Tidamtu Kut Last

TIDAMTU KUT.. (Last chapter) 

Ziaktu: Toni Râlte

(Khawngaihin Adds kha min click sak ve hram r'u aw 😍

Hlauhthawnna hlira ka khah avangin chumi zan chu ka tlaivar chiang hle. Zing dar 6-ah ka tho a. Ka lu te chu a hai chhú mai. Ka ngaihtuahna ka kawm nasat èm vangin ka â deuh húihin ka hre bawk. Awm nuam lo zetin tukthuan ka rèl a. Naupangte hi chu an tho tlai vak ngai lo va, an rawn thawh chuan bawnghnute ka lo chhawpsak nghal a. Min chîk lo emaw ka tih laiin, Abby chuan, "Ate, i mit hnuai kha a va'n dum" a ti a. Ka va inen vat. Ka mit hnuai chu a lo val kulh mai a, ka vun a senistive vang hian duk te pawh hi ka duk hma bik a. Ka rilru hah leh mut hmu mang lo va, ka tal tlaivarna nghawng chu a lang nghal a ni mai e. Ka hmai ka phih vat a. Tlemin a zia deuh. Pa Mapuia ka bum thei ang nge maw.. Engkim ka hrilh vek zawk dawn em mawni le aw tihte ka ngaihtuah a. Mahse, Jamesa chuan min enthla ru rengin, camera te lo kam ru leh ta se.. Ka saruak video kha darh ta se, ka chhungte, kan khua bakah kan case kal lai mek nen te pawh sawizawm a hlawh thei. A chang leh ka inbual a ni ve mai a, ka duh vanga ka lak pawh ni hlei lo tihte chu ka rilruah a lang. Mahse, kha video ah khan ka lang chiangin, ka kumkar engkim kha a lang vek si a. Mi zawng zawngin ka saruakna an hmu tur ka ngaihtuah chuan ka zak ngawih ngawih bawk si. A va hrehawmin a va thim tak êm.. 

Pa Mapuia a rawn tho a, min en chian loh nan ka pehhel zel a. Mipa a ni bawk a, ngaihthat lohna vak a nei hran loin ka hria. Abby te ka siam laiin ka phone a ri a, James a ni. Ka la lo lui a. Mahse, vawi li naah chuan ka la hram. 

"Luhlul viau lo teh. An chhuah vek hunah ka rawn kal ang" a rawn ti a. Ka aw a chhuak thei lo. Pa Mapuia nen kan inthlah liam chiah tihin a rawn lang nghal zat. Ka thaw a rang a, ka lung a phu rang ngei mai. Chiang takin min en a, min nuih súng bawk. Kawngkhar chu a khar a, a kalh nghal rap bawk. Hlauthawng zetin ka lo thlir reng ringawt. 

"Eng nge i thutlukna ni ta? " a ti a. Min rawn pan bawk. 

Tawlhnun pahin, "Khawngaihin hetiang hi chu ti suh. Min khawngaih rawh"ka ti thâm chhal a. 

Nuih huk huk pahin, "ka khawngaih che a, tuman an la hmuh loh hi" a ti a. 

"Eng nge i duh? " ka ti chhuak hrâwih a. 

"Ka duh i hria. " tih pahin ka chhip atanga ka ke ler thleng chuan ît hmel zet hian min melh a. Rapthlak ti zetin ka lo melh ngawt ngawt thung. 

"Nula lian tak chu i ni lo. Mahse, i khalin i îtawm hle a ni lawm ni? Ka nula i ni ang a, ka mamawh leh chãk chang apianga ka kianga mu tur i ni ang.. A bak ka beisei lo. " a ti ta a. Sofaah ka thu thla hnawk. Khur der der chungin, "Aih.. " ka ti sap a. Ka mittui a rawn luang lum nghal pap.. 

"Ka sava i nih hi.. Tunah hian bawm tâwt taka khung mek i ni. Kawng dang i nei lo. Police hrilh la, min manin jailah pawh min dah se, i taksa i kumkar zawng zawng kha zoram mipuiin an thlir tawh dawn tho. Engmah i tithei lo. Ka thu awih mai loh chu" a ti sup sup a. Mi tha tak emaw kan tihte chhungril lo tenawmzia hi aw. James hian hetiang rilru hi a put ka ring ngai lo asin le.. 

"Hun min pe leh rawh. Zanin thleng" ka ti a. Ka rilru a fim ta deuh bawk a, chinfel dan kawng ka hre maithei asin. 

Khi sâwngin min melh a, "Finrawl i chhuah a nih vaih chuan, i video chauh ni loin, tuna i enkawl naupangte thleng hian an tuar thei ania" a ti ta chher chher a. Chu kher kher chu ka tuar thei ta bik lo. Ka ding hluai a. "Buaina chu keima tawrh tur a ni, an ni khan tel vena an nei lo.. I va zak lo ve" ka ti vin thak a. A lo nui ringawt. 

"I hre mai ang. Ka tihtheih chu" namnul zet hian a ti a. 

Mittui tla par chungin, "Chhuak phawt teh.. Chhuak rawh" ka ti a. Engmah sawi leh tawh lo chuan a chhuak ve ta nulh a, mahse, rawn hawilet lehin, "Zanin chiah" a ti ram hmak a. A kal nghal. Nilengin tap thei si lo, rilru tawt lutukin hun ka hmang. Hlim a va har êm. Ti nge vanduaina pawh hian min umzui reng mai le. Ka hlim ve tan dawn chauh a. Jamesa duhdana ka awm anih chuan, Pa Mapuia rilru a nat bakah he inah pawh hian ka awm thei kherin ka ring lo. Vai hmeichhe ho dawihzep ka tih em em te dinhmunah ka ding ve ta a, huaisen chu a lo har viau mai. Anmahni leh anmahni an lo intihlum thin pawh an society ngaibtuah chuan ka dem ta vak lo. Kei erawh intihhlum tumna erawh ka nei lo thung. Chinfel dan kawng a awm beiseiin ka ngaihtuah ngat ngat mai. Ka thil tih mek te pawh ka lo theihnghilh leh thin. An rawn haw sap sap a. Naupangte pawh ni dang ang lo takin ngui nghiain ka lo dawngsawng a, inthiam lo hle mah ila, ka tilui thei hlawl lo a ni e. Pa Mapuia pawh a rawn haw a, ka biangah a rawn chuks zauh. Nui luiin ka lo dawngsawng. Min chîk se chuan; a hrethiam ngei ang le. Zanriah kan ei a, nidang aiin ka ei tlem. Lem lui thei hek lo le.. Chutah erawh chuan, Pa Mapuia'n, "I zia a dang. I ei tlem bawk si. Thil thleng a awm em ni? " a ti ta a. Abby pawn min melh kiau mai. Naupangte ka zah avang chuan, "Nakinah" ka ti satliah a. Thleng ka sengfela ka sil zawhah roomah ka lut a, ka ippik ngawih ngawih. 

A rawn lut a. Rei fe ngawi renga kan thut dun hnuah, "Ka ngaithla a nia" a ti sup a. Ka kut a rawn vuan bawk. 

Ka heh ka pet fan fan a, sawi tawp mai loh chu kawng dang awmin ka hre lo. Nilengin tihdan tue ka ngaihtuah a, ka tawngtai nasa bawk. Chhanna ka hmuh chhun chu Pa mApuia a ni. Amah hi ka mitthlaah a lang zel si a. A nupui hual ka nihnaah min pui thei ngeiin ka ring. 

"James a nia" ka ti sap a. A beng a rawn dawh hnai a. 

"Ka inbual lai video a kawl a. Thehdarhsakah min vau a ni. A duh anga ka awm loh chuan" ka ti ta vek a. 

"Eng nge a duh? " a hamhaih miah lo chu mak ka ti deuh. Mipa a ni bawk a. 

"A hmei" ka ti tawi tãk a. A rum nghut. A ding hluai a, "Chu chu nizan leh vawiin nilengin i lo ngaihtuah tawh a maw? Engvangin nge ka lakah i zep? Nangmaha i tawrh ka phal hleinem. " a ti hluai a. Ka han melh a, dam thlapin min lo melh let ve a. 

"Ka hlau a ni" ka ti sap a. 

"Ka awm hi. Min ring tawk thin lo va. Ka chingfel thei.. Hun engzah nge i la neih? " a ti a. 

"Zanin chiah" 

"A duhdan ang chuan awm rawh" a ti a. 

"Maw. ?! " ka ti nghek. Mak ka ti êm a ni. 

"Aw. A duh dan chu i zawm thei tih i hrilh ang. A bak chu ka kutah dah rawh. In inhmuh hun tur min hrilh la a tawk mai" a ti leh charh charh a. A inrintawk hmel viau si. Hlauthawng viau e ti lo chuan, a hmel landan avang chuan ka thaw huai lawi a. Amahah chuan ka innghat a ni ta ber mai. Chumi zan chuan ka pindanah ka khum a rawn ţawm ve a. Mahse, sex kan hmang lo. In kuah dun chial chungin hmalam hun kan sawi a. Ka thil tawn mek lak atang chuan min hruai peng hneh khawp mai. A kut lianpuiin dam thlupa min kuahna hnuaiah thinthi diaiin ka muhil ve ta siai siai a. 

A tukaha an chhuah vek hnuah James a rawn kal leh a. Ka thutlukna chu ka lo hrilh. 

"I duh dan anga awm chu ka remti e" ka ti awlsam êt a. Ka sawi awlsam êm vang chuan min rinhlelh ka hlau leh hnuhnawh. Mahse, min lo chîk vak lo nge, "A tha e. Zanin dar 9-ah ka inah rawn chhuk ang che. Zankhuain ka bulah i mu ang. Ka khawih chak tawhzia che hi i hrethiam lo vang" a ti thâm ţuak a. Hur hmel hi ka ti ngawih ngawih. Ka uak lo chauh a ni. Mahse, min rinhlelh loh nan ka lu ka bu nghat a. 

"Pa Mapuia hian a hre tur a ni lo" ka tih chuan, lawm hmel takin, "Ni tehlul mai. Tuman an hre lo vang" a ti a. 

"Tin, rai ka duh lo bawk" min rin theih nan ka ti lehzel a. Min rawn nuih hawk hawk, "Lungngai suh. Damdawi ka kawl e" a ti leh mai a. A hlim vur vur tawh khawp mai. Zangkhai takin in atang chuan a chhuak ta a. Pa Mapuia ka text nghal vat. 

"Zanin dar 9-ah" tih thu chu. 

Helhhawlh ang chiah hian ka awm a. Chet pawh ka che vak thei lo. Zanah eng nge thleng ang tih ka zeldin vak vak a. A chang leh Pa Mapuia leh James hi an tang dun a niang a. Pa Mapuia'n awlsam taka thu tlukna min siamtir chhan kha tih te ka ngaihtuah a, chutiang èm ni tur chuan ka ring phal bik si lo. Ka inkhâp buai reng mai. Nimin lam ai chuan naupangte pawh ka lo dawngsawng tha ta deuh. Danny te unau an rawn leng ve leh bawk. 

A nu min sawina kha ka la hriatreng vangin, "Danny, in lo len hian ka hau thin che u em ni? I nu khan ka hau thin che u angin a lo sawi sia" ka ti ve hmiah a. An hrilhhai hmel viau. Sual chu ka inti ve tho naa, a nu a tawngtam êm a ni. 

"Hau lo e.. A nu chuan lo len a phal lo va, mhse, tunah chuan a phal tawh" a ti mai a. Ka zawh belh lem lo. 

Pa Mapuia a lo haw a, mahse, ina rawn lut ta lo chuan, in hnuaiah a zu chhuk leh te tê a. Rei erawh a thang lo. Eng nge a tih ka zawh chuan, "Store room ka zuk en dik lawk" a ti mai a. James in luah lai hi a laiah pingdangin a lehlam chu store room atan an hmang a ni. A inbual zawhah zanriah kan ei. Nimin lam ai chuan ka ei tam ve leh hlek. Zan lam hun lo thleng tur chuan min kap lo thei si lo va, chhuna ka thawvenna te kha chu an bo leh duak tawh. 

"Eng tin nge ni dawn? Ka rilru a hah ania" ka ti sek sek a. 

Hahdam hmel zet hian, "Dar 9-ah i chhuk ang a, eng emaw in tur a lo hlui che pawn in awm tak anga langin lem miah suh ang che. Khawih che a tum hunah, i lo ţang ang a, i au bawk dawn nia. A bak chu ka kutah.. Tin, a phone kha amah hlat thei ang ber turin i lo dah ruksak dawn nia. " a ti ta zung zung a. A thusawi awmzia ka man em em lo naa.. Ka hlauhna erawh a bo duak thung. 

"Min khawih chhe hman ta se" ka ti zawi sap a. 

Min rawn melh haw a, "A teuh lo, ka ta chauh i nih hi.. Tuman an khawih chhe dawn lo che" a ti nghet charh a. Ka thlamuang ta deuh. Dar 9 chu kan nghak ta ngat ngat a. Ka zun a chhuak sek mai. James msg ka dawng ta. 

"Lo chhuk tawh rawh le" a rawn ti a. Pa Mapuia ka hmuh nghal. A bu nghut a. Kei pawh ka va inthlak a. Hna hautak zet hmachhawn tur chuan in chu ka chhuahsan ta a. James-a in kawngka chu a lo inkalh lo a, ka nam hawng a. Thutthleng seiah a lo mu a. Zãm lo ang taka lan ka tumna lamah ka insangruh ţeuh. A lo tho vat a, "I thutiam i hlen e.. A tha" a ti nghut a. Zúm takin ka thu thla a. 

Pa Mapuia sawi ang tak takin cold drinks a rawn la chhuak a, no-ah thliin, ani erawh chuan zu pangngai a in thung. 

"A hard hi chu i ti ve theiin ka ring lo. Kha kha in ve mai rawh. Ka in chhungin" a ti nghal mawlh mawlh a. No chu lain, min melh reng tih hre kar chungin ka hmui nen ka chuktuah a. Ka in ta a. Mahse, ka hmuam! Lem awm takin ka chil ka lem a, tlem azawng chu ka lem tel maithei. A harsa ve êm a. Ka hmuam tam lo naa, chhah vat loh chuan min hre chhuak dawn. Zu a in mek lai chuan, "Ka'n zung lawk" tih leh thawh ka rual a, ka tawng dan kha a chîk loh hram ka beisei. Bathroomah chuan ka va chhak ta vek a. Mahse, a lehpekah engtin nge niang tih ka rilruah a awm. No chu ka va la leh a, "In zo vat la, i tihtur chu ti vat teh" ka ti a. In niawm takin kal chungin ka hmui nen ka chuktuah a, tui dehnaah kalpuiin ka leih baw nghal, no chu ka sil ngjal bawrh bawrh a. A hmain tlem a lo lem sek tawh a nih ka ring, rin aiin a kai. Ka tan chuan a zia zawk. Kawngka a va kalh rak rak a. Ka lo hlauthawng, khawi atangin nge min chhanchhuaktu an rawn kal tak ang. Ka inrin hmain min kuah a, roomah min luhpui ta a. Khumah chuan min bawhthlu nghal tawp. Ka la awm zawi lui a. Chutah ka hmui rawn fawh a tum chu ka lo tal ta a, mak tih hmel lek lek hian min thlek a. A rawn tum tha leh. A hma aia nasa zawkin ka tal ta a. Tah zet chuan tum tak takin a tum ta, "Zawngi, ti nge hetia i awm leh si a? Kan sawi fel vek tawh kha" a ti sehchilh nawk nawk a. Min hneh tha mang bik lo. Ngawi rengin ka lo indang ngat ngat, rem leh rem loin kut te pawh min thlak nghe nghe kha.. A na lutuk lo naa, a duk leh ngei chu ka ring. Kan inchai fe hnuah a thinrim ta tak tak a, "I duh tak tak a ni maw? Khaw nge ka phone kha.. I video chu ka'n thehdarh ange, i chawh ngawt ang" tiin a hawi kual ruai a. A phone kha ka thukru hman tawh si, chutia a hawi kual hruk hruk lai tak chuan a hnunglam atangin, "Che tawh suh" mipa aw hian a rawn ti a. Ka han en chho nghal. Police a ni a, ka la hmu ngai lo. James makti hmel chu ka hlau lek lek mai. Diriam chak tih hriat ngawih ngawih hian min rawn melh a, min khawih a chak tih ka hai lo. Rang takin ka tho a, ka insiam tha nghal zung zung a, Police hnunga lo ding Pa Mapuia angchhungah chuan ka va tlan lut ta a. Duat taka min lo pawmin ka chal a fawp a, "Engkim a tha vek tawh e, ka naute.. Engmah hlauh tur a awm tawh lo" a ti sup a. Kan inpawm vawng vawng mai. Constable pahnihte chuan James chu kutkawl buntirin "Min pawngsual vangin an man ta a' hlawhtling lo mah se, ka lakah thil sual a ti tlat a ni. A phone chu ka va la chhuak a, Police chuan, "Video chu hmetchhuak rawh" tiin thu a pe a, a ti lo ngam si lo.video chu hmetchhuakin a delete ta a. A dang a la nei em tih zawhna chu Aih tiin a chhang a. Mahse, ka hlauthawng tho. Tu emaw kutah a dah ruk ka la ring.. A zan azan chuan Station lamah an hruai ta a ni. 

Kei erawh zankhuain Pa Mapuia khumah muin, hlauthawng leh thlamuang ru tho siin ka muhil a. Store room atang khan an lo lut a lo nia. Store room nen an inpindanna kha tile niin, a sang viau naa, Store room lama leilawn chu dawhin an rawn lawn liam a lo nia. A hun takah Jamesa hremna pek theih hisâpin min rawn chhanchhuak ta a ni. 

Police lamin James an han dâwp chuan thil mak tak kan hre ta tlat! Ka awih lo lutuk chu ka hawihai kher mai. James chuan tirtu a neih thu a sawi a, amah tirtu chu tudang ni lovin Ruati a ni! Ruati chu ka thiannu kha a ni si a. Engtin nge hetiang hi ka chungah a tihtheih… ele.. A nu ka tantir tlat a, ka timualpho bawk a tin ni. Anih chuan, Ruati hian a nu sumdawnna zawng zawng a lo hre ve vek tihna a nih dawn chu. James sawi danin, amah nen sex kan hmang a nih chuan, kan hmang dun lai video chu an thehdarh ang a; tuna kan case kal mekah hian min tihnawwktu leh Nu Zaii te chhanchhuahna theihna chance atan chu video chu hman tangkai an tum a lo ni.. A rapthlak piah lamah min zuamzia em em ka ngaihtuah chuan, ka insit lek lek zawk. Ni e, thingtlang nula mawlmang ve tak ka ni a, dawihzep leh hlauhlawpa inpe turah min ngai a ni ngei a. James chu Ruati cousin a lo ni nghe nghe. Anih chuan, Ruati hian a chhungkaw chanchin velte kha dawt vek min lo hrilh tihna em ni ang? Mak hi ka va ti tak em. Ka hnena rawn kala he ta thawh a duh thu a rwwn sawi te kha lo tihhlawhtlinsak ta se, engtin tak min bei ang maw? Police te chuan rang takin Ruati chu an va la a, a inpuang nghal vek a niawm e. Adika pawn engmah a hriatpui ve loh vangin mak a tiin, a thin pawh a rim hle nghe nghe. Ruati te Central jail-a an phurh thlak hmaa kan va kal chuan, "Hlute, ka nu min tihtir ania. Kei chu a hmanrua chauh ka ni " a ti lawm lawm a. Chhan ngaihna ka hre lo. 

Pa Mapuia zawk chuan, "Ruati, i nun zu sim phah hram ang che. " tiin a chah thung. An phur thla ta luah luah a. Tikhan kan case kal lai mekah chuan an thiam lohzia an rawn inpholan tak avangin kan tan helhkam neih buai a tul ta lo. Kan chak ngeiin a rinawm. 

Thil tha lo leh hlauhthawnawm tak ka tawn tak reng avang chuan Pa Mapuia chuan zin khawthawn a rawt ta a. Abby te exam a la ni dawn lo bawk a, amah chuan chawlh lain, Ningani chawhnuah kan khaw lam panin Aizawl chu kan chhuahsan ta a. Abby te an hlimin an phur em em a, putea te ka be lawk tawh bawk a. Kei pawh ka phurin kan khua ka hmu châk ve tawh hle. Aizawl kha ka ngeih ve viau a nih a rinawm, ka vun a nungin, ka thau ve deuh hmân a. Kal kawngah chuan Pa Mapuia nen kan titi char char.. Inngaihzawnna lam pawh kan sawi lo, hmalam hun bawk a ni kan sawi ni. Khaw thim dawn lek lekah kan khua chu kan lut ta a. Putea chu kan kawtah a lo ding vang mai. In chhung kan han lut chu piteii pawh chuan zah hmel takin min lo dawngsawng a. Kei chuan ka be bawrh bawrh thung. Inhmelhriattirna te kan han nei a, naupangte erawh an motor chuang chau an ngui hle. Putea fate an lian ve tawh bawk a, an lawm viau thung. Kan han inbual fai a, kan harh ta deuh. Zanriah chu kan ei ta a. Arpui tuilai an lo buhchiar a, Pa Mapuia a lawm ngei mai. Chuti taka putea ten an duhsak chu a rinphak bak a ni, kei pawh ka ni tho. Puar êl euhin zanriah chu kan ei ta a. Abby te pawh an nung ve tan a, Remremi'n a chhawnchhaih thiam bawk a, an inzui kawi ta reng mai. Thlen chauh nen hma takah kan mu a. Abby leh Remremi an mutpui a, Pa Mapuia erawh thutthleng seiah a mu thung. Keiin Alex ka mutpui a. Putea hian a theih ang tawkin in hi a lo sa ve a. Assm type mah nise, thingtlangah chuan a zia pawl tak a ni. A zau ve bawk a. Kan han awmkhawm deuh pawh min dawl zo viau. Tui takin kan muhil ta a. 

A tuk zing karah naupang hruaiin thenawm khawvengte ka tlawh kual a. Min lo chibai ve nak nak mai. Chhung leh khat hnaivai tak kan nei lo naa, thenawm khawveng bakah ka thiante ho tlawh tur ka nei ve nual. Hriati awm loh lai a ni hlauh chu pawi ka ti ngei mai, ka zu tlawh ta tho a. A nu nen kan titi luam mai. A hmaa ka mualpho vak tuma an thinrim ve zia te, thudik an hriat hnua a khaw nawta piteii an dem thu te a sawi a. Ka lo ngaithla char char ringawt. Chaw eiah min sawm a, inrnni tlaia ei turin kan intiam a. Kan haw meuh chuan tukthuan an lo peih der tawh. Piteii pawh zan lam ai kha chuan a tawng duh ve tawhin hlim hmel pu takin a titi siam siam a. Putea'n, "Crusade a chhim a, a rawn harh haw ve hlauh a" a tih khan zep thu a cheng lo, ka ringhlel a; nakinah a zia a chhuah leh tho vang ka ti rilru kha a nia. Mahse, hei a daihrei ve ta riau a nih dawn hi. A hmaa kan inhrawn lai tak taka a sualna vel kha hriatchhuah a har viau tawh mai. Tiang reng hi ni thei se ka va duh tak em.. 

Chaw eikhamah leileta kal turin kan insiam malh malh a. Kan vaiin kan kal dawn a ni. Kan va picnic dawn a ni ber ang chu.. Kan phurin nuam kan ti em em a. Kalkawngte chu naupangte pawn thui an ti lo reng reng. An tan thil thar a ni bawk a, an rak chel chul reng mai. Pa Mapuia tak tak pawh a hawi vual vual reng a, a phur súrh reng mai. Thlamah piteii nen rawng kan bawl a, mipa pahnih chuan leilet an fan hnuah a thlang luiah naupangho nen chakai leh sangha an zu man a. An hlim rak ri pawh kan hre pha. Piteii chuan, "Hlute, i hmel hi hmu leh ngam turah pawh ka inngai lo va, mahse, Pathian hi a tha êm a. Nang chuan min thungrulh tum miah loin tihian min la pawm thlap thei a. Ka lawm takzet a ni" a ti dam thlap a. 

"I ho em mai, pite, tunah chuan khatiang kha sawi a ngai lo. Ka theihnghilh vek tawh" ka lo ti ve luam a. 

"Mapuia hi a fel em mai, i putea'n eng emaw min hrilh ve a, a neih duh phawt che chuan nei rawh. I nawmna tur a ni. A fate lahin an ngaina bawk che si" a ti siam siam a. Ka nui ringawt.. Ni e, neih chu ka duh alawm.. Hun tha kan la nghak a nih hi.. Chawhnu herah an lo haw a. Eikhawp chu an rawn man ve mai. Tui an cheng nasa aniang, an huh hliam hlawm a. An han inthlak fel a, keinin an chawhmeh lo hawn chu kan siam a. Thlam bul lawka leikapuiah naupangho chu an inlemkhual a, an ri nak nak mai. 

.. Keini Pali erawh thlamah kan awm a. Ka awm ve lai reng chuan Pa Mapuia chuan, Putea bulah min dil ta mai le.. Ka va melh rum tak. Min en duh der si lo. 

"A hranpaa palai tirh i tih pawn ka hnial lo va, kei chuan nghah reng hi harsa ka ti tawh a ni. Kan khaw lamah ka chhungte hian buatsaih an duh a. Eng nge maw in rilru hi ni ve reng reng le? " a ti charh charh a. Piteii a nui tat tat a, kei erawh ka tum bur mai. Putea pawh chuan, "Aa.. Kan tan i thain, kan tunu hetiang khawp hian i lo enkawlin buaina a tawh pawhin i chinfelsak zel a, keini tan hnial rual i ni lo. Amaherawhchu, i hriat angin chhungkaw khawsak harsa ve tak kan ni a. Nangni ang milian te ina lawi tur chuan amah Hluteii pawh thuam mawi ve kan duh dawn a. Hun tlem azawng chu min pek ve a ngai dawn a ni" a ti dap dap a. Ka hnuk a ulh lek lek, heti taka min hmangaihtu Pathianin min pe hi ka lawm thin.

"Thuam chhawm kha chu ngai ka ti lo ania. A hak lai nen pawh rawn lut se, pawi tihna kan nei lo. Mamawhtu zawk kan ni a. Mahse, i thu chu hnial ngam tur niin ka inhre bik lo.. Thla engzat nge in mamawh ang le? " a ti a. 

"A lo berah thla 3 tal chu kan mamawh ang" putea chuan a ti a. Pa Mapuia chuan a chhut nge ni a ngawi deuh a, ner ru sak chungin, "Thla khat ni mai teh se.. A rei lulai em mai" a ti ta hlawl mai. Piteii a insum zo ta lo, a nui chhuak ta a. Keini pawh kan nui ve ta tawp.. 

A ngena a ngen chiam avang chuan thla khat chu an titlu ta niin ka hria. Chumi thla khat chhung chu kan khaw lamah ka awm rih dawn bawk. Pa Mapuia'n a huphurh lawk ngei mai. Kei tak pawn ka huphurh ve tho mai. A angchhunga awm hi a thlamuanthlak em a, bakah naupang te ka ngai dawn chiang. Pathlawi zúna uai zet chu, amah ngawr ngawr ngaihtuah hleihtheih a ni ta lo.. Kentel a nei ve ta zel mai. Chutianga kan khuaa kan zin chhung chuan hlim leh inpawh takin hun kan hmang a, khaw mite lahin min be thain biak hmasak ka chang hman meuh lo. Thawhtan zingah kan haw leh ta phawt a. Thawhlehniah ka pi a lo chhuk a, kei pawh kan khaw lama va awm rih turin a tukah ka haw ve leh ta phawt. Ka hawn dawn zan chuan ka pindanah a rawn lut a. A ngui nghuai mai. 

"Tikhan awm nguai reng suh, patling i nih kha" ka ti hlar a. 

"Awm ve zawk ta che. I ngui ve lo, min ngai dawn lo anih kha" a lo ti hluk. A chetdan naupangchhia lutuk chu ka lawm tlat.. 

Zah theih loh chhuahin ka va kuah a, "Thla khat hnuah kan innei tawh mai dawn alawm.. I chhel lo lutuk" ka ti ve sateh a. 

Ka bianga fawh zauh pahin, "Rinawm ang che. Mipa tumah a sîk pawh si suh ang che" a ti nghut a. Ka lo nui thung. Chawlh fo ka remtih loh vangin sumo in ka haw a, min thlah a chak tih ka hria. Mahse, chawlh a la zing sia, ka hnial ve a ni. Sawi hmaih loh tur chu ka case-ah khan kan chak ta nge nge a. Kum 10 lungin tang tura hrem an ni ta a. Ruati erawh bail-a chhuah phalsak niin, James erawh kum 5 chhung a tang dawn thung. Engkim chu a hlimawm chho tan ta ti mai ang. 

Kan khuaah chuan leiletah ka feh chho leh tan ta a. Mahse, piteii a fel tawh a, engpawh tiin hah hle thin mah ila a nuam tho mai. Ina hawn pawh a hahdamthlakin min lo dawngsawng tha thei em em a. Ei leh inah ni se min duatin pawisa hman chhuahna tur thilah min rawn der ve zel bawk. Putea khan a in sak nan khan a sum tam zawk a lo hmang tawh a. Intuak ve deuh a ngai a ni. Chutianga thuamchhawm nghek erawh ka duh hran lo. Engkim awmsa a nia. A mawihawih kan zawng ve deuh a ni ber. Pasal ka nei dawn tih Khaw mi ten an han hriat chuan min lawmpuiin min duhsak em em bawk. Hriati pawh a rawn haw a, thianah ka hmang dawn a ni. Kan pahniha kan awm dun tawh chuan tu dang kan ngai lo. Kan titi nasa thei ania aw.. 

A tawi zawngin sawi ang. Pasal ka neih ni pawh a rawn inher chhuak ve ta hlawl mai. Lungdai lamah ka pazawn te an fel bawk a. Min dawl zo khawp mai. Pa Mapuia pain min kutsuih a, a danglamin a hlimawm kher mai. Abby te unau pawh an nalh takzet. Min rawn nuih ver ver thin a, nun hi a nuam ngawih ngawihin ka hria. Pathianin ka nunkawng tur a lo sial hi kei chuan sawiselna tur ka hre lo. A hun laiin nain tuar thin mah ila, a tawpna hi a hlimawm êm mai. 

Lawiţhat zanah chuan zâm tak ka ni.. Mahse, pathlawi zei tawh, tawnhriat ngah ve tawh tak nupui ka ni miau a. Kan tlingtla ve thei mai e.. 

Kar khat Lungdaia hun kan hman hnuin Aizawlah kan chhuk thla a. Kan la buai deuh niah nuaih a. Inleng pawh kan nei ve deuh reng mai. Tlangkam atanga ka lo hriat danin Nu Sangi'n a fate lak a tum tih kan lo hria a. Ka hlauthawng hle. Pa Mapuia lah a hahdam riau bawk si. Ka hlauhthawn ang tak takin Nu Sangi chu court-ah a zualko ta a. Pa Mapuia nen an inkhing ta zak zak mai. Amah Nu Sangi leh a bialpa a um tak Rinpuia kha an lo inthen leh daih tawh a lo nia! Chuvanga a fate rawn chuh ngam a ni reng bawk. Court lam hian pe dawn tak tak se a buai zawk angem aw tih ka ngaibtuah. A enkawl peih dawn teuh si lo va. An ni hnuhnung berah Abby te unau chu court lamin an ko ve ta a. An kal hma chuan roomah an lu chunga kut nghatin tap chungin ka tawngtai a. A lang tlat a ni. An nuhrawn chu ka ni, mahse, ka fa hrawn an nih hmaa enkawltu ka ni a, ka hmangaih tawh a, ka khawngaih bawk. A nu bulah khawsa ta se, an ngaihtuahawm mai bakah ka ngaiin an ni pawn a pa nen min ngai dawn chiang. Chung zawng zawng ka ngaihtuah chuan ka phur a rit a, ka mangang êm a ni. Kan tawngtai zo ka hawi chhuak chu Pa Mapuia a lo ding ve reng mai a. Ka zak leh hnuhnawh angreng. Naupangte chhuah hnuah min rawn pan a, "Ka hmangaih che. Hetiang nupui ka nei hi Pathian hnenah lawmthu ka sawi fo ang. Lungngai suh, kan fate hi kan bulah an awm ngei ngei ang" a ti nghet charh a. Inkai dun rialin pindan chu kan chhuahsan a. 

Nilengin ka ngaihtuahna a chawl lo a ni ber. Chawhnu dar 1 velah min lo call a. 

"Hlute, nu i ni leh ta" a rawn ti a. Ka mittui a hnâm sawk. 

An lo hawn hnuah, Court lamin Abby te unau an kawm thu te, chhungkaw dinhmun leh inenkawlna an lo chhui dan report te an han endik leh a,. Abby te chu a pa bula awm tur an ni tih an puang ta hmiah mai a ni. Nu Sangi lungawi lo chu a an hrep thu te a sawi bawk. 

"A hmangaih chuang si lo va, ngati nge heti taka a rawn chuh ve ni? " a ti a. 

Ka ngaihdan chiah a ni. Eng emaw tak tum ruk te hi a nei zawk em mawni.. 

Chhungkua kan ni leh thei ta a. Tibuaitu kan nei ta rih lo. Abby te chuan, "Ate" tiin min la ko reng a

Kei pawn ka pasal chu, "Pa Mapui" tiin ka la ko zel. Mahse, zan khat erawh a sual thiam ngang mai. Ni e, nupa kan ni a, kan la thalaiin kan thisen a lum hma bawk nen.. Nupa nun kan hman laiin a vawrtawp ka thleng dawn tihin ka han rak ve deuh a, hei pawh ama min tihhmuh a nia. Chutia a hnungzâng sawk tâwn tâwn chunga ka ke ka mar awt awt lai chuan a chawl ta daih. Min rawn melh a, hrilhhai zetin ka lo melh let ve a. 

"U Mapui, khawngaihin" ti rawh.. " ati tham ţuak a. Ka va ngei tak, hnuailam nawrna a nasa tawh si.. 

Zawitê hian, "U Mapui, khawngaihin" ka ti ta a. Khawvel dangah min hruai leh ta vawn vawn mai. 

Ani pawn.. "Naute" tiin min ko tho.. Pa Mapuia tia ka koh hian ka thla a muang a, ka him a, ka innghahna a nihzia ka hriatchian phah bawk.. Tin, Pa Mapuia hi ka hmangaih em em a ni. 

(Ka hun neihin a zir si lo va. Ka titawp ta mai aw.. Chhiartu te, ka lawm vek e. Tihian, long story chu ka bansan rih ang. Ni hnih khat danah short story ka rawn dah zeuh zeuh ang.. Min hrethiam dawn nia. Class kal chhung chu aw.. In fel kha.. 😍😊