Escape 18

ESCAPE… (18)

Ziaktu: Toni Râlte

(Adds mawlh kha aw 😍

Ali a lo thleng ta.. Zoi nen pawh an inkawm thei phian. Zoi chuan Ephraime thawhpui a ni ang tih rinna a nei hran lo. Ephraimea'n a sawi bawk lo nen. Hlim takin zanriah an kil ho a, Ali chu a tawng duh barh barh hle. Hna chungchang erawh engmah an sawi duh lo. An eikhamah bathlar thlang lamah an thu ho dal a. Dar 8 bawr velah Epraime te chuan wine an in dun a. Zoi chuan mipa pahnihte chuan a hriat ve loh thil an sawi duh te ringin, a mut chhuah thu sawiin mu turin a kalsan ta a. 

"A that kha.. Hmeichhe fing fel tak a nih ngei kha" Ali chuan a ti zui sup a. 

Ephraime pawh chuan, "A nia lawm.. Chuvang alawm zawi zawia min thunun chhoh tak" a lo ti ve mai a. An han nui leh rih. 

"Lisa chuan hria se a sa teh ang chu.. Rawn kal chilh che a tum nghal ang mawle" Ali chuan nui huah huah chungin a ti leh a. Ephraime erawh a lo ner sak. "Kan Lisa hi chu a hmel zawng a tha.. Mahse, a mi treat dan ching cheng hian min hîp ngang lo a ni" a ti ve charh charh a. Chutianga thu ho mai mai sawia dar 10 dawn an thut hnuah hna chungchangah an lut ta a. 

"Sapliana a ni a. Sumdawnna thianghlim lo tak a kalpui mek a ni. Zoi pa te nena thawkho an ni a, Zoi pa tan a hlauhawm chhoh tak avangin dah that a tul ta a ni' Ephraime chuan a ti zawi sup a. 

"Mahse, Zoi pa chu an notice nghal lawng maw? An buaina an hriat phei chuan" Ali chuan a lo ti boh a. 

"Chuvang tak chuan alawm ka rawn koh che. I chet hunah kan chhuak lo a ni tih min hriatpuitu kan nei thlap dawn a. Rinhlelh kai mah ila, kan paltlang thei mai ang" Ephraime chuan inringtawk zetin a ti a. 

Ali pawh a bu nghut nghut mai. 

"A nih bansan i tum thu kha tak tak a ni em? " Ali chuan a ti thut a. 

Ephraime chuan wine no sawi hliau hliau chungin, "Mizoram zawng a zim em a ni. Buaina ka tawh hmaa bansan mai ka duh ta deuh chu a nih hi. Ka inkhawl tam ve thawkhat tawh bawk a.. Eizawnna tur dang te pawh ka la dap ang chu.." a ti nghet charh a. Ali pawn a hriatthiampui tih hriat takin a lo buk khum zauh a. 

"Kei pawh Jasmine vang chauh pawh hian ka kut hi phuar ni tawh se ka duh a. Mahse, ti teh ang pawisa hlutna kan hre tawh mah mah a, sum tam tham tak min offer hi chuan tun chiah tiin kan kal leh nge nge zel chu a nih hi. Anih heta chen hlen chu i tum em lo vang tiraw? " tiin a thianpa mitah chuan a en kal a. 

"Zoi nen kan hmabak azir ni rawh se. Amah pawhin heta awm hi a duh kher lo maithei. " a ti sup a. 

"A kaihruai ve tawh takzet che a nih hi.. A tha.. Tlawmna a ni lo. Hmeichhe tha chu an hlu lutuk tlat" Ali chuan a ti sar sar a. 

"Amah ka hmuh hian ka nu ka hrechhuak thin. Inanna an nei te pawh a ni mahna" Ephraime chuan a ti a. Zan te a rei ta bawk nen, an ni pawh mu turin an inbuatsaih tan a. 

Sangliana chu an pu roomah lutin a inkheng khawng auh a. 

"Mi pali te thihna case kha chinfel loh a la ni ta zel si a, nge i thlen chin ni rawh reng reng le? " an pu chuan a ti a. 

"Sir, ni e, kawng a ping khawp mai. Rinhlelh tur takngial pawh hi ka hre tawh mang lo a ni e. Han umzui deuh tura ka list ho lah umzui tlak an lo ni mang lo va, amaherawhchu, tunah hian mi pakhat khalh fal bik chu ka la nei a. A fiahna nei chuang lo mah ila, a chet dan, a hmel leh a chenna thleng hian ka ringhlel tlat si a. Chumi a hriat vang chu ni maw tunah hi chuan chet lak a tum lo deuh nge, hei ruang chhar pawh a reh tak deuh hi.. Chu zawng chu ka thlen chin a la ni rih. " a ti dap dap a. 

"Zoliana kha i enthla tawh lo em ni? " 

"Aw, ani hi chuan a thah ngam ka ring lo va, mahse, that turin mi a ruai ve thei tho bawk a. Chung anga pawimawh tur pawh ka enkim thawkhat.. " Sangliana chu a lo ti var a. 

"A tha e, mipui lam an phun nasa tawh si a, kan vuaicha deuh hlek a ni. " an pu chuan a lo ti a. A sawi dik lo hran lo. Hma an sawn mawh ve bawk èm a ni. A kar lakah buaina neuh neuh neite chinfel a lo ngai ve reng bawk nen. 

An pu room atanga a chhuah hnu chuan a inhum ruh a, Ephraime hmel kha a mitthlaah a rawn lang nghal. He pa hi engvanga a thinlung tak hian ringhlel nge maw a nih dawn ni.. Awm chu a awm a ni mahna. Sapliana te pafa lah kha a address a hrilh ve hmiah lehnghal a, an zu inchingfel thei nge ni an rawn zar hauh tawh lo. Ngaihtuahna thar pu lehin Zoi zawk hi kawm chi a ni niin a lang. Kawm seuh seuh se la, sawi tur leh hrilh tur a lo hre mial maithei asin.. Sangliana chu tu hmuhpui lohin a khi suk a, a hmel nur tak pawh a rawn lang thar leh ta sar a. 

"Hello" Zoi chuan a ti a. 

A pa chuan,"In pa a awm em? " a rawn ti nghal a. Chhun reh lai tak a ni. 

"Aw tuikhuah a siam tha a, ngati nge i be duh mi? " Zoi chuan a lo ti var a. 

"Duh hran lo ve.. Thil pawimawh tak la sawipui che ka duh a. Aizawla rawn kal i tan a buaithlak awm si a, keiman ka la rawn kal chilh mai ang che. Mahse, in pain hre ve lo se ka duh" Pu Liantawna chuan a ti nghal mawlh mawlh a. Zoi chuan mak a ti deuh. 

"Aw a tha alawm.. Eng lam ni reng reng a? " a ti a. 

"Ţhawng dawt thei tur che a ni tih lo hre phawt mai rawh. Pawm pawh a har viau ang, mahse, i pawm mai erawh a ngai dawn a ni" A pa thusawi dan mai mai chu'h! Ephraime thurúk hi a lo hre ve zawk em ni ang? Zoi ngaihtuahna a buai map mai. 

"Aw le.. Nia, i lo kal dawn nia" a ti ta ringawt a. Phone chu an dah a. A pa hian Ephraime nihna hre ta se, inneih a remti lo ngei ang a, mahse, a nunna in a tuar phah maithei thung. Ephriame hian a thuruk hretu te ka a hup ngei ngei ang tih a ring tlat a ni. A lo inngaihtuah tui deuh nge, "Zoi" rawn ti hrâwk a hriat rual chuan a inher zawk. Ephraime chu kekawrbul nen a lo ding to a. A taksa chu a huh hlap mai. A darpharh leh awm chu a mipa hliah hliah. 

"Koh i va hre thei lo ve.. Eng nge i ngaihtuah a" thinrim awrawl ni chuang lo hian a ti a. 

"Nia, ka thil siam hi ka lo tui leh lutuk a, hei a hmin ţep.. " Zoi chuan a mita en ngam lo chuan a ti niah niah a. Ali pawh a rawn lut ve, ani erawh a inhru hul tawh a ni maithei. Ephrame pawh intleng fai turin bathroom lam a pan a. A inbual zawhah lunch an ei a. 

"Zoi, innei ta ula, heta chen reng hi i duh dawn mi? " Ali chuan a ti a. Zoi a lai deuh. 

"Ka hre bik lo le.. Aizawlah mi in luah ngawt ai chuan a zia zawk tho ang chu" a ti ringawt a. 

Ephraime chuan, "I duh loh chuan Shillongah in ka nei ve alawm.. Ka nu nena kan chenna" a lo ti ve vat a. Ephraime chanchin a hre thui lo naa, Shillong lama chengkual a ni tih chu a hre ve reng. Mahse, a chhungkua, a nu leh pa leh thil dang dang erawh a hre thui lo khawp mai. A zawt ngam bik lo nen. 

"Kha lam kha chu Ephraime thu thu a ni mai" Zoi chuan nui sen sen chungin a ti a. Mipa pahnihte an insignal zauh. Ephraime chu a thinlung takin a lawm a ni. A nihna engkim hre vek chunga Zoi'n a hnar bik miah lo leh inneih sawi rik pawha a sawi buai ngai lo chu.. Nge tum dang a lo nei zawk? A nei a nih chuan, khawvel hmeichhiaah lem chang thiam ber a ni ngei ang. 

Zanriah pawh tui ti takin an kil ho leh a. Zanriah ei khamah Ali chu chhuak turin a insiam nghal. Ali chhuah hmain Ephraime chuan pindan rúkah Pu Liantawna a va bia a, "Khawiahmah chhuak hlek suh ang che. Inah i awm ngei tih hriatpuitu i neih a tha bawk ang" a ti a. A lo man thiam a ni ngei ang, "Aw le.. Chingfel la, ka thaw huai tawh ang chu" a rawn ti a. Chu zawng chu an thil sawi a ni. 

Ephraime chuan Zoliana number hmet chhuak lehin, "Hmannia hnathawk tur duh kha ka number pe rawh le" tiin. Zoliana lah chuan zawhna pawh nei bik lem lo vin, Pu Sapliana hnenah Amosa number chu a va pe ta a. Sapliana a lawm kher mai. A hmaa Zoliana'n Ephraime a zuk rawn khan khatiang boruak karah Zoliana hnena mi rawih tur zawngtu chu tu dang an nih a ring lo nghal a. Zoliana leh Sapliana te inhriat dan a lo ralkhat hriat sa bawk nen.. Sapliana a nih kha a ring nghal bur a, a lo ring dik chiah reng a. Sapliana chuan a rawn call ta chiah mai. 

"Hello" 

"Amos a ni em aw? Thil pawimawh taka biak che ka va duh ve" a rawn ti luam a. 

"Aw sawi la" 

"Zoliana tana i tihsak ang kha min tihsak ve la ka duh a ni. " a rawn ti a. 

"Tu nge target" Ephraime chuan a ti nghut a. 

"Ka sumdawnpui a nia, Pu Liantâwna a ni. A hming chauh chu i hre tawh ang ka ring. Tun hnai lawkah a fanu pawh a bo nghe nghe kha. Chuan, chu pa chu min chinfelsak hunah mi pakhat min chinfelsak leh bawk la, lawmman chu i tih zat zat a ni mai aw.. Ka lawm viau ang" a rawn ti bawrh bawrh a. Tu mipakhat tak maw ni ang ni.. 

"Zaninah tihfel nghal nise a that chu.. Ka rawn chhuak ang a, nang pawn min rawn hmu lawk ta che. A address leh a hun hman dan te ka hriat a ngai dawn a. Zanin dar 10-ah Zemabâwk daiah i lo kal dawn nia. A tha em? " Ephraime chuan a ti nghet charh a. Sapliana tan hnial ngam chi a ni lo. 

"Aw ka lo kal ang" a ti a. An inbiakna an titawp zui nghal. 

Ali melh pahin, "I tihfel hunah a phone i lo hawn mai dawn nia. Police lamin hmu lo law law se a tha mai. " a ti a. Ali a bu nghat. Sapliana nen an inhmuhna tur Ephraimea'n chiang takin a hrilh a. Ali pawn a ngaithla uluk khawp mai.. Hetih lai hian Zoi erawh study roomah lehkhabu chhiar tur a lo zawng ve mek a, a rilru chawl lo lutuk chu hahchawlhtir a chak ngawih ngawih a ni. Hun awl a ngah si a, a lo ngaihtuah leh ngawt ngawt thin.. 

"Hello, Jenny i mu tawh em? " Sangliana chuan a rawn ti lar lar a. An number hi a pa case la tu a nih vangin an inpe tawh sa hrim hrim a, biak erawh an inbe khat viau. 

Jenny chuan, "Mu nang, thu thar a awm em ni? " a ti a. 

"Awm chiah lo, mahse, awm tir dan ka hre maithei. Zomuansangi hian a number a lo thlak leh daih tawh sia, min lo pe mai teh a. A number" Sangliana chuan inringtawk zetin a ti a. 

"Teh daih a! Ani chu a pawimawh viau ani maw? Ka pa case chungchangah" lungawi vak lo hian a ti a. Zoi a tan lam ni loin Sangliana'n a pa case a ngaihsak lo deuh nia a hriat vang zawk a ni. 

"Aw pawimawh thawkhat.. Kawm ka duh a. A pasal chungchangah" a rawn ti ta a. Jenny a ding hluai, "Eng a?! Eng nge an pa chuan a tih a? A rinhlelhawm tihna em ni? " a ti ta mial mial a. A tiril a khur der der lehnghal. 

"Aw ka ringhlel a ni. Mahse, ka ringhlel tih pawh a hria. Mahse, fiahna ka hmu thei lo va, Zoi zawk hi chhimbudawi ka duh deuh a" a ti tlang râwt a. Jenny erawh chuan makti hmel a la pu reng. 

"Aw le.. Ka lo pe dawn che nia, whatsapp-ah aw" a ti hul hak a. An dah ta a. 

Sangliana'n Zoi number a neih takah chuan bul han tan mai dan tur a hre meuh lo. Mahse, Zoi chu Hmingzuala vanga a hmelhriat, inkawm ve bawrh bawrh thin an ni tho bawk a, va biak deuh thawr chu pawiin a hre lem lo. 

"Zomuan, Sangliana ka nia.. Kawm che ka duh khawp mai" tiin whatsapp atangin bul a tan ta tawp a. A la seen thei lo zui. 

Zan dar 10 rik nan minute tlem a la awm ang tihah Zemabawk daiah chuan Ali chu a ding vang tawh a. A sana a bih deuh sek mai. A thil tih tur chu a huphurh hran lo va, a lo tih than a nih avangin ngaiah a nei tawh. Engvanga thah ngai nge tih a ngaihven hek lo. Mahse, Ephraime khan Zoi pasal tura an hualsak pa a ni tih a hrilh thuak a. Kha ringawt pawh kha chhuanlam tha tak a tling thoin a hria. Zoi a ngaihtuah chhuah chuan a khi suk. Mizo nula hi a hmu ve ta nual a, Ephraime mit chu dikin a hria. Zoi kha hmel tha tawpthang tia sawi theih tur ni lo mah se; amahah khan thiltihtheihna riau, mi hneh theihna a awm tlat. An vawikhat inhmuhna atang ringawt pawn an innelin an inbe bawrh bawrh thei ania. A fing fel tih chu a vawikhat hmuhna atang pawh khan a hre thei nghal mai. A vawi thum nan cigaratte a tan leh chiah tihin a lam pana car lo tlan chu a hmu ta a. Ali hi chu bike-in a kal mai a. Ephraime car a hman chuan nakinah buaina a thlen an hlauh vang a ni. Car chu a ding dawt a. Zawi muangin Sapliana chu a rawn chhuak ta a. Ali pawh a rawn hmu ve nghal. A rawn pan ding nghal a. Motor veivak an la awm pheuh pheuh nain, an rawn chîk vak a rinawm loh. Kawngpui zau lai, kawngsir hnahthel tlakna laiah chuan an ding dun ran a. Sapliana chuan Ali chu a hmu chiang thei map lo lehnghal. 

"Liantawna chu ka tan mi hnawksak la ni thei tur number 1 a ni a, tin, tunah hian sumdawnna bansan a tum a. A chhan ka hre lo. A bansan hnua a ka a ân vaih chuan kei chu thi sa ka ni dawn tih erawh ka hria. Chuvang chuan dah that hi ka pawiti ta lo a ni" Sapliana chuan a ti nghut nghut a. Ali erawh a ngawi ran thung. Chet lak vata chinfel thuai a duh. Mizo tawng a thiam miau lo va, Sapliana thusawi zawng zawng chu engmah a hrethiam lo. Mahse, hrethiam awm tak chuan a bu ve nghauh nghauh tho. Motor an rawn tlan laklawh lo bawk a, muangchangin a kawnga a pai silai chu a phawrh zal zal a. Sapliana chuan a rawn melh phei ve chiah bawk. Ali chet dan chu mak a ti tih a lang. Ali chuan silai chu lekkawhin, "Sorry" a ti sup a. Sapliana mangang hamhaih zet chaldarah chuan silai mu chi a ving phei ta a, a puak ri a reh rualin Sapliana chu a tlu nghal thlawrh. A thi chiang em tih te a han endik leh te te a, chutah a taksa chu check lehin a phone chu a ak ta hmak a. A car pawh khawih tawh lem lo chuan bike-ah lawn kaiin chak zetin ramhnuai lam a pan ta nghal a. 

Ali rawn haw lai chuan Zoi chu a muhil siar siar tawh a. Ephraimea'n kawngka a va hawng a, Zoi erawh a mutchhuah deuh vangin a tho ve lem lo. Study rooma an inzui lut thawm a hria a. Zan a rei tawh bakah thawm vâng a awm lo bawk a. An ţawng ri pawh tlem tlem a hriat theih. 

"Ka chingfel e. Mahse, a car ka khawih lo" Ali chuan a ti a. 

"Khaw maw a phone chu" Ephraime chuan a ti a. 

An inpe aniang, an reh vang vang. 

"Naktukah chanchinthar kan chhiar dawn nia. Hahdam rawh. Muttui le Thianpa, ka lawm e" Ephraime chuan a ti sup a. A room lamah a kalsan ta a. Zoi chuan mawlhtu a nei ta chiah. Ali leh Ephraime chuan eng pawi nge an khawih a hre lo, tu nunna nge an lak a hre hek lo. Tualthattu bula zantin han mut chu engtin nge a theih tih a inhrethiam lo. A chhel vang ni loin loh theih loh vang zawkah a ngai tawp mai a ni. Ephraime bulah hian engkim a hria tih a sawi tawp mai dawn nge.. Sawi ta se, eng nge a hmachhawn ang a hre lo. A let thawk a, "A nih nih ni teh se" a ti rilru a. A muhil zui daih. 

"Sir, ruang chhar a ni" Constable chuan a ti a. Sangliana chu a ding hluai. Teh fo a a ti rilru a. A thin a rim takzet tawh a ni. Ruang chharna lamah an kal nghal a. A hmelhriat Pu Sapliana a la ni zui! A ngaihtuahnaah mi pahnih an rawn lang nghal. Liantawna leh Ephraime.. An ni pahnih bak hetiang thil ti tur a hre lo. An va chak dawn lo rua emm.. A ti nuah nuah a. Pu Sapliana thihna chuan Zoram a deng chhuak rang hle. Tun hnaia tualthahna thleng reng a ni bawk a. Mi nawlpui te chuan ngaiah an nei deuh titih emaw ni aw tih tur a ni. Mahse, Pu Sapliana chu Aizawl khawpuia pa lar ve pawl, a hausakzia tlang hriat a ni a. Uitu leh a thi ringawt mak ti an tam ngei mai. Lawmsanga pawn awmngaihna a hre lo a ni ber e. A pa hi a ngaisang a, a pa naute liau liau a ni thin. A pa thu chu a kawi a ngila zawm thin a ni a, tunah a innghahna ber chu rawng taka thah a ni ta si. A lainatawm angreng ngawt mai. Police lamin Lawmsanga te lam thu an han zawt a. Pi Teremi chuan an pa chu zantir atang khan a za deuh sek tih a sawi thei. Dar 9 bawr velah a mutsan a, "Chhuah lawk ka ngai, sumdawnna chungchangah" tiin a inkhalh chhuak a. Tu nge a hmuh dawn tih engmah a sawi lo. Chu a mi hmuh ngei chuan rawng takin a lo that tih a chiang reng mai. Police lam chu thinrim taktê in an thinrim tawh a ni. He tualthattu, chimawm leh ualau taka mi nunna la thin hi tu nge maw a nih chiah le.. Heti khawp hian mipui thlabarin a siam ta chu a nia. A hmai a uang ngawt ta ve ang. 

Pu Liantâwna te chhung pawn an lo hre ve vat a. A thaw huai mai. Ephraimea'n a hna a thawk a ni tih a hai lo. A langah erawh pawi ti awm zetin a lang thung. An nu nen Sapliana vuinaah an va kal ve nghe nghe. Thawk dun an ni miau a, kal ve tur an ni hrim hrim. Mahse, ruang vui zawhah call a dawng a, Police stationa kal tura kohna a ni. Mak a ti hran lo. An fanu leh fapate avang an chhungkaw hnih boruak hria an awm nual bawk nen. Mahse, inah a awm tih hriatpuitu an awm a, a zâm lem lo. An nu nen Police stationah chuan an va kal a. 

"In boruak kan hria a. Sapliana hian i fanu bo vanga mawhpuh chein i chungah eng emaw tih a tum a ni thei. Chu chu hlauthawngin nang hian i thahtir ta mai a ni thei em? " tih zawhna a dawn chuan, Confi zetin, "Hman zanah lawk pawh kan inhmu a. Buaina kan nei lo. Chhungkaw boruak leh sumdawnna kan kal kawptir ngai lo" a ti hmiah. 

"Nizanah khww nge i awm? " tih zawhna lah awlsam fèin, "Inah ka awm. Ka nupui leh faten min hriatpui bawk" a lo ti mai bawk a. Han nawr vak dawn se amah a ni ngei em tih hriat a ni bawk si lo. An kaltir leh ta phawt. Enthlak zui erawh a ni ang. Sangliana chuan Ephraime pawh a ko ngei ang le. 

Zoi'n Pu Sapliana thih thu a lo hriat chuan nizan lama Ephraime te thian dun inbiakna kha a hre chhuak nghal. Sapliana chu Alia'n a that tih chiang takin a hria a ni. Mahse, hria anga lan a hlau em em a, a inthup luatah a hah vek thei hial a ni. A pa nen an inbe zuai a, a pa hian Ephraime te thah a ni tih hre ta se, engtin tak ngai ang maw.. Inspector Sangliana lah khan a rawn be ringawt lehnghal. Jennyin a number a pek thu a la sawi zui a. He pa hian a veh kual tih a hria, Ephraime hnaihtu a nih vang a nih a ring bawk. Sapliana lo thi nen Sangliana chuan a rawn be leh rih tawh lo. Mahse, he thil inthup hi engtikah emaw hai lan a la ni ngei ang. 

"Sir, hei hian tualthahna thlen zan khan hmuh a nei a niawm e" Constable Ramdina chuan patling kum 48 bawr vel tur hi a rawn hruai a. Sangliana chuan thu turin a lo hrilh vat. 

"Eng nge i hmuh chu an sawi teh le" a ti dam dup a. 

Chu pa chuan, "Bungrua ka dah ka haw lamin ka hmu a. Kha mitthi ruang an chharna hmunah khan bike bulah tlangval pakhat sang lam, cher lam lek lek, vai hmel pu deuh hi a lo ding a. Meizial a zu bawk. Mi nghah nei hmel a pu bawk a. Kha pa kha tualthattu a ni thei mai ang em aw ka ti mai mai" a ti ta mial mial a. Hma an sawn ta hret e. Phur zetin Sangliana chuan, "A hmel i hmu chiang maw? Hmu leh ta la i la hre thei ang em? " a ti sawt sawt a. 

"Thei ang. Ka motor head light khan a chhun fuh em a. A rawn hawi lai tak a lo ni bawk nen" a lo ti ve mai a. 

Sangliana chuan Ephraime thla an lak rukna, a phone-a a dah ho chu hmuhtirin, "He pa hi a ni em? " a ti a. 

Chu pa chuan ngun zeta a en hnuah a lu a thing ta nur nur a, "Ni lo, an len zawng chu a inang ang. Mahse, he pa hi a ni lo" a ti ta mai a. Sangliana phur rukna chu a ral tial tial a ni ber e. Ephraime tur riakah a lo ngai hman tawh asin le.. 

Ali pawh Shillong zan tlanah a haw ve nghal daih a. Awlsam taka a tihtur a hlen avangin a lawm ru hle. Ephraime te an inkutsuih dawnah a chho ve leh ang chu.. Tunah chuan a inthiarfihlim rih a ngai tlat si a. 

"Zoi, i pasal a awm em? " Sangliana msg bawk. 

"Awm lo, huanah hna a thawk a" tiin a reply a. 

"Enteh, thu pawimawh tak sawi tur ka nei a ni. I bialpa kha ka ringhlel a ni. Ka chhui zel dawn a. Nang hian hriat ruk eng emaw i nei a nih chuan min hrilh turin ka ngen che a ni. Ka sawi awmzia i hria tiraw? " vawi thum a chhiar chhuak. Ephraime chu mi dang pawn an lo ringhlel tho a nih awm chu! A dinhmun a derthawng ta hle mai. 

"I sawi awmzia ka hre lo" tiin a reply tak naa.. Engkim a hre chiang lutuk tlat! Sangliana chu a buai nge a seen leh ta rih lo va. A pa call a dawng leh zui zat.. 

"Aw pa" 

"Ephraime a awm em? " a rawn ti a. 

"Awm lo.. Huanah hna a thawk.. "

"Enteh, Zoi, i bialpa kha tualthattu a nih kha. Tun hnaia mi panga nunna la tu a nih kha.. Min ring rawh. Engkim ka hre vek. Chuvang chuan a lak atang khan inthiarfihlim tum rawh" Pu Liantawna chu a insum thei ngang tawh lo a ni mahna le.. Zoi erawh a thaw hawk. 

"A va mak ve" a ti hul hak. A dara rawn khawihtu avangin a phu zawk.. A phone a la thlauh zui! Zaidam hmel zetin Ephraime chuan a lo melh kal a. A mitmeng chu zawhna hlirin a khat a ni ber e. 

"Ka.. Ih, ka pa nen kan inbia a" a ti bah nak a. 

"Ka hria.. I pa chu keiman nakinah ka bia ang" a ti zawi raih a. A mitmenga na tuar hmel zuk lang a mawle.. Eng vang tak ni ang maw? 

"Ephraime, Pu Sapliana kha… " a ti hman chauh tihin.. 

"Inspector Sangliana call la.. I pasal tur hi mantir rawh le" a ti vawt raih a. A mitmeng chu a thim tial tial a, Zoi'n a la hmuh ngai reng reng loh nunrawnna chu a rawn inlar chhuak ta a. Hlauin a kat dãwrh. Nui suk chungin a rawn pan ta a.. 

"Khawngaihin" a ti tham chhal. 

"Hei vang hian alawm ka nupui i nih a ngaih" a lo ti leh hmiah.. 

Zoi chuan khur dawt dawt chungin amah rawn pan chhat chhattu chu a melh ngawt ngawt a. 

(Buai ni a nia. A tam thei lo aw.