Lawmsangpuii

LAWMSANGPUII.. 

Ziaktu: Toni Rãlte

Amahah chuan mi dang aia mawina leh duhawmna engmah a awm lo. Chutih a hnêkin zu a in ţhin! A zu rui zaidam lohzia leh kut ramzia chu mi naran tana ngaih theih chi a ni lo. Mahse, ka kalsan thei tlat si lo! A bul chu hei hi a ni. 

Bialnu ka nei a, a hming chu Feli a ni. Dik tak chuan, mi rethei tak kan ni hran lo va, hausa uchuak lah kan ni hek lo. A hmingin hna ka nei ve a, ka hlawh chu ka pualin ka dah thei. A chhan chu ka nu hi health worker niin, ka pa erawh College pakhata Principal a ni. Farnu pathum ka nei a, kei hi a upa ber ka ni. Mipa awmchhun ka ni bawk. Ka farnu te zingah ka nau chiah hian pasal a nei tawh a, pakhat hi phaiah hnathawkin a awm a. Kan te ber erawh MA a la zir ve mek. Pathian zarah kan hrisel a, fel em em lo mah ila, malsawmna kan dawng ti mai ang, kan tluang ve riau. Kum 36-na ka hmang mek a,ka nu hian mo a awt khawp a, kei lah ka la tlangval ziai ziai mai si. Ka bialnu Feli hi kan veng thenawma awm niin, keini ai chuan an khawsak a harsa hlek.. A ú mipa hi addict a ni a, chhungkua a rawk ve nasa. Amah Feli hi chu lehkha a zir tawh lo va, a sumdawng ve thin. Phai lam dawr chi a ni a, lu zo veh vawh, tawngkam thiam tak leh nelawm tak a ni. Ka ngaihzawn chhan tak erawh a hmel hi a ni maithei. A hmeltha, hmai tung lam, ngo tak leh nui mawi zet a ni. A pa hi nikum khan cancer vangin a boral a, a nu hoin a ú leh a nau tleirawl te nen an khawsa ve naw naw a. A nu hi 4th grade a ni a, a hlawh beitham tak chu a ú vangin a zo nghal zel si a. Kei tak pawh hian a sum pai ang zawng pawn ka pui ve nasa thin. Zep thu a cheng lo, a nu nen hian min ngaizawng emaw tih mai tur khawpin min duhsak a, ka duh hun hunah Feli chu ka hruai chhuak thei. Ni e, nupa ni si lo chungin kan inkhawih tawn fê tawh bawk. Damdawi erawh a ei a, a rai lo mai chauh a ni. Ka chhungte pawn an hre ve tawh a, a tirah chuan an iai deuhin ka hria. Mahse, kum 2 zet kan han inzui ve takah chuan ka nu ber ber chuan inneih a sawi fo zawk. Kei hian eng nge ka nghah ka hre lo, ti nge maw ni la tlangval châkna chuan min la hneh zel mai. Mahse, thla khat liamta khan palai kan tir ta nge nge a, a rem thlap. Thla thar ni 14-ah Biak in hawnga innei mai tur kan ni tawh. Dik tak chuan Dan Thianghlim-a inneih kan tlin tawh lo tih hrereng chunga Biak in hawnga insuih chu ka chhungrilah nuam tih lohna ka nei veng veng. Mahse, kan inru pawh a ni si lo va, a rai bawk si lo. Kohhranah inhawlh lawr em em lo mah ila, group angah te chuan nihna te pawh ka nei ve thlip thlep a, Dan hnihnaa inneih kha ka zak ta zawk a ni ber ang chu. Bakah amah Feli ber ber khan Dan thianghlim lo chu a duh bau si lo va, Mipui lam kan bum ta nge nge dawn anih hi. 

Mo kawr enin kan chhuak dawn a, ka thianpa Sammy a rawn thleg der tawh. Kei pawh ka inpeih ve nghal mai. Chawlh a ni bawk a, Feli thiannu Mali pawh a rawn tel ve thei ang. Feli te chu kan sawm phei a, a nalh leh hle mai. Ka thiannu Rengi te dawrah kan en dawn a, min lo welcome tha khawp mai. 

"Lo kal teh, hei a nalhzia hi" Feli'n a ti sar sar a. Ka va en ve a, k hrethiam ve vak lo. A mawi tih ber kha la se a tha a ni mai. 

Rengi chuan hnathawk pahnih a chhawr a, coffee a zuk laktir a. Coffee min rawn petu chu a ni Lawmsangpuii chu.. A cher chhe lo va, a vun chu a var, mahse, a nung lo. A sam chu a pixie a, a inhmeh viau mai. A sang viau bawk. A hmai chu a mam tha hle a, mahse, sawi tawh ang khan a vun chu a nung sârh lo tlat. Feli kuta coffee a va dah tur chu Rengi ui Bony a rawn tlan zawk a, cofffee chu Feli kekawrah a baw ta. Feli a ding nghal zawk. Lawmsangpuii chu a beng ta ţhuai a. 

"I va mawl ve, ka kekawr man tozia hi i hria em? " a ti ling hlar mai. Chuta Lawmsangi zia chu a nia ka sawi thiam loh. A dam thlap reuh a, Feli chu a melh kar thung. 

"Ka tihpalh. Khawngaihin ka lo hrufai ang" tih pahin tissue paper a la nghal a. Feli a tawlh hnung.. 

"I kut bawlhhlawh khan ka kekawr manto hi khawih hlek suh. Nangni ang mi mawl lutuk hi chu hnathawka chhawr chi pawh in ni lo" a ti leh hrep. Ka lo îp nasa tawh. Rengi'n min rawn mitmei chu ka hmu reng. Ka melh let tha ngam lo. Ka zak. 

Rengi zawk chuan, "Lawmpui, kal rawh. A zia lo hle mai, Feli chu.. Washroomah va tihuh lawk mai rawh" tih pahin wash room a kawhhmuh nghal. Lawmsangi chuan chiang zet hian min rawn melh a. Hriat tham mang loh hian, "Mipa vanduai" a ti sap a. A kal nal nal. Rengi bulah tu nge a nih ka zawt nghal a, Lawmsangi chu a pi leh pute bula seilian niin an khawsak a harsa ve deuh a, A MA zirna tur a lo intuak rih a lo nia! Kum khat a chawl rih dawn tihna a nih chu.. 

Feli zia chu mak ka ti thar hle. Khatiang khan mi chungtlak deuhin a awm ka hre ngai si lo. Min tizak hle a ni. A kekawr pawh kha ka nauin online shopping-ah a chah a, a duh aia a tet deuh vangin Feli a pek kha a ni reng sia! Ka mood chu chhe tak a ni. Rei pawh kan awm lo. Rengi tak pawh chu a zahawm, Mali pawn nuam a ti chiah lo tih a lang reng mai. Sammy erawh thil thlen lai khan phone a hmang daih a, engmah a rawn hre ve lo. Mo kawr pawh chu kan la ta rih lo. A duhthusam a hmu miau si lo va. Chawhnu lam a ni bawk a, kan ril a tam deuh tawh nen, Restaurant-ah kan lut a. An lo tam angreng nen, kan nghak rei. Kan thutkhawm thep thawp lai chuan, mipa ka la hmuh ngai loh hian Feli chu a rawn bia a. 

"I va zin khât ta ve.. I awm loh chuan a reh thei lutuk, Lalawma pawn a sawi reng che. " a ti puat puat a. Feli hmel chu a pha deuh hian ka hria, "Nia, ka buai ve deuh a. Ka zin rih lo. Nangni pawh inngaihawm tawp" a ti ve luam a. Chu pa lah chu kal mai ta lo chuan, "Lalawma i block nge? Nangni hi in lo inthen leh tawh mi? A be thei lo che" a ti ta mai a. Ka kang zawt. 

"Block mai mai lo. I ho em mai, kan ni hleinem.. Thian alawm ani te chu" a lo ti let ve a. Mahse, a mitmeng chuan thil tam tak a sawi. A mitmeiin chu pa chu a khap nasa bawk a, chu pa pawh chu lu hiat nuah nuah chungin a kal sawn ta a. 

Tum bãr chungin, "A zak lo e.. Min hai aniang" Feli chuan a ti a. Ka nui hawk. Inchhuahchhalhna hun a ni lo bawk a, ka ngawi tlang thei hram. Sammy leh Mali lakah chuan te chem chemin ka inhria. Vawiin kan chhuak chu engmah a fuh lo. Feli pawh a ţawng phar phar ta lo khawp mai. Kan boruak hrethiamin kan inei puar zawhah Sammy chuan Mali chu a thlah zui ta nghal a. Keini erawh cottage ka book a, roomah kan awm ta ran mai. 

"Sawifiah phalsak i ni" ka ti a. Dik tak chuan Lawmsangi a ankhum atang khan ka hmu nep ta riau a, mahse, innei mai tawh tur kan ni si a. Puitling taka hmachhawn hram hram ka tum chauh a ni. Kha pa rawn lan hnuah phei chuan ka dik lo zo vek tawh. 

A heh a pet fan fan a, "Engmah a ni lo ka tih kha.. Min rinhlelh ka ring reng a" a ti duh lek a. Ka duhkhawp lo nasa. 

"Ni lo se kha pa khan khati bawl bawl khan a sawi lo vang. Thudik sawi la, ngaihdam che ka tum ang" ka ti a. Ka thinlung erawh hel tak a ni. 

Ka kut a rawn vuan a, "Ka tihpalh a ni. Nia, kan zin lai khan kan inkawp ve zuai a. Amah khan engkimah min pui bawk nen.. Mahse, kan inbe tawh ngai lo. Ka block a" a ti ta a. Thudik ka han hre ta chu ka tawt up up.. Kei hian hmeichhe dang kawp tur hmu lo ka ni bik lo. Mahse, ka rinawm ve tlat. Chu chu min tinatu a ni ta zawk a ni. Lo kawpsanin lo lerhsan ve ziai ziai thin chu ni ila keima lam inen letin ka na lutuk tur pawh a zia deuh ang. Mahse, ka kawpsan teuh si lo va, a na ve a, a tlawmthlak ve khawp mai. 

"Eng nge thleng tawh" khuma thut hnawk pahin ka ti a. Ka aw pawh a chang lam hret a ni. 

Aw lawi rât hian, "Engmah a thleng lo. Fawh chu kan infawp" a ti a. A khur der derin ka hria. Ka nupui ni mai tawh tur chu a ni si a. Tawrh a va harsa tak. Ka inhum ruh a, inthunun tum zetin, "Innei mai tur kan ni a. Tun tum chu ka ngaidam ang che. Mahse, rinhlelhawma i awm leh anih chuan ka ban san ang. Engkim" ka ti nghut a. A bu nghat nghat mai. Lawmsangpuii a tawngkhum danah pawh ka khak a, a ngawi reng. Eng thil mah ti loin kan haw ta a. Rilru a dam hlawl lo a ni e. 

Zanah pawh ka leng ta lo. Min rawn call sek avangin ka la ve hram a, ka be tha peih lo a ni ber e. Games te ka khel ta vel mai mai a. Dar 8 bawrah Sammya'n min lo call a, "Bro, min lo hruai mai teh. Bike khalh chi ka ni tlat lo, duh aiin ka nawi" a rawn ti. A awmna hmun ka zawt a, phur fahran lo chuan ka chhuak ta a. Ani hi chu han nawi leh zauh chang a nei a, chutih thu loah chuan mi fel leh rintlak tak a ni. Aizawl daiah daih a awm vangin ka tlan rei ve deuh. In mal ding kawtah an lo inhawr khawm a, an intibuai mawni chu aw ka ti rilru.. Ka va pan ve nghal a. Hmeichhe thinrim ang thawm ka hre zui nghal. 

"Nang mipa khan ka taksa dap theihna i nei lo. Tin, ruk ka ru ngai lo, ka bag i check tawh a, a tawk aw. I duh leh Police ko rawh" a lo ti tân tân a. A hmel ka va hmuh chuan ka ding chawt. Lawmsangpuii kha a ni tlat! A thinrim hmel chu a ling hlar mai a. A sam a thlah hniang a, torn jeans a ha a, a inhmeh zêk. A hmaa ding mipa chu a melh vâwt vâwt a, a thinrim tih a chiang khawp mai. 

"Nang lo la tur an awm lo. Ka bula thu i nia, midang tumah an rawn thu ve lo" mipa chuan sehchilh deuh hian a lo ti ve bawk a. Eng emaw tak chu a bo a ni. 

Sammy pawh ka va hmu, a lo thlir ve reng ringawt. Lawmsangi chuan a kutzungchala chu pa kawh pah chuan, "A nih chuan ka taksaa i phone i hmuh loh chuan, stationah min zui a ngai ang. Min dap rawh le" tiin a phar vah a. Cho zetin a melh bawk. An rui nawi hlawm si a, dikin ka hre ta lo va. Ka inrawlh ta ngawt. 

"Ngawi teh u, thiante u, a fel lo riau.. Hei ka pi hian dap zawk teh se.. " ka va ti a. Lawmsangi'n min rawn hmuh chuan mak ti hmel a pu. Hmeichhia lo awm ve chu nu upa lam deuh a ni a, in neitu a ni maithei. A dap ta a, a uluk khawp mai. Mahse, engmah a hmu lo. Mahse, mipa chu a la lungawi thei chuang lo, "Khawiah nge i thuhrúk hman a

. rawn la rawh" a la ti hram.. 

Lawmsangi thianpa niawm tak chuan, "I ti mah mah a ni, thianpa, a tawk.. Lawmpuii hian ruk a ru ngai lo. Kan duh loh thleng thleng min nawr suh" a ti ve ta a. Mipa chuan pawr lutukin, "I duh a mi a? I va pawr ve" tih leh hnek a rual ta mai.. Chutah zet chuan an phek buai ta, an inphek sual ni berin ka hria. Kei pawh min rawn su thuak thuak mai. Sammy ka va pan nghal a, a lo za ve em em lehnghal. Mahse, ka kai hrang ta daih a. Lawmsangi chu mipa ang mai a ni. A theihtawpin a sual ve ngar ngar nia! Dika ka hriat loh vangin thei leh thei loin ka va pawt hrang ta a, a chak hrep lehnghal. Sammy nen an inphek sual chu thelh daih kan han tum ngial a, an rui tawh si, a harsa lam a ni. Mahse, in neitupa a ni ngei ang, chempui a va la lawk a. 

"Tawp rawh u. In tawp loh chuan ka hmuh hmuh ka sat dawn ania" a ti ta mai a. An ri nuai nuai tho naa, a insual tak chu an han ta deuh. Lawmsangi chuan a thiante a va pan vat a, "In na em? " a va ti nghal sawt sawt. A tira a inhauhpui kha va melhin, "Naktukah i duh leh FIR i thehlut dawn nia. Ka ngam aw". A ti leh ta ngat. He nula hi a huaisen tlat! A mize pakhat zawk ang kha a ni hlek lo. 

Sammya'n hawn a rawt ta si a, kan haw hmain Lawmsangi chu ka va bia a. 

"Hetah hian hmuh che ka inbeisei lo asin" ka ti hmiah. Mak ka ti em a ni. 

"I beiseina hmuna ka awm ring suh. Vanduaipa" a ti ram hmak. 

"Ka vanneihzia i hre lo anih kha" 

"Nupui sual neih chu vanduaina rapthlak tak a ni.. " tih pahin a kal daih. A va hawihhawm lo tak. Dawra a hawihhawm nen. Mahse, chumi zan chuan Lawmsangpuii hmel chu ka mitthla luahtu a ni ta tlat.. Ka la mangphan ta fô bawk. Ka inhmeh lo teh e. 

Ni 3 lai ka hmuh tawh loh hnuah tlai khat ka office bang Rengi dawrah ka peng a, Lawmsangi ka hmuh chak vang a ni pakhat. Hawn tumin a lo inbuatsaih mek a, a engahmah hmain, "Ka lo thlah ang che. In veng lamah ka kal dawn" ka ti tâwng a. A hawihai deuh. Rengi erawh a bialpain a rawn lam dawn. Rengi awm vang nge min hnial ngam lo aniang, ka chhuahpui thei hram. Motora kan luh hnuah, "Khawi nge in veng? " ka ti chu a meng râng teh e. 

"I hriat kha.. I kalna tur lam alawm" a ti ve hmak. Kan thu rei hle. A ning ta deuh aniang, a sawi ta nge nge a. Ka tlan nghal. 

"Ti nge zu i in? " ka ti a

"I hriat a tul viau em ni? " a ti leh hmiah. He nu hi mi kawlh a nih hi.. 

"Aw tul e.. Ka bialnu i la ni thut thei" ka ti ve ta hmiah. A nui hawk. 

"I nupui hual kha i nei ngam lo mi? " a ti ta a. 

"Hmalam hun kan hre hleinem" ka ti a. 

"Zu chu maw.. A ruih hi nuam hek.. Ruih zel pawh ka la tum" a ti hem mai. Ka melh hrâwk a, mahse, min en ve lo. 

"In tawh suh.. I inhmeh lo"

"Ka in ang" luhlul zetin a la ti zui.. 

"Ding rawh.. " a tih zawm nghal a. Ka ding ve mai. A chhuk a, na zeta rawn khar pahin, "Vanduaipa, ka lawm e. Min hnaih tum duh suh. " a ti fiah kâk a. A kal zui nghal. Min cho tlat, he nau hian.. Zanah Rengi hnenah a number ka dil a, "An veng lamah biak duh ka nei" tiin. Min pe ve mai. Ka call a, a ring ral thak thak. Msg ka hnutchhiah hreh ve deuh bawk si. Ka dah ta rih a. Feli te in lamah ka leng phei. Ka thlen hmain an inhau thawm ka hre ta a. Ka nghak ta rih. A ú hi a sual ve bawk nen, han rik laih hi an nei ve deuh reng a, thil mak pawh a ni lo. 

"Zorina pawh ka hrilh vek ang. Min pek duh loh chuan, hre rawh, i awm dan hi ka hai reng reng lo" a ú chuan a ti bawrh bawrh a. Ka hming a lam avang chuan ka beng ka chhi uluk ta deuh. Eng tak ni ang maw. 

A nu chuan, "Insum thin teh, i mak zozai lutuk, vawiinah pawh 500 ka pe che a, i fai leh thak tawh ania. A ni lo em em lutuk, Pasal nei mai tur a ni tawh a, thuam chhawm te pawh hi engtin nge kan tih dawn pawh ka hre tawh lo. Hetiang reng reng te chuan" a lo ti ve hlaih hlaih a. 

"A ho lutuk, chhawm vak a ngai lo, Zorina te an hausa tho. Bakah in inneih hlen pawh ka ring lo. I nundan tê hi i lerh êm mai" A u chuan a ti leh a. Ka lo insehruh vak ringawt. 

"Ka thawhchhuah ringa la nung ve mai mai i nih hi.. Nau zawkin ka chawm che a nia. I zak thlawt lo mi? Ka nundanah hian sawi tur engmah i nei lo" Feli chuan a ti ta a. 

"Eee.. Chutiangtea min tih khanglan.. Addict mah ni ila, hna hi ka thawk lo bik lo aw. Lalnunfel, i tenawmzia hi ka hai lo aw. I phai zin changa i thlenna thin pawh ka hria, i zuk thlenchilh a, nupa ang chiahin alawm in zuk awm.. Mi hian thil an hria ania, ka hre lo emaw ti suh. Chuan, Aizawlah pawh a ruka i kawp an pawisa i eisak hi ka hre nual.. Zorina hian hria se chuan a nei hlek lo vang che. Naute in nia ka dawh hram hram che a, i bialpa Ramliana Officer nupui nen pawh in inhauh hrep tawh kha. Sum an neih chuan i duh zel, ka nu lah hian a lo duhpui zel che a, sum atchilh nufa lutuk, kei addict ai pawn in tenawm fê zawk aw" Feli Ú mapuia chuan a ti ta hrep mai le.. Ka bing mum mum a, ka tlu mai dawnin ka hria. Ka thu hriat chuan min shock lutuk tlat. Lalnunfeli chu ka lo va hrechiang lo ngai em.. Kei hi ka pa lo ngei mai, bum mai mai theihin ka lo awm tihna a nia. A rukin mi hian min lo nuihzat viau tawh ang em le.. Ka va zak êm.. An thusawi dang hre ngam tawh loin ka motor dahna lam ka pan ta hnak hnak a. Ka so bulh bulh mai. 

In ka thlen chuan ka nu te pawh an lo la meng a. Thut pawh ka thu lo, "Ka pa, inneih kha thulh tur aw" ka ti hrâwk a. Ka aw a lawi lek lek. Ka inkhawngaih takzet. Makti zetin min rawn en nghal thap. 

"Eng nge a awmzia? In inthen em ni? " ka pa chuan a ti a. 

"Ka then.. Keiman. Lalnunfeli saw ka nupui ni tlak a ni lo ve" ka ti ram hmak a. Ka room lam ka pan nghal. Ka pain Feli nu a lo call nghal aniang, Nu Lawmi chuan min rawn call nghal a. 

"Zorin, i pa nen kan inbia a, eng nge thil awmzia hi.. A ngaihna kan va hre lo vr" a rawn ti a. A tah a chhuah hmel hle. 

"I fanu kha ka duh ta lo a ni ber e. A chanchin ka hrechiang tawh a. I hrethiam maiin ka ring" ka ti tawp. Tawngkam hawihhawm hmang turin ka zaidamnain a tlin lo. 

"A va mak dawn ve aw.. Hetiang teh thut te chu.. Inngaihtuah chiang hram teh.. Khawngaihin" a rawn ti leh a. 

"Ka inngaihtuah tawh e. Neih ka tum lo" ka ti a. A tawng leh hmain ka hmet tawp ta a. Khumah a zangthal zawnga muin chunglam ka melh reng a, ka buai nuai nuai a ni ber. Thinrimna, zahna, mahni inkhawngaihna te chuan min tuam hlup hlup a ni ber e. Feli chu ka bulah chuan awm se ka beng duh hial mai thei. Chuti khawp chuan a lakah ka thinrim a ni. Sammy ka call a, "Thianpa, zu i nei em? Rawn keng teh aw. Ka mamawh tlat" ka ti hmiah. Min chhan hmain ka off zui nghal. 

Zu hi kum 7 liam ta khan ka nghei tawh. Beer erawh ka kawl reng a, ka in reng. A hard lam erawh ka pa ten min khak tak hnuah keima thuin ka thlah kha a nia. Mahse, zanin zet zawng beer mai mai chuan ka thluak a tinu pha dawn lo. Nu butin awm ila, Sammy bulah inbunruak ila ka thawl hawk ka ring. Sammy chuan min ngaipawimawh ngei mai, whisky nen a rawn lang zat. Thian hi chu kan heti tlat zel. Kan thlit mek laiin ka nu leh an rawn lut a, "Mama, khatiang zawng khan maw? A va pawi tak em.. I in a nih pawhin hun dangah chhunzawm suh aw" ka nu chuan a ti a. 

Ka chhang lo. Ka awmdan leh hmelhmai landan an hmuh chian em vangin zanin chu phalna min peah ka ngai. Phal lo mah se, ka in tho ang. Kan kai tan tihin Sammy bulah engkim chu ka sawi ta a. A chek leh hluk thin. Mak a ti ve hle anih hmel. 

"Thianpa, engpawhnise, a tlai hmaa i hrechhuak chu na hle mah se; a tha zawk. I pa tawk tih ka hria alawm.. I tuar rei lo vang. Thinrimna nen i tuar dawn bawk a.. Feli chu a! A mak hle mai. A lo inthup thei viau a nih hi" a ti ve sup sup a. Min hnem thiam lo mah se, min ngaithla a, ka thawl hawk tho. Um khat kan in zawh meuh chuan kan tha dun tawh hle.. Kan inah chuan a riak ve ta nghal law law a. 

Feli chuan min call zin em vang leh a insawifiahna msg ka dawn hnem em vangin loh theih lohin ka block ta a. Zep thu a cheng lo, kum 2 zet inzuia zahpui lo taka ka lo chhuahpui tawh a ni a, ka ngai lutuk. Mahse, ka ngaih apiangin a hmeltha tak phêna a túr pai ka hmuh tel zel tawh vangin Sammy sawi ang khan ka tuar thei viau zel. Ka nu te duh ang takin zu pawh ka in zawm ta rih lo. Hrehawm ber chu vantlang mi ten zawhna dengkhawng tak min zawt thin chu a ni. Kan innei dawn tih hria an tam si, kan thulh leh ta thut chu a chhan hriat chak tak tak hi an lo tam a. Mahse, "Aa.. Kan thulh ve tawp" tih bak chhanna erawh ka pe lem hlei law.. An la hre chhawm ve mai turah ngai ang. Feli chuan a lo tuar viau aniang, a lo dam lo vel a! Ka va kan awm lo e aw. Ka ten tel tlat erawh ka inthiam lo deuh thin. Chawlh ka la sauh sauh a, Khawchhak lamah Sammy nen kan zin ta daih. Ani hi chhungte an ngah a, thlen in turah kan buai lem lo. Kan zin chuan min chhawk khawp mai. Keimah tak pawh ka harh tha.. 

Lawmsangi kha ka lo hre chang tawh lo va, hriat chan thu awm hek lo. Mahse, ni khat ka phone ka hmet kual chu a number kha ka hmu ta a. Ka call nghal. Nupui atan ka duh a ni lo, a mize ngeng zet kha tlawm ka chak zek zek. A la ve mial. 

"Tu nge? " a ti nghal tâwng. 

"Keimah i bialpa tur kha" ka ti ve sak. 

"Ka hre lo chutiang" a ti a, a dah mai ka hlau si, "Vanduaipa kha " ka ti vat. A nui hak ri ka hre nghal. 

"Ve ngawt a che. Min lo call ve ringawt a" a ti a

"Ka vanduai zo tawh alawm.. Ka bem dawn che.. " ka ti ve hmawk hmawk. 

"In inthen tak tak law? "

"Chiang e"

"Hmm.. I tuar awm"

"Tuar ve tho e. Mahse, i awm a" 

"I zak lo"

"Ka zak lo"

"I chhia"

"Ka ţha"

Kan inhnial char char a ni mai. Mahse, ka hlim tlat! Nuam ka ti. Kawlh deuh deuha min chhang kha fak lo chhan let chu nuam tak a ni. Min haw tak tak lo niin ka hre bawk. Tu nge huat deuhte be peih bik ang? Kan zin ka haw a. A tukah Lawmsangi chu hmuh ka tum. Amah chuan a duh lo! 

Rengi te dawr bawk ka pan leh a, Rengi hi chuan Feli nen kan inkar a hre vek a. Lawmsangi chu a lo awm ngei. 

"Reng, Lawmpuii hi chhuahpui lawk la tum asin" ka tih chuan min rawn melh na ngat ngat ania. Ka hlau der si lo. 

"Aw kan buai loh lai tak ania. Va chhuak rawh u" a lo ti thliam bawk si. A hma zanin Rengi bulah ka lo sawi zauh tawh bawk a, ani hi chu min ú en ve em emtu leh ka thu hnial ngai lo a nia. Min hrethiam khawp mai. 

"Hawh le" tiin ka va melh a. Min chhiatkhum nghek. 

"Ka peih lo" a ti ram hmak a. 

"A mak.. Tau lo teh.. An hre vek tawh. Zah vak a ngai lo" tiin a banah ka va pawt a, a tang na viau naa, Rengi a awm ve bawk si. Kan chhuak leh ta nge nge. 

Cottage ka panpui leh tawp. A thinrim tek tek teh e. Mahse, zu ka lei lawk a, zu a hmuh chuan, "I zu hi chu ka insak ang che" a ti ham ham. 

"In rawh.. Amawii bak in hmu phak si lo.. Khatiang sap zu kha rui ve hrim hrim rawh" ka lo tih chuan, a sa leh phat. 

"Amawii ka in ngai lo aw.. Chhiaa" a ti a. Zu chu a thli nghal hmiah. A thawk khat piap a. A hmel chu ka'n en thin, ka lainat tlat. Zu bawiha a tang chu khai chhuah chaknain ka khat. 

"Lawmpui, fiamthu loin tak takin zu hi i nghei thei tawh lo mi? " ka ti ta tawp a. A mitmeng na zet chuan dam thlap siin min rawn melh a. 

"Thei " a ti sap a. 

"Kan inngaihzawn dawn phei chuan nghei daih la.. Zu in mi bialnu neih chu.. " ka ti a. 

A thinrim ka rin nen, a rim mang lo. Mahse, ka ban bulah a rawn hnek a, "Min ngaihzawn tum duh suh. I thei lo vang. Mipa tilawm tura piantir ve ka ni lo" a ti ta a. Ka bulah ka pawt thu a, "Ka duh che alawm.. Min duh ve tho kha" ka ti a. 

"I hmel chu a tha, tin, i zia hi ka duh bawk. Mahse, thian nih a tha zawk. Kan inthen leh hunah inhnialpui tur ka nei tawh lo vang.. Chuvang chuan inngaizawng hmingchhe tingtang lo vang" a ti kalh kalh. A hmui sen hiam chuan ka chil min lemtir khulh. Ka insum zo ta ngang lo va, ka pawt hnai a, "Ka fawp dawn che" tih leh fawh ka rual nghal. A che lo va, min fawp let ve hek lo. A nuam mai mai lo e a. 

"Min tih i tum em? " ka fawh zawh chuan a ti a. A frank lutuk chu ka lai deuh. 

"Tum ta ila" tiin ka va melh a. 

"A nih chuan a climax in tih fo hi ka hre ve duh aw" a ti a. A tho va, zu bawk a va in. Kei pawn ka lem ve. 

"I hre ngai lo mi? " ka ti hú a. 

"He thil ka hriat chak vanga sex hman ngawt pawh ka nei tawh. Mahse, play ka duh lo va, chuvang aniang ka hriat ve theih loh" a la ti ta deuh deuh

"Play i duh loh chuan, hriat a har ve ang chu.. Anih mi engzat nge i hmanpui tawh" he thil hi zawhna tul lo lutuk, mahse, mipain hmeichhe virgin lo kan zawh ziah ni si a niin ka hria. 

"Pathum" a ti tawi tâk a. Zu bawk a in leh. A in thei khawp mai. A rui awm pawn ka hre lo. 

A hmui a tuai a, "Hmeichhe zu rui hi an hur an tia, eng nge i ngaihdan? " a ti a. 

"Ka hrethiam lo. An hur kher chu ka ring lo" ka ti a. 

"An hur lo. Mahse, an easy,. " a lo ti leh mai. A nunzia awlsam puat puat lutuk chu mipa tan chuan iaiawm tak zawng a ni. Mahse, ka lainat! 

"Ti nge zu i in? " ka ti leh a. 

"I hre chak tak tak a nih hi.. Ka nu ka runluih mawle.. Naupang kum 2 mi lek kalsana pasal dang neitu fanu hi hmeichhe tha tak ka ni peih lo" a ti ta a. Ka man thiam ta deuh. Zu a rui tan ta bawk a, kan titi thei ta viau. Amah hi sâwn a ni a, a sawi tawh ang khan a nu chuan pasal a lo neihsan a niawm a. Kum 14 a nih laiin a nu bulah a va zin ve a, mahse, a pahrawn a sual bakah a tan hlauhthawnawm takin a khawsa thin a. A nu lahin a hlau si.. A pi leh pute bulah a khawsa a lo ni. A putean nupui a nei tawh a, mahse, a pi leh pu leh a putea chuan an duat ve viau a niawm e. An khawsak erawh a harsa lam hret a ni. Lehkha a thiam thei si a, MA zawh ve hram a duh vangin kum khat chhung a intuak mek a ni. 

Kan titi kan titi a, kan lo inhnaih ta hle. Ka fawp ta chawt a, lungtum fawh ang kha chu a ni ta bik lo e. Mahse, a zei miah lo. Ka khawih ang ang chuan a awm ve mai a. Play a duh miau si lo va, ka bung nghal chawt a ni ber. A rak lo va, a ngawi hmuk. Hmeichhe vawt tak a ni. Sex-ah chuan kan hlawhchham dun a ni ber e. Zirtir ngai a tam khawp mai. Kan zawh hnuah a in leh a, a kai lutuk ang tih ka hlau.. 

Kan hawn dawnah, inngaihzawnna lam bawk ka sawi leh a. 

"Inngaihzawn ai chuan sex friend ni zawk ang. Keiin zu, nangin sex" a ti hmiah mai. Mipa thenkhat tan chuan tenawm rawng a kai, an hmusit viau ngei ang. Mahse, ka infak lam ni lo se hmeichhia sex ka hmanpui theih ho hi ka hmusit ve lem lo va, mi hmusit tura thuneihna pek ka ni lo bawk. Mahse, a thu vuakthlak chu a rum lam hret chu a ni. Ka thlah haw nghal a. An in erawh ka lut lo. Ka hawn lamah ka ngaihtuah neuh neuh a, a zu duh dan ngaihtuah khan Feli ang chauh te hi a lo ni mai anga tih te thlengin ka ngaihtuah. Zu pe theitu chu a mutpui zel duh awm si a. Kei hi ti nge maw ka vanduai viau ni.. Kan office lama min melh no tak tak te leh kan veng chhunga nula tha tak tak min haw miah lotu te melh kana zu ngawlvei ber kher ka han duh ta tlat chu! Ka nu in hria se a ţêk khawpin ka ring. 

Kan inbe ta zeuh zeuh a. Weekend vawi hnih ka chhuahpui ta. Zan khat erawh a sual ta tlat. A kai phelh phawlh tawh si, kan riahna hmunah eitur ka order mai zel a. An rawn dah laiin ka inbual a, anin a lo dawng a. An inhau thawm ka hriat rualin ka inbual nghal sawk sawk. Ka va chhuah chuan, Lawmsangi chuan ka kawnghren hum chungin mipa chu a lo tin úr mai.. 

"Eng nge awmzia? " ka tih rual chuan, "He chhephaka hian min ît khanglang a. Ka hnute a rawn khawih khanglang a nih kha" a ti ta mai a. Ka sa ve zawk. Mahse, chu pa chuan min hlauh hmel si a, han tihzui vak ka duh ta lo.. Ka chhuahtir a, Lawmsangi chu ka pawm a, "Tikhan inngaizawng ang te chu i ti ve a, mipa dangin ka hnute an khawih pawn i kaltir thei ania. Khum laizawla mipa chiah ka duh lo" a ti bak hlar a. 

"Ka tihpalh. A inthiam loh em kha.. A thleng tawh lo vang. I kut hi a ram thin lutuk a, i sim a ngai" ka ti a. A samah ka chul a. A ni taka, kan awmdun hian a kut ka tuar nasa thin a, khin let chi a ni mang thin si lo. A kawlh ve tawk a ni. 

Chumi zan chuan ka mutpui thei lo. A tau zankhua thak. Mahse, a tukah chuan a harh a, zan ang em em chuan a sakei lo. Kan inhmu zing telh telh a. Ka duh tulh tulh. Ka buai tan ta. Ani lah hian min ngaih vak hmel si loh. Ti nge maw ka hneh theih miah loh le.. Friday zan a ni a, meeting turin ka chhuak a. Meeting kan tan hnu lawkah Lawmsangi'n a rawn call… 

Ka chhuak a, "Kan meeting… " ka tih rualin, "Min lo hruai loh chuan min pawngsual dawn ania.. " a ti ta mai. Ka lungphu chu rang tak a ni. 

A awmna ka zawt a. Kal lo thei ka ni lo. Ka thiante hmaah chuan ka pha ta tawp a. Chak zetin ka tlan chhuak nghal. WBR lam hi chu a lun thin teh e. A awmna lai tak ka hre thei si lo, min va hrawk nasa tak.. A hnuah amah zawk chu a rawn kal ta a. Min hmuh rualin min kuah thlawp.. A ţap nghal hlap hlap.. Lawmsangi a ţap ve nia! A hlau hle aniang, a khur der der bawk. Motora ka luhpui hnuah, "Mipa dang zu in pui tawh suh ka ti mawlh mawlh alawm.. I zawm duh lo anih kha" ka ti a. Ka lung a awi chiah lo a ni. 

"Ka thiante nen kan chhuak alawm..lam belh turin an kal a, ka kal ve peih lo va, chuan mipa pathum an rawn kal ve a. Hlauh enah ka en lo, mahse, min khawih ta mai a.. Ka tlanchhia a. Ka biru ta a ni" a ti a. A inhnit faih faih. Ka khawngaih tho bawk si, ka va pawm leh rih a.. 

An in kan thleng a. A chhuk dawnah min rawn melh a, "Ingaihzawn chu ka duh tawh e.. Ka hlauh lai ber leh ka lawm ber lai hian nangmah ka hrechhuak thin che a. Ka duh che anih ka ring" a ti sap a.. Ka chhan hmain a chhuk.. Ka hamhaih ve deuh bawk a ni. Chumi tum ka haw chu zangkhai tak ka ni. Ka hlim veng veng. Ka bialnu a nih chuan ka siamtha thei ang a, hmeichhe pangngai tak ka nihtir dawn a ni. 

Ni e, Kan han inngaizawng tak tak chu ka strict lutuk vang chiahin kan inhau thin. Mahse, a ziaa ka duh em em chu mipa ka nihna anga min zah ve chu a ni. Ka thinrim tawh chuan ngawih a chuh a, eng pawh ti dawn se, a chhuak dawn anih chuan min râwn thlap tawh. Zu pawh friday zanah chiah a in. Hei pawh a rei ang a, a in lo leh mai turah ka ngai. 

Feli kha ka sawi leh ta lo va. Pasal a um ta daih a. Phaia a bialpa kha a lo ni. Ka lawmpui thei tawh mai. Lawmsangpuii hian a khum zo vah vah em mai. Lawmpuii chu an inah pawh ka leng lut ta fo a, a piteii hi tawng duh leh phawk deuh a ni a, boruak a nuam thei hle. Kan inngaihzawn hnuah riah chhuah a duh ta lo va, sex lamah a khirh ve ta thung. Ka tuar hlethei thin lo. Mahse, ka thu a awih ka duh si chuan a thu ka zawm ve chang a awm tur a ni si. Kan boruak chu a nuam.. Thian pawh hmeichhia a nei ve tawh! A mize kawlh leh thinchhia te a sim ve hret hret bawk a. Hmuhnawm ti takin ka lo thlir thin.. 

Kan inah pawh a rawn leng ve tawh a, a hmain a mizia leh a thiltih zawng zawng ka chhungte ka hrilh tawh a, ka nu chu a hnual deuh naa, a nun a sim tawh thu ka sawi chuan a n ve leh ta deuh. 

"Mama, a tan missionary i ni tih hrereng ang che. I thlahthlam chuan a ngaiah a kir leh dawn" tia ka pain min hrilh tum chuan ka hnuk a ulh lek lek.. Ka tel lo va khawvel hmang tur chuan ka phal lo, ka ngaihtuah dawn lutuk. 

"M. A zir loin nakkum chu kan innei ang" ka va tih tum chuan.. 

"Ka nun ka la sim kim lo" a rawn ti! Ka bialnu hi chu aw… 

(Zawm ngai in tih chuan ka zawm ang.. Ka thluak leh thinlung a nâ.. Ka ziah zawm thei tawh rih lo.. Ka nachhawkna in lo ni e.. 😍