Tidamtu kut 7

TIDAMTU KUT… (7)

Ziaktu: Toni Râlte

"Engvangin nge i chhuah ringawt ang a? Ka remti awzawng lo" Pa mapuia aw chu a chang hle. Nu Sangi erawh a ngawi hmak thung. Chhuak se min duh tih hre thiam lo rual ka ni tawh bik lo. Thei leh thei loin ka pindanah ka bai phei a. Khumah thu hnawkin Ruati ka call ta a. 

"Ruat, chhuah ka duh a, zaninah ka lo riak thei ang em? " ka ti ta tawp a. Sunday a ni si a, hawn ngaihna awm hek lo. 

A thaw deuh hawk a, "Ka ring rengah, lo riak rawh. Hawn pawh a ngai lo, awmna tur nuam tawk kan zawng dawn nia. Lungngai suh. Bungraw lakpui i ngai em? " a rawn ti ta zung zung a. Thla a muang suai suai mai. 

"Aih, ka ngah lo va, taxi hman tur a awm mai ka ring. Mahse, in in awmna tak ka hre lo va, min lo hmuah loh chuan" ka ti a. 

"Aw i chhuah hunah min lo bia la, kan veng kawnah ka lo awm ang. Kei pawh tunah chuan hmun dangah ka awm rih tho" a rawn ti leh a. Kan inbiakna kan titawp ta nghal a. Ka sa pup pupin ka hria. Ka thaw te chu a hah a, ka khuate chu a sik ser ser mai. Ka ke lah chu a na reuh phian a. Ka bilh chiang ve êm bawk a ni. Pa Mapuia te nupa inhnial thawm hriat zui phei chu a nuam lo takzet. Ngah nge Remruati hmel chu ka lo an kher kher le.. Hmeichhe pangngai ve mai ka ni asin. Remruati ang lo ni ila chuan, nu Sangi pawh heti em ema ka laka a sual ka ring lo. Ka pi a rawn dak a, ka lo melh reng ringawt. 

"Hlute, chhuahte i tum deuh em ni? A tul reng reng lo a nia" a rawn ti a. Ka chhang thei lo. Ka rilru nat laia ka thlavang an hauh hian ka hnuk a ulh tlat zel. 

Pa Mapuia'n, "I awm dan zawng zawng hi ka hre lo emaw ti suh. Kan fate vang leh ka pa nihna ka zah vang chauha la then lo che ka nih hi. Vawi engzat nge Rinpuia nen in inhmuh tawh tihte hi hre lo turah min ngai suh. A thiam lo leh tenawm zawk si hian thiam ber niawm fahranin ka lakah thikthu te chu i la nei ngam zawk a. I rinawm loh vang zawk a nih hi.. Saw nau saw naupang mai a la nih saw.. Remruati nen inanna pawh an nei hek lo. Ka duh loh thleng thleng sawi tur hian min nawr lui suh" a tih fak fak chu ka hria. Ka chhing tawp. Keimah vanga nupa inhauh chu.. 

"Ve khanglang a che. Rinpuia nen chuan thian kan nihna a rei tawh. I ngaih anga inkawm kan ni lo e. Khatin i rinawm loh vangin min puh suh" Nu Sangi chuan a la ti ngam nia! Ka pi ngaihdan a ni ta bik lo nge.. 

"Ngawi teh, Sangi, ka lo inrawlh ve lawk. Inpa hi ka fapa a nih vang ni loin hetiang nulat tlangvalna kawngah chuan a hawiharh tehchiam lo asin. Mipa dang ang chu nise, Alex birthday zana pawn thima Rinpuia nen in inkuah khan a then daih tawh ang che. Tuman an dem hek lo vang, pasalte thlima rui chunga bialpa hlui te la kuah thei nupui chuan eng nge thiamthu sawi tur i neih? Tih tak êmah chuan Remruati thih sarhu laiin neih loh hlau ber niawm fahranin i rawn zar a, keini takngial pawh min zah zo loin.. Hetianga chhungkaw din tawh hnua innamnul leh mai mai hi kan ngaihdan a ni bik reng reng lo ania. Mahse, Mapuia sawi angin karah fanau in nei tawh a, kan tute kan lainat em vang hian Mapuia duhthlanna pawh kan la zahsak ve hram hram zawk a nih hi" a ti ve ta tâwn tâwn a. A thinrim ve viau anih ka ring. 

Nu Sangi chu a nui lui chiam a. Min râp zawk e a. 

"Pastor nupui pawh eng ual in lo nih loh hi e.. Ve tak che u hian, in fapa hian zir lo nise, kan innei nang. A zir ve em a, kei pawh ka huangtau ngam a ni mai. Mahni fate sualna leh dik lohna pawh hre lo, pastor nupui ve si" a ti ta chiam a. Ka lo hlauthawng zawk, Pa Mapuia thinthawkin kut a thlak mai ang tih ka hlau a ni. 

"Sangi, ngawi tawh rawh. I lo nasa êm mai. Ka nu hian dawt a sawi hran hleinem. Khati khawpa min neih duha buai te chu rinhlelhawm loh ten khawsa ve la, kan fate hi hmangaih ve ta che. Thil dang hi chu mipa ka nih angin ka tuarin enliam theih pawh ka tum. Kan fate i hlamchhiah lutuk erawh ka enliam thei ngang lo a ni. Ka bulah ngei i intiam tawh a, darkar tam pawh a liam hmain i bawhchhe leh nghal a nia. Siamthat chi niin ka hre lo che" Pa Mapuia chuan a ti ta khak khak a. Ka eng nge thawk ka hre lo, inrawlh ve chaknain ka khat a ni ber mai. Bai chungin ka va phei ve leh a. Min lo en thap. 

"Pa Mapui, ka chhuak anga, engkim a fel leh vek mai ang. Ruati te inah zanin chu ka riak ang a, naktukah ka haw ang. Chuan, min enkawl danah ka lawm em em a nia. Nu Sangi pawh demna leh huatna ka nei lo.. " aw khur lek lek hian ka ti ta a. Pa Mapuia chu a hmin lo tih a hriat reng mai. Mahse, ka pal luih a ngai. Ka hmakhua tam tak min thlirpui naa, khang duhthusam leh suangtuahna te kha chu an bo zo leh dawn ta a nih hi. Mahse, keimah vanga chhungkua an innghirngho reng dawn ai chuan kei an awmpui satliah chu ka kalbo mai tur a ni. Ka pindan lamah insiam tura ka let leh mek laiin, "Kha i hmel verther tak kha rawn lantir leh tawh ngai suh ang che" Nu Sangi chuan a ti chang fak a. Ka ding chawt. Mahse, chhan let a sawt chuang lo tih hriain hmalam ka pansan ta a. Bungrua ka ngah lem lo bawk a, ka insiam peih thuai mai. Ka kal hmaa naupangho hmuh ka duh viau nain, ka hnuk a ulh anga ka mualpho mai te ka hlauh vangin hmuh loh leh mai ka thlang ta a. Ka bag nen ka innawr chhuah lai chuan, "Ka va thlah ang che," Pa Mapuia hian a rawn ti a. Taxi hman mai tur a van hmel bakah fare chawite a ngai dawn sia, pawisa ka ui ve tho nen.. Pa Mapuia motorah chuan ka thu ta vang a. Ka chhuah a remtih tak avanga chhungrila lawm lohna ka nei chu thup hram hram ka duh. Ka thlavang hauh vak tura ka beisei ve ringawt pawh chu ka inthiam loh bakah zak thei lo ka inti. 

"I Nu Sangi hi zawng a beidawnthlak a ni e. Hlute, min hrethiam hram rawh aw. Engtikah emaw ka la rawn ko leh tho ang che. Naupangho pawh an khawngaihthlak. Tisawn a duh ang takin nun chu hmang se, ka dawhtheih loh hun erawh a la tawng baw ngei ngei ang. Ka fate hi chu awm lo se, ani saw ka mamawh ber a ni lo asin le" a ti vawng vawng a. A rilru a na takzet tih a lang reng mai. A dinhmun ka ngaihtuah a, fate ngaibtuah leh hmangaih em em a ni hi ka ngaisangin ka zah bawk. Nu Sangi a then mai lo pawh nep ka tih phah hek lo, mipa dik tak a ni tih ka chiang. Pa thenkhat chu an nupui fanaute ngaihtuah a hnekin, hmeichhe dang an la ngaihmelhsan a. An nupui fanau amah mamawh em emtu te phatsanin zan khaw tairek thleng thleng an fawr thin a nia. Pa Mapuia erawh a hmel ang chiah hian a dam dup reng a, nupui fel tak amah zahthiam tak nei ve chu nise, chhungkaw nuam lutuk din thei tur an ni mawle.. Ka lainat takzet a ni. 

"Ka hrethiam alawm.. A ho lutuk. Naupang te pawh a ngaihsak ve tawh mai ang. Ka thiam loh vek zawk a ni" ka ti a. A tlan muang thut, min rawn melh zauh a, "Thiam lohna engmah i nei lo. I vanduai a ni" a ti sup a. 

"Huat leh tak lohah chuan U Remruati hmel ang ka lo pu hi ka duh lo ee. Thlak theih se ka duh takzet a ni," ka ti ta phawng a. A rum nghut.. 

"Thil mak tak zawng a ni ngei a. Pathianin kan tan rem ruat duh pawh a nei a ni maithei.. Hetiang boruak kal dan vel hi," a ti ve ringawt. A sawi awmzia erawh ka hrethiam pha em em lo. Ruati kha ka biak lawk tawh vangin kawna waiting shed-ah chuan a lo thu vang a. An in a la hlat deuh tho vangin motorah lo chuang lut vein an in lam kan pan ta a. 

Ruati chuan Nu Sangi zia a hre thang tawh bawk a, makti hmel a pu lem lo. Zawhna pawh min zawt hek lo. Pa Mapuia nen chuan an inkawm ta daih a. Keiin ka ngaihtuahna ka lo kawm thung. An in peng kan thleng a, kan chhuk nghal. 

"Kha.. La rawh. I mamawh ang. Ka hamhaih atalângin engmah lakbelh nachang ka lo hre lo va, ka ah chhuah hi a tam lem lo naa.. La rawh" tiin Pa Mapuia chuan cheng 500 tlang panga hi min pe a. 

. "A ngai lo.. Hlawh ka la zo chauh a ka la hmang lo. Ka mamawh chu ka nei ve alawm," tiin ka lo hnar a. Mahse, min nawr ngat ngat bawk si nen, inthlahrung zetin ka laksak ta nge nge a. Ka lawm takmeuh a ni. Ani pawh rawn peng khawtlai loin a let leh nghal a. Ruak huaiin ka inhria. Ruati nen chuan stepah kan chhuk thla hnak hnak a. 

"Ti daih ila, Zorina chungchang kha i hre tawh em? " a ti thut. Ka ngaihtuah loh lam lutuk min zawh vang chuan ka hamhaih lek lek. 

"Eng kha" ka lo ti ve mai a. 

"A Bialnu vel kha " zep ţit tet lo chuan a ti ta mai a. Ka rin dan kha a lo dik chiah a nih dawn chu.. 

"Umm hria", ka ti nghat a. 

"Ka ngeizia hi amah vangin Adika nen kan inhau hrep lehnghal" a ti ta a. 

"I hriatpui ve vek zawk emaw ka tia" ka lo tih chuan, za vak lova nui chungin, "Aw an ni tawh lo turah ka lo ngai char char zawk a. Ka hriat lohin an lo inrenew leh a nih dawn kha. Adika pawn a zeppui emaw ka tih vang alawm kan inhauh hrep" a ti ta bawrh bawrh a. Dawt a sawi ka ring lem lo. 

"A ho em mai. Sawi tawh lo vang. Ni ve mai mai teh se" ka ti nghat a. An in kan thleng chawpchilh nghal bawk nen, ngawi rengin kan lut ta a. A nu chu a felin a bengvar khawp mai. min lo be sawk sawk a, Nu te lam deuh, ngo veng mai a ni a. A hmel hmuh a nuamin thla a muang nghal huai huai mai. Inbualsa ka phei avangin eirawng ka bawlpui nghal a. Ka ke nat vang erawh chuan ka che vak thei lo. An phal lo chung ka che a ni zawk mah. Ruati'n a hmain ka pa chungchang vel a sawipui tawh a nih ka ring a. Chu lam hlir chu kan sawi. 

"Ruati pa hi chu a la dam ka ring a, mahse, zawn chhuah dan ka hre lo a ni. Amah zawk hian min la rawn zawng chhuak mial thei bawk," a ti siam siam a. Sawi ve tur ka van hle thung. 

"I putea pawh chu ka la be ve dawn nia. Chuta tang te chuan hriat dan a awm maithei asin.. Ruati nen unau in nih phei chuan mi ina awm ka phal dawn lo ania. Hetah kan bulah i awm ve ang a, lehkha te pawh i zir ve leh ang chu" a tih chuan, "Aa.. Nute, putea te bula awm hi a ngai zawk. Piteii sawn a la chhuahsan hlen rinna ka nei thin. An nupa inkar saw a tha vak si lo va" ka ti niah niah a. 

"Buaithlak a nih hi.. Hmeichhia hi zawng kan lo sual em a ni" a ti hlak a. A sawi dik ka ti khawp mai. Hmeichhia hi chu hmeichhia kan nih bik vang nge neuh neuh te hi kan ngah thei si. Thil lah hi kan tithei phian zel bawk a! A mak a ni e. 

Zanriah chu ka ei tam phian. Nu Sangi nen kan inkar boruak engmah min zawt lo chu ka hrilhhai letling zawk. Min zawt hreh ve pawh a ni maithei. Nge Ruati atangin an lo hre tawh lutuk a, min zawt buai peih lo pawh a ni maithei. Putea nen kan inbia a, ka chhuah thu erawh ka la hrilh lo. Ruati thurawn kha ngaihchan leh rih deuh pawh sualin ka hre chiah lo. Va haw ringawt ila, ka hmabak chu ram hna va thawh leh bawrh bawrh kha a ni dawn a. Ka thatchhe ta e tihna lam ni loin, hah taka thlansa phulkaia va thawha piteii phun thawm hriat reng ai chuan heta hrehawm deuh tuara pawisa tlem azawng thawhchhuah pawh kha a la hlu zawk thoin ka hria. Ruati chuan, "Adika pawh hian a hre maithei. A patea nupuite chhung hi an hausa a, an fel bawk sia, awmpui tur an duh maithei" a ti a. Adika pawh a be nghe nghe. 

A nu inkhawm kal hnuah ka test kit lei ka phawrh a, a va intest ta a. Hlauthawng zetin kan thlir dun a. Rin pakhat a rawn inrin vâ a. Rei fe kan nghah hnuah pawh a rawn double ta lo. A thawk huai ka rin nen, "Zing zun kher an ti tak.. A dang lei leh a ngai anih hi" a ti leh lawi a. 

"Hmang tawh suu aw" ka tih chuan, "Awii, hlute, i bul ania ka sawi tawp ang. Vawi khat hman tawha inpawh laklawh tawh chuan lo nep hi a har ve thin tawh lutuk. Adika hi ka hmangaih bawk sia,bakah kan hman hnu hian a hma aiin min duat sawt bakah min neih lohte hi a hlau niin ka hre zawk. Ka virgin hawngtu a nih vang a ni maithei" a ti seuh seuh a. Ka la tawn ve miau loh vangin ka hrethiam ve vak lo. Bakah khawpuia ka awmna a la rei loh bakah hetiang lam chu zahmawh ang lek leka ngaihna ka neih vangin ngaihthlak nuam pawh ka ti vak lo. Ka lo zak deuh thin. Sâwn erawh pai loh ka tum khawp mai. A chhan chu sâwn ka ni a, ka dinhmun kha ka theihnghilh ngai lo a ni. 

Ruati khumah titi pahin kan mu char char a. Kan lo muhil ve mai. Ka mutui angreng viau. Zinga ka thawh chuan ka mutna ka hai tep.. Ka ke na pawh tlem chuan a zia deuhin ka hria. Kal pangngai erawh chuan ka la kal hleithei lo. Ruati thuchah ang kha Adika chuan a lo bawhzui ve vat ni ngei tur a ni.. "Nuteii u te chhungkua hian awmpui chu an duh a. Mahse, amah Hluteii khan nuam lo a ti ang em ka hre lo, amah ang rual leh amah aia upa pahnih an fate an awm ve a.. A thu thu a ni mai. Eirawngbawl leh in tihfel a ni mai. Hlawh pawh a chhe lo ang" a rawn ti ta a. Ka rilru a buai ru hle. Zep nak emaw naupang te takte te bula khawsak chu an awmpui mah ni ila, kan upat zawk miau avangin min chung enna an nei ve a. Chutianga ka rualpui te ho nena han chenho chu kan inkarah gap a awm chuan a nuam vak dawn loin ka hria. 

. "An fate chu an lian ve tawh tho sia, ti nge awmpui chu an duh le? " ka ti ta phawng a. 

Ruati pawh chuan, "Dik chiah. Khawpui milian ho chu an mak em asin. An awm awl lutuk vangte hi a niang, zunthlum te hi an neih hma em em ni" a lo ti ve hluai a. Kan nui dun ringawt.

"I thu thu ni mai. Fel chu an fel ve viauin ka hria. An zaidam " Ruati chuan a ti leh a. 

"Nia, ka hrethiam chiah lo. Ka duh tho mai. A lo nuam phian thei bawk a. A thuhrimin a mamawhtu zawk ka nia, duhthlang thei pawh ka nih loh chu" ka ti ve mai a. 

"I ngaihawm hrim hrim, i ke dam hunah i awm dawn pawn awm law law rawh.. " a tih chuan nuam ka ti huai mai. Inthlahrun tina chi ka ni si a, mi te hian min lo ning ru viau ang tih hi ka hlau tlat zel a ni. 

Zorina'n a rawn call hlawl mai. "Ka la ang nge la lo vang" ka tih chuan, "La rawh. Hau hrep rawh," a ti mai si. Phur fahran lo chuan ka la ta a. 

"I va reh ve" a rawn ti ham ham a. Ka ner sawk. 

"Nang alawm" ka ti hul hak a. 

"Thinrimna i nei chiang"

"A ho ee. Ti nge min lo biak a? " ka tih chuan, "Ka bialnu te ka be thei lo tihna mi! " a ka rawn ti ngam nia! A lan dan ang a va ni lo tak. 

"I bialnu kha be zawk la" ka ti ve salh. 

A chek hluk a, "Tu chu maw? " a la ti he haw. 

"Inrinnia a birthday in lawmnu kha.. Min hmuh loh der nasatzia kha.. I lo pa lo ngei mai.. I tuai tih ka lo hre lo reng reng a.. " ka ti ve ta hrep a. Nu Sangi laka insúm rei tawh nen, Zorina laka ka lungawi lohna nena a han inbelhkhawm chuan ka lo nasa ve hle mai a lo ni. 

"Awihawm loh e. I sawi awmzia ka hre lo" a rawn ti a. 

"Hriat kher a ngai hleinem.. Min lo be tawh suh" tih pahin ka hmet hlum nghal daih. Ruati bulah block dan ka zawt a. Engkimah ka block fai ta vek a. Dik tak chuan ni khat chiah kan inngaizawng a nih ber chu. Min la fawp hman zui! Kan inzawmna a la rei loh em vangin ka na lutuk lo a nih ka ring. Ngaih hohna riau ka nei ve tlat. 

"Adika pawh kawm tawh suh ka ti ang. Khatiang.. Ka tan pawh a nuam lo lawm.. Ka sawipui che sia" Ruati'n a ti hmarh hmarh a. 

"A ho em mai. Engahmah ka ngai lo ka tih kha" ka lo ti ve mai a. Nuam lo ka ti zawk, a inthlahrung lutuk chu. 

Mawl deuhin, "Taka Ruat, i nu hian eng nge a thawh? In in hi a nuam reuh sia, a changtlung bawk sia" ka ti ta hlawl a! 

Mak tih hmel deuh hlek hian, "Ka nu hi chu a thiante nen Agency an din ve a. Singapore, Macau leh China vela maid tur te hi an agency bultumin an ngaihtuah thin a. Chung atanga a sum hmuh bakah tlereuh hi a thian phaia awm ten an lo thawn a, a zuar chhawng ve leh a. Mi lian hmelhriatte hi a ngah zêk ania aw" A ti ta a. Ka rin loh lam daih. Mahse, Ruati nu Nu mawiteii hi nu mawl tak a ni loin ka hre reng a ni. A hawiher leh tawngkam atangte khan. A zangkhai vah mai a. 

Min rawn melh zauh a, "I duh ve lo mi? Singapore vela kal chu.. Hlawh a tha asin" a ti a. 

Ka heh ka liak zauh, "Ka hrethiam lo. Putea hian a remtih ka ring chiah lo" ka ti a. Ni e, a remtih ka ring lo. Aizawla ka awm pawh hi engtia tih thu loh. Ram danga awm phei chu a rilru a hah dawn em mai. 

"I nu chuan Aizawl velah awmna tur vel a ngaihtuahpui tho lo mi? " ka ti leh a. 

A ngawi rauh rauh, "Kan zawt dawn nia aw. Pa Mapuia te ina lânga ka kal pawh kha Nu Sangi nu te atanga a hriat ania. Chuvanga kal phal chauh chu a nia" a ti ta hlut a. 

"Nih chuan, a hmelhriat tha deuh, fel deuhte ina awmna tur hria se" tiin ka nui a. Ka beisei sang tawp. 

Nu Mawiteii chu tlaiah a rawn haw a. A chawhmeh lo hawn chu kan siam nghal a. Ruati pawh naktukah a zirna a chhunzawm tawh dawn a, lehlamah chuan ka huphurh ru viau. An ina lo awm ve reng pawh chu. Ruati chuan a nu bulah kan titi dunna chu a sawi ta ngei a. Nu mawiteii chuan, "Ni e, ka lo ngaihtuah ve reng asin. Ngawi rawh, Hlute, tihtheih ka nei maithei. Inthlahrung loin awm ve phawt mai la, thiante ho ka lo be kual dawn nia" a ti ta a. Ka lawm kher mai. 

Zanah ka rin loh lutukin Adika leh Zorina an rawn leng a. Min hmuh chuan mak ti awm pawn a awm hran lo. A hre sa a nih ka ring. Ruati chuan a lo bia a, ka ngawi ngal thung. Biak chakna ka nei lo bawk nen. 

Adika zawk chuan, "Hlute, i ke chu eng nge a an? A zia deuh em," a ti a. 

"Umm, hei a zia tawh tawp.. Naktukah chuan ka kalpui thei tawh mai ang" ka tih lai mekin Zorina ka bulah a rawn insawn. Han kalsawn daih chi a ni bik si lo nen, ka tum deuh bâr mai. Nu Mawiteii chu a mu hma a, a fate awmdan hi a hre vek tawh a, Adika hi a duhpui ve nge a be chhe hran lo. Ruati te pahnih an titi ser ser lai chuan Zorina chuan ka kut a rawn la a, ka lo ţang nasa mai. 

"Sawi dun a thain ka hria" a ti zawi raih a. 

"Eng chu" ka lo ti hlar thung. 

"I ngaihdan ang kha a ni lo. Ka sawifiah thei. Kha nu kha ka bialnu a ni lo" a ti a

"Ruati'n a sawi vek tawh. Pha buai lo mai rawh. Thian angin inkawm tawh zawk ang. " ka lo ti hmiah. Ruati hming han sawi kha ka hreh viau naa kawng dang ka nei lo a ni. Amah Ruati pawn pawi a tih ka ring lem lo. 

"Lal Ruati pawh sawn a hresual reng alawm.. Ih. Khami ni kha a birthday a ni sia, a tawp nan tak tak min hmanpui rawh a ti tlat a.. Chuan ka tibuai zui lo vang che a tia. Chuvanga hmanpui ve mai ka ni" a ti leh ta zut zut a. Ka awih loh dan chu a.. Ka nuihte lam a za. 

"Chupawhnise, a ho eee.. Ka duh tawh chuang lo che" ka ti ta tawp. Hmeichhe lerh ka ni lo va, ka dinhmun ka hre bawk. Mipa hi ka mamawh em em hran lo. 

"I mak hle mai" a ti nghat a. 

"Mak deuh asin ka nih.. Bakah mi awmpui mai maite chu zahpui tawk lek kan nia. I tan a hrehawm ang. Changkang deuh ngaihzawng zawk rawh" ka lo ti ve zel a. 

"Ti nge i awmna atanga i chhuah hrim hrim a? " a tih chuan.. "A chhan a awm a ni mai" ka ti leh tawp. Ka zep lo, a tira ka duha ka ngainat ve nen, min hmuhsitna leh min ngaihnepna khan min tentir aniang, ka hmu nep vek. Zah pawh ka zah der buangbar peih lo. A ngawi ta vung vung a. Adika'n hawn a lo rawt ve bawk nen, an haw ta a. Ka thaw huai mai. 

Mut hmunah Ruati chuan Adika nen an intawndan vel te a sawi a. An awhawm reuh ka ti. Naupangte ni siin an nghet ve em em a, Adika lah a rinawm phian bawk si. An la inneih mai pawh ka ring. Ka muhil chu ka mumangah Abby hi ka lo hmu a, a lo cherin a lo bal hle mai a. Chhangthawp khawro tawh lam hi a lo keih a, dam lo hrep a ang. Min hmuh veleh, "Ate, ka ngai tawh che e. I zin rei tawh si" a lo ti a. Ka harh nghal daih. Mutthilh leh a har tawh hle. Ka chhuahsan atang khan Pa Mapuia nen pawh kan la inbe leh miah lo. Abby te chanchin tal ka lo zawt khawmawi ve lo chu mawl ka intih bakah ka inthiam vak lo. Zingah ka zawt ngei ngei ang tiin ka intiam a. 

Ka thawh veleh ka intiamna angin Pa Mapuia ka call nghal. A lo la vr mial a. "Pa Mapui, in dam tha em? " ka ti phawt a. 

"Aw dam e, i haw nge i la awm? ",a rawn ti a. 

"Hei ka la awm. Awmna tur dang ka zawng leh laklawh a"nuamti vak lo chuan ka ti a. 

"A nih chu aww.. A pawi ngawt mai. Ka nu te pawh ka chelh leh rih a. Hlute, min hrethiam la, lo haw leh mai teh a.. I nu Sangi chu ka buaipui ang. Awmpui lak tur hi an vang riau bawk nen, Abby te lahin an sawi an sawi bawk che sia" a rawn ti a. Ka heh ka pet fan fan.. 

"Nia, Abby chu ka mumangah ka lo hmu a, a dam tha em? Ka ngai khawp mai. Alexa pawh" ka ti ta a. 

"Aw dam a ni mai. Mahse, an lung a leng a ni. Tlaiah ka lo hruai ang che aw" a rawn ti zawm zat a. Ka rilru a buai, mahse, mi dang nana hnawksak leh mi nupa inkara harsatna thlentu va nih leh ringawt chu ka zuam tawh si lo. 

"Aa.. Pa mapui, hun tha a la awm mai ang. Tunah chuan in nupa kha inrem phawt rawh u " ka ti ta tawp a. A tawng leh hmain phone ka dah daih. A polite loh thlak viau naa, ka hnar leh thei lo vang tih ka hlau. Ka nem ve bawk sia. Ei rawng kan bawl laiin, Nu mawiteii chuan, "Hlute, nizan khan ka thiante chu ka be kual a. Kan thiannu hmeithai, hmeithai ti ila, a fate hi hostelah a dah a. Tunah chuan amahin a khawsa a, a hnaah a buai viau mai a, awmna atan chuan nuam ber tura ka ngaih a nia. Hlawh pawh a chhe dawn lo va, i duh dawn chuan a awm theih. Eirawngbawl leh in lo nghah a ni mai" a ti siam siam a. 

"A that reng chu.. Ka duh lo hran lo.. Mahse, amah chu eng ang mi nge? Nu sangi anga sual a nih loh hram ka beisei" ka tih chuan a nui hawk hawk a. 

"Ni teh nang, nu thawm na zet a nia, tawngkam pawh a duhtui vak lo, mahse, a rilru a chhe lo ania. A tih ang chiah che khan tilet ve mah la, engahmah a ngai bik lo. I in ang chiahin i awm thei ang" a tih chuan ka lo hlim hle. 

"Eng nge a thawh a? " ka ti a. 

"Sumdawng a nia, tlereuh vel hi a comission ve thin a. Tin, in leh huan ram vel te pawh a ti tel tho. Ama tawkah a khawsa ve thei phian. A fate pathum pawh hostelah a dah vek thei ania. Hlawh pawh a chhe lo vang ka tih chu" a ti leh a. Ka phur ta viau e. Tlai lama awm nghal turin kan inbe rem chu a ni ta mai. Pa Mapuia lakah erawh ka inthlahrung ru khawp mai. Mahse, min dem em em ka ring bik lo. 

Ruati'n class a kal ta bawk sia, in ka nghahsak ta vel mai mai. Tihfel tur lah a tlem si. Ka awlthawng viau. Eirawngbawl hmain fai takin ka inbual a, eirawng ka bawl zui nghal. Ruati pawh a rawn haw ve ta a, a rai tak loh vangin a hlim zual niin ka hria. Mahse, fimkhur hram tawh se ka duh khawp mai. Zanriah chu kan ei hma ta deuh a. Thleng kan seng laiin ka awmna tur nu chu a rawn thleng. 

Nu lian leh thau pui mai, samkir bup mai, kuhva heh hmel zet a ni a. A kareh a zau deuh vangin a nui pawh chu a hmuhnawm tham hle. A tawng suam suam a, zial a pet deuh reng bawk. Nu sual tak chu a nih hmel loh. Ka lo hmuh ve dan chuan, no ho ve tak, phawkphawhraw ve deuh tak, zahmawh te pawh sawi thei mai tur, Kohhran lama inrawlh tehchiam lo, nu sual ni chuang si lo ang hi.. Ka lung pawh a dam ve viau. Min biak nghal suam suam avangin ka nel ve nghal mai. Ruati'n min insiampui a. Kawt thleng min thlah bawk. Ka awmna tur nu chu Nu Zaii a ni a, a taxi hmanah bawk chuan kan inphur phei ta a. 

"Motor leina te hi zawng ka kawl ve reng mawle.. Ka khalh thiam dawn chuang si lo va, driver chhawr leh tho a ngai ang a, driver nen kan inzui deuh hnuah kan inngaizawng te kha a ni awm sia, mahni driver ten zantin min bawhbet tur chu ka ngaingam lo" tih vel chu a tawng duh dan a nia. Driver nen kan nui hui huk ringawt. A ngainatawm suah suah khawp mai. An in chu veng mawng lam deuh, fal ve deuh hlekah a lo awm a. In mal ding, concrete a ni. Motor erawh a lut thei vek thung. Amah chauha awmna atan chuan a lian lam hret a ni. A chhung pawh a nuam khawp mai. Ka room tur pawh a zauin khum pawh a nuam tawp.. Ka inremfel hnu chuan a lo tlai ve duai tawh a. Nu Zaii erawh phone biain bathlar lamah a tei nulh nulh thung. Kei erawh mut mai ka tum thung. 

Pathian remruat dan hi a mak khawp mai. Tihian putea te hriat miah lohin in dangah ka awm ta chu a nia. Nakinah ka la hrilh tho ang chu ka ti.. Phone pawh ka khawih tha peih lo, ka ngaihtuahna kawmin ka lo muhil ve mai. 

Zingah pawh thawh hma em em a ngai ta lo va. Ni 3 ka awm hnu chuan chet dan leh awm dan tur chu ka hre ve ta viau. Sawisel leh i a nei ngai lo va, ka tihdik loh a awm chuan min vin hreh lem hlei lo va, ka chhang lo va. A thinrim rei ngai lo bawk. Sumdawng a nih vang nge phone hi a hmang deuh reng mai a. Ka ngaihven tehchiam lo. Chhunah a khawharthlak a, achhuak daih zel sia. Pa Mapuia te pawh ka awmna te chu ka hrilh ve a. Min lawmpui ve thoin ka hria. 

Kar khat ka awm tlin hnu chuan thil mak deuh deuh a thleng chho tan ta a. Zan lama inleng nei ngai lo kha. Inleng kan nei ta deuh reng a. A tlangpuiin hmeichhia leh mipa an ni tlangpui. Tin, Nu Zaii hi a chhuak a lo haw hian nula pakhat emaw pahnih emaw te a rawn hawnpui a, chung nula te chu an riak ve thin niin ka hria. Inleng an awm hian, amah Nu Zaii'n, "Ninawm i tih chuan i roomah awm daih zel rawh. Bakah i la naupang si a, an ngai eng emaw ang che" a tih vangin ka pindanah ka tawm daih zel a. Engtin nge an awm zui ka va hre vak tawh lo. Ka sawi loh pakhat, a in hi a zau ka tih tawh kha. In hnuai a la awm zui a. Mahse, chu in hnuai chu in chung atanga kal pawh theih loh a ni thung, tuman an luah chuang lo. Choka dep pindan bawk ka chang leh a, Ka awmna hmasaah pawh khan ka awm tho. Sitting room epah room pathum a awm a. Pakhat chu Nu zaii room a ni. Room dang pahnih chu a fate room a nih thu a sawi mai a. Ka tihfai pawn eng thil danglam mah a awm hran lo. In hnuai erawh ka la chhuk hauh lo. A inkalh reng bawk nen. Luah duhtu te an awm lo em mawni. 

Tin, zan khat chu zu an rui ngei a ni tih hriat takin an ri bual bual a, hmeichhe pahnih awm ve te lah chu an nui hawr hawr a, music an play ta a, an thawm ka hre thei ta vak lo. Ka rin danin Nu Zaii hi amaha awm a ni bawk nen, a thian inngaizawng ten chance neih nan an rawn hmang thin a nih ka ring ta ber. Ka lo buai vena tur awmin ka hre lo. MHse, mipa bawrchhawr leh harhfim lo tih hriat tak tak an rawn kal chuan fimkhur a ngai tih ka hria a. An hmuh lohin ka inthiarfihlim vat zel. 

Thla khat awm nan ni 6 chiahin min dang tawh ang tihin thil danglam tak ka tawng leh ta a. Kan chaw ei kham chu enghelh nei tih hriat zet hian a thaw leh hulh zel a. Ni dang a ang lo tawp mai. Hawihhawm chhuahin, "Nu Zai, i rilru a van hah hmel em em" ka ti ta a. 

Nui luiin, "Hah nang aw. Ka puar deuh a nih hi" a ti mai a. Ka zawt lui tawh chuang lo. Ka intihfel zawhah phone ka khawh mai mai a. Mipa pahnih an lo lut a. Pakhat chu ka hmuh fo tawh hnu a ni. Nu zaii kid ve deuh ni maiin ka hria. Pakhat erawh ka la hmu ngai lo, tlangval a nih chu ka ring chiah tawh lo.. Pa a nih pawn a la upa chuang lo thung ang. Inchei zahawm tak a ni a. A hmel pawh a pangngai. An thut atanga reivak loah nula pahnih leh an bialpa niawm tak an rawn lut leh a. An bialpa ni tur chuan an upa tawh ka lo tihpui.. Patling tak tak an ang. 

Kei chu inthiarfihlim leh mai ka tum a. Mahse, Nu Zaii chuan, "Hlute, i mut. Hmain Theitui va siam lawk ta che" a ti a. Fridge-a kan dah sa theitui chu la chhuakin an indaih turin ka siam a. "Nang pawn in ve rawh. Digestion atan a tha" a tih vangin ka inthlit kep ve a. Ka siam mawlh mawlh laiin, a kid niawm tak kha a rawn kal a, Nu Zaii'n, "Hlute, ka roomah phone ka dah, min va lak lawk teh" a rawn ti lang lang a. 

A kid chuan min melh zauhin, "Ka lo sem ang" a ti a. Nu Zaii phone la tur chuan ka kal nghal. Nu Zaii kid chuan theitui chu a sem ta law law a. Ka no erawh a lo dah a. Chokaah ding chungin ka in a. Phone ka hmet pah bawk. Ka in zawhah no ka seng leh a, ka sil leh vek hnuah, "Nu Zai, ka mu aw" tiin ka pindanah ka lut nghal. Khumah bawkkhupin phone ka khawih a. Betu hi ka va nei lo ve tak. Zorina lah ka block bawk si. Group vela nawina chu ka chhiar a, ka khi vur vur mai. Ka tawng ve ngai lo naa, ka chhiar chhuak dap zel. An nun hi a nawm hmel thei bik hi ka tia. Hriati te nen kan inbe zeuh zeuh bawk. Ani pawh bialpa a neih atangin min ngaihsak lo sawt. Mahse, ka vui lo. Khaw hmunah kan awm bawk si lo. Group pakhata thlalak an rawn dah ka hmuh chuan ka phu zawk.. Ka thu chhuak nghal.. 

Nu Sangi leh bazara a lo kalpui pa kha hotel niawm takah thawmhnaw tlemte inbelin nui sâng chungin an ding dun a, an awmna chu balcony a nih duh hmel. A lo posttu chuan captionah, "He nu hi lawm chhe lo ka tih chu.. Mahse, pasal a nei reng sia.. A thlalakpui pa hi a unaupa chu a ni awm si lo va" tih a hmang a. Engti tiha chu thlalak chu nei nge maw a nih le.. An comment zui nak nak a, thenkhat chuan, "U Sangzuali a nih khi. Khi pa khi a ex, tunah chuan pasal fel deuh a nei tawh alawm" an ti a. Thenkhat lahin, "Tihian a pasal hriat lohin a ex hi a la hmu fo chu a ni sia.. An pa chu ni ila, ka pet chhuak tawh ang. An pa hi a dawhthei mah mah" an ti bawk. Engmah ka sawi lo. Mahse, ka rilru a na ve ringawt. Pa Mapuia chu ka khawngaih a ni ber. Then daih se tih duhna pawh ka nei ve nghal. Nupui dang fel deuh nei mai se te ka ti a. A la hma nen, ka mut a rawn chhuak riau mai. Ka ha pawh nawt lo chuan muthlu chunga ka phone khawih chu ka lo muhil daih.. Ka mumangah chuan Nu Sangi bialpa khan min lo sual a tum a, min bawhbetin ka awmah hian a lo nem nghek nghek a, ka hrawkah te a rek thul.. Thawk harsa ka ti em em a, ka hlau takzet a ni. Chutah ka meng ta kâwk a. Mahse, ka thaw tha thei ta hauh lo mai, a thim vek a, mahse, min delhtu an awm a ni. A rit viau lehnghal. Au chhuah ka tum chu kut lianpui hian ka ka a rawn hup nghal. Chutah zet chuan ka dinhmun ka chiang ta kher mai. Ka ngaihtuahna pawh a rawn fim sawt sawt mai. 

A thim vek avangin tu nge min delhtu chu ka hre lo. Ka theihtawpin ka nam a, ka leng vak vak bawk. A chak si. Ka hah hle. Mahse, tlawm ka tum lo. Duh leh ka thi mai ang. Nu zaii hi a mu tawh mi le. Ti nge engmah a hriat loh? Ka tawngtai ru mawlh mawlh a.. A kutzungtang chu ka theihtawpa nain ka seh ta a. Ka biang a ri nghal thlawp. A thip kher mai. Chutah min rawn hnek nghal siah bawk. Ka beng a kiu vawng vawng mai. Mahse, khatia a tanna lamah a inthlahdul deuh bawk nen, ka thu chhuak thei ta hlauh mai. A kap zawn nia ka rinah chuan na theihtawpin ka tlawh ta ngheng a. A rak thawt. Ka tlawh fuh a nih ngei a rinawm.. Ring zetin, "Nu Zai.. Nu zai" tiin ka au ta tuar tuar a. Pindan kawngka dapin ka dap fuh lawk thei lo lehnghal. Mahse, light onna ka dap fuh hlauh a, ka on nghal. Khumah chuan a lo vial ngawlh ngawlh a. Kha pa, Zan tira Nu Zaii kid-in a rawn hruai luh ngei kha a ni. A kapa ka tlawhna chu a na thawkhat viau a nih a rinawm. Pindan atang chuan ka tlan chhuak ta nghal a. Nu Zaii lo lut tur nen kan insu lo chauh. 

Hlau aw khur der derin, "Nu Zai, min sual a tum" tiin thlaphang zetin ka ti a. Min rawn melh hrâwk ringawt. A awmdan chu mak ka ti hle. Chu pa chu a va sawngbawl zui a, "I tha em? A zia lo hle mai" tiin. Mak ti zetin ka melh ringawt. Chutah ka lam rawn hawiin mitmeng tur khúia min melh chung hian, "Zawngi, i tichhe vek a nih hi.. I hre dawn khawp e.. Ngawi tak rawh" a ti vawt ta raih a. Kei erawh ka ding ngawt ngawt ringawt. A kid, Dina tia an koh maiin ka kut hnungkhirha a tawn mawlh mawlh lai te chuan maktia hamhaihin ka la ding ngat ngat nia.. Eng nge ka chungah hian thleng ta le?!! 

(Inrinni chu buai ni.. Ka theihtawp hi lo hnualsuat lo hram ru aw.