Amanda 1

BOSS AMANDA (S2) - 1

Ziaktu: Toni Râlte

(Adds kha khawngaihin aw) 

Damdawiin gate ka lut fel chiah tihin min lo call a, "Sam, vaipa mix ka ei chak tawp. Lo ken dan ngaihtuah teh" a rawn ti! Ka nui nghek ringawt. Vaipa mix ber kher. Ni e, kar hmasa khan Smugling kaihhnawihah case a la a, ramriah te an teihawi nasa a, a thawhrim tuar lohin khawsik a rawn nei haw ve ta tlat mai si a. Doctor te thurawn angin damdawiin khumah a mut ve rih a ngai dawn a ni. Amah pawh a thu that mai. Vaipa mix zawng chuan ka tei chhuak leh ta poh a. Ka va hmu remchang mial bawk. Phur takin a awmna cabin lam chu ka pan ta thauh thauh a. A lo harhvang deuh tawh e. A la damkawr deuh tih erawh a la lang thei. Ka thil lei chu locker-ah a then ka dah lut a, vaipa mix chu ka pe ta a. Râwp hmel zet hian a ei tuam tuam a, ber kher hian a. 

"He lai khuma mu reng hman hi ka ni lo asin le aw" a ti a. 

"Mu mai mai rawh. I dam chian var hma loh chuan i chhuak lo vang. Case han la chi pawh i nih rih loh kha" ka lo ti a. A ner sak. 

"Nizan Venghluia thilthleng kha i lo ngaihven ve reng reng em? " a ti a. 

"Tukinah ka chhiar a, Pu Chungnunga'n a case a la dawn a niawm e. " ka lo ti ve mai a. Ni e, nizan ti ila tukin a ni mah zawk ang chu, zing dar 2 bawr vel khan Venghluia khawsa Pu Rosiama, kan minister Pu Lianzika nau chu a in chhung ngeiah beihna tawkin rawk a ni a. Sum thahnem tham tak bakah an nu tlereuh leh engilo, hralh theih tur awm an la nual a ni. Anmahni erawh an him pial thung! Cctv Footage atanga a landanin mi pahnih niin, hmai an tuam ve ve a, jean kekawr pawl hain kawr chung dum an ha ve ve bawk. An landan leh chet danah ruihhlo ngai an niin a lang lo. An professional riau tlat! Pakhat chuan a kawngah pistol a pai ran bawk. Chu zawng chu chhuizui theihna hmanrua a ni deuh mai. Mahse, Mizoram hi zawng a zim ve bawk a, hetiang inrawkna liantham te hi chu chhui chhuah a harsa lem lo. 

"Zanin chu min riahpui la" a tih chuan ka khi suk. 

"Lutuk" ka inrin hmain ka lo ti thawt thawt. 

Hnaah kal ka ngaih rih avangin ka chhuahsan ta phawt a, zan lamah ka riak dawn tho bawk nen. A cabin atanga ka chhuak chiah corridor ka zawh lai chuan nurse hleitling leh chhe lo fahran hi min tawk zawngin a rawn kal ve a, ka tum vang em em pawh ni lovin ka nui ringawt! A nui ve tak naa mak a tih hmel deuh. Ka zak leh hnuhnawh kher mai. 

Amanda tel loin pute hnung ka zui leh ta duan duan a. Case tharlam em em a awm lem lo naa case chinfel loh, serious deuh deuh ho chu kan OC in a rawn phawrh leh mauh si a, kan buai ve leh ta deuh. Ni a rei viau mai. Tlaiah ka hawn veleh ka inbual nghal sar sar a, chaw ka ei vat vat hnuah Amanda chaw tur kengin damdawiin ka pan leh ta nghal a. Duhberte pan ruak ruak hi a lo hrehawm lem loh a nih hi. A lo muhil a, ka kaitho duh rih lo. Phone khawihin thutthleng seiah ka mu zal pah a. Ka chau deuh nge ka lo muthlu suar suar tihin ţe thawm vangin ka harh hlawh. Ka thawh rualin Amanda pawh a rawn thu chhuak ve nghal zawt. Kan inmelh ta reng a. Pawn lamah eng nge thleng tih en turin ka chhuak vut a, a thim thet thet tawh a, zan tia sawi theih erawh a la ni lem lo. Cabin intlar zui chu kal pelin ward pangngai lam chu ka va mitmei a. Male ward niin an lo phu deuh mur murin ka hria. Ka'n ngaichang deuh a, rin dan ka nei thiam ta deuh. Chhuatah chuan thih sual ni mai awm hian tlangval pakhat hi a lo tal awrh awrh mai a. An lo hual laih mai. A meng sen rum a, a hachang a thial bawp bawp bawk. A rapawm zawnga lak chuan a rapawm ang a, lainat duhtu tan pawh a lainatawm khawp ang. A nu niawm tak chu hmai hup chungin a lo tap khur hlawk hlawk bawk a, amah hi a ni ngei ang, ţe vak kha. Nakin deuhah chuan nurse pakhat hian a jection thei ta hram a, a zal ta raih raih mai. A khumah zawn chhoin tha takin an muttir ta a. A la thi êm lo chuan ka hria. Ka let leh chuan Amanda chuan chaw a lo ei dawn mek a, chanchin min zawt nghal var. Ka hrilh ve mai a. "Zan thum ka riak tawh a, zantin ruang a chhuak ngei ngei.. Ka riah atangin" a tih chuan, "Thil mak pawh va ni suh" ka lo ti hluk a. Ni e, nitin mitthi hi chu an awm deuh ngei ngeiin ka hria. Dam hlen tur kan ni miau lo va. 

"Mahse, an thih dan a inang tlang vek asin.. Lungphu chawl vek" a ti sap a. 

"Lung tha lo sa te pawh an ni a niang chu.. " ka lo ti mai a. 

"Chuan, mipa vek an la ni bawk a" a ti lehzel a. 

"Enteh, i thluak i hmang nasa thin lutuk a, thil pangngai pawh i hmuh dan a dang vek tawh anih kha" ka lo ti ve khauh. A khi sak a, a lu a thing nar nar bawk. Engmah a sawi zawm ta lo. Chaw a ei khamah tihtur em em a awm tawh si lo va, games te ka khel ta mai mai. Ani erawh chuan movie a en thung. Doctorin ward a rawn fang a, vawiina ka tawh nurse hmeltha deuh khan a rawn zui bawk. Ka lai ru tawp. Doctor pawh chuan, "Zan khat bak riah a ngai tawh lo maithei. I tha chak khawp mai" a ti a. A thaw huai mai. An chhuah hnuah, "Ani ai khan ka tha zawk lo em ni? " a ti ta khauh. Ngam leh ngam loin ka va melh a, min lo melh kal mai. 

"Tha fe zawk" ka ti ringawt a. A nui hak. Thikthu a nei ve te chu ka lawm tih a hrethiam angem aw.. Dar 9 bawr velah kan mu ta ringawt. Thutthleng seiah chuan ka inkual rum a, mut a chhuak si lo, pubg bawk ka khel leh. Ani erawh a maimichhing a, a thawk lak danah a la muhil lo tih erawh ka hria. 11 a lo ri reng tawh mai. Kei pawh phone ka dah a, Amanda chu min hnungchhawn zawngin a saisir a, a muhil tawh a ni maithei. Puan ka va sin thattir a. Zung turin ka chhuak ta a. Mei zuk a lang leh tlat, hawi ru zawk zawk chungin zial khat chu ka'n zu hram a. A reh tawh hle. Cabin-a ka let leh tur chiah chu kan piah lawk room, toilet bul chiah ami-ah chuan eng emawni phe zawk hi ka va hmu thawi thuak a. Ka ngaihbel pawh a ni maithei. Mahse, eng emaw ni kha chu a phe zawk tlat a ni. A rawn lan leh tak lohah chuan roomah lutin kawngka ka kalh a, ka mu ve nghal. 

Ţap hlawp hlawp thawm leh pen ri tlak tlak thawm vangin ka harh hlawl a, ka meng chiang kher mai. Zan reiah chuan a ring duh bawk a ni. Sana ka en a, dar 3 rik nan 4mins a la awm. Ka tho a, Amanda khum lam ka va en chu a lo awm awzawng lo mai! Hlauhthawnnain min bual nghal a, kawngka pawh chu a lo inkalh tawh lo, hmanhmawh takin ka chhuak ve ta nghal a. Ka chhuah rualin zan tir ka mut dawna phe zeuh ka hmuhna room zawnah khan mi pali nga vel an lo ding laih a. Ka phei ve nghal. Amanda pawh a mutkawr nen room chhunga a tei lai ka va hmu, ka thaw huai mai. Eng nge thleng tih ka han zawh chuan, "An thi leh tawh a" Hmeichhe cher lam, nelawm vak loh chuan a lo ti zawi sap a. 

"Eng nge a natna? " ka tih chuan, "A ngai bawk" a lo ti ringawt. Biak a va har reuh e. Amandain min hmuh chuan min hui a, ka lut ve tawp. Ruang chu patling kum 60-65 bawr vel tur a ni a, sa tha lam, thau lek lek a ni. A thihna a la rei lutuk lo nge a la khawng lutuk lo tlat. Amanda chuan, "Hei hi thil thleng pangngai a ni tlat lo" a ti sap a. 

"A nih eng nge? " ka lo ti ve sup. Min melh kâwk chungin, "Ruahmanna tha tak a ni" a ti tawi tâk a. Ka bo leh hle. Dam lo a nia, a thi ve ni mai turah ka ngai. A riahpuitu a nupui ni ngei tur chu a ţap rawih rawih a, a lungchhiatthlak kher mai. Tlema a tap zualpui a reh deuh takah chuan Amanda chuan a va hnaih a. "Ka pi, biak lawk che ka duh a ni. Amanda ka nia, Detective" a ti zauh a. Doctor lo awm ve chuan, "Eng thilah? " a tarmit chawi chhoh pah chuan a lo ti nghal vat. 

"Enteh, Doctor, he damdawiinah hian zan thum a zawnin ruang a chhuak tawh, zaninah a palina a thleng leh chiah. Hei hi thil pangngai niin i hria em? I dam lo te an ni a, an hriselna lam pawh i hre thawkhat viau ang a, kei chuan thil pangngai leh thleng tur reng niin ka ngai thei tawh lo. Hei kan pu-a nen phei hi chuan tlaiah pawh chess kan khel dun zak zak, harsatna a neih awm ka hre lo" a ti ta hmiah hmiah a. Kei pawn ka ngaituahna ka thlak danglam tan. 

Nu pawh chuan, "Ni e, Doctor, sawi ka la tum hrim hrim a. Kan pa hi vui liam phawt ila, report ziah luh ka tum asin" a lo ti ve bawk a. Doctor chuan thutak zet hian, "Tihian lo inbuaipui se, room dangah sawiho lawk ang u hmiang, kei pawn hei hi ka duh ber a nia lawm" a ti ve ta sup a. Kan pali chuan Amanda roomah kan phei ta a. Nu ber khan a chhungkhatte a be tawh bawk a, nurse ten ruang an la sawngbawl bawk nen, hun tlem chu kan la nei thei e. 

"Aw.. Ka pi, hun kan ngah lo va, Zan tir atanga tun thlenga in awmdan i hriat theih chin han sawi phawt teh" Amanda chuan a ti nghal a. 

A muttui hruk hul pahin, "Um. Nia, chaw ei khamah khan tihtur em em a awm lo bawk a, Bible ka chhiar a, ani'n Pu Lungmuana sermon a ngaithla thung. Dar 9-ah mut tak tak chuan kan mu a. Kei thutthleng seiah ka mu thung. Dar 11 velah ka zun chhuakin min tiharh a, ka va zung a. Ka mu leh nghal. Mahse, ka muhil thei lawk lo. Ka harh kur reng a, chutia ka inleh chhen lai chuan fridge phena phe zauh hi ka va hmu fuh a, rannung an niang tiin ka mu leh mai a. Ka muhil siar siar tihin zawitea ke pen thawm niawm tak vangin ka harh ta a, ka meng chiah tihin kut ka hmu nghal, puan chhah lam pang hian ka hnar leh ka a rawn hup nghal a. Ka tal vak vak naa.. Kar loah ka zawi vek a, ka muhil ta bawrh bawrh a ni. Ka harh leh chuan kawngka hi a lo inhawng huau a, kan pa ka va en vat, a mut dan chu a dik lo tih ka hria, ka va pan hnai a. A lo chatthla fel der tawh a ni" tiin a tap leh bawrh bawrh a. Amanda chu rang deuhin a chhuak leh vut. A ngaihna hre lo zetin kan inmelh reng ringawt hlawm. Mahse, ka zui ve ta vat a. Ruang bulah khan dingin nurse chu a lo be mek a, Nurse in a lu a buk nghat rual chuan ruang thawmhnaw hak chu keu sawt sawtin a dul leh nak bawr vel chu a en dik ta zung zung a. A beisei ang a hmu lo a ni tih hriat takin a chek hlak. A lo chhuak leh a, kan pi rawn phei mek bulah, "I hnar huptu kut chu mipa kut nge hmeichhe kut tih i hre hrang thei em! " a ti nghal sawk sawk a. 

"Hre hrang lo, a chak danah khan mipa a nih ka ring" a ti ve mai a. Lehlamah an pa ruang a let ve reng bawk si, han biak buai chhen kha a ti deuh nge a kalsan a, roomah a lut leh nghal. Doctor nen chuan muk takin an sawi dun ta a. 

"Dik tak chuan ka ngaihthat lohna hi a rei tawh viau ania. I lo awm hma pawh khan zan hnih danah an hriselna tha tawha kan ngaihte an thi pheuh pheuh reng a, kan Hospital-a rawn indah luh ngam tha rai lo hi an awm tawh hialin ania ka rin ni. Zanina boral kha an nuin report a thehluh dawn chuan postmortem a ngai ngei dawn a, chu chu kan innghahna a ni deuh maiin ka hria. Lungphu chawl zantin mai chu a ni em em tawh lo. Zanin ka ward fan a ni lehnghal a, ka check pawh khan engmah that lohna a nei lo, a bp hi a la normal chiah lo va, chuvanga la chelh rih chauh kan ni. Anmahni lahin in lama inenkawl ai chuan tiin min lo ngen ve bawk nen" Doctor chuan a ti ta dap dap a. Ngaihtuahna a kal thui ta khawp mai. 

Amanda chu a thut ngawih vang vang hnuah, "Kal hmanga sumdawnna te a nih takin tih thuah zaina hnuhma a awm em tih ka han en a, engmah chutiang hmuh tur a awm lo" a ti ngui riai a. 

"Damdawi chak tak hmanga chiu hlum a nih a rinawm.. Emaw lukham hmanga up hlum" a ti leh zat. Doctor erawh a ngawi rauh rauh a. 

Amanda chu a ding hluai a, "Ngawi teh, Doctor, he thil hi la tlangzarh chi niin ka hre lo. Victim an awm leh phawt a ngai, target chu a nei leh em em ang, kan pii pawh kha hrilh a ngai a ni.. " a ti hliai a. 

"Mahse, a risk a sang lu deuh lo maw? Tu emaw nunna han dahkham tawp mai chu" Ka lo ti ve a. 

"A dik, mahse, he thil hi a tlangthan vaih chuan he hospital hi a tluchhe ngei ang. Lawk aw.. Doctor, he hospital hi engtik kuma din nge a nih kha'h? " phur angreng tak hian a ti leh zung zung a. 

"Kum 2013-ah khan din a nia, an din hun a la rei loh ngaihtuah chuan dam lo ngah pawl tak chu an ni ang" a lo ti a. He Hospital hi Pu Ramluaha, Zarkawta khawsa thin, a boral hnua a faten a hming chawia an din, RL Hospital tia an din a ni a. A fapa upa ber dawttu Pu Chawimawia kut a ni deuh bik bawk. Amah Pu Chawimawia chu Khatlaah a khawsa thung a, he hospital hi sawi tawh angin a changtlungin a thianghlim a, thawktu te an polite in thiamna lamah pawh sang tak tak vek an ni. Bill pawh a to ve deuh bawk a, mi hausa deuhten an pan ngun ber pawl a niawm e. Surgion thiam leh lar em em Dr. Famkima chenchilh a ni bawk nen.. 

"A nih thawktu te hi i hre deuh vek em? Sweeper atanga a sang ber thlengin" a ti a. Ka lo ner deuh. Hriat a har ve ka ring. 

"Kei hi an din atanga kum 1-na vela lut ka nia, hriat chu ka hre thei maithei. Doctor hi part time-a rawn thawk 5 an awm a. A nghet hi 6 kan ni thung. Nurse hi an vaiin 15 an niin ka hria. Sweeper pahnih, Cook pahnih.. " Doctor Hriatpuia chuan a ti a. 

Amanda chuan a chhinchhiah niin ka hria. 

"Engpawhnise, hnathawk ho zawng zawng hi kawm chian vek ka duh khawp mai. Tin, Pu Chawimawia pawh la biak a tha ang. A nih thil pakhat, Private Hospital dang nen buaina eng emaw nei tawh awmin i hria em! " a ti leh a. 

A chal a chuar nâng a. "Umm.. Aw.. Nikum kumtir lam khan Pu Famkima hi sawmi El Ar Hospital nen sawn an inchuh that that tawh a, mahse, Pu Famkima pa te leh Pu Ramluaha te kha thiantha tak, sumdawnna te pawh lo khawih dun thin an nia; Pu Famkima khan he lam hi a hawi ta zawk a ni" a ti ta a. Amanda a bu nghat nghat. 

"Chuan, ka rawn luh hma leh luh hnua rinhlelhawm deuha i ngaih mitthi ho list kha ka duh aw.. An address nen.. I theih chuan" a ti a. Hriatpuia pawh chuan, "Ka lo ti ang e" a ti a. A felin a polite khawp mai. 

Tun lawka boral ta kha Pu Zamvela niin, an nu kha Pi Hriatrengi a ni. Vaivakawna khawsa an ni a, an awmthei pangngai. Pu Zamvela hi a sugar leh BP lam vangin in lamah rei fe an inenkawl tawh a, tun hnaiah a zual deuh vangin he laiah an rawn inenkawl a lo nia. Nasa lutuk chu a ni lo. 

A tuk chanchin thar chuan beng a verh ta viau mai. Pi Hriatrengi khan report chu a thehlut ta lo naa, Tu te emaw zeldin thubawl vang nge RL hospital chuan sawi a kai phah ta tho mai. "Zan tin thi an awm ziah. A tlangpuiin cabin luahtu te an ni tlangpui.. " tih te, "RL hospitalah damna doctor ni lovin thihna doctor an inlar ta em ni? " tih te leh dengkhawng tak tak te an ni. Amanda pawn a chhiar ve vek. Engmah a sawi lo. An chanchin than vang chu ni maw, Cabin pathum chu a ruak nghal hmiah. Ward pangngaia awm, tlema ziaawm lam pan deuhte pawh Doctor remti vak lo chung chung an chhuak lui ta nual. Thawktute tan chuan a hrehawm ve khawp ang le. Damdawiin changtlung leh lar ber pawl, mi te fak em em a lo ni tawh thin si a. Thih hi zawng kan lo hreh tlang a ni e. 

Cabin hi 10 lai a awm a. Tunah hian Amanda tih loh mi pahnih chiahin an luah tawh a ni. Anni pawh an ţi ru viauin a rinawm. Chawhnu lamah Amanda min kohna angin ka va phei a. Pu Chawimawia a lo thu khar mai. A mangang tih loh rual a ni lo. A mitmen dan atang reng khan.. Thukhuh pawh awm lem loin, "He buaina hi min chinfelsak la ka duh a ni" a ti nghal tâwng mai. 

"Aw le, hahdam phawt teh. Tui kha in la.. " tiin tui bottle a pe a. 

"Thil ka zawt dawn che a, thudik tak zelin min chhang dawn nia. I pa khan Hospital hi din turin thu a chah che u nge, eng rilru pua din nge in nih le? " a ti ta a. 

Pu Chawimawia chu thil hlui tak ngaihtuah ang maiin a chal a chuar nâng a, "ka pa khan kan unau mipa pathum zinga pakhat tal kha Doctor ni turin min duh em em thin a. Mahse, kan tihhlawhtlinsak thei ta si lo, a thih dawn khan thei leh thei lovin, "Doctor ni tura ka duhna che u in puitlin thei tawh lo va, Thlamuang taka ka kalsan theih nan che u thil pakhat min tihsak ang che u. In unau hian Pathian khawngaihna azarah hna lian leh nghet tak tak in chelh vek a, sumdawnna lama kalte pawh in hlawk bawk. Mi dang tan in luan chhuah a ngai a ni. Malsawmna pawh in dawng zawk ang, chuvangin Damdawiin pathumah tal donation tha ve tawk tak in hlan tur a ni. Mi te damna tura in hming chher hi ka duhthusam a ni" a ti a. Kha khan ka thinlung a khawih em em a. 

Kan unau hi panga kan ni a. Mipa pathum leh hmeichhia pahnih. Mipa pathum te hian Pathian zarah hna nghet kan nei vek a, eizawnna tha tak kan nei tihna a nih chu. Kan farnu upa zawk chuan sumdawnna a kalpui thung a, a hlawk ve viau. Kan te ber erawh vanduaithlak takin ka pa boral hnu lawk khan a boral ta a. Tichuan, Ka pa a han boral a, unau kan inrawn khawm a. Hospital-a donation pek ai chuan tiin kan sum thehkhawm atanga bultan vein Hospital changtlung tak, ka pa hming chawi ngeia din kan titlu ta a. Kei hi a upa ber dawttu mah ni ila ka unaute aia ka sum laklawh a nat deuh vangin a fawng vuantu ka ni ta a. Tikhan kan din ve ta rãwih a. Mi thahnemngai leh ka pa thian hluite fel tak tak avangin hetiang dinhmun pawh hi kan thleng thei ka ti mai ang. A hlawkna ngawr ngawr ai chuan, Ka pa duhthusam kan tihlawhtling nia ka hriatna hian min tilawm zawk a ni" a ti ta mawlh mawlh a. 

"Tunah inpui tu in nge luah? " Amanda chuan a ti a. 

"Kan te ber dawttuin a luah.. Kan farnu hi tunah chuan phai lamah a inbengbel ve rih a, keini ho zawng chu Aizawlah kan la awm vek e" a ti a. 

"Aw le.. A lawmawm e. A nih El Ar Hospital nen in buaina kha min han hrilh teh" a ti leh a. 

"Buaina a tling meuh pawn ka hre lo. Kan thu a inhmu lo satliah mai a ni. Thianpa Famkima kha keini lamin kan mamawh si a, El Ar lam khan an lo be ve bawk nen, kan inchuh a ni ta deuh ber a. Mahse, amah khan thutlukna a siam ta thliam a. El Ar lam pawn engmah an rawn sawi nawi tawh lem lo" a ti a. 

"Aw le, engpawh nise, theihtawp kan chhuah ang a. Thil pakhat hnathawka chhawr thar deuh, tun hnaia thawk thar an awm em? " Amanda chuan a ti a. 

A ngaihtuah vang vang hnuah, "Aw.. Nurse pathum leh Part time-a thawk tur Doctor pakhat chu kan la e.. Thla hnih a liam tawh" a ti a. Amanda chuan a chhinchhiah nghal. 

Pu Chawimawia chhuah hnuah, "Sam, zanin chu i riah leh a ngai aw.. Risk kan la ang" a ti sap a. 

"I thu vek alawm boss" ka tih chuan min melh hrâwk. Ka lo nui ringawt. 

Zan dar 9 velah chuan Amanda khumah rizaia inkhuhin dam li pakhat chu a mu hlun tawh. Ka nuih te lam a za. Amanda erawh cabin no 07-ah a riak dawn thung. Cabin no. 04-ah erawh constable pakhat chu riahpuitu angin a riak dawn thung a ni. Kei erawh Amanda rooma riak vengtu tur ka ni. Sana chu kal muang hi kan ti khawp a. Ka damlo ven lah chu a muhil burh burh roh lehnghal, Amanda tal chu nise a nuam deuh tur. 

"I muhil tawh em? " tiin ka va text a. 

"Aih.. Ka muhil lo ang" a rawn ti. Biak reng ka inthlahrung ve deuh a, movie a en duh thin bawk nen. Games te ka han khel leh rih a; rei tawk fang hnuah ka mut a rawn chhuak ve ta chiai chiai a. Phone chu dahin ka inlukhup thawk. Ka harh eih lo. Zingah nizan lamah engmah a thlen loh thu ka hre ta bawk. 

Amanda bulah, "Kan chang tih a hria a ni ngei ang. A rawn lan loh danah" ka ti a. 

"Maithei. Mahse, duhtawk a ngah pawh a ni thei. A chhan chu Hospital hi an khar maithei.. " a ti sap a. 

"Engvang ringawt chuan" ka lo ti hú a. 

"Complain a nasa lutuk a, sawrkar a inrawlh lo thei lo a ni. " a lo ti mai a. Mi an thih zawn deuh vanga complain lo neih vak pawh chu aw.. Pu Chawia te an khawngaihthlak viau mai. 

Amanda pawh a tha tawh miau si a, a chhuak ta phawt. In lam atangin hnuchhui hna chu a thawk tawh mai ang chu.. Bakah ka hlauhthawnpui ve deuh hrim hrim bawk. Amanda chhuah zanah ruang dang bawk a chhuak leh ta.. Zingah ka hre chiah thung. Mahse, Hospital lamin an ngen nasat em vangin an titlangthang ta vak lo va. Police te pawh kan inrawlh tih pholan kher kan duh lo. A ruk deuha kalpui a ngai ve tlat a tin ni. Ruang chu Amanda cabina ka ven dam lo ngei mai kha a lo ni! Pu Lianmawia niin, Kum 45 chauh a la ni. Fa naupangte te pahnih a nei a, an nu pawh a la naupang ve khawp mai. A lainatawm ngei mai. A ruang chu an nu remtihna leh Police hriatpui nain postmortem a ni dawn ta a. Chutiang tehnuai a nih avang chuan Hospital hming chuan sawi rik a kai leh lo thei ta lo. Postmortem result nghah chhungin Amanda chuan Hospitala thawkte chu a kawm kual ta a. A bikin thawk thar deuhte chu a kawm chîk deuh,Nurse pathum zinga pakhat chu hmeltha deuh kha a ni. 

Doctor te erawh part time-a thawk an nih avangin eng em em sawi tur an hre lem lo. Nurse te erawh kawm ngun an ngaiin a lang. 

Hmelthai kha Ruatdiki a nia,. A tawngkam a felfaiin a polite khawp mai. 

Aizawl Dinthar venga cheng niin, chhungkaw pangngai tak an ni. A duty zanah pawh thi an awm tho rualin, a duty loh zanah pawh thi an awm tho. Nurse pakhat leh chu Zosangpuii niin cher lam, ti deuh kher khawr a ni a, a ha a kuh lek lek bawk. Ani pawh Ruatdiki ang tho a ni. A duty loh zanin ruang a chhuak tam zawk lehnghal. A tawp ber ami hi Jennifer Lalrinhlui a ni a, a la naupang tih a hriat, tleirawltê ni mai awma mawi ani. A duhawm riau bawk. Ani hi chu a duty loh chhung vekin ruang a chhuak thung. A chhan pawh kar hmasa lamah chawlh a la a, Shillong lamah bialpa a neih avangin a bialpa nen an 2nd Anniversary an zu hmang dun a ni. A rawn let leh khan chhun lamah a duty ta char char bawk si a, ani chu rinhlelhawm a ni ta lo phawt. Amanda chuan doctor hrang hrangte nun leh chanchin chu a rukin a chhui kal reng a, mi pangngai leh chhungkaw pangngai tak tak vek an ni. 

Postmortem result pawh kan hre thei ta a. Damdawi chak tak, Damlo thi mai tawh tur, na tawrhtir reng aia an chhungte phalna hmanga an jectionna thin, 'phynetoin ' chu a kawchhungah hmuh a ni. Chu chuan a rawn tifiah ta uar mai. Khang mi dang thi te pawh kha he damdawi hmanga chiu hlum vek hi an nih a rinawm ta a ni. An storage nghaktu kan va biak chuan, Phynetoin an kawl loh thu leh damdawi dang a anpui zawk an kawl thu a lo sawi si. Damdawi bo te a awm thin em tih zawhna chu, confi takin a awm ngai loh thu leh a record fel thlap zel thu a sawi bawk. Pa inchengvawng tak zawng a ni ngei ang. A landanah pawh a chimlim hmel viau. 

"El Ar Hospital lam i pan phawt teh ang" Amanda chuan a ti a. A ngaihtuahna chu ka hrethiam ve ruak. Ni e, El Ar Hospital pawh hi thawkkhat lai khan mi pan nasat ber pawl a ni tawh thin a. Mahse, RL hian a rawn luahlan chho ti mai ang, Doctor an inkawl that hleih tlat mai a. Damna rún mah nise, mimal ta a nih chuan sumdawnna a tel ve si a, hlawkna a tlakhniam takah chuan an elpui ber RL chungah kut an va thlak ve thei tlat a ni. 

An supirentendant kan va hmu nghal a. Pa zahawm deuh mai, biak nuam tak a lo nia. Pu Chhandama a ni. RL hospital chunga thil thleng chu pawi a tih thu leh mak a tih thu te a sawi ve luam a. An ni nen an inkarah buaina a awm tawh loh thu te, Doctor inţawm te pawh an neih hial thu te thlenga a sawi vang nge Amanda chuan a ringhlel ta lo riau. Kan let leh hma viau. RL -ah bawk kan kir leh a. Cctv footage atangin bul kan tan leh ta phawt. A hma khan Dr Hriatpuia khan Cabin pan chhohna bula an dah chu a chhiat thu a lo sawi tawh a. Tuna kan hmuh theih chu ward leh corridor vel chauh chu a ni mai e. Mahse, Amanda chuan a en chîk ngang mai. 

"Pause lawk" a ti sap a. Picture chu a zoom nghal bawk. Nu sang lam, inchei dik thlup, sam thlah hi a ni a. Cabin pan chhohna bul stepah chuan dingin a hawi kual a, tumah chuan an ngaihven hran lo niin a lang. Chu chu Pu Zamvela thih ni chhun kha a ni. Cabin lam panin a chho a, a hmuh theih ta loh. 

"He lai cctv pawh hi tihchhiat a nih dawn hi" a ti a. Tuman kan chhang lo. 

Sweeper thlengin a bia a, gatekeeper kan biak erawh chuan, nuih a za lek lek zawk. Tlangval ti ila pathlawi a ni maithei. Pa te lam, tawng zawnga mit khap zek zek ang kha a ni a. Amandain a han biak chuan, "Ka pi, ih maw.. Ramhuai a nih hi.. Ramhuai.. Ka hria alawm. Pute bulah pawh sawi a, an awih duh lo alawm. Saw laiah sawn ka mu thin a. Mitthi an awm zan apiang khan zan tir atangin ka mut a chhuak em em zel a. A chang phei chuan ka inbual harh thin. Chuan, dar 9-ah gate hi ka kalh thlap zel a. Chabi pawh ka kawrhma ipteah ka ak thin. Mahse, zan li chu thawm ka hre tawh. Tap ri a nia, ka pi, a chang leh a nui a. Hmeichhia a ni. Ka hlau ve tho thin sia, zan khat phei chu Canteen-ah ka riak tawp alawm. A tukah gate pawh hi a la inkalh thlap zel. Kha ramhuainu ngei khan khang mitthi te kha a that a ni" a ti nuah nuah a. Amanda chuan a ngaihven ka rin loh nen, a ngaihven phian. 

"Chabi hi vawi khat tal i tibo tawh em? " a tih chuan a ngawi vung vung a. 

"Umm.. Aa.. Pute hrilh miah suh, kar hmasa daih tawh khan ka thianpain Amawii a show a, ka kai lutuk khan ka thlauh palh a. Zin

g dar 2 thleng ka zawng alawm.. Mahse, bawlhhlawh bawm bulah a lo awm hlauh a.. " a ti ta a. Amanda mitmeng chu a phur leh ta sar mai. 

Hospital chu khar a la ni êm lo va, police in an veng ta rih. An ven zan chuan engmah a thleng ta lo. A tukah Pu Chawimawia te kan va tlawh a. An lo ngui nghiai mai. 

Sawi tur em em pawh kan hre bik lo. Amanda tak pawn. Kan va hnem a ni deuh ber mai. Kan chhuak leh vat a, mahse, Pu Ramluaha inpui lam kan pan leh nghal. An inah kan lut mai dawn emaw tih laiin an kawmchhaka dawr lian vak loah kan lut ta a. 

"Pu Ramluaha te hospital lah chu a hmingchhe ta si a, a pawi e.. Hna dil ve ka tum lai takin" tia bultanin dawr nghaktu nu chu a chhimbudawi kual a. 

"Ni ngawt mai. Ka khawngaih teh asin. A mak em mai. Ngati nge niang le? " a lo ti ve hliai a. 

"Hmanni hna vel ka va ngaihven khan saw thawk pakhat sawn ramhuai vel a nih a rin thu te kha a sawi zauh a. Mihring thiltih a nih chuan a rapthlak ngawt ang" Amanda chuan a ti leh a. 

"Aa.. Awihawm loh ee.. Saw chen a ding tawh a, ramhuai an sawi ngai lo.. Mihring tih a ni ngei ang, an doctor zingah sawn a nih ka ring" a lo ti hlak hlak a. 

"Mahse, maw ka pi, Pu Ramluaha fanu naupangber kha a thih lai vel khan an sawi hrâng riau an tia sin" Amanda chuan a ti ta a. Pitari a phâwk hra a. Mahse, a inthup leh vat. 

"Nia, Saroni kha chu a uihawm ngawt mai. A ruang lah kha hlawm tlak pawh a ni mang si lo va, a nu leh pate bula han phum ve te pawh a that nen, kan inngaina viau asin le" a ti nuah nuah a. Ka hriat ngai loh ka hre ta phawt. Saroni chu hetah phum a ni lo. 

"Ka hrechiang chak, an sawi dan a inang lo nuai a, thenkhat chuan amah leh amah a intihlum te an tia, thenkhat lahin mi sual kut a tuar an ti bawk a" Amanda chuan a ti leh khauh. 

"Aa.. Sawi dan a tam alawm. Mahse, Saroni kha ka chiang, amah chu a intihlum lul lo vang. Khatia a pa thih hnu lawkah khan Shillongah a u ten lehkha zir turin an dah kha a nia. Chawia te sawi hmangin bazar tura a chhuak kha a haw ta lo va, an han ngaichang deuh a, mahse, a reh ta tlawk tlawk si a, Police an pun ta a. Lui kamah a ruang chu an hmu ta a niawm e. A lo chhe hman viau tawh bawk" a ti ta a. Saroni chu hre ngai lo mah ila ka lo lainat ve kher mai. 

A tukah ka tel lo vin Amanda a chhuak ta vang vang mai. Kei erawh ka leh awl phian. Eng tak va ti ang maw? A tawp kan hnaih tawh hram ka beisei. Zanah min rawn call a, ka va phei. Coffee kan in dun a, "Naktukah kan tifel theiin ka ring. Ka rin aiin a lo khirh lo va" a ti puat a. 

"A tu chu nge ni ta" ka lo ti vat. 

"Ele! Ramhuai" a tih chuan ka ner khum sawk. A nui hak hak a, "I rin loh ber pawh a ni maithei. Mahse, i dem thiang ngawt lo. Mihring thinlung hi huatnaa a khaha phuba lak duhna rilru nen a tan kawp tawh chuan, dang zo tur khawpa chak chu hmangaihna chiah a ni. Hmangaihna tel lo chuan huatna leh phuba lak duhna chuan thihna a thlentir ta thin a ni" a ti chang rât a. A mitmeng chu ka sawi thiam lo. 

A tukah Pu Chawimawia te leh a unaute bakah Doctor thenkhat te chu Pu Ramluaha inah kan thu ta ţhap mai. A ngaihna hre lo zeta kan hawi vung vung lai chuan, kawngka an rawn kik a, Amanda chuan a va hawng ta vat. Cctv footage-a ka hmuh nu niawm tak leh Jenniferi nurse kha, khami te kha an rawn lut ta zan zan mai. 

"Pu Chawi, hemi te pahnih hi a ni. In Hospitala thihna thlentir tu te chu" Amanda chuan a ti fak a. Makti hmel an pu vek bawk. Mahse, tumah an tawng hmain Amanda bawk chuan, "Mahse, chhan neia ti an ni. Ka sawi ang a, in lo ngaithla phawt tur a ni. Hei hi han en vang vang teh, a mit tlangkawm leh a khabe ruh kual dan atang hian tu nge a nih i la hre thei em? " tiin Nu zawk chu a kawk a. Pu Chawimawia te unau chuan an melh ngar ngar ringawt. Amanda a nui hak a. 

. "In unaunu, in te ber Saroni kha a nih hi.. Khatin phu uih duh chuang suh u. Chuan, Hei hi Saroni fanu Jenniferi a ni bawk" a ti nghet charh a. Pu Chawimawia te unau chu hmuh theih khawpin an danglam. An sen ţawlh ţawlh mai. Mi dang erawh chuan Amanda kan ngaichang a. 

"I pa khan a ro kha inzat vekin in unau kha a sem che u a, a tam tham a, i pa hausakzia chu keini aiin in hre zawk ang a. Mahse, i pa thih atanga rei vak loah in chhungkaw Driver khasi Alexandera leh Saroni chu an inngaizawng tih in hre chhuak ta a. Hnam dang a kawp chu in thinrim ta em em a, chuta chhapah Saroni chuan nau thla hnih mi a lo pai tawh lehnghal vei nen. Chhungkaw zahawm tak in ni si a, hnam dang laka intihbawrhban kha in duh lo hulhual ang tih a chiang. Tichuan, Saroni leh Alexa chu Shillongah in zuk dah a, thisena in inzawmna nghet tak chu in pawtchat ta bawk a. In farnu chu tuithlarin a ro chanai zawng zawng pawh in insem ta anih kha. Mahse, nakinah Saroni a rawn let leh in hlauh avangin tualthattu ruaiin a nunna lak in tum leh a. Mahse, kha in mi rawih khan Saroni chu a lainat ta tlat a. A chungah kut a lek thei ta lo a ni. Mitthi dahna ami ruang ru chhuakin Saroni angin an cheibawl a, tichuan, nangni chuan in farnu chu thi tawh angah in ngai ta a nih kha.. 

Mahse, kan Saroni hi a la dam ve reng a, Fanu duhawm tak neiin a thinlunga huatna chu a fanu thisenah pawh a zam tel ve ta tlat. Alexa'n accident vangin a boralsan ta si a, an nufain rethei taka nun bul tanin khawvel an hmachhawn ve a. Saroni a la thalai a, hmeichhe nalh takh a ni bawk. A fanu hrawkchawm nan leh a duhthusam tihpuitlin nan a taksa hial a zuar ta a. A class a sang a, a rate pawh a to khawp mai. Sum lamah buaina a nei lo chho ta a, a duh ang zelin a fanu chu nurse training tirin, a chhungte ngeiin a chunga an thiltihte chu a hrilh keuh keuh thin. Jrnniferi thinlung chu huatna leh khakna hlirin a khat ta ta a ni. Nurse a zir zawh veleh Mizoramah rawn chuang chhuakin in hospital chu a rawn target ta chat a. Tichuan, an nufa duhthusam tihlawhtling turin a hna a thawk chho tan ta a nih kha.. ate keeper ei turah damdawi an phul ziah avangin a mutui thin a. Chabi spare hmanga lut ruin, Cabin lama awm te, zun zunga an chhuah zawk hlanin a lut ru zauh a, khawiah emaw biruin, an mutthilh tui lai takin chet a la ta thin a ni. In hospital hi tlu chhia se an duh vang a ni ber. In nunna êm an chhat lo hi lawm tur in ni. Mahse, pawisawilo nunna an lak avangin dan hmanga hrem an ni tho ang. " a ti nghet charh charh a. Boruak chu a reh tlawk tlawk mai. 

An nufaa kutkawl buntir an nih lai chuan, Saroni chuan, "Kei hi ka thi a nih pawhin ka fanu hi chuan ka chanai kha a nei ngei tur a ni ang" a ti hriam hraih a. Tuman an chhang lo.

Saroni nufa chauh hrem an ni lo va, an farnu chunga an chet lak dan avangin Pu Chawimawia te leh a unau te chuan hremna an hmuh mai bakah Saroni te nufa duhthusam ang ngeiin An Hospital pawh khar a ni ta bawk a ni. 

"Ruatdiki kha va rim la" motor khalh chungin a ti sar sar a. 

"I thik ve tak tak mi? " ka lo ti hú! A khi sak a. Chiang zeta min rawn melh chungin, "Ka lakah game khelh i tum anih ngai chuan tum buai duh suh. I boss hi bum chi rual ka ni ve lo e" a ti zawi sap a. A sawi awmzia ka ngaihtuah chhungin a in kan thleng…