THUTIAM 1

THUTIAM… (Chapter - 1)

Written by: Toni Râlte

"Hei hi hmangaihna a ni lo. Nawmchenna a ni.. I hrethiam em? " titu mitmeng rum el awl zet chu a melh let ve ran a. A heh a pet fan fan bawk. A nuih a zat loh êm vangin a nui sak a. A mitmeng erawh tawrhna hlirin a khat thung. 

"Nawmchenna mai maw ka lo nih a?! Hehe.. Aw le.. A tha.. " a ti salh a. A hmaa ding mipa chu a rum nghut. Rawn hnaih leh hretin, "Enteh, ka nupuiin engkim a hriat hmaa kan chinfel a ngai a ni. I hriatthiam a ngai.. Khawngaihin" tlema ngenngawl deuh hlek hian a ti ta a. 

"Ka nupui ka then dawn i tihna kha kar khat êm pawh a la liam si lo va.. Okay, mipa dawihzep hi mamawhna ka nei ta bik lo ve. Dam takin le" a bag a la a, auh zui hman rual lohin a chhuak ta a. 

Ngurnunsangi hi kum 25-a upa a ni a, kum hmasa lamah M. Com zo tawhin, tunah B. Ed a training leh mek thung. Nula sa tha lam, hleitling ve tak a ni a. Nula hmeltha em em tia sawi theih tur chi zawng a ni lo, a vun a nung a, a ngo paw phak bawk. A mitmeng hi a lian lo va, a zim lam a pawl mah, a hmai hi hmai phek kan tih ang chi cher lam a ni a. A mizia pawh harhvâng ve tak, tawng duh leh thian ngah ve tak a ni. Chhungkaw pangngai tak an ni a, hausa lua lo mah se; rual an awt em em bik lo. Hnahthial khua an ni a, Aizawlah hostelah awmin chhungte chawmhlawmin zirna a la chhunzawm ve a ni. Ngaihzawng lamah a vanduai deuh nge a tleirawl ngaihzawngin a phatsan a, a awl vang vang hnuah mipakhat a tawng leh a, thla 6 lai an inzui ve hnuah a bialpa chuan a lo kawp leh a! A beidawng ta deuh nge ngaihzawng lam a ngaihsak ta vak lo. Mahse, thla thum liam ta khan a nun zawng zawng tidanglamtu a tawng ta tlat mai a. Tu dang ni lo vin an zirtirtu an Sir Joela a ni. Nitin hmu fo mah se; a lo en liam mai thin a. Mahse, ni khat a material zawnga Library-a hun a hman rei deuh avangin a inpeih meuh chuan a lo tlai duai tawh a. Taxi a vangin bus lah a kal daih tawh si. 

An Sir Joela chu haw turin a lo inpuahchah ve mek a, ani hawihai chu rawn hmuin chuang ve turin a sawm a. Hnar phal ta bik hek lo, an inphur ta a. Khata tang khan an Sir chuan a sawm ta fo a, a remchang bawk nen a chuang ta fô. An titi nasa thin a, an sawi duhzawng a inang a, an nuihpui duhzawng pawh a danglam lo. An inngaina ta viau mai. Zirtirtu leh zirlai ni mah se, puitling ve ve an ni tawh a, number te inpetawnin an inbe ve ta fo a. Ngurpuii hi eng emaw changa han drinks ve zauh ching a ni bawk a. Friday tlai khat chu Sir Joela chuan dine out puiah a sawm a. Ani Hostel mess ning ta reng reng chu a lo châk sakhai a. An chhuak dun ta a. Chutah chuan beer leh whisky in dunin, an titi leh nasa ngang mai. Hostel gate khar hun an pel ta duai mai. 

Riahna tur chhungte chu nei bawk mah se; Joela chuan tum a lo nei ru sa ran a ni mahna. Cabin a book ta a. Ngurpuii chu kai deuh chiai tawh mah se; chhia leh tha hre lo khawpa rui chhia a ni lem lo. Joela chu a ngaina viau tawh nain, mi pasal a nihna chuan a thinlungah mawlhtu a la siamsak tho va. Room pakhata an han awm dun takah chuan, Joela chuan, "Kan nu nen kan inthen a. Ka nun a ruakin ka khua a har ve lutuk a, kawmhlimtu ka mamawh a. Min hrethiam rawh" a ti ta a. An inthen tih a hre miah lo, a hmain a sawi bawk si lo va. 

"Ngati nge in inthen? " a tih chuan, 

"Inthen kan tumna hi a rei tawh alawm.. Ka hmangaih vanga nei ka ni lo miau a.. Kan hlim dun thei si lo va. Mahse, inhau thinrimin a chhuak lo, tha takin kan sawi dun a, chuan min chhuahsan" felfai takin Joela chuan a ti a. Nguri chuan mak a ti angreng hle. Chhungkaw hlim tak an nih a lo rin vei nen. 

Whisky an han in belh leh a, Nguri pawh a kai ta viau. Khuma Joela'n a bawh thluk lai chu a mang hriat ruai ruai.. 

"Ka duh lo a nia.. Min tilui suh aw" a ti ţâwk ţâwk a.. Joela pawh chu tha taka a bula rawn mu thla vein, "I duh lo chung chu ka khawih lo vang che. Thlamuang deuhin muhil rawh" tiin duat zetin a rawn chul a. A chatthla zui ta mai. Mahse, khami zan khan Joela khan a khawih miah lo tak tak a, chu tak chu a thinlung hnehtu a ni zui ta a ni. Kar khat a liam leh meuh chuan an inngaizawng ta der mai. Mi pasal ni lo va pathlawi ngaizawng nia a inhriat vangin inthiam lohna leh tisual nia inngaih lohna a nei, Joela lahin a nupui ten bungrua an rawn lak thu te a hrilh zel mai bawk si. An awmna veng lo inang lo nen, Joela te veng lamah hmelhriat a nei lem lo bawk a. Tichuan, lungmuang takin an zirtirtupa zúnah chuan a uai zui ta kha a nia. 

Thla hnih an inzui hnuah a thiannu, Joela te veng thenawma awmin a rawn call a. 

"Sir Joela nen hian in ni ve tak tak mi? An nu a nasa ania aw.. A hriat vaih chuan" a rawn ti ta mai a. A thiante leh a zirpui te lakah an inthup ve êm vangin innel satliahah an ngai ve vek a, mahse, inthup zawh loh hun an nei lo thei ta lo aniang e.. A thiannu meuhin a rawn zawh danah.. 

"Maw?! An nu a? An nu hlui alawm" a lo ti bah nak a. 

"Mawli, an inthen reng reng lo. Niminah pawh lungphunnah an rawn kal dun rawl rawl alawm le.. Nang hi bumin i awm chiang" a rawn ti ta mai a. Nguri a khur der der.. 

"A van mak em em.. An inthen sia".. A ti ringawt a. Phone a dah zui. A sa chhuak vek. Joela a biak a ngai. A call nghal a, a ring ral thak. Chumi zan chuan Joela a reh zankhua, ani erawh a muhil mang lo. Mi pawmlai ngaizawng tur hian ngaihtuahna a la sêng chhin ngai lo. Bumin a awm a, a tal chhuak thei ang em tih chu a rilruah a lian ber. A ţap lo va, thinrimna leh tlawm intihnain a khat. A tuk class chawlh a ni bawk si, a thawh rualin Joela morning wish a dawng nghal. A ner sak. 

"Engkim ka hre vek tawh. Bumhmangpa" a va ti thawr a. A seen lawk lo lehnghal. 

"I sawi awmzia ka hre lo" tiin a la rawn reply ngam! 

"Nupui i then awzawng lo. Min lo bum char char a" 

"Chawhnuah chhuak ila.. Kan sawi dun dawn nia" a rawn ti. Hei hi chu a ngai vein a hria. Hnial a tum ta bik lo. Rilru helhkam ţúnin chawhma chhung hun a hmang a. Chawhnuah Joela chuan a rawn lam a. An inhmuh fona hmun lam an pan nghal. An tlan chhung zawng a tu amah an tawng lo. 

"Chami'n engkim min rawn hrilh vek.. In nu kha i lo then ngai reng reng lo va.. Dawt min lo hrilh char char a.. Engvang nge? " Cottage an thlen hnuah Nguri chuan a ti ta phiar phiar a. Ngun deuha rawn melhin, "Min ngaidam rawh. Ka duh em che a, khatianga ka tih loh kha chuan min duh ka ring lo a ni.. Ka tihpalh.. Ka siam tha vek ang" a ti mawlh mawlh a. Nguri a thu hnawk.. Dawt nise a lo tih ruk ngawih ngawih kha thudik a lo ni si. Awmdan tur pawh a hre lo. 

"Anih chuan inthen ang" a ti tham chhal a. A rang arangin Joela'n a rawn kuah nghal thlawp. A angchhunga awm nawmzia leh thlamuanthlakzia lo hre tawhtu tan chuan lo nam sawn chu a harsa lam a ni. 

"Ka thei lo.. Enteh, Ngurpui, ka nei ang che. Neih che ka duh. Ka nupui hi vawi tam then ka tum alawm.. A chhuak duh tlat si lo va.. Tihngaihna ka hre tawh lo a ni" a ti sup sup a. A tawngkam chhuak chuan a lem anna reng a nei lo. A mitmeng lah a tak ngal bawk si. 

"Nupui nei lai ka kawp duh lo" a ti sap a.. A mittui a hru pah zauh bawk. 

"Hun tlem min pe la, ka then ang. Mualpho pawh huamin.. Ka tiam a che. Ka then ang" a ti ta sek sek a. Nguri tan ngaihtuahna sen thiam a harsa ngang mai. Joela bulah hian a lo hlimin tu dang mah a ngai ngai lo va, Sex hial pawh an hmang dun tawh. A ring em em a, Joela lah rinhlelhawmin a awm ngai si lo. Nguri tan chuan ui leh i reng a nei ngai lo va, Cosmetic tha tak tak a hman phak ngai loh zawng zawngte khi Joela leisak vek an ni.. A ei chak leh duhzawng apiang ihe lo va rawn pe thintu pawh Joela.. A dammawh hritlan changa Damdawiina hruai thintu pawh Joela.. Hostela a awmpui ten a vanneihzia an sawi khum chamchi chhan pawh Joela tho. Eng nge a tih ang tih a hrethiam lo. Tuna a bula a awm lai pawh hian a ngai ngawih ngawih tho si. Mahse, lehlam a han thlir a, tu emaw pasal a tawmpui a, A bialpa lahin zantin a nupui a mutpui a. Engtin tehlul nge a tawrh theih ang? A rilru a mang vek a ni ber. 

A rawn kuah leh a, a hnungzanga chul hliau hliauin, "Min ring rawh.. Tun chiah. Hun tlem min pe rawh.. Tihnat che ka duh lo. Ka nupui tur i ni" a ti dam thlap a. Nguri a tuiral leh ta. Joela hi a lo ngaina hman êm a ni. Thinrima chhuak si kha hawn lamah erawh beiseina zahpuiawm zet nen a haw ta kha a nia. 

Khata tang phei kha chuan Joela chuan a ngaihsak zual a, hnar leh then harsa lutuk takin a rawn tilungawi thiam nasa mai. Nguri erawh chuan rilru nawm lohna pai ru reng chungin a hun a hmang lo thei lo. A thiante leh zirtirtu dangte pawh a zah ru ţhúm vek a. A rukin an sawi sep sep turah te a ngai a, Joela zawk hian a hnemin thlamuang turin a hrilh chamchi thin. College lamah an inhmu ta ngai lo va, phurh pawh an inphur ngai tawh lo. Mahse, zan han riah chhuah chang erawh an nei zeuh zeuh. Joela'n a nupui a then hun chu a nghak ve tawp mai a ni. Mahse, ni khat chu call dengkhawng zet a dawng ta. 

"Hello" a tih rual rualin, "Ngurnunsangi maw i nih? Kei hi Joela nupui Thanpuii ka ni e. Ka rawn biak chhan che chu i hriat ka ring. Ka pasal hi tuma ţwmpui ka duh lo va, i bansan vat lo a nih chuan i chhungte mai bakah Institution thlengin i chanchin an hria ang. Joela hian min hmangaih a, nang zawk hian i rawn zar reng tih a sawi a.. I lo bansan dawn nia. Nula te in la ni ve si a, a zahthlak aw" tham lo zetin a rawn ti nghal bawrh bawrh a. 

A kha a chih a, a dang a awk nghal. "Ih.. Ih.. " a ti tham ţiak a. 

"Tun hi ka rawn biak vawikhatna che leh a tawpna anih ka beisei.. Nu nasa ka nih hi. Ka ti ang ka tih chu ka ti ngei ang" a rawn ti leh hmiah. Phone a dah nghal. Nguri a chhing sawk. Joela huatna hlirin a khat. A nupui kha demna a nei lo, ani pawh nise amah ai khan a nasa zawk maithei. Mahse, Joela'n "Aman min zar" tia a lo sawi chu na a ti a, a ten ngawih ngawih. Chiang takin hei hi a hria, a bialpa hi a bansan a ngai tih hi. A inhumruh a, van lam hawiin, "Min pui rawh aw" a ti sep a. Joela number hmet chhuakin a call zui ta nghal a. 

An inthen hlim kar hnih chhung vel chu a nuamsam lo tluan thak. Eng tih mah nuam a ti lo va, khawvel chu a ning a, ninawm chu a ning a ni ber. Thian kawm a chak lo va, amaha a tawrhna hmachhawna tawrh tlawk tlawk chu nuam a ti ber. A tap thei ngai miah lo chu hrehawm a ti zawk. Zan khat erawh hostelah zu a chah sauh sauh a. A in ta nghek a, chumi zan chuan bathroomah tui herh hawin a ţap ta bawrh bawrh a. Thawl khatin a thawl ta. A thianten a mize danglam thut chhan an zawhna chu a ning a, biak lohah te a tlak tawp thin. Inbunruah a ngai tih zawng a hria, mahse, kha thawnthu tuihnai lo zet sawi tur khan a chak tawh lo, a zak a, a tlawm vawng vawng a ni. Hetiang a ni chung pawh hian Joela chu a ngai em em reng a, engkimah a block fai vek a. An thlalak tam tak erawh a delete phal ngang lo. Huat hlen a duh a, a hmangaih bawk si. A hun tawn mek chu a hrethiam a, hriatthiam loh a châk a, a hrethiam si.. Mi zawng zawng chuan an hawisanin an nuihsan niin a hria a. Lamtang tumah nei miah lo va khawvel hmachhawn tawrhhlelhawmzia a hre chiang hle.. Lehkha a zir thei lo va, class lak lai te hian eng nge an sawi hriat miah loh chang a nei thin. Ni e, Ngurnunsangi hi a kehsawm vek a, a thinlung kehchhe mek chuan vawn tur a dap ruai a, tumah a ruala kal duh a hmu lo. A natna hrethiama dawmkang theitu a hmu lo.. A beidawng mai dawn em ni? Zan khat a ippik lutuk leh a tawt lutuk chuan a kut leh chemte a chuktuah ran a. Mahse, Call a dawng tlat! A nu a ni. 

"I pa hi a lung tha lo a chhuak leh a, mahse, ngaihtuahawm a ni lo aw.. Nang mah kha dam tha la.. Lo ngaihtuah suh. " a rawn tih lehzel phei chuan au nghek nghek a chak.. Hostela awm a ni si, a rem ţeuh si lo. Mahse, "Nu, ka tha alawm.. Lo inenkawltha rawh u.. " a ti nghet charh a. A phone vawnna kut te chu a khur der der.. Mahse, hei hi a chiang. A damkhawchhuah a ngai. A chhungte hian an mamawh. A chhungte bak neih a nei tawh lo va, an tan khawvel a hmachhawn tur a ni tih hi a thinlungah chiang takin a rawn lang a ni. Chumi zan chuan tui takin a muhil ve thei ta. Nguri, kan lawmpui a che. 

Mahse, chuti maia dam nghal vâk chu thil theih a ni lo va. A mize hmasa neih let leh tumin a bei phawt a. Thian a kawm chho tan leh a, thil a ei tha bawk. Tihluihna nen lehkha a zir a, a nui lui a, hun awl neih loh hram a tum. Hma a sawn ve hret hret zel e. An class-a Joela a lo luh tum erawh chuan a lungphu a rang thin. Miin an rawn en thup ni ten a hre thin. Joela erawh danglamna nei awm pawhin a lang lo va, a hma ang thoin lecture a pe mawlh mawlh mai zel. Chutianga engahmah ngai miah lo anga a hmachhawn thei bik chuan Nguri chapona a kai chhuak lo thei ta bik lo va.. "Khanglang a! Ani pawn danglamna tel lo va min hmachhawn theih chuan ka theih lohna chhan tur ka hre lo ve" tiin amah leh amah a infuih a. Kar loah danglamna a nei ta bik lo.. Chu tak chuan Joela a tidanglam ve thung. 

"Lawmsang, i harh em? Hei.. Thianpa" tia sawi nawk nawktu chu a han hmu phe ruai.. Tu nge a nih a hre thei mai lo. 

"Ti nge hetia i awm? Mipa takin le.. Bawiha" a rawn ti leh a. A aw atang chuan tu nge tih a hre thei ta. A thiantha ber Mapuia a ni. Chet a tum a, a zawi vek bawk si. A malpui dinglam erawh a na ngut ngut thung. A ka atanga zu rim rawn nam leh huk chu tawrh harsa a ti hle. A ner leh sak thin. Mapuia leh mi dang te chuan motor atang chuan engtin tin emaw an la chhuak a, ani erawh ngawi ngul chungin an tih ang ang chuan a awm ve tawp. Engmah ngaihtuah a duh lo, ni e, awm tawpa mutthilh a chak ber. 

A harh leh chuan damdawiinah a lo mu a. A ka tui lo zet chuan a luak a tichhuak kher mai. A nu hmel a han hmu hmasa ber a, khawngaih hmel zet hian a rawn melh kiau a. Chutah a pa a rawn lang ve zat.. 

"Nu" a ti hrâwih a. 

"Eih ah.. Bawiha, ka va lawm em.. I lo harh chu.. I ril a tam em? " a lo ti nghal sawt sawt a. A pum ruahzia a hre nghal. Mahse, engmah a ei chak lo. Thawh mai a tum chu a mu leh thlawrh, a pa chuan a lo dawm vat. 

"Thawh tum suh.. I duh sawi mai rawh" a nu chuan a rawn ti vat a. A malpui an cher khawng ut chu a hre thei. A lu pawh an tuam naa, a lu na erawh a hre lo. 

"Tui" a ti sup a. A rawn tulh vat. 

"Ti nge hetia ka awm? " a ti tham ţuak a. A pa chuan a rawn melh vang vang a.. A pa mitmeng atang chuan thil awmzia a hrechhuak nghal. A chhing sawk.. Ni e, hetia a awm chhan chu a hrechiang khawp mai. Rawn meng lehin, "Khaw nge ka fapa? " a ti chang rút a. 

"I nau ten an awmpui e.. Ngaihtuah suh.. Bawiha" a nu chuan a ti leh vat. 

A chhing vang vang a. Nimin lawka thil thleng chu a mitthlaah a rawn lang ta uar uar a. Ni e, kum 3 liamtaah khan laklawh vang liau liauin a hmangaih miah loh nupuiah a nei a. A nula mi ve bawk a, sex ah fihlim hek lo; zan hnih khat a kawp lawp lawp pawh an tam.. Chung zinga hmeichhe pakhat, a bialnu ni miah lo chuan a fa a pai ta tlat si a. A pa, pa azawnga pa tha leh fahrah siam duh lotu khan nei turin a nawr a. Han sualin zu te pawh han in ve lawp lawp thin mah se; a pa hi chu a zah ve êm a. Tin, kha hmeichhia a fa paitu kha nula hmeltha leh a duhzawng tak a lo ni ve tho bawk a, inngaihzawnna tel lo mah se; neih mai a hnial ta bik lo a. Tichuan, mi tlemte sawmin tiam tlat e tiin thu an tiam ve ta phawt kha a nia. A pa in an inneih atanga thla 3-naah, " Puitlin zir nan a tha e.. " tiin an in atanga hla vak lo va, anmahni in tho chu a luahtir a. An nupa rek te chuan an luah dun ve ta rak rak mai. Amah Lawmsanga hi an chhungkaw black sheep tih takah zirna a chhunzawm tawh lo nen, eizawnna mumal tak a nei lo va. A pa bawkin a eizawnna tur ngaihtuahsakin taxi a leisak a. Chu chu khalhin a thawh chhuah ang ang chu an nupa chuan an kham khawp ve viau. Tin, an hlim dun ve thei rak rak viau. Zan tin khum khata mu duna innâwk reng leh tuk zana chawhlui kil dun ta na na nâ chu inhmangaihna pawh a lo piang lo thei ta lo va. Lawmsanga phei chu a tlangval laiin han lerh ziai ziai thin mah se; nupui a neih takah chuan lerh leh nula han melh kual vel chu a bansan hmiah a, tin, mipa rilru sakhat a ni bawk a. A nupui chu a thiam ang tawkin a duatin a hmangaih ve hle. Mipa zei tak zawng ni lo mah se; a theihtawp chhuahna chuan rah tha a chhuah ve zel e. An nu Ruthi pawh chuan a pasal chu a ringin amahah a innghat pumhlum hle. Han inhnialin han invin deuh hlawk hlawk thin mah se; Lawmsanga a thinrim tawh tih a hriat chuan ngawih lamah a ramtang ve mai zel a. Chu chuan nupa nun duhawm tak a hring chhuak lo thei lo. Hun a kal ve zel a, Ruthi pawh chuan fapa duhawm zet a hring ta. Lawmsanga lawm lutuk chu a driver puite eitur a leisak chiam a niawm e. A nu leh pa bakah a unau te lam lah lawm bawk. Duat rawn a ni ngei dawn e. Ruthi pawh a inhliam nasa lem lo, nau buchip chhung chu a nu te in lamah an insawn rih nghe nghe. Lawmsanga a chhuah ziah a ngai si a, buaipuitu nei hek lo. Chutiang chuan hringnun duhawm leh vul chúk hnuaiah chu chhungkua te chuan hringnun an chhiar ve zel a. An fapa Vanropuia pawn kum khat a tling ve ta.. Lawmsanga chuan a atchilh thawthang a ni ber e. A fapa pawn a ngai. 

Vanropuia'n kum 2 a rawn tlin atang khan vanduaina chhum chuan Lawmsang te pafa chungah thla a rawn zar chho tan a. Nitin a la service a, sum pawh a khawl ve hlek hlek tawh. Ruthi nungchang erawh a danglam hret hret, Lawmsanga, mi ring bur chi chuan lo chîk hek lo. A nupui nungchang danglam ta chu a hre lawk lo. Mahse, zan khat nupa nun hmanpui a han tum chu, a lo ţeu hlar a. "Ka peih lo" a lo tih khum hmak. Chutah chuan nupa nun an hman khâtzia a hrechhuak chiah. A fapa a atchilhna lamah nupa nun lam a lo ngaihthah ve deuh a ni mahna.. A ngaihtuah chho zel a, Ruthi thinchhe thar thut te, han inhnial changa a bak hlar te leh a cho ta riau zel te chu a ngaihtuah ta zel a. 

"Ka ngaihsak tha lo a niang e" tiin a inhnem a. Ngaihsak that tumin ngaihtuahna pawh a seng chho, thawmhnaw leh make up eng emaw te a leisak chho leh a. Ruthi pawh a lawm thiam viau. Nupa nun pawh an hmang leh thei ta. Lawmsanga ngaih pawh a tha chho tan a.. Mawlhtu pawh a nei ta rih lo. 

Mahse, kar a liam a, tlai khat a haw lam an thenawmnu office bang a phur haw chuan a beng verh zawng tak a sawi ta tlat mai. 

"In nu hi ngaihven deuh teh. I chhuah atanga rei vak loah hian mipakhat hi a rawn kal ziah ania.. Ka sawi dawt thei lo naa, ngaih tihthatna chi a ni lo" a ti ta râwt a. A tha a khur der der thei. 

"A thiante an niang" te chu a'n ti tak naa.. A rilru chu a so bulh bulh mai. 

"Kamtamah min ngai lo la, kan pa takngial pawn a sawi tawh a, ngaihthah chi niin ka hre lo. Ka fapa ang tho i nia.. Ka lo na ve deuh a" an thenawmnu chuan a ti leh a. A chhang tawh lo. Dawt a sawi a ring lo bur.. Fiah ngei a tum. Zanah chuan rinhlelhna nei miah lo angin a awm lui hram hram a. A insanmarna lamah a hah vekin a hria. Mut pawh a hmu tha meuh lo. A tukah chuan a ngai ang bawkin a chhuak leh ta a. Mahse, an in atanga hmuh phak lohah a ding a, ke in an in lam chu a pan ta a. An thenawmte inah a lut a, an tlangval lo awm bulah, "Vawiin chu thil fiah ka duh a" a ti hmiah. A lo hrethiam khawp mai. A nghak vang vang a, rei a ti tawh kher mai. 

"Vawiin chu a rawn kal dawn lo mawni le.. " thenawm tlangval chuan a ti sup a. A sawi lai mek chuan, an in kawta bike ding dat chu hriain an hawi rual ţhawt. An inmelh dun sak a. 

Inah chu tlangval chu lutin kawngka chu an kalh nghal thlap. Rei tawk fang an thut leh hnuah thenawm tlangval Siama nen chuan inthurual ang hrimin an chhuak a, an in kawngka chu an va kik ta dat dat a. Thawm a ri dat dat a, rei ve deuh hnuah kawngka chu an rawn hawng ta a. Ruthi'n Lawmsanga hmel a hmuh chuan a hnungtawlh nghal dawrh. A sam a phelh phang a, zu rim a nam rum rum bawk. Room atang chuan tlangval kha a lo chhuak a, ani pawh a hamhaih ve kher mai. Lawmsanga chu a chiâi hlek lo thung, a nupui chu panin a vawi khat nan a hmaiah a beng ta ţhuai a, chumi rual deuhthaw chuan tlangval chu a kawr awmah va ţhâmin, "Ka that dawn che" tih leh hnek a rual nghal. An ri ta luai luai mai. Thenawm khawvengte an rawn tlan khawm a; an rawn pawt then.. Ruthi leh tlangval chu in atanga nam chhuakin bike chuan an inphur chhuak ta a. Lawmsanga erawh a ã huih mai. A meng sen rúm a, tualthah chak hmel a pu ngawih ngawih. Han hnem liai liai mah se, tuma thusawi chu a hre thei lo. A nu leh pate an rawn lang a, a pa chuan tawngtaina a hmang thlap.. Lawmsanga thin eraeh a so a ni. A zak a, a zak ngawih ngawih.. Tlawm a intihna chuan a kher ngut ngut a; mi zawng zawngin an ngainep dawn niin a hria. Zanriah chu a nu te in lamah ei turin an chho a, mahse, a ei thei lo. A lem thei ngaang lo. A fapa pawh a kuah hleithei lo. A nu te buai lai deuh chuhin a chhuak zauh a, a taxi chu khalhin chak zetin pan lam pawh nei loin a tlanchhuak a. A thiantha ber Mapuia rawn len tum nen an intawk a, mahse, a tlan pel. Mapuia chuan a umzui ve vat. Thinlung so bulh bulh, uiresan anih inhriaa na ngawih ngawih Lawmsanga chuan a hmaa traffic point chu melh ngat ngatin a steering chu a vuan a. Chak zeta tlanin vawi leh khatah a su ta bur mai. A thi ngei tur a ni. Ni e, thih tuma he thil hi ti a ni. 

Mahse, Lawmsanga a la dam..! Pathian remruat a ni mahna.. 

(Duhtawk phawt aw.. Ka la dam fel chiah lo va. A har rih 😍😢