Tidamtu kut 5

TIDAMTU KUT.. (5)

Ziaktu: Toni Râlte

A tukah Pa Mapuia chuan tukthuan ei laiin, "Nizan kha tihpalh aw" a ti sup a. Naupangho chuan an hrethiam chuang lo vang. Ka lo bu nghat ringawt. Zu erawh in tawh lo se ka duh hle mai. Vawiinah a nu te an lo thleng dawn lehnghal. Kei pawn Ruati ka sawm a, a hman lai a lo ni bawk nen, in vel chu min tihfelpui ve leh a. Laizawn ang chiahin kan inen tihtheih a ni. An ina leng turin min sawm nasa thin a, mahse, naupang awmpui an ngai thin si a. Nu Sangi pawh kha la awm mah se, ka chhuak ve vak thei lo hrim hrim. Aizawl awm e ti lo chuan, bazar bak hi ka chhuak ngai lo tihtheih a ni. Biak in a ni leh tawp. Khawpui awm veah chuan ka bel lo ber awm e. Chawhnu dar 3 bawr velah Pa Mapuia chuan a nu leh pa te chu a rawn phur haw ta a. Ka tum aiin ka hmu nula tlangval daih. A pa phei chu a la valaiin Pa Mapuia nen an inang kher mai. A tlangval lai phei chuan a hmeltha ngawt ang. A nu erawh keimah anga nu tê ve kher khawr, hawiher zang vah, nelawm zet hi a ni a. Min be nghal bawrh bawrh a, ka ngaina nghal tawp. Ruati te nen chuan an lo inhre sa tawh bawk a, an infiam hlut nghe nghe. An han insingsa fel a, tun kar chhung zawng an châm dawn bawk a, bungrua pawh an rawn inkeng tam ve deuh. Naupangho an lo bang a, a pi leh pute an hmuh chuan an bawh nghal chat mai. Nu Sangi nu leh pate kha chu tiang hian an ti ve chiam lo hle. Hei hi an danglamna langsar ve tak pawh a ni ngei ang. An intihfai zawh meuh chuan zanriah ei a hun ruai a ni mai. 

Abby tawngtai zan a ni a, "Aw Lalpa, api leh apute an lo zin a, an bula awm reng kan duh sia, khawngaihtakin school min chawlhtir ang che. Chaw eitur min pek vangin kan lawm e. Isua hmingin kan dil a che" Tiin. Kan Amen hnuah apu pek chuan, "School chawl tura han dil chu aw.. Bawihno.. I pa thu thu ni rawh se.. " a ti a. Kan nui ţha hlawm mai. 

"Thursday leh Friday in chawl dawn nia. Ka dilsak ang che u. Naktuk leh wednesday chu test in nei si a, in chawl thei lo" A pain a tih chuan, Alex chuan, "A nih kan picnic tal ang" a lo ti vat a. Chu zawng a hnial thei ta lo nge, Zirtawpni-a picnic turin thu a titlu ta a. Kei pawh ka thian ka duh duh sawm turin min ti a, Ruati leh Adika a ni mai. Zorina pawh sawm ve a pawi hran lo ve. Pa Mapuia pa chu Pu Liantling a ni a, Pu tiin ka ko ve mai a. A nu erawh Lalremliani a ni. Pastor pension mahnise, pu Liana chu a phawkin a bula awm a nuam hle. Nu Sangi chungchang vawikhatmah an sawi ri lo. Nakinah an pafain an la sawi dun dawn aniang e. Zan lam hi chu tihtur a vang tawh thin si a, naupangho mut hnuah ka pindanah phone khawih pahin ka mu mai mai. Abby pu te pawh an zin chau ve nen, an mu hma ve bawk. 

"Ruati bulah ka rilru ka sawi vek tawh a. Chhanna min pek hi a harsa viau a ni maw? " Zorina msg a ni. Chhan dan tur ka bangbo hle. Amah hrim hrim hi han iaina tur ka hre lem lo, khawsak dinhmun thuah phei chuan ka phu lo mah zawk. Zirna lamah a sang zawk bawk nen, kei mi awmpui akara min lo duh ve te chu tiin a vawikhat nana ngaihzawng han neihte chu ka chak ve ta deuh rum rum a. Mahse, chhan dan turah tak ka buai. Bakah awmdun ila, min kuah leh fawhte kha a tum ve ngei awm si a. Engmah ka la hre ve der si lo, a zahthlak duh dawn e ti mai maiin ka inkhâp buai a. Ngaihzawng pawh nei ila hun lo chu kan ni tawh bik lo. Kan khua angah phei chuan pasal nei te pawh kan kum ang rualah an awm nawk tawh. 

"Ka thiam ve lo alawm. Engmah ka hre ve lo, tiang lam hi" tiin ka reply ve ta ngawt. A seen rualin a typing nghal a, "Kan inzir chawp zel dawn alawm. Tawnhriat engmah i la neih loh vang tak khan alawm ka duh che" a la ti zui.. Ka lei ka chhuah zul zul mai. Keimah chauhin awm mah ila, ka lai em em ringawt. Ruati va rawnin, ani lah a nuih a lo za nasa mai a. "Ka lo sawifel mai ang" a tih vangin amahah ka innghat tawp. Tichuan, A vawi khat nan ngaihzawng ka nei ve ta chu a nia.. 

Ka zing tho chu ka rit lúk mai. Ka hritlang deuh niin ka hria. Nachhawkna ka ei tawp. Ka pi chu a zuanzang reuh si a, min chetpui zung zung mai. A tawng duh bawk si, Pa Mapuia tetlaia a at zia te a sawi a, kan nui bâwk bâwk mai. An reh lai takin zawi deuh sap hian, "Dik tak chuan nu sual tak anga lan hi ka hreh êm a, i nu Sangi hi chuan min tihrehawm ve thin khawp asin. Remruati kha chu boral lo se innei se hetiang ringawt hi chu an ni lo vang mawle" a ti sa sa a. Ruati hnen atangin engkim lo hre tawh lo chu ni ila ka bangbo viau ang. Tin, thil hriatchhuah dang pawh ka nei, hman zana Pa Mapuia'n min kuah chunga a lam kha Remruati ngei a ni. Chu nu chu boralsantu kha a lo nih dawn chu.. Mahse, ti nge kei kha min kuah kher le.. Mahse, chawp leh chilhin a chhanna ka hre nghal. Ka pi chuan min rawn melh zauhin, "Ka hmuh tirh che khan ka chiâi hman ţèp alawm.. Remruati nen in danglamna chu ani chu nula hleitling tak a nia, a bak chu danglamna in ngah lo khawp mai" a ti ta a. Pa Mapuia bialnu, boral ta nen kan lo inang em em a nih awm chu.. Ruati kha chuan Remruati hmel a la hmuh ve loh vangin a lo sawi lo mai mai a nih hmel. Anih chuan, Nu Sangi'n min hmu mawh riau te hi chhan dang a awm a ni thei ang em? Mahse, Remruati chu a hre ve tho tihna em ni ang? 

"Nih, Pi, Nu Sangi hian Remruati i tih chu a hre ve tho em? " ka ti ta tawp a. A nui hul hak a. "A thiantha ber alawm" a ti ta mai a! Mak ka ti lutuk chu ka inthup hleithei lo a ni ber mai. Ka meng phâwk viauin ka ring. 

"Khatin mak ti lutuk suh. Remruati chu i Nu Sangi mize letling chiah a ni. A felin a zahawm a, a zaidam em em bawk. An inzui rei bawk a, engkimah kan inpawh tawh a ni. Chutihlai chuan i nu Sangi pawh hi hetiang mizia a nei tih kan hre lo hrim hrim. Remruati thiannu ber a nih vangin kan duatin kan zin chang pawn a felin a mawng a zang si a, kan fak nasa thin alawm.. I pa Mapuia lah amaha in luah a ni si a, engkimah Remruati a theih loh pawn a va tawiawmin a va pui nasa thin. Hetiang a lo ni ta hi mak ka la ti reng" a ti ta bawrh bawrh a. Ka hriat ngai loh thil ka han hre ta chu mak tihnain ka khat a ni ber. Mi dang an lo lan tak vangin chaw ei kan siam zui ta nghal a. Hriatbelh erawh ka chak ngang mai. 

Tukthuan ei khamah an hna leh kalna tur theuhah an kal leh sang sang a. Ka pu pawh tlawh kual tur ka nei e tiin pa Mapuia rualin a chhuak ve daih. Ka pi erawh, "Ka chau deuh rih, hun a la tam tho" tiin in min nghahpui dawn thung. Ka lawm hle. Han chet vakna tur a awm lem lo bawk a, kan awlthawng viau. Thingpui sen hâng leh kurtai hmehin kan thu dun a. 

"I chanchin tlangpui mapuia hnen atangin ka lo hre tawh a. I lainatawm hle mai. I pa chu i la hmu miah lo a ni maw? " min tihnat hlau deuh hian a ti a. 

"Hmu lo, a awmna pawh ka hre chuang lo" ka lo ti ve mai a. 

"Zawn chhuah dan te pawh a la awm maithei asin. A la dam anih te chuan mahni hringtu pa te chu nang pawn hmuh i chak ve tho ang chu" a ti ve zel a. Zep loh chuan pa tel lova chawi len ka ni bawk nen, pa hi mamawh viau pawn ka inhre lo. Mahse, thiante nena han awma an paten an thiltihsak an han sawiho chang hi chuan ruak leh mal bik anga inhriatna erawh ka nei ve fô.. 

"Nia, a dam tawh lo ve thei bawk a" ka ti ringawt a. 

"Lungngai suh. I pa Mapuia hian a khawngaih viau che a niang, kan bulah pawh 'Tihian ka bulah awm zel se, zirna te pawh bultan leh se, ka farnu a ni mai. Ka hnen atangin pasal pawh nei rawh se.. A putea te pawh ka be mai ang' a tih che kha.. I nu Sangi a lo let leh anih pawhin chhel takin awm hram hram tum rawh. In khuaa i let leh chuan i tan damkhawchhuah a har dawn asin" a ti seuh seuh a. Ka hnuk a ulh lek lek, tianga min hmangaiha duat taka min be siam siamtu hi ka pi thih hnu atang kha chuan ka tawng khât tawh em a. Ka lung a no ta deuh tlat a ni. 

"Nia, mahse, putea ten haw tura min tih tlat chuan ka hnial thei dawn lo va" ka ti a. 

"Lungngai suh. Mapuia'n a biak dawn chu. Hlawh i thawn theihte chuan ngah nge an rawn koh haw ngawt ang che" a ti dam thluam a. 

"Nia, ni ve reng.. Nu Sangi zawk hian zirna vel chu a phal ka ring lo" ka ti a. Ka rilru tak pawh a ni. 

"A rawn let leh kher ang e maw le..kan zin lai phei hi chuan a rawn haw lo vang.. " a ti ban chhalh a. 

"A nih, Pi, Remruati nen kan inan em vang chuan ami le heti taka a danglam ka ti" naupangchhia zetin ka ti a. A aw a thian kharh kharh a, " Ka hre lo le.. Rin thu chu a nia, mahse, ka rindan chu a nia lawm.. I awm ve hma kha chuan han buai neuh neuh chang chu nei thin bawk mah sela, heti taka bawraw hian a khawsa ngai lo. Mahse, nuam lo tih phah miah suh. Mapuia phei chuan heng hi i hriat a duh miah lo va, mahse, keia zep thei lo hi lawm.. Ka lo sawi leh thawt thawt a" a ti ta bawrh bawrh a. Ka va inthlahrung tak.. 

"Naa.. A van pawi tak.. lo awm lo ila an la hlim reng awm sia" ka ti ta a. Ka pi chuan nuam lo a tih hmel hle, "Hlute, chutiang zawngin ka sawi lo. I awm ve vang leh Remruati nen in inan vang ringawta hetia awm theihna hi a nei bik hleinem.. Chutah chuan thiam lohna pakhatmah i nei lo" a ti hlak hlak a. Mahse, nuam ka ti tawh chuang lo. 

"Ngah nge Remruati pawh chu ka lo an kher kher ni" ka ti niah niah a. 

"E taka! Hmu ve rawh aw. Lawk" tiin a tho tharh a. Pa Mapuia te pindanah lutin album a rawn keng chhuak a. Thlalak pakhat hi rawn phawrhin min pe ta a. Ka'n en nâk chuan, an sawi dik a nih hi ka ti tawp. Keimah emaw ka inti ţêp a ni. Mahse, kei aiin a lianin a thawmhnaw te chu a class hliah hliah a, kei aiin a hmel tha zawk bawk. 

"A va'n hmeltha em em" ka ti hlawl a. A lo nui hawk hawk. "Nang pawh i hmel tha tihna nih chu" a lo ti a. A hmaa kan boruak rit ru deuh pawh a zia huaiin ka hria. Nu Sangi tan chuan ka hnawksak hle dawn a nih tak hi.. A thiantha ber, a pasal bialnu kumhlun a theihnghilh theih loh anpui nen in khata chenho reng chu a hrehawm ve ngawt ang. Mahse, a tirah te khan a danglam em em chuang si lo va, ngaihbel tur pawn. Bakah hetianga min hmumawh leh tur chuan min chhawr loh mai tur a nia.. Huiham.. Ka hrethiam tawh lo e a. 

"Hlute, Engkim hi hre law law rawh. Abby te i enkawl bawk si a. Mahse, ka sawi hi khawiahmah chhuak tawh lo se ka duh a" thupuifun deuh hian ka pi chuan a ti a. Ngaithla turin ka lo insiamrem nghal vat. A aw a thian leh kharh a. 

"Sawi tawh ang khan Remruati leh Mapuia chu innei mai tawh tur kha an nia. Thla khat vel a la awm ang tihah Remruati chu i nu Sangi te ho nen an thian dangte pawh telin an picnic a. Mapuia erawh khami ni khan a hna lamah pawimawh deuh a awm vangin a chawl thei ta lo va. A tel loin an kal ta kha a nia. Kal tel ve se chu Remruati nen an inphur ang a, accident pawh kha a thleng kher lo maithei a ni. Mahse, Pathian remruat hi chu tu'n kan dal zo lo va. Tichuan, tlai dar 6 rik dawn aruaiah hian Mapuia chuan min rawn bia a, a rawn ţap thawthang a ni ber. Remruati accident thu a rawn sawi a. Remruati scooty leh truck an insu a lo ni. Mak ve mai mai chu phurh a nei lo kha.. An kal lam kha chuan Remruati nen an inphur a niawm e. Hawn lamah chuan, Remruati chu a bialpa chawhnu lama rawn lang ve bulah a chuang ta kha a nia, a vannei khawp mai. Inphur ta se, ani pawh kha a ngaihtuahawm viau maithei a ni. 

Tichuan, keini pawh a zan la lain Aizawlah kan chhuk a. Remruati chu a hmunah a boral nghal kha a nia. Ka fanu ang chiaha ka en tawh anih vangin ka tuar ve khawp mai. Bakah a thih dan a runthlak chu thuhran, pasal nei mai tawh tur a ni tih an veng chhung te chuan an hre vek tawh a. An lainat em em vek, Mapuia phei chu an khawngaihin engkimah an hnem liam liam vek a ni. Ani kha chu a thih sarhu lai kha chuan mi â angin a khawsa ti tawp mai ang. Keini pawn kan hrethiam. Keiin a in luahah ka awmpui ta chawt a. I pu hi a rawn tla thla zeuh zeuh bawk. Mapuia farnu kan fanu neihchhun Neihpuii hi a ban veilam zeng a ni a, pianphunga rualpawl ta lo chu a inkiltawihin mi bula khawsak te hi a hreh thin a. Remruati thih lai khan a fa pakhatna tur a pai ve mek a, an pa nen kan inpui an lo nghak a, kei leh i pu chu Mapuia buaipuiin kan awm chawt a ni ber e. 

Mahse, Mapuia hi ka fapa a nih anga ka fakna ni lose, mipa ve tak hi a ni a. Tuarin na teh mahse; tawrh hlena nat reng chu a tum bik lo aning e. Thla 5 vel a han ral meuh chuan a zia chho ta viau a. Mahse, 'Nupui neih ka tum lo,' a ti ta bur a. A pa nen phei chuan an inhnial thinrim lek lek fo a ni. Kei erawh chuan ngawih ka chuh zel a, a rilru tur kha ka hrethiam em a ni. Mahse, kan rin loh lam atangin thil a lo thleng ta a. I nu Sangi hi a rawn lang ta tlat mai a. 

A tir chuan a thiannu bialpa a ni a a khawngaih em vangin a rawn tanpuiin a hnem ve a nih hi kan ti mai a. A riah te pawh a rawn riak hial thin. Khum khatah erawh an mu dun lem lo. Mapuia pawn kan ngaih ang chuan a ngai tho aniang, a be chhe lo va, chutih a hnekin Remruati thian ni ta na nâ na chu a lo ngai em em zawk a. Tikhan a rawn chenchilh deuh râwt reng mai a. Kei pawh ka zangkhai phah viau a ni. Mahse, a rei telh telh a, ka mit khamna tur ka hmu ta zauh zauh. Kei rilru dawih chi tih takah engmah chu ka sawi ngai lem chuang lo. Zan khat a rawn kal phei chu zu rim a rawn nam thar thar a, "Zanin chu Mapuia roomah ka riak dawn. Remruati vangin ka tap zankhua dawn" a ti kual a. Keini tan lo hnar ngawt kha thil tih chi ni bik hek lo. A riak ta ngei a, engtin an va awm pawh chu kan hre chuang lo. A tuk a hawn hnuah Mapuia zawk chuan, "Nu, Sangzuali hi ka kham ţan a ni e. A awmdan hi Remruati vanga min hnem tum a ni lo reng reng. Min ngaizawng niin ka hria" a ti ta a. Ka lo rin dan sa a nih vangin mak ka ti hran lo.Fimkhur turin ka chah ringawt. Remruati chhungte lam mitmei ven pawh a na ve alawm le.. Khami atang phei kha chuan Sangi chuan Mapuia chu a zarin a zar ta a ni ber e. Kan chhungkua hi mi va haua va tawngkhum fak chi kan ni mang si lo. Zep thu a cheng lo, Sangi chu nula hawiharh leh lu zo tak a ni a, Ruihhlo lamah pawh a rualpawl tawka inlan ve thei mai a lo ni si. Keini lah Pastor chhungkua kan ni si. Remruati anga nula fel leh nungchang mawi tak ni se chuan ka iai hauh lo. Iai a hnekin, Remruati thian ni ta chu ka duh em em zawk ang. Mahse, sawi tawh angin a nungchang kha a dik hlawl si lo va. Mapuia reng pawh hian a hnar ve malh malh viauin ka hria. 

Mahse, Setana ruahmanna nge Pathian ruahmanna pawh ka hre bik lo. Ni khat chu kan khaw lama ka laichin hnai em em, thisena inzawmna nei lem lo va unau tak tak anga ka en chhungkaw pa ber chu a boral ta hlauh mai. Kal lo thei lo niin ka inhre si a, Mapuia ngaihtuah ru tak chung chuan ka haw ta a. Zan khat chauh han awm theih ni nghal bik lo chuan, zan 3 lai ka han riak a. Chumi chhung lek chuan, Sangzuali chuan a duh a hmu ta ti mai ang. Tilreh lo ni ve ta nafam chu Mapuia chuan hnar leh hnawl theih loh chin a lo nei ve a niang. Sangzuali pawh ka dem vek lo, ka fapa pawh a insúm zawh lohnaah ka thiam bik hauh lo. Thla khat a ral leh hnuah nau a pai thu kan hre zui ta a ni. Mapuia pawh chuan, "Nu, hetiang hi kan ni tawh si a, Remruati chhungte mitmei ven chu na viau mah se; ka fa tihfahrah chu ka duh lo" tiin inneih a rawt ta a. I pu phei chu a rilru a na viau mai. Pastor fapa meuh, Biak in pawh hawng êm lo va nupui a han nei kha i pu tan pawh a tlawmthlakin a zahthlak ve bawk a ni. Tichuan, an han innei ve ta poh a. A felin min be thiam viau. Tihlawm kan harsa lo bawk a, i pu pawh a tir khan han hel viau mah se, Sangzuali a fel tarh tarh bawk a, a lung a awi zui ta viau a. A duat pawh a duat viau. Tikhan an nupa rek khan an khawsa chho ta a, Abby a neih hma lawk hian a hmaa a lo dil tawh Lecturer hna kha a hmu nghe nghe. An khawsak pawh a harsa lo chho viau turah kan ngai. Abby a neihte khan ka zuk awmpuiin engkimah ka zuk buaipui vek a. An nupa pawh an hlimin hmuh an nuam khawp mai. An innupa hlen ngei ang tih rilru pu chungin kan thlir a ni. Remruati chhungte lam pawn Sangi chu en hrang bik hek lo, a thiannu hmun ruak luah mahnise, an lawmpuiin a fanu hming phei hi chu Remruati pa in a phuahsak ngat a ni. Chutiang khawpa rilru tluang chhungkua chu an ni. 

Mahse, rèl chan chang mah ni ila, Sangi chhungte lam hi ka thinlung taka pawh hi har ka ti tlat mai a. A bik takin a nu saw.. Nu sual leh rilru chhia a ni e ka tihna lam erawh a ni lo. Mahse, hmaichhana min fak hluak hluak a chin bakah a tawngkam nem hliak reng saw keimahah ngaihthat lohna siamtu a ni tlat. Ka rin dan chiahin an thenawm khawvengte bulah keini nupa mai bakah an makpa Mapuia ngei pawh an lo rel phâr lo chauh a nia! Mak ka ti hle. Mihring kan ni a, tihsual changte zawng nei ve tur kan ni a, chung zawng zawng kan inhriatsak zel chuan inrem ngaihna hi a lo awm dawn hauh lo a lo nia.. A hahthlak viau mai. Keini nupa phei chu kan hnawk lo viau zawkin ka hria. Pasala chhungte hrawn hlek loin Sangi pawh tihian an indang nghal ang a nia. Amah tak hi chuan min rêlna awm ka hre hran lo. Tin, ni e, khawsak dinhmunah kan phak lo vin, an khawsak a sang em em a, hausakna lamah chuan kan ter pha lo takzet. Chutiang vangte pawh chu aniang boruak neuh neuh a awm chhoh ni. 

Tikhan Alexa a neih hnu atang khan a danglam chho ta a. Alex kum khatna kan lawm tumin ka rilru tina em em thil a thleng ta a ni. A hma Remruati dam lai khan Sangzuali leh a bialpa Rinpuia pawh hi inah khan an rawn kal ve fo a, kan zin thlak changte pawn chaw eikhawm rawtin an rawn kal ve ziah thin. Rinpuia pawh kan hrechiang ve viau, khatia Remruati boral hnu lawka Sangzuali'n Mapuia a kherh vak hma khan Rinpuia hi Mamit lamah an transfer a, khu lamah bialnu a zuk nei nge, Amah Sangi bawk hian min hrilh vek a, a tuar ve hle nghe nghe. Mahse, Rinpuia nen an inthen atanga reivak loah tikhan Mapuia kha a kherh ta mai si a. Rinpuia hming han sawi rik leh chi kha ni tawh hek lo le.. Kan ngawi zui ta daih kha a nia.. Chu! Alexa birthday kan lawm tum chuan, ka rin loh lutukin Rinpuia hi a rawn lang ve hlawl mai a. Mawihnaiah kan inbe ve luam naa, nupui pawh nei tawh ang khan ka hre si a, "Khaw nge in nu? " ka tih khan.. 

"Kan inthenna a rei leh tawh" a ti mai a. Chutia a rawn lang ve chu Mapuia tak chuan pawi ti awmin a lang lem lo. Mahse, zan lamah reivak lo hun kan hman leh hnuah keini nupa chuan kan mutsan a. Engin nge min mawlh ka hre lo, zan dar 11 pelh daih tawhah ka harh hlawl mai a. Ka zun a chhuak bawk nen, zung turin ka chhuak phei a. Chuta ka thil hmuh chuan ania min tina em em chu.. 

Ka zung zo, pindan lama let leh mai ka tum chu tawng bul bul thawm ka hre ta a. Rukru emaw zurui tu emaw te an ni thei tiin pard keuin pawn lam chu ka va bih a. Saw thenawm te garage ngheng sawn Sangzuali leh Rinpuia chu an lo inkuah ngawih ngawih nia! Min deng na lutuk a, ka khur thei hial. Kan pa va kaihthawh ka tum zet a, mahse, min rawn hmu hman nge hmanhmawh takin Rinpuia chu a hawng ta a. Sangzuali chu hmel phelh phang hian a rawn lut a. Zu rim a nam huam bawk. Mapuia reng reng pawn engtin nge zu a lo intir phal ni.. Ka be miah lo va, ngawi rengin an room lam a pan nghal. A tukah i pu ka hrilh ta a. Mapuia erawh kan la hrilh lo. Sangzuali chhuah hlanin Mapuia chu kan hrilh ta a. A ngawi reng, "Ti nge maw zu te kha in i phalsak ni? " ka tih chuan, inthiam loh hmel deuh hian.. 

"Nia, Nu, engin nge min mawlh pawh ka hre lo. Rinpuia khan a rawn keng sia, ka in ve ringawt a. Kan nu in lai erawh ka hre miah lo" a ti ta mai a. Ka thin a tirim kher mai. Mahse, apa in a hau ta zawk a. A inthiam loh em vangin kei chuan ka hau duh ta lo a ni. I puin, "Sangi pawh ngaichang leh phawt ang u.. Kha chen lo inhmel duha inzui kumhlun ve an ni a, an lo kamnam ve nen, an insum zo bik lo aniang e.. Eng emaw an tih hman loh kha" a tih vangin engmah sawi loin kan ngawihsan ta a ni. Mahse, kha mi hun atang khan Sangzuali chu a danglam chho tan ta a. Keini kan haw a, Mapuia hian thil zawng zawng min rawn hrilh ngai lo naa, thenawm khawveng te ka atang hian eng eng emaw chu kan lo hre ve leh zel tho. Zu in a ching mawlh hi hrehawm kan ti. Tin, a fate a hlamchhiah chho ta lutuk leh awmpuite kuta a dah leh lutuk chu kan duh lo takzet bawk. Zuk awmpui dawn ila, mami te nupa leh an fate ringawt han hnutchhiah chu i pu hian a ngaingam bawk si lo. Bakah Sangi tan lah min han hrawn leh kha a nuam dawn bik lo nen.. Tihian enliam leh palliam chin kan nei ta tawp a. A tawpah i Pa Mapuia dawhtheihna in a tlin ta lo nge tihian a hawtir ta rih chu a nia. Sawi tur a tam.. Ka han inbunthawl ve a nih chu" a ti ta dap dap a. A sawi rei bawk a, a chhawl a hal a ni ngei ang. Tuisik a va la a, a in khawlh khawlh mai. Ngaihnawm ka lo ti ve hle ringawt. Chutih rualin nu Sangi nunzia chu tha lo ka ti ve hle. Kei chuan thil dang zawng aiin a fate hi ngaipawimawh se ka duh ber. 

"Pi, lungngai lutuk suh u. A nun te pawh a sim ve maithei asin" ka ti a. A nui hawk ringawt. A monu chu a ring vak lo a nih hmel e. 

Zanriah kan kil laiin door bell a rawn ri tlang tlang a. Ka tho nghal vat. Tun anga inleng kan nei ngai si lo va ka ti rilru a. Ka va hawng chu ka tawlh hnung hret. Nu Sangi chu inchei zet hian a lo ding ran mai. Mitmeng tur zeta min melh chungin, "I va rei ve" a ti hlar a. Ka chhang lo. A rawn luh rual chuan, "Ka nu te chu in rawn zin tih pawh min hrilh lo va, inti mak ka ti khawp mai.. " a ti nghal bawrh bawrh a. An ni pawh an hamhaih ve nge, an ngawi rei det. 

"Nia, niminah kan lo thleng ve chauh a, inhrilhhriatna hun a la awm lo alawm. Kan buai ve nen.. Chaw i ei tawh mi? Rawn kil ve nghal mai la" ka pi chuan a ti ta a. 

"Ka ei chak lo e.. A thingtlang chawhmeh leh awm em mai" ti nghat chungin sofaah chuan a thu chawrh a. A fate chu a ngaihven leh chuang hauh lo. 

"Eng nge i rawn tih dawn? " Pa Mapuia chuan a ti ta hmiah a. 

Nui lui tih hriat zeta nui chungin, "Ka inah hian eg nge rawn ti se min tih a.. Ka rawn haw" a lo ti hmak. Naupang an awm si a, Pa Mapuia chu a insúm deuh anih ka ring. A lung erawh a awi loh hmel angreng. Kan ei kham a, ka sengfel sawk sawk. Puitlung ho erawh an thu khawm a. Abby te chu an toys roomah ka awmtir tawp. An tawng thawm chu a hriat ve theih deuh a, ngaihthlak loh tum pawn zahpuiawm takin ka beng ka lo dawh ve vú zel. Ka buai lohna turah ka inrawlh chiang. 

"I nun chu i sim tawh tihna em ni? " Pa Mapuia chuan a ti a. 

"Sim tur ka nei em ni? I nupui ka nia, zantin khum khatah kan mu dun a, i fate hrinsaktu che ka ni bawk a. Sum ka thawk chhuak bawk a, eng chu nge ka sim ang a? Ka awmdan ang hian min enliam thei mai lo em ni? " Nu Sangi chuan a ti zat zat a. Zak thei lo hi ka va ti tak. Chhungkaw zaidam tak in chhungah a lawi hlauh zawk a, chuti ni lose, an pet chhuahna a rei tawh viauin ka ring. 

"I zu in te i bansana i fate i ngaihsak dawn lo anih chuan rawn let leh hi a tul hran lo. Kan mamawh ber lo che" Pa Mapuia aw chu a chang beng bawng viau. 

"Chutin min ti ngawt thei lo. Mihring chuan chin than kan nei vek. Tin, ka fate hian kei lo nu an nei lo a, ka fate an ni reng tho ang. Mi nute angin ka duat hliau hliau thiam lo, an mamawh ka pek chuan a tawk viau" tiin a lo chhang a. Ka pi leh pute ngawi thei lutuk chu ka lo ngei letling. 

"An mamawh ber chu hmangaih taka enkawl a ni. A bak chu kei pawn ka pe thei. Nu an mamawh, nang ang ni lo" a lo ti khauh. Nu Sangi a ding hluai a, "Chu! Nu dang neihtir te i lo tum a ni maw? " a ti ta chiam a. A awrawl a ring si, Abby te mitmei ka va veng tak. Tihtheih ka nei der bawk si lo. 

"Ka tum thu ka sawi lo. Hmangaihtu nu an mamawh thu ka sawi mai a ni" A lo ti dam leh thlup. 

"Ni e, Sangi, nang pawh Mapui, insum deuh ru, naupang an la meng si. In nupa hian insiamthat in mamawh ve ve.. Mapuia pawn thiam lohna tam tak i nei ve tho ang, Sangi chunga burbun vek pawh a tha kher lo. In nupa hian fim takin ngaihtuahin sawi dun ula, thinrim loin.. In tihdik loh leh siamthat in ngaihna lai te inhrilhtawnin insiamtha tawn ula, in la tlai lo ve.. Chhungkaw nuam tak in la din thei ania" Ka pu chuan a rawn ti ta a. A sawi dik ka ti khawp mai. Thawm chu a reh ta vang vang a. 

Putea'n min lo call vangin pindanah lutin ka be ta daih a.. 

(Mut hi a chhuak duh si a. Ka tihtheih tawk hi lo duhkhawp ve mai teh u aw 😘😍