Sawmdawnga

SAWMDAWNGA.. 

Ziaktu: Toni Râlte

Engvangin nge ka vei tlat? Ni lo, heti ang mihring hi ka ngaina tur a ni lo. Heti ang mi sual, pawisak nei lo, Thisena tuihal hi ka hmangaih theih tur chi a ni lo hrim hrim. 

Ni e, Malsawmdawnga chu api leh a nu te nen an khawsa a. Sâwn a ni. Apu hi Aizawl mi hausa hlun, hausakna dai thei tawh lo tur khawpa inbun nghet tawh a ni a. Nikum mai khan a thi a. Api hovin tihian an khawsa a ni. Anu hian pasal a nei ve zuai tawh a, fa an neih hmain an inthen leh a ni. Sawmdawnga chu a pi duat sual ka ti ngam sak. Kei aiin kum 2 in a nau a, kan birthday a inang chiah zui! A tet lai hi ka hre tam lo, phaiah a awm char char avangin. A graduate hnu-ah Zoram lamah rawn chuang chhuakin a hming a rawn tilar tan a. MZU-ah class kal vein a hming chauhin MA a zir ve a ni ber. Damdawi lam hi chu a ti chiah lo nain zu a in nasa a, thian a ngah si, pawisa a ngah bawk si. A nun chu a nuam khawp ang. Veng khatah awm mah ila, kan inhre ngai lo. Kei chuan ka hria, aman min hre lo. 

CYMA huaihawtin hnam lam intihsiakna neih a ni dawn a. Kan branch pawh chuan kan zir ve thin a. Kei hi nula satliah, ze zawi lam, cher lam leh derthawng tak ka ni. Lehkha ka zir tawh lo bawk. Ka ú dawrah puanthuiin ka thawk ve a. Unau pali zinga a naupang ber dawttu ka ni. Ka pa hian a hmingin hna chhete a nei ve a, ka u chiah mipa hian mat kamah huan a nei bawk a, huan lam a tui bawk a, kan eibel ber a ni mah tawh zawk. Ka nau erawh college a la kal ve. Kan upa ber hian pasal nei tawhin thawmhnaw dawr a nei ve a, chutah chuan puanthui pahnih min chhawr tel bawk a. A changtlung ve angreng viau e. 

Lam chu zan lamah Hall-ah kan zir thin a. Ka thiam ve zawng tak a nih vangin ka zir ve thin. Chuta kan lam zirna atang chuan ania Sawmdawnga chu ka hriat chauh. An thianhoin an lo kal ve a, an chimawm ngang mai. Lam ho chu an lo chhaih zawrh zawrh reng a, tleirawl deuh phei chu an lai titih mai reng a. Kan hruaitu ten an han hau ve tak naa an sim duh der lo. Kan chawlh laiin kan sawiho laih laih a. Kan thiannu chuan, "Sawmdawnga te ho chu menah thlak tur, tisawn awm ve mai mai rawh se. Mi chimawm tawpkhawk a nih saw" a ti a. 

An thenawm nula a lo awm ve a, Sawmdawnga chanchin chu a sawi ta a. "Insual hi a talent a niang tih tur a ni, englai pawn a inpeih at reng. Mahse, anu leh api thu hi chu a awih tho. A mizia hi a mak tawp. A pawng apuiin mi a va tibuai hmasa chuang lo naa an lo rik laih chuan a tlawm duh ngai lo hrim hrim, zu erawh a in nasa.. Sumah a buai bawk si lo va.. " Tiin. Sawmdawnga chu ka va melh kher a, min lo melh ve kur! Ka hlau.. 

A mitmeng lian kelkawl, mitmu dum zet chu a hlauhawm ka ti. A hmel phei chu a chhe lo. Vai hmel lam a pwl lek lek, a hnar ngul invuah dik thlup te, a hmui pawrh si lo va, chhah lek lek si te leh a biang leh khabe hmul to siar siar te chu a duhtu tan chuan tawrh a har ngawt ang. A sang si, gym-ah a kal thin aniang, zu in nasa tia sawi nisi a pian a dik angreng phian lawi a.. Hm.. Tleirawlho star pawh a hlawh reng bawk. An sawi sep sep chu ka hre pha reng mai. 

Zan tin an lo kal ve ta ziah a. An chimawm tluang zel naa, lam ve tura an tih chuan zei lo fahranin an lam ve leh mai bawk a. Zan khat erawh Hall pawnah an ri deuh luai luai a, kan va chhuak ve a. Sawmdawnga leh ka hriat ngai loh mipa pakhat hi an lo indinchilh ran mai. Hmelhriat loh zawka chu a thi deuh niai a, a tshirt pawh a tet hnuang mai. Hotu ten thil awmzia an han zawh chuan, "He mihring hian kan nula lam ho inthiar (zung) lai a lo bihthla tjin alawm.. " Sawmdawnga thiante zinga mi chuan a lo ti var a. Hmeichheho chu kan èè dual mai. 

"Sim ang che. Tun hnuah he lai hmunah i hmel ka hmu leh anih chuan, hospital i luh a ngai tawh ang" Sawmdawnga chuan a ti chher chher mai a. 

"Ka thu thu. He lai hi i pa ram a ni bik lo"

Sawmdawnga chuan eng sawi set set lo vin a kawr awmah a va tham nawk a, hneh zetin leiah chuan a paih thlu ta a. Rang takin an thelh thuai thuai a. Boruak a reh ta deuh a.. 

A tuk zanah an rawn lang lo. Kan ngaichang ru deuh thup niin ka hria. Lam fe hnuah an rawn lang ta a. Kan lo thaw huai mai. Boruak an tinuam ve tlat tawh. Tleirawlho lah an lo insik ru nasa. Nuihte lam a za.. Ka bulah a rawn ding vei thurh a. 

"Min zirtir ve la" a ti sup a. Ka han en chho ha a, min chhuk en run mai. Ka lian lo ve em lah taka.. 

"Nia kan zir dawn nia" ka ti ve mai a. 

"I thiam ber a.. " a ti leh a. Ka nui ringawt. Ka bulah a lam ve ta a, a zei lo lutuk chu ka nuih a za zel. "Nui tawh suh" a ti thul. Thiam lo chung chungin a lam ve zel a, a fel angreng. 

Kan zir apiangin ka bulah a lam ta ziah a, Kan innel viau lo naa kan inbe thei ve ta viau. Kan chawlh laiin ka bulah a rawn thu a, "Kha.. " a ti teh tawp a. Pepsi chu min pe a, "Ka lo leisak ve che nih kha" a ti leh a. Ka phuh tep. 

Zan khat a rawn kal lo va. Ka hrilhhai ngei mai. A mak tawp. Khami zan atang khan ka vei ta tlat kha a nia. A chanchin ka hriat belh atangin hmeichhia hi eng atanmah a ti lo, a mamawh lo. Ngaihzawng a neih sawi tur hria an la awm lo. Chuti ang mipa chu ka vei ve tlat sia. Hmelah leh khawsakah chuan ka phu lo rapthlak. Mahse, ka sawi thiam lo. Ka rilru a awm reng. 

Ka mut dawna ka ph ka en chuan, no ringawt atangin, "Zanin kha ka lo kal thei lo va. Anu a zin a, api awmpui a ngai a" a rawn ti a. Sawmdawnga a ni tih ka hai lo. Ka chhungril a lawm veng veng. Kan inbe tam lo. 

Khatia number te kan inneih tawn hnu atang kha chuan kan inbe ta zeuh zeuh a. Kei aiin a naupang a, tin, a luhlulin pawisak a nei lo bawk. Mahse, belhchian chuan kawm a nuam ve tho. Ka ngaizawng ru tih a hriat hlauin ka inthup nasa thin. 

"Nancy khan a star tawp che a" ka va ti a. 

"Ka hria, min lo be thin"

"A chhiat loh reuh em hi"

"Ka duh lo". 

"Ngati"

"Ngaihzawng ka nei peih lo. A ho"

"Eee" chhan dan tur ka hre tawh lo. Ka na tel deuh bawk nen. 

"Naktukah kan huanah kan picnic dawn a, lo kal ve rawh aw"

"Thian ka nei ve si lo"

"I thiante i sawm dawn nia"

An huan chu a nuam kher mai. Ka thiante pathum nen an ni thian panga nen, kei ni aia nau vek an ni. Hmeichhia an mamawh vak lo naa kan awm ve chu nuam an tih hmel ve tho mai. Zu an in a, ka thiante pawn an lem ve mai. Kei erawh vawikhat mah zu hi ka la tem chhin lo. In loh ka tum ve tawp mai a ni. Eirawng ka bawl a, thla ka la deuh sek ringawt. 

"Zu i in ve si lo va, a hrehawm em? " a rawn kal a. 

"Aih, a ho em mai"

"I fel e, nang chu"

"Teuh lo.. " ka mitah a rawn en a. Ka lai deuh. 

"Hawh ka fanpui ang che"

Huan kan fan pah chuan kan titi a. 

"Sawmdawng, ti nge min kawm ve mai a? " ka ti thut a. A ding chut. 

"Ka hre bik lo. I fel vang aniang"

"Ka fel kher lo. Mahse, i rualpui te pawh an awm awm sia.. "

"Lam kan zir ho thin vang aniang" a ti leh tawp. Ka va duhkhawp lo thin tak. 

Awih tlanah kan kal a, hnahthel a tam si, a kal hmasa a, ka inrin hmain ka tawlh thut, ka zuk bawh rawk rawk a, a lo inring bik lo nen, zawl laiah chuan kan inbawh ta run mai a. Hnai zeta inmelhin kan thaw ham ham mai. Zu rim a nam hiam a, ka khurh ang bawkin a khur vein ka hria. 

Rang zetin kan tho leh vat a. Kan inbeng fai mawlh mawlh a. kan lai chhe kher mai. 

"Phei tawh mai ang" ka ti a. Ngawi rengin kan phei ta a. Chaw kan ei lai te chuan kan inmelh rual leh zauh zel a. Kan mit kan lasawn rang thin teh e. A ngawi chawi riau bawk. 

Zanah, "Zu hi i hua em? " a rawn ti teh tawp a. 

"Hua e" ka ti hmiah. Ka patea zu seh vanga thi kha ka mitthla thei. 

"Kei chu a ruih hi a nuam ka ti" hmela mai mai chu.. Ka thutak tehreng nen. 

Hnam lam intihsiak ni pawh chuan kan inzui deuh chawt a. Mi lah hian min dem bel zeuh zeuh lehnghal. Kan lam zo chu ka lu a hai thut a, ka tlu thelh nghe nghe, sawmdawnga'n min lo kuah chawt a, a bak ka hre zawm tawh lo. Ka harh chuan damdawiinah ka lo awm. Ka chhungte an lo awm bawk. 

"I harh tawh maw.. I taksa chau tawngkhawng lutuk vang anih kha.. I tha leh vat mai ang' ka nu chuan a lo ti mawlh mawlh a. Sawmdawnga ka zawng deuh a. Ka hmu lo. A hnua ka hriat leh danin a thiante nen damdawiinah min lo hruai a lo nia, ka chhungte rawn thlen hnuah an lo haw ve leh a lo ni. An fel hle mai. 

Zan pwh riak lo vin kan chhuak leh nghal a, min rawn biak ka rin nen a reh hmak mai. Mak ka ti deuh. Mahse, ka ú leng hawin kan veng dawrkawna Sawmdawnga te insual thu a rawn sawi chuan mak ka ti leh ta lo. A rui leh tawh a ni mai. 

A tukah va wish pahin an insual chhan ka zawt a. 

"Kha pa khan a ex i nih thu a sawi a.. " tih chiah a rawn sawi. A vawi khat nan ka call, a la duh thak lo mawle.. Tu ka ex nge ni ta ang.. A hnuah ka thiannu Tluangi a rawn kal a, a rawn sawifiah ta a. Ka bialpa hlui Rina leng tur kuhva lam kawi leh Sawmdawnga te thil lei chu dawrah an inhmu a. Dawr nghak Nu Rami chuan ka luhai vel kha lo hre vein sawmdawnga chu a lo zawt thlithlai ve niaawm tak a ni. Chutah Rina pek chuan, "Kan nu hlui chu a va zia lo ve aw.. " fiamthu titihin a lo ti pek a. An ni rui lungpuam tawh si khan huatah lo lain, "In nu hlui anih pawh ka hre lo, pasal a la nei si lo va" Sawmdawnga chuan a lo ti khauh a. An inhnial chho ta a ni. Rina chu a hnek hrep! A hneh lo chai chai hle an tih chu.. Mahse, ka zak. Keimah vanga an insual ringawt chu. 

Zanah kan inbia a. Ka hau hrep. Rina pawh ka hau tho. 

"Ka bialpa hlui tih vela in lo buai a ngai lo, insual phei chu a tul lo hul hual.. " ti lamin ka hau. A la na ngang aniang. Min block hmak mawle.. Ka na leh roh si.. A va hahthlak tak e aw. 

Ni 3 vel zet kan inbe ta lo. Ka ngai lutuk. Kan inah a lo la leng ngai miah lo a, hmuh pawh kan inhmu tam lo. Mahse, kan inbe ve reng zel sia, ka ngai a ni mai. 

Mahse, ka mut dawnah a msg ka hmu ta hlawl mai. 

"Ate, bialnu ka nei ve tawh asin. A vawi khat nan" tih thu hi. Ka zawi hnawk thei. Chhan ngaihna reng ka hre lo. 

"Ka lawmpui che" tih thu chiah ka va thawn. Ka dah nghal hmak. Min unblock chhan chu bialnu a nei tih ka hriat theih nan maw.. Ka ngei lutuk.. 

Dawra kal turin ka insiam mawlh mawlh a, Sawmdawnga bialnu nei chu a rukin ka tuar hle. Mahse, ka intipachang a, kan nunphung zawng zawngte ka han khaikhin a, kan inmil rei dawn chuangin ka hre lo. Tin, kei chu nula hmel tha ka ni lo va, ka satliah a, a duhzawng pawh ka ni lo vang. Ú angin min en mai chauh a ni. 

Kan in atanga ka chhuak chiah tihin a carin a rawn tlan a, a rawn ding chat. Min ngen tlat vangin ka chuang ve ta a. Sawi tur ka hre lo. Kan ngawi char char. Kan dawr lamah a kal ta si lo, "Khaw nge kan kal dawn a" ka ti nghat a. 

"I hre mai ang" a ti mawl tawp. Bawngkawn lamah min tlanpui a, bazar piah kawng pengah chhuk thlain veng mawngah kan tlan zel a. A tawpah tuikhur bul lawka in lian lo tak kawtah min dinpui ta a. Ka chhuk ve mai. Ka titau bur bawk. 

A thianpa Remliana te in a lo nia. An thianho an lo awm thap. Zu rim a nam leh hak bawk. 

"Kan lo thleng" a ti satliah a. 

"Lo thu ru.. Lo kal rawh.. Ate" a lo ti thuai thuai a. Engmah thil awmzia ka hre lo. 

"Eng nge awmzia.. Eng nge kan tih dawn? " ka ti hú a. 

"In inru dawn" an ti ta mai..! Kareii! Mi mawlho hi.. Ka meng phawk teh e. 

"Tu nen" ka ti chiam a. 

"Sawmdawnga nen" an ti rual leh thap. Awiii, Sawmdawnga chu zah hmel deuh takin a thu tung út a. Min en duh miah lo bawk. 

"Eng nge awmzia? Ngaihzawn pawh kan inngaizawng lo va.. In mawl a mi? " ka thaw hap a. 

"Ngaizawng ang in ni. In induh ru ve ve.. Insawi ngam lo. Chuvang chuan tihian rem kan ruatpui tawp che u" Sanga chuan a lo ti var a. 

"Inngaizawng pawh ni ila, inruk kher a ngai lo" ka ti hmuk a. Ka thin pawh a rim lo, ka nuih a za mah zawk. 

Roomah Sawmdawnga ka kailut hmiah. Khumah a thu a, kei ka ding. Ka upa zawk bawk a, engkim ka tih a ngai tih ka hria. Ka zak duh tawh bik lo. 

"Bialnu i nei a, hetiang mai maia intih tur a ni hleinem. Bakah i la naupang lutuk, inruk pawh ka duh lo bawk. "

"Bialnu ka nei lo. Nangmah bak" a ti sup a. Mawla leh.. 

"Anih chuan hman zana min lo hrilh kha"

"Nangmah nih kha ka sawi.. I â mi? Hrethiam ve ta che" a ti zaw mah a.. Ka hah. 

"Min duh thu pawh i sawi ngai si lo va" 

"Ka sawi ngam bik hleinem" a ti nghut a. 

Tha deuhin ka hrilhfiah a, inngaizawng ve phawt ila, inneih chu hmanhmawh lo vang tiin. A tawp atawpah chuan a pawm ve ta nge nge a. Min han thlah leh ta phawt. 

Ka hlim veng veng. Mahse, mawlhtu ka la nei. Zu a heh lutuk hi. Ka simtir a ngai a ni. Ka thianten an han hriat chuan an lo rin lawk sa a nih vangin mak an ti vak lem lo, mahse, zu a in chu min ngaihtuahpui ve tho mai. Friday zanah a lo leng ve thin a. Ka chhungte mitmei tha a hmu ngai meuh lo. A chhan chu a hming tha lem lo ve bawk a. Ka nu phei chuan min hauh phah zing khawp mai. Kan ina rawn len a inthlahrun phah a, pawn lamah kan inhmu tam ta bawk. Fianrial hun neih fô takah chuan thisen lum ve ve ta chu tlukna sualah kan tlu lut ta hlauh mai. Khata tang khan ka hmangaih ni ta berin ka hria. A la virgin tlat! Kei pawh ka la virgin. Na kan ti ve ve. 

"Ka la virgin reng vang hian min hmusit em? " a ti! A teuh lo. 

Hmeichhia a mamawh ngai lo va, ngaihzawng neih dan a thiam lo. A zei loh dan atang khan rinhlelhna chhete mah ka nei lo. Keiman bul ka tana ka sawi hawn phawt zel te a ngai thin. A thianten sawi tur an hrilh te hi an hrilh ani tih te a sawi leh zut zut thin. Ka hlimpui a, ka nui hawk hawk zel. 

"I bialpa saw then ang che. Vwiinah pawh a sualzia thu ngawt an sawi leh tawh kha.. A zahthlak lutuk" ka nu chuan a ti hlawih hlawih a. Ka chaw bar tur ka thulh hmak. 

"Zu chu a in, mahse, a sual lo" ka ti. Ka huai ngawt mai. 

Ka pa erawh a la ngawi thei zel. Ka nu chuan min khak ta fô a. A lo len zan khat phei chu, "Inkawm tawh lo ula ka duh. Lo kal fo tawh lo la a tha " a lo tih khum a, khami tuma Sawmdawnga zak hmel khan ka awm a tinuam lo takzet. 

A ruka kan inhmuh tumin beidawng takin inruk mai a duh thu a sawi leh a. Kei chuan insiam tha phawt turin ka nawr thung. A tum thu a sawi a. A hlen a ngem le.. 

Api nen hian kan inbe thin a, a tupa nun siam tha tur hian min fuih ve nasa thin a. Khatia ka hnena a intiam tak atang khan zu chu in tawh loh tumin a inkhung ta hmak a. Chaw pwh a ei tha thei meuh lo. Mahse, an neihin a tlin bawk a, eitur tuihnai tak tak an hlui thei reng a. A zia mai e. A rukin vawi hnih chu ka va tlawh a, min lo ngai tawh hle aniang, api awm ve reng laiin min kuah thawk mai. Anu erawh sumdawnna vangin a zin kual reng a, vawi khat chiah kan la inhmu. A fel hmel khawp mai. 

"Te, kei chu inneih ka châk tawh. Mawh.. Aw ti mai rawh" a ti leh tlut tlut a. Class a kal mumal loh em vangin apiin IGNOU-ah admission a laksak ta ngawt kha a nia. Innei ringawt ila eizawnna kan nei si lo.. Rilru a buai. 

"Pi, Ateii hian inneih a duh tlat lo. Engtin nge kan tih dawn? " te a ti! Awiii ha… 

"Ate, ni e, i rilru a buai viauin ka ring. Ka tupa hi chu a la â si a. mahse, eizawnna vel hi chu buai lo la ka duh. In damchhung pawn in rethei lo vang. Sumdawn in duh leh bul ka tansak thei che u a, sum khawl lama in tan duh leh kan khawl mai ang a.. Engpawhnise, Asawma hi fel phawt mai se tiraw? " api chuan a ti dam diai a. A thlamuanthlak ngei mai. 

Zu nghei a tum atangin thla khat a tling tep tihin zan khat chu min lo call a, "Te, ka awm thei lo. Ka ngai che. Ka â mai dawn. Lo chhuak teh" a rawn ti. Dar 11 a pel tawh. Ka thaw hak a. Ka ngai ve lutuk tho. Thawm dim zetin ka tho ta a. Pawnah a lo awm khar mai. Hmanhmawh zetin an in lamah min hruai ta a. 

Khumah kan mu a, a hun hman dan min hrilh keuh keuh a, a chang leh kan nui dun a. Kan infawp bawk. Sex lam pawh a lang lo. Mitmeng tak zetin min melh a, "Te, sex hi chu inneih hma chu ka hmanpui tawh lo vang che. A na bawk si. Chuan, ti nge ka hmangaih em em che le.. " a ti a. Ka thinlung a dek zawr mai. A hmuiah ka fawp a. "Kei pawn ka hmangaih che"

"Enteh, lam zir lai kha chuan melh pawh ka melh tha ngai lo che. Mahse, i lam thiam em a, i hmuhnawm ka tia. Chuan tikhan kan inbia a, ka ngaina zel che. I ex nen kan insual vanga min hauh hrep khan ka rilru a na lutuk a, ka block che anih kha.. Ka ngai thei lutuk che. Ngaihzawng hi ka neih theih ka ring ngai lo va, a vawi khatna i nia, a tawpna i ni nghal bawk ang" a ti sap sap a. Ka chhang tawh lo. Ka duat em em tih a takin ka lantir thung. 

Dar 3 velah min va thlah leh a. Ka mu tlem ngei mai. 

Hun a kal ve zel a. Ka chhungte nekchepna pawh a nasa deuh deuh a. Sawmdawnga'n zu a nghei tak hnu kha chuan a reh ve mai ka nu mawlh hi a ni. Mi hian an lo sawipui ve zel bawk nen. Kan kamtam hlawm bawk si. Ka ning. 

Sawmdawnga pawh ka fuihna angin an hardware dawr a nghak ta a. Thahnemngaihna rilru a pu ve tial tial a, a rinawm ang tih pawh ka ring. Thikthu vang hian kan inhau khât khawp mai. Thik tur ka hre ngai lo. Vawi khat amah duh ve em emtuin a lo biakna a chhanna ka hmuh phei chuan ka hau zawk. "Ka duh ngang lo che a ni. Ka duh ka hmu tawh. I mizia kha ka duhzawng a ni bawk si lo va. Ka bialnu lakah chuan i tè lutuk" te a lo ti! A nui put put lehnghal. 

Anu hian a uap hman meuh lo bawk a, anu ang deuha min ngaih changte pawh a awm thin. Kei lahin ka lo duat ve si. Kan hlim a ni tawp. 

Zan khat kan inkhawm bang, min thlah haw chu zu rui pathum te nen kan intawk a. Ka bible thlauh khawpin min su leng lawp mai. A ze dik tak, a lo than hnan tawh kha rawn chhuakin Sawmdawnga chu a ter at mai. Rui lo hai lo vin mi a sual leh ta! Thelh ka tum, a thinrim tawh si. Rui lo na ná na chu hneh mawlh hek lo. Mi dangin an lo pawh pen hma chuan a khawih na hman hle aniang, damdawiinah an tlanpui! Ka hlauthawng ngei mai. 

A tukah ka nu an hla ka hre nghal. Ka ner sawk. Ka then loh chuan min hnawhchhuah mai pawh pawiti lo awm a ni. A tawngkam chu. Kha zurui kha Sawmdawnga piin a lo han kan a, a inenkawlna senso te pawh a tumsak ta vek a. Sawmdawnga eraeh a kal duh lo. 

Ka nu chuan min nawr nasa ta mah mah. Sawmdawnga pi a va hmu thul. Ka zak ta viau. Ka pa lah hi ngawi reng ringawt bawk si. Ka then phal tawh bik si lo. Then pawh tum ila amah hian min umzui zel tho ka ring. 

Zan khat ka nu nen kan inhau lrh chiam a. Ka thinrim ve takzet. "Sawti ang sâwn, pi leh pute hausakna zarzo ve mai saw i duh a maw? I taksa chiah a duh. Nawmchen nan bak a duh lo che. He in chhung hi a rawn rap leh anih chuan in pahnihin in chhuak tawh ang" a ti riap mai. Keia luhlul laklawh tawh chuan ngaihtuahna fim ka hmang thei tawh lo. Sawmdawnga ka call a, min lo hruai turin ka ti hmiah. Ani lawmah a lo tla. A rang arangin a rawn kal. Ka room tukverh atangin ka thawmhnaw ka thlak thla a, kei erawh ka nu an tui lai takin ka chhuak zeuh. Chak zetin kan tlan ta a. 

An huanah kan kal daih. Kha hun tluka hun nuam leh duhawm kha ka damchhunga ka tawn leh theih ka ring tawh lo. Kan pahnih chauhin, engkim kan ti dun a. Kan hlim a, a chang leh kan titau. Sangha kan man thul, thing kan inlawnsiak loh leh tui kan cheng a. Ei tur chu huan enkawltute kan leitir a, engmah ngaihtuah buai a ngai si lo. Vanram a ni ringawt mai. Sex pawh kan hmang nasa. A nawmna pawh kan tem ve ve tawh. Inzah tit tet a awm tawh lo bawk a. Inneihna hlimawm tak a ni e. 

Chawlhkar hnih lai kan awm bo a. Api te nen kan inbe reng a. Ka chhungte chu an sa kher mai. Mahse, nakinah an la pawm ve theih mai ka beisei. Ka bulah min hmanhaihtu a awm tlat si a. 

Inru ve ta chu min hruai hun a awm lo thei lo va, kan in lama ka hawn dawn chuan a lungai takzet. Inthen hlen tur ang mai hian a awm. Kei chuan ka hnem char char a. Inah ka hawng a, ka nu thinrim ang thawm chu ka ngaithla leh ta phawt. Palai an lo kal a, ka beisei loh daihin thu an kalpui ta. Sawmdawnga MA pass zawhah innei turin thu an titlu anih chu.. Ka so bawrh bawrh. 

Amah nen kan inhmuh pawn a lungawwi lo kher mai. "A la rei dawn asin. Ka nghak thei lo vang. Inru leh mai ang" a ti a. Mahse, ka ngam chiah tawh bik si lo. Dawhthei taka nghak hram hram turin ka fuih ta zawk a. Kum khat nghah a ngai anih chu.. 

Innei mai tur kan nih tho vangin a rawn leng ve ta fo a. Zu a in leh ang tih mawlh ka hlau thin. Ka hlauh ang ngeiin zan khat chu a rawn rui ta tlat. Ka thinrim a, ka be tha duh lo. Mut dawnah, "Te, a harsa em a ni. Kei chuan awmdun reng ka duh a. A rem si lo va. Ka khuahar sia, ka in leh ta mai a ni. Ka ti tawh lo vang" a rawn ti a. Ka hrethiam tho naa ka hau tho. 

Thla hnih a ral a, ka rai tih ka hre ta a. Sawmdawnga ka hrilh nghal. Rang lutukin a rawn kal. Kan lawmzia leh hlimzia chu aw. Ka nu pawn min melh tlawk tlawk ringawt. 

Nitin deuhthaw a rawn kal a ni mai. Ka ei chak zawng ka sawi apiang a ti zat zat. Ka dul lah kan teh zing. A puar ve al tawh a. Thla 7 anih phei chuan ka zo lo lam a ni. Phir anih ring lo an awm lo. A puar lian em a. 

Thla 8 a rawn nih chhoh takah phei chuan min awmchilh deuhthaw a ni mai. Ka chhungte pawn min enliam deuh tawp tawh. Ka nu pawh a nem ve tawh khawp mai. Inrinni zing a ni a, an in lamah a va haw zawk a, dawr pawh tlawh hram a duh vangin min hrilh lawk sa a, a rawn lang leh lawk si lo. Ka call a. A pick up thei si lo. 

Ka nu hi thaw hlawp hlawpin a rawn tlan lut a. "Mate, Sawmdawnga a thi" a rawn ti ta.. Ka tlu tawp. A bak engmah ka hre lo. 

Ka harh chuan damdawiinah ka lo awm a. Ngui nghiaia min lo thlir thaptute chu ka melh kual a. A tel ve lo. 

"Engvang nge.. Mawh.. Dawt a ni tiraw? " ka ti mawlh mawlh a. Ka nu chu ka melh a. 

"Mate, an dawr bungrua an unloadna lamah bungruain a delh palh a. Pawi ka ti lutuk" a ti a. A tap a. Kei eraeh ka tap thei lo. A ruang pawh ka kil hman lohin an lo vui diam tawh. Kei chu mihring ka ni ta lo. Engmah ka ni lo. Engmah. 

Ka pasal, ka hmangaih berin min liamsan atanga kum 20 a liam meuh chuan, kei chuan tarmit ka vuah tawh a. Ka kut te pwh a khur tan ta. 

"Nu, Sawmdawnga a lo haw" ka fanu chuan a ti lang lang a. 

Kawngkaah chuan ka fapa, apa nen danglamna nei mang lo, hmel tha tak chu a rawn dak heu mai. A farnu, a phirpui ni bawk nen chuan an inpawm chuk chuk a. A bek dinglam khem nian leh a kiu belkang vu chu kei a nu hian ka hmuh hmaih lo nasa.. 

"Eng nge i taksa kha a awmzia? " ka lo ti ha a. 

"Naaa.. Nu, nang chu min ngaih thu sawi hmain zawhna min zawt leh nghal a.. Hei chu kan insualna nih hi.. Vaiho hian min zuam ve ngawt a.. An chawh ngawt mai" a ti puat a. Ka maimichhing ta ngawt a. Ka pasal ka hrechhuak nghal. 

Zanah zanriah kan kil laiin, "Bawiha, bialnu te hi i nei ve em? Mo neih ka châk tawh ania" ka ti a. 

"A mak! Nuuuuu, eng atan nge hmeichhia ka tih ang a? Ka farnu leh nang in awm a. A tawk. A ninawm. Ngaihzawng tih vel" a ti hluk a. A nau a lo nui kur kur.. Kei eraeh chuan mi pakhat ka hrechhuak tel zel thin si.. 

Bawiha.. Ngaihzawng i la nei ve chèk ang a, chu chu a tawpna pawh nihtir i la tum vein ka ring.. Mahse, i pa ang mai chuan kalsan ve miah suh aw.. Ka ti rilru a. 

Ni e, hringnunah hian chhum dum leh thlipui a lo thawk fô a. Min sawi lawp lawpin hmalam pan hlei thei lo vin min kai peng thin mah se.. A bul atanga tan that leha siam that leh theih hian Pathianin khawvel thar min chhawp chhuahsak leh thin… 

Sawmdawnga hringnun hi engtiang nge ni ve ta ang le… 

(In chawh aw.. 😆😆