Tidamtu kut 2

TIDAMTU KUT.. (2)

Ziaktu : Toni Râlte

Leiletah chuan nilengin kan tihtheih ang tawk tawk kan thawk ve a. Chaw pawh kan ei hnem khawp mai. Chawhnuah putea kan pui leh zuai zuai a. Hna a laklawh deuh avangin putea chu a tih ngai loh deuhin a riak tlang dawn a. Piteii te pawh a hrilh tawh a ni. Dar 3 bawr velah Hriati nen chuan kan haw hnak hnak a. A hla lem lo bawk a, dar 4 rik hma deuhin in kan thleng. In ka thleng chu a lo reh thap. Ka rin dan sa a ni bawk a. Mak ka ti hran lo. Hriati min chah ang ngeiin ka inbual fai sawk sawk a. Ka inthlak fel hnuah Hriati te in lam panin ka kal hmak. Chaw ka ei dawn miau a. Ka va thlen chuan a nu chuan min lo be siam siam a. An khawsak a harsa lo ka tih tawh kha. Mahse, an felin a pa phei hi chu term 3 a zawnin VCP a ni tawh a ni. Hriati te hi unau pali niin, an upa ber hmeichhia chuan pasal a nei tawh a. A nau chiah hi phaiah lehkha zirin a awm a. Hriati erawh kan khuaah a la zir ve a, an te ber mipa pawh kan khuaah a kal ve tho bawk. Hriati nu hi High schoolah LDC a ni a, a senior tawh bawk a, a hlawh pawh a tam viau ang. Hriati'n ka chungchang a lo sawi tawh vangin chaw ka va ei tur pawh chu mak an lo ti lem lo. Ka rilru chhungril erawh a nuam chiah lo. Mahse, ka paltlanga ka tawn luih ve a ngai si a. 

"I piteii te chu an lo awm lo ngei ami? " Hriati'n a ti sap a. Ka bu nghat. 

"An chawh ngawt ang, an leng hawn hun chu" a ti a. Kan nui dun ringawt. Hna pawh thawkin chhuak thin mah ila, eirawng lo bawl ve hi an tum ngai eih lo va, chuvanga vawiin tlaiah pawh Hriati te ina chaw ei tur ka ni. Dar 5:30 velah chaw ei kan siam dawn ţan a. Piteii a rawn lut hlawl mai. Thinrim hmel a pu deuh. 

"Ngati nge engmah sawi lo va, mi inah chaw ei i tum? " a ti nghal chiah a. 

"in lo awm si lo va, hrilh tur che u pawn" ka ti ve mai a. 

"Saw.. Eirawng i bawl bawk si lo, a awm ang lo thin em mai" a ti nghal tâwn tâwn a. 

"In lo bawl ve ka ring a. Lalnuni pawn engmah a ti awm si lo va. " ka ti ve ta ngat a. Hriati te chhungkua a zah ve deuh nge ni, lungawi lo zet chuan a chhuak ta a. Hriati nu chuan, "Zoteii thin hi chu aw.. " a ti vawng vawng a. A thluk dan chuan awmzia a nei thui viau mai. Thil dang sawi tawh lem loin chaw chu kan ei nghal a. Ka eitui ve phian mai. Chaw ei khama kan inthfel zawhah Hriati'n ka note copy pahin min va thlah ta a. Chaw an lo ei ve dawn chauh. Tumah chu be lumlam hran lo in Hriati nen chuan note chu kan copy ta malh malh a. Piteii chuan ân a chak tih ka hre reng. Mahse, Hriati awm lai êma han puah kha a hreh ve a nih ka ring. Hriati a haw chiah a, a puakkeh ta chiah bawk. 

"I hrawk kan chawm a, i zirna thlengin, eirawngbawl leh chetah te min phút ve ngam tihna mi? A zah pawh i zak na nge? Bakah sawta chaw i ei khan min timualpho tih i hria em? " a ti nghal hlawk hlawk a. 

"Nilengin Lalnuni hian eng nge a tih a? " ka ti ve ta ngat. Hriati'n chhunah min fuih nasa bawk a, chuti maia tlawma dawihzep ka tum tawh bik lo. 

"Lalnuni pawh chu i va phút ve a. I zak lawm ni? Ani te chu englai pawn a che reng alawm.. Bakah kan awmpui a ni lo va, min rawn awmpui zawk a nih hi" a ti a. Ka nui tawp. 

"A rawn awmpui che u chuan a va hautak si ve" ka ti ve leh hmiah. Lalnuni chuan min zah bik hek lo, "I va zak lo tak, nuteii chawmhlawm ve mai i nih hi" a rawn ti a. 

"Ehe! Putea chawm emaw ka lo intia, piteii chuan engtin nge min lo chawm ve a. Hna a thawk ngai bawk si lo va" ka lo ti ve sak. Ka chezia leh ka awmdan danglam ta viau chu mak an ti tih ka hre reng. Ni e, a hma chuan engtin pawn min hau se, ngawih ka chuh zel a, an ânhla zawng zawng ka tuar dai thak thin. Mahse, ka harh ve tawh. Hriati sawi ang khan ka dawhtheih em vangin min zuam tawh a, an chhiahhlawh ang chauhin min en tawh, chu chu nakin zel atan thil tha a ni lo. Chuvang chuan ka intihhuaisen ve hi a ngai tlat a ni. 

"Ve khanglang a che. He ina i la awm theih chhan hi keimah vang a nih hi.. Ka duh chuan ka hnawtchhuak thei che tih hre rawh" piteii chuan a ti a. 

"Ee..! I ngam phawt chuan min hnawtchhuak rawh. Putea thu thu a ni e. He in hi putea in a nih hi.. Ve khanglang zawk a che" ka lo ti hmiah. Chuti taka ka lo tawng thei ve ta chu kei pawn mak ka ti. Rapthlak te pawh ka inti deuh reuh. Mahse, ka inup rei ve tawh êm a. Ka puakkeh ni maiin ka ngai. 

Ka ding a. "Chuan pite, ka sawi leh ang. Naupangchhia kan ni tawh bik lo va, i duh duha i tirh kuala i chhiahhlawh anga awm tur ka ni bik lo tih hi hria la, Lalnuni pawh he inah putea thawhchhuah ringin i lo awm ve a. I tihtheih tawk hi chu ti ve rawh. I thatchhe mah mah. Zing lamah thleng sil la, keiin tlaiah. Chuan, i thawmhnaw te hi nangman su ve tawh ang che.. Ka suk sak tawh dawn reng reng lo che. Ngaihzawng i nei ngam tawh a, in chhung chet hi chu i ti ve tur a ni" chang fek fawkin ka ti ta a. An pahnihin min melh reng ringawt. Ka huaisenzia an hria nge, min chhang miah lo. Tiamthu sawi tur nei miau hek lo le. 

Khami ni atang khan kan in chhunga ka dinhmun chu a danglam ve ta hlek a. Mahse, eirawngbawl leh in chhung chet hi chu ka kuta la awm reng tho a ni. Pawi ka ti lem lo, min hnuaichhiahna tawngkam ngeiawm tak tak kha a zia ta deuh a, chu chu ka tan a thawventhlak ber zawk. Putea pawn boruak danglam deuh chu a man thiam ve nghal mai. Dik tak chuan mi thenkhat hian an lo hrilh ve nawlh zel a, a fa ang tluka min duattu a lo ni ve thin bawk nen, piteii bulah pawh a thuphungin Lalnuni chu che ve tura hrilh turin a nawr ve thin. Mahse, a nupui tawngkam nalah a tawlhthlu leh nge nge zel a. Inla pa tak e ti lo chuan a thaibawih riau mai a ni. Mahse, ka laichin leh thisen zawmpui ka neih awmchhun a ni a. Ka demin ka haw ngai lo. A hnathawk nasa lutuk te hi ka khawngaih takzet zet thin. A kum phu lohin a lang upa reng bawk a. 

Tichuan, hun chu a kal ve bek bek reng a. Ka chunga sual han chhuah chiam an ngam tak bik lohah chuan kei pawh ka tha ve leh tho. Sual taka dolet kher kha tul ka ti bik lo a ni. School pawh ka la kal tluang ve zel a. Ka nun hlim chho ve tan chuan ka taksaah pawh rah a nei thuai a. Love letter ka dawng ka dawng mai. Mahse, tumah ka chhang let ngai lo. Ka zak! Zirlaiah rilru ka pe nasa zual a, a thiam thei ber pawl ka ni ve hial a ni. Zirtirtute pawn min duhsak ve khawpin ka hria. 

Chumi kum Christmas chu Lalnuni pawn kan khuaah a hmang a, a chhan pawh a bialpa nena hman a duh vang a ni. Kan inah an ri luih luih reng a, kei leh Hriati erawh inkhawm piah lamah kan zai khawm ve deuh reng a. Kum hlui thlah zanah erawh ka rin phak bakin thil a thleng a ni. Hriati'n, "Kan inah ar kang ve ang u, Sangzuala te nen" a ti a. Sangzuala chu pawl 8 an nih lai atanga a bialpa ve a ni. Kei leh Hriati, Puipuii bakah Sangzuala leh a thianpa Tepuia te nen kan kang ho ve ta lat lat a. Zan lai inkhawm erawh kan va kal hram. Zing dar 1 bawr velah arsa chu kan kang hmin ve ta hram a. Thingpui nen kan eiho ve ta liam liam a. Mahse, chutia kan ei ho lai chuan kawngkapui chu kik satliah mai ni lo a chum hian an rawn chum a. Hriati nu pawh a rawn harh nghe nghe. Hriati'n a va hawn chuan, Putea hi meng sen rúm chungin a lo ding reng mai a. Mak ka ti ngei mai. Mi rawn pan ding nghal a, "Vanlalhlupui, rawn haw nghal rawh. Naupang chhia emaw tih lai chein mipa i lo tawmpui ngam a maw? " tih leh ka sama min phih a rual nghal a. Ka hamhaih luatah tawng nachang pawh ka hre lo. Hriati nu chuan, "Khaih khaih! Rama, engtizia nge? Hluteii te chu hetah alawm an awm char char le.. Khatia i rawn tih ngawt mai le" zaidam deuh hian a lo ti a. 

"Rawn haw mai rawh se.. Kal rawh" a ti pawr hlur a. Ka putea hi a thinrim khãt viau a, a thinrim ve chhunah hi chuan ka hlau ve khawp mai. Ngawi rengin kan inzui chhuak ta a. Kal kawngah pawh engmah a sawi chuang lo. In kan thlen chuan an lo la meng thap a. Piteii chuan min lo melh rum ngei mai. Engmah thil awmzia ka hrethiam lo. 

"Tepuia nena sikul tlanga in tawm dun kha hei Lalnuni'n a rawn hmu che u a. Mi hriat tam hmain i putea a hrilh a, i mualpho lo mai mai zawk anih kha.. Zaikhawm chhuanlam hian i chhuak teivet a. I mipa râwp hiam huam vang lek lo niin.. I nu siar i nu siar" a ti nghal tâwn tãwn. Chu kher kher chu mak ka tih luat vangin ka ding khawng lah. Lalnuni chuan hmai pho lah chungin min lo la melh zui. 

"Engtin nge hetiang dawt chiang lutuka min puh theih a? Lo kal ru.. Tepuia te chu va zawt ang u. Hetianga intih hi ka duh thak lo mai" ka ti ve ta ngat a. Ka thinrim em vangin ka khur hlawk hlawk thei. 

An la ngawi thap. Putea chu ka va pan a, "Kal ang. Ti nge sawtah khan i sawi mai loh? Hetianga dawta inpuh hi chu fiah zel tur.. Hawh va kal ang"ka ti ve ta hmiah hmiah a. Putea lah chu a lo ding ve mai bawk a. "Kal ila" a ti nghut a. Lalnuni leh piteii hmela manganna lang chuan ka awm a tinuam hle. Lalnuni phei chuan hlauthawng hmel a pu tawh. 

"A tul mai mai lo, kan mualpho thui mai mai. Lalnuni hian dawt a sawi lul lo vang. A hmu a nih chuan a hmu a ni mai" piteii chuan a ti a. 

"Lalnuni pawh rawn kal ve raeh se, khawi laiah nge kan tawm duna min rawn phawkna lai chu sawi chat chat se, zanina kan kalna hmun ka sawi ve chat chat ang. Zaninah hian a themte pawn School tlang ka rap lo ve. A bialpa nen an tawm dun an phawk zawk a, Hriati nau ten an sawi pawh ka hre reng. Chumi mualpho hlau chuan min puh kual a tum a nih hi.. Lo kal rawh, Lalnun, i va zawt ang u" tih leh kaih thawh ka rual a. Hlauh engmah ka nei tawh lo. Ka thinrim ve êm a ni. 

"I va huaisar reuh e, dawt sawi lah chu i lo thiam phian a" Piteii chuan a rawn ti leh a. 

"Nang aia dawheh leh mi rel peih kan khuaah an awm mi? I u fanu hi i hrechiang lo mai mai zawk a ni. Miin an sawi dan i hre duh em? Tlang sum an ti.. Tlang sum" a auin ka au a ni ber. Putea lah chuan min khap a tum bik miah lo. Lalnuni chuan dawih aw zetin, "I va dawthei tak, i nihna kha min puh tum reng reng suh.. Tuman chutiangin min sawi lo" a lo ti a. 

Keia thinrim puakkeh tawh si chuan sawi loh tur tur te pawh ka sawi ta ve ang. "Thla hmasaa U Zova te nen in chakai chhit pawh an tih rawn che ni lawm ni? " ka'n ti mai a! Tlem chuan ka tîm deuh naa, an sawi miau sia lawm le.. Putea chuan Lalnuni chu a melh ta khui khui mai a. Lalnuni lah a kimki hmiah tawh. Piteii sawi tur hre lo, hawihil chu nuam ti zetin ka lo en ve thung. 

"Lalnunthar, Hluteii sawi hi dawt a ni lo. I chanchin hi ka hre lo emaw ti suh. I nuteii vang chauhin ka la ang chhuak lo mai mai a ni. Hetiang mi hur ka awmpui duh hleinem. Kum thar atang chuan i pite bulah i awm tawh ang. " a ti ta sak sak mai. Piteii a rawn vir ve leh zak. 

"I zak thlawt em? Ka fanu a nih hi. I u fanu pawh kan awmpui thei anih chuan ka u fanu kan awmpui theih lohna chhan tur ka hre lo.. Mi hur te chu ti khanglang suh, i u hur hiam huam vanga he nau pawh hi lo piang a nih kha… " tia sawi zawm a tum lai takin a biang a ri thlawrh. Putea'n kut a thlak ka hmuh vawikhatna a ni ang. 

"Vawi khat pawh ka u chanchin hi a tha lo zawngin sawi tawh ngai suh ang che. Nang pawh hi engmah i ni lo, thatchhe rapthlak bawk si, ka fate avang chauha la nei che ka nih hi.. I duh chuan min chhuahsan nal nal thei. Mahse, ka fate hi chu ka ta an ni.. Hluteii chunga i nunrawnzia leh a hahzia te hi ka hai reng reng hleinem. Kam khat pawhin ka hnenah a vui thu a la sawi lo. Nang erawh dawt nen tangkawpin i hek reng a. In awmdan hi ka kham tawh.. I duh leh chhuak la, i thu thu" a ti ta piap piap a. Patlingin thu tawp a sawi a ni bawk a. Piteii pawh a heh a hil deuh nge, a ngawi dâk mai. Ni e, putea hi a zaidam em a, a thinrim mai mai loh vang hian an zuam ve bawk a ni. Dik tak chuan kan in aia nawmsakna hi a hmu dawn lo hul hual tih amah pawh hian a hrechiang ang. An inah va tal tam viau mah se, a nutapa nupui Kan khaw Primary School Headmistress saw a lal ropui si a, inthenin va let leh pawh nise a lal tawh dawn lo tih a hre ve kar a. Chuvang chuan inthen a ngam awzawng lo vang. 

Eng em em thleng loin chumi zan chu kan mu ta a. Kum thar pawh kan chuangkai ve ta. Lalnuni chu School tan hmain a haw a. A chhan ka hre bik lo. A hnuah a thawmhnaw an rawn la ta bawk. A hnua ka hriat leh danin a lo rai reng mai a lo nia! A paa a puh lah chuan, "Kei chauh ka ni bik lo" tiin tan a lo khawh ve tlat si. Falak a hring mai dawn niawm a ni. Piteii zia pawh a zawi chho viau. Kei pawh exam hmachhawn turin ka inpuahchah ve nasa a, ka beisei dan chuan ka pass ve a nih chuan, Lungleiah emaw Aizawlah emaw Higher ka kal ve ang a.. Tih a ni. Kan han exam ta a. Har ka ti lo ve khawp mai. Ka pass ngei ang tih beiseina nen result ka nghak ta a. Exam chawlh chhung chu putea nen ram lamah kan riak lut deuh reng mai a ni. Hlawhfa a chhawr nual bawk a, in lam ai mahin ram chu nuam ka ti fô.. 

Result a lo chhuak a. 1st div-ah ka pass ta. Putea pawh a lawm ve ngang aniang. Kan arpui tui lai a talh a, hlim takin kan ei ve a ni. Ka zir zel dan tur chu kan han sawiho a. Vanduaithlak takin chung lai chuan Putea te fa naupang ber Remrema chu septicemia natna vangin rei tak damdawiinah a awm a, Sum leh pai kan inseng nasa viau. Chumi behchhan chuan Piteii chuan putea rilru a hneh a ni maithei. 

"Kumin chu chawl rih mai la.. Nakkum lamah i zawm mai dawn nia.. School tha pangngai taka i kal ka duh si a, tun dinhmunah chuan i naute an hautak chho ve nen, kan indaih rih ngang lo a ni" tiin Putea chuan ka beiseina chu a rawn hnawtbo ta a ni. Tihluih chiam chi ni hek lo. Rilru dam lo ru tak chungin ka chawl ta rih a. Ka thiante School kal zawm tur ka thlah ni chuan ka mittui a tla ve fap fap mai. Tichuan, chumi kum chu ram hna leh in lam hna thawk kawpin hun ka hmang a. Kohhran leh khawtlangah a rual pawl tawkin ka inhmang chho ve ta bawk. Thian pawh ka neih belh ve nual a, phone ka neih ve loh vangin ka thian hmun danga awm te nen kan inbe thei tawh si lo. Ka ngai thin ngawt mai. Hna ka thawhrim ngaihtuahin Pathian zarah ka hriselna a tha viau a, ka ţhan erawh a kin tawh niin ka hria. Ka tituai chho ve tan a, ka hnute leh mawngbawr lo seprawtui tawk te pawh an awm chho ve nuk mai. Mahse, mipa lam ka la hawi hleithei meuh lo. Ka zak zel. Bakah kan in angah chuan piteii avang pawn tuman min rim lo se ka duh. Min tihzahna tur kha a zawng leh a niawm si a. Ka duh lo. Mahse, min ngaizawng tia sawi theih loh tlangval pakhat, Samuela hian a khat tawka min rawn lenchilh hi a ching ve a. In lamah ka awm tam lo êm zawk a, ka awm chhunah chuan a rawn leng deuh ziahin ka hria. Hriati nen cousin an ni a, a pa hi kan Khaw High School Headmaster a ni. Unau pahnih chiah an ni a, a farnu a nau te nen chuan kan inkawm ve zeuh zeuh. Amah Sama hi chu hmun danga lehkha zira awm bo reng reng a ni a. A rawn haw khat viau, a rawn haw ve ta kha mikhual chan a rawn chang reng a. A hmain ka hriat ngai pawh ka hre lo kei pawn. Ani pawh hian min hriatchian ka ring lo. Min duh aniang tih theih si loh, min duh lo tih dawna min ngaihsak bakah min rawn rim ve zeuh zeuh bawk si chu, awmngaihna tak pawh min hriattir thei lo. Kei aiin kum 3 velin a upa a, tlangval lian lam, ngo vuah mai a ni a. An khawsakin a zir bawk a, a incheina pawh kan khua angah chuan changkang ber pawl a ni. A tawng tam lo em em a, kei lahin sawi tur ka hre ngai bik si lo. A rawn len ve te hian kan titi ngai mang lo. Piteii nen an inkawm daih changte a awm. An khawsak a that bakah tlangval pangngai, nula ten a ruka an ngaihzawn a nih ve miau avangin piteii chuan a be chhe ngam lo nge ni dawn ni, a rawn lan tawh chuan a phur sãrh zel a. Kei tak pawh min be tha thei viau. Nge Sama hi a lo ngaizawng ru ve zawk nge pawh ka hrethiam lo e a. 

Hun a kal a kal a. Kum thar kan chuangkai leh ta hlawl. Christmas kha chu Hriati te nen bawk kan hmang leh a, Sama a rawn tel ve ta bawk. Mi zawng zawngin inngaizawng turah min ngai vek tawh. Mahse, kan pahnih inkarah engmah a la awm lo tih chu kan pahnih bawkin kan hrechiang ang chu.. Kan innel ve ta deuh bawk a. Thian angin kan inkawm ve bawrh bawrh tawh a ni. Kum te a lo thar takah chuan ka zirna lamah rilru ka pe chho tan a. Mahse, ka sawi ri ngam chiah lo. Anmahni lamin sawi an tum bawk si lo. Board exam te an han zawh hnuah, a nih nih ni mai ang tiin Putea bulah ka sawi thawi ve ta tawp a. Mahse, "Hlute, kan chhungkaw dinhmun i hria a. Nang i awm loh leh daih si chuan i naute hi engtin nge an rawn thanlen ang? An nu ve tehlam hi tihngaihna a awm si lo" tiin Putea chuan min chhang ta daih! Ka beidawng ta vawng vawng mai. Putea te hian fa pathum mipa pahnih leh hmeichhia pakhat an nei a. An upa ber Lawmkima, kimkim tia kan koh hian pawl 4 a zir ve dawn mek a. A dawt chiah Atea hian pawl 3,an te ber Remremi hi pawl khat a ni ve bawk. Chutianga la buchip leh la te an nih vang chuan, putea thusawi pawh kha a dik lohna a awm hran lo. Piteii hian a ngaihsak lo chu ka ti dawt ngam lo va. Rún dalah hian a pawm ve mai mai nia hriat chang ka ngah. A bual leh an home work bakah an ei leh in thlengin keiin ka khawih vek tihtheih a ni. A nel pawh min nelin, min ngaina reng bawk a. Atea phei chu ka bula a mutna a rei tawh. Kimkima hi chu an duat ve deuh bawk a, a upa ber e ti lo chuan a nute bulah Remremi nen an la mu a ni. Ú ang tak takin min en ve bawk a, kei pawn ka hmangaih. Anmahni vang chauha thinrim loh chang hi ka ngah ve mai. An nu hian zir phei se chuan ka duat lehzual ngawt ang. Chutianga ka zirna kal zel tur dan chah a nih tak si-ah chuan, ramhna bawk ka thawk leh ta a. Mahse, Putea huan leh leilet a puitling chho tawh bawk a, ka hah em em lo, a thawhrimna rah a seng chho ţan dawn a nih hmel e. 

Tichuan, zirna chhunzawm ta lo chuan a tul apiang ka thawk ve ta mawp mawp chu a nia. Vui pawh ka vui peih tawh lo. Ngaiah ka nei chho ve mai bawk a. Nuam pawh ka ti chho ve mai. Sama nen khan min la dem bel zel naa, a zirna lamah a liam leh tawh vangin mipa dang min rawn rim an awm ve ta zeuh zeuh. Putea zilhna angin tu pawh ka be tha ve mai a. Mahse, mitmei ka hmuh ngai lo. Zep loh chuan, mipa lakah hian feelings ka nei ngai miah lo! Chu chu thil pangngai a ni lo tih pawh ka hrethiam hek lo. Ka nih dan ang angin ka nung mawl ve tawp a ni ber mai. Hun a kal zel a, Aizawl lama mi awmpui tura kal turin piteii'n min nawr ta kha a nia.. 

Zep thu a cheng lo, Aizawla awm te chu thil chakawm tak a ni ve reng reng a, mahse, mi awmpui ang zawnga va awm chu a chakawm hran miah lo. Piteii chuan, "A khawhawi te pawh a zau ve ang a, thil nihphung hriatna atan pawh a tha alawm. Hetia awm dual dual ai chuan sum tlem azawng a lo thawhchhuah bakah khawpui mi pasal te pawh a hmu ve mial maithei a" tiin putea a kar a. A sawi hi a dik lo hran lo. Mahse, kan khuaah hian ka lungawi tawk viau tho asin le.. 

Putea berin pawi a tih loh bakah min nawr ve deuh avang chuan, naupang tak chungin Aizawla ka hringnun va hmang ve tur chuan ka inpuahchah ta a… 

(Hun awl ka va ngah thin lo em..