Thutiam 2

THUTIAM (2)

Ziaktu: Toni Râlte

(Adds kha khawngaihin aw) 

"Ngur, Sir hi a ngui thei tawp. A temper hi a loss thinin ka hria, i lo chîk em? " a thiannu Chami'n a tih sar sar chuan a ner sak. A nui hak bawk a. 

"Bumhmang chantawk alawm" a ti sap a. Chami a hawihai thung. A thiante bulah hian engkim zawng zawng a sawi lem lo va. Mahse, rin dan sa chu an nei ru ţhúm, an zawt ngam lo mai chauh a ni. Tunah chuan a tira a tawrhna te khan an kiansan ţan ta a, dam fel chiah lo mah se; a tuar thei tawh a. A chantawka khuarel chu a pawm thiam tawh bawk. Sex a lo hmanpui erawh pawi a ti tawp thei lo thung. Tawnsual leh a hlauh em vangin single deuh char char chu a duh zawk. Mipa a mamawh lem lo. A inveng ru ran tawh zawk. Lehkha zir lamah a tlak a, a zir ngawrh viau mai. A chhungte an dam tha rih bawk a, a hah a dam chho tan a, a hmel pawh a rawn zia chho. Joela leisak cosmetic ho chu paih mai a duh hman a, mahse, a man a to bakah a tha hlawm si a, "A ho em mai. Min leisak tawh alawm" tiin a hmang leh ta zawk a. A roomah a tawm ngun deuh bawk a, thian han kawm leh pawh a khawr deuh ţút mai. 

Hetih lai mek hian Kan Lawmsanga erawh a ke chu a la dam hleithei lo va; cabin-ah a awm tawh a. A khua a har thinin ngaihtuah loh tur tur a ngaihtuah leh thin a. A fapa a rawn awm ve chang chuan a khawhar a hnem ve deuh. A thiante an fel êm a, Mapuia phei chuan a vil deuh chawt mai a ni. Thiantha hlutna a hrechiang khawp mai. Mahse, a inngaihtuah lungpuam chang chuan, "Ti nge ka thih loh? " tih zawhna a nei leh thin. Thih kha a hlau renh reng lo, a thlarau nun lam pawh a ngaihven hek lo. Uirena hi chu a na êm a, a demawm loh. A nupui kha hmangaih saa nei ni lo mah se; fa te hial an han neiha an inchenchilh takah kha chuan a hmangaihin mi dang amah hnaih tumtu te pawh a hnawl ve vek kha a nia. Hetianga inrulhletna hi dawnsawn harsa a ti êm a ni. Tin, chhungrila kher ngut nguttu chu zahna a ni. Tlawm intihna chuan a chhun sawk sawk fô.. A nu leh pa ten an fuih reng a, anmahni a zah êm vang chauhin tuar lo awm takin a awm mai mai zawk a ni. 

"I khua a lo har tawh em? Traffic a jam nasa lutuk a.. Bakah i awmna kan zawng rei ve deuh bawk nen" rawn ti lang langtu lam chu Mapuia nen an hawi rual ţhawt. Rawn melh let vetu te pahnih pawh an ding rual ţhâwih. Mak tih hmel zetin an inmelh hlawm ta ngat ngat a. 

Chutah Mapuia chu harh hmasaah ţangin, "Lo kal r'u.. Lo thu ru" a lo ti sawk sawk a. Nichina tawng lang lang nula kha a che hret a, "Ih.. Englo, room kan hai aniang.. In ni lo" a ti ta ngawt a. 

A bula ding chu melhin, "Ngur.. Kal ila" a ti sap a. Mapuia a â lo va, "A va zia lo ve aw.. A ho lutuk.. Lo thu tho ru. Hei thianpa hian nula kantu a nei khât teh mai ania" a lo ti leh sawk sawk a. Chu chuan an boruak a tiziaawm deuh. 

Nguri chuan khuma mu dam lo va melh pah chuan, "Aa.. Lo dam rawh aw.. Kan kal zawk ang e.. Hehe.. Nidangah kan lo kan ang che u" tih leh inher a rual nghal a. Lawmsanga erawh a ngawi reng. An chhuak chan chan a. Mapuia nuih a za hle. 

"Ka hmuh tawh hnu a va ang e" Lawmsanga chuan a ti sup a. 

"A tu zawk kha? "

"Min rawn betu kha" a lo ti leh nghut a. 

"Ka lo en chîk ve hleinem" a lo tihsan mai a. Phone a khawih daih. Lawmsanga erawh a ngaihtuahna bawk a kawm leh tawh. 

"Awii.. Ngur, ka zak ee.. Mawl min ti ve ngawt ang" Becky chuan a ti a. A inhup pah bawk. 

"Ho ee.. Kan hai ve ni mai a. Dam lo kha ka hmuh hnu a ang tawp lehnghal" Nguri chuan a ti mai a. Zak hmel a pu ve lem lo. Becky cousin Sihphir ami chu he damdawiinah tho hian a awm ve a. A cabin no. An lo hai a ni ngei ang. A tawpah an va hmu ta hram a. An luh sual dan te an han sawi a, an nuihpui ta har har hlawm a. Becky hi Thenzawl khua niin Nguri nen room insi cheta awm dun an ni a. An inkawm nasa ve a, Becky hi chuan M. Ed a zir mek thung. Nula lian leh thau lam, khal zet mai a ni a. A nelawmin a nui duh a, a bula awm a nuam takzet. Nguri pawn chu chu ania a ngainat chhan. Damdawiin atanga an haw tur gate bula an din lai chuan Mapuia haw tur kha a rawn kal ve mek a. An han inhmu leh chu an innuih ringawt. 

"In haw dawn mi? " Mapuia chuan a ti satliah a. An lo bu nghat. 

"Bus-in maw? "

"Aw" Becky chuan a ti a. 

"Ka lo thlah ang che u.. Lo kal ru.. " Mapuia chuan a ti a. Becky leh Nguri chu an inen ren rawn a. Bus chep zeta chuan ai chuan tiin Mapuia sawmna chu an hnar ta lo. Mapuia carah chuan a hnungah thu lutin an awmna hmun an sawi a. 

"Aizawlah in awmna a rei tawh em? " tih vel leh eng nge an zir tih vel te chu an inzawt a. Hming te pawh an inhrilh sap sap a. Mapuia hi Lawmsanga aiin a ú hlek a, Lawmsanga nen an intiat thuak ang, ngo lam, lu buk deuh tak, mipa ve tak, inchei duhdah ve thei tak a ni a. Ngaihsam ve lam, thiante erawh ngaihsak tak, nula mi em em lo a ni. Tlem lai khan nupui a ru ve ringawt a, a nupui ruk chhungte khan an nu chu a tukah la la an rawn la chhuak a, palai han tir ngial mah se; rem thei hek lo. A bansan ta mai a. Hmeichhia zawk chuan a la rawn hnâr reng thin naa a ngaihsak tawh lem lo. A vannei a, a ú boral ta ai hi Department pakhatah a lut a. A hmingin hlawh a nei ve a nih chu.. Nu leh pa te kara khawsa tih takah kum lamah naupangchhia vak tawh lo mah se; a la puitling tehchiam lo. 

Nguri te hostel kawtah a ding a, "Kan la inhmu leh ang chu" tiin an inthlah ta hlawm a. Mapuia chuan Nguri chu a ngaihtuah zui ta rauh rauh mai. A ngawichawi zet leh a changa a rawn tawng ve zauh te, a nui ri te chu a bengah zuk cham tlat a! Amah pawn mak a inti. "A va ho e aw" a ti leh ringawt zel a. A nui leh suk thin. In a thleng a, a inbual a, zanriah an ei zui nghal. 

"Ngurpui.. "Number hriat ngai loh a ni. A chhang lo. A hnuah a rawn call ta a. A pick up duh chuang lo. Vawi li zet a rawn call takah chuan pawimawh te pawh a ni thei tiin a pick ta hram a. Joela lek! A dah leh hman ţêp a ni. 

"Ka va ngai che ve" a rawn ti a. A rui tih a tawngkam atangin a hriat. 

"In nu ngai zawk rawh" a lo ti hmak a. 

"Kan nu hi min hnawhbosak daih tur awm se ka ti" a la ti tak deuh deuh. 

"I â tawh anih chu" tih leh phone dah a rual a. Joela number thar chu a block leh nghal hmak. Tihbuai fo a duh lo, a ngai thei lo. A nêm leh mai ang tih a hlau. A la dam chiang si lo va. Lehkha a zir a, a zir zawhah tuilum in lehin mu turin a inbuatsaih a. Becky erawh a hnar leh súk súk tawh. Ani hi zawng ei leh mut lam hi a awlsam ve a. A awhawm phian mai. A muhil leh thei lawk lo va, thil hlui ngaihtuahin a meng leh kar mai. Zing dar 2 a rik meuh chuan a thinrim hlur tawh. A mut chhuak miah lo chu amah pawn mak a ti. Chhunah a muhil pawh a ni si lo. A thu hlawl a, zun zunga va chhuah a tum lai takin thawm mak tak a hre ta a. An hostel hi chhawng li niin, an ni hi a chung ber Senior block-ah an awm a. A hnuai ber erawh Dining hall niin, an inkara blockah chuan college naupang an awm thung. An blockah hian single room 12 a awm a, an luah khat vek a ni. Ei leh in a tha a, fees pawh a to ve angreng. A beng chu a han chhi ngun leh deuh a.. An block hi balcony in a hual vek a, a mutna bul bathlar atanga thawm chu rawn chhuak niin a hria. A hlau deuh a, zawi tea ke pen ri niin a hria. A thu ta reng a, parda keuhin a va bih ngam teuh si lo. Amah chiah chu muhil lo awmchhun a nih ngei pawh a ring. A ngaichang leh vang vang a, chutah lehlam bathroom panna kawngka pui zawitea inhawng ri a hre ta.. A hmui a hup vat. 

Hmeichhe hlang an nih vangin an fimkhur ve a; dar 10-ah chuan kawngkapui zawng zawng an kalh vek tawh thin. A nih chuan lehlam kawngkapui chu kalh a ni lo tihna mawni le.. Zawitea ke pen ri thlep thlep chuan a rawn tibuai leh a. A room kawngka chu a inkalh tih a hmu. Becky pek hi a room kalhna chang a hre thin lo va, ani hi a lo kalh lo leh ang em tih a rilruah a rawn lut nghal. Chutah ke pen ri chu a rawn hnai zel a, zan reiah chuan a ring duh khawp mai. Kawngka hnuai awl lai atang chuan hlim thla chu a va hmu ta a.. Au chhuah mai a duh tawh rum rum, mahse, ngaihchan a la nei tlat si.. A hlauh ang ngeiin Becky room kawngka chu a inhawng ta a.. Kawngka chîk ri chu muhil kaihthawhna tham ni lo mah se; Nguri bengah chuan ring tak a ni. Hlau viau mah se, amahah turtu a awm bawk nen.. Chemte hi chu a kawl ve reng thin a, chawhmeh leh thei ilo channa chemte bakah chemte lian hret leh zum ve tak hi a kawl ve ran zel a. Chu chemte chu thawm dim em emim a la a, a hum nghet kher mai. Ke lawngin zawi theihtawpin a pen a, a room kawngka kalhna chu engtin nge ri lovin a hawn tak ang le.. A maimichhing vang vang a, thawm chu a ngaichang leh. A reh hmak bawk si. Hlimthla kha a hmu chiang ngang bawk si. Becky lah a la hnâr súk súk bawk nen.. Kawngka kalhna a vuan chiah tihin Becky chu a rawn rak ta hluai mai a. Chumi lai chuh chuan kawngka chu a hawng rawk a, Becky roomah chuan chemte lek kawh chung chuan a inkhawh lut nghal. A hlauh ang ngeiin hmai tuam pakhat hian Becky hmui chu hupin a nghawngah a lo rek a. Mahse, nguri a rawn hmuh chuan a tawp ve nghal mai. Khur hlawk hlawk chungin, "Tu nge i nih? " a ti khur dat dat a. 

Becky a rawn au tial ruan nghal..mi dang ho pawh an rawn harh ta nge ni thawm a ri ta nuai nuai a. Misual chu tlan chhuah tumin kawngka lam chu a rawn pan a, Mahse, Nguri chuan a chemte chuan a lo tin ve tlat! 

Mi dang ho rawn lut ta bawk nen, mipa mah nise, hmeichhe rual 12 lai chu a ngam ta bik lo nge, chhuah pawh a tum ta bik lo aniang. Chhuatah chuan a thu ta ringawt a. Nguri chuan, "Police call ru.. Warden be bawk ula" a ti nghat a. Chu pa lam chu hawi lehin, "I hmai tuamna kha phelh rawh" a ti vin thak. Mi dang an awm tawh bawk a, a hlau tawh bik lo. Phelh lo ngam hek lo le.. A phelh ta a, an hmuh meuh chuan mak tiin an hmui an hup far mai. An hostel piah lawka awm, an hostel neitu te fapa nen pawh inkawm reng reng, Vena a lo ni reng mai! 

Warden a rawn kal chuan ani pawn mak a ti nasa.. "Eng nge awmzia? Vena" a ti hluai a. Vena lah chu a rui nge ni a meng sen rúm a, a bu deuh lâk lâk bawk. 

Police an rawn thleng a, an la ta a. Tumah an muhil tawh lo. Mak an tih thu bak sawi tur an hre lo. Vena thianpa Jeremy pawn mak a ti ngang mai. A rui sual aniang te a han ti ngawt a! Ni chiahin an hre bawk si lo. A tukah erawh Police te ka atangin thudik chu an hrechhuak ta a. Vena inpuan dan chuan, Hosteller ho nen an inkawm ve fo vangin Becky haihawtzia leh kawngka kalh theihnghilh a hratzia an sawi atangin ani damdawi a ruka ti ve, pawisa mamawh si chuan Becky chu rawk a tum a lo nia! Tlai khaw thim hnu, kawngka an la kalh hma si khan hostel bula in ruak pakhat atangin Hostelah chuan hrui hmangin a inkhai lut a lo nia.. A vanneih asiamin a luhna lam kawngkapui kha an kalh lo hlauh bawk nen.. Kalh lo pawh nise kar chhiat a lo tum tho a lo nia.. Chutiang kual vel chu a ni thil kalhmang chu.. Tin, Nguri a lar phah ta tlat! Amah chuan a duh hauh lo, mahse, an hosteller zinga pakhat hmanhmawh fal deuh chuan an hostela rukru lo lut, Nguri'n chemte hmanga a vau zàm thu chu a lo post pek a! A darh chak ngang mai. A thlalak te thlenga post siam a ni ta chu Nguri chu a lawm lo hle zawk mai. Mahse, a darh tawh a, tihtheih a nei si lo. Becky pawh a chungah a lawm fâl khawp mai. 

Mapuia'n Nguri chungchang a hmuh ve chuan a phu zawk mai. A lo ngaihtuah ruk reuh reuh ngei kha a lo ni si a. A be chak kher mai. A number a nei der si lo. Lawmsanga bulah pawh a sawi ta nghe nghe a, Lawmsanga chuan ngun zeta Nguri hmel thlir chung chuan, "Ka hria he nu hi, mi pa a ngaizawng tawh" a ti ta mai a! Mapuia a phu zawk. A thinrim lek lek hial! 

"Eng a?! Engtin? " a ti hluai a. 

"Chaw kan ei khawm tumin kan room bul cabin an rawn book tawh alawm.. A bialpa chu ka mi hriatchian deuh pasal a nia.. I hria ang.. Kha Nu Marami fanu Thanpuii pasal kha" a ti ta mawlh mawlh a. Mapuia a zawi rawih rawih mai. A mood a chhe nghal vek thei. Mi pasal ngaihzawn ching a lo vei ve ringawt chu zahthlak a tih piah lamah a na tel bawk. A hrilhhai ngei mai. Mahse, Lawmsanga chuan, "An inthen tawh maithei.. A rei ve leh deuh tawh a" a ti sup a. A mitmeng chu hriatthiam hleihtheih lohin a rawng a inthlak a.. mapuia eraeh chuan a hmu lem lo. 

"Inthen tawh pawh nise, mi pasal khalh chul hnute chu a" a lo ti hmuk. An sawi zui tawh lo. Lawmsanga pawh a tha chho hret hret a, in lama hawn a chak tawh em vangin Doctor te remti chiah lo chungin an inla chhuak ve ta a. Anmahni in luah kha chu a chhungten an lo tiruak vek tawh a. A pa te in lamah a room ngaiah a tawm leh ta khar mai. A tawng tam lo chi a nih piah lamah a thil tawn nen a tawng khât kher mai. A chhungte erawh chuan hrethiam takin an dawm a. A nu mawlh hi a fakawm, a ngaihsakin a vil reng peih a, a ei chak zawng tur nise a lam khawmsak zung zung reng a, Lawmsanga fapa Vanropuia, Bawihte tia an koh lah chu Lawmsanga farnu leh u te chuan duat namen lohin an duat bawk. A nu ngai hmanin an siam meuh lo tihtheih a ni. Lawmsanga erawh chuan a fapa pawh a la kuah hleithei meuh lo a ni e. A chezia erawh thlir nuam a ti thung. 

Ruthi kha a uirena pa nen khan an inkawp zui ta kha a nia. Mahse, a uirena Johny chhungte khan an lo ngaithei vak lo ni tur a ni, an innghirngho ta zeuh zeuh. Johny hi pathlawi tho niin a fa erawh a nupui hluiin a kawl thung. A sarhu lai chuan an la hlim nupa ve viau naa, a rei telh telh a, dipdaltu an nei ta fo si.. Tin, Ruthi chhungte lam hian an fanu chu an rawn ngaihsak zui duh miah lo a, Ruthi tan pawh tawrh tlawk tlawk bak tihtheih a awm rih meuh lo a ni e. A fapa a hrechhuak ve fo a, Lawmsanga pawh. Lawmsanga chetsual dante pawh a lo hre ve a, va kan chi ni hek lo, a ruk chuan a ngaihtuah ve hle tho. Mahse, a ti tawh a, a kal sual laklawh tawh a, a vawn tawh chu thlah a tum bik lo. Johny chuan thawh em em a nei bik lo a, chu chuan an khawsak a tiharsa zual, han indang ringawt dawn se thawhchhuah an nei mang si lo. A buaithlak kual vel vek tawh a ni mai e. 

"Saw tah zawk sawn chawl ang. An noodles soup a tui" Becky chuan Nguri chu a kai dawt dawt a, an thlan hliam tawh mai. An bazar nasa bawk a, an bawr angreng viau. Nguri pawh chuan a zui ve mai a, Restaurant an luh chuan an lo khat angreng viau a. Thlanglam ber dawhkan chu panin thuthmun an rem ve nghal a. Waiterin a rawn vil nghal vat. Eitur an chah zawh rual chuan, "In dam maw? ' a rawn ti a. An hawi rual ţhawt.. Mapuia kha a lo nia! A nui sâng bawk. Becky chuan a lo be sawk sawk a, thu turin a lo ti ve a. 

"Ka ei zo tawh a, ka chhuak dawn chiah.. In number min pek phal chuan ka lawm ngawt ang. " zâm hmel zet hian a ti a. Becky chuan Nguri melh ralh chungin, "A tha lawm.. " tiin a number chu a sawi a. Nguri erawh a ngawi tlat. Mapuia zak leh hrilhhai chuan, "Ka lawm lutuk e " tiin hmai uang lo zetin a kalsan ta a. A rilru chuan, "Ve a.. I thiannu kha ka dil tho ang" a ti nghut nghut a. 

"A star tlat chein ka hria.. Mapuia khan" Becky chuan Nguri melh chung chuan a ti sar sar a. Nguri a ner sak. 

"A lerh vang anih kha" a ti nghat a. Eitur a lo thlen vangin ngawi rengin an ei dun ta malh malh a. He Ngurnunsangi hi hmeichhe vawt tak a ni reng tawh dawn em ni? 

Zanah Mapuia chuan Becky chu text-in Nguri number chu a dil ta chiah a. Becky chuan hreh hle mah se, nuam a ti si lo. A pe ta nge nge a. Mapuia chu a lawm viau. A rilrua riak reng thil erawh a awm. Chu chuan a rawn mawlh leh thut thin. "Ho em mai.. Nupui tur pawh ni chuang lo" tiin Nguri number chu hmet chhuakin, "I tha maw.. Mapuia kha ka nia" tiin a va text ta nghal a. 

Nguri'n a msg dawn a hmuh chuan a ner sak.. He Mapuia hi a lerh ru tlata hriatna a nei, chutih rualin thian tha tak tur ni pawn a hre tho. A seen a, a chhang lo. Thil a ziak laklawh bawk nen. A hnuah a phone a han en leh chuan a meng phawk kher mai. Mapuia hnen atang chuan, "Eng nge nia i inhriat? Lal fanu maw? Heheh.. Mi pasal chen chul tawh hnu hian ka induh e te i tih le? " tih thu hi a dawng a nih chu! A khur dawt dawt nghal a, a thin a na vawng vawng bawk. A rin aiin a chanchin zahpuiawm zet chu a darh a nih dawn hi.. 

"Tuman min chen chul lo" ti zawngin a reply ve. 

"Ka hre vek alawm.. Cabin in book te.. Engkim.. In inthen tawh em? " tiin a rawn reply a. 

"Tu sawi nge? " a va ti a. 

"Ka hmu che mawle" a la rawn ti zui! A rilruin a dap kual a, khawiah nge Mapuia nen an inhmuh tawh tihte.. A ngaihna a hrethiam lo kher mai. Mahse, a sawi dik lo si lo. A heh pet fan fan chungin, "Ni e, mi pasal chu ka lo ngaizawng tawh thin alawm.. Chutiang anih vang chuan min hmusit duh suh. Ka nun chu ka thu thu" tiin a reply ve leh a. 

Mapuia chuan, "Va confi reuh e" ti rilru chungin.. 

"Ka hmusit lo che. Mahse, ka bia che a, min reply ve la" a va ti a. 

"Min betu apiang reply hi ka ba lo" a rawn ti leh hmak. Tah zet chuan Mapuia a thinrim tawh hle, tawngkam chhe pui pui a hmang ang tih hlauin a dah ta ringawt a. Thawk a la hawk mai. Rin aiin a khirh zêk dawn a ni maithei. Mi pasal ngaizawng tawh hmeichhia chu a vei tlat bawk si, a laka a induhtawk poh leh hnaih a chak ting si.. Awmdan tur pawh a hrethiam tawh lo. 

Nguri pawh a inngaihtuah buai ve khawp mai. Tu tuin nge a chanchin chu hria ang tihah a buai a. A hah takzet a ni. Thup bo hlen theih tak tak hi a lo awm lo reng reng a, a tihsual phuba chuan a rawn umzui ta nge nge niin a ngai. Joela a haw thar leh a, a bum thiamzia kha mi te hian hre ve se an dem a ring bik lo. Mahse, ni e, a thiam loh a ni te a han ti leh ngawt zel a. Amah chauh pawh chuan a zak ngawih ngawih a ni ber mai. 

"Hmeichhe vawt, induhtawk lutuk a lo nia. Ve khanglang a. Ka la kherh thlu awm e" Mapuia chuan Lawmsanga bulah a ti bawrh bawrh a. Lawmsanga a khi suk. 

"Tu emaw sava a ni zawk a ni lo maw? " a ti duh lek a. 

"Ka hre lo. An inthen tawh leh tawh loh a sawi si lo va. Ka tibuai tho ang, min tihdan hi ka duh lo bur, tihian ka zunah ka uaitir sauh sauh ang a, ka ching let ve ang" tumruh zetin a lo ti a. 

Lawmsanga chuan a mitah tak rawn melhin, "Phuba lak nan hmeichhia hman loh tur. Thianpa.. I duh takzet anih chuan dimdawih takin le" a ti sup a. Mapuia a lo hamhaih deuh. 

"Dimdawih chi pawh a nih hrep loh hi.. A chapo si" a lo ti vak a. 

"A vawh nachhan hriat kan tum hmasa phawt ang.. Chuan, hneh dan kawng a awm ngei ngei ang" Lawmsanga chuan a ti nghet charh a. Mapuia'n nui chungin, "Pathlawi tharlam nge nge.. Ka ring a che.. " a ti a. A khi var var mai. Lawmsanga mitmengah erawh tawrhna a lang.. Pathlawi tharlam a nih vang nge thil dang vang? Tu nge hria.. 

(Tawk mai aw.. ML ka khel ve leh a. Sorry. In duhkhawp lo ka hria.. Kan la ti chho zel ang chu le.. 😍