mask 2

MASK.. (Part- 2)

Ziaktu: Toni Râlte

"Engvangin nge i tih? Sumdawnna i nei a, i hausa a, i pawisa khan mi dang chu tanpui mai ta che. Mi dang rawk lo hian" ka ti tuar tuar a. Ka thinrim takzet. Ka thinrim chhan hi a mi rawk te ka khawngaih vang lam ai mahin, an man chhuah ka hlauh vang zawk niin ka hria. 

"Kan target te hi mi rethei chan ai tur lo lak khalh emaw dik lo taka thil ti thin te vek an ni" a ti dam thlap a. 

"Chu pawh nise, i reh tawh a. Engvangin nge i thual nawn leh a? "

"A chhan i hria alawm" 

Sawi tur ka hre leh ta lo. 

"Engpawhnise, ka tawng chhuak tawh dawn" ka ti hmuk a. 

"MASK-in information kan dawnna bulpui ber i hre duh em? Hre duh maw? I boss Remruata atangin " a ti ta a. Mak tiin ka lo dâng sâwp sâwp thung. Boss pawh a tel ve maw?! Chuvang em ni keimaha min tirh fô? Thil ka lo va hre lo em.. 

Min koh zui lawm lawmna pawh ngaihsak lo vin Jimmy chu ka kalsan ta a. Zanah a rawn kal nghal. Hnar chi a ni si lo. Hm.., a hma ang bawkin kan awm leh dawn anih hmel. Ka bula a awma min duat heuh heuh chuan ka lo nèm leh thawt thawt zel bawk si a. 

"Zoteii tal hi chingfel la" ka ti tawp. Ka inthiam lo lutuk. Mahse, ka hmangaih si a. 

"Ngaithla la, Zoteii hi ka hmangaih lo tih chu i hre tawhin ka ring. Ka nupui hual anihna chhan chu thil dang vang a ni. Tu te nge ka nu leh pa ka hriat loh laiin fahrah in atangin Zoteii pa hian min la chhuak a, amah avanga tun dinhmun hi thleng thei ka nih vang chauhin ka bat rulh nan a fanu hi venhim ka tum mai a ni. Zoteii hian min lo hmangaih bawk si a, i lo lan hma thil anih vangin kawng dang ka nei lo va, ka hmangaih chhawm mai theih beiseiin a pasal hual nih ka hreh lo ta chauh a ni" a ti a. Hetiang thu hi a sawi ngai lo. 

"Anih chuan, Zoteii chu i neih a ngai anih chu. I ba i la rul hleinem" harsa ti zetin ka sawi a. Min en reng tih ka hria. Lehlam ka hawi daih. 

"Lo hawi teh" a ti sup a. Ka khabe a rawn kuai a.. 

"I hria em? Ka nunah hian mi hlu leh pawimawh pahnih chiah in awm. Nang leh Zoteii pa. Chuvang chuan ka thil duh nei tur hian engpawh tih ngai se ka bei zel ang" a ti thwwp sup a. Min rawn fawp nghal zat. 

Lo chhanlet loh hi a har thin mang e. Ka kawr bahna a tuai liam a, ka hnute a zen nghal zat. Ka meng diar diar, a hmel sexy lutuk leh pa lutuk chuan min hip bet vek ni maiin ka hria. 

"Emy, ka mamawh che. Min pui ang tiraw" a ti hrâwk a. Min pawm nawlh a, roomah min luhpui ta. Vawi tam a inah pawh kan inhmu zing, sex kan hmang ngai lo. Zanin hi a dan a dang tlat! 

"Jim, duhtwwk teh" ka ti a. Ka thaw ham ham mai. 

"Aih, ka insum tawh dawn lo. Ka ta i ni anga, i nghet mai ang. " a ti ta mai. 

"Chutiang vang ringawt sex hman ka duh hleinem, inhmangaihna vang zawkin ka duh"

"Hei hi inhmangaihna chu a ni lo em ni? Enteh, min mamawhzia hi" tih pahin ka hnute hmur chu a fawp zauh a, a kawh lah chu a hrual ner ner a. Ni e, ka châk! A angchhunga awma a ta liau liau nih chu ka chak lutuk. Mahse, innei thei ta si lo ila.. Tia ka ngaihtuah mek laiin ka panty a pawtthla der tawh. A kut hmanga zei taka a sawngbawl takah chuan, mi zei lo leh tawnhriat nei eih lo hi ka tuiral zo ta. Zah ka hre tawh lo va, ka rum ham ham nia! A vawikhatna a ni hauh lo tih pawh ka chiang. 

"A na ania.. " ka ti thawt a. A kang awk. 

"Ka lawm e. Ka hmangaih che" a rawn ti sup a. Dimtein a che zui ta a. 

Nula virgin ka ni ta lo!  

Sex kan hman tak hnu atang phei chuan min ta neih zual a, ka lakah a thikthu a chhe thar riau bawk. Zoteii ka ngaihtuah chhuah loh chang chuan ka hlimpui thin. Rukru tenawm tak ka nihna chuan min vaw chau leh si thin. Hmangaih ka tawng ve a, chu pawh misual, mi rawk hmang a ni a. Nupui hual a la nei zui!  

Sawkarin thapui thawha MASK ho zawnna a thawh pawh a ngawrh sauh a. Ri tet tet a awm ta. Kan boa, min rawn hmuh khan tuman Jimmy te kha kan sawi lo. Min kalsan danah anmahni sawi kan duh lo tih kan hriat vangin keimahnia tlanchhuak ve hrim hrim angin kan insawi anih kha. Mahse, tuikuk hel, silaia kah te kha an awm si a. Zawhna kan la dawng fô mai. Kan dinna ngaiah erawh kan la ding niin ka hria. Midang kha chuan MASK an ni tih an hre lem lo bawk. An hmel erawh an hre ngei mai. 

"Emy, Jima'n in inkar min hrilh a, ka nau anga ka en che avangin thurawn ka pe ang che. Bansan rawh" Boss teh tawl chu! 

"Ka tum alawm" ka lo ti hmak. 

"A chhan chu Zoteii pa mizia ka hriat vang a nia. I tan a la hlauhawm thei. A fanu a hmangaih vangin engpawh a ti thei" a ti ta a. 

"Ka lawm e, boss" ka ti sap. 

Inrawkna chu a thleng zui ta lem lo va. Mahse, ka ngaih erawh a la ngam thei meuh lo. Man chhuah hi an la nih ngei ka rin vangin. MASK an reh tak deuhah chuan thingtlang lam te leh khawpui daifem lam chu an mangang tan deuh a nih hmel. Sawrkar lahin cerfew a titawp mai si lo. Covid 19 vanga thi an la awm kal reng a, fimkhur chu tul tak a ni. Enkawlna pawh theih ang tawka thiam that zel a ni ve tho bawk. 

Boss thurawn ang khan Jim chu bansan duhna ka nei lian tial tial a, A sumdawnna pawh a tilian hleithei bik rih lo. Kan khuaa hawn mai te ka duh deuh. Mahse, sawrkar a khirh zual deuh avangin hawn mai pawh a harsa rih ang. Ka nau pawh a rawn chho thei bik lo. 

"Ka naute, naktuk chu ka huan min zuk fanpui dawn em ni ang? " a rawn ti a. Tihian ka ngaihtuah. Vawikhat chauh chu ka theihtawpin ka tihlim anga, keipawh hlim ka tum ang. Tichuan, ka kalsan ang tiin. A tukah chuan a ruk deuhin a huanah chuan kan kal ta a. Kan pahnih chiahin. 

Tui hleuh te kan inzirtir a, a tuikhuah chu a thuk lo naa a zau tha angreng. Thei chi hrang hrang a ngah khawp mai. A thlam pawh a nuam, sak that a la tum thu te a sawi a. 

"Tihian awm dun reng thei ila" Chawhmeh tur arsa ka kan lai chuan ka kawnga rawn kuahin a ti a. Ka duhthusam a ni ve tho. 

"Nia, mahse, hri hi a reh fel anga, min hrereng zui hauh lo vang" ka lo ti a. A ner sawk. 

"Mi hi i la hrechiang tawk lo ka ti" a ti nghut. 

Chaw kan ei a, Jima hian zu lem ve zeuh a ching a, mahse, hemi zan hi chuan a in lo. Chaw pawh kan ei hnem dun phian. In lamah min nghaktu nei lo ve ve chu kan hmanhmawh tehchiam lo va. Chaw eikhamah thleng ka sil a, aniin hmun a phiat durh durh thung. 

"Riak mai ang" a ti sup a. Dar 7 a pel fel tawh. Pawi ka ti lutuk lo. Haw mah ila, a inah min riahpui tho ka ring. Kan inbual dun leh te te a. Saruak ngalngata inhmuh tawn reng chu ka zei lohna kawng tak a ni. Mahse, sex hial kan hmang tawh a, ka zak tit tet peih tawh bik lo. Ka theihtawp chhuaha tihhlim ka duh tlat. 

Ka sam kan khuih ro a, min khuihsak dalh dalh. Inngaizawng ang pawh ni lem lovin kan titi dun mai mai a. Tuikuk lak atanga min rawn chhan dan te kan sawi dun a. Sawrkar thupek an lo hriat ve thu leh, nunrawng taka tuikuk ho an chet a hlauhzia te, tlai a hlauhzia a sawi te chu dawt a nih ka ring lo. Silaia kaptu erawh a thianpa kha a ni. Kha pa kha ka la hmu leh miah lo. Pakhat erawh kha chu Zirsanga a ni tih ka hria. Vawi hnih ka hmu tawh. 

"Bena kha chu Mumbaiah a chhuk daih alawm.. "A ti a. 

"Anih Zoteii hian a hre ve em? " 

"Hria" ti chauhin min chhang. Thudang sawi vak ka duh lo. A tawpna tur a ni si a. 

Tu zawkin nge chet la hmasa tih pawh ka hre tawh lo. Ka duhthawh lutuk chu mak a ti deuh lek lek in ka hria. Ka pawisa lo. Ka thiam ang tawka ka lei leh ka kut hmanga ka han nâwk kual chu a rum hrâwk mai. A mitmeng mutchhuah hmel lek lek, sexy zet chu ka melh ran a. In melh dun ngar ngar chunga chet kan han la chu, a nawm dan a dangdai teh e. Jim, ka lawm e. 

A tuk zingah kan haw a. Kan chau dun viau. Ka rai hial maithei ni. Ka indang hauh lo lehnghal. Mahse, pawi ka ti miah lo nia! Ka nu erawh in min hau ngei ang. A fanu chhuan em em kha ka ni ve miau si a. 

Chhunah Sakawrtuichhunah Boss nen kan kal a. A hma angin a nelawm tehchiam lo. A tarmit phen atanga min melh kawr chungin, "Nimin leh nizan vang khan thil pawi tak a thleng thei asin" a ti sup a. Min hlauhthawnpui tih ka hria. 

"Ka hmu tawh dawn hleinem" ka lo ti a. 

"I thei ang maw? Ani pawn a thei ang maw? "

"Ka beisei" 

Kan inbe tam lo kher mai. Chau takin in ka thleng a, ka inbual nghal. Jima ringawt ka ngaihtuah. Ka nu ka biak a ngai a ni. Ka inbual zawhah chawhmeh ka neih ang ang ka siam ve a. Ka nu ka call ta a, engkim a bul atangin ka hrilh vek. A chek tlal tlak a. 

"Bawihte, thutlukna dik tak i siamah ngai rawh. A harsa ang tih ka ring. Helamah pawh i lo haw thei tho a" a ti a. Sex chungchang sawi tel ngam lo mah ila; a ngaih a that ka ring lo. Ka nu bula ka han inbunruak chu ka thawl huai a. Nuamti takin rawng chu ka bawl ta a. 

Thleng ka sil mek laiin, Boss in min lo bia a. Naktukah Sialsukah kan zin dawn anih chu. Sialsukah tun hnaiah hian eng ramsa nge hriat hleitheih loh a inlar nasa mai a. An ran vulh a seh nual tawh nghe nghe. Chu chu han belhchian ve kan tum dawn a ni. Jima nen kan la inbe miah lo. Ka duh dan a ni tho naa a reh hmak chu mak erawh ka ti deuh. Ka ngai leh veng veng tawh lehnghal. Dar 8 velah ka mu daih. You tube lamah thu ngaihnawm ka ngaithla a, kawngka ka kalh tih chiang takin ka hria. Ka mut a rawn chhuak tan a, ka thil play lai ka off chiah tihin rim mak deuh ka hria. Ka hnar ka len vut vut a. A rimchhe hran lo a, mahse, thil hiar deuh rim niin ka hria. Ka hriat loh karin ka lo muhil daih. 

Ka harh chuan thawh mai ka tum a, ka lu chu a rit takzet. Ka han inbeng kang a. Eheu! Ka khumah ka lo mu awzawng lo mai. Dunlop hlang chungah ka mu tih ka hria, room te takte, bungraw dang pakhatmah awm loah ka awm mèk! Jima thiltih bawk a ni leh mai ang em? Kawngka a ri rak. Ka hawi nghal zawk. Tlangval la upat hmel lem loh, inmet fai vang hian thlengin eitur a rawn keng a. Arsa buhchiar niin ka hria. Soup nen a lo keng a. Ka ril a tam bawk a, ka lo ei zo nghal duak. Ka hmaah a thu reng. Ka ei zawha thleng senga kal leh mai a tum lai chuan, "Khawiah nge ka awm? " ka ti ta a. 

"An la hrilh ang che" ka rin aiin a aw a nèm. A tho nalh a, biak hman lohin a kal leh daih. Ka indap, phone ka ak si lo. Engmah ka nei lo. Tukverh reng reng a awm lo. Thawm lah chu a reh em em lehnghal. Eng nge maw ka chungah thleng le? Boss nen kan zin tur thu kha ka hrechhuak a, ka inah a va kal ngei anga, ka awm lo tih a hmuh rualin Police a ko mai ang chu maw.. Min that duh nise min man kher ngai lo vin ka nunna an la tawh ang. Kidnap ka tawk leh ta chu a nia! 

Room pawn lamah thawm a rawn awm ta a. Ka mu nghal vat. Kawngka an rawn hawng a. Ka rin loh lutuk hmel ka hmuh avang chuan ka thu chhuak zawt mai. Zoteii teh daih chu! 

Thil awmzia ka man tan. Jima vanga ka tawrhna bultanna a ni ngei ang. 

"I tha em? Thil kha i ei thei maw? " a aw chu a zaidam khawp mai. Ka hmaah a rawn thu ve a. 

"Aw.. Ti nge hetah ka awm" ka ti a. 

"I la hre mai ang. Mi pahnih inkara inrawlh pawizia pawh i la hre mai ang" a aw chu a nelawm tawh hauh lo. 

"Jimmy vang tiraw? "

"A dik"

"Enteh, ka hria alawm.. Pawi ka ti. Ka thiam miah lo. Mahse, nimin atang khan bansan tumin theihtawp ka lo chhuah ve mek asin. Biak pawh kan la inbe lo" 

"In inbe thei reng nang. Ani pawh nangmah ang bawkin kan hrèng alawm" a ti ta mai. 

"Hetia tih hi a tul lo asin. Puitling vek kan ni a.. "

"Hetia tih a ngai ta hi pawi ka ti keipawn" a mitmenga tawrhna lo lang zawk chu ka hmuh hmaih lo. 

"Duati.. " kawngkaah chuan Pa hleitling tak, hmel tha deuh mai. Nelawm zet hi a lo ding zuah a. 

"Pa…hna chu thawk tan tawh mai ila" Zoteiin a tih chuan apa a ni tih ka hre ve mai. 

"Emily maw.. i tha em? " a aw chu a chang lek lek. Ka lo bu ringawt a. Min kaitho a, ka lu a hai kher mai. 

"Lo kal rawh le.. Thil hmuhnawm tak ka entir ang che"a ti zawi sup a. Ka hlau ve lek lek. 

Room pawn lam chu hall zau lutuk lo hi a ni a. Hall tawpa room lo awmah chuan kan lut ta a. Boruak chu a vawt angreng hle. Room chhung chu a zau viau a, bungrua pawh a awm ve tawh. Chair panga vel bakah bang rinchhan chuan almira a awm phei zui a. Room kil tawpah chuan Jimmy chu chairah phuar chungin a lo thu reng mai. An phuar ngheh hmel khawp a, tal chhuah a har viau ang. Kan inhmu thut chu ka ka ti a, ka lo rin dan deuh mah nise; amah ka khawngaih vang nge ka bing chuk chuk mai. 

Chairah min nem thu a, an ni pahnih pawh an thu ve nghal. 

"I hriat angin ka fanu leh he tlangval hi innei mai tawh tur an ni a, i lo lang a. Engkim i rawn tichhe ta vek a. Mahse, thil engkim erawh i tihtawp ka phal lo.. Jima hi ka fapa aia ka hmangaih lohna ka hre lo va, ani pawhin min hmangaih. Ka fanu enkawltu atana ka thlan a ni a, a enkawl ngei bawk ang. Tunah hian i duh i thlang tur a ni. Tichuan, nungdamin i chhuak emaw i thi ang. 

Jima hi hmu tawh lo tura i intiam theih chuan helai hmuna thil thleng hi i theihnghilh vek anga, nungdamin i chhuak bawk ang. Tin, i hna pawh i thawk chhunzawm zel ang. Mahse, Jima kalsan thei lo nia i inhriat chuan, in pahnih hian in thi ang.. "A ti vawt raih a. 

Ka thaw hap ringawt. Invauna hmang khera ka hmangaih kalsan hi ka duh hauh lo. Mahse, jima tan ka tih a ngai. Zoteii pa mitmengah nunrawnna a tel tih chiang takin ka hre tawh bawk. A sawi ang khan a ti ngei bawk ang. 

"A pakhatna kha ka thlang e. Jima pawh tha takin i enkawl ve tur a ni" ka ti ta a. Ka inringtawk viau chu mak ka ti zawk. Jima mitmengah chuan dodalna ka va hmu thei. A lu a thing ngar ngar bawk a. Mahse, ka ngaipawimawh tur a ni lo. Nungdama a awm a ngai. 

"A tha e. Hei hi ka rinsa a ni reng bawk a. A lawmawm e. Nakinah ka nau ten an va hruai haw ang che" a ti a. Jima chu a va pan a. 

"I pawm em? " a ti hriam hraih a. 

"Aih.. " 

"Hm.. I nula chuan a kalsan dawn che. Nang erawh ka makpa i ni dawn"

"Hei hi i ti ngawt thei lo, ka pa.. Hmangaihna awmzia i hrethiam lo atin nih kha.. " Jima aw ki chu a ring lo naa a hriam angreng. 

"Ka fanu ka hmangaihna chauh ka hria" 

Mipa pahnih an rawn lang a, "Buaina kan tawk. Remruata'n police a pun tlat" an rawn ti a. Ka thaw huai. 

Kei chu min hawntir ta lo chuan, min phuar a. Room tetakteah bawk khan min dah leh ta. Tlanchhuah ngaihna reng a awm ta lo. Kan awmna hmun hriat theih tal dan awm se chuan aw.. 

Jima mitmenga min hmangaihna kha ka mitthlaah a chambang reng mai. Heti taka min hmangaih hi ka ring em em miah lo asin. Engvanga min duh nge tih ka zawh khan, "Remruata avangin ka hmu fô tawh che. Tv ah nen.. Khatihlai kha chuan ka enliam mai mai che. Nula te takte hian min hîp ngai lo. Mahse, Bena nen i ina kan rawnn kal zan khan mak takin min hîp a. Vawmbei ang thlawrh ka ni. Bena pawn a man rang teh asin" a ti anih kha. Mahse, kan vanduai tlat si. 

Ka tap lo va, ka muhil thei hek lo. Nula te tak ni mah ni ila, ka sehhel ve viau. Kan hna avang pawh a ni maithei. Boss chuan Zoteii te a ringhlel ve nghal mai tihna em ni ang. Warning min pek fo danah an hlauhawmzia a lo hrechiang tawh hle a ni mahna. 

Ka lo muhil siar siar a, kawngka rawn inhawng ri chuan min tiharh a, ka harh nghal. 

"Ka naute, harh rawh. Intiharh rawh. Kal vat ang" Jima aw ngei a ni. Min phuarna chu a phelh vat vat a. Thawm engmah siam lo turin min hrilh nghal a. Dim takin room chu kan chhuahsan a. Jima an dahna room piah maia step lo awmah chuan chhoin a kal hmasa zel a. Thawm chu a reh kher mai. Step tawpah gate a lo awm a. A inkalh bur mai. A sang deuh si a, lawnliam a har ngawt ang. Mahse, ka bialpa chuan min pawm kang a, ka tha tawpin a chhip thlen ka tum a, thawm pawh kan siam lo thei ta lo. Gate lehlamah chuan ka tum thla thei hram. Jima lawn lai chuan a rik loh nan Gate chu ka lo chelh a. Kan hlawhtling leh hram. Chhuat chu cementa zut vek a ni a, thawm dim a har lem lo. Corridor thui vak lo kan zawh hnuah step a lo awm leh a. A thim ruih mai. Thawm pawh kan hre tan. 

Step hnuaiah min luhpui a, chèp zetin kan inhnawh a. Zawitein, "He lai hmun hi Zoteii te in hnuai a ni a. Tuman an hre ve lo. Lei hnuai a ni tlat a. Chuvang ania tukverh reng reng pawh a awm loh. Ralthuam leh thingrai a tawlh ruk laia a dah thatna hmun a nih hi. Tin, a hmelma te ruang a thuhrukna hmun pawh" a ti a. Mi râp angreng. Step chu a rawn ti thla thlep thlep a. 

Zoteii pa leh tlangval pahnih an ni. Corridor kha an zawh a. A thim deuh a, min hmu lo a ni ngei ang. An rawn phei leh hma ngeia kan chhuah chhoh a ngai. Kan awm lo tih an hre dawn si a. Kan inzui chho ta hlawk hlawk a. Kawngkhar a lo awm a. Inchung pindan kawngka a lo ni. 

Room pakhat mutna khum pakhat leh sofa lo inhunnaah kan chuang chhuak ta hlawl a. Tukverh pawh a awm tawh. Tu room tak ni ang maw.. Chhuahna kawngkhar chu a hawng dèk dèk a. Tukverhah bar an kham vek avangin chhuah ngaihna a awm si lo. Zoteiii ten min hmu lo thei dawn ta lo. 

"Hawh le.. " a ti a. Kan chhuak leh ta. Common roomah kan chhuak hlawl. Lo awm ve dangte chu an mengphawk teh e. Chutih lai mekin hmanhmawh zetin Zoteii pa leh a thuihhruaite an rawn lang ve nghal. Zat bawk. Kan buai dawn ta a ang kher mai. 

"Inspector, he pa ngei hi a ni e. MASK-a an boss chu" tia Zoteiin Jima a kawh va chu mak tizetin ka lo melh a. Boss Remruata pawh a meng phawk viau!  

"I chiang maw? " Inspector chuan a ti a. 

"Chiang e. A nupui hual ka nih vangin engkim ka hria. A thawhpuite pawh ka hrilh thei ang che" 

"Heti zawng hian maw zote.. Hehe.. A tha e. Ka lawm e" Jima chuan a ti sap a. A kut chu Police hmaah a va dawh a. An lo handcuff ta mai. 

"Sir, thil ka sawi ve thei ang em? ' ka tih lai mekin, "Sir, hei Emily hi inhriat angin reporter a ni a, MASK tan a hnawksak deuh dawna a lan vangin Jimmy hian a kidnapp a, zuk chhan kan tum lai mekin amah ngei a rawn inpe ta zawk anih hi" Zoteii pa thusawi chuan min tinghing lawih. An va dawthei pafa ve mawle. 

"Ani lo sir.. Engkim ka sawi thei.. Min kidnap nise, engvangin nge he lai hmun daiah min thuhruk anga.. Thil awmzia ngaihtuah tum rawh" ka ti a. 

"Pu Ruat, kan lawm hle mai. I zarah MASK kan man thei ta. I thiltih hi a ropui takzet a ni. Kan kal ange" Inspector chuan a ti a. Zoteii pa nen an inmelh dan atang khan eng emaw chu a awm tih hai rual a ni lo. A lo tham vek tawh a ni mahna. 

Boss Remruata leh Zirsanga pawh an man tel ve. Bena erawh a awm lo va. Thana lamah min hruai a. Ka zui ve zel tawp. Mahse, engmah ka sawi fiah hman lo, MASK an man tih hria apiang an lo pungkhawm a, an hmel an hmuh chak vang hrim hrimin. Kutthlak duh erawh ka hmu lem lo. Engmah ka sawi kaw thei rih si lo va, Jima thu min rawn angin ka haw ta phawt. Fimkhur erawh ka fimkhur zual a ngai viau ang. 

A tukah ka va kal a, An lawyer te pawh an lo thlengntawh a. Bail an lo tum mek a. Mahse, phalsak an ni lo. Court rorelna nghah mai a ngai ang. MASK an ni ngei tih fiahna a awm miau lo va, an ni ngei tih hre mah ila, beiseina ka la neihsak tho nia!  

"In khuaah haw rih phawt rawh. I tan a him ber ang. Lo lungngai suh. Ka nupui i ni dawn tihah lo chiang la a tawk" Jima thusawi hnuhnungber. A thu awihin a rang arangin motor hire in kan khua ka pan ta nghal vat a. Ngaihtuahna a chawl hman meuh lo. Ka nu bulah engkim ka sawi a. A hlauhthawn em vangin ka hna pawh bansan mai turin thu min rawn. Ka hrethiam khawp mai. Ka bang mahna le. 

Central jailah an thawn thla ta a. Mi zahawm leh puitling tak vek an ni si a. A hrehawm viauin ka ring. Ka kan thei der bawk si lo. Zoteii te pafa fing vervek lutuk chuan min tihel laklawh a, Jima chu chhuah ka tum lo bur. Ka nu erawh ka hrilh lo. 

An court ni hmasa ber a lo thleng ta a. Social mediaah an chanchin bak a leng lo a ni ber. A tam zawkin an tan chu ka lo lawm ve tum hrang a. Mi sual tak hmel an pu bawk si lo. Mi lainat an hlawh ta zèk mai. 

Ka nu nen a leipuiah thlai hnah leh rah engilo kan va lam khawm a, in kan thlen hma hmain ka nau a lo tlan a, "U, U Jimmy te an phurna prison van kha a accident a.. " a lo ti! Ka ding chawt. 

Ka tawng ve hmain, "U Jimmy leh a thiante an bo daih" a ti leh a. Thil chhut peih nafam chu eng emaw tak a thleng anih ka ring nghal. Ka awm erawh a nuam lem lo. Chaw pawh ka ei mang lo. 

Whatsapp msg ka bih a, Jima te chungchang hlir. An accident dan an sawiah chuan, Chawlhmun thlen hma deuhin Truck a rawn tlan a, a side mai dawn emaw tih laiin a rawn su bur a, Van chu kawng thlangah a bu liam ta mai a niawm e. Kawng thlang hi a awih vak lo naa, an lum thui angreng. Vanneihthlak takin thi an awm lo va, tang zinga pahnih erawh an hliam na deuh, driver leh vengtu te erawh an pilh nin nian chauh. An vannnei takzet. Jima te pathum erawh an zawng. Hmu zo tlat lo. Truck pawh kha a ding ve nghal a. Motor lo tlan te chu tanpui turin a ngen nghal a niawm e. Khawiah nge Jima te chu an awm tak ang le.. 

Ni 2 a liam a, an la hmu chuang lo. Police ten ngawrh takin an zawng a, An inah te leh an kalna tur awmah. Hmeithai ina zang zawn ang mai a ni. An tlanchhuak tih chu thu than dan a ni ta. An chung a rip leh ta sawt mai. 

Kan naute fapa te zawk birthday kan lawm dawn a. Ka intiphur hram hram a ni ber. Ka za lo teh e. Artui kan chhum a, ka nauin tualmeiah ah arsa a sawhchiar bawk a. Mahni buai buaiin kan buai a ni ber. Ka ph a ri a. Number hlang ringawt. 

"Emy, I lo chhuah a ngai.. " a rawn ti ringawt a. 

"Tu nge"

"Bena.. Tunah hian in khaw tuikhur Lamhnai tih bulah ka awm mek. I thawmhnaw tlem nen rawn kal rawh. Jimmy i hmuh duh chuan" a ti ta mai. Chhei le.. 

Ka nu ka ko, ka hrilh. Min en thin, min ui tih ka hria. Mahse, jima ka hmangaihzia leh tunhnaia ka hlim lohzia a hmuchiang si. 

"Bawihte, ka thachhang dawltu ber i ni a. Mahse, i naute avangin ngaihtuahawmin kan awm tawh bik lo vang a. Hmangaih neih hi a hlu tih ka hria. Kal rawh. Pathianin kan inhmuh lehna hun tur chu a rawn herchhuahtir leh em em ang. I kal loh chuan kan rilru a nuam dawn chuang lo. Tluang deuhin aw" a ti a. Ka mittui a tla ve. Ka nu nen chuan kan inkuah vang vang a. Tlanchhe nun kan hman dawn vangin kan inhmu leh ang em tih kan hre si lo. Ka naute kan ko ve a. Thil. Awmzia kan hrilh zung zung a, Jima nen kan inkar hi chu an hre ve tawh tho va. Ka naute chu ka thlah ta liam liam a. An hrilhhai deuh vangin awmdan an thiam vak lo. 

Lamhnai chu ka va thleng a. Min hmutu an awm lem lo vin ka hria. Thingkung phen atangin Bena chu a lo chhuak ta a. Hmanhmawh takin khaw tawntira a motor awmna lam chu kan pan ta a. 

Bena thiltih vek a lo ni. Ka ring rengah. Truck driver kha a thianpa tho a lo nia. Ani erawh truck chhungah a biru thung. Khatia an buai takah khan rang tajin a thiante a zuk zawng nghal a. An lo lum hla lem lo bawk a, hliam em em pawh an nei mang lo. Mipui zawn lohna lamah kawng hreuhin harsa takin kawng an pawh a. An thawmhnaw te thlakin lukhum an khum a. Khaw en lai reng chuan a rukin truckah khan an lut ta dial a. An biru ta ngat ngat mai a ni. Truck driver kha an man ngei a, a truck erawh an dap lem lo. Buhfai phur a ni a, dap ngaiah an ngai lem lo aniang. A duh vang renga su a nih loh thu leh Vanin side a lak that loh vanga a sawi ve tlat vangin tih vak ngaihna a awm si lo. An sezawl chhuah phawt. Enthlak erawh a ni. A chhan chu amah vangin mi pawimawh pathum. An bo tlat si a. 

Bena thluak chu a tha kher mai. 

"I ina kan rawn kal zana Jima awmdan tehchai kha chu a.. Silai pawh lekkawh zo lo" a ti a. A nui hak hak a. Ka lo nui ve. Mumbaiah hnathawh tur a neih tak avang leh Jima berin Bansan a tum tak si avanga lo kalbo daih a lo nia. Zoteii pa hlauhawmzia te a sawi kai a. Zoteii ngei pawh a ngainat chi a nih lo thu leh rilru lamah chian lohna nei thána a hriat thu te a sawi bawrh bawrh. Rin aiin kawm a nuam. 

Aizawl chu dar 1 bawr velah kan lut a. Kan duhdan a ni reng a. Tu te emaw ni huanah kan tlang nghal. A hnuah Zoteii te huan a ni tih ka hre chiah. 

Kan inhmu chu zah pawh kan sawi thei lo. Kan inpawm chawt mai. Tichuan, kan awm dan tur an rel ta mam mam a. Boss chuan a nupui hnenah engkim a lo hrilh tawh a. A nupui pawh hruai tel duh viau mah se, an in lamah duty an awm vek tawh si a. Chet lak ngam a ni rih lo a ni. Kei pawh kha min enthla tur an rawn tirh ka ring khawp mai. 

"He lai hmun pawh hi a him tawh lo. Naktukah chuan an rawn lang mai ang. Zoteii pa finzia kan hriat kha" Zirsanga chuan a lo ti boh a. Mutmu pawh kan tuah hman meuh lo. Zing dar 4 velah kalkawnga kan ei tur paiin huan chu kan chhuahsan a. Airport lama chetlak ngam a nih miau loh vangin kawng dang dap mai a ngai dawn a ni. 

Car pahnih kan keng thei bawk si lo. Danchèp kan va ni tak. Lunglei lam kan pan ta daih. A chhan chu ramriah buaina kan tawk daen tlat si a. Ram pum huapa an lar tawh miau vangin fimkhur a ngai vek mai. Lungleiah chuan hotelah pawh kan thleng ngam lo. Jima sumdawnpui pa inah kan innghat. A rintlak em ang chu. Tlaiah Zirsanga leh Boss an va chhuak a, inchei danglam hran lo vin. An tum dan a ni reng a. 

Zanah chuan Lunglei khawpuiah MaSK member an hmuh thu a thang nghal, zoram titi a tling leh ta. Keini erawh kan tawm tlawk tlawk a, a tuk nileng pawn kan chhuak lo. Jima nen awm hran hun kan nei thei bik lo va, a thiante chuan min hre vek mah se, han in emg emaw viau kha a nuam lo ve a. Tlai dar 3-ah Inchei danglamin Sumo counter kan pan ta a. Lunglei - Gauhati sumoah kan chuang ta far mai. Tuman an hre lo anih hmel. 

Zirsanga sam chu a kir bup a, a mithmul a line kulh, an zinga mam ber a ni bawk a. Tuai anga han chei pawh a inhmeh phian. Kan nui kan nui mai. Ka thianpa a ni dawn a. Remruata erawh lukhum lum a khum ût a. Tarmit a vuah bawk, a vuah sa aia lian hlek kha. A hmuihmul lem chu a ning khawp mai. Bena erawh chu mipui nawlpui la hriat loh a ni a. A inchei danglam lem lo. Jima ve thung chuan ui tak chungin a khabe hmul a met fai vek a, tarmit a vuah bawk. A hmui chunga kutchuk kan siam chawp chuan a tilang chhe tawp! Kan innnuih leh rih thin. Kei pawh min hriat ve tawh deuh vangin salwar hnawk zet ka ha a, a sam kan tan hmawk. Ka va ui tak. Ka chalsam chuan ka hmai chanve dawn a hliah a. Ka ning ber awm e. 

Ding khawmuang lo vin kan tlan ngat ngat a. Thenzawlah zanriah kan ei a. Aizawl kan thlen chuan dar 11 a ri tep. Kan hmanhmawh vak lo aniang e. Aizawlah chawl khawmuang lo vin kan tlan leh ngat ngat. Kan vaiin driver nen pa 8 kan ni. Jima nen a hnung berah insi rialin kan thu dun ta daih a. A chhan chu kan chuanpui mizo pakhat a chhuk diah tawh vangin vai chu kan zah vak lo. Kut inhumsak tawnin kan mutlu leh lawp lawp bawk. 

Gauhati kan thlen tirha inbual ka chak dan kha.. Hotelah kan invawm lut nghal a. Boruak a nuam tan. Hlauhthawnna pawh a bo deuh ta. Jima nen kan roomah an rawn lut khawm a. Zu an in. Ka khap lem lo. An titi chu ka lo ngaithla ve kar. An kai nuam ta deuh bawk a. Kan inmang tha ta a. 

"Bawihi, a hranpaa inneih i duh em? " a ti thut. Ka lo ngaibtuah loh lam tak. 

"Ka hre nang"

"I duh chuan a theih tho ang. Mumbai thleng phawt ila, pastor te pawh an awm alawm" 

"Ka virgin tawh chuang hleinem"

"A mak.. Dan khatna kher ka sawi lo. A hranpaa invawna mo kawr hak te i chak takin ka ti" 

"Chak ve e.. Kawr fual hak te chu" 

"Umm.. Kan ti ang. I tan liau liau kan thuitir dawn nia.. I size hi chu an phochhuahsaah a awm lo vang" ka va chum taih. A lo nui hawk a. 

"Ka khawih chak tawhzia che hi" a ti nghut a. Min rawn pawm nghal rawk rawk. A bak chu in hriat kha.. Hehe.. 

Tluang takin Mumbai kan thleng thla a. An sawihona atangin an mi rawkte kha eiruknaa inhnamhnawih an lo ni deuh vek a. Eiruknaa tel ve lo pawh an hnuaia hnathawkte laka sual tak, chem lo va mi lu la tu. Te an lo ni. Ka hmangaih vangin ka thiam chawp zel mai. A buaithlak.. Aa… 

Flat nuam leh zau takah kan inbengbel a. Mizoram boruak a ziaawm deuh hunah chuan tih dan dang te pawh a awm mahna.. Ka beisei chiah lo. MASK kha mi rilruah a thi dawn si lo va. 

Kawr fual mawi tak haa nalh inti em ema darthlalang hmaa ka din lai chuan ka hnunglam atangin min rawn kuah a,. 

"Zoteii te kha engtin nge an awm zel ang le? " ka ti sap a. 

"Ngaihtuah duh suh. An damkhawchhuak thei em em ang. Ka tawngtaipui reng thin alawm" a ti a. 

"Ka nuin min hmu se.. Tihian.. " 

"Thlalak kan thawn dawn nia. Engtikah emaw ka pi chu kan hruai thla ve anga.. A makpa felzia hi hahîpin a la sawi dawn a ni" 

Ka ei lo ner kual vel chu min rawn nuih a. Ka bianga piai zauh pahin, "Tereuhte, ka thinlungah kei aiin i lian zawk tlat si a.. " a ti sup a. Min fawh a tum. Chuan ka lo nam a, "Lipstick ka inhnawih tawh" ka lo ti hlar a. 

" A ho.. I hmui hi ka ta.. I taksa hi ka ta.. I thlarau erawh Pathian ta.. " a ti nghut a.. 

Kan nui dun har har a.. 

A tawp ta.