Thutiam 3

THUTIAM.. (3)

Ziaktu: Toni Râlte

No chu a lek va va a, inngaihtuah buai miah lo vin a thawk khat piap a. A ner sak mai. A tui hran lo aniang. No hnihna a lem zawh leh meuh chuan a lu lam chu a rawn kai ta chiai chiai a, a pum a sa thla vawng vawng bawk. Becky chuan a lo no thum tawh thung. Chhuatah pher phahin inhmatawnin an thu dun a. Becky chuan rawn thlek pahin, "Ngur, i nun hi a ruah hmel ka ti" a ti sehchilh nak a. A lo khi sak ringawt. 

A melh ngai melh reng chungin, "Ka ruak alawm" a ti ta sap a. 

"Sas nei ve la.. Mapuia pawn a duh ve che em kha.. Ni ru.. Umm.. A chhiat loh bakah a fel em kha" a ti sar sar a. 

A thle deuh bak a, "Mipa a tlingin ka hre ve lo" a lo ti nghat thung. Becky chuan hrilhhai hmel lek leka melhin, "Anih star i nei em? Ka bawhzuisak ang che. Ka zei alawm tiang chu" a ti leh phar phar a. 

A no thumna tur tlak pawpin, a thaw hak a. "Mi pakhat chu a awm" a ti chang rât a. A mitmeng chu a thim raih mai. 

"Tu nge.. Sawi teh vat, ka hre ve em? " phur zetin a lo ti a. 

"Mahse, a duhzawng ka ni ve lo alawm" a lo ti leh daih. Becky a hnual rawih mai. Nguri mizia a hriat vangin zawh sek a duh ta bik lo. An pahnih chuan stag um khat an in zo ta thak. Becky zung tur chu a pai nawk nawk mai. An han nui leh rih thul. Nguri erawh rui ang pawn a awm lem lo, a mizia chu a zawi raih reng a, ngaihtuah lianpui a nei tih a hmelah a lang thung. Becky phei hnuah a room chu a tifai leh vek a, a ha nawt faiin a hmai a phih leh te te a. A mu ve nghal. A phone a han hmet eng a, whatsappa a lut chu Mapuia msg a lo awm tuar. 

"I nunhlui ka lo sawi vang khan ka tihpalh aw.. In inthen tawh chuan ka duh che a ni. Ka lo thinrim hma deuh a, min hrethiam rawh" Tih te, "Ka vei lutuk che.. Ka hmu chak che. Engtin pawn awm la ka duh che" tih angreng. Nguri chuan a chhiar thuak thuak ringawt. Mi dang msg a han open leh te te a, a tawp berah a save loh number atanga lo kal msg chu a hawng ta a. 

"Hmeichhe vawt tak i nih chhan hi hriain ka inhria" tih te chauh hi. A lo thawntu Dp a en chuan a thaw hawk. A chhing vang vang a. A thinlungah sawi thiam hleih theih loh thil a awm. A phur nge a hnual tih erawh amah chuan a hria ang chu. Khur der der chungin a chhanna tur a type ve nghal a. 

"I hria alawm" tih chauhin a reply. Mahse, a seen lo. A online tawh lo. A tlai ve tawh bawk a ni. Ani pawn a phone a hmet thim a, a ngaihtuahna kawm chungin a chhing ta vang vang a. 

"Apa, ih, huanah ka kal ve dawn.. A pu te nen" a fapain a rawn kaih thawh chuan a mit a nuai nawk nawk a. A fapa lua tuai pahin, "A nuam awm.. Eng nge min lo hawn ang? " a ti thum chhak a. 

"Ih.. Thlalak " a lo ti! He nau hi a â phuang mai a, a nu ngaihna chang pawh a hre vak lo. A tha zawk maithei a ni. Khuma la mu chung chuan a phone a hmet a, a fapa erawh a papuia roomah a lut leh daih tawh. 

Whatsapp a luh chuan a mit la hmasa bertu chu Ngurnunsangi msg chu a ni. A hawng nghal a. A khi suk. 

"Kan hria alawm" tih chauhin a reply ve. He mi te pahnih tawng tlem dunzia hi. A tho chhuak ve a, bai suih suih chungin a tei kual ve a. A nute chu Sihhmui lama an huanah an kal dawn a, tukthuan pawh an ei hma deuh. Bawihtea phur lutuk chu an nuih deuh reng mai. Ani a hlim hi chuan an hlim a ni mai e. Chaw ei khamah a phone a vuan leh chat, "I thianpa hian min tibuai tawh lo se ka duh hle a ni" tih msg a hmuh chuan a rum nghut a. A chal a chuar nâng a. 

"Ka thunun theih nise ka ti khawp mai" tiin a reply a. 

"Hrilh rawh.. Engkim" teh ngawt a. 

"Eng ber? "

"I hria"

"Khami zana thil thleng kha maw? " 

"Aw" a rawn ti teh tawl. Mapuia chu a ngaina tehchiam lo a ni ngei ang. 

"Ka hrilh chuan engkim ka tichhia ang" a va ti a. 

"A pawi lo" a rawn ti leh hmak. 

"Ka thei lo. Ka thiantha ber a ni asin" ni e, a tan chuan a harsa viau ang. Eng thil nge he mi te pahnih inkarah hian lo thleng tawh ang le.. 

Ni e, khami zan Lawmsanga te chaw ei khawm zan leh Joela leh Nguri room book zan a innan zanah khan Joela kha a rui lutuk a, chet pawh a che thei lo. Nguri tai na lutuk a vial a vial lai pawhin a harh thei si lo. A mangang tawngkhawng lutuk thi mai dawna a inhriat tawh vangin room atang chuan a chhuak a, bathlar lamah kalin a va luak a, a tai a nat hian a luak a chhuak tel ziah! Mak ve tak a ni. A reh thei mai si lo, inkawm luah leh a tum lai takin a hnunglam atangin, "Ka lo pui ang che" a rawn ti a. A chalah rawn dawmin a pawm bet bawk. Nguri lah a luak hleithei si lo. Tui a va laksak a, a in khawlh khawlh a, a mittui te chu a tla pur mai. Damdawi a va ngaihtuahsak leh a, a lo dawlh vat. Rei tawk fang an inawmpui hnuah, "I la zia loh chuan damdawiinah ka hruai mai dawn che mi? " a ti a. 

A lu a lo thing nar nar, a zia thawkhat ve deuh tawh bawk a. "Ka tha mai ang. Zu ka in ang a" a ti sap a. Zu chu a va laksak leh, Nguri chuan a la hmuh ngai loh mipa mah nise, chuti taka dimdawihtu chu a ringngam thlap tawp. Buaipuitu dang nei hek lo. Zu chu a in ta a, a pum a sa thla raih raih mai. A pum ruak sa nen a rui ta riau a. A hmaa dinga ngawi renga entu mipa, mitmeng tak raih chu a va melh a, eng nge a hriat a hre lo, a va pawm chawt a. A inrin hma hauhin a hmuiah chuan a fawp ta a. Engtinmah a lo chhang let ve lo. A inla hrang leh a, "Ka tihpalh aw.. Ka.. Ih.. Ka rui aniang. Ka va lut tawh ang" a ti bah nak a. 

"I bialpa saw mi pasal a ni asin" a rawn ti ta a. 

"Ka hria" a lo ti tawi tâk.. 

"Mi pasal ngaizawng tur chuan i uiawm lu deuh e" a lo ti chang rút a. 

"Ka thu thu" a ti ve hmak. A lut tur chu a banah rawn vuanin a lamah a pawt hnai dãwrh a, hnai taka melhin, "Hmeichhe mawl lutuk" a ti sup a. A rawn fawp ta a. Joela fawhna ang lo takin a dam raih a, a zei em em pawh a ni lo. A thúk em em a ni ber. Thlifim a thaw heuh heuh a, bathlar chu a eng uar bawk si lo. Rei ngial an inkiss ngat ngat a, A hnute a rawn ţham sak a, a lo dang eih lo. Feelings danglam tak a la neih ngai miah loh a nei ta bawk. Nuam a ti, zep buai a ngai lo. Bangah nawr betin ramsa koham ang maiin a rawn hrâwm ta a, na a ti hauh lo. A nghawngah a lo kuah chial a. Mahse, Lawmsanga chu a tawp ta thut a. Inla hrangin a hui pawp a.. "Ka thei lo. Nupui ka nei tawh" a ti nghut a. Nguri chu a zawi rawih rawih mai. A sawithiam si loh natna chuan a thin a rawn vilh nghal a. Mahse, nui lui chungin, "Aw le.. Ka lawm e aw.. " tiin a lut nghal daih. Chu chu Lawmsanga leh Ngurnunsangi te inhmelhriat tan dan chu a ni. Mapuia hian hre ngat se, mak a tih loh pawhin na a ti maithei. 

Khatia damdawiina an inhmuh leh kha an inhmuh lehna hmasa ber a ni a. Lawmsanga chuan a lo la theihnghilh awzawng lo va, Nguri lahin a va hmuh rual khan a ţek chhawk tih a inhre bawk. Mahse, an inkara rem ţeuh lo thil tam tak vangin an hringnun a hnawk ţan ta chu a nih hi.. 

Nguri class kal chu a rit ru hle. Nizan lamah an lo khulh nual si a. Becky erawh a off tawp. A kal lai khan thawh pawh a la tho lo. Engvanga zu kha in ringawt nge maw an nih ni.. An sawi an sawi a, an insawi phur ve ringawt. A luak te chu a chhuak ut ut a, a mitmeng pawh a phelh phang mai. A phone a bih deuh sek bawk, Lawmsanga msg a hmuh loh apiangin a mitmeng chu a hnual nghal rawih zel. A mah leh amah a inhau a, "Mawli, theihnghilh rawh. " tiin. A thei awzawng lo. Lawmsanga laka a feeling kha a theihnghilh ngai reng reng lo. Mahse, Lawmsanga best friend-in a atchilh tlat mai bawk si. 

Mapuia hnenah chuan, "Single ka duh rih a. Thian ni zawk ang" tiin a hrilh a. Mahse, beidawn mai a tum hmel loh. Mapuia hi a iaiawm hran pawh a ni lo, a tawngkam kha zet avang khan a ngaina ta lo zui a ni zawk. Khatiang tawngkam kha mipa diktakin an hman a ring lo bur. A nunhlui leh a nihna dik tak rawn sawi pawh nise, pawmzam harsa a ti ve fan a ni. Tin, single rih chu a tan tha berin a hre bawk. A single rei ngút ange mawle. 

Hostel a thleng, a room a lut chiah Becky a rawn lut a, a ţap nghal! A hamhaihin a hrilhhai kher mai. 

"Ngur, Lal Tanpuia'n min kawp" a ti ţuau a. Nguri chuan thil awmzia a hrethiam chiah. Becky bialpa, kum khat zet a zui tawh chuan mi dang a lo kawp a nih awm chu! A na viau ngei ang le. Becky hian a duh ve hluam hluam thin si a. 

"I chiang ami? A kawp che tih" a ti a. Khumah a thutpui a. Inhnit faih faih chungin, "En la.. " tiin a phone a phawrh a. Nguri'n an en nak chuan, Ţpa'n a rawn ţhenna a lo ni. 

"Beck, ka inthiam lo lutuk, mahse, nangmahah feelings engmah ka nei tawh lo a ni. Thla hmasa atang khan Rempuii nen kan inkawp tawh a, hrilh che ka hreh em a, ka ngawi rih a ni. Tunah chuan ka bum thei tawh lo che. Min ngaidam rawh aw" tih thu hi a lo ni. Nguri pawh chu a na ve dawt thei. Tpa nen chuan an inhre tha ve viau a, len te pawh an leng ho nasa ve thin. Mipa chut lam, fiamthu erawh duh ru fu, a bula awm nuam deuh mai a ni a. An hausa bawk a, Becky pawh sum paiah a pui ve nasa thin. Chutianga midang han kawp chi mizia a neiin a hre lo. Mak a ti ve hle. 

"Engpawhnise, mate, hei amah ngeiin a rawn sawi a, misual chu a ni lo alawm. Bum i nih reng loh nan a rawn inpuang tawp mai a nia. A fel ngawt zawk alawm.. A na ang tih chu ka hria, mahse, i na hlen dawn hleinem" a ti seuh seuh a. Becky chuan mittui kar atangin, "Mahse, Rempuii ber kher.. Ka thian nu ve tho ania.. Engtin nge min phatsan theih? " a ti a, a baw leh hawk. Nguri chuan a hnungzangah chulsakin, "Umm.. Tap phawt rawh. A pawi lo. Tah theih hi a hlu" a ti siam siam a. Rei tawk fang Becky a han inbunthawl chuan ani pawh a zang ve huai mai.

"Eng nge ka tih ang? Ka tibuai dawn mi? " a ti ta mai a. Nguri chuan, "Khaih! Tikhan a rawn then tawh che a, i va zar leh chuan i cheap dawn lutuk. Hmalam i pan ang. A tel lo va i nun a ngai tawh tihna a ni mai. " a lo ti vat a. 

"A va harsa dawn ve. " a ti chuai raih a. 

"Harsa e.. Hmangaihber te bum leh phatsan niha hmalam pan aia harsa hi a vâng viau ang. Mahse, phatsanna a awm chuan kan tuar thei tihna a ni mai. Lungngai suh, i tan ka awm reng ania" inringtawk zetin a ti a. Hmalam a melh tlat bawk. A lo kalsan tawh leh a lo phumbo tawh sulhnu kha a thiannuin a rawn chhui dawn chu a nia. A puihna a mamawh dawn tih a hai lo. Ni e, Becky hi a khai chhuak ngei tur a ni. Zanriah pawh Becky chuan a ei ta lo. Nguri pawn a ei tam bik lo. Thil thleng chu pawi a ti a, mahse, tihtheih a nei rih bawk si lo. Enliam deuh tawp bak chu tunah chuan nawr chuk chuk chi a ni si lo va. Mahse, Tpa chu va biak ve hrim hrim a duh. 

"I thiltih hi a mak hle a ni.. " a va ti tâwng a. A rawn hrethiam nghal mai. 

"Ngur, pawi ka ti lutuk, ka inthup thei tawh ngang lo a ni. Becky hi hmeichhe tha lo a ni lo, mahse, ka soul mate tur a ni lo aniang. Keimahah hian kim lo a awm thin" a rawn ti duah a. Nguri tan pawh han hauh vak chi a ni bawk si lo. 

"A na lutuk asin" a ti ta ngawt a. 

"A na dawn tih ka hre sa alawm.. Ka inthiam lo ngawih ngawih.. Mahse, mipa ka ni a, ka thutlukna chu ka kal tlangpui a ngai sia lawm" a rawn ti a. Lehlamah chuan Tpa chu Nguri mipa mize ngainat chi tak, tlang tak, zep hni hne nei lo a ni a, a hrethiam ve tho mai. 

"Engpawhnise, tunah chuan a fight a ngai dawn a. Eng nge a an tih hre tura rawn biak buai a tul rih lo aw.. A beiseina i siamsak mai mai ang" tiin a chah a. Tpa pawn a lo pawm ve thlap mai. Zanah pawh Becky chu a bulah a riahtir a. A tap faih faih reng a, Nguri pawh chuan hnem vak a tum rih lo. Video te a ensan ta daih a. A nat tak tak laia a awmdan te a ngaihtuah kual a, a tuar chhuak thei ta hi a lawm ngawih ngawih. Nat leh eraeh thih hrehin a hreh tawh. 

Mapuia text pawh a dawng leh malh malh e. Reply chin te chu a nei ve bawk. Mahse, beiseina siamsak ang zawngin a chhang duh lo. A rilruah mipakhat a rawn lang a. A ner sak. A inlet thawk a. Becky chu a lo tap muhil nge lehlam hawiin a mu ngawi reng a. Tihharh hlau deuhin a tho a, a va zung a. 

Arsi te chu an pe tiar a, thli a thaw heuh heuh bawk. An hostel view hi a tha bawk a, a de chuah chuah mai. Balconyah chuan a ding ta reng a, a lung a leng veng veng mai. A phone a rik chuan a phu zuk.. He pa hian a rawn call a maw?! 

Tim angreng takin a pick up a. 

"I mu tawh em? " a rawn ti thum leh dút a. 

"Mu tawh a, ka tho leh a" a ti ve mai a

"Mapuia i be tha lo ni maw? " a rawn ti nghal chat a. 

"Ka be chhe chuang hleinem" a ti ve khauh. 

A rawn nui hak a, "I hnial hrat dawn riau" a rawn ti a. 

"I bulah a rawn vui mi? " 

"Vui lehpek e.. Ani hi zawng a pangchang chi a nia.. Ti nge i thawh leh? " a rawn ti a. 

"Ka zung a. Balcony-ah ka ding rih mai mai" a ti ve mai a. 

"I hritlang ange aw.. In hostel kha thli a thww thei si" a rawn ti a. 

"Kan hostel i hria law? " a lo ti hú a. 

"Hriat lohin.. A hrâng ania aw" a la rawn ti zui. 

"I chhia" an ti ngawt a! 

"Se.. Nangte chu i huaisen em kha, misual pawh man thei i nia" a rawn uang ve ngei. 

"Sawi lo teh" a ti nghat. 

"Chuan maw.. Aw ti rawh" a rawn ti. A va naupangchhia tak. 

"Aw" a ti ve mai a. 

"Thil hi a buaithlak tiraw? " a ti halh a. A rum zui nghut. 

"Nia" tih bak sawizawm a ngam tawh lo. Lawmsanga hmel kha a mitthlaa chiang takin a rawn lang nghal a. A khi sak. 

"Inhmuh chu ka duh a ni" a rawn ti hlawl. Nguri a nghing dawt. Chutiang thu a sawi vang ringawt pawha a taksaa danglam awm chu a hai lo, a mak a ni. 

"Ka duh ve lo" a ti ngial a.. 

"I duh" a rawn ti hmiah. A dang titih ta tlat. 

"Ka duh lo " a ti leh a. 

"Aw le.. Ka hmu lo ang che" a rawn tih takah chuan a na zawk tho si. Mahse, Ngurnunsangi hi a inthunun hram hram tur a ni. 

"Bakah.. " tia thil dang sawi a tum lai takin, "Anih aw.. Muttui phawt" a rawn tih hnan hmiah. Phone a dah nghal bawk. Nguri zaidamna chuan a tuar lo kher mai. Titau tih hriat zeta a phone melh pah chuan, "Hmela leh" a ti sap a. A lut zui ve daih. 

Ngurnunsangi'n a ngenna a hnawl kha a tuar thei hlek lo. Titau tih hriat zetin a phone chu khumah a paih hmak a. Tukverhah dakin cigaratte a zu a, a rilruah engmah a awm lo. A phone a rawn rik tak si avangin a kalsawn a, Mapuia'n a lo call. Khi suk chungin a la a. 

"Thianpa, enteh, Nguri hi ka duh telh telh.. A induhtawk lutuk hian min hip aniang. Ka call tawp ngam si lo va" a rawn ti a. A kamnam deuh tih a tawng danah a lang. Tlangval puitling tawh si, thiante la rawn zut zut chi anih atang hian puitling tak a ni lo tih chu a chiang viau awm e. 

"Call rawh call rawh.. A seh lo vang che" Lawmsanga chuan a lo ti a. Mahse, a thusawi chuan a tina det tho. 

"Aa… text pawh a reply tha ngai lo ania.. Call phei chu a la lo vang" a rawn ti a. A thianpa hian a vei tak tak niin a hria. Ni lo, a vei tur a ni lo asin. 

"Mipa takin awm rawh. Nawr hmanhmawh lo la, bakah a single lo ve te pawh a ni thei a" a han ti a. 

"Ngaihzawng neih ka duh rih lo a tih danah a single alawm" a ti bawk si. 

A chek hluk a, "Be tam vak lo la, a khat tawk te tein text keuh keuh la, i biak teuh chuan i tihel ang" tiin a han fuih a. 

"Aw le.. Ni e..i lo awm hi chu a tha thin teh e, pathlawi nge nge" a rawn ti leh kher a. Lawmsanga pawh a nui ve ringawt. Ni e, pathlawi chu a ni ta ve ta reng mai. Ruthi a ngaihtuah chhuak thut a, a hmel a ngui nghal vek. A mitmenga eng emaw lo lang chu thil lawmawm lam zawng a ni mawlh lo. Ruthi chanchin hriat fo a duh loh tehlul nen,.mi thenkhat lah hian a hriat chak an ring mawni an hrilh sek lehnghal a. A fapa leh pasal phatsana uiresantu chanchin hi a hre chak hlawl lo tih an hre lo mawni… a fapa a rawn ngaihsak zui eih lo erawh tlem chuan a na ve deuh. Mahse, lehlamah rawn ngaihsak se a lawm chuang kher lo maithei. A fapain, "Nu" tia koh tur a han nei lo phawt pawh chuan a tihrehawm thin. A pi leh pu bakah a ni leh papuia te ho hian an duat em zawk a. Amah tak phei hi chuan a kuah tam lo khawp mai. A la dam chiang lo a ni bawk a. Dam chian ver vawra service leha thiante nena han rik leh laih laih a chak tawh kher mai. A driver pui te pawn an rawn ngaihsak thain eitur te an rawn leisak fo mai. A lawm takzet. A dam loh chhan erawh mi nazawng hriat a hlau ve tho. 

"Min thlah rawh.. Kal teh khawngaihin" tiin a lo nam ţâng ţâng a. A rawn kuah nghet nasa mai si. 

"Ka ta i ni.. Ka ta liau liau.. Tu man an nei dawn lo che" tiin a rawn phun sup sup a. 

"Tenawmpa, i ta ka ni lo bawk e. Ka tan engmah i ni tawh lo" tiin a kut chu a la lawk a, a theh kiang lawp a, "A naa" tia rak tuar ri avangin a harh nghal. Becky chuan rawn melh pahin, "Eng nge maw i hriat le.. " a ti hlar a. Becky ban chu bang deng dawtin a lo theh a lo ni. A nuih a za lek lek.. 

"Ka mumangah mi pakhatin min sual a lo tum a, min kuahna kha ka ka paihthla a.. " a ti sap a. Becky chu phun nuah nuah chungin a inlet thawk a. A muhil zui leh daih. Nguri chu thim zingah a khi var var mai. Joela'n lo sual a tum anih kha. Joela a hriat chhuah khât tawhzia a ngaihtuah a. A lawm hle rualin a mumanga a hmu chu a duh lo ru hle. Lawmsanga a ngaihtuah zui ta deuh a. 

Thu a duh rum lu deuhin a hria. Tikhan a rawn be tawh awm si lo va tih a ngaihtuah phei chuan, "Ngah nge inhmuh kha ka lo duh mai loh le" ti ten a ngaihtuah a. Amah leh amah a inhau ru mawlh mawlh reng mai. Nat leh a hlauh em vanga a inlakhran tumna chuan Lawmsanga a hnawtbo daih dawn anih hmel a. Chu chuan a tilawm teuh si lo. A mu tau chawrh chawrh ringawt. 

A tuk an class kal lamin Joela'n a rawn tlan pel a. Nguri thinphu a rang nghal. Hei hi ania a duh loh em em ni, Joela a hmuh changa eng emaw la thawk det awm thin chu a hua. A thunun thei rih si lo va. Class-ah a thu ngui bar mai. Joela a rawn lut a, thil dang a ngaihtuahsan daih.. 

"Nguri.. Ngurnun.. " a rawn tih lung lung chuan a phu zuk a. Joela chuan a rawn melh chawngkawr run mai. 

"Eng nge? " a ti zawi sap a. 

"Zawhna ka zawt che.. Engmah i ngaihtuah lo anih kha.. " a rawn ti bawng bawng a. 

"Nia" a lo ti leh tawp. A classmate te chuan an melh hrek hrek mai. Joela tak pawh chuan tihngaihna a hre lo aniang, a chal a beng thawk a. A chhuak zui daih. Thil thlen dan chu a dik chiah lo tih chu classrooma thu te chuan an hre vek ang. Mahse, zawhna an nei lo. Nguri chuan a chhang dawn chuang lo va. Lunch pawh a ei peih lo.. A mood chu a chhe hle ringawt. A chhan awm a ngaihtuahin a hre mai bawk si lo. Amaha rooma a thut reng laiin an class ami tho harhvang zet Rinpuia a rawn lut a. A bulah a rawn thu a. 

"I mizia hi a dang tawh e" a ti ngawt a. 

"A dang lo" a lo ti hmak. 

"A chang hian i mak leh thut thut zel a.. " a ti leh a

"Nang pawh i harhvang reng bik ami? " a lo ti hlar a. 

Rinpuia chuan melh hruk hruk chungin, "A thin chu leh" a ti zawi sup a. Nguri chuan a hre pha reng. A chhang peih tawh lo. Rinpuia bawk chuan, "M. Ed zirlai ami ka cousin in a star che ania.. I number pawh ka pe" a ti leh a. 

"Ka number hi zawrh lai a ni hleinem. Nge i pek ngawt" a lo ti leh thak. Rinpuia hrilhhai chuan a lei a chhuah tut ringawt. Nguri pawh chu a inthiam ta lo deuh a, "Ka single hleinem" nem deuh zawkin a ti ta a. 

"Chupawh nise, lo be tha ve tho rawh aw. Ka tan a nuam lo" a ti a. Nguri chuan a chhang tawh lo. Tihtakzeta biak chak chu pakhat chauh a nei. Ani lah a reh hmak bawk si. Chu chuan a mood a tichhia anih a ring ta ber. 

A phone chu a khawih awl lo va, a beisei msg a dawng thei si lo. A fapa a rawn kal a, "Apa, apiin thingpui lo in rawh a ti" a ti a. A tlan let leh nghal. Thaw hawk chungin a tho a, a biak chak, a chapona vanga biak a hreh si Ngurnunsangi chuan a rawn be hmasa lul lo vang tih a ring thiam. Dik tak chuan Mapuia vang hian engkim a tîm phah vek, a sawi ve reng bawk si. Thiante phatsan anga inngaihna a neih vangin hma a la ngam lo a ni. Khami zan Nguri nen an inhmuh hmasak ber kha a ngaihtuah let a. An inmamawh tawnna nasa lutuk kha tu hmeichhe lak atang mahin a la tem ngai lo. A nupui lak atang ngei pawn. Nguri taksa a khawih khan a mipatna a tho a ni satliah lo, a taksa zawng zawng chu a riltam huam huam a ni ber. A tawp a thlenpui teuhzia te kha.. Pathlawi chu ni tawh se kha lai bathlarah khan rem leh rem lo pawhin a tawp a thlenpui hmiah ang. Mi pasal a tawmpui tih hrereng chunga a hnualsuat theih miah loh hmeichhia hian eng ang chiaha thiltihtheihna nge maw a lo neih ni? Joela nupui lah kha a hrechiang mai bawk si. Tikhan an inhmu ta lo vang vang a, damdawiinah an inhmu leh ta kha a nia. A hmel kha a lo la theihnghilh awzawng lo a lo nia! Kha ta an inhmuh leh pawh khan a lungphu a rawn rang nghal thei ania. Mahse, a chhuak ve thei si lo va, Mapuia'n a chet khalh ta chu a nia. Mapuia te chu a ngei lek lek fo. Mahse, a tana engkim tih huam, a thiantha ber a ni si. Mapuia kuta Nguri a han dah chhin chuan a puakkeh mai dawnin a hria. 

A chang chuan nupui uiresan hlimchhawnin hmeichhe dang a buaipui chiam chu a inthiam lo ve deuh thin. Mahse, Ruthi nen an inneih laia Nguri nena an boruak kha thleng tawh a ni miau a. 

Thingpui an in laiin a nu chuan, "Motor chu i khalh thei tho bawk a, dar 3 velah Republic-ah kan puanthan inchah tawm i va lam lawk dawn mawni le.. " a ti a. 

"Umm" a ti liam puat. Dar 3 rik hma velin a fapa nen an chhuak a. Puanthan an lam zo an haw lamah Nguri ang deuh mai a hmu ta a. A hnunglam atang pawn a hai lo a nih hi.. A bulah a ding ta dawt a. 

"Nguri" a va ti a. A rawn hawi chuan a meng phawk khawp mai. 

"Lo chuang rawh" thupe aw zet hian a ti a. Nguri hamhaih deuh lah chu a hawi â deuh lehnghal. 

"Vat" a tih leh hrâwkah chuan, Nguri pawh chu a rawn chuang ve ta mai. A fapa chuan a lo en deuh hâ a. 

"Ka fapa a nih hi.. Vanropuia.. Bawihte, i nu Nguri a nih hi" tiin a han hmelhriattir a. 

Nguri a la ngawi reng. Tawng tur a hre lo nge a la hrilhhai zawk pawh hriat va ni suh. Dawr awmna an thlen chuan a fapa thil leisak ngen avang chuan an ding det a, a fapa chuan a duhzawng a sawi zat zat a.. A tawpah Nguri chu rawn melhin, "Anu, eng nge i duh ve? " a ti ta a. 

Nguri leh Lawmsanga chu an inmelh ngawt ngawt ringawt.. 

(Lunglei issue vangin ka type lawk thei lo va. Heti chin hi ka theih chin ni rawh se.. Sunday a ni bawk a. Lawm thiam ve mai teh u aw 😍🙏