Nunhlui

NUNHLUI (True Story)

.

(Mi chanchin ziah lam hi ka ti vak ngailo tih in hriat kha..ziah ngaihnawm a har bakah, diktak chuan Hmangaihte nena inthen dan chanchinte a ni tlangpui a, ka ngainep nilovin, keini ang duang paw’n nunhlui kan nei vek a. Khatiang lam ngawr ngawr nilo, dangdai deuh hlek leh zirtir nei tha si rawn tarlan ka tum a ni. He nula tumruh leh huaisen tak hi a kal zelna turah duhsakna ka hlan e.

“Toni” a rawn ti hlawl a. Whatsapp-ah. 

“Eih” ka tih zawh rual chuan, “Inbunruahna tur ka duh, I buai em?” a rawn ti leh a.

“Buai lo e” 

“Ka type peih lo, a sei sia, I ngaihthlak hman chuan ka lawm ngawt ang, rinngam I ni ang tiraw” a ti leh kher a. 

Keimah ang rual vel anih hmel a. Aw tham chil chel , ngaihno bei riau si hi a ni a. A confi tih a hriat mai. A thu lamah a nghet charh charh e mai. A chang chuan a ngawi leh vang vang thin a. A hnuk a ulh tih ka hai bik lo, tap ka thlem thiam lova, ka lo nghak mai. Darkar 2 dawn kan inbiak hnuah “I duh chuan I ziak thei ang, mahse, ka tilui lo che nia” a ti a. 

“Ka ziak ang” ka lo ti tawng mai ! ka lo luangliam ve deuh emaw ni..ka zawi nguaiin ka inhria. A hming erawh thupsak a tha e.

Chhiartu te tana ngaihnawm ve deuh tur in k’n remkhawm mai ange aw..

“ Tray-in eitur an chah chu ka chawi phei a, eitur ka chhawp sak ruala, ka dinglama thu rawn tawng chuan min tiphu chiang kher mai. Ka va melh nghal vat a. AMAH ngei a lo ni e! ka khur thei hial mai. Ka hlauh vang anilo a, ka huatna rawn sosang thar leh chuan, kum tam tak chhunga ka inthunna chu a rawn tichhe dawn nia ka hriat vang a ni. Min rawn melh ve chiah a. mahse, min hre ngailo ang hmiahin a awm anih chu! Ka thinlung chu natna leh huatna hlirin a khat a ni ber mai. Mahse, ka hnathawhna hmuna mualpho chu ka duh bik lo. Customer dang an lo lut ta bawk a. Insangmar teuh chungin ka va dawngsawng a. 

“Ka hmuh tawh hnu I ang tawp” An chhuak tur leh eitur chah ka pe tur kan intawk a, chu chu ka hmaa dingin a sawi a ni. Ka khur chhe lo chauh. “Ka hre ngailo che” ka ti hmak a. Khatianga tawng deuh hmak kha ka tumsa bik lo. A ri chhuak ve tawp a ni mai. Pawisa an pe a. An chhuak ta nghal a. Kei erawh nilengin ka awm a nuam lo; ka chhungrilah ka khua hi a sik hlauh hluah ani ber mai. Ka awmdan danglam chu kan piin a hriat ka hlau hle, mi dilchhut zet a nih vangin. Nachhawkna mum 2 ngawt ka hmawm mawle! Mahse, ka chhungril so bulh bulh chhawk thei tur khawpa chak a lo ni silo a. Ban veleh ka haw nghal a. Ka in tetakte ka luh rual chuan ka uak nghal tuar tuar a. Luakchhuah tur erawh ka pai lo. Ka pum ruak lutuk avang chuan ka chau hle zawk si.

Eirawng bawl zai pawh ka rel theilo a.Ka inbual a. Khumah ka bawk thlawp a. Eng nge ka tih ang tih ka ngaihtuah nasa; kha mihring ngaihtuah nana ka hun hlu tak hmangliamlo zawnga ka hun khawhral ka duh a ni. Tichuan Dr Hrekima (apan fo tawh ani awm e) number ka hmet chhuak a. Mahse,ka call tlang thei tlat lo. Ka online a, tihtur reng reng ka hre lo. Tihian ka rawn inbunruak tawp a ni. (A ngawi ta vang vang a)

Mami (ti mai ang) chu engvanga chu mihring avanga buai em em nge anih tih zawh ka chak hle. Mahse, a ngawih vang vang hnuah phurrit tak phur niawm takin a rawn tawngchhuak leh a.

“ Ka pa hi Officer (?) a ni a. Ka nu chu Zirtitu a ni. Kan hausa a, ka pa hian a eiru ve thin tih pawh zep a tulna ka hre lo. Mak ka tih zawk chu, ka nu hi kohhrana inhmang em em, kohhran hmeichhiaah pawh nihna nei a ni a, ka pa chetdan a sawisel ngai miah lo chu a ni. Ka nu leh pate rel ka tum vang a nilo a, thudik tak ka sawi mai a ni. Ka pa chuan zu a in zeuh zeuh thin a. Kan unau 4 zingah a upa ber dawttu ka ni a, ka u mipa chu Private School-ah a thawk ve a, Tlangval tha tak a ni. Kohhranah pawh a kul ataia inhmang a ni ve a, kei ngei pawh hian ka u hi chu ka ngaisang thin. Ka pa eiruk te pawh sawisel ngam leh ti tawh lo tura hrilhtu ber a ni thin. Eiru lo mahse, ka nu in hlawh a nei tho a. Kan rethei dawn chuang lo. Mahse , mihring duhamna hian chintawk a neilo ani ber e.

.

Ka nau chiah mipa hi ruihtheihthil duh ve tak, nu leh pa leh ute zahna chang pawh hre lo a ni a. Lehkha a thiam thei thung. Hostelah a awm tam zawk a, a lo haw chang chuan rilru a tihah thin hle. Kan naupangber erawh nu zim zen, ngawi reng mai, zahpuiawm khawpa zakzum a ni. Tunah chuan Bangalore-ah a awm mek. Lehkhathiam tak ka nilo naa, ka zir peih thung. Ka nu nen hian kan inmil vak lo a. A chhan pawh Biakinah chauh ringtu anih thin vang a ni ber. A hnathawhnaah pawh a student ten an hlauhber leh a ruka an huat rawn a ni. Mi chunga inlek ching, pawisak nei vak lo, tawngkam nem thluam si leh mi tihzah thiam deuh, mi khei fak zawnga tawng thin mi a ni a. Mi rel a peih lutuk te hi ka lo zak thin. Amaherawhchu, pawisa kan ngah a, kohhranah kan chhunglut tam a; a mizia hre vek chunga lo pawm duhtu leh lo tlawm hiam hiam zawktu te chu amah nen angkhat vekah ka ngai.

.

Mize tlang tak, induhtawk ve tak, dikna ngaina ve tak ka ni a, mahni infak lam a ni lo; dawt hi ka sawi ngailo ka tih chuan, dawt var sawi chang chu ka nei maithei, mahse, thudik ka tan zawk avanga hmaisen nena midang te nen kan inhmachhawn chang pawh a awm thin. Ti thlip thlep chi, engkim felfai taka tih duh mi ka ni a, inchhung tawp te hi ka ngaithei ngai lo. Pathian hi ka zah thin a. Vawiinah pawh hian zahna ka la neih tak fo avangin ka nun tichhetu lakah zahngaihna ka la lantir hram hram a ni. KTP group-ah te pawhsum vawngtua ka tan ve laiin, kan finance nen kan thu a inhmu lo deuh a, amah vangin ka sum enkawl danah dikhlel awmin an hria a, ka mualpho hman hial! Mahse, thudik chu ka nghak chhuak leh mai. Ka nauin ka pawisa kawl a lo ruk tum pawhin, thudik sawiin ka pa eirukna sum telloin keimah ngeiin ka thawk chhuak a, ka rul leh vek a ni. Sawma Pakhat (Pathian Ram) kan pek te hi diktak chuan ka zahna titamtu a ni zawk, tam engang mahse, kan hmuhchhuah dan kha ka lungawi pui lo a ni.

Kum 18 ka nihin ngaihzawng ka nei ve a. Kan venga mi tho a ni a. Ka hmel hi tha tia sawi vul chuk chi a ni lo a. Hna hahthlak thawk ngailo ta chu kan vunte a lo mamin a lo no ve a, chu chuan min tilang mawi ve ani mai. (A dp-ah chuan hmai tung lam, sam dum hlap, kir lutuk silo ngil silo ang hi a ni mai..a hmeltha ka ti keichuan) vawiin thleng hian ka thlalak hi ka la edit ve ngai lo. Ka nihna ang rawnga lan ka duh vang hian “I chapo” min titu ka tawng zeuh zeuh!! Ka bialpa chu khawsak vantlang tawk vel, mahni invawng tak, zuk leh hmuam, ruihhhlo engmah ti ngailo a ni a. Hang ngaihnobei ang hi a ni, a nui mawi ka ti thin a. kei aiin kum 2 in a upa a. Ka star tih a hriat vanga min bem niin ka hria. Kohhran khata lawi dun kan nih vangin inhmuhna hunte atam ve a, kan college erawh a inang lo thung. Kan inzui ve chawt zel a, ngaihzawng ka neih vawikhatna a nih vang nge ka nghet charh mai, ka pasal anih loh hi ka ring ngailo hrim hrim. Tuemaw zawk zawkin hna kan neih veleh inneih kan tiam a. 

.

“Sawtiang tlangval naran lutuk, hmelchhe ropui si, a pa lah Peon mai mai saw maw I duh a?! I mit han hniam zia hi chu, then nghal ang che”ka nu chuan a ti hlawih hlawih a. Rapthlak ti zeta lo melh rum bak tihngaihna ka hre lo. Ka nau (mipa) chuan, ngeiawm deuhin, “ Zu te in zuar dun anga, min khilai thin anga” a rawn ti a. Ka nu nen hian an inchhun fuh ania. Ka pa chu a ngawi reng a. ka pa hi chu lehlamah eiru thin mahse, pa dam thluam mai, nui huau huau chi leh kawm nuam tak a ni a. Mi pawn an nel ve hle. Ka nu hi neilo se, pa tha tak, kohhran bel tlat pa a ni ngei ka ring thin. 

.

“Sanga (A bialpa hming lem) te chu kan veng tlangval fel pawl alawm anih le..sawisel sak vak vak suh u” min chhangtu u Mama chuan a rawn ti ta hlauh a. ka lawm kher mai.

.

“I pasal tur chu kan level pui ni ngei tur a ni. Retheih I thiam dawn a mi” ka nu bawk chu.

.

“Hausak hi hlimna anilo e, kan rethei bawk lovang, eiruk vanga hausak ai chuan, rim taka thawha kan thawh hlawh lungawipui ka thlang zawk” ka ti ngat a. Ka pa hmel chu a pha dui mai. Ka nu vang vek a lawm..

.

“Khanglang che chuan” ka nu chuan a ti hlak a. Ka thawhsan ta daih a. Engnag pawn ka chhungten sawisel mahse, then ka tumlo bur. Ka duh telh telh ni zawk hian ka hria a. Nikhat lek pawh amah hmulo a awm te chu harsa ka ti thin. Chance nei ve fo mahila; sex hman dun chu kan la tum chhin ngailo. Nikhat chu ka thiannu Zovi te inah kan inhmu a. Khumah kan mu dun a. In kiss hi chu kan duhthawh ve thei khawp mai. Chumi tum chuan a duhthawh zual a, ka hnute pawh a dap thuak thuak mai, ka kawr a hlim a, a tih ngailoh ang takin ka hnute chu a fawp a. A mitmeng chu a de sawr sawr mai. Diktak chuan ka sihhnip vang pawh niloin atan chuan engmah ui ka nei lo. 

.

“Mam, ka diklo tan tlat, tui min va suah teh” ati sap a. Thuawih deuhin ka kal ve mai a. Tui chu a in khawlh khawlh a. “Mak min ti em? Kan va chesual teuh ve tiraw? Mahse, virgin a neih che ka tum sia” ati a, a thaw ham ham a. 

“Min lo hnar ve tur che alawm” fiamthu hian a ti leh a. “Hmm..a nuam ka ti ve tho sia lawm” ka lo ti hmuk a. Min han nuih tak tak mai a! thudik ka sawi ve ani mai a, eng nge anuam ka ti tak tak a lawm. Sex kha min hmanpui tumin min han fight vel se ka zawr hneh awm hi ka tia! Ka hmangaih em a tin ni. Mahse, mipa diktak a ni a, khatianga a inthunun thei kha, ani ang kuma ka han chhut sak hian ka ngaisang a, tun hnuah pawh hian ka la ngaisang thin. Min hmangaih ve takzet tih ka hriat phah bawk. Ka hlim a ni. 

.

Kan inhmuh atanga kar khat vel aliam ang tihah, tlaikhat ka nu School bang chu a rawn tum haw hmuk mai a. School-ah a mood thlaktu a tawng leh tawh anih hi ka tihsak mai a. Mahse, a lo nilo, vawiin thlenga ka zahna titamtu leh ka mittui kaichhuak fotu thil thleng a lo awm vang a ni. Khatia Zovi te ina kan inhmu kha, an kawmchhaknu (Nu kamtam lutuk) chuan ka nu a lo hrilh leh hi a lo ni a. “ An haw lai pawh ka lo thlir reng a, mami chu a pawr chhap mai a, thil thalo te hi an ti emw ni le ka tia” tiin ka nu bulah min lo hek anih chu!! Nu azawnga nu huaisar, zahpah nei ngailo ka nu chu a ling ta phat mai! Thinrim takin ka bialpa te inah chuan a va kal a. Ka bialpa chu a lo awm lova, anu te bulah a lo va ang hrep a; hmusit takin a lo tawngkhum vel niawm a ni. Zovi min hrilh leh dan chuan. Sanga nu rilru na lutuk chuan Sanga a lo hau ve hrep a, Sanga pawh a na kher mai. Theihtawpin a insum a, ka thianghlimna kha a hun hmaa chen a duh ngailo a sin, kei hian sawmlui pawh niila, min hnar fithla thak tur khawpa mipa ngilnei leh rilru tha kha keimah leh ka nu vangin a mualpho ta. 

.

Chumizan chuan Sanga leh apa an rawn kal ta thut mai! Ka hamhaih vek. Sanga pa hi Kan kohhran upa min, zaidam leh mite ngainat, damlo an awm chang pawha tawngtaisak tura an koh zin pawl, kohhran upa nih dan tur dik taka nung a ni a. Ni e, peon ve mai chu a ni, mahse, anun a hausa a, ka pa neih ve loh nun hlimna a nei bik a ni. Thil awmzia chu zaidam takin a sawi a. An thiamna rengah pawh ngaihdam an dil a nih chu!!

.

‘Pu Ring, engpawhnise, kan fanu hi infapa khan lo tibuai tawh lose a tawk a ni mai; nangni chhungkua leh kan chhungkua zawng kan inthlau deuh a ni e, I hriatthiam ka beisei” chang fak hian a ti a. Ka lo zak ngawih ngawih; in awihlo maithei, mahse, ka nu hrechiangtu te tan chuan a mak lova, a la nep zawk maithei hial a ni. Pu Ringa rilru na chu hmuh theihin a lang chhuak a. Sanga pawh a kun ngaih mai. 

.

“Ka nu, hetiang em em chuan tawng suh, Sanga hi ka hmangaih, neih pawh ka tum” ka ti ve ta thlawt a. ka bialpa thlavang ka lo hauhsak kha vawiin thlengin ka inchhir lo, hauhsak ngamlo in lo dawihzep ta ila, inthiamlo reng rengin hun ka hmang ngei ang.

.

“Lo ngawi chipcham rawh, Sanga hi chuan a phu hlawl lo che, I hmangaih emaw I ti mai mai anih kha..ani hi chuan a hmangaih ve lo che, kan sum leh pai vanga ngaizawng mai mai che anih hi” a ti leh hlawih hlawih a. Chuzet zawng a tuar zo ta bik lo aniang, “ Ka pi, Mami hi sum leh pai vangin ka ngaizawng lo; ka hmangaih a, nupui a neih ka duh a ni. Chuan maw, ka pa nihna te, kan chhungkaw dinhmun te avang hian min hmusit duh tawh suh, miin an ngaisang che emaw I ti aniange, a ruka nuihzat I ni tih hi inhria ang che. In sum leh pai lakluh dan te hi tuman kan hai hleinem; I fanu chu mi hausa tak nupui I la nihtir ngei dawn nia. I makpa nih hi ka chak bik lo e, hawh.. ka pa, I kal ang, hetiang in ropui lutukah hian kan leng ve lo a ni e” a aw chu a khur deuh a. A tho a, ka pan ruak a, mahse, en pawh min en duh lo. Ka nu chuan ka banah nghet zetin a lo hmer a, khatihlai khan kum 19 ka tling tan ve chauh a, kha ai khan lo huaisen deuh ila chuan ka zui haw ngei ang mawle…

.

“Nang ang nu ka lo nei hi ka zak a ni. I fanu nih ka duh lo. Ka hua che, kohhrana I nihna zawng zawngte kha bang vek rawh, min tizak tam tawh lutuk” ka ti a. ka tap bawk. Ka chhipsamah min kek a, min hnuk ta hrep a. Ka pa zinlai ani a, ka u mama lah Lungleia a thianpa te inneih hmang tura a zin lai a ni bawk. Tantu ka nei lo a, ka maldin a ni. Ka u mama tal chu awm se, kawng a awm mial tur..chumi zan chuan, ka tap tlaivar a ni ringawt mai.Sanga chuan phone anei lova, an landline ah ka call a, anu in min lo chhang a, min biaktir tura ka ngen ngawih ngawih pawhin, “ A awmlo” tih chauhin min chhang a. A awm tih ka hria, rilru na tak tuarin a awm mek ang, min biak chu a chak ve em em ang tih ka ring. Mahse, a mihring luhlulna leh induhtawkna chuan a tawlhtir theilo animahna..Zovi ka bia a, a tukah an inah lo hruai chho turin ka ngen a. An kawmchhaknu pawh kha chhuahchhalh ka duh. 

.

A tukah chuan Zovi te inah chuan ka phei a, an kawmchhaknu chu kawngah ka tawk a, zah pawh ka sawi theilo, a kamtam avanga kan buaina te chu ka sawi ta phiar phiar a, a tana thil tullo kha engvanga chhak chhuak nge anih? Ka hua a ni. Nui deuh titihin min chhang a, ka nu rual zet mahnise, insualpui ka chak takzet. Zovi chu amah chauhin a lo awm a, Sanga chuan min hmuh a duh loh thu leh engkim a tawp tawh thu a lo hrilh a. Ka tliak hnawp a ni ber e. Luhlul ta ngang chu an inah ngei ka zuk kalchilh ta hmiah mai. Zovi mangangin min rawn umzui bawk. Anu a lo awm a, “Ka pi, Sanga min hmuhtir rawh, khawngaihtakin” ka ti tawp! Duhleh zaktheilo min ti ru..ka hmangaihber kha hloh ka duh lo alawm. Mak tih hmel zetin min melh a. Room atangin Sanga chu a lo chhuak a, a mit chu a sen ram mai. Ka insumzo tawh lo, ka va bawh rawk a, “Min then suh” tiin ka ngen a..tlawmna pawh nise, pawi ka tilo, a telloa khawvel hmachhawn ka duh lo.

.

A room zimteah min kailut a, a insum ve hle tih ka hria, a hnuk a ulh ve chiang a lawm. “Mam, kawng dang kan neilo alawm, engtikahmah I nu hian min pawm dawn lo”

.

“A pawilo, tunah hian min ru mai rawh, anih loh pawn tlanbo mai ang, Aizawlah ka pute inah chhuk ang; min lo pawm dawn tih ka hria” 

.

“Mam, naupangchhia viau suh. Engmah hnathawh kan la nei silo a, I nu hmuhsit tura inneih buangbar ka duh lo”

.

“Anih loh chuan min then I tum sia lawm”

.

“ Ka then thei tak tak bik lo che. Tihdan ka hria, tihian inthen angin awm ila, a rukin kan inhmu tho anga, hna ka lo zawng ve anga, ka thianpa, Aizawla mi pawh min lo zawnsak turin ka hrilh anga, hna chhete tal, neih ve loh chuan ilakah ka inthlahrung ang. Hna ka neih veleh kan inru mai dawn nia. Dan khatna chu ka beisei ngam tawh lo, Pathianin kan thianghlim zia a hre tho” a ti a. Ka thla hi a van timuang tak em..kan infawp ngawih nmgawih a. Anu a lo lut a. Min khawngaih hmel deuhin min entawn sek a, “Pathian bel tlat ula, rem a la ruatsak em em ang che u” a ti dam dap a. ka nu ni zawk se ka va duh emm..

.

Tichuan, inngai em em si, inhmu fo thei lo leh midang hmuha inthen ang chuan kan awm ta a. Ka pa hnenah phone leina ka dil a, Sanga chu ka phone ka pe a, phone dang ka lei a. Phone ka pe te chu hrehawm a ti hle tih ka hria, khatihlai khan phone nei kha kan tam ve tawh viau naa..an chhungkua an rual ve a, apa hlawh ringa khawsa, leilet zimte nei an ni a. Sanga u te pa 2 chuan phone chu an nei a, amah hi chuan ‘ka la mamawh lutuk lo e’ a ti tlat a, a puitling a, a inrenthiam bawk, class chawlh laite hian mi insa te hian a inhlawh fo a. Leiletah a feh nasa thin bawk. A rukin an leiletah kan kal dun tawh a, kan va hlim dun tak, a nuam in a ralmuang a, hah a dam sawng sawng mai. Hna ka thawk ngailo tih a hria a, chuvang chuan zo hna thawk tura min neih chu a duh lo ni berin ka hria. Phone ka pek tum pawh chuan, “ ka duh lo, ka lei ve mai ang, ka nei alawm, naktukah ka lei nghal ang” a ti a. Mahse, a ipteah a hnawh a, ka kalsan daih!

.

“I pawisa chuan zungbun lei zawk la” ka va ti a. A lei ve mai. Arukin kan inhual chu a ni ta mai e. Ka nu pawhin kan inthen tawh angah ngaiin engmah a sawiri leh tawh lo a. Ka u mama bulah pawh ka zualko ta lo, boruak a tang tha leh ang tih ka hlauh vangin. Hun a liam ve zel a, Sanga thianpa, Aizawla mi khan hna ruak a rawn hrilh a, dil turin a chhuk thla ve ta a. Ka zui lo chauh a ni. Mahse, exam ka neih vangin ka insum a. Kan inhlat tak avangin ka lung a leng zual a, biak reng ka duh ani ber. Kar hnih lai a zuk cham a, result hriat law law a duh vangin. Vanneihthlak takin a tling ve ta hlauh mai. Min rawn hrilh ni chuan ka mittui a tla hial! Au vak vak hi ka chak a, a rem bawk silo. A ni pawh a lawm takzet tih a hriat. A tukah a rawn haw anga, a hna zawm turin a chhuk leh nghal mai dawn a ni. Tichuan, exam zawh veleh ka zuk chhuk anga, kan innei ang..chu chu kan sawi dun dan a ni.

.

“Mami, mami, Ih.. Usanga a thi!!” ka lehkhazir ning lutuk, ka lo muthlu zawk chu min rawn sawiharh a, ka nau Hmingteii a ni.Phawk zetin ka en a, a nui hmel hmuh ka tum ani ber. Mahse, a nui lo, ka duh thei lo…Lalpa.eng nge ka chunga thleng hi??!! Ka tlanchhuak rawp a, Hmingteii min auhna pawh ka bengkhawn thei lo. Ka hmangaiber te inlam pan chuan ka tlan chiam chiam a. Ka nu School bang ka tawk ..”Khaw nge I kal dawn?” a ti tuarh a. “ Nangmah vang anih hi” tlan pahin ka tilet tuarh a. Min rwn umzui tih erawh ka hria, ka ngaihven hman lo. Sanga a thilo, dawt ani tih hriat tuma an ina kal ka ni. Mahse, mi tamtak an lo awm a, an in chu an lo singsa a, tah hla chhamtu chu Sanga nu a ni. Dawt a ni ka la ti talh a! sanga nu chuan min lo hmu a, min rawn pan, “Mami, I nghakchhuak zo ta lo, a pawi ee mai..ka fapa, bawiha, mami hi I tihrilhhai lutuk” tiin min pawm chungin a tap a, tap turin ka chak lo nge ka tap chak lo? Ka hul vek niin ka hria. Ka mittui far khat mah a tla lo. Ka khur zawih zawih tih chu ka hria. A ruang chu kan nghak a, mi tam tak zingah chuan ka mal a, ka va rethei tak em..ka nu chuan min thutpui ve a. Chw eitura min kaih haw a tum pawhin min kai kal zo lo. 

.

Hei le. Ka hmangaih taksa chu..Amah hmangaihtu leh a hmangaih em em, amah lo nghakhlel em em tu nena nui duna intawng leh tura rawn haw chuan nuihna nilovin tahna a ni min pek tak zawk chu!! Hlimna niloin mittui..a rawn chuan hawna motor chu Truck nen insu in, ka hmangaih chu a vanduai pawlah tangin a lo intauh na bik a..Aizawl lama let pui an tum mek lalin..a liam ta..ni e, ka ngaih tehlul nen min kalsan a nih chu! Misual tak a ni. A taksa chu a vawt ngiai a, a heh te chu a duk cher mai. A lu chu an tuam bur a. A kut ka hum a.. zungbun a lo inkual raih a, ani hi ka pasal hual a ni a sin. Thih chu a la duh bik lovang, beiseina sang tak nen Aizawlah a chhuk a, hlim takin a rawn haw, hmabak tam tak kan la nei asin. A kal hi a la hun tlat lo. A thihna hi Pathian ruat a nih ka ring thei lo. Setana hian kan hlim min phalsak lo ani zawk. 

.

“Mam, Pathian chuan kan thatna turin engkim min ruatsak a lawm, engkim a tha leh vek mai ang” tia min hnemtu te chu “ In Pathian chu a va fair lo ve..ka Pathian chu a fair asin, he thihna hi a remruat a nilo. Setana a inrawlh ani zawk. Engkim tha leh chuang tur a awm tawh lo. Lu insun ve hunah leh in tawrhzawh hnuah min hnem dawn nia, in chunga a tlak ve loh chuan awlsam takin sawi liam satliah suh u. In ngawi theilo anih pawhin, a chanchin chauh min hrilh rawh u” tiin ka chhang thin. Exam chu ka ha se..a ni ringawt. Ka nu takngial pawh ka timangang a lawm le..ka cher hle a, tlaitin thlanmualah ka kal thin. A thlante chu fai takin ka phiat a, a chang chuan zingkarah eitur nen ka thawk chhuak a, nilengin a thlanah chuan ka awm thin a, miin min hmuh pawhin mak an ti ngai lo. Lainat hmel takin min thlir liam thin. Thla 2 aliam a, chhungte hmaizah vangin Aizawl lamah lehkha zirzawm turin ka chhuk a, a sulhnu hlir hmuh tur a awm si avangin kan khua chhuahsan pawh chu ka tan a tha zawk maithei. IGNOU-ah ka ti tha leh a. Ka pu (ka pa pa) te inah ka awm a, min duat bawk a, khwharna tih loh chu hrehawm em em a awm lo. Ngaihzawng neih ka tum tawh lo a. Zungbun pawh ka la bun ta reng anih hi..

.

Tihtur a awm loh em avangin, ka pu thianpa te thawhna company-ah a hniamber hna thawkin ka nitin hun chu ka hmang ve leh a. Thian te ka lo nei in kan innnel chho a, fam zun ngaih pawh a kiang chho ve hret hret zel a, mahse, a reh hlen dawnlo tih erawh ka hria. Kan pu ber fapa hi keimah ang rual a ni a, kan inthenawm hnai bawk a, kan inkawm nasa hle thin. Sanga nen inanna riau an neih chu ka ngainat chhan a ni. An hausa a, luck pawh a luck ve hle. Ani chu college a kal a, ka thawhna company hi sawi a remchang lo tlat a, min lo hrethiam mai teh u. Khang hun lai kha chuan an la hmelhriat em em lova, thawktu pawh an tam lem lo. Hlawh pawh a tha tehchiam lova, tunah erawh a lar ve tawh viau! Ka hna chu a ninawm viau naa..khawhar hman lek lova ka buai thin avangin lawmawm chu ka ti tho mai. Ka la naupan ang aiin ka rilru a puitling a, mahse, Sanga tello chuan hmalam hun suangtuah pawh engmahlo mai a ni. Ka nung mawl ve tawp ani ber e. Tuma hnenah ka chanchin ka sawi ngai lo.

.

Kumtawp alo thlen meuh chuan Aizawl chu nuam ka ti tawh hle a, kan khuaa haw pawh ka phurlo hial, chuvang chuan ka pu chuan Christmas hmang turin min ti a. Ka remti hmak. Ka haw chuan sulhnu ka fang leh rek rek anga, thiante ar kan laiin khawhar takin ka tap keuh keuh dawn tih ka hre lawk ve diam a. Mahse, a thlan cheina tur chu ka thawn tho. Akima (an pu fapa kha,,a hminglem aw) lah chuan min ngaizawng nasa tawh a, thian anga ka kawm avangin ka ngaizawng ve thei lo. Mahse, ka ngaina tih ka zep lo. Tichuan, Christmas pawh hlim takin kan hmang ve a ti mai ang. Ka inkhawm ngailo thung. Sanga thih atang khan Pathian hi ka belbul khat ta deuh a, ka huat vang pawh a nilo. Kha accident kha thlenglo tur pawhin a thunun thei awm tho sia tih ka ngaihtuah thin. “Pathian remruat” an ti pawh kha an thlirna zawn atang chuan a dik tho mai. Mahse, Pathian mawpuh ngawt zawng ka ngam ngang lo a ni.

.

Kumhlui thlah zanah chuan Akima nen kan leng ve a, ka pute phalna thlapin. A thiante kan tlawh kual a, “Kan nu anih hi” min ti mai zel a, lo huat vak chi pawh a ni lo. Lenna tur em em kan hre silo a, a cousin ka thawhpuite inah ar kang turin kan kal ve a. An lo awm nual mai. Sanga awm vese ka la ti fan a! amak..ka lo ngaihtuah leh thut thin. Roomah akima chuan min kailut a, khumah kan thu dun a. Tihtakzetin min bem ta a. Sanga kha chuan a thianpa bulah min duhthu a sawi a, a thianpa chuan min hrilh leh a, ka lo star sa nen, awlsam deuhin ka chhang ve ta mai kha ania. Hetia hmaichhana min han hrilh takah chuan ka zam ve hle. Sawi tur pawh ka hre chuang lo, Ka ngawih reng vang chuan ka duh ve angah angai anih hmel, min rawn fawp ta a..ka lo dawh mawl tawp. Ka duhlo chu ka ti thei bik lo, mipa dang ang chuan ka en thei tlat lo alawm..tichuan inngaizawng ang chuan kan awm ve ta ngawt a!!

.

Inthenawm hnai tak nimahila, min rawn be chamchi thin. A chang chuan ka ning lek lek hial fo! Mahse, min duh em avang chuan ka khawngaih chho a..ka hmangaih tan tawh zawk ani maithei. Sanga lo chu ngaihzawng ka nei lovang tia ka intiam rukna chu ka bawhchhe ta phawt. An lo inang ve bawk nen, ka ngaina telh telh a. Mi serious chi ka lo ni chhap bawk nen..kan inzui leh ta chawt mai. Chhungte atangin dodalna kan tawk lo bawk a. Kan ngampa dun khawp mai. Sanga nen an inan lohna chu min fight a ching thin chu a ni. Ka hnar feee a ngai thin a, hah zeta kan inchai thial thial chang a awm fo! Amak khawp mai. Sanga lakah kha chuan ka sihhnip tehlul nen Akima hi chuan ka hnute a khawih emaw fawh a tum hlek pawn ka lo nam tang tang thin. A thinrim ngai chuang lo a. Ka graduate hnu chuan IGNOU-ah bawk MA ka ti leh a. Class han kalthat vel kha ka phur tawh lo, ka pa chuan phaia awmtir min duh a, mahse, ka chak hran lo. Akima lahin a lo hlau tumhrang bawk nen.Hun a lo kal ve zel a, ka hna pawh ka kaisang ve a, sang tak ka beisei lo bawk a, ka lawm ve tawk hle. Vawikhat chu Akima bialnu hlui hian min rawn ankhum chiam tawh a, ka zak ngei mai. Akima ka hrilh chuan a insehruh a, a thinrim hmel khawp mai.

.

“Ka duh duha ka khawih chingpen theih anih saw..ve mai mai a” a ti ta zek a! sex a hmanpuite hi ka zawt ngailo hrim hrim a. Chunu pawh chu keimah aia naupang lehchhawng ani a, amak ka ti hle. Ka u mama nupui neihna hun ka han hmanpui tih loh chu ka haw ngai lo a.Ka nu pawh ka bialpa thar lakah chuan a tha ziap zuap khawp mai. An hausa tlat alawm! Ka pi leh pute inneihna hmangin an chhuak a, ka patea fapa ka chhang rual leh papuia fanu te pahnih, phir naupangte te nen chauh kan awm a. Akima a rawn lut a. Beer a rawn keng a, zu hi chu a in thin tih ka hria, ka zilh ve thin. A zawm chuang hlei lova. Beer chu ka in atan min rawn kensak a ni a, ka period lai anih vangin ka tai ana a, ka kawng nen. Beer a tha lutuk a tih vangin minlo kensak turin ka ti a, ka vawikhat inna anih vang nge tui hi kan tilo khawp a! a kha si..ka ner nawng nawng a, min lo nuih put put a. Patea fapa , Andrew (ti leh mai ang) chuan a lo ban ve thuai a, kan pahnih chuan kan inzo a. Ka rui ta pek a..Sanga hlir ka ngaihtuah a, k’n tap tak tak anih kha.!!

.

Akima chu ka tahkhum a, Andrew nen chuan nuih insum zetin min hnem a. A nuam dangdai ve riau mai. Akima chuan Sanga chanchin chu a tukah min zawt ta chat a, zep then nei chungin ka hrilh ta vek a. Min khawngaih hmel ve khawpin ka hria. Tichuan, Kohhrana inhmang bawk silo chu hun remchangah beer chu ka rui ta fo a! ka zangkhai a, nuam ka ti. Zu pangngai erawh ka in thei hlawl lo thung. Akima lahin ka sawi apiang chu min pe zel thei mai si, ka tlahniam tan khawp mai.Akima birthday anih vangin nalh taka incheiin an inah ka kal a. October ni 20 a nih chu..a thian te nen pawh kan inkawm nel ve tawh a, kan hlim dar dar hle. Beer pawh kan in nual.Akima chuan min kheuh zeuh a, a room lamah min kaichho a. A nu leh pate chu an mu tawh a. Inhnuaiah daih an mut avangin thawm a hriat vak loh. A thiante pawh a kawp tetein an awm hrang niah tawh a. A khumah chuan kan thu dun a. zu a in tih ka hria. Ka rui vak tawh lo thung. Min fight leh ta a.

.

Kan inbuan leh ta thial thial mai. Thaw hlawi hlawi chungin a let hle hle a. A beidawng ve ta anih ka ring. Mahse, min rawn kuah a, mittui tla chungin “Mam, ka hmangaih em vang che ani. A hmasaber nih ka duh a, ka ta liau liau angah ka ngai thei dawn bawk che a, ka thlamuang tawh dawn a sin. Khawngaih takin tun chauh chu phal hram rawh” tiin min ngen a. Mipa, keimah vanga mittui tla ka hmuh vawikhatna a ni a, Sanga kha chu hnukulh tuh chung pawn a insum thin. Akima chu khawngaihna hian ka khat ta tlat mai. Mahse, sex han hman ngawt chu ngamlohna ka nei bawk si. Ka rilru insual mek lai chuan min rawn khawih leh tan a, a hma aiin ka lo dawngsawngtha tlat! Tichuan, a tawp chu kan thleng ta ringawt a! a na ka ti khawp mai. Min dim thiam em em bik silo a, a nawmna pakhatmah ka hre lo. Kan zawh hnuah phei chuan inchhirna in ka khat nghal a. Mahse, ka chak a, ka duh ve vang ani tih ka zep lo. Mahni thiltih suala midang mawhpuh talh hi ka mizia a ni ve lo a, ka duhthlanna ngeia sex hmang kan ni. Tin, ka rintawk vang a ni bawk. Thenkhat chuan “I duh reng vang ania, I phutawk alawm” te pawh min ti maithei. A dik reng. Mahse, mihring an inang lo tih hi hre phawt ila, hnar tur khan ka chak famkim tawh bik tlat lo atin ni. Mihring ka ni a, ka thisen a lum ve thei, tumah hi an dinhmun diktak hriat loh chuan indem ngawt loh tur. Hmeichhia, sex avanga talbuai, miten an dirim ka hmuh te hian ka thin a rim thin. Anni chu dinhmun khirh takah an ding lo animahna, keichu ka paltlang tawh hnu anih vangin ka hrethiam lutuk, inneih hmaa sex hmang tamtak te hi hurherh vang anilo tih ka chiang.

.

Chumihnu chuan vawi hnih kan hmang leh a. Ka rai ta ani. Ka rai tih ka hrilh zan chuan ngawi rengin min kalsan a. A hnuah message in “Ti tla mai ang, ka pa pawisa ka dil anga” a rawn ti a. Min thawng khawp mai. Mak ka tihna leh ka thinrima chu a inzat thuak ang. Min neih nghal ka lo ring a. A lawm viau ka lo ring bawk. Kei hmeichhia a zawnga tawnhriat nei tlem ber hian bumthiam ber ka lo hmachhawn a, ka vanduai ta a ni. Tihtlak chu ka rilruah vawikhatmah a awm ngailo. Min nei dawn lo mahse, ka paitlang ang. Ka pu ten an hria a, sawn man an va thing a, chuta a tawngkam chuan ka hmelma a nihtir ta a ni ber “Diktak chuan min neih a duh vangin ania ka fa apai, kei chuan thianghlim taka inngaihzawn ka duh a, mahse, a hmeichhia zawkin min nawr reng chuan insuma har em a ni. Ka fa ani ang nge nilo ang tih pawh a hriatchian loh, mahse, sawn man chu pe tho rawh u” a lo ti a niawm e. Ka taksa pumpui leh ka rilru thleng hian ana chhuak vek ani ber. Chutiang em ema mi zaktheilo chu ka lo hmangaih a, ka inzahpui hial a ni. Ka rilru chu a let hmak a. mahse, he thinlung rethei takah hian “Bumhmang” tia hriatreng erawh a ni tawh dawn a ni.

.

Ka pi leh pute chuan min hau hrep a, an tawngkam pawh a na khawp mai. Ka nu leh pate an lo chhuk a, ka nu chuan amakpa ni tura a duh em em in min bum tih a hriat chuan, ka thlavang a hauh ka lo ring ve a. Mahse, a nilo. Nuhrawn sual tak agin min ankhum a, min diriam a, anchhia min lawh ani ber e. Ni e, Kohhrana inhmang tak fanu khan sawn a pai tlat! Chu chu amualphona ani tih a hria a, zak taka a awm tur chu a ngaingam lo ani mahna. Titla turin min nawr a, ka nu ka huatna leh Akima ka huatna inbelhbawm chuan min tihuaisen a, runluih chakna in ka khat a. Tih hrehawm nan hrim hrim pawh ka fa chu paih ka tumlo bur..Inthenawm hnai tak kan ni si avangin ka pa chuan kan khuah min hawpui a. Raipuar chungin kan khua chu ka thleng ve leh ta. Rilru na chuang tur ka awm tawh lo. Ka hna tangin min ban bawk a, hmabak ka nei vak lo. Ka naupai chu tha takin ka hring anga, naupang tha tak ni turin ka enkawl ang tih chauh lo chu..Sanga fa ni zawk se ka ti ngawih ngawih , Sanga thlana kal tlakah pawh ka inngai tawh lo a, kan in lianpuiah chuan mal leh khawhar takin, ngaihsaktu leh duattu nei lovin ka awm ve tawp a. Eitur leh chenna in min la pe phal te chu ka lawm tawk viau! Ka nu chuan min be ngai lo a, ka pa erawh chuan pawisa te min pe thin. Kan naupangber chu hostelah a awm a, ka nau chiah erawh a tlanbo loh karah class a kal ve thin,. Ka u mama te nupa erawh an indang tawh a, a chhan pawh kan mo leh ka nu inmil hek lo. Ka nu hi a sual a ni. Ka u te inah chuan ka leng fo thin a, kan mo U zami chu a felin, min lainattu tak tak ani tih ka hria; an bula awm daih turte hian min sawm fo thin a, mahse, an khawsak a sang lutuk bik lo a, ka tihautak duh lo. Ka dul pawh a puar viau tawh a, Akima chanchin chu ka cousin in min rawn hrilh thin. A rui nasa a, hmeichhe chi hrang hrang a kawp kual a, nupui pawh a ru tawh aniawm e. Mahse, an la naupang tiin an pawt then leh a . Chutiang ang mihring mumallo lutuk fa ka pai chu ani sia! Amah aia tha zawk leh sang zawka ka inngaih luih tlatna chuan tawrhnate pawh hmachhawn a tiawlsam niin ka hria. Amah ngai reng rengin hun hmang ta ila, ka duhnaa pawisak ka neih loh zia leh ka tlawm theih zia chu in hriat tawh kha…keimah leh keimah ka intimualpho mai mai dawn tlat..nau neih a lo hun ta a.Ka pum nat vang ni miah lova ka mittui far hnem zia kha aw..

.

Ka vial ka vial tawh hnuah pawh ka nu chu a chechang duh hauh lova, ka pa pumpuina avanga damdawina a awm lai a ni a,. Ka nau chiah lah chu an zurui insual an man a, Lock-up ah a tang ran mai bawk si. Keimah ai chuan ka nau lakchhuah dan tur a buaipui zawk a. Mi a be kual a, ka insuam thei ngang tawh lo “Nuuuu, khawngaihin damdawiinah min hruai rawh” ka ti a. Min rawn melh kawk a. Hmuhsit hmel zet hian, “A mualphothlak, inah hian nei mai rawh” a ti anih chu!! Ka nu chu ani si a maw?! Thei leh theiloin ka u ka call a. A rang arangin an lo chhuk nghal a, damdawiinah min phur nghal ta a ni. Ka pumna lutuk chu ka thlan a far zawih zawih mai. Damdawiin kan thlen meuh chuan biak tlak ka awm tawh lo, nikhua ka hrelo chawp chilh nghal a. Doctor te pawh an mangang khawp mai. Damdawi ka ei tha silo a, rilru hah leh nat nen..ka beiseina awmchhun ka fa lo piang tur pawh chuan min phatsan ve leh ta…a tawk..a tawk lutuk ta e.

.

“Naute nu hi a dinhmun a tha lo khawp mai a, thisen a nei tlem bawk si, naute hi kan chhan theih a rinawm chiah loh a, kan zaichhuah mai angai a ni” tiin ka u mama te nupa an lo hrilh a ni. Aizawlah te chuan nise kawng dang a awm mahna. Ka naute chu a hnua an sawi danin a duk chhuak vek a, a thaw lo hrim hrim..thi sa in a piang an ti. Ka khawvel chu a thim ta vek mai. Damchhan leh tur chuang ka nei tawh em ni? Tun tum zawng Pathian ka dem ngam ta..huaisar taka “ Min hua em ni? Hetiang tawng tur si chuan engvangin nge ka pian ve min phalsak? I awm tak tak lo anih ka ring tawh zawk e” tia tap chunga van lam hawia ka au piap piap laite khan tuemaw tal chuan ka banah kaiin, hmangaihtu ka la nei tih leh ka mal lo tih min lo hrilh nise..ka nun a chhe lo tur..aaa. ka nun hi chhe leh chuang tur pawh a awm tawh lo e. Ka nu chu a lawm zawk ni hian ka hria a..huatna hlirin ka khat tawh. Khawvel leh ka nu runluih nan khawvel chu k’n chen ve ta anih kha..hmm a chang chuan a nuam, a reilo mai pawh a. Zu ka inlui a, damdawi ka bar bawk a, ka beiseina timittu te chu a na thei ang bera tihnat let ve ka duh a ni. 

.

Kan khuaah ka awm peih lova, englaipawha diriamna tawn reng kha ka hne a ni. Ka pa pawisa, safe ami tam tham tak ka ru chhuak a, Aizawl lamah nuamchen turin ka chhuk ta ta. Ka pute pawh ka tlawh duh lo. Ka u in min lo call thin avangin ka sim card ka thlak a, a chhan chu kei a farnu anchhedawng tan hian a rilru seng tawh lose, hlim takin awm se ka duh a ni. Thi tawh angah min ngai hmiah se ka duh ber. Ka taksa a chhe chak em em a, in ka luah a, ka pa pawisa kha chuan rei min daih dawn lo tih ka hria. Pawisa ka ru tih an hriat chuan, “Pawisa kha lo dah let leh la, nang chu I awm awmin I awm dawn nia” ka nu chuan a ti ! fate hmangaihna neilo nu hi ka nu atan ka pawm thei lo. (A nu hi a haw takzet anih ka ring..a nu chanchin a sawi chuan a aw akhurh bakah a insehruh tlat zel ..) a fahrawn ka nih ka ring hmiah tawh. Hetiang nu hi mizoramah hian an awm ve pawh ka ring lo. Tichuan ka thiam dan anga hlimpui ka tumna kawng chu ka zawh ve zel a. Sex erawh ka hmang ngai lo. Ka pa pawisa ka hmang zo tep tawh sia, in luah man leh ei leh in turte a lo ngai ve bawk nen..hetiang ringawt chu tiin..inhlawhna ka zawng ta a. Thingpui dawr tawp fahranah ka thawk a, zan lamah ka rui thin. MA kha ka exam ta silo a, tih that leh chu ka duh viau..a la rem hrih lo. Hmelhriat hmuh ka hlau thei hle. 

.

Zankhat chu le..intihhlum ka chak ta tlat mai. Hruizen ka nei silo, ka kawnghren ho ka han dap a. Ka nghawng leng tur tawkin ka valh a, khaina tur ka meh kual lai chuan, nidanga ka lo chhiarliam mai mai thin..banga thuziak chuan ka mit a la ta tlat a! ka mit chu ka lasawn thei ta reng reng lo mai!

.

“Damchhung mi hmuak apiang, I tirh nise,

A nuam nge a hrehawm, engpawhnise;

Hei ngawt hi ka dil ang, I lam lo hnaih zel hi..

I lamah min hip rawh..Aw Ka Pathian” tih hi a ni. He in luah hmasatu te ziah niawm tak a ni. Hawrawp chhe nin nen, pherh deuha ziah ani nghe nghe. A hma pawn ka enliam a, ka chhiar tha peih lo. Mahse, zanin chu a danglam tlat! Ka chhungrilah hian min tur et et tu a awm hian ka hria a, dan ruallohin ka nunhlui, liam ta zawng zawngte chu a rawn lang uar uar a. Vanduai ka intihna leh ka beiseina thamral ta te pawh. Pathian ka ankhum tumte kha chiang takin a rawn lang a. Ka tleirawl laia Pathian ka zah ve thin zia leh kan chhungkaw diklohna siamthat tuma theihtawp ka chhuah ve thin zia te kha..tunah erawh khangte kha an liam tawh a. Keimah chauhin, khawhar takin khawvel ka hmachhawn a ni. Keimah leh keimah ka inhrem a, min hmangaihtute thinlung ka hliam a, mahni hmasial takin hringnun hi ka lo kalpui a lo ni. Ti nge khi hla chang khian, vanduaina ka tawh lai khan min lo kaihharh tawh loh le? Ka mamawh ngawih ngawih lai khan engvanga hrechhuak lo nge ka nih? Nu zawng zawngte aia nu danglam, Pathian hrelotu , fate aia sum leh pai hmangaih zawk nu ka neih vangte, Eiruk hmang pa ka neih vangte, ka hmangaihber leh ka innghahna in min thihsan avangte, chumi hnua ka hmangaih leh tak, a fa ka pai avanga min hnutchhiahtu avangte khan ka nun hi ka tichhia a. Ni e, keima nun ngei hi keima kut hmangin ka vaw chhia a ni.

.

Pathian chu ka dem a; ka nat duh em em tu leh min nuihsawh duhtu niin ka ngai a, huat ka tum a, ka runluih reng a ni. Mahse, ani chuan ka beidawn tawp leh damchhan reng neiloa ka inhriat tawh hnu, dam thlahlel tawh lo khawpa nun nawmna ka hloh tawh hnuah hla thu tlemte hmangin a amah hnaih turin min rawn ko chhuak leh ta si a!!a va mak em..(hetia a sawi lai hian phone atangin a tap hlawp hlawp thei mawle..) ka thinlung chu a let but a, thingthiin ka neihchhun Pathian chu auh ka tum ta a. Ka tawngtai ngai tawh loh avangin chham tur ka hre lo..”Lalpa, engkim I hria, min pui rawh” tih bak sawi tur ka hre lo. Mahse, ka thinlung zawng zawngin ka ngen a ni. Chhan ka ni dawn tih pawh ka hre nghal. Chumizan chu mak tak maiin Sanga thihcham a lo ni chiah mai! Sanga hian Pathian hnenah min chhanchhuak turin min ngensak anih dawn hi ka ti ta ngawt mai. Piangthar inti ve mah ila, min duhloa min diriam thintu te hnena kir leh chu ka phur thlawt lo a. Ka pi leh pute erawh ka tlawh a. Ngaihdam ka dil, ngaihdam ka dil chhan erawh ka hre lo. Ka nu leh pate erawh phone atangin ka bia a, ka pa chu ka ngai thar a, min ngaihsak thin zia te ka hechhuak hnuhnawh a. Ka nu pawh ahma angin ka haw tawh lo. Mahse, Isua ka ni silo a, ka thinlung taka pawm thlap thei tur erawh chuan hun ka la mamawh a ni. Min dem su aw..ka nau Hmingteii pawh ka be fo a, ka nau mipa tan pawh ka thiam ang tawkin ka tawngtai thin. Ka u mama chuan min rawn tlawh tawh a, kan khuaa hawnpui min tum a, mahse, ka hnial tlat! Ka nu ka hmachhawn ruala indona ka hmachhawn nghal tur kha ka ngaingam lo. Ka la chak tawk silo a.

.

Ka pa chuan ka dinhmun leh rilru hrethiam takin pawisa min rawn thawn a, ka inluah chu chhe ve hlein a awmna mawng hle mahse, ka chhuahsan phallo. A hlu vet vet em a sin. Mahse, inneitute phalnain ka chei tha a. MA ka zir tha leh bawk a. Restaurant changkang ve takah ka thawk ta bawk. A theih hram chuan ka pa te tihbuai loh ka tum a ni. Engtin nge Pathian rawng ka bawl ang tih ka ngaihtuah nasa ve a. Hetia ka hnathawhnaa lo chawl, thalai, ruih hmel deuh te an lo awm chuan an hming ka zawt a, ka tawngtai sak thin. Min eilo viau maithei, mahse, ka kawng neihchhun a ni hrih a. Tin, sawma pakhat hi ka khawl a, thla 3 hnuah khawsak harsa nia ka hriat te ka pe ve thin. Hetia ka sawi kher chhan pawh sawma pakhat te chu Kohhranah chhunluh tur alawm ti in awm maithei a, mahse, “Heng mite ber chunga in tih hi ka chunga ti in ni” titu kan Lalpa Isua Krista khan kohhrana ka thehluh loh avang in ka chungah lungawilohna a neih ka ring lo. Sawma pakhat nilo, ka neih ang tawk leh ka phal ang tawk chu Pathiam ramah ka pe ve leh tho zel a. A beitham thin naa ka lawm tho mai. 

.

Tuman ka chanchin hi an chhui peih lem lo a, min ngaihven riautu an awm hek lo. Chu chu ka lawmna a ni. Kohhranah erawh ka theih ang tawka tam tel ka tum a, an fel a, tupawh mai hi an tha em em vek mai a ni. Akima erawh ka hmu ngai tawh lo a. Apa thih thu erawh ka pu in min rawn hrilh ve a. Ka hmelma tana tawngtai chu harsa ka ti, naupangchhia takin, “Lalpa, Akima tan ka tawngtai theih loh vang hian min dem suh aw..thinlung takin ka dilpui thei chuang silo a, a dera dilsak vel kha chu nangpawn I duh ka ring lo” te hi ka tia..hehe..ka nu erawh ka tawngtaisak thin. Thisen zawmpui na na na chu enhran reng a lo har a ni e. Ka tum dan chuan MA hi ka pass ang, Pathian zarah. Chumihnuah chuan Missionary hna ka dil ve ang tiin. Tunah chuan dil dawn pawh niila..ka la fit tawk lo ka tia, ka sual hun chhung ang tal kha inzr nan hman ka tum a ni. Vawiinah Akima ka hmu a, na ka tuar leh a, ka chak lo a, ka thinrim vangin mawilo takin ka che thelh a ni. Mahse, “Min tichaktuah chuan engkim ka ti thei” tih hi vawn reng ka duh a ni. “Lalpa, ka fit hma hi chuan min hmuhtir tawh suh, khawngaihin” tiin ka dil a. Mahse, ka hmuh leh tho ka ring, fiahna a ni tlat! Ka chah duh che chu maw..khawvelah hian vanduai ber a awm theih loh, eng ang buaina pawh tawk la, I beiseina kha hloh ngai suh. Nangma nawmna tur hmangin engmah hmachhawn lo la, Pathian lawmzawng zelin hmachhawn zawk ang che. ISUA’N A HMANGAIH CHE..ka lawm e “

.

(Comment ve duah tawh lo mai ang..lungaihna chirdup hmun atanga kaitho leh tu Pathian chu fakin awm rawh se…