Tidamtu Kut 9

TIDAMTU KUT… (9)

Ziaktu: Toni Râlte

Pa Mapuia te inah chuan ka khawsa ve rih phawt dawn chu a nia. Putea'n engmah thil chinchang dik tak a hre lo chu ka lawm angreng. Hrilh pawh ka tum hran lo. Nu Zaii te chu Police lam ten a ruk a rala veh an ti nge ni an chanchin thangva pawh hriat tur a awm hran lo. Khawiah nge an tlanbo ang aw.. An man vat erawh ka beisei takzet a ni. Kei erawh ka taksa nâ chuan enkawl dam a mamawh bawk a. Ka pi leh Pa Mapuia te chuan engmah ka tih an phal rih lo. Awmpui pakhat, lânga rawn kal an la a, kei ai chuan a ú hlek a, Hriati a ni a. A felin a mawng a zang khawp mai. Kei chu damdawi hnawih chi leh ei chi nen ka mu deuh reng ringawt. Ka inthlahrun rualin ka lawm em em lawi si.. Pa Mapuia office hlanin ka pi bulah Nu Sangi nen an inthen dan tak chu ka zawt ta a. 

"I chhuah hnu kha chuan a pangngai ang a, awmpuite pawh la lehin, pangngai takin an awm leh mai turah kan ngai deuh a. Mahse, Hlute, I nu Sangi khan min lo bum nasa tawh êm a lo ni. Rinpuia nen khan inzawmna thuk tak an lo nei kal reng a lo nia! I Pa Mapuia lah pa a zawnga dawhthei leh fate avang chuan tlawm zel mai a lo ni si. Saw ta i awm phei atanga reivak loah khan i nu sangi chu a rawn haw thei ta reng reng lo mai a. A rawn call bawk si lo. Zanriah pawh kan eisan nghe nghe a, i pu ngaihdan pawh a ni ta vak lo. Zan dar 8-ah pawh a la rawn haw si lo va, i Pa Mapuia chuan a call a, a tlang thei bawk si lo. A chhungte a va bia a, an lo hre bawk si lo. Dar 9 velah Rinpuia chuan a rawn thlah ta a. Min zahpahna chhete mah nei loin, a rawn rui lut ham ham a. I pu nen phei chuan sawi tur pawh kan hre lo. Kan melh tlawk tlawk ringawt. I Pa Mapuia thinin a tuar ta lo nge ni.. A sawi nawk nawk a, "I pasal nu leh pate pawh la awm ve reng laiin hetiang hian i rawn rui haw ngam a maw? " a ti a. 

I Nu Sangi chuan runluih tih hriat lutuk hian, "Inthen i la ni mai lawm" cho zetin a ti ta a. 

"Chuti khawpa i cho te chuan ka pawiti hleinem" i Pa Mapuia'n a lo ti ve hmak a. Mahse, I nu sangi chu a ruih em vangin thu pangngai han sawipui theih a ni lo va, chumi zan chuan engmah a thleng ta lem lo. Mahse, i Pa mapuia a mu hrang ta nghal a ni. Engmah ka sawi duh bik lo, Sangi hian min ti hrehawm ve thawkhat tawh em a ni. Chumi zinga tukthuan kan ei lai chuan i pa Mapuia chuan, "Sangi, naupang awm loh laiin ka'n sawi ang e. Vawiinah ka office ban hmain i lo chhuak dawn nia. Nizanah khan kan sawifel tawhin ka hria. " a ti ta a. Sangi chu a ngawi reng ringawt. 

Tichuan, office tur chuan an chhuak ve ve ta a. Chawhnu dar 2 bawr velah Sangi leh Rinpuia hi an rawn lut hlawl mai a. An rui pawn ka hre lo. 

"Ka nu, i fapa duhdan ang ngeiin ka chhuak dawn ania.. " a ti nghal tâwng a. 

Maktia ka hamhaih laiin an roomah lutin a thawmhnaw ken awlsam deuhte chu a va khung ta zung zung a. Rinpuia nen chuan kan lo nghak a ni ber. I pu lah a chhuak bawk si. An kal dawn tak tak chuan, "Sangi, Mapuia ngaichâng lawk ila.. Hetia kal ringawt chu" ka tih chuan, chapona hmel pawh pu loin min rawn melh a. Mak takin a mitmengah inchhirna leh tlawmna ka hmu ve nia! 

"Ka nu, Mapuia tan chuan ka tha tawk lo alawm.. Tihkhawtlai ka duh tawh lo. Ka fate pawh in kutah ka dah e. Hei Rinpuia nen hian kan la inhmangaih reng a, ka zui mai dawn. Min lo ngaihtuah suh u" a ti ta a. Ka nghing lawih a ni ber mai. Chelh hman rual lohin an chhuak ta a ni. Tlaia i pu leh Mapuia an lo hawn chuan ka sawi a, Mapuia chuan, "Ni e, Sangi hi dem suh u, a khawngaihthlak zawk a nih hi. Hmangaih loh bula chen kumkhua zawng hremhmun nen a inang reng, a tel lo hian kan hlimin nuam kan ti zawk ang" a ti thei ta hmiah a. A tukah Sangi te chuan bungrua an rawn la zui ta nghal a ni. A nu leh pa te pawh a ngeiawm zawngin an awm lo, an zak ve nge ni an ngui nghiai mai. Tichuan, naupangte enkawltu tur awm hek lo, tihian i pu nen kan awmpui ta tawp mai a ni" tiin ka pi chuan a sawi ta vek a. Ka lo ngaithla tui hle. Nu Sangi chu mak ka tih rualin an inthen chu ka lawm phian. Dik tak chuan naupang ten an ngaina tak tak thei chuang si lo, boruak inep leh inup rúnin chhungkua an awm a. Naupang thanlen nan pawh a tha lo a ni. Abby te nen kan han inhmu leh kha an lawmin, min lo ngai ve tawh hle a lo ni a. Ka hmai duk leh ka mit vung phui titih chung pawn min hai ve miah lo. Zawhna an nei ta reng a, chhan a va har tak. Pa Mapuia'n, "Ateii kha motor an accident a.. Chuvangin a dam lo a nih kha" a rawn ti hlauh a. Ka thaw huai mai. Ka dam chian hma chu a pain min chimbuai a phal loh vangin an rawn lang vak lo. Hriati hi an ngaina vak lo nge a pi hi an ngheng chawt mai. A nu erawh a reh vang vang mai. 

Pa Mapuia office bang chuan phone thar min rawn hawn leh ringawt! Ka zakin ka va lawm si em.. "Ka hlawhin instalmentin ka rul ang che" ka ti tawp. A nui mai a. Engmah a sawi lo. Nu Sangi nen an inthen vanga hmel han tla leh ngui a nei lo nge, ka awm tirh ai mah khan a hmeltha tawh zawk. Chutia hmeltha ka tih vang chuan mipa enin ka va en hran lo. Bialnu chhe lo tawk, Abby te hmangaihtu deuh nei se ka duhpui. Amah lah hian a ngaihsak loh hmel angreng bawk si. 

Sawi hmaih hauh loh tur chu Ruati te nufa chungchang a ni. Ruati biak pawhna ka nei tawh lo va, mahse, Pa Mapuia'n a lo la nei a. Ka be ta a. Ka awmdan leh chanchin a han hriat chuan mak a ti ngang mai. Chu aia mak ka hrilh zui ta bawk nen, a tir chuan a thinrim lek lek, "Chutiangin ka nu puh suh. Khati khawp khan a hmangaih che a" a ti nghat nghat a. 

Mahse, "Tunah i nu inah a awm reng em? " ka tih chuan, Ka tlanchhuak tukah khan phaiah a lo zin ve daih a lo nia! Chutatang chuab Ruati ngaih pawh a tha lo chho tan a. Mahse, hringtunu na nâ na chutin a ringhlel bur duh lo. Ka be phawt ang a ti a, mahse, hei vawiin thlengin Ruati chuan min rawn be leh ta miah lo. A nu thiltih dan dik tak a hre ta a ni ngei ang. Amah hi chu demna leh huatna engmah ka nei lo, ka dinhmun chhiat lai remchanga hmanga bungrua ang mai maia min hralhtu Nu Mawii ka hua a ni. Pawnlamah nu tha leh ngainatawm ber angin a lang a, aw nêm diai phenah túr tenawm tak a lo pai ru reng si. Hetianga lemchang hi Mizoramah hian an awm nual ka ring. Fimkhur a ngai khawp mai. Thingtlang pilril tak atanga chinchang hre lo va, rawn chuang chhuak ve hlawl hmeichhe tleirawl tè tê te kha an bumin pawisa hmuh nan an hmang ta chu a nia. Tal chhuak hleithei lo turin engkimah an tlan khalh hneh bawk si. Thingtlang lam pawh hi kan harh a ngai. Hriatchian fak loh chuan kan fate hi pawisa thawk chhuak tura tirh mai mai chi niin a lang tawh lo. 

Ka hawn atanga kar khat a ral leh meuh chuan Nu zaii leh a sangawizawnpui te pawh an man ta a ni awm e. Kei pawh ka hmai duk leh vung te pawh a reh ve deuh tawh. Police station-ah koh ka nih avangin Pa Mapuia a office si, ka pu nen kan va kal ta a. Lock up lo hnai berah chuan Nu Zaii leh a thawhpuite an lo thu thap mai. Nu Mawii pawh a tel ve. An vai mai chuan min melh rum hlawm kher mai. Ka ngai pawimawh duh hran lo. Case I/O chuan, "Thuhretu atan kan mamawh che sia. Hetah hian i statement ziak ila a tha ang e.. " tiin Nu Zaii ina ka thiltawn leh hralh ka nih dan zawng zawng chu hmaih nei hlek loin ka sawi ta par par a. Ka tlan chhuah dan tak erawh engtia han sawi tur nge ka hre lo. Police zawk chu ka han be rawn leh rih a. A lo chinfel mai tur thu a sawi ta a. U Rinzuali chu chhanchhuah ve ngei ka duh a ni. Case chu a kal chak thei dawn lo tih an sawi bawk a, kei ka lo hmanhmawh ve chiam thung. Dik tak chuan an nula chhawr te hian tal chhuah an duh vekin ka ring a, mi dang bumna kawnga an inhnamhnawih ve lem loh chuan, zalen vek se ka duh hle. Nu zaii leh Nu Mawii erawh jail-ah tang ngei se ka duh. An che ngap mah mah em mai. Ukil an ruai ve dawn si a, an sum neihin a tlin dawn bawk nen, sawrkar lam pawn ţan an lak a ngai hlein a lang. Koh fo theih tura inchah chungin kan inthlah liam ta phawt a. 

Kan chhuak tur chu, Nu Zaii chuan, "Uichonu, i hre dawn khawp e. Lo nghak rawh" a rawn ti hram a. Ka chhang lem hlei lo. 

Ka pu chuan, "Hlau reng reng suh aw. Engtin mah an ti lo vang che. Thil dik lo leh tha lo i auchhuahpuina hian rah tha a chhuah em em ang" tiin min fuih sauh sauh a. Ni e, Hlauh ka nei hran lo. U Rinzuali khan min pui ta lo se; tunah chuan an duh angin ka inzuar ve tawh maithei a ni. Chutiang ka ngaihtuah chuan ka ţim uai uai mai. Thil an tithei angreng si a, ka putea te ka ngaihtuah ta riau mai. Biak vat an ngai a ni. 

In thlen veleh putea chu ka call ta nghal a. Thil awmzia ka hrilh vek loh chuan a hrethiam dawnin ka hre si lo va, a kip a kawiin ka hrilh ta tawp mai. A chek tlat tlat a,min khawngaih ve ngawtin ka ring. 

"A nih chuan tunah eng nge i an tawh? Engtin nge i la awm? " a rawn ti a. 

"Ka tha tawh e. Kei chu ka ngaihtuahawm loh aw.. Nangmahni ber kha ka sawi tawh ang khan fimkhur rawh u. Piteii pawh hrilh ve mai la. Naupangho ber kha anmahniin khawiahmah chhuahtir suh u" ka ti mawlh mawlh a. 

"Aw le, min ngaihtuah suh.. Ka chhungkua chu ka venghim thei ang. I piteii pawh hei a zia ve zel e. Hna te pawh a thawk a thawk ve tawh" a rawn tih chuan ka lawm ve khawp mai. A rilru a danglam ve ta a niang chu.. Kei a hmuhmawh ber ka awm ta lo bawk nen.. Hlim takin awm se ka duh em em a ni. 

Pa Mapuia bulah pawh thil awmzia ka sawi ve a. Ani pawhin Putea hnena engkim ka sawi chu pawi a lo ti bik lo va. Ka rin loh deuhin, "An buai dawn leh he lamah pawh an rawn awm rih mai ang chu" a ti a. 

"Chutiang em em a ngai lo vang.. Putea hi chu a pa ve alawm" ka ti a. Ka nui bawk. Min rawn melh zauh a, "Anih kei ka pa ve em? " a ti ta thut a. Ka lo hamhaih. 

"iiii.. Ngati nge?! " ka lo ti hú a. A nuih a za ngang mai. 

"I nu Sangi i ngai em? " ngeiawm fê hian a ti leh a. Ka lo ner sak, "I ngai a nih kha" ka lo ti a. 

"Abby te hian nu an mamawhin i hria em? " a ti leh a. A thutak ta riau. 

"Mamawh tho mai. Duat leh hmangaih taka enkawltu awm se chuan a pawi miah lo" ka lo ti a. 

"Chungte chu i tithei reng sia" zawi deuh fiah deuh si hian a ti a. Ka va melh kâwk. Min lo en ve chiah. Ka zak leh lai lutuk chu ka hawi let rang kher mai. 

"Kei te chu kei ka nia" ka ti niah niah a. 

"Umm.. Nang te chu Hluteii i nia" a lo ti leh.. A va nghal tak. 

"Kal teh, i lung a leng a nih kha.. Bialnu tha tawk ka zawnsak dawn che nia" ka ti a. A lo nui hak hak. 

Zirtawpni a ni a. Ka pi chuan zing kar eirawng kan bawl laiin, "Chawhnu lamah i pu nen kan haw lawk dawn. Sunday chamin.. Kohhran programme pawimawh deuh a awm a. Hriati a awm tho bawk a, in lo awm thei mai ang chu tiraw? " a ti a. 

"Naa.. Ka van ngai dawn che u" ka lo ti vat a. Dik tak chuan an tunu/fanu ang hian ka inngai tawh ni berin ka hria. Min duat leh ka chunga an tha lutuk chuan min tipangchang vek tawh. A chang chuan ka zakin ka inthlahrung ve tho. Mahse, ka naupanna hian mawihawih a la zawng thiam vak bik lo a ni e. Ka pi sawi ang chuan chawhnuah ka pu nen an khaw lam panin an chhuak ta a, rawn chhuk leh tur mah nise, an ngaihawm vung vung khawp mai. 

Lânga rawn kal Hriati hi sawi tawh ang khan keiin kum 4 velin a up a, sam sen thar mai, sei hnâp, nu deuh mai a ni a. A hmel pawh a chhe lo, a kareh hi a zau lek lek a, chu pawh a duhtu tan chuan a sexy thei viau awm e. A mizia hi tlemin mak ka ti deuh. A tawng tam hran lo va, eng emaw chang erawh chuan a phul ve hlut thung. Abby te hian an ngaina lutuk lo nge a khawih tam lem lo. In chhungkhur chetah pawh a pangngai, eirawngbawl erawh ka pi in a ti tam zawk a, a thiam lutuk lo a ni maithei. Ka pi te an haw tak siah chuan, kawm tur dang awm hek lo le, ka bia ka be ve ta a. Han biak tak sekah chuan ani pawh a tawng duh ve ta viau e. Chanchinte kan inzawt ve a. 

Awmpui satliah a lo ni lo va. Hriati ang deuh khan a zirna tur atana inhlawh a lo ni. A ngaihsanawm hle mai. Chhungkaw pangngai tak an ni a. Mahse, amah intodelh a duh vangin a chhungte tibuai lo va zir zel a duh vanga hetia inhlawh hi a lo ni. Kei nen chuan inthlau veng veng tak kan ni. Ka chanchin min han zawh ve takah chuan, zep then hlek hlek nei chungin ka sawi ve a. Nu Zaii ina ka awm vel kha chu ka sawi duh bik lo. Mahse, a hriat thawi tho ka ring. 

"A nih chu! U Mapuia nau emaw a cousin emaw ka ti che lawm. Awmpui ve tho i ni tih ka hre lo reng reng" a ti ta hlut a. Chu chuan min tihnual deuh. Awmpui ve mai mai ka ni tih a hriatna chuan amahah danglamna a thlen phah chuan, ka chèp sawt dawnin ka hria. Mahse, a awm rei dawn chuang lo va, tlem chuan ka thla a muang deuh. 

Abby te an lo bang a, ka lo dawngsawng vat. Alex hmel chu a hlim lo riaua ka hriat avangin, "Ka naute chu a va ngui ve.. Tuin nge lo hau? A úin a mi? " ka ti a. A hnungzangah ka chul a. 

Ngik faih faih chungin, "Ih.. A nu ka hmu a, ka au a, a hre lo anih kha" a ti ta a. Abby ka melh vat, "Au suh ka ti ka tia.. A ko lui a nih kha.. " a lo ti var. 

"Anu chuan i tawng ri a hre pha lo aniang.. Naute, hawh.. Inthlak la, thingpui ka lo siam ang aw.. " tiin Alex biangah ka va chul a. Ani hi chu a naupang zawk tih takah nu leh pa laka han pangchanna a la nei lo thei lo. A u angin engkim a hre ve kilhkelh bawk si lo. A lainatawm khawp mai. A u nen an inthlak chhungin thingpui ka lo lum a. Hriati'n vawksa a chan mek thung. 

"Naupang te hian an ngaina che e.. Tihdan riau i thiam aniang" a ti a. Ka lo nui ringawt. 

"An fel em alawm" ka ti ve mai. 

Naupang te chu an rawn phei a. Thingpui leh chhang ka lo chhawp a. Tui ti taka an ei lai chu ka thlir reng mai. An hmuhnawm piah lamah an lainatawm ka ti. Thian nu uiresan ti mai ang chutiang chu an ni ta mai chu a ni si a. An rawn thanlen tak tak hma hian nu ang tak taka an en theih tur nu hi an mamawh a ni. 

Thingpui an in zawhah an assignment an ti zui nghal a. An zawh veleh ka bual zui nghal. Ka bual zawhah Danny te unau an rawn leng a, games an khel. Kei erawh Hriati ka pui thung. Bai te ka siam veleh a, zep loh chuan bai uih ngei mai ka ei châkna a rei tawh em a ni. Ka bai phuan suah suah laiin Pa Mapuia pawh a rawn haw ve a. 

"I lo haw tawh maw? I chau em? " Hriati chuan a lo ti var a. 

"Chau lo e, Hlute, i pi te chu an kal ta mi! " tiin min rawn en a. Ka lo bu nghat. Ka thil bai rim chu chuan a hnar a verh deuh nge a rawn pan a, "He tiang hi lawm ka ei chak tawh chu.. Chaw kha chhum hnem ang che u" a ti hlut a. Ka tan chuan nuam ve tak a ni. Hriati erawh ka ngaihbel nge a lungawi loh hmel tlatin ka hria. Pa Mapuia a inbual zawhah Hriati pawh chu a haw ve nghal a. Chaw ei ka siam zui nghal. Kan pali chauha kan han ei chu ka eng emawti laih deuh, ani lah chu a titi bawrh bawrh a. Abby te lah ngawi rengin an ei mawlh mawlh bawk. 

"Abby te chawlh veleh chawlh ka la ang a, in khuaah chawlh han hmang ila a tha ang. Leiletah pawh ka feg ve chak. Abby te pawn nuam an ti ngawt ang" thleng ka sil lai chuan a rawn ti a. Ka lo melh hú ringawt. 

"Nge.. I duh vak lo mi? " a ti leh a. 

"Duh e. A mak ka ti em a" ka ti ringawt a. 

"Eng nge mak? " a lo ti vat. 

"In awmpui ve mai ka ni sia, tiang taka min duat leh min duhsak hi mak ka ti.. " ka ti zawi sap a. Rawn kal hnai leh deuhin, " I mak fe zawk.. Ti nge awmpui satliah anga i la inngaih tlat? Ka faten heti khawp hian an ngaina che a, a nu awm loh hriat loh khawpin i duat a. Tin, ka sawi tawh kha.. Mi hrang angin ka en lo che" a ti sup sup a. Ka lo thaw hak. 

"Ka lawm e" ka ti a. A nui hawk, "I zak lo" a lo ti daih. Ka hrilhhai hman. 

Chutah thutak deuh hian min en a, "Ih maw.. Bawihi, ka lakah ka lawm e tih sawi a ngai lo. Ka fate tan nuteii tha tak i ni a, ka rul zo lo zawk che. Pasal i neih hun tur hi ka huphurh zawk" a ti ta a. Thleng chu ka rem pah a, " Pasal ka nei peih lo. Bakah nupui i nei vat ang chu" ka ti satliah a. 

"Nupui pawh hi a.. Thlan sual leh ka hlau.. Bakah ka fate min hmangaih pui thei lo tur chu ka duh lo" a ti a. Ka rilrem zawng tak a ni. Abby te hmangaihpui ve thei lo nei ta se, ka thinrim ngawt ang. Chutiang khawp chuan a fate hi ka ngainain kan inpawh tawh a ni. Nu Zaii ina ka awm lai pawh khan ka be chak em em.. Mahse, chhuah tawh hnua va inrawlh ve sek kha Nu Sangi'n eng emaw zawngin a ngai ang tih ka hlau a, ka insum hram hram zel reng a ni. Tunah chuan tibuaitu leh dipdaltu nei miah lovin kan chengho thei tawh a. Nuam tak a ni. An ni pawh an hlim ve viauin ka hria. 

Zanah pawh ka bula mut an ngen sia, an roomah khum kan dawh zawm a. A laiah ka mu. Thawnthu sawi rawh an ti leh tlat a. Ka thawnthu hriat ka sawi zo tawh si.. Ka chanchin chu thawnthu angin ka sawi ta a. Alex chu a chanve vel ka sawi hnuah a muhil bawrh bawrh a. Abby erawh chu a harh tulh tulh emaw tihtur hi a nia. A ngaithla uluk ngang mai. Tawngkam ka thiam vak lo nen, ka sawi zo titih tawh si, ani a la harh bawk si. A va buaithlak tak.. 

"Ate.. Tu chanchin nge? " a ti ta chiah a. 

"A hming ka hre bik lo. A hming phuah la" ka lo ti a. A ngawih vang vang hnuah, "Abby ni ve mai rawh se" a ti ta reuh a. Min nghawr dawtin ka hria. Ka chanchin ka sawi mah nise, a hringnun nen pawh a lo inmil hle a lo nia! Ka va mawl tak.. 

"Ni e, Abby ni rawh se" ka ti a. A sam ka chulsak a. 

"Anu hian min ngai ve thin ang em le? " a ti leh a. 

"Ngai viau ang. A rawn kan tep ang che u.. Muhil tawh la ka naute" tiin ka kuah a. A maimichhing ve mai. An mang a chhe dun bawk a, zingah chuan Alexa'n ka nghawngah a ke a lo kham a, Abby erawh ka malpuiah a lu a lo dah thung. Zingkarah pawh ka nui awr awr mai. Hriati hi tukthuan ei hmain a lo kal thin a, hetah a ei ve mai zel. Kan pahnihin rawng kan bawl a. 

"U Mapuia nupui hi ka hre ve hman chiah lo va, an sawi danin a Sual an tia" a ti sar sar a. 

"A sual em em pawh ka hre lo. A fel reng" ka lo ti thung. 

"Nupui hi nei leh vat se tiraw? " tih pahin a nui a. 

"Nia, lo zawnpui ve rawh. Fel deuh, a fate hmangaih thei tur hi" ka lo ti a. 

"Nia, zawnpui ang. A hmeichhe duhzawng hre thei ila" a ti a. 

"Kan zawt tawp dawn mi? " ka lo ti hú a. Mawl min tih hmel zet hian, "Awiii, a sawi duh bik nang" a ti nghek. Kan nui vak vak a. Pa Mapuia pawh a rawn tho. 

Kan melh hrek hrek a, a hre ve lem lo aniang. 

"Tu zawk nge va bazar dawn che u" a ti a. Dar 7 a pel hlek a, tlai chu kan la tlai over lo. 

"Hlute, va bazar mai ta che. Chawhmeh lei hi ka thiam vak lo va" Hriati chuan a ti a. 

Ka hreh lem lo bawk a, ka insiam nghal. Pa Mapuia'n pawisa min pe a, ka chhuak tur chu min lo let lehin, "Rema taxi a chhe tak asin.. Ngawi rawh. Kan pahnihin va bazar mai ang. Naupangho chu Hriati'n lo awmpui mai rawh se" a ti hluai a. Hriati hrilhhai hmel ka va hmuh rual chuan ka chhungrilah min hmer dawttu a awm. A chhan ka hre lo. 

"Awii mahse, naupangho hi ka ti thiam vak lo sia.. Hlute, lo awm leh zawk mai si teh a" a ti a. 

"Aw a tha alawm" ka ti mai a. Hriati chu a rawn phei nghal. Pawisa pawh ka pe nghal. Pa Mapuia chuan min rawn melh vung vung a, "Kan rei lo vang" a ti sup a. An chhuak nghal. Kei chuan eirawng ka bawl zui nghal a. Pa Mapuia mitmeng leh Hriati hrilhhai hmel ngawt ka mitthla chhawk mai. Awm nawm lohna riau ka nei a, mawlhtu ka nei tlat. Hriati awmdan leh chetzia ka en hian Pa Mapuia hi a ngaizawng mawni le tih chu ka rilruah a rawn lang nghal a. Ka thil chan lai ka tawp chawt.. 

Hriati'n Pa Mapuia a ngaizawng anga ka han ngaihruat chuan ka chhungrilah nâ a rawn inchher chhuan tup tup nia. Mak ka ti, a chhan ka hre lo reng reng. Ka na ve tawp. Pa Mapuia chu ka lo duh ve tihna em ni le.. Nge Hriati chu ka thîk? A tira bazar peih tawp si lo, Pa Mapuia'n min hruai dawn vanga a chak leh hâwrh chuan min ngeitir.. Ka ei hlawl lo. Hmelah te, thiamna leh khawsakah te chuan ka phak lo maithei. Pa Mapuia ten min duat sia, hengte hi min lo thik ru thei ngawt ang. Huiham.. Ka thil ngaihtuah mai mai chu.. 

Ka ngaihtuahna ka kawm mawlh mawlh laiin, Kawngka chu a inkalh loh vangin thenawmnu Nu Lawmi a rawn lut hlawl mai. An rawn leng khat viau a, keini lam pawh kan leng khat. An fate erawh tlai tin tihtheih an rawn leng thin. 

"Aw.. Khaw nge Hriati? " a rawn ti nghal a. An bazar thu ka hrilh chuan, "Mapuia nen maw? " a ti leh kher a. 

"Umm" ka lo ti ringawt. 

"Zing dangah a bazar ve ngai si lo va.. Ngati nge mawni dawn le" awmze nei deuha min rawn melh chung chuan a ti a. 

"Nia.. U Rema taxi a chhe sia" ka lo ti mai a. 

"Chuvang pawh a ni lo maithei asin " a ti lehzel a. Kei chuan, "Hriati te nen in inhre hrim hrim mi? " ka tih chuan.. 

"Ka patea fanu alawm.. Ka cousin.. He hna pawh hi ka hmuhsak a nia" a ti ta zung zung a. Ka chhungrilah min nawrtu eng emaw tak a awm leh tawh. 

"A nih chu, a fel khawp mai. Hriati chu" ka ti ta ringawt a. 

"Nia, a fel alawm.. A puitling reuh bawk nen" a ti zel a. Thingpui te ka siamsak a, a titi ka ngaithla ta reng ringawt.Thingpui a in zawhah a haw phei ve ta a. 

 Pa Mapuia te pawh a sawi ang khan an rei vak lo.Bazar puiah an bazar lo zawk em mawni. Chawhmeh an lo hawn chu ka lo remfel zung zung a, "Hei hi i eichâk ka ring a, i duh thei sia" tih pahin hruizik a rawn lek vâ a, tui ka ti tih a hre tawh khawp mai. Ka lo nui var var a. Hriati ka va melh leh kher chu a lo tum hmuk mai. Kei lahin nuam ka lo ti mek. Kan awmdan chu Pa Mapuia inchuh te pawh kan ang lek lek alawm le.. Heheh.. Kei pawh hi ka chiang chiah tawh lo. Pa Mapuia chu ka hmu tha thar tlat te hian ka hria a, Hriati nen chuan inzawmna an nei ang tih ka lo hlau ve em em ringawt. 

Tukthuan ei laiin, "U Mapui, zanin chu ka riah a ngai maithei aw.. Ka chhungte an zin bo vek sia.. Mondayah daih an lo haw dawn sia.. Sunday pawh ka awm a ngai maithei" Hriati chuan a ti ta a. Ka thil hawp lai ka hak phah. Ka va tenawm mai mai tak. 

Pa Mapuia lah chuan, "A that hlauh chu, Hluteii pawh a khua har awm sia.. " a lo ti. 

"Nia" ka ti tawi tâk ringawt 

Hriati chuan hnehna chang intih hmel zet hian min rawn melh leh ta nghal. Ka fian ken lai chuan ka khawng fawk châk…! Pa Mapuia hriat miah lohin indona chu a inţan tih ka hai ta bik lo.. Mai mai chuan. 

(Ekhai! Thian te u, B. Ed multimode class kan kal leh tan si a. Ka rawn regular vak thei lo anih pawhin hriatthiamna nen aw. Class lak kara a ruka type tam chu a har 😂 hlawkpui tum ve tho si chuan… phunnawi awih loh aw 😊