Escape 20/

ESCAPE.. (20)

Ziaktu : Toni Râlte

Pu Liantâwna pindanah Ephraime chu a thu ran mai. A rawn lut ve mek bawk a. Kawngka chu kalh leh te tein, Ephraime hmachhawn zawngin chair-ah a thu thla a. 

"Ka rilru thlak i tum hi a dik lo a ni. Ka ka ka an chuan, tu nge hremna hmu nasa zawk dawn kan hria alawm" Pu Liantawna chuan a ti hul hak a. A hlim loh hmel takzet. A mu tha vak lo bawk a nih a rinawm, a mitmeng dul ruih leh val kulh danah. 

"I thlak leh thlak lohah chuan ka buai lo. Mahse, inremsiamna kan neih a tha ang. I ka hi ang duh ni la, i hriat rual khan police i call tawh ang. Mahse, i ti lo. A chhan kan hre ve ve. Keiin ka kap a, a bul tumtu erawh nangmah i ni. Tualthattu i ni ve tho tih hi i pawm tur a ni" A lo ti dam dap thung. Pu Liantawna ang lo takin a faiin hmuh a nuam kher mai. A mitmeng lah a nung sar bawk a, nizan lama a thil tawn khan a tichak ve te pawh a ni mahna. 

Thawk la hawkin, "Zoi'n a duh ve reng reng em ni? Inneih chu.. Engkim a hriat tawh hnuah pawh" a ti halh a. 

"A rilru a la insual ve mek a ni. Ka nawr duh rih lo bawk. A hlauthawng rih êm a, hun pek a mamawh a ni.. Nang lahin i lo tibuai ve sek bawk nen" a lo ti nghet charh a. Pu Liantawna chuan a lu thak lo pui a hiat nuah nuah a, "Police lamin an chhui reng bawk si che a. Ka fanu leh police hi an inkaihhnawih ka remti lo asin. Man chhuah hun che an nei ngei ang a, ani pawn a tuar ve thei" a ti malh malh a. Pa tan tualthattu bula hun hmang tura fanu kaltir chu a awlsam hauh lo vang. 

"Min man theihna tur engmah ka hnutchhiah lo. Tin, ka bansan dawn bawk. Nangmah vang chauhin Sapliana pawh that ka ni. Min chhui chu an bansan hlawl lo naa an inthlahdul ve hret hret e" a lo ti leh mai a. A hahdam hmel bik mang e. Pu Liantawna pawn hlauh nei miah lo ang maia a awm thei chu a awt ru hial mai. 

"A nih chuan intiamkamna i nei ngei tur a ni ang. Inremsiamna te pawh a ni thei ang chu" a ti ta nge nge a. Ephraime chu a nui suk. 

"A tha alawm.. I duh pawh ka hriat ka ring. Mahse, han sawi ve reng reng la" tiin a melh kalh a. 

A chil lem khawlhin, hah hmel zet hian, "Ka fanu hi nupuia i nei anih chuan i phatsanin i tina tur a ni lo. Zoi hi a duh tawh lohna lama luhlul ve tak a ni a, a pasal i nih angin i dawm thiam tur a ni. Chuan, pahnihnaah ka thuruk hi Zoi hian a damchhungin a hre tur a ni lo. Ka thurûk chu i hriat kha" a ti ta mawlh mawlh a. Tuisik a in nghal khawlh khawlh. 

Ephraime chuan, "Mi nunna la thintu pawh hian mi tihhlim a thiam ve tho turah ngai la, phatsan thuah phei chuan.. Inphatsanna haw bertu ka nih avangin min ring thei ang. Chuan, pahnihna kha chu ka tan zawm a harsa lo ve. Kei chuan intiamkamna ka neihtir lo mai ang che. I makpa hi tantirin, i fanu i tirethei lo vang. " a lo ti dam dap a. Liantawna pawh a lo bu ve nghat. 

"Mahse, i chanchin, i mimal nun engmah kan hre lo hi chu a dik lo deuh. Zoi tan pawh a hrehawm ang. Aizawla i chhungkhat te nen inneihna pawh buatsaih ka duh a ni" a lo ti ve leh tlat. Ephraime a ner sawk. 

"Chhungte ka nei lo" a ti hmuk. Mahse, a nu pa, a pute chhungkua a mitthlaah an rawn lang nghal uarh. Zoi hi hmu ve se an ngaina ngawtin a ring. A duh dan chuan inneih pawn Zoi pa leh Pastor bak an awm ve tul tihna a nei lem lo. Mahse, mizo society a hre ve nual tawh a, khatiang ringawt kha chu Zoi tak pawn a duh lo ve thei. Hei zawng Zoi chhungte lam te thu pawh a ngaihchan a ngaiin a hria. 

"Lei atangin i rawn chawr chhuak ve tawp tihna a ni maw? " Pu Liantawna chuan ngeiawm chhuahin a lo ti a. Ephraime pawh a khi ve suk. 

"Pu ka nei ve alawm. Ni e, engtin nge chet lak dan tur ka hrethiam mai bik lo va. He tah hi chuan thurawn min pek pawh a that ka ring" a ti ve ta nge nge a. Pu Liantawna pawh dam kim lo teh mah se, Ephraimea'n a tlan khalh hneh si, tin, an man chhuah loha a eizawnna a bansan phei chuan chhungkaw pangngai tak an din ve thei mai pawhin a ring. Tihsual erawh a hlau ve takzet a ni. Tichuan, chanchin inhrilh tawn leh tura intiam chungin an inthlah liam ta rih a. 

Ephraime chu haw nghal lo vin a pute veng lamah a tlan a. A tlawh khat leh ta deuh a, bakah a tlawh ni lah khan hmanhmawh baklengin a kalsan leh kha a nia. A phone lah a off leh daih bawk nen.

"Awiii, ka pa, hei kan naute duat a lo kal" a nuteii chu a rak chul a. A nuteii hi hetianga phur ve hluai thin a ni tih a hrechiang. A nu nen an zia a inang tehchiam lo khawp mai. Mahse, a ngainat loh phah lo. Pu Thanliana pawh hmanhmawh takin room atangin a rawn chhuak a. Ephraime chuan a hmu tar sawt mai. Hun reilote chauh a ni asin mawle. 

"Ka pu, i lo dam tha em? I hriselna te eng nge a an? " a lo ti ve vat a. 

"Ka tha e.. Bawiha, i lo va lang leh har em em ve. Biak pawh theih lah i ni si lo. Kan lo mangang hman tawh asin" a ti khur dat dat a. A vun chuar tap leh a ha bal tawh te vanga a biang thâwp tawh te chu Ephraime chuan a en reng a. A pu hian rei a daih pawh a ring tawh lo. Rilru hah leh mahni inthiam lo reng rengin a lo awm tawh a, a nupuiin a boralsan ve leh zel bawk nen.. A tan chuan hringnun a harsa ve ngawt ang. 

"Ni e, ka zin kual ve leh alawm mawle.. Nute, ka number pakhat zawk ka lo sawi ang a, lo save rawh aw. Chutah chuan ka biak theih ang" tiin a nuteii chu a melh a. A number a sawi nghal bawk. A pute tawng ve hma chuan, "Ka lo kal chhan zawk chu nupui neih ka tum a. Nangni bak chhungte ka nei si lo va, engtia chet lak tur nge ka hre lo va.. " a ti ban chhalh a. A nuteii a lo phur leh tawh kher mai. 

"Awiii, a ni maw? Ka van lawm tak. Tu nge in nu tur chu? " a ti leh hliai a. 

"Zomuansangi a nia, a pa chu in hre maithei. Sumdawng lian ve tak, Pu Liantâwna saw a nia" a lo ti a. 

Pu Thanliana zawk chuan, "A khai! Liantawna fanu upa ber kha em ni? Ka hmu ve tawh alawm. Amah Liantawna pawh ka hre lutuk tlat.. I pi boral pawn min rawn ral ve vang vang alawm. " a lo ti vat a. Ephraime chuan mak a ti zawk hle. Chuti taka an lo inhre tha chu lawm tur nge lungngaih tur pawh a hrethiam lo. 

"Chuan, Bawiha, palai te i tir fel vek tawh tihna em ni? Khawiah nge i chen reng reng? Ti nge kan lakah hian i inzepa i inthup tlat mai le.. Chung nupui neih te phei chu man leh mual pawh keini tih tur a nia. " Pu Thanliana chuan a ti leh a. Ephraime chuan, "Palai maw?! " a lo ti hú! A bo map mai. 

"Aw palai an tir thin alawm. Nge in lo inru tawh zawk nge, inru pawh ni ula, palai chu tirh hrim hrim a ngai alawm.. Kohhranah te pawh thlen ve a a ngai a" tiin a nuteii chuan a lo hrilhfiah vat. Ephraime chu a var ta deuh. Mahse, chutiang thil buangbarthlak lutuk chu tih kher kher ngai pawn a hre lo. 

"Dik tak chuan, Kohhran pawh ka nei hleinem. Ramhnuaiah in ka sa a, chutah chuan ka cheng mai a. Zoi pawh ka bulah a khawsa a. In lo hre tawh maithei, pasal nei mai tawh tur a nia, mahse, a duh ngang si lo va. Kan inru ve ta tawp mai a ni. Chutiang vel chu a nia. Khatiang bung bung lo deuha felfai leh awlsam taka inneih dan a awm mai lo em ni? " a ti ve ta duah a. A chhungte awmchhun an ni bawk a. Han inthup tit tet hun niin a hre tawh bik lo a ni. 

Pu Thanliana chuan, "Inneih dan awlsam ber chu tlan koh ang hi a ni mai ang chu maw.. Mahse, man leh mual inhlanna hunserh te chu hman ve ngei ngei a ngai dawn a. Kohhran lamin inneih certificate an pek chhuah theih nan che u Kohhran hriatpuia in inneih a ngai dawn bawk a. Inneih certificate hi tun laiah chuan a pawimawh tawh si a. Bawiha, i nuteii te bakah i pu Rammawia (amah pu Thanliana nau) te, i pi Ziki (an nu lama an chhungte) te ho te pawh rawn ve an tha ang. Thil i ngai awlsam lutuk a tin nih kha. Ka tupa te inneihna chu ropui takin kan lawm ang chu le.. Ka inhuam thui khawp ania" a lo ti ta dap dap a. Ephraime chuan han hnial vak ngaihna a hre lo. 

"Dik tak chuan mizo society hi ka la hrechiang lutuk lo va. Chung inneihna chungchangte chu ka la hre lo va. Ni e, ka pu, in duh dan angin kan kal dawn nia. Mahse, lawm hup hup leh mipui sawm duah kha chu tul ka ti lem lo aw. Mikhual mai ka nih rih hi" a ti ta a. Pu Thanliana te pawn an hnial bik lo. A inlak bing chhan hre lo mah se; hetia mi dang hriat a duh vak loh chuan sawm duah an tum lui bik lo. Mizo nunphung a la hre chiang si lo va, an khawngaih zawk lek lek mai. Thu tam tak an sawi hnuah Ephraime chuan a hawnsan ta a. A ke pen a zangkhaiin a motor khalh pawh a dam reih rawih hle. 

A nu khan van atanginna rawn thlir ve ngei ang a, a eizawnna chungchangah hi chuan a lawm chu ring chiah lo mah se; a pu te nena hetia beisei loh taka an inrem hi chu a lawm ve tho a ring. 

"Nu, nupui hial neiin nakinah chuan fate pawh ka la nei ve maithei a. Hmu ve la ka va duh em" a ti chhuak ta hial a. Mahse, Alia'n a lo call avangin a ngaihtuahna atang chuan a harh chhuak nghal. 

"Aw Ali" a ti satliah a. 

"Buaina ka tawk dawn a ang hle mai. Eng pawh tawk ila, i hming erawh a ri lo vang. Tin, damchhunga jail-a nun hman aia tha zawk ka hre bawk" a rawn tih takah chuan a ding dawt. Kawngsir rem laiah a motor chu a park a. 

"Eng nge thleng? " a ti hrâwih. 

"Tunah hian hual beh ka ni tawh, passport ka siamtirna pain min lo hek khanglang a. Ka lu man a ît a ni mahna. Ka chenna thlengin an rawn luh chhuak tawh. Tunah chuan Jasmine tana in ka leisakah ka biru rih. Hei pawh an hre vat dawn, a chhan chu an kutah Jasmine a awm tlat a.. " a rawn ti ta a. Ephraime lungphu a rang ngei mai. Ali chuan man a tawh vaih chuan, amah vangah a ngai ngei ngei dawn. 

"Ni lo, Ali, an man lo vang che. Zaninah ka rawn chhuk dawn. Kawng a awm ang. Kan pahnihin kan hmachhawn ngei tur a ni" a ti chang fak a. A mitmeng pawh a thim leh hmuk tawh. 

"Aih, hun kan nei tawh lo.. Ephraime, inthiam lo duh suh. Engmah tihsual i nei lo. Ka lo inringtawk mah mah a, ka lo fimkhur seng lo deuh nen.. Hetiang hun hi keini chuan kan la hmachhawn dawn tho tho.. Fimkhur la, nang chu inmantir hlek suh ang che" a rawn ti ve tlat! Ephraime erawh chuan a rilru thlak a tum bau lo. Inneihna, Zoi tih vel a ngaihtuah chang meuh tawh lo. A thiantha ber, a tana mi pawimawh em em, a tana nun hlan hial pawh hreh lo turin buaina a tawk a. Mizoram atangin a lo thlir liam mai mai thei lo tawp ang. 

"Ali, rilru fim tak lo pu hram hram rawh. Hei inah ka haw ang a, ka insiam ang a, ka rawn chhuk nghal ang. Min hnial suh ang che. I theih chen chen lo biru phawt rawh" a ti nghet charh a. Phone dahin chak zetin a lim nghal puat a. A insehruh nasa khawp mai. A chang leh Inspector Sangliana vangah te a ngai thul. A chhui peih lutuk vanga hetiang hi thleng niin a hria. Buaina kan tawh hian mawhpuh tur kan dap ruai ve thin bawk a ni. In a thlen chuan Zoi chu a lo muhil a. Tihtur nei hek lo le. Ephraime thawmah a rawn harh a, "I lo haw tawh law" a ti ţial rian a. Ephraime lah chuan a thawmhnaw tam lem lo chu bagah khung chawt chawtin, Almira hawngin document thenkhat leh pawisa thahnem tham tak a la chhuak a. Zoi chuan mak ti zetin a en reng ringawt. 

"Eng nge awmzia? " a ti hliai a. 

"Shillongah ka chhuk dawn. Nang pawh i pate inah i lo awm rih a ngai ang. Ni engzat nge ka cham dawn ka hre si lo va" a ti mawlh mawlh a. A hmanhmawh hmel kher mai. 

"Mahse, ti teh thut nge? " hrethiam lo takin a lo ti a. 

"Alia'n buaina a tawk. Man tumin an hual bet mek. Ka mantir thei lo. Ka puih a ngai.. Hawn chu i hreh em? Hector pawh i lo enkawl rih mai dawn nia aw" a ti nghut nghut a. 

"A nih chuan, ka insiam ve loh ten.. Bakah naktulah kal mai la..a tlai tawh e" a lo ti ve leh sap a. 

"Minute khat lek pawh hi a uiawm tawh.. Ali nunna a derthawng zel alawm" a ti hniam raih a. Zoi pawn an inthian thatzia a hriat tawh vangin chuti taka Ephraime hmanhmawh chu a hrethiam ve tho mai. Hmanhmawh deuhin a va insiam ve ta nghal a. Thawmhnaw zawng zawng pawh ken tul a ti lo. Inah khan a hnutchhiah nual tho a. A buai lo vang. An insiam zawhah Ephraime nen chuan in chu an chhuahsan ta a. Hector pawh Zoi'n a pawm hlu hlu a. Thu a awih kher mai. Kawngpui an la chuang chhuak lo deuh ang tihah chuan, Ephraime chuan call a dawng a. 

"Jasmine maw? " ti sup chungin a pick up a. Jasmine ţap hlawp hlawp ri a hre nghal. A ding dat a. 

"Jasmine, eng nge thleng? " zaidam hmel zet hian a ti a. Mahse, a insangmar nasa hle tih Zoi chuan a hre thei. 

In hnit hlap hlap chungin thei leh thei lo hian, Jasmine chuan, "Ali a thi.. A thi ta" a rawn ti ta a! Ephraime chu a ngawi dat. Hmalam a melh vung vung bawk. Zoi chuan an tawng te chu a hre pha ve vek a. A lo chhing sawk. 

"Tu nge? Sawi rawh. Tu phiangsenin nge that? " Ephraime aw chu a hlauhawm kher mai. Zoi pawh a îp chawih thei hial. 

"Amah a ni. Amah, Ali chu a inkap hlum ta a ni. Police kuta awm ai chuan tiin" Jasmine aw pawh a felfai ta deuh. Ephraime tawng leh hmain, "Keimah vang a ni, Ephraime, Police ten min kawl a, Ali bulah a inpek loh chuan keiman ka tawrh tur thu an hrilh a, Ali chuan min hmangaih tih i hriat kha. Ka tawrh ai chuan a thi ta a ni" a rawn ti tham chhal a. A ţap leh hlawp hlawp bawk. Ephraime chuan phone hmet hlumin steering chu a chum nghek a. Motor atanga chhuakin motor ke chu a chhuih nghek nghek mai. 

"Uicho ho, nangmahnin vangin khawvela ka thian neihchhun lak boin a awm leh ta. Eng nge ka tihtheih in la hre mawlh ang. A mal te tein in hnuk ka la rawn chhat mawlh dawn e.. " tiin a au khawk rum rum a. Zoi leh Hector chuan hlau em emin an lo thlir reng ringawt. Chhuah pawh a chhuak ngam lo. Ephraime lah a inhrosa kuk kuk mai si. Kawngpui an la pawh lo chu a vanneihthlak zawk. Mi ten lo hmu se a tihchi loh dawn lutuk. Leiah chuan thu hnawkin mipa inti pa ve tak, nunna eng emaw zat lo laa awlsam taka mi hnuk chhat thintu chu a ţap ta a! 

"Ali, min lo nghak thei ngang lo a ni maw? " a ti khur dat dat a. Naupangchhia ang maiin leiah chuan a nuar a ni ber mai. Ali hi a tan a hlu em bawk a ni. Dik tak chuan amah vang a ni ve pakhat bawk nen, Sapliana kha amahin lo that mai se chuan Ali a la dam tur.. A pawi takzet a ni. Zoi chu a insum zo ta ngang lo aniang. A va chhuak ta nge nge a. A bulah chuan thu vein a hnungzangah chuan a chulsak heuh heuh a, a thiam ang tawka hnem ve a duh a ni. 

"Ka hrethiam lutuk che. Mahse, insum hram hram teh.. Ali a rawn tho leh thei tawh lo". A ti sep sep a. 

Mitmeng sen rúm chunga lo dak chhuakin, "Ali chu a rawn tho thei lo a ni thei. A nunna latu te pawh tho leh tawh ngai lo turin ka la mutthilh ve ang" a ti vawt raih a. Zoi chuan a râp lek lek. A ti ngei ngei ang tih a hre bawk. 

"Phuba i lak avang khan i hlim phah dawn lo. Ali pawhin a duh ber a ni lo vang" a ti tak naa, Ephraime mitmenga tumruhna leh huatna chu a nasa lutuk mah mah. Chuti maia nuai reh chi niin a lang lo. Ephraime chu a tho vut a, "Khaw nge i kal dawn? " a lo ti vat. 

"Ka thiantha ber ka thlah liam dawn" tiin motor lam a pan a. Zoi'n a zui ve vat. 

"Ni lo, Ephraime, kal suh. Shillonga i chhuka an hmuh che chuan an ringhlel sawt ang che. Mizoramah pawh an veg reng che a, i kal tih an hre vat ang. An ringhlel tawh sa bawk che sia, an man ang che" a ti mawlh mawlh a. Ephraime banah chuan a vuan ta tlat. A ding ve chut a, Zoi chhuk melh run chungin, "Min dan tum buai duh suh. Duh leh min man ang hmiang. Ali ruala ka thi ve lo hi ka tan chuan tlawmna a ni zawk" a ti chang rút a. Zoi chuan hlau ru deuh chungin, "Anih chuan kei hi le? Kan innei dawn a ni lawm ni? " tiin a melh kâwk a. 

Ephraime chu a ngawi deuh dat. Thil ngaihtuah eng emaw tak chu a nei chiang. 

"Ali ruang hmu lo turin min duh a maw? " a ti hrâwk a. A mitmeng a thim leh ţan tawh. 

"Ali ruang i hmuh vanga an man dawn ai che chuan, aw hmu lo la ka duh" Luhlul zetin Zoi chuan a lo ti ve hmiah. Ephraime chuan Zoi kut chu a thingthla lawp a. 

"Ka tana Ali pawimawhzia hria la, khatiang khan i ţawng hlek lo vang" a ti hmuk a. Motorah a lut nghal. Zoi luhlul laklawh chu a ding ve tlat. Motor a start a, Zoi luh hun chu a nghak ve deuh niawm tak a ni. Ani a lut duh bik der si lo. 

"I lo lut dawn nge dawn lo" a ti bung nghut a. 

"Dawn lo" a lo ti ve fak. 

"A nih chu.. Mang tha le" tiin a tlan ta mai a! Zoi chuan makti em emin a thlir tawp. Ephraime chu a haw lutuk tlat! Engtin nge ramhnuaiah a tlansan theih zawk? A nupui tur a nia, a lusun rilru na chu eng pawh ni rawh se, ngaihsakna tlem tal chauh chu a phú ve a ni lawm ni? Kawngsira hnahthel ro tla zingah chuan a thu tawp. A tah a chhuak a, a tawt up up. A phone lah motorah khan a awm daih bawk si. In lamah let dawn ta se, chabi a neih loh chu thuhran, a hla tawh mah mah. Ephraime khan a tlansan duh a ring miah lo asin le. 

"Mi ã pa, ka va nei dawn lo chiang che em.. I nihna engkim hi ka puang fai vek ang. Thih i duh alawm.. I thi anga a ni mai" a ti bawrh bawrh a. Amah leh amah a inkhawngaihna chuan a mittui rawn ko chhuakin a'n ţap leh rih a. A tette atanga nu ngai reng reng leh pain a ngaihsaka a ngaihven ngai loh niin, nuhrawn a hrawn hnuah tlemin a nun a nuam ve ta deuh chauh a. Chu tah pawh inenhranna tlem tlem awm thin chu a hai hek lo. Sumdawnna hmanrua atan hralh a ni a. A tlanbo hnuah hralh nawn leh a ni a. Mahse, Ephraime a rin vangin a tlanbo a, nizan lawkah a taksa thianghlimna a chensak a. Tunah ramhnuai kar kawngah hnutchhiah a ni leh ta bawk. A nu kha la dam se chuan a nun hman dan pawh hi a danglam ngei a ring thin. Hnahthel chungah muin vanlama arsi pe un te chu a thlir mai mai a. A ţahna mittuiin a mit a chiahpiah vang ni maw, a mut a rawn chhuak chiai chiai a. Hlauhawm pawh ngaihtuah chang lêk loin a maimichhing ta a. Engvanga ramhnuaiah, zanah lehnghal hlau miah lo va muhil thei nge a nih ni? Pathianin a awmpui a ni ngei ang. Amah pawn a hnua a ngaihtuah leh hian mak a tiin a hlau leh hnuhnawh thin. Thawm eng emaw hlekah pawh hlauthawng nghal ringawt zel kha a ni si a. Mahse, chumi zan chuan sava hram thawm bak thawm vâng engmah hriat a nei lo. 

"Mawl lutuk" tia phun hluk ri chu a mumang emaw a ti a. Mahse, "I dawihzep loh tawp kha" a rawn tih leh takah chuan a harh ta kâwk a. A han men chuan a mutna bul maiah a lo ding luah a, a rawn chhuk melh run bawk. A thu chhuak vat a, dar engzat nge a hre lo. A muhil rei nge rei lo tih pawh a hre lo. 

"I lo leh leh maw? " a ti sap a. 

"Nia, let leh. Ka nupui tur hi ramhnuaia a riah ringawt ka phal hleinem" a ti dam thlup a. A hmaa a thinurna te kha chu hmuh tur a awm tawh lo. 

"Mahse, Shillonga kal tur i ni sia" a lo ti niah niah a. 

"Nia.. Mahse, i sawi dik. Ali chu a lo tho tawh dawn lo" a lo ti nghut a. 

Rawn melh kâwkin, "Haw ang" a ti leh sup a. Zoi pawh chuan a zui ve mai bawk. Ephraime rilru thlak chuan a lo huatna leh thinurna te kha an phetthla chiang kher mai. Vawm bo ang duak an ni. Ngawi rengin an tlan dun mawp mawp a, sawi tur a vâng deuh aniang e. Hector pawh a ngawi ve kar mai. In an thleng a, an thawmhnaw te chu Zoi chuan a dah fel zung zung a, a lo tlai ve duai tawh mai. An intihfel zawh meuh chuan, mu turin roomah an lut nghal. Zangthalin ngawi rengin an mu dun a, rei vak loah chuan Ephraime chuan, "Vawi khat ka hna ka thawk leh ang a, tichuan kan innei ang" a ti nghut a. 

Zoi a meng râng nghal. 

"Tu chu nge i target leh tak? " a ti nghek a. 

"Kha mihring, inla police, hnuchhui thiam ber anga inngai kha mawle" a lo ti ram hmak. Inspector Sangliana a sawina a ni tih a hai lo. 

"I that a nih chuan an man chhuak tawh ngei ang che" a lo ti vat a. A hlauthawng a ni. 

"A pawi hleinem. Pasal tur mi dang an tam alawm" a lo tihsan hmiah. 

"Mahse, Sangliana chuan eng nge mawhphurhna a neih a? " a lo ti leh nghek. 

"Tam takin a nei. Ka mimal nunah pawh a inrawlh tam mah mah. Ali kha zawn chhuah tumin phi ruai lo se an man miah lo vang. Chuan, a thi lo bawk ang" sehchilh deuh nawk nawk chung hian a ti a. 

Zoi chuan dik ve thoin a hre sia. Chhan ngaihna vâng a ti angreng viau. Mahse, a intiluhlul ve tlat a. Ephraime hi a rilru thlaktir a tum tlat a ni. 

"I that lo vang. I thah lohna tur kawng ka dap ang" a lo ti ve hmiah. Hlau chung chunga a sawi a ni bawk a, a aw pawh a khur deuh. 

Ephraime chu a inbeng kang a, Zoi melh kâwk chungin, "Nang tereuh hian min thunun tum khanglang suh" a ti hul hak a. Zoi'n a chhang ngam tawh lo. Chhan luih ngam chi ni nghal lo chuan.. an ngaihtuahna kawm chung zelin an muhil ve ta a. 

Ali thihna boruak chuan Shillong khawpui a chiah hneh hle. Proffessional Killer a fám ta tih chu an sawi dan a ni. Mizoram lam pawn an lo hria a. Sangliana te pawh an thaw huai mai. Tunah chuan case an close thei ta tih chu an ngaihdan a ni. Chutia an tih mai loh chuan chhui chhuah tik ni an nei thei si lo va. An tan chuan Ali thihna chu thawk huaina tham a tling ve reng reng e. Mahse, thihna chuan banzai a rel meuh ang e maw.. 

Jenny chu a zai rât rât a. A thawven hmel kher mai. A chhan chu vawiinah hian Ephraime hmel a hmu dawn tlat a. Zoi nen an inbe fel tawh a. An inah zanriah an eiho dawn a ni. Zoi chuan Ephraime rilru na leh lusûn tih thawven nan chaw ei khawm a rawt ta tawp a ni. Ephraime pawhin a lo hnial hran lo va. Mahse, dik tak chuan a rilru a chawl meuh lo. Amah pawh a tla ve kuam mai. Ali thihna zet chuan a deng na thawkhat hle tih a lang. A ruang vuinaah pawh a kal ve thei ta si lo. Zoi tanna lam chu dikin a hre ve deuh bawk nen, bakah phuba lak ngei a tum si a, phuba a lak hmaa Police kuta tluk luh chu a hlau ve bawk a ni. 

"I inpeih tawh em? " Jenny chuan Lawmsanga chu a va bia a. Ani chuan phur fahran lo hian, "Inpeih thawkhat.. Zep loh chuan ka châk lem lo khawp mai" a lo ti a. Jenny a chek hlak, "I ninawm.. Mipa takin awm rawh" a lo ti hlak hlak. 

Lawmsanga'n a rawn lam a, Ramhnuai lam an pan dun ta nghal a. Zoi pawh a lo inbuatsaih ve nasa a, inrem taka khawsak chu a duh ve em em a ni. Jenny bak hi thian tha tia chhal ngam a nei bik lo va, thian chu ngah mah se, a thuruk leh a engkim hrilh ngamna chu Jenny a ni tlat. Ephraime lakah khan thik deuh mah se, amah Jenny ber a rawn inphah hniam êm a. A tan lo pawm mai loh chu kawng dang a awm lem lo. Lawmsanga a huatna leh ngeinna pawh a nasa tawh lem lo, a pa a lo sún ve kher nen a khawngaih ve letling tawh. A pa thattu chu Ephraime a ni tih hre ta se, engtin tak ngai ang maw? Ali kha kutthlaktu zawk mah nise, Eohraime hmalakna vek a ni tih a hai bik lo. 

An lo thleng a, an ri hlut mai. Ephraime erawh study roomah a awm rih a. A la rawn chhuak lo. 

"Awii mate, i thau ve deuh tawh.. I lang tha tawp" Jenny chuan a ti sar sar a. Zoi pawh a khi sak mai. 

"Nang pawh i lang tha tawp" a lo ti ve mai a. Lawmsanga erawh an bulah ngawi rengin a lo thu ve mai mai. 

"Khaw nge inpa chu" Jenny chuan inthlahrun hmel angreng tak hian a ti a. 

"Ka'n ko ang e" tih leh thawh a rual nghal. Study rooma awm Ephraime chu koin, "Lo chhuak ve la" a ti sap a. Phur hmel fahran lo hian, " Aw le.. " a lo ti mawl tawp. Kar loah a rawn chhuak ve a. Han tawng lumlam dan tur a hre tehchiam bik lo. 

"Awii, Ephraime, lo haw lo la, hmanni tualthattu amah intihlum ta Ali nen khan in inang deuhin ka hria.. Tiraw, Zo" tiin Jenny chuan zoi chu a melh zauh a. Zoi mitmeng danglam zawk chu chîk zetin a melh bawk. 

"Nia, an palian dun tawp" a lo ti ringawt. 

Ephraime chu a nui hawk a. 

"Kei aiin a hmel tha zawkin ka hria" a ti thum chhak a. Jenny rin loh lam daiha a chhan vang chuan an hrilhhai hmel deuh. 

"Kei chu sawi takah chuan Kha pa kha ka khawngaih.. Tual a that tak tak em tih tuman an hre bawk si lo va, rinhlelh ringawt kha a ni sia.. A rukin tualthattu hi a la inphum ru reng thei tlat" Jenny chuan a ti leh sar sar a. Ephraime hmelah danglam engmah a awm lo. A nghet tlut mai. Zoi erawh a insum zawh loh a hlau nge, "Theitui ka va siam ang e" tiin a tho daih. Jenny thusawi duh dan chu a ngaina tlat lo. 

Lawmsanga pawh chuan, "Nia, kei pawh ka lo tia. Mizoram lama tualthahna nen te an thlunzawm vek ringawt a. Ani Shillong ami daih daih khan a rawn thah ka ring chiah lo. Ka pa thattu a nih pawh ka ring thei lo" a lo ti var a. An sawi dun tawh sa vek a ni awm e. 

Ephraime chuan Cigaratte tan kaiin a hip vang vang a, "Mizoram police te hian an chhui chhuak thei ngang lo a nih awm hi a.. Nep lutuk. Kei te hi min chhuitir ve se, ka chhui chhuak tawh ang" inringtawk zetin a lo ti hmiah. Hei pawh an beisei dan ang a ni leh ta lo. Zoi chu thei tui chawiin a lo kal a. No an la diat diat hlawm a. 

"Chuan, Lawmsanga nen hian innei daih u la" tiin topic dang a vawrh a. 

Lawmsanga a nui hawk hawk. "I van sawi awlsam ve, chuti maia awlsam a ni bik nang" a lo ti a. 

Jenny pawh chuan, "Innei hmasa phawt r'u.. Mo thianah ka ţang chak tawh ania," a lo ti vat a. 

Ephraime zawk chuan, "Mo thian tih vel ang pawh khan inneih kan lo tum hleinem. Ho lam deuha tih mai kan tum asin" a lo ti satliah a. Zoi erawh a ngawi daih. 

Chutianga titi pah reng chuan an ri ve hlut a. Zanriah ei hma, khua a la thim hma si chuan, in bul huan leh tuikhuah te chu an fang kual a. Jenny leh Lawmsanga erawh an hawi kual nasa mai a. Hmuh hmaih neih an tum loh hmel khawp mai. Mahse, an duh leh beisei ang erawh an hmu ta chuang lo a nih hmel. In chhung luh dawn phei chuan beidawng leh hrilhhai hmel an pu lek lek tawh. Zanriah chu an kil ho ta a. Wine an lem tel hlek bawk. Zoi'n a thiam ang tawka a siam a ni bawk a, tui an ti tlang hle. 

Lawmsanga wine kai hlek chuan, "Zoi hi chu nupui tha tak i ni ngei ang. Eisiam i thiam si.. " a ti leh zauh thin. Jenny mitmei a hrethiam der si lo. Zoi leh Ephraime an in nuih tet tet reng mai. 

"Ephraime, Zoi nen innei ula, hetah hian awmpui i tum em ni? " Jenny chuan a ti khauh a.

"Zoi duhthlanna a ni mai. Khawpuia awm a duh pawhin ka hnial hran lo" a lo ti mai a. 

"Khawpuiah awm ve r'u, in tlawhpawh a nuam ang. He lai chu a hla ve lutuk a, bakah Zoi pawn a hlau ve thin ang. A dawih tih ka hre chiang si" nui chungin a ti a. An chhang tawh lem lo. A hma anga inpawhna tak tak kha awm rih lo mah se, Zoi chuan hma an sawn hlein a hria. Jenny te rilru hre hauh lo mah se, Ephraime nen chauha zan tumtawi reng chu a ning ve deuh tawh a. Titipui tur an lo awm ve ringawt chu nuam a ti a ni. Dar 8 bawr velah Jenny te nen chuan an invai liam ta a. 

An mut hmunah, "Naktukah ka pu ten i pa te hnenah palai an tir tawh dawn a. Inneih hma chu i duh chuan in inah i awm rih thei tho ania" Eohraime chuan a ti a. 

"I thil tum ka hria alawm" a lo ti nghat. 

"Chumi vang chu a ni lo. Min dan tum mah la, ka kal tlang tho dawn tih i hria" a lo ti hniam ruih a. 

"Aih, ka tihtir dawn lo che ka tih tawh kha" a lo ti ve tlat! Wine kha a duh aiin a lem hnem ve deuh nen, a lu a hai ve chhap a. A thawvengin zalen riauin a inhre bawk. A inrin hmain Ephraimea'n a rawn kuai her sawk, nghet zeta a awma kuah betin a lungphu dup dup chu a ngaihthlaktir a. Na zeta a sam leh hnungzang vela hrâwm chung chuan, "I tum thiang alawm. Mahse, ka ti dawn tihah chiang ang. Ka kawng daltu nih i hreh loh chuan, i nunna hi ka hlut bik ring duh reng reng suh" a ti nghut nghut a. 

"Min tina a nia.. Min thlah teh" Zoi'n a lo ti thung. Zoi chu a kuai dak âwrh a, a lo tal ve aih aih naa, a rawn bawhthuah hmiah, a lianin a rit si, Zoi tan chuan thawk pawh a harsa lam a ni. 

. "Ephraime" a ti ţâwk ţâwk a. 

"Ka thin tihrim i chak hle a nih hi.. I hlawhtling mawlh ang" tih leh na zeta rawn kiss a rual nghal a. Zoi chuan a lu a thle tawn nsa mai. Mahse, tharumah hneh ngang hek lo, a hmui te chu a pet fanin, dim lo baksak hian a fawp ngâwng ngâwng a. Zoi na ti mahni inkhawngaih bawk si chu a ţap pur tawh mai. Chutah Ephraime chuan Zoi kawr hak lai chu a phiha phihin a pawt ţet hawk a,bra a hren loh vangin a hnute a lang var hai mai. 

"Ti suh. Ti miah suh" Zoi chuan thinrim zetin a ti mawlh mawlh a. 

Ephraime chuan a chhang lo. Ngawi rengin a che mawp mawp ringawt. A kekawr kawng a pawt vak a, pyzama pan thler thlawr a ni bawk a. A tet leh hawk mai. Tah zet chuan Zoi chu a tap chhuak ta a. "Khawngaihin" a ti tuar. 

Ngaihsak a ni eih lo. Ephraime chuan a kekawr tet kar atangin a kekawrte chu a va phih leh a, tunah chuan Zoi chu tharum hmanga hnehchhuh theihin a awm ta. Mitmeng khawngaihthla la zeta han melh chho tawk tawk chungin, "Ephraime, ka duh lo. " a ti ta ngawih ngawih a. A mitmeng thim raih mai chuan a rawn melh ran a. Reivak loah khum atanga thawhsanin, "Inha tha rawh" a ti nghut a. A kut hum ruh nasatzia chu Zoi'n a hmuh hmaih lo. A rilru a insual nasa hle aniang. Hmanhmawh zetin a thawmhnaw dang va lain a inthlak mawlh mawlh a. 

"Study roomah ka mu ang. Naktukah i pa bulah ka hruai haw ang che. Inneihna a thleng lo bawk ang. Hahdam rawh.. " ti hul hakin Zoi chu a chhuahsan ta a. Zoi'n mittui kar atangin hrilhhai zetin a chhuak tur chu a rawn melh ţâwk ţâwk a…