Hubby

HUBBY.. 

Ziaktu: Toni Râlte

"Tui pawh i la chhuang so na nge? I va han che muang tak e aw" a ti bawrh bawrh a. A tho phang hmel chhiatzia chu. A meng rúm úl bawk a, "Vawk chaw ka chhum daih a, ka lo la chhuang hman lo a ni" ka ti a. 

"Awmpui man awm lo lutuk" a ti hluk a. Ka rilru a na zawk. Awmpui ang leka min ngai ta mai chu..

Ka pi leh pute damlai chuan pa ka nei lo tih pawh hre chang lo lèkin an mi duatna te avangin ka nui thin a. Ka tan chuan pathian an ni thin. Ka nu erawh chuan kum 3 ka nihin pasal a nei a, ka pa hi ka nu nen an innei lo va, ka pian atanga rei vak lo ah an insakna lamah a chesual a, a thi ta mai a niawm e. Ka hmu ve hman ta lo a nih chu. Ka nu ai chuan ka pi in min kuah tam zawk a, ka nu hnute tui ka hne a, chu zawng chu a ni deuh mai. Mahse, ka vui lo. Ka nu kha hmeichhe hmel tha tak a ni a, ka la buchip hle lai pawn heltu a nei reng tho. Tichuan, nikhua ka hriat tak tak hmain pasal a nei ta a ni. Kei chu ka pi leh pu leh ka putea te nen kan awm ta a. Ka putea chuan min duat em em bawk. Puitling thiau kara seilian na nâ na chu ka fel èt reuh a. Ka tawngkam pawh a felfai thlarh mai. Ka pu hi sipai pension a ni a, a hlawh chu kan ei ber a ni ve. Ka pi erawh chuktuah huan te siamin chawhmeh a zuar thin a. Sum a la lut ve thei viau. Putea erawh zirna a la chhunzawm a. Ani hi kan innghahna a ni. 

Kum 15 ka nih kumin ka piin min boralsan a. Ka pu nen inkuahin kan tap dun rawi rawi mai a ni. Chutih lai chuan ka putea pawn hna tha ve tawk tak a hmu tawh a, kan khawsak a ziaawm chho hle tihah ka piin min kalsan leh ta si. Ka pu chu a lungleng nen a tar bawih bawih mai. Min kalsan thuai rinna ka neih avangin ka hlauthawng ngawih ngawih zel. Putea pawn nupui a nei ve ta a. Pite Madini chuan min duatin fa an neih hma chuan a fa ang chiahin min cheibawl thin. Kei pawn ka ngaina hle. Putea hi senior tawh lama nupui nei a ni bawk a, an nu lah a hmel tha si, an nu thu a awih duam duam hle. A awm ve reng mai. Ka pi thih atanga kum 2-naah ka pu duhtak pawh chu a liam ve ta a ni. Mak ka tih ber erawh ka pi leh pu thiha ka nu rawn lang ve ngai miah lo chu a ni. Hmu mah ila ka hre tawh kher lo maithei, mahse, ka nu a nih miau vangin beiseina ka lo nei ve thin. Tun hnuah ka nuin kum 3 lek ka nih laia pasal min umsan vang khan ka puin ka nu chu a tuithlar a lo nia! Rawn kal ngam chi ziazang a lo ni lo. Min hmangaih èm vanga tuithlar an nih avangin ka dem reng reng lo. 

Ka pu a thih ve takah chuan ka khawvel chu a lo danglam tan ta a. Lehkha ka thiam thei a, college ka kal ve tawh a. A thiam pawl ka ni ve thin. Piteii chuan fa a nei a, hmeichhia a nei a. An chhang a zing angreng, kum zawn deuhthawin fa an nei. Kan chhangchhe ta hle a, zirna erawh ka la chhunzawm ve tang tang a. Putea hlawh a tam ve thawkhat a, sumah chuan kan la buai chhe lem lo. Mahse, inthlahrun erawh a na tan angreng. Piteiii anhla thenkhat avangte chuan. 

"Chawmhlawm, engmah thawk chhuak si lo, ka fate hi an lo leikang ang a, a tha ber zel ka duh dawn si a. Ani hi chu a la inngaihtuah a la ngai ang" tihte hi a tawng duh dan a ni. Fa pathum an neih hnuah a insiam ta kha ania. A fate chu amah ai mahin ka buaipui nasa zawk. A teber a neih hian a u te pahnih chu ka bulah an mu tawh. An la nau ve tho ania. Zanah an harh pawn keimah vekin ka buaipui thin. Ka hah ve khawp aniang, ka cher kawk kawk a, ka thu bel bawk a. Putea chuan min lainat ve deuh nge eitui tuihnai deuh te min leisak ve a, chu pawh chu piteii mit tikhamtu a lo tling zel si. Min hmumawh ta lutuk chu mak ka ti fô! Ka chhawk zangkhaia ka puih nasat tehlul nen. 

College pawh tha takin ka zo ve ta a. Zirna chhunzawm zel ka duh em em, putea ka dil a, piteii a lo biak tur thu a sawi rual chuan ka zir zawm theihna chu a tawp tih ka hai lo. Piteii chuan a lo remti awzawng lo va, rilru mangang takin ka awm ta a ni. Mahse, vanneihthlak takin kan college principal hian ka dinhmun a lo hre ve a. Student loan min dilsak a, chu chuan ka tuina ber eisiam chu privatein ka zir thei dawn ta a. Mahse, ka la buai tho, chhuna ka chhuah chuan piteii a lungawi lo leh dawn si. Rem min ruatpui ta ngawt a, chawhma dar 9-12 thleng zirna hun min siamsak thei dawn a. Chupawh chu dil fe an ngai leh ang. 

A thin a rim a, ka sawi chuan. Mahse, an pawisa ka hmang dawn lo bawk a, ka ngampa ve deuh. Putea pawh chuan an nu mitmei veng tho siin a remti ta a. Piteii tum bur pawh ka pawisa duh ta bik lo. Ka lawm ve em em a ni. Zing dar 5ah ka tho a, in chhung tihtur tul zawng zawng ka ti vek a, naupang school kal tur ka siam a, an rualin tukthuan ka ei ve nghal a, an schoolah ka hruai nghal thin. An nupa chaw eina thleng sengfel leh sil ringawt a kuta a han awm ta pawh chu a phun nasa em em a. A thatchhiatthlak ka ti. Em em a na. 

Ka tuina ber a ni bawk a, ka thil zir chu nuam ka ti khawp mai. Thawktute an fel bawk a. Min duhsak riau nia hriatna te ka nei fô. 

Ka hming pawh ka la sawi lo. Lalenkawli ka ni a, Eni tiin min ko thin. Ria lam deuh, ngo ve tawk tak ka ni a. Biangsum hi ka nei ve kèk a, chu chuan min tilang cute.. Ka sam hi ka piantirh atang khan a buang deuh thâng a, School ka kal lai pawh khan min dye tir thin naa a rawn buang leh tho zel. A kir lek lek bawk. In lam hna ka thawk nasa bawk a, a hrana work out vak a ngai lo aniang, ka pian pawh chhe em em zawng a ni lem lo. Ka hnute erawh a te hret! Ngaihzawng lam hi ka la ngaihtuah ngai lo tawp ti ila star chu ka nei ve tawh. Mahse, ka phu loh em vangin beisei enah ka en ngai lo thung. A rei a, ka theihnghilh ve mai. Thian ka kawm tam em em lo va, thian tha pangngai pahnih ka nei a, tawk ka ti viau. Mi te angin ka chhuak vak tam hman lo bawk nen. Ka naute nen inah kan inawm deuh char char a, a hlimawm ve tho mai. An nu sual tehreng nen min ngaina ve hle a, an nu ai mahin min ngai zawk. A te ber eraeh ka khawih tam ta vak lo va, min ngaina viau lo. 

"Enkawl, vawiin chu chawl ang che. Ka chhuak dawn, in i nghah a ngai" fawk fawk zel a. Ka chhuak ta lo. 

Nitin hian ka piteii chu a tawrhhlelhawm telh telh mai. Kan teber Danny pawh kum khat lai a lo ni ve ta a. Piteii chu a vul leh tan hle tawh mai. A la nalh bawk a, a khal mawi tawk bawk si. A inchei chuan nalh tak a ni. A ph hi a khawih nileng deuh tawp. Putea lah hi a hna lam ngawt a ngaihtuah a, a lo upa ve deuh bawk nen, an nu chu a enliam ve tawp ni maiin ka hria. 

"En, lo en lawk teh.. I piteii zah lohzia hi" Sangteii chuan a rawn ti a. A thil ss chu min rawn thawn nghal a. Group pakhata ka piteii leh mi pakhat inbiakna vel a ni. 

"I thlazar hnuaia awm a nuam ngawt ang 🙈.. Kei chu nangmah ang hi ka duh chi" tih vel. Mipa lah chuan thlum deuh deuhin a rawn reply a. Private te chu nise ka hrethiam. Group ania, an zak miah lo mawni. Fiamthu pawh nise.. Nu a ni tih a hriat loh reng reng. Hei zawng a dik lo tawp mai. Putea chu hrilh ka duh rum rum hman a, mahse, piteii a hlauhzia leh chân a phal lohzia ka hria, buaina thlentu mai mai ka ni dawn tih ka hriat vangin ka sawi ta lo. 

Piteii chu a chhuak ngun tial tial a, ka zirnain a tawrh phah tial tial bawk. Nau awm a ngai zel si a. Ka harsatna chu kan hotute bulah ka sawi ta tawp a. Min hrethiam hle. Ka hun neih ang angah ka duh chen chen zir min phalsak ta a. Ka tan an tha ngawt mai. 

Kum a liam a. Ka thil zir pawh ka zo ve hnai ta. Dawr neiha sumdawnna bul han tan te pawh ka chak. Mahse, ka tan kawng a ping tlat si. Mahse, ka vanneih asiamin Aizawl Hotel lar ve takah hna ka hmu ta hlauh mai. Mi vanduai ber chu ka lo ni lo. Putea ka hrilh chuan a lawm ve khawp mai. Ka pi leh pu ka ngai vawng vawng. Awm ve se an lawm dawn asin le. 

Piteii erawh chuan, "Awmpui kan lak a ngai dawn anih chu.. Eirawngbawl lam chu ka chikat bawk sia" a ti hlang hlang a. 

"Chikat loh tak tak pawh i nei mawni le" Putea chuan a ti vei hluk a. Mak ka ti tawp. 

"Eng a? Rammawi, tikhan mi ti reng reng suh aw. Ka nulat lai atangin eirawng bawl ngai lo ka nia, ka thiam lo ve a ni mai lawm"

"Nia, i thiam lo ve a ni mai" a ngeiawm thiam tawp. 

"Ve mai mai che chuan.. Awmpui kan lak dawn loh chuan ka chhuak ang" 

Hmm.. Awmpui thar kan nei ta. A tha mai e. Thingtlang lam mi Ruati a ni a. Mi inthlahrung deuh, tawng tam lo tak a ni. Kan inkawm thei phian. Piteii mizia tlem azawng ka hrilh sa avangin piteii anhla satliah chu a kalpah ve thei mai. Hrehawm a tih ka hlauh vangin ka hman chang chuan a tih ai ka tihsak vek thin. A lawm ve thei khawpin ka hria. 

"En, vawiinah i piteii leh pa pakhat ka hmu a.. " Sangteii bawk chu.. 

"A thianpa a niang"

"Thianpa ringawt nena hotel book chu a mak hle lo maw? "

Ka phu chiang hle. Sangteii hi Hotela thawk ve tho, ani erawh receptionist a ni thung. Kan veng a inang lo va, piteii chuan ka thiannu a ni tih a hre lo vang. 

Piteii chet dan chu ngaihtuah zui a ngai ta riau mai. A chhuak tam si, putea lah a zin ve reng bawk nen. 

"Kawng en ta che.. Bawihi" a ti dam thlup a. Keia ngaihtuahna sawrbing phèng chuan motor lo ding chu ka lo su bur a lo ni. 

"Ka.. Ka tihpalh" 

A sang viau, a palian bawk. A ngo vuah a, tu emaw pasal duhlai a ni ngei ang. Tlangval hmel a pu chiah lo. Upa lutuk erawh a la ni lo thung. A nui sak a, a pa riau. 

"Kk.. Thil i ngaihtuah nasa lutuk anih kha" 

"Nia, ka tihpalh lutuk aw" ka ti leh a. Inthiam lo zetin ka kalsan ta a. Ka nui vur vur mai. 

August thla a ni a, ruah a sur deuh reng tawh a. Chhuah a ninawm angreng. Putea pawh champhai lamah a zin leh dawn a. Piteii nen kan va thlah a. 

Chumini ber kher chuan ka awm a nuam lo angreng. Ka ni búr reng mai a, hna lamah pawh rilru ka pe hlei thei meuh lo. Hawn ka dil ta tawp a. 

"I nawmsam loh hmel em mai, ka lo thlah ang che aw" Hmani ami kha a ni. A tshirt inhmehzia chu.. Ka lerh loh ve tehreng nen, he pa hi chu a danglam tlat. 

Chhuanlam ka siam a, ka inthlahtir ta lo. A thuhrimin kan hotel bulah hian hmuh tur a awm ziah a(vawi hnih bak ka la hmu tawp si lo) eng nge maw a tih thin ni.. 

In ka thleng chu a lo reh thap a. Chhunglamah a lo inkalh a, inchungah ka chho a, tukverh atangin ka lut ta a. Ruati a muhil a ni maithei. In hnuaiah ka chhuk nghal a. Inchung hi a lian lo va, naupangho nen kan room atan kan hmang. 

Piteii te room atanga thawm lo awm chuan min tiding chawt! Ka thin a phu nasa kher mai. An nupa khumlaizawlah ngei mipa dang a mutpui ngam tawh anih chu! Ngaihtuahna fim ka pu hram hram a. Ka ph ka phawrh a, Sofa chungah ka lawn sauh sauh a, dingdihlip chungin rooma an che tla lai chu ka capture ta a. Net an zar avangin a hmuh theih vek. Anihna takah chuan an room hi inhnuaiah a awm a, mahse, an siam tha a, mikhual room hi an luah hrih a ni. Chuvangin a secure lem lo. 

Piteii rak ri mawlh chu. Ka va uak teuh tak. 

Putea lo hawn hun ka nghak ta. Ni 3 hnuah a rawn hawng chauh ang. Ka za zek zek. Mai. Piteii chu a tenin ka ten tawh. A hnaiah pawh ka awm duh lo. 

"Laldinpui, huri, heti ang hian maw i lo awm thin" tih pahin a beng sawk a. A zam loh hmel kher mai. 

"He mihringnu thusawi hi i ring zawk dawn maw.. Amah zawk hian tlangval rawn hruai lutin a mutpui a, a hlauthawngin min puhchhiat a tum mai mai a nih hi.. " ka nuih a za zawk. 

"Tun tum chauh pawh hi a ni tawh lo. Mi thenkhat hian min hrilh fo tawh. Fiahna ka la nei lo va tiin fate avangin ka ngawi zel a. Tunah chuan a tawk tawh e. Chhuak vang vang rawh"

Tlemin a mangan hmel ve ta deuh. 

"Tunah pawh fiahna i nei mi? Enkawli sawi bak"

"Hei en la.. I en ngam em? " tih pahin video kha a va hmuh ta a. A meng phar awn awn mai. Rum elkhen hian min rawn melh a, ka hlau duh der si lo. 

"Inphiar rukna a nih hi.. Keimah ka ni lo" a la ti ngam nia! 

A biang a ri leh thak. Engkim chu a reh dúk mai. 

Piteii chu a uire miau vangin a chhuak ta. Danny pawh a hruai lo. Tunah chuan zalen takin mipa a mutpui thei tawh ang chu.. 

Nu ber tel lo vin kan han khawsa chho ta chu ania. Ka hlawh leh putea hlawh chu a tam tham ve tho bawk a, khawsak chu a harsa em em lo. Ruati pawh kan la awmpui zel a. Kan hlim tlang zawk phian mai. 

Kha pa nelawm deuh kha ka hmu zeuh zeuh mai. Min lo be ve ziah bawk. Kan hotel bul lawka hardware dawr chu a ta a lo nia. Tlai tin inhmuh takah chuan keipawn ka ngaina ta viau a, vawi hnih lai min thlah tawh. Mi pasal anih ka rin vangin ka tím deuh thin. Mahse, an chhungkaw chanchin ka zawt ngam si lo. 

Zan khat chu a rawn leng hlawl mai a. Mak ka ti deuh. Naupangho mut hnu thleng chuan a leng a.. 

"Sawi tur ka nei a" a ti sup a. 

"Eng"

"Neih che ka duh a ni" 

Teh tlawng a! A va frank mai mai e. Kan la inngaizawng der si lo. 

"Nupui i nei lo mi? "

"Nei thin. Kum 5 liamtaah khan a boral tawh a, fa pahnih ka nei ve a. Enteh, min duh chu ka ring chuang lo. Mahse, sawi hrim hrim ka duh a. Ka vei tlut mai bawk si che a" 

"Nulat ve vawikhata pathlawi han neih ngawt pawh chu"

"Nia, ka hrethiam tho che. Mahse, mi dang i neih chuan ka na ngawt ang"

Mipa dang chu nise a ngampatna chu ka ngei viau ang. Ka ten bawk ang. Mahse, mak deuhin U Tluanga chu ka ngei miah lo. Ka lawm ru viau zawk. Mahse, pathlawi a ni tlat. Tin, kum 10 chuangin kan inthlau bawk. Kum te hi chu ka ngaipawimawh ber hran lo. Hetah ka chhungkuain min la mamawh bawk nen. 

Khami zan atang khan min bialnu chei ta viau mai. Min thlah tlaitin a, putea pawn a hre ve tawh. Fel a ti viau naa pathlawi anihna chuan a titím ve deuh bawk a. 

Zan khat a lo leng chu a ph ka khawihsak mai mai a. Ka rin loh deuhin piteii nen an inbiakna ka hmu ta tlat! Ka zauthau ngei mai. 

Piteii chuan a kherh nasa mai a, engtin nge maw an lo inhriat reng reng ni. Ka zawt ta nge nge a. Piteii nulat lai atang tawha inhria an lo nia, a nulat lai pawn a ngaizawng nasa thin, piteii thiannu nen an inngaihzawn lai reng pawn a bem reng thin, khatia putea nen an inneih lai reng pawh khan a lo la be fo thin tih ka hrechhuak ta bawk. U Tluanga erawh chuan aw a pawh ve ngai lem lo va, a sawi hmangin a ten ru viau zawk niin a lang. Mipa tawng tam a ni lo hlauh zawk a. 

An ina chaw ei turin kan chhuak a. Min sawm zin em vangin ka hnar thei ta bik lo a ni. An awmpui nu leh a fate pahnih chu an lo awm a. Naupangte chu an duhawm takzet. Polite takin min bia a, ka zak lek lek zawk. 

"Pu, A lo kal leh a" an awmpuinu chuan chaw kan ei laiin a rawn ti a. U Tluanga chu a ner sawk. 

Chutihrual chuan piteii chu chokaah a rawn lut ve nghal. Kan inhmachhawn ran mai. A hmelah chuan mak tihna a lang thei. 

"Enkawli teh daih chu.. Eng nge hetah i tih a? " a aw ki chu a chang fak mai. 

"Chaw ka ei" ka ti mawl tawp a. 

"Mipa ina len te chu a zah pawh i zak lo mi?"

"Ka sawm anih hi. Chuan eng nge i rawn tih dawn? " U tluanga aw chu a ring viau. 

"Tluanga, zep loh chuan ka thiannu avang pawn hetianga nula dang i buaipui nghal mai hi ka rilru a na hle mai. A thihna pawh a la rei loh nen"

"Kum 5 lai a liam tawh alawm"

"Chupawhnise, i fate hi tulpui ta che"

"Lo buai lo la ka duh mang e. Nang pawh i fate saw ngaihsak ta che"

"Ka ngaihsak reng alawm" ka lo nui hak a. 

"Enkawl, i putea ka hrilh khawp ang. Hetiang thil te i lo buaipui ve hi"

"A hre daih tawh" ka lo ti a. 

"Madin, i rawn kal hun hi a timing chiah lo deuh a ni. Haw mai teh. Hei kan hlim dawn chiah asin" Tluanga chu a tho a. A kai chhuak hmiah. A hmaa kan boruak erawh kan pha ta chuang lo. 

U Tluanga chuan min uap hneh bawk a, ka duh ve ta riau mai. Neih mai pawh pawi ka ti tawh lo. Mahse, ka naute ho hi ka ngaihtuah si. Putea nen pawh kan sawi dun fo. 

"En, Mampuia te chu ngaihtuah suh. Ka enkawl thei alawm, putea hian nupui tha tak nei leh se a dik a ni mai" Ruati chuan a lo ti a. Putea lah hian hmeichhe lam a hawi tawh mang si lo. Naupangho pawh an lian ve zel a, a nute lamin rawn um e ta lo chu a ngaih pawh an ngai lem lo. 

Palai a rawn tir ta mai si a. Putea chuan pathlawi mahnise, min hmangaih tak tak anga a hriat vangin nei mai turin min ti a. A fate saw ka hmangaih tak tak thei chiah ang em ka hre lo. Kan insawirem ve ta chu ania. 

Mawltèin kan innei a. Tlang than vak kha ka duh lo. Tluanga chhungte lam pawh an fel, a farnu hur hmel deuh tih loh chu. Ani hian a u hi rosum vanga neiah min ngai deuh tlat a, hmaichhanah min hrilh bawl tawh. Pasal naute nen inbakkaih chu ka duh miah lo naa ka nihna lo puia min puh chu pawm thiam harsa ka ti ve hle. 

Mahse, kan chengho lem lo bawk a, a zia tho mai. Ka naute pawh an rawn leng fo a, ka fate (ti tawh mai ang) nen pawh an inkawm thei fu. Putea erawh hna ngawt a atchilh a. Nupui neih lam reng a ngaihtuah lo. 

Ka virgin hawngtu a nih vang pawh aniang, min duat a, min hmangaih ngawih ngawih niin ka hria. A fate nen pawh kan inngaina chho mai. Ka hnaah ka la kal reng tho a, kan awmpui kha a la awm reng bawk. 

Ni khat ka haw chu ang thawm ka hria a, hmanhmawh deuhin ka lut a, "Ka nu pawh ti suh u. He nu hian i pa pawisa bak a duh lo. A hmangaih lo che u" Tluanga farnu, Sarah chuan a lo ti hlawih hlawih a. Ka fate lah chuan kimki zetin an lo melh kar bawk a. 

"A tawk.. Sarah, k fate hi thu tha lo tak tak hrilh ka phal hleinem" ka ti ve ngat a. Cho zetin min rawn melh huam a. Zu rim a namin ka hria. 

"Nang mi retheinu hian ka u hausakna bak i duh lo. Ka hre vek. I tum ang chuan i awm chuang lo vang" a ti a

"I ngaihdan danin ngai rawh. I u ka call hmain min chhuahsan rawh" ka ti chang fak a. A ú a hlauh vangin phun nang nang chungin a chhuak ta a. Ka fate chu ka kuah a, aní thusawi chu a dik lohzia ka hrilh a. 

"Nu, aní hi chu ka hlau hrim hrim kei chu" Miriami chuan a ti a. Ka nuih a za deuh. A hlauhawm ve bawk a ni. 

Zanah Tluanga ka hrilh a, a thinrim viau naa engmah sawi hrih lo turin ka ti a. 

Vawiin chu chawlh ka la a, ka naute an lo leng dawn bawk a. Ka fate nen inah kan inkawm hlim ang chu. Kan pa erawh dawrah a kal a. 

"En, inpa leh i piteii ka hmu dun" tiin a hnuaiah an pic a rawn thawn nghal zat. Sangteii bawk kha.. Sangteii hian thil hi a hre thei viau. Thu thinthawng lam a ni ziah lehnghal. A tangkai fu mai. Pic ah chuan piteii chuan kan pa banah a kuah hnap a. Kan pa pawh lungawi lo hmel a pu lo. Ka thin a phu dup dup a. Ngaihzawng ka neih ngai loh vangin tawnhriat engmah ka nei lo. Ka pasal tan ka rinawm a, a tawk ka ti viau. Khumlaizawl nunah ka zakzum a, ka zei lo bawk. Min duhkhawp ta lo em mawni le.. Thla 5 chiah kan la innei lehnghal. 

A rawn haw chuan roomah ka awm a. A rawn lut a, min rawn kuah leh hnúp a. Ka lo nem sawn. An thlalak chu ka hmuh a, "Min bum a maw? " ka ti nghal a. 

A meng nur deuh a, "Kha te chu a pa dam lo kan turin min hruai lui tlat anih kha. Ka nin nak alaia, kan nu hlui thiannu anih hi chhuanlamah a hmang tlat a" 

"Chupawhnise, biain hmu tawh suh. Ka duh lo"

"I thu vek alawm"

"I hmuh leh vaih"

"Hmu tawh lo vang"

"Va inbual rawh" ka ti ta a. 

Thinrim rei theih pawh a ni lo. 

Zanah, "Inpa chu a zei khawp mai. A lo tuihal hle anih dawn kha.. " piteii hnen atangin ka dawng! Ka tho zawk nghal. 

Kan pa muhil ka kaitho, a masg chu ka hmuhtir a. A ner nang mai. A tho tuih tuih a, Piteii chu a call nghal a. 

"Naktukah inhmu lawk ang, sawi tur ka ngah tawp.. Bakah ka ngai deuh tlat che". Te a ti vel. 

"Zawnga" ka ti tuar a. 

"Bawihte, min rawn zuiru dawn alawm. Roomah camera kan kam dawn nia, tichuan, i tana ka rinawmzia hi ka fiahsak thei ang che" a ti sup a. A awmzia pawh ka hre lo e a. 

A tukah chuan kan insiam a. A faifuk rut rut bawk. Ka ngei bawk si,. Sawi vak dan ka hre bawk si lo. 

Kan inzui chhuak ta a. 

A room book piahah ka thu ran a, ka hmaa laptopah chuan a awmna room chu fiah takin a lang a. Kawngka a ri rak a, piteii chu inchei vul chúkin a rawn lut ta. Thinphu dup dupin ka lo thlir reng a. 

Kan pa. Chuan a lo kuah vei hnâp a. Ka ner sawk. 

Khumah an thu a. "Nizana kan nu msg i lo thawn kha a thawk tha tawp. A thinrim a, a haw daih a. Ka free" a ti ham ham a. 

"Chuan.. "Beisei nei tih hriat zet hian a melh no a. 

"I lo riak fo thei tihna"

"Mahse.. I ko leh vat awm sia"

"Ko dawn nang, sarah i lo fuihpawrh te kha a lawmawm tawp, ka nu te pawn kan nu an rin loh phah vek a"

"Engtin nge ka fuihpawrh tih i hriat? "

"Sarah te chu ka hrechiang a, khatiang lam kha a ngaigtuah pha lo tih ka hria lawm.. Chuan nizan chuan engtin chiah nge masg chu kan nu i lo thawn.. A sawi tha duh thak lo va"

"Haha.. Inpa chu a zei khawp mai.. Tih velin, ka tum lawk pawh ani lo.. Ka kai deuh a, ka rawn thawn mai mai"

"Chu.. Ka zei leh zei loh chu fiah i duh em? I risk dik nge dik lo" kan pa chuan a hnute a nul thuak thuak a. 

"Tluang, ka nulat lai atang tawha ka star kha i nia, i tan hi chuan ka inpeih reng. Dik tak chuan min hawi si lo va, ka rilru hi a na thei asin" a ti no ngher ngher a. Ka kut ka hum ruh rap.. 

"Vawinkhat tal min mutpui hi i suangtuah ngai em? "

"Awiii.. Pasal ka neih thleng khan ka suamgtuah ziah". 

Zawngi chu leh… 

"Madin, tun hi kan inhmuh tawpna ni rawh se. Nang leh kei hi tun atang chuan kan la inhre ngai lo va, kan la inhmu ngai lo bawk aw. Tuna kan inbiakna hi kan nu in a lo thlir reng a, thudik hriattir ka duh vanga ko che ka ni.. Nupui ka nei a, ka nupui hi ka hmangaih bawk. Lo inrawlh tawh lo hram ang che" kan pa hmel thatzia chu aw… 

Piteii zak leh hrilhhai chu ka khawngaih lek lek zawk. Mahse, a chantawk a ni miau si a. 

"Zah pawh sawi lo va ka zui duan duan hnu chea harsa taka ka neih che i nia. Ka rinawm lohsan che hi chu ring buai duh suh. I ta ka ni reng ang" a ti sar sar a. 

Lungchim takin min pawm a. Thlamuang zetin ka bei ta hle hle a. 

The end mai aw 😂