Escape 23

ESCAPE.. (23) 

Ziaktu: Toni Rãlte

Pu Liantawna te leh Pu Thanliana te pawn Ephraime inhliam dan te an lo hre ve tawh a. Rawn kan duh viau mah se, a awmna lai an hre si lo. Ephraime lahin a hrilh duh bik si lo. Chanchin inzawt tawn reng thoin an awm ve tawp tawp mai a ni. 

Zing ni chhuak a kang tha bawk a, boruak pawh a vawt lam aiin a lum lam a pawl mah. Zoi pawh eirel buatsaihin a che mial mial a. Jenny leh Ephraime erawh an la mu tui viau a nih hmel. Kaih thawh a tum lem lo. Jenny chu enthlak dan vak pawh awmin a hre lem lo. A duh ang leh a tum angin engmah a hmuh chhuah a ring lo hul hual a ni. Chaw chhum a siam laiin Jenny chu a rawn tho a. 

"Awii, min kaihthawh tur alawm.. A zia lo e" a rawn ti nghal bawrh bawrh a. 

"A ho em mai, i mutui bawk em? " Zoi'n a lo ti vat. 

"Tui tawp. Mut than lohna mahnise, ka mu nghet bawk sia" a lo ti siam siam a. 

Zoi chu puih a ngai lem lo bawk a. "Zo, in tuikhuah velah sawn ka va leng kual mai mai aw. Exer lak pah a ni mai" a ti a. Zoi pawh a lo bu nghat mai. Jenny chu a chhuak ta a. Zoi pawn Ephraime thingpui siam sakin roomah a luhpui a. Ani pawh a lo harh ve chiah ni tur a ni. Harsa tih hmel deuh hian a rawn tho a, Zoi'n a va puk vat. 

"Khaw nge a kal? " a lo ti nghal a. 

"Tuikhuah lamah" a lo ti ve mai a. 

"Chelh leh rawh. A duh ang a hmuh hma chu a bei ang. Kei nin a hlawhchham hmel kan lo thlir ang" Nuam tih hmel zet hian Ephraime chuan a lo ti a. 

"Nizan kha chuan engmah a ti lo a niang. Thawm pawh ka hre lo" Zoi'n a lo ti a. 

"I birúkna pindan kha a hmu chhuak" Ephraimean a tih chuan, Zoi a kang awk. 

Meng phawk zetin, "Engtin? A va mak ve! " a ti hliai a. 

"A tum em a, tin, a mawl hauh lo bawk. Mahse, lungngai suh. Tihian beiseina siamsak ila, a phur ve a, a tha alawm. A hlawhtling tluantling dawn chuang lo" a lo ti awlsam leh êt a. Zoi erawh a hlauthawng tho mai. Hmeichhia tih takah. A awm ve tho mai. Ephraime erawh a hah a dam hmel hle. Thingpui chu tui tih hmel zetin a in khulh khulh a. Zoi pawh a chhuak leh tawh. 

Jenny pawh a huai kual leh nasa. Eng nge a zawn a hre lo va, mahse, eng emaw hmuh a beisei si. Tuikhuah chu a thlir vang vang a. Zan lama a thil hmuhchhuah kha a ngaihtuah let a. Tu emaw birúkna atana duan zawng a ni ngei ang a. Tu nge Ephraime hian a thuhrúk tak ang? Zoi hi em ni? Mahse, langsar takin an inzui ta bawk sia. A hmaa a bo hmasak zawk khan a lo thukru zawk em ni ang? Emaw tu emaw tak a tualthahna kaihhnawihpui a thukru zawk? A rilru a buai ve viau. A chang leh Ephraime hian tualthat lo ta se, ani chu a hlawhchham tihna a ni dawn a. Chutiang hun a thlen chuan Lawmsanga a nei tawh mai ang chu. Ner sak chungin in lam a hawi a, zawi muangin a phei ta chhet chhet a. Tukthuan a lo peih deuh thuak tawh a. A han pui ve lawp lawp bawk a. Ephraime pawh a rawn tho chhuak ve peih e.. 

"Jen, zanin pawh riak law law la, weekend chu kan bulah hmang la, khawpui ri bengchheng deuh kara awm chu a hahthlak awm em mai" Zoi chuan a ti siam siam a. Jenny chuan, "Mahse, ka chhungte hi an khirh ve zêk zel a. Min hrilhsak la" a ti ta chiah a. Cham khawmuan chu a hnial hauh lo tih a lang reng. Ni e, a duh anga hmanraw tha a la hmu chhuak tlat lo a ni. 

"Tehreng, ka lo bia ang. Mahse, i nu number ka save tawh lo ania" Zoi chuan a lo ti vat. 

Jenny chuan Ephraime melh chungin, "Nizan lam te i mu tha thei maw? Rin aiin kei pawh ka mu tui a" a ti sap a. 

"Mu tha khawp mai. Zoi zawk hi zan laiah khan eng nge a va tih ni.. Ka umzui thei si lo va, A Chhuak tlatin ka hria" Ephraime chuan a lo ti a. 

Jenny chuan a makti hmel chu a thup thei meuh lo a ni e. Zoi lam hawiin, "Eng nge zan laiah te i tih a? " a ti hú a. Zoi lah mawl hek suh.. 

"Thawm ka hria a. Ka va enfiah mawle" a lo ti mai a. Jenny hmelah chuan ngaihthat lohna a inlar nasa ngang mai. Chaw pawh a ei mumal meuh lo. 

"Eng thawm nge? Pawn lamah maw? " a ti leh a. A aw khur chu thup a tum nasa kher mai. 

"Aih, in chhungah. Mahse, engmah a lo ni hran lo va" Zoi chuan a lo ti sam êt a. Jenny pawh thaw huai hmel a pu. 

Eikhamah an han che sang sang a. Tihtur em em awm hek lo. "In lehkhabu hi ka'n chhiar zo vek ange" tiin Jenny chu study roomah a inkhung a. Zoi erawh Ephraime a tha rih bawk a. Pangpar chi thenkhat, Ephraimean ramhnuaia a lak ho te chu pot siamin a phun bakah a ching hlawm a. An pangpar kawlsa, Saron buk zualpui te chu a cut bawk a. Nula awmna in a ni tih a hriat ve tawh riau. A hma kha chuan gate hrawl pui leh in mal ding kha a ni deuh tawp a. In hmalama Saron kung chu a cheimawina awmchhun a ni deuh mai. Tunah erawh Zoi chuan chu aia nuama siam a tum ve tlat a. Bakah chhunah tihtur a nei lo thei lutuk a, tihtur insiamchawp a ching thar a, zanah pawh a muttui phah ve a ni. Ni a sa deuh bawk a, a biang chu a tai têk mai. 

Hetih lai vek hian Sangliana chu a mi rinhlelh te profile leh phone call record en felin a buai angreng viau mai a. Zoliana hming chu a langsar leh viau mai. A chhan pawh Sapliana nen khan Sapliana thih hmain vawi hnih lai an inbia a. Sapliana phone kha bo mah se; Zoliana phone bo hek lo. A hma lamin an inbiakna hmuh tur a awm lo. A nih chuan a thih dawn aruaiah engvangin nge Zoliana nen an inbiak tak ang? Tin, Pu Liantawna pawh Zoliana dawtah a awm. Sapliana nen hmaichhana sumdawnna kawnga inbe hnuhnungber an ni miau a. Kha tah khan eng thu chiah nge an sawi hriat a ni si lo. Tin, mak ve tak pakhat chu Jerome kha Sangliana'n a zuk kawmnaah an pu sumdawnna dik tak kha a lo hre reng reng lo mai a. A hriat miah loin Pu Zaia khan a lo hmang tangkai mai mai a ni. A sumdawnna lairil kha Jerome hian a hre phak teuh lo. Mahse, sawrkar phal loh eng emaw chu a ti a nih rinna a nei tho. A sawmna a lo hnar lo kha a inchhir takzet a ni. Amah Pu Zaia lah a thi leh roh bawk si! A nu a ngaihtuah chang phei chuan tlan chhuah mai te a tum ut ut fô mai. Sangliana chuan a khawngaih riau a, bakah tangkaina la neiin a ring a, bail theih dan tur a ngaihvenpui nghe nghe. Mahse, tun tut tutah chuan engkim tihfel theih ni hek lo, nghah ve phawt a ngai dawn a ni. 

"Aw.. Pu Zolian, i lo kal tawh maw? Thu rawh. " nelawm takin Pu Zoliana lo kal chu a lo dawngsawng a. Pu Zoliana hmel chu a nelawm fahran loh hle. Ni e, Pu Rualkhuma thih atangin Police hmel a hmuh fo a ngai a, police ngainat tawh lo sa nak alaiin,. Túm búr chungin, "Eng thil chiah nge maw in la duh le? " a ti ban chhalh a. 

Sangliana chuan, "Ni e, kan tibuai fo che hi hrehawm ka ti ve tho. Mahse, Hmingzuala file ka haina lamah thil tam tak ka hmuhchhuah belh a. I ngaih aia nasa daih kha. I hming hi hmun langsar laiah a awm lo thei lo a ni.. " a lo ti duah a. 

"A eng thil tehchai chu nge? " a lo ti leh hmuk. 

"In sumdawnna hi mawle" a mita melh kal chung chuan a lo ti ve hmak. Pu Zoliana chuan a heh a liak zauh a, a mitmeng erawh thup a tum nasa khawp mai. Police tan erawh hai thu a awm lo va. 

"Eng sumdawnna maw? " a ti hul hak a. 

"Sawrkar phal loh sumdawnna tenawm tak hi mawle.. " a lo ti chang fak. Sangliana hmel chu a rum sâwt khawp mai. 

"Chutiang sumdawnna ka khawih ve ngai lo, i hre sual aniang. Hmingzuala i tih pawh chu ka hre lo" a lo ti vat a. A aw erawh a rum lam aiin khawngaihthla a la mah tawh zawk. 

"Chu tah tak chuan min pui dawn a ni" a lo ti daih! Pu Zoliana a bo tulh tulh. Sangliana chuan a rawn hnaih deuh a. 

"He khawpuia i sumdawnpui leh i mi ep te ka hai chhuak vek tawh. Ni lo, Hminga khan a hai chhuak vek tawh. Chu thil chu hriain tu emaw chuan tualthattu ruaiin Hminga nunna kha a laktir ta a ni. Chumi chu min zawnchhuahpui dawn chuan, i sumdawnna hi ka theihnghilh ang" a ti zawi sup sup a. Zoliana a meng phar viau mai. A ngaihtuahna erawh a fim em em tho. 

"Ka hre ve hauh lo mai. Chuan, eng sumdawnna nge i sawi ka la hrethiam chuang lo" a la ti ţâlh a. Sangliana thinin a diar ta lo nge, "I ralthuam tawlhruk hi kan hai reng reng lo. Sapliana te nen pawh sumdawnna huang khatah in tla za a, a thih dawn pawn vawi hnih lai a rawn bia che. Chu chu engtia ka hriat nge min zawt suh. Kha tah khan eng nge a rawn sawi? I puihna a ngen a ni thei ang em? Emaw nang leh ani khan buaina neiin, nang hian Pu Rualkhuma i thahtir ang khan tu emaw ruaiin i thahtir ve leh mai zawk? " a ti ta hmiah hmiah a. Zoliana insanmar nasatzia a hre lo. 

"Enteh, i rin thu leh zeldin thubawl mai mai ngaithla tur chuan ka hun hlu tak hi a uiawm i ti ve lo maw? " Zoliana chuan a lo ti chang rút a. 

"Engmah ka rin thu a awm lo ve. Tunah hian Aizawla sumdawng lian zual pahnih nang leh Pu Liantawna in la dam. Mi dang nangmahni ter pha tur ho erawh an chatuan hmuna nawr liam an ni tawh. Mi dang inhnamhnawih vete hi chu in hnuai ami te vek an ni tawh. In thu hmu lovin engmah an ti lo vang. I ralthuam tawlhruk dan, i dah thuhrukna thlenga sawi turin min duh em ni? I himna tur ngaihtuah chungin leh tualthattu zawn chhuah kawnga min puih theih dan tur ka ngaihtuah mek laiin nang hi lo inla innocent khanglang suh" Sangliana awki chu nelawm loh tak a ni tawh. Zoliana pawh ngawi rengin a inngaihtuah ta a. A sawi kha a dik vek si. Liantawna nen sumdawnna lian tham khawih zingah a dam awmchhun an ni tawh. Thudik sawi ta se, Pu Rualkhuma thihna vang khan kutkawl a pumpelh bik dawn hauh si lo, Chutih rualin engkimah Sangliana hian a tlan khalh vek tawh si. Eng chin atang khan nge a reh bun tak ang? Amosa biakna hun a nei tawh bawk si lo. Thudik sawi lo se, amah man theihna tur chhuanlam an nei tha ropui bawk si.. Mahse, Amosa chu man ta se, Tu nge a ruaitu a sawi a ngai ngei ang a. Kawh rawn a ni tho ang. Pu Rualkhuma bak kha a thahtir miah lo asin le.. Mi dang kha tu tirh ve ni ta ang. Pu Zaia kha chu rin dan a nei thiam mai a. Mahse, chu pawh sawi chhuah chi a ni chuang lo. Sumdawng lian Zoliana a talbuai ve ta tlat mai. 

"Pu Liantawna pawh ko ve la mawle, eng ah nge kei chauh? " a ti chuai raih a. 

"Ka ko dawn alawm. Mahse, a mala kawm ve ve che u ka duh tlat si a ni. Le.. Tunah chuan Pu Sapliana'n a rawn biak chhan che kha ka hre duh? " tlema nem deuh zawk hian Sangliana chuan a ti ta a. 

A chil a lem a, tuisik a in leh phawt. 

"Aw le, nie, min hum dawn phawt chuan thudik ka sawi ang. Pu Sapliana khan tualthattu zawnsak turin min rawn ngen. Mi thah a duh a ni" a ti ta a. 

"Engvanga nang kher lo zawt che nge a nih? " 

"Ka hre nang. I hriat angin Pu Rualkhuma kha ka thahtir angah mi nawlpui hian an ngai vek. A chhan kan hriat kha. Kha vang khan min chhimbudawi kual a tum a. Keiin ka hriat loh thu ka lo hrilh" Zoliana chuan a ti mai a. 

Sangliana chuan a awih hreh angreng. 

"A nih a mi thah tum chu tu nge a nih i hriatpui em? " 

"A sawi hauh lo. Ka tana hnawksak tak a ni a ti mai a" a lo ti a. 

"Chuan, thil pakhat i thianpa nia i sawi kha kan be tlang thei tawh miah lo va. Enh nge a awmzia? " Sangliana chuan a ti a. 

"In ni ve tho maw? Min rawn contact ta miah si lo va. Kei pawn ka be thei der lo mai" a lo ti khauh a. Sangliana a dang titih.mahs, tan la thar lehin, "Kha pa kha kei chuan hmuh leh ka duh a ni. A address min pe ta che" a ti ta a. 

Zoliana thlan fim a bawl ta ţak ţak mai. 

"A.. A address hi chiangkuang takin ka hre bik tlat lo a ni. A changin Silcharah, a changin Gauhati-ah a awm a. Min rawn biak phawt loh chuan ka sawi chiang fak ngam lo" a ti ta ringawt a. Sangliana beiseina a rawn thar tha leh ta. 

"Ngawi teh, Dawt i sawi a ni. I mitmengah a lang reng. Thudik insawitir dan ka thiam ania. Keimah ngeiin sawrkar phal loh sumdawnna i khawih vangin FIR ka thehlut thei ania. Finfiahna lah ka nei chiang ropui si.. In thuihhruai leh in sangawizawnpui te zawng zawng pawh ka man fai phiar mai ang. Ka hlau ve lo che u. Minister te nen inthlunzawm eng ang mah ula.. " a ti ta phiar phiar mai le. Zoliana a kimki chawih chawih mai. A khur thei hial. Sangliana hi mi namai a ni lo tih a hre chiang tawh tlat.. 

"Chutiang engmah ka hre lo. Ka sawi tur chin ka sawi tawh. Ka kal thei tawh ang em? " inti pachang hram hram chungin a ti khur dat dat a. Sangliana chuan lehpek a awm dawn tih hrereng chungin, "Tehreng mai. I ukil te pawh i lo be lawk dawn nia.. " a lo tihsan hmiah. Zoliana chhuah hnu chuan, an bula Constable lo awm ve Ramdina chuan, "Sir, a sen vek thei alawm le.. Kan dâwp deuh hlek lo va. A inpuang mai dawn asin" a ti a. 

Nui huah huah chungin, "Pu Liantâwna ka kawm leh phawt ang a. Tualthattu chu kan man thei mai ang" a lo ti a. 

Zoi pawh a biang sa hat hat vang chuan a ngaihtuahna atanga harh chhuakin a thiltih lai pawh a lo tizo tawh tih a hre nghal a. In chhungah lutin a biang leh chal bawr velte chu tuivawtin a dep a. A dai huai huai mai. A reh hle. An muhil ve ve mawni le a ti rilru a. Dar 2 bawr vel a ni tawh. Inbual hma a duh avangin pindanah lam a pan a. A inkalh lem loh vangin ngampa takin a hawng a, mahse, khuma a thil hmuh vang chuan a ding chawt. Ephraime chuan kawr a ha lo va, kekawrbul erawh a la ha ve, Ephraime taksa ruak kâng chungah chuan Jenny chu ruak vekin a lo thu a, a kap zawn vel chu a lo ti che nasa mai a. A va hmuh lai tak chuan an lo infawp mek.. Thawm nei lo va chhuah a duh tehlul nen, a phone ken lai chu a hriat miah lohin a thlauh chuai pek a! A bengchheng hle. An lo hawi nghal hâw reng a. Ephraimein Zoi a hmuh rual chuan Jenny chu nem sawn tumin a kuai vak a, a sirah a let thla hawl. Thawh tumin a inbeng kang a, a mal na vangin a tho mai thei si lo. Jenny erawh ngawi rengin khum bula a thawmhnaw chu a ha mial mial thung. Zoi chuan sawi tur reng reng a hre lo. A awm dan pawh chu a hrethiam lo, a bing mup mup a, a mang vek a ni ber mai. 

. "I hmuh ang kha a ni lo a nia" Ephraimein a tih mek lai chuan, Jenny chuan, "Zoi, kan tihpalh. Tih loh tawp tur kan lo ti a" a lo ti hmawk hmawk a. 

Ephraime chuan vin zetin, "Nang kha chhuak nghal rawh. Lo inrawlh suh" a ti tuar. 

Zoi rilru a rawn fim ţan chiah, "Ni lo ve. Keimah ka kal ang e.. Ani hi hetah awm zawk rawh se" a ti sep a. A hnungtawlh hrat bawk. Ephraime chu thaw deuh kâwk chungin khum tlangah chuan a thu thei hram. Zoi chu beidawn hmel zeta rawn melhin, "Ka sawi fiah thei" a ti tham ţuak a. 

Zoi erawh chuan a mittui khap per sak sak chungin, "Sawi fiah a ngai lo. Ka hmu vek alawm.. Kei hi bumin ka awm mek tih leh in hmanrua mai ka ni tih hi" a ti ta siah siah a. A khur hlawk hlawk bawk. 

Jenny chu Zoi bulah kalin, "Engkim hrilh che ka duh a. Mahse, ka ngam ngang lo a ni" a ti a. A kal hual vel a. Zoi tana a ngeiawm turzia leh tlawmthlak turzia chu aw.. 

Ephraime chuan lukham a hnek pawp. 

"Kha ramhuainu thusawi kha maw i awih zawk dawn? Eng nge a niha eng nge a tum tih chiang takin ka hrilh che kha. A thangah i awk mek a ni., Zoi" a ti hriam hraih a. Din a tum, a thei mai si lo, Khum bula Almira ring chung chuan a ding ve thei mai. Pen erawh a pen hleithei lo. 

"Nang pawn min bum lo bik em ni? Nang hian min nghaisa lo bik em ni? Ni e, ka hawn hi eng lai pawhin i duh a. Ka kal ang. " tih leh pindana luh a rual a. A bag lain a thawmhnaw a khung mawlh mawlh. Jenny erawh thutthleng seiah hmalam melhin confi zetin a thu ngil at mai. A thiltihin nghawng a neih nasatzia leh Zoi'n thup a neihzia a chiang tawh hle. Ephraime chu tunah hliam tuar mai a ni a, a tina thei rih dawn lo. Chuvang chuan Zoi hi a tihnat hmasak tur a ni. 

"Ka thusawi hi ngaithla ve phawt la mawle.. " Ephraimea'n a rawn tih hrâwk chuan, Zoi chuan melh kal chungin, "A bul ret atang khan min bum tawh. Tunah chuan ka tuar thei tawh lo" a ti fiah kâk a. Tumruh hmel a pu bawk. Chuti maia hneh theih chi a ni lo tih Ephraime chuan a hai lo. Mahse, Zoi kal bo chu a phal bik si lo. An inkarah sawi chhuak lo mah se, hmangaihna a alh tan ve hlep hlep tawh a, amah Ephraime ngei pawn hmalam hun suangtuahna tam tak a nei ve tawh kha a nia. Chutia vawi leh khata dâwt vanga a tawp vek chu a phal reng reng lo. Jenny chu a thin hnun taka vih tlang hrawih aia châk a nei awm lo ve. Thil thlen dan chu hetiang hi a ni. Zoi'n nuamti taka hna a thawh lai khan Jenny rilru verther tak chuan tum a lo nei sa ran a. Ephraime te room-a va lutin Ephraime muhil lai chu a va sawngbawl kual ta vel a. A rawn harh chuan Zoi a ni lo tih a hriat rualin Jenny chuan a rawn thutchilh nghal. A tak ram thlenpui lo mah se, Zoi hmuh atan chuan a nasa lam hret a ni. A inphelh ruak kúng mai bawk si a. Ephraime chuan nam sawn tumin a theihtawp a chhuah, a ke dinglam malpui na bawk nen, theihtawpa ţan lo khawh ve Jenny chu chuti maia awlsama chhuk tur chi a ni bik si lo. Jennyi'n Zoi'n in chhung a rawn lut tih a hriat rual khan a kun hniam a Eohraime chu a fawp ta a, a chung zawka awm leh thahrui hmang nasa thei zawk a nihna laiah Ephraime ka hupna tur tawkin a hmui kha a zuk fawp a ni. Fing verther ve tak chu a ni. 

"Zoi, i kal ang maw? Tu in nge min enkawl ang? " Ti chuai raihtu Ephraime hmel chu a va melh a. 

Khi sak chungin, "Kha nula duhawm leh zuanzang, fing fel tak i nei tawh alawm" a ti lar lar a. Elsen rawng a kai. 

"Engtin nge i hawn ang? " A lo tih leh chuan, a harh zawk. Tumah a la be reng reng hleinem. A pa a call nghal vat a. Mahse, a nu zawkin a lo la daih. 

"Police station-ah pa chu an ko a. Hei a phone a hnutchhiah a nih hi.. Eng nge ni ta? " a rawn ti a. 

"A motor a keng em? " 

"Keng e. Ngati nge? "

"Mama kha a awm em? Bolero khan min rawn hruai lawk dawn mawni.. Rawn haw lawk a ngai a. " a ti a. Engkim sawi chu a duh bik lo. 

"Mama chu Rih Dilah tukinah an zin daih alawm.. Keimah chiah ka awm. Kan nula te nen" a nu chuan a lo ti leh bawk si. Taxi ko dawn se, tumah hriat a nei lo. A thian thenkhat te sawm tur chu a hre maithei. Mahse, mi nazawngin he lai hmun an rawn hmu tur chu a ngaingam chiah bawk si lo. Jenny an hmu tel ngei ang a, zawhna a tam dawn lutuk tlat. Ephraime phei chu engvanga ramhnuaia khawsa nge a nih tih atanga intanin tualthattu a nihna thlengin a la pakai thei. Tihnat a nih tawh hnuah pawh hum a la duh hram hram chu a nia! Hmangaihna zet hi chu aw. 

Beidawng takin a thu hnawk a. Jenny chuan, "Pawi i tih loh chuan, ka car saw i hmang thei ang" a rawn ti ngam nia! He nu hi Ephraime sawi ang khan ramhuai hi a lo ni tak tak a ni lo maw le.. 

Ephraime a insum zo ta ngang lo nge, "Khawvel hmeichhia ka hriat tawhah i la zak thei loin i la nasa ber mai. Nang hi chhuak rawh. Kal bo vang vang rawh. Engkim thil thleng kha Zoi tihnat i duh vang leh kei min neihna tur atana i ruahman an nih kha.. Nemsawn che tumin theihtawp ka chhuah lo em ni? Ngawi tak rawh. Ka dam ang a, i lu hi ka la ang" a ti ta hmiah mai. 

Jenny chuan phawk zetin, "Awlsam takin mi i thah tur thu i sawi a maw? Nge i lo that tawh thin zawk" a ti ta hâ a. Zoi a lo thaw kâwk ringawt. 

Ephraime chu khuma thut leh pahin, "Tual lo that thin ta pawh ni ila, nang hian police i pun ngam ka ring lo. A chhan chu min khaihlum dawn sia, i tuar thei lo vang" a lo ti daih. Jenny zawhna chu a chhang miah lo, mahse, Jenny beisei tibo lo tawk velin a chhang thung. 

"Aw le.. Jen, engpawhnise, ka thian i ni a. I thiltih hi a dik lo tih nang pawn i hria. Khatiang khawpa ka laka ngaihdam dil tawh si chu i tihnawn ngam ka ring lo va, mahse, thang i lo kam mai mai a nih dawn hi.. Chuvang chuan, Ephraime nen kan sawi dun turah dah la, khawngaihin min hawnsan rawh" Zoi chuan a ti ta a. A tawngkam a fiahin a zahawm ru kher mai. Jenny pawn han chhan parat vak dan a hre tlat lo. 

'Haw tur chuan min duh tak tak maw? In pa hian tual a that thin tih report ta ila, engtin nge i ngaih ang,? ' a lo ti ve niah niah a. A zahzel thu ta deuh e. 

"A that lo miau sia lawm le.. I duh duh chu ti rawh. Finfiahna i neih phawt chuan kei thleng pawhin min mantir dawn nia" Zoi chu a huaisen siah siah kher mai. Jenny chu a ngei ve bawk êm a ni. Jenny heh a hil a, sawi tur a hre lo. A che fuh ta lo a ang riau. Zoi chu a hawn mai kha a lo ring a. A beisei angin engmah a kal leh ta si lo. Hlawhchham inti zetin a haw tau ta nghawng nghawng a. Ruahmanna erawh a la nei ru tho. 

"I fanu te inneihna tur chu a kal tluang bawk maw? " Sangliana chuan nelawm takin a ti a. Pu Liantawna pawh chuan, "Kal tluang ti ila, ka makpa tur a ramvahnaah savawm nen an inbei a, a inhliam hlauh mai a. Kan sawn maithei a ni" a lo ti ve luam a. 

"I hun ka khawhralsak lo ang che. Ka hriat duh chu Pu Sapliana thih hmaa in inhmuh khan eng nge in sawi dun le? " tiin a awka pawh a thutak ta deuh. 

Pu Liantâwna chuan, "Sumdawnna bansan ka tum thu ka sawi a. A nin a phal si lo va, rei ngial kan inhnial phah nghe nghe alawm" a tive mai a. 

"Ngati nge bansan i duh"? 

"Ka fanu vang mawle.. A fapa vangin tikhawp hian mualphona kan insiam tawn a, chutih lai kara lo la thawh dun reng kha nuam ka ti lo a ni" a ti a.

"A nih a phal ta si lo va. Bansan i tum lui tho em ni? " sangliana chuan a ti leh a. 

Pu Liantawna chuan, "Dik tak chuan Sapliana kha ka hlau a ni. A tawngkam leh mitmeng leh min vaukhanna te avang khan bansan loh ka tum tih ka sawi leh ta tho va. Mahse, tikhan ani kha a boral ta bawk si, a ai ka awh chhoh a ngaih phah ta a. Rinhlelh te pawh ka kai phah thei hial awm e" a ti ta duah a. 

"Ni e.. Rinhlelh i kai viau mai. Ani chu i chung chiah a nia, a hnuaia thawh rengte kha i lo ning ru viau thei tlat a tiraw? " tiin a han chhimbudawi a. 

"Chu lam chu ka ngaihtuah ngai loh lam daih a ni.. " a lo ti nghet charh. 

"Hmingzuala, Zoi nu u fapa kha i hria ang a, a thattu i hre duh em? " a ti thut a. Pu Liantawna a phâwk hle. 

"Tu nge? Min han hrilh vat teh. Hminga kher kha chu ka ui teh mai a nia" a lo ti sek sek. 

Nuih sak pahin, "In sumdawnpui tu emaw in tualthattu ruaiin a nunna a laksak ta a nih kha.. " a lo ti hmiah. Pu Liantawna bo deuh hu chu a hai lo. 

"Tu kan sumdawnpui maw? " a ti ta reng a. Sangliana chuan lehkha phek, hming leh an sumdawnna bungrua leh an hlèp zat inziahna list hi Pu Liantâwna chu va pein, "I laichin a ni bawk a. Kan inpui tawn thei reng ania" a ti bung vut a. Pu Liantâwna chu lehkha an chhiar chu a dáng sâwp sâwp a, a kut te chu a khur der der mai. 

"Khang kha i nau Hmingzuala chhui chhuah vek a ni a. Nang pawh i tel kha.. Khang thil a chhui tih hretu tu emaw chuan ngai thei loin tualthattu a ruai a, an that ta a ni.. Chu tu emaw chu rin dan emaw i nei em? " a ti leh sak sak a. 

"A.. Ih.. Aih, ka hre lo. Rin dan ka nei thiam lo. Ka rin ber Sapliana a thi tawh bawk si. Ani khan kan kawng daltu te dah that chu a kutah a dah a, engmah ka hriatpui ngai lo. Hriat tam loh kha a him zawk bawk a" a lo tih bah nak a. 

"A nih chuan he tualthattu chimawm zet hi nang pawn i hria tih ka hria. Pu Zaihmingliana kha motor accident vanga thi a ni lo tih nang pawn i hriat ka ring. Tin, Sapliana nen khan inthah in tum dun ve ve a, mahse, a che hmasa zawkah i ţang ta niin a lang" tiin a rin dan chu a au chhuahpui ta hmiah a. A sawi dik tih Pu Liantawna hmel hmaiah a lang ta. A hlim ru kher mai. 

Mahse, "Min puh thlu ngawt suh. Fiahna engmah i nei hek lo. Tumah ka ruai lo. Inrawlhna ka nei lo" a lo ti nasa. Sangliana erawh chuan a tum a tinghet bur mai. 

"Enteh, khang mi paruk te thattu kha ka man lo a nih chuan nangma tan thleng hian a la pawi thei dawn a nia. Heng in sumdawnnaa i aihnahphahpui te ngei hian hnunglam atangin an la bei thei che. Tualthat tura i mi rawih tawh ngei khan a la kap thei che a nia. Thudik i sawi anih chuan, ka hum hreh lo che.. Kan inpui tawn ka tih kha" Sangliana chuan a han ti leh charh charh a. Pu Liantawna rilru buaizia chu hmuh theih khawpin a lang a ni. Sangliana chuan hun pek hleka an duhthlanna ngeia inpuantir a duh vangin, "Tunah chuan haw phawt rawh. Va chawl hahdam la.. Inngaihtuah la.. Ukil te pawh be lawk ang che. Thudik in sawi duh si loh chuan in sumdawnna tenawm tak hi ka tlangzarh mai aniang chu" a ti ta a. 

"Chutin min man ngawt thei lo vang. Fiahna pawh i nei lo" ti eng ang mah se; lehkha phekah chuan engkim a chuang si. Pu Liantawna rilru a tawt kher mai. A haw kawngah Ephraime a call nghal. 

"Kan chhe ta vek mai" a ti nghal thâwr a. 

"Eng nge awmzia? " hahdam hmel zetin a rawn ti thung. 

"Ka fanu kha i venhim theih dawn chuan tlanbo mai ula ka duh a ni. Police lamin min inpuantir ngei dawn. Kei chauh ni lo Zoliana pawh" a ti nghal bawrh bawrh a. Thil thlen dan zawng zawng chu a sawi fai ta leng a. A hma lamin Zoliana hnen atangin chutiang ang thu chu a lo dawng zo ve chiah bawk a. Ephraime tan chuan a mak hran lo. A rilru erawh a chawl eih lo. Zoi lo thinrim ve zel bawk nen. A thaw ippik ve ber lai a ni awm e. 

Sangliana erawh tifuh inti zetin office a chhuahsan a. 

"Zoi, ka sawifiah thiam dan tawkin ka sawi tawh a. Sawifiah leh vak dan ka hre tawh lo a ni. Min rin loh chuan tih vak ngaihna ka hre lo" Ephraime chuan a ti dap dap a. Zoi erawh a inbual zawhah a mu tlat. Eirawng pawh a bawl du thak nang. 

"Duh ve lo la khatin in awm lo vang" tih chu a tanchhan a ni. 

"A nih duh ve ta ila, ka hnawtchhuak dawn mi? " pakhatin a lo ti ve thung. 

"A tawk. Engmah ka sawi peih lo. I duh leh ei rawng saw va inbawl mai rawh" a lo ti hlar a. A tira a thinrimna kha neih belh leh pawh tum se, an bo duak tawh. A chhan pawh a hre bik lo. 

"Ka ei bik lo mai ang. Ka ril a tam chuang lo. Chuan maw.. I ngaithla em? Ka dam vat a ngai. Min hre chhuak dawn a nia" a ti ta a. Zoi a rawn thu chhuak nghal awt. 

"Maw?! Tuin? Engtin? " zawhna a va ngah tak. 

"I pa leh Zoliana an khalh fal a. An sumdawnna an lo chhui chhuak vek tawh si a, chumi hmang chuan an ka antir an tum a ni. I nutapa Hmingzuala thihna atanga lo intan a ni zawk mah awm e. Sangliana nen thian tha tak an ni a ni lawm ni? " a ti a. Zãm hmel leh han hrehawm ti hmel a pu chuang lo. 

"Aw inthian tha e. Hminga hian a pui nasa alawm. Chuan, ka pa sumdawnna a hrechhuak maw? Chuan, chu chu engtin? " a helhhawlh nge ni a za sek mai. 

"Hminga khan i pa te leh mi dang sumdawn dan kha a lo chhui ru nasa a, hriat pawh a ngah. Chu tak chu a thihchhan a nih hmel.. I pate sumdawnpui pakhatin a nunna la turin min ruai ta a ni" a lo ti a. 

"Tu nge? " a lo ti zawi sap. 

"Pu Zoliana " a lo ti tawi tâk mai. 

"Chuan, amah bawk hi Pu Rualkhuma tana ruaitu che pawh tiraw? "

"Aw".. 

"A nih ka pa hian engtin nge tualthattu i ni tih a hriat chhuah theih? " a ti ta a. He zawhna hi a zawt har a lo ti tawh reng a. 

"A chhan chu i pa tan hna ka thawk ve tho alawm" tiin thudik a sawi ta hmiah. 

"Tu te nge? " a lo ti tuar. 

"Zoi" a ti dam thlup a. 

"Sawi rawh" a ţap par mai. 

"Ka thei lo" a lo ti thung. 

"Danglamna in awm lo a nih chu.. In pahnih hian mi tenawm in ni.. Mi tenawm" a ti hlaih hlaih a. Pakhat a lo ngawi reng thung. 

"Chuan, engtin nge ni dawn? " a ti leh hliai a. 

"Police lam chuan i pate chu vaukhanin, tualthattu an sawi chhuah chuan an sumdawnna vanga hremna an hmuh tur lakah an hum ang tih an sawi a. Kei chuan ka hming sawi turin ka ti ta a nih kha" Ephraime chuan a ti dam dap a. 

Zoi chuan pawr fe hian, "Engvangin nge i tih? Tirtu leh ruaitu che pawn an tuar ve ang chu.. Tichuan, an man che ang a, an khaihlum bawk ang che" a ti a. A insút zui hlap bawk. A lung a chhe thlawt a ni. 

"In ramah khaihlum a awm tak tak thei lo.. Mahse, ka damchhunga ka tan chu ka ring. Ka hreh lo. Ka eizawnna vanga lut tir ka nia. Mahse, ka sum lakluh zawng zawng kha nang leh ka pu te insem atan ka rochiah dawn che u a ni" a ti leh ta zel a. 

"Ephraime" a lo ti tuar. A mittui a tla zawih zawih bawk. 

"Lo kal hnai teh" a ti thawp sap a. Zoi a kal hnai ve mai. Khumah thu chung chuan a lo kuah vawng vawng a. 

"Hmeichhe tha tak i ni a. Tualthata eizawng thin nen chuan in khawvel a danglam a ni. I hlim tak tak dawn lo. Kei chu ka kal bo ang a, i pa a him bawk ang. Tichuan, pasal tha tak neiin chhungkua i lo dinpui dawn nia.. A tha em? Kei chu min uia min thlahleltu ber ka nu a awm tawh lo va, ka thiantha ber ka chân tawh bawk. Damchhan leh tur chuang ka nei tawh lo. Chuvang chuan ka tha" a ti sup sup a. A tawngkam te chu hnukulh lek lekin a ni a sawi ve ni. 

Zoi a inhnit faih faih. "Ka duh lo. Kawng a awm ang. Tlanbo mai ang. Mawh.. Hetiang ringawt chu ka thei lo" tiin a ţap hlawp hlawp a. Ephraime tan pawh thil dang han sawina chi ziazang a ni lo. Chumi zan chuan chaw pawh ei loin zankhuaa inkuah tlaivarin, an inhnial char char. Zing lam dar 3 bawr velah an muhil ve hram. 

A awma a lu nghata tui taka muhil sâk sâk hmeichhia lu chu a fâwp zauh a. A hma zawn chiah banga a nu Mary thlalak lian zet intar chu va melh ngawih ngawihin, "Ka tan engkim ka ti tawh thin a. Keima tan chauh. Tun ţum erawh he hmeichhe tan hian ka chet a ngai a ni. Min mamawh ngawih ngawihtu hi hi ka phatsan thei lo. Ka nu, vawi khat chauh thisen ka chhuah leh min phalsak rawh aw" Tiin a phun sup a. A maimichhing ta vang vang a. 

(Next-ah a tawp dawn aw.