Zolawmsangi

ZOLAWMSANGI. 

Ziaktu: Toni Râlte

A hnute bial mum kèrh chu ka khal niap niap a. A thaw hap a. Meng diar diar chungin, "Hei bak chu thleng lo hram ang aw" a ti tham chhal a. Ka lo nui mai a. 

Ka ta chauh a ni. Ka hmeichhia a ni reng bawk ang. 

"Mama, Lawmpuii nen sawn in ni ve deuh ni maw? " ka u chuan a ti a. 

"Ni e" ka lo ti mawl tawp a. 

"Sawtiang nuthlawi, chuta kara i thianpa sâwn thlakna nu saw i duh a maw? " a vin lek lek. 

"Ka ngaipawimawh lo. Min mamawh alawm"

"A bum. Mai mai che nih chu.. I thianpa pawn a neih duh loh saw"

"Mipa ni hek lo" ka rilru dik tak ka sawi. 

Ni e, ka bialnu Zolawmsangi chu nuthlawi la naupang tak a ni a. Fapa a nei tawh. Ka thianpa Sawma fa a ni nghe nghe. An inngaihzawn lai pawh ka hria, ka rimpui fô! A rai tirha a hrilh hmasak ber pawh keimah ka ni. Sawma chuan an la naupan chhuanlamin titla turin a nawr anih kha.. Mahse, huaisen takin a pai tlang a. A chhungte dona leh thinrimna zawng zawng pal daiin fapa duhawm tak a nei ta a ni. Fapa a neih hma deuhin phaiah ka thil zir chhunzawm turin ka chhukthlaksan a. Kan inbe zeuh zeuh ringawt. Ka mawhphurhna ni tel ve deuha ka hriat vang pawh a ni maithei. Ka ph a bo vangin kan inbe zawm ta lo reng a, ka haw ta lawk bawk si lo nen. Kum 2 hnuah kan inhmu leh ta chauh. A fapa pawh a lo lian tawhin a duhawm khawp mai. Sawma lah hian a ngaihsak miah lo mawni. Lawmpuii nen chuan kan inhmu zen zen lo. Raipuar chungin a graduate kha a nia, IGNOU tangin MA a zo. A fapa awm pahin an restaurant a nghak thin. 

Kei pawh a hmingin hna chhete ka thawk ve a. Chhungkaw khawsak harsa em em kan ni bik lo bawk a, a zia tho mai. Kan office piah lawka an restaurant a awm avangin ka va chawl deuh reng zel a. Kawm a nuam a, kan sawi duhzawng a inang bawk nen. Kan inngaina khawp mai. A hma Sawma nen an nih lai atang khan kan inmil ve hrim hrim, Sawma chanchin min zawt ngai lo va, keimah zawkin zawh ka ching zawk. Sawma nen kan inkawm mang tawh lo bawk a. Mahse, ph vela inbiak zeuh zeuh chang chu kan nei tho. Bialnu a nei leh daih tawh a, a fapa a ngaihsak miah lo chu ngei chang ka nei fô!  

"Nizan chu Sawma'n min rawn be nawlh mai" Lawmpuii chuan ka hmaa eitur rawn chhawp pahin a ti a. 

"Hmm.. Chuan.. "

"Bawihtea thlalak min rawn dil a, ka lo pe ve mai.. "

"Thil dang? "

"Ka be zawm duh tawh lo va.. ". A mitah ka en a, Sawma sulhnu ka hmu lo. A dam tawh a niang. A rai tirha Sawma'n a phatsan lai kha chuan mu leh mal kha a nei vak ngai lo va. A tah loh leh a nui thin. Hnem vak dan ka thiam ngai bawk si lo. A hahthlak thei ania. 

"Lo let leh ta se.. "

"Ka duh lo"

"Mahse, i fapa pa a nia lawm"

"A ni tawh lo" a ti hmuk a. A hmai bial kèrh mai, ngo zet chu ka en reng a. A hmel hi tha em em tia sawi tur a ni hran lo. Mahse, a vun nalh a, a sam hi a tawi a, a kawi deuh bawk. A awm awmin a dah tawp naa a inhmeh phian. A lian lem lo bawk. 

Kei erawh 6'1 ft ka ni a, gym-ah ka kal ziah bawk nen ka inphut mawi tawk ve hle. Ka mitmeng hi a na mah mah an tih tur ang hi a nia. Mahse, hmeichhia ka hípna pawh a ni ve tho. Insawitheih vang ni miah lo vin tih tak zeta min duhtu hi ka tawng ve nual tawh, mahse, hmangaih ka la tawng lo nge ka la runthlak tehchiam ngai lo. Sex lamah hnuhma ka nei ve nual tawh bawk. Mipa na nâ na chu.. 

Zanriah kan ei kham hlawt ang tihin Sawma a lo lut hlawl a. Ka chhungte nen an inhmuh khat vangin an ri chul a. 

"Ka fapa min va hmuhpui la ka tia"

"A tha lawm" ka rilru chuan, "I duh loh kha" a lo ti a. Sawi chhuah kher eraeh tul ka ti lo. 

Lawmpuii te ina kan lut chu a zúm dâk mai a. An lo be hâwrh bawk lo nen. A ngeiawm ve èm bawk a ni. Engtin nge an inah pawh hian a la kal ngam ka ti zawk. Ka thianpa a ni ve miau bawk si. A fapa chu pawm a tum ve ngawt a. A lo duh mang hlek lo va. A zah hmel kher mai. 

Rei pawh kan awm lo. Hawn ka rawt vat a. Inbe mang lo vin kan haw leh daih. Nuam ka ti lo èm a ni. 

"Lawmpuii nen hian ni daih ula" ka melh kawk a. 

"Tak tak alawm.. in inmil em a, a hma pawh khan.. "

"Thiante sulhnu fan te chu a.. I ti ang lo em mai.. Thianpa" ka ti duh lek a. 

"I ngaina alawm" a ti hul hak a. Ka lo nui tawp. Dâwt chu a sawi lo. Ka ngaina. Mahse, ka ngaizawng lo. 

Khami zan atang khan mak deuh maiin Lawmi chu ka ngaihtuah ta fô a! A chhelzia te, a tum tlangzia te, a fapa a enkawl dan te leh a la naupan ngaihtuaha a puitlin reuhzia te ka hrechhuak zel. Ka duh chu ka ti ngam lo a. Mahse, kil khatah a cheng ve ta reng mai. Amah lah hian min ngai unaupa em em mai bawk si. 

Nikhat chu ka hnaah ka kal lo va, min lo call a. 

"Awii lo kal la ka tih nen. Bawihtea khuh rehthei lo hi entir ka duh a, i hun awlah min kalpui la ka ti ania" a rawn ti a. 

"A va pawi ve. Zanah te sawi tur alawm" ka lo ti a. 

"I awm loh chuan a reh" a rawn ti teh ngawt a. A dah nghal daih lehnghal. Eng tin emaw ka awm. 

A tuka ka kal chuan a lo kal lo ve thung. An dawrah chuan ka va chawl ve tho naa ka kim thlawt lo. 

"I awm lo va a reh" ka va ti ve a. Smiley a rawn dah tuar ringawt. A fapa chanchin ka zawt a. A that thu te a rawn sawi luam a. Zanah len ka tum thu ka hrilh ta a. 

A chhungte hi chuan min haw lem lo bawk a, kan inbe thiam viau. Sawma thianpa mah ni ila Lawmi lam ka tang tih an hre ve tlat alawm.. 

"Sawma hian min lo be reng a. Ka ning tawp"

"Block la ni mai lawm" ka lo ti nghut. Ka inhrethiam chiah bik lo. Ni dang chu nise engkim a that leh nan ka fuih leh ngei awm si a. 

"Chiah aw. Ka block dawn"

"Umm i thu thu" 

Ka hawn dawn chuan an varenda thleng min lo thlah a. Light eng hnuaiah chuan ngawi rengin kan inmelh vawng vawng ringawt. 

Harhchhuak thutin "Nih aw. Muttui" a ti sap a. Keia insum thei lo phèng chuan a banah ka va man a, ka lamah ka pawt hnai a, a inrin hmain a hmuiah ka chuks zauh a. "Muttui le" ka ti sup a. Hawi let tawh lo vin ka kal nal nal. Engtin tak min ngai ang maw.. 

In ka thlen hnuin ka ph ka hmet a. A msg a awm lo. Eng emaw rawn sawi turin ka duh a, a reh si. Ka insum thei thlawt lo va, "Ka tihpalh aw." Ka va ti ta a. 

"I tihluih anih kha"

"Ni ve tho"

" engvang nge"

"Ka hre tawh bik lo"

"Mawl suh aw"

"Eng nge awmzia? "

"Engmah.. Mawl suh a ni mai.. Muttui" a rawn ti a. A dah nghal daih. 

A tuka kan han inhmu leh chu kan lai em em ringawt. A lai hmel chu ka hmu hmel tha zual. Kei pawh eng ual chu ka ni lo. Tlaiah ka thlah haw a. 

"Sawi tha ang" ka ti ta tawp a. 

"Nia"

"Ih.. Pawi ka ti lo kei chuan"

"I thianpa fa neihna nu ka nih hi"

"Ka hria lawm"

"A tha lo. A dik lo alawm. Kan kal thui hmain tawpsan ang.. An hmusit lutuk ang che"

"Min duh tih ka hria. A tawk viau. Ka duh bawk che. A chhehvel chu dah tha rih ang"

" Din, hetiang chu a dik lo alawm"

"Anih chuan Sawma i la duh mi? "

"A teuh lo mai"

"Eng nge min daltu ber chu"

"Ka hre lo" a hmela mangang hmel chu ka va hmu thei. Motor ka tiding a. Dim tein a kut ka va chul a. 

"Engkim ka siam tha vek ang. Bul tan phawt ang" ka ti a. Ka rilru tak tak ka sawi. Lawmpuii, nula anga ka en tak hnu atanga ka thinlung a luah hnehzia hi a mak èm a ni. Ka duh hluah hluah ni berin ka hria. Nuthlawi ka hmuhsit vang ni lo vin nula hnahkhat ngat lo chu melh ngai lo ka ni. Chuta kara ka thianpa sulhnu hmeichhia ka lo duh ve em em hi keimahah thil eng emaw a thleng pawh a ni mahna.. Hunin a la hril ang chu. 

Tiang khan bul kan tan atanga vawiin thlengin harsatna lian tham em em tawk lo vin kan awm ve ta chu a nia. Min tihlim a, a bulah hian ka kim. Nuthlawi a nih vanga zei ni lo vin ka bialnu anihna zawk khan zak lo theiin a siam a, ka bulah chuan a no a, a pangchang a, min duat thiam leh em em bawk si. Sawma nen khan kum khat vel chiah an inzui hman a. A rai ta kha a nia. Keini kum 2 dawn kan inzui hnuah pawh sex hman a duh tlat lo hi hriatthiam loh lek lek chang chu ka nei thin. "Phatsan nih leh ka. Hlau a, ka inveng lawk" a ti mai zel a. Tlawmthlak tih chang ka nei. Ka chhungkua te chuan an hriatna a la rei lo a. An hriat rualin min zilhhau nghal pang chu ania!  

Nuthlawi anih piah lamah an mi hriatchian Sawma fa neihna a ni kher hi a buaithlak lai ber a ni ta. Keiin pawi ka tih loh nen. Nia, a chang erawh chuan sawma kutthlak hnu lo chenbel ve chu tlawmah ka lak chang a awm thin. Amah Sawma pawh rei tak chhung chu ka zah ru hle nghe nghe. Mahse, a duh lo a, a hnawl a, a kalsan tawh. A paih hnu ka lo chhar. Ve a ni mai a. Tihsualka neih awm ka hre lo. 

"Thiana, i lo mak hle mai. Thiante bialnu i chhuhsak a ni hawt alawm le" min rawn tih zan erawh chuan ka sa ve phat hman. 

"Inzawmna in nei tawh hleinem"

"Kan nei leh dawn alawm.. A fapa saw ka fapa anih saw, hrereng rawh"

"I duh lo va, i kalsan tawh alawm. I phatsan tawh hnu ka lo duat chu lawmthu min hrilh zwk rawh" ka ti ve sak a. Min chhang tawh lo. Lawmpui ka hrilh chuan a thinrim a. Amah ngeiin a biak tur thu a sawi a, rem ka ti lo. Ngawih mai a tha. 

Ka nu leh ka u (senior) hi an hnawk! Lawmi an sawichhe reng a. Then tura min ti dawt ngam si lo hian ka neih mai an hlau tih hriat tak siin an tawng thin. An bulah ka awm peih loh phah.

Chaw eia sawm an neih vangin ka haw hma a. Ka nu thiannu te chhungkuain chaw an lo ei dawn a niawm e. In ka thlen chuan an lo awm tawh a. 

"Hei a lo haw lawm.. Mama, hei i nu siami chu ania, hei i pa Rama, chuan hei hi an fanu neihchhun Nancy nih hi" a lo ti luam a. Ka nu tak hi chu a.. A phur thei si. 

Zanriah kan ei chhung chuan ka nu leh a thiannu chu an tawng char char a. A karah ka pate an tawng ve zauh zauh chauh. 

"Mama, nancy nen hian dawrah va kal lawk ru.. Hei hi Pu Hlana lo pe nghal la" ka nu a ni. Dawr kal chhan tur a awm tawp si lo. 

Nancy chu kan awmfal hnu chuan a danglam daih. A tawng bawrh bawrh a, a hmaa min hmuh daih tawh thu te, a thiante nena min lo star thin thu te a sawi ham ham a. Ka ning ru hman hle. 

"Sas i nei em? "A ti a. 

"Nei ve e". Ka ti. 

A tum nghal hmak. Zakthei lo ee.. 

A tuka tukthuan kan ei laiin ka nu chuan Nancy nen min sawi zawm phèt a tum. 

"Nancy te kha chu a fel ania aw. Mi biangbiak a thiam si, bawhzui ang che. A nu nen kan sawi fel vek tawh" 

"Nuuu" ka ti vak ringawt. 

"Vawiin tlaiah dinner in ei chhuak ang. Rem kan ruat vek tawh" 

"Nih tak chu" ka ti hmuk a. Ka tho nghal. 

"Dina, hrereng rawh. ka damchhung chuan saw i bialnu saw chu i nei dawn lo ania" a ti váwt raih a. 

"I thih hunah ka nei mai ang" ka ti a. 

"Rodinpui" a ti tuar a. Ka pain a khap ta a. 

Ka pa hi chu a inrawlh lo. Eng pawh ti ila min pawmsak dawn tih ka hria. Nilengin ka mood a off. Lawmi ka hrilh thei si lo. Zawhna min zawt ta reng a. Ka feelings a hre hnehsawh si a. Dâwt ka sawi ta ringawt. 

Lawmi thlah tuma motor ka tih nun mek laiin, " Tlaiah chuan rawn rei vak lo la aw" Nancy a ni. Engtia helai thleng thlenga rawn kal nge maw a nih le.. Ngawi rengin ka tlan chhuak. Lawmi mitmeng ka hrethiam. 

"Kha nu kha"

"Nancy a nih kha. Ka nu thiannu fanu"

"Ka hrethiam. e'

"Engmah a thleng lo"

"A la thlen ka ring"

Ka nui ringawt. Inhnial ka peih lo. Ka nu leh ka u in min nawr nasat em vang leh Nancy nu ka zah derna vang chauhin tlaiah chuan ka chhuak ta nge nge a. Lawmi pawh ka hrilh. 

Ka hne lutuk. A tawng char char a, a insawitheihna ka ngaithla a ni ber. A phai awm chanchin a tam ber. Tawng ve pawh tum ila tawngna hun ka chang chuang lo vang. Ka luak te lam a chhuak. Ka thlah haw a. Leng turin min sawm a. 

"Ka bialnuin min lo nghak tawh a.. Nih phawt" ka ti sup a. Ka tlan vang vang. 

Lawmi pawh thil nih dan hrilh loh theih a ni ta bik lo va. Ka hrilh vek a. A hmain ka chhungte rilru hi chu a hre thawi tawh hrim hrim a. Mahse, kan hriat lawk sa deuh vangin kan buai phah lem lo. Tun tumah erawh hmeichhia an tel ve tlat a. A dan a dang. 

"Ka ring tawk che alawm. Ka rin loh angin lo awm pawh ni la, ka pawm tho vang" a ti. 

Ka va duh thin tak em.. 

Ka nu ang thawmin min tiharh a. 

"Va kal chilh hial hi ka duh a ni. Saw tiang hmeichhe tawp hnawk lutuk ka mo atan ka duh lo hrim hrim" ka bialnu chungchang bawk chu.. ka va tho a. 

"Niminah Nancy i tilunghnur hle mai maw" a lo ti nghat a. 

"Ani tihlungawi kha ka duty a ni hleinem" 

"Mahse, amah saw mo atan ka duh alawm"

"Ka duh ve lo.. Nangman nei rawh" a sawi zawm hmain ka kal sawn daih. 

Kan buaina chu a zual telh telh ta mai. Lawmpuii lah a inthlahrun a leiah min hlat tial tial ni maiin ka hria. 

Zan khat chu ka pa min tirh angin ka chhuak a. Lawmi te inah ka peng haw a. Ka call lawk lem lo. "A chhuak " an lo ti. Chhuah pahin ka call a, a la thei lo zui. 

In ka thleng a. Ka mu nghal daih. Engmah min hrilh lo vin a chhuak a maw? Khaw nge a kal ang? 

Vawi 6 vel ka call hnuah a la ta hram a. 

"Khaw nge i awm? " ka ti nghal bawl. 

"Hetah.. Chanmari-ah.. Ka thiannu te inah" a tím dai mai. 

"Ka rawn hruai ang che" ka ti a. Ka chhuak nghal. Ka ngaihtuah em em reng hi ka inthiam lo zawk. 

A awmna hmun a sawi tha duh miah lo zui. Eng thil nge maw thleng le? Min lo nghahna hmun ka va thlen chuan amah chauhin a awm a. 

"Khaw nge i thian te? "

"An awm ve lo" a mitmeng ti lutuk chuan min rinhlelhtir vek. 

"Lawmpui, i la kal lo maw? Hei i theihnghilh a" tia rawn tlan hlawp hlawp Sawma chu ka lo thlir reng a. 

Ka bing mup mup mai. Ka khur hial thei. Ngawi rengin kan tlan mawp mawp a. An in thlen hma thim laiah ka ding a. 

"Sawi fiah i tum lo mi? " ka ti a. 

"Tum lo" a ti hmak nia mawle.. 

"Anih chu.. A tha e. Chhuk rawh" min rawn melh haw a. Ka en duh lo lui tlat. 

"Fate pa nge nge chu a lo kalsan tak tak theih loh a nih dawn hi" a tih ri chuan nasa takin ka thinlung a nghawr a ni. Ka bengah ring tak a ni. Stearing chu ka hum ngawt ngawt ringawt. 

"Kal rawh" ka ti thei tâwk. Ka hrawkah hnawhtu a awm. 

"Mang tha le" a ti sap a. A chhuk ta. Darkar 2 dawn ka thu ta reng a. Ka zak a, na ka ti bawk. Fim takin engmah ka ngaihtuah thei hek lo. Harsatna kan tawh mek laiin phatsan ka ni a. Kan buaina chu chinfel a ni ta anih hi.. Mahse, ka chinfel duh loh dan ang berin a tawp kan khar a ngai ta si a.. Zolawmsang, i la hria ang.. 

Kar khat chhung ka inkhung tawh. Office ka kal duh lo. Thian ka kawm peih lo bawk. Hmeichhe pakhat avanga hetia awm hi tlawmah ka la, mahse, chuti maia tawrh awlsam a ni miah si lo. 

"Ka sawi reng kha.. Nuthlawi nih tawh chuan pawisak an nei tawh lo thin. Fate pa na nâ na chu an hnar reng thei ngai lo" ka nu chuan a ti a. 

Nuthlawi a ngaih dan hniam lutuk pawh chu ka la laknatpui fan a! Mizo society-a nuthlawi dinhmun hniamzia ka ngaihtuah hian ka farnute hi thlawi ve lo hram se ka duh. He rilru hniam, mawl mang zet, nuthlawi apiang pawisak nei lo leh easy em em tura kan ngai tlat hi engtikah tak reh ang maw.. Nuthlawi mah nise, Lawmpuii hi hmeichhe satliah a ni lo asin. Vawi khatmah sex ka hmanpui lo. Ka inpeih reng laiin a insum thei em em a, a inthunun theihna hi nula hnahkhat tam takte neih ve loh a ni. Nuthlawi tih tawngkam avang maia hmeichhe vanduai thenkhat te kan hmu tleu laklawh hi sima phum bo a va hun ta em.. Nuthlawi zak thei lo, hur hiam huam, mi pasal chuhpui ngam ngatte chu an awm ve tho. Mahse, a tlem zawk an ni. Nula zingah pawh an tam, an ni vek lo ang hian.. Mai mai ana.. 

Lawmi nen chuan kan inbe ngai lo va. Block ka hreh viau naa, ka biak leh ka hlauh em vangin ka block kha ania. Sawma nen chuan an tha chhawm zel ang chu. Amah buma na taka hliamtu a la iai lo anih phawt chuan a hmangaihna thúk tak avang chuan lo lawmpui mai loh chu tihtheih ka nei hleinem.. 

Office ka kal ve tan ta a. Ka dam ta viah e tihna erawh a ni lo. An dawrah chawlh loh hram tumin pumpelh ka zawng ngat ngat. Amah pawh ka hmu zuai. Ka thawhpuite bula a nui har har lai ngei mai.. Hmuh hrehawm ka ti. 

Nancy nen kan inbe chho a, ka ning ru viau thin naa eng emaw chang hian khawhar a hnem phian a. Kan chhuak dun ta fô a. Lawmi runluih nan kan office-a ka koh chang pawh a awm ta fô! Vawi khat phei chu an dawrah ka luhpui nghe nghe. Chumi tum chuan Lawmi mitmenga tawrhna ka hmu a, ka hlawhtling niin ka hria. Kut te kan invawnsak dun a, a langin ka nui a. Ka mit erawh chuan Lawmi a melh zauh zauh. Min en lo anga awm tum siin min mitsir reng tih ka hai bik lo. 

Ni khat kan bang tlai deuh a, kei leh peon nen kan tlai fal a, hna laklawh ka nei ve deuh nen. Kan haw tur kan chhuak chu Lawmi inkhar zo ve mek ka va hmu a. Eng nge ka hriat pawh ka hre lo. Ka thlah ang che ka ti a, a lo remti ve mai. 

"I hlim aniang, i thau tlat" ka ti satliah a. Hetia namnul deuha biak theih hi ka tum tlat a ni. 

"Aniang" a ti ve mai a. 

"Engtikah nge sa free kan ei dawn"

"Ka hre nang"

"Insawirem thuai ru, mampuia pawn pa neih a chak tawh ang"

"I rilru lo pui pui kha sawi tawh suh"

"Eng nge ka rilru? "

"Mi dang tan min phal loh kha" nui hmel pu deuh hian a rawn ti a. 

"I hre sual anih chu.. Min phatsan zan khan ka hlan fel daih tawh che" ka aw chu a bung hlek mai thei. 

A ngawi ta reng a. A hmel thim mak avang chuan a lungawi fahran lo tih ka hre thei. 

An in kan thleng a, a fapa pawh ka hmuh loh karin a lo lian leh hman tawh. Min lo nuih ver ver a. Min ngaina hman asin le.. Ka nuih te lam a za.. 

Hka zir turin ka u nen kan chhuak a. Sawma a rawn lang ve hlawl! Kan va inhmu khât tehlul em. Zolawmsangi vangin kan inchukha ta meuh lo kha a nia. Meizuin kan ding dun a. 

"Engtik nge in inhruai dawn? "

"Tu nen"

'Aw, Lawmi nen"

A nui hawk a. "Mawla, ani chu i ta alawm. I ta a la ni reng. Kei chu hmanrua chauh ka nia"

"I sawi awmzia ka hre lo"

"Khami zan khan khatianga awm tur khan aman min ti alawm. A chhan ka hre bik lo" ka lungphu chu a thlawk chhuak lo chauh. 

Hla pawh zir ta lo chuan ka haw nal nal. Ngawi renga ka luh avangin ka nute rooma ka nu ph hmang pawh chuan ka haw tih a hre lo ang. 

"Nia, chu chu lawm. Kan plan a kal dik mek. Nancy khan theihtawp lo chhuah leh se" a tih ri chu ka hrereng. Ka chungchang bawk an sawi. 

Zolawmsangi ka call. 

"Ka rawn kal. Rawn chhuak rawh"tiin. 

Ngawi renga rei fe kan thu hnuah, "Din, i nu alawm. Ka hnenah lo kalin i tana ka that tawk lohzia leh a mo ka nih theih loh tur thu min lo hrilh a. A sawi dik tih ka hria. Khatiang ka tih mai loh chuan min kalsan dawn si lo va"

"Mawli"

A mita mittui tling kiau chu ka melh ngawih ngawih a. 

"Ka ta chauh i ni.. Chu chu zaninah hian ka nemnghet dawn a. Min dal hlek suh ang che. Kawng dang kan nei lo"

"Din, fa nei leh turin ka inpeih hrih lo"

"Kawng awmchhun ania lawm" 

Mitmeng tawrh har zetin min melh kiau a. Ka fawp nawk nawk. Kha chen kha khawih thei lo vin ka lo awm tawh a. Ka mamawh ngawih ngawih. Car hnungah rem leh rem lo vin ka pawm phei a. Uar zetin ka che ta sawk sawk a. Min dal ta lo. 

Tunah chuan ka hlim leh ta. Faifuk hlarh hlarhin ka insiam a. 

"Vawiin tlaiah Nancy chaw a lo ei dawn a. Rawn hruai nghal rawh aw"

"Tehreng mai. Ka bialnu pawh ka rawn hruai tel. Ve ang"

Makti zetin min en haw a. 

"Nu, i plan a flop aw. Duh lo eng ang mah la, Zolawmsangi saw ka nei dawn"

"I va zak thei lo ve. I nu thu i hnial ang maw? "

"I fapa hi a hmangaih miah loh hmeichhe bula a damchhung hun hmang tura i duh phawt chuan.. Ka nei lo ang. Mahse, ka chungah eng pawh thleng se min dem thiang lo"

Min chhang tawh lo. Ka pain min ko lut a. 

"Mama, i hriat tur thil pawimawh tak a awm a"

Ka nu a lo lut ve a. Hah hmel takin khumah chuan a thu hnawk a. Min melh ngawih ngawih a. 

"Mama, a thawng ang che tih ka hria. I pa hi pa nih ka lo tling lo èm a tin ni.. Engkim hi ka thiam loh a ni" a thaw hawk a. 

"Sawi la, pa"

"Zolawmsangi saw i unaunu a ni asin.. " ka ding hlawl! Chutiang thu chu hriat ka inbeisei ngai lo. Dâwt a ni. 

"Nia, mak i ti hle tih ka hria. Nang leh i nau kum inthlauhna hi ngaihtuah rawh. I piang chauh tihin ka zu in nasat vangin i nu hi an in lamah a haw phei hrih a. Keia lungleng awmngaihna hre lo chuan Lawmi nu Ramteii chu ka kawp ta ngawt mai a ni. A pasal a sun hlim chhawn rilru mang lai a lo ni a. Zu kan in dun thin. Chutih lai chuan Lawmi ú saw kum 3 lek a la ni. Zu te kan han in dun tak fó hnu chuan kan inkawm thuk ta zel a. Kan chesual ta fô a. Kan kohhranin camping an buatsaihah ka luhsan a, ka piangthar ta a. I nu pawh kan hruai haw leh ta a. I nu lo let leh atanga thla 2-na velah Lawmi nu chuan a rai thu min rawn hrilh ta a ni. A tirah i nu hi engmah ka hrilh ngam lo. 

Mahse, ka mangan em vangin ka inthup zo ta ngang lo va. Ka hrilh ta a. A rilru a na lutuk, mahse, tihtheih kan nei bawk si lo va. Inthen hial te kha a duh a. Mahse, ka nu ten an ui bet ve tlat si. Tichuan, inrem lo takin kan khawsa chho ve ta naw naw a. Sâwn man pawh kan pe thlap. Lawmi a neih a lo hun a. Lawmi a hring hlawt tihin raichehin a thi ta mai bawk si a. Tun hnua ka ngaihtuah hian ka indem a, ka zak ngawih ngawih. Ramteii nunkhua ka tihchhiatzia kha.. Tichuan, Ramteii nau Tlani sawn Lawmi chu a fa angin a enkawlzui ta a. A pianhlim atanga enkawl ani bawk a, a fa ang tak takin a en thei ta a. A pasal pawh sawn a duat hle bawk. Lawmi ú pawh an awmpui renrawn a, mahse, a pa ten an la ve ta a. Mahse, tisawn an la inpawh ta reng anih saw. Kei chu min rawn purbuai ngai lo. 

Tlani phei chuan, "I fa a ni tawh lo. Kan fa a ni tawh a. Tel vena nei angah inngai tawh suh" min ti nghe nghe. Min huat vang em em pawh a ni bik lo. Khatia Sawma i rimpui lai khan Tlani chuan ka fapa i ni tih a la hre bik lo. Ka ngaihsak loh a leiah kei pawn ka fanu in rim thin tih ka hre lo. 

Hetia in lo inngaihzawn tak hial hnuah Nikhat chu Tlani hian min rawn be hlawl a. Chutah chuan engkim a rawn sawi ta a. Engtin nge ka fapa i ni tih a hriat chhuah erawh a sawi bik lo. I nu ka hrilh ta a. Fanu ka nei tih pawh a tan a nat tawh tehlul nen, a pasala fa bik mo atana neih chu a tan a harsat turzia i hrethiam ang. A thiam ang angin hma a la ve ta tawp a ni. Ka khap ngai loh chhan pawh tikhan i hrethiam tawh ang chu.. Mama, pawi ka ti lutuk" 

Ka hmai ka hup tlawk tlawk ringawt. Pawi zawng zawngah ka pa pawi khawih hi a la pawi ber awm e. A va na em.. 

Lawmi ka bia a. Inbiak a ngaih thu ka hrilh ta a. 

Kan kal fona thinah kalin, ni tla tur thlirin kan thu a. Sawi tan dan tur ka hre lo. Ka chil ka lem sek ringawt. 

"Sawi rawh. "

"Unau kan lo nia! "

Ka pa sawi zawng zawng kha ka hrilh ta vek a. A hmela danglamna ka hmu lo chu mak ka ti. 

" i lo hre tawh a maw? "

"Hre lo ila ka ti ngawt mai" a ti halh a. A mangang hmel chu hmuh hrehawm ka va ti tak.. 

"Lawmi"

"Ka thiam loh vek a ni. Hrilh tur chein huaisenna ka nei thlawt lo a ni. I nu khan engkim a sawi vek alawm. Min den natzia i hrethiam pha lo vang. Ka kawng neih chhun kha ka zawh a. Eng ka ang thei ta chuang lo anih kha" mittui parawl kuangin a sawi a. Ka nau chu a ni sia le.. 

Sawi tur kan hre lo va. Sawi tur kan ngah si. 

"Engpawhnise, Din, vawiin atang chuan unau kan ni tawh tih hi pawm ila.. Kan lo kal tawhna kawng kha chu theihnghilh tum ang. Hmabak kan nei chuang lo. Kei pawn ka pa ina mo nih ka duh bik lo. I nu tan pawh a harsat turzia ka hrethiam. I tan lah i nau ngei nupuia neih chu thil dik a ni lo. Khawngaihin pawm tum ang" a tap ta a. Ka pawm a, lungchim takin ka kuah ta ngawih ngawih a. Kei pawh ka khap per sak sak mai. Nun hi a va fair lo ve.. 

A tawp tan ti niawm takin duhthawh em emin kan infawp a. A tuka khawvel dang hmachhawn turin kan inthlah ta a. 

Thudik kan hriat tak hnuah chuan awlsam lo mah se, thil dang tlazep a awm lo bawk a. Tih hram hram theih kan inbeisei a ni. 

Nancy rawn lawr sek erawh ka hne. Ka nu bulah ka sawi ta a. A nui ringawt. 

Sawma chhungten an tupa an ngaihven thar thut chu mak ka ti lem lo. Sawma ngei pawh a leng ta fo a. Ka tel ve tawh ngai lo. Lawmi nen chuan kan la inbe zantin tho a. Mahse, Kan thil sawi erawh a dang tawh. Sawma chungchang kan khel thin. Neih a duh a, Lawmi hian a thei si lo. Ka pawimawh tih ka hria. Nutain farnu hnena thurawn a pe angin a fapa pa ngei chu nei turin ka nawr ta a. A harsa lutuk asin.. Thiante u. 

Ka nawr nasat em vangin a remti ve ta. Ka puakdarh lo chauh. Na ka ti a, mahse, ka paltlang a ngai si. Sawma hnen kher lo va hlan theih hi ka duh fô! A tihnat tawhna te kha ka hrereng si. Mahse, amah sawma hian a nun a sim ve hret hret chuan ka hria. Bakah a fapa nen an han inngainat chhoh tak hnu phei chuan Lawmi hi thupui berah a nei chho ve ni maiin ka hria. 

Ka nu rawtna angin Lawmi pawh a rawn leng ta fô a. Chhungkua angin. Lemchang ang mai kan ni. Ka nu chuan mak takin Lawmi pasal neihnaa sum sen ngai chu tumsak a duh thu a sawi a! Ka pa inthlahrung hmel mawlh kha.. 

Thla thar ni 19-ah ka farnu leh ka hmangaih chuan pasal a nei dawn ta. 

Nitin hian ka hah hnèp thin. Ka zo lo lek lek. Lemchanna khawvel chu. Ka hmangaihna te kha a la bo si lo. Ka farnu anihna anga hmangaih hi ka thiam ngai ang em le.. Ani pawn a nuta angin min zahin min hmangaih thei ang em? Thuruk hria lah kan tlem si. Nu Tlani nen pawh kan titi fô. Hrehawm a ti thin khawp mai. Min khawngaih ve tih ka chiang. 

An inneih kawr tur enin ka nu te nen kan pathumin kan chhuak a, tlaiah chaw a rawn ei nghal dawn a. Mo kawr an ha te chuan ka hnuk a tiulh. A nui lui hmel te chuan ka lainat a tizual. Khawvel inlaichinna dan hi ka hua. 

Zanriah kan ei lai chuan ka nu a titi siam siam a. A fanu thar a duat ta vel lutuk chuan min run hle. Mahse, a ruk tak chuan a hrehawm tihmel ka hmu zeuh zeuh. A fapa duatlai ka ni ve miau si a. 

Kan chaw ei kham thleng an seng lai chuan, Lawmi chu a tlu thlawrh mai a. Ka u a au tuar. Rang takin kan thenawm Doctor kan ko nghal a. Chutianga nikhaw hre lo em em a ni hran lo. Room atanga doctor rawn chhuak chuan, "A ruak lo anih saw" tih thu a rawn sawi ta a! 

The end.. 

(Tun kar atan chuan heti zawng hi aw. Ka hman dawn tlat lo. Ka thiante story ka rawn dah zeuh zeuh dawn nia.. 

In chawh lo. In hmel tha. In fel. Ka hmangaih che u ❤😍