Escape 22

ESCAPE… (22)

Ziaktu: Toni Râlte

(Adds min clicks sak hram hram thintu te chungah ka lawm em em a ni 😊

"Eng thil tehlul nge i tih a? Ka duh aiin i huangtau ta mah mah e" Ephraime aw chu chang beng bawng tak a ni. Zoi chuan chhan ngaihna a hre bik lo nge a kut tin a sik niap niap a. A kun daih. 

"I pa kha hrilh a tul viau ani ang chu maw.. In pafa thiltum hi hre lo turah min ngai em ni? Mawh" a ti rum leh nghut nghut a. Pu Liantawna hnenah intiamkamna nei lo nise zawng a pa thurúk nen lam a puang phiar maithei a ni. Mahse, mipain thu a tiam tawh a, chuti maia sút chu a duh bik lo a ni. 

"Ka pa chuan tumah a hrilh dawn lo" Zoi chuan a ti sap a. 

"Ni e, a hrilh lo vang. Mahse, a hriat ve kha a tul viau em ni? " a lo ti leh khauh. Tun tum zawng Zoi a pawr ngam vak lo. Tidik lo angin a inhre ve tlat a ni. 

"Ephraime, ka rilru a tawtin ka ippik êm a ni. Insawithawlna ka mamawh alawm. Ka puakkeh lo chauh a nih hi.. Min hrethiam hram rawh" Ephraime pawh en chuang lo chuan a ti sep sep a. 

"Haw rawh. Haw la, inneih hnuah hetah i awm ang. Keimaha awm ka duh.. I hrethiam em? " a ti hrâwk a. Zoi'n a han melh chuan, mitmeng nelawm loh leh ngeng zet a hmachhawn a ni. Thawk a la hawk a. 

"A nih Tumah that tawh lo hram la.. Khawngaihin. Chutianga i tih theih chuan i duh ang ngeiin inneih pawh kan innei lo mai dawn nia" Zoi chuan a ti ta a. 

Ephraime chuan a rawn hnaih nghal ruak a, a lo tawlh sawn hret. "Chuvang chuan maw min neih i lo duh? Tual ka thah tawh loh nan maw? Wow! I va hnehsawh èm.. Inspector tan chuan i thianghlimna hial pawh i hlan ngam ania. In inzawmna pawh a thuk tawh viauin ka ring.. Kal rawh.. Kal bo rawh" tih leh Zoi bana chelha kawngkapui lam panpui a rual nghal a. Zoi a tal aih aih. Ephraime chuan a thehchhuak ngei tawh dawnin a hria. A hlauthawng takzet a ni. 

"Khawngaihin Ephraime, ti suh. I ngaih ang kha a ni lo ania. A dik lo. Khawngaihin" a ti tuar tuar a. An thawm pawh a ring viau mai. 

"I biapa a nunna i hlutsak em em, Inspector nena in inneih theihna tur kawng ka hawnsak che a. Lawm viau zawk ta che. Mahse, i hmeithai hma deuh dawn a nih hi" a aw chu a hlauhawm kher mai. Zoi chuan a theihtawpa tal chhuah tumin, "Dâwt a nih chu.. Dawt vek.. Ephraime, nang bak hmangaih ka nei lo. Ka hmangaih che" a ti ta a.. A auin a au a ni ber. Ephraime a ding chut. Zoi pawh a thlah nghal. Zoi chu a ţap par a. Chhuatah a thu nghal hnawk. Ephraime chuan rawn chhuk melh ruin, "A tir atang khan lemchan vek a ni hial lo maw? Ka ina i rawn tlan luh zan atang khan" a ti ro halh a. A hma ang em em chuan a hlauhawm ta lo deuh. 

Beidawn hmel zet leh a bianga mittui luang chungin, "Tualthattu ka la hum chhan hi eng nge ni ta ang le? " a ti tham ţiak a. A lungchhiatzia chu hai rual a ni lo. 

"A chhan chu finfiahna i mamawh a, tin, i pa ngei i hnuhtel ve dawn vang te pawh a ni maithei.. " a lo tihsan a. Zoi chuan makti hmel puin, "Ka pa a?! Ka pa maw? Eng nge a awmzia? " a ti ta sek sek a. 

"I pa sumdawnna tenawm tak kha ka hre ve tih i hre tlat alawm" a lo ti teh daih. Pu Liantawna hnena a intiamna a puangchhuak hman ţhelh chu a inthiam lo deuh. 

Zoi chu inbengkangin a rawn ding chhuak a, Ephraime mitah tak melh chung chuan, "Inneiha chhungkaw pangngai tak din ve ka duh" a ti sap a. A aw chuan khawngaihthla a la kher mai. Ephraime thinlung pawh a dek ve deuh nge, a ngawi hmún ringawt. Zoi chu ngawi rengin pindan lamah a lut bo ta a. Khumah thu hnawkin a insút hraih a. A awmdan chu mak a inti. Ephraime lakah khan a inpuang ta tawp mai si a. Ni e, he pa hian ngaihsakin duat hliau lo mah se; A bulah a him a. A khawihna leh a dehna ringawt pawn a taksaah danglamna a thlen thin a nia. Chuvang chuan tunah chuan kalsan turin a thinlungin a hnaih mah mah tawh. Tualthattu a ni tih hre reng mah se; hmalam hun tha beiseina nen a nun a la hmang ve hram hram a ni. Haw ringawtin, inneih thulh ringawt se, an veng chhungah a hawi ngam meuh tawh lo vang. An inah nise thisen hrin hrang na nâ na chu eng emaw chenah inenhranna leh inlak bingna a awm lo thei si lo va. A chan hi a la chau tawlh tawlh dawn tih a hria. Tin, Ephraime hi man ta se, amah ngei pawh rinhlelh a kai dawn chiang. A nuamsa bik lo tawp ang. A pa a call a, a la har hrep lehnghal. 

"Pa, Engmah i sawi lo vang tih min tiam rawh" a ti nghal thãwr a. 

"Ngati nge? I tha em? " Pu Liantawna chuan a lo ti hú a. 

"Ephraime hi ka hmangaih a ni. A chhiatna tur ka duh lo. Min hmangaih anih chuan i hum ve zel tur a ni" a ti nghet charh a. Pu Liantawna thaw hawk pawh a hre pha.. A rilru a hah ve hmel hlein a lang. 

"Zoi, ka fanu i ni a. I hmakhua hi nasa takin ka ngaihtuah ve asin. Ani nena damchhung hman chu i duh takzet maw? " a ti ta a. 

"Aw.. Ka ngaihtuah vek tawh. Inspector Sangliana pawh chu lo that mah se, ka phatsan theiin ka ring tawh lo. Ali phuba hi a lak hma loh chuan a nun a pangngai dawn lo.. " a ti ta mawlh mawlh. A pa tan chuan ngaihthlak a hrehawm ngawt ang. 

"Chuan, Pa, i sumdawnna kha bansan la ka duh a ni. Mualpho hun leh manchhuah hun che a la awm dawn.. Tin, i nunna thlengin a derthawng thei" a ti leh a. Hei thil hian a nun khua a tinuam lo ve fo reng a ni. Mahse, Ephraime a len zawk vang hian he lam chu a la sawipui lo mai chauh a ni. 

"Bansan theih nise bansana engkim phumbo vek hi ka duh lutuk asin. Mahse, ka tâng laklawh a nih hi.. " a rawn ti chuai raih a. 

"Mahse, i tum thei a lawm.. Khawngaihin" Zoi chuan a ti a. 

"Ni e, innei phawt ula. Kan ngaihtuah dawn nia.. Inenkawl tha rawh aw" a rawn ti a. Phone chu an dah ta a. 

Ephraime erawh ramhnuai pilrilah silai nen a chhuak leh daih. Hlauh hi a nei hran lo va, a tan chhun leh zan hian danglamna an nei hranpa lo. Ngawi rengin a kal chhat chhat a, Zoi thusawi te kha a ngaihtuah let leh a. A ti tak tak ang em? Mahse, phuba lak a tumna dan a tum vang a ni ve thei tho. Hmeichhia a ni a. Mihring nunna la thin tu chu a tan mi rapthlak tak a ni ve khawp ang. Mahse, chuti chung chunga a bula a la cheng lui ve tlat chuan a tibuai ta deuh a ni. Engvanga la cheng ve tlat nge a nih ang le tia a ngaihtuahna a kawm mawlh mawlh lai chuan, a piah sir atanga thingţang rah tliak ri niawm tak ri bak chuan a rawn kai harh a. A hawi nghal zawk. Engmah phei chu a va hmu lem lo. A thlang lawk mau hmun, tlema zawl ve deuh laiah chuan kal thlain meizúk te a siam a. Thlan thla hluama a han kal leh thawk thin hi chu a taksa tan pawh a tha hrim hrim mai. Thlifim a rawn thaw heuh heuh a, a meizuk lai chu a hîp kâwk kâwk a. Ri leh bak thin chu a hre leh thin. Thawm nei hauh loin a silai nen inring phen phawn takin a lo chang ta a. A rawn chhukthla zel a, a rawn hmu lo zawk em mawni dawn ni.. Ngawr a la dur that bakah thing dingte chu a bit viau mai si a.. Thil phe leh zauh thin chu han hmu thin mah se, eng nge a nih a hre thei mai bik lo. Awrawl chhuah lah a hreh ve tingtang bawk si. Rei tawk fang a ngaihchan hnuah a reh leh vang vang avang chuan haw mai tumin a inbuatsaih a, a ding chhuak chiah tihin a chhak hnim pik kar atang chuan savawm sum sarih awm vel hi a rawn chhuak luau mai le.. Ephraime meuh pawh a hamhaih hman a ni. Chu Savawm mawl zet lah chu a rawn pan ang nul nul a, an inkar chu hlam ruk lo liam a ni lo vang tih vel turah a ding ta a. Ephraime pawh a lo inngaihtuah harh hman ta bawk nen, a silai chu chuh vatin a lo inpeih thlap mai. Savawm chu rum hruih hruih chungin a rawn chhuk leh nul nul a. Kahna rem tawk awm velah Ephraime chuan a kap ta dur mai. Mahse, thil mak tak a ni. A vun chhia bak a pilh lo vang tih tur nge a kap thawi zawk tih hriat loh.. Savawm chu nguk hruih chungin a rawn tlan ta mai a. Ephraime chuan a lo tin vang vang. A rin loh ang takin thil a thleng tlat! Hlam hnih vel dawna an inhlat tawh laiin chu savawm chu a rawn zuang ta phut mai a. Ephraime silai chu leiah a beng thla zui! Amah Ephraime hmai chu a rawn tum ta nghal bawk a. Mahse, mahni tawka huaisen leh thahrui ngah ve tawk tak Ephraime tan chuan chona lian tak a ni. Savawm nen chuan an inbuan let ta thial thial mai a. A tu a zawk mah chu an inkhawih fuh hleithei bik lo. Mahse, a lian zawk leh rit zawk na nâ na chu a lang ta deuh. Ephraime tha thlah lai a hre ve nge ni dawn ni.. A malpui thip zawk a hriat rualin, Savawmin a malpui dinglam a pet ngur chu a zuk hmu phe ruai a. Insehruh chungin lei chu a dap dan dan a, a silai chu an piah lawkah a let ran mai. A theihtawpa na nia a hriatin savawm bekah chuan a tlawh ta a. Savawm tluk lai takin hmanhmawh zeta inlet pheiin silai chu a va la ta a. Savawm rawn thu chhuak leh luau chaldarah tak chuan a kap ta dur mai. Hei zawng a fuh ta. Mahse, a la thi mai lo. Vawi 3 zet a lu leh zak dawha a kah hnuah a thi chiang chauh. He lai ramhnuai hi an la daidar lo bawk a, sakei pawh an la awm maithei a ni. A thut vang vang hnuah chet lak dan tur a ngaihtuah a, ina hawn phawt mai chu tha berin a hria. An inbuanna lamah khan a taksa thenkhat a pem nian nuan a, a hmai pawh a khem nasa viauin a ring. Chu zawng ai chuan a malpui chu a ni. A turin a rawn tur tawh a, thisen lah chu a chhuak duh ngang mai si. A kamiz hak lai chu phelhin a tuam phui ta ngawt a. Mahse, a rawn thi tlang tho mai. A mit te chu a vai tan ta deuh. Heti ringawt chuan a dik lo tiin a insangphek a. Bawkvak titihin a kal a. A silai chu a hnawk tawh zawk. A dang ka ngah tho tiin a hnutchhiah ta mai. Hah thaw hluam hluam chungin a tuikhuah siam thar bula phul hmunah chuan a mu ta thlawrh a. A khua lah chu a sik hluah hluah mai. Khua lah chu a thim chhhulh tawh a. Zoi call turin a phone pawh a keng mang si lo. Rilru mang zeta kal chhuak kha a nia, tui in tur leh eitur takngial pawh a keng lo. Rei tak zu daivah a tum lem lo bawk nen. Silai nen a arkawhchhuah ve tawp a ni.

Mutchhuakin a rawn zem chiai chiai a. A rilruah erawh, "I muhil hlen ngei ang. Muhil suh" a inti a. Mahse, a mit chunglam chu a rawn tla thla zel bawk si. Zoi au tur pawhin chakna a nei tawh lo. Tin, a awmna atang chuan in chu a lang thei chang chang a nia. Zoi pawn a au ri a hre pha kherin a ring lo. A malpuia a pehna kha a thúk riau a nih a rinawm. Thisen a chhuak nasa bawk nen. Kal kawng kha zozai a rawn kal tlang ve bawk si.. Chu laia tluk hlum ringawt chu a hreh bawk si.. A vawi khat nan a nu thih hnuah a tawngtai ve ta tawp a. 

"Pathian, i awm a nih chuan.. Zoi rawn tir rawh" a ti thawp sup a. A mutchhuak lutuk insum thei tawh ngang lo chu a maimichhing a. Bawkkhupin a muhil ta bawrh bawrh mai. Hetih mek lai hian Zoi erawh inah chuan a vei sek a, tih tur leh tih loh tur engmah a hre lo. Silai vawi khat puak dur hnu rei fe-ah vawi thum puak ri kha a hre ve leh bawk nen. Ephraine chuan buaina a tawk em mawni tih ngaihdan a nei a. Amah maia ramhnuaia kal lah chu a ngam bik bawk si lo. Tawhsual tawk ta se, a nunna hialin tuar ta se.. Tih a ngaihtuah chuan a inhup tlawk tlawk mai. Zanriah lah a ei thei bik lo. A za chung a ni ber mai. Hector lah chu a lo za ve ruai a, Zoi kalna lam apiangah zuiin a mei a hem ve vat vat reng mai. 

Thla a eng lutuk lo a, thli a thaw heuh heuh, nasa a ni lem lo. Zoi insum zo tawh ngang lo chu in atanga chhuakin Hector a kai bawk a. Ephraimea'n ramhnuai a panna lam kawng nia a hriat lamah chuan an inzui phei ta tawp a. A phone flashlight chu onin hawi deuh zak zak chungin a phei zel a. Tuikhuah piah lawka ramhnuai lama Ephraime kawng sial chawp lian lo tak chu vawi khat a lo hmuh ve tawh vangin chu lam chu pan ve tawp a rilruk a ni. Tuikhuah a thleng a, a kalpel mai. Mahse, tuikhuah phena mihring lo let reng a hmuh chuan a rak ţhawt. A phone pawh a thlauh nghe nghe. Mahse, inti pachangin khur zawih zawih chungin mihring bawkkhup chu zo leh zo lovin a zuk kuai let a. A rit kher mai. Ephraime ngei a ni. A hmai te chu a khem nian nuan a, a la thaw em tih hriat tumin hnai zetah a beng a zu dawh a. A lo la thaw ve hram hram tih a hriat chuan a thaw hawk. Kaih thawh tumin a sawi a, a pang lah chu a sa vur mai si. Hector nen an pitu ringawt chuan ina kuah phei theih ni nghal lo chuan. A malpui intuam ţup a hmuh chuan chu ngei chu a hliam tawrh a ni tih a hmu thiam ve mai. Mahse, engpawh nise, Ephraime hi a harh phawt a ngai. A hmai te chu a beng nawk nawk a, a mit te chu a keu sak thul. Hliam a buaipui vak ngai si lo. Rei tawk fang an insawp hnuah Ephraime chu a rawn thaw deuh halh a. Vai tih hriat ngawih ngawih hian a rawn meng ta a. Zoi lawm lutuk chu a ţap lek lek mai. 

Zoi'n a rawn melh reng tih a han hmuh chuan a la thi lo tih a hrethiam nghal. Mahse, a zawi takzet a ni. Zawi viau e ti lo chuan a taksa chu a mar pung ni in a hre bawk a, a chhungril a sahal bawk. 

"Hawh, inah sawn phei hram tum ang" Zoi'n a rawn ti a. Hector lahin a kut te a rawn liak deuh hlap hlap thin. 

A tha chakna leh Zoi chakna zawng zawng sawmkhawmin a thu chhuak thei hram. A malpui chu a na pawn a hre lo, a seh ngawt ngawt ni maiin a hria. Din tumin khur zawih zawih chungin an han ţang dun leh a. A ke veilam rinchhan chuan a ding thei ta hram e. Zoi kuah chungin a pen ve ta chhat chhat e. A rit si a, Zoi pawh nula te chhe lo tak mah nise, a taksa rihna zatve zet Zoi'n a phurh si avang chuan kal a sawt mawh angreng hle. Darkar chanve dawn an pen chhat chhat hnuah in an thleng ta hram e. In hlutzia a hre chhuak nghal. Zoi chuan rem takin a thut muttir a. Tui va lum vatin, nachhawkna a eitir nghal bawk. Tui a so hnuah a hliam lai chu phelhin Zoi chuan zei vak loin a sil faisak a. A tur et et kha chu a zia tawh reng. Damdawi hnawih chi nia an hriatte chu hnawihin, felfai takin a tuamsak ta a. Tin, tuilum tho chuan a taksa te chu hrulsak leh vekin, a pem leh khem satliahah pawh chuan pem thar damdawi a hnawihsak vek a. Ephraime pum ri ruk ruk a hriat vangin chawhmeh a va tilum vat vat a, buhhawp siamsakin, chawhmeh te nen a rawn inchawi phei a. Nuin a fa a barh angin a rawn barh ta a. Ephraime a lo thle sawn. 

"Ka ei ve thei reng alawm" a ti nghut a. 

"Ei mai mai teh. Chet pawh i chet that theih loh kha" a lo ti hlar a. Ni e, a zawi bakah a thu chhuak thei ngang si lo. 

"Hetiang hliam satliah mai maiah tikhawp hian ka chau thei ania. A mak hle mai" inthiam lo angreng deuhin a ti a. Tlawmthlak a ti ve deuh te pawh a niang. Zoi chuan eitur barh pahin a tawhsual tawh dan a zawt melh melh a, Ephraime pawn Savawm nen an insual dan leh kah dan te chu sawiin, a malpui pawh a pehsak thu a sawi a. Zoi a lo chek tlak tlak. 

"Vawi khatmah ramchhuak tawh suh. Sakei i tawng lo zawk a, i vannei anih chu" a lo ti deuh hmak a. 

Ephraime pawh a in eipuar ta deuh nen, chak sawtin a inhria. Zoi'n chaw a la ei lo tih hriain ei turin a nawr a. Zoi pawn thuawih takin a va ei ve mai. A ei khama a va kal leh chuan a lo muhil bawrh bawrh a, a thlansat danah nachhawkna khan a chhawk tha hle a ni ngei ang. Kaihthawh pawh a tum bik lo. A rilru takah chuan hetia Ephraimea'n hliam a tawk hi Pathian remruat ni te pawn a ngai. Inneih lam chu thuhran nise, tihi chuan a tan chet lak a harsa dawn a. A mi bitumte nunna pawhseisakin a awm tihna a nia. A dam loh chhung ngeia a rilru hnehsak theih hram a tum ve a. A tawngtai nasa reng bawk. Pathianin pui tak ang maw.. 

"Ehe! Sangliana teh hlawl chu, i va vâng em em ve" Hmingzuala pa Pu Rema chuan a lo ti hlut a. Sangliana chuan thut pahin, "Nia, hun awl hi ka nei mang lo va, Hminga ka rawn ral bak kha chu ka rawn tlawh thei ta si lo che u a.. Ka inthiam lo angreng khawp mai" a ti a 

Hminga farnu Awmpuii nen hian an inhre tha sa bawk a, ani pawn a lo be ve hlut mai. Thil danga penkual vak chu hun khawhralna a ni tih hriaiin, "Ka rawn kal chhan tak chu Hminga thattu chhuina kawnga min pui thei tur hi amah Hminga hian a kawl mial takin tih thuah beiseina sang tak nen ka rawn kal a ni. A thih hnuah a room saw in singsa tawh hrim hrim em? "A ti ta a. 

Hminga nu Pi Zaii chuan, "Mami hian vawi khat chu a va singsa a, kei phei chu ka lut zen zen duh lo. Ka lung chhiat a zual zel si a. " a lo ti ve vat. 

"Nia, vawi khat kha chu ka tifai. Engmah ka khawih danglam hran lo" Awmpuii chuan a lo ti a. 

Pu Rema chuan, "Sanga, Ka fapa thattu i chhui chhuah theihna a nih phawt chuan i duh duh kha va dap rawh khai.. Kei zawng ka fapa thattu hi ka hre chak tawh teh mai ania" a lo ti chuar chuar a. Rei rial lo vin Sangliana pawh chu Hminga room lam panin a kal ta nghal a. A lo felfai hle mai. Tuma luah an la phal lo bawk a. Hnawk leh mit tikham engmah a awm lo. Bungrua a ngah hran lo bawk a, Sangliana mit la bertu erawh a computer chu a ni. He a computer hi an lo hmang tangkai tawh thin a. Tunah pawh Hminga hian thihsan tawh mah se, hmanrua a la hnutchhiah mai thei asin. 

A thut chilh ta nghal a. A han on a. Hminga password chu a hre hlei hlui. Hminga32king tih chu a han chhu zat zat a. A lo inhawng ta. Folder hrang hranga a luh kual hnuah a mit la tu chu a hmu ta ngei e. Smuggler tih folder chu a click ta keuh a. Hming hrang hrang a lo lang tuar mai le.. A rin aiin an tam daih mai. An sumdawn dan leh an sumdawnna hmun, an bungraw dah thuhrúkna hmun leh an tham lungawi te, sumdawnna tenawma inhnamhnawih ve te nen lam a list a siam vek a. He ti taka a chet theih vang hi a ni ngei ang, a nunna kha a chân tak ni. A pendrive phawrhin chung document pawimawh tak te chu a inthawn ta nghal a. Inah rilru fim tak nena zir chian a tum a ni. Tu emaw rintlak leh fing tak, ngaihtuahna hmang thiam tak awm ve se a ti hle. Amah Hminga bawk chu awm se a ti.. Ani erawh a chatuan hmunah a kal tawh si. 

"Hminga, i thihna phuba chu ka rawn laksak mawlh ang che" ti chung zelin a haw ve ta a. 

"Eng a?! Ephraime a inhliam maw? Engtin? " Jenny aw chu makti tak tak a ang viau. A lo ti ve tak tak maithei bawk a. 

"Aw savawm nen an inbeih thu a sawi a. A vannei tawp" Zoi chuan a lo ti ve mai a. A ippik lutuk a, inbunthawlna a mamawh a ni. A pa lah biak zen a duh bik si lo. 

"A nih chu aw.. Naktukah office banah chaw ei nghal turin ka rawn kan ve dawn nia. I tan a hrehawm dawn em mai. Lawmsanga erawh a zin dawn a, a hman lo ang" Jenny chuan a ti zat zat a. Zoi a lo lawm tumhrang. 

"Awii i lo kal theih chuan ka lawm ngawt ang. Damdawiina kal a duh bawk si lo va. Keimah ringawt chu ka khua pawh a har.. Lo kal ngei ngei rawh. Damdawi pawh ka chah ang che" a ti ve hluai a. A damdawi chah hming chu a sawi diat diat a. Jenny pawh chuan leisak tura intiam chungin an inbiakna an titawp ta a. Zoi chu a thaw huai mai. Thiantha hlutzia a hriat chhuah rualin, Ephraimein Ali thihna a tawrh natzia a ngaihtuah nghal a. A tun hma nun engmah hriat a nei lo va, engtin chiah nge Ali nen an lo chet dun tawh a hre si se lo, heti taka mipa inti pa ve tawk takin mittui nena a sun mihring chu a hlu hle ang tih erawh a ring thiam. Chuvangin Ali sawi nep zawng emaw phuba lak tir loh dan zawn emaw a tum vak tawh rih lo. A thinlung lam hi hneh tum phawt ila, min hmangaihna thinlung a la neih ve phawt chuan a thulh em em ang tih chu a innghahna a ni. 

"Savawm nen a tia maw? A va mak awm ve" Lawmsanga chuan a ti hú a. 

"Umm.. A ramvahna lamah an intawng a niawm e. Kan tan chance tha lutuk, Ephraimea'n min chîkin min enthla thei dawn lo va, Zoi lah a phar buai ve dawn bawk si. Duhtawkin an in leh a vel kan fangin kan lepse thei tihna" Jenny chuan a lo ti sar sar a. 

"Mahse, zin hi ka thulh ngawt thei lo tih i hriat kha. Ka pa chungchang a ni sia.. Nangman lo bei phawt mai rawh. Nang chu i zei hawi zawk" Lawmsanga'n a tih chuan, uar fe hian Jenny chu a nui a. Fak te hi a lawm ve riau a. 

"Nia, lungngai suh. I awm ve hi chuan Zoi chungah i mit a fu mah mah zel a, Zoi awm a nuam lo vek zel.. Chanchin ka rawn hrilh ang che" tiin phone a dah nghal. Lawmsanga chu a hmanrua mai mah nise, an hausakzia a hria a. Ephraime a chan loh rau rau chuan neih mai pawh a hnial lo. Inthen leh pawh nise, eng emaw zat a hui luh theih a beisei. Rualkhuma fanu ni si hi, engvanga hetiang rilru dik lo leh tenawm tak hi pu ta nge maw a nih le.. A mak a ni. Ephraime a tawn atang khan mahni hmasialinain a khat zo a, a kawng dal thei apiang hmeh mih a duh zel a. Mahse, Ephraime zawk hian a hnawl ngat ngat mai si. A tihtheih awm chhun nia a hriat leh a thlir châk ber chu Ephraime inchhirtir leh Zoi tawrh tir chu a ni ta a. Nula mawl ni hek lo le. Tualthah chungchangah Ephraimein rinhlelh a kai tih a hriat khan tualthattu ni tur atan duh bik lo mah se, rinhlelhna chuan a rawn luah chho ve ta a, tualthattu a nih hlauh chuan Zoi tan tawrhna, Ephraime tan inchhirna a ni ang. Jenny rilru dik tak chu Ephraime hi tualthattu a nih theihna lai a hriat chhuah chuan, blackmail a tum. Lawmsanga bulah erawh phuba la tur angin a insawi thung a nih kha, tin, Police pui tur ang hial te pawhin. Mahse, A rilru chanve pawh Lawmsanga hian a hre lo. Ephraime chu blackmail-a a taa siam a rilruk a ni. Mahse, hlawhchham a inrin chang erawh chuan, Lawmsanga neih mai pawh a hnial lo hial thin a nih kha.. A tuk nghakhlel reng rengin chu zan chu a hmang tlaivar ta thak a. 

"Zoi.. " a aw chu a ring lo hle. Mahse, Zoi chu a thu chhuak nghal vat. 

"Umm.. I zun a chhuak em ni? " tiin a pang a va dek a. A lo sa leh vur mai. A mak ee, savawm seh satliah maiah a lo ngai a, a hliam hi rin aiin a thuk a nih dawn hi. Amah rinchhan lo chuan a kal thei miah lo lehnghal. 

"Ka tui a hal zawk" a lo ti a. Tui a pe vat. 

"I khua a sik leh tawh. Nachhawkna ei leh rawh aw" tiin damdawi a kheh nghal a. A lo ei ve mai. Puan te chu sin thattirin ani pawh a bulah a mu ve a. Ni e, khatia a hliam zan khan harh miah lovin a muhil zankhua thak a. A tukah erawh namên loin a ke chu na a tih bakah a khua a sik tel bawk. Damdawiina kal tura Zoi'n a rawt lahin a hnial tlat si. Chawhnu lam tlema a zia tak hnuah, a malpui tuamna chu phelh turin a ti a. An han phelh chuan a lo kak duai mai a, thui vat loh chuan thi a chhuah reng bakah a pún zual zel thei tih hriain, Zoi hreh chung chung thuisak turin a nawr a nih kha. Zoi lahin a hlau turu mai bawk sia. A wine kawl chu leihin, hriau chu Zoi a pe a. 

"Ti rawh le" a ti ta a. Rei ngial an indawr hnuah, Zoi chuan kawng dang nei hek lo le. Hlau leh insehruh chungin Ephraime malpui thler duai leh kak duai chu a thui ta a. A chang chuan a maimichhing ten a inhria. Amah Ephraime zawk chuan, "A tha vek ania. I thiam lutuk. Hlau suh.. Nakinah phei chuan silaimu te pawh i lak chhuah a la ngai maithei ania" tiin a lo fuih ngat ngat. A chhel bawk a niang, a rum eih lo va, na ti hmel pawh a pu duh lo. Mahse, a hmai dâng var pap danah a rukin na chu a ti ve hle tih Zoi'n a hre ve kar. An thui zo ve hram a. Tuam tha leh thlapin an inmuttir kha a nia. 

"I pa i hrilh leh em! " Ephraime chuan a ti sup a. 

'Hrilh lo" a lo ti ve sap. Chu aia chhanna sei chu hre hek lo le. Ephraime lam hawia saisir pah chuan, "Naktukah Jenny a rawn kal dawn, a rawn kan ve dawn che a. Chaw a ei nghal bawk ang. Tha takin lo hmachhawn rawh aw" a ti sar sar a. Ephraime erawh a ner sak. 

"I ring viau a ni tiraw? " a ti a. A khawsik chu nachhawknain a chhawk tan ta bawk nen, a tawng duh ve sawt khawp mai. 

"Rin lohna tur chhan a awm ni? A fel em hi" Zoi'n a lo ti vat. 

"I rin ang chiah nise ka duh khawp mai" a lo ti let ve a. 

"A lo star tawh che vangin i ngei aniang" te chu a la ti tak deuh deuh a. Zoi rilru thianghlim lutuk chu Ephraime chuan a khawngaih hial zawk. 

"A lo kal anih pawhin a kalna lam enzui zel ang che. Kei ka che thei si lo va. I hrethiam em? " tiin Zoi chu a rawn melh a. A mitmeng chu a coolin a thiam raih a, a thinrim mitmeng ang erawh a ni lo. 

"Hrethiam chiah lo. A hre ru ve te a nih ngawt loh chuan.. Eng nge ka enthlak kher ang? " a lo ti ve leh tlat. 

Nin hmel zet hian, "Hetia a that thar thut chhan hi kan laka a inthiam loh vangah ngai duh reng reng suh. Lawmsanga nen an la inkawp zui! Tum an nei a ni. An tum pawh ka hriain ka ring. Mahse, engmah ka thlentir dawn lo" a ti ta bawrh bawrh a. Zoi chuan, "I hah lutuk ang. Hahdam rawh. Ka hrethiam alawm" a lo ti ta zawk a. 

Mitmeng fir zeta rawn melh chungin, "Zoi, ka mamawh che. Tunah mai hian.. " tiin Zoi kut chu lain a kap zawn a khawihtir a. Zoi chu a hawi hú ringawt. 

Ephraime chu a lo khi sak a. "I thei ang em? " a ti sup a. Zoi a inngaihtuah nasa. A zak si, Ephraime thinlung hneh kha a tum kha a ni bawk si. 

"Ka thiam lo vang" a ti lawi rât a. 

"Ka pui thei ang che" tih leh a lamah kuah hnaih a rual nghal. Duhthawh zetin Zoi hmui chu a fawp ta nghal a. Ani dam lo khawsik zo chauh, taksa sa ham ham ni chu a lei thlengin a sa a, Zoi pawh kar loah a danglam nghal. Ephraime chu a mamawh ve ta em em hian a inhria a. Zah a sawi theih tawh loh a, zei leh zei loh lam pawh a lang tawh lo. Khami zana an chet dan kha Zoi hian sawi leh dawn se a sawi fiah thiam hauh lo vang. Mahse, an zawh hnua khuma an mut leh hnuah,,phuba k la lak min dal induh vanga i tih ni lo se chuan, ka thinlung zawng zawngin ka lawm tur" Ephraimean a tih chuan, Zoi a khawng nghal awt. 

"Enteh, i rin dan leh ngaih dan kha a dik lo tih hi ka la lantir khawp ang" inringtawk zetin a ti chang fak. Ephraime pawh a ngawi hmak mai. Ngawi reng chuan an muhil zui ta daih a. 

Sangliana chu a ţang ţeuh mai. Hminga thil chhui lai a han kaih theh chuan a rin loh pui pui an lo ni tlat! Khang mitthi tawh te zingah Pu Rualkhuma leh Amah Hmingzuala tih chauh lo chu he sumdawnnaa inhnamhnawih te vek an lo ni! Sapliana te lai lai! Tin, Sangliana mak tih leh em em chu Zomuansangi pa, Hmingzuala putea ngei Liantâwna lang ve vâ chu a ni. Ani phei chu a khawih lian chi leh bungraw hrawl lam khawih a la ni zui! Minister bakah MLA hming a lang nawk bawk a. Social worker nisi te pawh zuk awm a! Zirtirtu, Lecturer lai lai te. Tin, vai hming anga sumdawnna kal anga lang si, mizo pa thiltih ni vek bawk si te, an bungraw thuhrukna atana thamna an pek thinte lah chu Kohhran leh khawtlang tana tangkai leh langsar, mi hriat hlawh tak te an ni fur bawk! 

"Thil hi a lo va mak ngai em" a ti chhuak hial mai. 

Sawrkarin a ngaihthah chhan leh Police lam te pawhin an bengkhawn loh chhan te pawh hre tain a inhria. Hlauh an nei tlat! Khang Smuggler ho thuhnuaia kun an lo tam êm a lo ni. Mahse, Sangliana hi dikna ngaina zet mai, mi tumlum ve tak, a theihna zawng zawnga duty thin a ni miau a. Chung ho chu a hlau ve hlek lo. Mahse, tunah rih chuan Hmingzuala that tura mi ruaitu kha a hriat phawt a ngaiin a hria. Pu Liantâwna hi chu a nih a ring lem lo. Nge a lo ni ru reng thei zawk? Mahse, a nupui ú fapa êm chu a thahtir duh dawn em mawni le. An sumdawnna kal dan chu a han thai zawm leh a. 

Pu Rinawma leh Pu Sapliana, Pu Liantâwna te hi thawk ho niin, Pu Rosiama leh Pu Zaihmingthanga, Pu Zoliana te hi sumdawnna thuang khata kal ho an ni bawk. Pu Rualkhuma erawh mi dik, Journalist a ni a, Pu Zoliana bik kha thlur chhuakin a sum lakluh dan dikhlel lai a rawn thur a nih kha. A tana mi hnawksak dah thatsak turin Pu Zoliana hian tu emaw chu a ruai ngei a ni. Kha hotela a hmuh a sumdawnpui anga a sawi kha a nih a ring a, mahse, a thianpa inti a rawn lan takah khan a bei a dawng hle a nih kha. Thil hre chhuak thutin a phone chu a la a, Zoliana thianpa number chu a lo save mial mai. A call ta nghal. Mahse, chu sim card chu hman a ni tawh tlat lo! Sangliana a ding hlawl. Engvanga kha mihring kha lo sezawl chhuah tawp nge maw a nih le? A chhui zui thak lo lehnghal. Mawl a inti lutuk chu a a samah a inkêk nawk nawk mai. Tunah chuan Hmingzuala thihna te leh Khang mi dangte thihna hi a inzawm kual vek ang tih a ring thiam tawh a. Zoliana bakah he tiang sumdawnnaa inhnamhnawihte enthlak hna chu ngawrh lehzuala beih a tum ta a. 

"Ka hlawhchham a nih chuan, ka bang ang" a ti ngam ngat a ni. 

Jenny chu hmanhmawh takin damdawi dawrah a lut a. Zoi rawn sawiho chu a lei zung zung a. Hmanhmawh tak bawkin a car dahna lam a pan zui nghal a. Zoi be nghalin a rawn chhuah dawn thu a hrilh a. Ramhnuai lam panin a tlan zui nghal. Suangtuahna eng emaw tak zawng a nei a ni ngei ang, a nui leh sak thin. Ephraime hmel mitthlain, "Ka ta i la ni dawn khawp" a ti sap a. A hma aiin a tlan chak sauh. 

A zu thlen chuan Zoi'n kawtah a lo hmuak a. Hlim deuhin an inkai lut ta a. Zoi pawn zanriah tur tuihnai tak a lo siam ve bawk a. "Riak rawh aw. Naktuk chawlh a ni tho" a ti nghal mai reng a. Jenny duhthusam chiah! 

"Aa.. Ka tibuai ang che u" te chu a'n ti khawmawi ve tak naa, a hreh lo tih erawh a lang reng mai. Zoi te pindanah chuan lutin khuma lo mu meng reng Ephraime chu a va nuih sak a. 

"Ka rin aiin i lang tha. Zoi'n a sawi nat tehlul che nen, ka lo hlauthawng em em a" a ti hlut a. Zoi erawh a chawhmeh siam lai a chhunzawm daih thung. 

"Nia, ka tha reng. A hlauthawng ve mai mai a nih kha" a lo ti sup a. Jenny chu khumah chuan a thu kai ve a. Ephraime chal leh biangte chu a va dek a, "I pang pawh a dai a nih hi.. Dam vat rawh. In inneih a hnai tawh si" nelawm zet hian a ti a. 

"Dam ve mai ang. Lawmsanga i rawn hruai lo va, lo hruai ve tur a nia" a lo ti ve mai a. 

"Nia, zinna tur pawimawh tak a nei ve sia, hun dang a la tam alawm. A awm ve hi chuan boruak a nuam lo thin" Jenny chuan a lo ti ve vat. A damdawi hawn te chu a rem tha vek a, "Hei hi ei nghal tur an ti tak.. Ei nghal rawh aw" tiin a bur chu a thing nawk nawk a. Ephraime chu barh a tum a, a lo thlesawn vat. "Ka ti ve thei alawm. Ka kut ni loin ka ke alawm hliam" a lo ti nghut. Jenny pawh chuan a tum lui bik lo. 

Zanriah ei dawnah Zoi chuan Ephraime chu a kuah phei a. Chuti lutuka na chhia a ni tawh lo. Mahse, kalpui chi a la ni si lo va. An pathum chuan hlim tak chuan an kil tlang ve a. Jenny titi an ngaithla a ni deuh ber mai. Zanah Ephraime tel lo vin bathlarah an titi leh a. 

"Zo, hmanni chu ka pa thattu niawm tak hi ka mumangah ka lo hmu a, in pa ang chen vela sang hi a nia. Hmannia thi ta Ali an tih nen pawh khan an inang lek lek, ka pa a that lai hi chiang takin ka lo hmu a. Ka ţap chhuak nghe nghe alawm" Jenny chuan a bul a tan leh ta e. 

Zoi chuan lehlam hawiin a chil a lem khalh. 

"Pa Ruala thattu hi chu hria ila, hremna a hmuh ngei theih nan theihtawp ka chhuah ang. " Zoi chuan a ti chang fak a. Thinrim hmel deuh hian a hawi lah bawk. Ephraime thuchah kha a hre vawng vawng mai. Jenny hian tum a nei a ni tih a hrechiang tawh tlat. A mit men dan, a hawikual dan engkim hi. 

"Nia, kei chu tun hnaia tualthahna kha chu mi pakhat thiltih vek a nih ka ring bur.. Ka pa erawh an thah nachhan tur ka hre hlawl lo a ni" Jenny chuan a ti leh halh a. 

"I pa kha a dik em a, mi thiltih dik lo kha a hailang thin si a, hawtu a ngah ru viau ang. Chung mi te chuan an dah tha a nih ka ring. Lungngai suh. An la chhui chhuak em em ang" Zoi chuan a ti a. Jenny chuan a tum loh dan anga dawnsawn a nih vangin a hnual ru viau. Zoi hmel hmai leh chezia a enthla reng a, han ngaihbel tur a hmu eih si lo. Hlauthawng hmel a pu der bawk si lo. A thin a rim ru ţún tawh mai. 

In chhung lam atangin, "Zoi" a rawn ti tuar a. Hmanhmawh deuhin an tlan lut nghal. Ephraime zun tum, mahnia kal tum chu khum mawngah a lo tlu pek a, a malpui chu a rawn hnâm deuh. Thisen chhuak nasa erawh a ni lo. Zoi chu a che nghal vat vat a, a hliam chu dressing sak lehin, nachhawkna a eitir bawk. Jemny chuan thîk hmel zetin a lo melh râwm râwm tih a hre hlek lo vang. 

"Jen, mu tawh mai ang u hmiang. Ephraime hi a khua a sik leh chuan ka awmpui a ngai dawn sia. Study roomah i mu hreh lo vang tiraw? " Zoi chuan a ti a. 

. "Hreh teh nang.. Mahse, i thawmhnaw min hawh mai loh chuan" a lo ti var a. 

"Ni tak" tih leh a thawmhnaw va lak chhuah a rual nghal a. An hak duhzawng engkim inhre sa an ni bawk a. Hun a duh rei lem lo. An inmang tha hnuah Zoi chu a va intifai leh lawk a, inthlak lehin khumah chuan a mu thla a. Ephraimean a lo kuah nghal chawt. Chhun lamah an boruak a nuam tehchiam lo va, inbe mang lovin ni an vui liam kha a nia. Zan hmasa lama thil thleng avang te kha a ni mahna le. 

"Bâk a nih ngei saw. A va talented tehlul em" Ephraime an a tih chuan, Zoi chu a khi sak. 

"I lo fing ber mai" a ti ve sap a. An lungawi lohna te chu an theihnghilh ta nge nghet zeta inkuahin ngawi rengin an rilru an kawm ta mial mial a. 

Jenny erawh zing dar 1 bawr velah thawm dim em ema thoin study room chu a en kual nasa mai a. Chhuat te chu a han kik karh karh a, a tum ang a hmu mai lo. A hawi kualna lamah chhuar pakhat lehkhabu dahna phena bang chu bang dang rawng aiin a danglam deuhin a hria a ni ngei ang. Chhuar chu nemsawn a tum a. Lehkhabu a awm nual vangin a tawlh hleithei lo. Lehkhabu chhah deuh te chu dah thlain a'n bei leh a. Bang lo awm chu a kik ta karh karh a. A rik dan a danglam ta. A nui ta ver ver mai. Bang chu nem tawlh tumin a han bei kual a, a tawlh mawh viau. Thlan tla bat khawpa a beih hnuah a tawlh ta hret hret a. Pindan tia sawi tham ni lo, mihring tawmna tura siam niawm tak chu a hmaah a awm ta ran mai. 

"A tawpa tawpah chuan" a ti sep a. Mahse, chu ringawt chu finfiahna a tling lo tih a hria. Mahse, ramhnuaia in pakhata mihring leng tawk bihrukna tur siam a ni ringawt chu thil pangngai tak a ni lo. Police lamin hria se, engtin tak ngai ang maw? Mahse, a hrilh dawn hauh rih lo mai. Ama tan a bei a, amah vekin a pumbilh tur a ni. Engkim a siam that leh hnuah chau zetin khumah chuan a mu a. Lawmsanga msg a seen lawk loh chu enin, "Engmah ka ang lo. Ka rinhlelhna a bo tawh" tiin a reply ta a.. 

(Ka tlai deuh a. Sorry..