Escape 9

ESCAPE (9)

Ziaktu: Toni Râlte

(Adds kha aw ka duatte u.. Kan inpui tawn tihna a ni mai alawm tir'u) 

A in lam panin chak zetin a tlan ta par par a. Hectora'n a lo lawm leh hiam hiam a, Kawngka hawngin in chhung reh dûkah chuan a lut a. A khua a har veng veng mai. Ni e, Zoi awm lai kha chuan inbe hlut lo mah se; a lo awm ve tih a hriatna khan a awm a tinuam ve thin. Tin, eirawngbawl thiam tak ni lo mah se; a thiam ang tawkin a lo bawlsak ve a. Zanriah kilpui a nei thin ringawt pawh a hlu viau a ni. Mahse, Zoi a haw tir vang chuan inchhir loh a tum tlat a ni. A chhan chu a ba a la tlak lo va, rulh letna hna a thawh dawn chuan Zoi kha a hnawk ru tlat a tin ni. Police te nen inzawmna neih a duh lo bur bawk nen, Zoi khan a number a nei lo bawk a, aniin a nei lo bawk a. Tikhan a awm awmin awm mai rawh se.. Mahse, a chhungril takah chuan, "Ani khan min lo nghakin keimah vangin pasal nei lo tak tak ta se emaw ka reh tak daih avangin tu emaw nupui chu ni dawn ta se.. " tia a ngaihtuah chang chuan a ner sawk thin. Chu thil chu thleng tura a duh loh ve ve an ni. Tunah chuan nupui neia chhungkaw din thei a ni rih lo, hmabak a la ngah lutuk tlat. A sulhnute hi thenfai pawh a hun ta reng reng. Vawiinah Ali'in a rawn pui hlauh zawk a; lehpekah chuan a hma aia a fimkhur a ngai hle dawn tih a hria. A chhan chu an enthla reng tawh dawn si a. 

A laptop hmaah a thu vang vang a. A nu diary leh document pawimawh zual a dahna folder chu hmet chhuakin thaw hawk chungin a bih leh ta ngat ngat a. A rum leh nghut thin. 

Ni e, a pa Abbas Tamim'n an ram lama a nu a kalsan hnu khan thei reh takin a reh ta veng veng a, biak pawh ngaihna lah a awm hauh lo lehnghal. Mary chu a mangangin a lungngai takzet a ni. Thla hnih zet a reh hnuah nau a pai tih a hrechhuak lehnghal. Awmngaihna reng a hre tawh lo. Abbas chu biak pawh a tum nasa, mahse, chu a number chu a hmang tawh tlat lo. Hmeichhe pakhatin a lo chhang zel tawh. A ţap nitin a, khawhar leh lungleng reng rengin hun a hmang thin a ni. Thla thum lai a liam hnuah Abbas chuan a rawn be ta hlawl a! Chuta a lawmzia chu a ţah nuih nasa ngei mai. Mahse, thu lawmawm lam a dawng hran lo. Abbas chuan a rawn kal rih theih loh thu leh a nau pai vanga a lawm thu te bakah flat luah man kha thla 12 chhung a pek lawk thu te, pawisa a rawn thawn tur thu a rawn hrilh a. Sum tel lo chuan chet ngaihna awm hek lo le. An flat zau puiah khawhar takin Mary chu a tei ruk ruk thin. Mahse, mi luhlul ve tak a ni a, a thil lo tih tawhah inchhirna a nei lo. Let leh emaw tlawm san hni hne a tum hran lo. Abbas chu a rawn let leh em em ang tih a beiseina chuan a la nuntir hram hram a ni ber. Abbas chuan sum thahnem tham tak a rawn transfer ta ngei bawk a. A nau neih senso zawng zawng chu chung sum chuan a phuhru thei ngei ang. Thla a liam a, a dul pawh a puar lian ve telh telh mai. A chang chuan mahni inkhawngaihnain a khat ve fô! Naupangtê niin raipuar lehnghalin flat lianpuiah a khawsa a, pangchanna tur leh a na neuh neuh han sawina tur a nei ve ngai lo chu.. Mahse, zia deuh zawk chu Abbas nen an inbe pawp thei ta chu a ni. Ral khat atang chuan a rawn ngaihsak viau naa, a tak ram tluk hi chu a lo awm lo. Nupui pawh a nei ta. A lo tiam tawh angin thla tlemtê erawh an nghah a la ngai dawn a ni. Mary chuan nau a nei ta. Vanneihthlak takin tluang takin fapa duhawm tak a hring ta. A fapa hmel chu a en ning thei lo va, a thlahlel ngawih ngawih a ni ber. Hliam pawh a inhliam nasa lo va, Abbas erawh a ngai takzet a ni. Hun a liam ve zel a, engmah thawk thei ta lo chu sum pawh a chhuak heuh heuh si a, flat luah man a pek a ngai tan dawn ta a. A to nasa si a, a mangang tan ta. A pawisa la khawl vete chu a hmang ui si. A fapa tan a la mamawh dawn chauh si a. Abbas a be leh ta phawt. Ani pawh an sumdawnna tlak chhiat lai a lo ni si a. In puih ngaihna a vâng ta tlat. Chutia a buai ruk viau lai chuan, an thenawma khasi nupa tuak thar rawn zin te chuan Shillong lama inbengbela in lei turin thu an rawn ta a. Anmahni chu chutiang lama sumdawng thin an lo ni nghe nghe a, Mary chuan a belbul lo thei ta lo. An ni chuan Shillong lamah in lei tur an zawnsak ta a. Hmelhriat an lo ngah bakah an eizawnna a ni bawk a, kar loah an hmuhsak ta vat a. Mary chuan ui ru tak chungin, "Ka in" tia sawi ve theih turin in chu a lei ta a ni. Tichuan, a fapa la sen tak nen chuan an bungraw tlem a zawng nen Shillong lam chu an pan ta a ni. Chu chu Mary te nufa hringnun bulţanna a ni ta. Ephraimein kum 3 a rawn tlinin Abbas chuan a rawn hmu ve chauh! Pa tel lo va lo enkawl tawhtu Mary chuan a pasal chu a lo mamawh tehchiam tawh lo. A haw lo naa, a hma ang ema a thlakhlelhna kha a bo tawh a ni ber. Abbas lah a sawi ang khan awm thei hek suh, a nupui avangin an sumdawnna huang an zauh thei a, a then thei si lo. A fapa leh a nupui Mary bula thla khat zen zawn a khawsak ve hnuah damchhunga inhmu leh tawh ngai lo turin an in liamsan ta kha a nia. Mary chuan a fapain pa mamawh teh mah se; a chelh duh bik lo. Tunah chuan a fapa chu a ta liau liau, tuma chuhpui theih a ni ta lo va, chu chu a lawm tawk. Thawk khat laiin Mizo thenkhat ten Mary te nufa chu an lo hmu fuh a, An zinga pakhat chu Hmana Mary'n a neih duh loh Pastor Lawmpuia kha a ni nghe nghe. Ani chuan Mizoram lama Mary chhungte bulah an chanchin chu a lo sawi ni ngei tur a ni. 

Mahse, Pu Thanliana ţawngkam erawh a kha fak mai. "A duh a, a pan a, a dai a. Ka kut ka sil tawh. A awm awmin awm se, a lu nghahna hmun tur pawh hriat ka duh lo ve. Ka tan a thi tawh" tih a ni tawp. Chu thu chu Mary chuan a lo hre ve lehzel si a, engtin tin emaw thu hi a lo darh ve zel si a. A rilru na lutuk chu rei tak a mumal lo nghe nghe. Mahse, a pa chu a dem ngam lo, a tina a, heng hi chu a tawrh tur reng a ni tih a hai lo. Chuvang chuan, Shillongah ngei a ruang pawh phum nise tiin thutlukna a siam hmiah a ni. A fapa bulah thu tam sawi lo mah se; diary a ziak nitin a, chu a diary chu a fapain a la chhiar dawn tih a hre kar thung. 

A tawp a kharnaah erawh, "Bawihte, i pi leh pute i la zawng chhuak ngei ang a, an laka ka bat zawng zawng, ka tihnat tawhna zawng zawngte hi thawidamsakin ka ba hi min lo rulhsak ang che aw.. " tiin a ziak thung. Ephraime rilru erawh a dang daih thung. A nun chu phuba lak duhna hlirin a khat a. A nu hnampui mizo te chu a thinlung takin a pawh thei lo. Zomuansangi erawh a danglam bik a nih kha.. 

"Ka thu ka sút ngai lo tih hria la.. Ngaihzawng i nei emaw pasal hual a rukin i lo nei emaw ka pawisa lo ve.. Lawmsanga nupui ka nihtir dawn tho tho che" Pu Liantawna awki chu a ring hran lo naa a hlauhawm riau. Zoi chu a thu ngawi ngal a, a pa chu a melh kiau bawk. 

Pi Lawmi pawh chuan, "Ni e, nangpawn a tirah sawi tur a nia. Hetia pasal neih dawn a ruaia tlangval dang um te chu i pa i timualpho lutuk, nula thankin i ni tawh. Thil hi a awm tawk a awm ve ngai" a lo ti ve hlaih hlaih a. 

Zoi chu ngeiawm zetin a nui sak a, "Keia thusawi te chu tuman bengkhawn hek lo che u, Lawmsanga ka neih duh lohzia kha tawngka chauh ni lo chetzia pawn ka lantir tam tawk e. Tin, In sumdawnna hmanrua nih ai chuan thih ka thlang" a ti ta hmiah mai. A pa chuan ben tumin a ban a lek uaih hman a, mahse, a beng ta êm lo. 

"Ka chawm ka hrai, ka zara nuamsa taka awm hian ka thu i hnial a maw? Khanglang che chuan, Lawmsanga i neih hi kan chhungkaw tan a pawimawhzia hre pha chin i ni. I pa thu hi hnial hlek suh" a ti hmuar hmuar a. 

"I thu ka hnial vawikhatna ni rawh se, Chuti taka a pawimawh chuan Hlimi hi neihtir r'u.. " a lo ti ve leh hmak. A pa chu a hlau tehchiam lo a nih hmel. Pi Lawmi a lo ter at a, "Hlimi te chu a sawi pawh i sawi ngam e a.. Ani chu pasal tur tha tak ka hualsak diam tawh e.. Ani chuan kan thu a hnial ve hauh lo vang" a lo ti sak sak a. Zoi lah chu runluih tih hriat fahranin a lo nui lui nghek. 

"I fanu ka nih ve loh vang hian i bawlzan theih turah min ngai tawh suh ka tih kha.. Nanga thu phei hi chu ka tan engmah a ni lo" a ti ve ta salh a. Pu Liantawna'n ring mangkhenin, "Zomuansang" a rawn ti tuar! 

"Eih.. Ih maw, ka pa, Lawmsanga chu ka nei dawn chuang lo. Ka bialpa hi nei thei dawn lo pawh ni ila, Lawmsanga chu ka nei dawn chuang lo. A tawk em? Ka mu dawn.. Mang tha u" tih leh a room lama kal a rual nghal. Chutia a tawngkhum sak sak vang chuan an hamhaih deuh nge an ngawi nupa vang vang ringawt. 

Zoi chuan Ephraime number nei hek lo, engvanga a number takngial pawh nei lo nge a nih tiin a ngaihtuah a. Mawl a inti ngawih ngawih. Engkim kha a thleng zung zung si a, a hamhaih ve deuh bawk a ni. Ephraime khan a rawn lam leh tak tak ang em le? Rawn lang ta miah lo se eng nge a tih ang? A buai a ni. A mipa hriat chian loh neih ringawt chu a risk a sang tih a hai lo, tin, tualthattua rinhlelh a la ni zui! Kha thil kha a ngaihtuah ve hlek a ngai. Ephraime ina a chen chhungin a hmelhriat tha em em te pahnih an thi a, an thih hunah Ephraime kha inah a awm ngai miah lo tih a hre chhuak bawk. Chu chuan a chhungril a nghawr dat nghe nghe. Tin, Ephraime kha a eizawnna a hre hauh lo, sumdawng ti dawn ila a awm chiah si lo. Eng ber nge a thawh tak ang? A rooma luh kha a phal lo bur kha a nia. Engvang nge ni ta ang? Police ho an lo kal laia a thuhrukna te kha thurûk eng emaw tak zawng a nei chiang a ni. A lu a thing nar nar a, "Aih, a ni lo vang. A ni thei lo" a ti nghat nghat a. 

"Hello" 

"Amos, i hna tur ka nei e" lehlam ami chu a aw a sin rût mai a. A hmel lan dan tur a mitthla nghal. 

"Aw le.. Appoinment lo siam ta che" a ti bung nghut a. 

"Naktuk chawhnu dar 3-ah Shalom hotel room no. 078-ah ka lo nghak ang che" a rawn ti charh charh a. Pa felfai tak zawng a ni ngei ang. Phone an dah hnu chuan, room banga Lemziah mawi tak intar chu nem tawlhin, kawngkhar rûk lo awm chu a hawng a. He pindan rûk hi Zoi bihrukna kha a la ni lo chêu! Pindan te fel rin ren a ni a. Bangah chuan thlalak chi hrang hrang a lo intar thluah a. Ngun taka en chuan, Pu Rosiama, Pu Rinawma leh Pu Rualkhuma bakah Hmingzuala te thlalak pawh hmuh tur a awm. Mahse, an ni chu an thalak a in X tawh thung. A awmzia chu a mi target a dah that apiangte chu a chhinchhiah zel tihna a ni. Chhuar lian lutuk lo awmah chuan, silai bakah chemtê a intiang ţhât bawk. Thlalak chu melh kual zelin, Putar lam lek lek tawh, sa nghet tlet tlawt, fîp lam lek lek thawmhnaw zahawm tak nena Biak in kawta ding chu a melh ngawt ngawt a. Chutah a marker ken chuan a chal zawn chu a han chhun chat. 

"Ka pu, i tupa nen in inhmachhawn ţêp e" a ti sup a. A nu hmel a mitthlaah a rawn lang nghal bawk. A thu hnawk a, a chal dawma kun chhal chungin, "Ka rul zo ţêp e" a ti leh nghut a. Tho thutin chu pindan te takte chu a chhuahsan zui ta nghal a. 

Hectora saruh khel ri bawp bawp ngaithla chung chuan a phone chu a bih a, whatsapp te chu khawih ve mah se; biak tur a hre lo. Shillonga a awm laia a kawp nasat ve ber Lisain a rawm biakna chu a chhiar liam puat a, "Mizorama rawn kala rawn zawn chhuah che ka duh ania" tih thu chu. A khi sak a, "Tum buai duh suh" tiin a reply ve hmak. 

A number pakhat zawk hi chu Aizawl milian tam zawk chuan an kawl deuh vek tawh maithei. An hna a thawhsak thin miau a. Mahse, a chhawrtu te hian amah ai mahin man chhuah an hlau zawk awm e. Mahse, tunah chuan amah pawh fimkhur a ngai ve tan tih a hrethiam. Pu Rosiama fanute khan a sam la zuah ngat nise zawng an hre ngei ang mawle. Mahse, Ali puihna avang khan him damin a chhuak leh hram bawk kha a nia. 

"Ali, zanriah chu i rawn ei ang chu tiraw? "A benga a phone vuah chung chuan a ti a. 

"Hun ka nei tam lo naa, zanin chauh zawng ka thei ang. Dar 8-ah ka lo thleng ang" a rawn ti a. Phone an dah nghal. Rei tak a thian tha ber leh engkima puibawma a kawng sah ênsaktu nena an kil dun tur Zanriah buatsaih tur chuan choka lam a pan ta nghal a. A hawina lam apianga Zoi sulhnu lo lang erawh chuan a tibuai ve lek lek mai. Ngaih leh hriat reng a duh lo. Hmabak a la ngah lutuk tlat! Eirawng a bawl zawhah a inbual fai vák a, Ali a lo nghak ta ran mai. Car tlan thawm a hriat rualin kawngka chu a hawng a, Ali ngei a ni. Hectora bauh chu khap pahin Ali chu a va nuih sâng a. Kum khat zet an inhmu tawh lo bawk a, an landan pawh a danglam ta deuh. In chhungah inzui lutin thil dang ti khawtlai lovin Zanriah chu an ei dun nghal a. Eng em em an sawi rih lo. Zanriah ei khamah wine lem pahin living room te takteah chuan an inkawm ta mial mial a. Sawi tur an ngah dun zet mai. 

"I nu chhungte chu i zawng hmu tawh em? " Ali chuan a ti thut a. Ephraime a ner sawk. 

"Zawng hmu tawh e. Ka pi chu a boral tawh a, ka pu erawh tar kunin a la dam ve e. A unau te erawh an awmna ka hre kim rih lo" a ti thawp sup a. 

"Okay, a that chu! Tha takin tuamhlawm ang che. I nu duhdan ang takin.. Chuan, tunah hna i nei hnai em? " Ali chuan a ti zangkhai vah a. 

"Maithei. Naktukah appointment kan siam a.. Tu nge ka target erawh ka la hre lo" a lo ti ve mai a. 

Ali ţawng leh hmain, "Chuan vawiin ami chu a nunna i la lo tih i chiang maw? Report-a a landanah ruang an rawn ti mai si a" a ti hluai a. Ali chu hahdam hmel zeta thu thain, "Ka tihlauthawng ringawt alawm.. a dawihzep mah mah a, a thidang pek a nih kha" a lo ti a. A ţhen ţha bawk. 

Ephraime chuan, "Anih nang hna kal lai i nei nge? I awl rih? " a ti ve leh a. 

"Naktukah Gauhati-ah ka tlang a ngai dawn a. Chutah chuan kei pawh hnain min lo hmuak dawn a niawm e.. Enteh, thiana, i lungte hi a leng ve miah lo em ni? Heta cham hlen hi chu i tum lo vang tiraw? " a lo ti dam duai a. Ephraime chuan rilrua vei nei niawm takin, "Ka hre lo le.. Mizoram hi a nuam riau.. Mahse, nangni ka theihnghilh che u tihna ni lovin.. Nupui fanau neih pawh ka suangtuah ţan hial asin" nuih hak hak pah chuan a ti a. Ali pawh a nui sâwng mai. 

"A khai! Nupui a?! Chutiang khawpa thuka kawm te i lo nei ve tawh a ni maw? Kan Lisa a va khawngaihthlak awm ve.. Tak taka ka thian, kei pawh ka pawisa khawl tling khawm hi a tam thawkhat tawh a. Hna hnih vel ka thawh zawh chuan bansana sumdawnna bultana chhungkaw din ka rilruk ve deuh asin.. " thutak deuh zawk hian Ali chuan a ti a. 

Ephraime chuan buk nghut pahin, "Good.. Heti ringawt chuan kan inpal thluk hun a la awm ngei dawn a. Kei pawh i rilru ang kha ka pu ţan.mahse, engkim ka zawh fel hunah chauh nupui leh fate chu.. " tiin chunglam a melh zauh a. 

"Mizo nula em ni? " awmze nei deuha melh pah chuan Ali chuan a ti a. 

"Inzawmna kan nei hran lo. Mahse, hmeichhe kawlhrawng tak a ni a. Tin, nula thianghlim a ni bawk.. Dinhmun khirh takah a ding ve mek a.. Kan inpuitawn a ni mai" a lo ti mawlh mawlh a. Ali chuan a hrethiam chiah lo tih a mitmengah a lang. Ephraime bawk chuan, "Nakinah engkim ka zawh hunah chiang zawkin ka hrilh ang che. Anih nang? Jasmine kha mi? " tiin a va melh zauh a. 

"Umm.. Ani khu ka ring ber tlat! Tin, ka nihna dik tak hre mah se, min hmangaih zel tura ka beisei a ni bawk" Ali chuan a lo ti nghut a. 

Chutianga titi dun zel chuan zing dar 1 thleng dawn an meng ta a. Wine pawh an lem hnem bawk aniang, an hai ve chhulh mai. Mut zai an rel ve ta a.. Mumang bo thak khawpin an mutthilh kha.

"Zoi, Lawmsanga a lo kal.. " a nau Hlimi chuan a room kawngka kik pah chuan a ti a. 

"Ninawm" ti hlak hlak chungin a tho va. A kawm chak lo mai ni lovin a peih lo takzet. A insawitheihna ngaihthlak hi a kham tawk viau tawh a ni. Mahse, a pa thin butut a chhuak ang a, an inti mualpho ang tih a hlauh vang chauhin Lawmsanga hmachhawn tur chuan a va tho ve ta hram a. A lo pâwt leh zuah zuah tawh. A hlat thei ang berah a thu a, melh pawh a melh peih lo. 

"Ka nupui hual chu a va nawmsam loh hmel ve aw… " zu rim nam huk chung chuan a ti lar lar a. Amah Lawmsanga hi tlangval hmel chhe lo tak, palian ve tawk tak leh inchei pawh thiam tak a ni. Mahse, a mizia hi hmeichhiain, "Ka ten chi" an tih ang hi a ni roh a. Hausa viau e ti lo hian ngaihzawng nghet pawh hi a nei ngai zen zen lo. Zoi hi a hmuh phat atangin a star nghal a. A pa sumdawnpui fanu a ni tih a hre lehzel a, kaw hreuh dan a zawng ta ngar ngar a ni. A pa Pu Sapliana bulah engkim a sawi ta bawk a, an ni lahin Zoi chu mo atan an lo îai lem lo bawk a, an sumdawnna behchhanin inneihtir ngei tumin hma an la ta kha a nia. Pu Liantawna te nupa lah mi lian ngaisang chi, hawisang ve larh chi an lo ni a. Mi lian leh mi lian chhungkaw inkungkaih chu pawi an ti hauh si lo. Zoi erawhin a tawrh phah ta a nih hi. 

"Nia, ka nuamsam lo lutuk a. Ka meng rei thei lo ania" Zoi chuan awki deusawh rawng lek lek hian a lo ti ve hmak a. Lawmsanga chu a hawi vual vual ringawt. 

Thingpui a va lumsak ve hram a. Hlimi leh Deboi te nen an inkawm tam zawk. A naute hi an sual hran lo va, inleng chhawnchhaih pawh khawpui nula fingvar tih takah an thiam phian mai. Deboi erawh a la nau hlek a, mahse, ze harh chi a ni a, a inti nula ve viau tawh tho mai. Thingpui an in zawh chuan Zoi chuan, "Ka khua a sik leh tlat, ka mutsan mai ang che u aw" tih leh thawh a rual nghal a. Lawmsanga chu a inleng a ni tih a hai bik lo, a chet dan chu a mawi lem lo tih a hria. Mahse, a luak ţep tawh a ni. A hne lutuk tawp. A rooma a luh hnuah a thaw hawk ringawt. Ephraime bawk a mitthlaah a rawn lang leh a.. A va rei tak êm tiin. 

Shalom Hotel hi Aizawl chhim lam, fal deuh raiha awm a ni a. Officer thenkhat ten nula an riahpui fona hmun a ni. A thawktu te an fel bawk nen. Ephraime pawh room no 078 kawngkhar chu a kik dat dat a. Lut tura sawmna aw a hriat rualin a pen lut nghal. Chair-ah chuan pa ti sen sek sawk, cher lam leh sawngnawi hmel tak hi a lo thu a. A incheina erawh a zahawmin a puithu viau mai. Ephraime chu a lo melh kar a. Din pawh ding chhuak chuang lovin a hma zawna chair awmah chuan thu turin a zaizir a. 

Ephraime a thut hnu chuan, "Hun ka nei tam lo va. Hei hi i hna tur chu a ni" tih pahin thlalak pakhat hi Ephraime lamah a nawr phei a. Ephraime chuan thlalak chu la kangin a melh vang vang a. 

"Tu nge? " a ti zawi sup. 

"Liantâwna a ni a. Tunah hian kan sumdawnna kawnga min el pha tur khawpin a invawrh mek a ni. Keini aia a invawrh san rualin keini chuan meialh en kan hmabak.. "

"Chutiang chu ka hriat ve a tulna a awm lo ve. A address min hrilh la a tawk" a lo ti bung nghut a. A rilru erawh chuan, "Mi tha tak ni tawh lo hram rawh se" a ti thung. 

Address te an inpek zawhah Bank ac te inhrilh lehin, an target mizia leh hun hman dan tlangpui an inhrilh leh a, Chumi hnuah ngawi rengin an chhuak zui nghal. Dar 4 a la ri lo deuh a, Kha pain address a pek kha va thlithlai kual nan hun a la nei tih hriain chu lam pan chuan a inkhalh phei ta a. Building tam tak zingah an in chu a langsar deuh, Zomuansangi te veng a ni a. An inhmu thut ang tih a hlau deuh. Hmuh erawh a chak tho si. Building chu a thlek vang vang a, a bula building, Office atan an hman chu hman tangkai theih a inring deuh. Tlem chuan chu in luhchilh a, Liantawna nunna la tur chuan hun a duh maithei. A chhan chu a mi veh mek hi mi fimkhur tak leh pawn chhuak zen zen lo, a chhuah ve chhunah pawh a fimkhur viau mai si a. An ina luhchilh kha chu thil tihchiah a ngai chiah tawh lo a ni. A chhan chu cctv an vuah tlat! Chutia Pu Liantawna in a thlek rauh rauh lai chuan an kawngkapui chu rawn inhawngin, nula pahnih an rawn chhuak a. Ephraime a phu chiang kher mai.. Nula lian zawk leh sam thlah zawk chu hai rual lohin Zomuansangi a ni! An in em ni? Nge a thiante inah a leng zawk? Chutah Zoi chuan, "Chabi ka theihnghilh.. Ka va la lawk ange" tih leh in chhunga luh a rual nghal. A chiang e. Zoi te in a ni. Anih chuan Pu Liantâwna chu Zoi pa maw lo ni?! Chu pa ngei chu a target a ni si.. 

"Hrep tak chuan" tia phun hlukin a motor a tinung a. Ramhnuai lam panin a tlan ta daih a…