Escape 8

ESCAPE.. (8)

Ziaktu: Toni Râlte

(Adds mawlh kha aw) 

Inspector Sangliana chuan search warrant lain, a siruk lain Ephraime in dap tur chuan an rawn thawk chhuak leh ta a. Ephraime tan pawh han hnial kha a sâwt lem lo. Phal takin a lo daptir ve tawp mai a ni. Pindan pahnih chu a zau lo bawk a, an dap kim hneh hle. Mahse, an mi zawn ber Zomuansangi chu hmuh tur a awm hauh lo. Sangliana chu a thinur hlur tawh a, a hmai te chu a sen ţul tawh mai. Ephraime lah chuan hahdam hmel zeta thuin a lo thlir vung vung a. 

"I thukru em ni? Nge i that tawh zawk? " Sangliana aw ki chuan ngaihno a bei tehchiam lo kher mai. 

"Thudik i hre duh tak tak em ni? " a lo ti dam thlup a. 

"Zep ruk i neih hi ka ring reng a ni" a lo ti hmuk a. 

"Zoi nen chuan inneih kan tum a ni.. Mahse, hetah a awm lo. Shillongah a chhuk" Ephraime chuan a ti ta sup a. Awm ve dangte chu an thum hak mai. 

"Eng a?! Zoi nen in innei ang maw? " awih loh hmel fe hian a ti hluai a. 

Nuih huk pahin, "Tehreng mai. Mahse, a pa te remtihna kan nghak a ni" a lo ti sam et a. Sangliana a dang chiang kher mai. Mahse, chuti maia han sezawl chhuah chu a ui bawk si. 

"Aw le, Zoi chungchang ni lo thil dangah pawh zawhna ka nei a ni. Tun hnaiah tualthahna a thleng ngun viau mai a. Nang pawn i hriat ka ring a, khang mi pali te ho thih hun lai khan Aizawlah hian i awm reng em? " tiin bul a han ţan a. 

"Awm e, tlangval thih zan phei kha chuan mamawh lamin ka rawn chhuak a, mi tawngkam atangin ka hre ve nghe nghe asin" a lo ti leh mai a. 

"Pu Rosiama fate khan a pa thattu chu pa sang tak, sam buk leh sei tak a nih thu an sawi a. Naktukah Stationah lo kalin Pu Rosiama fate nen chuan inhmelhriat ta ula pawi i ti em? " a ti khauh a. 

"Chu! Min ringhlel deuh tihna em ni? Pawi ti lah lo ve. Tumah ka that miau lo va" a ti duh lek a. Sangliana pawh a thaw huai mai. Tualthattu zawn reng hi a khamin a ning tawh, mipui te lahin an dem rawn vek tawh bawk si. He pa a hmuh tirh atanga a rinhlelhna kha a dik a nih ngai chuan, awlsamtêin an hling mai dawn a. Amah pawh a hmingthat bakah kaisanna chance te pawh a ni ve zel a, mahse, he pa confi lutuk hian a tibuai deuh. Engpawhnise, Pu Rosiama fate chuan an hai lo turah a ngai tawp mai a ni. Zoi ber a awm tak lohah chuan kut cha bêngin an haw leh ta hnu hnu a. Darkar khat vel a liam hnuah, A hmaa a bihrukna atang khan Zoi pawh a rawn chhuak ve leh hlawl mai. 

"Min luhchilh thuk dawn tlat. Hei hi ka rin lawk sa kha a nia.. Ka lung a awi tehchiam lo hle mai" Ephraime chuan a ti sup a. A mitmeng pawh a hriam lam deuh chu a ni. 

"Eng nge kan tih ang? " mangan hmel deuh hian Zoi chuan a ti a. 

"Rem ka ruat fel tawh. Kan inneih mai a ngai ang. I haw ang a, kei nen inneih kan tum vanga pasal pawh neih i duh loh thu i sawi ang. Chuan a bak chu ka kutah dah rawh. I haw phawt chu a ngai. Engkim huamin" a lo ti dam thlap a. A hmaa a lungawi lo hmel kha chu a bo tawh. Zoi pawh chuan a hnial ngam ta bik lo. A pa thinur a tâwng dawn tih a hai lo va, mahse, Lawmsanga neih ai chuan he pa neih hi a la thlang zawk. 

Zanriah hnuhnung an kil dun lai chuan a tu amah an tawng lo va, an ei mawp mawp ringawt. Naktukah Ephraime rualin a chhuak ang a, an inah a haw tawh dawn a ni. Ephraime hian a thu zuk lehin a nei leh si lo vang tih erawh a hlau ru deuh. Intiamkamna lah a neihtir ngam der si lo. 

Inspector Sangliana'n Pu Liantawna bula Zoi chungchang a sawi chuan, Pu Liantawna chu a sa zak mai. Mahse, a insûm hram hram a. Ina a haw hnuah erawh a nupui bulah a inhrosa kuk kuk mai. 

"Kan Zomuansangi chuan ngaihzawng a neih thu te chu sawi ve tur a nia. Hetia a mualpho zawnga kal ngai lo hian. Rawn haw teh se, a bialpa a neih loh tur zia mai chu. Ţap chung pawhin Lawmsanga kiangah ka hnuk thleng tho tho ang" a ti nghut nghut mai. Pu Sapliana te hi an tan an pawimawh nasa si a, an share an lak vaih chuan an tlu chhe thei mai ang. Chutiang khawpa contribution nei tha chu an nia, tihlawm loh chu sakei tlukin an hlau a ni ber. Sum hian thil a va tithei em.. 

"Zoi.. " khum lianpuia insi lo va an mut men reng lai chuan a ti sup a. Zoi chu a che ţalh ţalh a, "Umm" a ti nghat. 

"Ruk chhuah i ngaih ka ring a. Mahse, hmanhmawh lo ang che. A chhan chu tualthah thubuaiah rinhlelh ka ni a, ka inchingfel phawt ang" a ti duam a. 

"Maw?! An ringhlel che maw? Ngati nge? " Zoi chuan rilru nuam vak lo hian a lo ti var a. 

"Ka palen vang phiangsen hian mawle.. " a ti hluk a. Zoi a khi sak. 

"I lian em alawm" a ti ve mai a. 

"Ka pa aiin ka la lian lo zawk" a inrin hmain a ti a. A sawi zo tawh si. 

"Ephraime" 

"Umm"

"Thil ka zawt ang che aw.. Ih, i pa hi mizo a ni em? " a ti ta tawp a. 

"Ni lo.. " a tawi tek tawk viau naa Zoi rin lawk sa a nih vangin a thaw huai mai. 

"I nu chhungte an la dam em? I tlawh pawh thin em? " zawhna a ngah tih chu a hria. Mahse, a hre chak si. 

"Ka hre hauh lo mai. Tlawh chhuah ngei erawh ka la tum, ka nu ba ka rulhsak a ngai alawm" mitmeng thim raih hian a lo ti bung nghut a. Zoi chuan sawi leh tur vâng a ti ngei mai. 

"Nih innei ta ila, nupa tak tak angin kan awm dawn em? " a ti ta ngawt a. 

"I duh em? " a lo ti let khauh. 

"Ka hrethiam lo. Kan inngaizawng bawk si lo va" thawk lak halh pah chuan a lo ti a. 

"Chu zawng hunin hril teh se" a lo ti a. Zan a rei ta bawk a. Mutthilh zai an rel ta a. Zankhuain an insi lo tihtheih a ni. Ti chung chuan inneih an tum ve bawk si! Ephraime hian engvanga Zoi chu neih duh ve ta ngawt nge a nih a inhrethiam bik lo. A khawngaih vang a nih a ring a. Mahse, nupui pasal chu khawngaihna vang maia neih ngawt chi niin a lang si lo. A rilru chhungril takah chuan, a hmangaih miah lo mipa a nei tur chu a ui zawk a ni ber e. Zing dar 2 bawr velah a harh hlawl a. Zoi chu a thww sâk sâk mai. Ani lah a harh tulh tulh si a. A chhing vang vang a, a nuin a boralsan hnua a nun hman zel dan te kha a ngaihtuah kir ta mai mai a. 

Khatia Mary a boral hnu khan a pawisa dah that tlemte hmang chuan a intungnung ve hram hram a. Dr Jimmy'n a pui nasa hle bawk. Zan khat chu an thenawm thar te fapa hi a rawn teilut nawlh mai a. Ephraime ai chuan kum 2 velin a ù deuh maithei. An han inkawm chho a, an mizia a lo inan bakah an titi duhzawng chenin a lo inang a. Ephraime pawh chuan thian a chhar thar chu a lawm viau mai. An inkawm nel telh telh a, chu pa Ali-a inti chuan eng em em a thawh a hre lo naa sum a nei thei phian mai. Eng nge a eizawnna han zawh tawp chu a hreh ve si. Thla hnih dawn an inkawm hnuah, Ephraime sum bawm a lo phai ţan ta a. Eizawnna tur a ngaihtuah a ngai ta. Ali bulah a sawi thuak a, ani pawh chuan a lo ngaihtuahpui tur thu te a sawi ve a. Mahse, hna a vâng angreng viau. Ephraime hi a graduate awrh a, Sawrkar hna te phei chu han beisei ngam turah a inngai lo. Sumdawnna lam a tui vak bawk si lo, a nu thawhna hlui Factory lamah bungraw thiar hna a hmu ta hlauh a. Hahthlak deuh mah se, a sum hmuhna a nih miau vangin a thawk lo thei lo. Thla khat awrh a thawk tihin, Ali chuan, "Eizawnna awlsam tak ka hria a. Sum pawh a tam. Mahse, a risk erawh a sang deuh" tiin a hrilh ta a. 

"Eng hna nge" tia a zawh chuan, "Ka ringngam che a, ka thuruk ka sawi dawn a ni. I thawh duh loh paw'n engmah ka sawi thei lo. Mahse, i mizia ka enin thawk chi tak i ni a, ka hrilh poh ang che. Mi hausa ho hna ka thawhsak thin a. An tana mi hnawksak te ka dahbo thin. Tichuan, sum tam tak min pe ve thung a. Chu chu ka eizawnna a ni. Min zawm ve i duh chuan, kan inthurual thei ang a, ka tan pawh a zangkhai sawt ang" a ti ta charh charh a. Ephraime chuan mak a ti ngang mai. A tirah chuan a hnawl nghal bur mai. A nu zirtirna nen a inpersan lu deuh a ni. 

Mahse, a thawhnaah ban a tawk leh ta zel a! A nu duhthusam Mizorama chhoh pawh a suangtuah phak ta meuh lo. A inngaihtuah fe hnuah a nu ba rulhna tur avang liau liauin, Ali chu a bel bul leh ta a. Mahse, chuti maia mi nunna lak chu thil awlsam a ni lo tih a hai lo. Ali paw'n thla thum chhung zet training a pe a ni. Silai kah atanga insual thlengin an zir dun a, a taksa a fit bawk a, a kalna tur lam tak a lo ni nge a thiam chakin Ali meuh pawn mak a ti zawk hial a ni. Thla thum a ral hnuah a hna hmasa ber tur chu Gauhati lama Hotel manager pakhat dah that a ni a. Ali nen an kal dun ta a. Ali thluak ring vekin a la che a ni. Kha manager chal dara a silai mu a luh kha a tan chuan a vawikhatna leh a hriatreng tawh tur a ni. A tirah chuan hrehawm a tiin ama siam leh din pawh ni hlei lo nunna a la ringawt chuan a nun a tihrehawm takzet a. Mahse, a rei a, nunna pathum a lak hnuah chuan tihian a ngaihtuah ta zawk a. "Mi dang tana hnawksak thenfai hna ka thawh vang hian ka lawm zawk tur a ni" tiin. Mahse, a mi dah that tur te nun dan leh chhungkaw khawsak te chu engmah hriat a duh ngai lo. A lainat zawng tak an nih a hlau a ni. A eizawnnaa a hming lem atan, "Amos" a hmang a. Ali erawh chuan, 'George' a inti thung. An lar dun ta hle a. Mahse, tuman an ni chu an ringhlel ngai hauh lo. Mizoram thlengin mi lian ho beng a lo thleng ta a. A tan Mizorama chhohna remchang a inhawng tan ta. 

A hriat loh karin a lo muhil ve daih nge, ni sain a hmai a rawn em chuan a harh ve hlawl. Zoi chu a lo tho tawh a. A tukthuan siam rim chuan ril a titam hle. A tho a, a intifai a. Choka lam a va pan ve a. Zoi chuan, "Morning" a lo ti zangkhai vah a. A wish let ve hnuah Zoi arsa fry chu a va tem chhin a. A tui viau mai. Tukthuan an ei khamah an insiam mial mial a, an phur loh hmel kher mai. Zing dar 10-ah ramhnuaia a in chu an chhuahsan ta a. Kawngtluana Zoi ngui chuan a rilru a kap khawp mai. Mahse, a hawn ngei hi a tul si a. A ngai viauin a ring. 

Zoi te veng lamah an tlan hmasa a, an in thlen hmain a chhuk. "Ephraime, ka lo nghak reng dawn che ania" a ti sap a. Ephraime pawh a bu nghut mai. Zoi chhuk hnuah Police station lam panin a inkhalh phei ve lehnghal a. Tlem chuan a hlauthawng ve deuh. "Amah ngei hi a ni" tia an kawh vaih chuan, a tan chet a khirh hle dawn a ni.. 

Sangliana chuan a lo dawngsawng vat a. Darkar chanve dawn an nghah hnuah Pu Rosiama fanu te chu an rawn thleng ta. Sangliana chuan ding chungin a lo chhawn vat a. A phur vat vat kher mai. Nula te chuan Ephraime chu an melh vang vang a, ani lah a sam thur bam thin leh sei zual kha a lo paih ve tawh si. An melh ngun ngang mai. 

"Ka hrethiam lo. A ang chu ka tia, mahse, ka chiang thei tawh lo" a naupang zawk chuan a ti sap a. 

"Hmanhmawh suh u. Fimkhur takin hlauthawng miah loin han en tha teh u" Sangliana chuan a lo ti a. 

A upa zawk chuan, " a san zawng leh a palen danah saw chuan a ang khawp mai. Mahse, a sam saw a sei tawk lo a ni" a ti tham chhal a. A chil a lem kawk bawk. Ephraime lah confi tawkin a ding zan mai si. Sangliana chu a thin a ur ru ţeuh tawh mai. A lo phur tawh tehreng nen. 

"A sam saw a cut alawm.. Ani saw kei chuan ka ringhlel a ni" a ti nghat a. Nula te chu an lo bu nghat ringawt. Chutih lai tak chuan constable pakhat hi a rawn tlan lut a. 

"Sir, ruang chhar a ni leh tawh" a rawn ti hlawp hlawp a. Ephraime chu a thep suai suai mai. Sangliana erawh a ter at mai. 

"Chhun laiah pawh maw.. Min va zah lo eltiang ngai ve le.. Khawi lai hmunah nge" a ti rum nghut a. 

"Rangvamual kawngah" Constable chuan a ti a

Ephraime chuan awki zang vahin, "Sir, ka kal thei a ni mai lawm ni? I bula ka awm lai rengin ruang an chhar a. Ka ni lo tih fiahna a ni mai lawm ni? " a lo ti nghet charh a. 

"A fiah hran lo. Aw i kal thei. Mahse, kan enthla zel dawn che tih erawh hrereng ang che" rum em ema melh chungin Sangliana chuan a ti a. Ephraime chu a carah lutin a phone chu a hmet mual mual a. Number pakhat chu dialin, a nghak vang vang a. 

"Ka lawm e, Ali.. Thian tha tak i ni" a ti sup a.. Motor tinungin a tlan chhuak ta nghal a. 

(A tawi maithei. Rilru a chawl rih sia. A rawn sei chho ve leh mai ang)