Tidamtu Kut 8

TIDAMTU KUT… (8)

Ziaktu: Toni Rãlte

"Min chhuahtir r'u.. Khawngaihin.. Ka duh lo.. Hetiang hi chuan ti lo hram rawh u" ka ka chu plaster in an rawn bel phui hmiah. Ka mittui a tla zawih zawih a, ka che thei bawk si lo. Khatia min phuar hlawm hnu khan nu Zaii room dawt chiaha roomah min nawr lut a, chair lo awmah chuan min nem thu chawrh a, ka ke an phuar zui nghal. Keia thahrui neih ve chuan a dang hneh ngang lo a ni. A hmain kan lo inchai hrep tawh bawk nen. Roomah chuan Nu Zaii leh nichina min sualtu kha an rawn lut a, a kap chu a na tawh lo nge a kal danah na nei ang pawn a awm tawh lo. 

Nu zaii chu a rawn kun hniam a, chiang takin min rawn melh. A nui vur vur a, kei pawn ka melh reng ringawt. Rapthlak ka ti, a hmel chu a nelawm lohin ka laka thinrimna nasa tak nei hmel a pu a ni. Tawng thei ila chuan zawhna ka ngah asin le. 

"Hetia i awm chhan hi i hrethiam tawh em? " thinrim insum zet hian a ti a. Ka lu ka lo thing nawk nawk. 

A nui leh huk a, "I cho chhuah a nih hi. I man ka dawng vek tawh a, mahse, nang phiangsen hian sual i lo chhuah ve khanglang a, i man ka dawn pawh ka return leh phah.. Khanglang che hian" tih leh ka chawna rawn tlawh a rual a, ka ngal charah tak a rawn chhuih vangin ka chhing sawk. A na ngut ngut mai. 

"I virgin vangin i man ka ti to a, mahse, min timualpho zawk hle a nih hi.. Tikhan tu nge ka niha engvangin nge veng mawnga in fâl takah ka khawsak tih chu i hrethiam tawh em? Ka chawm thau te te che a, tiang hian min thungrul leh ang maw? Mai mai che hian. Ngawi tak rawh. Pindan thima ni 3 i awm hnuah chuan i zal raih raih mai ang. Nang anga ngawltawt chhuahte pawh lo tukzal tawhtu ka nih hi" tiin a inhrosa pung pung a. Khawpui nun hrethiam loin mawlmang ve teh mah ila, Nu Zaii chuan eng nge a tih ka hrethiam pha ve. Ni e, nawhchizuar turin hmeichhia a nawrlui thin a, nawhchizawrhna hmanga sumdawng a ni tih ka chiang. Ka mang a ang takzet a ni. Ka tan tal chhuahna kawng a kaw mawlh si lo. Ka thianghlimna leh zahawmna tu nge an nih pawh ka hriat loh hnena tihluihna hmanga hlan ai chuan thih mai pawh ka thlang zawk. Ka taksa ka hlanna man chu he mihring rapthlak zet hian a la dawng dawn zui! Tichuan, kei chu nawhchizuar ka ni tawh ang a, keimah leh keimah inten leh inngainep reng rengin hun ka hmang tawh ang. Chung thil ka ngaihtuahna chuan min tina ngawih ngawih. 

Nu Zaii te chu an chhuak a. Pindan kawngka an khar rual chuan pindan chu a thim nghal vek. Ramhuai leh thlahrang ka hlau lo va, he tanin thim atang hian ka damchhungin ka chhuak thei tawh lo ang tih ka hlau zawk a ni. Ka mittui chu a rawn hnâm leh tiam tiam a. Ka manganna chuan a vawrtawp a thleng takzet a ni. Ka rilru lah a fim thei bawk si lo. Ka taksa chau leh hah lutuk vang nge min phuar chung chuan ka lo muhil a, ka bu leh lawp thin. Khua pawh a var hnai tawh aniang, sava an chiar nak nak mai. Ka tawngtai nasa lutuk chu chham tur pawh ka hre tawh lo. Ka phone tal kawl ila a tha tur.. Kawl a lo en takah chuan ka rilru pawh a rawn fim chho tial tial a, chutia ka inngaihtuah lai tak chuan ka awmna pindan bul chiaha awm nu Zaii phone hmang ri niawm tak ka hre zui ta a. Pindan hi tile hmanga pindan ringawt a ni a. Zing kar reh lai phei chuan hriat a harsa vak lo. 

"Ngawhngawl a chhuah ve khanglang alawm le.. Ka lei to sia, chhawr loha kaltir te chu ka phal teuh lo mai" a tih chuan hrilhhai zetin ka meng kâwk a. Tu hnen atang chuan nge min lei ang? Awih harsa ti zetin ka thaw hawk. Nu Mawii hmel ka mitthlaah a lang a, nu fel leh min lainat ve tak ni khan ka hre si a. Ruati ka mitthla leh a, kan inhriat atangin ka lakah sawisel kaia a awm ka la hre miah lo. Min puih inhuam em emtu a ni zawk asin. Mahse, Ruati hi chuan a nu thiltih hi a hriatpui lo ve thei tho. Nu Mawii chu aww mak ka ti tak em.. Ka laka a rilru put dan piahlamah hetiang hmanga sumdawng thin a nih chuan rapthlak ka tihna aiin mak ka tihna a sang zawk ngei ang. 

Nu zaii bawk chuan, "Lungngai suh. A tlanchhuak reng reng lo vang. Ni 3 vel ei leh in mumal lo va ka khung beh chuan a tlawm em em ang. Nangma lam chu lo invengthawng suh.. A phone pawh ka kawl e. A sim card pawh ka phawi tawh e" a ti leh zat zat a. Ka hriat tur ngeia sawi te pawh a ang. Tu nge a biak chu? Nu Mawii bak an nih ka ring lo hul hual. 

Mi tang ka ni ta sa sa, engtin he pindan atang hian ka tlanchhuah ang tih chu ka ngaihtuah hmasak ber tur a ni. Ni 3 ka reh chuan putea te ngaih pawh a tha lo ngei ang a, Pa Mapuia hi chuan min rawn biak a tum kher lo ve thei a. Ani chuan ka reh leh reh loh a hrethiam lo thei. Ruati hian a nu thiltih a hriat loh chuan ka reh thut chu mak a tih ngei ka beisei bawk. Hriati hi chu a â ve phuang a, bakah bialpa a nei a, chuti takin min chîk ka ring lo. Ka thaw leh kâwk a. Chakna ka mamawh. Eitur min pek ang ang tui ka ti emaw ka ti lo emaw ka ei zel a ngai tih ka hria. Tichuan, an mut reh tawh hnuah ka tha neih zawng zawng nen min phuarna hi phelh ka tum dawn a ni. Mahse he pindan atang hian chhuak ringawt ila, he in hi ka chhuahsan thei ang em ka hre lo. A in hi a sang a, tukverhah bar an kham vek bawk a, zuan thlak pawh tum ila, ka zuk insawh khaw lo maithei. Chu vang chuan kawngkapui atang lo chuan chhuak chi ka ni lo. Tukthuan ei hun awm velah kawngka chu a rawn inhawng a. Puia kha rawn lutin thlengah chaw leh chawhmeh tlem a rawn keng. Min phuarna chu a phelh a. Chemte a keng ran si a, chet lak ngam chi a ni lo. Bakah pindan pawnlamah tu te nge awm ka hre si lo. A eitur rawn ken chu ngawi rengin ka ei mawlh mawlh a. 

"Inthiar i duh pawn hei bathroom a awm hi.. Heta i awm chhung na nâ na chu i duh duh danin he pindan hi chu i suasam thei" nui huah huah chungin a ti a. Min ît hmel zeta min thlir te chuan ka luak a tichhuak. 

Ka ei zawhah a chhuak leh hmiah. Keimahtêin ka awm leh ta tlawk tlawk mai. Min phuar tawh lo thung. Mak ka ti deuh a, mahse, pawn lamah tala lianpuiin kawngka chu an lo kalh a lo ni. Ka tan chhuahna chance a chhe lehzual ta hle mai. Ka thu rei si a, ka mawng a na vek nen khumah chuan ka mu zangthal thlawp a. Chunglam melhin chet lak dan tur ka ngaihtuah leh ta. Chhunah chuan awm an awm lo nge thawm a reh hle. Tukverh chu ka hawng a, Nu zaii hian thenawm a nei reng reng si lo. A in hnaih ber pawh a chhak tlang pawng deuha in chu a ni mai. Au engang mah ila, an hriat ka ring lo. Ka aw lah a zawi chi a ni si. Nu Zaii awmna hmun hi khawi veng nge tih pawh ka hre lo. A changin ka muhil a, a changin ka vei ka vei a. Awmngaihna ka hre lo. Rilru hah si, engmah ti thei miah lo va awm hi hremhmun ang mai a ni e. Tlai lam a lo ni a, thawm an nei ta nak nak mai. Hmeichhe dang tawng thawmte a awm avang chuan KS tu emaw an rawn kal leh a nih ka ring. Heng mi te pawh hi Nu Zaii bum tawhte an ni maithei. Kei erawh ka sawi tawh ang khan eng ang pawn min nghaisa rethei rawh se, ka thih thleng ţan ka tum ve tawp. Thi mah ila, thinlung taka min uitu an tam chuang lo bawk a, ka pi leh pu bakah ka nu te ka hmu thei tawh ang a, a nuam daih zawk ang tihte thlengin ka ngaihtuah a ni. 

Zanriah min rawn pe leh a. Tun tum chu nulain min rawn pe. Ka hmu fo tawh. A hming erawh ka hre lo. Chaw ka ei lai chuan, "Hetianga in khungtir lo hian an thu chu awih mai rawh. I ţang rei thei chuang lo vang. An rapthlak ania. Thah che pawh an pawisa dawn hauh lo ania" a ti sar sar a. Awlsam taka a sawi avang chuan ka lo ngei em em ringawt. 

"Nang pawh i tlawm ve tihna em ni! " ka ti ram hmak a. 

"Teuh lo, kei chu ka duhthlanna ngeia lut ka nia. Hetia innghaisakna vel hi ka ngaina ve lo" satliah zet hian a ti leh a. 

"I hur ve bawk a nih chu" ka lo ti hmiah. A hmel ka enin a lak nat hmel lem loh. Mak ka ti zawk. 

"Hur e.. Ka hur vang alawm he sumdawnna hi ka luhchilh.. Nang pawh hian nuam i ti chho mai ang. A nawmna i pawh tawh chuan i tal chhuak leh mai mai tawh lo vang. Pawisa i hmu ang a, i â vek mai ang" a ti dap dap a. Ka lo nui huk, "Chu! Pawisa vangin i thianghlimna leh zahawmna chu i hriat ngai loh mipa râwp tak takte tan i hlan tihna maw ni a?! Ka ten hle mai che" ka ti leh hmak a. Amah aia thianghlim leh tha zawka ka inhriatna chuan min ngaihsantir chu sawi loh min ngaihneptir ngawih ngawih a. Zah pawh phuin ka hre nek lo e a. 

Ka bulah rawn thu hnaiin chiang takin min rawn melh a, chutah chuan a ni natna thuk tak tuar mek mitmeng ka hmachhawn tak. Ka sawi thiam dan chuan, khuarkhurum mawng nei lo va tla vawn vawn, inhamtanna tur dap ve hram hram ang hian ka chan ber. A nui tak naa, a thinlung chhungril nen a nui lo tih hi ka thinlung hian a hrethiam pha tlat. A hmel chu a chhe hran lo a, mahse, a mitmeng chuan a tilang ngui zo vek a. Hlimna tak tak hmel pu ta lo chu a nih dan tur ang pawn a hmeltha lo. 

"Kei pawh nangmah ang rual ka nih chuan ka huaisenin thih pawh ka hlau lo asin. Ka thianghlim a, ngaizawngtu pawh ka nei ve asin" a ti ta a. A aw chu a khur lek lek. Ka chaw ei ka chawl det a, "Mahse, i duhthlanna ngeia lut i ni alawm.. " ka lo ti a. 

"Ka pa vang chauha ti ka ni. " a ti nghat a. 

"Mahse, sum thawhchhuahna dang a awm tho alawm" ka ti ţâlh a. 

A khi sak. "I hrethiam ngai lo vang. Ka pa chuan min hralh alawm.. " a ti ta a. Ka ţek chhawkin ka hria. Ka chaw thial lai pawh lem nachang ka hre tawh lo. 

"Maw?! Eng tin? " ka ti ta nghek a. Tlema min hlat hratin a kutzungchal chu a hmuiah a dah a. 

"Tawng ring suh. Nakinah kan sawi leh dawn nia.. Tunah chuan ka kal phawt ang" tih leh ka chaw ei lai mek chu rawn khawm a rual nghal a. Pawi ka ti hran lo, ka chaw ei a tui lo lulai em a ni. A chhuak a, kawngka an kalh leh nghal rap. Tihtur ka nei leh ta lo. Kha hmeichhia kha ka ngaihtuah zui ta ringawt. Engtin nge ama pa ngeiin a hralh theih? Mak ka ti tawp thei lo. Khawvel hi chu aw.. 

Zan dar 9 bawr vel a ni maithei. Nu Zaii room lo zawk ka room bul chiahah chuan mipa leh hmeichhia an rawn lut a. An thawm a ring viau. An rui a nih ngei pawh ka ring. Ngaihthlak loh duh mah ila, a hriat loh theih si loh. Beng hupsan lahin an thawm chuan min rawn zawng hmu zel niin ka hria. An nuam tuar thawm chu min ngaihthlak luihtir a ni ber e. Mahse, ka engahmah a thawk pha lo. Thinrim ţeuh chunga lo ngaithla ka nih vang nge ka hre bik lo. An zo tawh nge ni an reh ta vang vang a. Ka thaw huai mai. Mutthilh a har, chhunah ka muhil zeuh zeuh bawk nen.. Ka ngaihtuahna ka kawm leh melh melh takah chuan, kha hmeichhia khan min pui thei maithei asin.. Tih chu a rawn lut nghal a. Ka thu hlawl mai. Ni e, ka lo dawnsawn dan kha fuh chiah lo mah se; min haw hran lo niin ka hria. A hmelah natna thuk tak a inphum ve bawk nen, min puih a duh maithei asin.. Beiseina thar nen chuan ka mu leh ta phawt chu a nia. Eng nge maw ka an dawn ni. 

Zingkarah ka mu tui deuh nge, ka harh chuan ni a chhuak ut tawh mai. Inbual te pawh a ngai tawh.. Inthlakna dil a ngai a ni. Dik tak chuan min sawisain min nghaisa lo mah se, zalen miah lohna hmun hi chu a nuam tak tak thei lo a ni e. Puia'n tukthuan min rawn pe a, "Inbual ka duh a, inthlak ka duh. Chuan Nu zaii hmuh pawh ka duh" ka ti ta a. Mak ti hmel a pu deuh. A chhuak leh vut a. Ka chaw ei lai chuan Nu Zaii chu a rawn lut ta a. Amah pawh en chuang lo chuan, "Min leina man chu engzat nge? Inkhul ta ila, min chhuahtir ang em? " ka ti ta tãwng a. 

A nui huk a, "Min va ngainep awm ve. Ka kuta ka man tawh sava an thlawk chhuak tawh ngai lo" a ti hmiah mai. 

"Kei chu ka danglam alawm" ka lo ti a. 

"I la virgin avang khan danglam emaw inti suh, virgin lo ka man ngai lo. A chhan chu in zan hun hmas ber hi a man a to bik tlat a" a ti leh a. Min ngainep ngawih ngawih tawngin a tawng a ni ber. 

"A nih chuan zan hmasa ber chu hmang ila, a hnu lehzel chu ka zalen thei ang chu" ka ti leh a. 

"Min ngai mawl mang e aw.. Nang hi ka thuhnuaia ka dah chea ka tan thih hial pawh i ngam hma chuan he in atang hian i chhuak dawn lo. I chhuah rualin police station i pan dawn tih hrethiam lo khawpa mawl ka ni lo. Naui" a ti fiak thak a. A thinrim deuhin ka hria. Kei erawh ka inthunun hram hram thung. 

"Ka tiam a che. Ka sawi miah lo vang" tiin ka va melh a. 

"Nanga intiamna kha ek tlukah pawh ka ngai lo ve. Ka duhdan ang chuan awm mai rawh. Nizana lo kal kha i hria em? Rinzuali a nih kha.. Ani pawh kha nangmah anga luhlul ve tho a nia, mahse, ani chu a fing a, sawisak leh hrem ngai loin ka thu a zawm a. Tunah chuan ka mi chhawrte zinga sum lalut hnem ber a ni tawh. Bank-ah pawh a khawl hnem tawh viau ania" a ti ta a. Ka hriat duh, ka zawh ngam si loh a rawn sawi chhuak chu ka lawm ru hle. 

"Nia, min thlem alawm.. " ka ti ringawt a. 

Min rawn thut hnaiha, "Ka thu i awih phawt chuan Rinzuali nen khan engkim in ti dawn nia. Ka sum hmuh tur zat ka hmuh phawt chuan he ina i duhtawka i chen ve pawh ka phalsak ang che. I chhungte bulah i hnathawh i sawi a ngai lo, pawisa i thawn kha a tawk.. Tuman an hre lo bawk ang che. Duhthlan tur dang i nei lo" a ti mawlh mawlh a. Ka ngawih reng hnuah, "Eng chena rei nge ka thawh ang? " ka ti a. 

" A tlem berah kum 2.. Chumi hnuah chuan i duhna lam hawiin i pen ve thei ang. Mahse, i thawh chhunga suahsual i chhuaha police i hrilh a nih chuan.. Nangma ni loin i chhung ten an tuar ang. Kan nula pakhat pawn a thiante bulah tanpuina ngen tumin remchang a lo dap a.. A thiante hnen a thlen hmain a nau chu motorin a su hlum mai a ni. Tikhan i hrethiam tawh em? " a ti ta hmiah a. Ka lo ip zawk. 

"Ka chhungte i hre lo ve" ka lo ti tuar. 

"I putea te bak chhungkua i nei tawh lo tihte chu ka hnar awmna ka hriat tlukin ka hrechiang. Zotui khuaah mi ka tir nghal thei" a ti ţeng chhuai a. Ka lung phu a rang nghal. 

"I ti miah lo vang" ka ti ringawt a. A nui a, "Ka tih loh nan duh i thlang thei rêng alawm" a ti ta a. Ka chhing tawp. 

"U Rinzuali kha kawm leh phawt ka duh. Engmah chinchang hre miah lo va, thawh ngawt chu ka duh lo" ka aw khur thup tum tak chung chuan ka ti a. 

"Tehreng mai. Ani pawh a lawm ngawt ang. Ka nau rin ber a nih kha" a ti a. A chhuak zui nghal. A nau rin ber a nih chuan min pui thei dawn mawni le.. Bei nge sei run dung kan ti tawh mai ang chu.. Tukthuan eikham atanga rei vak loah ka inthlakna an lo dah a. Ka inbual fai ta vâk mai. Ka harh sawtin ka hria. Bathroom atanga ka chhuah chuan U Rinzuali chu khumah a lo thu fel than a. Ka phu zawk nghe nghe. 

Ka inthlak hnuah ka va thu ve a. 

"Nizan khan ka lo dawngsawng tha vak lo che tih ka hria a. Ka tihpalh aw.. " ka ti a. Ka tawngtai ru mawlh mawlh bawk. 

"A ho lutuk. Ka tawn than alawm.. Chuan, inpek mai chu i duh ve ta em ni! " min ti a. Min melh chiang khawp mai. Ka chil ka lem khawlh a. A mitmengah chuan engmah ka chhiar thiam lo. A buai nuaih ni maiin ka hria. 

"Ka hre lo. Ka mangang a ni" ka ti zawi raih a. 

"A harsa vak lo asin.. KS ni kher lo thianghlim tawh lo, an ngaihzawng kher pawh ni lo, an ruih changa mutpui theih mai mai hi an kuh ţún ve tho asin. Nang erawh chuan i taksa kha pawisa lakluh nan i hmang dawn a ni mai a. I chhungte i chawm thei bawk ang a.. Ngaihtuah buai vak tur a awm lo" a ti mial mial a. 

"Nang hian min puih theih ka lo ring zawk asin" ka ti ta hrâwk a. A tawng tawp chat, min rawn melh ram râm a. A nelawm vak loh. 

"Kei hian ka pui ang che maw?! " a ti a. 

"Aw.. Min pui ngei tur a ni. A chhan chu he hna hi nuam ti takin i thawk lo tih ka hria. I hmeichhiatpui, tleirawl mai hi he sumdawnna rapthlak takah hian i hruai lut thei lo vang. Nangmah ang nihtir i duh lo.. A dik em? Nang pawn tal chhuah i duh ngawih ngawih a ni lawm ni? " ka ti ta hmiah hmiah a. Engtin pawn min ti rawh se, ka rilrua lo lut apiang chu ka sawi tawp mai a ni. 

A ding hluai a, nelawm loh zet hian, "Nang hian chhuah zalen tur chein min beisei a maw? " a ti fiak thak a. 

"Aw.. Min pui rawh" ka lo ti ve sak. Hlauhna engmah ka nei lo chu mak ka inti. 

" I hre viau ang. Ngawi tak rawh. Hetiangtea min han tih le.. " tih leh kawngka hawn a rual a. 

"U Rinzual, eng pawh ti la, engtikah emaw chuan ka puihna i la mamawh maithei asin. He thil rapthlak tak hi kalsan i chak ve lo em ni? Pangngai taka nuna, Biak ina inkhawm te, Pathian faka zai te, i chhungte nena zalen taka chenho te leh rim taka i thawh hlawh hmanga thil lei te i chak ve lo em ni? I nun kha nuam i ti lo tih ka hria.. Khawngaihin lo inngaihtuah hram rawh" ka ti ta bawrh bawrh a. Rawn hawiletin, tumruh hmel zet hian, "pathian a awm lo ve.. Tin, i sawi ang ho kha châkna pakhatmah ka nei lo " a ti hriam hraih a. A chhuak zui nghal. Beidawng zetin ka thu ta tlawk tlawk a. 

Chawhnu thlang her a ni tawh ang tihin Nu Zaii leh Puia leh Mipa bumro zet hi an rawn lut a. Nu zaii mitmeng chu a alhin a alh a ni ber. U Rinzuali'n thil awmzia a hrilh tawh tih ka hre thei nghal. Hlau angin ka awm duh bik lo. 

"Thingtlang nu, i va huaisar reuh ve. Kan hlauhawmzia i la hre tak tak lo a nih dawn hi.. Tiru le.. Ka sawi ang khan che ru" tiin mipa te chu a en a. Mipa bumro deuh khan min rawn hnaih nghal ruak a, ka kut chu lain chhuatah min hnuk thla a, thawm chhuah loh hram ka tum. Ka samah kekin chhuat chu ka hmaiin a tauhtir a. Ka chal chu na tak a ni. Puia chuan tairawtiang ang deuh hi a rawn la a, ka chawn leh mal te chu a'n hlap tak tak a nih kha.. Ka rak tuar tuar.. A na êm a ni. Nu Zaii chuan min lo nuih sâwng thung. Ka ke chuan a hriatna a hloh ni maiin ka hria. Chutah bumro pa khan ka hmaiah a rawn hnek ta sawk a, ka tlu hnawk mai. Leia ka tlu sa chu, min rawn thutchilh a, min hnek leh mawlh mawlh. Ka thidang niin ka hria. Ka taksa pum chu a nat vek vangin ka tuar zo ta lo aniang. 

. "Duhtawk ru.. A thi mai anga sin.. " titu aw chu ral hla deuh atangin ka hre ruai ruai.. A thim ta vek mai. Ka harh leh chuan khumah ka lo mu a. Ka chalah tuivawtin an lo dep mek niin ka hria. Chet ka tum a, kareii! Ka che thei lo. Ka engkim chu a na vek. Ka meng diar diar a. Ka la hmuh ngai loh hmeichhe pakhat hian ka chal chu a lo dep mek a lo ni. Min rawn en ve a, U Rinzuali aiin a naupang maithei. 

"I lo harh ta maw? " a ti ringawt a. 

Chhan pawh ka chhang peih lo. Tawng tur pawn chakna ka nei lo a ni ber e. Ka maimichhing leh a, ka muhil leh ni maiin ka hria. Ka harh leh meuh chuan a lo eng uar tawh a, ka pum a ri ruk ruk, tumah ka bulah an awm tawh lo. Ka riltamzia chu aww.. Ka awmdan ka chhut neuh neuh a, ka mittui a rawn luang ngiai ngiai.. A na a ni. Heng mi te hian hetianga min nghaisak theihna hi an nei lo asin. Putea ka ngaihtuah a, min va ngaihtuah dawn ve aw.. Ka biak theih dawn der si loh. 

Thawh ka tum a, ka aiah thawt.. Mahse, ka inbengkang ngat ngat a, insehruh ţeuh chungin ka thu ve thei hram. Ka kekawr chu ka zu hlim a, awiii ka chawn chu a duk tluk mai. Ka mal pawh a ni tho ang. Ka ke chu ka kutin ka chawi a, chhuatah ka zu nghat a. Ka ding thei ang em aw.. Almira lo hnai ber chu va bawh titihin chumi rinchhan chuan din ka tum ta a, ka mittui hi a tla zawih zawih mai. A na lutuk tlat. Mahse, ka ding thei hram.. Almira bul chiaha darthlalang lian vak lo intarah chuan ka va inhmu a. Ka rak tuar. Ka mit veilam hi a phui titih a, ka mit hnuai ve ve a val kulh bakah ka biang chu a duk chur bawk. Heti em ema min han nghaisa mai chu.. Min sawisa hlum thak zawk se tha tur a ni. 

Kawngka a rawn inhawng a. U Rinzuali a rawn lut. Min rawn hmuh chuan a ding chawt a. Rei ngial min thlek a, a chek hlak hlak bawk. 

. "Tiang em em kha chu ka ring lo asin.. " a ti a. Ka haw thut bawk nen, "I lawm tawh em? " ka ti ngat a. Min rawn melh zawk. 

"I tuhrah a lawm" a ti a. 

"Ni e, mihring i ni ve emaw ka tih vang chauh a nih kha.. Tunah chuan mihring ni loin ramsa i ni tih ka hre tawh a. I lakah hian engmah mamawh ka nei tawh lo. Mahse, hei hi hre reng ang che. Hetianga hmeichhe tam tak nun tichhiaa tahtir tur hian i lo piang lo tih hi" ka ti tham chhalh a. Ka aw pawh a chhuak tha hleithei lo a ni e. 

A ngawi rauh rauh a, "Ka pui thei lo che alawm. Ka tan pawh a hlauhawm lutuk a" a ti ta a. 

"Ni e, engmah insawifiah a ngai lo. Ka tawrh tur ka tuar vek tawh. Tikhan, min hêk vangin i mark a tha sawt ang a. I hlawh tam sauh dawn a. A tha hrim hrim" ka ti bawrh bawrh a. 

"Chaw ei rawh aw" a ti daih a. Ka lu ka thinkhum. Tuisik ka in a. Khumah thei leh thei loin ka thu leh hnawk. 

"Nachhawkna an pe che em? " a ti a. Ka chhang lo. A va chhuak a, damdawi kengin a rawn lut leh a. Min pe nghal bawk, ka nat em vangin ka hnar phal bik lo. Damdawi ka dawlh zawhah ka mu leh ta ngút a. 

"Chhuak rawh" ka ti sap a. Min rawn en reng tih ka hria. Ka en duh lo lui tlat thung. 

"Chhuak rawh ka tih chu" ka ti leh hrâwk a. Ngawi rengin a chhuak zui nghal. Nileng deuhthawin ka mu a. A changin ka tap a, a changin ka hriat phak lekin ka zai thul. Pathian ka va mamawh tak em.. "Lalpa, i awm a nih chuan kawng min pe rawh. He lai hmun hi chhuahsan ka duh" tiin ka tawngtai chamchi a. A chang leh ka vau thul, "Lalpa, nawhchizuar tur hian min duh mi? Min chhanchhuak lo a nih ngat chuan ka damchhungin i kawng ka zawh leh tawh lo vang.. Aids ka vei pawn mi tam tawk ka kai darh ang" te ka ti thul.. Keimah leh keimah ka inbe thul.. 

Zanriah chu an rawn dah tlai deuh a. Ka ril a tam tawh bawk a. Ka ei fai vek. Tuman min be lo a, tumah ka be bik lo. Zantir atangin an bengchheng nghal a, an ri laih laih mai. Hmeichhia pawh an awm nualin ka hria. An nui awr awr te chu va thawh lawka keh hrep ka chak a,ka pindan dawt chiahah pawh mi pahnih chu an rawn mudun tawh. Dar 10 bawr vel thleng aniang an rik.. Thawm a zawi ve tial tial a. An kalbo emaw an mu bo zo a ni maithei. Kei erawh ka harh tulh tulh thung. 

Zan lai ar khuang ri ka hria chu ka lungte lam a chhia. Zing dar 1 vel a ni tawh ang tihin, ka pindan kawngka chu a ri rek rek a. Ka hawi phawk hra mai. Tu emaw hian min pawngsual a rawn tum ni turah ka ngai a, kei na tuar mek, che hleithei lo chu min sawp rethei ngawt ang le.. Thinphu dawt dawt chungin ka lo ngaichang tawp a ni ber. Kawngka chu zawitê hian a rawn inhawng ţial ţial a. Chutah ka rin loh lutukin U Rinzuali ka hmu ta. Thawm dim zet hian a rawn phei zel a, ka beng bulah, "Tunah vatin" a rawn ti ta a. Ka lo thaw hawk. Min kai tho a, ka ke te chu a khur nasa lutuk a, ka pen hleithei lo, min kuah pah a, ka hak lai nen chauh chuan pindan chu ka chhuahsan ta. Sitting roomah chuan thutthleng tinah chuan a hmei apain an lo mu thluah hlawm a, a then chu an hnar bur bur mai. Bawkvakin kan tawlh phei dun a, thawm pawh kan nei mang lo. Kawngkapui chu amah chuan a hawng a. A hawn rual chuan thawm a rawn chhuah a. Kan han ngaichang leh rih. Tumah harh awma an lan loh vangin min nam chhuak a, pawisa min rawn humtir a, ka beng bulah, "Police station pan ang che" a ti sap a. A lut nghal daih. Kei pawh ka dinhmun derthawnzia hriain ka theih anga chakin ka kal a. Ka taksa a nat em vangin hma erawh ka sawn mawh viau. U Rinzuali pawisa min pek chu cheng 1000 lai a lo ni a. Ka lawm e.. Nu Zaii in la hmu pha tho siin ka thu hnawk a. Ka hah em a ni. An harh ka ring lem lo bawk a. Zan thim chu hlauhna pakhatmah ka nei lo,mahse, khawi emaw laiah mipa awm tha lo duhlo deuh te ka tawng fuh ang a, tuna ka dinhmun aia chhe zawkah min dintir ang tih ka hlau.. Chuvang chuan hmun biru lai deuha birukna tur ka mamawh. Ka hma zawn kawngpuiah chuan ka kal mawp mawp a.. Motor leh mi veivak tumah ka hmu lo. Ka lawm daih zawk. Building lian zet bulah chuan ka ding ren rawn a. An garage zau zetah chuan lutin, motor pakhat phenah motor ngheng chung chuan ka thu ta hnawk a. Ka thaw hlawi hlawi mai. Ka chau tawngkhawng nen, ka muhil ta bawrh bawrh a. 

Tawng ri nak nak thawm ka hriat chuan ka meng a. Ka phu zawk mai. Pa upa lam tawh leh tlangval pakhat hian min lo en reng mai a. Thawh mai ka tum chu ka ner sawk. Tlangval chuan min lo pui vat a. Motor rinchhan chuan ka ding thei hram.. 

"Eng nge awmzia le.. Nula? " pa zawk chuan a ti dam thlup a. 

"Ka pu, in motor dahnaa ka lo riah ve ngawt vangin ka tihpalh.. Khawi lai nge police station hnai ber hi le.. Min hrilh thei em? " ka ti ta a. 

An inmelh tawn zuk zuk a, "Heta tang chuan a la hla ang reng a, kan biaksak dawn che em ni? Hawh, in chhungah lo lut phawt teh.. I sawiho teh ang u" a ti a. Ka zui ve nghal tawp. In chhung kan luh chuan makti fe hian nu ber niawm tak leh an nula hian min lo en a. Mahse, putar chuan thil awmzia a sawi zung zung a. Sofaah min thuttir a, an nula chuan thingpui a siam nghal bawk. 

Thil awmzia min zawh takah chuan, hmaih nei miah loin engkim ka sawi fai ta leng a. An chek hlak hlak mai. Thingpui in hmain nachhawkna min eitir bawk a, a charge tha aniang, ka na pawh a zia khawp mai. 

Pa chuan, "Zaithantluangi mai mai chu, ka rin dan chiah a ni. A sumdawnna tlereuh tih vel mai maiin kum hnih khatah khuti em em khuan a che lian thei lo ka ti reng a. Hetiang a lo tih vang a nih chiah chu.. Ngawi tak rawh.. Keiman Police chu ka'n bia ang e" a ti ta mai a. A call nghal hmiah bawk. Pawi tihna ka nei lo. Police bula thil awmzia a sawi lai chuan nu ber chuan ka hming leh khuate min zawt a. Tha takin ka hrilh ve mai. Min lainat hmel viau. 

Pa chuan, "Ka be tawh e. An rawn kal nghal dawn e. Chuan, va intifai rawh.. Police lam lo thlen hunah an mamawh dawn che sia.. Inthlahrung suh aw.." a ti a. An nu pawh chuan nelawm takin a lo tuihnih ve bawk. Tu te nge ka pan ang tih ka ngaihtuah rauh rauh a, Pa Mapuia te bak pan tur ka hre eih si lo. He mite ina khawsak ve ringawt chu thil tih chi a ni hauh lo. Tukthuan pawh inthlahrung viau mah ila, ka ei ve teuh mai. An felin min be bawrh bawrh reng a, ka tlangnel titih. An tlangval pawh kha a fel khawp mai. Police an lo thleng ta a. Kei leh pa ber te nen chuan Nu Zaii in lam kan pan ta a. 

"Hlau reng reng suh aw. Engmah i chungah tihtheih an nei tawh lo ania" tiin Pa Rema chuan min hnem mawlh mawlh a. Police an awm tawh bawk a, ka hlau vak lo. 

Nu Zaii in kan thleng chu kan hrilhhai kher mai. A lo inkalh bâm mai. Police pakhat zawk chuan thinrim zetin, "An tlanbo hman a nih hi.. Zawngho chu, ka la man tho tho ang. Nula, nakin zelah thuhretu atan kan la mamawh dawn che a. Koh theihin lo awm hram hram rawh aw" a ti mawlh mawlh a. Ka lo bu nghat. Nu Zaii te mawlh chu a ni.. Khawiah nge an kal ang le.. Kan tlan let leh lamah chuan, "Ka pu, tikhan an awm hun in chang tawp dawn em ni? " ka ti ta tawp a. 

"Umm.. Rawn let leh hun an nei dawn chiang a, kan man em em ang" a lo ti a. Ka thlamuang huai mai. 

Pa Rema te in kan thleng a. Kei chuan, "Ka chungah in felin in tha em em a, ka lawm takzet. Mahse, ka awmna hmasa te hnenah let leh ka duh a, anmahni hian ka chhungte biak pawhna number an nei a, ka chhungte ka biak loh chuan ka rilru a hrehawm em mai" ka ti ta tawp a. An number ka vawng miau si lo a. 

An tlangval chuan, "Ka va hruai dawn che nia.. Ka'n insiam ange " tiin a pindanah a lut nghal a. Pa Rema te nen chuan kan lo inkawm a. Nu ber chuan ka dinhmun a hre bawk nen, "Hlute, awmna tur i nei lo emaw mamawhna min neih phawt chuan min lo be hreh reng reng suh aw.. Kha hei ka number hi la rawh" tiin lehkha themah a ziak nghal mawlh mawlh a, ka hnuk a ulh. Pathian hi a va tha em.. Khawi hmunah pawh min khawngaihtu a lo dah ve zel a. Amah belh hi a inchhirawm loh ber mai e. An tlangval Samuela tia an koh chu a inpeih ta bawk a, inbe ngei ngei tura inchah chungin Pa Rema te in chu ka chhuahsan ta a. 

Pa Mapuia te bulah chuan eng nge ka sawi ang? Tu nge inah awm ang? Vawiin hi inrinni a ni tak e. An awm ngei turah ka ngai ve tawp. Kan thleng a, "Lo lut ve la" ka ti tawp. A bu nghut a. Kan chhuak nghal. 

Door bell chu ka hmet ri tlang tlang a. Reivak loah a rawn inhawng a. Ka pi a lo ni! An la cham ta fo a ni maw? Min hmuh thut chuan min hre lo nge min thlek ngial a. A chhan chu ka hmai an sawisa nasa em a ni. 

"Pi, keimah Hluteii" ka ti tham ţiak a. A meng phawk vak a, min rawn kuahin, "Eng nge awmzia? hlute,.. " a ti hrâwk. 

In chhungah kan inzui lut a. Ka pi chuan Pa Mapuia a ko nghal chul bawk. A rawn chhuah chuan ani pawn min hriat loh hmel tawp, ka pi chuan a hrilh nghal var a. A mengphawk ve hle. A tawng hmain Samuela chuan puitling takin thil awmzia chu a sawi ta malh malh a. Ka pi chuan min lainat zetin ka kut a lo hum leh vang vang thin. Pa Mapuia chu a hmel a inthlak nasa hle, a changin thinrim hmel a pu a, a changin lungngai hmel.. A inhumsek thul.. Samuela'n a sawi zawh chuan, Pa Mapuia chuan min rawn kuah thawk a, "Ka naute leh! I va tuar nasa em.. A va pawi tak em.. " a ti vawng vawng a. Kei tah chhuak insum rei tawh bawk si chu ka puakkeh a ni ber.. Ka ţap ta hlawp hlawp a. Kan ri ta luai luai a ni ber e. Ka pi erawh nu bengvar tih takah Samuela chu lawmthu a hrilh mawlh mawlh a, thingpui a lum zui nghal bawk. 

"Ekhai! Thianpa, kan va lawm ve aw.. Ni e, Hluteii hi kan awmpui a ni satliah lo va, nau ang tak taka ka en a nia. Kan in a chhuahsan hnu pawh khan ka ngaihtuah reng a ni. Mahse, eng emaw vangin a chhuah kha a ngai si a. Tihian min lo hruai hawnsak a, kan lawm takzet a ni.. " Pa Mapuia chuan Samuela bulah a ti mawlh mawlh a. 

Samuela chuan, "A ho lutuk, kan tihtur ve reng alawm.. Amah hi a khawngaihthlak reuh em mai. Rawn tlanchhuak lo phei se chuan an tihlum duh mai ang" a lo ti ve bawk a. Kei chu ka ngawi reng. Thingpui te kan in zawhah Samua chu a chhuak a, inbe zui zel turin kan inchah mawlh mawlh mai. Chhungkua ka nei let leh angah ka ngai a, ka thla a muang veng veng tawh mai. 

"Khaw nge Nu Sangi" ka tih chuan ka pi nen an inmelh ralh a. 

"A lo haw tawh lo vang" Pa Mapuia chuan a ti ta a. A awmzia ka hrethiam hauh lo. Ka hmela buaina lang chu hrethiamin ka pi chuan, "Damchhung atan an inthen ta a nih kha" a ti a. 

"Ngati nge? " 

"A uire! " Pa Mapuia chhanna chu a tawi tek tawk viau. Mahse, a kim viau lawi si! 

"Awii a va pawi ve" ka ti ringawt a. 

A nui hak a, "Khaw nge Abby te" ka ti leh a. 

"A pu te nen an leng ve anih kha.. An lo haw tep ang" ka piin a ti a. 

"Hlute, va mu hahdam rawh. I intihdam vat a ngai. Khatiang chuan naupang ten zawhna an ngah dawn lutuk. Thawmhnaw i hloh vek si a, ka va bazar ang e. Eng nge ei chak te i nei em? " Pa Mapuia chuan a ti zung zung a. Ka lo hamhaih deuh. 

"Ih.. Bawngsa ka ei chak" ka ti a. Thawmhnaw vel kha chu ka hnial duh lo. Engmah ka nei miau lo a. 

"E taka.. Pa Mapui, i kal hmain putea ka lo be thei ang em? Min ngaihtuah tawh ngawt ang" ka ti a. 

"A ni tak, vawi thum lai min lo call tak asin. Kei lah ngaihthat lohna ka nei lo nen, 'A ph a chhia aniang' ka lo ti mai a. Kei pawn rawn call che chu ka tum ve ngial asin" tih pahin a phone min pe a. 

 

"In inah ka awm tawh lo tih a hria em? "Ka ti vat a. 

Inthlahrun hmel deuh hian, "Ka hrilh ta mai" a ti a. Ka thaw halh. 

Putea chu ka call nghal. 

"Ngati nge i biak theih loh? " tih zawhna a neih hmain, "Pute, ka phone a chhe daih a, hei Pa Mapuia te inah ka let leh tawh a. Ka rawn bia che" ka ti nghal zung zung a. 

Pa Mapuia'n ka chhuah chhan vel a lo sawi tawh nge ni, engmah dang min zawt lem lo. Tha takin kan inthlah thei a, ka lawm viau. Nu zaii khan hlawh engmah min pe hman lo va, ka awm rei lo bawk nen. Tun thla chu putea te thawn tur ka nei thei dawn ta lo a nih hi.. Pa Mapuia a chhuah hnuah ka inbual fai a, ka piin Nu Sangi thawmhnaw hnutchhiah thenkhat chu ka inthlak nan a lo zawng a. Ka tan chuan lian deuh mah se, a hak ve theih mai e. 

"Tikhan muhil vang vang la, eirawngbawl tih vel chu ka lo ti vek ang. Dam vat rawh" ka pi chuan a ti a. Ka hlim veng veng. Ka tan engmah hlauh tur an awm tawh lo tih ka hriatna ringawt pawh chuan ka na te chu a chhawk huai huaiin ka hria. 

Khuma ka mut hnuin chunglam ka melh vang vang a. "Lalpa, chhungkaw tha tak min pek vangin ka lawm e. He ina chengte tan malsawmna ka nih theih nan min tanpui ang che" tiin ka phun sep sep a. Ka maimichhing ta vang vang a. 

(Ih maw u, naktukah hian harsatna a awm loh chuan, Aizawl ka rawn zin dawn a. Sumo-ah chuan tuman story an type ka ring lo. Naktukah hian story a awm dawn lo tih ka rawn sawi nghal e aw. Tin, class hi dar 9-4 thleng kan kal dawn vangin, zan lamah emaw ka ziah a ngai tawh dawn a. Zan rei lamah lo chuan ka rawn post thei tawh rih lo vang. Class hi Ni 24- April thla pum kan kal dawn aw. Lo dawhthei hram hram teh u 😍😊