Jeremy

JEREMY… 

Ziaktu: Toni Râlte

"Mobile legend nge keimah? " a rawn ti! Ka nui hawk. A thinrim hmel ka mitthla thiam nghal. A ni tak, games ringawt ka atchilh ve bawk a ni. Inbiakna hun kan nei thei meuh tawh lo va, kan inhmu khât bawk si. A lungawi vak tawh lo a ni e. Kei lah mi ngaihsam chi, ka rinawm tho chuan a tawk ti thin ka lo ni bawk nen. Kan inhau ta zeuh zeuh mai. 

"Nangmah daih" ka va ti a. 

"Games kha i uninstall loh chuan min hmu tawh lo vang" a rawn ti. Ka nui tho naa ka chhungrilah nuam tih lohna ka nei mawle.. 

"I thu vek alawm boss" 

Ka uninstall phal chiah bawk si lo. A va buaithlak tak. Zan reiah chiah ka khel tawh mai ang tiin ka paih phal ta lo va. 

Ka bialpa Jeremy hi kei aiin kum 4 in a naupang zawk a! Lehkha thiam tak anihna chu ka duhna ber a ni. Tunah B. Com final semester a zir mek a. Kei erawh Department pakhatah LDC hna ka thawk ve mek thung. Unau zinga naupang ber na ná na chu ka rilru a puitling thei vak lo, ka lawm zawng leh duhzawngte hi a la naupangchhia em em a. Nula pui tawh siin tunah pawh mobile legend ringawt ka atchilh leh pek tawh anih hi. Keini Chanmari-a kan awm laiin ani erawh khatlaah a awm thung. Chapchar kút kan hmanna atanga inhria, in star ru ve ve, a hnua inbezuia inngaizawng ta kha kan nia. Kan inngaihzwn hma hian ngaihzawng pathum lai ka nei ve hman a. Ka serious ngai lo. Min kawp pawn ka tuar vak ngai lo. Ka mizia hi thawveng ve chi, harh ve tak, tawng duh leh hlim ve thei tak ka ni a. Min ei lo duhtu tan chuan ka ngeiawm ve thei ngawtin ka ring. Jeremy erawh ze zawi raih, inla puitling deuh, tawng tam lem lo, nui hawk hawk ngai lo a ni. A lian a, a hang lutuk lo bawk. A fresh lutuk mawlh hi.. A hmelah a naupanna chu a la chambang tho naa a hmel tha lutuk. Ka bialpa tawh zawng zawngah chuan ka duh ber leh ka serious ve berna a ni rih. Min hneh theih riauna hi a nei reuh a! Kan kum inthlauhna chu engah teh vak kan ngai lo hle. Kan sawi chhuak ngai eih lo. Chance kan nei ve zeuh zeuh a, ka ngaihsan ve riauna chu a insum thei lutuk hi a ni. Tun tum chu a tawp thlenpui min tum ngei dawn e tia ka lo insúm ruk ve deuh pawh hian laklawh eng ang mah se; a tawp thei zel.. Ka duh lutuk hi ka induhkhawp lo… hehe.. 

"Zothan, mitthi kan nei ania. I u nen zuk kal ve ru, Pu Siama tupa kha a boral anih chu' ka nu chuan a ti lawng lawng a. Ka inbual zo chiah ka inthlak mek lai a ni. Kan upa ber mipa hian nupui a nei tawh a, hna vangin Bungtlangah an awm mek. Ka u Apuii nen chuan mitthi in lam chu kan pan ta a. Ka u hi nurse niin Civil Hospitalah a thawk mèk thung. 

An in kan zuk thlen chuan an lo insingsa fel thawkhat tawh a. Ruang erawh a lo la thleg lo va. Kan lo nghak a. 

"A od an tia.. Damdawi a tihna a la rei loh nen.. Mihring nun hi chu aw" ka bula thu chuan a ti vawng vawng a. Ruang a lo thleng a, an tap chuah chuah a. Ka ú lah a lo mèn leh pur tawh. A hnuk hi a ulh hma ve khawp a. Kei erawh ka ni hauh lo. Tah hi ka hreh tawp a ni mai. 

Mitthi chu ka en reng a, tukin zingah pawh ka dawr kal tur nen kan intawk reng sia.. Tihian a thi leh ta mai chu a ni sia.. Chutia ka en reng lai chuan ka ngaihbel nge a mit chu a meng diar diar hian ka hmu tlat nia! Ka mit ka khap a. Ka'n melh nawn leh a, a meng diar diar tlat. Ka ú ka va nghawk a. Ka hrilh ru sur sur a. A va en ve a. A hmu ve lo aniang. Mawl min tih hmel zetin min ner khum a. A pum zawn ka va en leh chuan a thaw tlata hriatna ka nei bawk. Keima lam dik loh vang pawh a ni mai thei. 

Thil dang ngaihtuah ka tum a, ka zai a. Ph ka hmet zeuh zeuh bawk. Mahse, ka tum miah lohin ka va melh leh zauh thin. Ka ngaihbelnana zual telh telh lehnghal. 

"Kan mitthi hi a thaw tlatin ka hria" Jeremy ka va hrilh ngawt a. 

"Va mak awm ve.. "

"Nia, a mit te hi a meng tlatin ka hria" 

"I mitvai anih kha.. Zai vak vak la, en tawh lo la a reh mai ang"

Ka ner sak a. Melh tawh loh hram ka duh. Thutna ka sawn ta daih a. A zia deuh. Rilru erawh a nuam hauh lo. Zingah hmun te kan phiahfel hnuah kan haw ve ta chauh a. Ka chau kher mai. Holiday a ni hlauh a, a zia. 

Ka intifai a, ka mu hmak. Ka mutui bawrh bawrh khawp mai. Mumang bo thak khawpin ka muhil. Ka harh meuh chuan 11 a lo ri tawh a. Phak chualin ka tho a, eitur ka dap a. Ka pum a dik lo leh vek. Ka u chu a hnaah a kal leh nghal ania, a fel ngawt mai. Chawlh an nei ve mang si lo. Ka in eipuar zawhah in ka tifel zawk zawk a. Jeremy nen kan inbia, a lo kal dawn. 

Ka chhungte an awm lo bawk a, ka roomah kan awm daih. Khumah kan mu a. Kan mitthi chungchangte chu ka hrilh mial mial a. A nui suk a. 

"I hlau mi? "

"Hlau deuh tho" ka ti a. Inhmatawnin kan mu a. Min rawn kuah thlawp a. kan infawp mawlh mawlh ringawt. A duhthawh ve hle mai. Kei lah ka lo zawi sa si, min bawhbet run a. Kan thaw pwh a rang dun ngei mai. Ka nghawng leh ir vel chu a fawp kual dan dan a, ka beng bulah a thaw lum hiam mai bawk si. Insum a har tan khawp mai. Ka hnute a tham tawn tawn a, ka kekawrbul chhanah chuan ka mal te chu a sawk tawn tawn a. 

"Hm.. I duh em? " a ti thawp sat a. 

"Aih" ka ti bah nawk a. 

"Kei chu ka duh.. " a aw sexy lutuk chu ka tuiral tep. 

"Ti lo vang"

"Umm.. " tih pahin a tho vat a. A thinrim mawni ka ti hman. Mahse, a hmelah thinrimna ka hmu lo va, ka lawm ngei mai. Ka nute an lo haw hnai bawk a. Inhnuaiah kan chhuk thla a. 

Zanah khawhar inah kan kal leh a. Zai a nuam khawp mai. 

Thil tla ri bawl thawm vangin ka harh zawk a. A lo thim vek mai. A lum bawk si. Current a lo thim daih nih hi. Ka ph ka hmet eng a, inverter on turin ka tho chhuak a. Dar 2:32 am chiah a ni. Inverter on tuma ka va hmeh chuan min hmeh khalhtu an awm! Ka nu anih ka ring a. A eng ta mai bawk si lo. Ph chuan ka en kual a. Tumah ka hmu lo! Ka va on tha ta a. A eng thei miah lo nia! Hlauhna namèn lo vin min tuam a. Thil hlauhawm ka ngaihtuah kir zut zut bawk. Ka tha a khur titih ringawt lehnghal. Ka tawlh hnung a, ka roomah a rang arangin ka lut nghal. Ph flashlight on chungin ka mu meng kar a. Ka mut a chhuak lo nasa.. 

Thli thaw ni mai awm hian a rawn thaw heuh heuh a. Tukverh ka khar vek si. Ka nute koh mai ka duh tawh. Thawm lah a reh nasa si. Ka thlan tuiin min bual huh hnep tawh a. Ka nu call tuma ka ph ka hmeh lai chuan, na tuar niawm taka thaw hrâwk ri ka hria! A thaw hrawih hrawih a. Ka au chhuak dawn a, ka au thei miah lo. Ka rilru chuan ka nu ka ko mawlh mawlh. Ka ph lah chu ka thlauh nge ka hmu zo tawh si lo. Ka mang a va ang em.. 

Thim thamah chuan ka khum mawng lama mihring hlimthla ding chu ka hmu thei. A ding reng a, ka melh ngawt ngawt bawk. Parda kar atanga thla eng lo lutin a chhun hma chuan ka awmdan ka la hria.. Thla engin a rawn chhun takah chuan tu nge anih ka hre ta.. Engmah ka hre zui ta lo. 

Ka harh chuan khua a lo var tawh a. Mahse, dar 4 bawr vel chauh a la ni. Ka thidang nge ka muhil pawh ka hre lo. Current pawh a lo awm tawh aniang. A eng uar tawh. A hma lawka thil thleng kha ka mumang ang maiin a rawn lang zut zut a. Ka hlau em em tawh lo naa mak ka ti. Khaw eng chuan min muan hle a ni ta ve ang. 

Hnaah ka kal a. Ka zawi ngei mai. Tawng pawh ka tawng tam lo. Ka thiante chuan mak an ti deuh aniang. A chhan min zawt hlawm a. Ka that thu Ka hrilh a. Jeremy pwh ka la be lo. Min rawn be tho naa ka chhang lo. 

Tlaiah a class bangin min lo nghak a. 

"I reh lutuk a, i buai mi? " a lo ti var a. 

"Ka tha lawm.. Ka mumang a rapthlak lutuk a" ka ti sap a. 

"Eng nge sawi la.. Kha pa kha i hmu leh mi? "

"Umm.. Hmu leh ti ila, ka hmu chiang lo. " tiin a chin chhuakin ka hrilh ta vek a. A chek tlak tlak a. 

"I mumang anih ka ring e. Inentir la a tha ang, i taksa a chak lo aniang" min ngaihtuah hmel deuhin a ti a. He pa hi chu aw.. 

Zanah pawh khawhar inah kal lo vin ka awm mai mai. Ka chhungte bulah engmah ka sawi lo. Ka chaw ei pawh a tui lutuk lo. Roomah ka tawm char char ringawt. Ka tawt up up reng mai. Ka ning. Movie ka en ta daih a. Tlemin ka rilru a hruai peng ve deuh e. Jeremy te an meeting daih a. Kan inbe thei bawk si lo. 

Mu tura ka intintuah laiin min rawn be ta a. An ban chiah thu te a sawi a. 

A mut a chhuak tawh si, kan inmangtha ta vat a. Games ka khel hmiah. Ka nuamtih ber a ni bawk a, ka tui leh hle mai. Ka dah meuh chuan dar 1 a ri vah tawh. Pawi mai mai lo. Ka va zung a. Light erawh ka off duh lo. 

Ka muttui hle naa tiharhtu awm ang maiin ka harh leh hlawl mai. Ka bulah chuan tu emaw awm ve ang tlata hriatna ka nei. Nizan ami bawk kha a ni angem? Room a eng uarh bawk a, ka hlauhna a nep deuh. Ka maimichhing a, mahse, hnai deuha min bihtu awm tlatin ka hria a, ka meng a, tumah ka hmu bawk si lo. Ka maimichhing ngam tawh lo. Ka meng kar a. Ka mit a thip si. Ph ka la a, jeremy ka call tawp. A ring quit thak bawk si. Ka thinrim hlur mai. Zawi zawiin min uaptu boruak chu a reh ve tial tial a, ka mutthilh lai pawh hre lo vin ka lo muhil ta aniang, ka harh leh chuan khua a lo var tawh. 

Hetianga nuam lo deuha min siamtu hi kar khat dawn ka tawng ta. Ka nu te pawh ka hrilh tawh a. A tirah an awih lo naa ka sawi zin tak em vangin inentir turin min rawn a. Ka taksa chak loh vangah an puh deuh niawm a ni. Ka inentir ta nge nge a, damdawi min chawh leh tawp ringawt. A ho e.. Ka ei ve tho a, mahse, mangchhia chuan min kiansan chuang lo. 

Zan khat erawh ka mumang nge mumang lo tih ka hre chiah lo va, chiang em em hian kha mitthi Bda kha ka lo hmu a. Ka khum bulah a ding a, a damlai hmel chiah a pu a ni. 

"Thah ka ni. Ráwng taka thah ka ni. Reh hlum ka ni.. " a ti a. Ka bengah a ring viau a ni. 

"Min thattu chu hman zana i mi hmuh kha a ni" a ti ta a. Ka tim uaih mai. Ka tho kang awk hian ka hria. Bda chu a bo leh nghal daih. Hman zana hlimthla ka hmuh kha ka ngaihtuah let a, ka hlau ngawih ngawih. Jeremy ka call vat a, tho phang aw deuh hian, "I tha em? " a rawn ti a. 

"Ka hlau a ni"

"Tawngtai rawh. Hlauh tur a awm lo.. I nute ko la"

"Ka lo kaih thawh che vang hian min ngei em? "

"Ngei lo ve" a mut a chhuak tih chu ka hria.. Ka khawngaih ve bawk si. Ka dah ta a. Luhlul chhuahin mutthilh ka tum lui ngat ngat a. Ka hlawhtling bawk e. 

Bda thlarau chuan min uap run reng niin ka hria. Ti nge kei kher? A chhan a awm ngei ang. A chhungte bulah kalin ka thil hmuh leh hriatte ka sawi tawp. Mak an ti a, an awih tehchiam lo tih ka hre thei. Ka ngei rilru riau mai. An fapa a ni lehnghal a. Min ngaihven hurh ka lo rin vei nen. 

"Engpawhnise, kan fapa kha damdawi tih ching a ni a, hetia a thih tawh hnua tharthawh leh hi kan duh chiah lo a ni. Tihtheih kan nei tawh chuang lo va" an ti mawle.. A tawk. 

Bda chuan ka rilruah min bia ni maiin ka hria, min nawr et et reng a. Bansan ka tum nen ka hneh miau si lo. Ka chhungte leh thiante chuan min ngai dik lo tan tawh hial. Ka awm dan a mumal miau lo va. Jeremy pawh a ngaih a tha tawh lo va, a lungawi lo tih pawh ka hria. Min hrethiamtu an awm miah lo em mawni le? 

"Engtia tih che nge niang le.. Tisawn amah leh amah a inbe mawlh mawlh reng mai chu a ni sia" ka nuin mangan hmel taka a tih ri chu ka hre pha reng. Hnaa ka kal lohna pawh ni li lai a ni tawh. Min uaptu thlarau rethei tak chuan chawlh hahdamna a la hmu si lo. Roomah ka tawm a, thil pawh ka ei tha mang lo. Ka chhungte mang a ang tak tak tih ka hria. Hrehawm ka ti. Mahse, min hrethiamin he thlarau hi tanpui ve se ka duh a, an duh si lo. Jeremy nen phei chuan nizanah kan inhau hrep. A lungawi tawh mawlh lo tih ka hria. 

"I nuam tih dan chuan awm ang che. Kha i thlarau phuahchawp nen khan hlim ang che u" tiin min thlah a nih kha mawle.. 

Vawiin chu ka inchei a, ka chhuak dawn a ni. Thlarauin min hrilhna lamah ka pen zel mai ang chu. Bda kha Rangvamual thlen hma lawk side drainah chhar a ni a, damdawiinah hruai nghal niin chhan hman a ni tawh lo a ni. Rangvamual lamah min hruai zel a. Scooty pawh chu ka khalh nge a khalh pawh ka hrethiam tehnuai lo ve. Hman zana ka mi hmuh hlimthla kha a hmel kha ka hmuh fô hnu angin ka hria. Chuvang taka hlau em em chu ka ni. Mahse, tu nge tih ka hre thei tawh tlat lo hi a buaithlak a ni. A ruang an chharna bulah ka ding chat a. Ka mitthla in bda let reng chu ka hmu thei. Chiang takin a nghawnga rehna hnuhma pawh ka hmu. Hun chu a vir muai muai ni maiin ka hria, thli a thaw vuk vuk a, khua chu a thim chhelh tawh a. Car pakhat a lo tlan a, ka dinna bul maiah chuan a ding dawt a. Bda leh hman zana ka hmuh pa ngei kha an lo chhuak a. Kawngsir fai laiah zu inin an tawng bial bial reng a. 

"Lo chhuak ve la.. " car a chuang chu an va au a. Car atang chuan ka bialpa Jeremy a lo chhuak nia! Eng nge thleng le.. Aw ka hrechhuak ta. Jeremy thianpa, chaw ka ei khawm tuma buaina siamtu Zaia ngei kha hlimthla ka hmuh kha a ni. Ka hmuh tawh hnu a ang ka ti reng a ni. Jeremy chu an bulah va thu vein zu chu a in ve mawle! A va zak lo tak. An titi chul hlawm a. Inchhar thar an nih a rinawm loh. Inkawm fo thin an ang tlat. 

"Zothani chu i then tawh em? " Bda chuan a ti a. 

"Thenna tur chhuanlam a váng ve lutuk a" Jeremy chuan a ti! 

"Then vat rawh. Kan veng nula fel a ni ve a. Hetia kawp kual mai mai atan ka phal bik lo" Bda chuan a ti a. Kan veng chhungah kan inhriatpawh loh tehlul nen.. 

"Nia, mahse, min duh ve lutuk a."

"Vawi engzat nge in chetsual tawh? " Zaia chuan a lo ti thung. 

"Vawi khatmah. Keimahah hian inthiam lohna a awm tlat a, ka tilui thei ngang lo" tlem chuan a rilru a tha ve anih dawn hi.. 

"Bakah mami'n a hriat hmaa then vat a tha ber" Bda. 

Tu nge mami chu ni ta ang le.. 

"Rai lo se chuan mami hi chu ka duh lo zawk" a ti liam puat a! A bialnu a rai anih chu! Tenawm hian. Heti em em hian a lo inthup thei anih chu.. 

Eng emaw sawiin an inhnial chho va, Zaia a tawng chapo vang a ni ber. Zu ruih nen an thinrim chho tial tial a. An insual titih ringawt! Bda chuan Zaia chu a hnek thal tawp a. Jeremy chuan a rawn hnek ve nghal. An pahnih chuan Bda chu an sual rawn ta a. Hneh mawlh hek lo. Motor vei vak an awm miah lo lehnghal. A mak hle mai. Chutah Zaia chuan rek betin khur ngawt ngawt chungin a rek a. Bda thaw hrawk hrawk ri chu ka hre thei. Jeremy chuan Bda kut a lo man bet bawk a! An rek hlum ta. Hlauthawng taka an insaseng fel chu ka thlir reng a. Ka na vawng vawng mai. 

"Mami.. Mami.. Hei i harh em? " ka bianga sawi nawk nawktu chu ka en ha a. A hmela makti hmel chu a thup thei meuh lo a ni e. 

"Ka.. Ka tha e" ka ti chhuak thei hram a. 

"Hetah hian i lo ding reng ringawt a. I awmdan kha i hlauh hmel bawk sia" ka pa ai chuan a nau hlek ang, pa zaidam hmel tak a ni a. 

"Ka tha alawm ka pu, thil hriatchhuah ka neih vang ania. Tunah chuan ka tha tawh e" ka ti sawk sawk a. Scooty ka tinung a. Ka haw ta vang vang mai. 

Chaw ka ei lo. Hmalak dan tur ka hre lo. Ka thinlung hliam bawk,thluak fim hman ngai bawk si.. ka va mangang em.. Jeremy chu a reh hmak tawh. Engtin nge kha leh chen kha min lo bum theih le.. Mak ka va ti tak em.. Ka thinrim bawk si, hma lak buan buan chi a ni si lo va. Ka bangbo takzet. 

Ka pa ka be ta tawp a. Thil engkim a chinchhuakin ka hrilh ta a. A tirah a awih lo dawna mahse, ka thutak lutuk tih a hriat vangin zaidawh deuh zawkin min ngaithla ta a. Bda nu leh pate a han kohtir a. An rawn kal nghal… 

Kan han relho mam mam a, FIR thehlut turin thu kan titlu ta a. Case dang ang a ni si lo va. A buaithlak viauin a rinawm. Mahse, kan police fing tak tak ten hma an la a nga. A tha mai ang chu maw.. 

"Zothan, ka thil hrilh tur che hi mak i ti viau ang. jeremy kha enteh, mami, Sawma nau nen khan an inru daih nia! " Ka thiannu Remi chuan a rawn ti a! Ka nui tawp. Sawma nau Mami te chu ka hre lutuk tlat! Kan thenawm nula a nia! Thil hi a mak tawlh tawlh. A rai tih ka hriat khan tu fa nge a pai ang tih ka hrethiam lo reng a ni. Na ka ti lo chu ka ti lo, ka zak a. Mahse, ka thaw huai mai. Phuba lakin a awm tho dawn a. 

Case chu an han chinglet tan ta a. Zaia leh Jeremy an ko. Dawp rei an ngai lem lo, an inpuang hma viau. Mi zawng zanwgin Jeremy tel ve chu mak an ti. Enbik ka nih phah bawk. 

"Zothan, min hriatreng dan tur hi ka duh lo. Khawngaihin hetiang mi hi ka ni lo tih min hriatsak rawh aw' Jail-a an luh thlak hma chuan a ti a. 

"Chu zawng ka thu a ni e. I dam reng dawn nia" tiin ka kalsan ta a. 

Tunah chuan Bda thlarau pawh a chawl hahdam ve tawh ang chu. 

Ka nunah mi thar ka tawng leh ang em ka hre lo naa ka fimkhur tawh viau ang.. 

(Ih maw u, a ngaihnawm loh viau ang. Mahse, ka tihtheih tawk a ni hrih. Ka hmanhmawh leh viau a. In chawh leh ta anih hi. Love story ngialngan lutuk ka rawn ti leh dawnnnia.. Hur deuu 🙈🙉🙊