Tidamtu Kut 3

TIDAMTU KUT.. (3)

Ziaktu: Toni Râlte

Sawi tawh ang khan piteii cousin thiannu te inah ve lehchhawng ka awm dawn a nih kha. An sawi hmangin chhungkaw member pali chauh an ni a, naupang pahnih leh an ni nupa an ni mai. Naupang pahnih awm leh in chhungkhur enkawl chu ka thawh tur a niawm e. In chhungkhur enkawl hi chu ka tih ţhan a ni a, ka huphurh lem lo. Naupang enkawl erawh an mizia ka hre si lo va, ka naute ang mizia an nih loh chuan inzir ve deuh hlek ka ngai maithei. A hma lama kal tura min duh avangin ka inpuahchah tha hman vak lo. Putea'n min hruai duh viau mah se; hna lamah a tul si a. Bakah piteii'n a remti lo. Lunglei atangin sumo-in Aizawl chu ka pan ta a. Min lo hmuak dawn a niawm e. Phone takngial pawh ka nei si lo. Rilru a nuam lo duh hle. Aizawl hi vawi khat bak ka la zin lo va, chu pawh ni 3 vel lek ka cham. Engvakmah ka hmuin ka bel lo em em a. Ka zâm ru khawp mai. Tluang takin kan tlan a, ka chuanpuite an fel a, an ri bawrh bawrh a, khawhar miah loin ka awm ve theih phah a ni. 

Aizawl chu kan thleng ta. Counterah min lo hmuak dawn bawk a, counterah ka chhuk dawn a nih chu. Millinium centre kawtah chuan ka chhuk khu ve ta luih a. Ka bungrua tlemtê nen chuan sumo sirah ka ding ran mai. Ka hawi nasa a, min hruaitu niawm reng reng ka hmu si lo. Rei vak lo hnuah ka bulah car var a rawn ding dawt a, ka phu zuk nghe nghe. Driver seat atanga rawn dakin, "Hluteii i ni em? Zote khua" a rawn ti ta a. Ka thaw huai mai. Ka lu ka buk khum rual chuan a lo chhuk a, hmanhmawh deuhin ka bungrua chu a hlang lut sawk sawk a. "Traffic ten min hauh hmain kal ang le" a ti a. A front seat kawngkhar chu min hawnsak nghal. Kei pawh ka thu lut a, kan tlan zui ta nghal a. 

Ka bula thu chu kum 35-38 bawr vel a nih ka ring, pa sàr veng vawng, lian tak a ni a. Cher lam aiin thau lam lek lek a pawl zawk. Mahse, mipa thau tia sawi tur a ni lem lo, a palian êm a, amah a ngoin a ni vuah bawk si a. A tilang thau ni maiin ka hria. A sam chu a dum hlap a, a buk deuh bawk. A kutzungtang sei thlurhah chuan inneih zungbun niawm tak a bun a, chuvang chuan ka awmna tura an pa ber a nih ka ring ve tawp. Pa upa ve deuh nise ka tih nen.. A la naupan hmel si, hetiang a nih chuan an nu pawh a naupang ngawtin ka ring. 

"I rui em? I chau em? " tia min biakna chu tha takin ka chhang a. 

"Lalremruata ka nia, Mapui min ti mai a. I duh leh min pa la, i duh leh min ú dawn nia, chuan, kan nu hi Sangzuali a nia, U sang emaw nu Sang tiin i ko dawn nia. Kan fate hi a u zawk chu Abby a ni a, a nau zawk chu Alexander a nia, Alex tiin i ko mai dawn nia. Ui kan nei bawk a. Hunter-a a ni bawk aw. Chung chu kan chhungkaw thil vel i hriat tur chu a nia. Nakinah in thlen hunah kan nuin i tihtur vel chu a sawi mai ang" a ti dap dap a. Sap hming an uar hle mai ka lo ti rilru thung. Traffic jâmah kan tang ren rawn a. Tlai dar 5 bawr velah in kan thleng ve chiah. Khawpui hi chu a chep si, hei hi ka ninna ber a ni. Building sang zet zet kan kal pelh fe hnuah building thar tha tak, lian over lo changkang deuhah kan lut ta a. Kawt pawh an nei hran lo. Garrage a leng chang chang a ni mai. Hei hi thingtlang lamin khawpui kan hlêp vena nuam tak niin ka hria. Ka zâm ru viau naa, ka inthunun ve nasa hle. In chhung kan lut chu ka hawi nasa ngei mai. A pui ve êm bawk a ni. A phuisui chu thuhran, a simplein a changkang ngawih ngawih. An furniture reng reng chu mawlmang tak anga lang, class zet zet si an ni fur a. A faiin engkim chu a thianghlim a ni ber. Nu ber hi a fel hle a ni ngei ang. 

Kum 30 bawr vel ni mai tur, hleitling ziah zuah, sam sen thar leh kir lek lek, ngo zet hian min lo dawngsawng a. A mitmeng erawh a thip lek lek. Ka pi tur a ni tih ka hre ve nghal mai. A aw chu a fiak deuh a, a zaidam fahran bik lo maithei. A hmel tha ka ti em em lo naa, thingtlangah chuan awm se an rim luih luih ngeiin ka ring. 

Choka depa room-ah chuan ka innghat ta a. Hah a dam tan e. Kum 19 ka hnaih ve tawh a, zah ţut ţut chu a thing ti rual kan ni ve tawh bawk nen, kimkit loh ka tum nasa ve hle. 

"Inbual fai la.. Chaw kan ei dawn nia" Nu Sangi (ti mai ang. Han ú dawnin in neitunu ber a ni si a.. A nuam lo) chuan a ti a. Kei pawh ka insingsa sawk sawk a. An bathroom zau zetah chuan tuilum sa tha ver vawrin ka inbual sar sar a. Ka harh kawkin ka hria. Zanriah kan ei hma deuh chuan, naupang pahnih leh hmeichhe pakhat hi room pakhat atangin an rawn chhuak a. Hmeichhia chu kei aia upa hlek tur vel a ni a. A landan maiah chuan thingtlang mi a nih duh ve hmel viau. 

"Ruati, ei ve mai la" Pa Mapuia chuan a ti var a. 

Ani chuan a lu thingin, "Ka nu amah chiahin a ei dawn sia, ka phei zawk mai ang" a lo ti a. Min rawn melh zawk. A ngainatawm riauin ka hria. 

"Ani hi lângin a rawn kal thin a, a zirna chhunzawm a ngaih tawh dawn vangin a chawl dawn a. Chuvang ania nang kan mamawh tak che" Pa Mapuia chuan a ti leh suam suam a. Ka lo bu ve ringawt. 

Ruati lam hawi leh pahin, "Anih chuan naktukah hlawh lak pahin chaw i rawn ei dawn nia aw" a ti zui zat bawk. Nu sangi erawh chuan salad niawm tak a chawk mek a. Ruati pawh chuan eng eng emaw a sawi hnuaah naupang pahnih chu an biangah chuk ve vein min chhuahsan ta a. 

"Abby, Alex, hei hi in u tur a nia. U Hluteii a nih hi. Ani hian U Ruati tih ai kha a ti tawh dawn a, a thu awih tur aw" Pa Mapuia chuan a fate chu a hrilh malh malh a. Kei pawn chaw ei siam pahin ka va nuih ve var var. Abby chu a nu ang lo takin a sam a dum hlap a, a dar chen vel niin a ngil siau bawk. Kum 6 vel a nih ka ring. A hmelthain a fin hmel tawp. A nau Alex erawh a sam a kir thung! A chum buang a, a at hmel, a hmel erawh a thain a duhawm zawk mah. Kum 4 a nih ka ring. Ka rin dan chu a lo dik chiah. 

Zanriah ei lai chuan Nu Sangi chuan ka tihtur vel chu a sawi ta a. 

"Zing dar 7:30-ah breakfast kan ei thin a. Ei khamah naupang school kal tur siam, kan chhuah hnuah insuk leh inchhungkhur tihfel a ni mai. Zanriah tur hi chu tlema tuihnai leh chikim kan duh thin a. Bathroom a tawp tur a ni lo va, toilet a hing tur a ni hek lo. In a fai bawk tur a ni. Insuk ro tawh nawh ngai chu nawh nghal zel tur a ni bawk. Chuan, Inrinni zingah bazar a ngai thin bawk ang aw. In kan chhuahsan vek zel dawn a, mi rinawm i nih ka beisei" a ti ta fak fak a. A sawi dan tur ni tho mah se; dawnsawn a nuam fahran lo. Ka ngawi reng tawp. 

"I la hriat loh takin i nu Sangi hi Johnson College-ah Lecturer a nia. Kei hi MBSE-ah sawn ka thawk bawk.. I in angah ngai tawp la, inthlahrung lo la, nuam i ti a ni mai. Mikhual han tih hluak hi kan thiam vak lo va. I awm thiam leh thiam loh a ni deuh mai aw" Pa Mapuia chuan a lo ti dam thlup thung. 

Nu Sangi chuan, "Ka fate hi hauh leh vin ka phal lo va . Kutthlak phei chu ka chhuak ang tihna tluk a ni. I lo hre dawn nia" a ti chang leh fak. Ka chungah a lungawi lo emaw ka ti hman hial. Mahse, a mizia ve reng pawh a ni thei. Hmeichhia hi chuan thil kan man chak riau a, Nu Sangi pawh chu a mizia tur awm ka man thiam ruak mai. Nu inla ve tak, induhtawk tak, changkang ve tak, awmpuite nena innel taka chenho duh lem lo, mi invawng leh strict tak a nih ka ring ve tawp. Pa Mapuia erawh tha leh dam thluam, nupui fanaute duat thiam tak, mi dang laka that chhuah duh mi a nih ka ring. Chaw pawh ka rin aia tam ka ei. Chawhmeh a tui bawk a. Ruati kha eisiam thiam tak a nih ka ring. 

Zanriah ei khamah ka che nghal zung zung a, Pa Mapuia'n min vil thung. An thil dahna neuh neuh ka la hre ve lo nen, a tihzia hle. Naupangte erawh tv an en a, nu Sangi chu roomah a awm char charin ka hria.. A inbual pawh a ni maithei. 

Ka intihfel meuh chuan dar 8 a ri thuak tawh a. Mut mai ka duh. Ka chau ve deuh bawk nen. "Ka mu tawh mai dawn aw. Tihtur a la awm em? " tiin Nu Sangi te nupa, Living room-a thute bulah chuan ka ti a. 

En pawh min en lem lo chuan, "Aw.. Zing dar 6-ah thawh a ngai aw" Nu Sangi chuan a ti a. Ngawi rengin ka kalsan a. Ka room-ah chuan mu mai lovin ka thawmhnaw te chu ka thlep fel leh te te a. Phone tal hi chu neih ve a ngaiin ka hre ta. A khawharthlak dawn em mai. Ka chau bawk a, ka mutui phian mai. Thawh hai ka hlauh em vangin dar 5 -ah ka harh kur tawh. Alarm set tur ka nei ve si lo nen.. Ka mu meng reng a, ka ning ta bawk nen, ka tho ta nge nge a. Tui ka lum a, eirel ka buatsaih ve ta mawlh mawlh a. 

Ni 3 lai ka awm takah chuan ka bo em em tawh lo. Nu Sangi'n vawi li vel min vin that that hnuah chuan thil a awmna tur hmunah ka dah ve chat chat tawh a. Hunbi neiin ka che thiam tawh bawk. Naupangte erawh chuan min la nel lutuk lo va, mahse, ka lakah an chimawm lem loh. Naupang tha leh enkawl nuam tak an niin ka hria. An school kal leh haw lam hi chu an taxi driver hian a hruai mai zel a. Nu Sangi hian scooty neiin, Pa Mapuia erawh motorin a kal thin thung. Chawhmeh siam hi thingtlangah chuan bawlhlo kan lo ngah ve lo bawk nen, mawlmang takin kan siam mai zel a. Hetah erawh telh tur apui a tam a, ka zei tehchiam lo. Inzir chho zel tur ka ni bawk a. Kar khat ka awm champha tlaia Pa Mapuia lo haw chuan, "Hei.. hlute, thil ka lo hawn che a" tiin box hi min pe ringawt a. Ka lawmin mak ka ti bawk si, phur zetin ka hawng sawk sawk a. Phone manto, ka hmang ve phak ang tih pawh ka rin loh hi a lo awm khiau mai le.. Ka insum zo ngang lo va, kei leh kei lo ang takin ka rak ve chul mai. 

.. "Awiii, Pa Mapui, ka lawm lutuk, ka van lawm.. Mahse, a thlawn chuan ka la thei lo. Ka hlawhah cut rawh aw" ka ti a. Ka aw te chu a khur thei hial. 

A nui suk a, "Kan tihtur alawm.. I khua a har thei dawn sia, bakah eng emaw zir nan te a tha alawm. In lam rawn biak duh pawn tihngaihna a awm si lo va" a ti a. A sawi dik khawp mai. 

Nu Sangi chu tui bottle nen a rawn phei ve mek a, ka thil ken a hmuh chuan a meng râng deuh, mahse, inthunun leh thuaiin, "I Pa Mapuia chu a va fel ve. Mahse, a bak beisei awih loh aw" a ti leh hmak a. 

"Awii ka lawm tawp.. Engmah ka beisei lo asin. " ka lo ti ve hliai a. Engmah a sawi zui tawh lo. Keimah vangin an nupa an inhau ang tih erawh ka hlau kher mai. Ka phone thar chu ka han khawih chhin vel a, ka la zei hlawl lo. Abbyi'n min zirtir ve zawk. Mak ka tih deuh chu an unau hi an la naupan nen, phone an nei ve ve a nih chu! Nu Sangi'n, "Pawn lama va infiam ai chuan tihian phone nen inawmtlei rawh se" a ti hmiah a. Mahse, lehkha an zir chhung chuan an khawih bik lo. An mit a ngaihtuahawm ka ti. Tin, mak ka tih leh bawk chu a fate hi hmangaih a intih tehlul nen, ka beisei aiin a faten an ngai lo chu.. Ina an awmho ve chang pawn han inpawma inkuah leh infiam te hi an nei ngai lo. Pa Mapuia zawk hian a chhawnchhaihin an infiam zawk a, Nu Sangi hi chu nalh takin awmhmunah a thu tawp zel mai. Khawpui nu ho awmdan a niang, ka hrethiam ve lo. Piteii takngial pawh kha sualin thatchhe viau mah se; a fate chuan an ngainain an ngheng ve reng peih a, a fate eitur pawh a siam ve mai zel bawk. Nu Sangi erawh ka awm hnuah vawikhatmah a fate ei leh in tur a siamsak ka la hre lo. An han tlei loh deuh chuan cheng za te a pe tawp a, thil va lei ru a ti mai a. Han thlema an duat hliau hliau a nei lo khawp mai. Naupang te chu ka lo lainat deuh thin. 

Phone ka neih takah chuan Putea te pawh ka be pawp ve thei ta a, a hma khan Pa Mapuia phone atangin vawi hnih vel chu kan inbe ve. Putea te atangin ka thiante number ka nei thei bawk a. Tiang chuan ka phone thar chu ka hlimpui chho ve mek a ni. Hun a kal ve zel a, thla khat lai ka han awm ve takah chuan naupangho chuan min ngaina ve tawh khawp mai. Kei pawh ka tlangnel chho ve zel a. Zingah hian ka tho hma thei bawk a, chhuna ka tih tur angte pawh zingkarah ka ti vek hman zel a, in chhung lah a bal em em ngai si lo va, tihfai a harsa si lo. Chhunah hi chuan ka leh awl phian zawk a. Phone ka khawih nasat phah. 

Tlai khat chu Nu Sangi lo haw chu roomah lut nghalin, reiloteah a rawn chhuak leh nghal a. A thawmhnaw a va thlak niin ka hria. Chokaah ka lo awm a, "Hlute, i pa mapuia bulah, a lo la haw lo i lo ti dawn nia. Chhuah lawkna tur ka nei a" a ti sawk sawk a. Chhan hman lohin a tlan chhuak nghal, kei lahin enzui nachang ka hre lem si lo. Eng emaw tak hmanhmawhthlak tak a awm a nih ka ring ve tawp. Tlaia Pa Mapuia rawn haw bulah chuan a lo la haw loh thu ka lo sawi ta ngei a. Engmah a sawi lo. Lungawi lo hmel pawh a pu hran loin ka hria. Zanriah kan ei thlengin Nu Sangi chu a rawn haw lo. Pa Mapuia lahin a call hek lo. 

Zanriah ei khamah Abby te lehkha ka zirpui a, Abby hi chu thiam thei tak a ni, Alex hi a buţu deuh a, a zir rei peih ngai lo. Thlema tlawn deuh phawt a ngai thin. 'Ate' tiin min ko mai a, ka duhdan tak pawh a ni zawk e. Dar 9 rik nan 10 mins a la awm tihin naupangte chu ka tifai a, mu turin ka buatsaih tan. Khuma ka muttir lai mek chuan, room lehlam Pa Mapuia te room kawngkhar chu na zet hian a intheh hawng thuai mai a. Kan phu zawk nghe nghe. Thinrim awrawl kan hre zui ta zat bawk. Nu Sangi aw ngei hian, "Ka ning lutuk. Min ringhlel dawn tih ka hriatsa vang a nia, ka hrilh duh loh che. I hneawm aw, hetia inrinhlelh ringawt zel mai" a ti hlaih hlaih a. An nupa tualthu a chhe deuh tih ka man thiam mai. Alex zawk chu a rawn thu chhuak hlawl a, "A u, anu te an inhau leh tawh a mi? " a ti ta reuh a. Thla khat dawn ka awm tawh a, an nupa inhau ka hriat ka vawikhatna a niawm e. 

Abby chu a fing fel ka tih tawh kha, a nau hnunga va kuah pahin, "Hau lo. Muhil rawh" a ti dam thlap reuh a. Kei pawh chuan, "Nia, muhil tawh ru le.. " ka ti ve vat a. Alex pawh chu a mu ve leh mai. Mahse, Nu Sangi awrawl ring zet kan hre leh zat. 

"Rinpuia nen kan kal lo, a tel ve lo. Engvangin nge a tel ve ngawt ang. Malawmi nu kan râl ti na mawlh mawlh a" a ti leh hmuar hmuar a. 

"A tel tih ka chiang" Pa Mapuia chuan a ti zawi sup. Thikthu vanga inhau an ni tih ka hre leh nghal mai. Ka chhuak ngam mai tawh si lo, naupangte roomah chuan ka thu ve ta reng ringawt. Lo ngaithla ru te pawh ka ang dawn alawm le. 

"Tel pawh nise eng nge? Eng nge i tih chuan ang a? " cho zet hian nu Sangi chuan a ti leh a. 

Nidanga a tawng dan aiin a danglam tlatin ka hria, chu ka hriatna tinghettu atan chuan, Pa Mapuia chuan, "Zu lah hi i in fo a, pasal fanau nei i ni tih hi i theihnghilh thin em ni? Zahpuiawm lutuk" a ti ta a. Ka lo chhing sawk. Nu sangi chu mak ka ti hle. Zu êm chu a in ka ring lo a nia. Abby beng ka hup ringawt. Naupang hriat atan chuan a rum deuhin ka hria a ni. An inhau zual zel ang tih ka hlauh vangin ngam leh ngam loin thawm ka nei ta tawp a. Ka va chhuak a, Nu Sangi chuan min lo melh rum ngang mai. 

"Eng nge naupangte roomah chu chen chen i tih a? " a ti nghal tâwng a. 

"Ka.. Ih, ka timu a, an harh leh sia. Ka awmpui lawk a" ka ti bah nuaih a. 

"Awmpui i nih hre reng rawh" a ti nghat a. Ka chunga a tuan ta daih chu ka hrethiam vak lo. Pa Mapuia chuan, "I zak thei lo e a. Eng nge ani hian tihsual a neih a? Roomah lut rawh. Zingah kan sawi tha ang" rum helh hawlh hian a ti ta a. A chhang ngam tawh lo nge a lut ve ta mai a. Ka thaw huai mai. Nem deuh hian, "Ka fate chuan engkim an hria em? " Pa Mapuia chuan a ti a. Dawt sawi ai chuan tiin ka bu nghat. 

A rum nghut a, "A pawi thin a ni. I Nu Sangi hi chu tihngaihna ka hre tawh lo" a ti a. A lungngaih hmel hle. 

"A tha vek mai ang" ka ti ringawt. Ka room lam ka pansan ta a. Ka muhil har khawp mai. Pa Mapuia te nupa, nupa inhmeh em ema ka hriat te pawn buaina ril tak an lo nei ve reng ania! Mihring hi kan inchenchilh phawt loh chuan kan pawnlam nun hi chu intehna atan a lo tling lo tawp mai tih ka hmu chhuak. Pa Mapuia chu ka khawngaih, a zaidamin a nupui fanaute a duat si. Hetiang pasal tha lutuk te a han lerhsan thei chu Nu Sangi chuan a timak ka ti khawp mai. 

Kha mi hun atang khan an innghirngho ta zauh zauh a. Nuam lo hi ka va ti thin tak. An inhauh apiangin Nu Sangi hi ka chungah a tuan thin bawk si. Ka chhanglet ve ngam bawk si lo. Vawi khat phei chu ka bawnghnute chhuan a liam hlauh mai a, Abby sam ka phiarsak lai tak a nih vang a ni. A rawn kal tawrh tawrh a, arsi leng chuai khawpin min beng a. Naupang awm lai lehnghalin, ka pai nawk nawk mai. Ka zakin ka rilru a na ngang mai. Mahse, engmah ka sawi hmain Pa Mapuia'n thupha a chawi mawlh mawlh a, amah leh naupangte avang chauhin ka insúm a ni. An awmpui pawh ni ila, kut thlak theihna hi a neiin ka hre lo. Khata tang phei kha chuan kan inbe ngai mang lo, tul tawpah lo chuan kei pawn ka be ngai lo. Inleng kan neih erawh chuan ka chungah a thain a fel thei em em a. Hlute hlute a ti deuh reng a, inleng hi nei deuh reng ila ka ti thin khawp mai. Vawi khat erawh ka insum zo lo, a office bang hi Abby'n a lo bawh nghal chawt a, "Nu, hei fai ber lawmman ka dawng asin" tiin a lawmman dawn chu entir a tum a. 

A fanu tukhum sama thamin an ep chiah thutthleng deng dawtin zu han nem a! Ka thinin a tuar ngang lo va, "Naupang a nih hi.. " ka ti vin tuar. Abby chu ka va buaipui nghal vat. Thinrim namên loin a thinrim ta a. "Awmpui mai maiin awrawl vinin min bia a maw? " tih leh a high heel-a min rawn vawm a rual nghal a, ka lo awmsawn hman avangin min fuh lo hlauh. Abby ţap bawk, Alex lah a u tah vang nge a lo tap ve nghal zat. Kan ri ta nuai nuai a. Pa Mapuia a rawn thleng ve chiah. Thil awmzia a han zawt a, "He chhiahhlawhnu hian awrawl vinin min tawngkhum anih chu! Zanin la la hian chhuak nghal rawh se" a ti nghal tawn tawn a. Ka lo îp chawih. 

Abby ţap chu thlemin, "Bawihte, bang tawh rawh. Ngati nge? " a han ti a. Abby chuan inhnit hlap hlap chungin, "Papa, ih, anu hian min nem vak a, ka samah a ţhâm a. " a ti ta a. Pa Mapuia chuan Abby leh Alex chu an rooma hruai lut turin min mitmei a. Ka luhpui ta vat. An beng ka hupsak nghal bawk. Mahse, an hre phak tho maithei. Nu Sangi biang ri thlawp ka hriat chuan ka chhing sawk. Ka khur der der bawk. Chutah awrawl fiak leh thinrim tih hriat lutuk hian Nu Sangi chuan, "I chhiahhlawhnu thlavang hauhin maw kut min thlak a? " a ti ta a. Ka tlanchhuak tep a ni. Abby leh Alex chuan min kuah bet tlat bawk si, ka lainat lutuk. 

Pa Mapuia chuan thinrim aw khur dar dar chungin, "Sangzual, Abby leh Alex hi i hrin ngei i fate an ni asin. Hetiang em ema i hmangaih lo thei hi ka hrethiam thei lo. Tunah hian duhthlanna ka chhawpsak ang che. Kan fate hi i enkawl peih lo anih chuan hetah hian awm ve rengna chhan tur i nei lo. I haw thei ang. I duh i thlang dawn nia, kan fate nge he in chhuahsan.. A chiang em? " a ti ta a. Nu Sangi a ngawi hmak. Zanriah pawh a rawn ei lo. Pa Mapuia pawh ka be ngam lo, biak a chakawm bik lo bawk nen. Khata tang phei kha chuan boruak chu a inmúng chho nasa hle. Chhuahsan mai pawh ka duh ta rum rum mai. Mahse, naupangte chu ka khawngaih bawk si.. Pa Mapuia pawh a rilru a hah a ni tih hriat takin a pawr fap mai. 

Sundayah pawh hian keiman naupangho ka inkhawmpui mai thin. Nu Sangi chu a che bawn deuh deuh si a. Zu pawh zanah chuan a rui deuh phât zel. An pa chuan a enliam mai mai tawh niin ka hria. Mahse, Sunday zingah, "Hlute, vawiin chu i buai deuh dawn aw. I nu Sangi nu ten chaw an rawn ei dawn a. Chawhmeh chu i duh ang ang i siam dawn nia.. " a ti a. Eng emaw tak a thleng dawnin ka hria. Ka lo hlauthawng ve ringawt.. 

(Duhtawk rih ang aw. Paper check tur ka ngah sia maw.. A ngaihnawm in tih zawng a ni lo maithei. Mahse, ka la ziak rih lawk dawn 😂