Tidamtu Kut 10

TIDAMTU KUT… (10)

Ziaktu: Toni Râlte

(Adds kha aw.. Duatte u) 

Hriati chu ka mil lo ţan riau mai. Mahse, ka tilang hreh ve bawk si. A sawi ang khan a riak dawn a. Thawmhnaw pawh a lo inkeng lawk vek a lo nia. Nu Lawmi te inah riah ve mai awm. Pa Mapuia hi a ngaizawng chiang lutuk. Hmm.. He nu kher hi chu Abby te nu atan ka awt lo ve thlawt. Amah Pa Mapuia ka va duhna lam aiin Abby te a tiduhdah ang tih ka hlau. Bakah an ngaina bik lo bawk nen. Zanriah kan han ei chu boruak a rit ru hle. Abby leh Alex pawh an ngui ve vek ni maiin ka hria. Chaw bel ka chang a, Hriati chu chaw a lam hma chuan ka khawrh duh bik thak lo. Ka sual thiam ve dan lah chu a naupangchhia mai siah.. 

"Zanin chu chhuah lawk ka ngai. Kan thawhpuipa nupui a dam lo va, a serious riau aniang. Va menpui a ngai. Kan tlaivar dawn chuan ka rawn hrilh mai anh che" Tiin Pa Mapuia chuan min rawn melh a. Ka lo bu nghat. Hriati chu chawh ka ti ngei mai. A riah chhan ber a chhuak leh nulh dawn sia. Mahniin kan nuam veng veng mai alawm. Zanriah kan ei kham a, thleng ka seng a, ka seng mek laiin Abby ten an Assignment min lo zawt sek a. Ka seng fel zawh veleh ka va enpui nghal a. Pathian zarah Abby te level hi chu ka la zirtir ve thei mai zel a, keimah pawh ka inrintawk phah sawt ve. Kan inzirtir zo ka va chhuah chuan thleng chu si loh in a lo la awm a. Ka ner nawk. Hriati chu sitting roomah phone hmetin a lo thu reng a. Engmah sawi lem lo chuan ka va sil sawk sawk a. Han phun ngam tur ka ni bik si lo. 

Hriati chuan ka sil mek laiin tu emaw a bia a. A nui hawr hawr mai. "Eng nge ka thu mawm hmarh mai mawle, awmpui theuh theuh, inti lal chuang tur kan awm hleinem" a tih ri chuan ka beng a verh zawk mai. Keimah min sawina a ni tih hrethiam lo rual ka ni bik lo. Ka va tawng ve dawn mawni aw ka tih rilruk laiin ka phone a ri a, ka kut hru hul sawk sawkin ka va la a. Putea a lo ni. 

"Remremi motorin a su a" a rawn tih chuan ka ding khawng ta reng a. Ka tha a khur nghal der der mai. 

"Engtin? Chuan engtin nge a awm? " hamhaih deuhin ka ti a. 

"Hei khaw thenawm PHC kan pan nghal a, a lu hi thui a ngai a, chuan, a malpui ruh hi a tliak niin ka hria. Amah phei chu nachhawknain an jection a, a muhil rih" a rawn ti a. Ka hlauhthawn ang ngeiin maw.. 

"Fimkhur rawh u ka tih mawlh mawlh kha" ka ti tham chhalh a. Ka haw lek lek zawk. 

"Theihtawp chu ka chhuah ve alawm. A pi (a nu nu) te inah ka awm loh hlanin a nuin a lo tir sia. A pawi tak tak a ni" a rawn ti a. A rilru a hah hmel hle. 

"Piteii bulah engkim i sawi lo em ni? " ka tih chuan, "Sawi lo. Ka ngaihtuah a, a rilru a kawi sia, eng emaw zawngin a ngai ang tih ka hlau a.. Mahse, nichin kan tlanpui lai khan ka hrilh ta vek" a rawn ti hnuhnawh a. 

"A va pawi tak em.. Remremi chu a tha chhuak ang em? Doctorin eng nge a sawi? " ka ti mawlh mawlh a. 

"Hei a hliam thui leh nachhawkna han pek bak chu tihtheih vak a awm lo aniang. Naktukah Lunglei lam pan turin min refer a" a ti a. 

"Pawisa in nei em? " ka ti vat. Neih ka neih loh em vanga zawt ka ni. 

"Aw min ngaihtuah suh. Kan nei e.. " min ngaihtuah hmel deuh hian a rawn ti a. Ka khawngaih hle. Keimah vangin ka putea te chhungkuain an tawrh phah chu a nia! Nu Zaii khan a lo ti mai mai lo a nih dawn kha. Mahse, phuba ka la ve tho ang.. Ka awm a nuam lo ta hle mai. Abby te ka tihmut zawhah ka mu ve daih. Mu tihah ka muhil lo. Hriati erawh mikhual roomah a mu thung. Kan inbe mang lo a ni ber e. Pa Mapuia'n min lo call a, "Hei a chatthla titih a ni mai sia.. Han hawnsan zawng a mawi lo e.. Ka tlaivar mai ang" a rawn tih takah chuan, kawngka ka va kalh leh tê tê a. Hriati zung tur a rawn phei ve mek bawk. 

"Ti nge i kalh? A rawn haw dawn lo mi? " a ti a. 

"Umm.. A thi a" ka ti mai a. A ngui rawih mai. Chung thil pawh chuan ka ngaihtuahna an la peng zo lo. Putea te ringawt a ni ka ngaihtuah ni. Remremi chu boral ta se.. Ni lo, ka chan tur chu. Ka damchhungin ka inthiam thei tawh ngai lo vang. Rilru a hrehawm takzet a ni. Mutthilh pawh khawi lamah.. Zan dar 11 pelhah call ka dawng a, number ka hriat ngai loh atangin a ni. 

Mipa aw thum lam deuh hian, "Kha kha a ni e.. I kuang lo i nawr a, i tlanchhuah tawh ber chuan ngawi ve hle hle la a tha tur a nia. Tunah chuan hliam kan siam ringawt, a lehpekah chuan thihna a thleng tawh ang. I case hi i lakir a nih erawh chuan zah kan ngai ang" a rawn ti ta mai a. Ka thu chhuak hlawl mai. Hlauhthawnna hlirin ka khat a. Ka thlanin min bual nghal bawk. 

"Tu nge i nih? " ka ti thâm ţiak a. 

A rawn nui huk huk a. "Tu nge ka nih lam ai chuan, ka thusawi kha hrereng ang che. Ni 3 hun i nei. I case i lakir lo a nih chuan, i chhungkaw neihchhun i chân ang" a ti a. A ri khap a. A reh vawng vawng mai. Eng nge ka tih ang pawh ka hre lo. Ka thaw hawk a, tui ka in a. Ka tha a khur der der mai. Khatiang khawpa Naupang pawisawi lo lakah pawh chet an la duh a nih chuan ka putea te chhungkaw tihchimih chu an harsat hauh lo vang le. Ka hui leh pawp a. Ka mittui a rawn tla ringawt. Buaina thlentu mai ka ni. Ni e, ka tlanchhuah ber tawh a hnu ngah nge Police ka hrilh kher kher ni? Ka kuanglo chu ka nawr chiang a ni. Rilru ka siamfel titih a, Naktukah Police ka bia ang a, ka inhnukdawk leh tih ka sawi mai ang. Mahse, chinchang ka hre lo va, inhnukdawk mah ila,, an man tawh si a. An chhuah ngawt thei dawn em mawni le.. Pa Mapuia ka râwn phawt zawk dawn mawni.. Ka tawngtai ta tawp a. "Lalpa, ka thil hmachhawn mekah duhthlanna dik siam thei turin min pui ang che" tiin. Mahse, chumi zan chu ka muhil mang lo tihtheih a ni e. 

A tukah thawh ka hai phah. Zing lamah ka lo muhil ve nen, Pa Mapuia lo hawn lai pawh ka hre lo. Ka chala rawn dektu kut vawt lek lek an awm vangin ka harh hlawl a. Ngaihtuah hmel zeta min lo melh rengtu Pa Mapuia ka han hmu thut chu ka phu zawk mai. 

"I tha em? I khua chu a sik si lo va, zing dangah i tho hma thei sia" a ti thawp sup a. 

Zik mar pahin, "Ka tha lawm" ka ti a. Engahmah ngaih loh hmel deuhin ka ham bai bai bawk. 

"Nizanah i mu tha lo mi? Ti nge? " a ti lehzel a. Nizan thilthleng kha engmah ka la theihnghilh lo. 

"Mu tha vak lo.. Nakinah ka hrilh ang che. I inkhawm dawn em? " ka ti a. 

"Ka chau ve riau a, ka inkhawm lo mai dawn mawni.. Nang? " a rawn ti a. 

"Abby te ka kalpui loh chuan" ka lo ti sap a. 

"I chauh hmel em mai. Vawiin chu a nu Lawmi te rualin kal mai rawh se.. Engkim an hrethiam ve vek tawh alawm" a lo ti a. 

"Min ngaihtuah suh" ka lo ti nghat. Ka pangchang ve ringawt. Ka inzahpui. 

"I hmel en khan mawlhtu i nei tih ka hria alawm.. Vawiin chu awm hahdam rawh" a ti dam thlup a. Fing ka ti ngei mai. Ka tho va, ka inphihfai a. Hriati'n rawng chu a lo bawl a, chawhmeh chhuanlum a ni deuh mai. Min be lo bawk a, ka be bik lo. Ka buaina te hi a hria ang tih ka hlau zawk. Abby te zing inkhawm lo hawn hnuah tukthuan kan ei a. Kan ngawichawi tlang hle. 

"Bawihte, vawiin chu Ateii a dam tha si lo va, Anu Lawmi te rualin kal mai r'u aw" Pa Mapuia chuan hnial rual lohin Abby te bulah chuan a ti a. 

Abby chuan min rawn melh zawk, "Umm.. ".a ti mai a. 

"Ban veleh lo hawn tur aw.. Motor hlauh tur.. I nau hi kai zel ang che" ka lo ti ve vat a. 

Ner sak chungin, "An nu emaw i intih duh hmel tawp" Hriati chuan a lo ti khauh. Ka va melh kâwk a. 

"An nu ai pawn a hmangaih alawm" ka chhan hmain Pa Mapuia'n a rawn ti hmiah. Hriati hmel tum hmak chu nuamti zetin ka lo en thung. Abby hian thil a hrethiam tawh si a, an awm laia inbakkaih emaw inhnial emaw te hi tha ka ti lo. An eikham rualin an pindanah ka hruai nghal a, ka siam mawlh mawlh a. Abby sam ka tawnsak lai chuan, "Ate, i dam lo tak tak ami? " a ti a. 

"Dam lo tihah ka chau deuh a. Mahse, ka tha leh vat ang. " ka ti vat a. 

"Chhunah noodles chhum ang u aw' a ti leh daih. Ka bu nghat nghat a, Noodles hi a duh khawp a. Hmarcha thak erawh an ngam vak lo. Alex nen an inzui chhuak chu ka thlir liam a, ka khawngaih reuh hle. Anmahni vang hian ka rilru te hi a puitling vek tawhin ka hre thin. An nu nikhua loh vangin inzawmna kan neih phah a, ka putea fate nena ka en hranna a awm tawh lo. An fel unau si a, an lainatawm em a ni. 

Thleng sil tur a lo dah leh pek a. Tun tum chu ka pehhel ve ngat. Awmpui ve ve mah ni ila, ka senior zawk. Bakah ani chu lânga rawn kal a nia. Hetia min thuhnuai ang zawnga awm hi a tihtur a ni lo vein ka hria. Mahse, a sil lo reng ang tih ka hlau ve tho sia, "Hriat, ka nuamsam si lo va, thleng saw chu lo sil ve mai teh aw" tih leh rooma luh ka rual a. A ner sak chu ka hmu hman. A zak lo mai mai e a. 

Khuma mu chung chuan phone ka khawih a. Whatsapp ka han hawng chu, kareii! Ka thiannu Hriati msg a lo tlar thla duat a. Ka chhiar chuan ka sa pup pup mai. 

"Hlute, eng nge thil awmzia? Kan khuaah chuan KS angin i lar ania aw. 'KS a nia, a customer a lo rawk a, chupa thinrim chuan I putea fanu motorin a sut phah' tih velin i thang nasa a nia. Eng nge thil awmzia hi? " tih te.. A tam mai. Ka khur hlawk hlawk. Eng thil phiangsen nge ni ta ngai le? Putea number chu kut khur chungin ka hmet chhuak a. An inkhawm ka ring lem lo bawk, Lunglei lam panin an tlan mek a ni maithei. 

"Hello" a rawn tih rual rual chuan, Hriati thil rawn sawi chungchang chu ka sawi nghal mawlh mawlh a. Ka ţap pur bawk. Putea chu a chek hlak hlak a.. "Ka hlauh ang ngei a nih chu.. I piteii vek a ni.. I piteii vek. Ngawi tak rawh. A châk lo ang. Ka then dawn khawp.. Engvangin nge chutiang dawt muhlum te chu a lo tihdarh a. Zawngi chu.. " a insehruh nasa hle tih ka hre thei. Ka ţap bawk nen, ka tawng hleithei tawh lo. Ani pawn phone a dah daih. Remremi chungchang pawh ka zawt hman lo. Piteii thu veivir kual a ni tihna a nih chu! A va rapthlak em.. Chutiang em ema dawt muhlum han sawi theih chu.. Keimah vanga a fanuin a tuar ve chu a thinrim hle ang tih chu ka hria, mahse, hetiang zawng khera min han thungrul chu na ka va ti tak. Nulat tlangvalna lama hminghliau ngat phei chu.. Rapthlak ka ti lutuk. Khumah ka bawk thlawp a, lukham hmer chungin ri si loin ka ţap khur ta ngat ngat a. Ka thin hi a na vâwt vâwtin ka hria. Hluteii chu Ks an han ti tur ka mitthla chuan ka â lo chauh a ni. Awmdan tur reng ka hre lo. Nizan lamah vauna dengkhawng tak ka tawk bawk nen, ka rilru chu a chawl thei lo, ka hah hluah hluah a, nâ a tel ve tawh vangin tawrh a harsa zual hle mai. Tawngtai pawh ka tawngtai thei lo. Hriati chuan min lo call a, lak loh ka tum zet naa, hrilhfiah ve hrim hrim tulin ka hria a. Ka la hram.. 

Ani pawn a lo awih lem lo va. Mahse, thuchiang hriat a duh ve hle a lo ni. Tap chung chuan thil thlen dan chu ka hrilh ta vek a. A lo chek leh hlat hlat thin. A thinrim ve hlein ka hria. Ka sawi zawh meuh chuan ka tap pawh ka bang tawh a, ka la insút faih faih thung. 

"Awii i van tuar nasa em em.. Ti nge engmah min hrilh loh a? I thiantha ber ka ni emaw ka lo tia? " titau awka deuh hian a ti a. 

"Police lamin sawi darh an la phal lo va" ka ti ringawt. 

"Ka va khawngaih tak che em.. Ngawi rawh.. Kan khaw groupah ka va sawi vek dawn. Min hnial hlek suh.. Ka sawi dawn" tih leh phone dah a rual daih. Ka call leh pawn a la duh tawh lo. Keimah vangin putea te nupa an inthen maithei.. Remremi dam lo bawk.. Aaa… rilru a va buai tak êm. Putea lah ka call tlang thei der si lo. Ka tei sek a, Hriati sitting roomah a awm si. A hriat ve ka hlau bawk si. Tiang reng renga nun hrehawm ka tih hi ka damchhungin ka la tawng ngai lo. 

Awmngaihna hre mang lo va, ka thut chawrh chawrh lai chuan, Ka room kawngka chu a rawn kik dat dat a. Pa Mapuia a rawn lut nghal. Ka lo melh tawp ringawt. 

"Eng buaina chiah nge i neih le? Min han hrilh vek teh" ka bula rawn thut pah chuan a ti a. Hrilh mai thaa ka hriat tawh vangin ka aw ka thian a. Ka thutdan siamremin a lam ka hawi a. 

Vau ka nih dan, putea te chhiat tawh dan leh kan khuaa ka tlang than dan mawihnawi lo tak te chu a chin chhuakin ka hrilh ta a. Ngawi rengin a lo ngaithla ngat ngat. Ka kut a rawn vuan a, zaidam takin min melh a. 

"Ka hriat lohin i va tuar nasa ve. A tirah engkim min hrilh la, i phur a zâng deuh tur" a ti sup a. Ka kut a la vuan reng. Ka tah a chhuak hle, ka mittui tling pam chu a rawn hmu ni tur a ni. Min kuai dak a, ka mitui tla mek chu a hru fai a. 

"Ka naute, lungngai miah suh aw. Engkim a tha leh vek ang. Pathian kan nei alawm. Thil dik lo na nâ na chu a tlo ngai lo.. " a ti leh a. 

"In hnuhdawh mai ka duh a ni. Putea te keimah vanga an tawrh zel ka phal lo" ka ti sep a. A lu a thing nasa mai. 

"Ni lo ve.. Ni mai lo ve. Chutimaiin kan tlawm lo vang. Insiam rawh. Police station-ah i va kal teh ang" a ti ta mai a. Ka meng phawk kher mai. 

"Aih, police kan hmu tih an hriat phei chuan chet an la leh mai ang" ka ti chul a. 

"Ka awm hi.. Ka chingfel thei. Min ring em? " tiin min rawn melh a. A mitmeng thuk zia chu aw. 

Min nawr tlat si a. Amahah rinna nghat turin min duh bawk si. Ka ngaisang a, ka zah bawk. Chuvang chauh chuan ka insiam a. Kan chhuah dawn chuan, "Hriati, ka fate lo hawn hunah eitur lo siamsak rawh aw. Chuan lenchhuahtir loh tur.. Kan chhuak lawk dawn" a ti a. Hriati mitmengah chuan zawhna a lang. Chhan sen chi ni nghal lo chuan. Station kan pan lai chuan, "In khuaah chuan Ks angin maw i than a? " a ti nghut a. Lungawi lo hmel a pu bawk. Ka bu nghat ringawt. 

"I piteii rilru chu a chhe ve hle mai.. " a ti ve tawp. Ni e, hei zawng thupa zepsak rual pawh a ni bik lo. Khatiang rilru kawi lutuk a pu kha kei pawn ka rinphak bak a ni. Putea call ka dawng a, ka la rang kher mai. 

"Hei i piteii chu a chhuak dawn e. Ngaihdam min dil nasa a. Mahse, hetiang mi rilru chhe lutuk hi ka chenpui thei tawh lo. Remremi pawh Lungleia kalpui ngai loin Doctor in hmanrua a chah hlauh mai a. He lamah kan inenkawl thei dawn e. Rawn ngaihtuah suh. Pawisa pawh ka nei aw.. Nangmah kha inchingfel phawt rawh. Tlawm reng reng suh, dik lo taka i chunga khatiang titute kha hremna i pe ngei tur a ni" a rawn ti mawlh mawlh a. 

"Pute, inthen suh u. Remremi dam loh lai lehnghalin. Keimah vang vek a ni. Ka tan a hrehawm.. Ngaidam hram rawh" ka ti a. Ka ţap lek lek a ni. Za vak lo hian a rawn nui a, "Nangmah vang a ni lo. A rilru chhiat vang alawm. Bakah a awmdan tenawm tam tak ka haider rei tawh lutuk. Tihian ka tel loin awm ve rih rawh se.. A nun a sim dawn loh chuan ka nei tawh dawn lo. Ka fate pawh ka awmpui ang" a ti charh charh a. 

"Remremi dam hnuah fim takin inngaihtuah zawk rawh" ka ti leh hram. 

"Hei hi ka duhdan alawm.. I naute pawn an ngai lo. Ui pawh an ui lo.. Nangmah a tihmualphona che pawh hi thenna tham a tling tawh. Hei Remremi chu ka va awmpui ange. A u ten an awmpui sia, a ngaihtuahawm. Min lo ngaihtuah miah suh. Rawn hawn pawh a ngai lo aw" a ti a. Ka chhan leh hmain a dah daih. 

"Ka hawn a ngai" ka ti nghal thawr a. 

Pa Mapuia chuan min rawn thlek zeuh pahin, "Ka nute rawn chhuk se, kan kal ang" a ti hmiah. 

"A ngai lo, keimahin" ka ti tak naa.. A mitmeng ka enin a luhlul em mai. Station kan thleng a, Police lam te pawn min hre tawh bawk a. Min lo dawngsawng tha viau. Kan case I/O bulah chuan, Pa mapuia bula ka sawi zawng zawng kha ka sawi leh ta vek a. A chek hluk hluk mai. Ka sawi zawhah, "An va nasa ve aw. Ve khanglang a, Police te hi min ngainep viau a ni maw? An hre dawn khawp e. Bawihi, an lo callna che number chu min lo pe ta che" a ti a. A thinrim hmel hle. 

Number chu ka pe a, a dial nghal. "Ka rindan vel a ni. A hmang tawh lo. A fimkhur ve hle a nih dawn hi. Mahse, zawnchhuah a harsa lo khawp ang. Karleh nilaiah khian court tur a nia. Nang pawh i rawn kal a ngai aw" a ti zui zat a. Ka bu nghat. 

"Sir, ka putea te chu khawngahin min venhimsak thei lawm ni? Ka haw thei rih si lo va. In hnenah kan lo kal tih an hriat phei chuan an che leh duh mai ang" ka ti ta tawp a. A bu ve nghut mai. 

"Ngawi lawk aw. Saw lai out post lam ka lo be dawn nia aw. Lungngai suh. An him em em ang. Lehlamah chuan misual man nan i putea te chu kan tawktarh titih pawh a ngai maithei a ni. Mahse, hlauthawng lo la.. Engmah thil tha lo a thleng lo vang. I putea chuan a fanu sutu number chu hre thei se kan tan a awlsam dawn asin le aw" a ti vawng vawng a. Ni e, kha motor kha a tlan zui nghal daih vang leh an hamhaih hlawm si vangin tuman a number chhinchhiah nachang an lo hre lo a ni. A pawi ngawt mai. 

"Engpawhnise, lungmuang takin lo va haw phawt u la.. Hma kan la zel ang. Hetiang sumdawnna tenawma inhnamhnawih pawh kan rek chhuak zel turah ngai ila, i putea te pawh ngaihtuah suh. Kan lo buaipui vek ang. Nang pawh an lo biak leh che chuan min rawn hrilh vat dawn nia aw.. " tiin Pu Rinnunga chuan a number min pe nghal a. Pa Mapuia nen chuan kan haw leh ta nghal a. In lam min panpui ta lo chuan, falkland lamah min kualpui ta daih. Ka kal vawikhatna a ni a, ka hawi nasa mai. 

"Khaw nge kan kal dawn? " ka ti a. 

"In tihthawven i mamawh. I harhvang lo em mai" a ti ringawt. Hmun pakhat, fâl ve deuh hlek, thing din ţeuhna hmunah min kalpui a. Ka zui ve zel ringawt. Thui vak lo kan kal hnuah hmun zawl, hnim hringin a bawh khahna hmun kan pawh ta a. Ni a sa lo bawk a, a nuamin a dai hle. Hnim chungah chuan kan thu dun a, kan ep chiaha veng thenkhat lang tuar chu kan thlir a. 

"Kum hi thar se, zirna pawh i chhunzawm dawn nia. Awmpui chu ka la mai dawn nia.. Mi dang" a ti sup a. 

"Aa.. Rilru a chawl rei tawh sia, ka zir theih pawh ka ring tawh lo" ka ti a. 

"IGNOU atangin i ti dawn alawm.. Zir vak vak a ngai lo vang. Awmpui rilru pu tawh lo bawk la ka duh a ni" a ti leh a. A thutak bawk si. Ka lai lek lek zawk. 

"E taka! Hriati hi nu Lawmi patea fanu a lo ni reng a" ka ti ta daih a. 

"A ni maw? Ka hre ve miah hleinem.." a ti ve mai a. Ka tum loh deuhin, "A ngaizawng chein ka hria" ka ti thut. Ka zak leh hnuhnawh tawp. Chutiangte lo sawi ve ringawt chu.. 

A khi suk a, "Pathlawi te chu kan to thei tawh nang. I ngaihbel mai mai anih chu" a ti a. 

A sawi pawp laklawh tawh tho a tiin, "A nia lawm le.. A awmdanah hian ka hai lo. Mahse, Abby te nu atan ka duh thak lo a nia" ka ti ta hmiah. A nui suk suk a, min rawn melh chungin, "Abby te nu atana i duh chu tu nge? ".a ti a. 

"Aa.. Ka hre chuang lo. Zaidam, fel deuh, hmangaihtu a ni mai" ka ti niah niah a. Min rawn ngheng a, "Nangmah angte hi mi! " a ti a. Ka thaw hawk. Ka melh kâwk a, "I zak lo" ka ti ringawt. 

"I nu Sangi'n a thik che pawh kha a awm lo hran lo " a ti a. 

"Ti nge min thîk ve ringawt a. Remruati hmel ka an vangin maw" ka ti hâ a. 

"Ni vek chuang lo. Lehlamah amah a dik loh em vang khan a thik ve ringawt che aniang" a ti hnuhnawh a. 

"Hm… ka lerh loh loh nen" ka ti daih. 

"Nia, i lerh lo. Hei tak hi ka hlauhthawnna.. Mipa tu emaw zei deuh takin an eizawh mai che ka hlau thin" a ti ta a. Ka khur der der. Ka sawi thiam lo. A mak tawp. Ka awmdan chu. 

Chhan ngaihna ka hre si lo va, ka ngawi ringawt. 

"Hlute" a ti sup a. 

"Eih"

"Pasal nei suh aw" a ti a. Ani pawh a aw chu a khur deuhin ka hria. 

"Engvang? " ka lo ti nghek. 

"Ka ui che" a ri chang chang a ni mai. 

"Haw ang" ka ti thut. Ka zak. Kan awmdan hi.. Ka tho a, ani a la thu. Ka banah a rawn vuan a, "Min en teh" a ti sup a. Ka zuk melh.. Ka melh rei ngam lem lo. 

"Pathlawi ka ni a, kan inkar kum tam a tla.. Min iai em? " a ti ta mai a. Ka thaw hawk ringawt. Ka sen vekin ka ring. 

"Ti nge tihian i awm a? Kal ang" ka ti leh ringawt a. 

"Sawi phawt rawh. Hriati pawh i thîk reng kha" a ti hmuk a. Za lo zetin ka nui, "Kha te chu Abby te ka ngaihtuah vang alawm" ka ti a. 

"A nih chuan Hriati chu ka nihpui mai ang. Abby te pawh a hmangaih thei mai ang" tiin a tho thurh a. Ka va ngei tak. 

"Heyy.. A ngai lo" ka ti vak a. 

"Min duh chuang hleinem" a ti nghut a. 

"In inthenna pawh a la rei loh em hi.. " ka ti ta a. 

"Ani pawn pasal a um nghal alawm le.. Ani mitmei ka venna chhan tur ka hre lo" a ti hmak. 

"Remruati ka an vang mai mai a nih chu" ka lo ti daih a. Ka hmel a rawn en a, chiang deuhin.. Ka lai lek lek. 

"I rilru a buai loh hunah kan sawi dawn nia. Ka nawr mah mah che a nih hi.. Tirawh, haw ang.. " tiin min rawn kai a. Hrilhhai zetin ka zui hnak hnak ringawt. 

In kan thlen chuan Abby leh Alex an lo awm lo va. Hriati pawh a lo awm chuang lo. A ngaihna hre lo zetin kan inen a. Amah chu chhuak leh nulhin thenawm te in a pan ding nghal a. Rei vak loah Abby leh Alex te chu a rawn kai lut a. 

"In awm si lo va, anu Lawmi'n thingpui min intir a" Abby chuan a ti a. 

Ka inthiam lo ru angreng hle. Abby lah hi a fingin min chîk hmel si. A pa nen innei ta thut ila, min hua ang em le? Min ngainat ang reng hian min ngaina ang em? Mahse, lehlam zawnga ka ngaihtuah chuan nula virgin, la upa lo tak, vanglai hmang ve mek ka ni a, pathlawi akara fa pahnih nei tawh, kei aia upa fe lehnghal han neih ngawt chu.. Chu lah ka awmna pa a la ni zui! Mi ten eng angin nge min ngaih ang? Nu Sangi te lam pawhin, "Kha maw ka tih reng kha. Hluteii vang alawm kan inthen. An inngaizawng a" tiin thu an thehdarh dawn chiang. Chutihrualin veng chhung mi te pawn, "An awmpui nula nen an inngaihzawn vang alawm Sangzuali'n a chhuahsan" an ti ngei ang. Chung hmingchhiatna zawng zawng chu ka phur dawn a nia. Dik tak chuan ka huaisen tawk lo. Mahse, ngaihzawng a nei ang a nupui a nei vat ang tih erawh ka hlau tho bawk si. Zorina chiah kha ka la ngaizawng a, vawi khat chiah mipa ka la fâwp bawk. Ka zei loh bakah ka tawnhriat ve tehlam kha a ho lulai ve êm a ni. 

"Hriati pawh chu khaw nge maw a kal le? " tiin a phun a. Naupang te chu ka thlak a, bual turin ka siam mek. 

"A leng" Alexa chuan a lo ti a. 

Kan inmelh ringawt. 

Naupangte chu bathroomah ka luhpui ta nghal a. Kan han infiam leh rih.. Inbual lai hian kan hlim thei ania. 

Ka bual zo, ka hruk mek lai chuan, "I lo leng daih a. Eirawngbawl pawh a hun dawn tawh asin" Pa Mapuia'n a tih ri chu ka hria a. 

Hriati'n, "Hluteii pawh a awm ve reng alawm.. Ani phei chu awmpui kumhlun a nia. Kei chu lânga rawn kal ka nia" a tih ka hre zui zat. He nu hian phuihnam chu a mamawh ve deuh chu a ni. 

"Ani hi awmpui a ni lo ka fate nu tur a nih hi" Pa Mapuia aw ka hriat rual chuan ka thil tih lai ka tawp chawt. Abby leh Alexa te nen chuan kan inmelh ta reng a. 

(Ka regular thei lo ka tih kha aw. Naktuk pawh a awm loh hmel. Ka bazar ve dawn sia. Sundayah aw.. Phunnawi loh hram tum ang aw.. Ka duatte u, harsatna hi kan nei lo thei bik si lo va 😍😊