Tidamtu Kut 4

TIDAMTU KUT.. (4)

Ziaktu: Toni Râlte

(Adds min click sak hram hramtu te chungah ka lawm takmeuh e. In zarah story ziah ka phur phah ve thin a nia 😍

Vawksa kawchhung leh arsa ka siam a. Thlai lam pawh ka siam nual. Nu Sangi nu hi chu inrinni leh sunday hian a rawn kal zeuh zeuh a, Nu Sangi nen danglamna vak an awm lem lo. An danglamna chu Nu Sangi nu chu aw nem tak, mi fak hluak hluak ching a ni a, mahse, a mi fak deuh kha a kalsawn chuan a rel zui leh thei mai. Tiang mihring hi kan khuaah pawh an awm. Ka hlauh zawng tak an ni. A pa erawh ka la hmu ve lo thung. Pa Mapuia hian engvanga sawm nge ni ang aw.. Nu Sangi lah chu a túm deuh búr reng bawk si. Eirawng ka bawl zawh chuan ka inbual fai a. Ka inbual hlanin an lo thleng aniang, Bathroom kawngka rawn kik dawt dawt pahin, Nu Sangi chuan, "Inbual zo vat rawh. Hei thingpui lum te pawh a ngai.. Ngati nge maw i lo inbual chawng chawng ni" a rawn ti hlaih hlaih a. Zanriah ei a hun ţêp tawh a, Tun anga thingpui lo in te chu.. Ka sual ka chhuah ve a, ka inbual rei lui ngat. Ka chhuah meuh chuan a meng rum úl mai. Mahse, engahmah ka ngai lo lui ve tlat. Ka inthlak sawk sawk a, Chaw ei a hun ruai tawh. An la titi in ka hria. Ka intihfel zawhah.. "Pa Mapui, chaw ei ka siam mai dawn mi? " ka va ti a. A lo bu nghut. Ngawi rengin ka siam ta mawlh mawlh a. An rualin ka kil ve lo, chhungkaw inhmukhawm an ni si a, ka hnawk ka hlau. Ka lo vil pah tho a. Eng em em chu an sawi lo. Nu Sangi pa chu Pa Mapuia ang type deuh, dam dup mai, palian pui a ni ve bawk a. A ngainatawm nghal mai. Kei pawh min be suam suam reng a. Nu Sangi nu erawh chuan kam khat mahin min be lo. Pawi ka ti hran lo. An ei khamah an eina ka sengfel sawk sawk a, thleng ka sil leh vek hnuin, chaw ka ei ve ta chauh. Abby te chu sunday zanah an awl thin. An roomah an awm niin ka hria. Chaw ka ei mawlh mawlh lai chuan, Nu Sangi awki sang tak ka hre leh ta a. Chaw ei tuina a bo duak mai. 

"Heng vang hian maw ka nute hi chaw eiah i lo sawm a? " a ti tuar a. 

Nu Sangi nu pawh a tawng ve nghal, "Mapui, a va mak dawn ve. Hetianga han intih tawp mai chu le" a ti nem leh duai a. Eng tak Pa Mapuia chuan ti ni maw? 

Pa Mapuia chuan, " Ni e, ka pi, pawi ka ti. Min hrethiam rawh u. Inthen hlen ka sawi lo. Hun thawl kan mamawh dun niin ka hria a, chuvang chuan in in lamah rawn haw rih phawt mai se la, sum rawn chhuah rih pawh a ngai lo. A nun te insiamtha se, kan fate tana nu tha tak a nih theih dawn phawt chuan leh nunphung pangngai taka a nun theih dawn chuan; inpum leh hi ka hreh lo. Ka chhungte pawh ka rawn vek tawh a. Kan chhungkaw thutlukna a ni e" a ti ta dap dap a. Thil awmzia ka hre tan. 

"Engtin vak nge ka awm a?! Chutia thiam lo zawk anga min treat a? " Nu Sangi'n a ti leh chiam. 

Apa chuan, "Sangte, insum teh, naupang ten an hria ang e. Nang pawh i dik lo aniang. Mapuia meuh pawh a thinrim tawh chuan" a ti chuar chuar a. Ka insengfel ve mek. 

"Engtinmah ka awm lo. Amah hian ngaihzawng a nei a, chu chu min puh a tum mai mai a nih hi.. Khanglang a" a ti leh ham ham mai. Ka lo ner ve vak ringawt. Mahse, Pa Mapuia thutlukna chu mak ka ti ru ve tho. 

"Engpawhnise, va haw phawt la, ka sawi tawh ang khan i nun te i siam tha thei anih chuan i duh hun hunah i rawn haw thei e" Pa Mapuia chuan zaidam takin a ti a. Dik tak chuan mipa pangngai tan chuan dawhtheih reng a har ve bawk ang. Zu a rui duh si, a office bang lah a tlai thei ropui bawk si, chu zawng zawng ai chuan a fate a ngaihsak miah lo leh an awm ve tih hre miah lo anga a awm thei hi a ni. 

"A nih mai mai tak chu. Mapui, ka lawm lo hle mai. Kan fanu hi kehthei dawma kan dawm a ni ve a, hetianga i duh hun huna i kaih kual theih tur a ni hauh lo ania. Sangte, va insiam rawh. Naktuk zingah bungrua kan la nghal ang. Ve mai mai a" Nu Sangi nu chuan a ti ta sak sak a. A aw nem pawh a bo duak mai. Milian chhungkua an ni a, hetia inhnawhchhuah chu an paidam thei bik lo aniang e. Thleng ka sil zo va, tihtur a vang riau. An tawng ngaihthlak reng lah a inthlahrunawm bawk si. 

Nu Sangi chu an roomah lutin a ri bur bur a. A insiam a ni ngei ang. Boruak chu a uap churh a, a nuam lo takzet a ni. Pa Mapuia a rawn kal a, a hmel chu a thim mâk mai. 

"Engahmah ngai suh. A tel loin rei vak lo kan khawsak rih a ngai anih hi.. Ka tuar thei tawh thlawt lo a ni" a rawn ti ringawt a. Ka lo khawngaih ve hle. Sawi mai tur erawh ka hre lo. 

A suitcase nen Nu Sangi chu a ding to a, a hmai sen vek danah a thinrim hle tih a lang reng mai. Min rawn melh râwm rãwm a, "ka fate saw i lo tirethei a nih teh chuan ka chansawm ang che" min ti ta riap mai. Ka hlau hran lo, a chhan chu a fate hi ka tirethei ngai tlat lo va. 

Chutih lai tak chuan Abby leh Alex te chu room atangin zum zetin an rawn inzui chhuak a. Thil awmzia chuan a tibangbo ve hle aniang, a nu leh pa an melh tawn zak zak reng a. Pa Mapuia chuan va panin, "Bawihte, Ateii te nen dawrah va kal lawk ta che u, hei pawisa" tiin cheng 200 tlang a phawrh a. Kei chuan chet la vatin, "Nia, lo kal ru le" tiin ka au nghal a. Abby a fing bawk a, a nau chu kaiin kan inzui chhuak ta nghal a. Ka thaw hawk mai. 

Ina kan let leh meuh chuan Nu Sangi te chu an lo chhuak hman tawh a. A tihzia hlauh e. In luh hma chuan Abby chuan, "Ate, anu te kha an inthen dawn mi? " a ti ta a. Dawt hrilh ringawt chu dikin ka hre si lo. 

"Ih maw u, a nu leh apa te kha an awm hrang rih lawk dawn a. Anu chu a pi te inah a zin rih lawk dawn alawm. Reiloteah a rawn let leh mai ang" ka ti ta tawp a. Abby mitmengah chuan engkim a hrethiam niin ka hria. Alex erawh a at phuang avangin ka sawi chu a awih mai niin a lang. In chhung kan luh chuan Pa Mapuia chu rilru buai hmel zetin a lo thu ran a. Biak mai dan tur ka hre lo, naupangte chu an pindanah ka hruai nghal a. Khumah kan thu khawm a. Kan eitur lei te chu ka kheh a, kan ei hlawm a. An mitmenga zawhna chhiarsen loh awm chu keimah ringawt chuan ka chhan zawh ka ring lo. Pa mapuia a rawn lut ve a. A nui lui hram hram tih kei chuan ka hai lo. 

"Anu kha a pite inah a va awm rih lawk dawn a. A rawn haw leh vat ang. Fel deuhin awm ula, Ateii thu in awih ang a.. Umm.. A tha em? " tiin a fate chu a chul a. 

Abby chuan, "Apa, a nuin zu a rui leh tawh mi? " a ti ta reuh a. He nau fing lutuk hi a buaithlak. 

"Aih, rui lo ve. A rui ngai hleinem.. Mahse, Api te inah khan tihtur pawimawh tawk a awm a, chu chu va tihsak a ngai a" Pa Mapuia chuan a ti ta ringawt a. Ka lo ngawi reng ringawt. 

"Kei chu Anu awm lo mah se, nuam ka ti tho. Apa, saturdayah chuan picnic tawh ang u, Ateii te nen, Danny te kan sawm ve ang a" Alex chuan a rawn ti ve a. Ani pawh hi nute ngai rual tur si hi a nu awm leh awm loh hian awmzia a nei thui tehchiam lo khawp mai. 

Pa Mapuia chuan min rawn melh zawk a, "Tehreng mai. Kan picnic dawn nia. Spot pawh ka lo book ang" a ti ta a. Ka chil ka lem khawlh ringawt. Alexa'n Danny a tihte chu kan thenawm lawka awm te an ni a, an ni nen bak an inkawm vak lo a ni. Dar 9 a ri dawn hnai tihin naupangte chu an mut a chhuak ta bawk a, ka muttir ta a. Kei pawh ka ha te nawtin ka intifai a, mu turin ka inbuatsaih ve nghal. 

Pa Mapuia erawh naupang ho ka tih mut dawn khan, "Ka chhuak lawk dawn" a ti a. A chhuak nulh. Eng tak ti ang maw.. Ka ngaihven tur pawh a ni lem lo bawk a, ka mutsan ta mai. Mut hmunah chuan phone ka khawih mai mai a. Biak tur hi ka va nei lo thin tak. Hriati leh ka thian dangte bak tumah ka be ve ngai lo. Facebook te ka khawih ve tawh vangin news te ka chhiar leh mai mai a, video te ka en kual leh vak.

A tuka naupangho school kal hnu lawk, ka insuk laiin Ruati, an awmpui hmasa kha a rawn lut hlawl mai. Innel takin kan inbe nghal bawrh bawrh. 

"Zirna ka la chhunzawm chiah lo va, Pa Mapuia'n min lo bia a, i buai lutuk a hlau aniang, ka rawn pui dawn che a". A ti a. Mak ka ti deuh. 

"Ka buai hran lo. Mahse, a khawharthlak em a, i lo kal chu. a tihzia e" ka ti ve mai a. Chawhma chhungin tihfel ngai chu kan khawih zo ta vek a. Thingpui ka lum a, kan in dun lai chuan, "An inthen hlen i ring em? " a ti ta hlawl a. 

"Ka hrethiam lo.. Ring vak lo" ka lo ti a. 

A nui ringawt., "Kei chu ka ring deuh asin. Pa Mapuia a thinrim sosang tawh em mai" a ti a. Thil ka ngaihtuah chhuak, Ruati hi rei tak an chhawr tawh kha a nia, ani hian ka hriat loh a hre nualin ka ring. Tihtur em em a awm tawh lo bawk a, ka zawt ta tawp mai. A lo hre viau bawk. Ruati chuan Pa Mapuia te chhungkaw chungchang chu a sawi ta mial mial a. 

"Pa Mapuia Pa hi Pastor a nia, a pension tawh. Tunah chuan an khua Lungdaiah an awm tawh. Pa Mapuia te hi unau pahnih chauh an nia, a farnu hi a ban dinglam zeng a nia, mahse, a hmeltha tawp. Tichuan, a farnu leh a pasal chuan Pa Mapuia pa te chu an awmpui a. Tunah hian an khawsa ho mek a ni. Pa Mapuia hi maw.. Nu Sangi nen an inneih hma khan bialnu nghet a nei a, kum 7 dawn an inzui hman an ti. Heta ka thawh tirha an awmpuinu sawi ka hriat ve tho a nia. Mahse, an inneih hma thla khat velah a bialnu chu motor accident vangin a boral ta a, a at phah ţêp nghe nghe. Kum khat dawn ngaihzawng nei lova a awm hnuah Nu Sangi hian a kherh ta a, hmeichhia zawkin kherh reng reng na nâ na chu a lo nem ve ta aniang, Nu Sangi hi a rai ta hial a. Chuan, Abby a pai lai hian an innei ta a ni. Nu Sangi te chhungkua hi chu Aizawl mihlun an nia, unau pathum an nia, a nuta pawh a rawn kal tawh lo maw.. Ka thawh lai kha chuan a lo kal ve zeuh zeuh. Zep loh chuan an hausakna hi an chhuang ka ti mai, an chapo ve tawp. Chhuan tham an nei bawk a. Chuan, Abby a lo piang a, Nu Sangi nen pawh an la hlim ve zel. Alex an neih atanga thla 8-na velah hian Nu Sangi chu a danglam tan ta a. Ka thawh ve hma tho a nia chu chu. 

Ih, an sawi ka hriat tho a nia. Nu Sangi hian Pa Mapuia a kherh chhan kha chu a bialpain a phatsan vangin runluih nan a kherh an tia, a dik em ka hre bik lo. Mahse, tikhan a lo rai ta bawk si nen, Alex a neih hnu lawkah a bialpa chuan a rawn hel leh tan ta a. Nu Sangi lahin a lo duh ve tawh em em thin kha a ni bawk sia, a lo be chhe vak lo aniang. Ta tang chuan an nupa nun a buai chho ta an ti. Kei ai chuan an thenawm te hian an hre zawk ang. An in an sak lai hian zan khat chu an in relah nu Sangi leh a bialpa hlui te tawm dun chu Pa Mapuia hian a man a niawm e. An mudun hman êm lo bawk a tiin a ngaidam a. Nu Sangi pawh a insiam tha ve viau. A fate pawh a ngaihsak ve leh tan a. Mahse, a rukin an la inbe reng tho nge, ka thawh hnuah pawh buaina an nei chho ta reng a. A bialpa chu Rinawma a nia, an college bul lawkah an awm bawk si nen. Pa Mapuia tan chuan rinngam a har ve khawp ang. Chuan, zu hi a rui zeuh zeuh reng bawk sia, a hahthlak thei lutuk. Amah Pa Mapuia hian tlawm leh zah pawh dawn lovin a fate vangin vawikhat phei chu Rinawma chu a be tawp tawh. An nu rawn be tawh lo turin. Khangte kha Nu Mapuii chuan a thinrimpui a, a chang chuan Pa Mapuia hi nep ka tiin ka ngei zawk hial thin. Mahse, a fate a hmangaih êm mai a, a tuar ve hram hram niin ka hria. Nu Sangi sualzia chu maw.. Pa Mapuia chhungte an rawn zin te hian an in lama hawn daihte a ching a, biak thatin a be ngai mang lo. Pastor chhungkua an ni bawk a, an enliam deuh tawp niin ka hria. Mahse, nizan khan Pa Mapuia chuan min lo bia a, "I nu Sangi chu ka hawtir ta mai. Ka tuar thei tawh lo a ni ber. Hluteii hi a la naupang ve si a, a hlauhthawn ka ring deuh bawk nen, i hman tho chuan lo pui ve la, naupangho pawn an ngai tawh che" a rawn ti a. Ka lakah a thain ka zirna sensoah min pui nasa bawk nen, ka hnial ngam ta lo a ni.. " tiin. 

Pa Mapuia chu ka khawngaih zual sawt. Tin, naupangte pawh ka lainat takzet. Nu leh pa kara piang leh seilian ni si, nu nei lo ang chiaha an awm thei chu.. Ruati lo awm ve chu ka lawm khawp mai. 

"Anih nangmah hi tunah eng maw i zir dawn? " ka ti a. 

"B. A ka zir ve tan dawn a. Ka nu hian zir chhuahtir min duh ve bawk si nen.. " a ti mai a. 

"Anih Aizawl hi in khua hrim hrim ami? " ka tih chuan, "Ni bik nang. Kan khua Chhawrtui daih a nia, ka nu nen Aizawlah hian thil a awlsam zawk ang tiin kan pem daih alawm. Awlsam chu a awlsam zawk a, mahse, rual awh a na duh ee" a ti a. 

Min rawn en a, "Anih nang i chanchin sawi ve teh. I la naupan hmel sia, ti nge hetia mi awmpuia i awm? " a ti ta a. Ka chanchin hi tu bulah mah ka la sawi ngai lo. Kan khuaa ka thiante hi chuan sawi ngai loin an hria a ni bawk a. Ka chil ka lem khawlh a, ka chanchin tlem azawng chu ka hrilh ve ta a. Chhungkaw mualpho theihna te a nih vangin thui tak erawh ka sawi lem lo. 

"Keini pawh ka putea nupui vang pakhat ania kan pem.. I putea nupui chu a sual ve em? " a ti ta zel a. Piteii'n a hre tawh dawn chuang lo tiin a sualzia chu ka hrilh ve ta hmiah. Ka thawl hawk zawk mai. 

"Kan va inang em em ve. Kei phei chu putea hian kan thlavang pawh a hauh ngam hleinem.. Tunah chuan rethei deuh mah ila, ka nu nen zalen deuhin kan awm tawh a, ka hlimin nuam ka ti daih zawk" a ti siam siam a. Ni e, zalenna aia hlu hi chu a vâng viau ang. 

"A nih Ruat, i pa a boral tawh mi? " ka ti ta tawp a. A pa chanchin engmah a sawi si lo va, mak ka tih vang a nia. 

A ngawih vang vang hnuah hnukulh lek lek hian, "Boral lo e. Mahse, hei kum 10 vel chu ka hmu tawh lo. Ka hmuh hnuhnun ber kha chuan a la hrisel hmel viau a, ih, englo ania, ka nu leh pa te hi thla khat chiah an innei a niawm e. Mahse, ka nuin min lo pai hman sia. An inthen chhan hi ka nu chuan a sawi ngai lo naa tlangkam atanga ka hriat dan chuan, ka pa chu kan khaw mi leh sa tak tak a ni lo va, mihlim vakvel an tih ang hi a nia, an khuaah nupui fanau a nei an tia, chuvanga inthen an nih ka ring. Ka pa chu ka nu te inah a awm ve reng a, mahse, sawi tawh ang khan thla khat hnu velah a chhuak leh a, kan khua pawh a chhuahsan daih aniang. Chuan, kum 10 liam taah khan putea'n mi pakhat a rawn hruai a, "Ruati, hei i pa" a ti ta a. Mahse, ka nuin kan inbiak hmain, "Hetah eng nge u lo tih? Chhuak rang rawh" tiin a hnawtchhuak ta a ni. Kha kha ka pa a nih tak tak chuan pa lian leh hmel tha tak, hrisel hmel tak a ni ngei mai a" a ti ta a. Kan dinhmun a va inang em em.. 

"Awii, kei pawh chutiang deuh chu a nia sin. Ka pa pawh kei chuan ka hmu ve lo, mihlim vak vel ve tho a nia, ka nu nen inneih pawh an innei lo. Palai an va kal chuan, an khaw diktak pawh an hre lo a niawm e. Ka pa hmingah pawh ka putea hming kan dah tawp alawm" ka ti ve ta bawrh bawrh a. Ruati hmel chu a dang daih, phurna riau nei niawm tak hian, "Ehe! Hlute, kan pa hi a inang maithei a ni" a ti ta hlut a. Ka lo hamhaih deuh. 

"Engtin" ka ti nghek.. 

"Ka pa leh i pa chu mihlim vak vel an ni ve ve. Kei ai chuan i piang tlai deuh zawk a, ka nu a kalsan hnuah in khuaah a lo zin aniang" a ti ta zung zung a. A nih duh hmel khawp mai. 

"Ka hrethiam bik lo e a " ka ti ringawt. 

"Ngawi rawh.. Ka nu ka lo zawt ang aw.. A tha dawn lutuk. Unau kan nih chuan" a ti leh hlut a. Unau.. Ni e, pianpui unau neih ve ka chak theihzia kha.. Ruati nen chuan unau ni tak tak ila.. Kan dinhmun a inan êm vang chuan kan inngaina sawt a, ka anpui hmuah ka inngai deuh. Nilengin tihtur ti pahin kan titi ta a. Naupang ho an lo haw a, Ruati an hmuh chuan an ri chul mai. An lo ngai tawh hle a ni mahna. Ruati'n a buaipui ta vek a, keiin eirawng ka bawl thung. Pi ber awm lo chu a leh nawm phian mai. Englai pawha min vil runa ka tihsual chang rantu awm ta lo chu a nawm ve loh bawkin. Pa Mapuia pawh a rawn haw ve ta a, an nu awm lo chuan a tibuai vak lo nge a hmel hmuh pawh a nuam lo hran lo. A inbual zawhah chaw kan ei a, Ruati pawh a ei ve nghal mai. Chaw ei khamah Pa Mapuia'n a va thlah. Naupangho lehkha ka zirpui laiin a rawn haw a. Naupang ka tihmut zawhah thingpui min lumtir a, 'Nang pawn in ve rawh' min ti a. Ka chak vak lo naa ka in ve ta mai. Kan thu dun ta reng a. 

"I nu Sangi awm lo chu nuam i ti daih zawk em? " a ti a. A nui bawk. Dawt siam thiam lo tih takah, "Umm" ka lo ti hmiah. 

"I nu Sangi hi zawng a buaithlak a ni e. Theihtawp ka chhuah ve asin le.. Thil dang daih, kum engzat nge i nih? " a ti thut a. 

. "17th, October-ah kum 19 ka pum ve chiah ang" ka lo ti ve mai a. 

"I la naupang hle mai maw.. Lehkha zir rual chauh i la nih hi mawle.. " tiin ka chanchin tlangpui min zawt ta a. Kei pawn zep nei lem loin ka hrilh ve mai. Ka sawi zawh chuan, "A zia lo hle mai. Vanduai ber emaw kan intih pawh hian keini aia vanduai an awm ve zel ania.. Tihian kan hnenah i khawsa zel ang a, kum te thar se, OPEN atang te pawn class Xii zir dan kan la ngaihtuah dawn nia. Zirah tlai luat a awm hleinem.. Tihian, ka farnu ang i ni mai. I nu Sangi nen hian kan innei leh ang em tih ka sawi lawk thei lo va, kan inthen hlen phei chuan, naupangte hian enkawltu an mamawh dawn si a.. " a ti a. A inthlahrun hmel hlein ka hria. 

"Tehreng mai. Kan khuaa leta engmah va tih loh ringawt ai chuan heta awm hi a tha zawk hrim hrim.. " ka ti ve mai a. 

"Karlehah ka nu leh pate an lo zin dawn a, an ngaina viau ang che.. " a ti a. 

"Ka lo duat viau ang" inla puitling zet hian ka lo ti a. Kan nui dun ringawt. 

A hranpaa han inkawm vak kan nei ngai lo va, chumi zan chuan kan inkawm thei fu mai. Ka ngaina sawt. Pa sual zawng a ni hauh lo chiang a ni. Hetiang pa tha lutuk te engtin nge nu sangi hian a tihnat fo phal zawk ni.. 

Ka mu tur phone ka khawih chu Hriati'n, "Mate, bialpa ka nei" a rawn ti a. Ka khi sak ringawt. A thlalak a rawn thawn nghal zat. A pangngai khawp mai. Hriati hi kei ai chuan a lian hlek a, a hang zawk naa a hmai fang chu a dik zawkin ka hria. Ka lawmpui khawp mai. An college ami a ni bawk a, a nuam ngawt ang. 

"Nei ve tawh la" a rawn tih chuan ka nui chhuak. 

Heta ka awm atang hian ngaihzawng lam ka la ngaihtuah chhin eih lo, star takngial pawh ka la nei lo. Chutih a hnekin mipa ka thiante ni lo number pawh ka kawl lo va, ka lengchhuak ngai lo bawk nen. Hmelhriat pawh ka la nei mang lo. Inrinni bazar changa min phur thintu kan thenawm tlangval U Rema hi a ni deuh mai ka hriat ve chu. Ani lah a upat tawh bakah a lerh vak lo ve nge a titi te hi a nula mi lo ve thei tawp. A bak han kawm tumah ka nei lo. Sawi tawh ang khan mipa lakah feelings ka nei lo tawp, ka duhzawng tak ka la tawn loh vangte pawh a ni ang a. Mut hmuna han dream melh melh angte hi vawikhatmah ka la nei ngai lo. Ka suangtuahna tam zawk chu lehkha zir leha hna pangngai tak thawh a ni tawp. Mahse, a kalkawng ka hre bik si lo. Pa Mapuia khan a thusawi kha ti tak tak se ka ti ru khawp mai. Mahse, Nu Sangi a lo haw leh chuan ka zir theih pawh ka ring chuang lo. Ka phone min leisakna te kha ka hlawh atanga cut a tum a, mahse, Pa Mapuia'n a phal ta lo kha a nia. Awmpui hlawh hi a tam ve tawh a, thla khatah 10000 ka la ve a, 8000 chu ka putea te ka thawn ve a ni. Ka tha chu na deuh mah se, nakinah keima pualin Bank Ac te ka la neih ve hunah tlem azawng chu dah that ve zel ka rilruk hrim hrim tho. Heti ringawt chuan ka damkhawchhuak dawn lo tih ka hria. 

Nu sangi chhuah atangin ni 3 lai a liam ta. A reh vang vang mai. Pa Mapuia lahin ngaihven tang e a ti lem hlei law.. Bungrua an rawn la chuang bik lo bawk. Naupangte chuan an nu an sawi ngai lo hrim hrim. Games khelh dan min zirtir a, chutia a naupang zawkin thil min zirtir chu nuam an tiin an intithei em em a, kei tak pawn nuam ka ti. Kan infiam leh nui iar iar lai Pa Mapuia'n hlim hmel taka min lo thlir chang hi ka hmu fo a, a fate a ngaihtuahzia ka hmuh hian ka pa ka hrechhuak ve thin. A hmel takngial pawh ka hmuh ve loh ka pa khan fanu a nei tih hriain min hriatchhuah chang a nei ve thin ang em le tih te.. Tin, ka nu pawh ka theihnghilh ngai lo. A thihdan runthlak tak te kha ka ngaihtuah chhuah chang chuan ka thaw leh kâwk kâwk thin. Lengkirah khan a zuangthla nge ni ang miin an namthla ni ta ang tih mai mai te.. A zuangthla a nih te ka ring rum rum thin, a nunkhua kha a hrehawm ve thawkhat em a, naupangtê mah ni ila eng emaw chen kha chu ka hrethiam ve a ni. Ka nu min hnutchhiah dang pakhat chu, nu leh pa tel lova seilen hrehawmzia leh harsatzia ka hre tawh a, pasal ka neih ve hunah chuan ka then miah lo vang tih hi ka vawng ve reng mai. Ka fate chu ka tifahrah lo vang tih hi ka intiamna a ni ve. 

Pa Mapuia nu te an lo zin dawn sia tiin Inrinni zing ka va bazar chu ka in lei âm angreng hle. Ka inkhai bawr ţuaih mai. Ka inlei zo thawkhat tawh tihin hawn ka tum hnai a, stepa ka chhoh mek laiin min tawk zawngin Nu Sangi leh mipa pakhat hi tho hlim niawm takin an rawn inzui thla a, inchei viau mah se, an hmel landan chu tho hlim an ang. Hmuh loh der ka tum ta ringawt a. Mahse, min lo hai lo nasa mai. 

"Hlui, hei ding teh.. I va inlei nasa ve. Pawisa i va ngah awm ve" Nu Sangi chuan a ti nghal tâwng a. 

"Pa Mapuia'n bazarna tur chu min pe a" ka ti tha ve mai a. Zingkar anih vangin mi veivak an tam lutuk lo. 

"Ni danga i lei aia tam a nih hi i lei.. Ngati em em nge? " a ti leh a. A meng thîp hle bawk. 

"Nia, Pa Mapuia nu te an lo zin dawn sia.. "Ka ti a. 

"Hmm.. Kan pitari te chu ka awm loh lai chuhin an lo zin a ni maw?nuam an ti khawp ang chu.. An rawn zin dawn sia ka rawn haw rih lo mai ang. An hawn hunah ka lo haw ang. I lo hrilh dawn nia" a ti leh bawrh bawrh a. Ka bu nghat a. Ka kalsan ta daih. A kalpuipa kha ka lo en chîk lem lo va. Rinawma chu a ni ang em le.. Eng nge zingkarah te an tih ang? A ho em mai. Ka buaina tur a ni ve lo e. A tuk Sundayah chuan Abby ka chei mawlh mawlh laiin Pa Mapuia a rawn lut a. 

"Ka theihnghilh daih a. A va ho tak.. Kha Hlute, i kawr tur" tiin uluk taka tuam hi min rawn pe a. Ka lo hamhaih nasa mai. Phone min lei tawh a, tunah kawr.. Ka vanneihzia hi aw. Zep loh chuan kan khua atanga ka ken phei ve te ho tehlam kha chu mi bula hak chhuah atan chuan a tunlai lo ve hlawm tawh bawk a ni. Lawm takin ka la a, lawmthu ka sawi bawk. Ka han enchian nak chuan a mawiin a changkang kher mai. Kan khuaah chuan ha ila, Christmas emaw an ti maithei a ni. Ka hak lai chu hlipin kawr thar chu ka ha ta nghal a. Keima tawkah inhmeh ka inti ve kher mai. Min kap êng bawk si. Hlim takin biak in lam chu kan pan ta a. A hla lem lo bawk a, kein kan kal mai thin. Thian pawh nei lem loin ka va thu ve tawp zel a, a tuamahin min be lem hlei lo va, ka be bik lo bawk a. Veng a zau tham a, veng chhung theuh theuh pawh an inhre lo thei khawpin ka ring. Chutiang ve turah chuan min ngai ngei ang. Chawhnu lam erawh ka inkhawm meuh lo. Kan khuaah chuan Baptist-ah kan lawi a, mahse, ka awmna te ber Presbyterian an nih vangin an lawinaah ka inkhawm ve mai. Pathian pakhat be theuh theuh ka ti mai. Chawhnu lamah Ruati a rawn leng leh mial a, mahse, tlangval pahnih a rawn hruai thung! 

"Hei hi Zorina a nia, chuan hei hi Adika a nih hi.. " tiin min hmelhriattir zung zung a. Pa Mapuia rawn bang pawhin a rawn be ve hlut nghe nghe. A va inthlak a, a rawn chhuah leh chuan, "Hlute, ka chhuak lawk dawn a, ka rawn tlai deuh chuan min lo eisan mai ru aw" a ti a. A chhuak nghal. Abby te chu an toys room-ah Danny te unau nen an infiam a. 

"Thingpui ka'n lum nge" tiin ka tho a. Ka lum mek laiin Ruati a lo kal ve a. Zawi angreng tak hian, "Adika saw ka bialpa a nih saw.. Zorina sawn a star che ania aw.. Ni ru" a rawn ti sawr sawr a. Ka nui ringawt. 

"A mak nui ringawt suh. A fel rap, kuminah college a zo dawn a.. An awmthei bawk si.. Duh rawh" a ti leh a

"I lo phei ve daih sia, nuam an ti lo nge" ka lo ti thung. Nui vur vur chungin a phei ve mai. Zorina chu tlangval ria lam, hmai hriam lam deuh a ni a. A mitmeng a dum bakah a mitmu a lian, chu chuan a tilang zahawm ka ti. A hang chhe lo bawk, a pangngai reng. Tawng erawh a tawng tam lem lo. Kei lahin sawi tur ka lo hre em em bik si lo va, Ruati titi kan ngaithla a ni ringawt mai. Ruati te nen veng khat vek an ni a, Zorina te nen phei chuan inthenawm hnai te an ni a, Zorina leh Adika an inkawm bawk nen. Ta tang chuan Adika nen pawh an ni ve a lo ni. Adika pawh a chhe hran lo, mahse, ka duh aiin a tawi! Ruati ai chuan a sang tho naa,an inchen thuak angin a hriat. Mahse, kawm a nuamin a fel khawp mai. Zorina nen chuan min dem bel deuh ringawt lehnghal. Ka lai ve fun mai. Chaw ei turin ka sawm tak naa an vawikhat rawn lenna te a ni bawk nen, an haw ta a. 

Eirawngbawl vak a ngai lo bawk a. Ka inbual a, phone ka khawih mai mai. Abby te lah an tlei si. Chutia phone khawiha ka khik vur vur lai chuan kawngka pawh kik lem loin Nu Sangi leh a thiannu niawm tak hi an rawn lut hlawl mai a. Ka phu zawk nghe nghe. A meng sen rúm mai a. A sam a phelh phang bawk. Lecturer meuh si, hetia ţawp hmel deuha a awm hi mak ka ti tlat. 

"Khaw nge? " a ti nghal thâwr a. 

"A chhuak a" ka ti a. 

"Khawiah ka ti alawm" a ti pawr hlar a. 

"Ka hre bik lo, a sawi si lo va" ka ti ve hmak. 

"Nang hi min zah lo sawt riau mai. I Pa Mapuia hmei te hi i lo ni zawk em mawni? " a ti ta a. Ka sa zak mai. A thil sawi tenawm lutuk vang chuan ka hnuk a ulh lek lek zawk. 

"I mawl anih chu" ka ti hmiah. Ka thinrim hian sawi tur ka hre ngai lo. Ka tawng teuh chuan ka tawng na thin si a. 

"Hmeli a.. A mawl zawk chu chhiahhlawh mai mai i nih hi.. Khaw nge ka fate.. Zanin chu ka riahpui dawn ania" a ti thawr thawr a. An roomah a lut nghal. A thiannu erawh thuawih hmel fein a thu fel than. Engmah a sawi lo. A hmel pawh a pangngai phian. Abby tap ri ka hre zawm zat. Loh theih loha ka dan a ngai dawn anih hi. Ka va phur lo tak em.. 

Ka va luh chuan, Abby chu kut zungchal hmuhin, "Bang rawh ka tih chuu.. Tap suh. Ka bulah in awm dawn. Hre ringawt rawh.. " a lo ti hlawih hlawih a. Nu ve si, chutia fate thlabara han siam chu ka thinin a tuar thlawt lo. Ka naupan laia ka hrehawmzia kha ka theihnghilh hlek si lo va. 

"Thlah rawh" ka ti tuar a. Min rawn melh kâwk. Makti hmel a pu zuai hman. Mahse, chapo zetin min en leh a, "Eng a? " a ti nghek. 

"I fanu a nih hi. I fate tihthlabar hi i duhdan maw? Eng ang nu nge i nih a? " ka ti ve ta chiam a. Ka aw pawh a zawi lem lo. 

"Hmeli leh" tih paha min rawn ben a tum chu thlek sawn pahin a ban ka mansak a. Kan inlen hleih deuh naa, ani engmah thawk ngai lo ai chuan thahrui chu ka nei fe zawk ang. 

"Kut min thlak theihna i nei lo ve" tiin na zetin a ban chu ka paih thla a. Abby leh Alex ten min rawn pawm nghal chat. An hlau tih ka hre mai. An hmuh laia inbakkaih kha ka duhdan a ni bik lo. A loh theih tawh loh a ni. 

"Nang kha.. He inah hian chhungkaw nu ber ka ni tih i theihnghilh a ni maw? Nge ka hawn lawk avang hian ka ai awhtu angah i lo inngai hman" a ti fiak thak a. A thin a rim hle tih a aw khurh danah ka hre thei. Tin, Zu a rui tih pawh. 

"He inah hian nu ber i ni tih ka theihnghilh reng reng lo va, mahse, he ina ka mawhphurhna chu he in chhung enkawl leh naupangte venhim hi a ni.. " ka ti ve ta sak sak a. Insual pawh ngai se, ka ngam sak tawh. 

"Ka fate hi nang hian i venghim ang maw? Chu pawh ka lak atangin.. Zakthei lonu, eng mihring nge i nih a? Ka fate chu ka ta an ni. Ka thu thua awm tur an ni" a ti sehchilh nawk nawk a. 

"I lak atanga i fate venhim an ngai hi zak zawk tur i ni. Eng ang nu nge i nih zawk? " ka ti ve ta hrep a. A thiannu kha rawn lut vein, Nu Sangi chu a kuah a, "A zia lo em mai. Haw phawt ang. Nidangah i kal leh mai dawn nia" zaidawh deuh hian a ti a. 

A ţang tlat, "Ka fate pawh ka duh hun huna ka hmuha ka khawih theih lohin" a ti tlat. Mahse, a faten an hlau tih a hre tlat si lo. Lainatawm zawk hian a.. A thiannu chuan a nawr nasat em vangin an inkai chhuak ta hram a. "Ka rawn lang leh vat dawn ania. Zawngi" tiin min la vau hram. Ka nui tawp. An chhuah fel hnuah kawngka ka va kalh te te a, Abby chuan, "Ate, a nu hi a nu a ni lo mi? " a ti ta a. Ka nghing dawt thei. He thu hi ka tetlai khan ka pi bulah ka zawt ve tawh tak asin.. 

"Ni e, i nu a ni. Mahse, ih, a harhfim lo a. Tikhan a awm anih kha.. " ka ti ta ngawt a. Ka nu hmel ka mitthla vang vang mai. Mahse, kei chuan ka nu kha demna ka nei lo. Dem ahnekin ka khawngaih em em zawk. Nu Sangi erawh ka dem tlat! Eng harsatna nge a tawh tih erawh ka hre lo. Ka nu nen an dinhmun chu a inang hauh lo tih ka hria. Ka bulah ngawt an tâp ta a. Pa Mapuia lah a sawi ang khan a rei ta phian si a. Chaw kan eisan ta daih. Chaw ei pawh a tui nek lo ve. 

Dar 8 velah naupang an mu a. Living room-ah phone khawih pahin Pa Mapuia ka lo nghak. Zorina khan min lo be ngei a, ka khua a lo har ve bawk nen, thu ho mai mai sawiin kan inkawm ta reng a. Kan inmil fú mai. Mahse, ka dinhmun ka hria, mi awmpui mai mai ka ni a, ani ang college naupang tan chuan ka hniam ngawt ang. Ruati khan a ti ve mai mai aniang. Min duh ka ring lo. 

"Engtik nge kan inhmuh leh ang? " a rawn ti a. 

"Aw.. I rawn len leh hunah " ka lo ti sam êt a. 

"I chhuak thei vak lo mi? " a tih chuan, inthlahrung ru deuhin, "Umm.. In nghah hi a ngai sia" ka ti tawp. Awmpui ka ni tih a hre ve tho sia a. Door bell a rik chuan ka tho vat a. Ka va hawn nak chuan, mak tiin ka ka hau ringawt. Pa Mapuia chu rui em em, din pawh ding ngil hleithei lo hian a lo pai khut khut mai. En pawh min en lem lo hian, "Chaw ka ei peih lo aw" a ti thum chhak a. A pindan lam a pan nghal. Mahse, a ruih em vangin an pindan kawngkhar chu a hawng mai thei si lo. Ka va pui ta vat a, min rawn rinchhan titih nghal, a rit ropui si.. Khum a awm hnai hlauh a, khumah chuan ka muttir ta a. Ka awmna pa a ni a. A nupui nen an awm hrang mek a, rilru hahna leh buaina tam tak a nei ngei ang. A fate vanga a rilru hahna nen.. Ka dem em em lo. Ka tana tha reng thin a ni a, ka tih ve theih tawk ti turin ka inpeih reng bawk. A pheikhawk ka phelh a, a kekawr erawh thlaksak em chu ka hreh deuh a, a ngai ngaiin ka muttir a. Rizai ka sintir lai chuan ka banah a rawn vuan chawt a, a meng chuang miah lo. A lamah min pawt hnai hrâwkin, nghet zetin a awm ngheng chuan min kuah bet ta tlat a. Ka tal deuh lahin a rum tuah tuah a, min kuah na telh telh bawk si. 

"Remruat, bawihi, ka ngai lutuk che.. Ka bulah awm reng tawh rawh aw.. Ka hmangaih, i tel lo chuan khawvel hi a thim vek" a ti sup sup a. Ka meng kâwk mai. Remruati chu tu tak ni ang maw.. Ka lung a phu dup dup mai. Pa Mapuia hian Remruati emaw min ti anih hi.. Huiham.. Ka theihtawpa nain ka tal vak a, ka tal chhuak thei hram. Tha deuha muttir lehin ka chhuahsan ta a. Ka thaw ham ham mai. Ka hah hlein ka hria, ka insangmar nasa hman bawk nen.. Engtin emawni ka awm. Ka ni nghulh mai. Kei pawh mu turin ka room lam ka pan ve nghal a. 

Mahse, ka mumangah Pa Mapuia nen khum khatah lo mu dunin, mangpui an tih ang hi a ni ngei ang. Chutiang deuh chu ka lo mang a. Hmeichhiain mipa laka a feelings neih ang chiah kha ka mumangah chuan ka lo nei anih chu! Ka harh leh chuan zahna namen loin min tuam a. Zing dar 4 chauh mah nise, ka muhil thei tawh ngang lo va. Ka tho tawp.. A mak em mai. Ka mumang kha.. 

(Ka'n inbual ve sar sar ange 😀