Mask 1

MASK..!  

(Part -1) 

Ziaktu: Toni Râlte

Covid-19 vanga khawvel ram hrang hrang buaina siper chu kan ram paw'n kan lo dawng pha ve. Ram rethei tak kan nih ahnu hmanah ei leh barah kan ram a tlahniam zual a. Hripui vanga thi ai mahin, eitur tlakchham vanga nunna chân an tam zawk hial awm asin. Thingtlang khaw lam an vannei lel zawk. An ni zawng ramhnuaiah eng ilo an vai thei zawk a, buh ei tur nei lo pawh nise, ramhnuaia hnah nèm leh bahra ring te ringin an intungnung ve hram hram thei zawk a. Khawpuia cheng, veng tlabirha inbengbel ho mawlh an khawngaihthlak. Pawisa thawhchhuahna a vâng a, thawkchhuak tehreng pawh nise, eitur lei tur a awm chuang lo. Thil man a to em em bawk si. Ramhnuai lamah inhnangfak tum mah se; curfew-in a dang bet tlat bawk si. Nun a hahthlak takzet. 

Chutianga a ram buaia kan buai lai mèk chuan, Mizorama la awm ngai lo, Gang pawl pakhat "MASK' tih chu a rawn piang ta hlawl mai le.. Tu te nge an niha khawi lam mi nge an nih hria an awm lo. Mi hausa te rawkin an thil neih hlû leh an eitur chhek khawl te ruksakin eitur nei lo mei alh en mèk te hnenah chung an thil ruk chu an hlan thin. Mi hausa tan hnawksak viau mah se; mi rethei te tan erawh rukru duhawm tak an nih ngei a rinawm. Thingtlang lam pawh ramhnuai hnahnèm ten a daih loh chin a awm lo thei ta lo va, Tin, an thil eiin an kua a zut a, eitur tha ei thei lo nafam chu kawthalo mai mai pawh an thihpui ta zauh zauh mai. MASK pawh chuan thingtlang lam a hrut ta fô!  

Mi hausaho mangang authawm chu mi rethei riltam awrawl aiin a ring zawk nge, Sawrkar chuan MASK chu wanted-ah puangin, zawn hna beihpui a thlak ta a! Mahse, tuman tu te nge tih an hriat loh miau chu man mai an harsa viau ngei ang. Hrechhuak tehreng pawh nise, hum duh pawl an kuh tûn tlat! Mi hausaho duhâmna leh uikawmna chuan Ram ralmuang kha raltitna hmunah a siam ta mai em ni ang? 

"Emy, Pu Sangpara in rawk leh a ni a, i va kal mai dawn em ni ang, ka laklawh tlat" Boss in a rawn tih lai chuan ka ner sak. Vawiin chu ka mu rei ve deuh thei ang chu tih nak alaiin. Boss thu hnial ngam chi ni hek lo, peih lo zetin ka tho a, Ka nauin dawhkana tuilum a lo chhawpsa chu ka in khawlh khawlh a, tlem chuan ka harh deuh. 

Emily Vanlalruati ka ni a, Kum 2 liamtaah khan Journalist hna ka thawk tan a, Reporter tha ber ka ni chu ka ti lo, mahse, boss mi rin ber pawl ka ni chho ta hi ka tan chuan chawimawina nopui a ni tawh hrim hrim. Ka nun harsa leh khirh tak ka ngaihtuah let chang chuan tun dinhmuna ka vanneihna avang hian lawm lo ngam lo chi niin ka inhre lo a ni. Lungzar khua ka ni a, ka nu hova awm kan ni. Ka putea, pianphunga rualban lo kan awmpui bawk a. Kan unau pathum kan ni. Kei hi ka upa ber a, ka pa hi zu seh vanga thi tih ka'n sawi reng reng ang e. A thih hian keipawh kum 17 chauh ka la ni a, ka nu chuan pasal dang pawh ngaihsak lem lo vin min tulpui ta thak a. Ka ngaisangin ka zah takzet a ni. 

Ka nu pa ka pu te hi kan khaw mi awm thei an ni ve a. Mahse, ka nu nuta pakhat zawk Pute Sanga'n nupui a nei fuh lo deuh nge ka piteii chuan chhungkua min lengdarh titih a, ka pu dawrkai hausa ve tak thin kha a tluchhe rawk rawk mai. Piteii chu a sum hrâwm a na si a, putea lahin a duh ropui si. Engmah an sawi ngam lo a ni ber. Tichuan, ka pute pawh mi pangngai an ni ve ta mai a. Ka pi thih hnu lawkah ka pa pawh rilru na takin a boral zui ve leh ta a ni. Kan chhungkaw chanchin hi bu khat daiha ziah tham a awm. Mahse, hei hi ka sawi tum ber a nih lem loh vangin kan kal kán mai aniang chu. 

Ka nu chu nu taima leh viak tha tak, dammawh hritlan pawh nei ngai mang lo a ni hlauh a, ka pa khan a hmingin hna chhete a nei ve a, a thih khan an department lam ten sum tam ve tawk takin an rál a, tin, a GP te pawh kan la chhuak bawk a. A ai kha ka nu an lak theih takin tiin kan bei nasa viau naa a zirnain a phak lo deuh si a. Pension hlawh tlem chauh kan chang ta a ni. Mahse, thla tina lakluh awm ve chu a tangkai hle tho mai. Ka nu hian lehkha a zir san loh vangin zirna a ngaipawimawh nasa a. Keini unau pawh kan zir theih chhung chu chawlhtir min tum lo. Ka nau chiah erawh BA 1st sem a kal ve chauh tihin nupui a ru ve ngawt a, a kal chhunzawm ta lo. Tunah chuan kan khaw Private schoolah a inhlawh ve ta mai mai. Class 10 kha kan khua a tangin ka passed a, Higher erawh Aizawl lamah ka kal ta a. Ka pa chhungte hla ve deuh tawh te inah awmin harsa takin ka pass chhuak ve a. Heta ka awmna chanchin pawh hi sawi tur a tam. Ka sawi dawn chuan ka hnuk a ulh thin a, sawi loh ka thlang fo. A zawng zawng hi ka nu hnenah ka sawi duh ngai lo. A rilru a na dawn si a. A hrehawm thawkhat viau tih hian tawk mai teh se. 

Ka nu chuan lo a nei lo ngai lo va, ka putea kha ka pu thih hnuah ka piteiin a hnawtchhuak a, pianphunga rualban lo tiha a ke hi a bai deuh a, a rilru hi a kim zat lo bawk. Mahse, ka nu hian a hmangaih em em a, a enkawl thiam bawk nen. A taimakna chu a hmang tangkai zet mai. Ka putea nen lo lamah an tul dun a, buh chu kan thar tam thei viau, thlai hnah leh rah te pawh kan khaw thenawmah ka nu hian a va zuar thin. Kan chawhmeh thar atanga kan lakluh ringawt pawh hian ka nau zirna chu a cover thei hial thin. Pathianin mal min sawm ka ti mai. Mahse, Higher ka kal lai kha chuan ka rethei thlawt.. 

College erawh PUC ah kalin hostelah ka awm thei ta a. Tlemin ka nun pawh a zia chho ve tan. Retheih awmzia ka hriat tawh tlat avangin tum mumal tak ka nei ve a, ka thawkrim bawk. Thian pawh ka ngah lo, thian kawm nan hun ka ui ka ti thin. Ka nu hian min fuih reng bawk a, ka nu innghahna ka ni tih ka inhriat vang hian ka tumna chu bansan hni hne ka tum ngai lo. Kan naupangber erawh zirna lamaha bil deuh a, class 10 kha kum 2 a bei a, chawlhsan duh teh mah se, ka nuin a remti bau lo. A tuina lamah kal dawn pawn class 12 tal pass tir a duh si a. Ka awmna hluiah khan awmtir ve a tum a, mahse, ka phal ngang lo. Private hostelah kan dah ta a. Kan hautak ve fû. Mahse, ka nau chiah hlawh tlemte baka a nupui kan monu kha a fel reuh a, eitur eng emaw siamin a zuar kual thin a. Chung an thawhchhuah chu in lamah intunnun nan an hmang a, ka pa pension hlawh leh kan thlai hralhna man neuh neuh chu ka nau nen kan pumbilh thin. Ka graduate hnuah MZU-ah Mass communication ka zir ve leh a. Hostelah bawk ka awm leh. Nuam tawh tak a ni. Ka nau pawh Class 12 a pass a, Mobile rapairing centre-ah a thawk zui ve nghal. A tuina ber ni miau hek. 

Tunah chuan hna sang lua ni lo mah se, ka tuina ber leh nuam ka tih ber ka thawk ve ta a. Ka nau nen Aizawl Dintharah in luahin tumah tihduhdah theih tawh bik lohin nun kan hmang chho ve mèk tawh a ni. Kan khuaah kan haw zeuh zeuh bawk. Ka nu a upa ve tan tawh a, hnathawh kan phal vak tawh lo, ka nau chiah kha vanneih asiamin kan khaw Primary schoolah zirtirtu atan an la ve hlauh mai a. A la nghet lo naa a lawmawm tawh reng reng. Fa pawh pahnih lai an nei ve tawh. Kan monu hi ka fak ngawt mai. Ka putea te hi a duat thiam em em a, ka nau chuan a thlang fuh ka ti lo thei lo. Ka nu pawh a tute nen an inawm rak rak thin a, leipui erawh a la nei hram. Hnathawh loh thiam hek lo le. 

Nula te takte, sin rât mai ka ni a. Ka vun erawh a ngo thung. Hmeltha min titu hi ka la tawg lem lo. Hmelchhia min ti ngawih ngawih pawh ka tawng chuang lo. Bialpa chu pathum zet ka nei ve tawh, mahse, tumah ka hmangaih lo. Ka zirna a khaihlak ka hlauh vangin ka then hmasa deuh vek lehnghal. Ka vei zui lem lo va, thian angin ka kawm zui bawrh bawrh thei. Pakhat phei chuan nupui fanau a nei tawh nghe nghe. Ka naute hian min chhuk en run chungin ka thu an hnial ngam bik miah lo thung a, ka nu enkawlna a tha thawlhat tih a lang. 

"Mam, news i en em? " tiin ka nau hmarcha rawt mek chu ka bia a.. Eirawng hi kei aiin a bawl tam zawk! Ka hnaah ka buaiin haw tlai tum ka nei fo si a. A nuam tihzawng tak a lo ni hlauh a. Kei aiin a siamtui thiam zawk daih. Tawng tam lem lo tak a ni a, a zakzum deuh bawk. Tin, ka nu a ngai thei viau!

"En miah lo. Ti nge? " a ti sup a. 

"Pu Sangpara in an rawk leh a" ka ti satliah a. In rawk a hluar em vangin ngaiah kan nei ta deuh a niang chu. Pu Sangpara hi Aizawl palar, hardware dawr lian zet zet, District tina hung kha a ni a. A hausa tih chu tlang hriat a ni. Ka inbual a, chaw ka ei sawk sawk a. Inchei thuak thuakin ka chhuak zui nghal. Ka nau hian ama pualin dawr a hawng ve tawh a, thawktu a nei ve tawh nen a hmanhmawh tehchiam ngai lo. 

Cameraman John nen chuan Pu Sangpara in lian zet lam chu kan pan a. Ka kal vawikhatna tur a ni. A pui hep hep teh e. Kan va luh chuan Police ho pawh an lo tin dawn chiah a, kan tlai hlek chhan chu ka pum nuam lo ka ek sek vang a ni tih ka hai lo. An khawtlang hruaitu thenkhat an lo awm ve nak nak bawk a. Ka ID chu ka hmuh a, vawi tam TVah ka hmel an hmu ve tawh anih ka ring, mjn lo hre nghal mai. Amah Pu Sangpara ngei chu kawmin, thil thlen dan chu ka zawt a. 

"Zing lam dar 4 velah Library room lamah thawm a awm vangin ka harh a, inrawkna a tam si tiin ka ngaih a tha ta lo va, ka va tho a, lehkhabu a lo tla darh deuh a, mihring erawh ka hmu lo. Library room saw a zau lutuk lo nain bihrukna tur apui saw a tam a, ka enkual hlawm a. Tumah ka hmu lo. Chutia chhuahsan mai ka tum lai chuan kan nu te thawm ka hre ta a. Rang takin kan room lam ka pan a, mahse, ka tlai ta a ni. Kan nu chu khumah a lo thu a, a thlabar hmel khawp mai, kan safe chu a lo inhawng hiai a, kan mutna zawn chiah tukverh chu a inhawng bawk. Ka va chhuak a, hruizen hrawl tak an phelh hman tak loh a ni ngei ang. Bathlar hungnaah chuan a lo insuih a, mihring tumah erawh ka hmu hman ta lo a ni" a ti chuar chuar a. An room te pawh chu kan fang kual a, thlanglama awm a ni a, khum chu chhaklam bang nghengin an hung a, khum ep chiahah tukverh pahnih a awm. Tukverh chu bathlar chhuat nen a inzawl a, anihna takah chuan kawngka ang a ni mai. Bathlar chu a thui lem lo a, chhuat nawhna leh dustbin vel bak a awm lem lo. Bathlar hungna banah chuan hruizen pawh chu a lo la insuih a. Bathlar atanga ka dah chuan ka mawng a za zek. A sang mah mah a ni. Hrui hmang hian an uaithla chu a ni awm si a. 

An nu ve thung chuan, "Kawngka inhaawng sa atanga mi lo lut chu ka mang hriat ruai ruai, kan pa anih ka ring a, ka mutchhuak bawk si. Ka muhil zui leh ta mai a, mahse, kan safe, zawitea inhawng ri chu ka hre pha tlat! Meng mang hlei lo vin ka va en a. Fiah lo ruaiin mi pakhat a dum veka inthuam ka va hmu a, kan pa ani lo tih ka hriat rualin ka au ta nghal a, mahse, ka au rual khan room atangin a chhuak nghal. Kawngka atang ngeiin a chhuak. Thlanglam tukverh saw chu a inhawng sa niin ka hre tlat a ni" a ti a. An library room hi an room ep chiah thlanglam berah a awm. An room leh Library room inkarah hian thutchawlhna room a awm. A zau lem lo. 

Ka han chhut ve ngial a, Rawktute hi mi pathum vel an nih a rinawm. Pu Sangpara te room kawngka hian code a nei thlap a, chu chu hawn ngei a ngaih si avangin Library roomah thawm siamin an kai tho a, Pu Sangpara a chhuah rual khan tu emaw lo biru tawh sa chu roomah lut zauhin, pakhat dang erawh chuan tukverh hawngin hruizen kha a lo suih a ni maithei. Ka ngaihtuah thiam vak lo, Pu Sangpara rawn luh leh hma chiahin room atangin a tlanchhuak ang a, a relhru hman a ni mahna.. Hei chu ka buaina tur a ni vak lo. Zeldin thubawl mai mai mai kha a nia. Police ten an la chhui ang chu.. 

Report kimchang tak ka han pe ta a. Boss pawh a lawm khawpin ka ring. 

MASK hi an chanchin chhui hleihtheihin an khawsa tlat lo mai a. Mi engzat nge an nih tih pawh ngaihruat thiam a har. Pu Sangpara kha pawisa chiah an laksak a, cheng nuai 4 zet a ni. Engvanga Banka dah lo nge an nih tih zawhna chu, tlai lamah pawisa a dawn chauh avangin a tuk lama dah tura in lama a hawn a lo nih vang a lo nia. Pawisa fai a hawn tih hre chat an nihna kha a mak lai a ni. Chuvang tak chuan a hnuaia hnathawk leh pawisa a hawn tih hriatpuitu niawma lang ten Police an hmachhawn tak ni. An chhui chhuah leh tak tak pawh ka ring chiah lo. Lehlam zawng tak chuan mi rethei berh tete tan inhnangfakna a lo ni ve zel si a! Robinhood ka hrechhuak fó! Mahse, rukruk thila mi dang tanpui chu a tha viau chuang lo. Kan hun tawn hi a khirh telh telh phei chuan, inrawk mai bakah inthahna te thlengin a thleng lo vang tih a sawi theih tlat loh. 

Nilengin Office lamah kan buai a. Kan report lak khawm ang angte kan ziah fel hnuah case dang kan han buaipui leh a. Ho te te mah nise, mipui bengverh zawng an nih miau vangin phur vak lo chung pawha tih a ngai leh thin. Mahse, ni dang ai chuan ka haw hma ve mial e. Ka nau pawh a lo hawng tawh a, ka nu ten min lo thawn chawhmeh ho chu a lo dahfel mek a. Ka nute zarah chawhmeh pawh kan la hmeh tha thei viau mai. Sa hi kan ngaina lem lova, kan hmeh khât. 

"Cerfew tihtawp lailawk lai hian ka haw duh e" Zanriah ei lai chuan a ti ve leh sup a. 

"Umm.. I thu thu ni mai. Ka nu pawn a ngai tawh ang che. Kei erawh hna a laklawh sia, ka lo awm mai ang" ka ti a. Naupangber tih takah lian uaih tahw mah se, a la pangchang a, ka nu naute kha a la ni reng. 

"Nih chuan naktuk sumo chhuakah ka haw nghal mai ang" a ti leh tawp. Han biaksawm viau dawn pawn tawngkam a thiam si lo va, a bung leh nghut thin. 

Zanah Inbunruahna Groupah zahmawh an sawite ka nuihpui leh kek kek mai.. An nawi thei si. Bialpa biak tur ka nei ve mang si lo. Hmm… 

Ka nauin min hawnsan ta a, a khawharthlak ve angreng. Parawl ang chiahin ka khawsa, wai wai te ka chhum mai mai. A chang leh cup noodles te zanriahah ka ring thul. Ka nuin min lo call sek reng a, ka hun neihin zir lo bawk eirawngbawl ka thiam fahran bawk si lo va, min ngaihtuah leh tawh ani ngei ang. 

Zan dar 9 a pel hlek a, tui ka chhuang mek. Thawh hlim leh mut dawna tuilum in hi ka tih than tawh ania, ka sim thei lo. Boss in min lo call.. 

"Hmanhmawh takin insiam la, zarkawtah lo phei rawh. Pu Vanruma te in rawk leh a ni a, thi leh hliam an awm tlat! " a rawn ti ta a. Hmanhmawhthlak thei mang e. Tuilum chu ka thli dai sawk sawk a, ka in puat puat. Ka inha sawk sawk a, chei pawh inchei tawh lem lo vin ka chhuak ta a. Ka scooty hi ka nu nena kan tuak chhuah a nia, ka roh ve khawp mai. Mipui an lo pungkhawm nasa mai a. Kan tv a lo chhe ve kher a, engmah ka lo hre lo zawk a ni. Boss nen kan inhmu vat a, in chhungah kan lut thei hram. Ruang pawh senghawi rih lo vin a ngai ngaiin an lo la dah a. Pu Vanruma hi MLA ni lai mek a ni a, An sawrkar hmasak tum khan eiruk thubuaiah a lo hmingchhe hrep tawh a. Tunah hian engtitiha tling leh thei nge a nih ka hre lo. Tuna thi erawh an fapa a ni a. Nupui neiin fa pawh pakhat an nei ve tawh a, kum 35 bawr vel a ni. Ruang chu an choka chhuatah a let ngût a. A bulah chemte sei lutuk lo a let ngát bawk. A naka vih niin a lang, thisen erawh a chhuak tam vak lo. Tin, a chal dinglam chu a kak duai a, chu erawh a thi duh hle. Mut kawr nen a nih vangin a mut tawh hnua thilthleng a nih hmel. Hliam tuar zawk an nu chu a biang veilam a duk chur a, a ban veilam banrek chu a tiche ngam meuh lo bawk. 

Biak tlak a ni vak bawk si lo va, pasalte ruang leh reng laia thil thlen dan sawi fak fak chu a harsa thawkhat viau ang. Pu Vanruma kan kawm ta ngawt a, "Kan nu nen mitthi ralin kan chhuak a, Mama te chhung hian in an lo nghak a. Amah Mama hi tunlai an hna a thawkrim deuh a, a nuamsam vak lo nen an lo mu hma deuh a. Dar 8 pelh hretah kan haw a. In kan lut chu an lo mu vek tawh nge a reh dûk a. Kan nu hian, "thingpui hang in lawk ang. Ka chhawl a hal riau" tiin thingpui a va lum dawn a, choka light a on chiah chu a rak ta tuar tuar a, ka va luh chuan tihian Mama ruang hi kan hmu ta mai a ni. Kan hamhaih atalangin an nu pawh kan lo ngaihven lawk hman lo va, kan driver hi a fing var hlauh a, police a lo be nghal a. Bawihteii tap thawm kan hriat rualin kan harh chhuak ve chiah, an rooma kan va luh chuan, Jenny hi an khum mawngah an lo phuarbet a, a ka an lo hnawhsak bawk. Bawihteii erawh khumah a lo tap a" tiin.. 

Nunna hial lak a nih takah chuan MASK chu an hnawksak zual dawn ta a ang hle. Jenny chu a ziaawm chho ve ta deuh a, thil thlen dan chu insut hlap hlap chungin a sawi ta a, "U Zawma a damsam meuh si lo va, 'mu mai ang u' tiin dar 7:45 velah khan kan mu nghal daih a, mut erawh kan muhil lem lo. Bawihteii hnute ka pe a, kan pa chuan you tube lamah thu ngaihnawm huang ami kha a ngaithla a, a tih fo dan a ni hrim hrim a. Kei pawh whatsapp ka khawih ve pah a. Chutia kan mut reng lai chuan,. Kawngkapui inhawng ri kan hria a. Ka nu te ni turah kan ngai. Kawngkhar kalh lo va kan mu kha a mak ve hrim hrim, ka nute lo la hawn loh vang kha nge kan mangnghilh ka hre lo. Rawn lut thawm a awm a. Bawihteii an rawn lawm ka ring deuh a, mahse, an roomah an lut ta a. Thawm a reh vang vang a, Chhungkaw groupah ka luh mek lai ania, tah chuan ka nu ngei mai hian an mitthi ralnaa kawta an pangpar khawi lai chu rawn post in, 'Hei hi eng nge a hming khah. Ka duh ve riau.. A mawi lutuk.. ' a rawn ti a. Ngaihthat lohna ka la nei chuang lo, mahse, ka u, kan pa u pasal nei tawh hian, 'khawi mi nge? ' a rawn ti a. ', Kan mitthi ralnaa mi nih hi.. Hei kan haw dawn mek" a rawn ti ta si.. 

Kan pa ka hmuh vat. Ani pawh inrawk tih vel a lar vangin a hlauthawng nghal a. Ka phal lo chung room atangin a chhuak a, ka pate roomah chuan a va lut ta a, ka zui ve nghal. Hmai tuam pahnih hian ka nute safe chu kar hawn an lo tum mek a, kan pa chuan a va nangching ta si a, chuveleh an hmanraw ken lai chuan kan pa chu an rawn vai pawp a. A chak kak saw an vaina kha a nih ka ring. Ka rak nghal chul a. Kan in a phui si, thenawm ten an hriat phak ka ring lo. Tanpuitu au tura chhuah ka tum lai takin min rawn man a, ka banrek hi a herh vak a, ka rak thawk. Kan pa khan rang takin hmanrua a zawng a, chokaah chemte a va la, mahse, pakhat zawk khan a va bei ta a. An insual lai mek hian rooomah pakhat chuab min nawrlut a, ka ka a hnawh a. Min phuar bet ta a ni. Chuan a chhuah dawnin min hnek a, nikhua ka hre lo zui nghal. A bak chu ka nute rawn hawn kha a ni mai" tiin. 

A la naupan hmel sia, ka lo lainat ve tawp. An fanu lah a la te si. Pu Vanruma te chu an fimkhur vak lo ve hrjm hrim bawk ka ti.. An awmpuite ho lah Virus vangin an khaw lamah an lo haw vek a, an inah hian an ni nupa leh an fapa te chhung hi an cheng deuh tlawng a, an fanu erawh phaiah designing a zir mek thung. An driver hi a riak ve zeuh zeuh bawk. 

Thihna meuh a thlen tak siah chuan police ho pawh an tlawmla ta viau a, man ngei an tum ruh ta hle. Pawisa kha an la hman ta lo va, mahse, an fapa nunnain a tuar ta si. Report ka ziak a, dar 12 rik dawnah ka haw thei chauh. Boss chuan officea riak mai turin thu min ráwn a. Mahse, ka peih lo. Ka hlau hran lo, kei ang te chu min khawih duh ka ring lem lo, rawk tham lah ka ni lo bawk. Scooty ka ken vangin thlah pawh ka duh ta lem lo. Min ngaihtuah viau naa ka luhlul ve tlat si a. Ka ngaihdanah phei chuan MASK hi tawng nawlh ila, engtin tin emaw hre chhuak ila tih te.. Min thah chhan tur ka hre lem lo va, ka hlau hran miah lo. 

Scooty ka hung fel a, kan in panin stepah ka chhuk thla a, step hi 25 a awm. Ka hrechiangn tawh ngang mai. Kan in luahna te nen hian kan inpawh vak lo naa an sual hran lo. Dawr lianpui pui an nei a, hausa uchuak an ni lo naa an awmthei ve viau. An innhnuai hi kaw 4 a awm a, a kaw 3-na kan luah mek. Kan in chung chiah te hi chhangchhe tak an nia, an thawm a na ve lek lek thin. Kan inhnuai te erawh Thingtlang lam an ni ve tho a, an haw rih. Kawngka ka hawng fel chiah tihin, "Che lo la, thawm chhuah bawk suh" ka hnunglam atang chuan a rawn ti sup a. Ka ding chawih mai. Silaiin min tin tih ka hria, silai hi ka ngaina viau lo. Ngawi rengin ka lut ta a.. An rawn lut ve nghal. Pahnih an ni. 

Thutthleng seiah min nam thu a, ka ep chiahah an thu ve nghal. An hmai an tuam miau si a. Mipa lian tak an ni tih erawh ka hria, pakhat chuan tshirt dum, print dangdai zet a ha a, jean kekawr pawl da zet mai a ha bawk. Pakhat erawh tshirt dum chungah kamiz sen tial a ha a, cotton pant body fit a ha zaih bawk. Silai keng lo zawk anih vangin ka nel zawk. An mitmeng erawh a hriam dun hle, an mithmul a buk tha a, an mitmu erawh a dum kâk mai. An fin hmel viau bawk. 

"Eng nge in duh? " ka ti tâwng a. Theihtawpa inlak huai ve ka tum. 

"I report kha a dik lo tih hrilh che kan tum mai ania" Silai kenga chuan a ti a. Min tin tawh lem lo va, tlanchhiat chi a ni lem chuang lo. In chungte hi an muhil tawj ngei anga, kan thwwm te hi an hre pha awm si lo. 

"Eng nge a awmzia? " ka ti zawi sap a. 

"Nichin maia tualthahna thleng kha MASK thiltih a ni lo. MASK hming hawhin tu te emaw an che a ni zawk" a aw chu a pa khawp mai. A thum lek lek. Silai kenga char char a la tawng. 

"Chu chu engtin nge i chian theih"

"A chhan chu keimahni hi MASK kan nih avangin" Kamiz ha pa chuan a rawn ti ve ta. An aw a inang kher mai. Unau an nih ka ring. An intiat dun bawk si. 

"Anih chuan tu te nge ni ta ang"

"Kan la hre lo. Kan chhui chhuah hunah kan mamawh leh dawn che" silai kenga bawk. 

"In pawl thiltih a ni thei tho. In hote zinga mi pawh"

"Kan tam lem lo va, tuman a ruk aralin engmah kan ti ngai lo"

"Anih chuan bansan tawh rawh u. Mipui in tithlabar tawh a ni. "

"Target pathum kan la nei a, kan zawh hunah chuan MASK hi a ral tawh ang" 

"Tuna tualthahna avang hian nangmahni suport tute pawh an hèl mek tawhin ka ring"

"Chu tak chu kan nih lohzia nang hian min puanzarsak dawn a ni.. Reporter zingah i lar ber miau a" a awah chuan elsenna a tel. 

"Ka puang anih chuan fiahna an phût ngei ang"

"Chu chu kan thlentir dawn alawm.. Mahse, a dangdai deuh ang".. 

An in en a, an bu nghut a. A kut hrawl zet chuan ka ka a rawn hup a, pakhatin black tape a lo pawt mek, ka che ve eih eih a, min tham lo nasa si. Ka che buai peih tawh lo. Ka hmuia black tape an bel hnu chuan ka kut leh ke an phuar leh a, ka phone min dil a, mitmeiin ka hrilh. Thil tam tak an sawi hran lo. 

An chhuah dawnah, ka beng bulah "Pawi kan ti lutuk, mahse, nunna kan la ngai lo tih hi kan puanzar a ngai miau si a, a hrehawm lutuk lovang tiraw.. Min pui ngei ang tih ka ring. Kan la inhmuh leh ngei ka beisei" a rawn ti sup a. Kamiz-a khan. Ka beng a tiza. Min phuarna chu a hrehawm em em hran lo, ka hmui mawlh chu a ni. Ka thinrim hlur a. Mahse, an chhuah atanga rei vak loah Boss leh police an lo thleng ta rup mai. Video kha an thehdarh nghal a lo ni. 

"Zanina tualthahna thlengah khan MASK ten tel vena kan nei lo va, nunna hi kan hlut a, tumah tihnat kan duh lo. Kan duh ber chu ei sen loh thil neitu te kal tlanga tanpui ngaite tanpui a ni. Ka nih lohzia fiah nan Reporter Emily hi kan rawn hmang a ni e. Ani pawh hi hetia tih kher. angai hi pawi kan ti. Tun dinhmunah chuan in mantir loh kan la duh si a.. " tiin videoah chuan an sawi a. Kei pawh ka lang. 

Case hrang hrang vangin hmun hrehawm leh tawp deuh hlekah te pawh boss hnung ka lo zui ve tawh thin. Rikrap te hial pawh ka lo tawk ve tawh. Mahse, zanina ka chunga thil thleng ang hi ka la tawng ngai lo va, hlauhna lah ka nei hek lo. An thusawi kha ihe lo vin ka ring bur bawk. Duh chuan min that thei. Ka report ziahah MASK te thiltih a nih ka rin thu leh man chhuah ngei an la nih tue thu te ka ziak bawk si a. An tan la hnawksak lo mah ila, mipui te rilru sukthlek tidanglam thei kan nih vangin hnawk hun ka la nei ngei dawn tih hriain ka nunna kha an la hmak thei. Mahse, an la lo. Hei hi an dik ang tih ka rinna chhan pakhat a ni. 

Ka chunga thil thleng avang chuan ka lar belh kher mai. Nuam pawh ka ti chiah lo. Min khawngaih tawkte pawh an awm. Thenkhatin a va fimkhur lo ve min ti bawk. A engamah chu ka chhanglet duh lo. Boss in chawlh min pe ta bawk a, kan khaw lama haw ve lawk ka tum deuh. Kar khat vel zuk cham ila, rilru thar nen hna thawk leh chauh ila ka zia deuh ang. Ticket ka la fel ta bawk a. Zanriah atan artui ka kang sar sar. A siam a awlsam ber mai. 

Tv a la tha si lo va, ka lehkhabu chhiar tawhho ka bih leh mai mai. Phone ka khawih peih lo, MASK ho leh ka chanchin bakah tualthahna hlir bak hmuh tur a awm si lo. Ka ning deuh. Kha video avanga MASK ngaisang zual te, lo ngei tawk te, lo star tawk te hial an kat nuk a. Hmeichhe lamah an tla na phian! An inchei dan leh an tawng ki atang kha chuan mi rethei tak fate an nih a rinawm tlat loh. Mi hi ka hmachhawn tam tawh a, an tawngkam hman duh dan leh an awki atang hian an khawsak dinhmun a hriat ve theih tlat. An hmel kha ka hmu chak ve tho keipawn. Aa.. Hmuh loh kha a tha zawk maithei ni. 

Sumo-ah ka thu váng tawh a, kan khua hi Aizawl atang chuan 67kms a ni a. Kawng a tha vak lo bawk. Chuang kan tam lem lo. Driver nen panga chauh. Tawngtaina te kan neih zawhah kan tum ram panin kan tlan ta vang vang a. Earphone ka vuah sauh sauh a. Hla ka ngaithla char char. Hmunzawlah thungpui in in kan chawl zuai a. Khua chu a vawt lek lek tawh. Thlasik rim a nam tawh miau a. 

Motor ding chawt vang chuan kan bu suau hlawm a. Kei phei chuan ka hma seat ka va tauh. Ka chal ka tuai vat vat lai chuan,, "Tumah che suh u. Ngawi rengin lo chhuak rawh u" tih thawm kan hre ta. A aw chu a teng chhuai mai. Ti deuhin kan chhuk sap sap a. Hmeichhe pahnih leh mipa 3 kan nih chu.. An hmai an tuam a, An vaiin paruk an ni. Pahnih chuan ulhbun an keng a, a bak chuan Riffle an lek va thung. 

"Ka pu, thingtlang khua kan nia, rawk tlak kan ni lo asin. Mi hausa tumah kan awm lo" hlauh hmel deuhin Driver chuan a ti a. A bula ding chuan a tlawh thal nghal tawp. Mipa pakhat a hmaa chuang patling lam tawh chu tlanchhhiat tumin a che zeuh a, mahse, Silai a puak pawp! A tlu nghal thlawrh. Kan rak tuar mai. Hmeichhe pakhat awm ve chu kan khua a mi a ni lo va, ka hre ngai lo. Kei aiin a û hlek maithej, ka rindanin nu tir a nih loh chuan nuthlawi a ni ngei ang. A hlau kher mai. A khur nghal zawih zawih a. Kan khaw karkawng hi tlawhpawh khât tak a ni a, kan khua leh Bung khua chiah kan awm ve bawk a. Motor veivak reng reng a awm si lo. Min lo lambunna hmun ber kher lah tlangin a hual vel lai tak a ni a, au chiam chiam a sawt kher lo vang. Chiâi loh hram ka tum, mahse, awlsam taka nunna an lak theih danah an nunrawnzia hai rual a ni si lo va, pawngpaw ngama ât huai ngawt chi a ni lo. Tlanchhe pa kha a thi nghal anih ka ring. A che zui tawh lo. A hnunglam atanga kah a ni a, a dar hnuai hlek a va fuh bawk nen. An kahna a hnai bawk si. 

"Thu awih lo va in rak emaw in chet hlek chuan saw pa chan ang saw in chang nghal ang. Nunna kan ren lo teh mai ania" an hotupa niawm tak chuan a ti pawr huar a. MASK an nih rinna chhetemah ka nei lo. Eng pawl tak ni ve ang maw.. 

Min hnungkhirh a, kan bungrua an ching darh bawk. Vanneih asiamin cham rei ka tum lo bawk a. Thil hlu ka keng lem lo, pawisa lah ka nuin rawn pai a ngai lo a tih vangin 2300 chiah ka ak. Ka kalpuinu erawh sumdawng a ni ngei ang, a lo ak tam nasa a. Ui teh mah se, tihtheih a nei si lo. Ka khawngaih takzet. Driver leh tlangval erawh an ngah bik lo va, a zia zia a awm e. 

"Nang kha thih ve i duh loh chuan tap tawh suh" tiin kan thiannu chu a rawn kuaidak awrh a. Ka lo insehruh nasa. Kan bungrua ken awlsam ho chu kengin kawng sah chawpah min khalh ta dam dam a. Thingtlanga seilian ni mah ila, ramhnuaiah ka chetla tam bik lo va, kal harsa ka ti khawp mai. Engvanga hetia min man ngawt nge maw an nih ang le.. Ka hrethiam pha lo kher mai. 

Thim thet thetah chau zetin an buk niawm tak kan thleng ta a. Thlam lian tak ti ila a fuh zawk awm e. Kawtah mei an lo chhem hluah a. Mipa 7 bawr vel an lo awm bawk. Inah chuan min luhpui a. Chhuatah min thuttir thap. 

An hmai tuamna chu hnawk an ti ta deuh nge an phelh ta a. Hmel bumro tak tak hlir an lo ni a. An balh hmelin an rim pawh a tui tehchiam lo. An hotupa ber niawm tak, samkir buk zet, hmuihmul leh khabe hmul to fur mai, zu heh hmel zet chu a vei turh turh a. Intithupuifun fe hian, "Kan man chhan che u hi in la hre lo maithei. Hre lo law law ula a tha zawk. Damin in chhuak leh ang em kan hre lo. Mizoram sawrkar hian a khua leh tuite a hmangaih tak tak em tih kan hria ang chu.. (Min rawn kawk a) ani erawh hi chu kan duat deuh ang" a nui hmel tenawm zet chu rum zetin ka lo melh a. Mizoram sawrkar lakah chuan eng nge an phût ang le.. Mizo an ni ve lo tihna em ni ang? Ka chau si a, engmah fim tak pawhin ka ngaihtuah thei lo. 

Zanriah atan atta ro leh mai kan hul zet kan ei a. Ka luak lo chauh. Heng mi te hi em ni Pu Vanruma fapa thattu te kha.. Thlam chhungah chuan chhuat daiah ran ang maiin min muttir ta a. A vawt viau mai. Kan tawng hlekin kan ri dawp nghal zel si a. Ngawi rengin kan ngaihtuahna kan kawm ta mial mial hlawm a. Ka nu in min ngaihtuah dan tur chu ngaihtuah loh hram ka duh law law. Ka khawngaih. Kan motor kalsan kha an hmu tawh ngei anga, rukbo kan ni tih an hrethiam em ang chu. 

Khua a lo var a, tlem ka chhing ve sek hman. Tuilum ka in chak ngei mai. Kan inthiarnaah pawh min zui zel a, tlanchhiat dan tur erawh ka ngaibtuah char char. Tukthuan atan thingpui sen thlum zet leh chhangthawp kan ei a. Tui ti viau lo mah ila, ei a ngai tlat si. Tihduhdahna em em erawh kan tawk lo. Tukthuan ei khamah mi panga an lo lut a. Mizoram sawrkar hnena thuchah tur video an siam leh ta. Ngah nge maw kei hlir pawh chu.. 

"Khankawn ram khu an ei leh bar tur in ngaihtuahsaka, zalen taka mizoram chhunga an chet vel in phalsak lo anih chuan, nunna kan ren dawn lo va. Kan mi leh sa tam tak In khawpuiah khan an inphum ru mek bawk. MASK ten min chetkhalh zel avang zawka thenkhat kha chu la dam in ni. Kei ni chuan nunna pakhat tal nen kan zalenna hi kan sual zel ang. Vawiin tlai dar 4 thleng pawha engmah in rawn sawi lo anih chuan, he pa thisen hian ka hmai ka phih ang" tiin Hruaia kan tlangval pakhat zawk chu a thuai nawk a. Kei ni erawh tumah kan chechang ngam lo. Chu video chu ka ac atangin an upload leh ta. Ka zeldin kual a, kei kha chuang tel ve lo ila an ru bo kher lo maithei. Keimah vanga thil thleng anga ka ngaihna chuan min tina a. Ka inthiam lo ngawih ngawih a ni. 

Video an upload zawhah ka phone chu an ak bo nghal hmak. Hruaia chu kan bawihsawm nghal a. A kamsir a thi a, a nak chu na a ti viau bawk. Driver Tluanga chuan a han zut sak ngial a. U Seni erawh beidawn hmel zetin a thu kun ngawih ngawih mai a ni. Min zawng an awm tawh ngei ka ring a. Kan awmna hmun hi an rawn pawh theih ka ring tlat. Heng mi te hi tuikuk an ni tih ka hre tawh a, Khankawn chu tuikuk chambang ho inbengbelna a ni. An nun a chèp a, an ramah an haw hleithei bik si lo, an tâm nasa a nih ka ring a. Chuvanga hetia chetla ta mai an nih ka ring. Hripui vangin zoram a la buai a, ei leh barah a tlahniam chak si, ram dang nen indawr tawn hleihtheih bawk si loh chu tuikuk te pawn an lo tuar lo thei bik lo a ni. Hriatthiamna chen ka nei ve tho, khawpuia an luh phalsak a ni lo va, an tan ei leh bar zawn a harsa bik. Sumdawn tawnna a awm thei lo. Pawisa an nei miau si lo va. Engpawhnise, kan damkhawchhuak ang em tih chu a pawimawh ta. 

Nilengin kan thu tlawk tlawk ringawt. A chang leh kan mu a. Kan titi thei der bawk si lo. Min khap nghal zel si a. Tlanchhuak thei ta ila, kan himna hmun kan thleng zo kher ang em ka hre lo. Min hmuh rualin min kah hlum duh mai ka ring bawk si. Sawrkar thuchhuak nghak phawt mai ang. Sawrkar tan pawh ngaihtuahna sen a ngai ve viau ang, an ram mi leh sa ni ve lo te tana chanvo pek leh lo cháwm ve ngawt kha a thanatthlak viau ang. Chutih ahnekin a ram mi leh sa te ngei pawh an chawm hneh lo a ni si a. MASK ho zarah thenkhat an la dam ve hram hram chauh si a. Mi hausa ho lah an fimkhur tulh tulh a, pekchhuah a hnekin an thuru thuk telh telh si. Kan ram tak hi chu aw.. 

Dar 4 a ri ta. Kan helhhawlh nge kan za ruai hlawm mai. Sawrkar thuchhuah chu, "In mi kawl te kha chhuah nghal tura thupek in ni e. Anih loh chuan kan mi leh sa ten in mi leh sate an hual mèk e" tih thu a ni. Tuikuk finin tuikhur ral a kai lo a ni ber. Khankawn an sawi tel kha a pawi ta. Eng nge thleng ang le.. Thinrim takin a ha chang a thial bawp bawp a, ka phone chu a paih darh vek. Ka leina a la rei si lo va ka ui angreng khawp mai. Hruaia chu an rek chhuak a, kei niin kan umzui. Hmeichhia e hmeichhia an sawi tawh lo, kan ri dawp dawp ta mai. Mipa phei chu an thum dawt dawt a, tap thawm nen.. Kan buai ta nuaih mai. Silai a puak dur a. Kan ngawi diak! Hruaia malpui chu a thi nghal zur zur a, rak pawh a rak hleithei lo, ka va lainat tak em.. Min chelh hneh ropui si. 

U seni mangang lutuk chiai bawk si chu an chelhna atanga talpitin a hmazawnah a tlan ta ngawt a! Ka au tuar tuar a, tuikuk ho pawh an rak ve ruai mai. An kap ngei dawna ka hriat vangin "U sen, bawk rawh. Bawk rawh' ka ti tuar tuar a. Silai a puak dawt. Mahse, U seni a tlu miah lo. Ka bula Silai lek mek chu a awn ruai ruai a. A tlu ta thlawr mai. Eng nge thleng ta le. An buai ta nuai nuai a. An silai neih ang ang an chuh sap sap a. Mahse, tumah an rawn lang si lo. Useni pawh a ding ta a. A thingthi hnawk a. A tap niin ka hria. Hruaia chu ka va bawihsawm a, ka kamiz hak lai chu phelhin a mal chu ka tuam ve sasawi a, thisen a hloh hnem avangin a chau takzet a ni. Tluanga pawh a rawn kal ve a. Keimahni min ngaihsak hman vak tawh lo. Silai rawn rikna lam kha an zawng ni berin ka hria. An inhrosa kuk kuk bawk a. Silai a puak leh ta dur.. A tira min mantu, kan chuanpuipa kalhlumtu kha a tlu leh ta tawp. An mangang takzet tawh a ni. Keimahni chu min hrechhuak thut niawm takinn min rawn pan a, dim lo baksakin inah chuan min hnuk lut ta a. U seni pawh an rawn vawm lut thlawrh mai. Thaw dèp dèpin an thawm chu kan ngaithla a, pawn lamah an buai a, vengtu pawh an awm lo. Hruaia chu tui te tulhin Tluanga nen kan theih ang angin kan bawihsawm a. A vai riai mai. U seni erawh a hamhaih vek. Kan awmtir tawp mai. Pawn lama inhrosaa an buai nuk nuk lai chuan, kan awmna in chhuat chu a rawn che hrut hrut a. Chhuat hi dap a ni. A rawn inkeu hawng ta mai a. Thawmhnaw duma inthuam palian tak a rawn inperh lut zawk mai. A hmuiah a kut dahin thawm nei lo turin min signal a, hmanhmawh ru deuhin a mal malin chhuat awngah chuan kan pût thla ta a. In hnuaiah chuan thawmhnaw duma inthuam tho mi pahnihin min lo chelh vat hlawm a. Hruaia erawh kal ngaihna a awm lo, in chhunga rawn lut khan a rawn vuan a, a hlang a ni mah zawk. A hnuai ami te chuan an lo dawm vat a. Kan zavaiin kan chhuak ta. In hnuaiah chuan kan tawm ren rawn a. Thawm dim thei ang berin bawk vak titihin in sir lama mau thelh hmunah chuan kan lut phei ta a. 

Khua chu a thim lek lek tawh a. Unau hmelhai awm vel a ni. Ngaw hnuaiah kan lut zel a. Hruaia mawlh chu mi pahnihin an kuah a, thawm chhuah chi a ni si lo. Min rawn hruaitu ber khan hma a hruai a, kan zui tawp. Sawrkar mi tirh an nih ka ring ve tawp. Khua a rawn thim ta a. Phone flaslight an on a, a theih ang angin kan kal zel tho. Tumah kan tawng lo. Tuikuk ho thawm erawh kan hre phak rih lo, minnlo umzui ngei erawh ka ring. Luitè kan thleng ta a, kan tuihalzia kan hre chiah a ni teh chèk ang chu. Tui chu kan dâwt khawlh khawlh mai. Hruaia chu a chau riau tawh si a, kalpui zel chi ni pawhin a lang lo. 

"He lai thing hnuaiah hian khua kan nghak tlaivar mai aniang chu.. Kawng pui a la hla deuh si a" Min hruaitu khan a ti a. 

"Kan thianpa maluia silaimu hi kan lak chhuah a ngai a ni" an aw hi ka hriat hnu chu a ni chiang. Mahse, an hmai an tuam si lo. Khamizana an aw kha ka lo ka theihnghilh awzawng si lo. An hmel chu ka hmuchiang chak takzet. Mei an chhem ta a. Mahse, alh hluah chu a hlauhawm theih avangin a eng teng teng chauh. Ka kamiz kha Hruaia mal tuam nan ka hmang daih sia, tshirt ringawt nen chuan a vawt riau mai. 

Hruaia chu an dawm far a, a malpui chu an tawnkhalh bawk a. Chemte hriam hmel zet rawn phawrhin a rawh ling leh te te a, "Thianpa, a na dawn ania aw. Hei thingtang hi seh rawh. Silaimu hi kan lak chhuah vat loh chuan a pawi thei dawn si a" a ti sup a. Kei erawh chuan mei eng karah a hmel chu ka va bih tâwk tâwk thung. Kum 37 bawr vel tur a ni a, a pa tih mai bakin ka sawi thiam lo, a khabe hmul chu a buk hluah lo naa a dum that em vangin a langsar hle. Tin, a thianpa silaia min tintu zawk pawh kha a chhe hran lo. An vai chuan khawpui tlangval, ramhnuaia chetla ngai vak lo hmel an pu. Mahse, an ramvachal angreng viau lawi si. MASK an nih tih hrilh nawn ka ngai tahw lo. Chutihrualin min rawn chhan chhuak ngawt hi mak ka ti. Sawrkarin a tir lul awm si lo. Hruaia rak thawt chuan ka ngaihtuahna a rawn pawr peng a, a mapuia chemte hriam zet hmanga silai mu an zuk la chhuak chu rap zetin ka lo melh. Hruaia thlan chu a tla bawrh bawrh a, thingtang a seh ngawt ngawt bawk. A na thawkhat ang. Ka va khawngaih em.. 

An lak chhuah zawhah mei vut chu lain an bel a, ka kamiz chuan awmze nei deuh hlekin an tuam ta a. 

"Thiante u, tu te nge in nih kan hre lo naa kan lawm takzet a ni. Kan nunna min chhanhimsak a" Tluanga chuan a ti ta a. 

"Nunna hi a hlu em alawm" a lo ti sup. An hming ka hre chak. Ka zawt ngam si lo. 

Zan chu a rei dawn hlein ka hria. A jacket hak lai phelha min rawn petu chu ka melh reng a, a mitmeng chu a zaidam takzet. Vawt ti miau si a. Ka haksak ta a. A lum nuam ta. Ka lo muhil ve sek a, mahse, sava hram danglam tak avangin ka harh. A râpawm èm vangin ka hlau deuh. 

"I hlau em ni? Chingpirinu anih chu" a ti a. Ka phu zawk. Mi dang erawh an hnar tliar tliar a. Hruaia pawh a chau bawk nen a muhil ve thei ta a ni ngei ang. Ka lawmpui hle mai. 

"Ka zun a chhuak lutuk" ka ti a. Ka tho nghal a. A rawn tho ve vat. Kawr deuh laiah ka va zung a. Ka hawi hruk hruk mai. Ka hnungah a ding tih ka hre tho. Kan mutna hmuna kan let hmain kan ding det a. 

"Ka hria che " ka ti ta sap a. 

"Ni e, min hriat vang alawm ka rawn zawn chhuah che" a ti a. Kan insanhleih lutuk chu ka zak zawk. Ka te chem chem mai. 

"Ih.. Mask in vuah si lo va" ka ti leh ringawt. 

"A tul tawh hleinem" 

"Sawrkar in an zawn mek che u hi"

"Tuman an nunna chhan chhuaktu an mantir lo vang" 

Ka pen leh tur chiah chu thing zung ka chhuih palh a, ka pai khet khet, min rawn kuah vat a. A awmah min pawmbet ta thlap a. A lungphu ri chu ka ngaithal veng veng mai. A harhchhuak thut aniang, minnthlah a. 

"Hmeichhe danglam tak i ni " a ti sup a. Ka thinlung a dek tlat. 

"Nang pawh" ka ti. 

"Buaina reh hunah leh MASK a ral hunah coffee min la inpui ang chu tiraw? " 

"Tehreng mai. Mahse, i hming tal hriat hi ka phû ve lo maw? "

"I la hre mai ang" a ti a. A nui hak a. Kan phei dun ta ral ral a. 

Ni a lo chhuak ta sur sur a, riltam teh mah ila, eitur a awm der si lo, eitur kan zawn chhungin tuikuk ho vin min lo nangching thei. Thin thip vung vungin kan tlan leh ta a. Rei erawh kan kal hman lo. Min zawngtu te thawm kan hre ta a. 

"Hetah hian kan hnutchhiah ang che u. Dam takin u le" engmah kan sawi ve hmain hmanhmawh takin ngaw chhungrilah an lut bo nghal. Kan hrilhhaizia kha aw.. 

Zoram titi kan siam leh ta chu nuam pawh ka ti lo. Kan khuaah ka tawmbo ta rih. Ka nu nen kan induat tawn a ni ber e. A fanu neihchhun leh upa ber ka ni bawk a. Min ngaihtuah em em chu mak ka ti hran lo. Kan monu lah vawk pa 8 ngawt a vulh a, a buai em em reng mai. An fate chu ka hlimpui thei hle. Phone ka nei ta bawk si lo va, tihtur a váng angreng. Zan tin deuhthaw ka mumangah ka hmu thin. A mitmeng zaidam tak kha.. A kut lianpuia min kuahna te kha ka ngai fô! Mipa hi hetiang takin ka la vei ngai lo sin le.. 

Kar thum dawn kan khuaa ka awm hnuah Aizawl lam panin ka nau nen kan chhuak leh ta a. Tun tum chu kan tluang ta e. Tuikuk hel te pawh an man tawh a, mahse, kan ram chhunga an inbenbel ve miau vangin Khankawn khua chu Sawrkarin a ngaihsak ve ta hlek a. Dem tawk erawh an awm tho. U seni pawh tluang takin in a thleng thei a, Hruaia pawh a dam tawh viau, Tluanga pawn motor a khalh ve leh thei ta. 

"Emy, i va ngaihawm reuh ve.. Mahse, i hah leh dawn ania" Boss chuan a ti a. A nui var var bawk. Hna thawk thei turin ka fit tawh viau chuan ka hria. Thuruk zep tue erawh ka nei ta si. 

Boss nen an in lam kan pan a, Vawiin hi an fapa birthday a ni a. A thenrual tha te sawmin chawhlui a buatsaih ve a ni. 

"Ehe, Jim, in lo lang thei e law? Ka va lawm ee.. In buai viau ka ring asin" Boss chuan min hnungchhawn zawnga ding mipa lian tak leh hmeichhe nalh zet chu a bia a. An rawn lehhawi ta vat a. Kareii! Amah kha a ni. Mahse, min hre ngai miah lo angin a awm. 

"Ka ngaipawimawh che lawm.. Boss kha i ni miau a" a ti nghut a. An inchibai zui a. 

"Emy, hei hi ka best friend, Jimmy-a a nih hi. Chuan hei hi a nupui hual Zoteii" Boss tawngka tin chuan min chhun zawk zawk mai. Za lo zetin ka va nuih a, ka. Chibai nghal bawk. Nupui hual a nei th ka hriat ruala ka thinlung deng dawttu kha eng nge ni ta ang le? Nuam ka ti ta meuh lo. Boss nupui nen hian kan innel em em a, an fapa pawn min ngaina bawk. Chuti ni lo phei se chuan ka haw daih duh ngei ang. A laka ka beiseina kha a lo sang hman viau a nih ka ring, heti em ema ka na hi. MASK member a ni a, tihian mi pangngai angin a chetla leh bawk si. A lo inthup thei awm hle mai. Zoteii kha a nalh a, a tunlai em em. An inhmeh takzet a ni. Chaw pawh chu ka eitui thei lo. Ka khamsan lai chu min melh ru reng tih ka hria. 

"Boss, ka awm a nuam vak lo va, hawn mai ka duh.. " Boss chu ka bia a. Ka chal a rawn dek a, ka hmelah a lang ve deuh nge, "Aw le.. Ka nau ka va thlahtir ang che. Inleng an la awm sia. Ka chhuak thei si lo va' a ti a. 

"Ka lo thlah ang, kalna tur ka nei a. Keipawh. Zoteii saw i lo kawmhlim dawn nia" Jimmy chuan a rawn ti ta a. Ka chhungril khawsik er er chu ka hre thei. 

Kan in tlanpelin min phur kual zel. Engmah ka sawi duh miah lo. Min tina dawn lo tih ka hria. A ding dawt a. Zemabawk daiah kan awm. 

"I rilru a na viau em ni? " a ti ta khawl a. 

"Engvangin nge a nat ang? "Ka lo ti chang rât! 

"Nupui hual ka nei sia"

"Chu chu a pawimawh em ni? I hmanrua mah ni ila ka nunna i chhanhim alawm"

"Hmanrua a?! Huhh.. "

"A ni lo vem ni? Ka ina min rawn luhkhung zan kha ania ka sawi"

"Ni e, khatih lai kha chuan kawng dang kan nei lo alawm.. Mahse, nunna thâpa hel ho kan hmachhawn kha chu thil dang vang"

"Hmai phihfaina" ka lo ti hmak. 

"Nangte reuh hi" a ti hul hak a. 

"In nihna dik tak hi chu ka puangzar lo vang. Mahse, khawngaihin tumah rawk tawh suh u. Thil. Dik. ani lo" 

"Kan hnuchhawn tawh alawm" mak ka lo ti deuh. 

"Tak tak maw? "

"A chhan pawh hmeichhe pakhat, te taktè, tawng thei zet vang ania" 

Ka hmui ka tipawrh a. Ka chhungril lo lawm hman chu ka duh viau lo. Zoteii kha.. 

"Engtikah nge in inneih dawn? "

"I inpeih tawh em ni? " hmela chuh.. 

"Min namnul hauh suh" ka lo ti hrâwk a. 

"I inpeih hun hunah nupui ka nei ang" 

Min rawn kuah thlawp. Engvanga inhîptawn viau nge kan nih chu le.. Vawikhat inhmuhna atanga rilrua cham veng veng thil chu… a fawh nuam zet lakah chuan ka tuiral titih hial, min dimdawih a, min dim lo lui thiam bawk si. 

"Duhtawk rawh" ka ti tuar a. A thu tha ta a. Kan thaw dun ham ham mai. 

Khami zan atang khan a rukin kan inbia a, kan inhmu a. Sex chiah kan hmang lo. A bak kan ti vek. Nupui hual a nei tih hrereng chunga ka vuan tlat hi ka. Va inzahpui tak em.. Mahse, ka ngai ngawih ngawih si. MASK pawh sawrkarin a la zawng kal reng. Engtin nge a chhui chhuah tehlul ang? Kan bul hnaiah zahawm takin hna an thawk miau si a! Vawi tam an hnathawh dan leh an chet dan ka zawt thin. Member engzat nge an nih tih te.. Chhanna awmchhun, "Kan inneih hunah aw" tih bak ka dawng ngai lo. 

Zan khat erawh nasa takin ka inngaihtuah a, Zoteii avang pawn ka then tur a ni tiin rilru ka siam ta a. Mittui tla chungin amah thlahna thu ka type ta. Amah nena kan inbiak chuan ka nèm leh dawn tih ka hria. Ka msg a seen rualin ka block nghal. Engkimah ka block fai vek. 

"Jim, ka hmangaih che. Mahse, mi pasal hual lo ruksak chu ka thei tawh lo a ni e. Engkim tawp rawh se" tih thu kha.. 

Ka muhil mang lo. Zan tira ka thawn avang khan a lo kal ka hlau a, ka riak chhuak daih nghe nghe. Ka nau haw lai a lo ni bawk a. 

Ka ph riin min tiharh, sana ka en a, zing dar 6:17 chiah chiah. 

"Hello' ka thophang aw zet chu.. 

"Emy, inrawkna a thleng leh tawh. Dawrpuiah.. Pu Sailothanga te in rawk a ni leh tawh.. " a bak a sawi zawm chu ka hre mumal lo… 

Hei zawng keimah vanga thleng a ni ngei ang le… 

Jim.. Misualpa.. 

(Tin, ka kut hi a kham ve em em a. Min khawngaih tawh mai ru aw. Ka hmangaih che u. In chawh lo ania.. 😥 chuan, part 2 thleng bak ka ziak peih lo bawk. In chawh 😌