Tidamtu Kut 11

TIDAMTU KUT (11) 

Ziaktu: Toni Râlte

Pa Mapuia chu ka duh aiin a hmanhmawh. A fate mitmei hi ka veng si. Tin, thil thleng thei hrang hrang ka ngaihtuahin ka awmna pa han ngaihzawn ngawt chu mawiin ka hre lo. Amahah chuan iaina tur pakhatmah ka nei lo. Chutih a hnêkin, ka muthmuna ka suangtuahna kawltu a ni fô a, ngaihzawng ka la neih mang loh avangin han dream vak dan erawh ka hre lo. Remruati ka an vang chauha min duh niin ka hria. Tin, a faten min ngaina em em a, a fate a hmangaih em vangin min ngaina ve pawh a ni thei. Kan khaw hoin hria se engtin tak ngai ang maw? Tin, Putea nen kan inbiak leh pawn Piteii te chu bungrua la turin a ti a. Mahse, piteii chhungten ngaihdam dilin amah piteii ngei pawn ngaihdam a dil a niawm e. Kei chuan, "In inngaihdam tawn theih chuan chu tluk chu a awm lo. Kei chu kei ka ni. I fate hmakhua tur ngaihtuah rawh, nu chu nu nge nge an ni thin ania" ka ti ve tlat a. Amah Piteii ngei pawn ngaihdam min rawn dil avangin kei chu ka dam titih. Dik tak chuan ka putea fate nu a nih vangin laina anga ka ngaih loh theih loh chin a awm ve a. Ka lakah sual hle mah se; tunah min tiduhdah phak tawh chuang lo va, keimah vang zela an buai ka duh hlawl lo a ni. Putea pawh a inngaihtuah fe hnuah, "Tun ţum chauh" tiin chance a pe leh ta kha a nia. Piteii pawn a nun a sim ngei ka beisei khawp mai. 

Pa Mapuia'n Hriati bulah, "Hei Hluteii hi a dam tawh bawk a, engkim a enkawl fel vek thei bawk nen, thla thar atang chuan rawn kal a ngai tawh lo vang" a tih ni chuan nuam lo ka ti angreng. Hriati hian kherhthluk a tum nasa ve bawk si. 

Nui lui tih hriat zetin, "A tha alawm.. " a lo ti a. Kar khat vel hun a la nei a. Hman tangkai a tum ngeiin ka ring. Nu Lawmi lah chu a hma zawnga rawn leng lut vak ngai lo kha, a rawn lawr chhen a. Pa Mapuia awm loh lai phei chuan, an pahnih chuan mei nei deuh deuhin min tawngkhum thin. Engahmah ngaih loh ka tum thin naa, ka la naupang vein mi fel famkim ka ni bik lo bawk nen, han chhan ve fawk chang chu ka nei thin. Ni khat pawh Abby te school kal tur ka bye bye liam chiah tihin Nu Lawmi chu a rawn lang nghal a. Tukthuan kan ei kham deuh chauh a ni bawk a, thleng erawh ka sengfel tawh a. 

In chhung a rawn luh rualin, "Hriati, awm lo ta la, thleng saw sil a ni har awm. Tun laiah thleng sil loha awm vum thúr te hi a zahthlak. A thingtlang e" a ti nghal ngawt a. Hriati hian thleng a sil thatchhiatzia a hre lo mawni. Ka ngei ve deuh a, "Hriati'n a sil ngai hleinem" ka ti ve hmak a. 

"Ee..! Awmpui kumhlun zawk chuan i awl hneh viau a nih chu.. Awmpui nghet ho hi chu an fel thei ania.. " a ti leh kher a. 

"Nia, a thu pawh ka thu" ka ti ve leh hmiah bawk. Pa Mapuia"n pawisa min kawltir ngam hmiah tawh a, in chhungkhur mamawh engkim hi ka kuta tla a ni tawh a. A thu pawh ka thu ve ang chu. A chang chuan ka vanneihzia hi ka hrethiam lo lek lek zawk thin. Thingtlang nula mawl ve tak kha thla tlemtê an inah ka awm a, an lainat zawng ka lo ni kher a, Abby ten min lo ngaina bawk nen. Ka tlatlum chho ta êm a ni. Tin, tawhsual ka han tawk ve kher bawk a, kha khan anmahniah nghawng a nei lian êm bawk a ni. 

Thleng chu ka sil bawrh bawrh a. Hriati leh Nu Lawmi chu an titi mawlh mawlh a. Ka ngaithla hran lo. Ka thleng sil zo chu Hriati chuan, "Thingpui lo lum teh" a rawn ti a. Ka nui tawp. 

"Ka peih lo" ka ti a. Ka pindanah ka lut daih. Nu Lawmi'n ring zeta, "Aia upa zahna a va tlachham ve" a tih chu ka hre hman. Ka khi sak. An ni tirh kual mai mai tur ka ni lo tlat. Hriati mizia hi mak ka ti tawp thei lo. Pa Mapuia awm lai chuan min zah deuh ang te hian a awm thiam a, Pa Mapuia hriat phak loha mei nei deuha tawng dan a hre bawk si. Mahse, Pa Mapuia hian a hawi lo ve bawk si a, a chumi tuar awmngaihna hre loah ka ngai tawp. Chumi ni pawh chuan Nu Lawmi te inah an inzui phei a. Pa Mapuia rawn haw hun awm velah a rawn phei chauh. Sual ka chhuah ve teh ang ka ti a. 

"Hriati chu i haw ta daih emaw ka tia.. I bo nileng sia" Pa Mapuia hriat lai chuan ka ti ve ngat a. A hamhaih deuh, ka tih ngam a rin loh vang nge a rawn haw confi êm a. 

Pa Mapuia chuan, "Khaw nge i kal a? " a lo ti ve bawk a. 

"Aa.. U Lawmi te saw puih an ngai ve sia, ka va pui ve lawk a. Hluteii a awm tho bawk a ka tia" a ti niah niah a. Inthlahrung awm deuhin a awm a. 

"A nih chu mawle, thla a la ral lo naa, puih an ngaih viau chuan va pui rawh. Hlawh pawh ka pe nghal mai ang che. An ni saw an buai ve thin bawk nen.. Naktuk atang chuan lo kal a ngai tawh lo vang aw" Pa Mapuia chuan a ti ta mai a. Hriati hrilhhaizia chu aw.. Nuam lo ka lo ti letling. 

"Aa.. A ngai lo, puih an ngai tawh hleinem. Tun thla chu ka awm tling a, ni 3 bak a ngai tawh hleinem" a ti nawk nawk a. Pa Mapuia chuan thinrim hmel a pu hran lo. Ka rindanin Nu Lawmi te chuan inthenawm reng reng an nih vang leh Hriati te nen an inchhun vang chuan chutianga ti chu a ni zawkin ka ring. Engmah a sawi leh tawh loh vangin Hriati pawh a tukah a rawn kal leh tho. 

Vauna kha ka la tawk leh rih lo va, ka ngaichang deuh rún a, ka awm a nuam tak tak thei lo. Court ni a lo thlen chuan Pa Mapuia'n min kalpui thei hlauh a. Ka pi leh pute pawh an lo chhuk ve leh a, mahse, Court-ah an rawn kal ve lo. Ka zâmin ka confi hleithei lo. Pa Mapuia'n ka kut vuanin min fuih reng a. A thusawi dik ka tih em em chu.. 

"I duhthlannaa lut pawh ni la, i thluak an suksak vangin hrem an phú tho ang. Chutiang chu i la ni miah lo zui a. Engmah hre miah lo va, nawr luh i ni a. I taksa leh rilru thlengin i tawrh phah a; i theihtawp chhuahin mi dik lo te hi i dodal tur a ni. Hremna i pek avang khan khua leh tui tha i ni tihna, i hmeichhiatpuite i chhanchhuak tel bawk tih hre reng rawh" a tih chu a ni. Ka tawngtai ru mawlh mawlh bawk. Dik tak chuan U Rinzuali te pawh kha a mah duhthu anga lut angin insawi mah se, a chhungte tawrhna a siamsak duh loh vang zawk a ni. Mi tam tak chuan mi dang harsatna kan hriatthiampui thin lo, demna tur leh an chak tawh lohna, an nunhlui nen lam kan phawrh chhuahsak zawk a. Mi sual zawk dem lo va a tuartu zawk dem tum ţâng ţâng pawh hi an la awm zu nia! Thil dang dang hmangin an teh kual a, Hmeichhe pakhat pawngsual tawk chu a taksa leh rilru thlenga tihnat a nihna lam aiin, a zu vawikhat lo in vena chu an sawi lar zawk fô! Hei hi hriatthiam harsa ka ti thin. Misual hum duh ringtu inti si, sual do si lo va, a langa mawia inti piangthar hi kan tam tawh khawp mai. Hei hi chu sawi ţeuh tur a awm.. (Next story-ah he mi lam hawi hi ka la rawn ziak dawn.. TR) 

Nu Zaii chu a túm búr a. A nu lian sia, savawm te pawh a ang lek lek. A thur bam bawk sia. Nu Mawii pawh a hmaa a hlim hmel kha a bo vek tawh. Ruati pawh a rawn lang ve. A nguiin a dawldang hle. Ruati lakah hi chuan inthiam lohna riau ka nei fo, mahse, a nu hi ka hnuktel lo thei si lo. Court an han ţan a. Kei chuan ka thil tawn zawng zawngte chu kimchang takin Magistrate leh ukil te hmaah ka han sawi leh ta dap dap a. Ka ţawng bah dawn apiangin Pa Mapuia hmel ka va en thin a, a mitmengin min lo fuih thin. Lehlam ukil chuan, thiam takin kei chuan nu Zaii te tihmualpho tum ang leh awmpuia ka tanna chhan pawh Nu Zaii ro eng emaw rúk ka tum vang niin a sawi ta daih a. Chu chu an hriat vangin vawi hnih khat kut min thlak thu te a sawi. Ka awih lo lutuk chu ka nui tawp. Pu Rinnunga'n ka tlanchhuah hlima ka thla an lak te chu Magistrate kutah a hlan a. Vawi hnih khat kutthlak ka nih lohzia chu a hre viau ang. Eng emaw an sawi a, ka ngaihtuahna ka lo kawm ata lângin an thusawi pawh ka hre mumal lo. Ka putea chunga kut an thlak dan thlenga sawi kai a nih takah chuan, Nu Zaii te lam chan chu a chau hle. Mahse, hun a tawp rih vangin a lehpek nghak turin court chu tihtawp a ni ta a. 

Hetih lai hian kan thubuai chu Police lamin journalist an lo hrilh vangin social media lamah chuan a lar tawh viau a. Facebook lamah pawh sawi a hlawh viau. A tam zawk chuan min ţan a. Sawi tawh angin thenkhat rilru kawi ka ti mai, rilru maksak deuh ho erawh chuan Nu Zaii te thlavang an hauh ve mek thung. An sawi dan chuan, keimah hi KS niin, ka customer ka rawk vangin min chhawrtu te lam hian hremna min pe a, chuta tanga tlanchhuak angin min sawi a ni. Piteii vawrhdarh thuthang ang tho kha a ni. Mahse, engahmah ka ngai duh lo ve tlat. Ka dikzia hria mi tlemte pawh awm se pawi ka ti lo. Pathian ka lamah a ţang tih ka hria. Samuela te pawh khan chanchin min rawn zawt ve reng a, an felin samari mi tha ka ti tawp. Leng turin la sawm tur a ni. Ka pu phei chuan chaw eiah kan la sawm dawn nia a ti nghe nghe. 

Hriati pawh a awm theih hun a tawp ta a. Hlawh a la a, a haw ve ta. Ka thaw huai mai. Sawi chiam theih ni si lo hian ka tan a hnawk ve tlat. Pa Mapuia nen inngaihzawnna rawngkaiin kan la inkawm leh lo. Kan pahniha kan awm fal chuan ka zakin ka lai thei em a, min khawngaih a niang. Ka haw bik lo tih erawh hrethiam tur khawpa fing a ni ve tawh. Ni khat chu tukverh darthlalang ka nawh laiin kawngka pawh kik lem lo vin Nu Sangi hi a rawn lut hlawl mai a. A meng phelh phang mai a, a inhnawih dúr angreng bawk si. A hmel thatna te kha a bo duakin ka hria. Min rawn pan nghal chat a. Ka pi leh pu an chhuak bawk si.. Ka hlau rilru hle. 

"Ka fate enkawltu atan hian ks ka duh i ring em ni? Ka fate ka la dawn" a ti nghal tâwng a. Ka hamhaih hle. 

"Eng nge i sawi awmzia? " ka ti a. 

"I hria.. Zoram titi i nih tawh hi.. Nangtê hi mi bum thiam tak i nih hi.. Hei tunah Mapuia te chhungkaw lakah inla khawngaihthlakin ka aiawhte i tum vel a. I zak thei lo mah mah. Ka nihtir dawn therte lo che. Nang ang mi tenawm lutuk hi chuan he chhungkua hi i phú ve lo" a ti ta bawrh bawrh a. Ka bangbo rualin a sawi awmzia chu ka hria. Thuthang dik lo a hre ve a ni mai. Min ngeih lo sa a lo ni bawk a, a tan chuan tanchhan tha tak a ni ngei ang. 

"Dawt vek a nih chu" ka lo ti a. 

"Mapuia leh ka nute bulah pawh ka sawi vek ang. Remruati hmel ang tak i put chhante hi sugery i tih vang vek alawm lo ni le. Ngawi tak rawh, thudik an hriat hunah chuan he in chhung hi i rap leh tawh lo vang" a ti hlawih hlawih a. Rapthlak ka ti zawk. Sawi tur pawh ka hre lo. Chutiang dawt lian lutuk a sawi thei chu.. 

"Tin, Mapuia bual at tumin i theihtawp i chhuah tihte hi ka hriat loh ring suh. Zanah ni se a rukin i va hmu thul.. Ka fate lah hmangaih ber niawmin i duat vel a, an hlauh vang chein i thu an awih lo ngam si lo.. I hre dawn, zawngi.. I châk lo vang " a ti leh hmarh hmar a. A thinrim lutuk chu a khur der der thei hial. Chutiang thu te chu eng titiha phuhchhuak thei nge maw a nih le.. Ka ngaihtuah phak bak a ni. 

"I rui anih kha.. Nu Sang" ka ti chu a ling teh e. Min khawih duh mai hmel a pu a. Mahse, vanneih asiamin ka pi te an lo haw hlauh mai a. Thil awmzia min zawh chuan amah nu Sangi chuan ka bula a sawi ang kha a sawi fai leh leng a. Ka lo ngawi reng. Min hrechiang tawk bawk a, ka insawithiam peih kual lo. 

Ka pu chuan thutak deuhin, "Sangi, he in hi i chhuahsan tawh a, i duhthu ngeiin.. Tunah phei chuan pasal i nei tawh lehnghal a. Kan sawm che a nih loh chuan rawn lut tawh lo la kan duh a ni. I fate i ngai a, i hmu châk a nih erawh chuan Mapuia dil la, anin rem a tih chuan i rawn hmu thei maithei" a ti ta khauh a. Nu Sangi mitmeng chu a ling hlar mai. 

"Nang pawh chu he nu hian a hneh vek tawh che a ni maw.. In va tenawm chhungkua tak.. Mapuia bulah ka la sawi vek ang" a ti a. 

Ka pu bawk chuan, "Ni e, i la hrilh dawn nia. Tunah chuan min chhuahsan phawt teh" a lo ti ta bur a. Nu Sangi chu engmah sawi leh lem lo chuan a chhuak ta nulh a, mak ka ti viau zawk. Ka pi chuan min hnem mawlh mawlh a. Chhun thingpui in a hun ta bawk a, thingpui ka va lum nghal a. Kan thil ei lai chuan, ka pi chuan, "Hlute, I pa Mapuia'n engkim min hrilh tawh a. Eng nge maw i rilru hi ni ve chiah le.. Kei chuan ka tute nu ni tur hian ka duh ber che a, i la naupang deuh tih mai a nia. Keini i pu nen lah kan rawn zin fo thei bik si lo. Khi lamah Kohhran thlengin kan pawimawh ve tho si a, ngaihngam taka ka tu leh fate kalsan theih hi ka duh tawh a ni" a ti ta a. Ka kha a chih, sawi tur ber pawh ka hre lo. Ka chil ka lem khalh a, ka kut tin ka sik niap niap ringawt. 

Ka pu chuan, "Ni e mawle.., i zak deuh em ni? Han sawi ve reng reng teh" a ti a. A nui deuh bawk. An pahnih chuan ka melh tawn sek a, ka tihngaihna hre lo chu ka nui ringawt. An ni pawh an nui ta a. Kan boruak uap churh pawh a zia sawt e. 

"Ih, mi hoin min sawi duh dawn asin" ka ti sap a. 

"Chu chu a thleng ngei dawn. Ni e, a la hma mah mah bawk a, chuvang chuan inneih nghal rum rum kan ti bik lo ania. Mahse, ngaihngam taka hawnsan theih che u hi kan duh a ni. Kumin hi liam se, kum thar lamah chuan inneih mai pawh a pawi lo vang. Mahse, Hlute, i hriat angin Pastor pension ka ni a. Ka fapa hian Sangi kha Biak in hawng lo vin a nei tawh a. Ka rilru pawh a na reng a, nang erawh Biak in hawng ngeiin nei che se la ka duh a. Ka duhdan tak phei chuan khi lamah buatsaih ila ka duh a ni. Mipa chu ngaihsam taka han pelhe ching kan ni thin a, nangin i Pa Mapuia hi i khalh ngila in lo insúm hrm hram a tha khawp ang" Ka pu chuan a ti ta dap dap a. Ka zak tawp. Chutiang thleng thlenga a han sawi chu.. 

"Aa.. Khalam kha chu" ka ti ringawt. An nui a. 

"Thil hi tlang rawta sawi a ngai ve thin alawm. Nang phei chu i la â si a. I pa mapuia duh ang angte hian i lo awm ang tih kan hlau a nih chu" ka pi chuan a lo ti ve a. 

"Awm lo vang" ka lo ti vat. An nui ta hawk hawk a. Kei pawh za deuhin ka nui ve tawp. An sawi chu a dik ka tih bakah inneih hmaa sex hman tih vel chu ka duh lo hrim hrim. 

"Mahse, miin min sawi leh tho ang. He tah ka awm reng dawn sia.. In khata cheng dun te chu tih velin" ka ti a. 

"In fihlim phawt chuan mi sawi danah buai suh. Mahse, Pathian chu bum rual a ni lo ania" ka pu chuan a lo ti khauh a. Ka bu ve nghat tho. Mahse, ka ngaihtuah thiam vak lo. Pa Mapuia nen nupa ni ta ila, kan inupat hleih si.. Bakah an milian a, hmelhriatte a nei changkang si, min zahpui hun te pawh a la awm ka ring. Kei lah class X Ka pass ve a ni ringawt si.. 

Zanah Pa Mapuia nen chuan a thawhpui damlo kan han kan a. Ka pi te awm lai hi chuan naupangte pawh ka enkawl lutuk lo. An thawhpui chu nu tling pui tawh, phawk zet hi a lo ni a. A lo zia viau tawh bawk. Kan thut rual rualin, "Pafa in ang miah lo. Nupa niawm tak in ni" a ti ngjal ringawt a. Ka lai leh hle. Pa Mapuia erawh a nui ringawt. Kan titi ta hlut a, min biak dan tawk a hre hle, lehkhathiam tih takah. Kan hawn dawnah, Pa mapuia hriat phak siin, "Hlute, in atang sawn chhuak miah suh aw.. Hmeichhe thenkhat hian saw ina awm saw an châk teh mai a nia.. " a ti zauh a. A sawi awmzia ka hre ve, ka nui ringawt. 

"Mu mai mai teh.. Ka chhuahtir phal teuh lo" Pa mapuia chuan a ti a. Ka lo nuam veng veng. Kan han kal dun te chu kei nula lian lo tih takah ani a palian bawk si, pafa kan ang ngawt ang. Min zakzeh phak var var.. A pen zau bawk si, ka um ve det det a ni ber. Motora kan chuan hnuah, "Coffee lam kawi lawk ang" a ti a. Ka ngawi reng. Coffee a va lak hlan chuan a phone a rawn ri a, Hriati a lo ni! A rei angreng bawk si, ka pickup ta a.. 

"Hei pa Mapuia hi dawrah a kal lawk a" ka ti a.. A ngawi det, "Nih chu" a rawn ti a. 

A dah nghal hmak. Ka dar ka chhin âk ringawt. A lo call fo tawh aniang a tih te chu ka ngaihtuah a. Awmhmunah ka insehruh ve ţeuh ringawt. 

A lo let leh chuan, "Hriati'n a lo call che a" ka ti nghat a. Ka lungawi lo tih a hrethiam ang tih erawh ka hlau ngang mai. 

"Eng nge a sawi? " a ti a. 

"Engmah" ka ti leh hmak. Min rawn melh zawk a, a nui deuhin ka hria. Pawn lam ka thlir daih. 

"I thîk tih hi i sawi hreh sia" a tih rual rual chuan, "Ka thik lo" ka lo ti hlar a. 

A nui hawk, "Hriati te ang han thik reng reng.. " a ti leh a. Ka ngei tawk a tling ngang mai. In thlen hmain kan ding leh a, kawng reh lai niin coffee chu kan in a. Zâmin ka khat leh tawh. Ka ning. 

"Vawiinah i pi ten thil an sawipui che em? " a ti sup a. Ani pawh a hma ang khan a zangkhai tawh miah lo. 

"Umm" ka ti ringawt. 

"Chuan" 

"Eng nge ni vak? " ka ti leh hlur a. 

"Ti nge ka bulah hian i thinchhiat vak kher zel.. Hahdam rawh. Zâm taka i awm a ngai lo.. " a ti dam duai a. 

"Nang pawh i zâm ve tho" ka ti khauh. Min rawn melh hâw a, a mitmeng mawiza chu.. 

"I nu tet ang ai hian i huhâng hi a na reuh a" a ti satliah a. 

"Nia kan lian ve lo lawm" ka lo ti kual a. 

"Hm.. Khati zawngin ka sawi lo. I hmel a tha bawk a" a ti leh a. 

"Remruati vang a nih chu" ka lo ti hmak. A túm deuh hmuk a, hmalam thlir chungin, "I hmel hi thlak daih mah la, ka rilru a danglam lo vang" a ti ta a. Kei lah hi ka mawl sia, "In nu nen in inthenna a la rei lo si, i lerh ve hrim hrim.. Duh i nei nghal a" ka ti a. 

"Nia.. Chu chu Sangi tan pawh chhuanlam tha tak tur a ni. Chuvang chuan alawm hmanhmawh taka ka chet loh.. A lakah khan ka beidawnna a rei tawh em a, ka fate vangin ka la chelh hram hram a, kan inneih tirh lai ang hun kha thlentir leh tumin theihtawp ka chhuah a, ka tlawm bawk. Mahse, Pathian pawhin min hrethiam ve em em tawhin ka ring.. Ka beidawng kal ngaihna ka hriat loh lai takin i rawn lang ta a. Ka insúm nasat êm vanga ka hah thinzia te kha hria la aw.. I nu Sangi vanga in atanga i chhuah tumte khan.. Awmngaihna ka hre miah hleinem. Mahse, Pathian remruat a ni ang, uirena suala ka tluk luh phal loin tihian kawng dang min siamsak a nih dawn hi ka ti ta a.. Sangi pawn a nun a sim beiseina nen ka intipachang leh a, mahse, i hriat kha.. Mipat hmeichhiatna vanga nupa inkar buaina hi chu a tawp chiang thei viau a ni e.. Sangi hi ka tan chuan Sangi satliah mai a ni. Ka fate nu a ni pawh hi pawi ka ti" a ti ta hawk hawk a. A inbunruak ve niin ka hria. Mak takin a thusawi vang chuan ka dam huaiin ka hria. Ka sawi thiam chiah bik lo. 

"Min lo duh char char tawh tihna mi? " ka ti a. 

"Aw" a ti hmiah. 

"I van lerh" ka ti a, min rawn melh chu kan mit a intawng chhawk a, "A nih Remruati ang ta lo ila" ka ti leh ţâlh. Ka rilru a tibuak ve bawk a ni. A chek hluk a, "Ninawm.. Chawlh ka neih theih hunah i hmel thlaktir turin phai doctor kan pan dawn nia" a ti ta a. 

"Ka duh bawk lo" ka lo ti si.. Min rawn ngheng a, "A nih min duh em? " a ti a. 

"I hriat vek tawh hi. Chutiangte inzawh" ka lo ti ve mai a. Ka zak vak tawh lo. 

"Engtik atangin" 

"Ih, Hriati'n a ngaizawng che tih ka hriat atang khan aniang" ka ti ve mai a. Niin ka hre ve deuh bawk a. 

"Chu! Nang pawh mi dang tan min phal loh vang mai mai a nih chu" a ti ve leh thung. 

Sawi ngaihna vak ka hre tawh si lo. "A ninawm" ka ti hlak a. Min rawn pawm thut, rem leh rem lo hian min rawn fâwp ta a. Ka meng phawk kher mai. 

A fawh chu a dam thlap a, a fresh ngawih ngawih. Zorina kha chu meizial rim te kha a namin ka hria.. Ka thiam ang tawkin ka lo fawp let ve a. Rei erawh kan infawp lo. Kan kal leh dawnah chuan, "Inkiss zirtir i la ngai dawn anih kha.. Zei lo deuh kiss chu a hahthlak" a ti sup a. Ka lo ner khum nghek ringawt. 

Hun chu a kal ve bek bek a. Enghelh em em nei lem loin ka hun ka hmang chho ve mek a ni. Vauna ka dawng ta lo chu ngaiah ka nei titih tawh a. Putea te pawh an la hlim ve rih, Remremi pawh a tha chak hle. A ruh a la no bawk a, a malpui ruh pawh nakinah chuan ngaiawh leh theih Doctor ten an beisei a niawm e. A bak a hliam dangte chu a dam vek tawh. Pa Mapuia'n ka hriat miah lohin Remremi enkawlna senso chu putea a lo thawn a, a hnua ka hriat leh chuan thil dang ka sawi hma hmain, "I hlawh atangin kan cut dawn nia" a ti hmiah. Han thinrim chiam chi a ni bawk si lo. Hlawh neia awmpui la nih reng pawh hi ka duh tawh bik lo asin le.. A tih ang hian awm ve naw naw phawt mai ang ka ti rilru a. 

Ka pite pawh ngaihngam takin an haw ti mai ang. Mahse, an awm loh chuan ka khua a har, chhunah phei chuan a khawharthlak thei em a ni. Hriati awm laia rawn lawr zut si, Nu Lawmi lah chu a reh hmak bawk si. A fate pawh an rawn leng lutuk tawh lo. Abby te unau chu tha thei ang bera enkawl ka tum ve tlat a, thu an awih a, enkawl an nuam takzet. Zan khat erawh Alex leh a u chu an inhnial a, Alex pek chuan, "Zawngi.. I chawh" a ti ta mai a. Ka va phei vat. 

"Khatiang tawngkam kha khawi atanga i hriat nge? Khatiang kha tawngkam mawi lo a ni a. Hman tawh loh tur aw.. I hria em? " ka tih chuan a ngawi ngal mai a. A luhlul hmel hle. 

Ka fapa ni lo mah se; enkawltu ka nih avangin ka duhdana ka enkawl chu a thiangin ka hria a. "Alex, kha tawngkam kha i hman leh chuan ka hrem dawn che nia. I hmang tawh lo vang tiraw? " ka ti a. 

Min rawn melh a, "Ka nu pawh i ni lo. " a ti ta a. Ka nghing lawih thei. Hei chen ka enkawl tawh a, chutiang chuan vawi khatmah min la ti ngai lo. Tun hnai ni 2 kalta vel atang khan a danglamin ka hre rêng a. Thil a ei that loh bakah a ú lehkha zir tihbuai a ching bawk a, Pawn lam a ngaina bawk. 

Abby zawk chuan, "Alex, i zak na nge? Ateii a nih hi" a lo ti vat a. 

"Ateii tak tak pawh a ni lo" a ti leh a. Ka ding zum reng ringawt. Ni e, a sawi dik chiah si a… 

Ţawng tuma ka ka ka an ziau laiin, "Alex, ka fapa, khatiang khan i nuteii hi i ti tur a ni lo asin. Khatiang tawngkham kha khawi atanga i hriat nge?" Pa mapuia'n a rawn ti a. 

"Sawi rawh. Khawi atangin nge i hriat? " a ti leh salh. A aw pawh a nelawm vak loh. Alex chuan mit khap fak fak chungin, "Danny nu in a sawi vek alawm" a ti ta a. Nu Lawmi mai mai chu'h! 

Pa Mapuia chuan, "A nih tu nge i nu? " a ti leh a. 

"A nu Sangzuali" a lo ti a. 

"Ni e, i nu chu Sangzuali a ni. I nute Hluteii hian i nu ka ni a ti ngai reng reng em? Ngai lo tiraw? A nih chuan, ka nu i ni lo tih pawh a ngai lo tihna a nih chu.. Mahse, nangmahni enkawltu a ni a, i nu a awm tawh lo va, ani thu hi in awih ber tur a ni. I hrethiam em? Ani hian a hmangaih che u tih hi hrereng ang che u" tiin an unau chuan a melh kual a. Abby chu a bu nghat nghat. Ani hi chu sawiselboi a ni ringawt. A fel lutuk hi ka ngaihte a tha lo zawk thin. 

Alex pawh chu thuawih deuh chuan a awm ve leh ta mai a. Ka thaw huai mai. Ka rilru a lo na hman deuh a, dik tak chuan an nu aia ka hmangaih lohna hi a tamin ka ring lo. An ei chak zawng an sawi apiang ka siamsak a, zan reiah mutpui an ngaih pawn mutchhuak chung chung pawn thawnthu ka sawi sak a, an thawmhnaw engkim zawng zawng ka tifelin an hmunhnawk ka thian a. Awmpui ka ni a, ka tihtur chu a ni ngei. Mahse, awmpui satliah anga a nih dan tur rênga ti ka ni ngai lo. Hmangaihna leh lainatna, duhsakna nen a ni ka tihsak thin. Chuvang chuan khatianga min tawngkhum kha na ka ti a ni. Nu Lawmi chu ka hua, ni e, zep miah loh chuan a sawi loh tur a lo sawi avang chuan ka hua a ni tawp. 

Mut hmain kan thu dun a. "Lawmi chu ka lo kam khat dawn nia. A ti ang lo em mai, naupang bulah khatiang sawi te chu" a ti a. 

Ka ngawi reng. Sawi se sawi lo pawh nise, a thleng vek tawh tho. Eng nge kei chu min lo ter ve em em ringawt ni.. A huatthu ka sawi a zeng pawh a ni si lo va, a fate lah ka duatpuiin an eitur nise ka siamsak zing. Abby te ang chiahin ka duhsak ve tho. Ka lungawi lo khawp mai. 

Ka muhil thei lawk lo nghe nghe. 

A tukah Ruati a rawn lang hlawl mai. A pawr chhap mai a. Ka khawngaih ngei mai. 

"Hlute, min hua ang tih pawh ka hria.. Mahse, lo kal hi a lang tlat.. I hnena ngaihdam dil hi a ngai tlat a ni" a ti nghal bawrh bawrh a. A ippik hle anih ka ring. 

"Nang te chuan ka lakah engmah i tisual ve hleinem" tih pahin tuisik ka chhawp sak a. 

"Aih, ka tisual ve alawm.. Ka ngaihtuah let leh hian, ka nu khan i chanchin a hriat rual khan "Awmpui daih ila.. Sawm rawh" a ti fo a. Khatia in atanga i chhuak te kha kan ina i lo kal loh mawlh kha a hlau a, kei ai aiin a lo hmanhmawh a. Kei chuan a khawngaih vangah che ka lo ngai a, mahse, tiang kha a ni ta sia. Ka tel ve alawm, Hlute, hrehawm ka ti. Mahse, engmah ka hriatpui miah lo aw" a ti leh mawlh mawlh a. A hmel ka en chuan ka lainat takzet. A cher kuam bawk nen. Kei pawh ka inthiam lo, ka lo ngaihthah lutuk chu. Ka laka tihsual nei miah lo, ka mamawh lai pawha awm reng thin kha ka lo hlamchhiah rei mah mah a ni. Min huat ka rin vang a ni pakhat a, ka be ngam chiah lo deuh thin a ni. 

"Ruat, khatiang sawi suh. Ka lakah engmah i tisual lo ka tih chu.. Chuan, i dam tha em? " ka ti a. 

"Dam chu a ni mai. Taka Adika nen kan inruk te pawh i la hre lo vang tiraw? " a ti leh daih a. A mumal vak lo. 

"Hre nang.. engtikah" ka lo ti ve vat a

"Kar hmasa daih tawh khan, ih, a chhungten min then turin an lo nawr nasa a, a chhan pawh ka nu vang vekin. Mahse, min then thei bik si lo va; kan inah a rawn lut ve tawp a. Kan cheng dun hmiah" a ti ta a. A remchang phian. Ni e, Adika hian a duh ve em a. 

"A nih chuan a tha mai alawm. Adika chhungte pawn inchhir hun an la nei em em ang. I nuin a hria em? " ka tih chuan a bu nghat a, tumruh hmel taka min rawn melh pah hian, "Ih maw, Hlute, keimah vang hian ka nu hi i lo khawngaiha i lo lainat ka hlau a. Khatiang zawng kha chuan ngaihtuah miah suh aw. Ka duh dan phei chuan kum 10 te hi tâng thei se ka duh. Heti khawpa min tizaka mualphoa min siamtu hi ka nu tia koh leh pawh harsa ka ti. Fanu a nei a, a fanu hi tu ten emaw hralhin sumdawn nan hmang ve se tih te a ngaihtuah ngai lo aniang. Ka haw em mai.. Chuvang chuan bail pawh hi theih loh se ka duh. Pathian zarah a tel lo pawhin kan nghei bik lo vang, tunah pawh Adika chu a patea ten an khawngaih sia, a va inhlawh a, keiin inhlawhna ka zawng bawk ang a. Kan awm thei em em ang. Ka nu chuan bank-a a sum dah sa pawh hmang turin min ti a, mahse, mi fanu te taksa hmanga a sum hmuh chu ka hmang duh lo bur.. " a ti nghat nghat a. Ruati chu ka ngaisang ru hle. Chutiang rilru a pu chu. Mhase, a nu chu engtikamah a ensan thei dawn bik lo tih ka hria. 

"Enteh, Ruat, i nu chuan a tisual ngei a, ka hria. Mahse, tumah mi famkim kan awm lo, i nu pawn a sim hmak ka ring. Chuvang chuan haw tawh suh.. Huat chu a tha lo" ka ti a. A ngawi reng. Thingpui te ka lum a, kan in dun laiin, "I rai mi? I cher e" ka ti ta tawp a. 

"Rai lo.. Rai tur pawn kan khawsak a la mumal lo em mai. 

Nau pai chi ka la ni lo. Ka rilru ka sèng nasa êm a, chuvang aniang ka cher" a ti ve mai a. Anih ka ring. 

"Chuan college pawh i kal zawm ta lo mi! " ka tih chuan, "Umm, kal pwh a zahthlak. Min hretu an lo awm ve zel sia. A nuam lo" a ti a. Ka khawngaih takzet. 

"Inhlawhna chu i la hmu lo tihna mi! " ka ti a. 

"Um.. Thil zawrh lahin min lungten emaw ni tuman min dawr duh bawk si lo. Mi ina lânga kalna tur te hi ka duh leh ngawt mai" a ti a. 

"Ngawi rawh.. Pa Mapuia bia la, a khawngaih dawn che em mai. " ka lo ti vat. 

"Nia, mahse, ka be hreh em a ni. Nangmah hian min biaksak la" tiin ngenngawl zet hian min rawn melh a. A harsa chuang lo bawk a. Ka lo remti ve mai. A hawn dawn chuan, "Ruat, tam chu a ni lo va, kha hei in chawhmeh lei nan" tiin cheng 500 ka pe ve a. A lawm thiam ngang mai. A nu pawisa an hman duh si loh chuan, an neih vak a rinawm loh a ni. Nilengin Ruati mawlh chu ka rilruah a awm. 

Abby te pawh an lo bang a. Ka lo dawngsawng a. Eitur ka siamsak lai chuan, "Danny chu a nuin kawm a phal tawh lo va" Abby chuan a ti a. 

"Ngati nge" ka tih chuan, "I nuteiin a hau thin a. Ka phal tawh lo. In kawm duh chuan lo leng mai r'u a tia" Alexa'n a lo ti vat. Mak hi ka ti thin. Tun hnaiah an rawn leng vak ta lo va, an lo kal chhunah hauh chu sawi loh ka lo duhsak ve em em zel kha a nia. 

.. "In unau hian inkawm ula a tha mai. Thian kawm tam chu sualna hmawr ania sin" ka ti a. 

"Mahse, maw Ate, Alex nen ringawt chuan inkhualtelem a nuam lo thei lutuk a. " Abbyin a lo ti a. A ni thei lutuk ang. Thian ngaina rual an ni ve bawk nen. 

"Nakinah Danny nu chu ka lo hrilh tha dawn nia" ka ti ta ringawt. 

Alex chuan, "E.. Ate, anu ka hmu a. Ih, ka rawn hruai dawn che u a tia, mahse, an tlan leh nghal daih" a rawn tih chuan hlauhthawnnain ka khat nghal. 

"Khawiah nge a hruai dawn che u" ka tih chuan, an lu an thing nar nar a

"A nih a bulah in awm duh em? " ka tih rual rualin, "Aih" an lo ti rual thawt. Hetiang em ema mahni nu han ngainat loh mai chu. Naupang rilru thianghlim ni si.. Hei zawng nu zir loh a ni ka ti lo thei lo. 

Pa Mapuia bulah Nu Sangi an hmuh thu leh a thusawite chu ka hrilh a, a nui ringawt. A ngaih lah hi a sam thei sia a. "Nakinah te courtah te kal se, a buaithlak ang e" ka ti a.chiang taka min en chungin, "Court chuan rel se ka tih zawk nak alaia" a ti ta daih. Ka hrethiam ve lo e a. Kum an tlin hma chuan nu zawkin an kawl thei angin ka hre thin. Mahse, court lamin an nu leh pate nungchang leh dinhmun azirin thutlukna an siam thei tho tih min hrilh takah chuan hlauhthawnna ka nei ta lo. Naupang pawisawi lo, hmangaihna tel lo va enkawl an nih hi ka lo hlau ve êm a ni. Pa Mapuia bulah chuan Ruati chungchang pawh ka sawi a. A lo ngaihven ve khawp mai. . 

"A nihte chu lângin rawn kal se ni mai lawm. Mahse, thawh tur ang hi ka hre mai lo va" a ti a. Dik tak chuan lo kal pawh nise, ka tan chuan lo thawhtir vak kha a nuam miah lo. 

"Kei pawn ka hre vak lo. Bakah lo chhawr vak kha a nuam lo e" ka ti a. A bu nghut. 

"Engtin nge niang aw.. Awmna tur dang ka zawnsak mai dawn em mawni le.. " a ti nuah nuah a. 

"I thu thu ni mai" ka lo ti a. 

"Ka hre maithei. Ka thianpa te hotelah hna ruak a awmin ka hria" a ti ta a. Ka lo thaw huai mai. Hotelah chuan hlawh pawh a that zawk ka ring. Mut dawna ka inphihfai lai chuan ka bulah a rawn ding run a, "Eng nge" ka lo ti hluk a. 

"Lo mu ve la" a ti sur sur a. 

"I zak lo" ka lo ti nghek. 

"Ka khawih lo vang che. Chuti em emin ka râwp huam lo" a ti nghut a. 

"Huam ang" ka lo ti. A nuihza bawk si, titau duh bawk si chu ka lo nuih a. 

"Tuman an hre dawn chuang hleinem" a ti leh a. 

"Api te thuchah kha hrereng rawh" ka lo ti hmanhmawh. 

"Api pawh ti suh. I nu tur a nih khi, kei pawh hi min pa tawh suh. " a lo ti hluk a. Ka hmai ka hruk hul lai pawn ka bulah zel a lo ding. 

"Ka mu dawn.. Kal teh" ka ti hlar a. 

"Anih mut hmain.. 'U mapui' han ti teh" a ti sup a. Min fan raih raih mai. Min rawn chhuk en run a. A sam chu a pheng deuh a, a kawisawi niah bawk. A thutak ngang bawk si. 

"I over em mai" ka lo ti leh ringawt a. 

"Mawh.. Ti teh" a ti leh a. 

Thawk ka la halh a, zak deuh chungin, "U Mapui' ka ti a. Ka lei ka chhuak nghal zuk. 

"Eih.. Ka naute" tiin ka bek tawn tawnah a rawn vuan a. Tukverh atanga thla eng lo lut chuan a mitmeng chu a chhun eng sawr sawr mai. Min kuai dak a, uluk leh fimkhur zet hian min rawn fâwp a. Ka lo chhing vang vang. A vawikhatna ang em em chuan ka bo tawh bik lo. A nghawngah ka kuah ve ngam tawh bawk. Thawchham lek lek khawpa kan infawh hnuah, "Anih muttui aw.. " a ti sup a. Ka bu nghat. Ka khur der der. Mipa hian min dek tam lo bawk a, Pa Mapuia min dehna leh fawhna chuan min fan ril khawp mai. Tui takin ka muhil ta siai siai a. 

Ruati pawh hna a hmuhsak ta a. A lawm thiam khawp mai. Pa Mapuia nen kan inkar te pawh ka hrilh ve ta vek a, min lawmpui bakah "Chhuah reng reng suh" min ti chamchi mai. Ka thian dangte pawh ka hrilh ve a. A thlalak te ka thawn a, chhe lo an tithei nasa. Aizawla an rawn zin veleh lo thleng turin ka sawm ve tawp bawk. A pawi em lo vang chu. Abby te pawh an pangngaiin, Alex pawh a pain a zilh atang khan a chimawm zawngin a awm leh tawh rih lo. Inrinni a ni a, Pa Mapuia chu a chhuak a. Ka insu a, Abby te erawh naupang pawl an hnatlang ve a. A khawharthlak khawp mai. 

Kawngka an rawn kik a, ka va hawn chuan, ka la hmuh ngai loh tlangval sang ve tak hi a lo ding a. Min lo nuih sâng mai. Ka nuih ve ringawt. 

"Lo lut rawh. Eng nge ni ta? " ka ti a. 

"Eng ni lo ve, in in hnuai luahtu tur ka nia" a ti a. Ka hrechhuak zawk. Pa Mapuia khan a sawi tak. An inhnuai hi luah theih a ni naa, Nu Sangi kha hrawn a hrehawm thin èm vangin tumah an awm rei thei lo va, tunah a han chhuah takah chuan an rawn be nual tawh a. A lian lem lo va, nupa rek emaw chenna tham lek a ni a. Tlangval pakhatin a rawn luah dawn tih kha a sawi tak alawm. Mahse, chu ti teh thuta a rawn luah ka lo ring lo va. Ka be ve ta siam siam a, thingpui te pawh ka siam kha. A tawng duhin a nui duh phian a. A hming chu James Lallianmawia a ni, Aizawla hnathawk tur a ni. An khua erawh ka zawt lem lo va, a sawi bik lo bawk. Thingpui te a in zawh chuan, a bungrua a tam lem lo bawk a. A inthiar thla ta a. Ka tifai sa vek bawk a, han tihfel vak tur a awm lo vang. Ka pui ta lem lo, ka buai ve tho sia. 

Pa Mapuia lo hawnin ka hrilh a, a zuk tlawh nghal. A lo chho rang leh viau. Chaw chhum kep turin min ti a, chaw a lo ei dawn a nih hmel. Zanriah kan kil ho pawh titipui tur an awm ta chu amah Pa Mapuia tak pawh chuan nuam a tih hmel hle. James chuan an hnathawh dan te a sawi suam suam a, kum 30 bawr vel a nih ka ring. Tlangval pian tha leh hleitling, hmel pawh chhe lem lo tak a ni. Naupangte pawh chu a besawm peihin tihdan a thiam phian a. An nel hma viauin ka ring. 

"Nupa in ni emaw ka tia.. A tirah.. Mahse, Pa Mapuia a ti bawk che sia.. Ka hrethiam lo" a tih chuan, kan nui ringawt. Pa Mapuia chuan, "Nia, an ti fo asin. Abby te unau enkawltu ber a nih hi.. Tihian nu ber awm ta lo chu nu ber chan a chang chho ta mai a nih hi" thukhuh ru deuh si hian a ti a. James pawn zawhna dang a nei tawh bik lo. 

A haw hnuah, "Tiang kha a nia. Tu emaw tak hi chu awm belh se, mi ngaihah pawh nupa kan ang lo deuh ang" ka ti a. 

"Awmpui kan la mai dawn mi? " a tih lahin, "Thawh tur ka nei nang" ka ti bawk si. 

"I putea fate zinga a lian deuh kan awmpui mai dawn mi niang" a ti leh a. Mahse, puitling an nih loh chuan ngaih a la ngam chuang lo. 

"Ka hrethiam lo" ka ti ringawt. Min rawn kuah a, "Mi ngaihdan leh sawi dan turah buai lutuk lo teh ang. Pathian hmaah kan la thianghlim ve ve tho a, mi zawng zawng kan tilawm thei chuang lo. Tihian awm ve mawp mawp phawt mai ang" a ti ta a. Ka pawmpui viau tho mai. 

Ka hringnun chu a thèn kual ve ta zel a. Putea te an ngaihtuahawm lo bawk a, ka hlim ve tawh khawp mai. 

"Hello.. " ka tih rual chuan, "I putea fanu sutu kha kan man tawh e" Police chuan a rawn ti a. Ka mengphar awk. 

"Kan han dâwp deuh a, pawisa hlawhin midangin an lo tir ve lehchhawng a lo nia.. Kan la chhui zel e. " a rawn ti leh a. Pathian hnenah lawmthu ka sawi nghal. 

Pa Mapuia pawh a lawm ve khawpin ka hria. Thil dik lo titu te chu nuai chimihin an awm zel ang. 

Zan khat ka mut dawna ka msg dawn chuan min tiphu deuh, "Hlute, i va duhawm êm.. Ka neih loh che chuan, mipa ka ni lo vang" tih hi a ni. A hming a dah lo va, dp pawh a nei hek lo. Ka delete nghal daih. Mahse, zinga ka phone ka en leh chuan, a lo tlar thla dul mai. Ka duh che, ka ît che.. Tih vel hlir a ni. Ka delete leh tawp. Mahse, bansan a tum awzawng lo mai. A rawn ngampa tial tial mai a. Ni 2 chhung lek pawn min tihrehawm hman. Ka thiltih lai te, ka kalna te, ka mut hun te a rawn hre thlap thlap zel. Min enthla aniang tih turin.. A ni ta em em lo ve tiin Pa mapuia ka hrilh ta tawp a. A block nghal hmak. 

Chumi zan chuan James a rawn leng lut ve a, a rawn lut khat angreng. Hna an thawkrim ve bawk nen. Dar 10 velah pawh a la titi tui viau. Zu rim a nam deuhin ka hria. Mahse, a nun a nia, tlangval te an ni bawk a, keia lo sawisel ve phak a ni lem lo. Thingpui ka va lum lai chuan a rawn kal ve a, tui a rawn in a. Let leh mai lo chuan a ding reng a. Ka va en chuan, min nuih suk a. 

"Zaninah ka msg lo en rawh aw" a ti zawi sup a. Ka lo bangbo tawp. 

Thingpui an in lai te chuan ka za sek, James hian eng nge min rawn thawn dawn ka hre si lo. A haw ta. Pa mapuia nen inmang tha nana kan infawh zuai hnuah ka mu ta than a. Msg chu ka nghak a ni ber. 

A lo thleng ta. Karei! Ka phone ka thlauh thelh a ni. Bathrooma ka inbual lai, saruaka ka inbualna a lo ni. Ka hmel a lang chiang mai bawk si. Ka khur hlawk hlawk thei. 

"Mapuia emaw Police i hrilh rualin a darh nghal ang. Ka duh chu nangmah.. Ka duhdanin awm la, he video hi tuman an hmu lo vang. I hrethiam em? Lo inngaihtuah ang che. Muttui phawt le" tih thu a rawn dah tel bawk. 

Eng nge ka tih tak ang le.. Lalpa..! 

(A tawp tep tawh aw.