Ramthanpuia

RAMTHANPUIA.. 

Ziaktu: Toni Râlte

A hming sawi apianga sawi tel ngai ziah chu, 'play boy' tih hi a ni. A lerh ngawih ngawih a ni tawp! A hur tel lehzel bawk a. A nun leh mize phú lohin eizawnna a nei tha zèk roh a! Dik tak chuan thian atan chuan ani tluk an awm bik lo vang tih theih khawpa thian nih tling a ni lawi si. Inhmuamúp ni si lo hian a cool raih a. Ze dam pui a nei thlup mai bawk nen, eng topic pawh sawipui theih vek an tih tur khawpa khaw hawi zau leh fingvar ve tak a ni a. Chung a mize changkang angreng tak te avang pawh chu a ni maithei, hmeichhia hi a hneh leh zung zung mai thin. Mizo paah chuan palian thelhthawlh pawl tak, 6'1 ft a ni a, a cher lo va, a thau lem chuang lo. A hmaitluak a tha a, a vun pawh a mam vei phian a. A mitmeng chu a na mah mah em aw tih theih tur a ni a, mitmu dum uluk zet a neih vang te pwh aniang e. A hmui hmul hi tlem lai atang khan a zuah ve deuh nge, a to deuh siar siar chuan a tilang pa zawk emaw tih tur a ni. Mipa puitling kum 32 lai chu a ni ve tawh. Nupui neih pawh hman deuh khan a tum ve thut thut a, mahse, a nupui tur kha a thianpa cousin nen a hmaa sex an lo hman tawh vang maiin a iai leh ta mai kha ania! Ani pawh hian sulhnu pawr eng emaw zat zawng a nei asin le.. 

Tunah hian MZU-a Geography department-ah Asst. Professor ni mèkin, a nitin hna chu nuam tih hmel takin a thawk thin. A student zingah ngaihzawng a nei ngei ngei ti ila kan sawi sual awm lo ve. Hmeichhia hi uitè ang deuhah a ngai nge, a nin chinah a thlak mai zel a. Kawp erawh a duh lo ve thak. A tenawm zek zuk ania. 

Mahse, Ramthanpuia, Valpuia tia koh nisi hian a nuna a vawikhat nan hmangaih a la tawn ve ngei a rinawm a. Engtin tak hmachhawn ang le.. Kan sawi ang. 

Kum 2018,August thla a ni a, class tan tur an lo kal zut zut a. Khua a nuam chiah lo naa, hrehawm ti hmel an awm lem lo. Geography Department lam hi a aw thum chi an tam deuh thin a, vawiinah erawh aw sin lam 16 lai an awm ve. An zingah chuan, Remruati, Tuna MLA ni lai mek, Pu Chhuanmawia fanu pawh a awm ve nghe nghe. A nalh a, an enzui vawng vawng thin. Khal tawk tak, vun nung zet mai a ni a. A sam chu a kir chiat a, a buang tháng mai bawk a. A hmui sexy zet chuan a tilang nu hliah hliah mai. Nula lian lam a ni bawk a, an class mipa zingah amah aia te an awm. Nui har har chungin a thiante nen an inkawm a. A hlim hmel chu hmuh a nuam viau. An senior te chuan, "Saw ngei saw Sir Valpuia bitum leh tur a ni ngei ang" an lo ti rilru lawk a. A dik ngei pawh a rinawm. 

Sir Valpuia chu a rawn lut a, hmeichhe thenkhat an lo insik nghal. Remruati mit pawh a nghal ve deuh. Introduction te a han pe a, naupangte pawh chuan an pe ve bawk a. Remruati a langsar fal nalh. A hnuhnungberah chuan hmeichhe te reuhtè, ngo ving veng, zahzum hmel zet hi a rawn lang ve a. 

"Ka hming chu Saizâmpuii a nia, ih, Lunglei Bazarveng atanga lo kal ka nia, tunah Ainawn hostelah ka awm mèk" a ti a. Chimawm chhuahin, "Sailo in ni ngei ang maw? " Valpuia chuan a lo ti hmanhmawh a. 

"Aih, Ralte kan ni" a lo ti a. An nui dar dar a. 

Chu chu Saii, Remruati leh Valpuia te pathum khawvel bultanna chu a ni. 

Kar khat lai class te an han kal hnu chuan an innel ve hlawm tawhin, nuam an ti chho tan viau a. Remruati chu a luck viau nain, Sir Valpuia mitmei an veng nge an chim luih luih lem lo. Sèp erawh an sèp nasa thin. Amah dawta chhe lo fal leh deuh hlek Rinkimi pw'n chhaih a tawk nasa tan angreng a, amah mi phawk chi a lo ni bawk a, a bula awm nuam an ti tlang thin hle. Saii erawh a thianpa, a best friend Bena nen an inzui chawt a. Classah pawh an thu dun. A hmel chhe miah lo, mahse, a tè. Tin, mipa a zui nasat vang nge tuman chhai enah an en lem lo aniang e. 

Ruah a sur vak tumin Remruati leh a thiante pahnih chu Valpuia rualin an haw a. Khata tang khan tu ka atanga chhuak nge hriat ni suh, inngaizawng thanin an thang tan ta a. Remruati lah a lawm zawk emaw tih turin insawi thiam a tum eih bawk si lo, Valpuia lah a ngawi tlut bawk si a. Valpuia lo star ru ve deuhtu ho te pawh chuan mi dang pakaina an melh tan ta ngawt mai. 

"Vawiin chu discussion nei ta mai mai ila, kan subject huang chhung ami kher lo pawh. In duh duh a ni mai" Valpuia chuan a ti a. Class a boring lutuk loh nan hetia tih hi a ching ve thin reng reng a. Mipaho chuan an han sawi laih laih a, an topic erawh, 'Women empowerment hi a sang ta mah mah em mawni aw' tih lam a ni. Mipaho chuan kan ramah chuan a la tul tampui lo a, kan hmeichhia te dinhmun hi a la tha tawk viau, ti lamin an sawi laih laih a. Hmeichhe lam chu an rawn ding ve a. 

"Hmeichhia kan nih vanga mipa thuhnuaia kun emaw an rorelna hnuaia awm kherin a tul lo va, danah chuan kan intluktlang vek. Chuvang chuan kan dinhmun leh kan thuneihna hi inchhungah pawh a inang vek tur a ni" Remruati chuan a rawn ti lawng lawng a. Thenkhat chuan kut an lo beng a. 

"Saii, nang chhim lam aiawhin han sawi ve teh" Valpuia'n a tih takah chuan, "Kei chu kan dinhmun hi tha ka ti tawh khawp mai. Kan inluling mah mah tawh zawk em aw tih theih khawp a ni tawh zawk. Hman lai kan pi pute huna hmeichhe dinhmun ngaihtuah chuan kan power leh dinhmun hi a tha tawh a, tin, hmeichhe thenkhat mipa te nena intluk tlanna duh te pawh an tidik ka tih tho rualin, chhungkuaah chuan pa berin rorel se.. Thil a kal fuh zawkin ka hria, Arpa aia Arpui a khuan rin zawkna inchhung chu a nuam ngai tak tak lo" a rawn ti ve fak fak a. An ngawi dúk a, mahse, mipaho lawm zawng tak a lo ni nge kut an beng ta dar dar a. Remruati mitmenga eng emaw lo lang chu Valpuia chuan a hmuh hmaih miah lo. A nui suk a. 

Canteen-a an chawlh laiin, Remruati chuan, "Saii, chhim kun lam i ni bawk a. Isua pawh Thuama (tri) in ti tiraw? " ring deuh hian a rawn ti a. Saii chuan nui sak chung hian, "Ti bik leh chuang miah lo" a ti a. An nui leh dar dar mai. Chhim lam an awm ve nual bawk a, a chhim leh hmar ang zawnga lo tangru ve teuh an awm nual ang. 

"In town hall-ah table tenis in khel ngai em? " (tri anga lam vek tur, ka keyboard hian a nei ve leh pek lo anih hi) a rawn ti leh a. An nui vak vak a. 

"Khel leh chuang miah lo, anih 22 hi han lam teh" Saii chuan a rawn ti leh khauh a. Remruati chuan a rawn lam a, "Chhim lam i va ang tho si ve. Twenty two tiin lam ta che" a lo ti. Lo nui char char an awm a. An boruak a sang ru hle. Mahse, Saii chuan thil an ei zawh veleh bill a pe a. A kalsan ta nghal a. 

Khamini atang khan a chhan sawi fak theih loh hian an intai hlek hlek reng a, an class boruak pawh a tidanglam ve deuh. Valpuia chuan a hai miah lo va, a nuih a za ru hle thin. 

"Nizan chu Sir leh a bialnu te aniang, sawtah Bai báwm-ah chaw an lo ei ve asin. " Remruati thiannu Sawmi chuan a ti a. Khatia inngaizawng anga an than tak chiam hnuah khan boruak engmah a awm leh tak si loh vangin a thiannu leh an sir chuan inzawmna an nei lo anih a ring ve te pawh a ni mahna. 

"A ni lo vang, ka'n zawt ang e" tih pahin a phone khawih a rual nghal a. A thinlunga thikna meipui alh hlup hlup chuan a biang a tisen hlar a. 

"Sir, nizan chu a va nuam awm ve" a va ti tawng a. Zantin an intext ve thin bawk a. A ngampa phian. 

"Nuam ve tho mai" a rawn ti a. 

"In nu mi? I dine out pui chu"

"Ka ex"

"Hmm.. Ka lo hlauthawng hman tawp a" 

"Ti nge i lo hlauhthawn"

"Miin min sawi dan i hre vek a, ka tan a nuam lo lawm"

"Kan ni lo tih hrilh mai la"

"An awih tawh chuang lo vang"

Ve tlat mai a, Remruati hian Valpuia a ngaizawng tih phat rual a ni ta lo. Zantin an intext tih pawh kha Remruati bultan zel ania, Valpuia tak hi chuan reply loh chang a nei fô. 

An class picnic tur chu an phur hlawm ngei mai. Valpuia a kal ve dawn lehnghal. Spot an thlen chuan Remruati leh Valpuia chu an bo nghal daih! Mahse, tuman an zawng lem lo. Thil thleng ve tur rengah an ngai tlat alawm. Saii leh Bena chuan eirawng an bawl a. An titi siam siam a.  

"Nizanah pawh min lo be leh a. Ka ning ee.. " Saii'n a tih lai chuan Bena chu a lo nui hak a. 

"Amah bak i hmuh zawh chuan loh kha, ni leh mai ru" a lo ti a. 

Rum zeta melh pahin, " Lentar ka thlang zawk" a ti a. An mi sawi chu Saii ex Hruaia a ni. 

Sir Valpuia leh Remruati te pawh an rawn lang ve tawh a. Remruati hmel chu a hlim ngei mai. A hawi deuh larh hian a hriat a. A tum ber kha a hlenchhuak ta em mawni dawn ni. 

Saii'n tui chen ve tuma a inthlak zo rawn chhuak chu, "Saii, ti nge nizanah ka message i reply loh? " Valpuia chuan a lo ti tâwng a. Awmve dangho an meng phawk teh e. 

"Ka lo muhil daih a" 

"Zingah pawh"

"Thawh ka hai a, phone ka khawih hman hleinem" a lo ti hlar a. Chuti anga ngam deuha a lo chhanna te chuan mi dang mak tih a hlawh a. Remruati mitmeng tawrhhlelhawm hmanzia pawh hai der chi rual a ni lo ve. 

"A pawimawh tehlul nen" a lo ti satliah ve mai a. 

"Nia, zanah aw" tih pahin tui cheng turin a kalsan ta daih a. Valpuia khi suk chu hmuhnawm a tling. 

"In inbe thin law" Remruati. 

"Be ve zeuh zeuh"

"Nih tak chu" titau tih hriat zet hian a lo ti a. 

Valpuia chu tui cheng turin a kal ve daih. 

Remruati thiante chuan khawiah nge an kal tih an zawt nghal sap sap a. 

"A cousin te inah kan peng lawk alawm. Rin aiin kan rei leh sia" a lo ti ve mai a. An han dâwp kual vel a, nui har har chungin, "Chutiang in kan awm lo, hun thawl a awm lo ve lutuk a, kei phei chuan nuam lo ka tihzia, kan senior te an kal ve vek sia, mahse, aman a ti tlat sia, ka hnial ngam lo va" a ti leh a. Tui cheng turin a insiam ve ta nghal mawlh mawlh a. 

Valpuia chuan Rinkimi te ho chu tui chen a zirtir a. An rak teng tung a, nuam an ti kher mai. Saii erawh a hleuh pap pap reuh a, "Saw sangha te chu tui a cheng thang a ni maw? " valpuia chuan a ti sap a. Remruati ngaih dan pel tawk vel hian Saii a lo thlir hman ziah. 

Volley ball an khel a, A ruka thinrim tún chungin Remruati chuan a khel ve a. Lehlam pawla Saii awm ve vang a ni pakhat. 

Saii service hun a thleng a, ball vawrhin a zuang kang auh a, a tet phú loha na hian a beng pawp mai. Vanduai asiamin Remruati luah tak a va per a. A awp rawk mai. Thinrim sa a lo ni bawk nen, a ter at mai le.. 

"I tum sa reng a nih kha.. Min ben per i tum hrim hrim" a ti ta hrep a. Saii chuan, "Ka tihpalh lutuk, ka tum miah lo" a lo ti a. Senior te chu rawn tawngin an boruak a dai ta hram a. Remruati lung erawh a la dam mawlh lo. 

"Volley ball pawh a lo thiam lehzel anih saw" Valpuia chuan a ma hriat tawk lek hian a ti sup a. Khami ni Discussion an neih ni atang khan Saii hi mi danglam hmuhin a lo hmu daih tawh. Ngaihzawn ena a en erawh hriat a ni lo naa, class luh a phur phahna a ni ve tlat. 

Chaw an ei lai chuan, Remruati bula thu lo vin Rinkimi te bulah a thu a. Saii te ep chiahah. Remruati chuan chaw a ei hman meuh lo, a hawi nasat em avangin. An haw tur inpuahchah lai chuan, "Kimi, chintawk hre rawh aw" a ti ngawt a. Rinkimi, mi pawisa tehchiam lo a lo ter ve at, "I bialpa pawh ni hlei lo chu nge i thik ve ngawt? In inngaihzawn loh tawp kha" a ti ta zèk a. A chhang ngam miah lo. A thikthu chhiat luatah hmelma a insiam mawlh mawlh dawn a ang hle mai. 

Ni khat chu Saii a rawn kal lo tlat mai a. "Bena, ti nge Saii? " Valpuia chuan a ti a. 

"Niminah khan apa damlo an rawn hruai a, a han awmpui ve a" 

"A va pawi ve aw. Apa kha cancer tiraw? "

"Aw ni e"

"Anih chuan, a class ang zawng pawha han kan ve a that chu" tih pahin class CR a va melh a. A chhuak zui ta nghal a. 

Saii chu a pa dam lo, cher zet tawh mai kut chu zútin a tawng siam siam a. Kawngka bul atanga thlir rengtu a nei tih a inhre lo. 

"Pa, hei hi in leh tum teh, tlem tal aw" tiin a bula bottlea tui fim zet chu a han hawng a, a tulh mek lai chuan, "In tha zel maw? " tih ri avangin hnunglam a hawi a. 

"Umm, kan tha ve zel mai. I lo kal a, i van fel" 

Thuthmun remin Saii chu a melh vang vang a, "I ngaihawm em a" 

"I tenawm" hei hi ania Saii danglamna chu.. 

A ten tak tak bik lo vang tih eraeh a ring. 

"A ei theih zawng ka hre si lo va, engmah pawh ka rawn keng lo"

"Engmah hi a ei thei tak tak lo, a pawi lo, i lo kal a, a lawmawm"

"In class ho khan an rawn kan ta che u em? "

"Umm, in nu leh a thiante tih loh chu lo kal e"

"Tu kan nu? "

"Remruati"

"I hre thelh.. "

"Rinkimi maw"

"Ni chuang lo" 

"E"

"Khatin min chhang tawh suh ka tih kha.. Saizam"

"I thu mi? "

"Thu"

"I lerh"

"I hre ve chiah law"

"In nu phalna te i la em? I lo kal hi, min hau leh vak ang e aw" 

"I ninawm teivet.. Kan nu tia ka la koh tur chu nangmah chiah" 

" i va tenawm tak" 

Valpuia mitmenga hlimna chu hmeichhe dang bula a awmin a lang ngai lo. Student leh zirtirtu an ni a, an inpawhna a tha thawkhat viau mai. Valpuia hian Saii hi a ngaizawng ta hle tih mai loh chu. 

Apa pawh a zia ve leh deuh bawk a, class a rawn join ve leh tawh a. Remruati nen an inbe thei mang der lo chu a hahthlak tih chang a nei fö! Mi dangho chu a chungah an sual hran lo. Rinkimi nen phei chuan an in kawm ve ta fô.. 

Valpuia rawn kal loh ni-ah Remruati a rawn kal lo ve leh chat thin hian titi a siam leh zauh thin a. Mahse, inngaizawng tia sawi fak theih si loh hian class leh canteen velah chuan an innamnul liam tho si. Remruati chuan a bialpa a nih loh thu a sawi ngai lo va, Valpuia pawh a ngawi tho. Saii bulah erawh a bialnu a ni lo tih a sawi thung. 

Fried Rice a thial chap chap lai chuan, a bulah a rawn thu ve a. A lo núr deuh. Remruati a awm ve reng sia. 

"Ei i duh nen i lian thei mang si lo' a ti sup a. 

"Nang anga len hi ka chak bik lo aw"

"Tawng thei reuh siah"

"Nang fee" tawng thlawn an ba duh lo dun ngat ngat thei ania. 

"Vawiin tlai chu aw.. Ka rawn lam ang che"

"Zep loh chuan ka phur lo ee.. "

"Lo insiam ang che" a kal daih! 

"Khaw nge in kal dawn a" Bena chuan a lo ti var a. 

"A birthday ania, min sawm anih kha"

"Nge ka lakah hian i zèp tlat a.. In ni tawh tih hriat reng, sawi ve mai tur che nia' Bena chuan ring deuh tak hian a ti ta láwng lâwng a. Remruati an melh ru thup mai. 

"Kan ni tlat si lo alawm"

Remruati zak leh tlawmla bawk si hmel chu a tha tawh miah lo. Khin thama a ngaih loh Saizampuii chu amah aiin Sir lakah a tla na zawk tlat si. An. Class ho vin an hre vek lehnghal. A za vek. 

"Saii, Sir nen in inbe thin mi? " classah a ruk deuh tak hian a ti ta tawp a. 

"Be ve zeuh zeuh"

" Play boy anih hi.. A bum ve che ange aw" 

"A bum tawh che mi? "

"Min bum anih ber hi.. " a tap tep mai. A khawngaihthlak letling. 

"Bum emaw i inti mai mai anih kha. Dik tak chuan, in inkarah engmah a awm lo va, awm emaw i tih tlat vang zawk a ni"

Hei hi thudik tak chu a ni chiah a. Remruati hian a bialpa anga a cheibawl chawp vangin hliam a tuar mai mai a ni. Valpuia hian a bum lo va, bum tur pawn inzawmna an nei miah lo a ni. 

"Sir, ka kua a tha lo va, ka lo kal thei lo vang. Tihpalh aw" Saii message chuan a tithinur hlur thei mawle.. 

Khatia Saiin chhuanlam a siam atang khan kar khat a liam tawh a. Valpuia chuan bialnu a nei ta. Political Science deparment lam mi Jenny a ni a. Hmeltha pangngai, thawveng zet a ni. Remruati chuan a tuar na ngang mai. An inzui nasa mai si a. 

Saii leh valpuia chu an inbe ngai ta lo. A chhan a awm ngei tur a ni. Tu khaw kha hriatpui si lohin an intina tawn a ni ber mai. Khamini Valpuia birthday phuahchawp ni khan Saii kha a kawthat loh chhuanlamin a kal ta lo kha a ni a. Mahse, a cousin Dinpuia'n an ina riak tura a rawn hruai, an inphur lai kha Valpuia chuan a lo hmu leh si. Chu chuan thinlung nem kha huatnaah a chantir ta a. Mipa chapona a cho chhuak ti ila kan sawi sual awm lo ve. 

Dik tak chuan Saii pawh hian Sir hi a duh lo a ni lo, mahse, a rinngngam lo va, Remruati mitmei a veng bawk. Bum nih a hlau a, kalsan anih hnua a zah dan turte ngaihtuahin risk lak a ngam leh ta thin lo a ni zawk. Hetia Sir leh Jenny innngaizawng ta pawh hi a rukin a tuar tlawk tlawk mai a ni. A chang leh a inhua a, chhuanlam kha siam lo in kal ve ta mai se tihte a ngaihtuah fó! Mahse, khatih lai khan a la induhtawk a, Sir khan a ngaihthiam theih mai leh a ngaihhlut zawk a lo inrin vang a nia. A inlak value-na chuan nâ a siamsak ta zawk a ni e. 

Be hmasatu nih a tum lo naa a last seen leh status a check reng thung. A runluih emaw tih turin status te chu a up thin a, Saii chuan rilru siam fel tumin theihtawp a chhuah phah ta thung. 

An class pawh a nuam ta vak lo. Remruati a kal khát tial tial a, a kal chhunah a ngui ngjiai a. A khawngaihthlak reuh. Saii erawh a pangngai reng mai. 

"Chhim kun lam khan tuizem hi engtin nge in tih kha? " canteenah Valpuia chuan Saii melh chungin a ti a. Mi dang an lo tawng nak nak a. 

"Tâwp/(trâwp) kan ti" a ti hmak a. 

"Laui te, Kawiâm te pawh in nei tiraw? "

"Kan thu thu"

"Khatiang kha sir te biak dan tur em ni? Nang hi hman atang tawhin i chaltlai thei riau mai. Ka hauh ngai loh vang che a ni maithei, tun hnuah ching tawh suh" 

Saii chuan a mitah tak a rawn melh a. Saii mita na inphum ru chu a hmu thei. A feel thei. 

"Nang pawh zirtirtuin a zirlai a biak dan turin be ve tawh ang che" a ti ve sak a. A tho nghal. 

A khur ru der der, a zak a, a nâ. Khatiang em em khan a lo haw tawh a ni maw? Eng nge alakah tihsual aneih? 'I tenawm" a tih bawng bawng pawn a nui mai zel kha a nia. Tun ataka mi dang hmaa a timualpho chu a na takzet. Remruati nui hmel a hmuh phei chuan a za vek thei.. 

Valpuia chuan a status viewer te a han en a, Saii hming a hmu lo. Nidangah chuan a hmasa pawl a ni thin kha a nia. A last seen check tuma a lut chu engmah a lang lo. Saii'n a block! 

Vawiinah a tizak a. Phuba a la anih dawn hi. A awm ve khan a nuam a, Saii vang bawkin a online thin kha a ni asin. He nau hi a chhaih kual rei tawh a, a rilru a let ta aniang e. Engtin tin emaw khaminia Saii phurtu kha a cousin a ni tih te a hre leh hnuhnawh tawh bawk si. A awm a nuam ta miah lo. Saii rilru chu a let tak tak ang tih a hlau ta kher mai. 

A call ta tawp a. "Ti nge min block"

"A ngai a ni mai"

"Block tham khawpin i thinlungah ka tla na tawh a ni maw? "

"Nia, chuvang chuan ka block che"

"Naktukah inkawm lawk ang hmiang"

"Sawi dun tur kan neih ka hre lo" 

"Ka hria lawm.. Keiman" 

"Bialnu nei ka kawm ngai lo. "

"Naktuk chu aw, chuan min unblock rawh" a dah ta a. 

A unblock ta chuang lo. 

A tukah chuan Saii chu tlai zetah a rawn kal a. Class ban rualin hmanhmawh zetin a haw nghal. Valpuia chuan a call ngat ngat a. A pick up duh miah lo. 

"In hostelah ka rawn kal ania. In warden ka hmu mai ang" a rawn ti. 

A chhuak ta nge nge a. Helipadah an chhuk a. A tum bur mai. 

"Engkim hi i cho chhuah a ni" a ti phawt a. 

"Ka duh loh thleng thlengin min nawr lui alawm" a ti leh a. 

"I duhthlanna a ni e" a lo ti sap a. 

"Saizampui" tih pahin a kuaiher lawp a. A fawp mawlh mawlh mai. Na zetin a nam leng dawrh a. 

"Play boy ka ngaizawng ngai lo" 

"Play boy ni lo turin min siam thei"

"Ka tum lo zawk mai ang" 

"Hmanni vang khan i la thinrim em ni? ngaihdam ka dil che. Ka tihpalh. Ka rilru i tibuai em a tin ni"

"Ka tibuai tawh lo vang" 

"Engtin"

"Bialpa ka nei dawn alawm"

"I ngam phawt chuan i nei dawn nia. Eng nge ka tihtheih i hre mai ang" a hmela tumruhna lang chu a fiah viau. 

"Anih eng titurin nge min duh a? "

"Ka ta chauh ni turin"

"Nang chu jenny ta i ni thung anga"

"Jenny chu a lem. Ka thianpa nau anih saw, nau anga ka en ania, i rilru hneh nan lem kan chang mai a ni e"

"Zawnga"

"Sim rawh ka tih kha.. Khatiang tawngkam kha.. Nakinah kan fate hriatah phei chuan hman ka phal hlek lo ania" 

"I va zak lo tak"

"I lungawi reng, a ruk chuan.. Saizampui, nang hian min duh.. Ka chiang"

" Min tiam phawt la… I rinawm ang tih hi"

"Ka tiam lo vang che. I hmu mai ang. "

A vawikhat nan induhtawn takin an infâwp a. Hei zawng a thlum ta e. Valpuia hian a ti tak tak em tih eraeh a hriat loh. A play leh mai mai angem le.. 

Kum 5 a liam leh meuh chuan,.. Mipa naupang duhawm zet, sam kir chiat hian, fiah mang lo hian, "Ápa, ánuin 'zawnga' a ti leh tawh ania" a ti lang lang a.. 

The end

(Sei deuh, ngaihnawm deuha ziah ka tum ve reng, hun a awm lo. Exam kan vèng dawn sia. Ka short cut ta mai. Ka hmangaihzia che u hi e.. 

Next-ah chuan, Romantic or Thriller? 

A story hming tur rawn phuah ru ka tih kha.. In chawh 😡