Escape 17

ESCAPE… (17)

Ziaktu: Toni Râlte

"Engvangin" Ephraime chuan a ti hrâwk a. 

"Jenny tan hun leh hmun ka lo kian ang e" Zoi chuan a lo ti sap. 

Ephraime chu a tawlhsawn hrat a. A khi suk bawk. 

"Jenny chu engtin? " ti el lek lek hian a ti a. 

Zoi a thinur ţeuh mai. "Min pal mai mai suh. Ka awm thei. Keimah ka nih chhung chuan" a ti nghek a. 

"Enteh, I thiantha ber a nih vang pawn ka hmaah inphelh ruak mah se; ka bawh lo vang" zaidam zetin Ephraime chuan a ti a. 

Zoi a lungawi zo chuang lo, thîk anga lan hreh si, thîk tho bawk si nun chu a la hman ngai loh vangin inthunun harsa a ti ngang mai. 

"En la.. Hei bak bak" tiin a phone chu a lek vâ a. Ephraime chuan a rawn thlek thuak, a nui ta hawk hawk a, "I thîk takzet a nih hi" a ti a. Zoi tlawmla bawk si chu a ţap lek lek tawh. 

"Ka thîk hlawl lo. I lakah hian thikthu ka nei chhete eih lo e" a ti hlaih hlaih a. Mahse, a hmel hmaiah thîkna bak a lang hauh si lo. Ephraime chuan a rawn kuah a, dam raihin a chul a. 

"Mizo hmeichhe zingah nang chiah hi ka la kawp. Chutah pawh ka la mutpui lo che.. Eng nge ka lak atang hian i duh? " a ti seuh seuh a. Zoi chuan a kuahna chu nuamti viau mah se, a induhtawkna sawmkhawmin, "Engmah ka duh lo. Mahse, min puih avangin ka lawm" a ti hap a. 

An inthlah hnuah kal a tum leh chu Ephraime chuan a pawt let dâwrh a. Tlema hriam deuh hian, "Kal la, khawnge i kal ang? Lawmsanga bulah maw? Eng lai pawha veha rukbo tumtu che hnaiha i awm hi ka phal i ring em ni? Awm mai mai teh" a ti ta bawrh bawrh a. Zoi pawn kal tak tak chu a tum ngam chuang lo. A lungawi lo a ni tih hre ve reng reng se a duh a ni ber. 

"Pa, tikhan kan awmtir ringawt ang maw? Kei chu ka tlawmngai mang e" Lawmsanga chuan a ti niah niah. Pu Sapliana chuan, "Lungngai suh. Ka chingfel em em ang. A pa saw kan chaw chah tur a nih saw. Ani saw dam reng lo se, Zomuani chuan min belh hun a nei em em ang. A nu saw a nuhrawn a nih saw" a ti a. A meng tur khai khai hle. 

"Pu Liantawna chu tu chuan nge dah tha ang a? " Lawmsanga chu a lungawi tehchiam lo a ang hle. 

"An awm mai ang. A tul chuan kei pawn ka hreh hleinem. Mahse, kan boruak inmúng hi rehin dai phawt teh se. Rinhlelh kan kai dawn si a" a ti khak khak a. A tumruh hmel kher mai. 

"A tha lawm. Mahse, a pa thihna pawn ko haw thei ta lo se, tin, kha mihring khan zui ve zel bawk se la.. Eng nge kan tih tak ang? " Lawnsanga chuan a pa chu a en hâ a. 

Sapliana chu a nui suk, "Kha pa kha a arpa chanlai a ni ve bawk ani kha.. Inngaizawng an nih ka ring lo. Zoi hi a pui mai chauh niin ka hria" a lo ti khauh a. 

"A nih chuan a awlsam dawn chu. Zomuani hian ka na tawrh te hi a la phur ngei tur a ni" Lawmsanga chuan a ti charh charh a. Ni e, tlangval pangngai, mi te chung en, duh duh nei thei, retheihna chu a hmelhriat ngai loh khawpa hausa an ni. Chu lai kara a nupui turin buaina a chawk chhuak fo chu buaina a tling dawn tlat a ni. A tan pawh a zahthlak tawpthang tawh. Chuvang chuan Zoi chu nuamsaa siam a tum lo bur tawp a ni. 

Pu Liantawna te chhungkua erawh Zoi tel lo leh rilru pangkhing ru tak chungin an khawsa ve naw naw a. A fanu in a um mek chu tualthattu a ni tih Pu Liantawna lahin sawi a tum bik hek lo. Amah Zoi erawh engtikah emaw la hrilh hriata engtin emaw tak Ephraime lak atanga lak chhuah a tum tho. Tun dinhmunah erawh a tan tihngaihna a awm rih lo a ni ber. La chhuakin a bulah chentir ngawt mah se; Pu Sapliana te pafa an tawrhhlelhawm dawn lutuk tlat. Chhiatna zakhua pawh a thleng thei.. Sapliana emaw Lawmsanga emaw hi chu he khawvel atanga an kalbo a ngai. Ephraime chuan a hna kha a thawhsak duh ang em? An inhre pawp laklawh naa, Zoi avang chauh pawhin a thawhsak duh mahna le.. Mahse, Ephraime sawi ang khan ama lam chu a fimkhur tho a ngai. Zaninah Sapliana nen an inhmachhawn ngei ang a, engtin pawn a lo ti thei.. A nunna hial pawh a hloh thei. A sumdawnna hi kalsan anga a lan a ngai tlat si a. A tira a tum dan tak phei kha chuan amah Sapliana chu amah ngeiin thah tawp mai kha a rilruk kha a nia. A rilru fim lo nu but khan inhmuh te kha a rawt tawp a nih kha. Mahse, a han fim tak hnuah chuan a thiltih chu a dik ber lo tih a hria, mahse, thulh leh ngawt chi a ni si lo. A tawng tawng tawng baw turin a kal mai aniang chu.. Sapliana rinhlelh kai lo thei ang bera a insawi te pawh a ngai ngei ang. 

Jenny pawh Zou huatna hlira khat chungin a hun a hmang mek chu a nia! A thiannu chuan a thlim angah a ngai tlat. Kha chen tette atanga inkawmin college thlengin an kal dun a. An nun thuruk leh mimal nun inhriatsak loh a hleih pawh an nei lo. Hmanni maiah Lawmsanga vangin a tlan bo a, khata tang khan Zoi chuan engmah a hrilh ta ngai lo kha a nia! Khatah khan Ephraime nen chuan intawngin engkim a thleng vek tawh niin a ngai. Chu chu Zoi pawn a bula sawi ve tur a nia sin. Restaurant-a Ephraime an hmuh te khan hre ngai lo awm tak khan an awm a. Engkim an lo inhre vek si. 

"Nuam zawng in sa dawn hauh lo. Jenny Laldampuii thiltihtheihzia in la hre khawp ang" tiin a inhrosa kuk kuk a. A thinlung takin Ephraime chu a la ngai ngawih ngawih tho. A laka polite chhuaha lunch a eipui te kha a tan chuan a kumkhaw sawi a tling ngei dawn a nih hi. An awmna hmun hi hria se zuk tlawha pal darh vek a duh takzet a ni. Lawmsanga number hmet chhuakin a dial nghal a. 

"Aw jenny" a rawn ti a. 

"Zomuani bialpa ka hre tawh" a va ti nghal tâwng. 

Lawmsanga lah chuan, "Ka hre daih tawh. Kan zuk hmu tawh alawm" a lo ti mai si. 

Thinrim zetin, "khawiah nge an awm a.. Ka hmu ve duh. Hetiang thil ka laka a zep avang hian hauh ka duh a ni. " a ti tân tân a. 

"Ramhnuaiah a bialpa inah.. I thiannu hi a lo mak khawp mai.. Ka ten teh mai ania" a lo ti hluk a. 

"Sawi lo mai teh. Ti nge i ngawih reng theih a? Police hnenah thlen ta che. Mi nupui hual lai a rukbo vangin a bialpa pawh dan hmanga hrem theih a nia sin" Jenny chuan Lawmsanga on te chu a hnehsawh tehmeuh mai. 

"Nia, mahse, police lam hian an ngaihsak vak lo. Inspector saw Zoi thianpa a nia, ani sawn a hmetmit niin ka hria. Bakah amah Zoi'n a duh thlanna a nih thu a sawi chuan tihtheih kan nei chuang lo a ni" Lawmsanga chuan a ti chuai raih a. 

"Lungngai suh. Ka awm alawm. I hman remchan veleh zu kal ila, keiman Zoi chu ka bia ang. A duh vanga zui pawh a ni lo thei. Mipa hian a vau te pawh a ni thei. " Jenny chuan a ti dat dat a. Lawmsanga'n a lo awih leh hram pek! 

"Aw le, kan kal dawn nia" tiin an inbiakna an titawp ta a. 

"Zomuansang, hre rawh.. I bialpa hi ka ta a la ni dawn khawp. Hmangaihnaah chuan thiang lo a awm lo ve" Chung lam melh chungin Jenny chuan a ti sap a. 

"Zoi, kan pahnih chauhin he tah kan awm a. Intihtauh khum lo teh ang. A khawharthlak em mai" Ephraime chuan Zoi bawkbawn chan lai chuan a rawn ti lut a. Chhuah chu a chhuak ta êm lo va, mahse, a be tawng zo lo thawthang a ni. Zanah pawh study roomah a riak lui ngat a. Ephraime tan tak pawh a hahthlak ve viau ang. Hmeichhe dang vang a la ni zui bawk nen. Jenny chet dan chu ţhing a tih rualin mak a ti deuh bawk. Chuti taka a lo duha a lo vei chu a ring hranpa lo a nia. A rin aiin a khirh zek a ni maithei. 

"Ka biak che chu" Zoi beng bulah a ti leh sup. 

Che chang chuang eih lo hian, "Jenny be rawh" a lo ti chang rât a. Ephraime nuih a za. 

"I lo thîk takzet a nih hi. Ka hmuin ka be tawh miah lo vang. Heti taka ka laka thikthu i neih hi ka la ring lo asin" a ti el kual a. Zoi sahuat a deng fuh ngang mai. A bawkbawn chan lai a dah rawk a, rum zeta melh chungin, "Ka thik awzawng lo. Nei sawmsarih mah la pawi ka ti lo. Mahse, ka thiannu tih hre reng chunga khatianga i awmpui thei kha ka ten che a ni mai" a ti hlaih hlaih a. Amah pawh chuan a chhungrilah, "Zoi, i thik reng kha" a inti tho. 

"Ka sawi tawh kha. Engtinmah kan awm lo. Kan awm lo ka tih chuan min awihsak ve la" zaidawh deuhin a lo ti a. 

"I pute bula hruai te kha eng nge a tulna? Kei pawh min hruai loh laiin, kei hi i hmei chauh em ni ka nih? " a lo ti leh hlawk hlawk. Ephraime insúm zo lo chuan a hnunglam atangin a zuk kuah a, a biang leh a biang chu insiktirin, a beng bul chètah, "Zaninah innei ang aw" a ti sur sur a. Zoi chuan za a ti si, a mur uai uai a. A tal aih aih bawk. 

"I duh hun hunah a inneih theih ngawt loh.. " a ti hlar a. A thinlung erawh a hriatthiam mang lohin a hlim ve ringawt! 

"A nih chuan naktukah i pa kan ko ang a. Pastor lo hruai se, kan inkutsuih thei mai ang chu.. " a lo ti awlsam èt a. Zoi chuan, "Mipa ho lah hi thil ngai awlsam thei si. Kal teh ka hmu ning che" a ti nghat a. A bawkbawn chan lai chu a chan zawm leh a. Ephraime erawh faifuk rut rut chungin chawhmeh bel a hawng lawr dan dan a. 

"Nupui eirawngbawl thiam ka nei hi ka vannei tak tak a ni" a ti kual vel a. Zoi run tawk a tling si, an inmelh leh nasa mang e. 

Dik tak chuan Ephraime nen engtin va awm lo mah se; hetia an han chen duna a nihna engkim a hriat hnu pawh hian Zoi innghahna a la ni tho. A nun a sima eizawnna dang a dap mai te a beisei a. Thi tawh chu thi tawh an nia tiin a inhnem tawp mai a ni. Hawin Ephraime chu kalsan ta se, an veng chhungah pawh a tan hawi zahna tham a ni ve tawh a. Pasal nei mai tur vawi hnih lai han tlanbo chu mi ten pangngai taka an biaka an kawm theih a ring lo. Hmun dangah awm dawn pawh nise, a ma pualin eizawnna a nei si lo va, pawisa a mamawh tho dawn si. Tin, mipa dang a suangtuah thei ngai reng reng lo chu a buaithlak tawh. Mipa dang lakah luangliamin a intatlut leh thei ang em tih chu a inzawhna a ni fo. Ephraime chu a va hmangaih hlur pawh a ni lo. Hetia ramhnuaia ralmuang taka awm hi a thlang rih zawk a ni. Mahse, a rilru kap kumkhua tur erawh Ephraime nihna chu a ni tho. Inneiin fate hial nei se, a hnuah a faten a pa nihna hre leh ta si se.. A damkhawchhuahpui zo ang em a hre lo. Ephraime chu an man a hlauh em em rualin, thawh lawka police biak mai te a tum ut ut lawi si! A chhungril nun insual nasa lutuk chuan a taksa thleng a nghawng hial tawh a. A bo tirh lai ai khan a cher kuam tawh zawk a ni. 

Zoi ang thoin Ephraime rilru pawh a buai ve tho. Pu Liantawna'n a lo hrechhuak ve leh zel bawk nen. Ani hi chuan a sawi chhuah ngam chu ring lo mah se; a fanu erawh chhanchhuah a tum ngei dawnin a hria a. Kaltir ta se, a hnuah inthahna te thlengin a tih ni miah loah pawh Zoi'n a rawn ringhlel nghal tur a ngaihtuah chuan, hrehawm a ti tawpkhawk a ni ber. Chutih laiin Pu Liantawna ngenna kha a hrereng bawk. Lawmsanga pa dah that kha. Hei hi chu Zoi tan pawh a la tih tho a la ngai maithei.. Mahse, tun tut tuta a chet chuan, Liantawna ten rinhlelh an kai a hlau si, tin, amah ngei pawh Sangliana khan a hre tawh si a. Zoi bialpa a ni tih thlengin. An tana hnawksak Sapliana dahthatuah a rawn kawk chat ve thei bawk. Fimkhur a ngai khawp ang le. A vei tuak sek a, a ngaihtuahna a hmang kal reng bawk. Zanriah ei hma deuhin a in piah phul hmunah a va vak rawlai a. Fimkhur takin phone a hmang ta a. A mi biak chu tu dang ni loin Ali a ni. 

 A dinhmun khirhzia leh rinhlelh a kai tawhzia te sawiin, a hna hmachhawp chu a thawhsak thei mai ang em tih a zawt a. Ali lahin Mizoram rawn kal a chak sakhai a. "Awlsam takin ka hlen ang" a lo ti then mai. Zoi chungchang an sawi dun bawk a. 

"A sawi chhuah chu ka ring chiah lo. Mahse, nula fing leh induhtawk tak a nih chuan i laka chet lak zel a duh vangin i bulah a la khawsa pawh a ni thei tho" Ali chuan a ti a. 

"Chu zawng ka ring chiah lo. Tunah chuan min nghenchhan a la ngai tlat a. Kei lo mi dang amah pui thei tur an awm hnai tlat lo bawk a. Ka kut atanga a tal chhuah erawh zawngin a ka chu a âng mahna le" Ephraime chuan a ti a. 

"Chu tak chu i bula i chentir reng nachhan tur a ni" Ali chuan a lo ti thung. 

"Ni e.. Ka bulah chauh a awm ang" Ephraime chuan a ti sup a. An dah ta a. Ni tla tur sen mawi em em chu thlirin, "Ka bula awm tura ka duh chhan erawh thil dang a ni" a ti leh nghut a. In lam panin a phei leh ta hnak hnak a. 

Zoi pawh tlemin a pangngai ta deuh. Zanriah ei lai chuan an titi ve thei ta a. Ephraimea'n inneih a hmanhmawh ta thut chuan a awm a tinuam tehchiam lo. A eizawnna a hria tih a hria ang a, a chelh tlat theih nan tiang hian a hmanhmawh a nih a ring lek lek. Han hnial dawn se a chhan a zawt ngei awm si a. Chhan dan thiam harsa a ti angreng hle. 

"Ka pa rawn ve phawt ila" a ti ta tawp anih kha. Ephraime pawh chuan, "Ni e, ka lo be dawn nia" a lo ti awlsam êt a. Ngam ni se zawng "I eizawnna hi thlak phawt rawh" a ti mai tur. A ngam chai bawk si lo. 

Zanriah ei khamah Ephraime chuan ph call a dawng a, roomah inkhar khipin a va bia a. Zoi erawh hector nen an inchhaih mai mai. Ephraime a rawn chhuah chuan, "Naktukah mikhual kan nei dawn a niawm e.. Ka thianpa" a ti a. A hlim hmel viau mai. 

Chutih lai tak chuan kawngka an rawn kik ta tlat. Zoi a phawk hrâ mai. Ephraime zawk chuan zaizirin study room lama kal turin a hrilh a, kawngka lam a pan nghal bawk. A rin loh deuh te a hmuh vang nge a makti hmel a thup hman bik lo. 

"I dam maw? Zothanpui" Jenny chu a nui sâng a. A bula ding Lawmsanga erawh a a tum bur thung. 

"Teh hlawl che u chuan, lo lut rawh u" tiin kawngka chu a hawng zau deuh a. A zan azana an rawn lang chu mak a ti ve hle. In chhung an luh chuan Jenny chu a hawi kual nasa mai. A rin aiin a pui tlat a tin ni. Thlam satliah mai maiah an awm dawn emaw a tih vang a ni mahna. Hahdam hmel zeta thut pah chuan, "Khaw nge in nu chu? " a ti nghat a. 

Ephraime chuan, Study room kawngka hawngin, "Zo, Jenny te an lo kal" a va ti sup a. Zoi a meng phar nasa ngang mai. He laiah eng tehchai nge an rawn tih dawn le.. Thil a kal thui ta mah mah niin a hria. Tawmîm reng chu a duh bik hauh lo. A tho tharh a, confi zetin a va chhuak ve ta ngat a. Lawmsanga nen an la ni zui! Jenny hian eng game tak khel ang maw.. 

"In va fel ve.. Zan zanah te min rawn tlawh a" nui sâng hian a ti a. Indona chu a inţan ta chiah mai. 

"Nia, Lawmsanga hian 'Zu hmu teh ang. Ka ngai riau' a tia. Ka rawn kalpui alawm.. Zothanpuia hi i pasal a ni tih ka hriatna a la rei lo bawk nen.. Thil hi a lo mak em a. Ka rawn kal tawp mai a ni" Jenny chuan a ti sak sak a. 

"Surprise che u kan tum tehreng nen.. Kha police mawl zet khan a ti flop ta vek sia. A zia lo tak tak a ni.. "Ephraime chuan a lo ti zauh a. 

Lawmsanga erawh thuthmunah a inhumruh ve vak vak ringawt. Thawh lawka Ephraime chu va rehhlum hial a nâp a. Mahse, kuttum hmang chuan a hneh dawn lo tih a hai bik lo. Jenny chuan, "Hei in pawh in neih nawm hi le.. Mahse, he lai teh daiha in awm hi chu a tha ka ti vak lo. Thil eng emaw ti ru thin te pawh in ang dawn alawm" mei nei zet hian a ti leh a. 

"Nia, Ephraime hian khawpui thawm bengchheng a ngaithei lo va, weekend te chu kan rawn hmang zawk zawk tho ang. Tak ana, kar tharah hetah Pastor ho va inkutsuih ve hrim hrim kan tum a. Ka bula i din a ngai dawn ania.. I duh leh i kawrfual duh ber i ha dawn nia" Zoi chuan zangkhai zet hian a ti ve hmak hmak a. 

Jenny lah chu a chimawm thiam bawk, "Ehe! In la innei na nge? Inruk tawh ber te chuan Pastor hmaa intiam leh kher a ngai dawn mi? In tlin tawh awm der si lo va, lan that tumna mai mai a ni em lo maw? " a ti lar lar a., Zoi a nui tawp. Chutiang em ema Jenny danglam thei chu mak a ti. 

Ephraime zawk chuan, "I hre sual liau liau a nih chu. Kan inkutsuih hma chuan i thiannu hian khum khata mut dun pawh a duh bau lo. Hei vang hian alawm pasal a neih dawn pawha ka ruk chhuah. Nula thianghlim ngat ka nei tur hi ka lawm teh asin" a lo ti ve hmiah mai. Jenny a dang ta der mai. Ephramean a chhan kual vel chu tihtheih nei si lovin rilru na takin a thlir tawp mai a ni. Lawmsanga lah sawi tur hre hek lo. 

"I lo kal ngam pawh ka ring tawh lo a nia. Kei ni ila, ka nupui turin tlangval dang um se, ka va tlawh zut lo dawn chiang tak. Ka intithangtlawm duh lo" Ephraimean a ti hial nghe nghe. 

Lawmsanga lah a lo rui ve deuh bawk nen, "Ve a che. Zomuani hi ka lak atangin i ru bo tih hre reng rawh. I ruk chhuah dan pawh hi a duhthlanna tel miah lo a nih ka ring. I vau te hi a ni lo maw? " a lo ti bawrh bawrh a. Jenny'in a va mitmei a, a hrethiam der si lo. 

Ephraime chu a nui hawk hawk a, Zoi chuan din pahin, "Inleng zahawm tak neih manah thingpui tui tawk kan lum ange.. " tih leh choka lam pan a rual nghal. Lawmsanga chuan zui a lo tum ve ngawt bawk. Mahse, Ephraime a che rang kher mai. A bana va chelh sakin a mitah chiang takin a melh a. 

"Ti lo zawk la a that ka ring" a ti hniam raih a. A hlauhawm thawkhat hle ang tih a hriat reng mai. Jenny pawh chuan, "Ni e, thu ve mai mai teh" a lo ti hlak a. Lawmsanga a thu leh hnu hnu. Zoi hian a duh ngang lo a ni tih hre tho mah se, a chapona hian a lakkawihtir zel a, amah leh amah a intitlawm mai mai zel a ni. 

Zoi pawh kar loah thingpui nen a rawn inchawi phei a. 

"In r'u, in lo kal vang vang sia, zanriah ei turin in lo la kal dawn nia" a ti sar sar a. A nui var var bawk. Jenny tan chuan ngeiawm a tling khawp ang le.. 

"Nia, kan lo la ei ang.. " a ti tawi tâk a. 

Ephraime ta pek chuan, "In pahnih hian innei ve daih ula, in inhmeh riau" a lo ti a. Jenny a rum nghat. A meng râng ngang mai. Lawmsanga erawh a khi suk. Engvanga nui ringawt nge a nih amah pawn a inhre lo. 

Thingpui te an inzawha Jenny thusawi ho deuh deuh an ngaihthlak zawhah ţin zai an rel ve ta a. Leng fo tura inchahin an invai liam a. An leng fo kher ang e maw le. 

"Engvang ringawt chuan maw bansan i duh? " Sapliana aw chu a zawi reih rawih viau. 

Liantawna chuan a chil lem khawlhin, "Ka fanu vangin" a ti hul hak a. 

"Zomuansangi leh kan sumdawnnain eng nge inzawmna a neih? Ka thachhang dawltu ber i ni a, a hlawhzia hretu pawh i ni. Heti maia chawlhsan ka remti lo" Sapliana chuan a ti khawl khawl a. Liantawna danglam ta riau chu a ni mi mawl ni ta bik lo chuan a hai hlek lo va. Eng emaw inphumru a awm ngei erawh a ring. 

"Tikhawp hian ka fanuin min timualpho a, nang thlengin a timualpho che a. Chuta kara thawh dun chu ka zah theih lohna hian a tlin tawh ngang lo a ni e" Liantawna chuan a ti a. 

"Chu chu a chhan dik tak a ni em tih kan hre zel ang chu" Sapliana mitmeng chu a hlauhawm sawt riau. Rawn pan hnaiin, "I makpa, i fanuin a um khu i hmu ve reng reng tawh em? " fiah zet hian a ti a. 

Pu Liantawna chuan a chhungril khur der der chu hai der luiin, "Hmu hauh lo mai" a ti satliah a. A kut erawh hmuh theih loh lamah a humruh nasa hle. 

"Eng mi nge a nih pawh hre lovin i fanu chu a bulah i la awmtir tlat lawi sia! An awmna i hre tawh a. Zuk lakchhuaha pawh then tumna i nei miah lo hi kei chuan mak ka lo ti daih tawh asin" a rawn ti su su a. Liantawna a chhing sawk. 

"Zomuansangi nen inzawmna kan nei tawh lo" a ti tham ţuak a. 

Sapliana chu a nui hul hak.. "Takzet maw? Chutiang a nihte chuan Zomuansangi aiawh tur kan zawn a ngai a nih chu.. Fanu pahnih i la nei a.. " a tih mek laiin, Pu Liantawna chuan, "Eng a?! Eng nge a awmzia? " a lo ti tuar a. 

"Enteh, Liana, nang leh keia inzawmna hi a thuk tawh lutuk a, thuruk tam tak kan inhriatsak tawn bawk. Chuvang chuan kal hrang thei kan ni lo tih i hria.. Tuna buaina kan tawh mek laia kal hran i duhna chhan hi ka hriat ngei a ngai" a ti chang fak fak a. 

Liantawna chuan, "Ka sawi tawh kha.. Zomuani vang ka tih kha. Chuti taka kal hran i duh loh chuan ka kal lui lo ang a a ni mai lawm" a ti ta a. Sapliana a khi vur vur mai. Ni e, He Liantawna hian a fanu leh a makpa chungchang hi ril tak a hre ngei ngei ang. Tun ataka sumdawnna bansan a duh chhan hi eng emaw hriat lawk emaw hmuh lawk emaw a nei pawh a ni thei. Liantawna a ban chuan nasa takin a sumdawnna a heu dawn tih a hre kur, engkima a hmatawnga a tirh, a hmingchhe tur inphen nan bera a hman, man pawh tawk se la, a tawrh ai tuar tur a ban daih chuan nuamti takin a sumdawng thei tawh nang. Tin, Liantawna hmel a han en hian, a fanu nen inzawmna nei tawh lo anga a insawi chu awih harsa a ti. An inzawm ruk reng vang zawk a nih a ring bur mai a ni. 

An chhuah dawnah, "E taka! Liana, Tu emaw dah that duh ta ila, rawih tur i hre lo maw? " a ti hluai a. Liantawna a ding chat, "Tu nge dah that i duh? " a ti ro hak a. 

"Tu emaw a ni mai. Rawih tur chu i hria em? " a rawn ti a. 

"Hria ni ila kei pawn dah that duh ka nei alawm" a lo ti pangngai a. 

"Mahse, Kha Zaihmingliana thihna kha a pangngai lo hle tih kan hria a ni lawm ni? Zaia khan that tur chein mi a ruai tih te pawh kan hria a ni lawm ni? Tichuan, chumi hnuah Zaia zawk a thi a… " awmze nei zetin a ti a. 

"Ka tih a ni lo. " a lo ti hmak. 

An chhuak ta a. An rilru erawh inang lo tak a ni. 

Ephraime hmai chu thisen hlirin a khat a, Hmingzuala chuan a pheikhawk rih hmel zet chuan a chhuih char char bawk. Tihtheih nei si loin a lo thlir tlawk tlawk a, Hmingzuala chuan chemte hriam tak phawrhin Ephraime nghawngah chuan a tintuah a. Chutah zet chuan insûm zo loin, "Ti lul suh.. Khawngaihin" tiin a au tuar a. A harh nghal hlawl bawk. Thlanin a lo bual huh vek lehnghal. A thaw hawk a, a bula mu Ephraime chuan rawn kuahin, "Mangchhia a ni maw? A tha vek e. Engkim a tha aw" tiin a hnem mawlh mawlh a. 

"Ih, ka cousin Hmingzuala khan thah che a lo tum a" a ti tham chhal a. Ephraime chuan nghet zetin a lo kuah. A lungphu rang lutuk pawh a zia awm chho ve mai. An mut leh hnuah, "Tichuan, i lo hlauthawng lutuk em ni? " tiin Ephraime chuan a va melh a. 

Dâwt a sawi thei lo. A lo bu nghat a. Mitmeng tak lutuka inmelh tawn reng chungin a rawn hnaih hret hret a, a hmuiah chuan a rawn fawp ta a. A lo maimichhing tawp..