LILYPARI

LILYPARI.. 

"Tu nge i hming sawi rawh. I sam meh káwnsak che i duh loh chuan," tiin a hmaa ding chuan na zetin a sam chu a kek lawp a, a kuai dak nghal zat bawk. Chhoh melh rantu hmeichhe mitmengah chuan zámna pakhat mah hmuh tur a awm lo.

"Sawi rawh ka tih chu," tiin a rawn rian leh salh a. 

A nui hul hak a. Chu pa mitah tak melh chung chuan, "Lilypari ka ni e," a ti fiah kâk a. 

"Damdawi kha i vawrh tiraw? Khaw nge i thuhrûk? " an piaha ţhu an hruaitu ber ni awm tak chuan a rawn ti a.

"Damdawi zuar ka ni lo. Ka vawrh hek lo," a lo ti leh hmiah. Zâmna eng mah a neih loh avang chuan amah hualtute tan chuan ngeiawm a tling. Hmeichhia a nih avangin kut han thlak vak kha rem ţeuhin an hre bawk si lo. Duty zinga hmeichhe pahnihte chuan an dap chhuak vek tawh a, mahse, a taksaah eng mah hmuh tur a awm lo. Report an dawn danin chu hmeichhia chu damdawi rawn kenga an venga rawn vawrh tur anga an hriat kha a ni si a. Mahse, a lo hre lawk nge eng mah a rawn pai tlat si lo.

"Eng pawh ni se, kan vengah hian engti tura lo kal nge i nih? " Sikri hnaih bera ţhu chuan a rawn ti a. 

"Rawn len in phal na’nge? " a lo ti let leh hmak. Chhanna ngeiawm tak zawng a ni ve alawm.

"Ruihhlo do kum puanah kan nei a, hei hunpui a hnai tawh si a, veng chhungah damdawi leh zu tihbo tumin kan thawk mêk a ni. Report kan dawng a, nang hian damdawi rawn vawrh tur angin. Chuvang a ni e kan man che. Veng chhung a lo thianghlim theih nan eng ruihhlo mah lak luh kan phal lo a ni," an hruaitu ber chuan a ti ta dap dap a. Thinrima sawi pawh a ni lo. A dam dup mai.

"Ka pu, hmeichhe ţha tak chu ka ni lo. Mahse, ruihhlo ka zuar ngai lo," a hma aia nem hret hian a ti ve ta a. Tih theih dang awm hek lo le, an sezawl chhuah ta phawt a. 

A rawn let leh a. "Ka scooty chabi in la kawl a," a ti sap a. An lo pe ve mai. A tira amah kektu tlema kam nam deuh kha a va melh zauh a, nui sak chungin, "Saw pa sawn in thawhrimna a la tirimchhe fô dawn a nih hmel," a ti zui sap a. A chhuak nghal nal nal. Amah kektu kha a che hrut a, an lo dang vat.

"A huaisar zet mai. Ka beng châk hle mai," a ti pawr huar a. Tu man an sawi zuipui duh lo.

A scooty chu a tinung a, hma lam bih ngar chungin, "Hrep tak a!" a ti chang fak a. Chak zetin a tlan liam ta a.

LILYPARI

"Ka duh lo… Min thlah rawh. Ka duh lo…" tia ţap hlawp hlawpin amah bawhtu taksa lian zet chu nam kian tumin a bei ve fat fat a. A kawr a ţet phung tawh a, a hnute ùm ţan, bial kêrh chu chu pa chuan a ţhamsak nawk nawk a. Ţah pawh ţap ţha thei tawh lo chuan a theihtawpa inven ve tumin a tha neih zawng zawng nen ţan a la ve a. Mahse, a taksa te tak te chu chu pa taksa lianpui chuan a khuh bo hneh kher mai. 

"Ţang duh tawh suh. Ngawi rawh…" tih tuar pahin chu pa chuan a biang dinglamah a rawn hnek dawt mai. Ani hmeichhe naupang hmaiah chuan arsi a leng chuai a, a khaw hmuh a thim nghal mup mai. A chakna thahrui te chu an zo ta. Hmeichhe naupang ţhanthi pawh la nei lo kha a neih zawng zawng laksakin a awm ta. A nunna chu zuahsak ni mah se, thaw chungin a thi ta. Ni e, kha lai hmunah khan a nunna chu vui liam a ni tawh. Lilypari ngei chu.. 

"Nu, i lo haw ţêp tawh em? " khawsik tlun hluah hluah chungin a nu chu a bia a. 

"Naktukah ka rawn haw ang, i aw a va dik lo ve. Engati nge?" Nu te nge nge chuan ral khat aţang paw'n fanute nawmsam loh chu an aw aţang ringawt pawn an lo hre thei a nih dawn hi. 

"Ka khua a sik deuh a. Mahse, damdawi ka ei a. Lo haw vat rawh aw," a ti a. A aw chu a ri chang chang a ni ber mai.

"Aw haw vat dawn e, i pa ka lo hrilh ang. Lo dam rawh aw," a nu chuan a rawn ti vau vau a. A maimitchhing a, a mittui chu a dir zung zung mai. Phone chu a dah ta a.

Rei vak loah a pindan kawngka chu a rawn inhawng a, zu rim a nam nghal huk.

"Damdawi chu i ei em? Khawiah i pang ka lo dek chhin," tiin a pang chu a rawn dek nghal zat a. A dehna ringawt pawh chu rapthlak ti zetin a lo tuar ngawt ngawt.

Nachhawkna a va hai ruk ruk a, "Kha hei dawlh rawh. I dam vat mai ang," tiin a rawn pe a. A ţha duam duam hle mai. A khua a sik miau vangin damdawi a mamawh si a, a inbeng kang a, damdawi a dawlh a. 

"Hre rawh. I nu bula a thawi pawha i sawi a nih chuan, i nunna kha ka la nghal ang. I nu pawh ka that ve bawk ang. I hria em?" a pa chuan a ti hriam hraih a. A ti duh tak tak ang tih pawh a rinawm. Peih lo zeta melh hram hram chungin, "Ka sawi ang," a ti tham chhal a. A hrawkah a rawn rek nghal nawk nawk. 

"Nangtê hi ka luhlul e te i ti ve law? I ngam phawt chuan sawi rawh. I nu hian nang aiin min hmangaih zawk," a ti ţeng chhuai a. A lo maimitchhing tawp. 

A chhuahsan hnu chuan a thaw hawk a. In chung lam melhin a mu meng reng a, a mittui chu a luang zawih zawih bawk. 

"Aw Lalpa, ka sawi dawn aw…" tiin a phun sep a.

NU

"Engati nge i khua chu a sik ringawt le aw. Naktukah han inentir a ngai a nih hi," a nu chuan a ti mawlh mawlh a. A zin chau ve nen; a thaw a ipik hmel hle. 

Lily-i chuan zanriah pawh a kil peih lo. A nu chu a fâla hmuha biak a duh ngawih ngawih. Mahse, a pa chuan a rawn zui lut ve zel si. A khawsik lah chu a zual telh telh leh nghal. A serh chu na a ti a, zun pawh a zung ţha ngam meuh lo. Zingah a nu chuan, "Inbual fai la, chaw eikhamah doctor kan han pan dawn nia," a rawn ti a. Kha mi sual khawih zan aţang khan a la inbual miah lo. Hmun dangah a tla hrang ngam hlawl lo a ni ber. A nu thu chu awih phawt ţhain a hria a. Luhai búr chungin a va inbual a. A serh chu a sil ţha ngam meuh lo. Sex chungchang eng mah hriat la nei lo mah se; a thil tawn chu a dik lo tih hre thiam tur khawpin a lian ve tawh. Bawlhhlawh êm êm anga inhriain a inleih char char a, mahse, a natna chu chuti maia tlen fai chi a ni lo. 

A nu nen an chhuah hma chuan a pa a rawn lut leh a. A meng sen rûm mai. 

"I sawi vaih chuan ka sawi tawh kha. Thi saah inngai ang che," a rawn ti leh! Mahse, Lilypari hi hmeichhe naupang naran a ni lo. A sawi dawn tihah a chiang. Pathian hnenah pawh a sawi tur thu a sawi vek tawh. 

A nu nen taxi-a an chuan dun lai chuan sawi a châk hle naa driver a awm ve tlat si a. Hun remchang a hmu tho vang tiin a inhnem a. Doctor lehkha lain, an han nghak deuh a. An luh hun a thlen chuan a nu chuan a luhpui a. 

"A khua a rawn sik ringawt a. Chaw a ei thei bawk si lo, " tiin a nat dan chu a sawi fiahsak a. Doctor Remmawia chuan a tarmit phên aţang chuan a rawn melh a. Nelawm taka nuiin, "I pum a na em? Bawihi," a ti dam duai a. 

"Aih, na lo," a lo ti ve mai a. Thisen lak tir a ngaih thu sawiin damdawi a chawh bawk a. A awlsam phian. An chhuak leh ta mai. Doctor room an chhuak fel chiah tihin doctor pakhat hi an lam panin a rawn phei ve chiah a, an insu thawi thuak. Lily tlu tur chu a rawn kuah vat a, "Aw khaih! " a ti ţhawt bawk. Lily chu a sarak ta chiam mai! Chu Doctorin a vawnna chu rapthlak tih hmel zetin a melh bawk a. A ngaihna an hre lo kher mai.

"Ka tihpalh Bawihi, i ţha em?" a ti a. A thlah nghal mai bawk. 

"Awi a zia lo êm mai. A damsam lo va, a pangchang a nih hi," a nu chuan a lo ti vat a. A kai a, an kal hmawk hmawk. Corridor an zawh lai chuan, "Ti nge khatia i au chiam a. I â lutuk, a zahthlakzia kha," a nu chuan a ti hlaih hlaih a.

"Nu," tiin a men nghal puai a. A nu chuan a rawn chhuk melh ran bawk. 

"Ti nge? Eng nge a? " a ti a. Mi veivak an awm lem lo va, an piah deuha thutthlengah chuan mi pali nga vel an ţhu bawk. 

"Nu, ih, i zin hlan khan ka pain.. " sawi zawm thei lo vin a ţap nghal. A nu chu a hawi kual vat vat a, "Lo kal teh, hetah hian," tiin a kai sawn a. An piah deuha inthiarnaah chuan a luhpui ta a.

"Eng nge i pa chu? Engtin nge a tih che," tiin a zawt ta sek sek a. 

"Min khawih a. Ih, min sual a…" a ti a. A ţap nghal hlawp hlawp a. A nu chuan a rawn kuah vat a. 

"Bawihte, a va pawi tak êm! Ka thiam loh a ni. Mahse, tunah chuan tu bulah mah sawi suh aw. Kei man i pa chu ka bia ang. Tu mah hrilh rih suh aw," a ti mawlh mawlh a. Lily pawh a bu nghat nghat mai. A nu chuan engtin emaw hma a lak a beisei a, a ngaih dan leh beisei dan takah chuan a pa kalsanin khawi hmunah emaw an awm a ring a ni. 

In an thleng a, a pindanah a lut a, a inthlak nghal. A khawsik pawh a ziaawm chho ta bawk nen. A nute pindana inhau thawm chu a hre ta nghal a. A beng a chhi ran mai. 

"Ring em em chein ka hnutchhiah a, engtin nge sawtiang naupang chungah khatiang thil tenawm kha i tih theih? Mawh, i va tenawm êm êm ve," a nu thinrim awrâwl chu a tan chuan hriat a hahdam thlak zawk. 

"Ka thusawi ngaithla ve phawt la, i fanu saw i hre chiang lo mai mai a nih saw. A lian ûr tawh a, a tituai tawh. Ţhanthi a la nei lo tih a ni mai. Ka khawih khan a lo him tawh awzawng lo. Ka lo rui lutuk a, ka tihpalh a ni, nu-i, ka sim hmak ang. Mahse, kei chauh min dem suh," a pa chuan a ti hluak hluak a. 

Lily chu a ner nak. Kum 13 a ni tawh. Ni e, a ţhiante zawng zawngin thi an nei tawh. Ani erawh a la nei thei tlat lo. A ţhiante chuan, "I hrisel loh vang a nih kha," an tihsak ţhin. Ani ngaih danah chuan a ţhiante chuan bialpa te, star te an nei tawh a. An lerh vangin an period a ni ang tiin. Ani erawh mipa hi engah teh vak a ngai lo va, star pawh a la nei ve lo. Chuvang chuan, a la period lo angah a ngai mai ţhin. A taksa erawh a lian uai tawh thung. 

"Ka fanu saw ka hre chiang, khatin thiam thu sawi suh. I lo tenawm dan hi. A pawizia hi i ngaihtuah phak reng reng em? Engtin nge a nulat hunah pawh a awm ang? A piangsual hlen thei asin…" A nu chu a ţap lek lek mai. 

"Chutiang a thleng lo vang. Ka rui lutuk a, nang mah emaw ka tih vang alawm. A thleng tawh lo vang," tiin an pa chuan tihlawm tum zetin a kuah a. A inphah hniam thiam hle bawk. 

Tuna an awmna hi a pa in a ni. A pa kan han ti tak naa a pahrawn a ni. A pa dik tak leh a nu hi an innei lo va, a pa chuan nupui fanau neiin khawsak harsa lutuk lovin hun a hmang mêk tawh. Mahse, a nu hian a pa a huat êm vangin an inhre pawh tehchiam lo va. A pute inah an nufain rei tak an awm ve a. A putea'n nupui a nei a, a nuteii'n pasal a nei ta bawk. A putea nupui chuan a zia a chhuah tak avangin an nufa chu an chêp ţan ta a. A nu hian sumdawnna eng emaw a khawih ve ţhin a, chuta ţang chuan tuna a pa nen hian an intawng ta a ni. 

A pa hian sumo a khalh ţhin a, pathlawi ve tho niin a parawl a. Rei pawh an inngaihzawn hmain an nufa dinhmun a chêp sâwt tak êm vangin a nu chuan an nufa hmakhua ngaihtuahin a nei ta tawp mai a ni ber. Chenna in chu an nei ta phawt a, tin, an in chhungah chuan tu mitmei mah ven a ngai ta lo. An inneih aţanga thla hnih lekah a pahrawn chuan zu a in nasat vangin a hna aţangin a bang ta mai a. An khawsak a harsa zual ta hle mai. Tichuan, a nu chuan phai lam dawrin sumdawnna bul a ţan chho leh ta a, an káng ve leh ta deuh hlek. A pute ina an awm lai khan langsar taka intihduhdahna awm lo mah se; ţawngkam ngeiawm tak hmanga inkiltawih tura dan chêp an ni fó! A piteii khan hlawh a lo nei ve chhap nen, a ţawngkam mei nei tak tak chu tharuma nêk aiin a na zawk fó. A putea lahin an nu chu pathian tlukah a ngai thawthang si a. A nuin pasal a nei ta vat pawh hi a dem awm lohna chin a awm ve tho mai. Nuţain a farnu thlavang a hauh ngam loh chinah leh moin chhungkua a leng darh ţan chinah chuan duhthlan tur hi a váng raih tawh ţhin. 

Mahse, a nu pasal nei chu Lily-i tan kumkhaw chawr lohna a ni thei ta tlat si a!

SIKUL

A nu nawr luihna vangin phur lo zetin a insiam a, tu pawh a hmu zak tawh a. Tawm tlawk tlawk chu a duh ber. Mahse, a nu chuan, "Sikul i kal ţhat loh chuan nakinah ka thih hunah engtin nge i awm ang?" a ti tlat si a. A lo beisei angin eng mah a thleng ta lo bawk. A nu chuan a pa chu police a mantir a ring a. Mahse, eng mah thleng lo ang maiin an awm leh thliam tawh. Chu chu naupangtê mah ni se; tawrh harsa a ti a. A nuin ţha taka a pahrawn a be leh thei a hmuh phei chuan a rin loh kar leh a hriat thiam phak bakin a nu meuh pawh huatna thinlung a pu ţan der mai. 

"Lily, i va ngui ve. I mut a chhuak em ni? " An Miss-in a rawn tih chuan a inthing harh vat a. 

"Aih chhuak lo," a ti tham chhel a. Ngun taka entu tan chuan a mitmeng nguizia leh natna inphum rukzia chu a lang reng mai. Chhun chawlhah a ţhiante an infiam nuai nuai a; kil khatah ngawi rengin a ţhu kar mai. Lehkha hrual mum hi an vawr a, a lu-ah tak a rawn tlak fuh a. A che chang eih lo.

An class mipa lian ber Tluanga chuan a rawn chhar a, ni dangah pawh infiam fó an ni bawk a, Lily-i beka va nawr pah chuan, "Inla cool ê!" a ti nghat a. Lehkha hrual mum, chhuata tla chu chhar tura a kun pahin Lily-i mal chu a nem pah a. Lily-i chu ring zetin a rak nghal. Hlauhthawn hmel zetin bang kil lamah a tawlh phei nghal bawk. Tluanga bakah class-a awm vete chuan mak ti zetin an melh hû hlawm mai. An hre chhuak ang tih hlauin, "Ka uang a nih kha," nui lui chungin a ti a. Naupang ta na nâ na chuan an awih a ni ang chu, an infiam zui leh daih. 

A awm dan mak leh danglam tak avang chuan ţhian a kawm tlem phah a. Kawm hleih theih lohin a inla hrang a. A ţhian hmeichhiate paw'n induh an tiin an rêl fó mai. Mahse, a hlau. Tu pawh chuan, "Lily-i hian mipa a mutpui tawh," tia an kawh rawn a hlau a ni ber. Mipa a hlau a, an khawihna ringawt pawh mei saa deh ang mai niin a hre ţhin. 

    A khua a sik ser ser a, an zirtirtu lah chu a ţawng tui nasa si. A zun te chu a chhuak et etin a hria. A kawng leh tai bawr velte chu a na ut ut bawk. A ek te pawh a chhuak lek lekin a hria. An zirtirtu chu a chhuak ve ta hram e. Zun tumin a tho nalh a, kawngka a kan hman ţêp tihin a ţhiannu ţhin Puiteii chuan, "Lily!" a rawn ti vak a. A hawi let vat. An lo melh ţhap. A ngaihna a hre lo ang reng hle. A hlauthawng leh vek. Puiteii chuan a rawn pan a, "I ţhut tlang a nia," a rawn ti sar sar a. A bo hú hman. Mahse, a ţhiante an period hian, "Ka ţhut tlang em?" tia an zawh ziah vangin Puiteii thusawi awmzia chu a hre thiam ta thuai a. A pawnfen hnung lam chu a en vat. A lo val kalh mai. Thi a nei ve ta. A maimitchhing a, lawm tur nge lungngaih tur pawh a hre thiam lo. Puiteii chuan bengvar takin stayfree a va dilsak a, hman dan tur pawh a hre si lo. An han inhrilh fiah leh rih a, a bel ve ta thân e. Hawn a dil zui bawk a, an lo phalsak bawk nen, a haw ta nal nal mai. 

NULA VANDUAI

A mu kawm chal a, a mittui chuan a lukham a bual huh hnêp tawh. Ruah sur ri chu a ring angreng viau. Chung ruah sur te chuan a thinlung nâ chu rawn tleng fai hawk hawk thei se a ti ngawih ngawih. Mahse, mi bawlhhlawh a nihna leh a tenawmna chu eng tui mahin an tlen fai zawh a ring lo. A taksa hnuai lam chuan a rawn nawr leh ţan a. Rizai chu a la lawk a, a kapkarah zepin insehruh chungin rizai chu a theihtawpa nain a chep bet a. A thlan fim leh mittui chu a inpawlh nawk mai. A ţap ring ngam hek lo. A hriat tawk lekin a hui pap a. Pathian a au ngam lo, mahse, a mamawh chu Pathian a ni tih a hria. 

"Ka ti lo vang. Ka ti thei… Ka hneh thei," tiin a rilruin amah leh amah a infuih a. Hetiang hun a thlen apiang hian a pahrawn thin hnuna chemtè zum taka vih tlang pawp tluka châk a nei ngai lo. Amah vanga a nun khaw danglamzia leh a vanduaina khawvel ram rehzia hi tu man an hriatpui ve si lo. A pahrawnin a khawihna kha a pian sualpui ta si a. A nu lahin doctor rawna puih a tum ta miah lo nen. A thinlunga huatna leh a nu runluih châkna chuan ni tin a nawr et et ţhin. Mahse, a nu chu a neih chhun a nih miau vangin a insûm leh hram ţhin. Mipa a hlau a, a mamawh thung si. Ngaihzawng pawh a nei ngam lo. A hmel chhe lo va, a pian a nalh bawk. Duh dertu tam tak a hmu ve, mahse, beiseina a siamsak ngam lo. An deh hlek pawha hlau hlawpa awm ţhin chu an hmuhsit a hlau tlat! Hmeichhe thianghlim niin a inhre lo va, a bawlhhlawhna chu engtia tihreh chi nge tih lah a hre hek lo. 

Pawl 12 a pass ţâwk a. A chhunzawm ta lo. A nu sumdawnna a lian ve zel a, tin, nau pahnih a nei ta bawk. Pa hrang mah ni se; a naute chu a ngainain a duat ve êm êm. Pawl 7 a pass khan High School chu Hostel aţangin a zir chhuak ta reng a. Chu chu nuam a ti zawk. A pahrawn hmel hmu lo va a awm thei ringawt pawh chu zalênna hlu tak a tling. 

Mahse, a dik lo chho tawh a. A dik lo ta zel mai. Class XII a pass chiah khan nulat a hre ve ţan ta bawk nen, a mizia pawh a dang ta deuh. Zan khat chu a ţhian ve ber Kimpuii birthday lawmin an party ve a. Mi pawh an tam lo. Kimpuii nu\apa Zosanga chuan a zui ta deuh bik a. Mipa bula awm a thiam lo va, a lai hú zel. Mahse, Zosanga chuan sawi tur a hria a, fiamthu thawh tur a hre hle bawk. Mipa dang bulah aiin Zosanga bulah chuan himin a inhre ta bawk. Theitui te an in dun a, Zosanga chuan zu rim a nam naa a rui lem lo a nih hmel. Chumi zan chuan a bike-in a thlah haw nghe nghe. An kawt thleng a thlah a, a haw ve leh mai. Mahse, mipain an rawn thlah tih a pahrawn chuan a lo hmu tlat! In chhung a luh rualin ţawngkam chhe pui puiin a lo tâwng nghal a. 

"Ka sawi reng kha maw… Nang hi chu i tet lai aţang khan i za tawh alawm. Class XII i pass ve chiah a, mipa i fawrpui nghal thei a nia. I nasa dawn khawp e," a lo ti bawrh bawrh. Patling ţawngkama mawi loin a ni a lo ankhum ni. A nu erawh a ngawi hlauh thung. 

"Ka ţhian thar a nih kha, Kimpuii unaupa a nia. Min lo thlah ve mai a nih kha." Dawih aw zetin a lo ti ve a. 

Mahse, a kam nam chuan a duh tawk mai lo. "Rai pawh i rai har hrep lo vang. I tet laia thil thlengah lah i nuin min la mawhpui zui. Tikhan i fanu nunphung chu i hre tawh em? " tiin an nu chu a melh a. Lily-i thinlung a dek ta zar mai. Kha chen a lo up bo, hlauhlawpa siama zan tam thinthia mutthilhtir thei lo ţhin kha a rawn so chhuak a ni phawt ang chu.. 

"Ve a che. Nang ang pahrawn hur lutuk vanga ka nun hrehawmzia hi i hre lo. Nangmah vang hian bialpa pawh ka nei ve ngam lo. Eng lai pawn ka hlau che. Ka pa i ni lo hi ka lawm," a ti ve ta hmiah mai. 

"Lilypar!" A nuin a rawn ti tuar. 

"Eng nge, nang, mahni fanu pawngsualtu pawh haw ngam lo nu pawh hi ka hua che. Ka haw vek che u… " a lo tihsan leh hmiah. A thinur tak zet tih chu a biang tai hlar leh a mitmeng ling hlar chuan a hril chiang hle. A nu chu a ngawi zui daih. A inthiam lo ni fahmiang. A pa hrawn erawh a phun bul bul a, Lily-i chu a pindanah lutin a intifai a, a mu ta hmak. A thin phu dat dat chu a khawih a. A ţawng chhuah ngam tak vanga thawl ta huaia inhriatna a nei bawk. ‘Tunah chuan ka duh danin nun ka hmang tawh ang. Kha thil thleng kha ka cho chhuah angah te a lo ngai a. Ka nu pawh hian a awihsak hial a nih dawn hi. An la hre viau ang’ a ti rilru tân tân a. A hriat loh karin a lo muhil ve mai. 

Khata ţang khan a chhungrila huaisenna chuan a luhlulna a kai chhuak a. Hmeichhe tihmawh, thu awih lo nih a hlawh chho ţan. Tin, sual hian hna a lo thawk rang hle bawk nen; a chak lohna laiah a rawn bei chat chat a. A chhungte thu ngaih pawimawh lohna chuan a hnuk hla tial tial a. Mobile phone dawrah hna a hmu ve ta hlauh bawk nen. Thawh chhuah a neih takah phei chuan, a inngaihhlutna a rawn pung chho ve zel a. Mahni induhtawkna leh mi dang mamawh lo nia a inhriatna chuan kawng dik lo lamah a hruai ta reng a. 

A ţhian kawm ten zir bik hek suh. Beer aţangin zu pangngaiah a kai ta thuai a. Vanduaithlak takin zu ruih chu nuam a ti êm êm bawk. Damdawi erawh a khawih duh bik hauh lo. Sex-ah a fihlim rih bawk. Ngaihzawng ni chiah lo, han kawp ve zuai ang pawh a nei lui a, thil hrehawm zawk zawk a lo ni lem lo bawk a. Mahse, sex hmanpui an tum hun chu an inkar tawp hun a ni mai. A tilui thei ngang lo a ni tawp. A nun khua chu a har a, a nun tuihalna chu zu hmangin a hrithla a, nawmna tak tak pawh lo mah se; a zu ruih chhung lek a thluak nu but pawh chuan a chhungril natna chu a theih nghilhtir ţhin. Chu chauh pawh chu a thlahlel ngawih ngawih a ni ber mai. 

Zosanga erawh chu a danglam bik a. Amah Lily-i hian a hel ngat ngat ţhin. Zosanga chuan zu in ve zeuh zeuh mah se; Lily-i zu in a hmu thei lo va, miin hmeichhe khaw lo taka an hmuh a phal hek lo. Vawi khat phei chu Lily te hi an boss fapa birthday lawmin Falkland-ah cottage bookin an lo va party daih a. An boss hi mi ho ve deuh, ţhalai bula tal nuam ti chi a lo ni bawk nen, an hlim viau mai. Duh aiin zu a tam ni maw, Lily-i pawh chuan a zo lo lam a ni. A chatthla tak ngial dawnin a inhria a. An boss ţhianpa Michael-a chuan risk tum melhin a melh run bawk si. A hlauthawng chuan Zosanga a be ta tawp a. Laklawh pawh sawi loin a rawn hruai vang vang a ni. Bike-aţanga a tlak a hlau si, a kawnghrenin a inphuar belhbawm tawp. Muangchangin a tlan ta a. An inah a roomah a paw lut thlap. A nu leh pate chuan hauh ngaihna pawh an hre tawh lo. Zosanga chu a nu chuan lawm thu a hrilh a, ani pawh rei awm lo vin a haw ve nghal. Khawih chhe duh ni se, khawi emaw hmun falah tlanpuiin a sual thei. Mahse, Lily-i hi a hmangaih satliah lo. A thlarau thlengin a hmangaih a ni ber mai. 

Lily-i erawh a nun a bawraw tulh tulh a, an boss scooty hlui chu installment-a rulh turin a la ta bawk. An in chu riah nan a hmang a ni deuh mai. A nu chuan a hau ngai mang lo; a chhan chu a tet laia thil thlengah khan inthiam lohna a nei tlat a! A pahrawn erawh chuan khuahkhirh a tum sateh a, a hlawhchham chiang hle. A hringtunu pawh zah zo lo chuan ani a nun tichhe vektu chu zah ngaihna awm hlawl hek lo. A pahrawn phei chuan KS ang lek lekin a en tawh hial. A nu erawh chuan thinlung na taka thlir liam bak tihtheih a nei meuh lo. 

HMANGAIHNA

    

"Ly, i nun hi siam ţhat ngai i ti ve lo em ni? I la naupang si, i hmel a ţha bawk a. Pangngai takin nung la, pasal ţha deuh i la hmu dawn asin," Zosanga chuan a ti mawlh mawlh a. Thinlung taka sawi a ni tih a hriat bawk. 

"Tihian a nuam alawm. Insiam ţhat ka ngaihna lai ka hre lo," a lo ti hmak. 

"Mahse, a dik lo alawm. I nu pawh i timangang alawm," Zosanga chuan thutak fê hian a ti leh a. 

"A mangang tak tak lo. Sum a hmuha pasal a neih chuan a lungawi." An piah râl tlang thlir vang vang pah chuan a lo ti sap a. A mitmenga tawrhna lo lang chu Zosanga chuan a hmuh hmaih lo. Naupangtê si Lily-i nunah hian thil mak tak tak a hmu fô! A chanchin erawh thuk zawka zawh a ngam bik lo. 

"A nih bialpa i nei em? " a ti ta daih a. 

"Neih loh hian ka ţha zawk alawm," a lo ti leh daih. Beisei hi a bo ţhin teh e. 

"Ka lo nghak reng ang che." A inrin hmain a sawi hlawl. Lily-i pawh a phâwk deuh. Mahse, a ngawi reng. 

"Eng emaw tal sawi ve la," Zosanga chuan a ti nghut a. 

"Eng nge sawi se min duh? Bialpa ka nei peih lo. Bakah nang chuan kei aia ţha i phû." A rilru dik tak a sawi. 

"Mahse, ka duh che alawm," titau awki hian a lo ti bung leh vut. 

"Ţhian nih hi a ţha zawk," Lily-i chuan a ti ta sap a. Zosanga tan chuan a beidawnthlak ang reng hle. Mahse, Lily-i hian a mangan tawpkhawk leh a ruih chhiat lai bera a koh ngam awm chhun a ni tih a inhre ve tlat. Chu chuan beiseina a la neihtir ve hram hram. 

 

THIM

"Rawn rui haw tawh suh ka ti che em? Ţhenawm khawvengte min sawina zozai te hi i hre ve lo em ni? Hmeichhia si, i zak miah na nge? I la naupanzia te hi," a nu chuan a ti hlawih hlawih a. Chuti lutuka kai phei chu a ni lo. Mahse, a nam leh pek bawk a ni. 

A ngawi reng a, pindanah a lut hmak. A naute thil a hawnsak chu a phawrh a. A ko va, an va la a. A pahrawn erawh a awm lo. A nu eisiam rim chuan a ril a tiţâm hle. Mahse, a zu in hian a pum lam a khawih ve tawh a, thil a ei tam thei tawh lo. A cher kuam reng a. A vun pawn a hma a tluk tawh lo hle. A inbual fai a. Zosanga a mitthlaah a rawn lang. Ani hian a duh ve tak tak em maw ni le? A chhungril nun hre chiang se a thlauhthlak mai a ring. Pasal nei ve tlak a inti lo va, ngaihzawng pawh nghet taka neih a duh lo. A lut thûk zel ang tih a hlau. Tin, a piansual rukna hi nakinah puah chhuah hun a la nei ang a, chintawk hre lêk lo va mipat hmeichhiatna lama tlan a hlau. Chuvang chuan a theih chin chinah insûm hram a duh. A chhe tawh a, chhiat belh zel a tum lo.

Zanriah an ei a, a pa pawh a lo haw ve tawh. Ani pawh a rui leh chhû mai. A phun leh hluk hluk a, a tu man an bengkhawn loh vang nge a phun rei peih lem lo. Thleng te a sil zawhah pindanah a lut leh daih a, a online mai mai. A nuin a rawn ko va, a va chhuah chuan, Zosanga leh a la hmuh ngai loh an lo ţhu khar mai. Mak a ti deuh. 

An bulah va ţhu vein a be ve luam a. "Lo hrilh lawk che ka tum naa ka phone ka thlauh a, inah ka dah daih a," a lo ti a. 

"Va pawi ve, ka phone hi lei chhawng la," a lo ti a. An nui dun. A ţhianpa chu a hmelhriattir a, Sangpuia a ni. Phaia awm deuh reng a nih vangin Lily-i tan pawh han hriat ngaihna a awm lo; an veng a lo inang lo bawk nen. An titi ve luam a, sawi tur erawh an hre vak lo. In chunga a pahrawn leng pawh a rawn haw a, a nu erawh a sumdawnna thil a buaipui thung. Lily-i inlengte chu a melh vang vang a. Pai khut khut chungin, "Ka fanu hi nula pawh a la ni lo va, rim ka la remti vak lo asin," a ti chhur chhur a. Zosangate an sen ap ap. A nu a rawn ţawng ta vat a, "An rawn rim pawh a nih loh kha. A ţhiante an ni a, rawn leng ve ang hmiang. Va mu rawh," a lo ti hlak hlak a. Lily-i chuan thingpui a va lum daih. A zak ve khawp mai. Mahse, a ţhiante awm laia han chhan let êm chu a hreh si a. 

Thingpui an in zawh aţanga rei vak loah a pahrawn chu pindan aţangin a lo chhuak leh a, "Lilypar, mu tawh rawh. I va meng rei ve," a rawn ti leh thâwr. A chhan hmain Zosanga chuan, "Nia, Ly, a tlai tawh êm mai, kan va haw tawh ang e," tih leh thawh a rual nghal. A nu chuan a pahrawn chu pindanah a nam lut mêk. Lily-i chuan zak êm êmin Zosanga te chu a thlah a, an mitah pawh a en ngam lo. Kawngka a kalh a, a inphihfai a, mu turin pindanah a lut nghal a. 

A nuin a pa a hau mial mial chu a ngaithla reng a; a maimitchhing. Mipa chu ni se a pahrawn saw a sual tawh ang. A laka rilru chhe zet zet a pu ţhin hi a chang chuan a inthiam lo deuh ţhin naa a chunga a pahrawn chet dan ngaihtuah chuan nêp a la ti fó! Zosanga te khan engtin tak ngai ang maw? An rawn leng duh tawh kher paw'n a ring lo. Lehlamah inleng neih hi chu a duh chiah lo hrim hrim. An chhungkaw nunzia an rawn hriat ve kha a duh lo a ni ber. Mahse, mipa dang aia a ngaihtuah tam ber Zosanga ber kherin an chhungkaw mizia a rawn hre ta si a. Hrehawm a va ti tak. 

A tukah a nu chu Silchar dawr turin chawhnuah a chhuak a, a pahrawn erawh a dan ngaitein inah a awm leh. A naute hian lehkha an thiam thei reuh a, a tiţha pawl an rawn ni deuh ziah a, a pa pawh hian a chhuang ve viau. Lily-i ţawng elsen nan tak a hmang ţhin. Mahse, Lily-i chuan a naute a fuih ve char char ţhin. Ani pawh dawrah a kal a, an inhralh ţha lem lo. An ţhiannu Tei hi nungchang zawi-awi ang reng tak, ţawng tam lo, zu pawh in ve ngai lem lo a ni a. A zah pawh an zah ru deuh ţhin. Mahse, chumi ni chuan thil mak deuh a thleng ta a ni. 

Customer nei lem lo va an ţhut mai mai lai chuan, nu pakhat hmel chhe lo tak, inchei thiam tak hi a rawn lut a. An lo dawngsawng vat. A'n ding ren rawn a, Tei lam chu hawiin, "Tei maw? Ka hmu che chu ka lawm hle mai. Biak che ka duh a, Tihian ka sawi mai dawn nge a falin kan inbe dawn? " a ti a. A aw chu a tliang khawp mai. 

Tei lah chuan, "Tihian sawi mai rawh," a lo ti ve hmiah a. 

"Aw le, i bialpa nupui ka nia. Tei, i hriatsa vek a ni tho tiraw? Tunah hian fapa 2 leh fanu pakhat kan nei a. An la te si, ka rilru a hah ţhin khawp mai. Tunah hian rawn vaua rawn hau tur chea rawn kal ka ni lo. Ka pasal hi khawngaih takin lo hnar hram rawh tih ka tum a ni. Mipa pangngai, tlangval ţha tak tak i hmu êm êm ang. Khawngaihin lo bansan hram teh a!" a ti ta mai a! Chuta awmte chuan Tei chu mak tih hmel tak hian an thlir ţhup a. Zak hmel a pu hran lo. 

"In pa kha control la a tawk a ni mai," a lo ti hmak. 

"Ka tum ve alawm. Ka tum ve nasa asin. Ka theihtawp ka chhuah, mahse, hman zanah pawh amah ngeiin tawp a duh thu a rawn sawi a. Nau ka pai tiin i lamah i hnuk hnai leh a, engkim ka hre vek alawm. Khawngaihin kaltir rawh. A chhungkaw tan a la pawimawh êm mai. Min khawngaih la, kei leh ka fate tan ka pasal hi lo hnar hram tawh rawh," ngenngawl zet hian a ti a. A hmel chuan khawngaih thla a la tak zet. 

Tei chu a ngawi ran a. Emily-i insum zo lo chuan, "Tei bansan rawh. I zak lo hle mai. Ka rin ang i lo ni lo. Kei pawh ka pain ngaihzawng dang a neih vangin ka nu hoin kan awm a. Heti ang thil hi ka huat ber a ni. Bansan vang vang ang che," a lo ti ta hmiah hmiah mai a. Tei chuan a bag a la a, ngawi rengin a chhuak zui daih. 

"Ka pi, i pasal chu fuih la, keini pawn theihtawp kan lo chhuahpui dawn che nia. Lo mangang suh. Tei chu ka rin a ang lo hle mai," Lawmi'n a lo ti bawk. Ani pawh chuan lawm thute sawiin a chhuahsan ve nghal. Thil thleng chuan a ţhawng ang reng viau. Tei mizia leh nungchang, an kohhrana a nihna te leh a ţawngkam hman ţhinte ngaihtuah chuan kha nu khan dâwt a sawi zawk a ni ang tih mai awl tak a ni. 

A nu a awm si lo va, hawn hma a dil a, an phalsak ve mai. Zosanga'n a lo la be miah lo. Mahse, a vui ngam lo; nizan lama an hun tawn khan a la tizak êm mai. Bakah Zosanga phone kha a chhia pawh a ni mai thei a ni. In a thleng a, ţi ru deuh chungin a lut. A hlauh ang ngeiin a pahrawn leh a ţhian pathumin zu an lo in mêk a. A ner sak. 

A inthlak vat vat a, eirawng bawl turin a chhuak leh nghal a. A pate chu an titi nasa mai, Lily lam pawh an ngaihven meuh lo va, a lawm ru hle. Maian a hih mêk laiin a pa ţhian zinga a ngei ruk deuh, pa të lam kut hlei zet Pa Thara an tih mai hi a rawn phei a. A biangah a rawn piai thuak. 

"Ka nghak nula dawn che ka tih kha aw. Hei i nula reng tawh si a, i pa te hi ka dil tawh mai dawn," a ti su su a. Lily-i a luak lo chauh. A ngawi reng thung. A sam a chul leh a, a lo thle sawn. Chutah a hnung lam aţang chuan a nghawng a rawn khawih leh thuak. A tho ta tharh a, "I va zak lo ve. Kal sawn teh," a ti tuar a. Pa Thara chu a nui huah huah. 

"I hmel pawh a lo ţha zual a nih hi. Ka hmu khât deuh tawh che a, i lo nalh ta hle mai. I lem ve duh hlek em?" a ti a, a nui sâwng bawk. Lily a insum zo ngang lo va, a hmaiah chuan a beng ta a. 

Ring leng lawng hian, "I zak thei lo mah mah. I fiama i chhaih tur pawh ka ni lo. Haw rawh," a ti hlaih hlaih a. A pate an rawn phei ve nghal. 

"Ţhianpa, i fanu chuan fiam a ngaina vak lo a nih dawn hi. A pawi lo ve, ka nupui tur a la ni tho alawm," tiin Pa Thara chu a nui thler duai duai a. Lily pa chuan, "Lilypar, i Pa Thara kha khati anga an khum tur kha a ni em? Mawh? Engvangin nge khatianga i ţawng khum vel a? " a ti hmuar hmuar a. A meng rum kher mai. 

"A fiam loh tur a fiam a nih kha!" a lo ti hmak. A pa ţhiante zinga a ngamtlak ve ber Pa Muana chuan, "Tir'u saw lamah inkawm ang u. Thara pawh ngah nge i va phei reng reng. Kan sawi lai kha va sawi leh teh ang u," a ti chuar chuar a. A pa pawh chu a ţawng zui ta bik lo. A naute pawh an rawn bang ve ta a. A lo buaipui nghal vat vat. Dar 5 a pel fel awrh tihin a hriat ngai loh number aţangin call a dawng ta a. 

"Hello!"

"Hello, Lily, hetah Pu Rammuana ka nia. Hei thil duhawm lo deuh a thleng a. I nute chuanna sumo kha a che sual a, kawng thlangah a tlan liam a. I nu pawh vanduaithlak takin a boral zingah a tel ve a!" a rawn ti ta a. Lily-i chuan phone a thlauh tawp! A khur nghal hlawk hlawk. 

"Paaa…Paa!" tiin a au ţial ruan a. An rawn phei. Chhuata phone chu a kawk a, eng mah a sawi thei lo. Pa Muana chuan a lo chhar vat a, a han be ta a. Ani pawh a hamhaih kher mai. Thil awmzia a pa chu an han hrilh a. Ani pawh a rui a reh nghal vek. A meng phawk hrû mai. Lily-i lah chet ngaihna hre loin a khur zawih zawih reng si a, a naute erawh an bang bo viau. In chungte an rawn chhuk a. A putea te pawh an rawn lang ve nghal. Ţap thawm leh in singsa thawm nen; Lily-i chuan awm ngaihna reng a hre lo. A naute a kuah a, bang kil lamah an ding khawm raih mai. Nakin deuhah an in chung nuin a rawn kai chhuak a, in chungah a hruai chho ta rih a. 

Ţah nachang pawh a hre lo. A nu a thi tih chu awih har a ti tak zet a ni. A nu lakah a hel fó va, amah vanga nun chhe ta angah te a inngai hial ţhin. A pahrawn hremna pe lo leh doctor pawh a panpui lo kha a dem a, a haw fô! Mahse, a tawp khawkah chuan a nu chauh chu a neihchhun a ni. A laka a inthiam loh vangin a nu khan a hau ţha ngam ngai lo va, zu rui chunga a haw pawhin a hauh loh a tam zawk. Engkim a tihsak a, thawmhnaw leh eitur, amahin a mamawha a hriat loh thlengin a pe. A nu a ni miau a, a tur ve rengah a lo ngai ţhin. Mahse, tunah chuan a nu kha a kal tawh. Hetah a awm tawh lo. Neih eng mah a nei ta lo. 

Zan dar 10 dawnah a nu ruang chu a lo thleng a. A hma chuan a bungraw tam tak nen a rawn thleng a, a buai pawh an buai hle ţhin. Tunah erawh amahin, a kham phei zawngin a rawn lut ta. Kuang chhung aţanga la chhuakin khumah an zalh a. Puancheiin an khuh, a hmai te pawh an chei. Lily-i leh a naute erawh a nu lu bulah an ţhu tawp. Eng mah tih nachang an hre lo va, tih loh tur pawh an hre hek lo. An in chung nu leh a nu ţhiante an ţap hawm hawm a. A pahrawn pawh a rui lungpuam a ţap ruah ruah mai. A naute pawh an insût hlap hlap a. "Nu…nu..!" tiin. Lily-i mittui hi engati nge a hul tlat! Engati nge a ţah ve theih miah loh le! A nu hmai chu a chûl a chûl ringawt a. Sawi duh a la ngah asin. A laka a lungawi lohna pawh a la hrithla famkim hlei nem. A lo tihhrehawmnaah pawh ngaihdam dil a la duh asin. Tunah chuan a nu chu a thaw tawh lo va, a meng duh hek lo. 

Khua a lo eng ţan a. A naute chu in chungah an pawm chho va. An muhil a ni ngei ang. Ani erawh vawi khat a va zung tih loh chu vawi khat mah a nu ruang a kalsan lo. Zosanga leh a ţhian dangte an rawn lang a, ruang an rawn kil ve ren rawn a, mi dang an kian leh ta mai. Mahse, a ţhiannu ve ber Kimpuii chu a bulah a ţhu a, hnem ngaihna erawh a hre bik chuang lo. Zosanga'n lainat hmel zeta a melh vawng vawng pawh Lily-i chuan a hmu hek lo. A nu chauh lo chu tu mah a hmu thei lo. 

CHHUM DUM

A nu chu an vui a, thlanah an phum ta. Hetih chhung zawng hian vawi khat mah a ţap lo va, a mittui a tla hek lo. Mi ţhenkhatin "Lily-i chuan a va tuar awm lo em!" an ti hial mai thei. Mahse, mi tam zawk chuan, "A va lainatawm tak êm, a ţap thei bawk si lo. Han ţap bawrh bawrh se, a inţap thawl ve ang a. A hamhaih vek a nih saw, nakinah a la tuar ngawt ang," an ti. An sawi dik. Ni e, a la tuar dawn chauh. A sarhu lai chuan lenpuitu an la nei a. Khawngaiha lainattu an rawn lang zut. Ţhalai lam lah thiam takin an rawn zai ţhât ţhât a. A ţhiante pawh an rawn kim ţhap zel. 

Ni a ral a, hun a liam a. Inleng an ţil ţan ta. Khawpuiah phei chuan inlen chilh hman an ni meuh tawh lo nen. Mahni buai buaiin an buai hlawm tawh si a. Lily-i pa Pu Mawia pawh a la ţha hruah hruah hle. An nu râlna sum pawh a dawng ve zel a. Inleng an han ţin tak tak hnuah chuan, a zia a rawn chhuah leh ţan ta der mai. A khawhar lungleng chhuanlamin zu a han in chho leh ta a. Lily chuan a nu ai a awh a ngai tih a hriat ve vek avangin chhel taka eng pawh tuar turin a infuih sauh sauh reng a. A naute chu a nu thisen, a nu hrin te an nih vangin a ensan thei lo. Tih tak êmah chuan a putea te pawh a hrawn thei; nuam lo mah se, a nun tichhetu a pahrawn bula awm ai chuan a zia zawk tho vang. Mahse, a naute vangin a nu lu nghahna hmun chu a chhuahsan thei lo a ni. 

"Lilypar, chaw ei min siam vat rawh!" Dar 8 bawr vela a pa lo haw chuan a ti tuar tuar a. A naute lehkha zir a ţhutpui mêk lai a ni. A nu thih aţang khan zu far khat mah a la in leh lo. Hreh zetin a va chhuak phei a. Chaw ei chu a siam mawlh mawlh a. 

"Sa a awm na’nge? Heti ang chawhmeh tui lo lutuk ka ei ngai em ni? " a lo ti vin leh ţhak. Zan dangah chuan sual a chhuah vak ngai lo. A rui lungpuam a ţap bengchheng ţhin tih mai loh chu. 

"Sa leina min pe la, naktukah ka lo lei dawn nia," a lo ti sap a. 

"I hlawh te kha i hmang zo vek tawh mi a? Eng atan nge i hman? " a lo ti khur khur. 

A hna aţang khan a la bang chiah lo va, mahse, a hawn hma zel a ngaih vangin mi dang angin a hlawh chu a tam thei lo vang. Tin, a nu thih aţangin hlawh a la la lo hrim hrim. A la hun lo bawk a. 

"Hlawh ka la la lo va," a ti a. 

A pa chaw ei chhung zawng chu ţhutna pindanah a lo ţhu ngat ngat. Ani lah a rui si, chawhmeh te chu a tibaw thul, a ei hlei thei lo chu a ni e. A ei khamah a va seng fel vat vat a. A sil fai zawha a naute pindana a lut tur chu a pa chuan a rawn kuah chawt mai. A ka a hup nghal. Mahse, ani zurui mai mai chu a hlau hlek lo. 

"I nu ai i awh a ngai. Hman ang khan. I hre thiam em?" a rawn ti sur sur a. A thawk rim chhiatzia lah chu Lily-i a luak lo chauh. A hmui hupna chu na zetin a phih thlaksak a, nam kian dawrh pahin, "Thih i duh loh chuan min rawn hnaih tawh suh!" a ti ţhawt a. A naute mitmei a veng ve deuh bawk si. Rang takin a naute pindanah lutin kawngka a kalh nghal khap a. A dinhmun a derthawng chho zel tih a hai lo. Mahni inveng ran chunga a naute tana û ţha ber nih tum chu a hahthlak viau ngei ang le.. 

A ni telin a pa chu a sual telh telh a. Zu a in nasa tual tual bawk. A inah a ţhiante 

hruai lutin lehkha an deng tluk tluk bawk a. Naupangho tan pawh lehkha zir a harsa sâwt khawp mai. Lily chuan an in chungpa a hrilh ta tawp a. An in chungpa chuan Lily-i pa chu a kam khat ta nge nge a. Chungte chu, "Min hêk!” tiin Lily-i a ankhum leh hrep. Kut êm hi chu a thlak leh rih lo. 

Sunday chawhnu a ni a, Lily-i naute inkhawm bang an rawn hawng. Lily-i chuan a lo thlak vat a. Amah hi chu a inkhawm ngai lo. A nu dam lai pawh khan a inkhawm ngai lo tawp! A naute erawh a tir lui hram hram ţhin. A pate chu bial hnihin an inlehkha den leh tluk tluk a. An ţawngkam a phawkphawhraw thei si; Lily a lo ìp chawih chawih ţhin. Dar 5 bawr velah an zu latu a lo thleng a. An han in leh ta a. An ri nuai nuai mai. A ţhen an haw ta bawk. Lily-i pawh eirawng bawl turin a chhuak ve ta a. An lo thlek hû hlawm. 

"Ţhianpa, in nu thar em ni?" An venga mi ni lo, a pa ţhian tho chuan a rawn ti hlawl mai. An nui dar dar a. Pu Mawia chuan, "Kan nu fanu a nih saw. Nupui atana neih tlak fê chu a ni tawh. A nu ai hi a la awh mai ang," a ti lûng lûng a. A ţhiante hoin an lo bawl nghal bawk. 

"Zaninah mo lawm nghal ila a ni mai alawm, " an ti kual vel a, Lily-i a ţap ţêp. Mipa phawkphawhraw pui puiin chutia zah pah lo taka an han hisâp kual vel chuan a tina tak zet a ni. A pa a rawn phei ţuang ţuang a, "Bawihte, ka ţhiante ho saw rawn kawm ve la. An kawm châk êm che saw," a rawn ti a. A álu velna chemte chuan vih thawih a châk kher mai. Mahse, êm a a ti leh deuh a. 

"Awm ve mai mai teh u," a lo ti ringawt. A thil tih lai a ti leh hmiah hmiah. Mi dang an lo luh belh tak bawk avangin lehkha bawk chu an deng leh a. A pahrawn paw'n a kalsan ve nghal a, a thaw hawk mai. 

A dinhmun a derthawng telh telh tih a hai lo. Hetih lai hian Zosanga nen an inbe fê tawh. Mahse, lo len erawh a phal lo. Inngaizawng ang deuhin an inbe tawh. Amah paw'n Zosanga a tana a hlutzia a hre thiam tawh a. Hnar kuala hlat zel a hreh tawh. A nu thih hlim chhawn laia Zosanga felzia leh a ngaihtuahzia kha a hai bik lo. 

"Ly, ţap bawrh bawrh rawh. Ti kha chuan i puakkeh mai ang. A ţha lo," tiin a fuih ţhin a nih kha. Mahse, a ţap thei ngai si lo. 

Hun a kal ve zel a. Lily-i paw'n hlawh a la ve ta. A naute fee tur a dah hrang nghal a, chan alawi a nei lo nghal. Chawhmeh eng ilo ngaihtuah ve reng a ngai si. Mahse, an vanneih asiamin a nu babu a hai chhuak hlauh a. A bungrua la ba hote chu a lo ziak fel vek a. Heng bate hi a rawn luh theih chuan eng emaw chen an daih ve thei dawn a ni. Mahse, a pa chu eng mah a hrilh duh lo. Zu manah a tlak ral dawn si a. 

"Lily, khaw maw cheng zanga min lo pe the," a pa chuan a eirawngbawl laiin a ti a. 

"Ka nei lo," a lo ti. 

"Hlawh i la tih ka hre ve. Khawi rawn la vat rawh," a ti khur khur a. 

"Ka nu râlna sum te kha i hmang zo tawh em ni? Ka nei lo. Duati te fee-ah ka pe vek tawh," a lo ti ve ta hmiah. A hlau duh bik lo. 

A meng sen rûm a, khawih mai duh hmel a pu. Mahse, a hlau hlek lo. 

A ding bu lûk lûk a, "Hmm, sum hmuhna dang ngaihtuah a ngai a nih chu," tiin thei leh thei lo vin an gas bur a va pu chhuak ta mai. Lily-i a ţêk teh e. 

"Dah vat rawh. Gas ván nak alaia, i va sual tak!" a ti hlaih hlaih a. Intipa takin a pu chhuak ta daih. Hrilhhai zetin a en liam ringawt. A ţah a chhuak. 

Zanriah chu a naute nen an kil a, a chaw ei a tui lem lo kher mai. Duati chuan, "U, â pa hi lo haw tawh lo mai se tiraw? " a ti ta reuh a. Lily-i hnuk a ulh. 

Mampuia pawh chuan, "Nia, kei pawh â pa hi ka hlau e," a lo ti ve bawk. 

"I pa bak pa kan nei si lo va, â nu a thi tawh bawk si a, chuvang chuan nangni chu fel deuhin awm u la, ţha takin lehkha zir ula. Nakinah nuam deuhin kan la awm dawn alawm," tiin a thiam ang tawkin a naute a fuih ve. 

Chaw an ei kham a, a nau ten TV an en a. Zosanga'n a rawn bia a, inhmuh falna hun hi an la nei meuh lo. An dawra a rawn kal zawk bak hi an inhmu meuh lo tih theih a ni. Chuvang chuan a ngaih pawh an inngai ve viau. "Naktuk chu dil la, chawhnuah leng ve ila," a rawn ti a. Amah Zosanga a khawngaihin zahawm a ti ve bawk si, "Ni e, ka lo dil dawn nia," a ti ve ta ringawt. An hotupa hi a fel a, a khawngaih bawk a, a vannei ang reng. 

Zosanga nen an inbiak zawhah a nau ten You tube en an châk si a, a entir a. Tv chu a thlir mai mai. A rilruah erawh thil dang daih a awm. A nu pawisa batute pawh a be pawp hlawm a, pahnih khat lo rinawm lo leh ka ba lo tia lo sawi an awm tih loh chuan thla thar veleha an pek theih tur thu an lo hrilh hlawm a. A lawmawm hlein a hria. A nu bank A/c ah pawh eng emaw zat chu a awm mai thei. Mahse, chu erawh a tawp khawkah lo chuan khawih chêt a tum lem lo. 

A nu passbook leh file vel chin fel tumin an pindanah a va lut a, a luh khât deuh vangin a lo hnawk nuaih mai. Zu rim a nam hum hum bawk. Almira chu a hawng a, safe pawh a lo inkalh lem lo. Tah chuan file-ah fel fai takin a nu document ho chu a lo awm a. A en kual thuak thuak. A pa hian a hre chhuak ang a, a han draw vek a hlau si. A pindana dah daih a rilruk a. Almira a khar leh dawn chiah tihin a nu puan kara whisky lo inzep tawt chu a hmu a! A pa hian a hmu lo nge a dah tih a theihnghilh zawk ni. Almira chu a khar mai thei ta lo. A heh a pet fan fan a; chu zu ûm chuan a hìp ngawih ngawih. Thla khat dawn chu zu a in tawh lo. A rilru hah mangan rukna, a chhungril hahna zawng zawngte hrikthlak loha la awm chuan, chu zu hmang chuan an thlem a ni ber mai. A la ta nge nge a. A chanve aia sang mah a lo la awm zui! A ruk thei ang berin a pindanah a keng lut a. File-te chu a dah ţha phawt. Darthlalangah a inen vang vang a. 

"Tun ţum chauh zawng eng mah hre lo leh ngaihtuah lo va muthilh ka duh ve a ni," tiin a phun sap a. Dar 9-ah a naute chu mu turin a ti a, thu an awih thei a, a zia. An mut tawh hnuah a inphih fai leh tê tê a. A pindanah a lut ta. 

A khum nghengin chhuatah a ţhu sawp niaih a. Zu chu a thli ta ker ker mai. A no khatna chu a thawk khat piap a. A ner náwng nâwng a. A pum sa thla ham ham chu a hre thei. No thum a in leh meuh chuan a vai ţan. Chaw kha a ei tlem bawk nen, pum ruakah chuan a thawk chak ang reng hle mai. Zosanga'n a lo call zui!

"Hello!" a ti thám ţiak a. 

An han inbiak takah chuan a ţawng dan aţangin Zosanga'n a lo man thiam nghal vek. Ni e, a hre ţhang tawh alawm. 

"Ka lo kal dawn. I pa lo haw se a hau dawn che asin," a rawn ti. 

"A ngai lo. Mut ka duh. Eng mah hre loin min muthilhtir teh khawngaihin," a ti niah niah a. Zosanga paw'n a hre thiam. 

"I pindan kawngka kha a inkalh ţha em? Va en phawt teh," a rawn ti. A va en a, a lo inkalh thlap. An inmang ţha a, a mu nghal. A duh dan ang ngeiin tui takin mumang bo ţhak khawpin a muhil ve ta. A pa lo hawn lai pawh a hre lo. Zingah lu na leh luak chhuak burin a tho.

An lo sawi lawk tawh angin chawhnu lamah Zosanga'n a rawn lam a. An chhuak dun ve ta. Zosanga chuan a chhungte in lam a panpui a. Lily-i paw'n a hnial lem lo. A chhungte chu an nu leh pate zin lai a lo ni a. An lo dawngsawng ţha hle. An innel nghal viau. Eitur te an ei hnuah Zosanga unaupa Remruata pindanah an lut dun ta. 

Khumah an ţhu dun ran a. Zosanga pawh a zâm hmel hle. Lily-i kut chu lain, "Ka laka i rilru dik tak hi sawi ve la, phone aţanga sawi hi chu a ho tlat," a ti sup a. 

Lily-i chu a khur der der, a chil a lem khawlh a. "Ih, sawi kher a ngai mi? Ti hian i hriat vek hi," a lo ti ve tawp. Zosanga chuan hnai zetah a rawn melh a, a mitmeng thûkzia chu Lily chuan a hai bik lo. Dimtèin a rawn fâwp ta a. A lo chhang let ve nghal. Zosanga chu a duhthawh tial tial a, Lily pawn mipa dang khawih ang ngawt a ni lo tih a hre thei. Tlûk erawh a hlau! A hlauh ang ngeiin Zosanga chuan a kawng hnuai lam chu a rawn dap a. An kut an inelh ngat ngat. A tawpa tawpah Lily-i a ding thut. Meng phelh phang chungin, "Zosang, ka duh lo!" a ti ta tawl mai. A khur nasa lutuk chu Zosanga chuan mak a ti ngei mai. 

"I ţha em? " a ti a. A ngaihtuah hmel hle. 

"Ţha lo, hawn ka duh," a lo ti hul hak a. A dang ro zet tihnâwng turin a chil a lem leh khawlh. 

"Ly, ka tihpalh. Tihhlauh che ka tum lo a nia aw. Ka duh lutuk vang che a nih kha. Min ngaidam rawh," a ti tham ţuak a. 

Lily pawh a inthlah dul ta deuh. "Hmm…ka hre thiam che alawm. Mahse, hawng tawh ang," a lo ti a. 

"I thinrim lo tih sawi phawt rawh," a ti leh a. 

"Ka thinrim lo. Mahse, khatiang kha thleng tawh lo se ka duh," a lo ti a. Zosanga pawh a ngaih a ţha ta deuh. Duat taka a lua chul pahin, "Ka lawm e, i duh dan chu ka zawm ngei ngei ang. Ka lo insùm thei lo palh a ni. A thleng leh tawh lo vang," a ti dam thlup a. Lily-i pawh a muang ru suai suai mai. 

Zosanga hian Lily mize mak tak hi a hrethiam lo fô! A changa a vawt raih ţhin te, a changa a titi leh sar sar zel te chu mak a ti ţhin. A nunah eng emaw tak a thleng tawh a nih rinna a nei fô. A zawt ngam meuh si lo. Dik tak chuan, hmeichhe dang chu a ang lo alawm. A hmaa zu a in ve zeuh lai te pawh khan ngaihsamna leh nun pawlawh ang kha a nei ngai lo. A inveng ru ran ţhin niin a hria. Chetsual hlau êm êm rengin hun a hmang a ni ber. Chu tak chu Zosanga chuan mak a ti a ni. Engtikah emaw a chhan a la hre êm ang chu. 

THLIPUI

Pu Mawia chu a hrâng telh telh mai. Zan khat phei chu hmeichhia a rawn hruai lut a, an nupa khumah a mutpui hmak mai. Lily-i chuan insûm harsa a ti ngei mai. Mahse, zingah a hmeichhe rawn hruai chu a hawn leh tak mai avangin eng mah a sawi ta lo. An in chu a ţawp sâwt ta viau. Ani lah a hnaah a kal lo thei si lo. A pindan chu tala-in a kalh tawp zel. An chhungkaw thil neih hlu deuhte chu a pindanah a dah vek. A nu puante pawh a pa chuan a lo hralh nual tawh a. A la hralh bang chu a dah ţha ta vek. A tirah a pa chu a âng nasa mai. Mahse, mak ve deuh chu Lily-i hi kut a thlak ngam miah lo! Amah Lily-i hian a hlauh miau loh vang te pawh a ni ang e. A ţhiante nen an ri hut hut reng a, a fate pahnih chu an awm ve tih pawh hre lo ang maiin nuam a tawl ţhin. 

Zan khat chu ruah a sur cherh cherh a. Lily-i te chu an la mu lo deuh tihin a pa leh a ţhian pahnih an rawn lut a. An rui vak lo tlat! Eitur an rawn hawn nual mai. Apple te chu Lily-i an veltir a. A naute paw'n an ei ve. Ani erawh chuan a ei châk lem lo va, an zinga a la hmuh vak ngai loh chuan, "Kha naute, hei in rawh. A to teh mai a nia," tiin coke bur tiat, a tui var hi a rawn lek chhuak a. Lily chuan a lu a lo thing nar nar, "In ve chhin teh, a tui teh mai a nia. Champhai aţanga ka chah ngat a nih hi," a ti leh a. Chuti taka nawr ta chu tiin a in chhin a, a thlum tui zêk. Lem thum vel a lem hnuah a pe leh a, a naute pawn an in ve. 

Dar 10 a rik dawn tak avangin an mu ta a. Khum a deh rual deuhthawin a muhil nghal. Mumang mak zet a mang zui. A mumangah chuan, Zosanga hian a lo bawh run a, tal a tumin a tal chhuak mai thei lo, "Lily, ka ta chauh i ni. Ka nei dawn che," a lo ti nghut nghut a. Au chhuah a tum, a thei hlek lo. A taksa chu a che thei lo tawp mai. Zosanga chuan a pyjama chu pawtthlain a kawr a rawn hlim nghal zat a, a rilruin ‘Hetiang hi ti suh, khawngaihin,’ a ti a. Mahse, a ţawng chhuak thei si lo. A mangang lutuk chu a theih tawpa insang marin a ke a leng vak a, a harh hlawl mai. A'n men nâk chuan thei tui in tirtu khan a lo bawh run mai. Lily-i a rak nghal tuarh. Rang zetin a ka a rawn hup ta hmiah. Kekawrtê nen chauh a awm tih a hre zui nghal. A mangang tak zet a ni. A tal aih aih a, a taksa lah chu a zawi nguai mai si. 

Chu pa kut chu a seh sak ta a. Na tia a kut a thin nawk nawk laiin, a theihtawpa insang marin a tlawh ta a. A lo ţhu nghet lo nge khum aţang chuan a tla thla ta. Lily-i chu a ţhu chhuak nghal vat. Mahse, a lu a hai tak zet. "Pa, ka pa!" tiin a au a. A reh vawng vawng mai. 

"Duati!" a ti leh. A reh leh tho. A tlawh thluk pa chu a lo rui ve deuh bawk a, zawi muangin a rawn tho ţuah ţuah a. Lily-i erawh pindan kawngka a hawng mek thung. Thutna pindana a va chhuah chuan a a pa leh a ţhianpa chu ţhutthleng seiah an lo mu hnâr sûk sûk mai. 

"Pa, hei pa, harh teh," tiin a sawi nawk nawk. Kha mihring kha a rawn chhuak ve nghal zat. Engtin nge a pindanah a rawn luh theih? Kawngka kha a kalhin a hre si a! A pa chu a rum ţuah ţuah a. A rawn meng duar duar. 

"Tho teh, hei i ţhianpa hian min khawih a tum a nia," thlaphang zetin a lo ti a. A rawn ţhu chhuak luau. A ţhianpa chu a va melh a. Lily-i lam hawi lehin, "Mutpui rawh. Pawisa min pe alawm," a ti ta mai a! Lily-i a per dãwrh. A pa ţhianpa lah chuan nui sâwng chungin a rawn pan ta chhar chhar mai. 

"Ni e, i pa hian ka hnenah a hralh tawh che. Pawisa in nei si lo va, in chhungkaw tan i inhlan mai a ngai a ni," a ti bul bul a. Lily-i chuan rapthlak ti zetin a lo melh a. Zawi zawiin kawngkapui lam a hnaih tial tial a. Kawngka kalhna chu hawng rawkin, kekawrtê nen chuan a tlan chhuak ta thut mai. A lo thim vek a. Hmanhmawh zetin in chung lam a pan nghal. 

"Pa Lawm, Pa Lawm, khawngaih takin lo hawng teh u!" a ti a. A ţap titih. In chung nu zawkin a rawn hawng a. Lily kekawrtê nen chauha ding a hmuh chuan a mit a nuai nawk nawk a, makti zetin a melh reng. Pa Lawma chu a rawn tho ve nghal bawk. Mittui tling piau chungin, "Pa Lawm, ka pa khu that rawh!" a ti ta tawp a! Thil dik lo a thleng tih an hre thiam a ni ang; a fapa tlangval upa tawh lam Ruata va kai thoin Lily-i te nen chuan an in lam an pan thla ta nghal a. Kawngka chu a lo la inhawng hiai mai. An va luh chuan Pu Mawia leh a ţhianpa chu ţhutthleng seiah an lo ţhu dun a. 

"Mawia, eng thil nge i tih leh tak? Hei Lily hlau hlawpin a rawn tlan chho va, eng nge thleng? " Pu Mawia chuan awka ngaihnobei vak lo hian a ti a. 

"Kal suh ka ti ka tia, a rawn chho ţâlh a nih kha. Kha a zurui ka ţhianpa nen hian an mu dun a, a harh leh khan min mawhpuh ringawt a nih kha. A tih fô dan a nia, tihian ka ţhiante hnenah hian a inhralh ţhin alawm," Pu Mawia chuan a lo ti ta tlat mai. Lily-i a ding sai ngar ngar, "I va dawthei tak êm. I ţhianpa hnenah min hralh a, theitui min in luihtirin damdawi in lo pawlh a, ka muthilh laiin i ţhianpa hian min sual a tum a nih kha. Dâwt chiang lutuk chu sawi suh," a lo ti khur dat dat a. 

Pu Lawma chuan, "Lily-i hian zu rim pawh a nam lo. I awm dan hi a dik tawh lo. Heti reng renga i khawsak chuan in pawh hi in luah reng thei lo vang. I fate hi ngaihtuah rawh," a lo ti ve a. Pu Lawma te leh Pu Mawia te hi hla tawh tak aţanga inchhung an ni ve a. A zilh pawh an zilh nasa, a ngawi kur zel a. A intih khawngaih thlak thiam bakah mi tihlawm a thiam hle bawk si. Pu Lawmate pawn tih ngaihna tak an hre tawh bik meuh lo. Hnawt chhuak ringawt se, lehlamah an chhungkhat a nih ve bakah Lily te unau an ngaihtuah ve bawk si. 

"Ka sawi te chu in awih ngai hlei nem. Lilypari hi ring vak duh suh u. Tihian in laka tlaktlum nan a rawn zualko vel a nih kha," a ti leh bul bul a. Lily-i chu a ţawng thei tawh lo. A inhum ruh ngat ngat ringawt. 

Zan lai laia thawm han neih vak kha Pu Lawma chuan a duh meuh lo va, "Lily, va mu leh phawt rawh. Naktukah a rilru fim hunah kan lo sawipui leh dawn nia. Hlauthawng suh. Eng mah a thleng tawh lo vang," a ti a. Lily-i pawh kekawr a ha bawk si lo; Pu Lawma te awm lai chuan a pindanah lutin kawngka chu a kalh a. A dawhkanin a dang leh nghal bawk. A muthilh theih chu a rinawm chiah tawh loh. A vanduaizia a ngaihtuah chuan ţap hawm hawm awm a ni. Mahse, thil mak leh rapthlak a tawng ngun tawh a, a kum naupan ngaihtuahin a chhel vek tawh. A dinhmun derthawng zel chu a ngaihtuah a, engtikah emaw chuan inven zawh loh a la neih ngei a ring. A pian sual rukna a chhuah lai te ni ta se, kha pa lakah khan a tlawm mai thei a ni. Chutiang a ngaihtuah kai phei chuan a let tawn chhên a, A pa tak tak bulah a va awm daih zawk dawn em maw ni le. Mahse, a naute mawlh hi. A pate nen chauh an awm phei chuan, engtin tak rawn sei lian ang maw… 

HMANGAIHTU KUT

Eng lai pawha fimkhur leh inveng reng renga hun hman chu rilru a chawl lo va, a taksain a lo tuar leh zel bawk nen; Lily pawh tla kùam mai. A thu that bawk. A naute hmuha hlim lo lutuk anga lan chu hrehawm a ti bawk si. Dawrah lah hlim ber anga customer-te lo hmachhawn a ngai bawk si, a hah hluah hluah ţhin. Zosanga nen pawh an la inbe ve zel a. Thil thleng erawh kha chu a hrilh duh lo. A thinrim dawn bakah a punlun vak ang tih a hlau. Mahse, khatiang thil kha a thleng leh a nih vaih chuan, Police kuta dah a tum nghet tawh hle. 

"Ly, i pa a awm em? " Tlai dar 4 a pel hlek. 

"Awm nang," a ti a. 

"Ka lo kal lawk ang aw," a rawn ti a. A pa a awm lo bawk a, a remti ve mai. A rawn inkhai bawr nasa mai a. 

"Eng nge a? " a lo ti vat. 

"Ei ţeuh ţeuh i mamawh," a lo ti mai a. Lily a nui ringawt. Zosanga chuan damdawi te a rawn phawrh ruih mai. 

"Awiii, engati êm êm nge? " a lo ti hluai. 

"I naute tan chak taka i awm a ngai alawm," a lo ti liam leh puat. A apple lo kensak chu a vel nghal a. An ei dun a. 

"Chaw ei ve la," a ti fiamthu a. 

"I phal te chuan," a lo ti leh tawp. A pa a lo la haw lawk awm chuang si lo va, eitir mai pawh pawi a ti lo. Chaw pawh a chhum kep ta nge nge a. An titi siam siam a, a naute sikul bang an lo haw. An zah deuh avangin, Zosanga chuan a lo be vat a. Eitur te chu a pe nghal a, an nêl ve mai. 

Ni dang aiin zanriah an ei hma a. Zosanga'n a lo ei ve vang a ni pakhat. An hlim tlang reuh hle. Chutia hlim taka an ei khawm ve dar dar lai chuan, rin loh lutukin a pa a rawn haw thut mai. A ţhianpa Pu Tluanga nen an la ni zui! Lily-i a meng phâwk viau. A pa chuan Zosanga chu hnai set sawtah a melh a. 

"E heu! I va ngampa sâwt ve!" a ti ta mai. Zosanga a ngawi reng. 

"Pa, Zosanga hi ka sawm ve a nih hi. Eitur te, damdawi te min lo kensak ţeuh a," tlawn titih hian Lily-i chuan a lo ti a. 

A pa chu ngeiawm taka nuiin, "Chu! Ka tel loin nuam in lo ti hle a ni maw? Lilypar, hei hi hre rawh. Ka inah hian mipa dang ka ţhiante tih loh tu mah i khawi tur a ni lo," a ti vin ţhak a. 

Zosanga a kham nalh a, a kut a sil zo, a lo let leh lamah chuan, "Pa Mawi, ka thiam loh a ni e. Kei man min sawm ve mai la ka tih vang a nia. Lily-i kha hau suh," a ti a. Ţawngkam nêm takin a bia. 

Pu Mawia erawh a pawr tulh tulh. An zu in a kham lo chhap nen. "Khawi pawisa min lo pe rawh. He pa i mutpuina man hi i dawng ngei ang a, rawn la vat teh," a ti a, Lily-i chu a din chilh ta run mai. 

A bialpa awm laia chutiang kher khera a ti chu tawrh harsa a ti ngei mai. A tho thut a, "Nang anga tenawm ka ni lo ve. I zu inna tur chu thawk chhuak rawh," a ti ta hmak mai. Zosanga a awm tho va, a hlau duh ta bik lo. 

"Eeê, khatiang tea min ţawng khum ngam. Ka chawm ka hrai in nih hi hre rawh. Mai mai a che," tih leh ni danga a tih ngai loh ang taka a chhip sama keh a rual nghal a. Zosanga a awm ve vang a ni pakhat ang. Han inlak pa vel a châk a ni mai thei. 

"Min thlah rawh," Lily chuan a ti ţhat. Mampuia a lo ţap ţuau bawk. 

Pu Mawia chuan Lily-i chu kawih her sawk pahin, a hmaiah a beng nghal ţhuai a. Zosanga mit a kham ta. A va pan phei a, Pu Mawia bekah a va hnek ta siah mai. A tlu chiang teh e. Lily chu a kuah nghal thlawp a, "A na em?" a ti sup. Lily chu a zak ngawih ngawih. Pu Tluanga a rawn inrawlh ve ta vat, "I va zak lo ve, a in chhungah pa ber kut i thlak ngam a maw?" tih leh inhum sek a rual ve nghal. Zosanga lahin a hlau therte si lo. 

"I ngam chuan min khawih la, ka pa rual i ni tih ka theihnghilh ang," Zosanga'n a lo ti hmiah. Pu Mawia rawn tho khan a chempui a va chuh lawk a, Zosanga chu sah a tum ta mai. Lily hlauhlawp lutuk chuan, "Pa, duh tawk rawh. Khawngaihin!" a ti a. A theih ang angin Zosanga a din hliah bawk. Duati hlau lutuk khan in chungte a lo han pun bawk a. An rawn chhuk thla. An inţhelh dai thei hram. Pu Mawia chu a ang nasa kher mai. 

"Chhuak rawh. Ka in chhung hi vawi khat mah rawn rap tawh suh ang che," a ti hluk hluk a. Zosanga chuan dam dapin, "Ka pu, ka chhuak êm êm ang. Mahse, thil pakhat ka sawi ve ang. I fanu hi ka hmangaih a, neih ngei pawh ka tum. Khawngaihin kut chu lo thlak tawh lo la; hrehawm taka a awm leh a nih vaih chuan ka nupui ni turin ka rawn hruai ang. Chu chu i lo hre reng dawn nia," a ti ta a. Lily-i a buk khum zauh a, ngawi rengin a chhuak nghal. Pu Mawia chuan Zosanga thil lo lei te chu a paih darh a, a âng reng bawk. Pu Lawma te tan pawh han hauh vakna hun a ni rih lo bawk a. Eng vak an sawi lo. Lily-i rilru erawh a paukhauh sâwt hle. 

Kha mi ni aţang phei kha chuan Pu Mawia chu a sual zual a. A ţhiante lah hian inthlahrun nachang an hre ţhak bawk si lo. Lily-i chu hmeichhe khaw lo hmuhin an hmu ni fahmiang, an fiamna ţawngkam bungrua pawh ngap thei tak a ni. Mahse, Lily-i chuan a tuar zel a, a tawrh theih loh hun a la awm erawh a ring. 

KAWNG BUMBOH

Pu Mawia chuan engmah thawk peih hek lo. Hralh theih a mual a mual a la neih ho chu a hralh zel a. A taksa pawh a chhe chak hle. Lily rilru chhia a chhuah chang chuan, ‘thi daih se’ tihna rilru a pu ţhin. Mahse, a naute pa a ni si a, a naute vangin ţhat a chhuah hram hram zawk ţhin. Zosanga lahin a rawn ngaihtuah êm êm reng a, an inhmu zeuh zeuh bawk. 

Ni khat chu a ţhiannu Kimpuii'n a rawn be nawlh mai. Kimpuii hi phaiah zirna avangin a awm ta daih a. An inhmuh lohna a rei tawh ang reng. 

"Lily, hrehawm i ti viau ang tih chu ka ring. Mahse, Zosanga hi ţhen rawh. A nuin min rawn bia a, 'Sawtiang nu nei tawh lo, pa zu ngawlvei leh nghal chu mo atan ka duh awzawng lo. Chhungkaw pangngai deuh chu ni se ka hre thiam, ‘bakah a hma paw'n zu te pawh a in ve ţhin an ti tlat. I ţhiannu chu lo hrilh rawh. Ka duh lo a nia' tiin min rawn hrilh a. Ka rilru a natpui ve tawp che a, chuvang chuan ţhen tum rawh. In innei thei dawn chuang lo," a rawn ti ta a. Lily-i tawrhna a rawn belhchhah sauh mai. Sawi tur pawh a hre meuh lo. 

Zosanga tan a tling tawk lo tih a inhria. Mahse, amah hmangaiha duattu awm chhun a nih miau vangin a tan a hlû a, kal bosan chu a ngaingam si lo. Chutih rualin a nuin a duh lo ngawih ngawih tih hre chunga inzawmna neihpui zel chu a inthlahrung bawk si. Hmangaihna lamah tawn hriat eng mah a la nei ve lo va; mi dang bula inbunruah lah a ngam si lo. Zosanga bula sawi tawp mai chu ţhain a hre ta a. 

"Ih, inţhen mai ang. I chhung ten min duh si lo va, duh tlak pawh ka ni lo reng a. Hmeichhe ţha deuh tawng rawh. I phû zawk" tiin thu a thawn ta tawp a. A hmuh hnu rei vak loah a rawn be nghal. A la duh lo lui a. A vawi linaah a tuar thei ngang lo va, a chhang ta hram. 

"Ka chhungte chungchang kha engtin nge i hriat? " a rawn ti nghal. 

"Ka hre ve tawp," a ti mai a. 

"Ly, ni e, ka chhungte chuan ţhen tur chein min nawr alawm. Mahse, an neih tur che i ni lo va, keima neih tur che i ni. Inţhen ka duh lo. Nang pawh i pain min duh bik hlei nem," a ti dat dat a. 

"Mahse, kan innei thei dawn chuang lo. Ka naute hi ka enkawl an ngai alawm," a lo ti vat. 

"Kan pahnihin kan enkawl dawn alawm. Min ring tawp rawh. M.A. hi ka pass phawt ang a, hna ka zawng ve ang a. Hun ţha a la awm êm êm ang," a rawn ti a. Lily-i tana lo hnar a harsatzia chu… A ngaiin a thlahlel ve ngawih ngawih tawh bawk si. An inţhen ta lo phawt. 

A tuk tlai a haw chu a phu chiang kher mai. A pa chuan an inah ngei chuan zu a lo chhuang vut vut mai! A ter ve ta at. 

"A ni êm êm tawh lo. Kan inah êm chuan hetiang hi ti suh," a ti ve tán tân a. A lo nuihsan vel. A naute an rawn haw, mak an ti ve nasa mai. Gas an hman tlat vangin ei rawng pawh a bawl thei lawk lo va. Tlai tawkah chaw an ei phah. 

Zanah chuan an ri hut hut a. A ţhen an lo luak thul. Zai an play a, an lam vel thul. In chungte pawn an thawm chu an hre reng. Mahse, hauh vak a sâwt lohzia an hre tawh a. An rawn dîkdâk duh lo. 

A naute pawn lehkha zir thei hek lo. Hma takah an mu ta mai. Lily pawh a mu ve daih. Zosanga nen rei vak lo an inbia a. A hriat loh karin a lo muhil ve. A harh chuan thawm a lo reh dûk tawh a. An chatthla tawh a ni mai thei. A zun chhuah vangin a va tho va, a rin ang chiahin an lo thal phung mai. A va zung a, luh leh mai tuma a pindan kawngka a hawn lai chuan a hnung lam aţangin a rawn kuah thut; rak pawh a rak hman lo. Hetiang thil hi a tawng zing tawh a, a inthunun vat. Hnung lam a'n hawi chuan a pahrawn chu a lo khi sûng mai. 

"I nu ka ngai êm mai. Zanin chu a ai awh rawh aw," a ti a. Lily-i a luak lo chauh. 

"Kal sawn vat teh!" tih leh nam sawn a rual a, a pindanah a tlan lut nghal. Kawngka a khar hmain a rawn petek lut ve hman tlat. A pa chuan kawngka a kalh zui nghal hmak. Lily-i hrawkah chuan a rek ta tlat a! 

"I nu ai i awh dawn a ni mai. Chu chu hre ringawt mai rawh. I sawi chhuak emaw, i au beng chheng emaw a nih chuan i naute sawn an tuar ang," a ti a, a sawi nawk nawk bawk. Mahse, Lily-i hi a hre chiang tawk lo a ni. A fanu laka a thil lo tih tawh khan a fanu chu a tisehhel tawh a, inrîkrâpna hi ngaiah a neihtir tawh tlat. 

A pa samah chuan a kêk ve ta mai a, an insual chu a ni ta mai. Ngawi rengin an inelh ngat ngat a. Pu Mawia chu a ruih bakah a taksa a chak tawh lo êm êm a. A tlu ta a. Lily chuan bawhbetin a rèk zui ve nghal. 

"I dam chhunga ka tana i hnawksak leh tawh ngai loh nan ka'n that law law teh ang che,” a ti ta mai a. A rèk na tial tial a, a mitmeng chu thinrimna vangin a de sawr sawr bawk. Mahse, a thinlungah hian zawitèin, "Phuba reng reng keima lak tur a ni" tih thu hi a rawn ri ta tlat mai. A rehna chu a thlah dul ta tial tial a. Thaw hawk chungin a thawhsan ta a ni. A pa a nam chhuah hnuah kawngka chu a kalh a. Khumah muin chung lam a melh ran mai. Namên lovin a ţah a rawn chhuak ta a. 

"Ti nge heti reng renga awm tura piantir ka nih bik? " tiin amah siamtu a chhuah chhal a. A hun kal tawh zawng zawng thlir letin a tan nawm hun lai leh thlamuang leh zalên taka a awm hun lai hi a khât pharh mai. Zanah ni se thinthia mut lai a nei ngai hek lo. A nu thih hma te kha chuan a nu lakah a thinrimna te a la hrithla thei a, a thawl ve hawk ţhin. Tunah a nu pawh lak bo va awmin neih a nei tawh lo. Amah rinchhana dam ve hram hram naupang pahnihte lah an derthawngin an pa suahsualna vangin an ţi êm êm a. Ţhian pawh an kawm ngai mang lo. 

Hmangaih a nei ve a, chu lah a chhungten an duh lo êm êm bawk si. Hma bak hi neiin a inhre lo. Thih a hlau lo, a hreh chhan ber erawh naupang pahnihte hi an ni. A tel lovin engtin nge an awm tak ang? A pa hian a enkawl thei dawn si lo va, fahrah chawmna inah te dah an la ngai ang a, a nih loh pawhin tuten emaw an fa atan lain an unau an la inţhen hrang thei. Heng zawng zawng avang hian Lily-i chuan thi thei niin a la inhre lo. Tunah chuan rilru fìm takin a inngaihtuah a. A pa hi a dah bo a ngai a ni. Heti reng renga a awm chuan, nakinah inven zawh loh a la nei ngei ang. A tlai hma ngeia khawi laiah emaw a dah a ngai. Tum nghet tak a nei. Muthilh tumin a saisir ta a. 

A tukah ni dang aiin a chhuak hma a. An dawra kal hmasa lovin Police Station lam a pan ta. Police officer pakhat hian nelawm takin a lo dawngsawng a. 

A buaina leh harsatna zawng zawng, an unau tana a pa hnawksakzia, khawih a tum dan leh an in chhunga zu an chhuan thu te thlengin a sawi ta vek a. Police chu a lo bu nghut nghut. 

"I pa chu man se min duh tihna em ni? " a ti a. 

"Aw, man ula, jail-ah khung daih ula ka duh êm mai. Ka pu, heti reng reng chuan kan thi thei mai ang," a ti a. Ţah chu a ţap êm lo. Mahse, lo hmutu te chuan a manganzia an hre thiam. 

"Aw le, a nih chuan tunah i hnaah va kal phawt la, tlaiah ina i hawn veleh min lo bia la, man turin kan lo kal dawn nia," a lo ti a. Heti an tih kher chhan pawh nakinah a pa chu lo manin jail-ah khung ta se, chhuah hun a la nei leh ngei dawn a. Lily-i chungah a ţuan an hlau a ni. Chuvangin, manna chhuanlam ţha tak, amah ngei pawh a insawi fihlim zawh lohna tur hmanrua an mamawh a, chuvangin ruahmanna an siam a ni. Lily-i pawh muan khat chuan a muang ta deuh. Dawra a awm lai erawh chuan a thil tih kha a dik ang em tih ngawt a ngaihtuah thung. Mahse, a ti lo a nih si chuan tawrhna hmachhawn zel a ngai dawn si a. A la puahkeh a hlau a ni. 

In a thlen chuan a rin ang ngeiin zu an lo chhuang leh. Pindana a awm laiin police-te chu a be ta a. Darkar chanve hnu velah an rawn thleng ta rup mai. Pu Mawia leh a ţhiante hrilh a hai kher mai. 

"Nang ramhuainu hian min report a ni maw?" tiin Pu Mawia chuan Lily-i chu a kâwk sawk sawk a. 

"I fanu hian eng mah a rawn sawi lo. Mi tu emawin min lo call a, chuvanga lo kal kan ni," an ti ve tlat! An vai mai chuan an man ta dial a. An zu chhuan lai pawh an suan thla vek. In chung pa a rawn chhuk bawk a, "Nang hian min lo hêk a ni maw? Ngawi tak rawh i la hria ang," Pu Mawia chuan a lo ti leh phiar phiar a. Pu Lawma a hrilhhai zawk mah. Mahse, "Jail-ah te zu awm la, i nun i sim tak tak hnuah ka rawn khul chhuak leh dawn che nia," a ti sam êt a. An man chu pawi a tih hmel vak loh. Pu Mawia chu Central Jail lamah an phur thla ta vung vung mai. 

I HNEH TA

Zanah Zosanga a rawn kal. A naute pawh an phâwk lèk deuh vangin lehkha an zir ţha thei meuh lo va. Kar loah an mut a chhuak ta bawk nen; Lily-i chuan a va muttir a. Thutna pindana ţhutthleng seiah an pahnih chuan an ţhu dun a. 

"Zosang, ka chanchin engkim ka thurùk zawng zawng hi i hriat a hun tain ka hria," Lily-i chuan a ti sap a. 

"A pawi hlei nem, ka lo ngaithla ang e," a lo ti dam thluam a. 

A tet laia a pa nunrâwng takin a khawih zan aţanga a tun hun thlengin a sawi ta melh melh a. A ţap hauh lo thung. Zosanga chuan a kut a lo vawnsak ran a. A lo bu leh nghut nghut ţhin. A sawi zawh meuh chuan a tlai duai mai. 

"Tunah chuan i hneh ta. Lily, ka va chhuang che êm! Inthunun tlat lo la chuan tunlai hmeichhe ţhenkhat angin i taksa ngei i zawrh hun te pawh a la awm awm si a," a ti a. A bialnu chu a melh vâwng vâwng mai. 

"Ih maw, dik tak chuan ka phak ang tawkin lehkhabu ka chhiar nasa a, internet-ah ka dap nasa bawk. Kei anga vanduaina tawk ten engtin nge an hneh dan tih hriat ka duh vangin. Kei mah ngei hian ka tum hmasak a ngai tih ka hre ta a. Ka tum a, a harsa ve ţhin. I sawi ang hi a chang chuan ka rilruah a awm ve fô, kan khawsak a harsa bawk nen. Mahse, Zosang, ka tithei hlawl lo. Mi hur ka ni lo va, hmeichhe satliah ni turin Pathianin min din lo tih ka chiang," a ti khur dat dat a. A hnuk a ulh tih erawh a hriat. 

"Zosang, ka thianghlim tawh lo tih i hria a, I duh chuan min kalsan thei ania. Demna che ka nei lo vang," a ti leh sap. Inthlahrung ngawih ngawih hmel a pu. 

Zosanga chu a nui suk a, Lily kut chu dimtèin a la a, a hum rauh rauh a. "Nupui atan nula thianghlim ngei ka duh ţhin. Chuvang chuan alawm ka thlan che. Ly, i la thianghlim. Thianghlim tawh lo anga i inhriatna kha paih bo daih rawh. Ka tan chuan i la thianghlim e. Khang thu kha a hma khan min hrilh la chuan, ka insûm thei lo hian i pa kha ka khawih duh mai thei a ni," a ti ta a. 

Zawitê têa phun sep sepin an inkuah dun rial a. Zosanga chhungte aţanga dodalna lam an sawi lo. Lily-i hnehna chanchin chu ngaihnawm titakin an sawi dun ta zawk a. 

An unau hovin an khawsa ve naw naw a. A nu pawisa batu tam zawkin an rawn pe tlak ve nual bawk nen; pawisa hlawm chu bank-ah a dah ve zel a. A pa pawh a zuk kan ve tho mai. Eitur te a kensak ve. Engtin nge heti taka a chunga nunrâwng leh thlamuanga awmtir thei lotu hi a lo khawngaih tak a hre lo. A pa hmel a zuk hmuha a mitmeng ţi êm êm leh, a thusawi, "Lily, ka fate mawlh kha i kutah an awm aw. I chungah nasa takin tisual mah ila; ka laka i phuba lakna chu ka tuar vek ang. Ka fate erawh khawngaih takin min lo enkawlsak hram rawh aw. Chuan, min ngaihdam theih ka ring lo naa, ngaihdam ka dil duh tho che. Hetah hian min awmtir reng rawh. Hei hi ka awmna tur a ni," tia a sawi khan a rilru a khawih ve deuh. Ni e, nat zawng a la na teh meuh mai. Mahse, thil thleng tur zawng zawng a thleng vek tawh. Siam ţhat leh theih a ni tawh lo. A ruka a pian sualna pawh a hneh chho hret hret tawh a,Chak taka a awm a ngai tih a inhria. 

Dawrah a la thawk reng bawk. Ren takin pawisa a hmang a, a naute pawh an mamawh a tihsak ve thei ta zel e. Zosanga a rawn leng lut reng thei tawh a. A naute nen pawh innêl tawh tak an ni. 

Sunday chawhnu a ni a. A naute nen Zosanga motor-in a nu thlan tlawh turin an kal diak a. Thlan an thlen chuan an tlawh khât deuh bawk nen; a lo hnim deuh a. An pawt fai malh malh mai. A pangpar ken chu dimtein a nu hming ziahnaah chuan a tung a. A naute leh Zosanga te chuan thla an lo la mêk thung. 

"Nu, engkimah khan ka ngaidam che aw. Thlamuang takin chawl ang che. Min hmangaih tih ka hria. Khatih lai khan i dinhmun kha a khirh ve êm atin a ni. Mahse nu, fanu chak tak i nei asin. Ani chuan kha zan rapthlak taka a thil tawn kha inhnehtir lovin, tunah chuan nun pangngai tak a hmang ve tawh e. Van aţangin min lo thlir reng rawh aw. I fanu ka ni hi ka inchhir lo a nia," tiin a phun sep sep a. A biangah mittui a luang ngiai ngiai bawk. A mittui hru hulin Zosangate lam a hawi a. 

"Haw tawh ila," a ti sap a. An pali chuan zawi muangin thlan mual chu an kalsan ta a. 

A tawp ta.

Ziaktu : Toni Lalhmangaihzuali