ESCAPE… (19)
Ziaktu: Toni Râlte
"Khawngaihin" Zoi aw chu a ri chang chang a ni. Hlauhnain a tuam mup mup a, a chesawn hleithei der bawk si lo. Muangchang fahran hian a rawn pan chhat chhat bawk si a. Ephrame hmel thim mak mai, luhlul hmel zet chuan a tihlau takzet a ni.
"I hria tih hi ka hriat loh i ring reng reng em ni? Ni e, i pa pawhin a hria.. Tihtheih erawh in nei pafa lem lo ang" a ti hul hak hak a. A awki te thleng chuan a danglam niin a hria.
"Ka sawi chhuak lo vang, min kal tir rawh" Zoi chuan khur der der chungin a ti a.
A nui huk. A khabe-a rawn chawi kan pahin, "Ka kaltir ang che maw.. Mumang leh duhthusam sawi hun a ni lo" a ti hniam raih a. A dehna te chu a sa ham ham niin Zoi chuan a lo hria. Nula induhtawk leh chhel ve tawka inhria kha EPhraime hmaah chuan a khur hlum lo chauh chu a nih hi..
"Ka sawi miah lo vang. Sawi duh ni ila, tunah pawh Police ka hrilh thei alawm" A lo ti ve ţâwk ţâwk a.
Ephrame chuan hnai zeta rawn melhin, "Ka hria alawm. I sawi miah lovang. Mahse, ka nupui i nih a ngai a ni" a ti hriam hraih a. A sawi awmzia hrethiam lo takin a lo melh let hâw.
Nuih leh suk pahin, "A chhan chu i pasal nih ka duh a ni" a ti a. Tlemin a aw chu a nem ta deuh.
"Enteh, tualthat thin bulah chuan engtin nge ka chen reng theih ang? Nupa nih chuan fa te kan la nei ngei ang a, an pa chu tualthata eizawng a ni tih an hriat ka phal i ring em ni? " huaisen sawtin a inhria. A chhan chu Ephraime chuan a tina lo vang tih a ring tlat.
Ephraime chu inngaihtuah niawm takin a ngawi hlek a. Chutah fiah zetin, "Bansan ka tum lai takin mi pakhat pawimawh tak avangin chet ka la leh zawk anih kha.. Pawisa ka ngah tawk tawh a; Eizawnna kawng dang dap ka tum mek a ni" a ti ta a.
"Mahse, an chhui reng si che a. Man chhuah hun che an la nei ngei ang. Chutih hunah chuan kei hi engtin nge awm se min tih? " a lo ti ve salh a.
"Min man tur nise hman hmanah min man tawh ang. Sawtiang thluak kawrawngho sawn min man lo kumkhua ang.. I tan ka awm reng ang. Min ring em? " tiin a rawn hnaih sawt a. Zoi chuan inveng ru deuh chungin, "Hun ka mamawh a ni" a lo ti sap.
"Ka hrethiam alawm.. Hahdam rawh. Ka nawr sek sek lo vang che " a ti dam thlup a. A hmaa a hmel chang rút kha an bo zo leh vek tawh. Ephraime dik tak a ni leh tawh. Zoi hlauhna pawh a kiang ta duak e.
"Hello" Pu Liantawna chuan a ti a. Pindanah a lut a, a inkalh khum nghal bawk.
"I fanu hi ka nei dawn a ni. Sawi buai i tum anih chuan, Pu Zaia leh Sapliana thihna chungchang hi i fanu bulah ka zep reng hauh lo vang" ti tu aw chu nem teh mah se; a ti mai mai lo tih erawh a lang si.
"Ani kha chu pawt lut ve lo hram rawh. Khawiah mah ka sawi chhuak lo vang' Liantawna chuan tlawn titih hian a ti a.
"Ka hna hi ka bansan dawn ti ta ila, i rilru te i thlak thei em? " nuihzat hmel lek lek hian a rawn ti leh a.
"Mahse, man hun che an la nei dawn asin" a tih rualin Ephraime an man ruala a hming lang ve tur chuan a tithlabar nghal.
"Man theih loh ka nih hi.. Min man lo vang" a lo ti nghet charh thung.
"Kan sawi tha dawn nia. Hmaichhanah" Pu Liantawna chuan a ti a. An nu thawm a hre ta bawk nen, phone chu a dah ta a. Pi Lawmi chuan an pa awmdan danglam ta riau chu a hai hlek lo va. Eng emaw tak a hriatpui ve loh a tawng niin a hria a, han zawh dawt lah a hreh ve bawk si. Pu Zaia leh Pu Sapliana thih dan a han ngaihtuahin Police lamin an pa an rawn ringhlel pawh kha mak a ti hran lo. An pa thah chu an ni lo ang a, mahse, inrawlhna a nei ve maithei. A chhan chu an pa sumdawnna a ngaihtuahin hetiang lam pawh hi a thleng ngam em em ang tih a ring tlat a ni. Hausain pawisa ngah teh mah se; an lakluhna a ngaihtuah chang chuan a thaw a ippik a, a hah hluah hluah thin. Duhâm hian chinlem a lo nei lo bawk nen. An pain bansan a tum te khan dik tak chuan a lo ui tawh hial zawk. Mahse, bansan chu tha zawkin a ngai ve tho bawk si. A fahrawn Zomuansangi a kal bo tawh a, an chhungkaw bila an han awm takah chuan nakina an fate hmakhua tur ngaihtuahin a rilru a sèng nasa thei ta viau. Mahse, an pa hian Zoi hi a ensanin a thlauhthla dawn miah lo tih a hre tho. Ama tawkah a rilru a siam ve bat bat thin a ni.
Lawmsanga te nufa an khawngaihthlak bawk. A nu phei chu a ţap reng mai nen, Lawmsanga tak pawh hmeichhia angin tap hawm hawm lo mah se, a mut hmunah te hian a mittui a seng ve fo mai. A pa khan dik lo takin sum lalut thin mah se, a hausakna zar zo ber chu amah hi a ni tlat a. A pa zara thaw lian ve thei, nu tam takin makpa atana an awh a ni a, a pa zar vek a ni. Tunah a pa ai a awh dawn ta chu a nia. Thiamna leh tuina tak tak a nei ve lo nen.. A pa sumdawnna pawh a thamral mai a rinawm. Pi Teremi zawk chuan pawi a ti lo nasa. Hlauthawng thinphu dep depa thangkhat lian tehmeuh a lo awm tawh vangin, an pa thihna chu tuar hle mah se, a eng emaw zawng chuan a thawl hawk zawk emaw tih tur a ni. An pa nun kha a tha lem lo bawk a, mi kut tuara a tualthi ta mai hi mak a ti hran lo bawk. Mahse, a thattu erawh man chhuah ngei nise a duh takzet a ni.
"Lawmsang, inah i awm em? Ka rawn leng dawn a" Jenny aw chu a zangkhai hle. Sapliana thih sarhu lai zawng zawng khan Jenny hi Lawmsanga te nufa tan a tangkaiin a hlu em em a ni. Fanu fel tak angin a tawiawmin inleng chuangkai te lah a lo dawngsawng thiam em em a. Lawmsanga tak pawn heti taka an laka Jennyin that a chhuah hi mak a ti hial zawk. Zoi avanga inkawm ve chauh kha an ni bawk nen.. A ngaina chho ve ta viau bawk.
"Awm e.. Lo leng rawh" tiin a chhang a. Chawhmaah Jenny chu a rawn thleng a, eitur eng emaw a rawn lei nual bawk. Pi Teremi'n a lo chiau au chul a, khawpui hi zawng thih ni bak hi kan inlenpui hman tak tak tawh lo bawk a. Chhungkhat tak tak bakin ka tawiawm thei meuh tawh lo a, chutiang kara a hun hlu tak senga a rawn tawiawm thin chu a hlu ve bawk a ni.
"I roomah inkawm lawk ang.. A pawimawh" Jenny chuan Lawmsanga bulah a ti sap a. A hmel pawh a tak ran mai. Eng thu tak ni ang maw Lawmsanga chuan a ti rilru a.
Room lamah an inzui lut ta a.
"Zoi bialpa kha Police lamin an ringhlel a, an chhui char char" A ti phawt a. Lawmsanga a bangbo deuh.
"Engah chuan nge an rinhlelh a. " a lo ti hú a. Jenny chuan nin hmel zet hian, "I mawl siah.. Tun hnaia mi panga lai thihnaah khan, tualthattu a nih an ring. I pa pawh kha a thah a ni lo vang tih a sawi theih loh" a lo ti hlar a. Lawmsanga'n a ngaihtuah thiam ţan.
"Mahse, ti nge an rinhlelh chhan ber le" a ti a.
"Ka hre bik lo. An sawi vek si lo va. Ka pa thattu a nih teh chuan, ka nasa khawp ang. Zoi thleng khuan a tuar ang" tiin a inhrosa a.
"Tichuan, eng nge min hrilh chhan? " a lo ti leh he hâw a.
"Police kan tanpui ang. I tan pawh phuba lakna a ni mai. Zoi atangin bul kan tan ang a, kan pahnih hian inngaizawng angin kan lang ang a. A hmaa kan boruak kha kan siamtha vek ang. Tlawm takin kan dawr ang a, inclose em em anga kan awm leh theih nan. Chuan zawi zawiin Zoi chu kan chhimbudawi ang a, an in te pawh tualthahna hmanrua a awm em tih te thlengin kan chîk ve ang a, eng emaw kan hmuh chhuah hlauh chuan, an pahnih hringnun chu a chhe nghal a ni mai" a ti ta zat zat a. Jenny hmelah chuan thinrimna leh mi tihnat duhna hmel a khat hliam mai. Engvanga chutiang rilru chu pu ta mai nge a nih tih chu hmangaihna kalsual vang ti ila a fiah ber awm e. Ephraime chu a la duhin a la vei reng. Mahse, amah hnawlin a thiannu a thlang zawk a, khati khawpa tlawm khan a siam a. A hmangaihna kha huatnaah a inlet chho mek a ni. Zoi tihnat ve a chak bawk a, a tihnat theihna tur ber chu Ephraime tihchhiat niin a hria. Chuvanga hetiang idea hi nei a ni.
"Min lo lawm tawh awm lo em mai" Lawmsanga'n a ti nang nang a.
"Nep viau thin suh. Chapona te pawh nei ve ta che. Zoi'n a tihmualphozia te hi ngaihtuah rawh. " Jenny chuan a lo ti leh zung zung.
"Bakah an awih bik nang" Lawmsanga chu a phur lem lo tih a lang reng mai.
"An awih turin kan khawsa dawn reng alawm. Hun pawh a ngai rei deuh ang. Police lam pawh an lawm viau ang" a lo ti leh ham ham. A huphurh loh hmel khawp mai. Lemchan lam chu a ti thang a ni châwk ang chu..
"Aw le.. Engtikah nge kan tlawh ang? " a ti ve ta a.
"Zoi hi ka be phawt ang a, kqn boruak a ziaawm hunah kan zuk tlawh dawn nia.. " a lo ti a. Room atanga chhuakin an chhun ei tur an siam ta a.
Sangliana chuan driver thusawi kha bawhzuiin, lemziak thiam hnenah Driver kha a hruai a. A mi hmuh pa lem chu a sawi a, a lo ziak ta a. Vai hmelpu, sang leh cher lam a lo chhuak ta. Chu lemziah smzawn a nih thu chu Media lamah an tilang chuai chuai a. Ni 2 hnuah pawh thuthar a la awm lo. Mahse, ni 3 naah chuan nula pakhat, hang lam deuh, senior ve hmel tawh lam a rawn kal ta a. Kha pa lemziah ami ang tak kha Sapliana vui ni tlai lama Sumo chhuakah an chuanpui thu a sawi ta a. Shillong-a awm a nih thu leh Mizorama a chhungte a rawn tlawh zuai thu te a sawi niin a sawi ta a. Sangliana a phur kher mai. Chu pa chu sumo stand-a a chhuk thu leh bazar lam a pan thu te an hre lehzel a. A hming erawh an lo zawh lem loh vangin an hre lo. Mahse, hei chu sumo counter-ah an va zawt a, Ali tih tawpin a lo inziak! Sapliana that tur khan a rawn kal vang vang tihna a nia nga, chutiang a nih chuan ruaitu a nei ngei ang le.. Mizoram mi leh sa ngeiin an ruai ang tih pawh a ring. Shillong lam be pawp nghalin Ali chungchang te chu a zuk hrilh zung zung a, an ni lam pawn hma lak an tum thu leh Shillong khawpuiah pawh tualthahna inang tak tak a thlen fo thu an lo hrilh a. A thattu an lo zawng ve reng a ni awm a. Chutia an inbengvar thei chu an lawm viau nghe nghe.
"Ali, zawn chhuah ngei che tumin an hmanhlel khawp mai. Social media lamah pawh i thlalak a darh nasa ania.. Khaw nge i awm? ", Ephraime chuan a ti a. A hmanhmawh hmel hle.
"Ka lo hmu alawm.. Ka lem kha an ziak thiam khawp mai. Min ang tak tak a ni. Tunah chuan Pune lama zin turin ka insiam mek".. A lo ti zang vah a. Han hlauhthawnna em em a nei hran lo nge, a la thawven hmel hle.
"Zin chhuak rih lo la a va tha ve.. Hmun tinah i thlalak an tar bawk si, i him lo thei zawk ania" Zaidam takin Ephraime chuan a ti a.
"Ni ve tho mai. Mahse, kar loah ka chenna an rawn thleng ve thei tho a" a lo ti ve bawk a.
"Hetah la bulah i him thei ang. I hmel kha chu thlak leh zuai mai rawh. Mahse, check gate-a phawrh tur passport lem chu i neih a ngai dawn a ni. " a ti zung zung a. Ali pawh chuan a lo inngaihtuah tur thu a hrilh ve a.
Tun tum chu an chesual ve dawn ta a ang riau mai. Ali chu man pawh nise, engti kawng mahin Ephraime chungchang a sawi dawn lo, mahse, Ephraime chuan Ali an man chu a remti lo bur. A theih chen chenah humhim a tum a ni. Shillonga a lo chhuk ta vat kha a pawi. A inah awm reng nise, a thukru thei dawn lutuk tlat. Hun rei tak he kawng hi an lo zawh dun tawh a, a phatsan thiang lo a ni tawp mai.
Zoi pawh a inngaihtuah nasa kher mai. Thurawn lak ngaihna a hre bawk si lo. A pa lahin tal chhuak turin a nawr bawk si. Ephraime chu police kutah awm ta se tih a ngaihtuah lahin a na tlat tawh lawi si! Nei dawn ta se, mi nunna ren lo lutuk chuan thinrim hun te a nei ngei ang a, chutih hunah chuan ani nunna mai mai te chu a zuah duh a ring si lo. Ephraimea'n neih a duh chhan lah a ka hupna tur bakah a ngai si lo. Inhmangaihna tel miah lo va chhungkaw din tawp chu a ngaihtuah ngam lo zawk. Tin, a buai rukna bawk chu Ephraime chanchin a hre tlem lutuk hi a ni. Shillong lamah te khawsa ta se, chhung leh kua tumah a neih hmel bawk si loh a, an mal tur lutuk ringawt pawh chuan a tibuai. Heta tang hian Ephraimean chhuah pawh phal mah se; engtikah mah tualthattu a ni tih hi a sawi chhuah a ring chuang lo. A pa zawk hian a report maithei. Zoi avang chauha la ngawi mai mai a niin a lang.
A phone ri ral ral chuan a ngaihtuahna ram atangin a kai harh hlawl a. Jenny a lo la ni zui! Eng tak rawn sawi ang maw.. Phur fahran lo chuan a la a.
"Awi mate, ka thil tihsual ka hre chhuak a. Hrehawm ka ti lutuk a, ka lo be tawp che. Enteh, i bialpa ka lo vei ve ringawt kha ka zak tawp a ni mai. In ni tih i sawi bik lo nen, kan inthianthatna chhe ringawt tur hi ka ngaingam lo. Ngaihdam dil che ka duh a, khawngaihin min ngaidam thei ang em? " a rawn ti mawlh mawlh a. Zoi rin loh lam daih a ni. Jenny lah chu a serious ropui bawk si.
"Ih, a.. Kei te chuan ka haw ve hleinem che" a lo ti niah niah a.
"Nia, nang chu i rilru a tha tih ka hria alawm. A hma ang khan awm leh ang. Lawmsanga pawh vengthawng tawh suh. A pa thih bawr vel atang khan min ngaina thar a, min ngaizawng ang te hian a awm a maw… kei pawh hi ka rilru ka sawi thiam lo" a hmaa an titi hlutna boruak ang khan a rawn tawng leh ta bawrh bawrh a. Zoi chuan mak a tih bakah a lo lawm ve hle bawk.
"Awi. ani maw? A van mak. A lawmawm tho bawk sia. Ni daih ru, in inhmeh dawn lutuk.. Kei chu min vengthawng reng reng suh. Nia, a pa thi kha ka lo tawrhpui ve tawp. Ka be hreh deuh sia" a lo ti ve ta hliai a. Jenny chu a nui var var mai. Zoi mizia hrechiang thawkhat ve tak a ni bawk a. A rilru a tha a, tumah a relin a haw ve ngai lo bawk. A nuhrawn laka luhlul a chhuah lai te pawh khan a ruk tak chuan hrehawm a ti em em ve tho a ni.
"Chuan, engtikah emaw kan lo la tlawh leh dawn che u nia, inpa pawh ngaihdam min lo dilsak ve rawh aw. Ka be ngam tawh lo va" Jenny chuan a ti leh zat zat a.
"Hm… be rawh, a ho lutuk.. A ngaidam em em ang che. Kan pawi i sawi hran hleinem, chuan min lo tlawh ngei ngei ru, zanriah in lo la ei dawn nia" a lo ti ve sar sar a. Jenny chuan an boruak khi tawh chu a rawn tuam phui leh ta hmak mai. Jenny nge nge.
Zoi chuan zanriah an ei laiin Jenny nen an inbiakna te chu Ephraime a hrilh ve a, a lo rum nghut ringawt.
"Nang pawn lo be tha ve rawh aw. A zah che a, a be ngam lo che a" naupangchhia zetin a ti a.
"Ka be chhe ngai hleinem.. Nangin i tih tlat te chuan a duat pawh kan duat mai ang chu" uang fe hian a lo ti ve a. Mahse, a rilru tak takah chuan chutia Jenny danglam thut chu chhan eng emaw tak a awm a ring. Fimkhur tur a ni tih signal a dawng tlat a ni. Zoi bulah erawh sawi kher tulin a hre rih lo.
"I pa nen naktuk chu kan inhmu dawn a" Ephraime chuan a ti a.
"Khawiah"
"In inah"
"Eng nge in sawi dawn? "
"Inneih chungchang leh a dangte pawh" a lo ti mai a.
"Nia, inbe ru.. Ka pa rilru i hmin theih erawh ka ring vak lo. Tu pain nge mahni fanu te tualthah ching neihtir duh ang" tiin a kham nalh a. A tawng tam chuan a thinrim dawn tlatin a inhriat vang a ni.
"A remti ngei ngei ang" Ephraime chuan a ti sup. A chhang duh tawh lo. A confi ropui sia.. Hlauh te hi a nei ve lo mawni.
Mut hma chu Zoi'n lehkhabu a chhiar a, Ephraime erawh Laptop a khawih thung. Dar 10 bawr velah Zoi chu mu turin a inbuatsaih a.
"Kan inneih hma chu mu dun tawh lo ang" a tih tawh avangin study roomah a mu a. Jenny nen an intext char char mai. A mut a chhuak thei der lo. Inspector Sangliana hian a rawn be leh ta miah lo va, Ephraime aiah Ali a buaipui zawk vang te pawh a ni mahna. Mutchhuakin a zem chiai chiai a. A phone dahin a muhil ta a. Mumang a nei zui lehnghal.
A mutna khum mawng lamah Ali hi a lo ding ngui bur a. A hmai chu thisen hlirin a lo khat bawk. A tawng lo va, an inen char char ringawt. Chutah Ali chu inherin, kawngka lam a pan a. Zoi chuan, "Ali" a ti a. Ali chu a taksa inher si lo vin a lu chauh chu a rawn inher ta mai. Zoi a rak thawt. A harh zui ta nghal a. Hectora a bauh zui zat bawk. A hlauh dan chu pui tak a ni. Thla mang lai lo ni bawk nen, light a on a, mahse, a hlau lo chuang lo. Ali chungah eng emaw tak a thleng a nih a ring. A mu lui ngam ta ngang lo va, Ephraime room lam a pan ta a.
A harh thei lawk lo lehnghal. A hnuah phak chuapin a rawn hawng a. Ephraime chu a bawh nghal rawk rawk. Chutih lai tak chuan Hectora a rawn tap zui!
"Eng nge ni leh ta? " a lo ti sup a.
"Ka hlau" tiin Ephraimean Hectora va en tuma a kal te chu a umzui dat dat a. Hector chu Ephraimean a hau that that a. A ngawi ve leh mai. Roomah an inzui lut a. A mumang chu a hrilh nghal mial mial. Ephraime chuan, "A chungah thil tha lo a thleng mawni aw.. Ka'n bia ange" tih leh phone ban a rual a. A ring ral tep tihin mutchhuah hmel zetin a rawn la a.
"I tha em? "
"Aw. Tun ang hunah chuan a pawimawh viau ang maw" a rawn ti a.
"Zoi'n mak deuhin a mumangah a hmu che a, i that leh that loh ka rawn hre duh mai mai" inthiam loh hmel deuh hian a ti a.
Ali a rawn nui hak hak, "Hmeichhia vangin i danglam ta hle mai. Mumang mai mai buaipui tur khawpin a thunun tawh che a nih kha" a rawn ti a. Ephraime pawh a nui ve tawp. An inbiak zawhah an mu ta a. Zoi chuan a banah a chelh ran mai. A rilru a hman nasat vang nge a taksa pawh a chak lo riau a. Chuvanga dawih zual te pawh a ni maithei. A rawn kuah thlup a, a beng bulah a thaw ham ham. Zoi hlauhna pawh a kiang duak mai. Feelings danglam takin a tuam chho a, Ephraime kut lah chu a awm mai mai teuh si lo. Lo dan pawh a tum bik lem lo. Chutah a rawn fâwp ta a, an inkiss rei ngat ngat khawp mai. An han chawlh deuh chuan Zoi chuan engmah a lo ha tawh lo. Ephraime ngei pawn.. Inmamawh tawnna nasa lutuk chuan tualthahna tih vel lam chu a thlir phak tawh lo. Zoi chuan Ephraime chu a mamawh hliah hliah a ni ber. A chungah rawn lawn kaiin, "Ka rilţam takzet tawh a ni. Min hrethiam rawh aw" a ti tham ţuak a. Dimtêa nawrin, Zoi taksa nen chuan an inzawm ta. A kut a lo hum ngat ngat, a na rei lo hlauh zawk a. A maimichhing tawp bawk. Ephraime a zei em zawk a, ani pawh a zei ve vekn a inhria., a lo insiamrem ve zung zung thiam tlat!
An zawh hnuah chau zetin an mu thlawp a. Inhak a tum chuan, "Aih, tihian mu ang. " a rawn tih tlat avangin a inha ta bik lo. Sil erawh a va insil a. Saruaka han awm tawp chu zei harsa a ti angreng. Mahse, zankhuain Ephraimea'n a kuah hlu hlu a. A mutui kher mai. Zinga a harha a hriat chhuah hmasak ber chu, "Ka virgin tawh lo' tih hi. Pawi a tihna lam ai mahin khati taka a lo mamawh ve kha a inzahpui ngawih ngawih. Tualthattu a la ni zui bawk si.. Mahse, an taksa thlenga inzawmna an neih tak vang nge Ephraime muhil lai te chu a melh ngawih ngawih a, a bulah chuan him ngawih ngawihin a inhria. "Lalpa, eng nge ka tih tak ang le? " a ti rilru a. A tho chhuak ta a.
🖤🖤🖤
ReplyDelete