Tidamtu Kut 6/

TIDAMTU KUT… (6)

Ziaktu: Toni Râlte

Nu Sangi chu a lo haw a ni ta reng mai. Ka beisei aia hma leh rin lohin a lo haw ta si a. Ka awm a nuam fahran lo hle. Pa Mapuia erawh a lungawi hmel fahran loh a, ka pi leh pute erawh mi â an ni lo bawk a; an awm dan a danglam hran lo. Inbe em em lovin hun chu kan hmang chho leh ta phawt a, ka pi leh pu an la awm ve chuan tlemin min vawng ve deuh a, nu Sangi pawn sual a chhuah em em lo. Zirtawpni a lo thleng a, zingkar atangin kan buai nghal. Naupang pahnih te lah an phur em em a, keinin ei kan lo siam lawk a. Ruati te pawh an lo kal ve thei dawn a, a tihzia hle. Thenawmte chhungkua nen kan kal dawn a. Pa Mapuia motorah an chhungkua bik an inhnawh a. Kei erawh Zorina bike-ah ka chuang. Thenawm te pawh an taxi-in an kal a. Nu sangi a inchei parh leh khawp mai. A hmel hi chu a tha chiang alawm. Mahse, belhchian a dawl lo ve êm a ni. Picnic-na tur hmun kan thlen chuan naupangho an ri teng tung mai a. Keini pawh kan phur súrh mai. Kei phei chu Aizawla ka awm hnua ka chhuah vah ve vawikhatna a ni bawk a, nuam ka ti ve khawp mai. Choka lamah chawhmeh vel kan thiar lut a. Kei leh Ruati'n eirawng kan bawl dawn a ni. Abyy te unau chu an tuichen kawr ka haktir vat vat a, nu Sangi chuan melh pawh a rawn melh lo. Thenawmnu Nu Lawmi nen an titi char chat. Nu Lawmi pawh hi a hminga sawrkar hnathawk ve a ni a, an pa hian taxi a khalh bawk, anmahni tawkah an khawsa thei ve viau. Naupangho chuan tui an cheng a, an hlim ve khawp mai. Mipa ho chu eng emaw sawiin an titi ve nak nak a. Ka pi leh pu erawh huan lama tui tih takah kan picnic-na thlang lawka a neitute huan puitling tawh tak chu an zu fang kual leh hman a. 

"Awii Hlute, ka rilru a hah tawp.. Ka sawi hreh bawk sia" Ruati chuan a ti sar sar a. Chîk taka en chuan mawlhtu a nei tih hai rual a ni lo. 

"Sawi la" ka lo ti ve mai a. Ka lo hlauthawng ve ringawt. 

"Ih maw, ka la period lo va, tun thla" a ti ta mai a! A tir chuan ka bo deuh hú naa, ka hrethiam ve chawpchilh nghal. 

"In englo mi? " ka ti zawi sap a. Nui hmel pu deuh hian, "Umm.. Thla hmasa khan vawi hnih kan ti a" a ti ta a. Ka lo chek hlak.. 

"Intest la" ka ti a. 

"Ka lei ngam lo lawm.. " a lo ti. 

"Ka leisak dawn che nia" ka ti ta a. Tlem chuan hmuh a nuam ta deuh. 

"Rai ta la, Adika hian a nei che ang em? " 

"Amah chuan inruk te a rawt reng tawh zawk a. Mahse, ka nu hi ka ngaihtuah ve bawk sia" a ti a. Ka hrethiam khawp mai. Ruati pawh a la upa hran lo naa, chutia sex a lo hmang mai chu pawi ka tihpui. Kei chu kum 14 ka nih laia ka intiamna, "Virgin ngeiin pasal ka nei ang" tih kha vawn nun zel ka la duh a, ka tum bawk. 

"I rai loh chuan hmang tawh rih lo u la, College te hi kal zo ve phawt la, i nu pawh a khawngaihthlak alawm.. " ka ti ve a. 

"Dik chiah, ih maw, zep loh chuan ka duh ve êm a, amah lah a zei bawk sia, bakah min hmangaih ve tak takin ka hre bawk nen. Ka lo hnial thei ta lo a ni" a ti a. Ruati chu ka dem em em hran lo. A mipa hmangaih leh thlakhlelh em emin a nêka a zar reng chuan hnar zawh loh hun chu nei ve tur a ni reng a ni. Mahse, tisual nawn tawh lo se ka duhpui khawp mai. 

Zorina rawn phei chu ka mitsirin ka hmu reng. Ka lo lai leh em em ringawt. Ka bulah chuan a rawn thu ve chat a. 

"Puih in ngai em? " a ti sup a. 

"Ngai hran lo e. A har lo em mai, tiang te chu," ka lo ti a. 

"Nakinah huan khu zu fang ve ang u aw. In bawl zawhah" a ti a. Ka lo bu nghat. Ruati chuan Adika chu koin, "Zorina nen vawksa hi va chan r'u. Patling bulah tal ve reng loh tur" a ti lâwng lâwng a. Pa Mapuia te an lo nui dar dar mai. Adika chu a rawn phei nghal a. Vawksa chu an chan nghal mawlh mawlh. Pa Mapuia pawh a rawn phei ve a, "Eheu! Ka makpa te pahnih tur chu in thaibawih nghal ringawt a ni maw? " a ti a. Kan lo nui ringawt. Ruati nen an lo innel tawh bawk a, "Thaibawih hi a tha zawk, chhungkaw tangrual tihna " a lo ti ve hmak. Zorina chuan min rawn melh zauh pahin, "Ani bawih nihte chu a hrehawm vak dawn mi? " a ti khauh a. Ruati te'n lo la fuhin an fiam char char, kei ka lo zak em em thung. 

"Hlui, theitui kha lo siam teh aw. Khu ka nute pawh an chhawl hal tawh ang" Nu Sangi aw fiak thak chuan a rawn ti a. 

Ka che nghal vat. Ka siam peih hnuah ka va sem dan dan a, Nu Sangi'n a no a lak dawn lai tak chuan Abby hian ka hnunglam atanga min rawn pawmin, "Ate, tui hleuh min zirtir ve rawh" a rawn ti a. Nu Sangi lamah chuan ka va petek palh ta hlauh mai a, a no chu a mal chungah tlain, thei tui chuan a kekawr a zu buak ta vek a. A ding nghal at, ka inrin hmain ka biang a ri nghal thlawp. A thip veng veng mai. Ka zak bawk si. Mitmeng rum elkhena min melh chungin, "Ka kekawr mantozia hi i hria em? Kum khat chhung pawn i thawkchhuak zo lo ang. Engvanga khatia min rawn tihbuaktir a? " a ti ta hlawih hlawih a. 

"Ka tihpalh lutuk.. Ih, ka lo su fai ang" ka ti a. Ka aw chu a khur lehnghal. Min en thup si.. 

"Nanga kut bawlhhlawh khan ka kekawr manto hi i khawih ka phal awzawng lo mai" a ti leh chiam a. 

"Sangi, em em a che. I nasa mah mah e.. Hlute, lo kal rawh. I tihpalh anih kha" Pa Mapuia chuan a rawn ti a. Abby lah chuan min la pawm reng bawk. A hlauhlawp tih ka hre ve reng. 

"Nang lah hian a thlavang i lo hauhsak ve ziah a. Tenawm lutuk" Nu Sangi chuan a ti hmarh hmarh a, min rawn en ang he hawin, "Rang takin theitui va siam leh rawh" a ti a. Abby kai chung chuan kal ka tum a. 

"Ka fanu kha hnaih tawh suh. Thingtlang nula thing lutuk hri a kai ve ang" a ti leh kher chuan min tina viau mai. Ka pu a rawn tawng ta a. "Sangi, i ti lutuk e, a thiam loh a ni lo, Abby'n a rawn pawm vang a nih kha.. Khatianga inzahpah lo lutuka mi dang tawngkhum kha ka duh hauh lo a nia" a rawn ti hriam hraih a. A hmelah pawh a lungawi vak lo tih a lang reng mai. 

"Lo inrawlh ve suh u, ka fanu a nia, he nu bula a awm ka phal lo mai a ni.. Hetiang khaw mawngping nula bula awmtir te chu a" a ti sak sak a. Ruih a nei leh aniang. Mi dang mitmei a veng lo em mai.

"Ka pi, i awmpui mahnise, khatianga tawngkhum theihna kha i nei lo ania. I lo rapthlak hle mai. Lehkhathiam ve si" Zorina aw ka hriat rual chuan ka lung a chhe thut. Zorina rawn tawng ve chuan khap daih a hnehin a thinrimna a vur belh ni tur a ni. 

" ve khanglang hlawm che u hian, tu nge ka nih in hre lo anih hi.. Chuti taka in khawngaih anih chuan awmpui ula ti nia. Abby rawn kal rawh. Vat" tiin a fanu chu a rawn hawi a. Abby lah chuan a lu thing nar nar chungin ka kapkar a bel tlat thung. Pa Mapuia thinin a tuar ta ngang lo nge, chak zeta nu Sangi chu va kaih sawk pahin, "Zirtirna pek hlek i ngai anih hi. I pasal min timualpho tam tawk tawh e" tiin Pool piah lawka in tê lam chu a panpui ta hlawk hlawk a. Abby kai chung chuan Ruati te bul lam ka pan ta daih a. Mi kan tam lo hlauh a, a zia hlauh zawk. Khatiang em ema a thinrim kha ka ring phak lo asin le. Zorina chuan a bulah min lo thuttir vat a, Abby pawh ka la pawm zel. Ka pi a rawn phei ve zat a. 

"Hlute, ngaidam hram rawh aw. A pawi thin em mai. Nang chu i rilru a tluan kha, tun tum chu hrethiam leh hram rawh.. Abby, hawh ka lo pawm ang che, Ateii te khan eirawng an bawl dawn si" a rawn ti siam siam a. Ka ngawi reng thung. Abby pawh chu a pi bulah a kal ve mai a. Pa Mapuia te thawm erawh a reh vang vang mai. Engtin tak va inhau ang maw.. Keimah vanga an inhauh hi ka duh lo asin aw.. Mahse, heti em ema min hawtu te ina awm reng hi tlin loh hun ka la nei khawpin ka ring. Pa Mapuia leh naupang te avang chauhin ka la inhamtang ve tang tang niin ka hria. 

"A mak ka ti, ka awm ve lai kha chuan sual tho mah se, ti em em hian ka lakah a awm ngai lo asin. Ka demna lam che ni loin a huat zawng deuh hian i lo awm a ni lo maw? " Ruati chuan a ti a. Ka chhing sawk. A pasal bialnu Remruati nen kan inan êm vangin min hua a ni tih chu ka sawi duh ang em? Ni lo, sawi loh a tha zawkin ka ring. 

"Ka hre bik lo, ka sual aniang" ka ti ringawt. 

Zorina chuan, "I sual teuh lo. Misual a nih vang anih saw, a lo rapthlak ngei mai. Lungngai suh. Kan inah i lo awm daih dawn nia" a ti awlsam puat a. Ka ngei angreng zawk. A sawi awlsam lutuk chu. Adika a lo nui ruh ruh a. 

"Eu! An va insawm rang ve.. Sa free a hnai tihna nih chu" a lo ti zauh a. Chu a fiamthu chuan kan boruak uap churh pawh a rawn hai veng ta deuh. Eirawng chu kan bawl mawp mawp a, kan peih fel meuh chuan chawhnu a lo thlangher ve duai tawh. Ruati'n tui chen a chak ve si a, kan va phei ve a. Tui chen thawmhnaw pawh ka nei ve lem lo. Ka hleuh thiam lo bawk a. Tuia kan han inchiah takah kan dai sawng sawng mai. Kan chen laiin Pa Mapuia te nupa pawh an rawn chhuak ve chiah. An inkhung rei ngar ngar bawk a, Nu Sangi chuan ţap hmel te pawh a puin ka hria. Pa Mapuia erawh a danglam lem lo. Nu Lawmi te nupain min rawn fin ve leh a, kan chiau ve chul mai. Zep nak emaw a hma lawkin buaina nei mah ila, rilru a la naupang a, khang buaina kha ka hre chang leh vak tawh lo a ni ber. Ball te kan beng a, kan rak chul mai. Zanriah ei nana la hma deuh siah kan intleng fai thuak thuak a, Zorina sawi tawh angin huan chu kan zu fang ve a. Thlam nuam zet a lo awm reng bawk a, kan pali-a kan han awmho takah chuan Nu Sangi chungchang bawk an sawi leh thin. Kei chuan eng em em ka sawi lo, rapthlak an tih thu bak an ni pawn sawi tur an hre lo. Kan titi reng emaw tih laiin Ruati leh Adika chu an lo inkheuh hrang a, Zorina nen chauh thlam luhkaah chuan kan thu dun ta ran mai. Ka zâm a ni. 

Ka kut chu zawitea rawn lain a khal niap niap a, a lai ve thoin ka hria. 

"Nu Sangi vang khan hrehawm ti miah suh aw. I inthlahrun phah ka hlau lutuk a" a ti a. 

"Umm.. Mahse, a zahthlak ve ee.. " ka ti ringawt a. 

"Awmna tur dang kan zawng daih dawn nia. " a ti a. Sawi tur a hre em em bik lo aniang. 

"Aa.. A ngai lo, ka inngaihtuah ve thei alawm.. Dik tak chuan mi ina awm mai mai te chu ngaihzawn tlak pawh ka ni ve lo. Mi dang duh daih rawh," ka ti ve ta mawlh mawlh a. He thu hi hmai chhana sawi ka chakna a rei tawh bawk a ni. A ner sak a, "Mi ina i awm vanga hmusit tur cheah min ngai tihna mi? ",a ti ta khauh a. 

"Chutiang lam a ni lo. Ih, i thianten an nuihzat ang che. Mi awmpui ngaihzawnte chu" ka ti a. 

"A ho em mai a. Mi ina awm leh awm loh lam ai chuan nungchang dik leh taima hi ka chhungte pawn an duh dan a ni zawk. Lehkha ka zir tang tang ang a, Pathian zarah hna te ka hmuh veleh kan innei daih dawn nia" a ti ta mial mial a. Zorina pawh hi a la upa lo bawk a, a rilru a la puitling bik lo tih ka hria. Mahse, chutiang dinhmuna ka din laia ka lama tang an awm ve tih ka hriatna chuan min tithlamuang ve hrim hrim mai. Kan ngawih vang vang hnuah, ka beng a rawn khal a, za ka tih vangin ka thle sawn a. Chutah a lamah min kuai herin ka hmuiah a rawn fawp ta a. Chutianga deep kiss an tih anga infawp pawh kan ni lo. Kei phei chuan ka dawh tawp ringawt. Kan han infawp zo ka hawi chhuak chu huan luhna bula thingbuk hnuaia Pa Mapuia lo ding reng chu ka han hmu a. Ka phu zawk. Ka zak ngei mai. A hmela danglamna engmah awm loin a let leh daih. Ruati te pawh an rawn lang ve nghal mai a. Zanriah ei a hun tawh dawn vangin muangchangin kan haw chho ta a. 

Chaw kan ei lai chuan boruak chhia eng em em mah a thleng lo. Nu Sangi ngawichawi lutuk chuan ka ngaih a titha lo lek lek zawk. Pa Mapuia bulah thuin ngawi rengin chaw a ei ve mual mual ringawt. Eng thu tak lo infah ang maw.. Abyy te erawh Danny te ho nen a hranin an ei ve a, an ri ve dar dar mai. Hmuh hi an nuam thin a nia. Chaw eikhamah awm khawmuang tawh lem loin, haw turin kan inbuatsaih nghal a. Kal lam ang thoin kan haw. 

Zorina pawh chu a rawn peng kawi lem lo. Ka tan a nuam lo ve bawk nen. Thlen veleh ka intleng leh thuak thuak a, Abby te unau chu tuilumin ka bual leh phawt. An chau ve bawk nen, ka bual zawhah an muhil nghal deuh mai. Nu Sangi te erawh an roomah an tawm deuh reng ringawt. Ka pi leh pu pawh an ngawichawi khawp mai. Abby te mutthilh hnuah kei pawh ka tlu zal ve mai mai. Zorina nen kan intext char char, group pakhatah min lo add a. "kan nu a nih hi" a la ti zui! A thiante niawm tak chuan min lo fiam nghal luai luai a, a zahthlak rualin a nuam ve phian. Min zahpui lo tih ka hriatna chuan min tihlim veng veng mai. 

Ka muhil tep tihin putea'n min lo call hlawl mai a. Phak zetin ka chhang. 

"Hei i piteii te an tlan leh a. Tlaiah khan kan inhau deuh nen, mahse, min rawn ngaihtuah suh. Ka tha a nia" a rawn ti a. 

"Naupangho a hruai mi? " ka ti vat. 

"Remremi a hruai a. A u te chu hei an muhil tawh" a rawn ti a. Ka khawngaih hle. 

"Ti nge in inhauh leh a? " ka ti a. 

"Ka hriat hlek lohin pheikhawk 1500 man a lo la ba a, an rawn thing ta sia, khata tang khan kan inhnial chho a, inthen hi a cho at reng bawk nen.. I duh leh chhuak rawh ka ti ta a nih kha. Bungrua pawh rawn la dawn se ka chelh lo vang. I piteii zawng a hahthlak em mai" a rawn ti dat dat a. Ka lo ner sawk, pheikhawk 1000 chuang man pawh hi ka la bun lo. Tun laiah thil man chu a sang ka hria, mahse, kan dinhmun ngaihtuahin leh an chhangchhiat ngaihtuahin Piteii chuan chutiang pheikhawk sang chuang man bun chu a phu ka ti lo a ni. Putea thinrimna chu ka hrethiam khawp mai. 

"Engpawhnise, bungrua te an rawn lak chuan ka lo haw dawn nia. Naupang an khawngaihthlak alawm" ka ti a. Inthen suh u ka ti duh bik lo, a upa pahnihte an lian ve tawh tho a, putea hoa kan khawsak chuan kan berh em em ka ring bik lo a ni. 

"A ngai teuh lo mai. I hlawh i rawn thawn ziah alawm.. Min lo ngaihtuah suh. He lam chu.. " a rawn ti ve luam a. Mahse, hawn chu ka tum tho. Hmeichhe tel lo chuan an tan khawsak ngaihna a awm dawn lo. 

Ka zing tho chu ka rawl riau mai. Chhuak ngai lo tih takah ka han chhuak ve chu ka rawl ve em em ringawt. Tukthuan kan ei tlai ni a ni bawk a. Ka che hmanhmawh tehchiam lo. An lo tho ve sap sap a, Nu Sangi rawn phei lai chuan ka thin a phu dup dup mai. A tho fuh lo vang tih mawlh ka hlau. 

Bawnghnute chu thliin dawhkanah ka va dah nghal a, "Nu Sang, hei aw i bawnghnute" ka ti sap. En pawh min en lem lo chuan a la a, chairah a thu nghal. Ka pi a rawn phei ve leh a, thingpui ka lo siam a. 

"I bazar dawn lo mi? " Nu Sangi chuan a ti a. A aw pawh a pangngai ve reng. 

"Ka hre lo, pawisa min pe si lo va" ka lo ti ringawt. Bazar nan chuan a tlai tawh mah mah. 

"Nizanah i sawi lawk si lo va, kan theihnghilh aniang. Chawhnu lamah va bazar mai rawh. Ka nu, eng sa nge i ei chak? " a ti nghal sar sar a. Chuti taka that a chhuah ve chu mak ka ti zawk. Ka pi pawh chuan tha te tein, "I pa khan bawngsa kawchhung a ei chak thu a sawi tak kha mawle.. " a ti dam diai a. 

"Umm, bawngsa kawchhung leh vawksa lei ila a tha reng alawm.. Hlute, chawhnuah chuan" tih leh thawh a rual a. Ka lo bu nghat. 

Tukthuan kan ei pawh chu thilmak a thleng a ni ringawt. Nidanga vawikhat pawh ngaihven ngai lo khan a fate chu a kilkawi ve a, an chawhmeh duhzawngte chu suah sakin, Alex phei chu chaw te a barh hial! A piangthar a ni ngei ngei ang. Mahse, a fate chu an nu bulah an la zum hle thung. Hetianga a ngaihsak that ve tawh dawn chuan thlamuang takin kan khuaah pawh ka haw thei ngei ang. 

"Hluteii hi chuan bai a siam thiam ania aw.. ".. Tih pahin min rawn en a. A mitmeng pawh a na hran lo. Ka pi chuan, "Dik chiah.. Bai hi kei ka siam tui thiam lo. Hlute, min la zirtir ve rawh aw, i pu hian a duh ve barh barh sia" a ti hlut a. Ka lo nui ve ringawt. Boruak a nuam hle mai. 

In ka tihfel zawhah ka inbual a, Taxi ka hmang mai ang chu tiin bazar tur chuan ka chhuak ta a. Vanneih asiamin taxi a lo tlan remchang hlauh lehnghal. Ding takin bazar lam ka pan ta nghal a. Chawhmeh zawrhna lane lamah kal nghalin, thlai engilo chu keima duhzawng ka lei zung zung a, Pa Mapuia hian Hruizik a ngaina hle a, ka hmuh phawt chuan ka leisak ziah thin. Vawiin pawh tel hnih lai ka lei. Sa pawh chu ka chang rei lo, talh an tam bawk a, duhthlan tur ber hriat a har zawk a ni. Bawr em emin ka inak chho ta hnak hnak a. Waiting shed-ah taxi nghah pah chuan ka thu a. Ka thlan hliam mai. 

Taxi ruak han phar mai tur a vâng phian. Ka hawi ka hawi a, chutah chuan ka tum loh deuhin Zorina leh nula pakhat, keimah ang rual vel, hmelchhe lo tak hi ka lam pan zawngin an lo phei ta a. Ka bing mum mum mai. Zorina nen kan inbiak hnuhnun ber kha chuan, "Ka patea te huanah khutah Sihhmuiah kan kal dawn a. Kan chhuak chiah" tih thu kha a sawi si a. Tunah hmeichhe dang nen an rawn inkai dun rial bawk si. Min hmu ang tih hlau zetin lehlam ka hawi nghal a. Ka inhliah deuh ţút bawk. Vanduaithlak takin ka thutna bul lawkah chuan an rawn ding ve lehnghal. Thutna a awm tawh loh vangin an ding a ni maithei. A va hrehawm tak.. Ka bula thu nu pakhat naupawm lai chuan ka bag-a chawhmeh ka ah chu a namthlu leh ta zui a! A biruk theih ta loh.. Chawhmeh bua te chu hmanhmawh zetin ka chhar nghal mawlh mawlh a, ka hawi chhuah leh chuan Zorina chuan min lo en ve chiah. Ka mit ka va la sawn rang tak. Mahse, min hre ngai lo ang chiahin a awm nia.. 

A bula ding nula chuan a sam te chu a siamthatsak kual a, "Adika chu sawm ve la, duh leh an nu pawh kha sawm tel la.. A nuam ve lawm" a lang lang a. Zorina hi Zorina ngei a ni tih ka chiang ta ngang mai. A thianpa Adika a ni tlat. 

"Nia, nang berin i tihte chuan kan sawm lo ngam nang" Zorina aw chu ka bengah ri ring tak a ni. 

"I over aw.. Chuan, eng maw min present dawn? " nula chuan a ti sar sar a. 

"I duh ber a ni mai. Hetiang hun atan hian ka inkhawl rei tawh alawm" Zorina chuan a ti a. Taxi ruak a rawn tlan hlauh a, ring zetin ka ko nghal, min rawn en thupin ka hria. Hmanhmawh baklengin taxi lam chu ka pan nghal a. Kan tlan chhuah chuan ka thaw hawk mai. Ka hah vekin ka hria. Ka ngaihtuahna chu a chawmawlh vek ni maiin ka hria. Zorina khan engtin nge min hriat loh theih? Min be miah lo a? Kha nu kha a bialnu a ni ngei ang.. Ka bag chu ka hmer ngat ngat ringawt. Kei chu min lo bum kual vel mai mai a nih hi. Ni e, mi awmpui mai mai te chu tuin nge duh tak tak ang.. Ka tah a chhuak lo naa, na chu ka ti ve reng. Min zahpui niawm taka khatianga a awm kha. Nimin lawkah min iai loh thu a sawi zut zut a, a fawh pawh min fawp a nih kha.. Tunah a danglam leh ta vek chu a nia. In ka thlen pawn ka ngui tawp. Tumah ka be chak hlawl lo a ni e. Tin, zahthlak ka tih em vangin Ruati pawh ka hrilh duh lo. Mahse, a test kit erawh ka leisak a. 

"Ehe! Hei hi tu ta. Tur nge? Hlute, nangmah maw? " tiin Nu Sangi'n test kit kha a rawn lek vâ lehnghal. Ka chil ka lem khawlh a. 

"Ih, ka thiante ta tur a nih kha. An lei ngam si lo va, min leitir a" ka ti chhuak hrâwk. Awih loh hmel deuha min melh chungin a ner sak a, "I ta tur pawh nise a mak hran hleinem. Mhase, he ina i awm chhung chu i rai thei lo aw" a ti chang ta fak a. Tumah mi dang an awm ve lo hlauh a, ka lawm. 

"Ka ta tur a ni lo tak tak" ka tih lai mekin Pa Mapuia a rawn kal a. Kan pahniha min melh tawn chungin, "Eng nge a? " a ti thawp sup a. 

"Hei Hluteii hian hei hi a lei a. Aizawlah thla thla hnih khat a awm dek dek a, hetiang a nih nghal mai chuan" awmze nei zet hian a ti a. 

Pa Mapuia'n min rawn melh chuan, "Ka ta tur a ni lo kei chuan test dan pawh ka hre lo. Ka thiante ka leisak ka tih chu" mangang zetin ka ti a. 

"Umm.. a dik ang. Engpawhnise, zaninah I Nu sangi nu ten chaw an rawn ei dawn a. Chawhmeh kha chu i duh ang ang kha a ni leh mai aw" a ti a. A tawng dan nghut nghut chu lungawi lo te pawh a ang. Nuam lo ka ti ta kher mai. Ngah nge maw ka lo leisak kher kher ni. Amah Ruati pawh ka call nghal a, tlaiah ka lo lam ang a tih vangin ka dah tha a. Eirawng ka bawl zui nghal. Zep loh chuan chaw ei tur neih hi ka ning lek lek thin, siam tlem chi a ni bik si lo va, chetpuitu neih loh phei chuan an duh hunah kan peih hman lo vang tih hlauin kan che sawk sawk reng a. A hrehawm. Vawiin phei chu ka mood a chuti teh ual lo bawk nen.. Ka ngawi run reng mai. 

"Hlute.. " ka phu zawk. Pa Mapuia'n mak tih hmel angreng taka min lo melh reng chu ka va hmu nghal a. 

"Koh i va hre thei lo ve aw. I rilru i kawm nasa lutuk anih kha.. Thingpui hang lo chhuang lawk ta che" a ti a. A aw chu a dam thlup tho nain, lungawi vak lo ang hian ka hre tlat, ka sawi thiam lo. Keimah hian ka feel ka ti mai. 

"Aw le" ka lo ti vut a. Ka chhuang nghal. Dar 4 a ri dawn hnai a, nu Sangi nute pawh an lo thleng ve ţêp ang. Thingpui chu ka va sem a, ka let leh chiah tihin kan mikhual turte chu an rawn thleng nghal. Ka la hmuh ngai loh tlangval ti ila, Pa Mapuia aia nau awrh tur hi a rawn tel ve a. Nu Sangi nen an inan deuh vangin a nau emaw a u emaw anih ka ring ve tawp. Min rawn hmuh rual chuan a ding chawt a, phawk zetin min melh ta reng mai. Nuam lo tak a ni. 

"Remruati chiah chiah" a ti sup a. Mak ka ti lo. Pa Mapuia a rawn kal a, nui huk huk pahin, "I ti ve maw? An inang asin aw.. Hluteii a nih hi.. A fel ania, Hlute, hei i nu Sangi nau Rempuia a nih hi" a ti nghal mawlh mawlh a. Apron nen ka nih nuaih vangin ka va uksak vak lo. Ka tih ngai ka ti leh mawlh mawlh. Nu Sangi nu a tawng hlut a, a ngai te bawkin a tawng nem leh hlei mai. Awmhmunah ka lo ei lo ve chiam ringawt. "Aa.. Ka rilrute hi a chhe sawt sia maw" tiin keimah leh keimah ka inbia a. Ka nui chhuak tawp. Ka phone a ri tlang tlang a, Ruati a ni. 

"Mate, vawiin tlai chu birthday kan lawm dawn a. Ih, naktukah thil chu ka rawn la mai ang aw" a ti zung zung a. Kan inbe rei lo. Ruati te kalna tur chu vawiina Zorina kalpuinu te bulah khan a nih ngei ka ring. A birthday a nih ka ring. Tul lo deuh deuh ngaihtuah leh ka hlauh vangin ka che leh sawk sawk a, mahse, rilru hmanna tur dang a vâng khawp mai. Kawm tur ka nei ve bawk si lo. Eirawng ka bawl zawh meuh chuan dar 6 a ri thuak tawh a. Chhungkaw inkhawm neih an tih vangin Apron hlipin ka va phei ve a. Rempuia ep chiahah ka thu. Kan inhmu chiang kher mai. Rempuia ka ti ve ringawt a, kei aiin a u fe ang a, U Rempuia ti zawk ila a fuh ang. Min rawn en ngun ngang mai. 

Pa Mapuia nen an intiat thuak ang, a ngo a, a thau vak lo. Khabe hmul a zuah a, nula ho pa tih chi a ni. Tin, a hmel pawh a tha. A mitmeng chu nu sangi ang deuhin a thip lek lek a, a hriam lam a pawl bawk. Min en reng vang chuan ka zak deuh a, chhuat lam ka bih daih. Ka puin tawngtaina te a hman zawh hnuah chaw ei ka siam a. Ka piin min rawn pui. Nu Sangi erawh a nui leh awr awr tawh mai. Ka phút ve lem lo bawk a, a ho em mai. Ka siam zawhah an kil ta hlawm a. Kei erawh an ei khamah ka ei ang. 

"In ei chhungin ka va inbual ang e" ka ti a. Tuman min chhang lem lo.. Ka inbual zawh pawn an lo la ei zo lo va, ka inthlak fel hnuah an kham hram. Ka seng fel leh vek a, ka ril a tam ve tawh khawp mai. Mahse, chaw ei chakna ka nei lem lo. Zorina'n ka rilru kil khat a luah ve reng bawk nen. Thleng ka sil lai chuan, U Rempuia chu ka bulah a rawn kal a. 

"Remruati te nen in inchhung hial a ni lo maw? In inang em mai" a ti leh a. 

"Ka hre bik lo" ka ti ringawt. 

"Nang aiin a lian deuh tih lohah chuan danglamna in awm vak lo. E chuan, ka u hi a sual em? A thinchhe sia, a hrehawm ngawt lo maw? " a ti leh bawrh bawrh a. 

"Sual lo e.. A hrehawm loh" tiin a rul tawkin ka chhang. 

"Khawi khua nge in nih? " zawhna a va ngah tak. Ka hrilh ve mai a. 

"Rawn len fo tur a nih hi.. I fel reuh tlat" te chu a la ti deuh deuh a. Hetiang milian leh lutuk ang ho bulah chuan ka ţi dui zel a, nuam ka ti lo. Ka anpui ve deuhte bula ka awm dan nen a inang lo thei em a ni. 

Nu Sangi te nupa chungchang te an sawiho leh a. Tuna an lan danah chuan an invengthawng tawnin intihlungawi loh an hlau tawn hlein a lang. Nu Sangi te nupa pawh an in pawh hmel ta deuh e. Thingpui ka lumsak an in zawh hnuah haw turin an inbuatsaih ve ta chauh a. Haw vat vat se mut vat ka chak tawh lutuk. 

Ka phone ka'n en chu putea miscall vawi 3 lai a lo awm a. Ka call back nghal. 

"I piteii chu koh pawh a ngai lo, hei a rawn haw ve leh mai" a rawn tih chuan ka thaw huai mai. Sualin ka lakah tha lo hle mah se, an fate hmakhua tur ka ngaihtuahin inthen lo se a tha zawk. Keimah anga an rawn fahrah ve tur hi ka ngaingam bik lo a ni. 

"A that hlauh chu.. Inhau tawh suu aw" ka ti ve luam a. 

"Nia, a nun pawh siamthat a tum tur thu a sawi ve kha.. Nang pawh inenkawl tha rawh aw" a rawn ti a. Kan inbiakna kan titawp zui nghal. Zorina erawh a reh vang vang a. Whatsappah pawh min rawm be lo. Ruati takngial pawn min be lo. Engkim chu an hriatpui a nih ka ring. Mahse, ka fiah phawt loh chuan mi dang lo dem ve vak kha tul ka ti hran lo. 

Ka mutui phian! Zorina hi ka mipa tawn hmasak ber a ni a. Kan inthen a nih pawhin ka theihnghilh bik lo maithei. Mahse, tawnhriat engmah la nei lo ta chu, hetia min han bum pawh hi lak nat vak dan ka thiam lo a nih ka ring. Chhungrilah min kher ngut nguttu chu awm ve bawk mah se.. Mi te anga taha indawmkun vel chu ka la hlat. A lawmawm phian zawk. 

Inkhawm turin Abby te unau ka siam a, ka chei bawk. Nu Sangi pawh a insiam mek. A nalh leh ngawt ang. Abby sam chu sang takah ka tawnsak a, tihian a lang felfaiin a lang duhawm ka ti a ni. Tin, naupang samsei lutuk hi mawi ka ti lo, an lang chal ka ti mai. Abby sam pawh hi a hmawr lam la paihsak ka tum nghe nghe. Naupangho room atanga kan chhuak chu Nu Sangi te nupa pawh an lo chhuak ve chiah a. Abby a hmuh rual chuan a chek tlat tlat a. 

"Engvangin nge a sam saw i tawnsak. Thlah rawh.. " a ti vin leh thak. Pa Mapuia mitmei pawh a veng hman meuh lo. 

"Tisawn a nalh ka tia" ka tih chuan, "Nanga nalh tih leh tih loh lamah kan buai lo. Kei a nu hian a sam saw thlah se ka duh a ni mai" a rawn ti chang leh fak. Ngawi rengin Abby chu ka kai lut a, a sam chu ka thlahsak a. Duh ai chuan a sei deuh ka ti. Mahse, ka duh dan a pawimawh si lo va. 

Tichuan, inkhawm tur chuan kan chhuak ta thâm thâm a. Biak in kawt kan thlen chuan an lo zai tawh a. Veranda ka thleng dawn tihin mi pakhat hian min rawn su thawi thuak a.. Ka pai khut khut, ka paina lamah ka ke ka bilh ta a. Ka pheikawk heel pawh a chhe zui bawk. Mi an la tam si, ka zahzia chu aw.. Ka ke chu a tirah a na lutuk lo. Ka pheikhawk chu chhe lo se, ka inkhawmpui thei mai ang. Mahse, tihngaihna awm hek lo. An luh rem hnuah mi hmuh hlau takin pheikhawk khai chung chuan ka haw ta hnak hnak a. Ka ke pawh a rawn na tan ta viau. Inah tumah an awm si lo va, keimah vekin ka inbuaipui a. Thiam leh thiam loin ka ke chu ka tuam ve a. A rawn na tawh khawp mai. 

Inkhawm an rawn ban lai chuan ka lo chhng sek,ka nachhawkna ei khan min chhawk ve deuh bawk aniang. Tlemin a zia. 

"Khaw nge a awm a? A muhil a mawni le.. Hlui,.., "Nu Sangi aw fiak zet chuan a rawn ti lang lang a. 

Thei leh thei loin ka va tho a, bai auh auh chungin ka va pan. "Ka ke hi ka bilh a, ka lo mu daih a" ka ti a. Mitmeng nelawm lem loh taka min melh chungin, "Thatchhiat chhuanlam mai mai anih chu. Thingpui lum rawh" a ti hmak. Thawh lawka nam thluk ka va chak tak.. Thingpui chu ka va lum a. 

"Ka rawn hmu reng che alawm.. Biak in kawta i tlu kha.. Khawi maw a na viau ang" tiin Pa Mapuia chuan ka ke chu a rawn chul a. 

A tumana a phelh chuan a lo vung nasa tawh hle. A chek hluk a, an roomah lutin bandage a rawn la chhuak a. Dim deuh hian a tuam ta mawlh mawlh mai. 

"Khatiang inkhawm peih loh vanga na der te duat vak a ngai em ni? " kan hmaah a rawn ding a. Min rawn melh ran mai. Ka lung a phu dup dup mai. 

"A vun vek hi, a na der lo tih i hre ve reng. I khamawm" Pa Mapuia chuan a ti hluk a. 

Chhim thlipui a tleh leh ta… 

"Eee.. Kham awm te min ti elo? Kha nu vang khan.. Enteh, kha nu kha Remruati a ni lo, Vanlalhlupuii a nih kha.." a ti ta chiam a. Ka pi leh pute an lo la haw lo hlauh. 

"Ka hria. Remruati a ni lo tih ka hria" Pa mapuia awki chu a dang zak mai. Thinrim insum tawt lutuk hi ka chan ber mai. 

"A nih a hnu eng nge i ngaihsak viau a? " a ti leh hlar a. 

"Ka thu thu. Ngaihsak a ngai a ka ngaihsak. Thingpui saw va siam rawh. Tunah" a nupui hmachhawn zawng taka dingin a ti ta hmak a. A mitmeng atangin a hlauhawm thawkhat tih a hria nge thinrim hmel zetin thingpui chu a va siam tau ta sawk sawk a..

"Pa Mapui, naktukah ka chhuak mai ang e. Hetianga keimah vanga in inhauh fo dawn ai chuan.. Bakah ka peih tawh lo" ka ti ta tawp mai. An pahnihin min rawn melh rual ţhâwih.. An mitmeng erawh a inang lo. Pakhat a verther a, pakhat a inthlahrung thung.. 

(Duhtawk leh phawt ang aw 😍😊

(Tawk rih aw.