Escape Last

ESCAPE.. (Last Episode) 

Ziaktu: Toni Râlte

(A tawp tawh dawn sia, adds kha min lo click sak leh hram r'u aw 😍😍

Aizawl daia cottage pakhatah chuan, pa pathum hi khunkhan takin an titi a. Buaina inmúng chho zel chuan a tawp kharna a hnaih tawh tih an hria. Chumi avanga inhmu khawm pawh an ni. 

Pu Zoliana chuan, "Engti kawng pawn sawi ila, inpuang ang pawn kalpui se, buainaah min hnuk lut dawn tho tho.. He Inspector hi rin aiin a tawhkhirh tlat mai.. " a ti bai bai a. A thla a muan loh hmel viau. A ep chiaha thu Ephraime chu va melh lehin, "I hliam dam fel hma chuan ka ngawi thei tho ania" a ti zui a. 

Pu Liantâwna erawh a hmel phelh zet chu thup buai pawh tum hran lo vin a meng tlaran hle a. Buaina a tawk tih chu chîk duh tan chuan hai rual a awm lo ve. Engkimah kawng lehlam lehlama dan chêpa a han awm ta chu zei a lo har viau pawh a ni ange. 

"Sangliana hian min hum duh tak tak i ring em? " tiin Zoliana chu a va melh a. A thaw hawk bawk. 

"Ring miah lo. Tualthattu hming kan puanchhuah rualin keini pawh min hnuktel ve zel dawn ka tih mawlh mawlh kha.. Min dai khalh hneh lutuk. Hei vang hian a nia i nau Hmingzuala kha hnawksak ka tih em em ni. Engkim a lo chhui ru a, kan hming nen lam, kan bungraw tawlh thin leh kan thuhrúkna thlengin.. Chu vangin a thih phah ta a nih kha" Zoliana chuan a lo ti bâwih bâwih a. Buaina thuhmun nei an ni bawk a, inzahderna pawh an lantir thei meuh lo a ni ber e. 

Pu Liantâwna a ding nghal awt. "Hminga thihnaa bultumtu kha nangmah maw?! Hrep tak che chuan.. " a ti a. Zoliana chu khawih mai duh hmel a pu hial a ni. Ephraime chuan a aw a thian kharh a. 

"Pute u, tun hi intihbuai hun a ni lo. Fim taka ngaihtuah hun a ni. Mitthi chu mitthi an ni tawh. Kan dai loh tur huang kan dai hian tu tan pawh hnawksak kan ni thin.. Tunah hian keini pawh chintawk nei lo vin kan pen lohna turah kan pen thui mah mah a, kan buai mek a nih hi" a lo ti charh charh a. A naupangber mah nise, a mitmeng fim zet leh fin hmel tak te, a hmel zaidam leh dap bawk si te chuan a hneh ta deuh nge.. An inbengdai thei hram a. 

"Sangliana hian hun pe inti si che u in, a enthla ru reng che u tih hria u la, fimkhur takin awm ang che u. Ni tam a ral hmain a rawn ko leh dawn che u a, ka rin danin a hmanhmawh tawh a, naktuk emaw a tuk leh emaw velah a rawn koh che u ka ring. Chutah chuan ka hming sawi ang che u. Ka hliam hi la dam chiang lutuk lo mah se, tlanbo theih lohna tur khawpa nâ a ni tawh lo ve.. Ka hming in sawi rualin, hei hi in sawi tel ngei tur a ni. 

'Amah ruaitu dik tak hi chu keini pawn kan hre bik lo. Kan aia chungnung leh mi inthup fê a ni a. Keini chu a hmanrua chauh kan ni. Kan inremsiam tawh angin, kan sumdawnna chu min tlangzarhsak dawn lo bawk a. I hna thawk la, kan hna kan thawk ang' tiin.. " a ti leh dap dap a. 

Pu Zoliana chuan, "Mahse, chuti ngawtin min kaltir lo vang. Evidence a neih that bakah a hre thúk mah mah tlat. Awlsam takin min kaltir dawn lo, ka chiang" a lo ti ve tlat a. Chu chu Ephraime ngaihdan pawh a ni. Mahse, ruahmanna a neih a ngai tlat si a. 

Pu Liantawna erawh chuan mangang zetin, "Khawiah chuan nge i tlanbo chuang ang? " tiin Ephraime chu a va melh a. A lo khi suk duh chauh. 

"I fanu erawh ka hnutchhiah ang. Ka kalna tur chu ka sawi thei lo" a lo ti nghut a. Zawh zui zel chi a ni lo. 

"Chuan i address kan hrilh dawn em ni? " Zoliana'n a lo ti thung. 

"A hre tawh alawm. A rawn kal tawh. Mahse, Amos ang ni loin Ephraime ka nihna angin min rawn hmu.. " a lo ti mai a. 

"Kan tan chuan Amos i ni rèng alawm. Nang leh tuna kan sumdawnna chungchanga evidence a kawl saw inthlengpuiah ka dil dawn a ni" A lo ti hem mai. Zoliana pawh hi pa ngawhngawl ve tak a ni ngei ang. Liantawna erawh za lo zeta nuiin, "Amos hian thudik a sawi chuan i sumdawnnna vang ni loin mi i thahtir vangin jail bang chu i zút ve ngei ang" a lo ti a. A mitmeng erawh a ngui hle. 

Zoliana chuan a lu a dawm vung vung a. "Ni leh bawk si. Ani hian min puan loh ka lo beisei ngawt mawle" inthiam loh hmel ve deuh hian Ephraime chu a melh a. Ani lah a lo ngawi run si.  

Mahse, a hnu deuhah, "Heng thil zawng zawng hmawrbâwkna tur thil pakhat chu a awm ngei tur a ni" a lo ti chhuak ta hlawl a. 

Sangliana erawh hmabak hlimawm takin a hmuak niin a hria a. A hlim vur vur khawp mai. Pu Liantawna leh Zoliana rilru buai dan turzia a chhut thiam vek. Engkimah a dai khalh tak avangin kawng dang an neih lohzia pawh. Chuvang chuan tualthattu chu tu pawh nise, a man ang a, hremna a pe ngei dawn tihah a chiang ngam tlat. Tin, Hminga hnutchhiah document chu hotu sang zawk hnenah thlen rih lo mah se; tualthattu a man zawhha tharthawh leh a tum tho. Pu Liantawna leh Pu Zoliana chu an vanduai double deuh dawn tihna a nih ber mai chu. Zoi pa a nih angin Pu Liantawna chu a lainat ve lek lek, mahse, a lian ber pawl a hmaih leh si chuan a dinhmun thlengin a derthawng thei tih a hai lo. Thil sual ti na nâ na chu hmaih nei lova ruh kim barh a tum ruh hle. Minister pahnihte erawh an khin ve nalh dawn a, amah maia chinfel chu a har ang. Hetih lai hian an department-in an detective neih that ber Amanda chu Khawthlang lamah ramri buaina vanga tualthahna thlengah kaih pen a ni rih a. A hna a chinfel veleh Amanda chu phungbawma sawm a tum hle nghe nghe. He Smuggling hi tualthah thubuai nen inzawmna nei vek a ni bawk a, a zung nen lama phoro chu Amanda pawn a chak sakhai ngei ang le.. A phone a rawn ri ral ral a. 

Pu Zoliana a lo ni. Phur zetin a la a, "Tualthattu chu i hre duh takzet a nih chuan, inremsiamna neih ka duh a ni" a rawn ti ta a. 

"Office-ah kan sawi dun thei ang chu" a lo ti a. 

"Ni lo ve. Kan pahnih chauha inring tawn taka sawi dun ka duh. Ka sumdawnpui ten min hmu tur a ni lo bawk" a rawn ti ta tlat a! Sangliana chuan a rilru te tein, "A thawhpuite a thlim dawn a ni maw? " a ti a. 

A langah erawh, "Zan lamah lo chuan ka va hman awm lo ve" a ti a. 

"Chu chu duhthusam a ni e. Ka rawn hrilh leh ang che. Tuna kan inbiakna tur hi confidential tak a nih avangin i police nihna pawh kha hmachhuan duh lem suh" a la rawn ti zui! A sawi hlauhawm thiam phian mai. 

Chutah, "Kan inbe dawn tih hria se, khawi lam lam atang pawhin ka dinhmun a derthawng ve ve thei dawn a" a ti lehzel a. Sangliana pawh a serious ta deuh. A hmachhawn tur te hi mi naran leh satliah an ni lo va. Zoramah pawh mi hming tha leh mi lian, mi nawlpuiin an chung en leh Kohhran huangah pawh duhsakna dawng pha chin deuh vek an ni a. Ho leh thuihhruai tam tak an nei ngei bawk ang. Chung chu tuna proffessional killer ang chiaha nunna chhat tura hniak phawi eih lo va pawisak nei lo deuh hlir an ni ngei bawk ang a, chutia awlsam taka hmachhawn chi an ni tlat lo a ni. Tualthattu a zawn mek lah zawn hmuh leh chhui harsa khawpa fing, a tuma hlawhchham tum miah lo mihring a lo ni chhap nen.. Tlema a rilru a sen ve deuh a ngai dawn a ni. 

Zoliana nen an inbiak zawh rual chiahin Pu Rualkhuma fanu Jenny call a dawng zui leh zat. 

"Biak duhna che ka nei a. A pawimawh angreng sia, lunch ei dun ila kan sawi mai dawn em ni ang? " a rawn ti a. 

"A pawi hleinem" tiin an inhmuhna hmun tur an sawi a. An dah ta a. Case fahrah ti ila, tenau lam deuh chu a hnawl char char rih, a thawhpui te pawn an hrethiam viau. A hah rimtawng leh inngaihtuah nasa lutuk chu a cher ve kuam mai. Mahse, a hlawhtling ve ţep ang chu maw. 

"Bawiha, i malpui chu a dam tawh em ni? Ka hmu thut che chu ka hamhaih deuh alawm le" Pu Thanliana chuan a ti chuar chuar a. 

"Dam chiang chiah lo naa, a kal ve theih sawlh sawlh tawh e. Rawn tlawh hram che u ka duh sia, i lo dam tha maw? " tiin a pu chu a en a. 

"Ekhai! Ka la chak viay asin. Hei ai hian han naupang deuh ila chuan, kan han daivak dun tur a nia le.. Chuan, i inhliam ta si a, inbuatsaihna ang khan kan la kal zel dawn em? " a lo ti a. 

Ephraime chu a lo bu nghut. "Kal zel mai loh chuan, thulh ringawt thu awm hek lo" a lo ti ve mai a. A nuteii thingpui lumsak chu tui ti takin a lem khalh khalh a. A hmelah chuan sawi duh nei hmel a pu a, lungkham nei hmel a pu mah zawk. 

"Ka pu, thu pawimawh tak sawi duh ka nei a. Lo ngaithla uluk hle rawh aw. Ka nu khan kan nufa tan khan Shillongah in te fel ren rawn a lei ve a. Tunah chuan ka thianpa te ka enkawltir a. Zoi nen kan inneih chuan, ka nu sulhnu lam hian ka lung min len bawk nen, khu lamah ka awmpui mai dawn mawni ka ti a. Tin, Zoi pa saw a hausakzia i hre tawh a. Ani sawn a sum fai ang zawng pawn eng emaw chen chu min puih a inhuam bawk a, kei lah ka lo inkhawl ve nual bawk. Mahse, chung aia pawimawh zawk chu, tun hnaiah tualthahna a hluar sawt riau mai a. Hman deuh atang khan ramhnuaia ka in bul velah khuan thawm ka hre fo a, hoteah kan lo tualthi ve reng thei tihte ka ngaihtuah a. Chutiang hun a lo thlen palh hlauh chuan, Ka ro zawng zawng hi Zoi nen in insem dawn nia. Zoi pawh ka hrilh tawh. Mahse, thil pakhat erawh min tiam ang che. Ka nu thlan i rawn siam ngei tur a ni. I dam lai ngei hian" Ephraime chuan a ti ta dap dap a. Pu Thanliana chuan a beisei loh lam daih a hriat tak vang chuan a tupa chu a melh vung vung a. A mitmengah ngaihthat lohna a rawn piang nghal bawk.

"Engvangin nge an thah ve ngawt ang che? Tu pawi mah i sawi hleinem" a ti ta a. 

"Khang thi ta te pawh khan tu pawi nge an sawi bik? An thi tho alawm. Anih leh sumdawnna thianghlim lo, khawchhak mai bakah ram dang atanga kan lakluh hi i hre thui ve reng reng em? " a lo ti duah a. 

"Hre thui tehchiam lo. Ka ngaihven loh lam a ni deuh bawk a. I hre thui em ni? " a lo ti hlauh zawk a. 

"I hre thui lo chu a tha zawk aw. Hriat tam lutuk te hi a tha lo zawk. Kan nunna thlengin a derthawng duh" awmze nei fe hian a ti a. Pu Thanliana chuan thil a hmu thiam tan nge a bu ve nghut nghut mai. 

"Mahse, Bawiha, khu lai a him lo nia i hriat chuan he tah pawh i tan hmun a awm reng alawm. Ramhnuaia zuk khawsak hi a tulna reng reng ka hmu thiam ve lo" a ti leh a. 

"Ka hria alawm. Mahse, ramhnuai hi ka ngaina a, Him tawkin ka inhre thin alawm. I ngaih lo titha lo vak suh, nakina thil thleng thut thei te anihna laiah ka sawi lawk mai mai a nih kha" tiin a pu chu a hnem a. Rei mawi tawk a nu chanchin sawia an phul hlut hnuah haw turin a inpuahchah ve ta a. 

Tukthuan ei khama Ephraime chhuak chu chawhnu dar 3 velah a rawn thleng leh chauh a. Chawhmeh eng ilo a rawn lei nual mai. Zoi pawh chuan ngawi rengin a lo dah fel sawk sawk a. 

"Inbual fai la, i ke kha kan dressing leh dawn nia" a ti sap a. 

"Aw le, ka pi" tiin a lo uang a. A hma zan boruak uap leh rit lutuk khan Zoi chu a la uai hneh deuh nge, Ephraime chu a va melh râm râm a. "Ka nuih a za lo ve" a ti hmak. 

"I nui thei ţêp ang" a lo tihsan a. Zoi'n a ner khum ringawt. Ephraime chu a inbual sar sar a, a ngaihtuahna erawh a chawl lo hrim hrim. A thiltih tur huphurhawm tak, a hlen ngei ngai si avang chuan a vawi khat nan a zâm ve deuh. A tawpna nihtir nghal pawh a tum ruh kher mai. Zoi hi rawn lang hman ta lo se; hetiang thil hi a ti tho ang em tih a ngaihtuah. Ni leh lo, rawn lang lo nise chuan Ali phuba lain hlate khuaah eizawnna dang nen a awm vang tawh zawk ang. Zoi'n a dan tlat piah lamah a lo inhliam ve khanglang nen. Mahse, engtin emaw chet a lak erawh a ngai ta tho a nih hi. A malpui chu dressing em em a ngai tawh hran lo naa, A nupui tur hi a intithu ve bawk si, a thu a awih loh chuan a túm leh bâr kha a ni awm si a. Zoi'n an tum khum hi chuan awmngaihna vak a hre bik lo. Mi a thlem thiam lem lo nen. Ngawi renga an lungawi hun nghah a ni mai. Zoi'n damdawi a hnawihsak lai chuan, "Zoi, i pa hi chhanchhuah i duh em? " a ti sup a. A rawn melh hâw. 

"Duh e. Mahse, a sual man chu a tel ve ngei tur a ni" a ti hlak a. 

"Anih kei? " 

"Nang pawn engtikah emaw i thah tawhte thisen phuba kha i la tuar ve tho ang" a lo ti hmiah. A sawi dik lo hauh lo. Leiah tho hian kan thiltih rah hi kan tuar leh tho zel a lo nia. Tu emaw na taka kan hliam chuan, tu emawin na taka min hliam hun kan tawngbaw ve leh nge nge thin. Hei hi a fair tawk hle a ni lawm ni? 

"Chuti chung chuan min neih chu i duh tho em ni? " a ti ta khauh a. Zoi hmel a buai nak mai. Mahse, pangngai takin, "Aw.. A chhan i hria" a ti leh thei tho. Ephraime pawn sawi tur a hre mai tawh lo. 

Eirawng an bawl dun a. Thu ho deuh deuh an sawi a, jenny an rel thul. Zoi pawh a insanmarna kha a thlahdul ve ta a niang. A tawngkam pawh a zangkhai ta deuh e. 

"Eng thu pawimawh nge ni ta? " Sangliana chuan eitur chawh pah chuan a hmaa Thu Jenny bulah chuan a ti a. 

"I tan chuan a ho maithei. Mahse, ka thinlungah hian mawlhtu a awm tlat a. Ka rinhlelhna hi a dik ngei em tih chiang lo mah ila.. Hrilh ve hrim hrim che ka duh a ni" a han ti te tê a. Sangliana'n a lo nghakhlel khawp mai. 

"Ih, Zoi chu kan hria anga, i hriat kha. Thian tha ber kan ni a. Khatia a bialpa nen an inruk takah khan kan zuk tlawh ve a. Ramhnuaiah an awm daih a, a bialpa kha kan inkawm tho nain, amah ka hmuh hian keimahah hian sawi thiam si loh min ţhamtu hi a awm tlat zel anih chu.. Ka pa thattu a nih rinna te ka nei thut zel. Engvanga ring ve ringawt nge ka nih ka hre lo. A in awmna teh daih te, a eizawnna sawi fak tur awm lo te avang pawh aniang. Tichuan, Hmanni khan a inhliam vanga kan tur angin ka insawi a. Zan khat ka zu riak a. Ka rinhlelhna tifiahtu atan pindan pakhat, birukna tur liau liaua siam niawm tak ka hmu chhuak ta a ni. Chu chuan rinhlelhna min neihbelhtir zual a.. I bulah ka sawi ta mai a ni" Jenny chuan a ti ta mawlh mawlh a. 

A hmaa a rilru zawng zawng kha, Ephraime leh Zoi ten in atanga an hnawhchhuah hnu khan phum boin a awm tawh. Engti kawng zawng pawhin an pahniha tawrhtir a duh bur tawh a ni. 

Sangliana chuan mak tih hmel zetin, "Chu! Pindanah pindan dang a awm i tihna em ni? " a ti hú a. 

Jenny a bu nghat. "Awm chiang e. Study roomah a nia, bang nem tawlh theihin an siam a. Mihring pahnih vel chu an biru thei ang. Ruang thuhrúk nan pawh a rem phian ang" a ti lehzel a. 

"I sawi chu kei pawn ka lo ngaihtuahzui a. Zoi a bo hmasaka kan zu zawn khan kan dap hneh lutuk alawm. A bialpa hmel ka hmuh rual khan keimahah i awm ang chiah khan ngaihbel theih tur thil a awm tlat. Mahse, finfiahna ka neih loh chuan ka puhthlu ngawt thei si lo va.. Chutiang thil i lo hmu chhuak chu a lawmawm reng reng e. Zoi pawh kha kan kal lai khan chutah chuan a biru a ni ngei ang" a ti ve ta bawrh bawrh a. An inman ta hle mai. An pahnih thiltum chu inang lo mah se, an beisei erawh thuhmun a nih ngei a rinawm. 

Tlai lam dar 5 bawr velah Sangliana chuan msg a dawng ta a. Zoliana msg a ni. 

"Zanin dar 8:30-ah .. Selly Hotel, Room no. 052-ah" tih thu chauh hi. Mahse, a dawngtuin a hriatthiam chuan a tawk mai. Sangliana pawh a phur rualin huphurhna chen a nei ve tho. Zoliana hian fin kherek chhuahin a hote tu emaw punin a lo dah tha hmiah thei. A mi rawih thin tualthattu nena an ruahmanna pawh a ni thei. Chutiang a nih avang chuan Sangliana pawh chuan amah maia kal a him ta lo riauin a hria a. A hotel rawn sawi lah kha Aizawl daiah daih a awm bawk si. Khatiang hotel ţawp ru tak, fianrial bawk si chu suahsual bawlna atana duhthusam a ni tlat lawi si a. Sangliana chuan a mi rin ber ber te pahnih Ramdina leh Ruatpuia te chu biain, Zan lamah a mah zui turin a hrilh a. Thu chiang erawh an kal lamah a hrilh mai ang chu.. 

Zanriah an kil dun laiin, "Jenny kha a hnawk thei ang em? " Zoi'n a ti zauh a. 

"Hnawksak tur khawpin thil a hre tam lo ve" a lo ti mai a. 

"Mahse, min haw dawn sia. Police bulah pindan chungchangte kha sawi ta se.. " 

"Sawi se, rawn kal se a tha ting" a lo ti leh hmiah. Zoi chu a ner sak a, "Ngaihsam leh lutuk" a ti hlak. 

"Zo, zaninah ka chhuak dawn a. Khawvar hmaa ka rawn kir lo a nih chuan, i thawmhnaw leh ka pawisa kawl lai leh document pawimawh zawng zawng la chhuakin in hi i chhuahsan dawn nia. I pa pawh be sa la.. I hrethiam em? " Ephraime chu a thutak kher mai. Zoi chuan a chaw ei tuina zawng zawng a hloh nghal vek. 

"Eng nge tih i tum tih tal chu hrilh ka phu ve lo maw? " a ti hul hak a. 

" Hre lo la a tha zawk. I pa chu be ngei ngei ang che. A lo hrethiam vek mai ang. Chuan, buainain a kiansan mai dawn lo che a. Zawhna maksak pui pui i la dawng maithei. Chuta i chhan dan tur chu, "Vau beh ka ni. Ani khan min kidnapped a, ka chhuak lui a nih chuan ka chhungte zawng zawng thahsakah min vau a ni" tiin i chhang ang. A bak engmah sawi suh ang che" Ephraime chuan a ti leh kalh kalh a. Zoi ngaihdan a ni lo kher mai. A kham nghal hmak. 

"Ka duhthlanna a nia. Dawt sawi kher a ngai lo" a ti hlak hlak. Mahse, Ephraime thusawi awmzia a hre lutuk tlat. A hriat vanga khur chhe mek a ni zawk. Zaninah hian tu emaw an thi a nih loh chuan Ephraime hi a damchhungin a hmu leh tawh kher lo maithei. Chu chu a hrechiang ve tawk e. 

Ephraime pawh a ei tam lem lo. Thleng te senga an intihfel hnuah chuan dar 7 a lo pel duai tawh a. Ephraime chu a insiam nghal malh malh. Zoi'n engkim a hre vek taawh bawk a, inthup buai lem loin a hmanraw dahna pindan pawh a hawng mai. Pistol te chu a han check fel leh te te a, a kawngah a zep nghal hmak. Chemte hriam hmel zet, kawihthleh theih pakhat chu a boot karah a zep zauh bawk a. A bak chu kutkawr leh lukhum a ni tawh mai. Over coat dum hain, a thawmhnaw dang pawh a dum vek a ni. Zoi'n a thuam famkima a han hmu chiah chu hlauhna aiin pa tih hliah hliahnain a khat nghal. Chutiang rilru a pu chu a inhua a, a inthiam lo em em bawk. 

A chhuah dawnah Zoi hmaah chuan a ding dat a, a lukhum chu phawkin a rawn kun hniam a, a hmuiah a rawn fâwp a. Zoi chuan maimichhing chungin a lo dawh tawp. A hriat loh laiin a mittui a rawn luang a. Duat taka hruksakin, hnai takah a rawn melh a. 

"Ka sawi hman loh takin, Zoi, ka hmangaih che. Ka bula reilote i chen ve duh avang hian ka lawm e. Zaninah hian a tawpna chu a thleng dawn a. Engpawh thleng se, hriatreng ka phu lo va, i nun leh ngaihtuahna atangin min paih bo nghal ang che. Mahse, ka pute kha khawngaihin i lo ţawiawm hram dawn nia" tiin a thuchah hnuhnung chu a sawi a. Mipa dik tak, a nu thihna vanga rilru kalsuala pawisak neih lohna thinlung pu tawh mah nise; Hmangaihna meuh chuan a lo kal kan thei bik awzawng lo va. Tuna a hmaa ding hmeichhia avangin tunah hian a hmabak kô tak chu a hmachhawn dawn ta a ni. Heng hi a tan a ni lo.. Zoi tan a ni. 

Zoi chu a hnuk a ulh vangin a tawng dawnin a hrawkah a rawn hnawh zel si a. A tawpa tawpah, Ephraime chhoh melh hâ chungin, "Kei pawn ka hmangaih che. Ka lo nghak reng ang che" a ti ta sap a. Ephraime nen chuan inthlahin zan khawthim hnuaiah chuan an invai liam ta. Kawngka a khar a, a kalh nghal. Roomah lutin khumah a thu zawi hnak a. A awrawl neih zawng zawng nen a ţap ta hawm hawm a. 

Boruak chu sachhe deuh tan chuan a vâwt lek lek mai. Tin, thla chu a mang lai ni lo mah se; chhum dum chhah tak a chambang a, chu chuan thla eng chu a rawn hliah ta tlat a, a thim angreng viau mai. Thli lah chu sarthi tur an awm aniang e tih mai turin a thaw vúk vúk lehnghal a. Suahsual rawngbawl leh huaikawm bawl duhte tan erawh hun ţha eltiang a ni ngei ang. A chhan chu boruak awmdan chu a nelawm loh êm vangin mi veivak an khât pharh tlat a ni. Ephraime pawh a tlan zel a, motor pawh a tawk tlem angreng viau. 

Pu Liantawna call lo kal chu lak loh a tum zet naa, a la ta tho a. 

"Zaninah i chhuak em ni? Kan rin ang khan thil a thleng ta em ni? " a rawn ti nghal mawlh mawlh a. 

"Aw.. Zoliana chuan a bum chhuak thei ta ngei e" 

"Mahse, Ephraime, Sangliana hian amah maia a hmuh ring suh. A hoten an zui ngei ang" a rawn ti a. A rawn ngaihtuah ve hle ni te pawhin a lang. 

"Ka hria alawm. He lam chu rawn ngaihven suh. I fanu kha ngaihtuah rawh" tiin phone chu a dah daih. Thil a kal sual thei tih hriain tun ang hunah chuan mi a be zen zen duh ngai lo. 

Zoliana msg pawh a dawng zui ve zat. 

"Ka awm tawh a. Ka nghak mek" tih thu hi. 

Hei hi thil awmzia chu a ni. Ephraime chuan, Zoliana bulah, "Liantâwna hian a fanu ka kawl vangin min khenthlak a hreh miah lo va, amah ngeiin tawrh ve pawh a inhuam a ni. Sangliana nen an inhmuh hma ngeia ruahmanna kan siam a tha ang. Nang man i hmuh hmasak theiha inremsiamna chhuanlama i tihkhawtlai theih chuan, ka chingfel thei ang. Kan zawh hnuah Liantâwna chu a ka kan hup zui thei mai ang" tiin a hrilh a. Zoliana, hlauthawng reng renga khawsa chuan awih lo phal hek lo. Ephraime thu chu zawmin, Sangliana chu a bum chhuak ta chiah reng a nih kha.. Liantawna leh Ephraime ruahmanna a tihlawhtling lek fang tih hria se chuan a inah a awm ve mai mai ngei ang. Mahse, Ephraime rilruah Zoliana hi Liantawna ai chuan a sualin a rawih pawh a ruai zing zawk a. Nakin zelah Liantawna aiin Zoram tan leh ama tan ngei pawh a la hnawksak zawk ang tih a hmu thiam. Chuvanga hetianga thlim ta mai an ni. Nuam lo tihna erawh a nei ve deuh. Mahse, a inti pachang a, "Ephraime Zothanpuia hian mahni inthiam lohna hi a awmzia pawh a hre tur a ni lo" tiin. Zoi vanga a thinlung sak leh khauh tak te nem chakzia a hriat hian Zoi zawk chu a hmumawh lek lek thin. Mahse, a thlahlelin a kiangah awm reng se a duh bawk si a. 

Sangliana leh a thiante pahnih pawn Hotel lam chu an pan ve zel a. Thil awmzia chu a naute bulah a sawi mawlh mawlh a. Ngaihnawm an lo ti viau mai. Zoliana nen an inbakkaih deuh emaw thawm eng emaw an hriat ruala luhchilh nghal turin an room dawt chiaha awm turin a ti a. Mahse, an lut rual lo vang. Room book pangngai angin an ni chu an rawn lut ve chauh zawk dawn a ni. 

"Hre reng rawh u. Zoliana leh a hote bakah tualthattu hian Zoliana hi a rawn bitum ve thei. Venhim leh mahni inven a ngai a nih ber chu! Kan rin aiin a lo awlsam phian thei bawk. Engpawhnise, zaninah hian mi paruk râwng taka thattu hming zawng kan hre dawn khawp e" a ti sak sak a. A naute pawh an lo bu ve nghat nghat mai. Sangliana hian a hna a tlin em vangin ngaihsan leh el a hlawh ve bawk a. Amah mi invawng tak, zu leh ruihhlo laka fihlim lo ni bawk si chuan a tilang zahawm lo thei lo va. A nupui pawh hi veng khata nula hmel tha leh fela an sawi a ni hial reng a ni. Hotel chu an hmu phak ta tihah an ding a. Ke in an kal phei ta a. Garage-a car pakhat chu Zoliana car a ni tih a hre thei mai. A lo nghak ran tawh a ni ngei mai. Amahin a lut phawt a, manager hnenah thil awmzia sawiin Zoliana room sawi lam pan chuan a kal ta nghal a. Vanduaithlak takin he hotelah hian cctv an lo vuah lo hlauh mai. Hei vang hian Zoliana khan a book pawh a ni maithei. A awm ve tho, hotel lian lem lo, ks leh sumdawng ţawih ve tak tak thlen khawmna hmun a ni a. Han intibuai deuh hluai mah se, security lam an tha thung a. An chingfel thei mai zel a. Chuvangin Cctv manto taka han vuah chu tul an ti lo a ni ve thei. 

Room kawngka chu a kik kauh kauh a. Lut tura sawmna a hmuh rualin a lut nghal. Zoliana chu hahdam hmel zetin chairah a lo thu vang a. Thutna tur dang a awm tawh loh avangin khumah chuan a thu ve nghal a. He tih mek lai hian Ramdina leh Ruatpuia te chu hotelah an rawn lut ve mek. Room book nghalin, "Nakinah kan thiannu te an rawn kal dawn aw".. Tiin Receptionist an siai khum zauh a. An room tur lam an pan nghal. Sangliana khan a ring sual ve tlat! Zoliana chuan tumah thuihhruai a nei lo. Amah chauhin a kal. Nakinah tu emaw chu a rawn lang mahna le.. 

"Le.. Hun khawhral lo in i sawi nghal mai ang hmiang" Sangliana chuan a ti a. 

"Min va ring awm lo ve. I naute i rawn hruai tak" a ti ta mai. Sangliana a phu zawk. 

"Ka hruai lo" a ti tak naa a hmel hmaiah a thup seng bik lo a nih hmel, "Aa.. Thil dang vang a ni lo. Nangmah venhim nan zawk alawm ka hruai. Tualthattu hian a hming i puangzar dawn tih hre ta se, i sawi hma ngeiin i nunna chhat turin a lo kal i ring miah lo em ni? " a ti ta zaih a. Zoliana pawh chu a awm a nuam ta huai aniang. A thaw hawk a. 

"Aw le.. A tha alawm. A hmasa berin tualthattu ka sawi dawn chuan, khang document, Hmingzuala lo chhuichhuah tawh zing atang khan ka hming i paih bo phawt tur a ni" Zoliana chuan a ti ta a. Sangliana chuan a rin lawk sa a ni tho bawk a, mak a ti hran lo. 

"Tehreng mai. Lehkha kha chu nuaibo maithei a ni a. Document chu ka computerah a awm. Chu pawh folder biru takah.. Tualthattu kan man rualin i hming chu thai boin a awm nghal ang. Patling leh patling indawr kan ni a. Min ring thei ang" a lo ti nghet charh a. Beiseina mitmengin Zoliana chu a melh kal mai bawk. 

A chil lem khawlhin, "A hming chu Amos a ni. Chu chu a sumdawnna hming a ni.. " Zoliana chuan harsa tih hmel zet hian a ti a. Sangliana'n a lo ngaithla uluk kher mai. 

"Chuan, a hming pangngai chu" a ti sup a. 

Hetih mek lai hian an room bul chiaha Ramdina leh Ruatpuia te inring rana lo awm chu thawk leh khatah an mut a rawn chhuak ta em em a, han au chhuaka an ngaihthat lohna thu sawi tur pawhin thahrui an nei zo tawh lo. Chhuatah an tlu dun a. Engmah hre loin an muhil bawrh bawrh mai. 

"A mizo hming chu Zothanpuia a ni a. A hnam dang hming chu a pa hnam angin Ephraime a ni. " Zoliana chuan a ti ta a. Sangliana a vir zawk. 

"Ka rin ang chiah. Min mawlhtu lak kianin a awm ta. I mi sawi chu Pu Liantawna makpa ni mai tur, Zomuansangi pasal tur saw tiraw? " phur em em hian a ti ta a. Zoliana chuan buk nghut pahin, " Mahse, Zomuansangi pawh saw a kidnapp tih i hre lo tiraw? I hriat miah lova Liantawna buai theihzia leh amah Zoi ngei pawh a rilru hahzia saw" a ti leh ta zel a. Chu zawng a beisei loh lam thil a ni. 

"Mahse, Zoi sawn… " a tih mek laiin kawngka chu an rawn kik a. A phawk hrâ mai. Zoliana chuan, "Room service a nih chu. In tur ka chah alawm. Harhfima ka paltlang theih ka rin loh vangin" a lo ti awlsam èt a. Kawngka chu a va hawnsak nghal. Mahse, a tawlh hnung dãwrh a. Hlau em em niawm takin a petek a, "Min pui rawh" tiin Sangliana chu a va bawh ta mai a. In chhunga lo lut palian tak, a dum veka inthuam lukhum khum chu tu nge a nih Sangliana'n a hre chiang kher mai. Hamhaih miah lohin a silai phawrhin, "Che tawh suh" a ti nghal ţhat. A naute rawn lang miah lo chu mak a ti ru hle. Mahse, chutiang ngaihtuah hman a ni tawh lo. Manager be turin Zoliana chu a tir nghal a. 

Chu pa sang deuh chuan a rawn hnaih hret hret. "Che tawh suh, i ban kha chunglamah phar bawk la" a ti leh tuar. A ngai pawimawh tehchiam lo nge a che chang eih lo. Chutah a lukhum chu phawkin, a khi suk a. A mitmeng erawh hlauhawm tak a ni. 

"Ani kha min pe la, himdamin i chhuak ang" tiin Zoliana chu a kawk a. Sangliana chuan a thu hriat chu a hriatsual emaw a ti hial.. Chutiang em ema mihring zâm lo chu a la hmachhawn ngai tlat lo a ni. 

"Nang hi mi paruk i thah vanga man i ni. A chiang em? " tiin hnai set sawtah a silai chuan a tin ta a. Hlau hmel emaw chiâi hmel emaw a pu eih lo. Zoliana lah chu manager biak chu sawi loh bang kil lamah a tawmim tlat.. Lemchan zawng a lo thiam hle a ni e. 

Sangliana'n Office lam phone tuma a hmaa ding melh reng chunga a phone a lak chhuak lai chuan, a hriat hman rual loh khawpa rangin chu pa chuan a ban a rawn vai fua a. A kun zui nghal avangin Sangliana silai hmehper chuan bang a va deng dawt. Mahse, chu chu Sangliana kut chetna hnuhnung ber a ni ta. A hrawk atang chuan thisen hi a rawn khawh chhuak a ni ber mai. A chemte ken hriam zet hmangin Sangliana hrawkah tak a va zai thler chu niin.. A awk rawp a. A hrawk thler lai chu a kut pahniha hup chungin a thaw hrâwih hrâwih a. Meng sen rúm chungin a hmaa ding chu a han melh ţãwk ţãwk a. Chu pa chu rawn thu hniamin, "Ka tih ngei a ngai si a ni" tih chauh a sawi. Sangliana pawh irh ak ak chungin a chatthla zui ta nghal a. 

"Tikhan a fel mai em? A silai ri kha a ring hran lo naa, an hre tho ang. Kal vat ang" Zoliana chuan a ti a. A phi sek mai. 

"Ni mai lo ve. Tu nge tualthattu dik tak tih hi Amanda ngeiin a rawn chhui dawn asin. Chuvang chuan sulhnu ka hnutchhiah thei lo. Min hrethiam rawh" tiin Sangliana silai kha a lo hum ran tawh a, chu chuan Zoliana chaldarah chuan leh pawh tih hman rual lohin a kap ta a. A hamhaih leh hlauhthawn tak tak hmaa thah kha a felfai a ti zawk aniang e. Silai chu Sangliana a humtir leh a. A chemte thisen kai nuan chu Zoliana kutah a dah a, a humtir leh ta bawk. Sangliana chu a dap leh te tê a. Chutih lai chuan kawngka chu an rawn kik nasa tawh mai. Hmanhmawh a ngai tih a hai lo. Sangliana phone leh Zoliana phone chu akin khum piaha tukverh chu a hawng a. A chhuak zui ta a. A khar leh rualin kawngka chu an rawn nèk hawng ve chiah. An thil hmuh avang chuan an rak ţeng ţung mai. Police pahnih erawh an la mutui angreng viau. Tukverh bul bangah chuan eng emaw chen a beh hnuah an rak thawm karah chuan septic tank pipe thlawp zaih chuan lei lam panin a tawlh thla ta a. Hotel hungna thirlen chu lawn liam lehin Hotel thlang ramhnuai deuh ruihah chuan rei tawk fang a awm a. Police thawm leh reporter thawm a hriat hnuah thawm nei hauh loin hotel atanga mel khat vel bawra a motor dahna lam a pan ta a. Hotel thlang kawng rualrem lo zeta kal a nih avangin tumah a tawk lo. 

Sangliana chhungten chanchin an hriat ve meuh chuan an phili buaiin tap thawm nen an ri nghal nuai nuai a. Thenawm khawvengte rawn lang ve nghalin, mipui pawh an pungkhawm chak kher mai. In singsa turin thalai an rawn kal nghal hum hum bawk a. Mizo nih a nuam thin e. Thalai rual zingah chuan mut kawr nena la inthuam, mut chhuah hmel tak, palian zet chu tuman an lo chîk lem lo va, veng chhung a lian bawk a, inhriat sen a lo har bawk nen. Chu pa chuan, Sangliana room lam chu a singsa ve a. A laptop chu, "Pawimawh te a awm takin.. A bo palh ang" tiin in chung lamah a keng chho a. Sangliana nupui bulah, "Hei hi document pawimawh te a awm awm sia. A bo a hlauhawm em mai. Khaw nge ka dah ang? " tiin a zawt a. Ani lah lungchhe vankai hamhaih tawh bawk si chuan, "Ka pa te roomah sawn va dah rih mai rawh" a lo ti mai a. Sangliana pate roomah chuan a luhpui a. Kawngka kalh lem loin Sangliana pate bathroomah a luhpui a. Folder chi hrang hrang chu hawng kualin a duh ber a la hmu thei lo. A beidawng hle. A tawpa tawpah an rawn hmu ang tih a hlau ve bawk nen.. Sangliana pa kawrchung hluihlawn tawh niawm takah laptop chu a fun a. Tukverh atangin a paihchhuak ta a. Room atanga a chhuak chu lo hmu pawh nise tuman an notice kher in a rinawm loh. An buai tlang em a ni. Rei vak lo thalai bula a chettlat hnuah a chhuak zauh a. Sangliana nute room zawnah chuan kal pheiin, a laptop theh thlak chu a zuk hmu nghal a. Rang taka lain kawr chung chu a ha a, laptop chu a hnungah a kekawr kawngah a zep ta a. A motor dahna a thlen chuan inthlak leh kher tawh loin ramhnuai lam a pan ta vang vang a. 

Zing dar 3 a ri ta. Zoi chu a mu meng kar a. Hlauhna hian a thauah a man a. A khur der der reng mai. Hector lah chu zan dang ang lo takin thawm a nei duh reng reng lo va. Eng emaw ni a hriat ve ni. Ral hla taka motor tlan thawm a hriat chuan a thu hlawl a. A beng a chhi ngun takzet. Chu thawm chu a lo hnai zel a. An in bulah a ding ta. Tukverh atangin a va thlir a. Ephraime motor ngei a ni tih a hriat hnu chuan a phun sep. Hmanhmawh takin kawngka a va hawng a. Zawi muangin a rawn pen lut ta a. Mut kawr nen a nih avang chuan Zoi chuan mak a lo ti nasa mai a. Mahse, zawhna zawh chi a ni lo tih a hrethiam ve aniang. Ngawi rengin a lo dawngsawng ve tawp. Ephraime chuan a laptop ken luh chu hawng lehin a screen chu a lo keh deuh a. Mahse, a software lam a la chhe lo hlauh. Laptop tha tak a ni ngei ang. Sangliana folder thuhruk chu a zawng leh ta ngat ngat a. Zoi'n coffee tak ngek ngawk a lo siamsak a. Lawmthu pawh a hrilh chuang lo. A thaw hawk a. A hmu ta. Ni e, Smuggler ho hming intlar thla duat awmna list chu. Rang takin pendrivein chu folder chu a la a. A laptopah a thun nghal. Sangliana laptop erawh a dah tha a. Nakinah a tana pawimawh a la awm mahna le. A zo ta bawk a. Hahdam hmel zetin, "Kan him ta" a ti thawp sup a. 

"Eng nge thleng? " Zoi'n a tih chuan, "News en rawh" a lo ti a. Zoi'n a en ta vat. A hmui a hup tawp. Ephraime chu a va melh leh thin. Ani lah a ngawi run tawh bawk si. 

"An pahnihin maw? Ti nge an pahnih kherin" a ti ta chiam a. 

"A ţul tlat a ni. Zoliana kha tualthattu anga an ngaih a ngai alawm" a lo ti a. 

"Mahse, ngai ta lo se" 

"An ngai ngei ang. Zoliana kutze thla an hmu dawn a" 

"Tichuan, ka pa pawh a him em? " 

"Aw.. I pa mai ni lo sumdawnnaa inhnamhnawih zawng zawng pawh an him" a tih lai chuan a hmel chu a rum sawt a. Zoi chuan a hrethiam lo. 

"Kan tlanbo dawn lo tihna em ni? " inthlahrun hmel deuh hian a ti a. 

"Kan innei ang" a lo ti nghut. A nui hmel mawi zet chuan Zoi pawh a tihahdam sawt sawt mai. 

Zorama thil thleng rapthlak tak tak zinga rapthlak ber pawla sawi tur chu a thleng ta kha a nia. Inspector Sangliana, a hnaa tui leh inpe zo em em, case chinfel thei loh nei ngai lo kha a fam ta. Chutih rualin sumdawng lian leh hausa, an veng chhunga langsar leh mite zah kai, Pu Zoliana chu tualthattu a nih rualin ani pawh thah a ni ve ta bawk. Chu chu mi nawlpui ngaih dan a ni. Kha Hotela thawk te zawhna chhan dan chu a inang vek. Khang mi te bakah Ks pahnih leh a riahpuitu patling tawh te bak chu khami zan khan hotelah lut leh chhuak an awm lo tih a ni tawp. Anih chuan Pu Zoliana chuan rinhlelh a kai lo thei lo a ni. Lo dam khawchhuak tehreng mah se, buaina zakhua a hmachhawn dawn chauh zawk. Chu chu Ephriame khan a hriat avang leh ruahmanna dang a neih avangin a hmer tel lo thei lo a ni. Constable Ramdina leh Ruatpuia te chuan men ngaihna pawh an hre lo, an zakin hrehawm an ti a. An thin a rim ngawih ngawih bawk. Mahse, a ruala mutchhuaka muhil ta hmiah kha an inthlahdah vang lam aiin thil dang a inrawlh a nih a rinawm a. Chuvang chauha suspend tawk lo an la ni. Chhui chian tura an dah a ni. Forensic lamin an han chhui chian takah chuan damdawi chak tak, hnimhlum atan pawha an hman zen zen ngam loh, mutthilh hlen theihna a nih vanga hlauhawm tak chu khami te roomah khan kah luh a lo ni reng mai tih an hmu chhuak a. Chutiang a nih chuan Zoliana kha chu a ni thei lo. Zoliana thurualpui tu emaw an ni ngei ang le. Chu tu emaw chu zawn chhuah theihna chance erawh hniam tak a ni. 

Zoram khawvel chuan Sangliana a sún takzet a ni. Chutihrualin mi paruk ngawt thattu Pu Zoliana chu sún a nih rualin a nihna avanga makti an thahnem hle bawk. Jenny erawh chu kha thil thleng a hriat atang khan a roomah a la tawm char char a. Engmah a eiin a in duh hek lo. A chhungte chuan a chhan an zawt chhuak thei lo. 

"Engtin nge hetang hi a nih theih? Ephraime zawk asin man tur.. Ani khan alawm that" tiin a phun mawlh mawlh a. Mahse, a phun thawm hria an awm hauh lo. Lawmsanga call pawh a chhang duh lo va, a awm tawp a ni ber. A pa thattu an han hre ta chêng a! A lawm miah si lo. Ephriame ni zawk se a duhna chuan a phur a tirit zual a. Zoi vanneihna chuan a ti â lo chauh a ni. A mipa duh leh atchilh kha Zomuani'n a neihsak dawn ta. Chumi hmaa hremna a hmuh kha a lo ring a, a lo beisei bawk asin.. Tunah chuan a tawp ta vek mai. 

Sangliana te thih atanga kar khatnaah chiah Zomuansangi leh Ephraime Zothanpuia te chu an in khawhar takah Pastorin a kutsuihtir ta a. Thawmhnaw simple tak ve ve hain, Zoi te chhungkua leh Pu Thanliana te chhungkua nen chu inneihna chu an hmang ta. An hlim ve tho mai. Zoi mawlh a lawmpuiawm.. A hmelah nui hmel a chamban reng a vangin. 

An ineih zanah Ephraime chu Pu Liantawna, a puzawn ni ta nen tuikhuah lamah an inzui phei a. Muk takin an titi mek a ni. 

"Bansan la.. Kei pawn hnathawh tur ka nei tihna a ni mai. Khang smuggler te kha ka chhui dawn a ni" Ephraime chuan a ti a. 

"Bansan ka tum thu nimimah ka nau te pawh ka hrilh tawh e.. I duh ang ngeiin ka kawng chu ka thianfai ta vek e" a lo ti ve a. 

"A that chu. Sangliana ka zahna leh a tana ka tihtheih tawk atan a chhui zawh loh leh hremna a pek hman loh te chu keiman ka'n thenfaisak ange.. " a ti nghet charh a. A inringtawk hle tih a lang. 

Lawi that zan an mut dunnaah, "Zo, honeymoon chu ka nu nena kan inah aw niang" a ti sar sar a. Zoi chuan hlim zetin, "Lutuk. I nu nena in chanchin pawh hriat ka phu ve tawh tiraw? " tiin a nèk deuh salh salh a. Ephraime chuan, "Chumi hmain" tih pahin a rawn fâwp a. Nupa an nih ang takin nupa nun chu hlim takin an hmang dun a. 

An zawh hnuah Ephraime chuan zawi tè tèin a nupui bulah a nu leh pa intawn dan leh, a nu thih hnua a nun dan te chu zep nei hauh loin a hrilh ta vek a. A sawi zawh meuh chuan zing dar 4 a ri thuak tawh a ni. Mahse, a nupui chuan a ning hauh lo. Khawvar dawn tawh lamah inkuah rialin an muhil ve ta sâk sâk a. 

DGP Saidingliana hmaa thu hmeichhia chu tumruh hmel takin a hawi lah a. A mitmeng pawh a hriam hraih mai. A naupangchhe zawk zawk tawh lo tih erawh a lang. 

"I duhthlanna a nia. I thu. Mahse, tlangzarh erawh ka remti lo, a tawpah lo chuan" DGP chuan a ti a. 

Chu hmeichhia chu buk nghat pahin, "Sir, ka tiam a che. Tualthattu dik tak ka hmuh hunah chauh ka tlangau ang" a ti vawt raih a. Thu tam sawi tawh loin a chhuak zui nghal. 

DGP chuan a phone hmetin tu emaw a call zui a. 

"Sir, Amanda inrawlh a tum tlat mai. He hmeichhia hian kan sumdawnna hi a zung nen lam a rawn phoro dawn tih ka chiang a nia. Tualthattu leh sumdawnna hi a inkaihhnawih vek si a" a ti charh charh a. A rilru a hah hmel hle. 

Lehlam ami chuan, "Ani pawh kan dahthattir mai a ngai dawn anih chu" a rawn ti hul hak a. 

Zoi leh Ephraime te honeymoon hmang erawh an hlim tawpkhawk ti ila, kan sawi uar kher lo vang. Ephraime pawn chutianga hlimna chu a nu a bula a awm lai chauh khan a hrethiam thin. Tunah erawh a kianga ding hmeichhia a awm tawh a. Engkim chu a tha a, a pangngai vek a ni. Mahse, hei erawh a hrereng, a sulhnu hnutchhiah tawh leh a mi thahte thisen phuba khan engtikah emaw a la rawn nagching dawn tih hi.. Mahse, chu hun avang chuan a intilungngai duh lo. A theih anga tam Zoi tan hlimna thlen a duh a ni. 

Zoi a mutthilh sâk sâk laiin a pu zawnin a rawn call a. 

"I va laklawh thin ve" a ti nghut a. Room chu chhuahsanin bathlar zau lo teah chuan a ding a. 

"A pawimawh alawm. Amanda inrawlh a tum. Tualthahna bakah sumdawnna thlengin" a rawn ti nghal thâwr a. Ephraime chuan vana arsi pe tuarh chu thlirin, a nui lui sak a. 

"Chuti chu Amanda nen kan inlungrual thei dawn anih chu.. Keimah ngeiin ka la hmachhawn dawn nia" a ti fiah kâk a. Chu a beiseina chu a tak ramah chang thei tak ang maw. 

"Zothanpui" a hnunga rawn kuahtu a nupui kutzungtang sei sal chu vuanin a hum nghet hle a. 

"Ka ta i ni hi ka lawm a ni.. Pathian thilpek zinga a tha ber dawttu chu nang hi i ni" Ral hla tak thlir chung chuan a ti sup a. 

"Tu nge a pakhatna chu? " lungawi vak lo hian Zoi chuan a ti a. 

"Ka nu" a lo ti nghet charh. Zoi hlim nui ri chu a mawi kher mai. 

A tawp ta. 

(Ngaihtuah zawm tur in ngah mang e 😂😂