ka ti leh a. 

"A nuam dawn tan chauh alawm le" a lo ti mai a. Ka melh run run ringawt. 

Mitthi kha Remsanga a ni a. Chaltlangah an awm. Pathlawi niin, an nu nen hian kum hnih kaltaah an inthen a, Amah hi party bel fuhin contract eng emaw a hmu fo a, a che thei viau a niawm e. Pa phunglung ve tak, zu leh nula lamah pawh mikhual lo tak a ni ve a niawm e. An nu nen an inthen chhan pawh ngaihzawng a neih vang an ti! A nau te chhungkua nen an han khawsa ren rawn a, mahse, nikum khan amahin a indang ve ta a. A in pawh a lun viau thin. Fa pahnih a nei a, an nuin a awmpui thung. Pa ngaihsam leh che bawn ve tak mahnise, a fate chu a ngaihsak viau a, pawisa a thawn deuh reng bakah a fate tan ram te pawh a leisak thlap thung si a ni. 

Pi Malsawmi kan hmuh hmain Spi kan be ta phawt. Nimin ka hawnsan hnua a nu awmdan leh thiltih zawng zawngte chu a sawi ta a. 

"A chiai riau a. A roomah a tawm char char a ni mai. Bawihtea pawh a ngaihsak lo. Zanriah ei khamah roomah bawk a tawm leh a, Callin tu emaw chu a be chiang. Mahse, an sawi ka hre thei lo. Zing dar 1 bawr velah Bawihtea a harh thut a, hnute ka pe nghal. Ka nu chuan chutih lai tak chuan call a dawng. Mahse, an sawi ka hre thei tlat lo" a rawn ti ta a. 

Hetih lai hian social media lamah thu a thang nasa viau. Remsanga thiante tawngkam niawm tak tak a ni. 

"WBR ah zu kan in a, mipa vek kan ni. A rui lungpuam chuan tun laia tihdam rawngbawlna nei thin Pi malsawmi'n 'naktuk zing ni chhuak i hmu tawh lo vang' min ti a, tih thu te a sawi a, a sawi ang tak taka hetiang thil a thleng ta hi a mak hle mai" tih thu chu a darh chak hle. An inhauh dan lah chu an zeldin kual a, thenkhatin, "Pi Malswmi hian mi a thahtir aniang" an tih laiin, thenkhat chuan, "Pathian mi te chu sawisel loh a tha asin. Thlarau thianghlim sawi chhiat hi a hlauhawm" an lo ti bawk. Thu a saisa ta nuai mai. 

Khami zana a zu inpui a thiante chu kan kawm ta a. 

"Kan nawi viau a, mahse, ka la hre thei deuh vek. Kan vaiin paruk kan nia, kan phul phul khan kan phul ve hlut a. A changin kan han lam leh rih bawk. Dar 12 vel a ni tawh maithei, Rema chu a thlang thingkung bulah a zu zung a, tuna a ruang an hmuhna bul mai kha a ni. Keini kan lo lam leh rih a, zu a tam bawk nen, kan in kan in bawk si a. Sana en nachang pawh kan lo hre lo. Rema a zung tih pawh kan hriatchahn tawh loh laiin a thlang kawngpui sira kan bike hun chu a start mawlh mawlh a, a tlan chhuak ta daih a ni. A hnuah msg in, "Ka bialnu ka ru dawn a. Ka kal ta mai" a rawn ti a. Ngaihthat lohna kan nei lo. Keini pawh kan haw zui a, tikhan a thi tih kan hre ta si a. Kan hrilhhai teh asin" an zinga upa chan chang ber chuan a ti ta a. Dawt an sawi a rinawm loh. Remsanga phone kha kan hmu zo lo hrim hrim reng bawk a. A bike pawh a thattu hian a khalh haw tih a lang. Pathian thiltih ni loin mihring ruahmanna a ni ngei mai. 

Tunah chuan Pi Malsawmi kan hmachhawn a ngai ta. Kan va kalchilh ta law law a. 

"Ee! In lo kal ka ring sa hrim hrim a. Ka lo nghak deuh che u alawm" a ti a. Min hmuh chuan min melh vung vung, mask ka vuah a, lukhum ka khum bawk. A chhan chu min hriat ka duh lo a ni. 

"Remsanga, i pawisa batna pa chu a thi ta chu a nia. Nimin lam in boruak te kan lo hre ve a. Chumi chungchang chu a nia kan rawn kalchhan" Amanda chuan a ti nghal a. 

A nui vur vur a. "Ka hre sa alawm. Pathian mi ankhum chu pawi deuh asin. Tihtheih ka nei lo kei chuan. Pathian hremna a hmu anih kha" a ti a. 

"Tu nge amah that tur khan i rawih? " amanda aw chu a fiah kher mai. 

"Eng a?! I timak em mai. Nula, tumah ka ruai lo. Pathianin amah ring lotu te nunna chhat tur hi chu khawvelah a ngah lutuk" a lo ti leh diam a. 

"Kan hre zel ang chu" tih pahin a tho a. A duhtawk ringawt. Mak ka lo ti deuh. Man nghal mai theih turah ka lo ngai asin le. 

"Finfiahna kan nei rih lo alawm.. sam, kawng dang kan dap ang. Remsanga kuta sam niawm tak awm kha khabe hmul a nih kha. Kan pii hian putar khabel hmul sei tak a kawm thin tih a chiang. A chhan eraeh a awm ang. Ka rindan hi a dikin ka ring. Zaninah chet kan la nghal mai dawn nia" tiin, Spi a call nghal.

Zan dar 8 a pel fel tihin Naute pawm chungin Spi te in piah kawiah kan ding ta ran a a., naute chu a pawm a. A muhil sek sek mai. A hmeltha reuh sia, ka thlek ka thlek mai. 

"Chhungkua kan ang" ka ti a. 

Za vak lo va nuiin, "Nangmah hi rai thei zawk la ka ti" a ti pek a! Ka inrin hmain ka nui hawk. A nui ve ta hawk hawk a. 

"Naute te chu zei lo deuh pawn an neih chuan an zei chawp mai alawm" ka ti a. 

"Fa tam tawk neih ka duh a, mahse, ka kum hian a support tawh lo" a ti a. Hmalam hun dream chungin ngawi rengin ka thu ta reng a.  

"ti rawh le" a ti sap a. Spi pasal ka call nghal. 

"In fapa inhmu let duh a nih chuan, cheng nuai 10 kengin ka sawina hmunah in rawn kal ang. Police in hrilh vaih chuan a thi a ni mai" ka ti a. Ka aw chu ka ti thum lui nasa. 

Pi Malsawmi aw zawk hian, "Ka naute kha tina miah suh. I duh apiang kan ti ang. " thlaphan hmel zet hian a ti a. Ka dah nghal daih. 

Spi msg a hnuah kan dawng a. 

"A chiai, a buai tawp. A vei sek mai.. " tih a ni. Kan plan chu a fuh dawn e. 

Ni e, naute kha Spi inbual hlan leh an pa len chhuah inkarah kan va la a ni. Amah Pi Malsawmi erawh khawiah nge a kal kan hre lo, a awm lo tih chiah kan hria. Zan khat tawp mi fapa han kawl chu thil tih chi a ni chiah lo. Nghah kan nei a ni. Dar 10 velah Spi msg kan dawng leh ta a. 

"A chhuak chiah" tiin. Hmanhmawh takin an in lam kan pan ta a. Spi chu kawtah a lo ding vâng a, naute chu kan pe. A pasal bulah engkim a lo sawi tawh a. An pa pawn a hrethiam viau a nih hmel e. 

Pi Malsawmi kalna lam panin kan tlan nghal. Maruti 800 -a a chuang lut tur kan va nangching a, a lawmawm e. Chu car chu rinhlelhawm lo tawkin kan zui ta zel a. Ngaizel lamah tlanin Muallungthu lamah a peng ta a. Kan zui ve zel. Kawng peng lo awmah tlan lutin, hla vak loah car pawh chu a ding ve nghal a. Keini pawh dingin thawm nei loin kan chhuk ve nghal. Hnim pik karah kan bawkvak a, thawm chu a reh kher mai. Pen thawm a rawn awm a. Vawthlep a bun a ni ngei ang. Keini pawh insiam remin kan tawlh hma hret hret a. Zawl deuh laia mi pathum thukhawm chu kan va hmu ta a. 

"Pawisa an ngiat a. Tihdan ka hre tawh lo. A tu phiangsenin nge ru bo ni? " pi Malsawmi chuan a ti hlak hlak a. 

Vai putar puithiam niawm tak, khabe hmul sei zet chuan, "Pawisa i neih si loh chuan kawng dang a awm lo anih chu.. Tawpsan mai rawh. " a ti a. Mizo tawng a pai deuh danah vai ngei a ni tih a chiang. 

"Ka tawp thei ngawt lo. Ka hming hi khawvelin an hre tur a ni. " pi Malsawmi chuan a ti fiak thak. 

"Tunah phei chuan Police umzui lai i ni a, ka dinhmun pawh i tiderthawng vek a ni. Duhtawk tawh rawh. Kei pawh kan ramah ka haw tawh dawn" Vaipa chuan a ti a. 

"Khang police tlaw lutuk khan min man lul lo vang. Pathian mi ka nih hi.. Ani hian a senghawi leh vek mai ang" tiin a bula thu Maruti khalhtu kha a kawk a. Chupa erawh chu a ngawi reng. 

"Anih chuan naupang dang ngaihtuah mai rawh" Vaipa chuan a ti a. 

"Sam, hawh le" a silai phawrh zal zal chungin Amanda chuan a ti sap. A ding nghal rap a, "Chunglamah in ban phar nghal ru.. Man in ni e" a ti vawt raih a. An hamhaih kher mai. Keiin silaiin ka lo tin ve chiah bawk. Tlanchhiat mai tumin an meng tih kan hai bik lo va, thla a eng uar lo naa an hmuh chian theih tho mai. Maruti khalhtu kha vawi leh khatah ramhnuai lam panin a tlan ta thut a. Silai a puak nghal thawt, a tlu bawkkhup nghak. 

Keiin mi dang ka call nghal a. 

Handcuff a hrentir mawlh mawlh lai chuan, "Sam, kan mi tawngthei lopa saw va buaipui rawh. A thi lo vang. A malpuiah anih kha ka kah" a ti nghal zat a. Rei kan nghah hmain kan thiante an lo thleng a, mi pathumte chu kan phur phei ta a. 

Pi Malsawmi inpuanna:

Kan pa boral hma khan he puithiam nen hian kan inhmelhriat a. Vai rama kaninentir tumin kan inhria a, Kan thlenna hotel bul lawkah hian temple-ah rawngbawlna a nei Patthin. Kei kha ka taksa pangkhing na vak thin, Mizoram doctor ten enkawl ngaihna min hriat tawh loh ka ni a. Phaia kan han inentir pawh chuan ka natna tak chu an hre thei chuang lo. Ni khat chu kan pa chhuah hlanin temple-ah chuan ka va kal ve a, Shalu hi ka va inkhawihtir ve ta a. Ani chuan, "Pathian zawlnei i ni a. Chuvangin na i nei thin anih hi. Pathianin puantir duh che a nei a, chu chu i tihhlawhtlin loh chian i dam lo vang" min lo ti a. Mak ka ti khawp mai. Kan pa bulah ka sawi ta a, a awih lo nasa mai. Vai puithiam te lo rin reng reng tiin a lungawi vak lo lehnghal. Kei pawn ka sawi ri duh ta lo va. Kan haw leh hnuah pawh a rawn na leh thin, nachhawkna ka ei mai zel a. Tihngaihna vak ka hre tawh lo a ni. Mahse, ni khat chu Shalu hian min rawn zawng chhuak ta hlawl mai a. "Ka thusawi kha i awi lo ani maw? " a ti a. 

"Eng nge puanchhuahtur ka hre hleinem" ka ti a. 

"Tihdam theihna te i nei ang a, mi dang tan thiltha i ti dawn a ni" a ti leh ta zel a. Kan pa chhuah hlanin Nitin deuhthaw kan inkawm ta ziah a. A pathian sawi leh Ka Pathian sawi hi a inang lo tih reng ka hre lo. A rei a, Shalu chu ka ngai ta ngawih ngawih mai a. Ani lah a rawn lang zing tawlh tawlh bawk. Chutih lai chuan a inmet fai vang a, puithiam a nihna atang khan a bang tawh a ni. Kan awmdan chuan kan pa beng a thleng ta hial a, hetih lai hian Mama hi Hyderabad-ah lehkhazirin a awm a ni. Kan pa chuan min zilh a, a sawt lo. 

Zan khat a mutthilh tawh hnuah Shalu chu rawn kalin kan inhmu ru ta a. Ka pasal inchhung ngeiah thil tenawm tak kan ti dun ta a ni. A muhil tawh emaw ka tih kha a lo muhil lo nge, kan pa chuan min phawk ta a. Kawng dang neiin kan inhre tawh si lo va, Shalu chuan a rekhlum ta ringawt a ni. Keiin thenawmte punin kan pa awmdan a dik loh thu ka sawi a, Stroke vanga thi angin kan tilang thei ta hram. Mahse, Thenawm ten min ringhlel ru tih ka hriat avangin nuam ka ti ta lo va, Tuar ber anga langin mi â ang maiin ka awm chho ta a ni. Kan pa a boral chiah takah chuan Shalu sawi ang khan keimahah thawk a awm ta a, Thlarau chuan min pawl nasa ta mai a, harhna chang chhoin Pathian ka au nasa bawk. Chutia mi â ang maia ka bawraw hnua Kohhran lama ka tuallim leh thei chu mi te pawn min lawmpui ta viau a. Tichuan, tihdam rawngbawl hna chu ka thawk chho tan ta a ni. 

Rawngbawlna ka tan chhoh hnu lawkah Shalu chu a pa thih vangin an ramah a haw ta a. A pa thuchah angin Puithiam hnaah a kir leh ta a. Kei pawh ka buai theih tak em vangin ka ngaihven zui lutuk lo. 

Mo kan neih tirh khan Shalu lehkha ka dawng ta a. "I thiltihtheihna khan tawp chin a nei dawn a. Hriattirna ka dawn angin i tu hmuh hmasak ber chu mipa a ni ngei tur a ni a, chu naute chu kum khat a tlin chiahin ka kutah i hlan ang a, a ngai ang bawkin thiltihtheihna i nei leh ang. I ti lo anih chuan zawi zawiin kha thiltihtheihna khan a kiansan ang che" a rawn ti a. Ka mangang ta hle mai. A sawi ang tak tak khan ka rawngbawlna chu a zuih ta tial tial a, keimah pawh hian ka hre thei. Ka nunram a chau a, huatnain ka khat a. Sangpuii nau pai thei lawk lo te kha ka hua a ni. Ka duh ber chu Khawvel hian Zawlnei ropui tiin min sawi se, mi tam takin min zui se tih a ni. 

Ka mangan em vangin Shalu chu Mizoram lama awmhmun rawn bengbel turin ka chah ta tawp a. Pawisa lama a harsat vangin Remsanga hnenah khan cheng nuai 5 ka puksak a ni. Ani nen khan a thil bo ka hmuhsakna lama inhria kan ni. Shalu chu a rawn chuang chhuak a. Sangpuii a rai ta bawk. Ka lawm chho tan ta a. Nau a lo piang a, mipa a ni lehzel. A dik adik chu mihring ka nih angin ka tupa chu ka hmangaih ve em em, kum khat hnua mi dang kuta ka hlan dawn vangin ka theihtawpa duat ka duh a, ka tum bawk. A nu hi hnawk ka ti a, nakinah pawh harsatna min la siamsak thei dawna ka hriat vangin vawinkhat phei chu chhuak turin ka vau nghe nghe a nih kha. 

Tichuan, Remsanga chungchang kha chu sum ka neih mai loh vang leh zawlnei der min tih vang khan anchhia ka lawh ta anih kha. Kha ka thil sawi kha a thlendik hlauh chuan Zoramah ka hming ka chher thei turah ka ngai a, Shalu kaihzavengtu Shalim biain Remsanga dah tha tur khan ka ti ta a nih kha. Khami zan khan Shalim chuan a kawng a herh hlauh mai a. Shalu khan ka hna min thawhsak ta zawk a ni. 

Chuan, naute a bo khan ka chhe ta vek a, ka hmingthanna tur a tawp mai dawnin ka hria a. Shalu nen inhmu turin ka bia a, kawng min ngaihtuahsak theih beiseiin… kha lai hmun kher kan thlan chhan kha chu Shalu awmna hmun hi hmun lun lai a nih bakah kei mi hriat ka lo hlawh ve tawh bawk vang a ni" tiin. 

An pathum chuan hremna hmu turin Central jail-ah phurhliam an ni ta a. Zoram pawn zawlnei Malsawmi chu a theihnghilh tawh ang. 

"Rin aiin kan zo hma a" Amanda bulah ka ti a. 

"A tir atang khan rin dan sa ka nei tawh alawm.. Sam, zawlnei tih vel hi ka ring ve hleinem. Bible ka nei a, Bible hi ka tan zawlnei a ni a, ka ringtawk khawp mai" a ti nghet charh a. Duh em emin ka melh ngawih ngawih mai…