Escape 21/

ESCAPE.. (21)

Ziaktu : Toni Râlte

Ephraime chet dan teh thut chuan a tihrilhhai kher mai. Thawveng huai tur a nih laiin a ippik tulh tulh lehnghal. Amah leh amah chu inkhawngaihin a tah te lam a chhuak a. A mittui pawh a dang zo lo. Ephraime thawm chu a hre zeuh zeuh, zu a in tih a hre thei. A thinrim takzet pawh aniang. Mahse, mi a thah leh chu a phal ngang lo a ni. A phal loh chhan ber zawk chu an man chhuak ang a, jail-ah a tâng emaw an khaihlum emaw a niang a, chu hun chu thleng ta se, engtin nge a awm ang a. Mi ten amah ngei pawh engtin nge an ngaih ang. A nuhrawn bakah Jenny ten khawngaih a hnêkin diriam zui ta se.. A thaw hawk. A thu chhuak a, "Lalpa, min pui teh. Eng kawng nge ka zawh dawn.? Tunah hian tualthattu ka hum mek chu a ni sia, mahse, Lalpa, he pa hi ka hmangaih tawh niin ka hria" tiin a phun sep sep a. A phun ri chu Ephraimea'n a hre pha em lo vang chu. 

Ephraime pawh a no lina tur a dawm mek a, a meng tur ngang mai. Thawh lawka pindan lehlama mu mek hmeichhia chu va reh hlum te a ngaihtuah thut thut a. Zoi chu a haw hlur tawh. A chhan chu Ali a chân a, a ruang pawh hmu thei lo va danchêpin a la awm zui! Chutah Zoi lah chuan amah kalh zawngin tawngkam a cheh teivet a, a nun chhungril pakhatmah a hriatthiampui miah lo. Ni e, Thian hloh natzia bakah Ali nen an zinkawng zawh dun dan engmah a hre lo. Hnem a hnêkin phuba lak ka phal lo e te chu a la ti ve khanglang a. Tun atangin an inneih hma hauhin a nunah thuneih a tum a; a nu bak kha a chunga thunei an awm a phal lo bur.. A zu in chu tui pawlh loh ni bawk nen, a rawn thawk chho tan a. A lu a hai chiai chiai mai. A thle buk buk a. Khum ngheng chuan a muthlu ta lawp lawp a. 

Pu Liantâwna chuan Pu Thanliana nen an inbiakna chu a ngaihtuah let neuh neuh a. Pu Thanliana te nen hian hman ata tawh inhriain, veng khatah an khawsa ho thin a. Chhungkhat ang mai niin, an nu dam lai phei chuan an intlawhpawh fo thin. Zoi ngei pawn a hre lutuk. Zoi nu a boral te khan an ni chhung hian an rawn tuamhlawmin an tawiawm tha em em kha a nia. Tunah Ephraime chu Pu Thanliana fanu Mary fapa a lo ni reng tih a hriat chhuaha mak a tihzia kha.. Mahse, Ephraime chu Mary nen pawh inanna an nei tih a hre thei. Mahse, mak a la ti tho. Thil kual thui theihzia a ngaihtuah chuan awih harsa a ti riau. Zoi tak pawn hre ve ta se mak a ti ve hlein a ring. Nge a lo hre sa tawh zawk ang? Engvangin nge Ephraime chu a chhungte bula awm lo va, ramhnuaia khawsa nge a nih tak ang? Mary kha vai ramah rei tak a zuk awm kha a nia.. Ephraime pa pawh hnam dang a ni tih an hre vek. Pu Thanliana'n luhlul takin a fanu ngei chu a tuithlar a, a rawn haw pawh a phalsak lo a nih kha. Engtin lêk nge Mary te chu an awm tak tih tuman an ngaihven zui ta lo va. An ni Pu Liantawna te phei chu veng danga an awm tak daih vangin a ngaihven lo hrim hrim. Pu Thanliana te nen pawh an inbe khat tial tial a, eng emaw han inhmuh nikhuaa an inbe ve hlut tih mai loh chu, a hranpa taka inkawm leh inlenchilh an nei tawh mang lo a ni. Mahse, Pu Thanliana'n rawn biain, a makpa tur chu a tupa a ni tih a rawn sawi anih kha! Fiamthu a rawn thawh emaw a ti hman hial a, mahse, a rawn thutak viau. A tupain mizo nunphung leh ziarang a la hriat tlem vanga a bangbo zia te, palai tirh tur a ni tih pawh a hriat loh thu bakah, man leh mual inhlan te, inneihna a ngaih awlsamzia te sawiin thupha a chawi luam a. Amah Pu Liantawna tak pawhin chutianga palai tirh leh man leh mual vel chu a lo la ngaihtuah chhuak lo tih a hrechhuak nghal. Zia lo a tiin nikhua lo a inti ngei mai. Tichuan, inbe dun zelin hmalak dan tur an sawi dun ta a. Pu Thanliana chuan a tupa a biak phawt hnuah palai pawh rawn tirh a tum thu a sawi ta a. Pawm loh chi ni tawh hek lo le.. 

An nu bulah pawh a sawi ve luam kha. Pu Lawmi pawh chuan, "Ropui leh tih bûng bùng lam chu a tihchi vak loh ang, tiang khawp khan boruak kan lo nei tawh si a. Amah Zoi pawn a duh kherin ka ring lo. Mahse, man leh mual erawh pangngai takin inhlan ve ila" a lo ti luam a. An pa ngaihdan pawh a ni ve tho mai. Lawmsanga te mitmei ven te pawh a na ve alawm le. 

Zoi zing tho chu a rawl thúm mai. A zi ar ar a. Zan lama thil thleng chu theihnghilh hram hram a tum. A banreka a hmer na lah chu a la sen ţul mai. A hmer na bawk a niang e. A intihfai hnuah eirel a buatsaih a. Chawhmeh thing a la tam vangin chaw chhum chiah a siam. Ephraime thawm a la hre lo. Nizan khan a rui si a, a rawn thawh hma pawh a ring lo. Amaha a rik rek rek lai chuan, Hectora leh a pu an rawn inzui lut leh hlawl mai. Zoi chuan zan lama thil thleng miah lo angin, "Ehe! I tho hma peih elo,? " a lo ti var a. Ephraime chu a bu nghut. Mahse, nizan ang em em chuan a hmel a rum tawh lo. Biak sek chi erawh niin a lang chuang lo. 

"I chhuak dawn em? " rooma a lut tur chu a ti zui hram a. 

A ding chut. A rawn lehhawi te tè a, "In inah ka hruai haw dawn che" a ti sup. Biak leh hman miah lohin a pindan a pan nghal. Zoi'n a fian ken lai a thlauh ri bawl. Ephraime chu a enzui ngat ngat bawk. Tunah khan eng nge a sawi kha? Hruai hawna inneih thulh chu a tum tak tak tihna a nia… Zoi chuan eng nge a tih ang tih a hrethiam lo. Ephraime hlata awm tura a inngaihtuah zawng ringawt pawhin a na vawng vawng thei tawh tlat! Tin, dah bo a tum chhan hi phuba lak a tum vang a ni bawk. Chu chu a tihtir thei lo vang. An man dawn asin. Ephraime chu khaihlum ta se.. Ta se tih ringawt chuan a thauah a man nge ni, a khur thei hial. Hlau leh thinphu dat dat chungin pindan lam chu a va pan a. Kawngka a kalh loh vangin a hawng a. Ephraime chu bathroomah a awm aniang, a lo awm lo. Khumah thuin a lo nghak a. 

Bathroom kawngka a ri rak a. Huh hlap chungin a lo chhuak a. A lang tharlam ngawih ngawih mai. Zoi chu a melh eih lo. Titau hmel erawh a pu hran lo. 

"inbia ang" Zoi chuan a ti sap a. 

"umm Sawi rawh" a lo ti a. 

"Inneih thulh ka duh lo va, ina hawn pawh ka duh hek lo" a ti ta râwih a. 

"Engvangin? " a lo ti sup. 

"A chhan chu inneih ka duh a ni" Zoi aw chu a hma aiin a ring ta deuh. 

"Phuba ka lakna tur min dal i tum vang zawk anih kha. Haw la, min han puang vek rawh. Pawi ka ti lo" Ephraime aw chu a chang beng bawng hle. 

Zoi chuan a chil lem khawlhin, "Mahse, jail-a i tan loh pawn an khaihlum ang che" a lo ti a. 

"Thih emaw tan emaw ka hlau lo. Ali thlarau vahvaih ka hlau zawk. A nunna chhattu te hi a mal tetea ka thah hnuah kei pawn Ali ka zui ve ang" inringtawk zetin a ti ta a. Zoi a ding hluai, "Mahse, ka pasal tur i nih kha" a ti ţial rian a. Tlawm a inti lutuk, mahse, hetianga a tlawm mai loh chuan kawng dang neiin a inhre lo a ni. 

"Huh.. Kan bultanna kan hriat kha. Inhmangaih vanga innei tur pawh kan ni lo. Tlangval pangngai tak nei zawk la, chhungkaw tha tak din zawk rawh u. Tlanchhe reng reng leh inthup reng renga nun hman chu i beidawn hun a la awm dawn" Ephraime chuan dam deuh hian a ti a. Zoi'n a lu a lo thing nar nar.. 

"Aih, ka duh lo. Ih, i fa te pawh ka pai maithei sin" a ti ta mauh mai. A zak ve deuh aniang, chhuat lam a bih ngar a. Ephraime rum nghut erawh a hre reng. 

"Vawi khat chauh a nia. I rai lo vang" a lo ti sam êt a. Zoi chuan Ephraime rilru chu a thlak theih a ring tawh lo. Mahse, a kalsan duh bawk si lo. 

"Zoi, i ti ta sa sa, a tawp thlengin le.. Tlawm ral raihna a nih pawhin i tlawm ngam mai tur a ni" tiin amah leh amah a infuih mawlh mawlh a. 

"Ka haw chuang lo vang" a ti mawl tawp a. Choka lam a pansan daih. Ephraime pawn a hnunglam atangin a melh zui ve vung vung ringawt. Luhlul dun ve ve, induhtawk ve ve cheng dun chuan buaina an ngah em em ang. Hengte hi chu thilmak a ni lo e. Ephraime pawh nghak si se loin tukthuan a ei nghal mawp mawp. A eitui phian lehnghal! A chaw eina bulah a rawn ding a. A melh duh lo lui ve tlat. 

"Naupang angin awm suh" a ti sup a. 

"Nge min then i tum ni? " chaw thial ţawlh ţawlh chungin a lo ti ve sak. Ephraime nui hmel a hmu lo zawk a, Engvanga nui ve ringawt nge maw a nih ni. Amahin thleng a inlak a, a rawn kil ve thawr mai bawk. Inbe tawh lem chuang lo chuan an ei mial mial mai. 

Eikham hmain a puin a lo call mial a. 

"Aw ka pu" a tih rual chuan, "Hei zaninah palai chu kan va tir dawn e aw. Ka be fel tawh e" a rawn ti ta mai. 

"Ngawi rawh.. Lawk. Ka rilru ka thlak leh a, inneih loh mai ka duh leh zawk a. A chhan chu hmachhawp ka nei leh thut a" a tih mek laiin, Zoi'n a phone bula a hmui rawn dahin, "Mawina a tifiam anih hi. Kan innei dawn" a ti ta mai. Ephraime chuan Zoi nungchang chu mak a tih êm vangin âng phuau chungin a han melh a. A pu tawng ri pawh a hre tawh lo. 

"Khati khan mi melh ker kawr suh. Kan innei dawn. Kawr var fual ka hak chakna a rei tawh" Zoi'n a lo ti leh hmiah! Ephraime tan a la mak zel! 

"Ti.. Tikhan i awm maw? " a ti ta hlawl a. Zoi zak chu a sen ţân ţân a. Mahse, a rukin a nuih a za ve tho. Zak lo a intih bakah Ephraime tan chuan a mak dawn em a ni. Inngaizawng hrep tawh, inpawh tawh lutuk te pawh an ang hial alawm. 

"Khawia inneih nge i duh? " tiin a melh kiau a. 

Ephraime chu chair atanga tho chhuakin, "Ka hre lo" a ti hmuk a. A thinrim vak lo tih chu a lang tho mai. 

"Nih chuan hetah ni mai lawm. Mi sawm tam ka duh lo bawk ania" Zoi'n a ti leh hmiah. A chhang tawh lo. A rilru a buai ve hmel tawp. Zoi luhlulna chuan nghawng a nei ta nge, nileng chuan an inhruai haw ta lo phawt chu a nia. In bul hnim leh hnawk te Zoi'n a thianfai a, hetia hna chhete a thawh ve zeuh zeuh loh chuan a thau dawn tan tlat. Ephraime erawh, a silai nen ramhnuai lam a pan a. "Sava ka veh dawn" tiin. Mizorama a awm hma kha chuan nungcha te laka ngilneihna lantir thin a ni a, ramsa leh sava sa a ei ngai lo. Mahse, hetah a rawn awm a. A hlawhfa chhawr te khan a in bula ramsa leh sava lo tla hnai te chu an lo tihlum ta thin sia, vawi khat an eitir ve a. Tui a ti ta phian nen, a hunawlah chuan a tei chhuak ve ta fo mai. Mahse, hlawhchham chang pawh a ngah. 

Jenny'n a lo call a, a rawn titi tui leh khawp mai. 

"In inneih huna ka hak tur ka design tir vek tawh. Nang aiin ka nalh zawk dawn" tiin a nui awr awr a. Zoi pawh a nui ve sâng mai. 

"E chuan, Zo, inneih hnuah chuan khawpuia awm tum ru.. Kha lai chu a hlauhawm em mai. Bakah tualthahna a tam si, a fal sia. I tan pawh a hlauhawm.. Kan tualthattu hi a reh hlen ka ring lo" a rawn ti leh seuh seuh a. Zoi a chhing sawk, Jenny hian thil hriat ruk a nei mawni aw a ti rilru hman hial a ni. 

"Nia, ka sawi alawm. Kei pawh dawra la thawh zel ka tum. Awm mai mai ringawt chu ka ning" a ti ve mai a. 

"Inpa hian eng nge a thawh khah? " a rawn ti thut pek a. Sawi tur a haihchham deuh hman. Mahse, "Eng em em a thawk rih lo. A nu thihsan sum kha a tam tham deuh a, bakah a pu te lam hian an pui ve reng bawk nen. Inneih hnu chuan ka pa sumdawnna lam hi a zui ve dawn a" a ti ta tawp a. Dawt chiang tak a sawi vang chuan a lei a chhuah tut bawk. 

"A chanchin hi ka hrechiang chak. Chhungte nei lo anga khata a awm teh daih te kha" a la rawn ti zui. 

"A sawi duh vak lo. Ka hriat chin a tlem lutuk kei pawh. A nu a thi tawh a, a pa hi chu amah pawn a hre hman lo hrim hrim a niawm e. Tihian amaha khawsak a duh zawk aniang. Mahse, a tha phian, hrawn tur ka nei dawn lo va" tiin an titi chu a herrem ta hret a. Jenny pawn Lawmsanga chungchang a rawn sawi ta bawk. An inngaihzawn ve tak tak thu te a sawi a. Zoi pawn a lawmpui thiam hle. Mahse, a rilru chhungril tak chuan, Jenny chuan tlawm intihna a nei lo a mi le? Thianthaber te pasal tur nena han inngaihzawn tak tlat chu a ti ve tho. Mahse, Lawmsanga'n a bansan hrim hrim pawh a lawm tawk tawh. 

Zanah chuan Pu Liantâwna te chuan Ephraime palai te chu an lo dawngsawng a. Inru ang an nih tawh miau avangin a awlsam thei ang bera invawntir mai chu an duh dan ve ve a ni. A hun an ruatfel a, tlan inkoh ang chauh a nih dawn avangin a hmun tur vel chu an pahnih duh danah an dah ta a. Palai te pawh an awm rei lem lo. 

" ú chu a timak eee.. Mi hian an sawi duh rapthlak sia, ka zak tlat. Nangni pawh a duh lo chung kha sawi rem loh ve mai tur a nia" Hlimi'n a ti hlak hlak a. A dik ang. Zoi te chu an veng chhungah langsar khawpa hausa an ni pha ve a, a chanchin mawi lo lam chu a darh chak lo thei lo. Pasal a um tih erawh hria an la tam lo. Jenny hian a sawi peih deuh zawk a. A pasal neih tur vawi hnih ngawt a tlanbosan vangin an thulh tawh a, tlema kamtam deuh tan chuan sawi loh phal chu a har ve bawk ang. Chutiang huam chuan alawm le a tlanbo ve zawk ni. 

Sawi tawh ang khan Pu Liantâwna hi dawrkai hlun leh lian nia mite hriat hlawh ni mahse, a eizawnna tak tak zawk erawh a thawhpuite bakin an hre lo va. A dawr a len vang hian mi nawlpui hian an ringhlel vak lo nge ni, an pâk thei huam huam em mai. Kohhranah lah a chhung lut tam thei si. Kohhran hruaitu te tan chuan biak chhiat ngamawm loh tak a ni ve a. A thu pawh hi tlang tak a ni. Kohhran chauh ni lo, khawtlang thilah pawh sum hlawm tha deuh deuh a donate peih em vang hian, "Liantâwna hi chu a thilphalin mi dang a tanpui nasa bawk a, malsawmna pawh a dawng nasa a nih hi" te an ti mai zel reng a. An fate thlengin khawiah pawh an tlatlum em em zel chu a nia. 

Tin, han sawi kai leh ta lawk ila, Sapliana a thih tak avangin a aiawh ang deuhin Liantawna hi a lut chho a. Sapliana sawi tawh thin ang khan lamtang a ngah sa ve tho bawk nen. Sapliana thuihhruai ho te pawn khin phakah an ngai ta lo nge bungraw tawlhruk dan lamah rilru an pe ta zawk a. Mizo mi nawlpuiin an rin loh pui pui tur te hi heng Smugling huangah hian an kat nuk mai a ni. Dawr thenkhat, lun lutuk loah te hian an bungraw thenkhat te chu pawisa pein an thukru fo a. Sawrkar leh police lam hian an ngaihven teh ual bawk si lo. Ngaihven chu sawi loh a ram hruaitu zawk zawk te hi inhmamhnawihna nei fur an lo ni zawk a! Zoram hmakhua hi a èng lo ve khawp mai. A ruka an sumdawnna lo hria te lahin an ka an âng mai ngam bik si lo, venhimna a chhe ropui bawk si a. An nunna thlengin a tawrh phah a hlauhawm ve bawk si. Khehpuam lam chu an chawlhsan rih deuh a, ralthuam lam an chelek leh ta deuh. Mihring hmanga sumdawnna pawh a risk a san em avangin an chawlhsan rih. A chhan chu tun hnaiah tualthahna a thleng nasa si a, khang mitthi te lah kha hetiang lam sumdawnna kawnga inhnamhnawihna nei deuh vek an ni bawk nen. Pu Rualkhuma leh Hmingzuala pawh kha sumdawng ve lo mah se, a ruka anmahni chhui ngam an ni a, a la inkaihhnawih vek tho a ni. Chuvang chuan buaina te hi han ziaawmin thawm te pawh han reh deuh se, hlawk zawka sumdawn chu an tum theuh mai. Thenkhat lah tihhlum ve mai an nih hlauin chawlhsan an lo tum a! An chawl hlen ang e maw le.. 

Sangliana pawh thawl khat chuan a thawl ta phawt chu a nia. Case incharge a nih miau avangin dik tak chuan a thin a rim tún tawh a. Tualthattu a chhui chhuak thei lo kha.. Mahse, Ali chungah khan a burbun thei dawn tain a lang. Mahse, a chang chuan amahah mawlhtu a awm fo tho. Ali kha mizo a ni lo a, Mizorama a hna rawn thawk fo tur khan mizo te bawkin an ruai thin tih a lang reng mai a. Chutiang hunah chuan thian pawh nei lem loin a che mawl tawp zel tihna nge, khaw nge a innghah thin ang tih te thlengin a ngaihtuah fo. Hotel chengker lai chu a thlang thin ngei ang a. Aa.. A ngaihtuah vak duh lo. Office a thlen hnuin thingpui hang a lam a, thut hahdam deuh hnuah an pu va hmuh a tum a ni. Ali chungchang leh an case kalpui mek thilah hian. Chutia thingpui hâng dawma a thut vung vung lai chuan, nula pahnih an rawn lut a. Constable in lo welcomein a hnenah a rawn hruai a. A hmuh tawh hnu an ang a ti viau. E aw.. A hrechhuak leh si, Pu Rosiama fanu te kha an ni tak. Eng tak rawn ti dawn ni maw.. A ú zawk chuan thut rual rualin, "Sir, kan lo kal chhan chu ka pa thattu hi in la chhui chhuak thei lo em ni? Tih thuah a nia" a ti nghal a. A awkiah lungawi lohna tlem a tel. 

'E.. Aw ni e, chanchin kha in lo la hre ve lo aniang maw.. Hmanni maia Shillong-a thil thleng kha" a ti ban chhalh a. 

Nula upa zawk bawk chuan, "Hria e, chuvang ania kan lo kal.. Kha pa Ali inti kha news pakhata kan hmuh dan chuan, Pu Rinawma, ka pa leh mi dang thattu a nih thu a chuang a.. Mahse, ka pa thattu kha a ni tlat si lo a ni" a ti ta mai a. Sangliana a îp nghal châwih. Mawlh fótu a hriatthiam loh kha hei ngei hi a nih dawn hi. 

"Engtin maw? I pa thattu a ni lo tih i chiang a maw? A hmel kha han en tha leh teh. Hei hetah hian a chiang zawk ang. Shillong lam atanga ka dawn a nia" tiin, Khu lam police ten Ali ruang thla an lak fiah tak chu a hmuhtir a. Nula te chuan an lu an thing nar nar mai. 

"Ni lo. Kan chiang tawk. A thuhrimin ani hi chu hnamdang a nia. Engtin nge mizoram ami te daih daih a rawn thah ang? " a nau zawk chuan a ti ve hlar a. Sangliana awm a nuam ta lo hle. 

"Ali kha Pu Sapliana thih zan khan a ruang chharna hmunah hmuh a nia, pu Sapliana thattu kha chu amah bak an ni thei lo. Engpawhnise, mi pahnih aia tam pawh an ni thei maithei. Nangni a hmu chiang ber ten a ni lo intih tlat si chuan, keini tan a ni e tih ngawt theih a ni si lo va. Hma kan lo la tha leh ang e. I pa thattu hmel kha in la hre thei em? " tiin nem zawkin a han zawt a. 

"Kha pa min hmuhtir khan a ang ber. Mahse, dik tak chuan Sir, thil tisual miah lo hi kan lo hrem ve reng thei a, chu chu kan duh chuang lo. Kha pa pawh kha a ang a ni mai a. A ni tiin kan kawk chat ngam bik lo a ni" a u zawk chuan puitling takin a lo ti a. A nau pawh a bu ve nghat nghat. Sangliana chu Police Inspector lai mahnise, a tah te lam a chhuak tawh. A hlawhchhamzia hi amah ertu ten sawi nuam an ti em em bawk si. Tunah case close theih mai tura a dah tawh lah chu close ngam awm loh tawpin a rawn awm leh ta bawk si. Police hna chu bansan daih te a chak rum rum mai. 

Nula te chhuah hnuah chuan a ngaihtuahna a han sèng leh ţan a. Private detective amah pui thei awm tur te a han dap a. Hmingzuala kha a tha ber thin a. Close pawh an inclose viau. A thih pawh khan a tuar ve reng bawk a. Hmingzuala a ngaihtuah chhuah takah chuan Hmingzuala thah a nih ngawt chhan a ngaihtuah zui leh ta. A tirah kha chuan Detective a nih vang leh kawng tam taka Police a puih thin vangin hawtu leh dah that duhtu an awm nual dawn a, chung ho thiltih chu a nih a ring kha a nia. Mahse, A ngaihtuahna a fim tial tial, a thih hma ni 2 ni-a a rawn lenchilh tuma Hmingzuala thusawi te kha a ngaihtuah let a. Bawhzui chakawm tak nia a hriat loh vangin a lo ngaihvenpui vak lo kha a nia. Bakah tualthahna thlen reng vang khan thil dangah rilru a pe hman meuh lo bawk. Hmingzuala khan, "Tuna ka chhui leh veh lai hi a tawp ka khar theih hun chu i tan pawh hmingthatna chance a awm ngei ang. A chhan chu civil mi ka nia, kutkawl ka buntir ve thei si lo va. Nangmah ngeiin i la man khawm phiar dawn nia. Aizawla mi lian leh hausa tam tak zingah hian Smuggler an inzêp ţún tawh a. I rin aiin an inpharh zau tawh ang, Foreign thlenga an sumdawnna huang zauh pawh an awm nawk tawh. Inphen nan dawr an siam a, engmah thawk em em si lo vin, an nei îm èm vek a nia. Kohhran leh khawtlangah sum an pek tam theih em vangin fak an la hlawh ta dah a! Tuman an khing ngam lo va, an sumdawnna chîk zui ta pawh an awm meuh lo. Mahse, kei chuan ram ka vei a, kan ram tan tiin hman atangin he thila inhnamhnawih te hi ka lo chhui zauh zauh tawh a. Tunah hian an hming mal man pawn sawi tur ka hre nual tawh. Mahse, evidence tha tawk tak ka la neih loh vangin a rukin ka la veh tlut tlut a. Ralthuam bakah damdawi, mihring thlenga sumdawnna tenawm tak kalpui tute chu evidence tha tawk tak ka neih veleh an hming list ka pe che ang a, i man ngam ang chu tiraw? " a ti a nih kha.. Ani lahin awlsam takin, "Ngam loh thu a awm nang.. Mahse, Tawngkawlangah te hian an puten min sawn lawng lawng mai lawng maw? " a lo ti a. An nui dun nghe nghe. 

"Ni e, chutiang vang chu alawm sawrkar pawh a inrawlh duh loh. Minister leh MLA thlenga inhnamhnawih an awm fur tlat a. Thil an tithei si a, tunah te hian ka chhui ru tih hria se chuan ka nunna hian a tuar daih tawh ang. An kawng daltu nia an hriat te chu an dah tha hmiah duh zel ania. Chuvangin lo sawi ri hrih suh.. " Hmingzuala'n a ti leh a. 

Khatih lai khan Pu Rinawma, Pu Rosiama leh Hmingzuala putea ngei Pu Rualkhuma te thih hlimchhawn kha a ni a. Sangliana hian amah pui tura sawm a tum nghe nghe a, mahse, Pu Rualkhuma thihna khan Hmingzuala te chhungkaw thlenga nghawng a neih rih avangin, "Ka theih ang angin a ruk chuan ka lo bawhzui ang a. Langsar tak chuan ka zui rih lovang che. He tualthahna hi phuba lakna a nih loh pawhin Proffessional killer chetna a nih ngei a rinawm," a ti ve nghe nghe a nih kha. 

Sangliana chuan a hma zawn melh run pahin, Hmingzuala kha a thil chhui mek vanga thi a ni thei tih a ngaihtuah mek a ni. Smugler te chetna a nih chuan, chung smugler ten an rawih chu tu nge ni ta ang? Chuan, sumdawnna tenawm tak kalpuitu te chu a hriat a ngai phawt.. Tlem chuan hma a sawn deuh e. A ding a, a kawnghren siam thain, "Tualthattu ka chhui chhuak a nih chuan.. A taksaah ka nghaisakna a ser ngei ngei tur a ni. Min tihah tawh em mai" a ti nghut nghut a. 

"Aw, Bawiha, a hun tur kan sawifel a. A hmun tur lam chu in duhdan nise kan tia. I nupui man hi chu i nuteii te nupain kan tum dawn an ti ve tlat aw" Pu Thanliana'n a rawn tih chuan.. 

"Eng tik nge in ruat a? " a lo ti vat. Zoi pawn a va melh hâw. 

"Thla thar ni 2 kan ti ta mai. Inbuatsaih vak in ngai lo bawk nen.. Bakah ti kha in ni tawh a" a rawn ti a. Thla laihawl vel an hmang mek a ni. 

"A va la rei zawk ve. Ka rilru ka thlak leh hman anga sin" ama hriat tawk lekin a ti sup. 

"Thla thar ni 2-ah kan innei dawn anih chu. I lawm em? " Ti el lek lek hian Ephraime chuan a ti a. 

Zoi'n hawi vah pahin, "Lawm khawp mai" a lo ti ve hmak. 

"Mahse, chumi hmain ka tihtur ka hlen ang" a lo ti chang rút a. Zoi a meng râng nasa mai. 

"Ephraime.. " a ti hman ţawk, "Khawngaihin ka thiltih tumah inrawlh suh. Ka tih dawn tho tho avangin" a lo tihsan hmiah. 

"Man chhuak ta che se la" 

"I nula leh thei a ni mai alawm"

"Ka virgin tawh loh hi.. " a au nghek nghek mai. 

"Vawi khat chiah kan ti a, a phui leh hman vek ang" a lo ti chu Zoi run tawk a tling kher mai. Nawr na ngam lo mah se, Ephraime thinlung chu hneh hret hret turin a theihtawp a chhuah ve takmeuh a ni. Tualthahtir tawh loh hram a duh takzet a ni. 

Pu Liantawna'n Zoi chu a rawn bia a. 

"Inneih hma te chu i lo haw ve dawn lo mi? " tiin. 

"Aih, ka thei lo" a ti tlat. 

"Eng nge awmzia? " a pa chuan a rawn ti a. 

"Ephraime hi ka hlatah ka awmtir thei lo" a ti zawi raih. 

"Target a nei leh tihna em ni? " a pa chuan a rawn ti hawk a. 

Zoi lah inring hman hek suh, "Aw.. Inspector Sangliana kha" a ti sar sar a. Pu Liantawna thaw hawk ri a hre nghal. 

"Ngati nge" a rawn ti a. 

"Phuba" a lo ti mawl tawp. 

"Kan tihtir thei lo vang. Police phei chu ni lul lo ve. An man nghal ang" a pa chu a hmanhmawh hmel hle. 

"Eng nge tih i tum? " Zoi'n a ti a. 

"Kan hrilh mai ang chu. Engkim" a lo ti! Zoi a ţek teh e. 

"I hrilh rualin i fanu hi ka thih ring rawh. Min hmangaih chuan ti suh. Theihtawp chhuaha dan ka tum alawm.. Chuvangin alawm ka rawn haw duh loh" a ti nghal hlawk hlawk. 

Pu Liantâwna pawh chuan, "E.. Ni tak e. Aw le.. Ka rilru a fim hman lo a nih kha. Fimkhur rawh aw. A tina che a nih chuan ka ka ka âng nghal ang" a rawn ti ve leh hnuhnawh a. 

"Aw le.. Ka dah aw.. Nang pawh fimkhur ang che.. " tiin Zoi chuan phone a dah ta a. 

"Mi á nu leh! " chu aw a hriat rual chuan a phone a thlauh nghal tawp. Inher in Mitmenga huatna leh hmuhsitnaa khata lo ding a pasal tur nen chuan an inhmachhawn ta ran a.. 

(A va tawp har tawh tak 😂😂