Thutiam 4

l. THUTIAM… (4)

Ziaktu: Toni Râlte

(Adds hi min click sak ngai lo ni maw 😢 in va sual ve.. 

Lawmsanga chuan, "I duhzawng a zawt che a nih chu" a ti a. Nguri a inthing nawk nawk a, "Aa.. Aih engmah ka duh lo" a ti nawk nawk a. 

Bawihtea pawh chu a lai ve deuh nge a pa melh ralh ralh chungin a nui deuh lek lek a. Lawmsanga chuan dawrah a duhzawng chu a va lamsak a. A rawn let rualin an kal lehnghal. Nguri te hostel lam panin an tlan a, tumah an tawng tawh lo. An boruak chu a eng emaw ti nawm loh.. Sawi thiam a har. An lai dun lutuk chu a ni maithei ni. Hostel an thleng a, Nguri chu a chhuk nghal a. A ding ve det a, "Ka lawm e aw" a ti sap a. Thúk zeta rawn melhtu Lawmsanga chuan zawi sup hian, "Zanah ka lo bia ang che" a ti a. Nguri pawh a bu nghat. An tlan zui nghal a. 

Becky pawh nimin lam ai ngawt ai chuan, hmuh a nuam ta deuh e. Nuih erawh a la nui hleithei lo. Time pass nan movie a en tluk tluk ringawt mai a ni. Mahse, tah leh ringawt ai chuan chu chu a tha zawk tho mai. Zanriah pawh Nguri'n a tilui nasa bawk a. A ei ve hram. Zanah Nguri roomah inbe lem lovin phone an khal ve ve a. Nguri chuan Lawmsanga vel chu hrilh a chak ve viau naa, engmah a la thleng chuang si lo va, Mapuia thianpa a ni bawk si. A zak leh deuh a, a ngawi ta rih. Dar 8 pelh hretah Lawmsanga chuan a rawn call ta chiah a. Balcony-ah chhuakin a va bia a. 

"Arsi i thlir ve em? " Lawmsanga zawk chuan a rawn ti a. 

"Umm.. An tam tiraw? " a lo ti ve mai a. 

"Chhim thlang lama arsi lian bik riau khi i hmu em? En ve teh" a rawn ti a. Nguri a hawihai. 

"Engtia chhim thlang.. Khawi lam nge chhim lam khah? " a ti hú a. Lawmsanga a rawn nui huk, "Ngurnunsang, kha chen nula tawh siin chhim lam i hre lo maw? " a rawn ti a. 

Nguri pawh a nuih a za ve hle, hre miau hek lo le. An inbiak dan chu a zangkhai ta viau mai. Mapuia chungchang an sawi miah lo va, an pahnih inkar pawh an sawi hek lo. Hnahthiala Lawmsanga zin tuma thil thleng te, a chet chhiatna te a sawi a. Nguri pawh a nui ve kar kar mai. Lawmsanga thusawi ngaihthlak chu nuam a ti a, a fiamthu sawite chuan a nuih a tiza bik. Darkar khat dawn an inbia! Becky rawn zung turin, "Em em a na.. Tu nge i biak em em le? " a rawn tih chuan an inbiak reizia an hrechhuak chiah. Lawmsanga pawh chuan, "Pawnah i ding rei tawh sia, i ke a kham vek ang. Bakah i hritlang ang.. Ka dah ang. Whatsapah intext ang aw.. " tiin a dah ta a. Inngaizawng nisi lo, inthlahlel tawn si hringnun hi a nuam a, a famkim si lo. Chu hun leh boruak chuan Lawmsanga leh Nguri nun chu a ţham kual a, hlim em em viau mah se, an inkara mi pakhat hming an hriatchhuah apiangin an ngui leh zel si. Lawmsanga lahin bem tawpa a hmeichhia ni tura nemngheh chawt chu a ngam chiah bik si lo, mipa a nihna ang chuan a ngam tehmeuh mai. Mahse, a thiantha ber hian a ke pen a tibahlah ve tlat si a ni. Pawi a ti.. 

Becky phone khawih mawlh mawlh chu a rawn thu hlawl a, "Awii He zawng Rempuii han zah loh dan hi.. Min luahlan tawh a hnu ngawih zui ve mai awm. Min la tâwng reng anih chu.. A va zak lo tak" a ti hlaih hlaih a. Nguri pawh chuan, "Engtin nge a rawn tih a? " a ti ve vat a. 

"Groupah kan awm ho vek sia, 'Duh loh leh paih tawh hnu hi chu awm ve reng lo mah se a pawi lo sin' te a rawn ti.. Keimah min sawina a ni tih hre lo tur khawpin ka mawl lo. Jeneti cheng chawng lah hian a lo support vat zel a" a ti bawrh bawrh a. A thinrimthlak ve bawk a ni. 

"A va tiang lo ve.. A pangngai viau maw ka tia" Nguri chuan a ti a. 

"Engtinmah ka ti ngai lo, groupah phei chuan kan inthen atangin ka la tawng lo hrim hrim.. Min tâwng duh tho.. Min thîk aniang" Becky chuan a ti hlak hlak a. 

"Khawi teh, ka lo type lawk. Tihlet ve tur.. Ngawihsan tawp chuan min zuam" tih leh Becky phone chu laksak a rual a. Groupah chuan a lut nghal a. 

"Ţhiante bialpa chhuhsaka zak map lo va la hawi valh valh thei te zah loh theihna hi ka awt thin. Kei mi zakzum hian" tih thu hi type-in a post ve hmiah. Becky chuan khatiang kha thiam ve hek lo. 

Rempuii chuan a seen rang bawk a, a rawn comment rang kher mai. 

"Chhuhsak tlak te hi an awm ve ania" a rawn ti a. 

"Chhuhsak leh rukbo theih mipa an lo duh ve em em te hi chu aw.. Pathian hnenah lawmthu ka sawi thin" Nguri bawk chuan a ti ve leh sak. Tpa pawn a seen ve reng. Mi pangngai anih chuan zak tur a ni. Nguri tawngkam chu a na salh salh si a. 

An groupa puipa deuh ber, fing fel tak Papuia chuan, "Duhtawk r'u.. In fiamthu a sang leh lutuk a, kan phak lo.. " tiin topic dang a rawn sawi ta daih a. Midang ho in an lo zawm ve liai liai bawk a. Rempuii pawh chu a rawn lawr ta bik lo. 

"Hetianga hnehsawh zeta a tih leh che chuan min hrilh zel tawh rawh. Ngawi teh, groupah khan min lo add ve rawh" Nguri chuan a ti ta a. Becky lahin ihe lovin a add nghal hmak. 

"Hrereng rawh. Thenkhat chuan mi diriamna te hi ngawihsanin an tuar tlawk tlawk a, chhan let chu mi mawlzia leh tlawmnaah an ngai a. An intihrehawm mai mai. Chhan let i chak chuan chhang let rawh. An zah rawih rawihna tur khawpin chhan zel tur.. Kan diknaah chuan tumah hlauh a tul lo. Luahlan i nih vang khan dik lohna i nei lo, a bul chu Tpa a ni. Rukbo theih tur mipa a lo ni a! A tenawm a ni. Nang pawhin i haw thei tur a ni. Hrethiam em? " tiin Becky chu a fuih piap piap a. Becky pawh a bu ve nghat nghat mai. 

Chutia an infuih lai tak chuan Mapuia'n a rawn call a, a khawngaih ve deuh nge a mood that vang zawk.. A pick up sak ve hram. 

"Mu tawh mi? " a rawn ti a. 

"Mu deuh chiah" a ti ve mai a. 

"Ka text i reply duh si lo va. Ka lo call tawp che" ati a. Tlemin a khawngaih ve deuh. 

"Nia, kan lo titi tui lutuk a" a ti ve mai a. 

"I ngaihawm" a rawn ti ngei. 

Chhan ngaihna a hre ta lo.. 

"Aha.. I ho em mai a" a ti ta ngawt a. 

Eng eng emaw chu an sawi ve nasa. Lawmsanga a biak dan nen erawh danglam tak a ni. A nui ve te chu a fake ngawih ngawih. A tawp lamah a ning ta deuh a, "An muhil vek tawh sia, ka mu ve tawh mai dawn" a ti ta ringawt a. Mapuia pawh chuan a rawn mang tha ve nghal a. 

"Nu, naktuk atang chuan service ka duh tawh. Ka hne ania ina awm hi" Lawmsanga chuan a ti nuah nuah a. A pa zawk chuan, "I la dam chiang si lo va" a ti nghut a. 

"Ka tha tawh reng, motor chu ka khalh thei alawm.. Ina awm reng chu a ninawm" a ti ve mai a. 

A nu pawh chuan, "I pa thu thu ni mai.. Lehlamah hawiharh te pawh a tha ve reng reng. Va thawkrim em em lo pawn" a lo ti ve luam a. A dik a dik chuan ina tawm chawt chawt chu a tan tak pawh a tha lo ve bawk a. Inngaihtuah ngut ngut a ching bawk si, han tei harhin thiante han kawm tam ve leh se a boruak te pawh a zia mahna. 

"Banah min lo nghak teh aw.. Ngur, a pawimawh lutuk" Joela msg chu a chhiar nawn sek a. A ner nâng bawk. A pawimawh hmel angreng sia, eng lam tak ni ang maw? A rilru a buai riau. Amah Joela a ngaihpawimawh lam aiin a thusawi tur chu a ngaihpawimawh zawk vangin lo nghah mai chu a tum ta a. Joela hi a unblock tawh a, a rawn tibuai ngai tawh lo naa, tunah tihian a rawn be ta si a. Hlauhthawn riauna a nei bawk. Class an bang a, Becky bulah, "Library kal ka ngai sia.. Min lo han hawnsan rih mai rawh" a ti a. A lo awih ve mai. College piaha thingpui dawrah chuan thuin Joela chu a nghak ta ran a. An haw rem titih tawh tihin, "Lo kal rawh le" a rawn ti ta a. A chhuak zui ve nghal. 

Joela carah chuan hmanhmawh zetin a lut a. A rawn melh reng chu a en duh lo lui tlat. Hmalam a melh ran a. College veng lamah tlanin PUC lamah an tlan a. Kawng zau laiah dingin an ngawih dun vang vang hnuah, "Kan video kha i hmuh duh ka ring a" Joela chuan a ti ta a. Nguri a nghing dawt. Ni e, Ţam dila an kal ţumin an rui dun ve deuh bawk nen, "Cover ve ang" Joela'n a tih tlat vangin ani rui phur tawh si, Joela zúnzama tâng laklawh tawh si khan a lo remti ve ta mai a. An cover a nih kha. Nguri phei chuan a en ngam lo hrim hrim. Joela chuan a delete ve mai turah a lo ngai kha a nia. A lo la kawl reng tihna a nih chu.. 

"I delete tawh emaw ka tia"Hmalam melh ngar chung chuan a ti a. 

"Engtin nge ka delete phal ang? Hei hi i hre lo, bansan hlen che hi ka tum reng reng hleinem. Ka ta i la ni reng. " Joela awki chu a sang hret. 

"I ta ka ni lo" a ti nghet charh a. 

"I ni dawn tho tho.. Kha en rawh" tih leh phone rawn theh phei a rual a. 

Nguri chuan a en duh lo lui tlat!  

" I tithei lo vang" a ti tham ţiak a. 

Nui huk chungin, "K thei. He video hi a darh i duh loh chuan lo let leh rawh" a lo ti a. Rawn kuah a tum chu a tawlhsawn vat. 

"Tenawmpa" a ti tuar a. 

"Tenawmnu, i tenawm ve tho.. Mi pasal ngaizawngin i taksa i hlan a, nula thianghlim anga awm tum leh vel suh. Engmah i ni lo.. Engmah" a duhthawh kher mai. 

Nguri chuan a heh pet fan fan chungin, "Aw le.. A tha e.. Tihian ti ang. I duh ka pe che ang a. Mahse, video kha i delete tur a ni" a ti ta a. Joela a khi sung mai. 

"I fing thiam ta maw? A tha e..ka duh anga i awm anih chuan ka delete hmak ang. Mahse, thu i awih tur a ni" a ti chhum hmak a. 

"Aw le.. Tunah chuan haw ka duh. Khawngaihin" a lo ti a. Joela pawh chuan a hrethiam ve nge a letpui ta nghal a. Kal kawngah vawikhatmah an inbe chhunzawm tawh lo. Chutiang mipa tenawm a lo tawng chu pawi a ti ngawih ngawih.. A tihsual rah chuan a umzui zel chu a ni si a. Zu leh sex a lo palzam lutukna rah chu a rapthlak ta kher mai. Hmeichhe vanduai an tihte zinga rinluh a ni ve ta chu a nia. Zu kha in lo se chuan khatiang khan ngaihsam takin a awm lo mai tur.. A pawi a ni. Zu hi sual a ni lo tia ţanchhan nei tam tak te aiin zu in pawi a khawih theihzia hrechiang bertu a ni ta. A tah a chhuak a, a tap leh thei lo. Eng nge a tih ang tih chu a inbual laiin a ngaihtuah char char.. Joela kuta inpumpek chu a tum lo bur. Mahse, mualpho erawh a hlau tho si. Police a hrilh mai dawn nge. Hrilh ta se Joela an ko ang a, a video te kha a darh phah zawk ang em? Hmingchhe tingtangin an inchhuah mai ang em? A buai nuai nuai mai. A zahawmna a humhim zawh loh vanga mualphona chu huaisen takin a hmachhawn thei dawn lo tih a hre si.. A tawngtai ngam der bawk si lo. 

Zanriah an ei khama Lawmsanga msg a hmuh rualin a buaina, a phurrit te chu kiang duak hian a hre ta a. Mak a ti amah pawn. Lawmsanga hi chuan engkim a hre sa vek a, khami zana Joela nen an riah dun te, mi pasal a ni tih te pawh a hre vek. A bulah hian sawi se kawng a sah kuaksak thei ang em le? A lo hmusitin a lo ten viau ang em? Mahse, tun dinhmunah chuan a mi rin ber a ni rih tlat si. A rin aiin Lawmsanga hi a lo ngaisang a, a chinfelsak theih dawnin a hre tlat! 

"Ih maw.. Buaina ka tawk a" tiin bul a va tan ta ngei a. 

"Eng thilah" a rawn ti vat. 

Han sawi dawn tak tak chuan a zak ve tho bawk si. Amah lo rin tur a hre bawk si lo. 

"Vauna ka tawk a" a ti ta a. 

"Maw?! Joela atangin maw? " a rawn ti chat mai. 

"Aw" tih bak chhan dan tur a hre lo. 

"Sawi chiang teh" a rawn ti a. 

"Video a kawl a. Min tihmualpho a tum. A duh anga ka awm loh chuan" a ti ta râwih a. 

"Khai! "Tih chiah reply na a dawng. A tisual ta emaw a ti hman hial. Lawmsanga mizia zawng zawng a thlirin hmusit tur chi niin a lo ngai lo va. 

An reh ta veng veng a. Mahse, mut dawn tak taka a phone a en leh chuan, "A duh ang chuan i awm tur a ni lo. I awm lo vang" tih msg a dawng a. Chu chuan a tiharh ta deuh. 

"Mahse, video a thehdarh dawn sia" a tih a seen rual chuan a rawn call nghal. A ngaite bawkin balcony-ah a chhuak leh vat a. 

"Video chu i hmu ve em? " a rawn ti a. 

"Ka en ngam lo a" a ti tawp. A ni bawk lah taka.. 

"Amah ka va hmu ang. Naktukah a tha em? " 

"Lawmsang" a ti ringawt. 

"Ka bialnu i nih thu ka sawi ang.. " a la ti ta deuh deuh. 

"Khawngaihin" a ti chuai raih a. 

"Ka hlau ve hleinem. A hnena i inpek leh dawn ai chuan duh leh mualpho mai rawh. Ka pawm tho ang che" a ti hmiah. 

"Lawmsang.. " a ti leh ringawt. 

"Zanin atang hian ka bialnu i ni tawh. Mapuia pawh ka hrilh ang" a ti hmiah hmiah. Nguri a hamhaih zawk. Lawmsanga chu rintlak viau mah se.. Hlauhthawnna a la bo tak tak thei si lo. 

A zan mu te chu a phu leh zawk zawk thin a. A mumangah lah Joela leh Lawmsanga a hmuh pawlh nuai bawk. 

Lawmsanga erawh a muhil hleithei lo. A let sek a, a hui leh pap thin. Cigaratte a zu nasa hle bawk. A rilru a hmang nasa a ni. Hmeichhe pakhat, nun inthlahdah ve tak, tu'n engah mah an ngaih loh tur chu chhanchhuah a ngai miau si a. Tin, he hmeichhia hi a tan a pawimawh a ni. A kaltir a nih chuan a damchhungin a inthiam thei tawh lo vang. Sex video a nei tih a hria, chu chuan tihnual bawk mahse, engkim hresaa he hmeichhia hi ngaihsak a ni tlat. A thianpain a atchilh tih pawh a hria, mahse, chung zawng zawng chu a chingfel tawh tur a ni. An inhrem rei thawkhat tawh e. Engkim chu a nih nih ni tawh mai teh se. A buaithlak em mai. 

Zingah a fapain a rawn kai tho a, mut a kham lo kher mai. Vawiinah a service ve leh tawh dawn a. Kalna tur pawimawh tak a nei bawk. Chaw a ei sawk sawk a, a inbual fai a. A insiam nghal. Ţawp deuha service hi a tih ngai loh dan a ni. A lang thar sar mai. A hmabak a ko êm vang erawh chuan a mitmeng chu a thim deuh. A kal tur chu a fapain, "Apa, thil min lo hawn rawh aw.. Bye" a rawn ti a. 

"Hawn teuh ang. Lo fel rawh aw.. Bye" a ti a. A chhuak nghal. Khatla lamah tlan nghal par parin, Joel Lalremsanga in kawtah a ding ta chat a. Amah tak chu a awm a ring lo. Mahse, a nupui Thanpuii nen hian an inhria a, a nupui atanga bultan mai chu fuhin a hria a ni. Thanpuii chuan a lo be nghal sawk sawk a. Veng khata awm reng reng an ni a, chutia a va tlawh ta pawh chu a lawm hmel hle. 

Mahse, rei a thut hmain Lawmsanga chuan, "U Thanpui, thil pawimawh deuh a awm a. Chuvanga lo kal ka ni.. Englo ania. In pa bialnu hlui Ngurnunsangi kha i hria ang a. Kan inngaizawng a. Mahse, niminah inpa hian an video hmangin a lo vau a. A duh anga a awm loh chuan tihmualpho a tum a.. A mangang khawp mai. Kei pawh ka mangang a, ka rawn kal tawp mai.. " a ti ta a. Thanpuii'n chu thu a hria chu a down vek niin a lang. 

"Lalremsanga chu a va mak ve aw.. Ka hrilh tam tawh nen.. Zawnga chu rawn haw teh se" a ti nghal piap piap a. Lawmsanga chuan hlawhtling thawkhatin a inhria. Rei pawh awm lovin a kal ta daih a. Nawm khat chuan a nuam.. 

"Ngur, ka chingfelin ka hria. Hahdam takin awm rawh.. Chuan zanin chu ka bulah awm ang che. Ka rawn lam ang che" tiin text msg a va thawn a. Nilengin a mood a fuh.. 

(Ngawi teh u.. Ka migrain a chhuak a. Ka type hleithei lo a ni e. Tin, thursdayah hian exam ka nei.. Ka lo sawi lawk aw.. Miss Toni hi a buai ve êm em a nih hi.. In fel kha.. Muah vek u.